|
Ve amwe muminukilyo woo ukethiwa AVUNGWA iiani ya MWAKI nundu nimaleile uw’o nundu wa kwendeewa ni uvoo museo ungi ula ute waw’o wa “kwendeesya andu” ula uutavanwa ni atavanya aingi umunthi. Mundu umwe wa muika anangulilye kyumwa kithelu “Ikanisa yakwa yimanyiasya ituni nitonya kuendwa ni mundu wonthe ona ethiwa eisila nzia yiva ethiwe ni Yesu, Budha, Alah… Ithyonthe twithukuma Ngai oumwe… We ndukwona umanyisyo ta usu ti museo na niwa kukwasya? UNDU USU NDUTONYEKA! Ngai atwiie ti ala “Mosuanio moo matheke” indi ni “NZIA NTHEKE”: “Votai inyw’i nthini wa mbingilo ila ntheke: nundu mbingilo ni nthanthau, na nzia ni mbaamu, ila ieletwe wanangikoni nao ni aingi ala mavotelaa mbingiloni isu. Nundu mbingilo ni ntheke, na nzia ni nziiie, ila ielete thayuni, nao ni avuthu ala mamyonaa”. Mathayo 7:13-14  Ngai nuvatanite kuthaitha NGAI INGI: “Ndukethiwe na ngai ingi ate o nyie.” Kuma 20:3 “Na maundu onthe ala nimwiite masisyei: na mutikawete syitwa ya ngai ingi, o na yitikew’ike yikyuma kanyw’ani waku.” Kuma 23:13 “Nikwithiwa we, ndukaathaithe ngai ingi ona yiva: nundu Yeova, ula witawa Wi-ki-wiu, ni Ngai wi kiwiu.” Kuma 34:14 : WIKWATYO WITU WA TENE NA TENE wa utangiio ni MUTHEKE nundu Yesu Klisto aisye uu. No kwisila vala ve YESU KLISTO vala mundu utonya KWONA THAYU UTATHELA: “Nundu vai mundu utonya kwambililya wambililyo ungi ateo o ula wambililw’e, naw’o ni Yesu Klisto.” 1 Akolintho 3:11 “Na thayu utathela niw’o uu, ni kana makumanye we Ngai ula wa w’o weka, n aula wamutumie, naki ni Yesu Klisto.” Yoana 17:3 "Yesu amwia, Nyie ninyie nzia, na ninyie w’o, na ninyie thayu: vai mundu ukaa kwaAsa, atesile kwakwa." - Yoana 14:6 Ethiwa Ikanisa yaku yimanyithasya utangiio kwa nzia ingi eka Yesu, ni ukulya kwa ndaia wivetangane vyu na umanyisyo usu wa UVUNGU mbee wa utanaselewa. Mantha mbivilia ya utianio mweu na uisisya ikanisa yila yimanyiasya w’o wa MBIVILIA YI YOKA na ti momanyisyo ma andu. Kuatiia o nzia tu eka YESU KLISTO muthya waku ni thinani wa tene na tene. |