Iromayon11 Paul ebulesit loka Kristo Yesu, Iokenyaraunio araun: ekiyakia, Iokegitakinio alimonokin Akiro Nukajokak nuka Edeke, 2 nuesumunit Edeke kolo kama ka inabinoke kotoma nukiwadikatai nukalaunak, 3 kes akiro nuka okokuke Yesu Kristo Ejakaitiwok, lokeurio kaur naka Daudi kwape ejaar akuan, 4 loedakakinitai araut Okoku loka Edeke kapedor kwape ejaar Emoyo loka Alaunit, kanuka ajarun kokatwak, 5 kotomakeŋ ŋes kipou kadumuniata asianut ka eiyakiane tetere erimarete lukatekerin kere aiyuun kanuka ekekiror, 6kotomakec yes da kinyaritai araut luka Yesu Kristo. 7 Mama ejaas ŋul kere luejaas Rome luminan luka Edeke luenyaritai araut ikalaunak: Asianut kojai mamakus ka ainapakin nuepote kama ejai Edeke Papawok ka Ejakait Yesu Kristo. 8 Esiauni aimal Ekadeke kotoma Yesu Kristo kanukus kere, naarai elimonokinio akusiiyuun anatar akwapin kere. 9 Naarai Edeke, loamai komoyoka kotoma Akiro Nukajokak nuka Okokuke, ŋes ekajenanika ebe alimununei yes kailipika komam apalari. 10 Ecebokinit ailip arai motoko kanuka akoteke kesipedori Edeke arurukun mama ijaas. 11 Naarai kemuit aanyun yes tetere kekopakin yes adioinakinet naka emoyo nakiticasi yes, 12 ŋes atemar ebe aitalakanario bonik ka bonik kanuka aiyuunikus, ka nakaŋ da. 13 Konye iinacan, akoto yes ajenun ebe irwan ipu alosikinit abunore mamakus, tetere adumuni adioraito kamakus kwape kama kImo ice, konye ketikokinitai kiton kwana. 14Keburaete Iyonanin ka lukacekwapin da, keburaete lukacoa ka lueolito da: 15kanuka ŋun akapakina eoŋ kowaika alimonokin Akiro Nukajokak kiton mamakus da luijaas Rome. 16 Naarai mam Akiro Nukajokak kesurumito ileic: naarai erai apedor naka Edeke ainun aitajario mama ejai ŋinituŋanan yeniyuuni, mama ejai Eyudayat ber, ka Eyonanit da. 17 Naarai tomakec epukoritai adolit naka Edeke, anyoun kaiyuun kiton aiyuun; kwape iwadikatere ebe, “Ebusi ikadoliton kanuka aiyuun.” 18 Naarai epukoritai anyunyura naka Edeke abunore kokuju mama ejai epali kere ka amamus adolit naka ituŋa luitikokinete abeit kanuka amamus adolitekec. 19 Naarai ejenas akiro nuka Edeke ideleleete kotomakec, naarai abu Edeke kisideleleu mamakec. 20 Naarai ameun kaisub akwap, atakanut iboroke lumam etakanete, ŋes atemar akepedor namam enaŋi, ka Eidekeoneke, kotoma oboro lukesubi. Aso emamei kes aiyar: 21 naarai apotu kojenut Edeke, mam kes itubusikinito ŋes kwape Edeke, karaida aima ŋes, dimarai kooliosi kotoma aomisiokec, kitumutoroi ikecetauon luemamei ajenun. 22 Kineras ebe eraas lukacoa, kobaŋaakaros, 23 kisiecata aibuses naka Edeke lomam etwani aituputoor aputosia nuka ituŋa kaluetwakete, arai nuka akweny, arai nuka itiaŋ, arai nuka lueliatos. 24 Kanuka ŋun abu Edeke kojalak kes toma oraŋasia luka itauonokec mama ejai amamus aila, ka aitisilio da naka awatekec bonik ka bonik, 25 naarai apotu kisiecata abeit naka Edeke araun aiŋal, koyoŋito komaata da isubat itia Ekasuban loituritoi ikar kere! Amen. 26Kanuka ŋun abu Edeke kojalak kes ainekit naka ileic, naarai apotu aŋorokec da kilocokis einono lokaurunet aituluor lomere lokaurunet, 27 ikiliok da kwape kwaŋin kinyeis einono lokaurunet loka aberu kibworo kotoma oraŋakec ŋolituŋanan mama ejai locekeŋ, ikiliok kiswamanakis ikiliok nukileic, ido koinanakinos eropit loebusakinit apaarikec. 28Ido kwape mam apotu kocamuniata ajenun Edeke, abu Edeke kojalak kes aomisio numam ajokis, kiswamata numam ibusakinito. 29Ileleba amamus adolit kere, nukaronok, airaŋaanut, ameŋeranut; ileleba ekokote, earit, aŋolopa, aiŋal, aomisio nueroko, ikedeideok, 30ikasiomak, luelaito Edeke, lukepali, luepogaka, luituros, ikapwakak nueroko, luiulakinito ikauriakakec, 31luemamei acoa, luejalete aitutuket, lumam eminanara, luemamei aitim, 32luejenete aitepesenit naka Edeke, ebe luiswamaete nuikote nen ibusakinit atwanare, mam bon iswamaete ŋun, konye itojokito da ŋul lukiswamaete ŋun.21 Aso emamei jo aiyar, ijo ituŋanan yenitubokini yenice; naarai ŋun nuitubokini yenice, itubokin ilopet aitelekar, naarai jo yenitubi, iswamai da ŋupeŋun, 2Kijeni oni ebe aitub naka Edeke erai nakabeit mama ejaas ŋul luiswamaete nuikote nen. 3Ijo ituŋanan, yenitubokini luiswamaete nuikote nen, iswamai ijo da ŋupeŋun, iwomit ebe ikui tope kaitub naka Edeke? 4 Imwaŋit kereka ijo abar naka ajokisike, ka aŋirikin, ka atitiŋikinitike da? Mam kereka ijeni ebe ajokis naka Edeke kiriuni jo aitoronikin? 5Konye kanuka aninikukon, ka etaukon loemamei aitoronikin, iŋadakin bon anyunyura kapaaran naka anyunyura ka apukorio naka etube loedolit loka Edeke, 6 loetacakini ŋinituŋanan kwape ejaatar aswamisioke; 7mama ejaas ŋul luemoete aibuses ka ayoŋio, ka aibut, kotoma atitiŋ naka aswamisio nuejok einakini aijar naka ikar kere. 8 Ido kaŋul kalueŋolopaka, luiulakinito abeit, luerimasi amamus adolit, edumunete anyunyura ka adedeŋ. 9 Ejaunete ican ka aridakinio toma aijar naka ŋinituŋanan yeniswamai nueroko, aisiaun lyudayat, ka Iyonanit da, 10konye aibuses ka ayoŋio ka ainapakin mama ejai ŋinituŋanan yeniswamai nuejok, aisiaun Iyudayat, ka Iyonanit da. 11 Naarai emamei aitiak ituŋa kama ejai Edeke. 12Naarai lukediakarete kere komameete ikisila, emudiaros da komameete ikisila, ŋul da kere lukediakarete kojaas kikisila, etubokinio kokisila. 13 Naarai mere ŋul luiirarete ikisila kes eraas ikadolitok kakonyen nuka Edeke, konye ikeswamak ikisila kes luitojokio araut ikadolitok. 14 Naarai naiswamaata Imo luemameete ikisila koinono loka ikisila, karaida emameete ikisila eraas kesi ikulepek ikisila. 15 Itodikinete ebe iwadikatai aswam naka ikisila toma otauonokec itejenikini da etaukec, iwosaete akeceomisio nuepegasi bonik ka bonik, arai bo eiyaros; 16 kapaaran naetubokinia Edeke nukaiyeiyea nuka ituŋa kama ka Yesu Kristo kwape ejaatar Akiro Nukajokak nuketitiŋitai eoŋ. 17 Konye jo, arai kinyaritai Eyudayat kogoŋakina okisila, iwoloboboi kama ejai Edeke, 18 kojeni nuekoto ŋesi, icamuni da nuitelekarito ajokis, kituutooritai kotoma okisila, 19 itogogoŋit bon araut ekeŋarenon loka imudukiok, aica da naka ŋul kaluejaas amuton, 20 eketetenan loka ibaŋiok, ekesisianakinan loka imukerun, ijai kaput naka aijen ka abeit toma okisila, 21 aso jo loisisianakini loce, mam tope isisianakini bon? Jo loilimonokini ebe Sirikokoi, ikokoi kereka ijo? 22Jo loibala ebe Siridote, idotei ijo? Jo loisacit aputosia, iŋasi ijo abilai? 23Jo loiwolobobot kotoma okisila, itisili kereka Edeke kanuka apaar kokisila? 24 Naarai kwape iwadikatere ebe, “Einyanakinio ekiror loka Edeke katekerin kanukus.” 25 Naarai ejai akepio ajokis arai iswamai ikisila; konye arai irai ijo loipaarit kokisila, arau akonikepio amamus akepio. 26 Aso arai erici lomam ekepep aicorakineta nuka ikisila, mam kereka amamus akepioke imarakinio araut akepio? 27Ŋol da lomam ekepitai koinono loerici ikisila, mam kereka kitubokini jo loijaas kaiwadikaet ka akepio da, loipaari kokisila? 28 Naarai ŋol loerai Eyudayat kokuju mere ŋol Eyudayat cut, karaida akepio nakokuju toma akuan; 29 dimarai ŋol loerai Eyudayat kotoma, ka akepio nakotau kotoma omoyo kwabo mere aiwadikaet. Akeiturio mam ebuni kotuŋa dimarai kama ejai Edeke.31Itelekarit kereka Eyudayat kinyo? Arai anyoin bo ajokis naka akepio? 2 Itelekarit noi kaŋolipone. Nasodit, naarai isiŋadikinitai Iyudayan akiro nuka Edeke. 3 Anyoika bo arai ice kakesi araas lumere lumunon? Amamus amunonutukec itapalauni tope amunonut naka Edeke? 4 Madi akuj! Korai Edeke lokabeit, ŋinituŋanan da ikeŋalan, kwape iwadikatere ebe, “Tetere itojokio araut loedolit kakirokon, Ipikori da kotoma atubokiniokon.” 5Konye arai amamus adolitewok iticasi adolit naka Edeke, kenera anu? Ebe Mam Edeke erai loedolit aitican oni kanyunyura? (Enera kopone loka etuŋanan.) 6Madi akuj! Kanuka ŋun ikonakini ai Edeke etubokini akwapin? 7Konye arai kanuka aiŋalaka iyatanakini abeit naka Edeke aitodiar akeibuses, kanukinyo eriŋa katubokinitere eoŋ kwape ekadiakanaran? 8 Ido kanukinyo mam kibalar ebe, “Keswamata nukaronok tetere epote nukajokak”? kwape kisabanakiniata icetuŋa sio ebe kinera isio kwaŋin, Edolit atubokiniokec. 9 Biai bo do? Kijokuka oni aitelekarit ice? Mam cut, nepepec da; naarai kidau aosan Iyudayan ka Iyonanin da kere ebe eyait adiakanar kes, 10 kwape iwadikatere ebe: “Emamei ikadoliton, karaida idiopet; 11Emamei yenejenuni, emamei da yenemoot Edeke. 12Apaasi kere, emamei kes kere ajokis; Emamei yeniswamai nuejok, emamei karaida idiopet.” 13 “Elogorotokec ŋes ailit naeŋaara; Ijodijodete kaŋajepakec, Ejai aisorit naka emusaga kwap kaŋajepakec.” 14 “Ileleba aitukekec elamit ka adwaris.” 15 “Erurukito akejenekec abukor aokot. 16Ejai amudiar ka aburun orotinikec. 17Mam apotu kojenut erot loka ainapakin.” 18 “Emamei ayoŋit Edeke kakonyenekec.” 19 Aso kijeni ebe akiro kere nuelimito ikisila, inerasi mama ejaas ŋul lueyaito ikisila, tetere itubutario ŋiniituk, akwap kere da kojau otube loka Edeke. 20 Kanuka ŋun emamei yenejai akuan yenitojokio araut yenedolit kakonyeneke kanuka aswamisio nuka ikisila, naarai kanuka ikisila ŋes ejenunor adiakar. 21 Konye kwana edeleleu adolit naka Edeke komameete ikisila, itejenunitai kokisila ka inabin da, 22 ŋes adolit naka Edeke naejai kanuka aiyuun Yesu Kristo, mama ejaas kere luiyuunito. Naarai emamei atiaketait; 23 naarai adiakasi kere, komam edolokinito aibuses naka Edeke, 24 akesianut naeinakini atitai ŋes itojokit kes araut luedolito, kanuka alakunio naejai toma Kristo Yesu, 25 loibwaikinit Edeke araut aitupucet kanuka aiyuun akeokot, tetere itodikini akedolit kanuka ajalakin adiakanareta nukolo nueŋirikinit Edeke; 26kosodi kitodik adoliteke kapak kana, tetere eraun loedolit ka loitojoki da ŋin yeniyuuni Yesu araut loedolit. 27 Aso ai bo ejai aolobobot? Agolor kiŋa, Kanuka ikisila inyoika tope? Luka aswamisio? Mam cut, konye kanuka ikisila luka aiyuun. 28 Naarai kitogogoŋit ebe itojokio ituŋanan araut yenedolit kanuka aiyuun, komameete aswamisio nuka ikisila. 29 Erai kereka Edeke loka Iyudayan bon? Mam kereka erai loka Imo da? Eebo, loka Imo da, 30 naarai erai Edeke ediopet; loitojoki luekepitai kotoma aiyuun, ka lumam ekepitai da kanuka aiyuun ŋipeŋin. 31 Aso kitapalauni kereka ikisila kanuka aiyuun ŋin? Madi akuj! Konye kiticasi ikisila.41Aso kinera anyoika nuka Aburaam papaakosi kwape ejaar akuan? 2Naarai arai kitojokitai Aburaam kanuka aswamisioke, ejai naeolobobaa, konye mere kakonyen nuka Edeke. 3 Naarai inerasi biai nuiwadikatai? Ebe, “Abu Aburaam kiyu Edeke, kimarakinai ŋes araun adolit.” 4 Konye mama ejai ekeswaman, mam ekeropit imarakinio kanuka asianut, dimarai iburao. 5Kwabo mama ejai yenimam iswamai, konye iyuuni ŋol loitojoki luetumaaka, imarakinio akeiyuun araun adolit. 6 Kwape inerar Daudi ebe isirereŋitoi ituŋanan yenimarakinit Edeke araun ikadoliton komameete aswamisio; 7 Ebe, “Isirereŋitoi luisionio aronisio, ka luerapitai da adiakanareta; 8Isirereŋitoi etuŋanan lomam Ejakait imarakinit adiakar.” 9 Aso ca isirereŋitoi ŋol loekepitai arai bo ŋol lomam ekepitai da? Naarai kinera ebe, Kimarakinai aiyuun naka Aburaam araun adolit. 10Kimarakinio biai? Kedaun aikep, arai bo eroko kekepa? Mere kedaun aikep, dimarai eroko ekepa. 11 Abu ŋesi kodum akepio araun aanyunet arai nakaipucakinet naka adolit naka akeiyuun eroko ekepa, tetere eraun papa loka lukeyuunak kere karaida mam ekepitai, tetere imarakinio kes adolit. 12 Eraun da papa loka akepio mere mama ejaas ŋul luekepitai bon, konye mama ejaas ŋul da luetupito ikukut luka aiyuun naka papaakosi Aburaam nakejaatar eriŋa ekepa. 13 Naarai aisumunet ŋin mama ejai Aburaam ka aurike da ebe eraun ekeruman loka akwapin, mam kebuni kokisila, dimarai kanuka adolit naka aiyuun. 14 Naarai arai luka ikisila kes ikerumak, eraun aiyuun atitai, aisumunet da itapalaunio. 15 Naarai eyaŋaunete ikisila anyunyura, konye naemameatar ikisila emamei apaar. 16 Kanuka ŋun ebuni aisumunet kotoma aiyuun, tetere egoŋakina aisumunet asianut, kitogogoŋoi da mama ejai aur kere, mere mama ejaas ŋul luka ikisila bon, dimarai mama ejaas ŋul luka aiyuun naka Aburaam, (loerai papaawok kere, 17 kwape iwadikatere ebe, “Kadakaki jo araun papa loka atekerin nuipu,”) kakonyen nuka Edeke loiyuunit ŋesi, loeinakini lukatwak aijar, loenyarauni da iboro luemameete bala luejaas. 18 Kemamei amun abu kiyuu kotoma amun, tetere eraun papa loka atekerin nuipu; kwape kelimokinere ebe, “Kwape kwaŋin ejaun akoniwur.” 19 Mam abu akeiyuun kononokiar, naaomitor ejautene loka akuanake naketwanit, nakeraar loka ikar bala akwatat, ka akoik da naka Sara nakerakakinit, 20 konye mam abu kobuonokin kanuka aisumunet naka Edeke kamamus aiyuun, dimarai kogogoŋor kaiyuun, kitopoloo Edeke, 21kojeni cut ebe epedori Edeke aswam nuisumunit. 22 Kanuka ŋun, “kimarakinai ŋes adolit.” 23 Konye mam kiwadikatai kanukeŋ bon ebe, “Kimarakinai ŋes”, 24 dimarai kanuwok da, Kiponio aimarakin oni da lukiyuunit ŋol lokitajaruni Yesu Ejakaitiwok kokatwak, 25 lokeinakinio kanuka aibucanaretawok, kitajarunai da aitojok oni araun luedolito.51 Aso naarai kitojokitai araun luedolito kanuka aiyuun, kajaut kainapakin mama ejai Edeke kanuka Ejakaitiwok Yesu Kristo. 2 Kanukeŋ kidumu erot loka aiyuun lokitodoli asianut ŋin nakibwoia, kiwoloboboi da kotoma amun aibuses naka Edeke. 3 Kwabo mere ŋun bon, dimarai kiwoloboboi da kotoma aiticanio, kajenete ebe aiticanio eyaŋauni atitiŋikin, 4atitiŋikin da eyaŋauni aitogogoŋio, aitogogoŋio da eyaŋauni amun, 5 amun da mam itisili, naarai ekwamakinitai amin naka Edeke otauonowok kanuka Emoyo Lokalaunan lokiinakinitai oni. 6Naarai nakirokor kikalanyaka, kedol apak abu Kristo kotwanik luetumaaka, 7Naarai etiono ituŋanan atwanikin ikadoliton, konye diat eluŋakin ituŋanan aŋirikin atwanikin yenejok. 8 Konye iturit Edeke akemin mamawok, naarai nakirokor kirai ikadiakanarak abu Kristo kotwanik oni. 9 Aso aitelekarit noi kiidau kwana aitojokio kotoma akeokot, kitajario da kanukeŋ alemunio kama ejai anyunyura. 10 Naarai arai nakiraar kolo lukasurup kitupucitoi kEdeke kanuka atwanare naka Okokuke, aitelekarit noi kiidau aitupucio, kitajario kotoma aijarake. 11Kwabo mere ŋun bon, konye kiwoloboboi da kotoma Edeke, kanuka Ejakaitiwok Yesu Kristo, lokidumunia kwana aitupuciowok. 12 Kanuka ŋun kwape kelomunia adiakanar akwapin kanuka etuŋanan ediopet, kolom da atwanare kanuka adiakar, kwaŋin kodolok atwanare otuŋa kere, naarai apotu kere kodiakasi— 13 naarai ajai adiakar toma akwap aliŋakin ikisila, konye mam emaritai adiakar naemameatar ikisila. 14 Konye erumit atwanare ameun ka Adam kiton Musa, erumit da ŋesi lumam apotu kodiakasi kopone loka apaar naka Adam, loerai aput naka ŋol kaloebunit. 15Konye ainakinet mam eputos kaibucaret. Naarai arai apotu luipu kotwaka kanuka aibucaret naka ediopet, aitelekarit noi epoloor asianut naka Edeke ka ainakinet naejai toma asianut naka etuŋanan ediopet Yesu Kristo, kanuka luipu. 16Ido ainakinet mam eputos kanaayau loadiakaa. Naarai etube loabu kobu kanuka ediopetuŋanan abu koyau atubokinio, konye ainakinet naabu kobu kanuka aibucanareta nuipu ayau aitojokio. 17Aso, arai kanuka aibucar naka ediopetuŋanan abu atwanare kirum kanuka etuŋanan ŋol, aitelekarit noi ŋul luedumunete aipadara naka asianut ka ainakinet naka adolit irumete toma aijar kanuka etuŋanan ŋol ediopet, Yesu Kristo. 18 Aso ca kwape iriaria aibucaret adiopet ituŋa kere atubokinio, kwape kwaŋin iriaria aswamisioit adiopet nakadolit ituŋa kere aitojokio ka aijar da. 19 Naarai kwape keraunotor luipu ikadiakanarak kanuka epali loka ediopetuŋanan, kwape kwaŋin itaraunio luipu ikadolitok kanuka arima naka etuŋanan ediopet. 20 Apotu ikisila kolomut tetere iyatanakin aibucar; konye nekiyatakinor adiakar, abu asianut kodepa noi noi, 21 tetere kwape erumitor adiakar kotoma atwanare, kwape kwaŋin irumi asianut kanuka adolit kiton aijar naka ikar kere kanuka Yesu Kristo Ejakaitiwok.61 Aso do kinera anu? Kasalakis kereka adiakanar, tetere iyatakin asianut? 2 Madi akuj! Oni lukitwaka kama kadiakar kikwaikini ai kirina kibusi kotomakeŋ? 3 Arai bo mam ijenete ebe oni kere lukibatisatai kotoma Kristo Yesu, aponi kibatisai kotoma atwanareke? 4 Aso aponi kidaai nepepe kaŋes kanuka aibatis kotoma atwanare, tetere kwape kitajarunere Kristo kokatwak kanuka aibuses naka Papa, kwape kwaŋin oni da kilosenenei kaijar nakitetet. 5 Naarai arai kirotakinitai kaŋes kotoma aput naka atwanareke, kwape kwaŋin kirotakinio kotoma aput naka ajarunike. 6 Kijeni na ebe aponi etuŋananiwok lokolo kibubukinoi kaŋes, tetere itapalaunio akuan nakadiakanar, komam bobo adiakanar kitubuleseni oni. 7 Naarai yenatwana eosikinitai anyoun kadiakar, 8Konye arai kipou katwaka nepepe ka Kristo, kiyuunit ebe kijari da nepepe kaŋes. 9Kijeni ebe kedau Kristo ajarun kokatwak, mam etwani bobo, mam bobo atwanare eyait ŋes. 10 Naarai atwanare naketwani, abu kotwanik adiakar irwan atipet bon, konye aijar naejari, ejari mama ejai Edeke. 11 Yes da kwape kwaŋin koomito bonik araut lukatwak kama ejai adiakar, konye ikajarak mama ejai Edeke kotoma Kristo Yesu. 12 Aso kinye adiakar airum awatekus nuetwakete, yes arimar aiŋobelekec. 13 Kwabo sirijaikinete akusitutubeta mama ejai adiakar aitwasamaa amamus adolit, dimarai kijaikis bonik mama ejai Edeke, kwape ikajarak luanyout kokatwak, akusitutubeta da mama ejai Edeke aitwasamaa adolit; 14 naarai mam adiakar kiyait yes, naarai mere ikisila kiyaito yes, dimarai asianut. 15 Biai bo do? Kadiakasi, naarai mam ikisila kiyaito oni, dimarai asianut? Madi akuj! 16 Mam kereka ijenete ebe loijaikinos bonik arimar kwape ibulesin, iraas do ibulesin luka ŋol kaloirimarito, arai adiakar naeyauni atwanare, arai bo arima naeyauni adolit? 17Konye kimalai Edeke, naarai iraas kolo ibulesin luka adiakar, konye ipotu korimasi kotauonokus aput naka aisisianakin nakiinakinio yes, 18 ido nakiwosikinere anyoun kadiakar koraut ibulesin luka adolit. 19Enera eoŋ kopone loka etuŋanan kanuka akalanyanut naka awatekus. Naarai kwape kijaikiniata kolo atutubetakus aitwasamao kotoma amodokok, ka epali loeyauni epali, kwape kwaŋin kijaikis do kwana atutubetakus aitwasamao kotoma adolit naeyauni aitalaunio. 20Naarai nakiraatar ibulesin luka adiakar, kiwosikinitai anyoun kadolit. 21 Anyoika kereka araito nuipotu kodumut kapaarasia kaŋun, kakiro kaŋun nukisurumito kwana ileic? Naarai awasia naka akiro kaŋun ŋes atwanare. 22 Konye kwana kidaut aosikinio anyoun kadiakar iraut ibulesin luka Edeke, idumut araito nueyaunete alaunit, awasiakec da ŋes aijar naka ikar kere. 23 Naarai eropit loka adiakar ŋes atwanare, konye ainakinet naka Edeke erai aijar naka ikar kere kotoma Kristo Yesu Ejakaitiwok.71Iinacan, mam kereka ijenete-naarai enera kaŋul kaluejenete ikisila ebe eyaito ikisila etuŋanan eroko ejari? 2Naarai eenito ikisila aberu naemanyitai eroko okilenike ejari; konye ketwana ekiliokit, eosikinitai ŋin kokisila luka okilenike. 3Kanuka ŋun enyarao naadote arai kedumun kecekiliokit, apak naeriŋar okilenike ejari. Konye arai ketwana okilenike, eosikinitai anyoun kokisila, mam da erai naadote arai kemany ekiliokit ece. 4 Ikainacan, yes da kwape kwaŋin ipotu kotwakata kama kikisila, kanuka akuan naka Kristo, tetere iraunos luka ece, ŋes ŋol loitajarunitai kokatwak, tetere kidumakini Edeke araito. 5 Naarai nakiraar kolo luka akuan, abu airaŋaanut naka adiakar kiswama kotoma atutubetawok kanuka ikisila, kasodete adumakin atwanare araito. 6 Konye kwana kiwosikinitai anyoun kokisila, kitwaka kama ejai ŋin nakijoreorit, kasodete kejaanakis komoyo lokitetet kwabo mere kaiwadikaet namojoŋ. 7 Aso do kinera anu? Eraas kereka ikisila adiakar? Madi akuj! Konye timam kajenu adiakar kedim ikisila. Naarai timam kajenu aiŋobel kedim ikisila atemar ebe, “Siriŋobelei.” 8 Konye adiakar, naabu kodum apak kanuka aicorakinet, kiswama kotomakaŋ ŋolipone loka aiŋobel, Naarai etwanit adiakar emameete ikisila. 9Abu eoŋ karai kolo loajari komameete ikisila, konye nakebunio aicorakinet kojaru adiakar, katwana do eoŋ. 10 Kerai aicorakinet naeyauni aijar kosubite ŋin kamakaŋ naeyauni atwanare. 11 Naarai abu adiakar, naabu kodum apak kanuka aicorakinet, keŋala eoŋ, kaaria da. 12 Kwaŋin eraas ikisila lukalaunak, ka aicorakinet da nakalaunan, ka naedolit ka naejok da. 13 Aso do koraun kereka ajokis atwanare kamakaŋ? Madi akuj! Konye adiakar, tetere etakanuni araut adiakar, abu kiswama atwanare kotomakaŋ kanuka ajokis, tetere iyatakin adiakar araut adiakar naerono noi kanuka aicorakinet. 14 Naarai kijeni ebe eraas ikisila luka emoyo; konye eoŋ arai lokakuan, kagwelaritai ayait naka adiakar. 15 Naarai mam ajeni nueswamai, Naarai nuakoto, mere kes nueswamai, konye eswamai nualait. 16Konye arai eswamai numam akoto, acamunit ebe ejokuka ikisila. 17Aso kwana mere eoŋ eswamai ŋun dimarai adiakar naiboie kotomakaŋ. 18 Naarai ajeni ebe emamei ibore yenejok yeniboie kotomakaŋ, ŋes atemar ebe toma akuanaka. Naarai ejai akote diekaŋ, konye aswam ajokis be. 19Naarai mam eswamai ajokis naakoto, konye aronis namam akoto, ŋes eswamai. 20Konye arai eswamai numam akoto, mam bobo eoŋ eswamai dimarai adiakar naiboie kotomakaŋ. 21Kwaŋin adumuni ekisil ebe naakotor eoŋ aswam nuejok, kaapikin aronis. 22Naarai alelakinit ikisila luka Edeke kotoma otuŋanan lokotoma. 23 Konye aanyuni ekisil ece kotoma atutubetaka ejiosi kekisil loka aomisioka, ka aituluor eŋatara loka ekisil loka adiakar loejai toma atutubetaka. 24Itukwi eoŋ lokican! Iŋai bo kayuuni eoŋ kakuan kana nakatwanare? 25 Emalai Edeke kanuka Yesu Kristo Ejakaitiwok! Aso do eoŋ elopet ejaanakini ekisil loka Edeke kaomisioka, kwabo ekisil loka adiakar kakuanaka.81Aso do kwana emamei ŋul luejaas toma Kristo Yesu atubokinio. 2 Naarai kaosikis eoŋ ikisila luka Emoyo loka aijar loejai toma Kristo Yesu anyoun kokisila luka adiakar ka atwanare. 3 Naarai ŋun numam apedorito ikisila, kanuka akalanyanut naka akuan, abu Edeke, naejukunia Okokuke elopet kaput naka akuan nakadiakaran ido kanuka adiakar, kotubok adiakar kotoma akuan, 4 tetere aicorakineta nuka ikisila itodolikinio kotomawok, lumam kilosenenei atupar akuan dimarai atupar Emoyo. 5Naarai ŋul luetuparete akuan eomitos nuka akuan, konye ŋul luetuparete Emoyo, eomitos nuka Emoyo. 6 Naarai aomit naka akuan ŋes atwanare, konye aomit naka Emoyo ŋes aijar ka ainapakin. 7 Kanuka ŋun aomit naka akuan ŋes aitusurup Edeke; naarai mam enonokikinit ikisila luka Edeke, kwabo mam epedori anonokikin; 8kes da luejaas toma akuan mam epedorete aisiyalamikin Edeke. 9 Konye arai iboie Emoyo loka Edeke kotomakus, mam ijaas toma akuan dimarai toma Omoyo. Arai da emamei ituŋanan Emoyo loka Kristo, mam ŋin erai yenike. 10 Konye arai ejai Kristo kotomakus, atwakata awatekus kanuka adiakar, konye ejarete ikusimoyon kanuka adolit. 11 Konye arai iboie Emoyo loka ŋol lokitajaruni Yesu kokatwak kotomakus, ŋol lokitajaruni Kristo Yesu kokatwak einakini da akusiwat nuetwakete aijar kanuka Ekemoyo loiboie kotomakus. 12 Aso do, iinacan, kija kapesen, mere mama ejai akuan atupar aijar naka akuan, 13 naarai arai ijarete atupar akuan, ikotosi atwakare, konye arai kitwataniasi aswamisio nuka akuan kanuka Emoyo, ijarete do. 14Naarai kere luiŋarenikinit Emoyo loka Edeke, ŋul kes odwe luka Edeke. 15 Naarai mam idumunito emoyo loka ebulesene aboŋor bobo akurian, dimarai idumunito emoyo loka araun odwe. Kanuka ŋol kimonya ebe, “Abba! Papa!” 16 Emoyo elopet itejenikini imoyonowok ebe kirai idwe luka Edeke, 17 arai kirai idwe, kirai da ikerumak, ikerumak luka Edeke, luirumete nepepe ka Kristo, arai ca kiiticani nepepe kaŋes, tetere kitubusikinio da kaŋes. 18 Aomit eoŋ ebe aiticanio naka apak kana mam ibusakinit aitiirianio kaibuses naekoto apukokinio oni. 19 Naarai idarete isuban keimiel noi apukokinio naka odwe luka Edeke; 20 naarai kitononokikinai isuban aamameak, mere kanuka eipudikec, dimarai kanuka ŋol lokitononokikini kotoma amun; 21 naarai eosikinio isuban da anyoun kobulesene loka aibos, alomar aosikinio naka aibuses naka idwe luka Edeke. 22Naarai kijeni ebe idinyasi isuban kere, eriebasi da nepepe kiton tinenikwana; 23 kwabo mere ŋul bon, dimarai oni da ikulepek luejaas araito nugeet nuka Emoyo, kidinya oni da kotomawok, kedareto araut odwe, ŋes atemar ebe alakun naka awatewok 24 Naarai kiponi kitajari kanuka amun. Konye ketakanu ibore yenikemunoi emamei bobo amun. Naarai iŋai tope emunokina ibore yenetakani? 25Konye arai kimunokina yenimam etakani, kidaret katitiŋikin. 26Kwape kwaŋin da isigalikini Emoyo akalanyanutuwok; naarai mam kijeni kwape ibusakinitor ailip, konye kinainaanakin Emoyo oni keidiny lomam inerio. 27 Ŋol da loirerei itauon ejeni aomisio nuka Emoyo, kwape ejaatar, naarai iŋaiŋaaŋakini lukalaunak kwape ekotor Edeke. 28 Kijeni ebe iswamaete iboro kere nepepe kanuka ajokis mama ejaas ŋul lueminasi Edeke, ŋes atemar ŋul lukenyaraunio kanuka alosikiniteke. 29 Naarai ŋul luabu kojenu sek, abu koseu da sek aituput kes aput naka Okokuke, tetere erauni ŋesi ekiyai kotoma oinacan luipu. 30Ŋul da luabu koseu sek, konyarau da kes; ŋul da luabu konyarau, kitojok da kes; ŋul da luabu kitojok, kitubusik da kes. 31 Aso do kinera anu kaŋun? Arai ejai Edeke kanuwok iŋai tope kisurokini oni? 32 Ŋol lomam abu kimik Okokuke elopet, konye koinak ŋes kanuwok kere, mam kereka kikorakini iboro kere da nepepe kaŋes? 33 Iŋai bo iwosai luseuna luka Edeke? Edeke itojokit; 34 iŋai bo etubokini? Kristo Yesu loketwani, konye aitelekarit lokitajarunio, loejai akan nakoteten naka Edeke, loiŋaiŋaanakini oni. 35Iŋai bo kitiaki oni kamin naka Kristo? Arai bo ican, arai aridakinio, arai areio, arai ebeli, arai amujalal, arai aronis, arai ekileŋ? 36 Kwape iwadikatere ebe, “Kanukon kiario aitiwar akwap, Kimario bala amerekekin nutubutubo.” 37 Konye kotoma ŋun kere kipikori noi kanuka ŋol lokimina oni. 38Naarai etogogoŋi ebe karaida atwanare, karaida aijar, karaida imalaikan, karaida lueyaito, karaida nuejaas, karaida nuejaunete, karaida lukapedor, 39karaida amukurur, karaida aidules, karaida isubat kere, mam kipedorete aitiak oni kamin naka Edeke naejai toma Kristo Yesu Ejakaitiwok.91Enera abeit kotoma Kristo, mam eŋalai; itejenunete akaomisio kotoma Emoyo Lokalaunan, 2ebe kakadakinit noi ka ariebo da namam enaŋi kotauka. 3Naarai tikapedo ailip eoŋ elopet aikenio atiakario kama ka Kristo kanuka ikainacan, lukatekerika kwape ejaar akuan, 4kes luka Isirael, lukeinakinio araut odwe, ka aibuses, ka aitutuketa, ka ainakinio ikisila, ka aijaanakin Edeke, ka aisumuneta da; 5eraas lukapapaa lukec, ido kotomakec alomunia Kristo kwape ejaar akuan. Kituritete Edeke loeyait kere ikar ka ikar. Amen. 6Kwabo mere ebe ekarun akirot naka Edeke. Naarai luelomunete kotoma Isirael, mere kere luka Isirael obe, 7karaida keraas lukaur naka Aburaam, mam kere eraas idwe; konye “toma Isaak ŋes enyaritere akoniwur.” 8Ŋes atemar ebe idwe luka akuan mere ŋul idwe luka Edeke, dimarai idwe luka aisumunet imaritai araut akeur. 9Naarai akirot na ŋes ebalar aisumunet ebe, “Kedol apak, aboŋuni, ido ejaunete Sara da kikoku.” 10Kwabo mere ŋin bon, konye Rebeka da kedum akoik kokiliokit ediopet, ŋes Isaak papaawok, 11karaida mam ber euruunitai idwe ŋul, komam iswamato adiokirot naejok arai naerono, tetere icasit alosikinit naka Edeke naka aseun, mere kanuka aswamisio, dimarai kanuka anyariteke, 12aponi kolimokinai ŋin ebe, “Ijaanakini lokapolon lodidi.” 13Kwape iwadikatere ebe, “Abu kamina Yakob, konye kala Esau.” 14Aso kinera anu? Ejai kereka amamus adolit kaneejai Edeke? Madi akuj! 15Naarai ebala ŋesi Musa ebe, “Etimi yenakoto aitim, ido ekonakini asianut yenakoto aikonakin asianut.” 16Aso do mere kanuka loekot karaida loekeri, dimarai kanuka aitim naka Edeke. 17Naarai ebala nakiwadikatai Parao ebe, “Kanuka nu ŋes ketonyounio jo tetere etodikini akapedor mamakon, ido tetere elimorio ekakiror kakwapin kere.” 18Aso do itimi loekot, ido itininiki loekot. 19Aso kitemari eoŋ ebe, “Kanukinyo eriŋar ŋesi itoronitor? Naarai iŋai kereka enyoikini nuelosikinit ŋesi?” 20Ijo ba ituŋanan, iŋai bo ijo yeniboŋokini Edeke? Epedori kereka ibore yenisubuna alimokin yenikesubuni ebe, “Kanukinyo kiisubia eoŋ kwana?” 21Emamei kereka ekajean apedor kama kelupe, asubun ibore yenibus ka ibore da yenesil kaluŋuret ŋipeŋin? 22Konye anyoika bo arai ekoto Edeke aitodikin anyunyura ka aitejenun da akepedor, abu kotitiŋikin katitiŋ kanaepol iboro luka anyunyura luasubitai amudiario, 23tetere itejenuni abarara naka akeibuses kotoma oboro luka aitim, luetemonokinit apeŋo kodumut aibuses, 24kes oni lukiinyarauni mere Iyudayan bonik, dimarai Imo da? 25Kwape kineritor da kama ka Kosea ebe, “Ŋul lumam araas ikatuŋa, anyarai ikatuŋa, ŋin da namam kerai naminataka, anyarai naminat.” 26“Bobo da toma aibois ŋin nakelimokinitere kes ebe, ‘Mam yes iraas ikatuŋa,’ Nepenen enyaraere idwe luka Edeke lokajaran.” 27Kiworo Isaia da nuka Isirael ebe, “Karaida kerai etiai loka odwe luka Isirael kwape asiŋe naka aŋolol, aatoŋotokec bon itajario; 28naarai iswamai Ejakait akekirot kakwap aitodol ka atubutub da.” 29Ido kwape kegeunia Isaia einer ebe: “Arai kemam Ejakait loka ajoresio kinyeinitor oni aur, Ti kiirau bala Sodom, ti kiiputokin ka Gomora.” 30Aso do kinera anu? Ebe Imo lumam atupito adolit apotu kodumut adolit, ŋes adolit naelomuni kaiyuun. 31Konye do luka Isirael luetupito ikisila luka adolit, mam edolokinito ikisila ŋul. 32Kanukinyo? Naarai mam apotu kotupata korot loka aiyuun, dimarai korot loka aswamisio. Kitiguikinos kamoru naketiguikinan, 33kwape iwadikatere ebe, “Koany, ebwaikini toma Sion amoru naketiguikinan ka atiiba nakebiroron; Yeniyuuni ŋes mam isurumio ileic.”101 Ikainacan, nuemiela kotauka, ido nuelipi Edeke kanukec ŋes aitajariokec. 2Naarai etejenuni kanukec ebe edunyaka kanuka Edeke, konye mere kotoma aijen. 3 Naarai kanumam ejeniata adolit naka Edeke, kokotos aitogogoŋ adolitekec kikulepek, mam apotu korimasi adolit naka Edeke. 4 Naarai Kristo ŋes aŋetakinet naka ikisila, tetere ŋin yeniyuuni itojokio araut ikadoliton. 5 Naarai abu Musa kiwadik ebe ituŋanan yeniswamai adolit naelomuni kokisila ejari kotoma ŋin. 6 Konye adolit naelomuni kaiyuun inera kwanata ebe, Sirikiner kotaukon ebe, “Iŋai bo yenekot adokari toma akuj?” (Ŋes atemar ebe, ayaun Kristo kwap.) 7Arai bo ebe, “Iŋai bo yenekot aijesar toma aipany?” (Ŋes atemar ebe, ayaun Kristo kuju anyoun kokatwak.) 8 Konye inera anu? Ebe, Eapie akirot kamakon, kaitukukon, kotaukon da, (ŋes atemar ebe akirot naka aiyuun nakilimonokini isio). 9 Naarai arai ilimori kaitukukon ebe Yesu ŋes Ejakait, iyuuni da kotaukon ebe abu Edeke kitajar ŋes kokatwak, kitajario. 10Naarai iyuuni ituŋanan kotauke kiton adumun adolit, elimori da kaitukuke kiton adumun aitajario. 11 Naarai ineras nuiwadikatai ebe, “Ŋin yeniyuuni ŋes mam irumete ileic.” 12 Naarai emamei atiaketait, Eyudayat ka Eyonanit; naarai erai ŋesi Ejakait loka kere, ekabaran mama ejaas kere luiwoneete ŋes. 13 Naarai “Ŋin yeniwonei ekiror loka Ejakait itajario.” 14Aso iwoneete biai ŋol lomam iyuunito? Ido da iyuunete biai ŋol lomam iirarito? Iirarete da biai komamei ekalimonokinan? 15 Elimonokinete biai komam iyakiaritai? Kwape iwadikatere ebe, “Ejokuka cama akeje nuka ŋul kaluelimonokinete Akiro Nukajokak!” 16 Konye mam kes kere apotu korimasi akiro nukajokak. Naarai inera Isaia ebe, “Ejakait, iŋai bo iyuunit akiro nueirarit kamakosi?” 17 Aso aiyuun elomuni kotoma aiirar, aiirar da kanuka akirot naka Kristo. 18 Konye abala eoŋ ebe, mam kereka apotu kiirasi? Eebo, eirasi; “Anata ekeceporoto akwap kere, Akecekiro da kiton osaŋeta luka akwapin.” 19 Konye abala eoŋ ebe, mam kereka luka Isirael ajenunito? Nugeet inera Musa ebe, “Kesurumi yes ekokote kama kaŋul lumam eraas ateker; Ketunyunyurikini do yes kanuka ateker naemamei aijen.” 20 Isaia da etitiŋ noi einer ebe, “Abu kadumun kama kaŋul lumam kamooto; Abu ketejenun mama kaŋul lumam keŋisito.” 21 Konye nuka Isirael ebala ebe, “Abu kariorite akakanin aitiwar akwap mama ejaas ituŋa lukepali ka luirebirebete.”111 Aso abala ebe, Aŋer kereka Edeke iketuŋa? Madi akuj! Naarai arai eoŋ da loka Isirael, loka aur naka Aburaam, loka ateker naka Benyamin. 2 Mam Edeke enerit iketuŋa luabu kogeu ajenun, Mam kereka ijenete nuineras nuiwadikatai kanuka Eliya, kwape iwosaa luka Isirael kakonyen nuka Edeke? 3 Ebe, “Ejakait, aarata inabinokon, atiyanakis da itemwanakon, eoŋ bon asal, ido emoete akaijar.” 4 Konye aboŋokinet naka Edeke ebala biai? Ebe, “Etasalit kanukaŋ ikiliok ilukumin ikanykaarei, lumam ekukokinos Baal.” 5 Aso kwape kwaŋin apak na, naka kwana, ejai aatoŋot naeseunitai kanuka asianut. 6 Konye arai erai kanuka asianut, mam bobo elomuni kanuka aswamisio; arai timam asianut eroko erai asianut. 7 Biai bo do? Ibore ŋin yenikemoot Isirael, mam edumuna. Luseuna apotu kodumut, konye ice kere aponi kitininikai, 8 kwape iwadikatere ebe, “Abu Edeke koinak kes emoyo loka ajo, Akonye numam eanyunete, Aki da numam iirarete, Kiton apaaran naka lolo.” 9 Ebala Daudi da ebe, “Korau emesakec eic ka akuluma, Ka ibore yenikitiguikinet, ka yenikitegelet kes. 10Kitumudakai akonyekec, tetere mam esesenete, Kitukukum ipuranakec apaarasia kere.” 11 Aso abala ebe, eguikis kereka kiton aibiror cut? Madi akuj! Konye kanuka aibucarikec adolok aitajario Imo, tetere isurumio luka Isirael ekokote. 12Aso arai eraun aibucarikec abar naka akwapin, atwaniarikec da araun abar naka Imo, itelekarit cama aitodolikiniokec! 13Konye enera kayes Imo. Aso naarai arai eoŋ ekiyakia loka imo, etopoloori aijaanakinika, 14 tetere esurumi lukatekerika ekokote, ka aitajar da ice kakesi. 15Naarai arai acakariokec ayau aipuc naka akwapin, anyoin aisukunyuniokec dimarai aijar anyoun kokatwak? 16 Arai araito nageet erai nakalaunan, kwape kwaŋin aluŋuret da; arai da aliasit erai nakalaunan, kwape kwaŋin atenieik da. 17 Konye arai epakanaritai ace katenieik, ijo da, eseitun loka ais kiraikinitai kidiŋikec, korau ikamoran yenika ajokis naka aliasit, 18 sirikiwolobob katenieik kaŋun. Arai kiwolobob, mere jo idakit aliasit dimarai aliasit kidakit jo: 19Aso itemari atiar, “Kepakario atenieik ŋun tetere keraikinio eoŋ.” 20 Abeit ŋun. Epakanaritai kes kanuka amamus aiyuunikec, ido da icasi kanuka aiyuunikon. Sirikiturokin, konye koyoŋ. 21Naarai arai mam Edeke itimit atenieik akulepek, mam kitimi jo da. 22 Aso koany ajokis ka adedeŋ naka Edeke; adedeŋ mama ejaas luibiroros, konye ajokis naka Edeke mamakon, arai kisalak ajokis ŋin; arai mere kwaŋin jo da kijepario. 23 Ka ŋul da, arai mam esalito toma amamus aiyuun, iraikinio, naarai epedori Edeke airaikin kes bobo. 24Naarai arai kijepunitai jo katorom naka eseitun loka ais, kiraikinitai oseitun lokoriot lomam erai einono, itelekarito cama atenieik akulepek airaikinio ainyakakin oseitunikec. 25 Naarai iinacan, akoto yes ajenun aiyeiyea na kinyeis aomit bonik araut lukacoa; ebe, aninikiar atutubet naka Isirael aitodol naelomunia etiai kere loka Imo, 26 kwaŋin itajario luka Isirael kere; kwape iwadikatere ebe, “Ebuni Ekalakunan koSion, Isiyekari amamus ayoŋit Edeke kotoma Yakob”; 27 “Na da ŋes akaitutuket kakes, Naalemaria adiakanaretakec.” 28Aso kotoma Akiro Nukajokak araut lukasurup luka Edeke kanukus; konye kotoma aseunio araut lueminai kanuka lukapapaakec. 29Naarai mam Edeke iitokini ainakinetake ka anyariteke da. 30Naarai kwape kolo kipaliikinioto yesi Edeke, konye kwana idumut aitimio kanuka aipaliikinikec, 31kwape kwaŋin epaliikinioto kesi kwape kwana tetere edumunete aitimio kanuka aitim naipotu yesi kodumut. 32 Naarai agoloki Edeke kere nepepe toma aipaliikin, tetere itimi kere. 33 Eiliili cama abar ka acoa ka aijen naka Edeke Mam ireikinos itubesiake, irotinike da mam ibwapunos! 34 “Naarai iŋai tope ejeni aomisio nuka Ejakait, Arai iŋai bo kerai ekapetan akiroke?” 35 “Arai iŋai bo keinakinit ber ŋes ainakinet, Etacakinio ŋes bobo?” 36 Naarai epote iboro kere kamakeŋ, ejaas da kanukeŋ, ido eboŋorete mamakeŋ. Kojai aibuses mamakeŋ ikar kere. Amen.121 Kanuka ŋun, iinacan, keŋaiŋait yes, kanuka aitimeta nuka Edeke, kijaikis akusiwat koraut asubanit naejari, nakalaunan, naisiyalamikinit Edeke, ŋes erai aimakus naibus. 2 Kwabo sirikiputo nuka ikar kalu, konye kanuka aisiteteunio naka aomisiokus kijulakinos, tetere igimorete nuekoto Edeke, nuejok, ka nuisiyalamikinito, ka nuedolito da. 3 Naarai kanuka asianut nakainakinitai alimokini ŋinituŋanan kayesi ebe siriwomiara adepar naibusakinit aomit, konye koomito kacoit, kwape ekorakinitor Edeke aitemis naka aiyuun. 4 Naarai kwape kijaar katutubeta nuipu toma akuan adiopet, kwabo mam atutubeta kere iswamaete aswam adiopet, 5 kwape kwaŋin oni da lukipu, kirai akuan adiopet kotoma Kristo, ka atutubeta da nuka lucewok bonik ka bonik. 6 Aso naarai kija kainakineta nuegelegela kwape ejaar asianut nakiinakinitai, ketwasamata kes; arai adwaranut, kwape ejaar aiyuuniwok; 7 arai aijaanakin, kotoma aijaanakiniwok; yenisisianakini, kotoma aisisianakinike; 8 yenicori, kotoma aicoroke; yenekori, kotau loliogot; yeniŋarakini, kadunyanut; yenitimi da, kaiyalama. 9 Korau amina naemamei aisoswanut. Kolaata aronis, kiketakinos kotoma kanuejok. 10 Kotoma amin naka einacane, kominanaros bonik ka bonik; kotoma aibuses kitopoloorite ŋinituŋanan aupake. 11 Kotoma adunyanut sirikalanyaka, kokokito komoyo, kijaanakis Ejakait. 12 Kolelakinito amun kotitiŋioto kocan, kicebokinito ailip. 13 Kokoranakisi lukalaunak nuipudasi, kisukunyanakisi ipejok. 14 Kilipanakisi arereŋ lukimanito yes; kilipanakisi arereŋ kwabo sirikilamata. 15 Kolelata kaluelelete, komonyata kaluemonyete. 16 Koomito adiopekirot bonik ka bonik. Siridakara, konye koupanaros kaluitasonos. Siriraas lukacoa kakonyenekus ikulepek. 17 Siritacakis aronis kanuka aronis, kocoito nuejok kakonyen nuka ituŋa kere. 18 Arai epedoros kowaikus, kinapakina kituŋa kere. 19 Luminan, sirinyaŋanakinos, konye kinac anyunyura; naarai iwadikatai ebe, “Ebala Ejakait ebe, Enyaŋit ekaŋ, eoŋ atacakini.” 20 Konye “arai eriebi lokasurupikon eteŋei, kitanyam, arai ejakit akur, kitamat ŋes; naarai naiswamaa kwaŋin inokokini atotole akouke.” 21Sirikiipiko aronis, konye kipiko aronis kanuka ajokis.131 Kononokikinite ŋinituŋanan ikapolok lueyaito, naarai emamei apolou dimarai naebuni kama ejai Edeke, ka ŋin da naejai icorakinit Edeke. 2Kanuka ŋun yenitepegi apolou etepeg aicorakinet naka Edeke, ido luitepegete itudumikinos etube. 3 Naarai ikayaitok mere luitukurianete kotoma aswamisioit naejok, dimarai kotoma naerono. Ikoto kereka ijo kinyek akurian apolou? Kiswama do nuejok, kituri ŋesi jo. 4 Naarai erai ŋesi ekejaanakinan loka Edeke kamakon kanuka ajokis, Konye arai kiswama naerono, kokuriana, naarai mam edakit ekileŋ atai; erai ŋesi ekejaanakinan loka Edeke, loinyaŋi kanyunyura yeniswamai nueroko. 5Kanuka ŋun ibusakinit anonokikin, mere kanuka anyunyura bon, dimarai kanuka aomisio nuilepilepete. 6 Naarai kanuka ŋun itacete da esolo, naarai eraas kesi ikejaanakinak luka Edeke, icebokinito ŋipeŋin. 7 Kotacanakisi kere nuebeito, loitelemi esolo loka ituŋa, esolo loka ituŋa; loitelemi esolo da loka iboro, esolo loka iboro; kotacanakisi ayoŋit luebeito ayoŋit, aibuses da mama ejaas lukaibuses. 8 Sirijaas kapesen mama ejai ituŋanan kere, dimikito aminanara; naarai yenemina aupake etodol ikisila. 9 Naarai na ebe, “Siridote, Siriari, Sirikokoi, Siriŋobelei,” ka aceicorakinet kere, imorikikinitai toma akirot na ebe, “Komina ikoniidunyet kwape iminar bon.” 10 Amin mam ikonakini iidunyet erono; kwaŋin amin ŋes aitodolikinet naka ikisila. 11 Ka ŋun da, ijenete apak, ebe adol esawa yes akwenyun kajoo. Naarai kwana eapie aitajariowok aitelekarit nakigeunia aiyuun; 12 aeka akuar, eapie da apaaran. Aso kalacasi aswamisio nuka amuton, kanapa lujiis luka aica. 13 Kalosenenete kebusak kwape paaran, mere kotoma aboliasio ka emeret, mere kotoma adoteu ka abenyanut, mere kotoma aŋolopa ka ekokote, 14 konye konapa Ejakait Yesu Kristo, kwabo siribuakinito akuan aitodol nuimiela.141 Kisukunyut yenekalanyana kaiyuun, kwabo mere atubokin abuonokinike. 2 Ituŋanan yeniyuunit enyami kere, konye yenekalanyana enyami ikui. 3 Kinyek yenenyami aimen yenimam enyami, karaida yenimam enyami siriketuboki yenenyami; naarai isukunyikinit Edeke ŋes. 4 Iŋai bo jo yenitubokini ebulesit loka yenice? Ebwoi ŋesi arai ibirori kama kejakaitike elopet. Eebo, isibwoio naarai epedori Ejakait aisibwo ŋes. 5 Eomit ice apaaran adiopet adepar apaaran ace, eomit ice apaarasia kere araut nueriakanara. Kitogogoŋite ŋinituŋanan kaomisioke ilopet. 6Yenericit apaaran, ericit kanuka Ejakait. Yenenyami da, enyami kanuka Ejakait, naarai imalai Edeke. Yenimam enyami da, mam enyami kanuka Ejakait, imalai da Edeke. 7Naarai emamei ituŋanan kotomawok yenejari kanuke bon, emamei da yenetwani kanuke bon. 8 Aso arai kijari, kijari kanuka Ejakait, arai kitwaki da, kitwaki kanuka Ejakait. Aso arai kijari, arai kitwaki da, kirai luka Ejakait. 9Naarai abu Kristo kotwana kojaru da tetere eraun Ejakait loka lukatwak ka lukajarak da. 10 Konye jo, kanukinyo itubokinia onacekon? Ijo da, kanukinyo imenitor onacekon? Naarai kibwoi rwaru kere kakonyen nuka eicoloŋ loka aitub loka Edeke. 11 Naarai iwadikatai ebe, “Ebala Ejakait ebe, Kwape ajaria, ekukokini ŋinikuŋ mamakaŋ, Elimori da ŋiniŋajep Edeke.” 12 Aso do inera ŋinituŋanan kaoni akekiro ilopet kakonyen nuka Edeke. 13Kanuka ŋun kenyeis bobo atubonokin bonik ka bonik, konye aitelekarit kitogogoŋoto na ebe sirikibwaikis ekomio karaida aitiguikinet orot loka onacekon 14 Ajeni eoŋ bobo da etogogoŋit noi kotoma Ejakait Yesu ebe emamei ibore yeniketal kotoma oinonoke. Konye ŋin yeneomit ibore araut yeniketal, erai yeniketal kamakeŋ. 15 Naarai arai ekadakinit onacekon kanuka inyamatakon, mam bobo ilosi kwape ejaar amin. Sirikimudia yenabu Kristo kotwanik kanuka inyamatakon. 16 Aso kinyek yenejok kamakus ainyanakinio. 17 Naarai ajakanut naka Edeke mere ainyam ka aimat, dimarai adolit ka ainapakin ka aiyalama da kOmoyo Lokalaunan; 18naarai ŋin yenijaanakini Kristo kotoma akiro kaŋun, isiyalamikinit Edeke, ecamunito da ituŋa. 19 Aso do katupasi akiro nuka ainapakin ka nuka adukonor bonik ka bonik. 20Sirikimuna aswam naka Edeke kanuka inyamat. Abeit elaete kere, dimarai erono ituŋanan yenenyami kitiguikinia ice; 21 ejok ainyein ainyam karaida aimat ebino, karaida aswam akirot kere naitiguikini onacekon, 22Aiyuun naijaatar, kojaut kaŋin ijo elopet kakonyen nuka Edeke. Isirereŋitoi ŋin yenimam etubokin ilopet kotoma akirot naceamunit. 23 Konye yenebuonokin arai enyami etubokinio aitelekar, naarai mam enyamit kaiyuun; naarai ŋiniswamisioit namam elomuni kaiyuun erai adiakar,151Kibusakinit oni lukagogoŋok aibwok akalanyanut naka luemamei agogoŋ, kwabo mere aisiyalamikina bonik. 2 Kesiyalamikisi oni ŋinituŋanan ikeidunyet kodum ajokis kodukoi da. 3 Naarai Kristo da mam esiyalamikina elopet bon; dimarai kwape iwadikatere ebe, “Amorosito nuka lukimoromoroete jo, apotu kadoikis eoŋ.” 4 Naarai nuewadikatai sek, ewadikatai kanuka aisisianakinia oni, tetere kanuka atitiŋikin ka aitalakara naka nukiwadikatai kidumuni amun. 5 Edeke da loka atitiŋikin ka aitalakara koinak yes aomit adiopet bonik ka bonik koidicane loka Kristo Yesu, 6tetere itopoloorete Edeke Papa da loka Ejakaitiwok Yesu Kristo, ketau ediopet ka eporoto da ediopet. 7Kanuka ŋun, kisukunyanakinos bonik ka bonik, kwape kiisukunyikinia Kristo oni, tetere itopoloorio Edeke. 8 Naarai kalimokini ebe araun Kristo ebulesit loka aitutuket naka akepio kanuka abeit naka Edeke, tetere itogogoŋi aisumuneta nuka lukapapaakosi, 9 bobo da tetere Imo itopoloorete Edeke kanuka akeitim, Kwape iwadikatere ebe, “Kanuka ŋun ŋes kalimonoria jo kotoma atekerin, Ayeikinenei ekonikiror.” 10 Bobo da ebe, “Kolelata, yes atekerin, nepepe kiketuŋa.” 11 Bobo da ebe, “Yes atekerin kere, kituroto Ejakait, Kituroto da ŋes Ituŋa kere.” 12 Bobo da ebala Isaia ebe, “Ejaun aliasit naka Yese, Ŋes loenyouni ayait atekerin; Emunokinos ŋol atekerin.” 13Edeke da loka amun kilelebik yes aiyalama kere ka ainapakin kotoma aiyuun, kiyatanakinos noi ajaut kamun kotoma apedor naka Emoyo Lokalaunan. 14Ikainacan, etogogoŋit eoŋ elopet kanukus ebe ileleba yes da ajokis, isilelebitai acoa kere, bobo da ipedorete aikwenyanar bonik ka bonik. 15 Konye kewadikakinit yes katitiŋ naepol katutubeta ace, aisiitun, kanuka asianut nakainakinit Edeke, 16 tetere araun ebulesit loka Kristo Yesu mama ejaas atekerin, keswamak Akiro Nukajokak nuka Edeke aswam naka esasedoti, tetere eraunete atekerin asubanit naecamunitai, naitalaunit Emoyo Lokalaunan, 17Aso ejai akirot naaolobobotor kotoma Kristo Yesu kakonyen nuka Edeke. 18 Naarai mam atitiŋikini einer akirot namam Kristo iswamat kotomakaŋ, tetere erimarete atekerin, kanuka akirot arai aswamisioit, 19 kotoma apedor naka aanyuneta ka nukaumokin, kotoma apedor naka Emoyo Lokalaunan, kwaŋin ameun ka Yerusalem, kiton da airiamar Iliriko etodol alimonokin Akiro Nukajokak nuka Kristo, 20 kwabo alosikinit alimonokin Akiro Nukajokak, mere neelimoritere ekiror loka Kristo, kenyek adukokin apetetait naka icetuŋanan, 21 konye kwape iwadikatere ebe, “Eanyunete ŋul lumam alimonokinitai akekiro, Ejenunete da ŋul lumam iirarito.” 22 Kanuka ŋun ŋes ketikokinitere irwan ipu kenyek abunore mamakus, 23konye kwana, naarai emamei bobo eoŋ aibois katutubeta kanu, bobo da ameun ikar luipu emiela abunore mamakus, 24 amuno aanyun yes naetorio alosit Sipain, yes da kinyamakinete eoŋ korotoka, kadau ber aipejokin yes adaun aimue. 25 Konye kwana alosi Yerusalem, ejaanakini lukalaunak. 26 Naarai isiyalamikinito luko Makedonia ka Akaia atukonokin iboro akorakin lukican lukotoma lukalaunak luejaas Yerusalem. 27 Naarai isiyalamikinito kesi, ido da ejai kes apesen kamakec, naarai arai imorikikinete Imo arereŋesiokec nuka emoyo, ibusakinit da kes aijaanakin ŋul karereŋesiokec nuka akuan. 28Aso kadau eoŋ ŋun, kepucak kes araito ŋin, etori mamakus alosit Sipain; 29 ido ajeni ebe naabunio mamakus, abuni kaileleba naka arereŋ naka Kristo. 30 Keŋaiŋait yes, iinacan, kanuka Ejakaitiwok Yesu Kristo, kanuka amin da naka Emoyo, koutas nepepe keoŋ kotoma ailipikus kanukaŋ mama ejai Edeke, 31ebe ketajari kama ejaas lukepali kotoma Yudaya, bobo da akaijaanakin nakijaar ŋina Yerusalem korau naisiyalamikinit lukalaunak; 32tetere adoluni mamakus kaiyalama, kanuka akote naka Edeke, keyeŋ nepepe kayes. 33Edeke loka ainapakin kojai nepepe kayes kere. Amen.161Eturit Poibe kinaciwok kamakus, naerai akejaanakinan naka ekanisa loka Kenekerea, 2tetere isukunyikinete ŋes kotoma Ejakait kwape ibusakinitor lukalaunak, kisigalikis ŋes kotoma akirot kere naipuda kamakus, naarai arau ŋesi akeŋarakinan naka ituŋa luipu, ka eoŋ da elopet. 3 Kiyogata Pirisika ka Akuila ikeswamak lukaupaka kotoma Kristo Yesu, 4luakapakina cut ajepario akwesikec kanuka aijaraka, luemalai, kwabo mere eoŋ bon konye ikanisan kere luka Imo, 5 kiyogata da ekanisa loejai togokec. Kiyogata Epaineto lominataka, loerai losodit loko Asia kotoma Kristo. 6Kiyogata Mariam, nakitaaritoi noi kanukus. 7 Kiyogata Anderoniko ka Yunia ipajenaka ka ikijoreoritono nepepe keoŋ; luejenikina kokiyakia, lukageikinete eoŋ toma Kristo. 8Kiyogata Amupiliato lominataka toma Ejakait. 9Kiyogata Urubano ekeswaman aupawok toma Kristo, ka Sitakus lominatakaŋ. 10Kiyogata Apele, loecamunitai toma Kristo. Kiyogata lukokale loka Arisitobolo. 11Kiyogata Kerodion epajenaka, Kiyogata lukokale loka Narakiso luejaas toma Ejakait. 12Kiyogata Turupaina, ka Turuposa nuitaaritos toma Ejakait. Kiyogata Perisida naminat, naitaaritoi noi toma Ejakait. 13 Kiyogata Rupo loseuna toma Ejakait, ka totoke ka nakaŋ da. 14Kiyogata Asunikirito, ka Pelegon, ka Kereme, ka Pataroba, ka Kerema, ka iinacan luejaas nenipe kakes. 15Kiyogata Pilologo ka Yulia, ka Nerea ka inacike, ka Olumupa, ka lukalaunak kere luejaas kakes. 16 Kiyoganakinos bonik ka bonik kainu nakalaunan. Kiyogaete yes ikanisan kere luka Kristo. 17 Keŋaiŋait yes iinacan, kocoito ŋul lueyaunete atiaketa ka nuitiguikinete, asurokin aisisianakin naipotu yesi kisisiata; kinacata kes. 18 Naarai luikote kwaŋin mam ijaanakinete Ejakaitiwok Kristo, dimarai akecekoikes; iŋalaarete itauon luka luemamei akirot kanuka akecekiro nuejijim nuijodijodete. 19 Naarai adolok akusirima ituŋa kere. Aso aleli kanukus, konye akoto yes koraas lukacoa kotoma akiro kanuejok, ka luiyapaara kotoma akiro kanueroko. 20 Edeke da loka ainapakin idecideci Satan atipet kwap kakejenekus. Asianut naka Ejakaitiwok Yesu Kristo kojai kayes. 21 Kiyogai yes Timoteo ekeswaman aupaka; ka Lukio ka Yason ka Sosipater, ipajenaka. 22Eoŋ Teretio, ekewadikan ebalua lo, keyogai yes toma Ejakait. 23 Kiyogai da Gaio lokesipejo eoŋ ka ekanisa kere. Erasito, ekeŋadan loka ere, ka Kuarito onacewok, kiyogaete. [24Asianut naka Ejakaitiwok Yesu Kristo kojai kayes kere.] 25 Mama ejai ŋol loepedori aitogogoŋ yes kwape ejaatar Akakiro Nukajokak, ka alimonokinio naka Yesu Kristo, kwape ejaar apukokinio naka aiyeiyea naimunonitai ameun ikar lupeŋo, 26 konye kwana itakanunitai, ido kanuka aiwadikaeta nuka inabin itejenunitai mama ejaas atekerin kere kwape kicorakinitor Edeke loka ikar kere tetere erimarete aiyuun— 27 Mama ejai Edeke bon lokacoa kojai aibuses kotoma Yesu Kristo ikar ka ikar. Amen. |