https://www.bible.com/bible/436/rev.3.ate61
Apukokino
1
1
Apukokin naka Yesu Kristo naabu Edeke koinak ŋes aitodikin ikebulesin nuibusakinit adoikin atipet, kitejen kanuka aijukar ekemalaika mama ejai Yokana ekebulesit, 2
lokitejenuni akirot naka Edeke, ka ajenanut naka Yesu Kristo, kere nuabu koany. 3
Isirereŋitoi ŋin yenesiomi, ka ŋul da luepupete akiro nuka adwarasit kana, ka luericete da nuiwadikatai kotomakeŋ; naarai eapie apak.
4
Yokana mama ejaas ikanisan ikanykaarei luka Asia:
Asianut kojai mama ijaas ka ainapakin nuepote kama ejai ŋol loejai, ido lokejai, ido loebuni, ido kama ejaas Imoyon ikanykaarei luejaas kiŋaren keicoloŋoke, 5
ido kama ejai Yesu Kristo, ekajenan lomunot, ekiyai loka ikatwak, ekayaiton da loka ikabakan luka akwapin.
Mama ejai ŋol lokimina oni, lokilacuni da kotoma adiakanaretawok kanuka aokotoke, 6
kituluo da oni ajakanut, isasedotin luka Edeke Papake, mama ejai ŋol kojai aibuses ka ailerit, kiton ikar ka ikar. Amen. 7
Koany ebuni nepepe kidouon, eanyuni ŋes ŋinikoŋu, kere lukicumete ŋes; ibworos atekerin kere nuka akwap kanukeŋ. Eebo, Amen.
8
Ebala Ejakait Edeke ebe, “Arai eoŋ Alupa ka Omega
, loejai, ido lokejai, ido loebuni, Lokapedor kere,”
9Eoŋ Yokana, onacekus, loamori nepepe kayes aiticanio, ka ajakanut, ka atitiŋ, nuejaas toma Yesu, abu kajai apujan naenyaritai Patumo, kanuka akirot naka Edeke, ka aitejenun da nuka Yesu. 10Abu kajai kotoma Omoyo kapaaran naka Ejakait, kasodi apupun eporoto loepol kokaukaŋ, bala loka arupepe, 11
kobala ebe, “Kiwadik nuiany toma oitabo, kijukak ikanisan ikanykaarei, mama ejai Epeso, ka Sumuruna, ka Perugamo, ka Suatira, ka Sarudio, ka Piladelupia, ka Laodikia da.”
12Abu kebelokin aanyun eporoto loenera keoŋ, ido naebelokinor abu kaany ipirin lukatalai ikanykaarei luka esabu, 13
ido kokidiŋ kipirin lukatalai kaany loeputosi bala okoku loka etuŋanan enapit anapito naedolit akejen, koenite da amuny naka esabu atorobuke; 14
kokwaŋ akouke ka iketim da kwape ajul nukakwaŋak, kwape akako; akekonye da kwape aipeloret naka akim, 15
akekeje da aikomon nuepwatat, bala naililiauna kotoma oupa, eporotoke da kosubite bala eporoto loka akipi nuipu; 16
ido abu kitiŋite aacer akanykaarei kakanike nakoteten, ido kolom kaitukuke ekileŋ loekwana kowaitin iarei kere, ereeteke da kosubite bala akoloŋ naecai kakepedor.
17
Naanyunia ŋes, abu kebirokin akejeneke bala atwanit. Kedokok akanike nakoteten, kabala ebe, “Sirikiyoŋ, arai eoŋ losodit ka lokawasia da, 18ido Lokajaran; abu katwanite, ido koany ajari ikar ka ikar, ajai kilaceta luka Atwanare ka luka Okatwak. 19
Aso kiwadik nuiany, nuejaas, ka nuejaunete da akaulo kaŋun. 20
Aiyeiyea naka aacer akanykaarei nuiany kakanika nakoteten, ka ipirin lukatalai ikanykaarei luka esabu. Aacer ŋun akanykaarei kes imalaikan luka ikanisan ikanykaarei, ka ipirin da lukatalai ikanykaarei kes ikanisan ikanykaarei.
2
1
“Kiwadikak emalaika loka ekanisa lokotoma Epeso ebe: Inera kwanata ŋol loitiŋit aacer akanykaarei kakanike nakoteten, loelosenenei kokidiŋ opirin lukatalai ikanykaarei luka esabu ebe:
2
“Ajeni akoniswamisio, ka aitaaritoi, ka aŋirikinitekon, ido kwape mam ipedoria atitiŋikin ituŋa lukaronok, ido ibu kitem ŋul luenyaras bonik ikiyakia, kwabo mam eraas, kodum ebe eraas ikeŋalak, 3Iŋirikinit ka atitiŋikin kanuka ekakiror, kwabo mam ibu kopas. 4Konye ejai eoŋ akirot na kajo ebe ibu kojal akonimin nasodit. 5Aso kiitu nekibirunor, kitoronikin, kiswama da aswamisio nusodit. Konye arai mam iswamai kwaŋin, abuni mamakon, alemari da epirikon lokatala kaiboisike, dimikito kitoronikin. 6
Konye ejai jo na ebe ilait aswamisio nuka Inikolain, nualait eoŋ da. 7
Ŋin yenejai akit, kopup nuelimokini Emoyo ikanisan. Ŋin yenipikori ainakini ŋes ainyam araito nuka ekitoi loka aijar, loejai Paradais
loka Edeke.
8
“Ido kiwadikak emalaika loka ekanisa lokotoma Sumuruna ebe: Inera kwanata ŋol losodit ka lokawasia da, loabu kotwanite ido ejari, ebe:
9
“Ajeni aiticaniokon, ka ikonibakor, (konye irai ekabaran) ka amoromor naka ŋul kaluenyaras bonik Iyudayan, kwabo mam eraas, konye eraas atukos naka Satan. 10
Sirikiyoŋ nukidoikinete aisirieb jo, Koany, elosi Satan acakakin ice kayes aidaris, tetere kitemio, kiticanio da yes apaarasia atomon. Koraenena lomunot kiton atwanare, eoŋ da kainakini jo aboko naka aijar. 11
Ŋin yenejai akit, kopup nuelimokini Emoyo ikanisan. Ŋin yenipikori mam epipilikini cut atwanare nakiareit.
12
“Ido kiwadikak emalaika loka ekanisa lokotoma Perugamo ebe: Inera kwanata ŋol loejai ekileŋ loekwana kowaitin iarei kere ebe:
13
“Ajeni mama iboio, neejai eicoloŋ loka Satan; ido ikamunit noi ekakiror, kwabo mam ibu koŋer aiyuunika, karaida kapaarasia nuka Antipa ekajenanika, lomunotoka, loaarakinio mamakus, mama iboio Satan. 14
Konye ejai eoŋ akiro nuikidioko kajo, naarai ejaas jo ituŋa luikamunito aisisianakin naka Balaam, loesisianakini Balak acakakin aitiguikinet akonyen nuka idwe luka Isirael, ainyam nueinakinio aputosia, ka adotear da. 15Ejaas jo da kwaŋin ituŋa luikamunito aisisianakin naka Inikolain, 16Aso kitoronikin. Konye arai mam iswamai kwaŋin abunit atipet mamakon, ajiikini kakes kekileŋ loka aitukuka. 17
Ŋin yenejai akit, kopup nuelimokini Emoyo ikanisan. Ŋin yenipikori ainakini ŋes emanu loebwaitai, ainakini da ŋes amoru naekwaŋ, ido iwadikatai amoru ekiror lokitetet, lomam ituŋanan ejeni nabarai yenijauni.
18
“Ido kiwadikak emalaika loka ekanisa lokotoma Suatira ebe: Inera kwanata Okoku loka Edeke, ŋol loejaas akonyeke bala aipelonoreta nuka akim, akejeke da eputosi kwape aikomon nuepwatat ebe:
19“Ajeni akoniswamisio, ka amin ka aiyuun ka aijaanakin, ka aŋirikinitekon da, ka aswamisiokon nukawasia kwape itelekaritotor kwa nusodit. 20
Konye ejai eoŋ akirot na kajo, naarai inyeinit aberu ŋin, Yesebel, naenyara bon anabi, isisianakini iŋalaari da ikabulesin tetere edotearos, ka ainyam nueinakinio aputosia. 21Abu kainak ŋes apak tetere itoronikin, kwabo mam ekoto aitoronikin kotoma adoteuke. 22Koany, acakakini ŋes ojam, ka ŋul da luedoteete nepepe kaŋes acakakini toma aiticanio naepol, dimikito kitoronikinos kotoma aswamisioke. 23
Ido aari ikedwe katwanare. Ejenunete da ikanisan kere ebe eoŋ ŋopeŋol loererei aomisio ka itauon, eoŋ da ainakini ŋinidiopet kayesi kwape ejaatar aswamisiokus. 24Konye kabala yes ice luijaas Suatira luemamei aisisianakin ŋin kere, lumam ijenete nuidulok nuka Satan, kwape ineratar, mam kebwaikini yes abwokon ace; 25
nabarai kikamut noi yenijaatar, kiton naabunio. 26
Ŋin yenipikori, ka aricit aswamisioka kiton awasia, ainakini ŋes apolou kama ejaas atekerin. 27
Ŋes da icokiei kes kebela loka asuat, kwape ebwaŋabwaŋatar amoti nuka ekajean, kwape kainakinia da Papaka eoŋ; 28eoŋ da ainakini ŋes etop. 29Ŋin yenejai akit, kopup nuelimokini Emoyo ikanisan.
3
1
“Ido kiwadikak emalaika loka ekanisa lokotoma Sarudio ebe: Inera kwanata ŋol loejaas Imoyon ikanykaarei luka Edeke, ka aacer akanykaarei ebe:
“Ajeni akoniswamisio; ebe ejai jo ekiror ebe ijari, konye irai lokatwan. 2
Kokweny, kitogogoŋ da nuesalito nuekotosi atwakare, Naarai mam abu kadum akoniswamisio nuedolito kakonyen nuka Edekeka. 3
Aso kiitu kwape kijaunia, kwape kipupunio da; koric, kitoronikin da. Aso arai mam ikwenyi, abuni eoŋ kwape ekokolan, kwabo mam ijenuni esawa loabunio mamakon. 4
Konye ejaas jo ikiroria luikidioko koSarudio, ituŋa lumam emunaarito inapenekec; elosenenete kesi nepepe keoŋ enapito lukakwaŋak, naarai ibusakinito. 5
Ŋin yenipikori itanapio kwaŋin inapen lukakwaŋak, kwabo mam cut amwatari ekekiror koitabo loka aijar; eoŋ da alimori ekekiror kakonyen nuka Papaka, kakonyen da nuka imalaikanake. 6Ŋin yenejai akit, kopup nuelimokini Emoyo ikanisan.
7
“Ido kiwadikak emalaika loka ekanisa lokotoma Piladelupia ebe: Inera kwanata Lokalaunan, lokabeit, loejaas kelacet loka Daudi, loeŋaari kwabo emamei yenegoli, loegoli da kwabo emamei yeneŋaari, ebe:
8
“Ajeni akoniswamisio. Koany, ebwaiki kakonyenekon ekek loeŋaara, lomam epedori ituŋanan kere agolokin. Ejai jo apedor naedit, iricit da akakirot, kwabo mam ibu koŋer ekakiror. 9
Koany, ainakini lukatukos naka Satan, luenyaras bonik Iyudayan, kwabo mam eraas, konye iŋalaete; koany, ainakini kes aponare, akukonokin kakejenekon, ejenunete da ebe kamina jo. 10
Naarai iricit akakirot naka aŋirikinit, eoŋ da karici jo kotoma osawa loka aitemio, loebuni kakwapin kere, aitem ŋul luiboiete kakwap. 11
Abuni eoŋ atipet; kikam yenijaatar, kinye ituŋanan kere ayaŋaar abokokon. 12
Ŋin yenipikori, etarauni ŋes epir kotoma oyekalu loka Edekeka; kwabo mam cut elomari kiŋa; eoŋ da ewadikakini ŋes ekiror loka Edekeka, ekiror da loka ere loka Edekeka, ŋes Yerusalem lokitetet loijesuni abunore kotoma akuj; kama ka Edekeka, ekirorika da lokitetet. 13Ŋin yenejai akit, kopup nuelimokini Emoyo ikanisan.
14
“Ido kiwadikak emalaika loka ekanisa lokotoma Laodikia ebe: Inera kwanata ŋol loerai Amen, ekajenan lomunot lokabeit da, ageunet naka aisub naka Edeke ebe:
15
“Ajeni akoniswamisio, ebe mam ililim karaida mam imwana. Tiejok arai kolilim arai komwaŋa! 16Aso naarai ijalam, kwabo mam imwana karaida mam ililim, kalekari jo kaitukuka. 17
Naarai ibala ebe, Arai ekabaran, ido abarit, kwabo mam epuda ibore. Kwabo mam ijeni ebe irai lokican, lokitimitoi, loilwaritoi, emuduk, loimujalal da. 18
Aso ketetemikini jo ebe, kogwel kamakaŋ esabu loililiaunitai kakim, tetere ibari, ka inapen da lukakwaŋak tetere inapi, kinyeis ileic luka amujalalakon atakanun, ka ekiya da lokinyonyoa akonyekon tetere ikwenyi. 19
Etoroni eoŋ ŋul kere luamina, alecori da; aso kodunyak, kitoronikin da. 20
Koany, abwoi kokek ekuŋukuŋi; arai epupi ituŋanan kere ekaporoto, koŋaa da ekek, alomari mamakeŋ, amori nepepe kaŋes, ŋes da keoŋ. 21
Ŋin yenipikori, ainakini ŋes aiboi nepepe keoŋ oicoloŋoka, kwape abu kepikoria keboikin nepepe ka Papaka oicoloŋoke. 22Ŋin yenejai akit, kopup nuelimokini Emoyo ikanisan.”
4
1
Akaulo kaŋun abu kete, ido koany, ekek loeŋaara toma akuj! Kobala da eporoto loagei eoŋ apupun inera keoŋ kwape loka arupepe, ebe, “Kodoku ne, eoŋ da ketodikini jo nuibusakinito ajaun akaulo kanu.” 2
Atipet abu kajai kotoma Omoyo, ido koany, kibwaikinitete eicoloŋ toma akuj, ka loiboie koicoloŋ kaŋol! 3
Ŋol da lokiboie kotakani koputosi bala amoru naka ayaseper, ka naka sarudio, kirimorite etaluka eicoloŋ, kotakani koputosi bala emeralid. 4
Kirimorito iicoloŋo akaisaarei kaluoŋon eicoloŋ, kiboiete imakio akaisaarei kaluoŋon koicoloŋo kaŋul, konapito inapen lukakwaŋak, kojaas da abokoi nuka esabu akwesikec. 5
Kolomununei aimiliaunun koicoloŋ, ka iporotoi, ka agiro, konokete da atalai akanykaarei nuka akim koiŋaren keicoloŋ, kes Imoyon ikanykaarei luka Edeke; 6
ido kiŋaren keicoloŋ bala aŋolol naka aroet, koputosi bala agilasi.
Kokidiŋ keicoloŋ, kowaitin da kere luka eicoloŋ, kejaas lukajarak iwoŋon, lukileleba akonye kiŋaren kokau da. 7
Keputosi lokajaran losodit bala eŋatuny, ka lokajaran lokiareit bala itaok, kejai lokajaran lokiwuniet ereet bala loka etuŋanan, ka lokajaran lokiwoŋonet da bala emorukaalet loeporitoi. 8
Lukajarak ŋul luoŋon kejaas ŋolidiopet abebenoka akanykape, kileleba akonye iwaitin kere, kotoma da, kwabo mam iyeŋete paaran ka kuare da ayoore ebe,
“Lokalaunan, lokalaunan, lokalaunan, Ejakait Edeke Lokapedor kere,
Lokejai, ido loejai, ido loebuni da!”
9
Ido napeinanakinete lukajarak loiboie koicoloŋ loejari ikar ka ikar aibuses, ka ayoŋio, ka aimal da, 10
kanen ibiroros imakio akaisaarei ka luoŋon kakonyen nuka ŋol kaloiboie koicoloŋ, emaete ŋol loejari ikar ka ikar, kocakanakinete abokoikec kiŋaren keicoloŋ, koyeete ebe,
11“Ibusakinit ijo, Ejakaitikosi ka Edekekosi da, Adumun aibuses, ka ayoŋio, ka apedor, Naarai ibu ijo kosub iboro kere,
Ijo kojaut, kesubio da kanuka akotekon.”
5
1
Abu kaany eitabo lokiwadikatai iwaitin kere, kotoma akan naka ŋol kaloiboie koicoloŋ, ipucakinitai aipuceta akanykaarei. 2Abu kaany da emalaika loegogoŋ elimokini keporoto loepol ebe, “Iŋai bo ibusakinit apukor eitabo, ka aibil da aipucetake?” 3Kwabo emamei ituŋanan kotoma akuj, karaida kakwap, karaida kokwap kakwap, yenepedori apukor eitabo ŋol karaida asesen tomake. 4Abu kamony noi, naarai mam edumuna yenibusakinit apukor eitabo, karaida asesen tomake. 5
Kalimok ediopet komakio ebe, “Sirikimony; koany epiko Eŋatuny loka ateker naka Yuda, Aliasit naka Daudi, tetere epedori apukor eitabo ka aipucetake akanykaarei.”
6
Abu kaany kokidiŋ keicoloŋ, ka lukajarak ŋul luoŋon, kokidiŋ da naka imakio ebwoi Imerekek, esubit bala earitai, ejaas amumwara akanykaarei ka akonye da akanykaarei, nueraas imoyon ikanykaarei luka Edeke lukijukunio toma akwap kere. 7
Kolot ŋesi kolem eitabo kakan nakoteten naka ŋol kalokiboie koicoloŋ. 8
Napelemuni eitabo ŋol, kibiroros lukajarak luoŋon ka imakio akaisaarei ka luoŋon, kakonyen nuka Imerekek, ŋolidiopet kakesi kejai adeudeu, ka atanyia nuka esabu nukileleba lukisupurununo, nueraas ailip naka lukalaunak; 9
koyooto ekosio lokitetet, ebe,
“Ibusakinit ijo alemun eitabo, ka apukor da aipucetake, Naarai aponi koari, kogwelak Edeke kaokotokon ŋiniteker, ka aŋajep, ka ituŋa, ka ajena.
10
Kituluo kes ajakanut ka isasedotin mama ejai Edekewok,
Irumete kesi kakwap.”
11
Kasodi kaany, keira eporoto loka imalaikan luipu kowaitin kere luka eicoloŋ, ka lukajarak, ka imakio, etiaikec keraas ilukumin itomon irwan ilukumin itomon ka ilukumin irwan ilukumin, 12
ebalas keporoto loepol ebe, “Ibusakinit Imerekek yenaponi koarai, adumun apedor, ka abar, ka acoa, ka agogoŋ, ka ayoŋio, ka aibuses, ka arereŋ da!” 13
Keira da ŋinisubat kere yenejai toma akuj, ka akwap, kokwap da kakwap, kaŋolol, ka iboro kere luejaas tomake, kobalas ebe, “Mama ejai ŋol loiboie koicoloŋ, ido mama ejai Imerekek, kojai arereŋ, ka ayoŋio, ka aibuses, ka ailerit kiton ikar ka ikar!” 14
Kobalas lukajarak luoŋon ebe, “Amen!” Kibiroros da imakio komaata.
6
1
Kasodi kaany naapukoria Imerekek adiopet naka aipuceta akanykaarei, keira da ediopet ka lukajarak luoŋon inera bala eporoto loka agiro ebe, “Bia!” 2
Kaany, ido koany, ebalasit lokakwaŋan, kejai ekebwaneniton da akabwa; koinakinai aboko, koloma da aipikor, ido ipikori.
3Naapukoria ŋesi aipucet nakiareit, keira lokajaran lokiareit ebala ebe, “Bia!” 4
Kolom do ebalasit ece, loereŋ; koinakinai ekebwanenitonike alemar ainapakin kotoma akwap, tetere ituŋa earas; koinakinai da ŋes ekileŋ loepol.
5
Naapukoria ŋesi aipucet nakiwuniet, keira lokajaran lokiwuniet ebala ebe, “Bia!” Kaany, ido koany, ebalasit lokirionon, kejai ekebwanenitonike aitemis akanike. 6Keira bala eporoto kokidiŋ lukajarak luoŋon ebala ebe, “Aitemis naka akiria naka adenari, ka aitemisio auni nuka esairi nuka adenari, kwabo mam imunaari akinyet karaida ebino!”
7Naapukoria ŋesi aipucet nakiwoŋonet, keira eporoto loka lokajaran lokiwoŋonet ebala ebe, “Bia!” 8
Kaany, ido koany, ebalasit loekwele, ekebwanenitonike da ekekiror Atwanare, kotupa ŋes Okatwak; koinakinai kes apolou kama katutubet nakiwoŋonet naka akwap, koarete kekileŋ, ka ebeli, ka atular, ka itiaŋ luededeŋ luka akwap.
9
Naapukoria ŋesi aipucet nakikanyet, kaany kokwap ketem, imoyon luka ŋul kalukeario kanuka akirot naka Edeke, kanuka ajenanut da nakejaatar. 10
Kiworoto keporoto loepol ebe, “Ijo Ejakait, Lokalaunan, lokabeit, itodoli ai mam kitubokini, karaida ainyaŋ aokotokosi kama ejaas ŋul luiboiete kakwap?” 11
Koinakinai kes ŋinidiopet anapito nakakwaŋan, kolimokinai da kes aiyeŋun bobo apak naedit, kiton naitodolikinor etiai loka ibulesin lukaupakec, ka ikeceinacan, luepote aario kwape kakesi.
12
Naapukoria ŋesi aipucet nakikanyetekape, kaany, kejai amaran naepol naka akwap; kirioniar akoloŋ bala epuko loka ajul nukirionok, koluor elap da kere bala aokot, 13
kibirununos aacer nuka akuj toma akwap, kwape eraraununia etini araitoke nuelidio naejanijaŋia ekwam loepol. 14
Kilicarai akuj bala eitabo loenunukitoi, kolemarai ŋoliroŋat ka ŋinipujan kaiboisike. 15
Kosodete ikabakan luka akwap, ka ikapolok, ka ikapolokitok iserikalei, ka ikabarak, ka ikagogoŋok, ka ŋinibulesit ka yenejakakai, koŋopata kotoma abuai, ka atiiban nuka iroŋan, 16
kobalas iroŋan ka atiiban ebe, “Kibirunos mamakosi, kitoŋopai sio kakonyen nuka ŋol kaloiboie koicoloŋ, ka anyunyura da naka Imerekek; 17
naarai adol apaaran naepol naka anyunyurakec, iŋai bo do epedori aibwo?”
7
1
Akaulo kaŋun abu kaany imalaikan iwoŋon ebwoete kagoria aoŋon nuka akwap, itikokinete ikwamin luoŋon luka akwap, kinyek ekwam aikut akwap, karaida aŋolol, karaida okitoi kere, 2Kaany da emalaika ece ikeun kama elomunia akoloŋ, kejai aipucet naka Edeke lokajaran, kiworo mama ejaas imalaikan lukeinakinitai apedor amunaar akwap ka aŋolol da, keporoto loepol, 3
ebe, “Sirikimunaasi akwap, karaida aŋolol, karaida ikito, kiton nekidaunia aipucakin aipucet oreeta luka ibulesin luka Edekewok.” 4
Keira da etiai loka luepucakinitai emwaasi ilukumin akwatat ka akaisaoŋon ka luoŋon luepucakinitai, lukotoma ŋiniteker naka idwe luka Isirael. 5Luepucakinitai lukateker naka Yuda, ilukumin itomon ka luarei, lukateker naka Reuben, ilikumin itomon ka luarei, lukateker naka Gad, ilukumin itomon ka luarei, 6lukateker naka Aser, ilukumin itomon ka luarei, lukateker naka Naputali, ilukumin itomon ka luarei, lukateker naka Manase, ilukumin itomon ka luarei, 7lukateker naka Simeon, ilukumin itomon ka luarei, lukateker naka Lebi, ilukumin itomon ka luarei, lukateker naka Isakar, ilukumin itomon ka luarei, 8lukateker naka Sebulun, ilukumin itomon ka luarei, lukateker naka Yosep, ilukumin itomon ka luarei, lukateker da naka Benyamin, ilukumin itomon ka luarei.
9
Akaulo kaŋun abu kaany, ido koany, ekodet loepol noi, loemamei ituŋanan yenepedori aimar, ituŋa luka ŋinijena, ka luka atekerin, ka ituŋa, ka aŋajepa, ebwoete koiŋaren keicoloŋ, kakonyen da nuka Imerekek, itanapitai inapen lukakwaŋak, kitiŋito amusog kakaninikec, 10
kiworoete keporoto loepol ebe, “Ebeit Edekekosi loiboie koicoloŋ, ka Imerekek da aitajar!” 11
Kobwoete imalaikan kere airimor eicoloŋ, ka imakio, ka lukajarak da luoŋon, kibiroros kesi ebuburia kiŋaren keicoloŋ, komaata Edeke, 12kobalas ebe, “Amen! Kojai arereŋ, ka aibuses, ka acoa, ka aimal, ka ayoŋio, ka apedor, ka agogoŋ mama ejai Edekekosi ikar ka ikar! Amen.”
13Koboŋok ediopet komakio, kalimok eoŋ ebe, “Lukaŋai bo lu, luitanapitai inapen lukakwaŋak, ai bo da keponiata kesi?” 14
Katema ŋes atiar, “Ekajakait, ijo ijeni.” Kabala ebe, “Lu kes lukepote kotoma aiticanio naepol, elota inapenekec, etwakaŋata kes kotoma aokot nuka Imerekek.
15
Kanuka ŋun ejaas kiŋaren keicoloŋ loka Edeke,
Ijaanakinete paaran ka kuare kotoma oyekaluke;
Ŋol da loiboie koicoloŋ, erapari kes kewemake.
16
Mam bobo eriebi kes eteŋei, karaida akure aijak,
Mam bobo akoloŋ enomonori kes, karaida amwanis apeor.
17
Naarai icokiei kes Imerekek yenejai kidiŋ keicoloŋ, Iŋarenikini kes atanin nuka akipi nukajarak;
Emwatari da Edeke akiyo kere kakonyenekec.”
8
1
Naapukoria Imerekek aipucet nakikanyetekaarei, kejai aililiŋ toma akuj bala apak naka atutubet naka esawa. 2
Kasodi kaany imalaikan ikanykaarei luebwoenenete kakonyen nuka Edeke, koinakinai kes arupepen akanykaarei.
3
Kobu emalaika ece kobwo koiŋaren ketem, kejai aisupurunet naka esabu; koinakinai ŋes lukisupurununo luipu tetere ibwaikin nepepe kailip naka lukalaunak kere otem loka esabu lokejai kiŋaren keicoloŋ. 4
Kopurio apuru naka lukisupurununo nepepe kailip naka lukalaunak, kakan naka emalaika, kakonyen nuka Edeke. 5
Kolem emalaika ŋol aisupurunet, kilelebik akim nakejai otem, kocakak akwap; kojau agiro, ka iporotoi, ka eimilia, ka amaran da naka akwap.
6Kokapakinos imalaikan ikanykaarei lukejaas arupepen akanykaarei tetere ekusete.
7
Kokut losodit akerupepe, kojau akako ka akim inyalakina kaokot, kocakakinai akwap; kicwea atutubet nakiwuniet naka akwap, kicwea da atutubet nakiwuniet naka ikito, kicwea da anya kere nuepalal.
8
Kokut emalaika lokiareit akerupepe, kocakakinai yenesubit bala eroŋat loepol, loenoki akim, toma aŋolol; 9koraun atutubet nakiwuniet naka aŋolol aokot, kotwana atutubet nakiwuniet naka isuban lukejaas toma aŋolol lukejai aijar; komudiarai atutubet nakiwuniet naka atakerin.
10
Kokut emalaika lokiwuniet akerupepe, kibirun aacerit nakapolon kotoma akuj, enoki kwape akalas, kibirokin atutubet nakiwuniet naka icorin, ka atanin da nuka akipi. 11
Ekiror loka aacerit ŋes Adwaris. Koraun atutubet nakiwuniet naka akipi adwaris, kotwaka ituŋa luipu kanuka akipi kaŋun, naarai etadwaritai.
12
Kokut emalaika lokiwoŋonet akerupepe, kinomai atutubet nakiwuniet naka akoloŋ, ka atutubet nakiwuniet naka elap, ka atutubet nakiwuniet da naka aacer, tetere itumutonio atutubetekec nakiwuniet, kinye atutubet nakiwuniet naka apaaran acaun, akuare da kwape kwaŋin.
13
Kasodi kaany, keira da emorukaalet ediopet, loeporitoi kokidiŋ kakuj, ebala keporoto loepol ebe, “Itukwi, itukwi, itukwi ŋul luiboiete kakwap, kanuka iporotoi ice luka arupepen nuka imalaikan iuni lukekapakina aikut!”
9
1
Kokut emalaika lokikanyet akerupepe, abu kaany da aacerit naebirun kakuj toma akwap, aponi koinakinai ŋes elacetait loka aipany naemamei enaŋeke. 2
Kolaca aipany naemamei enaŋeke, kolom apuru kaipany, kwape apuru naka eupa loepol. Kitumuton apuru naalomuni kaipany akoloŋ ka apak da. 3
Kolom emaase kapuru toma akwap, aponi koinakinai ŋes apolou, kwape ejaatar ikiritona luka akwap apolou. 4
Aponi kolimokinai ŋes ebe mam emunaari anya nuka akwap, karaida ikiot kere yenepalal, karaida ekitoi kere, dimarai ituŋa bonik luemamei aipucet naka Edeke koreetakec; 5aponi koinakinai ŋes aisirieb kes noi, ilapio ikany, kwabo mere aiar kes; korai aisiriebeke kwape aisirieb naka ekiriton naekonyia ituŋanan. 6
Kapaarasia kaŋun da emoete ituŋa atwakare, konye mam edumunete, imielas atwakare, ekeri da atwanare kamakec.
7
Kotakan aput naka emaase bala ibalasin luisikapikinitai ejie, kakwesikec da kojaas nuesubito bala abokoi nuka esabu, koputosi akecekonyen bala akonyen nuka ituŋa. 8
Kejaas kes itima kwape itima luka aŋor, ikelakec da kwape ikel luka iŋatunyo, 9
kejaas kes iboro lukatorob, bala luka aswa, airurum da naka abebenokakec kerai kwape airurum naka agalin nuipu nuka ibalasin luekuboros ojie. 10Kejaas kes ikorio lueputosi ikiritona, ka itido, toma okoriokec ŋes ejai apedorikec aisirieb ituŋa ilapio ikany. 11Kejai kes ekabakakec ŋes emalaika loka aipany naemamei enaŋe, ekekiror kAburanian Abadon, ka Ayonanin da ekekiror Apoluon.
12
Atuboros ican lusodit; koany eriŋa eponito iarei akaulo kaŋun. 13
Kosodi kokut emalaika lokikanyetekape akerupepe, abu keira da eporoto loalomuni kamumwar aoŋon nuka etem loka esabu loejai akonyen nuka Edeke, 14
loalimokini emalaika lokikanyetekape, lokejai arupepe ebe, “Kolac imalaikan iwoŋon lueenitai kocor lokapolon Eupurate.” 15
Kolacakinai imalaikan iwoŋon luetemokinitoi esawa, ka apaaran, ka elap, ka ekaru da, tetere earete atutubet nakiwuniet naka ituŋa, 16Etiai loka ajoresio nuka ikebwanenok emwaasi ilukumin itomon irwan ilukumin itomon irwan aarei; abu kapup etiaikec. 17Ido abu kaany kotoma aitapoet kana ibalasin, ka ŋul da luebwanenito kwana ta: konapito iboro lukatorob bala luka akim, ka luka ebululu, ka luka acukuman; koputosi akwes nuka ibalasin bala akwes nuka iŋatunyo, kolom akim ka apuru ka acukuman kaitukekec. 18Apotu aiticaneta nu auni nualomunete kaitukekec koarata atutubet nakiwuniet naka ituŋa, kes akim, ka apuru, ka acukuman. 19Naarai ejai apedor naka ibalasin toma aitukekec, ido toma okoriokec; naarai eputosi ikoriokec bala imunwo, ejaas akwes, nuisiriebiata.
20
Ituŋa ice kere da, lumam aponi koarai kotoma aiticaneta ŋun, mam apotu kitoronikinos kotoma aswamisio nuka akaninikec, ainyein aima ajokin, ka aputosia nuka esabu, ka epuesa, ka aikomon, ka amor, ka akito, numam epedorete aanyun, karaida aiirar, karaida alosit; 21
ido mam apotu kitoronikinos kotoma aiarakec, karaida kotoma ocudetekec, karai da kotoma adoteukec, karaida kotoma akokokec.
10
1
Kasodi kaany emalaika ece Loegogoŋ ijesuni kakuj, enapit edou, kojai etaluka akouke, koputosi akekonyen bala akoloŋ, akekeje da bala ipirin luka akim. 2Kojai iitabo yenididi yenepukoritai akanike, Kibwaik akejuke nakoteten aŋolol, ka akejuke da nakokediany akwap, 3
kiworo keporoto loepol kwape loka eŋatuny loegat, Napiworoi, kinerata agirokineta akanykaarei ikeceporotoi. 4
Ido naadauniata agirokineta einer, abu kakoto aiwadik, konye abu keira eporoto loebuni kotoma akuj ebala ebe, “Kipucak nuenerata agirokineta akanykaarei, konye sirikiwadik ŋun.” 5
Emalaika da loabu kaany ebwoi kaŋolol ka akwap da, kikeu akekan nakoteten mama ejai akuj, 6
kiyapo kolimite ŋol loejari ikar ka ikar, lokesubi akuj; ka luejaas toma, ka akwap da, ka luejaas toma, ka aŋolol da, ka luejaas toma, ebe mam bobo ejaun apak, 7
konye toma apaarasia nuka eporoto loka emalaika lokikanyetekaarei, naekotor aikut akerupepe, kosodi aiyeiyea naka Edeke aitodolikinio, kwape ejaatar akiro nukajokak nuabu kolimonok ibulesinike inabin.
8
Kosodi abu eporoto loabu keira ebuni kotoma akuj kinera bobo keoŋ kobala ebe, “Kolot, kolem eitabo loepukoro kakan naka emalaika kaloebwoi kaŋolol ka akwap da.” 9
Kalot mama ejai emalaika, kalimok ŋes ainakin eoŋ iitabo. Kabala ŋesi eoŋ ebe, “Kolem, konyam ŋes; edwaruni kakoikikon, konye kaitukukon ewinyuni kwape esik loka ao,” 10Kalem iitabo kakan naka emalaika, kanyam, kowiny kotoma aitukuka kwape esik loka ao, konye kadau ainyam, kodwaru akoikika. 11
Kalimokis eoŋ ebe, “Kibusakinit jo adwarakin bobo ituŋa luipu ka atekerin, ka aŋajepa ka ikabakan da luipu.”
11
1
Aponi kainakin egada loeputosi bala ebela, kabala ebe, “Konyou, kitem eyekalu loka Edeke, ka etem, ka ŋul da luemaete kotomakeŋ. 2
Konye alaro naejai kiŋa keyekalu, kinyek kokiŋa, mam itemi ŋin, naarai aponi koinakinai atekerin, ido icakacakaete kesi ere lokalaunan ilapio akaisaoŋon ka luarei. 3Ainakini da ikakajenak iarei edwarete apaarasia alukumit ka akwat aarei ka akaisakanykape, konapito ipukoi.”
4
Ŋul kes iseitunin iarei ka atalai aarei nuebwoete kakonyen nuka Ejakait loka akwap. 5
Arai ekoto ituŋanan aikonakin kes erono, elomuni akim kaitukekec, enyamari lukasurupokec; ido arai ekoto ituŋanan aikonakin kes erono, ibusakinit ŋes aario kwaŋin. 6
Ejai kes apedor agolokin akuj, kinyek akiru aitep apaarasia nuka aidwarakec, ejai kes apedor toma akipi aituluor kes aokot, ido ka aitican akwap kaiticaneta kere irwan nuipu kwape ekototor. 7
Ido kedaut aitejenunetekec ebuni etiaŋ loedokuni kaipany naemamei enaŋe aitiji kes, ipikori kes, eari da kes. 8
Ejaunos awatekec orot loka ere lokapolon loenyaritai kotoma omoyo Sodom ka Misiri, neebubukinitoi Ejakaitikec, 9Esesenete lukotuŋa, ka atekerin, ka aŋajepa, ka ajena awatekec apaarasia auni ka atutubet, komam ecamakinete awatekec anukio toma ailin. 10
Iyalamikinos luiboiete kotoma akwap kanukec, elelete, ijukanakinos bonik ainakineta, naarai apotu inabin ŋul luarei kisiriebata noi luiboiete kotoma akwap. 11
Konye akaulo kapaarasia kakwa auni ka atutubet, koloma emoyo lokajaran loebuni kama ejai Edeke tomakec, kobwaata kakejekec, kodoik akurian naepol ŋul luapotu koanyutu kes. 12
Kopuput eporoto loepol loabuni kotoma akuj, kobala kes ebe, “Kodokutu ne!” Kodokasi toma akuj; toma odou, kosesenete da lukasurupokec. 13
Kosawa kaŋol kojai amaran naepol naka akwap, kibiror atutubet nakitomonet naka ere; koarai ituŋa ilukumin ikanykaarei kotoma amaran ŋin naka akwap, kokuriakaros noi luasalito, kituritos do Edeke loka akuj.
14
Atuboros ican lukiareit; koany, eponito lukiwuniet atipet.
15
Kosodi kokut emalaika lokikanyetekaarei akerupepe, kojaas iporotoi luepolok toma akuj, kobalasi ebe, “Aluor ajakanut naka akwapin ajakanut naka Ejakaitiwok ka naka Kristoke, irumit ŋesi ikar ka ikar.” 16
Kibiroros imakio akaisaarei ka luoŋon ebuburia, luiboiete kakonyen nuka Edeke koicoloŋokec, komaata Edeke. 17
Kobalas ebe,
“Kimalai jo Ejakait Edeke Lokapedor kere, Loejai, ido lokejai,
Naarai ilem ijo akonipedor naepol, irumit da.
18
Konyunyurikinos atekerin, kobu da anyunyurakon,
Ka apak da naka lukatwak atubokinio,
Ka naka ainakin ikonibulesin inabin, ka lukalaunak,
Ka ŋul da lueyoŋito ekonikiror, ludidik ka lukapolok, eropitikec, Ka naka amudiar da luemudiarete akwap.”
19
Kosodi koŋaarai eyekalu loka Edeke loejai toma akuj, kotakan asaduku naka aitutuketeke kotoma oyekaluke, kojau aimiliaunun, ka iporotoi, ka agiro, ka amaran naka akwap, ka akako da naepol.
12
1Kotakan aanyunet naepol kotoma akuj, aberu naenapit akoloŋ, kojai elap kwap kakejeke, kojai da aboko naka aacer atomon ka nuarei akouke; 2
kepotiei, kodelo karieboke naka aidoun, kikilianar aidoun. 3
Kotakan aanyunet ace toma akuj, ido koany, apiu naepol naereŋ, kojaas kakwes akanykaarei ka amumwara atomon, kojaas da amekemeken akanykaarei akwesike. 4
Kiria ekorike atutubet nakiwuniet naka aacer nuka akuj, kocakak kes toma akwap, Kobwo apiu kakonyen nuka aberu naekoto aidoun, tetere naedounio ikokuke konyamari. 5
Kidou ŋesi ikoku yenisapat, yenekoto acok atekerin kere kebela loka asuat, konye kouruporoi ikokuke mama ejai Edeke, ido mama ejai eicoloŋoke. 6
Koker aberu toma amodiŋ, naejai aibois naitemokinit Edeke ŋes, tetere itanete ŋes kanen apaarasia alukumit ka akwat aarei ka akaisakanykape.
7
Kojau ejie toma akuj, kitiji Mikael ka ikemalaikan apiu. Koji apiu ka ikemalaikan, 8komam ipikorete, kwabo mam bobo etakanuna aiboisikec kotoma akuj. 9
Kocakarai apiu ŋin naapol, emun ŋol lokolo sek, loenyaritai Ekejodijodon, ka Satan da, ekeŋalaaran loka akwapin kere, kocakakinai toma akwap, kocakakinai da ikemalaikan nepepe kaŋes. 10
Kapup eporoto loepol kotoma akuj, loabala ebe, “Adol kwana aitajar, ka apedor, ka ajakanut naka Edekewok, ka apolou naka Kristoke, naarai acakar loirupei iinacanawok, loirupei kes kakonyen nuka Edekewok, paaran ka akuare da. 11
Ipikorete ŋul da kanuka aokot nuka Imerekek, ido kanuka akirot naka aitejenunetekec; komam eminasi aijarakec kiton atwanare. 12
Kanuka ŋun, kolel, ijo akuj, ka yes da luiboiete kotomake! Itukwi akwap ka aŋolol, naarai ejesun ekejodijodon mamakus, ejai kanyunyura naepol, naarai ejeni ebe edit akepak!”
13Naaanyunia apiu ebe acakar ŋes toma akwap, komeja aberu naedouni ikoku yenisapat. 14
Koinakinai aberu abebenoka aarei nuka emorukaalet loepol, tetere eporori adolore toma amodiŋ, toma aiboisike, naitanere apak, ka apakio, ka atutubet naka apak, kotoma akonyen nuka emun, 15Kolek emun akipi kotoma aitukuke kwape ecor, kakonyen nuka aberu, tetere eyaŋaarete akip aberu. 16Kiŋarak akwap aberu, kooŋ akwap akeituk, komataa ecor loalekuni apiu kotoma aitukuke. 17
Konyunyurik apiu aberu, kolot aitiji lukaurike luesalito, luericito aicorakineta nuka Edeke, luejai aitejenunet naka Yesu, Kobwo kotoma asiŋe naka aŋolol.
13
1
Abu kaany etiaŋ edokuni kaŋolol, ejaas amumwara atomon ka akwes akanykaarei, amumwarake da kojaas amekemeken atomon, akwesike da ikiroria luka ainyanakin. 2
Koputosi da etiaŋ loabu kaany bala eris, ka akekeje da bala nuka edubu, akeituk da bala aituk naka eŋatuny. Abu apiu koinak ŋes akepedor, ka eicoloŋoke, ka apolou da naepol. 3
Kesubit adiopet kakwesike bala ebelitai aŋole naka atwanare, konye koŋaleu aŋole naka atwanare, kotupa akwap kere etiaŋ eumokinit. 4Komaata ituŋa apiu, naarai abu koinak etiaŋ apolou, komaata da etiaŋ, kobalas ebe, “Iŋai bo eputosi ketiaŋ kaŋol, iŋai bo da epedori aitiji ŋes?”
5
Aponi koinakinai etiaŋ aituk nainera akiro nuepolok ka nuka ainyanakin, aponi koinakinai da apolou aswam ilapio akaisaoŋon ka luarei. 6Kooŋ da akeituk ainyanakin Edeke, ainyanakin ekekiror, ka ewemake, kes luiboiete kotoma akuj. 7
Aponi koinakinai ŋes ejie ka lukalaunak, ka aipikor kes, koinakinai da apolou kama kaŋiniteker, ka ituŋa, ka aŋajep, ka ajena da. 8
Emaete ŋes ituŋa kere luiboiete kakwap, ŋin yenimam iwadikatai ekirorike oitabo loka aijar loka Imerekek yenaponi koarai, eriŋa epesikina apetetait naka akwap, 9Arai ejai yenejai akit, kopup:
10
Arai kijoreor ituŋanan, elosi aijoreorio, Arai kear ituŋanan kekileŋ, ibusakinit ŋes da aario kekileŋ, Ne ŋes ejai atitiŋikin ka aiyuun naka lukalaunak.
11
Kasodi kaany etiaŋ ece elomuni kotoma akwap; ejaas amumwara aarei nueputosi bala imerekek, kinera kwape apiu, 12Kitwasam apolou kere naka etiaŋ losodit kakonyeneke. Koinak akwap ka luiboiete kotoma aima etiaŋ losodit, loaŋaleuni aŋoleke naka atwanare. 13
Iswamai ŋesi aanyuneta nuepolok, kiton aitodoun da akim abunore kotoma akuj, kiton akwap, kakonyen nuka ituŋa. 14
Itapaari da luiboiete kotoma akwap, kanuka aanyuneta nukeinakinitai ŋes aswam kakonyen nuka etiaŋ, elimokini luiboiete kotoma akwap aiswamakin etiaŋ ŋol aput, loaponi kobelitete kekileŋ, kojar. 15
Koinakinai ŋes aiyeŋakin eiyeŋane aput naka etiaŋ, tetere inera da aput naka etiaŋ, ka ainakin da ŋul kere lumam emaete aput naka etiaŋ aario. 16
Koinak ŋesi kere, ludidik ka lukapolok, lukabarak ka lukican, luijakakaete, ka ibulesin da, aibwaikinio emacar akanikec nakoteten, arai bo oreetakec, 17tetere emamei yenepedori agwel karaida agwelar dimikito ejai emacar, ŋes ekiror loka etiaŋ, arai bo aimwaus naka ekirorike. 18
Ne ŋes ejai acoa. Ŋin yenejai aijen, kimar aimwaus naka etiaŋ, naarai ŋes aimwaus naka ituŋanan. Aimwausike erai akwat akanykape ka akaisakanykape ka nukanykape.
14
1
Kasodi kaany, ido koany, kobwoi Imerekek komoru Sion, ka ituŋa ilukumin akwatat ka akaisaoŋon ka luoŋon nepepe kaŋes, luiwadikatai ekirorike, ka ekiror loka Papake oreetakec. 2
Keira da eporoto loebuni kotoma akuj bala eporoto loka akipi nukepuak, bala da eporoto loka agiro naepol; eporoto da loabu keira kosubite bala eporoto loka ikaramak lueramete adeudeunokec. 3
Koyeete ekosio lokitetet koiŋaren keicoloŋ, kakonyen da nuka ikajarak luoŋon, ka imakio. Kwabo emamei ituŋanan yenepedori aisisiaun ekosio ŋol, dimarai ŋul ilukumin akwatat ka akaisaoŋon ka luoŋon, lualakunio kotoma akwap. 4
Ŋul kes lumam emunaara kama ejaas aŋor naarai eraas ibekon; ŋul kes luetupito Imerekek kama elosi kere; ŋul kes lualakunio kotoma otuŋa araut araito nugeet nuka Edeke, ka nuka Imerekek, 5
ido mam edumuna aimod kaitukekec, naarai emamei kes aitoronet.
6
Kasodi kaany emalaika ece eporitoi kokidiŋ kakuj, ejaas Akiro Nukajokak nuka ikar kere alimonokin luiboiete kotoma akwap, luka ŋinijena, ka ateker, ka aŋajep, ka ituŋa da; 7
kobala keporoto loepol ebe, “Koyoŋito Edeke, kiturito ŋes, naarai adol esawa loka aitubuke, komaata ŋol lokesubi akuj; ka akwap ka aŋolol, ka atanin da nuka akipi.”
8
Kotupak emalaika ece, lokiareit, kobala ebe, “Ebiror, ebiror Babulon lokapolon, loetamasi atekerin kere ebino loka adedeŋ naka adoteuke.”
9
Kotupak da emalaika ece, lokiwuniet, kobala keporoto loepol ebe, “Arai kema ituŋanan etiaŋ ka aputoke, kedumu da emacar koreeteke arai bo kakanike, 10
emasi ŋin da ebino loka adedeŋ naka Edeke, loebukokinitai lomam inyalitai toma aikopo naka anyunyurake, isiriebio ŋes da kotoma akim ka acukuman kakonyen nuka imalaikan lukalaunak, kakonyen da nuka Imerekek. 11
Epuriori da apuru naka aisiriebiokec kuju, ikar ka ikar, kwabo mam iyeŋunete paaran ka kuare da, luemaete etiaŋ ka aputoke, ka ŋin da yenedumuni emacar loka ekirorike.”
12
Ne ŋes ejai atitiŋikin naka lukalaunak, ŋul luericito aicorakineta nuka Edeke ka aiyuun da naka Yesu.
13
Abu keira eporoto loebuni kotoma akuj kobala ebe, “Kiwadik ebe: Isirereŋitoi lukatwak, luetwakete kotoma Ejakait amear lolo.” Eebo, ebala Emoyo ebe, “Tetere ibworarete kotoma aitaaritoikec; naarai euparos akeceswamisio kakes!”
14
Kasodi kaany, ido koany, edou lokakwaŋan, kiboie da kodou loeputosi bala okoku loka etuŋanan, kejai aboko naka esabu akouke, ka ecilikiki da loekwana akanike. 15
Kolomu emalaika ece koyekalu, kiworoi keporoto loepol mama ejai ŋol loiboie kodou, ebe, “Kijuka ecilikiki, kosak, naarai adol apak naka aisak, naarai akoko noi isakan luka akwap.” 16Kosodi loiboie kodou acakar ecilikikike toma akwap, kosakai do akwap.
17Kolomu do emalaika ece koyekalu lokotoma akuj, kojai ŋes da ecilikiki loekwana. 18
Kosodi kolom emalaika ece kotem, kojai apolou kama ejai akim, kiworoi keporoto loepol mama ejai ŋol loejai ecilikiki loekwana, ebe, “Kijuka ecilikikikon loekwana, kode aibuŋeta nuka emusabibu loka akwap, naarai akoko noi imusabibunuke.” 19
Kocaka do emalaika ecilikikike toma akwap, kode emusabibu loka akwap, kocakak acuet naepol naka adedeŋ naka Edeke. 20
Kicakacakai acuet kokiŋa naka ere, koleleata aokot alomun kacuet, kiton arukanasia nuka ibalasin, kwape alosit naka amairon akwat aarei.
15
1
Kasodi kaany aanyunet ace naepol nakaumokin kotoma akuj, imalaikan ikanykaarei luejaas aiticaneta akanykaarei nukawasia, naarai kotomakec, ŋes enaŋia adedeŋ naka Edeke.
2
Abu kaany ibore yenesubit bala aŋolol naka agilas nainyalakina akim, kobwoete da luepikorete etiaŋ ka aputoke, ka aimwaus da naka ekirorike, kodie kaŋolol naka agilas, kojaas kadeudeun nuka Edeke. 3
Koyeete da ekosio loka Musa ebulesit loka Edeke, ka ekosio da loka Imerekek, kobalas ebe,
“Epolok aswamisiokon, ido nukaumokin da, Wu Ejakait Edeke Lokapedor kere! Edolito ikonirotin ido lukabeit da,
Ijo ekabaka loka atekerin!
4
Wu Ejakait, iŋai bo yenimam kiyoŋit jo, Ka aitopoloorit da ekonikiror?
Naarai ijo bon lokalaunan,
Naarai epote atekerin kere, emaete da kakonyenekon,
Naarai atakanut aswamisiokon nukadolit.”
5
Akaulo kaŋun abu kaany, koŋaarai eyekalu loka ewema loka aitejenunet kotoma akuj, 6
kolomut do imalaikan ikanykaarei luejaas aiticaneta akanykaarei kotoma oyekalu, konapito ebaputa loelai loimilia, koenito atorobosiokec amunyin nuka esabu. 7
Abu ediopet kotoma lukajarak luoŋon koinak imalaikan lukanykaarei atanyia akanykaarei nuka esabu, nuileleba adedeŋ naka Edeke loejari ikar ka ikar; 8
kilelebun da eyekalu apuru naebuni kotoma aibuses naka Edeke, kotoma apedorike da, komamei da yenepedori alomar oyekalu kiton neanaŋiata aiticaneta akanykaarei nuka imalaikan ikanykaarei.
16
1
Kasodi keira eporoto loepol loebuni kotoma oyekalu elimokini imalaikan ikanykaarei ebe, “Koloto, kobukokis atanyia akanykaarei nuka adedeŋ naka Edeke toma akwap.”
2
Kosodi losodit alosit, kobukok atanyike toma akwap, koraun edola loerono loetiono kotuŋa luejai emacar loka etiaŋ, luemaete da aputoke. 3
Kobukok emalaika lokiareit atanyike toma aŋolol, koraun aokot bala nuka yenikatwan, kotwaka da iboro kere luejarete, lukejaas toma aŋolol. 4
Kobukok emalaika lokiwuniet atanyike toma ocorin ka atanin nuka akipi, koraunos aokot. 5
Keira emalaika loka akipi ebala ebe, “Idolit ijo, loijai, ido lokijai, Lokalaunan,
Naarai itubok kwaŋin.
6
Naarai apotu kobukosi aokot nuka lukalaunak ka nuka inabin,
Ijo iinak kes aokot aimat,
Ibusakinito kes!”
7
Keira da etem ebala ebe:
“Eebo, Ejakait Edeke Lokapedor kere,
Eraas itubesiakon lukabeit ka luedolito da.”
8Kobukok emalaika lokiwoŋonet atanyike toma akoloŋ, aponi koinakinai ŋes anomor ituŋa kakim. 9
Konomoroi ituŋa kamwanis naepol, koinyanakis ekiror loka Edeke, loejai apolou kama ejaas aiticaneta ŋun, kwabo mam apotu kitoronikinos, karaida aitopoloor ŋes.
10
Kobukok emalaika lokikanyet atanyike oicoloŋ loka etiaŋ, kitumutonoroi ajakanutuke; kokonyokonyata aŋajepakec kanuka ariebokec. 11
Koinyanakis Edeke loka akuj kanuka ariebokec, ka idolakec, kwabo mam apotu kitoronikinos kotoma aswamisiokec.
12
Kobukok emalaika lokikanyetekape atanyike toma ocor lokapolon Eupurate, koonikis akipike, tetere itemokino erot loka ikabakan luepote kokide. 13
Abu kaany da imoyon iuni lueroko lueputosi kaidodokai, elomunete kaituk naka apiu, kaituk da naka etiaŋ, kaituk da naka enabi lokeŋalan. 14
Naarai eraas imoyon luka ajokin luiswamaete aanyuneta, luelosete mama ejaas ikabakan luka akwapin kere, atukonokin kes ojie loka apaaran nakapolon naka Edeke Lokapedor kere, 15
(“Koany, abuni kwape ekokolan! Isirereŋitoi yenekwenyi, koricite ikenapen, kinyek alosit imujalal, kinyeis ituŋa da aanyun ileicike!”) 16
Kotukonokis kes aibois naenyaritai kAburanian Arumagedon.
17
Kobukok emalaika lokikanyetekaarei atanyike apak, kolom eporoto loepol koyekalu, ebuni koicoloŋ, ebala ebe, “Eswamaun!” 18
Kojau aimiliaunun, ka iporotoi, ka agiro, kojau da amaran naepol naka akwap, namam ejai apeŋo netikolo ajaatar ituŋa akwap, kopol amaran ŋin naetia nen. 19
Kotiaka ere lokapolon atutubeta auni, kibiroros da ireria luka atekerin, Kiitu Edeke Babulon lokapolon, ainakin ŋes aimat aikopo naka ebino loka adedeŋ naka anyunyurake. 20
Koker ŋinipujan, kwabo mam edumuna iroŋan; 21
kodounun akako naepol, naelaŋir kwape atalant, abunore kotoma akuj mama ejaas ituŋa, koinyanakis ituŋa Edeke kanuka aiticanet ŋin naka akako, naarai kepol noi jokan akeitieanet.
17
1
Kosodi kobu ediopet komalaikan ikanykaarei luajaas atanyia akanykaarei, kenerata keoŋ ebe, “Bia, ketodikini jo atubokinio naka naadote nakapolon naiboie kakipi nuipu, 2
naadoteata ikabakan luka akwap, ka ŋul da luiboiete kotoma akwap amerikinos ebino loka adoteuke.” 3
Abu kadaka eoŋ modiŋ kotoma Omoyo; kaany da aberu iboie kotiaŋ loereŋ, loileleba ikiroria luka ainyanakin, kojaas akwes akanykaarei ka amumwara da atomon. 4
Konapit aberu anapito namuge ka nakareŋan kisiritete esabu ka amor nuka akais nuipu, ka ilulun, kojai aikopo naka esabu akanike, naileleba italesia, ka asilianut naka adoteuke; 5
iwadikatete da oreeteke ekiror loka aiyeiyea ebe: “Babulon lokapolon, toto naka nudotea, ka italesia da luka akwap.” 6
Abu kaany aberu ŋin emera aokot nuka lukalaunak ka aokot nuka ikajenak luka Yesu.
Nakaanyunia ŋes abu kaumok aumokin naepol. 7Kabala emalaika eoŋ ebe, “Kanukinyo iwumokinitor? Kalimokini jo aiyeiyea naka aberu, ka naka etiaŋ loedakit ŋes, loejaas akwes akanykaarei, ka amumwara da atomon. 8
Kejai etiaŋ loibu koany, ido emamei, ido ebuni adokun kotoma aipany naemamei enaŋe, elosi da amudiario; eumokinete da ŋul luiboiete kotoma akwap, lumam iwadikatai ikiroriakec oitabo loka aijar ameun kapetetait naka akwap, naeanyuniata etiaŋ, naarai kejai, ido emamei, ido ejaun. 9
Ne ŋes ejai aijen naejai acoa: akwes akanykaarei kes iroŋan ikanykaarei, luiboikino aberu; 10eraas da ikabakan ikanykaarei, ebiroros ikany, ejai ediopet, eriŋa ece ebuno, ido naebunio ibusakinit ŋes asalakinit apak naedit. 11
Etiaŋ da lokejai, ido emamei, erai ŋol lokikanyetekauni, konye erai lokokanykaarei, elosi da amudiario. 12
Amumwara da atomon nuibu koany eraas ikabakan itomon lueriŋa edumuna ajakanut, konye edumunete apolou kwape ikabakan adaun esawa ediopet, nepepe ketiaŋ, 13Ejai kes ainerun adiopet, einakinete etiaŋ apedorikec ka apoloukec da. 14
Ejiosi ŋul ka Imerekek, ipikori Imerekek kes, naarai erai ŋesi Ejakait loka ijaka, ka Ekabaka da loka ikabakan, ŋul da luejaas kaŋes eraas luenyaritai, lueseunitai, ka lumunon da.”
15
Kabala ŋesi eoŋ ebe, “Akipi nuibu koany, kama iboio naadote, kes ituŋa ka ikodeta, ka atekerin ka aŋajepa. 16
Amumwara da atomon nuibu koany, ka etiaŋ, elaete kesi naadote; einakinete ŋes asilikinit, ka amujalal, enyamarete akuanake, icweikinete ŋes kakim, 17
naarai abu Edeke kibwaik otauonokec aswam naenerunit, ajaut kainerun adiopet, ka ainakin da etiaŋ ajakanutukec, aitodol naitodolere akiro nuka Edeke. 18
Aberu da naibu koany ŋes ere lokapolon loirumit ikabakan luka akwap.”
18
1
Akaulo kaŋun abu kaany emalaika ece ijesuni kotoma akuj, ejai kapolou naepol; kitacau aibusesuke akwap. 2
Kiworo keporoto loegogoŋ ebe,
“Ebiror, ebiror Babulon lokapolon!
Arau aibois naiboioto ajokin,
Ka aidaris naka imoyon lueroko,
Aidaris da naka ŋinikweny yenerono yenelaitai;
3
Naarai ebiroros atekerin kere kanuka ebino loka adedeŋ naka adoteuke,
Adoteata da ikabakan luka akwap kaŋes,
Abarata da ikagwelanarak luka akwap
Kanuka agogoŋ naka eporoke.”
4
Kasodi keira eporoto ece ebuni kotoma akuj ebala ebe,
“Ikatuŋa, kolomutu kotomakeŋ,
Kinyeis aimorikikin kadiakanaretake,
Kinyeis ainakinio aiticanetake;
5
Naarai iculul adiakanaretake kiton akuj,
Eitu da Edeke amamus adoliteke.
6
Kotaca ŋes kwape atacia ŋesi,
Kiyatakis ŋes irwan aarei kwape ejaatar aswamisioke:
Toma aikopo naenyalia ŋesi, kinyalakis ŋes irwan aarei.
7
Kwape etopolooror bon, koporo da,
Kwape kwaŋin koinakis ŋes aisiriebio noi ka akuudian,
Naarai ebala kotauke ebe, ‘Eboie eoŋ kwape akabaka,
Mam arai apuserut, mam cut aanyuni akuudian.’
8
Kanuka ŋun ŋes eponiata aiticanetake toma apaaran adiopet,
Atwanare, ka akuudian, ka ebeli,
Icweikinio cut kakim;
Naarai egogoŋ Ejakait Edeke loetubokini ŋes.”
9
Emonyakinete ŋes, ibwololoete da ikabakan luka akwap luadoteata kaŋes ka eporo da, naeanyuniata apuru naka aicweioke; 10
kobwoete kama elwana, kanuka akurian naka aisiriebioke, kobalasi ebe,
“Itukwi! Itukwi! Ere lokapolon,
Babulon, ere lokapolon loegogoŋ!
Naarai adolu atubokiniokon toma osawa ediopet.”
11
Emonyete ikagwelanarak luka akwap, ekuudianete da kanukeŋ, naarai emamei bobo yenegweli igwelarakec, 12
igwelara luka esabu, ka epuesa, ka amoru nuka akais nuipu, ka ilulun, ka ebaputa loejok, ka lomuge, ka aliri, ka lokareŋan, ka ŋolikitoi loeuru maa, ka ŋinibore kere yenika ikel luka itomei, ka ŋinibore kere yenika ekitoi loka akais nuipu noi, ka aikomon, ka asua, ka amor nuka ijesesinei, 13
akinomon, ka lueuru maa, ka emina, ka luesaete, ka lukisupurununo, ka ebino, ka akinyet, ka akiria nuicidie, ka eŋano, ka ibaren, ka amerekekin, ka ibalasin, ka agalin, ka ibulesin, ka aijar da naka ituŋa.
14“Araito da nuimiela ekonitau anyout mamakon,
Iboro kere da luetarioko ka luimilias anyout kamakon, Komam bobo ituŋa edumunete kes!”
15
Ikagwelanarak iboro ŋul, luetabari ŋesi, ebwoete kama elwana, kanuka akurian naka aisiriebioke, komonyete ka akuudian, kobalasi ebe,
16
“Itukwi! Itukwi! Ere lokapolon,
Loaponi kitanapai ebaputa loejok,
ka lomuge ka lokareŋan, Kisiritete kesabu,
ka amor nuka akais nuipu, ka ilulun da!
17
Naarai amudiar abar naetia nen kosawa ediopet.”
Kobwoi da ŋolikapolon loka ataker, ka yenelosi aibois kere kotoma ataker, ka ikekwaŋak, ka ŋul kere da luiswamaete toma aŋolol, kobwoete kama elwana, 18
ido naaanyuniata apuru naka aicweioke, kiworoto ebe,
“Inyo bo eputosi ka ere lokapolon?”
19
Kiwelanakis apua akwesikec, kiworoto emonyete ka akuudian ebe,
“Itukwi! Itukwi! Ere lokapolon,
Loetabari kere lukejaas atakerin toma aŋolol kanuka akaisike nuipu! Naarai amudiar kotoma osawa ediopet.
20
Kiyalamikin kanukeŋ, ijo akuj,
Ka yes lukalaunak, ka yes ikiyakia, ka yes da inabin,
Naarai kitubok Edeke akirokus kamakeŋ!”
21
Kosodi kodak emalaika loegogoŋ amoru, kwape akukuse naepol, kocakak aŋolol cikil, kobala ebe,
“Kwaŋin ecakakinere Babulon ere lokapolon,
Kwabo mam bobo etakanuni.
22
Karaida eporoto loka ikaramak adeudeun,
ka luejaas lueruosi,
ka luekusete alamarun,
ka luekusete arupepen,
Mam epupunos bobo kotomakon.
Karaida epirioit loka aswam kere,
mam etakanuni bobo kotomakon;
Karaida eporoto loka akukuse mam epupuni bobo kotomakon;
23
Karaida aica naka atala, mam ecai bobo kotomakon;
Karaida eporoto loka eteran ka ateran mam epupuni bobo kotomakon;
Naarai keraas ikagwelanarakakon ikapolok luka akwap,
Naarai toma ocudetekon ŋes eŋalaarere atekerin kere.
24
Kotakanut da kotomake aokot nuka inabin ka nuka lukalaunak,
Ka nuka ŋul kere luaario kotoma akwap.”
19
1
Akaulo kaŋun abu keira bala eporoto loepol loka ekodet loepol kotoma akuj, kinerasi ebe,
“Aleluia! Aitajar ka aibuses, ka apedor eraas nuka Edekewok.
2
Naarai eraas itubesiake lukabeit, ka luedolito da;
Naarai atuboki akiro naadote nakapolon,
Naamunaari akwap kadoteuke,
Enyaŋaa kamakeŋ aokot nuka ikebulesin.”
3
Kirucakis einer nakiareit ebe,
“Aleluia! Epuriori apuruke ikar ka ikar.”
4
Kibiroros imakio akaisaarei ka luoŋon ka lukajarak iwoŋon, komaata Edeke loiboie koicoloŋ, kobalasi ebe, “Amen. Aleluia!” 5
Kobu eporoto koicoloŋ kinera atiar,
“Kituroto Edekewok, yes kere ikebulesin,
Yes luiyoŋito ŋes, ludidik ka lukapolok da.”
6
Keira bala eporoto loka ekodet loepol, ido bala eporoto loka akipi nuipu, ido bala eporoto loka agiro naegogoŋ, kobala ebe,
“Aleluia! Naarai irumit Ejakait Edekewok Lokapedor kere.
7
Keyalamikinos, kalakaros noi, kainakis ŋes aibuses,
Naarai adolu adukokin naka Imerekek,
Itemokino da ateranike;
8
Aponi koinakinai ŋes ainap ebaputa loejok, loimilia, loelai”— naarai ebaputa loejok kes aswamisio nuedolito nuka lukalaunak.
9
Katema emalaika eoŋ atiar, “Kiwadik ebe: Isirereŋitoi luenyaritai toma opucit loka eterane loka Imerekek.” Katema ŋesi eoŋ atiar, “Eraas nu akiro nukabeit nuka Edeke,” 10
Kasodi aibirokin kiŋaren kakejeke, aima ŋes, Katema ŋesi eoŋ atiar, “Koany, sirikiswama kwaŋin! Arai eoŋ ebulesit aupakon, ka lokoinacanakon, luejaas kaitejenunet naka Yesu. Koma Edeke.” Naarai aitejenunet naka Yesu ŋes emoyo loka adwaranut.
11
Kasodi kaany akuj eŋaara, ido koany, ebalasit loekwaŋ! Lokibwanenit ŋes enyaritai Lomunot ido Lokabeit, etubokini ka aitiji kadolit. 12
Ido akekonyen eraas aipeloret naka akim, kejaas amekemeken nuipu akouke; kojai kekiror loiwadikatai lomam ejeni idiotuŋanan dimarai ŋes bon. 13
Konapite anapito naebwasitai aokot; enyaritai ekekiror Akirot naka Edeke. 14
Kotupakis ŋes ajoresio nukotoma akuj, kibwanenito ibalasin lukakwaŋak, konapito ebaputa loejok, loekwaŋ, loelai. 15
Elomuni ekileŋ loekwana kaitukuke, loinomia atekerin, icokiei kes kebela loka asuat; icakacakai ŋesi acuet naka ebino loka adedeŋ naka anyunyura naka Edeke Lokapedor kere. 16
Ejai ekiror loiwadikatai anapitoke kamurwoke da ebe, EKABAKA LOKA IKABAKAN, IDO EJAKAIT LOKA IJAKA.
17
Kasodi kaany emalaika ebwoi kotoma akoloŋ, kiworo keporoto loepol kobala akweny kere nueporitos toma apak ebe, “Kopotu, kotukonokinos opucit loepol loka Edeke, 18tetere inyamete akiriŋ naka ikabakan, ka akiriŋ naka ikapolokitok, ka akiriŋ naka lukagogoŋ, ka akiriŋ naka ibalasin, ka naka ŋul kaluibwanenete kes, ka akiriŋ naka luijakakaete, ka naka ibulesin, naka ludidik ka naka lukapolok da.” 19
Kaany etiaŋ ka ikabakan luka akwap, ka ajoresiokec, etukokinos ejie kaŋol kaloebwanenit ebalasit ka ajoreke da. 20
Kikamunai etiaŋ nepepe ka enabi lokeŋalan loeswamai aanyuneta kakonyeneke, nueŋalaaria ŋul luadumut emacar loka etiaŋ, ka ŋul da luamaete aputoke. Kocakakinai iarei kere ejarete toma aŋolol naka akim naenoki kacukuman. 21
Koarai luasalete kekileŋ loka ŋol kaloebwanenit ebalasit, loalomunit kaitukuke; kimonikinos akweny kere akiriŋikec.
20
1
Kasodi kaany emalaika ijesuni kotoma akuj, itiŋit elacetait loka aipany naemamei enaŋe, ka erikot da loepol kakanike. 2
Kikam apiu, emun ŋol lokolosek, loerai Ekejodijodon ido Satan, koen ŋes adaun ikar elukumit, 3
kocakak ŋes aipany, kogolok, kipucak aipucet kujukeŋ, kinyek bobo aiŋalaŋal atekerin, aitodol naedaunotor ikar elukumit. Akaulo kaŋun ibusakinit ŋes aosikinio apak naedit.
4
Kasodi kaany iicoloŋo, kojaas lueboiete kotomakec, koinakinai kes aitub akiro. Kaany da aijar naka ŋul kaluajepanario akwesikec kanuka aitejenunet naka Yesu, ido kanuka akirot naka Edeke, ka ŋul da lumam apotu komaata etiaŋ, karaida aputoke, lumam edumunito emacar koreetakec karaida kakaninikec. Kojara, kirumata da nepepe ka Kristo ikar elukumit. 5
Luasalete luka lukatwak mam apotu kojara aitodol naedaunotor ikar elukumit. Ŋin ŋes ajarun nasodit. 6
Isirereŋitoi, ido erai yenikalaunan, yenejai akorakinet kotoma ajarun nasodit! Emamei atwanare nakiareit apolou kamakec, konye eraunos isasedotin luka Edeke ka luka Kristo, ido irumete nepepe kaŋes ikar elukumit. 7Kosodi naedaunotor ikar ŋul elukumit, eosikinio Satan kaidarisike, 8
elomuni da aiŋalaŋal atekerin nuejaas agoria aoŋon nuka akwap, Gog ka Magog, atukonokin kes kojie; etiaikec bala asine naka aŋolol. 9
Kodokut kalalau naka akwap, kirimorito iidukurun luka lukalaunak, ka ere da lominat; konye kijesun akim kotoma akuj, konyama kes. 10
Kocakakinai ekejodijodon loeŋalaŋalai kes aŋolol naka akim ka acukuman, nekejaas etiaŋ ka enabi lokeŋalan, isiriebio kes noi paaran ka kuare ikar ka ikar.
11
Kasodi kaany eicoloŋ loepol loekwaŋ, ka ŋol da lokiboie kotoma; kokera akuj ka akwap kakonyeneke, mam bobo kes edumuna aibois. 12
Kaany da lukatwak, lukapolok ka ludidik da, ebwoete koiŋaren keicoloŋ, kopukoroi iitabon. Kopukoroi eceitabo da, loerai loka aijar. Kotubokinai lukatwak kotoma ŋun kanuewadikatai oitabon kwape kejaatar aswamisiokec. 13
Kijaik aŋolol lukatwak lukejaas tomakeŋ, Atwanare da ka Okatwak kijaikis lukatwak lukejaas tomakec, kotubokinai da ŋinidiopet kwape kejaatar aswamisioke. 14
Kosodi kocakakinai Atwanare ka Okatwak aŋolol naka akim. Ŋin ŋes atwanare nakiareit, aŋolol naka akim. 15
Arai kedumun idiotuŋanan yenimam iwadikatai toma oitabo loka aijar, kocakakinai aŋolol naka akim.
21
1
Kasodi kaany akuj nakitetet, ka akwap nakitetet; naarai atubor akuj nasodit, ka akwap da nasodit, mam bobo aŋolol ejai. 2
Kaany da ere lokalaunan, Yerusalem lokitetet, ijesun kotoma akuj, kama ka Edeke, itemokino kwape ateran naisirokinitai okilenike. 3
Keira da eporoto loepol loebuni kotoma oicoloŋ kobala ebe, “Koany, ejai ewema loka Edeke nepepe kituŋa, iboienenei kakes, eraunos kesi iketuŋa, Edeke da elopet ejaenena kakes. 4
Emwatari akiyo kere kakonyeneke, mam bobo ejaun atwanare, karaida akuudian, karaida aimony, karaida ariebo, mam bobo ejaunos; naarai atuboros nusodit.”
5
Ŋol da loiboie koicoloŋ kobala ebe, “Koany, eteteuni eoŋ kere.”
Kobala da ebe, “Kiwadik, naarai eraas akiro nu numunon ido nukabeit.” 6
Katema ŋesi eoŋ atiar, “Eswamaunos! Arai eoŋ Alupa ka Omega, ageunet ka esaŋe da, Ainakini yenejakit akure aimat atai atan naka akipi nuka aijar. 7
Yenipikori irumi ŋun, araun eoŋ Ekedeke, ŋes da eraun okokuka. 8
Konye ikuriesik, ka lumam iyuunito, ka luesiliaka, ka ikaarak, ka idotea, ka ikacudak, ka luemaete aputosia, ka ikeŋalak kere, ejaun akorakineteke toma aŋolol naenoki kakim ka acukuman; ŋes atwanare nakiareit.”
9
Kosodi kobu ediopet komalaikan ikanykaarei lukejaas atanyia akanykaarei nueleleba aiticaneta akanykaarei nukawasia, kinera keoŋ, kobala ebe, “Bia, ketodikini jo ateran, aberu naka Imerekek.” 10
Kadaka kotoma Omoyo oroŋat loepol, loeoja, ketodik eoŋ ere lokalaunan Yerusalem, ijesun kotoma akuj kama ka Edeke, 11
ejaas kaibuses naka Edeke, koputosi aicake bala amoru naka akais nuipu noi, kwape amoru naka ayaseper naipiororoi noi. 12
Kejai arwatat naepol, naeoja, kejaas irutei itomon ka luarei, kejaas imalaikan itomon ka luarei orutei, kiwadikatai da ikiroria luka atekerin atomon ka nuarei nuka idwe luka Isirael orutei. 13Kide irutei iuni, agolitomei irutei iuni, eŋalakimak irutei iuni, to da irutei iuni, 14Kojaas apeteta atomon ka nuarei arwatat naka ere, kotomakec da ikiroria itomon ka luarei luka ikiyakia itomon ka luarei luka Imerekek.
15
Kojai ŋol lokinera keoŋ egada lokitemis loka esabu, tetere itemio ere, ka iruteike, ka arwatatake. 16
Etirianitai da ere iwaitin kere, aojauke koriakasi kalalau. Kitem ŋesi ere kegada amairon alukumit ka akwat akany; koriakanara aojauke ka alalauke ka amukururuke da. 17Kitem da arwatatake ikubitin
akwatat ka akaisaoŋon ka luoŋon, kwape ejaar aitemis naka etuŋanan, ŋes naka emalaika. 18
Adukio naka arwatatake korai naka ayaseper, ere da korai loka esabu loelai, kwape aroet naelai. 19
Kisiritete apeteta nuka arwatat naka ere kaŋinimoru kere naka akais nuipu; apetetait nasodit ayaseper, nakiareit asapiro, nakiwuniet aget, nakiwoŋonet emeralid, 20nakikanyet naemelomelot; nakikanyetekape asadia; nakikanyetekaarei akurusoliso; nakikanyetekauni aberul; nakikanyetekaoŋon atopasit; nakitomonet akurusopuraso; nakitomonet ka nadiopet ayasit; nakitomonet kanuarei da ametusit, 21Keraas irutei itomon ka luarei ilulun itomon ka luarei, ŋolidiopet korutei kerai elulu ediopet; erot da loka ere kerai esabu loelai bala aroet naipiororoi.
22Mam abu kaany eyekalu kore, naarai eyekaluke ŋes Ejakait Edeke Lokapedor kere ka Imerekek. 23
Mam ere ipuda akoloŋ karaida elap acaikin ŋes; naarai inwakakinit aibuses naka Edeke, atalake da ŋes Imerekek. 24
Elosenenete da atekerin kaicake, eyaunete ikabakan luka akwap aibusesukec tomake; 25
mam cut egolokinio iruteike paaran, naarai mam ejaun akuare ŋina; 26einunete ŋes aibuses ka ayoŋio nuka atekerin. 27
Ido mam elomari cut ibore kere tomake yenemunaara, karaida yeniswamai nukasilianut, ka aiŋalanut, dimarai ŋul bonik luiwadikatai toma oitabo loka aijar loka Imerekek.
22
1
Kosodi ketodik eoŋ ecor loka akipi nuka aijar, loemwekimweki kwape aroet, eleleuni kotoma oicoloŋ loka Edeke ka loka Imerekek, 2
kokidiŋ kerot loka ere, kojai ekitoi loka aijar epuai ka epuai kecor, loerai araito nukiponesio itomon kaluarei, loerai araitoke ŋolilap; keraas akui nuka ekitoi nuitaŋaleunete atekerin. 3
Mam ejaun bobo ekenit; ejaun eicoloŋ loka Edeke ka loka Imerekek da tomake; ijaanakinete ŋes ikebulesin; 4
eanyunete akekonyen, ejaun da ekekiror oreetake. 5
Mam ejaun bobo akuare; mam ipudasi aica naka atala, ka aica da naka akoloŋ, naarai icaikini kes Ejakait Edeke, irumete kesi ikar ka ikar.
6
Katema ŋesi eoŋ atiar, “Eraas akiro nu numunon ido nukabeit. Ejuku Ejakait Edeke loka imoyon luka inabin ekemalaika aitodikin ikebulesin nuekotosi ajakut atipet. 7
Ido koany, abunit atipet.”
Isirereŋitoi yenerici akiro nuka adwarasit naka eitabo kalo.
8
Eoŋ Yokana abu kapup ka aanyun da ŋun, Ido naapupunio ka aanyun abu kebiror aima koiŋaren kakeje nuka emalaika loketodikini ŋun. 9Katema ŋesi eoŋ atiar, “Koany, sirikiswama kwaŋin! Arai eoŋ ebulesit aupakon lokoinacanakon inabin, ka ŋul da luericito akiro nuka eitabo kalo. Koma Edeke.”
10
Kabala eoŋ ebe, “Sirikipucak aipucet akiro nuka adwarasit naka eitabo kalo, naarai eapie apak ŋin. 11
Yeniswamai numam edolito, kiyatak aswam amamus adolit, yenesiliana da, kiyatak asilianar, yenedolit da kiyatak aswam nukadolit, yenikalaunan da kiyatak aitalaunio.”
12
“Koany, abunit eoŋ atipet, ayauni eropitika da, atacia ŋinituŋanan kwape ejaar akeswam. 13
Arai eoŋ Alupa ka Omega, losodit ka lokawasia, ageunet ka esaŋe da.”
14
Isirereŋitoi luilosete anapitokec, tetere ejaunos kapedor kokitoi loka aijar, elomarete da ore itorete oruteike. 15
Ejaas iŋokwo kiŋa, ka ikacudak, ka idotea, ka ikaarak, ka luemaete aputosia, ka ŋinituŋanan kere yenemin ka aswam da aiŋal.
16
“Eoŋ Yesu ejuk emalaikaka aitejenun yes ŋun kanuka ikanisan. Arai eoŋ aliasit ka etatait loka Daudi, aacerit naemwekimweki naka atupuruc.” 17
Ebalas Emoyo ka ateran ebe, “Bia.” Yenepupuni da kobala ebe, “Bia.” Ŋin da yenejakit akure kobu; yenekoto kooko atai akipi nuka aijar.
18
Etejenikini ŋinituŋanan yenepupuni akiro nuka adwarasit naka eitabo kalo ebe: Arai kiyataki ituŋanan kotomakec, iyatakini Edeke tomakeŋ aiticaneta nuiwadikatai toma oitabo lo, 19
bobo da arai elemari ituŋanan kotoma akiro nuka eitabo loka adwarasit kana, elemari Edeke akorakineteke kokitoi loka aijar, kore da lokalaunan, nuiwadikatai toma oitabo lo.
20Loitejenunit nu inera ebe, “Eebo, abunit atipet.” Amen. Kobia, Ejakait Yesu!
21Asianut naka Ejakait Yesu kojai ka lukalaunak; Amen.
|