Ateso - Uganda
TITO
1
1Paul, ebulesit loka Edeke, ekiyakia da loka Yesu Kristo aisilosikinia aiyuun naka luseuna luka Edeke ka ajenunikec naka abeit kiton ayoŋit Edeke, 2kotoma amun naka aijar naka ikar kere, naabu Edeke, lomam iŋalai, kisumun eriŋa apakio nuka ikar, 3 konye kapakike abu kitodia akekirot kotoma alimonokin nakejokokinio kwape ejaar aicorakinet naka Eketajaraniwok Edeke: 4 Mama ejai Tito ikakoku obe kotoma aiyuun nakimorit:
Asianut ka ainapakin nuepote kama ejai Edeke Papa, ka Kristo Yesu da Eketajaraniwok.5 Kanuka nu ŋes kenyeinia jo koKurete, tetere iteteni nuideuna, kodakak da imakio kaŋolire kwape kecorakinia jo, 6 arai ejai loemamei aitoronet, ekiliokit loka aberu adiopet, loiyuunito ikedwe, komam iwosatai ebe eraas luka iponesio lutai, ka luetumaaka. 7 Naarai ibusakinit ekaanyanaran araut loemamei aitoronet, kwape ekeŋadan loka Edeke; mere loisiyalamikina bon, mere loenyunyurana, lomam emer, lomam ibuŋai, lomam iŋobelei apesan, 8konye loisukunyikini ipejok, loemina ajokis, loecoit, loedolit, lokalaunan, loitikokina da; 9 loericit akirot naka aiyuun kwape ejaar aisisianakin, tetere epedori aicor kotoma aisisianakin naka aijar, bobo da aitoron luirebirebete. 10Naarai ejaas luetumaaka luipu, luinerasi aamameak, ka luiŋalas da, aitelekarit lueraas luekepitai. 11Ibusakinit aisililiŋ kes, naarai itotolikinete ituŋa kere lukokalia, isisianakinete numam ibusakinit kes aisisianakin, kanuka ameda nakileic. 12Abu ediopet kakesi, enabikec kikulepek, kobala ebe, “Eraas Ikureton ikeŋalak apaarasia kere, itiaŋ lueroko, ikeraŋak lueloŋwaka.” 13 Aitejenunet ŋin erai nakabeit da, Kanuka ŋun kitoron kes kadedeŋ, tetere eŋaleete kotoma aiyuun, 14 kinyeis acoit awaragasia nutai nuka Iyudayan, ka aicorakineta da nuka ituŋa luepaarete ainyein abeit. 15 Elaete iboro kere mama ejaas luelaete. Konye emamei ibore yenelai mama ejaas luemunaara ka lumam iyuunito; konye emunaara do adamakec ka aomisiokec da. 16 Elimorete ebe ejenete Edeke, konye eŋerito ŋes kaswamisiokec; eraas luesacitai, luiulaka, luegiritoi da kaŋiniswam kere naejok.
2
1 Konye jo, kiner nuibusakinito aisisianakin naka aijar. 2 Koraas imakio luitikokina, luiyapaara, luecoito, lueŋaleete kotoma aiyuun, ka amin, ka atitiŋikin da. 3 Kwape kwaŋin da koraas amakio nukejautene lokayoŋit, mere akasabak, karaida abulesin nuka ajon nuipu; konye nuisisianakinete nuejok, 4tetere ituutoorete akatumunak araut nueminasi ikiliokokec, ka nueminasi ikecedwe da, 5 koraas nuecoito, nuesegara, nuiswamaete ore, nuejok, nuenonokikinito ikiliokokec, kinyek akirot naka Edeke ainyanakinio. 6Kwape kwaŋin, kicor ikatumunak acoit. 7 Kakiro kere kitoduun korai aanyunet naka aswamisio nuejok, kotoma aisisianakin kitoduun korai lomam imunaara, loiyapaara, 8 kakiro nueŋaleete lomam itoronio, tetere isurumio ekapegan ileic, komamei ŋes akirot naerono einer asurokinia oni. 9 Kicor ibulesin kononokikis ikecejaka kakiro kere, koraut luitojokete, mere luirebirebete, 10 mere luelemelemaka iboro, konye kitodiasi kamunonut kere naejok, tetere isirete aisisianakin naka Eketajaraniwok Edeke kakiro kere. 11Naarai atakanu asianut naka Edeke einunit ituŋa kere aitajario, 12 kituutoori oni ebe, kaŋeroto amamus ayoŋit Edeke, ka aiŋobel naka akwapin, kajarata kacoit, ka adolit, ka ayoŋit da Edeke, kotoma okar luka kwana, 13 kedareto noi amun nakarereŋ naka atakan nakaibuses naka Edeke lokapolon ka Eketajaraniwok Yesu Kristo, 14 loabu koinakin bon kanuwok, tetere kilakuni oni kama kepali kere, ka aitalaun kanukeŋ ituŋake obe, luekokakinito aswamisio nuejok. 15 Kiner ŋun, kicor da, kitoron da kapolou kere. Kinyek idiotuŋanan aimen jo.
3
1 Kisiitu kes anonokikin ikayaitok ka lukapolou da, korimasi, kitemokino kaŋiniswam kere naejok, 2 kinyeis amoromor idiotuŋanan, kinyeis da aŋolopamit, luiyapaara, kitodikis ituŋa kere aiyapepera kere. 3 Naarai kirai kolo oni da lukibaŋaaka, lukiulaka, lukiŋala, ibulesin luka aiŋobel ka nuisiyalamikinete nukiponesio luipu, ketorito kotoma ameŋeranut ka ekokote, lukilaitai, lukilait luce; 4 konye naketakanunia asianut ka amin naka Eketajaraniwok Edeke, 5 abu kitajar oni, mere kanuka aswamisio nukiswamat kadolit, dimarai kwape ejaar akeitim, kanuka ailotario naka aurio nakiareit ka aisiteteunio naka Emoyo Lokalaunan, 6 nakibukok akwamakin oni kanuka Yesu Kristo Eketajaraniwok, 7 tetere kitojokio araut lukidolit kanuka akesianut, karaut da ikerumak kwape ejaar amun naka aijar naka ikar kere. 8Namunot akirot ŋin. Akoto jo aitogogoŋ akiro ŋun, tetere luapotu kiyuut Edeke ibwaikinito itauonokec aigaŋ aswamisio nuejok; eraas ŋun nuejok ido nueinunete ituŋa ajokis. 9 Konye kinac ipegeta lukabaŋaanut, ka iitabon luka aur ka aŋolopa ka ijiisio luka ikisila, naarai eraas lumam ajokis ka lutai da. 10 Koŋer ituŋanan yenekot agitara, kidau aikwenyar irwan atipet ka nakiareit, 11 ijeni ebe yenikoni nen erii, adiak da, itetelekara bon. 12 Nakejukakinia jo Aretemo arai Tukiko, kokukunyuun abunore mamakaŋ Nikopoli, naarai alosikinit aiboi nen adaun apaarasia nuka aaterot. 13 Kokukunyikin aitwar ejok Sena ericakisila, ka Apolo; tetere mam etwakiarete ibore. 14 Konye kisisiaut luwok aigaŋ aswamisio nuejok kiton aijaikin luipudasi, tetere mam eraas luemameete araito. 15 Kiyogaete jo kere luejaas keoŋ, Kiyoga ŋul lukiminasi oni kotoma aiyuun.
Asianut kojai kayes kere,
|