Ekosio


1

1 Ekosio loitelekarit ikososinei, ŋes loka Solomon. 2Mere cama kanu ŋesi eoŋ kanueta nuka aitukuke! Naarai aminakon itelekarit ebino kajokis. 3 Eurok sa akinyetakon nukiledis; Esubit ekonikiror bala akinyet naebukoritai; Ŋes kiminatatar apesur. 4 Kiriunai; kikeri isio da kitupit jo: Kayaŋ au ekabaka toma agolaike. Kiyalamikini kalakaros kotomakon, Kitatamenenei aminakon aitelekarit ebino: Kiminasi jo kadolit. 5Enono eoŋ, konye etemelel, Yes apesur nuka Yerusalem, Kwape iweman luka Kedar, Kwape aigalisio nuka Solomon. 6Sirikisesenete eoŋ, naarai awasar, Naarai kapeit akoloŋ. Kesiopakis odwe luka totoka, Ketaraut akedaran imanikoria luka emusabibu; Konye mam abu kedar emanikorika loka emusabibu. 7 Wu jo loemina ekatau, kolimokinai, Neitadakenenei esipanikon, Naisiuriakenenea kidiŋ paaran: Naarai kanukinyo tikaraunor naerimi Kaneejaas isipanin luka ipaupakon? 8Arai mam ijeni, ijo naitelekarit aŋor kere katemelel, Koloma kibwap akejen nuka esipanikon loka amerekekin, Kitadak ikaleikon neejaas iweman luka ikecokok. 9 Wu jo naminataka, ketiriani jo Kabalasit naka agalin nuka Parao. 10 Ibusak iitinyokon kaicipeta nuka itim, Ekonimurisiŋ da kaunoi nuka iboro luka akais nuipu. 11Kiswamakini jo aicipeta nuka esabu Nueropanakinio kepuesa. 12Nakiboio ekabaka kariri naka emesake, Kouru sa akakinyet nakesai. 13Lominataka esubit bala eriagi loka emina, Loenapakinitai kidiŋ kikisinaka. 14Lominataka esubit bala aibuŋet naka aturo nuka koper, Komanikoria luka emusabibu luka En-gedi. 15 Koany, itemelel, ijo naminataka; koany, itemelel: Ijaas kakonye nuka ajele. 16Koany, itemelel, lominataka, eebo, kesiyalamikinit: Imeloikinit etutiwok. 17Akito nuka etogowok kes iresia, Nuiriikino da iberosin.



2

1Arai eoŋ aturot naka Saron, Apecel naka aditon. 2Kwape apecel kotoma okukwa, Ikoni nen naminataka kotoma apesur. 3 Kwape kelamai kokito lukomanikor, Ikoni nen lominataka kotoma otelepai. Abu keboikini kotolimike kaiyalama naepol, Kojijimikis araitoke aanyigolika. 4Kayaŋau togo lokepucit, Emederake kokuiukan ŋes amin. 5Kigaŋai kimusabibun lucokito, kitalakarai kalam: Naarai ketedek amin. 6 Kojai akekan nakokediany akouka, Katunite kakekan nakoteten. 7Kesiyapoi yes, wu apesur nuka Yerusalem, Kalimit amorio, ka amiameik nuka ais, Kinyeis aisidik arai aitwekenyun amin, Aitodol neakotokinor. 8 Eporoto loka lominataka! Koany, ebunit, Etaci koroŋan, icuro koukon. 9Esubit lominataka bala amori arai amiam nadidi: Koany, ebwoi kokau karwatatakosi, Eseseni kotoma adirisan, Ireonokini kapedon. 10Kiner lominataka, katema atiar, “Konyou, naminataka, atemeleka, kaloto. 11Naarai koany, atubor aiporo, Adaun akiru, alot; 12Atakanut aturo kakwap; Adolut apaarasia nueyeioto akweny, Epupunio eporoto loka adudumer kakwapuwok; 13Itokoni etini araitoke, Ituroete imusabibun, Euruuni asakatakec. Konyou, naminataka, atemeleka, kaloto. 14 Wu ajeleka, naejai toma acilana nuka atiiba, Toma aŋopis naka aibois naimukurur, Kaany ma akonyenekon, kapup eporotokon; Naarai ejok ekoniporoto, akonikonyen da nuitemelelas. 15 Kikamakinai ikuei, ikuei ludidik luemunaunete imanikoria luka emusabibu: Naarai ituroete imanikoriawok.” 16 Lominataka ŋes lokaŋ, eoŋ da nakeŋ: Itadakenenei esipanike neejaas apecelun. 17 Aitodol naeriripio apaaran, ilicaros itolimo, Kibelokin, lominataka, koput kwape amori arai amiam nadidi Koroŋan luka Beter.



3

1 Kuare, kaperitika, abu kamoote ŋol loemina ekatau: Amoot ŋes, konye mam abu kadum. 2Kener atiar, “Mere kanyou do, kerimirim toma ore, Toma orotin, kaiboisio da nuelalak, Amoi ŋol loemina ekatau.” Abu kamoote ŋes, konye mam abu kadum. 3 Apotu ikedarak luirimirimete roma ore kadumut: Kasodi atemar atiar, “Ianyunito gwai ŋol loemina ekatau?” 4 Nediokasilon katubor, Kadum ŋol loemina ekatau: Kekam ŋes, komam aosikini ŋes, Aitodol neayanaunia togo loka totoka, Agola naka ŋin nakauriei. 5 Kesiyapoi yes, wu apesur nuka Yerusalem, Kalimit amorio, ka amiameik nuka ais, Kinyeis aisidik, arai aitwekenyun amin, Aitodol neakotokinor. 6 Inyo bo ŋin yenebuni kamodiŋ esubit bala ipirino luka apuru, Yenituwuritoi sa kemina ka lukisupurununo, Ka ikee kere luka ekagwelanaran? 7Koany, ŋes eitada loka Solomon; Kolukunito lukirigin akaisakanykape, Lukokirigin luka Isirael. 8Kere kitiŋito ikileŋa, koraas lukacoa aitiji: ŋolituŋ anaŋ koenit ekekileŋ otul, Kanuka etasuro kuare. 9Kiswamau ekabaka Solomon agali Naka akito nuka Lebanon. 10 Kiswamau ipirinoke kepuesa, Kwapuke da esabu, eicoloŋoke lomuge, Kiladatete kidiŋike kamin Naka apesur nuka Yerusalem. 11 Kolomasi, yes apesur nuka Sion, koanyut ekabaka Solomon, Enapit aboko naedokokini totoke kapaaran naka adukokinike, Kapaaran da nakelelia eketau



4

1 Koany, itemelel, naminataka; koany, itemelel; Ijaas kakonye nuka ajele kotoma aimukisikon: Esubito itimakon bala esipan loka akinei Nueperete neejululue moru Gilead. 2 Esubito ikelakon bala esipan loka amerekekin nuetubio ajul Nuepote kailosio; ŋinidiopet kakesi imuunit imwatok. Komamei kakesi naetwaniarit. 3Esubit aitukukon bala eusi Lokareŋan, Itemelel da akoniituk: Esubit ereetekon bala atutubet naka ekamamaga Kotoma aimukisikon. 4 Esubit ekonimurisiŋ bala etogo loeoja loka Daudi Lokedukitoi aiŋadanakin lujiis, Loekajakinitai iupalia elukumit, Ibukui kere luka lukirigin. 5 Esubito ikisinakon luarei bala ikalei iarei lumwatok luka amori, Luedakas neejaas apecelun. 6Aitodol naeriripio apaaran, ilicaros itolimo, Alosi oroŋat loka emina, Oukot da loka lukisupurununo. 7 Itemelel cut, naminataka; Emamei akemer kotomakon. 8 Bia kauparos anyoun koLebanon, ateranika, Kauparos anyoun koLebanon: Kosesen kaidi naka Amana, Kaidi naka Senir ka Kerumon, Kabuai nuka iŋatunyo, Koroŋan luka irisai. 9 Inomo ekatau, inacika, ateranika; Inomo ekatau kanoliar naka akonyekon. Kerikot ediopet lokomurisinikon. 10Ejok ca ma aminakon, inacika, ateranika! Itelekarit ca ma aminakon ebino! Aures da naka akinyetakon itelekarito ca luesaete Lukiponesio kere lukaures naejok. 11 Aitukukon, wu ateranika, eisi kwape kakape nuka ao: Esik ka akile ejaas kwap kanajepekon; Aures da naka inapenekon esubit bala aures naka Lebanon. 12 Inacika, ateranika, ŋes emanikor loebwaitai; Akoŋu naka akipi nairwasitai, atan naipucuc. 13Alibetakon kes emanikor loka akamamagan, loejai araito nuka akais nuipu; Koper, ka iraan lukesai. 14Lukesai ka saparon, Akalamus ka akinomon, ka ikito kere lukisupurununo; Emina ka icicikwa, ka lueuru ma kere luitelekarito ajokis. 15 Irai ijo atan naka imanikoria, Ecoa loka akipi nukajarak, Ido aguuruto nueleleete anyoun koLebanon. 16 Kokweny, ijo ekwam loka agolitomei, Kobia da, Ijo loka eŋalakimak; Kokutak omanikorika, kokut auresike. Kolom lominataka omanikorike, Konyam akeraito nuka akais nuipu.



5

1 Alomuni eoŋ omanikorika, inacika, ateranika: Adeni eminaka ka lueuru ma; Anyami akapeka nuka ao kesikeka; Amasi ebinoka kakileka, Konyama yesi, ipaperoka; Komata, eebo, komata noi, luminanaka. 2 Abu kajotor, konye abu ekatau kokwenyi: Ŋes eporoto loka lominataka loikuŋikuŋi, kobala ebe, “Koŋ aarai, inacika, ateranika, ajeleka, aliogotoka; Naarai epalal akakou akopyo, Itimaka da kaiseta nuka akuare.” 3Alae inapeneka; anapi bobo biai? Elot akakeje; epwoki bobo biai? 4Kibwaik lominataka akekan kapedot naka ekek, Kikilakin ekatau. 5Kasodi anyoun anaikin lominataka; Koitata akakanin emina, Ikabokor kemina loepalal, Kakodeta nuka ekirigi. 6 Kanaiki lominataka; Konye kebu lominataka kibelokin, keeka. Abu ekatau kodusaun naenerar ŋesi: Abu kamoote ŋes, konye mam abu kadum; Keworo ŋes, konye mam abu kaboŋok. 7 Apotu ikedarak luirimirimete toma ore kadumut, Kenomonomata, kemusunata da; Apotu ikedarak luka arwatatin kademasi elouka. 8Kesiyapoi yes, wu apesur nuka Yerusalem, arai kidumut lominataka, Kolimokis ŋes ebe ketedek amin. 9Itelekari lominatakon biai lominat ece, Wu jo naitelekarit aŋor kere katemelel? Itelekari lominatakon biai lominat ece, Tape isiyapoikini sio kwaŋin? 10Ekwaŋ lominataka, ereŋ da, Lokapolon kotoma ilukumin itomon. 11Esubit akekou bala esabu loejok noi, Epopiras itimake, irioko kwape kelibi. 12 Esubit akekonye bala ajele kariri kaguuruto nuka akipi; Nuilositai kakile, ibwaikinitai kotenan. 13Esubito iitinyoke bala amanat nuka lueum ma, bala itutio luka ikui lueum ma: Esubit akeituk apecelun, nueisete emina. 14Esubito akekanin bala igilun luka esabu luibwaikinitai aberulo: Esubit akekuan bala ikel luka etom lueminaikina asapiro. 15Esubito akejeke bala ipirino luka amor nukijesesio luegelegela, Luesipokinio aigaŋ eta nuka esabu loejok: Esubit asimake bala Lebanon, ejok noi kwape iresia. 16 Ejijim noi akeituk: eebo, ejok ŋesi noi cut. Ŋol ŋes lominataka, ŋol ŋes oupaka; Wu yes apesur nuka Yerusalem.



6

1 Ai bo alot lominatakon, Wu jo naitelekarit aŋor kere katemelel? Ai bo ebelokin lominatakon, Tape kimoi ŋes nepepe kajo? 2 Alot lominataka omanikorike, amanat nuka lueum ma, Ainyam komanikoria, ka aide da apecelun. 3 Arai eoŋ naka lominataka, lominataka da erai lokaŋ: Itadaki esipanike kotoma apecelun. 4 Ijok ijo noi, wu jo naminatala, kwape Tirusa, Itemelel kwape Yerusalem, Naketasuro bala ajore naejaas imederan. 5 Sirikisesen eoŋ, Naarai ketoolikis akonikonye. Esubito itimakon bala esipan loka akinei Nueperete neejululue Gilead. 6Esubito ikelakon bala esipan loka amerekekin, Nuepote kailosio; Ŋinidiopet kakesi imuunit imwatok, Komamei kakesi naetwaniarit. 7Esubit ereetekon bala atutubet naka akamamaga Kotoma aimukisikon. 8Ejaas akabakan akaisakanykape, ka abusian akaisakanykauni, Ka apesur nurmm imarunos. 9Ajeleka, aliogotoka, erai adiopet bon: Erai adiopet naka totoke; Naseuna naka nakeuriei. Koanyut ŋes apesur, konyarata ŋes nakarereŋ; Eebo, akabakan ka abusian da kituritos ŋes 10“Iŋai bo ŋin naiŋoliari, kwape atupuruc, Itemelel kwape kelap, Iliyai kwape kakoloŋ, Naketasuro bala ajore naejaas imederan?” 11 Abu kejesar omanikor loka emaido, Aanyun iraan luelibete kaditot, Aanyun arai iburukunyit emusabibu, Arai ituroete akamamagan. 12Eriŋa eoŋ ejenuna, abu ekatau kebwaik Neejaas agalin nuka ikapolokitokoka. 13Koboŋ, koboŋ, wu jo Asulamit; Koboŋ, koboŋ, tetere kiseseni jo. Kanukinyo ikototor asesen Asulamit, Kwape iseseniata ekosio loka Makanaim?



7

1 Ejokuka ca ma akonikeje kotoma amuk, Ijo akoku naka lokapolon! Amurwosikon nupakir esubito bala iboro luka akais nuipu, Aswam naka akanin nuka ekeswaman loepiriana. 2Aipulekon esubit bala aikopo naeieuna, Namam etwaniarit ebino loinyalakinitai: Akoikikon esubit bala atukit naka akima, Naelukunito apecelun. 3 Esubito ikisinakon bala ikalei iarei Lumwatok luka amori. 4Esubit emurisiŋikon bala etogo loeoja loka ikel luka etom; Esubito akonvekon bala ataparin nuka Kesibon nuejaas orute loka Bat-rabim; Esubito ikumesikon bala etogo loeoja loka Lebanon Loesesenas ka Damasiko. 5Esubit akoukon kotomakon bala Karamel, Esubito da itima luka akoukon bala lumugeik; Ikamuni ekabaka kaicipetakec. 6Itemelel ca ma ijo, isiyalamikinit da, Ijo naminat, nakalakar! 7Esubit aojaukon na bala edukudukut, Ikisinakon bala aibuŋeta nuka emusabibu. 8Kener ebe, Adokar odukudukut ŋol, Ketiŋ atenunake: Kosubito ikisinakon bala aibuŋeta nuka emusabibu, Aures naka eiyeijanekon bala alam. 9Kosubite aitukukon bala ebino loitelekarit kajokis, Loitololoor lominataka, Loidiririei kaituke nuka ŋul kaluejotoete. 10 Arai eoŋ naka lominataka, Aiŋobeleke da ejai neajar. 11Kobia, lominataka, kaloto amanat; Kapero oreria. 12 Kadiloto omanikoria luka emusabibu: Kaanyut arai iburukunyit emusabibu, eterara da aketur, Arai ituroto akamamagan: Kainak kaŋina aminaka. 13 Eurok ma aiduduma, Okekiawok da ejaas araito nuka akais nuipu nuka iponesio kere, Nukitetiak ka numojon da, Nukenadakinit jo, lominataka.



8

1Arai korai ijo onaceka, Lokenaki ikisina luka totoka! Nakaanyunia kokiŋa, tikanu; Eebo, komameun lokameni. 2 Tikenarenikini jo aitolomar togo loka totoka, Nakesisianakini; Tiketamat jo ebino loinyalakinitai lueuru ma, Kakipi nuka akamamaganaka. 3 Kojai akekan nakokediany akouka, Katunite akekan nakoteten. 4Kesiyapoi yes, wu apesur nuka Yerusalem, Kinyeis aisidik arai aitwekenyun amin, Aitodol neakotokinor. 5 Iŋai bo na naebuni kamodiŋ, Egoŋakina kalominatake? Ketwekeny jo kokwap kelamai: Kanekeriebar totokon kiuriei, Kanekeriebar ŋin nakiuriei jo. 6 Kibwaikinai eoŋ otaukon kwape amacaret, Kwape amacaret kakanikon: Naarai egogoŋ amin kwape atwanare; Eninik ekokote kwape okatwak: Aimiliaununetake esubito bala aimiliaununeta nuka akim, Aipelonoreta cut nuka EJAKAIT. 7 Mam epedorete akipi nuipu airuden amin, Karaida akalele ai tulumor ŋes: Arai iyuuni etuŋanan ainakin iboro kere lukokaleke itia amin, Tiemwanitai cut. 8 Kija sio kainacikosi nadidi, Emameete ŋes ikisin: Kikwaikini ai inacikosi Kapaaran naisinerere? 9 Arai erai ŋesi arwatat, Kidukokini ŋes etogo loka epuesa: Arai erai ekirigi, Kigolokini ŋes katiketa nuka iresia. 10 Arai eoŋ arwatat, ikisinaka da esubito bala itogoike: Kasodi ajaut kakonyeneke bala yenikainapakin. 11 Ejai Solomon emanikor loka emusabibu ko Baal-kamon; Kititiŋik ikakoriok emanikor ŋol loka emusabibu; Koyaununut ŋinituŋ anaŋ atutubeta alukumit nuka epuesa itia araitoke. 12Emanikorika loka emusabibu loerai lokaŋ, ejai kakonyeneka: Ijo, wu Solomon, ijaun kalukumit, Ka ŋul da luidarete araitoke akwat aarei. 13 Ijo naiboie komanikoria, Iirarete aupasiakon ekoniporota, Kisiirarai eoŋ da. 14 Kiwony, lominataka, Koputokin kamori arai amiam nadidi, Koroŋan lueuru ma.



AMAZING GRACE BIBLE INSTITUTE