Teso Psalms
Isabulin
1
1
Isirereŋitoi ituŋanan yenimam elosenenei kotoma ainerun naka ikaronok,
Karaida abwoenen korot loka ikadiakanarak;
Karaida aiboienen koicoloŋ loka ikamenak.
2Konye akelakanar ejai toma okisil loka EJAKAIT;
Okisilike da eomoomaa paaran ka kuare da.
3
Eputoori da ekitoi loiraikinitai ariri naka aleles naka akipi;
Loeraenenei akeraito kedol apak,
Akekiot da mam erinyori;
Ikemeri kanuiswamaenenei kere.
4Mam ikote nen kama kalukaronok;
Konye esubito bala agugu nuituari ekwam.
5Ŋes mam epedoriata ikaronok aibwo kotoma atubokinio;
Karaida ikadiakanarak katukot naka ikadolitok.
6
Naarai ejeni EJAKAIT erot loka ikadolitok:
Konye etwaniari rwaru erot loka ikaronok.
2
1
Kanukinyo enyunyuratatar atekerin,
Kanukinyo da itetemonoriata ituŋa aamameak kotauonokec?
2
Etemonokinos ikabakan luka akwapin,
Enerut ikayaitok da nepepe,
Asurokin EJAKAIT ka Kristoke atiar,
3
“Kaiŋedeŋedata ikecerikoi,
Kacakasi da aunoikec.”
4
Ekienie iŋol loiboie kotoma akui;
Isekelei kes EJAKAIT.
5Kosodi isiejanakini kes;
Iticani kes kakeisiop naepol.
6Ebe, “Konye ebwaik Ekakabaka
Koukotoka lokalaunan loka Sion.”
7
Alimokini nuka ekisil:
Abu EJAKAIT katema eoŋ atiar, “Ijoŋ Okokuka;
Lolo kauru jo.
8
Kilipai, kainakini atekerin aluor akoniirumet,
Isaiŋeta da luka akwap aluor lukon.
9
Ibili kes kebela loka asuat;
Ibwaiŋabwaiŋai kes cut bala amot naka ekajean.”
10Aso do koeoutu, yes ikabakan:
Kituutooros, yes ikatubok luka akwapin.
11Kijaanakis BJAKAIT kayoŋit;
Kiyalamikinos kamaran.
12
Konuata Okoku, kinyek anyunyurikin, kosodete yesi aolior korot,
Naarai isunyari akenyunyura ainepun.
Isirereŋitoi kere luemunos ŋes.
3
1
EJAKAIT, eyatakinos cama noi lukasurupoka!
Ipu lukanyoikis.
2
Ipu luetemarete etauka atiar,
Mam Edeke itajari ŋes. Sela.
3
Konye ijoŋ, wu EJAKAIT, irai ebukuka;
Akaibuses, eketonyounon da loka akouka.
4Eworoi kekaporoto mama ejai EJAKAIT;
Kaboŋokini ŋesi eoŋ koukotoke lokalaunan. Sela.
5
Abu eoŋ kaper kajotoor;
Kakweny; naarai EJAKAIT kegan it.
6Mam akurianar ilukumin itomon luka ituŋa,
Luederakinos airigaun asurokin eoŋ.
7Konyou, wu EJAKAIT; kitajarai, wu Ekadeke:
Naarai inananan ijo lukasurupoka kere amatenen;
Ibilana ijo ikela luka ikaronok.
8
Erai aitajar naka EJAKAIT:
Kojai akonisuliany mama ejaas ikonituŋa. Sela.
4
1Koboŋokinoi nakeworoo, wu Edeke loka adoliteka;
Ibu kocilak eoŋ apak naajar ocan:
Kitimoi, kiira akailip.
2Okwe, yes isap luka ituŋa, itodolete ai aijulanakin akaibuses toma oleic?
Itodolete ai amin aamameak ka aibwapit aiŋalanut? Sela.
3
Konye kojenutu ebe abu EJAKAIT elopet kotiaka yeneyoŋit ŋes:
Epupuni EJAKAIT naeworoo eoŋ ŋes.
4
Kobwoete koyoŋito, sirikidiakasi:
Koomoomata kotauonokus kaperitokus, kopalarito. Sela.
5
Koinakisi asuban nuka adolit,
Komunosi da EJAKAIT.
6
Ejaas luipu luineras atiar, “Iŋai bo kitodikini oni ajokis?
EJAKAIT, kitonyoikinoi sio aica naka akonyenekon.”
7Ibu kibwaik aiyalama otauka,
Adepar naiyatakinotor akimakec ka ebinokec.
8
Kaper kajotoor enapakina:
Naarai ijo bon, EJAKAIT, kisiboikini eoŋ kainapakina.
5
1Kitoik akit akakiro, wu EJAKAIT,
Kibwaik etau toma aomoomoka.
2Kopupok eporoto loka akaiwonet, Ekakabaka ka Ekadeke da; Naarai kelipit jo.
3
Wu EJAKAIT, ipupununei ekaporoto tupuruc;
Etemonokini akailip tupuruc mama ijai, kedarite.
4
Naarai mam irai Edeke loisiyalamikinit nukaronok;
Mam aronis iboie kamakon.
5
Mam luiwoŋoko ebwoete kakonyenekon;
Ilait kere luiswamaete numam edolito.
6Imudiari luineras nukaiŋal:
Elait EJAKAIT ikaaran ka ikamodan.
7
Konye kanukaŋ, toma ailiil naka akonisianut-nakamin alomari togokon:
Kotoma ayoŋit jo ŋes amaia kaseseni eyekalukon lokalaunan.
8Kiŋarenikinoi, wu EJAKAIT, kotoma adolitekon, kanuka lukasurupoka; Kisideleleu erotokon kakonyeneka.
9
Naarai emamei amunonut kaitukekec; Atutubetakec nukotoma eraas nukaronok cut:
Elogorotokec ŋes ailit naeŋaara;
Ijodijodete kaŋajepakec.
10Komudia kes, wu Edeke;
Kibiroros kanuka akeceinerun kikulepek:
Koremo toma aipues naka apaarikec;
Naarai kipaliikis jo.
11
Konye kolakaros kere luemunos jo,
Kibwoŋata kanuka aiyalama apaarasia kere, naarai iiikinit ijo kes:
Ido kiyalamasi lueminas ekonikiror kotomakon.
12Naarai isirereŋi ijo ikadoliton;
Wu EJAKAIT, irigauni ŋes kasianut kwape kebuku.
6
1
Wu EJAKAIT, sirikiitoron eoŋ kanyunyurakon,
Karaida alecor kotoma akadakinikon naepol.
2
Kitimoi eoŋ, wu EJAKAIT, naarai arinyo eoŋ cut:
Wu EJAKAIT, kitaŋaleunoi; naarai eyalononoto akakojo.
3
Eyalonono da noi akaijar:
Konye jo, wu EJAKAIT, itodoli bo ai?
4Koboŋ, WU EJAKAIT, koyu akaijar:
Kitajarai kanuka akonisianut-nakamin.
5
Naarai emamei akiitun jo kotoma atwanare:
Iŋai bo kimalai jo kotoma Okatwak?
6Ketapas ekaidiny:
ŋinikuare etapapalenenei ekajam;
Eleleete akiyoka oitadaka.
7Aoniki akakoŋu kanuka aimony;
Awariwar kanuka lukasurupoka kere.
8
Irwa do kamakaŋ, yes kere luiswamaete numam edolito; Naarai eira EJAKAIT eporoto loka aimonyoka.
9
Eira EJAKAIT akaiŋaiŋa;
Ecamuni EJAKAIT akailip.
10Irumete ileic lukasurupoka kere,
Iyaloŋoŋoete da noi:
Eboŋorete, isunvarete ileic airum.
7
1Wu EJAKAIT, Ekadeke, kamuno jo:
Kitajarai kama ejaas ŋul lukarukitotor, koyuunai.
2
Kinyek apoopo akaijar kwape keŋatuny,
Anyilinyil ŋes, komamei yenikayuuni.
3
Wu EJAKAIT, Ekadeke, arai eswamat na;
Arai ejaas numam edolito akaninika;
4
Arai ekwaikinit erono ŋin yenikinapapai keoŋ,
(Eebo, ayu ŋin yeniketokokolit eoŋ atitai:)
5Korukio lokasurup akaijar, kodolok;
Eebo, kipudapud akaijar kokwap,
Kiperik akaibuses toma apua. Sela.
6
Konyou, wu EJAKAIT, kotoma anyunyurakon,
Kodakun asurokin adedeŋ naka lukasurupoka:
Kokweny kanukaŋ; icorak ijo etube.
7Kirimo ijo atukot naka ituŋa:
Kodok kes koboŋoria toma akuj.
8Ijaikini EJAKAIT etube otuŋa:
Kotubokinai wu EJAKAIT, kwape ejaar akadolit,
Ka abeit da naejai tomakaŋ.
9
Konaŋ ca do aronis naka ikaronok, konye kiticat ijo ikadolitok:
Naarai itemi Edeke lokadoliton itauon ka iŋeretenya.
10Ekabuku ejai ka Edeke,
Loitajari luejaas itauon luitenara.
11Edeke ŋes ekatubon lokadoliton;
Eebo, ŋes Edeke loisiopit ŋinipaaran.
12Arai mam ituŋanan ibelokin, ipeni Edeke ekekileŋ;
Eketaki akekabwa, alok da.
13Etemonoki da ŋesi iboro lukaarak;
Itasarani ikemalia.
14Koany, erieba ikaronon aidoun numam edolito;
Eebo, apotuu ameŋeranut, edou da aiŋalanut.
15
Abu kigir aipany, kobok da,
Ebirokin elopet toma acukulet naaboki.
16
Eboŋokini akemeneranut akouke kelopet,
Eboŋokini da akededeŋ osiadukuke.
17Emalai EJAKAIT kwape ejaar akedolit:
Ayei aiturit ekiror loka EJAKAIT Loejai kuju kakuj.
8
1Wu EJAKAIT, EkosiJAKAIT,
Ejok ca ma noi ekonikiror kakwapisinei kere!
Lokibwaikini aibusesukon kuju kakuj.
2
Ibu kiticat agogoŋ kaituke nuka imukerun ka idwe luenakete, Kanuka lukasurupokon,
Tetere itapalaari yenikasurup ka ikenyanan.
3
Naasesenia eoŋ akonikuj, aswam naka ikonibokoro,
Elap ka aacer nukibwaikini ijo;
4
Inyo bo ituŋanan, tape jo ipodo ŋes?
Okoku loka ituŋanan da, tape jo ianyanari ŋes?
5Naarai ibu kosub ŋes nepetai arianakin ka Edeke,
Itanapit ŋes aboko naka aibuses ka ayoŋio.
6
Isurumit ŋes aswamisio nuka akaninikon;
Ibwaikinit iboro kere kwap kakejeneke:
7Amerekekin kere ka imoŋin,
Eebo, ka itiaŋ da luka ais;
8Akweny nuka apak, iboro da luka ecor,
Kere luitoritos orotin luka aŋololin.
9
Wu EJAKAIT, EkosiJAKAIT,
Ejok ca ma noi ekonikiror kakwapisinei kere!
9
1Emalaenenei EJAKAIT kekatau kere;
Etodianari aswamisiokon kere nukaumokin.
2Eyalamanakin, alakanar kotomakon;
Ayeenenei aiturit ekonikiror, wu Jo Loijai kuju kakuj.
3Nacbonoriata lukasurupoka kau, Iguikinos, emudiaros kakonyenekon.
4Naarai ibu ijo kitodolo akabeit ka akiroka;
Ibu kiboikin oicoloŋ aitub kadolit.
5
Ibu kitoron atekerin, komudia ikaronok,
Komwata ikiroriakec ikar kere.
6Adaunos lukasurupo, asilikis ikar kere;
Ireria da lukiweliweli,
Amudiar aiitunetekec mudic.
7
Konye iboienenei EJAKAIT erai ekabaka ikar kere:
Etemonoki eicoloŋoke atubokinia.
8Etubokini akwapisinei kere kadolit,
Einakini ituŋa etube kotoma abeit.
9Eraun EJAKAIT aŋopis naka luereitai,
Eebo, aŋopis kapakio nuka ationis:
10
ŋul da luejenete ekonikiror kimunonenos;
Naarai ijo, EJAKAIT, mam ijalakinit ŋul lukimoete.
11Koyeoto aiturit EJAKAIT, loiboie koSion; Kolimonokis ituŋa akeswamisinei.
12Naarai iŋol loiburai aokot iituni kes:
Mam imurwokini aimony naka lukibakor.
13Kitimoi, wu EJAKAIT;
Koany aiticanitoika naketaanyut lukalaito,
Ijo lokitonyouni eoŋ korutei luka atwanare;
14
Tetere etodiari aituriokon kere:
Korutei luka akoku naka Sion,
Ebwonenena kotoma aitajarakon.
15Ebirokinos atekerin toma aipany nakebokete:
Epok akecekeiu kikulepek kotoma atacit nakelokete.
16
Etejenun EJAKAIT elopet, adau etube:
Epok yenikaronon kotoma aswam naka akaninike kilopet. Sela.
17
Eboŋorete ikaronok Okatwak,
Kes atekerin kere nuemurwokis Edeke.
18
Naarai mam luilwaritos imurwokinio apaarasia kere,
Karaida amun naka luitasonos mam eoliori ikar kere.
19Konyou, wu EJAKAIT, kinyek ituŋanan aipikor:
Kotubokinai atekerin kakonyenekon.
20Kitukurian kes, wu EJAKAIT:
Kojenut atekerin ebe eraas ituŋa atai! Sela.
10
1Kanukinyo ibwasitor, wu EJAKAIT?
Kanukinyo inopenenaa kapakio nuka ationis?
2
Idopeo yenikican kotoma aiwoŋonut naka ikaronok;
Kikamunai kes kobotei lukebilete.
3Naarai ituro ikaronon kanuka aiŋobel nakotauke,
Yenikebit da enerit, eebo, elait ŋesi EJAKAIT.
4
Ebala ikaronon kotoma aiwononutuke ebe, “Mam itepeseni.”
Ebalas akeomisio kere ebe, “Emamei Edeke.”
5Eninik ikerotin apaarasia kere;
Itubesiakon iyedara kuju noi kakonyeneke:
Ido imuanari lukasurupoke kere.
6Ebala kotauke ebe, “Mam eriaŋiriaŋa;
Mam aanyuni ican aitodol aturio kere.”
7
Ileleba aitukuke elamit ka aimod ka areit;
Kwap kaŋajepeke ejai ameŋeranut ka numam adolit.
8Iboikin aiboisio nuperunet koronyia:
Eari yenemamei aronis kaiboisio nuka aiyeiyea.
Imwarakinit yenikalany akekonyen.
9Eŋopi kaperunet kwape keŋatuny kotoma abuake:
Idasi aikamun yenikican;
Ikamuni yenikican, ibwosuni koboike.
10Ekukumi, elolot,
Ibirorete ikekagogonok lukalanyak.
11Ebala kotauke ebe, “Emurwoki Edeke:
Ebwa akekonyen; mam eanyununei.”
12Konyou, wu EJAKAIT; Wu Edeke, kodak akonikan:
Sirikiimurwok yenikibakor.
13Kanukinyo emenitor ikaronon Edeke,
Atemar kotauke ebe, “Mam itepeseni”?
14Ibu koany; naarai iseseni ameŋeranut ka aidupor, aibwaikin akanikon:
Elunakina ikalany mama iŋal:
Ibu koraun ekeŋarakinan loka ikokiok.
15Kobil akan naka ikaronon:
Ituŋanan yenikaronis da, komo ijo akeronis aitodol neemamuunor.
16EJAKAIT ŋes Ekabaka loka ikar kere:
Amudiaros atekerin kotoma akwapuke.
17EJAKAIT, ibu kiira eipud loka luitasonos:
Itemonokini itauonokec, isiirari akonikit:
18Airabakin ikokiok ka luemwaŋitai,
Kinyek ituŋanan yenelomuni kalup ajaut kanuitukurianete.
11
1EJAKAIT ŋes loamuno eoŋ;
Ikote ibalasi ai ekatau atiar,
“Koker oronatakus kwape kakweny”?
2Naarai koany, ikesete lukaronok akabwa,
Itemonokinete ekojokec,
Agumia kamuton luitenara itauon.
3Arai emudiario apeteta,
Ikwaikini ai ikadoliton?
4
Ejai EJAKAIT oyekaluke lokalaunan,
EJAKAIT, ejai ekeicoloŋ toma akui;
Esesenete akekonye idwe luka ituŋa, itemete akebukio kes.
5
Itemi EJAKAIT ikadoliton;
Konye elait eketau ikaronon ka ŋin yenekot nukagogoŋ.
6Isitepi atacin mama ejaas lukaronok;
Akim, ka acukuman ka ikwamin luepeonorete eraananas akoretait naka akolikec.
7Naarai edolit EJAKAIT; ekot adolit;
Eanyunete luitenara itauon akekonyen.
12
1
EJAKAIT, kiŋarak; naarai asan yeneyoŋit Edeke;
Naarai eŋoŋaros luiyuunito kodwe luka ituŋa.
2Inerasi aamameak ŋinituŋanan kiidunyeteke;
Ŋodoete inerasi kitauon iarei.
3Etubori EJAKAIT aituke kere nuijodoete,
Aŋajep da nainera akiro nuepolok;
4Luenerata atiar, “Kipikori kanaiepewok;
Aitukewok kes nuwok; iŋai bo kiyait oni?”
5
Kanuka aŋatario naka lukibakor, kanuka eidiny da loka luiyarorotos,
Ebala EJAKAIT ebe, “Natikwana anyouni,
Esinapikini ŋin yenimuarete.”
6
Akiro nuka EJAKAIT eraas akiro nuesegara:
Kwape itemere epuesa koupa kotoma akwap,
Itesegaario aatenak akanykaarei.
7Idarenenei kes, wu EJAKAIT,
Iiyari kes katur kana apaarasia kere.
8Ikaikinos ikaronok alosit iŋoliwai,
Naitopoloorere asilianut kodwe luka ituŋa.
13
1
Itodoli ai, wu EJAKAIT, aimurwonokin eoŋ ikar kere? Itodoli ai aisinopikinit eoŋ akonikonyen?
2Etodoli ai ainerunun kotauka,
Kaitururwenen kotauka aitiwar akwap?
Itodoli ai lokasurupika aitopoloonorio kamakaŋ?
3
Koomoom Koboŋok, wu EJAKAIT, Ekadeke:
Kitacau akakonyen kenyek ajotoor ajo nuka atwanare;
4Kinyek lokasurupika atemar atiar, “Epiko ŋes”;
Kinyeis lukekoloka eibwoŋ naerianirianar eoŋ.
5
Konye amuno akoniitim:
Ibwona ekatau kotoma aitajarakon.
6Ayoonokinenei EJAKAIT,
Naarai kekonaki nukajokak.
14
1
Atema yenibaŋ kotauke atiar, “Emamei Edeke.” Abosa kesi, eswamata nukasilianut;
Emamei yeniswamai nuejok.
2Abu EJAKAIT kosesen kokuju idwe luka ituŋa kokwap, Aanyun arai cani ejaas luejenete,
Luemoete da Edeke.
3Apaasi kere; emodumodunos;
Emamei yeniswamai nuejok, emamei imodio da.
4Emamei kereka luiswamaete numam adolit kere aijen?
Luenyamete ikatuŋa kwape enyamiata atap,
Komam iwoneto EJAKAIT.
5Akuriaka noi kaŋina;
Naarai ejai Edeke katur naka luedolito.
6Itisilete ainerun naka lukican,
Naarai EJAKAIT ŋes neekerianarake.
7Okwe, arai kolom aitajar naka Isirael koSion!
Nainyakunia EJAKAIT iketuŋa luaŋataritai,
Ti Yakob kibwoŋ, kiyalamikin Isirael.
15
1
EJAKAIT, iŋai bo iboienenei kowemakon?
Iŋai bo iboienenei koukotokon lokalaunan?
2
Ŋin yenelosenenei itenara, kiswamai nuedolito,
Kinera da nuka abeit kotauke.
3Yenimam akeŋajep esabanakinenei,
Karaida aikwaikin erono ikepapero,
Komam ecamunit ikeidunyet asiomio.
4
Yenemenito akekonye ikaronon,
Konye itubusikinit kes lueyoŋito EJAKAIT.
Naiyapoo, mam ibelokin, karaida ketwania.
5
Ŋin yenimam eyuuni kanuka aimedaun,
Kwabo mam eropio kanuka aitetelekar akiro yenimam akirot.
Ŋin yeniswamai ŋun, mam irianirianenena.
16
1
Kidarai, wu Edeke; naarai kamuno jo.
2Atema eoŋ EJAKAIT atiar, “Ijoŋo EJAKAIT ika:
Emamei eoŋ ajokis dimarai mamakon.”
3Lukalaunak luejaas kakwap,
Eraas kesi luejok noi, tomakec ŋes ejai akaiyalama kere.
4Itupuo ican luka ŋul kaluisiecarete EJAKAIT itia edeke ece,
Mam ainakini asubanakec numatan nuka aokot,
Kwabo mam alimuni ikecekiroria kakaituk.
5EJAKAIT ŋes akorakinet naka akairumet ka naka akakoli da;
Idari ijo ŋun nukabeikinete.
6Kebirokinos eoŋ aunoi kaiboisio nuketalakarak;
Eeca, ejai bo eoŋ airumet naejok.
7Emalai EJAKAIT, loabu kenerak eoŋ;
Eeca, kesisianakinete ineretenyaka kosawan luka akuare.
8
Etilinenenei EJAKAIT tiritir;
Naarai ejai iŋesi akanika nakoteten, mam eriaŋiriaŋenena.
9Ŋes iyalamar ekatau, ibwoŋar da akaibuses:
ŋes iboieneneo akakuan inapakina.
10
Naarai mam inyeini ekatau kOkatwak;
Kwabo mam icamakini ikalaunanikon aibos.
11
Kitodianakini eoŋ erot loka aijar:
Neijai ijo iŋes aiyalama naitekoro;
Akanikon nakoteten ŋes ejaas nuitalakarito ikar kere.
17
1Kiira naedolit, wu EJAKAIT, kopupok akaiwor;
Kitoik akit akailip, namam ebuni kaituk nakamodan.
2Kolom akatubokinio kamakon; Kosesenata akonyekon nuedolito.
3
Igimo ijo ekatau; kilatok eoŋ kuare;
Kirere eoŋ kwabo mam eanyuna akirot;
Akanau eoŋ ebe mam akaituk epaari.
4
Kwape ejaatar aswamisio nuka ituŋa, kanuka akirot naka aitukukon,
Abu kenac irotin luka ikadedeŋak.
5Ecat akalosit korotinikon,
Mam eiurusiara akakeje.
6Kewonei jo, naarai kiboŋokini eoŋ, wu Edeke; Kitoikinai akonikit, kopup nuenera.
7Kitodia akonisianut-nakamin nakaumokin, Wu jo loitajari lukimunosi jo,
Kama ejaas luenyoikinete, kakonikan nakoteten.
8
Kidarai kwape ecopot loka akoŋu,
Kibwaai kotoribe loka abebenokakon.
9Kama ejaas ikaronok lukanasete,
Lukasurupoka lukakotosi aiar, lukerigaunito.
10Arapia kes asiepaikec;
Inerasi nuka eitur kaitukekec.
11
Kirigaut sio kalositekosi:
Etogogonoto akecekonye aibirokin sio kwap.
12Esubit bala eŋatuny loibitiikinit kanuka imejaunake,
Ido bala ikoku yenika eŋatuny yenedapadapat kaiboisio nuperunet.
13Konyou, wu EJAKAIT,
Kotereikin, kibirok ŋes kwap;
Koyu ekatau kekonikileŋ kama ejai ikaronon.
14Kama ejaas ituŋa, kanuka akonikan, wu EJAKAIT,
Kama ejaas ituŋa luka akwapin, luejaas akorakinetekec kotoma aijar kana,
Luitilelebi abarakon akoikikec:
Epuikis kes idwe,
Inyeiniata ikecedwe ikeceboro luideunos.
15
Konye bo eoŋ, aanyuni akonikonyen kotoma adolit:
Naakwenyunia kadaunit asimakon.
18
1
Kamina jo, wu EJAKAIT, akagogoŋ.
2
EJAKAIT ŋes atiibaka, abwasika, ka ekayuunanika; Edekeka, atiibaka nakagogoŋ, amunonena ŋes;
Ekabuku, amulwarat naka aitajarioka, abwasika naicelelei.
3
Ewonenenei EJAKAIT, loibusakinit aiturio;
Ketajareneneo kwaŋin kama kalukasurupoka.
4
Kaena aunoi nuka atwanare,
Ketukuriana ŋol akalele nuka numam ayoŋit Edeke.
5Kerimorito aunoi nuka Okatwak:
Kepoka iica luka atwanare.
6Keworo EJAKAIT kotoma ocanika,
Kamony mama ejai Ekadeke:
Abu kiira ekaporoto koyekaluke,
Kodolok aimonyoka akiike.
7
Kosodi kijaniiana akwap, komarani,
Kilokilokos da apeteta nuka iroŋan,
Kijaŋijaŋasi, naarai anyunyura ŋesi.
8Kisusumau apuru kokumesike,
Kidonyo akim nakelomuni kaitukuke;
Kisinep atotol.
9
Kitukukum akuj, kodok;
Kojai amuton naejesi ŋaŋ kwap kakejeke.
10
Kibwanen ekerubi, koporo:
Eebo, koporo kiiror kabebenoka nuka ekwam.
11
Kituluo amuton akeŋopis, ekewema loiswaparit ŋes; Amuton naka akipi, idouon luitolimakinito luka akuj.
12Kikutasi ikedouon luitolimakinito kanuka amwekimwek naka akonyeneke,
Akako ka atotol nuka akim.
13
Kiretu da EJAKAIT kotoma akuj,
Kolimo Loejai kuju kakuj ekeporoto:
Akako ka atotol nuka akim.
14
Koguma ikekoioi, kisiarisiar;
Eebo, koguma aimiliaununeta nuipu, kisiyaloŋoŋ kes.
15Kotakanutu do alelesia nuka akipi,
Kideleleut apeteta nuka akwapin,
Kanuka airetakinikon, wu EJAKAIT,
Kanuka akutun naka eiyeŋane loka ikumesikon.
16
Abu kijuk kokuju, kayaŋa;
Kegalala kakipi nuipu.
17Abu kayu kama kalokasurupika lokagogoŋ,
Kama kakesi da lukalaito,
Naarai ketelekarito eoŋ kagogoŋ.
18Kabunokis kapaaran naka epolaka:
Konye EJAKAIT ŋes ketogogoŋi.
19
Ido abu ketoloma aibois naelal;
Abu kayu eoŋ naarai kesiyalamikinit.
20
Karop EJAKAIT eoŋ kwape ejaar akadolit;
Katacak kwape ejaar alaunite naka akaninika.
21Naarai abu karic irotin luka EJAKAIT,
Ido mam abu kejerukana kama ejai Ekadeke.
22Naarai ajaas itubesiake kere kakonyeneka,
Ido mam abu kajal akeicorakineta.
23Abu karai loadolit kamake,
Abu kedara kenyek aswam numam adolit.
24
Ŋes katacakinia EJAKAIT kwape ejaar akadolit,
Kwape ejaar alaunite naka akaninika kakonyeneke.
25
Mama ejai yeniketimon itodianakini aitim;
Mama ejai yenikadoliton itodianakini adolit;
26
Mama etai yenesegara itodianakini aseg;
Ido mama ejai yenetumaana itodianakini airebokinet.
27
Naarai itajari ituŋa luemwaŋitai;
Konye itisili akonye nuka lueomiara
28
Naarai itonokuni ijo akatala;
Itacauni EJAKAIT Ekadeke akamuton.
29Naarai kanukon arukitor ajore;
Ido kanuka aiŋarakinio naka Edekeka elami abwas.
30
Konye Edeke, edolit ekerot;
Egimor akirot naka EJAKAIT;
iŋol ŋes ebuku loka ŋul kere luemunos ŋes.
31
Naarai iŋai bo Edeke dimarai EJAKAIT?
Iŋai bo da atiiba dimarai Edekewok?
32Edeke loketanapikinit agogoŋ,
Loitodolit da ekarot.
33
Ituluori akakejen kwape nuka amiam:
Ido kebwaikini eoŋ aiboisioka nukokuju.
34Isisianakini akakanin ejie;
Tetere ikesete akakanin akabwa naka aikomon.
35Ido kiinak eoŋ ebuku loka akoniitajar:
Kegagauni akonikan nakoteten,
Ketopoloo eoŋ aiyapeperakon.
36Kitalalik eoŋ neetorit,
Mam ejurusiaros akatitiban.
37Ebwapi lukasurupoka, kadolok:
Bobo da mam aboŋuni aitodol neemudiarotor.
38Ecumueumei cut komam epedorete anyoun:
Ibirokinos kwap akejeka.
39Naarai ibu kitanapik eoŋ agogoŋ najus:
Itukukum ŋul lukanyoikinete.
40Isibonik lukasurupoka ikecepuran neajai eoŋ,
Tetere amudiari lukalaito.
41
Apotu kiworoto, konye komameun yenitajari:
Kiworoto EJAKAIT, konye mam abu Koboŋok.
42Kasodi kepudapud kes bala apua naekutari ekwam:
Kacaka kes bala erit loka irotin.
43Ibu koyu eoŋ kotoma aŋolopa naka ituŋa:
Kituluo ekeŋarenon loka atekerin:
Kejaanakinete eoŋ ituŋa lumam lem ajeni.
44Atipet kepuput nukaŋ karimarete;
Kanonokikinete imo.
45
Eoliorete imo,
Elomunete emaranete kaiboisiokec nuŋopis.
46
Ejari EJAKAIT; kituritete atiibaka;
Kitopolooritete Edeke loka akaitajario.
47Ŋes Edeke lokenyanakini, Ketapatanikini eoŋ ituŋa.
48
Kaiyanari eoŋ kama ejaas lukasurupoka:
Eebo, kidaka eoŋ kuju kaŋul kalukanyoikinete:
Kiyu eoŋ kama ejai ituŋanan yenikelepa.
49
Ŋes kemalaenena jo kotoma atekerin, wu EJAKAIT.
Ayeenenei aiturit ekonikiror.
50
Einakini ekabakake aitajar naepol:
Itodianakini da nukasianut-nakamin ekinyonyoikitonoke akinyet,
Daudi ka akeur ikar kere.
19
1
Elimorit akuj aibuses naka Edeke;
Itejenunit da apak aswam naka akaninike.
2Apaaran ineras kapaaran,
Akuare ka akuare itodianakinos aijen.
3Emameete akiro karaida aŋajep;
Mam iirario ekeceporoto.
4
Anataa eikorukec akwap kere,
Akecekiro da kiton osaŋe loka akwap.
Tomakec ebwaiki akoloŋ ewema.
5
Naesubit bala eteran loelomuni kotogoke,
Kolakara kwape ediniriria ekagogoŋon eboloboloi.
6
Akelomun egeuni kosaŋe loka akuj,
Akeirimor da kiton osaŋeke;
Kwabo emamei ibore yenibwaio kamwanisike.
7Edolit ekisil loka EJAKAIT, inyakuni etau;
Icasit aitejenunet naka EJAKAIT, itocouni ibaŋ.
8
Etenete aituutoonoreta nuka EJAKAIT, isiyalamikinete etau:
Esegara aicorakinet naka EJAKAIT, itacauni akonye.
9Ayoŋit naka EJAKAIT erai nakalaunan, ejaenena ikar kere; Itubesia luka EJAKAIT eraas lukabeit,
Luedolito cut.
10Ibusakinit eimiel aitelekarit esabu,
Eebo, esabu loepol loililiauna:
Ejijim aitelekarit esik ka akap naka ao.
11
Ikwenyarete teni ŋun ekonibulesit:
Toma aricit ŋun ŋes ejai eropit loepol.
12Iŋai bo yenepedori ajenun akepaar?
Kolemarai eoŋ aibucanareta nuibwaa.
13Kitikok da ekonibulesit kotoma aisosolonut;
Kinyek ayait eoŋ; kasodi kebecokin, K
enyek adiakar akirot naepol.
14
Kocam akiro nuka aitukuka ka aomoom nakotauka kakonyenekon, Wu EJAKAIT, atiibaka, ekalakunanika da.
20
1
Koboŋok EJAKAIT jo kapaaran naka aiyaloŋoŋ!
Ekiror da loka Edeke loka Yakob kitadakari jo kujul
2Kijukanakini iŋesi jo aiŋarakinio naebuni kaibois nakalaunan,
Koinanakini agogoŋ naebuni koSion.
3Kiitununei ŋesi ainanakinetakon kere,
Koeamununei ako nisuban nuicweio. Sela.
4
Koinanakini ŋesi jo nuimiela ekonitau,
Kitodolenenei nuineruni kere.
5
Kipikonori isio kotoma aitajarakon;
Kikianari imederanawok kokiror loka Edekewok.
EJAKAIT kitodolonokini nuilipi ijo kere.
6Natikwana ajeni ebe itajari EJAKAIT ekinyonyoikitonoke akinyet;
Eboŋokini kojai akujuke nakalaunan
Kagogoŋ naitanaleuni naka akekan nakoteten.
7
Emunosi ice agalin, ice da ibalasin;
Konye oni kilimit ekiror loka EJAKAIT Edekewok.
8Akukumoto, ebiroros:
Konye oni kinyou, kibwoi.
9Kitajar, wu EJAKAIT:
Koboŋok Ekabaka oni nakiworoo.
21
1Isiyalamanakini ekabaka akonigogoŋ, wu EJAKAIT; Elakanari ca noi kanuka akoniitajar!
2
Ŋaik ŋes nuimiela eketau,
Kwabo mam imikit nuilipit akeituk. Sela.
3Naarai iŋarenikini iŋes karerenesio nuka ajokis:
Itanapikini akouke aboko naka esabu loililiauna.
4
Abu kilip ijo aijar, ibu koinak;
Apaarasia nuipu, nuka ikar kere.
5Epol akeibuses kotoma aitajarakon:
Itanap ayoŋio ka apolou.
6Naarai itarau ŋes loka arereŋesio ikar kere:
Isiyalamikini ŋes kalakara kakonyenekon.
7
Naarai emuno ekabaka EJAKAIT,
Ido kanuka asianut-nakamin naka Loejai kuju kaku; mam iriaŋiriaŋa.
8Edolokini akonikan lukasurupokon kere:
Edolokini akonikan nakoteten ŋul lukilaito.
9
Itusubi kes bala eupa loesarani kapak naka anyunyurakon.
Ilikori EJAKAIT kes kotoma aliliteke,
Ido enyamari kes akim.
10Imudiari akeceraito kakwap,
Akeceur da kodwe luka ituŋa.
11Naarai apotu kokanata aiswamakin jo aronis:
Kobila da ebotet lomam epedorete aitodol.
12Naarai inyakari kes kau,
Itemonokini da aunoikon nuka akabwa kakonyenekec.
13
Kitopolooritete jo, wu EJAKAIT, kotoma agogoŋukon!
Kayeenenete isio da aiturit apedorikon.
22
1
Wu Ekadeke, Ekadeke, kanukinyo kijalakinia?
Kanukinyo ilwaniaror aiŋarakin eoŋ, kakiro nuka aumenoka? 2Wu Ekadeke, eworoi paaran, konye mam iboŋokini;
Kuare da mam eliliŋi.
3
Konye irai ijo lokalaunan,
Ijo loiboie kotoma aiturit naka Isirael.
4Kimunonenos jo lukapapaakos:
Kimunonenos, ibu koyuununei kes.
5Kiworoenenete jo, koyuununete:
Kimunonenos jo komam irumenenete ileic.
6
Konye eoŋ arai iritanit, kwabo mam arai ituŋanan; Imoromorot ka imenitono da yenika ituŋa.
7
Kakienatatar lukaanyunete kere, kesekelete:
Isuanaros, imuŋumuŋete akwes, kineras ebe,
8
“Koluŋakin neejai EJAKAIT; tetere eyuuni ŋes;
Tetere eyuuni ŋes, naarai elelakinit ŋes!”
9Konye ijo ŋol lokisidouni eoŋ kakoik naka totoka:
Lokisumunoori da aroko anaki.
10Aponi ketitiŋi jo ameuni kaurunioka:
Ijoŋ Ekadeke ameuni kakoik naka totoka.
11Sirikilwaniar kaneajai; naarai eapie aronis;
Naarai emamei yenikeŋarakini.
12Kerimorito imaseniko luipu;
Kerigaunito imaseniko lukagogoŋ luka Basan.
13
Kaoonanakinete aitukekec,
Kwape eŋatuny loikuna loegat.
14Kabukor kwape kakipi,
Elionyonokinos akakojo da kere:
Esubit ekatau bala edipor;
Acalar kokidiŋ amoetenaka.
15
Aono akagogoŋ bala atibolok;
Emakakin akaŋajep abokonyaka,
Kiyau da toma apua naka atwanare.
16
Naarai kerimorito iŋokwo:
Karidakinit atukot naka lukeswamak aronis;
Kecumata akakanin ka akakejen.
17Apedori aimarun akakojo kere;
Kasesenete kedetakinito akonye:
18
Akorokorata akanapito,
Kilamilamata eroet kanuka ekasoka.
19Konye sirikilwaniar, wu EJAKAIT!
Ijo ekakenarakinan, kiwonyuni aiŋarakin eoŋ.
20Koyu ekatau kokileŋ;
Iminataka kapedor naka ekiŋok.
21
Kitajarai kotoma aituk naka eŋatuny;
Eebo, ibu Koboŋok da kamumwar nuka ekosobwan.
22
Alimonokinenei ekonikiror mama ejaas iinacanaka:
Keturenenei jo kokidiŋ katukor.
23Kiturito ŋes, yes luiyoŋito EJAKAIT!
Kitopoloonorete ŋes, yes kere aur naka Yakob;
Koyoŋenenete ŋes, yes kere aur naka Isirael.
24Naarai mam abu komen kwabo mam abu kola Ican luka iŋol kaloiticanio;
Kwabo mam abu kibwa akekonyen kamakeŋ;
Konye naeworoo, abu kiira.
25Mamakon ŋes elomunia aituriteka kotoma okodet loepol:
Etodoli akaiyaposio kakonyen nuka ŋul kalueyonito ŋes.
26
Enyamete luitasonos kimonikinos:
Iturete EJAKAIT ŋul luemootos ŋes.
Kojarenenete ikusitauon ikar kere.
27
Iitunete rwaru awaitin kere nuka akwap, kibelokinos neejai EJAKAIT:
Emai ajena kere naka atekerin kakonyenekon.
28
Naarai ajakanut erai naka EJAKAIT:
ŋes da irumit atekerin.
29
Ituŋa luiusak kere enyamete emaete da:
ŋul da luebonorete toma apua ekukumete kakonyeneke, Ŋopeŋol lomam epedori aitajar eketau.
30Ijaanakini aur ŋes:
Elimokinio nuka EJAKAIT aitodol atur naejauni.
31Epote elimonokinete adoliteke
Mama ejaas ituŋa lumoolo eurio, ebe eswama ŋin.
23
1
EJAKAIT ŋes ekecokonika;
Emamei ibore yenepuda.
2
Kesiperikini amelo:
Keŋarenikini ariri naka akipi nueliiliete.
3Iteteuni ekatau;
Kenarenikinir korotin luka adolit kanuka ekekiror.
4
Eebo, karaida ketor aditot naka etoribe loka atwanare,
Mam akurianar aronis kere;
Naarai ijai ijo keoŋ;
Akonimorok ka ebelakon kes ketalakarito.
5Itemonokini ijo emesa neajai eoŋ
Kakonyen nuka lukasurupoka;
Inyonyoik akinyet akouka;
Ilapanar kadereka.
6
Abeit ajokis ka aitim katupenenete eoŋ
Apaarasia kere nuka aijaraka;
Eboienenei kotogo loka EJAKAIT ikar kere.
24
1
Alup eraas nuka EJAKAIT, ka ailelebakec;
Akwap kere, ka ŋul da luiboienenete kotoma.
2Naarai abu ŋesi kosipok roma aŋolol,
Abu kisieat kakalelen.
3Iŋai bo yenedokari moru loka EJAKAIT?
Iŋai bo da yenebwoi kaiboisike nakalaunan?
4
Ŋin yenejaas akanin nuelaete, etau da loesegara;
Yenimam itonyounit eketau mama ejaas aamameak,
Kwabo mam iyapot aimod.
5Itusulianyi EJAKAIT ŋin,
Edeke da loka akeitajario einakini adolit.
6Na ŋes atur naka iŋul kaluemoete ŋes,
Luemoete akonyenekon, wu Edeke loka Yakob. Sela.
7
Kitonyoutu akwesikus, yes irutei!
Konyoutu yesi da, ikirigin lumam idaunos!
Koloma Ekabaka loka aibuses.
8Iŋai bo Ekabaka loka aibuses?
EJAKAIT lokagogoŋ lokapedor, EJAKAIT lokagogoŋon kojie.
9Kitonyoutu akwesikus, yes irutei!
Eebo, kitonyoutu, yes ikirigin lumam idaunos!
Koloma Ekabaka loka aibuses.
10Iŋai bo Ekabaka lo loka aibuses?
EJAKAIT loka ajoresio,
Ŋopeŋol ŋes Ekabaka loka aibuses. Sela.
25
1
Etonyouni ekatau mama ŋal jo, wu EJAKAIT.
2
Wu Ekadeke, kamunonena jo,
Kenyeis ileic airum;
Kenyeis da lukasurupoka aipikor eoŋ.
3Eebo, lukidarito jo emamei yenirumete ileic:
ŋul luebilete ibotei luutai kes irumete ileic.
4
Kitodikinai ikonirotin, wu EJAKAIT;
Kisisianakinai ikonisokono.
5Kiŋarenikinoi kotoma abeitekon, kisisianakinai;
Naarai irai ijo Edeke loka akaitajar;
Kedareunenei jo aitiwar akwap.
6Kiitu, wu EJAKAIT aitimikon nakajokan, ka asianutukon-nakamin; Naarai kejaas apeŋo.
7
Sirikiitu aronisio nuka akatumun, karaida akadiakanar:
Kiitunai kwape ejaar akonisianut-nakamin,
Kanuka akonijokis, wu EJAKAIT.
8Ejok EJAKAIT ido edolit:
ŋes isisianakinia ikadiakanarak korot.
9Inarenikinenei luitasonos kotube:
Ido isisianakinenei luitasonos ekerot.
10Isokono kere luka EJAKAIT eraas asianut-nakamin ka abeit, Mama ejaas iŋul luericete aitutuketeke ka aitejenunetake.
11
Kanuka ekonikiror, wu EJAKAIT, Kisionioi numam adoliteka naarai ipu.
12
Iŋai bo ituŋanan yeneyoŋit EJAKAIT?
Ŋipeŋin isisianakinenei korot loeseikini.
13
Iboienenei eketau inapakina:
lrumenenei aurike akwap.
14
Aiyeiyea naka EJAKAIT ejai kaŋul kalueyonito ŋes:
Itodianakinenei akeitutuket.
15
Esesenenete ilkakonye EJAKAIT apaarasia kere;
Naarai elemununei ŋesi akakeje koboi.
16
Kibelokin neajai, kitim;
Naarai kasiliki bon, eticanitoi.
17Eyatakinos ican lukotauka:
Okwe kolemunai kotoma aitururuka!
18
Koomoom nuka aiticanioka ka aitaaritoika;
Kisionioi akaronisio kere.
19Koomoom nuka lukasurupoka, naarai ipu;
Kalaito da kalait naedwar.
20Okwe kidarenenei ekatau, koyuununei eoŋ!
Kenyeis ileic airum, naarai kamuno jo.
21Kedarata eoŋ alaunit ka adolit,
Naarai kedareunit jo.
22
Kolaku Isirael, wu Edeke,
Kotoma ocanike kere,
26
1
Kotubokinai, wu EJAKAIT, naarai abu kalosenenei kotoma abeiteka:
Abu da kamunoneno EJAKAIT komam ajurusiar.
2Koŋicai, wu EJAKAIT, kiniŋoi;
Kitem ikaŋeretenya ka ekatau da.
3Naarai ejai akonisianut-nakamin kakonyeka;
Abu kalosenenei da kotoma abeitekon.
4
Mam abu keboienenei kituŋa luutai;
Mam da kiupakin kaluijoseoko.
5
Alait eoŋ atukot naka lukeswamak nueroko,
Mam da kiboikin kalukaronok.
6
Elosenenei akakanin kotoma amamut karonis;
Kwaŋin kasodi airimor ekonitem, wu EJAKAIT:
7Tetere esiirari eporoto loka aimal,
Alimori da akoniswamisio kere nukaumokin.
8Wu EJAKAIT, amina aibois naka etogokon,
Ka aibois naiboieneno aibusesukon.
9Sirikimoria ekatau nepepe kikadiakarak,
Karaida akaijar nepepe kikaarak:
10Toma akaninikec ejai ameŋeranut,
Akanikec nakoteten ileleba ainakineta nuitumudakete akonye.
11Konye eoŋ alosenenei kabeiteka:
Kolakunai, kitimoi.
12Ebwoi akakeju kaibois naiiyakina:
Eturenenei EJAKAIT kotoma okodeta.
27
1EJAKAIT ŋes akaica ka akaitajar: da;
Akurianar iŋai?
EJAKAIT ŋes agogoŋ naka akaijar;
Akerit iŋai?
2Nakasurokiniata luiswamaete aronis ainyam akakuan, Kes lukasurupoka lukekoloka da,
Eguiikis ebiroros.
3Karaida kidukur ajore ainn,
Mam ekatau ekurianar:
Karaida kaadoikis ijiisio, ŋul da anirikini.
4Abu kelip EJAKAIT akirot adiopet,
ŋipeŋin naamoenenei;
Aiboienen kotogo loka EJAKAIT
Apaarasia kere nuka aijaraka,
Asesenen ajokis naka EJAKAIT,
Aomoomoenen da koyekaluke.
5
Naarai kapaaran naka aiyaloŋoŋ
Kedari kaiyeiyea kotogoke;
Kaŋopis naka ekewema ŋes kebwaia;
Ketonyouni katiiba.
6Natikwana itonyouni akouka kokuju kalukasurupoka lukerimorete; Ainakini da asuban nuka aiyalama owemake;
Ayeenenei, eebo, ayeenenei aiturit EJAKAIT.
7Wu EJAKAIT, kiira naeworoo keporotoka:
Kitimoi da, Koboŋok.
8Naitemaria atiar, “Komoata akakonyen”;
Kobala ekatau jo ebe,
“EJAKAIT, amoenenei akonikonyen.”
9Sirikibwa akonikonyen kaneajai;
Sirikirenea ekonibulesit kanyunyura.
Irai ijo ekeŋarakinanika;
Sirikiicaka, kwabo sirikiijalak,
Wu Edeke loka akaitajario!
10
Naarai kajalakis papaka ka totoka,
Konye ketanuni EJAKAIT.
11Kisisianakinai ekonirot, wu EJAKAIT;
Kitetenai kosokot loetakani,
Kanuka lukasurupoka.
12
Sirikiinak mama ejaas lukasurupoka aiswamakin nuipudasi:
Naarai kanyoikis ikasabak, ka ŋul luinerasi nuka adedeŋ.
13
Tikeilor arai kemam eyuunit aanyun ajokis naka EJAKAIT
Kakwap naka lukajarak!
14
Kidareu EJAKAIT!
Kogogoŋior, kotitiŋior;
Eebo, kidareu EJAKAIT!
28
1Kewonei jo, wu EJAKAIT:
Atiibaka, sirikikiminanar kamakaŋ:
Arai kiililiŋik
Aputoori ŋul luijesaros aipany.
2Kiira eporoto loka akaiŋaiŋa, naeworoo,
Naarioria akaninika neejai aiboisikon nakalaunan.
3Sirikiidilidila nepepe kikaronok,
Ka ŋul da luiswamaete numam adolit;
Luineras nuka ainapakin kiidunyetakec,
Konye kojai ameŋeranut toma otauonokec.
4
Koinak kes kwape ejaatar akeceswamisio,
Kwape ejaar aronis naka nuiswamaete;
Koinak kwape iswamaata akecekanin,
Korop nuibusakinito kes.
5Naarai mam esesenete aswamisio nuka EJAKAIT,
Karaida nuesubete akekanin,
Itakitaki kes, komam eduki.
6Kituritete EJAKAIT!
Naarai eira eporoto loka akaiŋaiŋa.
7
EJAKAIT ŋes akagogoŋ, ka ekabuku da;
Emunoneno ekatau ŋes, keŋarakin;
ŋes eyalamikinor ekatau noi;
Eturenenei ŋes kekosioka.
8EJAKAIT ŋes agogoŋukec,
ŋes aŋopis naka aitajar neejai ekinyonyoikitonoke akinyet.
9Kitajar ikonituŋa, kisirereŋ akoniirumet:
Kitanyamenenei kes, kiganite da ikar kere.
29
1
Koinakisi EJAKAIT, yes odwe luka ikagogoŋok,
Koinakisi EJAKAIT aibuses ka agogoŋ.
2Koinakisi EJAKAIT aibuses naibusakinit ekekiror;
Komaata EJAKAIT konapito luelaete.
3Ejai eporoto loka EJAKAIT akipi:
Iretuni Edeke loka aibuses; Ejai EJAKAIT akipi nukepuak.
4Egogoŋ eporoto loka EJAKAIT;
Ileleba eporoto loka EJAKAIT apolou.
5Ebili eporoto loka EJAKAIT iresia;
Eebo, ebilibilei EJAKAIT iresia luka Lebanon.
6
Itucuri da kes kwape kitaok;
Lebanon ka Sirion kwape kikosobwan.
7Ecili eporoto loka EJAKAIT aŋajepa nuka akim.
8
Isirieŋuni eporoto loka EJAKAIT amodiŋ;
Isirieŋuni EJAKAIT amodiŋ naka Kades.
9Isidouni eporoto loka EJAKAIT amiamieik,
Iregari amonieik;
Ebala ŋinibore koyekaluke ebe, “Aibuses!”
10
Abu EJAKAIT kiboikin akalele kwape ekabaka;
Eebo, iboie EJAKAIT kwape ekabaka ikar kere.
11
Einakini EJAKAIT iketuŋa agogoŋ;
Isirereŋi EJAKAIT iketuŋa kainapakin.
30
1Ketopoloorenenei jo, wu EJAKAIT, naarai kikia eoŋ,
Mam isiyalamikinit lukasurupoka aipikor eoŋ.
2
Wu EJAKAIT, Ekadeke,
Abu keworo, kitaŋaleu.
3
Wu EJAKAIT, ibu kitonyou ekatau kOkatwak:
Ibu kidar akaijar kenye aijesar toma Aipany.
4Koyeenenete aiturit EJAKAIT, yes lukalaunakake,
Kimalaenenete ekekiror lokalaunan.
5
Naarai etubor akenyunyura atipet;
Toma aminake ejai aijar:
Diat kimonyi akuare kia, konye kilakar tupuruc.
6
Eoŋ da naakerianar kabala ebe,
“Mam eriaŋiriaŋenena.”
7
Ijo EJAKAIT, kotoma aminakon,
Ibu kiticat ekaroŋat kogogoŋ;
Ibu kibwa akonikonyen; keyaloŋoŋ.
8Keworoi jo, wu EJAKAIT:
Ido keŋaiŋa EJAKAIT ebe,
9
“Ajokis anyoin ejai toma aokotoka, kejesar Aipany?
Kiturenenei kereka apua jo?
Elimonokini kereka abeitekon?
10
Kiira, wu EJAKAIT, kitimoi:
EJAKAIT, koraun ijo ekakenarakinan.”
11
Ibelok akaibworo araun ekosio;
Ilaea igoen luka aibworoka, kitanap aiyalama:
12Tetere kiyoonokini akaibuses aiturit jo, komam ililiŋi,
Wu EJAKAIT Ekadeke, kemalaenenei jo apaarasia kere,
31
1Wu EJAKAIT, kamuno jo;
Kenyek aisurumeneneo ileic:
Kolakunai kadolitekon.
2
Kitoikinai akonikit;
Kisunyite alakun eoŋ.
Koraun atiibaka nakagogoŋ,
Etogo loegalikinio aitajar eoŋ.
3
Naarai ijo atiibaka ka akabwas da;
Kanuka ŋun korikoroi kiŋarenikinoi kanuka ekonikiror.
4Kolemunai kotoma oboi lokalokitere kaiyeiyea;
Naarai irai ijo akabwas.
5
Eŋadakini ekamoyo akanikon:
Ibu kolaku eoŋ, wu EJAKAIT, ijo Edeke loka abeit.
6Alait ŋul lueomitos aamameak nuka aiŋal;
Konye amuno eoŋ EJAKAIT.
7
Alakanar eyalamanakin kanuka akoniitim:
Naarai ibu koany akaiticanio;
Ibu kojen ekatau kotoma ocan:
8
Kwabo mam ibu kogoloo eoŋ akan naka lokasurup:
Ibu kibwaik akakeje aibois naelal.
9Kitimoi, wu EJAKAIT, naarai kakadaki:
Aoniki akakoŋu kanuka aimony,
Eebo, ekatau ka akakuan da.
10Naarai iiŋoŋanar akaijar kaiturur, ka ikaruka da keidiny:
Etegaki akagogoŋ kanuka numam adoliteka,
Akakojo da aoko.
11
Kanuka lukekoloka kere araun eoŋ amorosit,
Eebo, mama ejaas ikaidunyeta cut,
Ido akurian mama ejaas ipaupaka:
Lukaanyunete korot kakerete.
12Kemurwokin bala ikatwan yenimam eomitai:
Asub bala atido naabwaŋa.
13
Naarai abu keira areanakin naka luipu,
Etasuro loepol iwaitin kere!
Naeneruniata aluikin eoŋ,
Kotuboto acoa amudiar akaijar.
14Konye kamuno jo, wu EJAKAIT:
Katema atiar, “Ijo Ekadeke.”
15Ejaas akapaarasia akanikon:
Koyuunai kakan naka lukasurupoka,
Kaneejaas ŋul dil lukemanito.
16
Kitacaik ekonibulesit akonikonyen:
Kitajarai kakonisianut-nakamin.
17
Kenyeis ileic airum, wu EJAKAIT;
Naarai keworo jo:
Kisurumenenei ikaronok ileic,
Kisililiŋ kes kOkatwak.
18
Kisibuta aituke nukeŋalak:
Nuinerasi nuka epali mama ejaas ikadolitok,
Kelepa ka emwaŋit.
19
Eiliili cama akonijokis
Nainadakinit ŋul lukiyoŋito,
Naiswamakinia ŋul lukimunos,
Kakonyen nuka odwe luka ituŋa!
20
Ibwai kes kotoma aŋopis naka ajautukon
Kobotei luka ituŋa:
Idarenenei kes kaiyeiyea kowema
Kama ejai aŋolopa naka aŋajepa.
21Kituritete EJAKAIT!
Naarai ketodiki akesianut-nakamin nakaumokin
Kotoma ore loegogoŋ.
22Esuburiarit eoŋ einer ebe,
“Kamudiar kakonyenekon”:
Kwabo ibu kopup eporoto loka akaiŋaiŋa
Nakeworoo jo.
23
Kominasi EJAKAIT, yes kere ikekalaunak:
Itaŋaleuni EJAKAIT lumunon,
Eropi noi ekeswaman nukelepa.
24Kogogoŋoto, kotitiŋioto,
Yes kere luidareunito EJAKAIT.
32
1
Isirereŋitoi ŋin yenisionio adiakarike,
Yenerapitai da akeronis.
2
Isirereŋitoi ituŋanan yenimam imarakini EJAKAIT numam adolit,
Yenimam emodit komoyoke.
3Nakelilinia, komoionata akakojo
Kanuka aumenoka aitiwar akwap.
4Naarai kalaŋirikinit akonikan paaran ka kuare:
Koonikis akakip bala aonit naka akamu. Sela.
5
Abu kalimok jo akaronis,
Komam ebwait numam adoliteka:
Kabala ebe, “Alimori adiakaretaka mama ejai EJAKAIT.” Sela.
Ibu kisioni numam adolit nuka akaronis.
6
Kanuka ŋun kilipenenei jo ŋinituŋanan yeneyoŋit Edeke kapak naitakanunia:
Abeit naeleleata akip nuipu mam edolokinete ŋes.
7
Ijoŋ anopisika; kiiyari ijo eoŋ kocan;
Kirigauni eoŋ kikososinei luka alakunio. Sela.
8
Ketuutonori jo, kesisianakini da korot loiloseneneo:
Kekwenyari jo kakakoŋu.
9Sirisubito bala ibalasin, arai bala inyubun, luemamei ajenun:
Luibusakinit ajen kasua ka amunyin aitikokinia kes,
Kinyeis aikunyakin mama ijai.
10
Ejaunos ikaronok ican luipu;
Konye yenemuno EJAKAIT irigauni ŋin aitim.
11Kiyalamikinos kotoma EJAKAIT, kolelata yesi ikadolitok:
Kibwoŋata kanuka aiyalama, yes kere luitenara itauon,
33
1Kolelata toma EJAKAIT, yes ikadolitok:
Aiturit ibusakinit yenitenara kotau.
2Kimalata EJAKAIT kadeudeu:
Koyeikis aiturit ŋes kisabulin luka aputio atomon.
3
Koyeikisi ŋes ekosio lokitetet:
Koramakis ejok keporoto loepol.
4Naarai etenit akirot naka EJAKAIT;
Akeswam da kere iswamai kamunonut.
5Emin adolit ka etube:
Ileleba akwap asianut-nakamin naka EJAKAIT.
6
Asubunio akuj kakirot naka EJAKAIT;
Ajoreke da kere keiyeŋane loka aitukuke.
7Etukonokini akipi nuka aŋololin nepepe bala atukit:
Inadi ataroi toma odula.
8Koyoŋ akwap kere EJAKAIT:
Komaranata luiboiete kere kotoma akwap.
9
Naarai abu kolim, kiswamai;
Abu kicorak, kicat da.
10Itapalauni EJAKAIT ainerun naka atekerin:
Itwataniari aomisio nuka ituŋa.
11
Icasit ainerun naka EJAKAIT ikar kere,
Aomisio da nukotauke mama ejaas aturio kere.
12Isirereŋitoi ateker naerai EJAKAIT Edekekec;
Ituŋa luaseu araun airumeteke.
13
Eseseni EJAKAIT kokuju;
Itei da idwe kere luka ituŋa;
14Kotoma aibois naiboio
Eseseni kere luiboiete kakwap;
15
ŋopeŋol loitemonokini itauonokec kere,
ŋes da loeomoomoi aswamisiokec kere.
16Emamei ekabaka loitajaritai kanuka ajore naepol;
Mam lokagogoŋ eyuunio kanuka agogoŋuke naepol.
17Erai ebalasit ibore yenitai kanuka aitajar:
Mam da eyuuni imodio kere kanuka akegogoŋ naepol.
18
Koany, itei akoŋu naka EJAKAIT ŋul lueyoŋito ŋes,
Ka ŋul da luemunos aitimike;
19Ayuun itauonokec kotoma atwanare,
Aitajar da kes kotoma obeli.
20Idarito itauonowok EJAKAIT:
Erai ewokokenarakinan ka ewokobuku da.
21Isiyalamikinito iwokotauon iŋol,
Naarai kimunokin ekekiror lokalaunan.
22Kodolok sio akoniitim, wu EJAKAIT,
Kwape kimunokinor jo.
34
1
Emalaeneriei EJAKAIT apakio kere:
Aituriteke ejaununei toma aitukuka.
2
Eolobobot ekatau kotoma EJAKAIT:
Iirarete luitasonos iyalamikinos da.
3Kitopoloosi EJAKAIT yesi ka eoŋ da,
Keturoto ekekiror nepepe!
4
Abu kamo EJAKAIT, kaboŋok,
Kayu eoŋ kotoma akurianuka kere.
5Apotu kosesenata ŋes, kitacaunai:
Mam bobo akonyenekec ileicikinete.
6
Abu lokican lo kiworo, kiira EJAKAIT ŋes,
Kitajar ŋes kocanike kere.
7
Idukuri emalaika loka EJAKAIT alukun ŋul lueyoŋito ŋes, Eyuuni da kes.
8
Kiir ber, koany ebe ejok EJAKAIT!
Isirereŋitoi ituŋanan yenemuno ŋes!
9
Koyoŋito EJAKAIT, yes ikalaunakake:
Naarai emamei ibore yenipudas ŋul lueyoŋito ŋes.
10Ilwaritos iŋatunyo ludidik, eriebete eteŋei:
Konye ŋul luemoete EJAKAIT mam eolikinete ibore kere yenejok.
11Kopotu, yes idwe, kopupunoi:
Kesisianakinete yes aiyoŋ EJAKAIT.
12
Iŋai bo ituŋanan yenimiela aijar,
Yenemina da apaarasia nuipu, tetere edumuni ajokis?
13
Kisinac aŋajepekon nukaronok,
Ka aitukukon da aimod.
14Konyou kotoma aronis, kiswama ajokis;
Komo ainapakin, kotupa da.
15
Esesenete akonye nuka EJAKAIT ikadolitok,
Itoikinit da akiike apupun aimonyokec.
16
Egirito akonyen nuka EJAKAIT ŋul luiswamaete aronis, Amwatar aiitunetekec kotoma akwap.
17Apotu ikadolitok kiworoto, kopup EJAKAIT,
Koyu kes kocanikec kere.
18Eapie EJAKAIT kaneejaas ŋul kere luebilil itauon,
Itajari ŋul luejaas emoyo loitoronikina.
19Ipu aicaneta nuka ikadoliton:
Konye eyuuni EJAKAIT ŋes kotoma kaŋun kere.
20
Idari akojoke kere:
Mam da amodio naebila.
21
Eari aronis ikaronok:
Etubokinio ŋul luelaito ikadolitok.
22
Elakuni EJAKAIT itauon luka ikekejaanakinak:
Mam etubokinio idio kaluemunosi ŋes.
35
1Wu EJAKAIT, kopegata kaŋul luepegasi keoŋ:
Kitiji ŋul luketijiete eoŋ.
2Kokap ebuku ka eupal,
Kobwo kiŋarak eoŋ.
3Kout akwara da kigalik erot loka ŋul kalukarukitotor:
Kolimok ekatau ebe, “Eoŋ akoniitajar.”
4Kisurum ileic kitisil da ŋul luemoete akaijar:
Kitoboŋo kau kisiyaloŋoŋ ŋul luinerunete aiswamakin eoŋ aronis.
5Kosubata kesi bala agugu nuekutari ekwam,
Kireŋe kes emalaika loka EJAKAIT.
6Koraun ekecerot amuton ka arurut,
Korukitor kes emalaika loka EJAKAIT.
7Naarai apotu kolokikis eic toma aipany alokia eoŋ komameete akiro,
Abokikis ekatau aipany komameete akiro.
8
Kobunok ŋes amudiario komam ecoit,
Kipok ŋes elopet eicike loalokit:
Kibirokin komudiar.
9
Kosodi elakar ekatau kotoma EJAKAIT:
Elelakini akeitajar.
10
Etemarete akakojo kere ebe, “EJAKAIT, iiŋai bo iputotor ijo, Loiyuuni lokican kama kaŋol kaloitelekarit ŋes kagogoŋ,
Eebo, lokican ka loilwaritoi kama kaŋol kaloenetart?”
11Anyout ikajenak lumam edolito;
Kenita akiro numam ajeni.
12Eropete eoŋ karonis itia ajokis,
Aitisilikin ekatau.
13Konye eoŋ, kedekakinos kesi,
Anapi inapen luka aibworo:
Ketaari ekatau ailuŋ;
Eboŋokini akailip toma atorobuka alopet.
14Abu kekonak kwape tikeraar ekapapero arai onaceka:
Kakukum aibworo kwape yenekuudiani totoke.
15Konye do kecodokin eoŋ kiyalamikinos, kotukonokinos; Katukonokinotor luenolopaka, komam ajeni;
Kanyilinyilata komam eionoete:
16Kwape lukesekelok lueinyanakinete kopucino, Kakonyanakiniata ikel.
17EJAKAIT, itodoli ai itei?
Kitajar ekatau kotoma amudiarikec,
Iminataka kama ejaas iŋatunyo.
18Kemalai jo kokodet loepol:
Keturenenei jo kotuŋa luipu.
19
Kinyeis ŋul lueraas lukasurupoka aiyalamikin kaiŋal:
Karaida ŋul lukalaito komameete akiro aedia akonye.
20Naarai mam inerasi ainapakin:
Konye inerunete akiro nuka aiŋal
Aluikinio ŋul luiyapaara kakwap.
21Eebo, kaoonikinitos noi aitukekec;
Kobalas ebe, “Us, ijo ba! Abu akosikonu kogipa!”
22
Ibu ijo kogipu, wu EJAKAIT: sirikililiŋ:
Wu EJAKAIT, sirikilwaniar kamakaŋ.
23Kokweny, konyou kotubok eoŋ akiro, Akakiro,
Edekeka ka EJAKAIT ika.
24
Kotubokinai wu EJAKAIT Ekadeke, kwape ejaar akonidolit;
Kinyeis aiyalamar eoŋ.
25Kinyeis atemar kotauonokec ebe,
“Ijo ba, kwaŋin kito!”
Kinyeis atemar ebe, “Kiliko oni ŋes elue.”
26Kisurum ileic kisiyaloŋoŋ kere
Luisiyalamikinito eoŋ adumun aronis!
Kitanap ileic ka asiles lukadakanarotor!
27Kibwoŋata kanuka aiyalama, kolakaros,
Luitojokitos akakirot nakadolit:
Eebo, kinerenenas duc ebe,
“Kitopolooritete EJAKAIT,
Loeminakinit akerianut naka ekebulesit.”
28Kosodi inerenena akaŋajep adolitekon,
Aituritekon da aitiwar akwap.
36
1
Inera adiakar naka ikaronon kotauke ebe,
Emamei akurian Edeke kakonyeneke.
2Naarai iturokina bon kakonyeneke ebe,
Numam adoliteke mam eieriunio, mam elaio da.
3
Eraas akiro nuka aitukuke numam adolit ka aiŋal:
Enyeki nukacoa ka aswam da nuejok.
4
Ineruni numam adolit koitadake,
Ibwaikina elopet bon orot lomam ejok;
Mam esacit aronis.
5
Wu EJAKAIT, ejai akonisianut-nakamin toma akui;
Edolit amunonutukon toma akuj.
6
Esubit adolitekon bala iroŋan luka Edeke;
Itubesiakon eraas ataro naepol:
Wu EJAKAIT, idari ijo ituŋanan ka itiaŋ da.
7
Ejok ca ma akonisianut-nakamin, wu Edeke!
Eŋopete idwe luka ituŋa kotolim loka abebenokakon.
8
Imonikinos kojokan atarion nakotogokon;
Itamasi kes ecor loka aiyalamakon.
9
Naarai neijai ijo ŋes ejai atan naka aijar:
Toma aicakon ŋes kianyunia isio aica.
10
Kiyatak ijo akonisianut-nakamin mama ejaas ŋul lukijenete jo; Ka adolitekon da mama ejaas luitenara itauon.
11Kinyek akeju naka luituros aluikin eoŋ,
Kinyeis da akanin nuka lukaronok aireŋear eoŋ.
12Ebirokinos nen ikeswamak numam adolit:
Alatanakin kwap, mam epedorete anyoun.
37
1Siriyaloŋoŋoenenei kanuka lukeswamak aronis,
Sirikokotekit da ŋul luiswamaete numam adolit.
2Naarai etubio kwape anya,
Erinyorete bala amel.
3Komunonena EJAKAIT, kiswamaenenei nuejok;
Kiboienenei kakwap, kotupenenei amunonut.
4
Kolakanar kama ejai EJAKAIT;
Kiinakini ŋesi da jo nuimiela ekonitau.
5
Kititiŋik EJAKAIT ekonirot;
Komunonena ŋes, itodolenenei ŋesi da.
6
Itoduuni akonidolit bala aica,
Akoniitub da kwape kidiŋ paaran.
7Kililiŋ kaneejai EJAKAIT, kidareununei katitiŋikinit; Siriyaloŋoŋoenenei kanuka ŋin yenekeriana korotoke,
Kanuka ituŋanan yenitodoli ibotei luka aronis.
8
Kinyek anyunyura, kojal adedeŋ;
Siriyaloŋoŋoenenei, naarai iriuni ŋin aronis.
9Naarai egelario luiswamaete nueroko:
Konye ŋul luidarito EJAKAIT, kes irumete akwap.
10Naarai kapak naedit, emameun ikaronon:
Eebo, irerei cut akeibois, ido emameun.
11
Konye luitasonos irumete akwap;
Iyalamanakinos kainapakin naeiliili.
12Ineruni ikaronon aluikin ikadoliton,
Ekonyanakinor ŋes ikel.
13
Konye ekienar EJAKAIT ikaronon;
Naarai eanyuni ebe eapie akepaaran.
14Autut ikaronok ikileŋa, eketata akabwaikec;
Aibirokin yenikican ka yenilwaritoi,
Aiar ŋul luitenara korot:
15Icumete ikecekileŋa itauonokec kikulepek,
Ebilas akabwaikec.
16
Idis luejaatar ikadoliton
Itelekaritos aipues naka iboro luka ikaronok luipu.
17Naarai ebilas akanin nuka ikaronok:
Konye igaŋit EJAKAIT ikadolitok.
18
Ejeni EJAKAIT apaarasianuka luitenara:
Ejaenena akeceirumet ikar kere.
19
Mam irumenenete ileic kapakio nuka aronis:
Imonianakinos da kapaarasia nuka eteŋei.
20Konye eoliorete ikaronok,
Ilicaros lukasurupo luka EJAKAIT kwape ajokis naka elet;
Icweikinio; epuriorete bala apuru.
21Ijauni ikaronon, komam inyakakini bobo:
Konye ekori yenedolit kasianut, einakini da.
22
Naarai luisirereŋitoi irumete akwap;
Ka ŋul luikenit ŋesi egelario.
23
Iticasi EJAKAIT alosit naka ituŋanan;
Isiyalamikinit da ekerot.
24
Karaida kibiror, mam elatar noi;
Naarai igaŋit EJAKAIT kakekan.
25Adite kolo eoŋ, konye kwana amojoŋ;
Konye eriŋa eanyuna yenedolit ejalakinitai.
26Karaida akeur ilipitoi inyamat,
Ekori kasianut aitiwar akwap, eyuuni;
Isirereŋitoi da akeur.
27Konyou kotoma aronis, kiswama nuejok;
Kobut ikar kere.
28
Naarai emin EJAKAIT etube,
Ido mam ejalakini lukalaunakake;
Idario kes ikar kere:
Konye egelario aur naka yenikaronon.
29Irumete ikadolitok akwap,
Ebusete kotoma ikar kere.
30Inera aituk naka ikadoliton nuka acoa,
Elimonokini da akeŋajep etube.
31Ikisila luka Edekeke ejaas otauke:
Mam ejurusianar kotoma alositeke kere.
32Eseseni ikaronon ikadoliton,
Kokoto aiar.
33
Mam EJAKAIT inyeini kakanike,
Karaida aitetelekar ŋes naetubokinere akiro.
34Kidareununei EJAKAIT, kotupenenei ekerot,
Ŋes da kitopoloori jo airum akwap:
Ianyuni egelario lukarenok.
35Abu kaany ikaronon ejai apedor naepol,
Kigananai kwape kekitoi loelomunit kalupoke.
36Konye kitor, ido koany, emamei:
Eebo, abu kamo, konye mam etakanuna.
37
Koŋicenenei yenedolit, kiteenenei yenetenit:
Naarai esaŋe loka ituŋanan kaŋin ŋes ainapakin.
38Konye ikadiakanarak emudiario nepepe:
Egelario cut esaŋe loka yenikaronon.
39
Konye aitajario naka ikadolitok ebuni kama ejai EJAKAIT:
Ŋol ŋes anopisikec kotoma apakio nuka icano
40
Ido iŋarakini EJAKAIT, itaŋaleuni kes:
Itaŋaleuni kama ejaas ikaronok, itajari kes,
Naarai akeriasi neejai ŋesi.
38
1Wu EJAKAIT, sirikiiretak kakoninyunyura:
Karaida alecor eoŋ kotoma akadakinikon naepol.
2Naarai kediriakinos cut ikonikojoi,
Karidakinit eoŋ akonikan noi.
3Emamei aŋaleu kakuanaka kanuka aisiopitekon;
Kwabo emamei aiyeŋun kotoma akojoka kanuka akaronis.
4Naarai elaparos numam adoliteka kakouka:
Kalaŋirikis noi kwape abwokon naepol.
5Auruut akamusunun ido abosuut,
Kanuka akabaŋaanut.
6Kesiriebi kaeuikinitai noi;
Alosi amonyi aitiwar akwap.
7
Naarai ilelebikina akanabet amwanis;
Ido emamei aŋaleu kakuanaka.
8Eilor aiionokineta nuipu:
Eluluk kanuka aiyaloŋoŋ nakotauka.
9EJAKAIT, nuemiela kere ejaas akonyenekon;
Mam ibwaa ekaidiny kamakon.
10Ebala ekatau pukupuk, eŋoŋar akagogoŋ;
Asesen naka akakonye, kaoliki ŋin da.
11
Abwataros lukaminasi ka ikapapero kama ejaas aromaka;
Abwataros da lukajenaka.
12Ŋul da Iuirigaete aijaraka, kalokete;
Ka ŋul da luitojokito eoŋ aanyun ican
Ineras nuka ameŋeranut,
Ido itetemonorete nuka aiŋal kotauonokec aitiwar akwap.
13Konye eoŋ, asubit bala ekimiŋ, mam epupi;
Asubit bala ebaŋ lomam eoonari akeituk.
14Eebo, asubit bala etuŋanan lomam epupi,
Emamei aitukuke aitoron.
15
Naarai kamuno jo, wu EJAKAIT:
Kiboŋokini wu EJAKAIT Ekadeke.
16Naarai abu katema atiar, “Kinyeis kesi aiyalamar eoŋ:
Keiurusiar akakeju kadakanarotor.”
17Naarai eapie eoŋ aicodokin,
Akaiturur ejai akonyeneka tiritir.
18
Naarai alimori numam adoliteka,
Kakadakinite kanuka akaronis.
19Konye eŋaleete lukasurupoka egogoŋ da:
Eyatakinos ŋul lukalaito kotoma aiŋal.
20
Ka ŋul da Iuinyanete aronis itia ajokis
Kes lukasurupoka, naarai atupit eoŋ akirot naejok.
21
Sirikiijalak, wu EJAKAIT.
Wu Ekadeke, sirikilwaniar kaneajai.
22
Kiwonyuni aiŋarakin eoŋ,
Wu EJAKAIT loka akaitajario.
39
1
Abu katema atiar, “Edarenenei ikaponesio,
Kenyek aibucar kaŋajepeka:
Aeni akaituk kamuny,
Naejaar lokaronon akonyeneka.”
2Abu kebanubanun keliliŋi,
Kabuta komam enera karaida nukajokak;
Kiyatakin akaiturur.
3
Komwanu ekatau kotomaka;
Naaomoomaa kinep akim:
Kasodi kener kaŋajepeka ebe:
4“Wu EJAKAIT, kitejenunai esaneka,
Ido kwape ejaar aitemisioit naka apaarasiaka;
Kitejenunai kwape araar loaloŋwana.
5
Koany, ibu kituluo akapaarasia kwape alalau naka akan;
Akaibut da erai ibore yenitai kakonyenekon:
Abeit ŋinituŋanan naicasitor erai eiyeŋane lootai. Sela.
6Abeit elosi ŋinituŋanan bala etoribe,
Abeit iyaloŋoŋoete atai:
Etuki abar, komam ejeni yeneyaari.
7Aso do, wu EJAKAIT, edareunit inyo?
Ejai akamun mamakon.
8Koyuunai kapaaretaka kere:
Sirikiituluo amorosit naka ibaŋiok.
9Abu kebanubanun, mam abu kaoona akaituk;
Naarai ibu kosub.
10Kolema ebelakon kamaka:
Karumo ainomio naka akonikan.
11Naitetenia ituŋanan kairetakin kanuka numam adolit,
Irumori akejokis kwape ekaporiporit:
Abeit ŋinituŋanan erai eiyeŋane lootai. Sela.
12
Kopup akailip, wu EJAKAIT, kitoik akit akaiwonet;
Sirikililinik akakiyo:
Naarai arai eloŋwait kamakon,
Ekeboiororon, kwape ajaatar lukapapaaka.
13
Okwe kideunai eoŋ, tetere ecasicasi,
Eriŋa kenyouno, kamameun kane.”
40
1Abu kedareununei EJAKAIT katitiŋikinit;
Ketoik ŋesi eoŋ akit kopup akaimony.
2Ido kalem kaipany naka amudiario,
Kotoma orit loiminai;
Kibwaik akakeje atiiba,
Kiticat akalosit.
3Epikaki ekosio lokitetet aitukuka,
ŋes aiturit Edekewok:
Eanyunete luipu, koyoŋata,
Komunokinos EJAKAIT.
4
Isirereŋitoi ituŋanan yenemuno EJAKAIT,
Yenimam ibwaikinit aibuses luiwoŋoko,
Karaida luepaarete aiŋal.
5
Wu EJAKAIT Ekadeke, ipu aswamisio nukaumokin nuibu kiswama, Ka aomisiokon nuejaas mamakosi;
Mam epedorete aitemokin kamakon;
Arai akoto alimor ka einer kes,
Ipu mam imarunos.
6
Mam isiyalamikinit asubanit ka ainakinet;
Ipuko akaki;
Mam ibu kokoto ainakinet naicweio,
Karaida ainakinet naka adiakaret.
7
Kasodi kener ebe, “Koany, abu eoŋ;
Ewadikatai nukaŋ oitabo lonunuko:
8
Wu Ekadeke, esiyalamikinit eoŋ aswam nuikoto ijo,
Eebo, ejaas ikonikisila otauka.”
9
Alimonok adolit kotoma atukot naepol;
Koany, mam ctubutanari akaituk,
Wu EJAKAIT, ijeni ijo.
10
Mam ebwait akonidolit kotauka;
Alimonok amunonutukon ka akoniitajar:
Mam emunonit akonisianut-nakamin ka abeitekon kama ejai atukot naepol.
11
Wu EJAKAIT, sirikiimik eoŋ akoniitim naiyapaara;
Kedarete tiritir akonisianut-nakamin ka akonibeit.
12
Naarai kerimorito nukaronok numam imarunos,
Kadolokis numam adoliteka,
ŋes mam apedoria asesen kuju;
Epuata aitelekarit itim luka akouka, Eteg ekatau.
13Wu EJAKAIT, kitojok ayuun eoŋ.
Wu EJAKAIT, kiwonyuni aiŋarakin eoŋ.
14Kirumata ileic kimuarai kere
Luemoete amudiar akaijar:
Kinyakarai kau komwanai
ŋul luisiyalamikinito eoŋ adumun aronis.
15Kosilikis, kanuka ileicikec
Lukesuanarete ebe, “Uus, Uus!”
16Kiyalamikinos kolakaros da kotomakon kere lukimoete:
Kinerenenas tiritir lueminas akoniitajar ebe,
“Kitopolooroi EJAKAIT!”
17
Konye arai eoŋ lokican loelwaritoi da;
Keitunit EJAKAIT eoŋ;
Ijo ekakenarakinan ido ekakayuunan;
Sirikiyap, wu Ekadeke.
41
1
Isirereŋitoi ŋin yeniitunit yenikican:
Eyuuni EJAKAIT ŋes kapaaran naka aronis.
2Idarenenei EJAKAIT ŋes tetere ebusi,
Ido isirereŋitoi kakwap;
Sirikiinak ŋes mama ejaas lukasurupoke aiswamakin nuipudas.
3Igaŋi EJAKAIT ŋes ilworuna koitada:
Itemonokini ijo cut akeperit kedekakin.
4
Katema atiar, “Wu EJAKAIT, kitimoi:
Kitaŋaleu ekatau; naarai adiaka kamakon.”
5Ineras lukasurupoka nueroko mamaka ebe,
“Wori bo etwania, koolio ekekiror?”
6
Naebunio ediopet aanyun eoŋ, inera aamameak;
Etuki eketau numam edolito:
Itatami da ŋun ilato.
7Iyeiyeas lukalaito kere nepepe:
Inerunete aiswamakin eoŋ aronis.
8Ebalas ebe, “Adoiki adek nakaronon:
Kwape do eperio mam bobo enyouni.”
9
Eebo, epadicaka loabu kamuno, loanyamenenei akatap, Ketonyoiki aketitibat,
10Konye jo, wu EJAKAIT, kitimoi, kitonyounoi,
Tetere enyaŋari.
11Ŋes ajenunia ebe kisiyalamikinit eoŋ,
Naarai mam Iokasurupika kepikorit.
12
Kiganit ijo eoŋ kotoma adoliteka,
Kibwaikinit da akonyenekon apaarasia kere.
13
Kituritete EJAKAIT, Edeke loka Isirael,
Ageun apeŋo aitodol ikar kere,
Amen ka Amen.
42
1Kwape iyeŋanakinor amiam kanuka akipi nuka aleles,
Kwape kwaŋin iyeŋanakinor ekatau kanukon, wu Edeke.
2
Ejakit ekatau akur kanuka Edeke, kanuka Edeke lokajaran:
Adoli wori ketaanyun kakonyen nuka Edeke?
3Araunos akakiyo ikanyamat paaran ka kuare,
Nakeŋisiananata aitiwar akwap ebe,
“Ai bo ejai Ekonideke?”
4
Eituni akiro ŋun, abukokin ekatau toma,
Nakiupar kekodet kenarenikinite kes togo loka Edeke,
Kiporotoi luka ailel ka aiturit,
Etuŋat loidari apaaran nakalaunan.
5
Kanukinyo ilurio, wu etauka?
Kanukinyo iyalononoo kotomaka?
Komuno Edeke: naarai eturenenei ŋes,
Kanuka aŋaleu naka akonyeneke.
6Wu Ekadeke, alur ekatau kotomaka:
ŋes keitunio kakwap naka Yorodan,
Komoru da Kerumon, koukot loka Misar.
7
Ataro iworoi ataro kairurum naka akipikon nuibulubulas:
Karapia eoŋ akalelekon ka akailanakon kere.
8
Konye icorakini EJAKAIT akesianut-nakamin paaran,
Kuare da kijaun eoŋ kekekosio,
ŋes ailip Edeke loka akaijar.
9Enisi eoŋ Edeke atiibaka ebe,
“Inyo bo kimurwokinia eoŋ?
Inyo bo alosio ebworo
Kanuka aroikinit naka lokasurup?”
10Kamoromoroete lukasurupoka bala ekileŋ loicumit akakojo; Nakeŋisiananata ebe, “Ai bo ejai Ekonideke?”
11Kanukinyo ilurio, wu etauka?
Kanukinyo iyalononoo kotomaka?
Komuno Edeke, naarai eturenenei ŋes,
Loerai aŋaleu naka akonyeneka, ka Ekadeke da.
43
1
Kotubokinai, wu Edeke, kopurokinai
Kama ejai ateker namam eyoŋit Edeke:
Kitajarai kama ejai ituŋanan yenikenalan
Ka yenimam edolir.
2
Naarai irai ijo Edeke loka akagogoŋ;
Inyo bo kicakaria?
Inyo bo alosio ebworo
Kanuka aroikinit naka Iokasurup?
3
Okwe kijuk akoniica ka akonibeit;
Kenarenikis:
Kayautu eoŋ morukon lokalaunan,
Owemaikon lukalaunak.
4Kasodi alosit otem loka Edeke,
Mama ejai Edeke aileleka namam itemio;
Keturenenei kadeudeu, wu Edeke, Ekadeke.
5
Kanukinyo ilurio, wu etauka?
Kanukinyo iyalononoo kotomaka?
Komuno Edeke: naarai eturenenei ŋes,
Loerai aŋaleu naka akonyeneka, ka Ekadeke da.
44
1Kipou keirasi kakosiki, wu Edeke,
Apotu lukapapaakosi kolimonokis sio,
Aswamisinei nukiswamaenenei kapaarasiakec,
Kapaarasia nukolosek.
2
Ibu kireŋea atekerin kakonikan, kiraik kes:
Ibu kitican ituŋa, kisiarisiar kes.
3
Naarai mam erumete akwap kanuka ekilenikec,
Karaida akecekan mere ŋes etajari kes:
Dimarai akonikan nakoteten, ka aica naka akonyenekon,
Naarai ibu komina kes.
4
Irai ijo Ekakabaka, wu Edeke:
Kicorak aitajar kanuka Yakob.
5
Kiremori lukasurupokosi kanukon:
Kicakacakai ŋul lukinyoikinete sio kanuka ekonikiror.
6
Naarai mam amuno akakabwa,
Ekakileŋ da mere ŋes ketajari eoŋ.
7Konye ibu ijo kitajar sio kama kalukasurupokosi,
Ibu kisurum ŋul lukilaito sio ileic.
8
Toma Edeke kitureneneo aitiwar akwap;
Kimalaenenei ekonikiror ikar kere. Sela.
9Konye natikwana kicaka ijo sio, kitisil;
Kwabo mam iupanaros kajoresiokosi.
10
Kinyaki sio kau kaneejaas lukasurupokosi;
Enaŋete ŋul lukilaito sio kanukec.
11
Ibu kituluo sio bala imerekekin lueseunitai ainyam;
Ibu kisiarak sio toma atekerin.
12
Igwelari ikonituŋa atai,
Komam idumunit ameda kotiaikec.
13Kituluo sio amorosit kama ejaas iidunyetakosi,
Lukisekelio ka lukisuanara kama ejaas ŋul lukirimorito.
14Kituluo iwaraga kotoma atekerin,
Ikimuŋumunes akwes kotuŋa.
15Ejai aitisilioka akonyeneka aitiwar akwap,
Adakar akakou.
16
Kanuka eporoto loka yenimoromoroi ka yeneinyanakini; Kanuka lokasurup ka lokenyaŋan da.
17
Kidolokis ŋun kere; konye mam sio kimurwokinit jo, Kwabo mam sio kinalat kotoma aitutuketekon.
18Mam ikositauon ebonorito kau,
Karaida akosikejen mam epaarito korotokon;
19
Karaida ibu kipieipic sio noi kaibois naka ikuwei,
Ibu kiteribo sio ketoribe loka atwanare.
20Arai kimurwokinit isio ekiror loka Edekekosi,
Arai kiiriorit akosikanin mama ejai edeke logela;
21
Mam kereka Edeke enicuni ŋun?
Naarai ejeni aiyeiyea nakotau.
22
Eebo, kanukon kiario aitiwar akwap;
Kimario bala imerekekin lutubutubo.
23Kokweny! Kanukinyo iiotoo, wu EJAKAIT?
Konyou! Sirikiicaka ikar kere.
24Kanukinyo ibwaia akonikonyen,
Kimurwok aiticanitoikosi ka aroikiniokosi?
25Naarai aluroosi ikositauon toma apua;
Eminaikinos akosikoikes alup.
26Konyou kiŋarakinai,
Kolakunai sio kanuka akonisianut-nakamin.
45
1Ilapanar akirot naejok kotauka;
Enera akiro nuapeleu nuka ekabaka:
Aŋajepeka ŋes ekalamu loka ekewadikan loekapakina.
2Itemelel ijo aitelekarit idwe luka ituŋa;
Ebukokinitai asianut aitukukon:
ŋes kisirereŋio Edeke jo ikar kere.
3Koenik ekonikileŋ otul, ijo ekagogoŋon,
Koen akoniibuses ka apoloukon.
4Kibwanen kapoloukon kipiko,
Kanuka abeit ka aitasono ka adolit:
Akonikan da nakoteten kisisianakini jo akiro nusogim.
5Eitak ikonikojoi:
Ibironoros ituŋa kakonyenekon;
Ejaas ikonikojoi otauon luka lukasurupo luka ekabaka.
6
Ejaenena ekoniicoloŋ loka ajakanut ikar kere, wu Edeke:
Ebela lokadolit ŋes ebela loka ajakanutukon.
7
Imina adolit, ilait aronis:
Tape Edeke, Ekonideke, kinyonyoikini jo
Akinyet naka aiyalama aitelekarit lucekon.
8Eurok ikoninapen kere sa luesaete, icicikwa, ka ekasia;
Kisiyalamikinito jo iraman luka aputio
Kotoma otogoi luka ekabaka luka ikel luka etom.
9Ejaas adwe nuka ikabakan toma aŋorokon nukaibuses:
Ebwoi akabaka kakanikon nakoteten enapit esabu loka Opir.
10
Kiira, ijo apese, koomoom, kitoik akitikon:
Kimurwokis ituŋakon, ka ekal loka papakon.
11
Ŋes do imielakinor ekabaka akonitemelel:
Naarai iŋes ekonijakait; komaenenei ŋes.
12Ebuni da apese naka Turo kainakinet;
Iŋaiŋaete lukabarak kotuŋa akonimin.
13
Erai akoku naka ekabaka naibus kotoma ore loka ekabaka:
Esonyitai inapeneke kesabu.
14Eyaŋaunio mama ejai ekabaka enapit lueculueulo:
Eyaŋaunio neuai ijo
Abekon nukaupake nuetupitos.
15Eyaŋaunio kaiyalama ka ailel:
Elomarete togo loka ekabaka.
16
Aibois naka lukapapakon ejaunos ikonidwe,
Luituluori ijaka kakwap kere.
17
Esiitununei aturio kere ekonikiror;
ŋes kimalaeneneata jo ituŋa ikar kere.
46
1Edeke ŋes neekerianarawok, ka agogoŋuwok,
Ekeŋarakinan lokirurukit noi kotoma ocan.
2Ŋes mam kikuriakaror, karaida kijulakin akwap,
Karaida keukonoros iroŋan kidiŋ aŋololin:
3Karaida kirurumata akip kilunulunanaros,
Karaida kemaranata iroŋan kanuka adakununukec, Sela.
4
Ejai nen ecor, italakarete iciletake ere loka Edeke,
Aibois nakalaunan naka iweman luka iŋol loejai kuju kakuj.
5
Ejai Edeke kidiŋike; mam eukun:
Iŋarakini Edeke iŋes tupuruc sek.
6Erurumata atekerin, aukonoros ajakanuto;
Kelimo ekeporoto, kocalar akwap.
7Ejai EJAKAIT loka ajoresio kaoni;
Edeke loka Yakob ŋes neekerianarawok. Sela.
8Kopotu, koanyut aswamisio nuka EJAKAIT,
Nukaumokin nueswamaki akwap.
9Itasani ijiisio kiton osaŋe loka akwap;
Ebili akabwa, etubutubei akwaras;
Icwei agalin kakim.
10Kopalasi, kojenut ebe Eoŋ Edeke:
Ketopoloonorio katekerin,
Ketopoloonorio kakwap.
11Ejai EJAKAIT loka ajoresio kaoni;
Edeke loka Yakob ŋes neekerianarawok. Sela.
47
1Kibapata akanin, yes ituŋa kere!
Kibwoŋata mama ejai Edeke keporoto loka aipikor.
2
Naarai eyonitai EJAKAIT loejai kuju kakuj;
ŋes Ekabaka lopeti kakwap kere.
3
Kitapatanikini oni ituŋa,
Atekerin da akejewok.
4
Kiseikini oni airumetewok,
Ajokis naka Yakob loamina ŋesi. Sela.
5
Adoka Edeke kecelet loka ailel,
Adoka EJAKAIT keporoto loka arupepe.
6Koyooto aiturit Edeke, koyooto aiturit ŋes!
Koyooto aiturit Ekabakawok, koyooto aiturit ŋes!
7
Naarai Edeke ŋes Ekabaka loka akwap kere:
Koyooto aiturit ŋes kaijen.
8Irumit Edeke atekerin;
Iboie Edeke koicoloŋoke lokalaunan.
9Atukonokinos ijaka luka ituŋa
Neejaas ituŋa luka Edeke loka Aburaam:
Naarai ibukui luka akwap eraas luka Edeke;
Itopolooritai ŋes noi.
48
1
Epol EJAKAIT, ibusakinit aiturio noi,
Kotoma ore loka Edekewok, koronatake lokalaunan.
2
Ejokuna aiceleleke, ailel naka akwap kere,
ŋes emoru Sion, kari naka agolitomei,
Ere loka Ekabaka lokapolon.
3Etejenun Edeke kotogoike lukapolok
Ebe Erai neekerianara.
4
Naarai koany, apotu ikabakan kotukonokinos,
Kotuboros nepepe.
5Apotu koanyut, kosodete aumokin;
Kiyaloŋoŋoto, kiwonyasi.
6Komaranata kanen;
Koriebasi bala aberu naerieb aidoun.
7
Ekwam lokokide
ŋes ibilibilia ameerin nuka Tarusis.
8
Kwape kipupunio, kianyu kwape kwaŋin
Kore loka EJAKAIT loka ajoresio,
Kore loka Edekewok:
lticasi Edeke ŋes ikar kere. Sela.
9Wu Edeke, kiwoomoom isio akonisianut-nakamin,
Kokidiŋ oyekalukon.
10
Wu Edeke, kwape ejaar ekonikiror,
Ejai kwape kwaŋin akoniiturit aitodol osaŋe loka akwap:
Ileleba akonikan nakoteten adolit.
11Kolakar emoru Sion,
Kolelata adwe nuka Yuda,
Kanuka itubesiakon.
12Aso kirimosi Sion, kimanimanata,
Kimarata itogoike lukaojak.
13Kirereoro arwatatinike,
Koomoomata nuka itogoike lukapolok;
Tetere itatamanakinete atur naetupakini.
14
Naarai Edeke ŋol erai Edekewok ikar lumam enaŋete:
Erai ekeŋarenikinoniwok aitodol atwanare.
49
1Kiirasi nu, yes atekerin kere;
Kitoikisi aki, yes kere luiboienenete kakwap:
2Imukopin ka lukapolok,
Lukabarak ka lukibakor kere nepepe.
3Inerenena akaituk nuka acoa;
Eomoomoenenei ekatau nuka aijen.
4
Etoikini akak it apupun awarag:
Ekuiuni kadeudeu akakirot naemunonit.
5Inyo bo akurianar kotoma apaarasia nuka aronis,
Nakerigaunitor amamus adolit atitibanaka?
6Luemunos abarakec,
Koomiara kanuka aipues naka abarakec.
7
Emamei kaŋul yenepedori alakun onaceke nepetai da,
Karaida ainakin Edeke lugelis ŋes:
8
(Naarai eiliilete akais nuka alakun akeceijar,
Ibusakinit ainyeinio ikar kere.)
9
Tetere ebusi ikar kere,
Komam ebosi.
10Naarai eanyuni ebe etwakete lukacoa,
Yenibaŋ ka yenesubit etiaŋ eoliorete kere nepepe,
Inyeiniata da ice akecebar.
11Eomitos kotauonokec
Ebe Ejaenenas ikecetogoi apaarasia kere
Aiboisiokec da enatarete aturio kere:
Emaanakinete akecekwapin ikiroriakec kikulepek.
12Konye mam ebusenenei etuŋanan kayonio:
Esubit bala itiaŋ lueoliorete.
13Ekecerot ŋol ŋes akecebaŋaanut:
Konye ituŋa luetupakinete kes itojokete akecekiro. Sela.
14
Elomarete Okatwak bala amerekekin;
Eraun atwanare ekecokonikec:
Eyaenenete luetenito kes kiwala akwap;
Eraun aputokec nailikorio kokatwak,
Tetere emameikini aibois.
15
Konye elakuni Edeke akaijar kotoma agogoŋ naka Okatwak:
Naarai ŋes kesukunyikini. Sela.
16Siriyonenenei etuŋanan kebar,
Kiyatakin aibuses naka eketogo:
17Naarai naetwania mam eyaŋaari imodiobore;
Mam akeibuses etupari ŋes.
18Karaida abu konyarite akeijar nakarereŋ naariŋar ejari,
Ido kiturito ituŋa jo naiswamanakinor nukajokak.
19Elosi ŋesi neejai atur naka lukapapaake;
Mam eanyunete bobo aica.
20
Ituŋanan yenejai aibuses komamei aijen, Esubit bala itiaŋ lueoliorete.
50
1Edeke, ŋes Edeke, EJAKAIT, ener,
Anyara akwap anyoun kaneelomunia akoloŋ
Aitodol neelomaria bobo.
2Anyoun koSion, ajokis naedolit,
Eliyau Edeke.
3Ebunit Ewokodeke, mam Ililiŋi:
Enyami akim koiŋareneke,
Irimorito ŋes ikwamin lueiliilete.
4
Iworoi akuj kokuju,
Akwap da, tetere etubokini iketuŋa;
5
Kotukonokisi lukalaunakaka neajai;
ŋul luetutukete keoŋ aitutuket kasubanit.
6Elimonokini akuj akedolit;
Naarai Edeke elopet ŋes ekatubon. Sela.
7“Kiirasi, okwe ikatwa, kener eoŋ:
Ijo Isirael, ketejenuni jo:
Arai eoŋ Edeke, Ekonideke.
8Mam ketoroni kanuka asubanakon;
Ejaas ainakinetakon nuicweio akonyeneka tiritir.
9
Mam alemuni emoŋ lotobait kotogokon,
Karaida ikorwa lumaseniko kosipaninikon.
10Naarai iŋolitiaŋ loka amagoro erai lokaŋ,
Ka ibaren luejaas koukono ilukumin.
11Ajeni akweny kere nukoronan:
Ka itiaŋ da luka ais eraas lukaiŋ.
12Arai kaariebi eteŋei, timam kalimok jo:
Naarai erai akwap nakaŋ, ka ailelebake.
13Anyamenenei kereka eoŋ akirig naka imoŋin lumaseniko?
Arai amasenenei kereka eoŋ aokot nuka ikorwa?
14
Koinanakinenei Edeke asubanit naka aimal:
Kitodolenenei akoniiyaposio mama ejai iŋol loejai kuju kakuj:
15
Ido kiworoununei eoŋ kapaarasia nuka ican;
Kayuuni jo, kitopoloori ijo da eoŋ.”
16Konye ebala Edeke yenikaronon ebe,
“Ipodo inyo alimonokin akaicorakineta,
Aitwasam da akaitutuket kaitukukon?
17
Naarai isacit aituutoorio,
Ieakanari da akakiro kaukon.
18
Naianyunia ekokolan, ibu koupakinos kaŋes,
Ido kimorikikinos kidotea.
19Itacamikinit akoniituk einer aronis,
Inera da akoninaiep nuka aiŋal.
20Iboie komoromoroi onacekon;
Ido isabanakini okoku loka totokon.
21
Ibu kiswamaenenei ŋun, keliliŋi eoŋ;
Koomite ebe opaputokon cut eoŋ:
Konye ketoroni jo, eterereikini kes akonyenekon.
22Aso do kiitutu nu, yes lukimurwokis Edeke,
Kenye apoopo yes, komameun yenikiyuuni;
23Yeneinakini asubanit naka aimal, ketopoloori eoŋ:
ŋin da yenitemokini ekerot
Etodikini eoŋ ŋes aitajar naka Edeke.”
51
1
Kitimoi, wu Edeke, kwape ejaar akonisianut-nakamin:
Komwata apaanaretaka kwape ejaar aipues naka aitimesiakon.
2
Kiloŋarai eoŋ cut numam adoliteka,
Kitesegarai da akadiakar.
3
Naarai ajeni eoŋ apaanaretaka:
Akadiakar da ejai duc akonyeneka.
4
Adiaka eoŋ kaneijai jo bon,
Eswama nukaronok kakonyenekon:
Tetere kitojokio jo nainerar,
Kosegara naitubio.
5
Koany, toma numam adolit ŋes kauriere:
Toma adiakar da ŋes kapotuunio totoka.
6Koany, imiela ijo abeit kotoma atutubeta nukotoma:
Kitejenuni ijo eoŋ acoa kotoma atutubet naibwaa.
7Kidetarai kesop,
alauni eoŋ da:
Kiloŋai, kakwanu aitelekarit akile.
8Kisiirarai alakara ka aiyalama;
Tetere iyalamikinos akojo nuibu kobil.
9Kibwa akonyenekon kinyeis aanyun adiakanaretaka,
Komwata numam adoliteka kere.
10
Kosubakinai etau loelai, wu Edeke;
Kibwaikinai emoyo lokitetet loetenit tomakaŋ.
11
Sirikiicaka kakonyenekon;
Sirikilema ekonimoyo lokalaunan kamakaŋ.
12
Kinyakakinai alakara naka aitajarakon:
Kigaŋai eoŋ kemoyo loka asianut.
13Kasodi aisisianakin ikapaanarak ikoniponesio;
Ibeleunos do ikadiakanarak mamakon.
14Wu Edeke, koyuunai kotoma akirot naagwaunit naka aokot,
Ijo Edeke loka aitajaraka;
Ikalalai akaŋajep ayoore akonidolit.
15Wu EJAKAIT, kitoona akaituk;
Itodiari akaituk akoniiturio.
16Naarai mam isiyalamikinit asubanit; tikainak:
Mam da itojokit ainakinet naicweio.
17Asubanit naka Edeke ŋes emoyo loebilil:
Wu Edeke, mam imeni etau loebilil loisilarit.
18Kiswamak Sion ejok kakotekon naejok;
Koduk ijo arwatatin nuka Yerusalem.
19
Kosodi ijo aisiyalamikin asuban nuka adolit,
Ainakinet naicweio ka ainakinet napeot;
Kosodete kesi ainakin imoŋin lutobai kotemukon.
52
1
Kanukinyo iwolobobotor kotoma ameŋeranut, ijo ekagogoŋon? Ejaenena aitim naka Edeke tiritir.
2
Itetemonori akoninaiep nukaronok;
Iswamai nuka aiŋal kwape kebarenit loekwana.
3
Imina aronis adepar ajokis;
Ka aiŋal da adepar einer nuka adolit. Sela.
4Imina akiro kere nuisiriebete,
Okwe ijo aŋajep nakeŋalan.
5
Kimudiari Edeke jo ikar kere,
Kidakuni jo, kiwurupuuni jo kowemakon,
Kirutuni anyoun kakwap naka lukajarak. Sela.
6
Eanyunete da ikadolitok, eyoŋete,
Ekienatatar kinerasi ebe,
7
“Koany, etikesa lo ŋes lomam abu kitarau Edeke akegogoŋ:
Konye komunokin akebar naepol,
Kiketakin kotoma aronisike.”
8
Konye asubit eoŋ bala eseituni
Loelibilibi kotogo loka Edeke:
Amuno aitim naka Edeke ikar lumam enaŋete.
9
Kemalaenenei jo apaarasia kere, naarai ibu kosub:
Edareununei ekonikiror, naarai ejokuna,
Kakonyen nuka lukalaunakakon,
53
1
Atema ibaŋ kotauke ebe, “Emamei Edeke.”
Abosata, eswamata aronis naketal;
Emamei yeniswamai nuejok.
2
Abu Edeke kosesen kotoma akuj idwe luka ituŋa,
Aanyun arai kejaas ice kakesi luajenete,
Luamoete Edeke.
3
Aboŋo ŋinituŋanan kakesi kau: asiliakata kere;
Emamei yeniswamai nuejok, emamei idio da.
4
Emamei kereka lukeswamak numam edolito aijen?
Luenyamete ikatuŋa kwape enyamiata atap,
Ido mam iwoneete Edeke.
5Apotu kokuriakata noi kanen, kaneamamei akurian:
Naarai esiarisiar Edeke akojo nuka ŋin kayenidukurit asurokin jo;
Isurum kes ileic, naarai aŋer Edeke kes.
6Arai kebunit aitajario naka Isirael koSion!
Nainyakunia Edeke iketuŋa luenataritai,
Elakar do Yakob, iyalamikin Isirael.
54
1Kitajarai, wu Edeke, kanuka ekonikiror,
Kotubokinai kagogoŋukon.
2Wu Edeke, kiira akailip;
Kitoik akit akiro nuka aitukuka.
3Naarai kanyoikis imo,
Emoete ikadedeŋak akaijar:
Mam ibwaikinito Edeke akonyenekec, Sela.
4
Koany, Edeke ŋes ekakenarakinan:
Ejai EJAKAIT nepepe kaŋul kaluigaŋito akaijar.
5
Itobonikini aronis neejaas lukasurupoka:
Komudia ijo kes kotoma abeitekon.
6Kainakini jo ainakinet nakakote:
Wu EJAKAIT, emalaenenei ekonikiror, naarai ejokuna.
7Naarai kayuu kotoma ocan kere;
Asesen da akakoŋu nuakotor lukasurupoka.
55
1Wu Edeke, kitoik akit akailip,
Kwabo sirikiŋopik akaiŋaiŋa.
2Koŋolearai, koboŋokinoi:
Elolitoi eoŋ kanurianaka, edinyil da;
3Kanuka eporoto loka lokasurup,
Kanuka aroikinit naka ikaronok;
Naarai kaeakanakis numam edolito,
Ido kerigaete kanyunyura.
4
Kariebi etau noi kotomaka:
Kadoiki da etasuro loka atwanare.
5Kadoloki arieŋun ka amaran,
Kaunia akurian.
6Kasodi eoŋ ebe, “Arai kiŋa kabebenoka nuka ajelel Tikaporoo, kalot keyeŋ.
7Koany, tikapaa neelwana,
Tikaper modiŋ. Sela.
8Tikadinirir nemecat
Ikwamin ka akiru naepol.”
9Komudia, wu EJAKAIT, kotiakatiak akeceŋajepa:
Naarai aany adedeŋ ka eŋuŋet kore.
10Edapadapata karwatatin paaran ka kuare aswam ŋun:
Ido nepenen ejaas numam adolit ka ameŋeranut.
11Nepenen da ejaas nukaronok:
Mam aroikinit ka emodit enyounete korotinike.
12Naarai mere lokasurup kamoromoroi;
Tikapedo atitiŋikin:
Mere iŋopeiŋol lokalait loitopolooro bon aluikin eoŋ:
Tikaiŋopik.
13
Konye ijo, etuŋanan oparianaka, Opaperoka, opadieaka loanaikinit noi.
14Kipou kenerununete nepepe kaiyalama,
Kipou kalosenenete kotogo loka Edeke kikodeta.
15
Konesa kes atwanare,
Kodokasi Okatwak ejarete:
Naarai ejai aronis otogoikec, kokidiŋikec.
16Ewonenenei eoŋ elopet Edeke;
Ido ketajarenenei EJAKAIT.
17
Eboŋ ka atupuruc, kokidiŋ paaran da,
Aŋuriani, edinya da:
Iiranari ŋesi da ekaporoto.
18
Abu kolaku akaijar kotoma ainapakin
Kojie lokasurokinitere:
Naarai epu luketijiete eoŋ.
19
Iirari Edeke, eboŋokini kes,
Ŋes ŋol loebusi ameun apeŋo,
Ŋul lumam ijulakinos,
Lumam eyoŋete Edeke. Sela.
20Ario akekanin mama ejaas ŋul luenapapaete kaŋes:
Abu kobil akeitutuket.
21Ajijim akeituk bala akinyet,
Konye kojio eketau:
Kononok akekiro aitelekarit akinyet,
Konye koraas ikileŋa lueutunitoi.
22
Kowoik EJAKAIT alanirukon,
Ŋes da kiganununei jo:
Mam ecamakinit ikadolitok aiiananario.
23Konye jo, wu Edeke, itodokari kes toma aipany naka amudiario:
Ikaarak ka ikeŋalak mam ebusete adaun atutubet naka apaarasiakec;
Konye eoŋ kamunoneno jo.
56
1
Kitimoi, wu Edeke; naarai kakotosi ituŋa ailikor eoŋ:
Itiwarete akwap ejios aroikinit eoŋ.
2
Ekotosi lukasurupoka ailik eoŋ aitiwar akwap:
Naarai ipu luketijiete kaiwononut.
3
Apaaran naakurianar eoŋ,
Kamunoneno jo.
4
Mama ejai Edeke ŋes etureneneo akekirot:
Amunokina Edeke, mam akurianar;
Keswamakini ituŋanan eoŋ inyo?
5Iloconokinete akakiro aitiwar akwap;
Kaluikinitos akeceomisio kere aiswamakin eoŋ aronis.
6
Etukonokinos, eŋopete, Irereete ikakukut,
Kwape edariata ekatau.
7Ekuete kereka kanuka numam adolit?
Wu Edeke, kibiro ituŋa kanyunyura!
8
Imari ijo akairimeta:
Kibwaik akakiyo acupakon:
Emameete kereka koitabokon?
9
Kosodete lukasurupoka aboŋor kau
Kapaaran naeworoo:
Ajeni na ebe, ejai Edeke keoŋ.
10Mama ejai Edeke ŋes etureneneo akekirot:
Mama ejai EJAKAIT ŋes etureneneo akekirot.
11Amunokina Edeke, mam akurianar;
Keswamakini ituŋanan eoŋ inyo?
12
Akoniiyaposio ejaas keoŋ, wu Edeke:
Kejaikini jo ainakineta nuka aimal.
13
Naarai ibu koyu akaijar kinyek atwanare:
Mam kereka ibu koyu akakeje kinyeis aiguikin?
Tetere alosenenei kakonyen nuka Edeke
Kotoma aica naka lukajarak,
57
1
Kitimoi, wu Edeke, kitimoi;
Naarai emecit ekatau mamakon:
Eebo, toma otoribe loka abebenokakon ŋes amecenenei,
Aitodol needaunotor aronisio nu.
2
Eworoi Edeke loejai kuju kakuj;
Edeke lokeswamaki kere.
3
Ijukuni kokuju, ketajar,
Karat iŋol lokakoto ailikor eoŋ;
Ijukuni Edeke akeitim ka akebeit. Sela.
4
Ejai akaijar kidiŋ oŋatunyo;
Aperi kidiŋ kaŋul kaluenokete,
Kes idwe luka ituŋa, ikecekel kes akwaras ka imalia,
Akecenaiepa da kes ikileŋa luekwaka.
5
Kitopoloor ijo, wu Edeke, kokuju kakuj!
Kojau akoniibuses da kuju kakwap kere.
6
Etemonokis eboi akejeneka;
Alur akaijar:
Abokikis aipany orotoka;
Ebirokinos kes ikulepek kidiŋike. Sela.
7
Ecat etauka, wu Edeke, ecat etauka:
Ayei, eebo ayei aiturit.
8
Kokweny, ijo akaibuses!
Kokwenyutu, esabuli ka adeudeu!
Eoŋ elopet adilokini akwenyun.
9Wu EJAKAIT, kemalai jo kotuŋa:
Ayei aiturit jo katekerin.
10
Naarai epol akoniitim kiton akuj,
Ka akonibeit da kiton odouon.
11Kitopoloor ijo, wu Edeke, kokuju kakuj!
Kojau akoniibuses da kuju kakwap kere!
58
1Ineras kereka yesi nuka adolit eililiŋa?
Itubenenete kereka akiro nuka abeit, yes odwe luka ituŋa?
2
Konye iswamaete yesi nueroko kotauonokus;
Itemete epali loka akaninikus kotoma akwap.
3
Egelaros ikaronok ameun kakoik:
Epaarete kesi ageun kaurunio, iŋalaete.
4
Eputos aisoritikec kaisorit naka emun:
Esubitos bala emusaga lokimin loisikakini akekit:
5Lomam iirari eporoto loka ikesupak,
Karaida kisupata kacoa.
6
Wu Edeke, kolokono ikel kotoma aitukekec;
Wu EJAKAIT, kolokono cut itirikada luka iŋatunyo ludidik.
7Kiliearos bala akipi nueleleete atipet:
Naedeseikinia kikoioike, koraut bala luetubutubo.
8Koraut bala totokacelet nailiear komameun:
Ido bala yenikijecuna yenika aberu yenimam eanyunit akoloŋ.
9
Eriŋa amotiikus itaialamuna kokukwa,
Eyaŋaari kes ketapipirio, luepalal ka luenokete kere.
10
Iyalamikin ikadoliton keanyu einyaŋane ŋol:
Ilosi akekeje kaokot nuka lukaronok.
11
Aso etemarete ituŋa ebe,
“Abeit ejai ainakinet kanuka ikadolitok:
Abeit ejai Edeke loetubi akiro nuka akwap.”
59
1Wu Ekadeke, koyuunai kama kalukasurupoka:
Kikiarai kama kaŋul kalukanyoikinete.
2Koyuunai kama kaŋul kaluiswamaete numam adolit,
Kitajarai kama ejaas ikaarak.
3
Naarai koany, eperunito akaijar;
Etukonokinos ikagogoŋok asurokin eoŋ:
Mere kanuka apaarika, kwabo mere kanuka akadiakar, wu EJAKAIT.
4Ekerete itemonokinos komam eoŋ ebuearit.
Kokweny kiŋarak eoŋ, koany.
5
Ijo, wu EJAKAIT Edeke loka ajoresio, Edeke loka Isirael, Konyou aitican atekerin kere:
Sirikitim ikapaanarak lueroko kere. Sela.
6Eboŋunete eboŋ, emonyete bala iŋokwo,
Irimorete ere.
7Koany, ijerasi kesi;
Ekwaka aitukekec bala ekileŋ:
Naarai ineras ebe, “Iŋai bo iirari?”
8
Konye jo, wu EJAKAIT, ikienar kes;
Isekelei atekerin kere.
9Wu jo agogoŋuka, kedareununei jo:
Naarai Edeke ŋes akaŋopis naicelelei.
10Keŋarenikini eoŋ Edeke loka akaitimio:
Ketaanyununei Edeke nuemiela kama kalukasurupoka.
11
Sirikiar kes, kinyeis ikatuŋa aimurwokin:
Kisiarisiar kagogoŋukon, kisurum ileic,
Wu EJAKAIT, ekosibuku.
12Kanuka aronis naka aitukekec,
Ka akiro da nuka aŋajepakec,
Kikamunai kanuka eiturikec,
Ido kanuka nuineras nuka eilam ka aiŋal.
13Komudia kanyunyura,
Komudia kes, kinyeis bobo ajakut:
Kojenut ebe irumit Edeke kotoma Yakob,
Aitodol osaŋeta luka akwap. Sela.
14Koboŋut eboŋ, emonyete bala iŋokwo,
Irimorete ere.
15Irimete amoot inyamat,
Iwalakinete arai mam imonikinos.
16Konye eoŋ ayeenenei nuka agogoŋukon;
Eebo, ayeenenei teni nuka akoniitim tupuruc:
Naarai mu akaŋopis naicelelei,
Amecis da kotoma apaaran naka icanika.
17Wu jo akagogoŋ, ayoonokini aiturit jo:
Naarai Edeke ŋes akaŋopis naicelelei, Edeke loka akaitimio.
60
1Wu Edeke, kicaka sio, kibilibil:
Ibu konyunyurikin; okwe kinyakunai bobo.
2Ibu kisimaran akwap; ibu kocil ŋes:
Kiteteu neetiyanakina; naarai ijaŋijaŋa.
3Ibu kitodik ikonituŋa nuetioko;
Kitamat da sio ebino luka aigesitoi.
4
Iinak ŋul lukiyoŋito jo emedera,
Tetere itodiario ŋes kanuka abeit. Sela.
5
Tetere eyuunio iminanakon,
Kitajar kakonikan nakoteten, koboŋokinoi.
6
Ener Edeke kotoma alauniteke ebe: “Ebwoŋakini;
Atiaki Sekem, akori aditot naka Sukot.
7
Gilead akan; Manase da akaŋ;
Epuraim ŋes aigaet naka akouka;
Yuda ŋes ekabela loka ajakanut.
8Moab da ŋes akailoŋis;
Edom ŋes acakakini akamukat:
Ijo Pilisitia, kibwoŋ kanukaŋ.”
9Iŋai bo ketolomari ore loegogoŋ?
Iŋai bo keŋarenikini kiton Edom?
10
Wu Edeke, mam kereka kicaka ijo sio?
Kwabo mam iupasi kaiorekosi, wu Edeke.
11Kiŋarakinai kama ejai lokasurup:
Naarai aiŋarakin naka ituŋa emamei ajokis.
12
Kiswamai oni nuka atitiŋ kaiŋarakin naka Edeke:
Naarai ŋol ŋes ipudapudai lukasurupowok.
61
1Wu Edeke, kiira aimonyoka; Kopupok akailip.
2
Keworoi jo kosaŋe loka akwap, nakiilor ekatau:
Kiŋarenikinoi aitodokar atiiba nakadeparit eoŋ kaojau.
3
Naarai irai ijo amecisika,
Aŋopis naegogoŋ kama ejai lokasurup.
4
Eboienenei kowemakon lokalaunan ikar kere:
Ameci kotoribe loka abebenokakon. Sela.
5
Naarai ijo, wu Edeke, iira aiyaposioka:
Kiinak eoŋ airumet naka ŋul kalueyonete ekonikiror.
6Iyatakini apaarasia nuka aijar naka ekabaka:
Eraunos ikaruke bala aturio nuipu.
7
Iboienenei kakonyen nuka Edeke apaarasia kere:
Okwe, kitemonok asianut-nakamin ka abeit,
Tetere idarete ŋes.
8
Kwaŋin ayei aiturit ekonikiror apaarasia kere,
Tetere etodolenenei ŋinipaaran aiyaposioka.
62
1Idarit ekatau Edeke bon:
Mamake ŋes ebunio akaitajario.
2Ŋes bon akatiiba ka aitajarioka:
Erai ŋesi anopisika naicelelei; mam eoŋ eianakini noi.
3
Itodolete ai asuronokin ituŋanan,
Yes kere aiar ŋes,
Bala arwatat naerii, bala abwas naijaiŋijaŋa?
4
Inerunete aitidisiar ŋes kaibusesuke;
Isiyalamikinito kesi aiŋal.
Ilipakinete arereŋ kaitukekec,
Konye kikenos kotauonokec. Sela.
5
Ekatau, kidareununei Edeke bon;
Naarai elomunit amunoka kamakeŋ.
6Ŋes bon atiibaka, akaitajario da:
Erai ŋesi anopisika naicelelei;
Mam eoŋ eianakini.
7
Ejai akaitajario ka aibusesuka mama ejai Edeke:
Atiiba naka agogoŋuka, ka amecisika, ejai neejai Edeke.
8
Komunosi ŋes apaarasia kere, yes ituŋa;
Kobukokisi ikusitauon akonyeneke:
Edeke ŋes amecisiwok. Sela.
9Abeit ituŋa lumam aibuses eraas eiyeŋane,
Ituŋa da luka aibuses eraas aiŋal:
Ikiaros kuju kotoma aitemis;
Ebenen kesi kere adepar eiyeŋane.
10
Sirimunos emwan it,
Sirisosoloko kotoma aiŋat:
Arai kiyatakin abar, sirikibwaikis ikusitauon tomake.
11Ener Edeke irwan atipet,
Apup eoŋ da nu irwan aarei;
Ebe Edeke ŋes elopet apedor:
12
Ijo, wu EJAKAIT, elopet aitim:
Naarai itacanakini ŋinituŋanan kwape ejaar akeswam.
63
1
Wu Edeke, irai ijo Ekadeke; kadilokini aimo:
Ejakit ekatau akure kanukon, imwit akakuan jo,
Kotoma akwap naeonit nakailolony, naemameete akip.
2
Ŋes kasesenenia jo kotoma aibois nakalaunan, Aanyun akonipedor ka akoniibuses.
3
Naarai ejijim akonisianut-nakamin aitelekarit aijar;
Kiturenenei jo aitukuka.
4Kwaŋin kemalaenenei jo aroko ajari:
Arionori akakanin okirorikon.
5
Isimonanakinio ekatau kwape imonikinor ituŋanan asumet ka atarion;
Kiturenenei jo akaituk kaŋajep naiyalama.
6
Nakeitunio kaperitika,
Naaomitor nukon kapakio nuakwenyunia kuare.
7
Naarai jo irai ekakenarakinan,
Eyalamikin kotoribe loka abebenokakon.
8
Edunyit ekatau aibwapit jo:
Kegaŋit akonikan nakoteten.
9Konye ŋul luemoete amudiar akaijar
Elosete kwap alup.
10Einakinio mama ejai agogoŋ naka ekileŋ:
Eraunos akorakinet naka ikuwei.
11
Konye elakara ekabaka kotoma Edeke:
Iyalama ŋin yenelimit ŋes;
Naarai itubutario aituke nuka ŋul kaluineras nuka aiŋal,
64
1Wu Edeke, kiiranari eporotoka, kotoma akadanakinika:
Kidarenenei aijaraka kenyek akurianar yenikasurup.
2
Kisinopai eoŋ kama ejai ainerun nakaiyeiyea naka ikeswamak nukaronok;
Kama ejai ecelet loka ikeswamak numam edolito.
3
Luepenata aŋajepekec kwape ekileŋ,
Luetebeikis imaliakec, kes akiro nuedwarak:
4Tetere egumete iŋol loedoliorit toma aiboisio nukaiyeiyea:
Enesarete aigum ŋes, komam ekuriaka.
5Isidikete itauonokec kotoma ainerun aronis:
Inerununete ailok iica kaiyeiyea;
Kobalas ebe, “Iŋai eanyuni kes?”
6Emoete numam edolito;
Kobalas ebe, “Kidau akukunyikin aimo noi.”
Idul aomisioit nakotoma naka ŋinituŋanan ka etau da.
7Konye egumi kes Edeke;
Enesario aimusuŋ kemal.
8
Iguanakinos kwaŋin, idupori kes aŋajepekec:
Kere lueanyunete kes imuŋumuŋete akwesikec.
9Ekuriakaros ituŋa kere;
Elimorete da aswam naka Edeke,
Eomoomoete akeswamisio kacoa.
10
Iyalamikinos ikadolitok kotoma EJAKAIT,
Emunokinos da ŋes;
Iturete luitenara kotauon.
65
1Wu Edeke kidarit jo aiturit koSion:
Ido mamakon itodolenenere aiyaposit.
2
Wu jo loiirari ailip,
Mamakon epote kere luejaas awat.
3
Ketelekasi eoŋ numam adolit:
Iluci ijo aibucanaretakosi.
4
Isirereŋitoi ŋin yeniseuni ijo, ka aisukunyikin da,
Tetere iboienenei kalaroikon:
Kisimonikinio sio ajokis naka ekonitog,
Aibois nakalaunan naka eyekalukon.
5Kotoma akiro nusogim kiboŋokini ijo sio kadolit,
Wu Edeke loka aitajariokosi;
Ijo loirai amun naka isaŋeta kere luka akwap,
Ka naka ŋul da kaluelwaka luejaas aŋolol:
6ŋol loitieasi imor kakegogoŋ;
Konapite apedor:
7
Loisinapikini airuruma naka aŋololin, airuruma naka akailanakec,
Ka ecelet loka atekerin.
8
Ŋul da luiboiete kawasia naka akwap akuriakaros kanuka aanyunetakon:
Iinakinit ijo elomune loka tupuruc ka loka atiboŋ alakera.
9Ianyanari akwap, icocoi da, Itabari noi;
Ecor loka Edeke ileleba akip:
Itudumikini kes akima,
Kidau aitemonokin akwap kwaŋin.
10Icocoi noi alelesiake; Idipakini itutioke:
Itonokoki kelimilim; Isirereŋi akebwanun.
11
Itorokini aboko naka ajokisikon okaru;
Edoenenete ikonirotin atarion.
12Idonanakinos oronyia luka amodiŋ:
Enapete iukon aiyalama.
13Enapito ironyia isipanin;
Akima da erapito aditon;
Ikareete kanuka aiyalama, eyeete da,
66
1Kikare akwap kere kaiyalama mama ejai Edeke:
2Koye nuka aibuses naka ekekiror:
Kitubusik akeiturit.
3
Kolimok Edeke ebe, “Iŋosibibos ca ma akoniswamisio!”
Kanuka ailiil naka akonipedor kinonokikinete lukasurupokon.
4
Kimai jo akwap kere,
Kiyeikinete;
Eyeikinete ekonikiror. Sela.
5
Kopotu, koanyut aswamisio nuka Edeke;
Iŋosibib ŋesi kotoma nuiswamakini idwe luka ituŋa.
6
Abu kituluo aŋolol aonit;
Apotu kitoroto ocor kakeje;
Kanen kipou kalakaros kotomakeŋ.
7
Irumit kakegogoŋ ikar kere;
Esesenete akekonyen atekerin:
Kinyeis lukepali aitopoloor bonik. Sela.
8Aso do yes ituŋa, kiturenenete Edekewok,
Kisiirasi eporoto loka akeiturio:
9Ibwaikinit itauonowok toma aijar,
Mam isunupit akejewok airiaŋiriaŋa.
10
Naarai jo, wu Edeke, ibu kigimo sio:
Ibu kililiau sio, kwape ililiaunere epuesa.
11Ibu kitolomik sio oboi;
Ibu koinak sio aigugunatoi naelaŋir kaŋabesikosi.
12Isibwaneni ituŋa kosodete aidok kakwesikosi;
Kipou ketoro akim ka akipi da;
Konye ibu kitolomik sio aibois naidilas iboro.
13
Alomuni togokon kasuban nuicweio,
Katacakini jo aiyaposioka.
14Nuabu akaituk kiner,
Ka nuabu akaŋajep kolim, nakaburunia.
15Kainakini jo asuban nuicweio nuka kaluetarioko,
Ka lukisupurununo luka imerekekin lumaseniko:
Ainakini imoŋin lutoba ka akinei. Sela.
16Kopotu, kiirasi, yes kere luiyoŋito Edeke,
Kalimonokis nuabu ŋesi kiswamak ekatau.
17Abu keworo kakaituk,
Kitopolooroi ŋes kakaŋajep.
18
Arai aomit numam adolit kotauka,
Mam EJAKAIT epupuni.
19Konye abeit apupu Edeke;
Eira eporoto loka akailip.
20Kituritete Edeke,
Lomam abu kireŋea akailip,
Kwabo mam kemikit akeitim,
67
1
Kitimenenei Edeke oni, kitusulianyenenei da:
Kitacaik oni akekonyen; Sela.
2
Tetere ejenun ekonirot kakwap,
Aŋaleukon da naitajari kotoma atekerin kere.
3
Kiturito jo ituŋa, wu Edeke;
Kiturito jo Ituŋa kere.
4
Kolakaros atekerin koyooto kaiyalama:
Naarai itubokini ituŋa kadolit,
Irumi atekerin kotoma akwap. Sela.
5Kiturito jo ituŋa, wu Edeke:
Kiturito jo ituŋa kere.
6
Ara akwap akemio:
Edeke da, Edeke lopewok, kitusulianyi oni.
7
Kitusulianyi Edeke oni:
Isaŋeta da kere luka akwap eyoŋete ŋes.
68
1Konyou Edeke, kisiarakinos lukasurupoke;
Ŋul da luelaito ŋes kokerata kamakeŋ.
2Kwape ireŋearere apuru, kireŋea ijo da kes kwaŋin:
Kwape ecalaror edipor kakim,
Kooliosi ikaronok kwaŋin kakonyen nuka Edeke.
3Konye kiyalamasi ikadolitok;
Kibwoŋasi kakonyen nuka Edeke:
Eebo, kolakaros kaiyalama.
4Koyeikisi Edeke, koyooto aiturit ekekiror:
Kiswamaut erot loka ŋol kaloibwanenit kitorite amodiŋ;
YAWE ŋes ekekiror; kibwoŋasi do kakonyeneke.
5Edeke kotoma aiboisike nakalaunan,
Ŋes papa loka ikokiok, ekeraban da loka apuserun.
6
Einakini Edeke obonipe ekal:
Elacuni lueenitai kaenis aitekeriana kes:
Konye luipaliok iboiete kakwap naeonit.
7
Wu Edeke, nakiŋarenikinitor ituŋakon,
Naitoritor ijo amodiŋ: Sela.
8
Abu akwap komaran,
Kodaeun akuj kakonyen nuka Edeke:
Komaran emoru je Sinai kakonyen nuka Edeke,
Edeke loka Isirael.
9Ijo, wu Edeke, ibu kitetep akiru naepol,
Kitogogoŋ airumetekon naalolonyitor.
10
Abu ekodetekon kiboikin nen:
Ijo, wu Edeke, ibu kitemonok ajokisikon lukican.
11Elimuni EJAKAIT akirot:
Aŋor nuisiarakinete eemut eraas ajore naepol.
12Ekerete ikabakan luka ajoresio, ekerete:
ŋin da naesali ore ekori luŋatuna.
13
Iperete kereka yesi osipanin luka amerekekin,
Kwape kabebenoka nuka ajele nuerapara kepuesa,
Ka akekopir nuejaas esabu loodos?
14Nakitisiarikinia Lokapedor kere ikabakan kanen,
Kosubite bala akako naetepakini Salumon.
15Eroŋat Basan ŋes eroŋat loka Edeke;
Eroŋat Basan ŋes eroŋat loeoja.
16Yes iroŋan lukaojak, kanukinyo iteoto kekokote
Eroŋat loakoto Edeke aiboikin?
Eebo, iboienenei EJAKAIT kanen ikar kere.
17
Agalin nuka EJAKAIT kes alukumin akaisaarei,
Kes alukumin nuka alukumin:
Ejai EJAKAIT tomakec, kwape toma Sinai, aibois nakalaunan.
18
Idoka kuju, ijoreu ijoreunokon,
Ijau ijo ainakineta kotuŋa,
Eebo, kama kaluipaliok da, tetere iboienenei EJAKAIT
Edeke nepepe kakes.
19Kituritete EJAKAIT:
Loibwokenenei ŋinipaaran alagiruwok,
ŋes Edeke loerai aitajariowok, Sela.
20
Erai Edeke kamakosi Edeke lokayuununan;
EJAKAIT YAWE ŋes elopet aitajar kotoma atwanare.
21Konye icumi Edeke akou naka lukasurupoke,
Aipelor esiaduk loitatelooritai loka ŋinituŋanan yenedunyakinit agwaunun akiro.
22Abala EJAKAIT ebe, “Enyakuni kes anyoun koBasan,
Enyakuni kes anyoun katar naka aŋolol:
23Tetere idomakini akonikeju aokot,
Tetere edumunete aŋajepa nuka iŋokwokon akorakinetakec kama ejaas lukasurupokon.”
24Aanyut kesi alositokon, wu Edeke,
Alosito nuka Ekadeke, Ekakabaka, ilomanari aibois nakalaunan.
25Kiŋarenoto ikayook, kotupakis luetiŋito iboro lueruos,
Kokidiŋ apesur nuiyekete isiman.
26“Kituroto Edeke kotoma atukono,
Ŋes EJAKAIT, yes luka atan naka Isirael.”
27Ejai Benyamin lodidi ekayaitonikec,
Ikapolok luka Yuda ka aurianetekec,
Ikapolok luka Sebulun, ka ikapolok luka Naputali.
28Ecoraki Edekekon akonigogoŋ:
Kitogogoŋ, wu Elieke, nuibu ijo kiswamak sio.
29
Kanuka eyekalukon loejai Yerusalem
Ŋes kiinuniata ikabakan jo ainakineta.
30Kitoron etiaŋ lokotoma osege,
Ekodet loka imerukwai ka itak luka ituŋa,
Ipudapudai kakeje atutubeta nuka epuesa;
Esiarisiar ituŋa luelelakinitos ejie.
31
Elomunete ikapolok koMisiri;
Isunyakini Etiopia arior akekanin mama ejai Edeke.
32Koyeikisi Edeke, yes ajakanuto nuka akwapin;
Koyooto aiturit EJAKAIT; Sela.
33Mama kaŋol kaloibwanenit akuj naka akuj, nakejai ageun apeŋo;
Koany, inera keporotoke, eporoto lokagogoŋ.
34Koinakisi Edeke agogoŋ,
Irumit akejokis Isirael,
Akegogoŋ da ejai toma akuj.
35
Wu Edeke, iŋosibib ijo kotoma aiboisiokon nukalaunak:
Edeke loka Isirael, ŋes ekori agogoŋ ka apedor mama ejaas ituŋake,
Kituritete Edeke!
69
1Wu Edeke, kitajarai:
Naarai alomasi akip kiton otauka.
2Kepok erit loidul, nemam ipedoria abwoia:
Adolok atar, nekelikoria akalele.
3Kapas akaimony; aono ekaporoto:
Eriokuut akakonye naedaritor Ekadeke.
4
Ipu ŋul lukalaito atai edeparito itim luka akouka:
Ŋul luekotos aicutar eoŋ,
Lukasurupoka kanuka aiŋal, eraas ikagogoŋok:
Kasodi kenyakak lumam aŋatarit.
5Wu Edeke, ijeni akabaŋaanut;
Mam akadiakanareta imunonitai kamakon.
6Kinyeis ŋul lukidareunito jo aileicikin kanukaŋ,
Wu EJAKAIT Edeke loka ajoresio:
Kinyeis ŋul lukimoete jo aitisilio kanukaŋ,
Wu Edeke loka Isirael.
7Naarai apotu kamoromoroto eoŋ kanukon;
Kodakar akakou.
8
Araun emoit koinacanaka,
Eloŋwait kodwe luka totoka.
9
Naarai kaari ekokote loka ekonitogo;
Kebirokinos amorosito nuka ŋul kalukimoromoroete jo.
10Naamonyia, ido kaleco ekatau keteŋei, ŋun kes kamoromoroere.
11
Naanapia epuko,
Karau egaraca kama ejaas.
12
Kinerasi ŋul lueboiete korutei nukaŋ;
Arai eoŋ ekosio loka ikamerak.
13
Konye kanukaŋ, akailip ejai neijai ijo,
wu EJAKAIT, kapak nakacamunio:
Wu Edeke, kotoma aitimikon naepol,
Koboŋokinoi kotoma abeit naka akoniitajar.
14Koyuunai kotoma orit, kenyek alumor:
Kayuun kama ejaas lukalaito, kataro da.
15Kinyek akalele arapar eoŋ,
Karaida ataro ailikor eoŋ;
Kinyek aipany abunakin eoŋ.
16Koboŋokinoi, wu EJAKAIT;
naarai ejok akonisianut-nakamin:
Kwape ejaar aipues naka aitimesiakon, koŋolearai.
17Sirikitoŋopik ekonibulesit akonikonyen;
Naarai kaburunit; kisunya aboŋokin eoŋ.
18Koduduŋ ekatau, koyuu:
Kolakunai kama kalukasurupoka.
19
Ijeni ijo akamorosit, ikaleic, akaitisilio da:
Ejaas lukasurupoka kere akonyenekon.
20Ecum amorosit ekatau; kagor noi:
Amo luketimete, konye emamei idio da;
Ka luketalakarete, konye mam abu kadum.
21
Apotu kainakis da epiu araun inyamataka;
Nakajakitor akur ketamata yenikadwaran.
22
Korau ekecemesa eic kakonyenekec;
Ido naijamamaata korau akuluma.
23Komudukakata akecekonye, kinyeis aanyun;
Kisitelitel aŋabesikec tiritir.
24Kobukok kes akoninyunyura,
Kodolok kes adedeŋ naka akonikadakin.
25
Kosilior etogokec;
Kinyek da ituŋanan kere ajaut owemanakec.
26
Naarai ereito ŋol loinomo ijo;
Emocatar ican kaŋul kaluimusuŋit ijo.
27
Kiyatanak numam adolit mama ejaas numam adolitekec:
Kinyeis alomar adolitekon.
28
Komwatarai kes koitabo loka aijar,
Kinyeis aiwadikao nepepe kikadolitok.
29Konye ecana eoŋ ido etururue:
Kekeu akoniitajara kuju, wu Edeke.
30Eturi eoŋ ekiror loka Edeke kekosio,
Etopoloori ŋes kaimal.
31Isiyalamikinete ŋul EJAKAIT aitelekarit emoŋ,
Arai emoŋ lotobait loeja amumwar ka imageger.
32Aanyutu luitasonos ŋun, ido eyalamikinos:
Yes luimoenenete Edeke, kojarata ikusitauon.
33Naarai epupununei EJAKAIT luilwaritos,
Mam emwaŋit ienanake.
34Akuj ka akwap kituroto ŋes,
Aŋololin ka iboro kere luirimete kotoma.
35
Naarai eyuuni EJAKAIT Sion,
Eduki da ireria luka Yuda;
Kes da iboienenete kanen, kirumito da.
36Aur da naka ikekejaanakinak irumi ŋes,
Kes da lueminas ekekiror iboienenete kotoma,
70
1Wu Edeke, korurukun ayuun eoŋ;
Wu EJAKAIT korurukun aiŋarakin eoŋ.
2
Kileicikis, kodakaros akecekwes:
Luemoete ekatau!
Kitoboŋoroi kau kosodete kitisiloi
Luisiyalamikinito arieboka.
3Kitoboŋoroi kes kau kanuka ikeceleic
Lukakienatatar ebe, “Ha, ha, ha!”
4
Kolakaros kere lukimoete jo, kiyalamikinos kotomakon;
Ŋul da lueminas akoniitajar kobalananas duc ebe, “Kitopolooroi Edeke.”
5
Konye ecana eoŋ elwaritoi,
Wu Edeke, korurukai:
Ijo ekeŋarakinanika ekakayuunan da;
Wu EJAKAIT, sirikiyap.
71
1Wu EJAKAIT, ebwaik akamuno tomakon:
Sirikerumata bobo ileic.
2Koyuunai, kitajarai kadolitekon:
Kitoik akonikit mamaka, kitajarai.
3
Koraun ijo kamaka atiiba naeboionono,
Naalosenenei ducuduc:
Icorak ijo aitajar eoŋ;
Naarai ijo ŋes akatiiba ido akabwas da.
4Koyuunai, wu Ekadeke, kakan naka ikaronon,
Kakan da naka yenemamei adolit ka yenemeŋerana.
5
Naarai ijo akamuno, wu EJAKAIT Edeke:
Ijo amunoka ageun koiditeuka.
6
Ageun naajaar akoik naka totoka jo kigagat eoŋ:
Ijo ŋol lokitolomuni eoŋ kakoik naka totoka:
Keturenenei jo tiritir.
7
Arai eoŋ aumokinet kaneeja luipu;
Konye irai ijo akaŋopis nakagogoŋ.
8Ilelebun akaituk aituriokon,
Ka aibusesukon apaaran kere.
9Sirikiireŋea kapak nakamojoŋuka;
Sirikiijal nakiŋoŋoor akagogoŋ.
10
Naarai lukasurupoka ineras nukaŋ;
Ka ŋul da lueperunete ekatau inerununete nepepe.
11Kobalas ebe, “Ajal Edeke ŋes:
Korukioto kikamut ŋes;
Naarai emamei yeneyuuni.”
12
Wu Edeke, sirilwanikina kamakaŋ;
Wu Ekadeke, korurukun aiŋarakin eoŋ.
13
Kileicikis kodaunos da lueraas lukasurup luka ekarau;
Korapiasi kes amorosito ka aitisilio
Luemoete aisirieb eoŋ.
14Konye eoŋ amunonena tiritir;
Eyatakini noi aiturit jo.
15
Elimori akaituk adolitekon,
Ka aitajarakon apaaran kere;
Naarai mam ajeni etiaikec.
16
Abuni kaswamisio nuka apedor naka EJAKAIT Edeke:
Alimonori nuka adolitekon nupekon bon.
17Wu Edeke, kisisianak ijo eoŋ ameun keiditeuka;
Aitodol kwana da alimo akoniswamisio nukaumokin.
18Eebo, karaida kamojoŋ koja da akorwo,
Wu Edeke, sirikiijal;
Aitodol nealimoro akonigogoŋ
Mama ejai aturi naetupakini,
Akonipedor da mama ejai yenebuni kere.
19
Akonidolite da, wu Edeke, ikiara noi.
Ijo loiswama nuepolok,
Wu Edeke, iŋai bo iriakatar jo?
20
Ijo, lokitodik sio ican luipu luetioko;
Kitajari sio bobo,
Kitodokuni sio kaidules naka akwap.
21Kiyatak jo akapolou,
Ido kibelokin bobo kitalaka eoŋ.
22
Keturi da jo kibore kayenikutat,
Abeitekon da, wu Ekadeke:
Ayeikinenei aiturit jo kadeudeu,
Wu jo Lokalaunan loka Isirael.
23
Iyalamikin noi akaituk naayeikinio aiturit jo;
Ka ekatau da loibu kolaku.
24Inerenenei da akaŋajep adolitekon Apaaran kere:
Naarai eleicikis, adakaros da akecekwes,
Luemoete aisirieb eoŋ.
72
1Wu Edeke, koinak ekabaka itubesiakon,
Okoku loka ekabaka da akonidolit.
2
Irabanakini ŋesi ikonituŋa kadolit,
Ka lukicanikon ketube.
3Einunete iroŋan ituŋa ainapakin,
Ka iukono da adolit.
4Irabanakini ŋesi lukican kotuŋa,
Eyuuni idwe luka luilwaritos,
Emunyumunyei da ikamwaŋan.
5Eyoŋete jo eriŋa akoloŋ ejai,
Eriŋa da elap ecai, anatar aturio kere.
6
Ijesuni kwape etepakinia akiru anya nuetubub:
Kwape irwairwaikinia elimilim akwap.
7
Ekeriakaros ikadolitok kapaarasiake;
Ainapakin da naepol aitodol naemamuunor elap.
8
Emeari akejakanut kaŋolol kiton aŋolol,
Kocor kiton osaŋeta luka akwap.
9Luiboiete kamodiŋ ekukonokinos ŋes;
Lukasurupoke da idielete apua.
10
Eyaunete ikabakan luka Tarusis ka luka apujana ainakineta;
Ikabakan da luka Syeba ka Seba einakinete akorakineta.
11Eebo, isudedikinos ikabakan kere kakonyeneke:
Ijaanakinete ŋes atekerin kere.
12Naarai eyuuni yenilwaritoi kemony;
Ka yenikican yenemamei ekeŋarakinan.
13Itimi yenikican ka yenilwaritoi,
Itajari da aijar naka luilwaritos.
14Elakuni aijarakec kotoma amwaŋio ka adedeŋ:
Aokotokec da eraunos nuka etiai loepol kakonyeneke.
15
Ejarete; einakinio ŋes esabu loka Syeba:
Ilipanakinete ŋes ituŋa tiritir;
Imalaete ŋes apaaran kere.
16
Idiliunete akima kakwap kaidiasia nuka iroŋan;
Araitoke da kijaŋijaŋa kwape ka Lebanon:
Epolooros lukore bala anya nuka akwap.
17
Ebusi ekekiror ikar kere:
Ikopa ekekiror kwape ebusio akoloŋ:
Isirereŋio ituŋa kotomakeŋ;
Atekerin kere nuka akwap enyaraete ŋes lokarereŋ.
18Kituritete EJAKAIT Edeke, Edeke loka Isirael,
Loesubi bon nukaumokin.
19Kituritete ekekiror lokaibuses ikar kere;
Akwap kere kilelebun akeibuses.
Amen, Amen.
20Asaŋata ne ailipasia nuka Daudi okoku loka Yese.
73
1Abeit ejok Edeke mama ejai Isirael,
Ido mama ejaas luesegas kotauon.
2Konye eoŋ, nepetai akakeje apaar;
Nepetai da eoŋ ajurusiar kotoma alositeka.
3Naarai etokokolit eoŋ luituroko,
Naanyunia akerianut naka ikaronok.
4Naarai emamei ariebo katwanarekec:
Konye icasit akecegogoŋ.
5Mam kes iticanitos bala icetuŋa;
Karaida aisiriebio kwape kalucetuŋa.
6
Kanuka ŋun esubit eitur bala erikot loenapakinitai omurisiŋakec;
Imukorit akaje kes bala anapito.
7Itulereras akecekonye kanuka atumes:
Ipu noi luejaatar adepar luipudas ikecetauon.
8
Isekelos, ido kotoma aronis ŋes ineratar nuka areit:
Ineras kitopoloro bonik.
9
Eluikinit akeceituk akuj;
Ido itorit akeceŋajep kakwap.
10Ŋes aboŋunioto iketuŋa nee:
Tape ikokoorete akipi nuileleba aikopo.
11
Kobalas ebe, “Ikwaikini Edeke ejenum ai?
Ejai da adiocoa neejai Loejai kuju kakuj?”
12Koany, ŋul kes ikaronok;
Kanuijamamata duc, iyatanakin abarakec.
13
Abeit etesega eoŋ ekatau taai;
Elot akakanin kotoma amamut aronis.
14Naarai keticani apaaran kere,
Ŋinitupuruc da kalecorio.
15Arai katemarite ebe, “Mere kener kwaŋin,”
Koany, ti kabilakebotet aturi naka idwekon.
16
Naaomoomaa epone lojenunet ŋin,
Abu kesirieb eoŋ noi;
17
Aitodol nealomaria eoŋ aibois nakalaunan naka Edeke,
Kaomoom esaŋekec lokokau.
18Abeit ibwaik ijo kes aiboisio nuerurut,
Icakak kes toma amudiario.
19Aluoros kesi asiles atipet!
Amudia kes cut etasuro.
20Kwape airujasit kekwenyu ituŋanan;
Kwaŋin, wu EJAKAIT, naikwenyunia ijo, imwaŋi ijo akeceput.
21Naarai abu kokadak ekatau,
Aponi kecumi oŋeretenyaka:
22Abu kasubite bala etiaŋ, loemamei aijen;
Karai eoŋ etiaŋ kakonyenekon.
23Konye ajaenena kajo duc:
Itiŋi ijo akakan nakoteten.
24
Kiŋarenikini ijo eoŋ kainerunetekon,
Kokau kaŋun kisukunyikini eoŋ kaibuses.
25
Iŋai bo ikan yenejai toma akui, nabarai ijo?
Emamei idiotuŋanan kakwap yenepuda eoŋ dimarai ijo.
26
Arumoros akakiriŋ ka ekatau:
Konye Edeke ŋes atiiba naka ekatau, ŋes ekawai ikar kere.
27Naarai, koany, ŋul luelwaka kamakon eoliorete cut:
Imudia ijo ŋul kere lukinyeis jo kolosete eporo.
28
Konye ejok eoŋ aapu kama ejai Edeke:
Etarau EJAKAIT Edeke akaŋopis,
Tetere alimonokini nukaswamisiokon kere.
74
1
Wu Edeke, kanukinyo kicakaria ijo sio ikar kere?
Kanukinyo epurionokinia anyunyurakon amerekekin nukoronyikon?
2Kiitu ekodetekon, lokolo ibu ijo kogwel,
Loibu ijo kolaku araun ateker nakairumetekon;
Ka emoru Sion lokiboieneno ijo.
3Kodakak akonikeje amejei numam edaunos,
Nukaronok kere nueswamaki lokasurup aibois nakalaunan.
4
Ikunasi lukasurupokon kokidiŋ katukotokon;
Ebwaikis imederanakec araun aanyuneta.
5Kosubito bala ituŋa luapotu kikeut aepeikec
Ajepia amoni naka ikito.
6Aswamisio nuigirir kere
Ajepa kesi kaepei ka anyulia.
7Ecweikis akoniibois nakalaunan;
Etisilioto aibois naiboieneno ekonikiror atiyakis kwap.
8
Apotu kotemasi kotauonokec ebe, “Katiyatiyata kes cut”:
Ecweanakis da atukosia kere nuka Edeke kotoma akwap.
9
Mam kianyuni aanyunetawok:
Emamei bobo enabi edio da;
Kwabo emamei kamawok idio yenejeni ebe itodoli ai.
10Wu Edeke, itodoli lokasurup ai emoromoroi?
Einyanakini kereka da lokasurup ekonikiror ikar kere?
11Kanukinyo inyakaria ijo akonikan, akonikan nakoteten?
Kolem ŋes katorobukon komudia kes.
12
Konye Edeke ŋes Ekabakaka apeŋo,
Loiswamai aitajar kokidiŋ kakwap.
13
Ibu kotiak aŋolol kanuka akonigogoŋ:
Idecideci akwes nuka apiuan kakipi.
14
Idecideci akwes nuka Lebiatan,
Iinak ŋes araun inyamat luka ituŋa luiboienenete kamodiŋ.
15Ibu kocil atan ka akalele da:
Kitoonik icorin luepolok noi.
16Apaaran erai nakon, akuare da nakon:
Ibu kitemok aica ka akoloŋ da.
17
Ibu kibwaik iikoruno kere luka akwap:
Ibu kiswama akamu ka aiporo da.
18
Kiitu na, wu EJAKAIT, ebe amoromor lokasurup,
Ituŋa da lubaŋiok ainyanakis ekonikiror.
19
Sirikiinak aijar naka ajelekon mama ejai etiaŋ loka ais:
Sirikiimurwok aijar naka lukieanakon ikar kere.
20
Koricite aitutuket:
Naarai aiboisio nuemutoko nuka akwap ileleba itogoi luka akaje.
21
Okwe kinyeis luereitai aboŋun ileicikinito:
Kituroto lukican ka luilwaritos ekonikiror.
22
Konyou, wu Edeke: kopurokin bon,
Kiitu kwape kimoromoroo jo ituŋanan yenibaŋ apaaran kere.
23Sirikiimurwok eporoto loka lukasurupokon:
Edokununei tiritir ecelet loka ŋul kalukisurokinito jo.
75
1Wu Edeke, kimalaenenei isio jo,
Kimalaenenei, naarai eapie ekonikiror:
Elimonorete ituŋa nuka aswamisiokon nukaumokin.
2Naadolokinia eoŋ apak naeseunitai,
Atubi kabeit.
3
Karaida kemudicar akwap, ka luiboiete kotomakeŋ kere:
Asipokinit eoŋ ipirinoke. Sela.
4Abu kalimok luituroko ebe, “Sirikiswamata nuka abaŋaanut”:
Kalimok da ikaronok ebe, “Sirikikeut amumwar:
5Sirikikeut akusimumwar kuju noi;
Sirikinera kimurisiŋa lueninik.”
6Naarai mere ari nakokide, arai ari nakoto,
Mere da ari naka eŋalakimak ebunio aikeunun.
7
Konye Edeke ŋes ekatubon:
Ijesari ice kwap, ido ikeari ice kuju.
8
Naarai toma akan naka EJAKAIT ejai aikopo, ebino da ereŋ;
Ipu luinyalinyalitere, ebukununei ŋesi kotoma;
Abeit emasete ikaronok kere lukotoma akwap,
Ikokoorete asidak nakotoma.
9Konye alimori ikar kere,
Ayeenenei aiturit Edeke loka Yakob.
10Atubonori amumwar kere nuka ikaronok;
Konye amumwar nuka ikadolitok ikeunio kuju.
76
1Ejen Edeke kotoma Yuda:
Epol ekekiror kotoma Isirael.
2Ejai ekewema lokalaunan toma Salem,
Toma Sion da iboieneno.
3
Ŋina abilia ŋesi ikojoi luka akabwa;
Ebuku, ka ekileŋ, ka ejie. Sela.
4
Irai ijo lokaibuses,
Loitelekarit iroŋan lumam edaunos.
5
Anatar lueninik itauon, ajototo akecejo;
Emamei da loicasit kotuŋa lukagogoŋok.
6
Wu Edeke loka Yakob, itoroni ijo,
Kosodete ajo nuka atwanare aikamar agali ka ebalasi.
7
Ijo, ijo loisogim, ibus koyoŋi:
Iŋai bo da epedori abwa kakonyenekon nainyunyurikinor ijo?
8Abu ekonitube kopupun anyoun kokuju;
Kokurianar akwap, kopalaa.
9Naanyounio Edeke aitub,
Aitajar luitasonos kere lukotoma akwap. Sela.
10
Abeit kituri jo anyunyura naka ituŋanan:
Inapi da anyunyura naesalakinit.
11
Kiyapo, kitodolik neejai EJAKAIT Ekonideke:
Luelukunito ŋes kere koyaut ainakineta
Mama ejai ŋol loibus ayoŋio.
12
Emudiari ŋesi imoyon luka ikapolok:
Erai losogim kama ejaas ikabakan luka akwap.
77
1Amonyi kekaporoto mama ejai Edeke;
Ebwololoi kekaporoto mama ejai Edeke,
Ŋesi da kapupuni.
2
Toma apaaran naka icanika abu kamo EJAKAIT:
Korioro akakan kuare komam itegi;
Kogir ekatau aitalakario.
3Eitunit Edeke, keyaloŋoŋi:
Kaŋuriani, emwokolikin ekamoyo.
4Isikoler akakonye:
Mam apedori ener da naarai eticanitoi noi.
5
Aomoom apaarasia nukolo kasonya:
Ikar da lukoloŋo sek.
6Eitunit ekakosio loka akuare:
Aomoom kotauka bon;
Ekamoyo da ekukunyikina amoote.
7Ecakari kereka Edeke ikar kere?
Mam bobo ŋes itoduni aminake?
8
Asaŋa cut akeitim ikar kere?
Atwania akeisumunet ikar ka ikar?
9
Emurwoki Edeke araut lokasianut?
Etasaŋa da ŋesi akeitimesia kotoma anyunyura? Sela.
10
Katema ebe, “Na ŋes akailworuna;
Konye eituni ikar luka akan nakoteten naka
Loejai kuju kakuj.” Sela.
11
Alimonori aswamisio nuka EJAKAIT;
Naarai eituni nukaumokinikon nukoloŋo.
12Aomoomoenenei da aswamisiokon kere,
Ido enyogonokini aomoom nuisubenenei.
13
Wu Edeke, ekonirot ejai toma aibois nakalaunan.
Iŋai bo edeke loepol kwape Edeke?
14Irai ijo Edeke loiswamai nukaumokin:
Itejenu ijo akonigogoŋ kotuŋa.
15Ilaku ijo ikonituŋa kakonikan,
Odwe luka Yakob ka Yosep. Sela.
16
Apotu akip koanyut jo, wu Edeke;
Apotu akip koanyut jo, koyoŋata,
Komaranata da ataroi.
17Apotu idouon kobukut akipi,
Kijuk akuj eires:
Kisiarakinos da imaliakon.
18Eporoto loka airetunikon abu kojai toma otapipirio
Eimilia da kitacau akwap:
Komaran akwap kijaŋijaŋa.
19
Kojai erotokon toma aŋolol,
Ka isokonokon da toma akipi nuipu,
Konye mam ajenio ikonikukut.
20
Ibu kiŋarenikinite ikonituŋa kwape kesipan loka amerekekin,
Kakan naka Musa ka Aaron.
78
1
Wu ikatuŋa, kopupokisi ekakisil:
Kitoikisi akusiki akiro nuka aitukuka.
2
Awoŋaari akaituk kotoma awarag;
Eneri akiro nuimunonoro nukoloŋo.
3
Nukipupu ka nukijenu,
Nukilimonokis oni lukapapaawok.
4
Mam kimunoni kes kama ejaas idwekec,
Alimonokin aturi naebunit aiturio naka EJAKAIT,
Ka akegogoŋ ka akeswamisio da nukaumokin nueswama.
5Abu kiticat aitejenunet kotoma Yakob,
Kibwaik ekisil toma Isirael,
Loabu kicorak lukapapaawok, ebe,
Ibusakinit aitejenun kes idwekec.
6
Tetere aturi naebunit ejenuni kes,
Ka idwe da lueponio aur;
Luepote anyoun alimokin kes ikecedwe.
7Tetere ibwaikinete amunokec toma Edeke,
Komam imurwokinete aswamisio nuka Edeke,
Konye koricito akeicorakineta.
8Ido kinyeis aiput lukapapaakec,
Aturi naaninik naepaliono;
Aturi namam abu kitemok eketau,
Namam ekemoyo eketakina mama ejai Edeke.
9Akapakina idwe luka Epuraim kalujiis, kitiŋito akabwai,
Koboŋosi kau kotoma apaaran naka, ejie.
10Mam aricito aitutuket naka Edeke,
Koŋero alosenen kokisilake;
11
Kimurwokis akeswamisio,
Ka nukaumokin nuabu kitodik kes.
12
Abu kiswama nukaumokin kakonyen nuka lukapapaakec,
Kotoma akwap nako Misiri, omanikor da loka Soan.
13
Abu kotiak aŋolol, kitotor kes toma;
Kitobwo akipi kwape kabwas.
14
Paaran kiŋarenikinite kes kedou,
Akuare da kere kaica naka akim.
15
Abu kocil atiiba kotoma amodiŋ,
Kitamat kes akipi nuepu bala nuelomunete kataro.
16
Kitolom icileta kotoma atiiba,
Kitelelea da akipi kwape kicorin.
17
Konye kodiakanarete kesi kwape kwaŋin kamakeŋ,
Aipaliikin Loejai kuju kakuj kotoma amodiŋ.
18
Apotu kokodut Edeke kotauonokec
Kanuka eibelikec kiisito inyamat.
19
Eebo, apotu koluikinito Edeke koinerekec;
Kobalas ebe, “Epedori kereka Edeke aitemokin emesa kotoma amodiŋ?
20
Koany, abu ŋesi kinom atiiba, kibulubulunos akip,
Koleleata icileta;
Epedori kereka ŋesi ainakin atap da?
Itudumikini kereka ŋesi iketuŋa akiriŋ?”
21Kanuka ŋun kepupu EJAKAIT, konyunyurikin:
Kinepak akim Yakob,
Konyoik da anyunyura Isirael.
22
Naarai mam eyuunito Edeke,
Komam da emunos akeitajar.
23
Konye abu kicorak akuj,
Koŋaa da ikekia luka akuj;
24
Kitetepik kes emanu ainyam,
Koinak da kes akima nukokuju.
25Apotu ituŋa konyamata atap naka lukapedor:
Kijukak kes inyamat luaupete cut.
26Kitukut ekwam loka ari nakokide kotoma akui:
Abu kiŋarenik ekwam loka ari naka eŋalakimak kotoma apedorike.
27Kitetepik kes akiriŋ kwape kapua,
Ka alurueik da kwape kasinei naka aŋololin.
28Kitodoik kidiŋ oidukurunukec,
Alukun akeceiboisio.
29Kwaŋin apotu konyamata, kimonikinos cut;
Koinak luekibelikinito kes.
30Mam ekeceibel abu kiŋoŋoor,
Koriŋa akecekiriŋ ejai aitukekec.
31Konyoiki kes anyunyura naka Edeke,
Koar luetelekaritos atumit kakesi,
Kodany ikatumunak luka Isirael.
32Keja ŋun kere da, kodiakanarete ca kwape kwaŋin,
Komam iyuunito aswamisioke nukaumokin.
33Kanuka ŋun, abu ŋesi koŋetak akecepaarasia kotoma nukamameak,
Ka ikecekaru da kotoma akurian naepol.
34
Naaaria kes, ŋes konyet ewoneoto ŋes:
Koboŋut kodunyakis amoote Edeke.
35Kiitut da ebe Edeke ŋes atiibakec,
Edeke Loejai kuju kakuj ŋes ekalakunanikec.
36
Konye komodakito aiturite ŋes kakeceituk,
Kiŋalaŋalata da ŋes kakeceŋajepa.
37
Naarai mam ekecetau atenit kamakeŋ,
Ido mam keraas imunon kotoma aitutuketeke.
38
Konye ŋes, kanuepoloor aitim, abu kisioni numam adolitekec,
Mam abu komudia kes:
Eeca, irwan ipu abu ŋesi kisinac akededeŋ,
Ido mam abu kidikok akenyunyura kere.
39
Kiitu ŋesi ebe keraas kesi awat;
Ekwam loetubor, komam eboŋuni bobo.
40Ipu ca ma aatenak nuapotu kipaliikinioto ŋes kotoma ais:
Kitakadikiniata ŋes kotoma amodiŋ!
41Kibelokinos da bobo kokodut Edeke,
Kitunyunyurikis Lokalaunan loka Isirael.
42Mam apotu kiitut akekan,
Karaida apaaran naalakunia kes kama kalukekolo.
43Kwape kibwaikinia akeanyuneta toma Misiri,
Ka nukaumokinike da omanikor loka Soan;
44
Kitarau ikececorin aokot,
Ka ikececileta da tetere mam epedorete aimat.
45
Kijukak kes atukon nuka icuc, luapotu konyamata kes:
Ka aidodoka da nuapotu komudiasi kes.
46
Kitanyam ekutelek akecemio,
Ka lukorionokec da kitanyam emaase.
47
Komudia ikecemusabibun kakako,
Ka isukumorinikec da komudia kakako naepol noi.
48Ikecebaren da kotula kakako,
Ka ikecesipanin luka amerekekin kotula kamwanis naka eipyei.
49
Kocakak mamakec adedeŋ naka aitakadikinioke,
Anyunyura, ka aisiop, ka ican da,
Ekodet loka imalaikan lukaronok.
50Abu kocilak akenyunyura esokot,
Mam abu kideu aijarakec kaneejai atwanare,
Konye kotulana.
51
Kodany ikiyaik kere kotoma Misiri,
Ageunet naka agogoŋukec koweman luka Kam.
52
Konye komea iketuŋa kwape kamerekekin,
Kiŋarenik kes kotoma amodiŋ kwape kesipan loka amerekekin
53
Komea kes kainapakina, ŋes mam akuriakatar:
Konye abu aŋolol korapia lukasurupokec.
54
Koyau kes akwapuke nakalaunan,
Kiton oroŋat lo, loagwelit akanike nakoteten.
55
Kireŋea atekerin nuaja kiŋarenekec,
Kokoranak kes airumetekec,
Kisiboik da idwe luka Isirael owemanakec.
56
Konye kokodut bobo kipaliikis
Edeke Loejai kuju kakuj,
Mam da aricito aitejenunetake.
57
Kibelooros kau kiswamata nukamodomod kwape kalukapapaakec:
Kopaasi awai bala akabwa nakeŋalan.
58
Naarai apotu kitunyunyurikis ŋes kaiboisiokec nuiceleleete,
Kitokokoloto da ŋes kaputosiakec nuikec.
59
Kepupu Edeke ŋun, konyunyurikin,
Kosac cut Isirael.
60
Kwaŋin abu kojal ewema lokalaunan loka Silo,
Ewema loeboieneno ŋesi kokidiŋ otuŋa.
61
Koinak akegogoŋ toma aŋatario,
Akeibuses da toma akan naka lukasurup.
62Koinak iketuŋa da neejai ekileŋ;
Konyunyurikinite airumeteke.
63Konyam akim ikatumunakakec;
Apesurukec da amamei ekosio loenyamanarere adukokin.
64
Kodany ekileŋ isasedotinikec;
Apuserunukec da mam akuudianete.
65
Kosodi EJAKAIT akwenyun bala yenekwenyuni kajo,
Kwape etuŋanan lokagogoŋon loecela kanuemerar ajon.
66Koreto lukasurupoke kau:
Kisurum kes ileic lumam edaunos.
67Bobo da abu kogir ewema loka Yosep,
Mam abu koseu ateker naka Epuraim.
68Konye koseu ateker naka Yuda,
Emoru Sion loamina.
69
Koduk aiboisike nakalaunan kwape kimor,
Kwape kakwap naeticat ŋesi ikar kere.
70
Koseu Daudi da ebulesitike,
Kolem ŋes kanuk naka amerekekin.
71
Kolem ŋes kacok amerekekin nuetanakete,
Aitanyam Yakob iketuŋa, ka Isirael airumeteke.
72
Kwaŋin kitanyam kes kwape kejaar aliogot naka etauke;
Kiŋarenik da kes kapirianut naka akaninike.
79
1
Wu Edeke, apotu ikapirin toma airumetekon;
Amunaut eyekalukon;
Atiyanakis Yerusalem aitaraun aapoŋor.
2
Etanyamata akweny nuka akuj akiriŋ naka awat nuka ibulesinikon lukatwak,
Ainakis itiaŋ luka akwap akiriŋ naka lukalaunakakon.
3
Abukonosi da akeceokot kwape kakipi airimor Yerusalem,
Komamei da yenidai kes.
4Kiraun isio amorosit kama ejaas iidunyetakosi,
Aisekelio ka akienar kama ejaas lukirimorito sio.
5
Wu EJAKAIT, itodoli ai inyunyura ikar kere?
Enokenenei kereka ekonikolo bala akim?
6
Kobukok akoninyunyura mama ejaas ikapirin lumam kijenete jo,
Kobukok da mama ejaas ajakanuto numam iwoneete ekonikiror.
7Naarai anyamasi Yakob,
Etisilioto da akeibois.
8
Sirikiitu kamakosi numam adolit nuka lukapapaakosi,
Konye koruruk sio akoniitim:
Naarai kisilior isio noi.
9
Kiŋarakinai sio, wu Edeke loka aitajariokosi,
Kanuka aibuses naka ekonikiror:
Kolaku sio, koluc akosironisio,
Kanuka ekonikiror.
10Kanukinyo atemariata do ikapirin ebe, “Ai bo ejai Ekecedeke?”
Ibus ainyaŋ aokot nuka ibulesinikon nuabukoros,
Kojenun kotoma okapirin keteete isio da.
11
Kobu aumeno naka ienan akonyenekon;
Kwape ejaar apolou naka apedorikon kitajar ijo ŋul lueraas idwe luka atwanare.
12Kinyakak toma atorobu naka iidunyetakosi irwan akanykaarei,
Amorositokec, nukimoromoroto jo, wu EJAKAIT.
13
Kasodete isio ikonituŋa, amerekekin nukoronyikon,
Aimalaenen jo ikar kere:
Kitodikini aturio kere akoniiturio.
80
1
Wu ekecokon loka Isirael, kopupok,
Ijo loiŋarenikinit Yosep bala esipan loka amerekekin;
Ijo loiboie kama kikerubin, kocaik.
2Kisidik akonigogoŋ kakonyen nuka Epuraim ka Benyamin ka Manase,
Kobu aitajar sio.
3
Kinyakarai sio bobo, wu Edeke;
Kitacau akonikonyen, sio da kitajario.
4Wu EJAKAIT Edeke loka ajoresio,
Itodoli ai inyunyurikinit ailip naka ikonituŋa?
5Itanyam ijo kes atap naka akiyo,
Itamat kes akiyo nuipu noi.
6Kitarau sio eŋuŋet kama ejaas iidunyetakosi:
Lukasurupokosi ekienanakinos bonik.
7Kinyakarai sio bobo, wu Edeke loka ajoresio;
Kitacau akonikonyen, sio da kitajario.
8
Ibu kitolom emusabibu anyoun kakwap nako Misiri:
Ibu kireŋea atekerin, kiraik ŋes.
9Ibu kirienya akwap kakonyeneke,
Koremo akejeke kwap noi, kiriam akwap kere.
10Abu etolimike korapia iroŋan,
Aketenuna koputos kiresia luka Edeke.
11
Kigananata aketenun kiton aŋolol,
Akelibuneta da kodolo Ocor.
12
Kanukinyo ibilia ijo akebwas,
Tape luitorete orot kere edeŋete?
13Iboiboi eputir akitoike,
Itiaŋ da lukadedeŋak lukais enyamete ŋes.
14
Wu Edeke loka ajoresio, kiŋaiŋait jo, kibelokin bobo:
Koŋolia kwap ijai kuju, kosesen,
Koanyana emusabibu lo.
15
Atorom naabu akonikan nakoteten kiraik,
Ka atenu naibu ijo kitogogoŋ kanukon.
16Icweio kakim, ajepar cut:
Etwakete kisiŋir luka akonyenekon.
17
Kojaun akanikon neejai etuŋanan loka akanikon nakoteten,
Neejai okoku loka etuŋanan loibu ijo kitogogoŋ kanukon.
18Kwaŋin mam sio kiboŋori kama ijai ijo:
Kitajarunai sio, sio da kiwonei ekonikiror.
19
Kinyakarai sio bobo, wu EJAKAIT Edeke loka ajoresio;
Kitacau akonikonyen, sio da kitajario.
81
1Koboorianata ayoere mama ejai Edeke agogoŋuwok:
Kikareoto kaiyalama mama ejai Edeke loka Yakob.
2Koyooto esabuli kituruoto da isiman,
Ka adeudeu naejijim ka yenikutat.
3
Kokutakis arupepe kilamu elap:
Kepoloor da cut elap, kapaaran naka epucitiwok loiyamakina.
4
Naarai erai ekisil kotoma Isirael,
Aicorakinet naka Edeke loka Yakob.
5Abu koseu ŋes kotoma Yosep araun aitejenunet,
Naalosio aluikin akwap nako Misiri:
Nama apupunio aŋajep namam ajeni.
6“Abu kalema alaŋiru kokeperike:
Ka akekanin da kojalas kodita.
7
Ibu konyara kotoma ocan, abu kayu;
Kaboŋok jo kotoma aibois nakaiyeiyea naka airetun;
Abu ketem jo kakipi nuka Meriba. Sela.
8Kopuputu, wu ikatuŋa, eoŋ da ketejenuni yes:
Wu Isirael, tikipupok eoŋ!
9
Sirikejaun edeke ece loegelara tomakon;
Karaida jo aima ecedeke loegelara.
10
Arai eoŋ EJAKAIT Ekonideke,
Loabu kitolom jo kakwap nako Misiri:
Kooŋa noi akoniituk, kelelebik.
11Konye ikatuŋa mam apotu kopupokis ekaporoto;
Ido Isirael mam kakoto eoŋ.
12
Kwaŋin abu kajalak kes atupar aninik naka itauonokec,
Tetere elosenenete kotoma ainerununikec nuka ikulepek.
13
Konye karai ikatuŋa kapupokis eoŋ:
Kosodi Isirael alosenen korotinika!
14Tieon ketonokok lukasurupokec atipet,
Kasodi aibelokin akakan asurokin luitokokolito kes.
15Luelaito EJAKAIT tiiyapaara kamakeŋ:
Konye timam akecepak kedaun.
16Tiketanyam yes akima nuejok noi adepar:
Tikesimonik kesik lokomoru.”
82
1
Ebwoi Edeke katukot naka Edeke;
Irabi kokidiŋ kidekesio.
2
“Itodolete yesi ai irabete komam itupito abeit,
Ido itubusikinito ikaronok? Sela.
3Kirabakisi lukican ka ikokiok:
Kirabakisi da kabeit luereitai ka lukibakor.
4Kolakutu lukican ka luilwaritos:
Koyuutu kes kakan naka ikaronok.”
5
Mam ejenete, mam eomoomoete;
Irimete kesi taai kotoma amuton,
Apeteta kere nuka akwap ejanaros.
6
Katema atiar, “Iraas yesi idekesio,
Yes kere iraas odwe luka Loejai kuju kakuj.
7Karaida kwaŋin itwakete yesi kwape kituŋa,
Ibiroros da kwape kediopet kotoma ikapolok.”
8
Konyou, wu Edeke, kotubok akwap:
Naarai irumit ijo atekerin kere.
83
1Wu Edeke, sirikililiŋ:
Wu Edeke, sirikitau ti, sirikipala.
2
Naarai, koany, ecelasi lukasurupokon:
Ŋul da lukilaito jo ekeut akwes.
3
Inerunete kapirianut abilakin ikonituŋa ebotet,
Iŋitanaros nepepe aluikin lukibwaitonokon.
4
Atemasi atiar, “Kopotu, kamudiasi kes kinyeis araun ateker:
Tetere mam bobo ekiror loka Isirael iitununoo.”
5Naarai eŋitanaros nepepe, acamut da kediopetau;
Etutukoto aluikin jo.
6Iweman luka Edom ka Isimaelin;
Moab ka Ikagarein;
7Gebal, ka Amon, ka Amalek;
Pilisitia ka luiboiete kotoma Turo.
8Asuria da imorikikina nepepe kakes,
Eŋarakis kesi idwe luka Lot. Sela.
9
Kiswamak ijo kes kwape kaMidian;
Kwape ka Sisera, kwape ka Yabin kocor loka Kison:
10Luatwakikinete En-dor;
Koraunos da aworet naka akwap.
11
Kiswamak ikapolokokec kwape ka Oreb ka Seeb:
Eebo, ikapolokokec kere kwape ka Seba ka Salumuna.
12Luatemasi ebe, “Ketarautu oni
Ironyia luka Edeke luwok.”
13Wu Ekadeke, kituluo kes kwape apua naka etapipirio;
Kwape da kagugu nuekutari ekwam.
14Kwape kakim naicwei amagoro,
Kwape kaipelonoreta nuka akim nuinokokinete iroŋan;
15Kibwap kes kwaŋin kekonikwam loededeŋ,
Kitukurian kes kekonitapipirio loepol!
16Kisileleb ileic akonyenekec;
Tetere emoete ekonikiror, wu EJAKAIT.
17Kisurumai kes ileic, kisiyaloŋoŋoi ikar kere;
Kitisiloi kitoolioroi da.
18Tetere ejenunete ebe ijo bon, Loerai ekonikiror YAWE,
Irai Loijai kuju kakuj koyaite akwap kere.
84
1
Ejokuka ca ma ikoniweman lukalaunak,
Wu EJAKAIT loka ajoresio!
2Imiela ekamoyo, eebo, iilonori da
Kanuka alaroi nuka EJAKAIT;
Ekatau ka akakuan da eyeete kaiyalama
Mama ejai Edeke Lokajaran.
3Eebo, adumu anyiporit etogoke,
Iporoidoliat da adum akai naeurianakini ikedwe,
Kes itemwanakon, wu EJAKAIT loka ajoresio,
Ekakabaka Ekadeke da.
4Isirereŋitoi ŋul luiboiete kotogokon:
Iyatanakinete duc aiturit jo. Sela.
5Isirereŋitoi ŋin yenejai agogoŋuke tomakon:
Yenejaas otauke irotin luepolok luebeete Sion.
6Itorito toma aditot naka Aimony
Ituluorete ŋes aibois naka akonye nuka atanin;
Eebo, akiru naeliŋun erapiari ŋes karereŋio.
7
Elosete anyoun kagogoŋ kiton agogoŋ,
Ŋinidiopet kakesi etakanuni kakonyen nuka Edeke kotoma Sion.
8Wu EJAKAIT Edeke loka ajoresio, kopup akailip:
Kopupokinai, wu Edeke loka Yakob. Sela.
9
Koany, wu Edeke loirai ebukukosi,
Koŋolek ereet loka lokinyonyoikitonokon akinyet.
10Naarai apaaran adiopet kotoma alaroikon
Itelekarit apaarasia kamace alukumit,
Ibus eoŋ araun ekedaran ekek kotogo loka Edekeka,
Itia aiboi koweman luka aronis.
11Naarai EJAKAIT Edeke ŋes akoloŋ ka ebuku:
Einakini EJAKAIT asianut ka aibuses;
Emamei ibore yenejok yenimiki ŋesi
Ŋul luelosenenete kadolit.
12Wu EJAKAIT loka ajoresio,
Isirereŋitoi ituŋanan yenikimuno jo!
85
1
EJAKAIT, kiminakinit akonikwap;
Inyaku arereŋ naka Yakob.
2Isioni numam adolit nuka ikonituŋa,
Irapaa aronisikec kere.
3Ilema akoninyunyura kere:
Ibelokin anyoun kadedeŋ naka akoniisiop. Sela.
4Kibelokinoi sio, wu Edeke loka akosiitajario,
Kitanaŋ akoniisiopanakin sio.
5Inyunyurikini kereka ijo sio ikar kere?
Isinatari kereka akoninyunyura aturio kere?
6
Mam kereka bobo kitajari sio:
Tetere ikonituŋa iyalamikinos kanukon?
7Wu EJAKAIT, kitodikinai sio akoniitim,
Koinakinai sio akoniitajar.
8
Eirari eoŋ nuinera Edeke EJAKAIT:
Naarai elimonokini ituŋake ka lukalaunakake ainapakin:
Konye sirikemanasi bobo neejai abaŋaanut.
9Abeit eapie aitajarake kaŋul kalueyonito ŋes;
Tetere iboienenei aibuses kakwapuwok.
10
Eriamunos aitim ka abeit;
Anuanaros adolit ka ainapakin.
11
Elibi abeit kotoma alup;
Ete adolit kwap kojai toma akuj.
12
Eebo, einakini EJAKAIT ajokis;
Emienenei awokokwap.
13Iŋarenikini adolit ŋes;
Itemokini erot loitorete akekeje.
86
1Kitoik akonikit, wu EJAKAIT, koboŋokinoi;
Naarai ecana eoŋ ido elwaritoi.
2Kidar akaijar; naarai ayoŋit eoŋ Edeke:
Wu jo Ekadeke, kitajar ekonibulesit lokimuno jo.
3Kitimoi, wu EJAKAIT;
Naarai amonyi mamakon aitiwar akwap.
4Kisiyalamik aijar naka ekonibulesit;
Naarai ekeunit ekatau mama ijai, wu EJAKAIT.
5
Naarai ijok ijo, EJAKAIT, itemokino aisioni,
Epol aitimikon mama kaŋul kere lukiwoneete jo.
6Wu EJAKAIT, kitoik akit akailip;
Kopupok eporoto loka akaiŋaiŋa.
7Kapaaran naka icanika ewonei jo;
Naarai kiboŋokini eoŋ.
8
Wu EJAKAIT, emamei loiputotor jo kodekesio;
Emameete da nueputotor akoniswamisio.
9
Wu EJAKAIT, epote atekerin kere nuibu kosub aima jo;
Itopoloorete da ekonikiror.
10
Naarai ipol ijo, iswamai da nukaumokin;
Ijo bon Edeke.
11Wu EJAKAIT, kisisianakinai ekonirot,
Alosenenei kotoma abeitekon:
Kimorikik ekatau ayoŋit ekonikiror bon.
12Wu EJAKAIT Ekadeke, keturi jo kekatau kere;
Etopoloori ekonikiror ikar kere.
13
Naarai epol akoniitim mama ajai:
Ibu koyu akaijar kaipany naejai kwap noi.
14Wu Edeke, kanyoikis luiwoŋooko,
Emoi da atukot naka lukakaje akaijar,
Komam kibwaikinito jo akonyenekec.
15
Konye jo, wu EJAKAIT, irai Edeke loileleba aision, isiana da,
Iyapi anyunyurikin, epol akoniitim ka abeit.
16Okwe, kibelokin mama ajai, kitimoi;
Koinak ekonibulesit akonigogoŋ,
Kitajar ikoku yenika akonibulesit.
17Kitodikinai aanyunet naka ajokis;
Tetere lukalaito eanyunete, kirumata ileic,
Naarai ijo, EJAKAIT, ibu kiŋarak eoŋ, kitalaka da.
87
1Akepetetait ejai oroŋan lukalaunak.
2Emin EJAKAIT irutei luka Sion,
Adepar aiboisio kere nuka Yakob.
3
Inerai nukaibusesukon,
Wu ere loka Edeke. Sela.
4Alimori nuka Rakab ka Babulon,
Kotoma kakesi nukajenete eoŋ;
Koany Pilisitia, ka Turo, nepepe ka Etiopia;
Ebalasi ebe, “Aurikinio ŋin ŋina.”
5
Eebo, elimunio nuka Sion da ebe,
“Aurikinio ŋin ka ii tomake”;
Loejai kuju kakuj ŋes elopet iticasi.
6
Naiwadikaa EJAKAIT ituŋa, imarakini ebe,
“Aurikinio ŋin ŋina.” Sela.
7Kes lueyeete ka kes da luikosiete etemarete ebe,
“Akatanin kere eja tomakon.”
88
1Wu EJAKAIT, Edeke loka akaitajario,
Amonyi paaran ka kuare da kakonyenekon:
2Kocamak akailip kolom neijai ijo;
Kitoik akonikit mama ejai aimonyoka.
3Naarai ileleba emoyoka ican,
Akaijar da aapia Okatwak.
4Kemarakinitai eoŋ nepepe kaŋul kaluijesaros toma Aipany;
Arai eoŋ kwape ketuŋanan yenemamei aiŋarakinio.
5Kacakakin neeja ikatwak,
Kwape luaaritai lueperete kates,
Lumam ijo iitunit bobo cut;
Agelaros kakanikon.
6Kiperik ijo eoŋ toma Aipany nakokwap noi,
Toma aiboisio nuemutoko, toma ataro.
7Kalaŋirikinit noi akoninyunyura,
Kiŋaru ijo eoŋ kakonikailan kere. Sela.
8Isieka ijo ikapapero kamakaŋ,
Kitarau da eoŋ ibore yeneketal kamakec;
Kagoloritai, mam apedori alomun kiŋa.
9Aororor akakoŋu kanuka aiticanioka;
Wu EJAKAIT, ewonenenei mamakon ŋinipaaran,
Egagat akakanin mamakon.
10Itodikini kereka ijo lukatwak nukaumokin?
Enyounete kereka itoilon aiturit jo? Sela
11Elimor kereka akonisianut-nakamin kotoma ates?
Arai bo akonimunonut kotoma Amudiario?
12
Ejenunos kereka nukaumokinikon kotoma amuton?
Adolitekon da kotoma akwap naka aimurwonut?
13Konye wu EJAKAIT, mamakon amony eoŋ,
Ido tupuruc elipenenaa kakonyenekon.
14EJAKAIT, kanukinyo icakaria ijo ekamoyo?
Kanukinyo da ibwaia ijo akonikonyen kamakaŋ?
15
Keticanio kaapianari atwanare ameun koiditeuka:
Nakesiriebiata nuketasurokon eyaloŋoŋi.
16Karapa eoŋ anyunyurakon naededeŋ:
Kagelasi eoŋ nuketasurokon.
17Apotu kesi kerimosi eoŋ bala akipi apaaran kere;
Apotu da kalukut eoŋ.
18
Isieka ijo kama kayeniminat ka ipapero;
Ipaupaka da amuton.
89
1Ayei nuka aitim naka EJAKAIT ikar kere:
Itejenuni da akaituk amunonutukon mama ejaas aturio kere.
2Naarai atema atiar, “Edukio aitim ikar kere:
Iticasi ijo akonimunonut kotoma akuj cut.
3
Etutuk kaloseunaka,
Eyapoik Daudi ekabulesit;
4
Eticasi aurikon ikar kere,
Aduki eicoloŋokon loka ajakanut mama ejaas aturio kere.” Sela.
5Wu EJAKAIT, ituri akuj nukaumokinikon,
Akonimunonut da katukot naka lukalaunak.
6Naarai iŋai bo EJAKAIT kitirianere jo kotoma akuj?
Iŋai da kodwe luka idekesio iputotor ijo?
7Edeke loiŋosibib noi kainerunet naka lukalaunak,
Loibus ayoŋit adepar ŋul kere luirimorito ŋes.
8Wu EJAKAIT Edeke loka ajoresio,
Iŋai bo lokapedor kwape kajo, wu Edeke?
Akonimunonut da kirimorit jo.
9
Iyait ijo ewoŋo loka aŋolol;
Naedakunotor akailan nukotoma, isililiŋi ijo kes.
10
Ibilibil ijo Rakab kwape yenearitai;
Isiarisiar lukasurupokon kakan nakagogoŋukon.
11Erai akuj nakon, ka akwap da erai nakon;
Akwap ka ailelebake, ijo kisubuni kes.
12
Ijo ŋes isubi ari naka agolitome ka ari naka eŋalakimak:
Iyalamas Tabor ka Kerumon kokirorikon.
13Ejai jo akan naka apedor:
Erai akanikon nakagogoŋ, ikiara akanikon nakoteten.
14Adolit ka etube kes apeteta nuka eicoloŋokon,
Aitim ka abeit kes kiŋarenikinito jo.
15
Isirereŋitoi ituŋa luejenete aruo naka arupepe:
Wu EJAKAIT, elosenenete kotoma aica naka akonyenekon.
16Isiyalamikinito ekonikiror apaaran kere:
Itopoloorio da kes kadolitekon.
17Naarai ijo aibuses naka agogoŋukec:
Kotoma asianutukon ŋes itopoloorere amumwaratakosi.
18
Naarai ebukuwok ŋes loka EJAKAIT;
Ekabakawok da ŋes loka Lokalaunan loka Isirael
19Ibu kolo kiner kalukalaunakakeŋ kaitapoet,
Kotema atiar, “Ebwaik aiŋarakinio neejai ŋol loegogoŋ;
Etopoloo da ediopet loeseunitai kotuŋa.
20
Aseu Daudi ekabulesit;
Enyonyoik ŋes akakinyet nakalaunan:
21Iticasenenei akakan;
Akakan da itogogoŋi ŋes.
22Mam lokasurup eŋasi ŋes;
Karaida okoku loka aronis aitican ŋes.
23Esibirori eoŋ lukasurupoke kakonyeneke;
Adanyi da luelaito ŋes.
24
Konye akamunonut ka akaitim ejaununos nepepe kaŋes;
Kokirorika itopoloorere akemumwarat
25Ebwaikini akekan aŋolol,
Akekan da nakoteten ebwaikini ocorin.
26
Emonyenenei mamaka ebe, ‘Irai ijo papaka,
Ekadeke, atiiba da naka aitajarioka.’
27
Etarauni da ŋes ekakiyai,
Ido loitelekarit ikabakan kere luka akwap.
28Edarenenei akaitim kanukeŋ ikar kere,
Akaitutuket da icasi cut kamakeŋ
29
Mam etanaŋi akeur ikar kere,
Ka ekeicoloŋ loka ajakanut kwape kepaarasia nuka akuj.
30
Arai kejala ikedwe ekakisil,
Komam etupito itubesiaka;
31Arai kebila ikakisila,
Komam ericete akaicorakineta;
32Ŋes do eticania eoŋ aibucaretakec kebela,
Numam adolitekec da kamacareta.
33Konye mam erikari cut aitimika kamakeŋ,
Karaida aiŋoŋar akamunonut.
34Mam abili akaitutuket,
Karaida aijulakin akirot naadau alomun kaitukuka.
35
Eyapo adiopekirot kalauniteka;
Mam eŋalai Daudi;
36
Ejaenena aurike ikar kere,
Ekeicoloŋ da loka ajakanut kwape kakoloŋ kama ajai.
37
Iticasio ikar kere kwape kelap,
Ido kwape kekajenan lomunot kotoma akuj.” Sela.
38Konye icakar ijo isac da,
Inyunyurik lokinyonyoikitonokon akinyet.
39
Ila aitutuket naka ebulesitikon:
Itisil da akeboko acakakin kwap.
40Ibelebel ijo iregiake kere;
Itiyatiya da ikereria.
41Luitorete orot kere enaŋete ŋes:
Araun ŋesi amorosit koidunyetake.
42Itopoloo ijo akan nakoteten naka lukekoloke;
Isiyalamik da lukasurupoke kere.
43Eebo, itiŋiŋ ijo akwanis naka ekileŋike;
Mam ibu kitobwo ŋes kojie.
44Itanaŋ apiripirike,
Icakak eicoloŋoke loka ajakanut kwap.
45Ituurian apaarasia nuka atumunike;
Iburia da ŋes kileic. Sela.
46Wu EJAKAIT, itodoli ai iŋopit ikar kere?
Itodoli ai akoninyunyura enoki bala akim?
47
Okwe kiitu kwape eurianar apakika;
Aamameak anyoika kisubia kolo idwe kere luka ituŋa!
48
Iŋai bo ituŋanan yenejari yenimam eanyuni atwanare,
Yeneyuuni akeijar kapedor naka Okatwak? Sela.
49
EJAKAIT, ai bo abeata aitimesiakon nulem?
Nuibu kiyapok Daudi kamunonutukon.
50EJAKAIT, kiitu amorosit naka ibulesinikon;
Kwape adakitor katorobuka amorosit naka ituŋa kere lukagogoŋok;
51Nakemoromoroto lukasurupokon, wu EJAKAIT,
Nakemoromoroto ikukut luka lokinyonyoikitonokon akinyet.
52Kituritete ETAKAIT ikar kere.
Amen, Amen.
90
1EJAKAIT, irai ijo akosiibois nakiboienenoo,
Anatar aturio kere.
2
Eriŋa iroŋan kesubuna,
Eriŋa jo kesubuna alup ka akwap,
Ameun ikar luŋo kiton ikar kere, ijo ŋes Edeke.
3
Inyakari ituŋanan toma apua;
Kobala ebe, “Koboŋosi, yes idwe luka ituŋa!”
4
Naarai kakonyenekon ikar elukumit
Esubito bala nakabian naatubor,
Ido bala akwenyunet naka akuare.
5
Iyaŋaari kes kwape kakalele; esubito bala ajo:
Tupuruc esubito bala inya luebwanuŋete.
6
Elibunete tupuruc epoloete da,
Etubio eboŋ, erinyorete.
7Naarai kimudia sio akoninyunyura,
Kisiyaloŋoŋoi sio akoniisiop.
8
Ibwaik numam adolitekosi akonyenekon,
Adiakanaretakosi nukaiyeiyea da aica naka akonyenekon.
9Naarai atuboros akosipaarasia kere kotoma anyunyurakon:
Kitanaŋi ikosikar bala aomisioit.
10Apaarasia nuka ikarukosi kes ikar akaisakanykaarei,
Arai kija kagogoŋ imwaunete ikar akaisakanykauni;
Konye ekeceitur erai aitaaritoi ka aiturur bon;
Naarai eoliori atipet, kimameun da.
11Iŋai bo ejeni apedor naka akoninyunyura,
Ka akoniisiop kwape kibusakinitor ayoŋit jo?
12
Kisisianakinai do Sio aimar akosipaarasia,
Tetere kidumuni etau loka acoa.
13
Koboŋ, wu EJAKAIT! Itodoli bo ai?
Kiitu ikonibulesin.
14Kisimonikinai sio tupuruc kakoniitim;
Kasodete ailel ka aiyalamikin akosipaarasia kere.
15Kisiyalamikinai sio kwape ejaatar apaarasia nuibu kiticania,
Ka ikar da lukianyunitor aronis.
16
Kotakanik ikonibulesin akoniswam,
Ka akoniibuses da odwekec.
17
Kojaikin ajokis naka EJAKAIT Ekosideke mamakosi:
Kiticat ijo aswam naka akaninikosi kamakosi,
Eebo, kiticat aswam naka akosikanin.
91
1Yeniboie kaibois naka aiyeiyea naka Loejai kuju kakuj,
Iboienenei kotoribe loka Lokapedor kere.
2Alimuni nuka EJAKAIT ebe, “Ŋes neekerianaraka ka abwasika;
Ekadeke, loamuno.”
3Naarai kiyuuni jo kairukutu naka ekalokan akweny,
Ka atular da naerono.
4
Kirapiari jo kakopirike,
Imeci ijo kwap kabebenokake:
Akebeit erai ebuku ka aupal.
5
Mam ikurianari etasuro loka akuare,
Karaida emal loegumunio paaran;
6Karaida atular naebuni kamuton,
Karaida amudiar naemunauni paaran.
7Ibirokinos ilukwnin osiepikon,
Ka ilukwnin itomon kakonikan nakoteten,
Konye mam kidolokini jo.
8
Konye iseseni ijo kakonikonye,
Ianyuni da eropit loka ikaronok.
9Naarai jo, wu EJAKAIT, irai neekerianaraka!
Itarau Loejai kuju kakuj aiboisikon naiboieneno;
10
Mam adioronis kidoikini jo,
Karaida adiotular adolokin owemakon.
11
Naarai einakini ikemalaikan aidar jo,
Koricito jo korotinikon kere.
12
Kidakete jo kakaninikec,
Kinyek amoru aiguikin akonikeju.
13
Icaki ijo eŋatuny ka emusaga:
Ipudapudai iŋatuny ka emun.
14Ayuuni ŋes, naarai kaminakin eoŋ noi;
Ekeuni ŋes kuju naarai ajenu ekakiror.
15
Kewonei eoŋ, eoŋ da aboŋokini ŋes;
Ajaenena kaŋes kotoma ocan;
Ayuuni ŋes, etopoloori da.
16Esimonikini ŋes aibut naka apaarasia nuipu,
Ido etodikini ŋes akaitajar.
92
1Ejok aimalaenen EJAKAIT,
Ayoere aiturit ekonikiror, wu jo Loijai kuju kakuj.
2Aitodunia asianutukon-nakamin tupuruc,
Amunonutukon da ŋinikuare.
3Kobore yeniramat yenikaputio atomon, ka isabulin,
Ka aruo naiyapaara naka adeudeu.
4Naarai ijo, EJAKAIT, kisiyalamik eoŋ kaswamukon:
Ebwonenena da kaswamisio nuka akanikon.
5
Epolok ca ma aswamisiokon, wu EJAKAIT!
Aomisiokon da idulok noi.
6
Etuŋanan loesubit bala etiaŋ mam ejeni;
Ebaŋ da mam ejenuni ŋun.
7
Naelibuniata ikaronok bala inya,
Naekeriakarotor lukeswamak numam adolit kere;
Iswamaete kwaŋin tetere emudiario ikar kere.
8Konye ijo, wu EJAKAIT, ijai kuju ikar kere.
9Naarai, koany, lukasurupokon, wu EJAKAIT,
Naarai, koany, etwakete lukasurupokon;
Isiarakinio da lukeswamak numam adolit kere.
10Konye itopoloo ijo akamumwarat kwape kamumwarat naka ekosobwan:
Kenyonyoikin akinyet nakitetet.
11Aanyu akakoŋu nuemiela eoŋ kodoikis lukasurupoka,
Apuput da akaki nuemiela apupun kama ka luiswamaete nukaronok lukanyoikis asurokin eoŋ.
12
Ekerianar loedolit kwape edukudukut;
Epoloi da kwape eres loka Lebanon.
13
Ŋul luiraikinio togo loka EJAKAIT,
Ekeriakaros kalaroi nuka Edekewok.
14Eraenenete araito kemojoŋata;
Ileleba kes akip elibilibete da.
15
Aitodunia ebe eteni EJAKAIT;
Erai atiibaka, emamei da amamus adolit kotomakeŋ.
93
1
Irumit EJAKAIT: enapit apolou;
Enapit EJAKAIT, eenikinit agogoŋ:
Icasit akwap da, mam epedori aijaŋijaŋa.
2
Ecat eicoloŋokon apeŋo:
Ijai ijo ageun kolo ŋo.
3Wu EJAKAIT, ekeut akalele,
Ekeut akalele ekeceporoto;
Ekeut akalele akecekailan.
4
Edeparit iporotoi luka akipi nuipu,
Akailan nukapolok nuka aŋolol,
EJAKAIT lokokuju ŋes agogoŋ!
5Eraas aitejenunetakon numunon cut:
Alaunit ŋes itubusikinit ekonitogo
Ikar kere, wu EJAKAIT.
94
1Wu EJAKAIT, ijo Edeke lokenyaŋan,
Ijo Edeke lokenyaŋan, kocaik!
2
Konyou, ijo ekatubon loka akwap,
Koinak luituros nuibusakinito kes.
3
EJAKAIT, itodolete ai ikaronok,
Itodolete ai ikaronok kibwoŋatatar?
4
Ineras aamameak, ineras da nuka eitur,
Eoloboboto bonik ikeswamak numam adolit kere.
5Wu EJAKAIT, emunyumunyete kesi ikonituŋa,
Aŋarut da akoniirumet.
6Earete apuserut ka imoit,
Earete da ikoki.
7Kobalas ebe, “Mam EJAKAIT eanyuni,
Mam Edeke loka Yakob eomoomoi.”
8Koomoomata yesi luisubito bala itiaŋ kotuŋa:
Ka yes da ibaŋiok, icounete wori?
9
Ŋol lokiswamauni akit, ŋes emam epupi?
Lokesubi da akoŋu, ŋes emam eanyuni?
10
Ŋol loelecori atekerin, ŋes emam iteteni?
Ŋopeŋol loisisianakini ituŋanan acoa.
11
Ejeni EJAKAIT aomisio nuka ituŋanan ebe,
Eraas nukamameak.
12
Wu EJAKAIT, isirereŋitoi ituŋanan yenilecorit ijo,
Yenisisianakini ijo kokisilakon.
13Isibworari ijo ŋes kinyek aanyun apaarasia nuka ican,
Aitodol naebokikinere ikaronok aipany.
14
Naarai mam EJAKAIT ecakari iketuŋa,
Karaida aijal airumeteke.
15Naarai etube eboŋori mama ejai adolit;
Kes da luitenara kotauon etuparete ŋes.
16Iŋai bo enyouni kanukaŋ aluikin ikeswamak nukaronok?
Iŋai bo ebwoi kanukaŋ aluikin ikeswamak numam adolit?
17Kedim EJAKAIT araut ekeŋarakinanika,
Esunyakinit ekatau aiboikin eililiŋa.
18Naalimunio ebe, “Ejurusiar akakeju”;
Wu EJAKAIT, aitimikon ŋes kegaŋit.
19Kotoma aipues naka aomisioka kotomaka,
Isiyalamikinito aitalakaretakon ekatau.
20
Epedorete kereka ikayaitok lukaronok aimorikikin kajo,
Luisilakinete nukameŋeranut?
21
Etukonokinos nepepe aluikin aijar naka luedolito,
Etubokinete da aiar aokot numam aronis.
22Konye korai EJAKAIT ekapir loeoja:
Ekadeke da korai atiibaka nakerianara.
23
Enyakaki ŋesi kes numam adolitekec,
Emudiari da kes karonisikec;
Emudiari kes EJAKAIT Edekewok.
95
1Kopotu, kayeikis EJAKAIT:
Kekareete kaiyalama mama ejai Atiiba naka aitajariowok.
2Kekunyakis akonyeneke kaimal,
Kekareete mamake kaiyalama kisabulin.
3Naarai EJAKAIT ŋes Edeke Lopeti,
Ekabaka da lopeti, adepar idekesio kere.
4Agururin nuka akwapin ejaas toma akanike,
Aidiasia da nuka iroŋan eraas nukeŋ.
5Aŋololin nukeŋ, ŋes kolo kesubi:
Akekanin elunuluŋete akwap naeonit.
6
Kopotu, kamaata kakukumo;
Kakukonokinos kakonyen nuka EJAKAIT Ekasubaniwok.
7
Naarai ŋes Ewokodeke,
Oni da kirai ituŋa lukoronyike;
Amerekekin nuka akanike.
Lolo, arai kiirasi ekeporoto!
8
Sirikitininikata ikusitauon, kwape koMeriba,
Kwape kapaaran naka Masa kamodiŋ:
9Nakakoduniata eoŋ lukapapaakus,
Ketogogoŋoto, koanyut akaswam.
10
Ikar akaisaoŋon apotu lukatur kaya ketakadikis;
Kabala ebe, “Kes ituŋa luapuoros kotauonokec,
Komam ejenete ikarotin.”
11
Ŋes keyapoikinio kakaisiop ebe,
Mam elomunete rwaru aibworareteka.
96
1Koyeikisi EJAKAIT ekosio lokitetet:
Koyeikisi EJAKAIT, yes akwapin kere.
2Koyeikisi EJAKAIT, kiturito ekekiror:
Kitodiasi akeitajar ŋinipaaran.
3Kolimosi akeibuses katekerin,
Aswamisioke nukaumokin kotuŋa kere.
4Naarai epol EJAKAIT, loibusakinit noi aiturio:
Loibusakinit ayoŋio adepar idekesio kere.
5
Naarai idekesio kere luka ituŋa eraas aputosia:
Konye EJAKAIT ŋes asubi akuj.
6Aibuses ka apolou ejaas akonyeneke:
Agogoŋ ka atemelel ejaas aiboisike nakalaunan.
7
Koinakis EJAKAIT, yes atekerin nuka ituŋa,
Koinakis EJAKAIT aibuses ka agogoŋ.
8Koinakis EJAKAIT aibuses naibusakinit ekekiror:
Koyautu ainakinet, kolomut alaroike.
9Komaata EJAKAIT konapito luelaete:
Komaran kakonyeneke akwap kere.
10
Kolimosi katekerin ebe, “Irumit EJAKAIT:
Icasit akwap da, komam epedori aijaŋijaŋa:
Etubokini ituŋa kabeit.”
11Kiyalamikin akuj, kolel akwap;
Kirurum aŋolol, ka ailelebake kere.
12Kolel ekitui, ka luejaas toma kere;
Kosodete do ikito kere luka amagoro ayoore kanuka aiyalama;
13
Kakonyen nuka EJAKAIT, naarai ebunit;
Naarai ebunit atubokin akwap:
Etubokini akwap kadolit, Ka ituŋa da kakebeit.
97
1Eyait EJAKAIT; kolel akwap;
Kiyalamikinos apujana nuipu.
2Irimorito ŋes idouon ka amuton:
Adolit ka etube kes apetetait naka eicoloŋoke.
3
Iŋarenikinit akim ŋes,
Icwei lukasurupoke luirimorito.
4Abu eimiliake kinwak akwap:
Koany akwap, komaran.
5Kocalaros iukon bala edipor kakonyen nuka EJAKAIT,
Kakonyen nuka EJAKAIT loka akwap kere.
6Elimori akuj akedolit,
Aanyut da ituŋa kere akeibuses.
7
Kirumata ileic kere luijaanakinete aputosia nuikec,
Lueoloboboto kanuka aputosia:
Komaata ŋes, yes idekesio kere.
8Abu Sion kiira kiyalamikin,
Kolelata da adwe nuka Yuda;
Kanuka itubesiakon, wu EJAKAIT.
9
Naarai ijo, EJAKAIT, ijai kuju noi icelelei kakwap kere:
Kitopolooritai noi aitelekarit idekesio kere.
10
Aso ca, yes luiminasi EJAKAIT, kolaata aronis:
Idari ŋesi itauon luka lukalaunakake;
Eyuuni kes kakan naka ikaronon.
11Eŋiuni aica kanuka ikadolitok,
Aiyalama da kanuka luitenara kotauon.
12Kiyalamikinos kotoma EJAKAIT, yes ikadolitok;
Kimalata ekekiror lokalaunan.
98
1
Koyeikisi EJAKAIT ekosio lokitetet;
Naarai eswama nukaumokin:
Akekan nakoteten ka akekan nakalaunan
Eswamakis ŋes aitajar.
2
Etejenu EJAKAIT akeitajar,
Edeleleu da adoliteke kakonyen nuka atekerin.
3
Eitu akeitim ka akemunonut
Mama ejai ekek loka Isirael;
Isaŋeta kere luka akwap aanyut aitajar naka Edekewok.
4Kikare akwap kere kaiyalama mama ejai EJAKAIT;
Koboorianata ayoore kai yala ma, eebo, koyooto aiturit.
5Koyeikisi aiturit EJAKAIT kadeudeu;
Kadeudeu keporoto loka ayoore.
6
Karupepen karuo naka apeet,
Kikareoto kaiyalama kakonyen nuka Ekabaka, EJAKAIT.
7Kiruruma aŋolol, ka ailelebake;
Akwap da ka luiboiete kotoma.
8Kibapa akalele akecekanin;
Koyeikis iukon nepepe kanuka aiyalama.
9Kakonyen nuka EJAKAIT, naarai ebuni atubokin akwap:
Etubokini akwap kadolit, ka ituŋa kere kabeit,
99
1
Eyait EJAKAIT, komaranete ituŋa;
Iboie kama kikerubin; kijaŋijaŋa akwap.
2Epol EJAKAIT kotoma Sion;
Ejai kuju noi aitelekarit ituŋa kere.
3
Kituroto kesi ekonikiror loepol lokaŋosibib;
Lokalaunan ŋesi!
4
Emina agogoŋ naka ekabaka da etube;
Iticasi ijo abeit;
Itubi kabeit kadolit kotoma Yakob.
5
Kitopoloosi yesi EJAKAIT Ewokodeke,
Ido komaata koicoloŋoke:
Lokalaunan ŋesi!
6Musa ka Aaron kotoma osasedotinike,
Ka Samuel da kotomakec kaluiworoete ekekiror;
Apotu kiworoto EJAKAIT Koboŋok ŋesi kes.
7
Kiner kakes kopir loka edou:
Apotu koricata aitejenunetake,
Ka ekisil loabu koinak kes.
8
Wu EJAKAIT Ekosideke, ibu Koboŋok kes;
Ijo Edeke loibu kisioni kes,
Karaida kinyaŋenenei nuka aswamisiokec.
9Kitopoloosi yesi EJAKAIT Ewokodeke,
Komaata da koukotoke lokalaunan;
Naarai EJAKAIT Ewokodeke erai Lokalaunan.
100
1Kikareoto kaiyalama mama ejai EJAKAIT; yes akwapisinei kere.
2Kijaanakis EJAKAIT kaiyalama;
Kopotu akonyeneke kayoore.
3
Kojenutu EJAKAIT ŋes Edeke;
Ŋol ŋes kolo kisubi, kirai oni da lukeŋ;
Kirai iketuŋa, amerekekin da nukoronyike.
4Kolomasi oruteike kaimal,
Alaroike da kaiturit:
Kimalata ŋes, kiturito ekekiror.
5
Naarai ejok EJAKAIT;
Ejaenena akeitim ikar kere;
Akemunonut da mama ejaas aturio kere.
101
1Ayeenenei nuka aitim ka etube:
Mama ijai ijo, wu EJAKAIT, ayeenenei aiturit.
2
Eswamai kacoa kopone loetenit:
Okwe, wori bo ibunio mama ajai?
Alosenenei kotogoka ketau loetenit.
3
Mam ebwaikini idiobore yenerono akonyeneka:
Alait eoŋ aswam naka ŋul kaluepaarete awai:
Mam keminaikin eoŋ.
4
Enyouni etau loeninik kamaka:
Mam ajeni idiobore yenikaronon.
5
Amudiari eoŋ loesabanakini eidunyeteke kaiyeiyea:
Mam da atitiŋikin loejai akoŋu naeomiara ka etau loituro.
6
Eteenenei lumunon kakwap tetere iboienenete keoŋ:
Loelosenenei kopone loetenit, ŋes kejaanakini eoŋ.
7Loemodomodoi mam iboikin togo ka:
Loinera nuka aiŋal da mam icasi kakonyeneka.
8
Ŋinitupuruc amudianari ikaronok kere luka akwap;
Agelari ikeswamak numam adolit kere kore loka EJAKAIT.
102
1Wu EJAKAIT, kiira akailip,
Akaimony da kodolu mama ijai.
2Sirikibwa akonyenekon kama ajai,
Kapaaran naanyunitor ican:
Kitoik akonikit mama ajai;
Kapaaran naeworoo Koboŋok katipet.
3
Naarai edaunos apaarasiaka kwape kapuru,
Akakojo da icweio kwape kakalas.
4Anomor ekatau bala inya, arinyo da;
Naarai kemurwoki ainyam ikanyamat.
5Kanuka eporoto loka eidinyaka
Eminaikinos akakojo amunyoka.
6
Asubit bala etolut loka amodiŋ,
Aput bala etukuri loka ais.
7Akwenyi, ido asubit bala anyiporit,
Naesilikinit bon koswi.
8
Kamoromoroete lukasurupoka apaaran kere;
Luekerepikis mamaka ikenere.
9Naarai anyam eoŋ ekurwon bala atap,
Enyalak numatanaka kakiyo.
10
Kanuka aisiopokon, ka akoninyunyura:
Naarai kidak eoŋ kosodi acakar.
11
Esubito apaarasiaka bala etoribe loeoliori;
Arinyo eoŋ bala inya.
12
Konye jo wu EJAKAIT, iboienenei ikar kere;
Aiitunetekon da mama ejaas aturio kere.
13
Inyouni, itimi da Sion:
Naarai adolu apak aitim ŋes,
Eebo, adolu apale naaseikinitai.
14
Naarai isiyalamikinito ikonibulesin amoruke,
Ido etimoto akepua.
15
Kwape kwaŋin eyoŋete atekerin kere ekiror loka EJAKAIT,
Ikabakan da kere luka akwapin akoniibuses.
16Naarai aduk EJAKAIT Sion,
Atakanu kotoma aibusesuke.
17
Asesen ailip naka lukibakor,
Komam emenit ailipikec.
18
Iwadikakinio ŋun aturi naebunit:
Ituŋa da luesubunio iturete EJAKAIT.
19
Naarai ete ŋesi kwap kojai kaiboisike nakalaunan naicelelei;
Abu EJAKAIT kosesen akwap kojai kuju:
20Akiirar eidiny loka eenat;
Alacun ŋul luidaritere atwanare;
21Tetere elimorete ituŋa ekiror loka EJAKAIT koSion,
Ka aituriteke da koYerusalem;
22
Naetukonokinotor ituŋa,
Ka ajakanuto da, aijaanakin EJAKAIT.
23Abu kiŋoŋa akagogoŋ korot,
Kituurian da akapaarasia.
24
Katema atiar, “Wu Ekadeke, sirikiiyaŋa eroko kedauna akapaarasia:
Ikarukon eŋatarito aturio kere.”
25
Ageun apeŋo ibu ijo kopet apetetait naka akwap;
Aku; da erai aswam naka akaninikon.
26
Edaunos ŋul, konye ibusenenei ijo:
Eebo, ŋul kere emojoŋete kwape kanapito;
Iloci kes kwape kanapito, ido iloconokinos:
27
Konye ijo ŋopeŋol,
Ikonikar da mam enaŋete.
28Iboienenete idwe luka ibulesinikon
Aurikec da iticasio kakonyenekon.
103
1Kiturite EJAKAIT, ijo etauka;
Ka iboro da kere luejaas tomakaŋ
Kituroto ekekiror lokalaunan.
2Kiturite EJAKAIT, ijo etauka:
Sirikiimurwokis akejokisio kere.
3
Loisionie numam adolitekon kere;
Loitaŋaleuni adekesiakon kere.
4Loelakuni akoniijar kotoma amudiario;
Loitanapit jo aboko naka asianut-nakamin ka aitimesia nukajokak.
5Loisimonikini jo luejok;
Kosodi akonitumun aiteteun bala emorukaalet.
6Iswamai EJAKAIT nuedolito,
Ka itubesia luka ituŋa kere luemwaŋitai.
7Abu ŋesi kitejen Musa ikerotin,
Ka akeswamisio da mama ejaas idwe luka Isirael.
8
Ileleba EJAKAIT aisioni, esiana da,
Iyapi anyunyurikin, epol da akeitim.
9
Mam itoroni apaarasia kere;
Karaida anyunyuranakin ikar kere.
10
Mam kiswamakinit oni kwape ejaatar awokoronisio,
Karaida airop oni kwape ejaatar numam adolitewok.
11Naarai kwape ejaar akuj kuju noi akwap,
Epol kwaŋin akeitim mama ejaas lueyoŋito ŋes.
12
Kwape elwaniar kide anyoun koto,
Esieka kwaŋin aibucanaretawok.
13
Kwape itimio papa ikedwe,
Kwape kwaŋin itimi EJAKAIT lueyoŋito ŋes.
14Naarai ejeni asubunetewok;
Iitunit ebe kirai oni apua.
15Etuŋanan, esubito akepaarasia bala inya;
Bala aturot naka ekitui, epoloi kwaŋin.
16Naarai ekutakini ŋes ekwam, emameun;
Akeibois da mam bobo ejenuni ŋes.
17
Konye aitim naka EJAKAIT ejai ameun apaarasia nuŋo kiton apaarasia kere
Mama ejaas ŋul lueyoŋito ŋes,
Akedolit da mama ejaas idwe luka idwe;
18
Mama ejaas luericito aitutuketeke,
Ka luiitunito aicorakinetake aitodol kes.
19
Eticat EJAKAIT ekeicoloŋ kotoma akuj;
Ido irumit akejakanut kere.
20
Kituroto EJAKAIT, yes ikemalaikan;
Yes lukapedor kotoma agogoŋ, luitodolete akekirot,
Kopupete eporoto loka akekirot.
21
Kituroto EJAKAIT, yes akejoresio kere;
Yes ikejaanakinakake, luiswamaete nuekoto ŋesi.
22Kituroto EJAKAIT, yes akeswamisinei kere,
Kaiboisio kere nuka airumiteke.
Kiturite EJAKAIT, ijo etauka.
104
1Wu EJAKAIT Ekadeke, ipolo ijo noi!
Inapit aibuses ka apolou.
2Loimukori bon kaica bala anapito;
Loapesikinit akuj bala aigalisit:
3
Loiriikini akito nuka agolaike kakipi;
Loituluori idouon agalike;
Loelosenenei kabebenoka nuka ekwam.
4
Loituluori ikwamin ikekiyakia;
Ikekejaanakinak akim naesarani.
5Loapesi apeteta nuka akwap,
Tetere mam ijaŋijaŋa ikar kere.
6Irapaa ŋes kataro kwape kegoe;
Kibwaut akip kokuju kiroŋan.
7Apotu kokerata kaitoronokon;
Kiwonyasi kanuka eporoto loka airetunikon.
8
Kodokas oroŋan, kijesaros aditon,
Kiton aiboisio nuibu kosubakinite kes.
9
Ibu kibwaik eikor lomam kes etubete;
Tetere mam bobo eboŋorete arapiar akwap.
10Ijukari akipi nuka atanin aditon;
Eleleete koroŋan:
11Itamasete ŋolitiaŋ loka ais;
Eŋaleunete itukoi akecekure.
12Iboienenete akweny nuka akuj karirikec,
Eruosi katenun.
13Itapapali iroŋan kakip nuka agolaike;
Emonikin akwap araito nuka aswamisiokon.
14
Isibwaŋikini ibaren inya,
Ijaikini ituŋa da ikui;
Tetere elemunete inyamat kalup;
15
Ka ebino loisiyalamikinit etau loka etuŋanan,
Ka akinyet naisimilimilio akekonyen,
Ka atap da naeinakini etau loka ituŋanan agogoŋ.
16
Imonikinos ikito luka EJAKAIT;
Iresia luka Lebanon, luabu kiraik;
17Mama edukonokinete akweny akecekais:
Etolut da iberosin
kes eketogo.
18
Iroŋan lueojak eraas luka akinei nuka ais;
Imor kes ameceta nuka ipooi.
19
Abu kibwaik elap abilia apakio;
Ejeni akoloŋ akelomar.
20
Isubi ijo amuton, koraun akuare;
Naecedunotor itiaŋ kere luka amagoro.
21
Egatasi iŋatunyo ludidik adumun lumejauna,
Emoete da ikecenyamat kama ejai Edeke.
22Elomuni akoloŋ, eboŋorete,
Eperete kabuaikec.
23
Elosete ituŋa aswamukec,
Aitaaritoikec aitodol eboŋ.
24
Wu EJAKAIT, ipu ca ma ipitenyo luka aswamisiokon!
Isubit kes kere kacoa:
Ileleba akwap abarakon.
25Ejai aŋolol ya, epol ido elal,
Ejaas toma iboro lueliatos lumam emarunos,
Itiaŋ ludidik ka lukapolok da.
26
Elosete ameerin kanen;
Ejai nen Lebiatan,
loibu kosubak abolia kanen.
27
Ŋul kere kidarito jo,
Tetere iinakini kes ikecenyamat kedol apak.
28Etukonokinete luiinakini kes;
Ilakari akonikan, imonikinos kesi lukajokak.
29
Ibwai akonikonyen, iyaloŋoŋoete;
Idemari eiyeŋanekec, etwakete,
Eboŋorete da apuakec.
30
Ijukuni ekonimoyo, esubunio kes;
Ido iteteuni ijo alup.
31Kojaenena aibuses naka EJAKAIT ikar kere;
Kolelak EJAKAIT aswamisioke:
32
Loeŋolekini akwap, kosodi akwap amaran;
Etirori iroŋan, epurunete.
33Ayeonokini eoŋ EJAKAIT apaarasia kere nuka aijaraka:
Ayeonokini aiturit Ekadeke aroko ajari.
34Kojokik ŋes akaomoom;
Alelakini EJAKAIT.
35
Komudiarai ikadiakanarak kakwap,
Komameunos da ikaronok.
Kiturite EJAKAIT, ijo etauka.
Kituroto yesi EJAKAIT.
105
1
Kimalata EJAKAIT, kiworoto ekekiror;
Kitejenut aswamisioke otuŋa.
2Koyeikisi ŋes, koyeikisi aiturit ŋes,
Kitatamata aswamisioke kere nukaumokin.
3Kitubusikina kokirorike lokalaunan,
Kolakaros itauon luka ŋul kaluemoete EJAKAIT.
4
Komoata EJAKAIT ka akegogoŋ;
Komoata akonyeneke ikar kere.
5
Kiitutu akeswamisio nukaumokin nueswama;
Nukaumokinike ka Itubesia luka aitukuke;
6Wu yes aur naka Aburaam ebulesitike,
Yes idwe luka Yakob, luseunake.
7
Ŋes EJAKAIT Ewokodeke:
Ejaas iketubesia akwap kere.
8
Eitu ŋesi aitutuketeke ikar kere,
Akirot naabu kicorak aturio alukumit.
9
Aitutuket naetutuki ŋesi kAburaam,
Ka aiyapositike mama ejai Isaak.
10
Abu kitogogoŋ da ŋipeŋin mama ejai Yakob araun ekisil,
Mama ejai Isirael araun aitutuket namam edaun.
11
Kotema atiar, “Kainakini jo akwap naka Kanaan;
Koraun ewai loka airumetekon.”
12
Nakeraatar kesi ituŋa luekidioko,
Eebo, luekidioko noi, kiboiororoto kotomake.
13Kirimete kateker kiton ateker,
Anyoun kajakanut adiopet kiton otuŋa ice.
14
Mam abu kocamak idiotuŋanan aikonakin kes erono,
Eebo, abu kitoron ikabakan kanukec;
15Kobala ebe, “Sitikitirosi lukinyonyoikitonoka akinyet,
Sirikiswamakis ikanabin aronis.”
16
Konyarak akwap ebeli,
Abu kobil ebela kere loka atap.
17
Abu kijuka etuŋanan aiŋarenikin kes;
Aponi Yosep kogwelarai araun ebulesit:
18
Aponi kisiriebai akekeje kirikoi,
Kiperikinoi orikoi luka asua.
19Aitodol apak naetodolere akekirot;
Kigimo akirot naka EJAKAIT ŋes.
20
Kijuka ekabaka kolacak ŋes,
Ekayaiton loka ituŋa, koosik ŋes.
21
Kitarau ŋes ekapolon loka etogoke,
Ekayaiton da iboroke kere.
22Ajen ikapolokoke kwape etojokitor ŋesi,
Aisisianakin imakioke apirianut.
23
Kobu Isirael da Misiri;
Kiboikin Yakob akwap naka Kam.
24
Kitupuu iketuŋa noi,
Kitogogoŋ da kes adepar lukasurupokec.
25Kibelok itauonokec alaite iketuŋa,
Amodanakin ikebulesin.
26
Abu kijuka Musa ekebulesit,
Aaron da loabu koseu.
27Kitodikis kes aanyunetake,
Ka nukaumokin kakwap naka Kam.
28
Kijukak amuton, kitumuton;
Mam apotu kipaliikis akekiro.
29
Kituluo akecekipi aokot,
Koar da ikeceboro lukecor.
30
Kileleba akecekwap aidodoka,
Kagolai nuka ikabakanakec.
31
Abu kiner, kopotu do icuc luipu noi,
Ka ilac koikorunokec kere.
32
Kitetepik kes akako itia akiru,
Ka eimilia loededeŋ akwapukec.
33Kipot imusabibunukec ka itininikec;
Kobilibil ikito luka oikorunokec.
34
Abu kiner, kobu do emaase,
Ka enyede, lomam imarun.
35Konyam ŋinikiot kakwapukec,
Konyam da araito nuka akecekwap.
36
Abu kodany da ikiyaik kere kakwapukec,
Ageunet naka akecegogoŋ.
37
Abu kitolom kes kojaas kepuesa ka esabu:
Komamei idiopet yenineniakauna katekerinike.
38Eyalama Misiri naanyounioto kesi;
Naarai apotu kesi kokuriakata kes.
39
Kotera edou araun eimukos;
Ka akim aica kuare.
40
Kilipata, koinu kes alurueik,
Kisimonik kes atap naka akuj.
41
Koŋa atiiba, kibulubulunos akip;
Koleleata kaiboisio nueokito bala ecor.
42Naarai abu kiitu akekirot nakalaunan,
Ka Aburaam da ekebulesit.
43Kitolom iketuŋa kaiyalama,
Luseunake kayoore.
44
Koinak kes akwapin nuka atekerin;
Kodemut lukorion luka ituŋa aitaraun lukec:
45
Tetere ericete ikekisila,
Idarete da aicorakinetake.
106
1
Kituroto yesi EJAKAIT!
Kituroto yesi EJAKAIT!
Kimalata ma EJAKAIT; naarai ejok ŋesi:
Naarai ejaenena akeitim ikar kere.
2
Iŋai bo gwai epedori alimor aswamisinei nukos nuka EJAKAIT,
Arai aitodiar akeiturit kere?
3
Isirereŋitoi ŋul luericete etube,
Ŋin da yeniswamai nuedolito kapakio kere.
4Wu EJAKAIT, kiitunoi kasianut naitodianakini ikonituŋa;
Koanyanarai kaitajarakon:
5Kasodi kaany akerianut naka luseunakon,
Kalel kaiyalama naka atekerekon,
Ketur nepepe kairumetekon.
6
Kipou kadiakasi kalukapapaakosi,
Kiswama numam adolit, kisub nukaronok.
7
Mam lukapapaakosi apotu kojenut nukaumokinikon koMisiri;
Mam apotu kiitut aipues naka aitimesiakon;
Konye apotu kipaliikis kaŋolol, ŋes Aŋolol Nakareŋan.
8
Konye abu ŋesi kitajar kes kanuka ekekiror,
Aitejenunia akepedor nakos.
9
Abu kiretak da Aŋolol Nakareŋan, koono:
Kitotor kes ataro kosubite bala itorito amodiŋ.
10Kitajar kes kakan naka ŋol kaloalait kes,
Kolaku da kes kakan naka lokasurup.
11Korapias akip lukasurupokec;
Amamei ediopet da loabu kideun.
12
Kosodete kiyuut kesi akekiro:
Koyooto aiturite ŋes.
13Kisunyasi kesi akekiro aimurwokin;
Mam apotu kidareut ainerunike:
14
Konye kikibelikis noi kamodiŋ,
Kokodut Edeke kamodiŋ.
15
Koinak kes nuelipito;
Konye kiteseny ikecetauon.
16
Apotu kikokotekis Musa koidukurun,
Ka Aaron da ekalaunan loka EJAKAIT.
17Koŋaar akwap kiliko Datan,
Koburia atukot naka Abiram.
18Kinep akim katukotokec;
Kicwe akim ikaronok.
19
Kiswamaut itaok koKoreb,
Komaata aput nacaluna.
20
Kwaŋin kisiecasi aibusesukec
Kaput naka emoŋ loenyami inya.
21Kimurwokis Edeke eketajaranikec,
Loabu kiswama nukapolok koMisiri:
22Aswamisio nukaumokin kakwap naka Kam,
Ka nusogim kariri naka Aŋolol Nakareŋan.
23
Kanuka ŋun kobala ebe tikemudia kes,
Kedim Musa loseunake aibwo kakonyeneke aidiek,
Aibelokin akenyunyura, kinyek amudiar kes.
24
Eebo, komwaŋata akwap naejok,
Mam apotu kiyuut akekirot;
25Konye kirurumata kowemanakec,
Mam da apupete eporoto loka EJAKAIT.
26Kanuka ŋun korio akekan mama ejaas,
Aisibiroria kes kamodiŋ.
27
Isiarisiari aurikec atekerin,
Ikaikin kes toma akwapin.
28
Kimorianakinos ka Baal-peor,
Konyama asuban nuka lukatwak.
29Kwaŋin kitunyunyurikis ŋes kakeceswamisio;
Kodoik atular mamakec.
30Kosodi Pinekas aibwo, kitodol etube:
Kitanaŋai atular.
31Kimarakinai ŋes adolit ŋin,
Anatar aturio kere ikar kere.
32
Kitunyunyurikis ŋes bobo kakipi nuka Meriba,
Kodum Musa arereŋ naerono kanukec:
33Naarai apotu kipaliikis ekemoyo,
Kisud einer.
34
Mam kes apotu komudias ituŋa
Kwape ecorakinitor EJAKAIT;
35
Konye kinyalinyalunos katekerin,
Kisisiaut da akeceswamisio:
36
Kijaanakis aputosiakec:
Nuapotu koraunos iica kamakec.
37
Eebo, apotu koinakis ikecedwe lusap ka lupesur araun asuban mama ejaas ajokin.
38
Kobukosi aokot numam aronis,
Kes aokot nuka ikecedwe lusap ka lupesur,
Luainakinete kesi araun asuban mama ejaas aputosia nuka Kanaan;
Komunaun akwap kaokot.
39Kwaŋin komunaunos kanueswamaete,
Koelos da kaswamisiokec.
40
Kanuka ŋun kinep anyunyura naka EJAKAIT aluikin iketuŋa,
Kola da airumeteke.
41
Koinak kes akanin nuka atekerin;
Lualaito kes kirumata kes.
42Koroikis kes lukasurupokec,
Kitonokokai kamakec.
43Abu koyu kes irwan nuipu;
Konye kipaliikis kainerunikec,
Kitisiloto numam adolitekec.
44
Konye abu kosesen icanikec,
Naapupunio aimonyokec:
45Kiitu aitutuketeke kamakec,
Kiitu da kwape ejaar aipues naka aitimesiake.
46
Koinak kes aitimio
Kama ejaas ŋul kere luaŋatarito kes.
47
Kitajarai sio, wu EJAKAIT Ekosideke,
Kotukonokinai sio katekerin,
Aimalaenen ekonikiror lokalaunan,
Kebwoŋananas kotoma aiturit jo.
48Kituritete EJAKAIT, Edeke loka Isirael,
Ameun ikar luŋo kiton ikar kere.
Kotemasi ituŋa kere ebe, “Amen.”
Kituroto yesi EJAKAIT!
107
1
Kimalata ma EJAKAIT; naarai ejok ŋesi:
Naarai ejaenena akeitim ikar kere.
2Kotemasi lulakuna luka EJAKAIT kwaŋin,
Lualaku ŋesi kakan naka lokasurup;
3
Kotuk kes kakwapin,
Anyoun kokide koto da,
Anyoun kagolitomei ka eŋalakimak da.
4Kitoroto amodiŋ ipasitos;
Mam apotu kodumut ere loiboikinos.
5Kiilor etaukec kotomakec
Kanuka eteŋei ka akure.
6
Kosodete kesi aimony mama ejai EJAKAIT kotoma ocanikec,
Koyu kes kationisikec.
7
Kiŋarenik kes korot loitenara,
Tetere elosete ore loiboikinos.
8Okwe ti ca ituŋa kituroto EJAKAIT kanuka ajokisike,
Kanuka aswamisioke da nukaumokin mama ejaas idwe luka ituŋa!
9
Naarai isimonikini etau loimiela,
Etau da loeriebi eteŋei ilelebi nukajokak.
10
Ŋul lueboiete kamuton kotoribe da loka atwanare,
Koenitete kaiticanit ka asuat;
11
Naarai apotu kipaliikis akiro nuka Edeke,
Komenata ainerunet naka Loejai kuju kakuj:
12
Kanuka ŋun abu ŋesi kitisil ekecetau kaitaaritoi;
Kibiroros, komamei yeniŋarakinit.
13Kosodete kesi aimony mama ejai EJAKAIT kotoma ocanikec,
Kitajar kes kationisikec.
14
Kitolom kes kamuton kotoribe da loka atwanare,
Kobilibil aenetakec.
15Okwe ti ca ituŋa kituroto EJAKAIT kanuka ajokisike,
Kanuka aswamisloke da nukaumokin mama ejaas idwe luka ituŋa!
16
Naarai abil ikirigin luka aisinit,
Atub da atiketa nuka asua.
17
Iticanio ibaŋiok kanuka epalikec,
Kanuka numam adolitekec da.
18Egirit ekecetau inyamat luka ŋolipone kere;
Ikunyakinete da orutei luka atwanare.
19Kosodete kesi aimony mama ejai EJAKAIT kotoma ocanikec,
Kitajar kes kationisikec.
20
Ijukari akekirot, itaŋaleuni kes,
Eyuuni da kamudiariokec.
21Okwe ti ca ituŋa kituroto EJAKAIT kanuka ajokisike,
Kanuka akeswamisio da nukaumokin mama ejaas idwe luka ituŋa!
22
Koinakisi asuban nuka aimal,
Kolimosi da akeswamisio kayoore.
23Ŋul luelosete aŋolol kotoma ameerin,
Luiswamaete kotoma akar naepol;
24Eanyunete ŋul aswamisio nuka EJAKAIT,
Ka nukaumokinike kataro.
25Naarai icorakini, itukusi da ekwam lokos,
Loedakuni akailan.
26
Edokarete kiton akuj, koboŋorete bobo ataro:
Eburunete ikecetauon kanuka ican.
27Iriaŋanaros lailo ka laije, kigetigetas bala ekameran,
Kipirisiaros ikecetauon piris.
28Kosodete kesi aimony mama ejai EJAKAIT kotoma ocanikec,
Kitolom kes kationisikec.
29
Kisinapikini ekwam,
Tetere akailan epalarete.
30Kosodete kesi aiyalamikin naarai apalasi;
Kwaŋin eyaŋaari kes odoket loakotosi kesi adokaria.
31Okwe ti ca ituŋa kituroto EJAKAIT kanuka ajokisike,
Kanuka akeswamisio da nukaumokin mama ejaas idwe luka ituŋa!
32Kitopoloosi kesi da ŋes katukot naka ituŋa,
Kituroto da ŋes kaibois naka imakio.
33
Ituluori icorin amodiŋ,
Ka atanin da akwap naeonit;
34
Akwap nakamio ituluori amodiŋ naka abalaŋ,
Kanuka aronis naka ŋul kaluiboiete kotoma.
35
Ituluori amodiŋ abwal naka akipi,
Ka akwap naeonit da atanin.
36
Isiboikini ŋina lueriebi eteŋei,
Tetere itemokinete ere loiboikinos;
37Eyeete amanat, iraete da imusabibun,
Edumunete amio naepol.
38
Isirereŋi kes da, tetere euriaros noi;
Mam ecamakini ikecebaren aiŋoŋar.
39
Kosodi bobo naiŋoŋarere kes, naitukukumere
Kanuka aroikinio, ka ican, ka aiturur.
40Ebukokini ikapolok emenit,
Isirimi da kes kamodiŋ naemamei erot.
41
Kwabo itonyouni luilwaritos alemun kaiticaniokec,
Einakini ikalia luesubito bala esipan.
42
Eanyunete luitenara kotauon, kiyalamikinos;
Numam adolit kere ebutarete.
43
Ŋin yeneco kibwaik ŋun otau,
Koomoomata aitimesia nuka EJAKAIT.
108
1Wu Edeke, ecat ekatau;
Ayei, eebo, ayei aiturit, kaibusesuka.
2Kokwenyutu, esabuli ka adeudeu!
Adilokini eoŋ elopet akwenyun.
3Wu EJAKAIT, kemalaenenei jo kotuŋa:
Ayei aiturit jo katekerin.
4
Naarai epol akoniitim kokuju kakuj,
Akonibeit da edolit akuj.
5
Wu Edeke, kitopolooritete jo kokuju kakuj:
Akoniibuses da kokuju kakwap kere.
6Tetere eyuunio iminatakon,
Kitajar kakanikon nakoteten, koboŋokinoi.
7Ener Edeke kalauniteke ebe: “Ebwoŋakini:
Atiaki Sekem, akori aditot naka Sukot.
8
Gilead akan; Manase da akaŋ;
Epuraim ŋes aigaet naka akouka;
Yuda ŋes ekabela loka ajakanut.
9Moab da ŋes akailoŋis;
Edom ŋes acakakini akamukat:
Ekareikini koPilisitia,”
10
Iŋai bo ketolomari ore loebwaitai?
Iŋai bo keŋarenikini kiton Edom?
11Wu Edeke, mere kijala ijo sio?
Ido mam iupasi kakosijore, wu Edeke.
12
Kiŋarakinai kama ejai lokasurup:
Naarai aiŋarakin naka ituŋa emamei ajokis.
13
Kiswamai nuka atitiŋ kaiŋarakin naka Edeke:
Naarai ŋol ŋes ipudapudai lukasurupowok.
109
1
Sirikililiŋ, wu Edeke loeturenenei;
2Naarai kaooŋikis ikaronok ka ikeŋalak akeceituke:
Enerata keoŋ kaŋajep naeŋalai.
3
Kalukut kakiro nuka alait,
Ketijioto da komamei akirot.
4Itia aminaka ŋes araunotor lukasurupoka:
Konye elipenenei eoŋ.
5
Karopata eoŋ aronis itia ajokis,
Ka alait da itia akamin.
6Kodakak ijo ekaronon ayait ŋes:
Kitobwo da lokasurup kakanike nakoteten.
7
Naetubokinere ŋes, kolom itelekarito akiro;
Kitaraunai da akeilip adiakaret.
8
Kikidiokoto akepaarasia;
Koyaŋa ice akeibois.
9
Koraunos ikedwe luemameete papakec,
Akeberu da apuserut.
10
Koraunos ikedwe ipasoi, inyamuren da;
Komoata inyamat kaneelwana anyoun koreriakec luatiyanakinos.
11
Koyaŋa lokapeseneke kere luejaatar ŋesi:
Koŋatasi imo ikorionoke.
12Komamuun yeniswamakini ŋes nukasianut;
Komamuun da yenitimi idweke luemamei papakec.
13
Kitanaŋai aurike;
Komwatarai da ekecekiror katuri naetupakini.
14
Kiitu EJAKAIT numam adolit nuka lukapapaake;
Sirikemwatar aronis naka totoke.
15
Kojaenenas kesi kakonyen nuka EJAKAIT ducuduc,
Tetere itanaŋi aiitunetekec kakwap.
16Naarai mam abu kiitu aitodun aitim,
Konye irigai yenikican ka yenilwaritoi,
Ka yenebilil etau, aiar kes.
17Eebo, amina ŋesi ekenit, kobunok ŋes;
Mam abu kisiyalamik ailipakin arereŋ, kolwanari do kamakeŋ.
18Konap ekenit bala anapitoke,
Koloma da tomake bala akipi,
Ido bala akinyet toma akojoke.
19Koraun kamake bala anapito naerapitor akekuan,
Ka amuny da naeenitor ŋes duc.
20Ŋol ŋes eropit loka lukasurupoka kama ejai EJAKAIT,
Loka ŋul da luineras nueroko aluikin ekatau.
21Konye wu Edeke EJAKAIT, kiswamakinai, kanuka ekirorikon;
Naarai ejok aitimikon, koyuunai.
22Naarai ecana ido elwaritoi,
Ekatau da imusuŋitai kotomakaŋ.
23Alosi bala etoribe loeoliori;
Kelakilakar eoŋ bala emaase.
24
Anonokata akakuŋin kanuka aikany eteŋei;
Adokoror akakuan.
25
Araun eoŋ amorosit kamakec:
Nakaanyuniata eoŋ imuŋumuŋete akecekwes.
26Wu EJAKAIT Ekadeke, kiŋarakinai;
Okwe, kitajarai kwape ejaar akoniitim:
27
Tetere ejenunete ebe ŋin ŋes aswam naka akanikon;
Ebe ijo, EJAKAIT, ŋes iswama.
28
Kikenoto kesi, konye kisirereŋ ijo:
Naenyounioto, irumete ileic, konye eleli ekonibulesit.
29Kitanapai lukasurupoka aitisilio,
Kimukoros da ikeceleic bala elou.
30Emalaenenei noi EJAKAIT kaitukuka;
Eebo, eturenenei ŋes kokodet.
31Naarai ebwoenenei ŋesi kakan nakoteten naka yenilwaritoi,
Aitajar ŋes kama ejaas luetubokinete eketau.
110
1
Abu EJAKAIT kotema ekajakait ebe, “Kiboikin akanika nakoteten,
Aitodol naebwaikinia lukasurupokon kwap kakejenekon.”
2Ijukari EJAKAIT ebela loka akonigogoŋ anyoun ko Sion:
Kirumite ijo kokidiŋ kalukasurupokon.
3
Ijaikinos ikonituŋa kakote kapaaran naka apedorikon:
Kajokisio nuka alaunit, kakoik naka atupuruc,
Ejaas jo akopyo nuka ikatumunakakon.
4
Eyapoiki EJAKAIT, ido mam ijulakini, ebe
“Irai ijo esasedoti ikar kere
Kwape ejaar epone loka Melukisadek.”
5
EJAKAIT, kakanikon nakoteten
Icumi ikabakan aipelor kapaaran naka anyunyurake.
6
Etubokini ŋesi atekerin,
Isilelebikini aiboisio awate nukatwak;
Icumi aipelor ikapolok kakwapin nuipu.
7
Emasi akipi nuka aguurut nakorot:
Kanuka ŋun ikeuni akou.
111
1
Abu EJAKAIT kotema ekajakait ebe, “Kiboikin akanika nakoteten,
Aitodol naebwaikinia lukasurupokon kwap kakejenekon.”
2Ijukari EJAKAIT ebela loka akonigogoŋ anyoun ko Sion:
Kirumite ijo kokidiŋ kalukasurupokon.
3
Ijaikinos ikonituŋa kakote kapaaran naka apedorikon:
Kajokisio nuka alaunit, kakoik naka atupuruc,
Ejaas jo akopyo nuka ikatumunakakon.
4
Eyapoiki EJAKAIT, ido mam ijulakini, ebe
“Irai ijo esasedoti ikar kere
Kwape ejaar epone loka Melukisadek.”
5
EJAKAIT, kakanikon nakoteten
Icumi ikabakan aipelor kapaaran naka anyunyurake.
6
Etubokini ŋesi atekerin,
Isilelebikini aiboisio awate nukatwak;
Icumi aipelor ikapolok kakwapin nuipu.
7
Emasi akipi nuka aguurut nakorot:
Kanuka ŋun ikeuni akou.
112
1Kituroto yesi EJAKAIT.
Isirereŋitoi ituŋanan yeneyoŋit EJAKAIT,
Yenisiyalamikinit noi akeicorakineta.
2Akeur eraun nakapedor kakwap;
Isirereŋio atur naka luitenara kotauon.
3
Abar ka akerianut ejaas togoke,
Ejaenena da akedolit ikar kere.
4Ecaikini luitenara kotauon aica kamuton,
Esiana ŋesi, ido ileleba aitim ka adolit.
5
Ejok kama kituŋanan yeniswamai nuka asianut koyuununei;
Etogogoŋi akekirot kotube.
6Naarai mam cut iriaŋiriaŋa;
Iitunio ikadoliton ikar kere.
7Mam ekuriana akiro nueroko;
Icasit eketau, emuno EJAKAIT.
8Ecat eketau, mam ekurianar,
Aitodol naeanyunia nuipuda ŋesi edoikinete lukasurupoke.
9
Akoro, ainaki luilwaritos;
Ejaenena akedolit ikar kere:
Itopoloorio akemumwarat kaibuses.
10
Eanyuni ikaronon, ekadakini;
Ekonyanakini ikekel, kosodi ailicar:
Eoliori eipud loka ikaronon.
113
1Kituroto yesi EJAKAIT!
Kituroto, yes ibulesin luka EJAKAIT,
Kituroto ekiror loka EJAKAIT.
2
Kituritete ekiror loka EJAKAIT
Amear kapak kana aitodol ikar kere.
3
Ageun kama eŋiunia akoloŋ aitodol naelomaria
Ibusakinit aiturit ekiror loka EJAKAIT.
4Icelelei EJAKAIT kokuju katekerin kere,
Akeibuses da kokuju kakuj.
5Iŋai bo eputos ka EJAKAIT Ewokodeke,
Loejai eicoloŋoke kuju.
6
Loitasonokin asesen iboro
Luejaas toma akuj toma akwap da?
7
Itonyouni yenikican kapua,
Ikeuni da yenilwaritoi kasusujo;
8
Tetere isiboikini ŋes nepepe kikapolok,
Kes ikapolok luka iketuŋa.
9
Einakini arakan ekal,
Itarauni da toto naisiyalamikinit idwe.
Kituroto yesi EJAKAIT!
114
1
Naalomunia Isirael koMisiri,
Etogo da loka Yakob kotuŋa luka aŋajep naagelara:
2Koraun Yuda aiboisike nakalaunan,
Isirael ŋes ayaetaitike.
3
Koany aŋolol ŋun, koker;
Kitoboŋooroi Yorodan.
4
Kicuroto iroŋan bala imerekekin,
Iukono ludidik da bala imerekekin ludidik.
5Ikwaikini bo ijo ai, wu aŋolol, tape ikeri?
Ijo Yorodan, tape iboŋori?
6Yes iroŋan, tape icurosi bala imerekekin;
Yes da iukono bala imerekekin ludidik?
7Komaran ijo akwap, kama ejai EJAKAIT,
Kama ejai Edeke loka Yakob;
8
Loabu kituluo atiiba abwal naka akipi,
Iikepia da atan naka akipi.
115
1
Mere mamakosi, wu EJAKAIT, mere mamakosi,
Konye koinak ekonikiror aibuses,
Kanuka aitimikon ido kanuka abeitekon.
2
Kanukinyo etemariata atekerin ebe,
“Ai bo kwana ejai Edekekec?”
3
Konye Edekewok ejai toma akuj:
Eswama nuepuda elopet.
4
Eraas aputosiakec epuesa ka esabu,
Aswam naka akanin nuka ituŋa.
5Ejaas aituke, konye mam ineras;
Ejaas da akonye, konye mam esesenete.
6Ejaas aki, konye mam epupete;
Ejaas da ikumes, konye mam iŋuunete.
7Ejaas akanin, konye mam itiŋere:
Ejaas da akeje, konye mam elosete,
Mam ineras kiporotoikec.
8
Ŋul luesubete kes eputokinos kakes;
Eebo, ŋinidiopet yenemuno kes.
9
Wu Isirael, komunonena ijo EJAKAIT:
Erai ŋesi ekeŋarakinanikec ido ekecebuku.
10
Okwe ekal loka Aaron, komunonena EJAKAIT,
Erai ŋesi ekeŋarakinanikec ido ekecebuku.
11Yes luiyoŋito EJAKAIT, komunonenasi EJAKAIT:
Erai ŋesi ekeŋarakinanikec ido ekecebuku.
12
Naarai abu EJAKAIT kiitu oni;
kisirereŋi ŋesi oni:
Isirereŋi ekal loka Isirael,
Isirereŋi ekal loka Aaron.
13
Isirereŋi ŋul lueyoŋito EJAKAIT,
Kere lukapolok ka ludidik da.
14Kiyatanak EJAKAIT yes noi noi,
Yes ka ikusidwe.
15
Isirereŋitoi yes kama ejai EJAKAIT
Lokesubi akuj ka akwap da.
16Akuj ŋes akuj naka EJAKAIT:
Konye akwap abu koinak idwe luka ituŋa.
17Mam ikatwak iturito EJAKAIT,
Karaida ŋul kere luijesaros toma aililiŋ.
18
Konye oni kiturenenei EJAKAIT,
Amear kapak kana aitodol ikar kere.
Kituroto yesi EJAKAIT!
116
1Amina eoŋ EJAKAIT, naarai eira
Ekaporoto ka akaiŋaiŋa.
2Naarai ketoiki akekit,
Ŋes do ewonenenoo ŋes apaarasia kere nuka akaijar.
3Kalukunito aunoi nuka atwanare,
Ketiŋa eoŋ ariebesia nuka Okatwak,
Adum ican ka aiturur.
4Ŋes do ewoneo ekiror loka EJAKAIT ebe:
“Wu EJAKAIT, keŋaiŋait jo, koyu ekatau.”
5
Esiana EJAKAIT, ido edolit;
Eebo, itimono Ewokodeke.
6Idari EJAKAIT ijimat:
Aponi ketisili konye ketajar ŋesi eoŋ.
7
Okwe ekatau, koboŋ toma aibworarikon;
Naarai kikonak EJAKAIT nukajokak.
8Naarai iyuu ijo ekatau katwanare,
Akakonye da kakiyo,
Ka akakeje da kotoma aibiror.
9Alosenenei kakonyen nuka EJAKAIT
Kakwap naka ikajarak.
10
Eyuunit, naatemaria ebe,
“Aponi keticani noi”:
11
Alimuni kamarani ebe,
“Eraas ituŋa kere ikeŋalak.”
12Inyo bo ainakini eoŋ EJAKAIT
Kanuka ajokisioke kere nukekonaki ŋesi eoŋ?
13Ayaŋaari aikopo naka aitajario,
Kasodi aiwone ekiror loka EJAKAIT.
14
Ataci akaiyaposio mama ejai EJAKAIT,
Eebo, kakonyen nuka iketuŋa kere.
15
Atwanare naka lukalaunakake
Erai naketiai loepol kakonyen nuka EJAKAIT.
16Wu EJAKAIT, abeit arai eoŋ ebulesitikon:
Arai eoŋ ebulesitikon, okoku loka akonibulesit;
Ijarijarak ijo aunoi nukaenito.
17Ainakini jo asubanit naka aimal,
Ido ewonei ekiror loka EJAKAIT.
18Ataci akaiyaposio mama ejai EJAKAIT,
Eebo, kakonyen nuka iketuŋa kere;
19Kalaroi nuka etogo loka EJAKAIT,
Kokidiŋikon, wu Yerusalem.
Kituroto yesi EJAKAIT!
117
1
Okwe kituroto EJAKAIT, yes atekerin kere;
Kitopoloosi ŋes, yes ituŋa kere.
2Naarai epol akeitim kama kija oni:
Ejaenena abeit naka EJAKAIT ikar kere.
Kituroto yesi EJAKAIT!
118
1
Okwe kimalata EJAKAIT, naarai ejok ŋesi:
Naarai ejaenena akeitim ikar kere.
2
Kotema do Isirael ebe,
“Ejaenena akeitim ikar kere.”
3Kotema do ekal loka Aaron ebe,
“Ejaenena akeitim ikar kere.”
4Kotemasi kesi da lueyoŋito EJAKAIT ebe,
“Ejaenena akeitim ikar kere.”
5
Abu kewone EJAKAIT kationisika:
Kaboŋok EJAKAIT, kebwaik da aibois naelal.
6
Ejai EJAKAIT owaika, mam akurianar:
Inyo bo epedori ituŋanan aiswamakin eoŋ?
7
Ejai EJAKAIT owaika kama kaŋul kalukeŋarakinete eoŋ:
Kanuka ŋun aanyuni eoŋ nuepuda kama kaŋul kalukalaito eoŋ.
8
Ejok amun EJAKAIT,
Itia amunokina ituŋanan.
9
Ejok amun EJAKAIT,
Itia amunokina ikapolok.
10Kalukut eoŋ atekerin,
Kokiror loka EJAKAIT amudiari kes.
11
Kalukut eoŋ, eebo, kalukut:
Kokiror loka EJAKAIT amudiari kes.
12
Kalukut eoŋ bala ao;
Aduŋiosi kesi bala akim nakokukwa:
Kokiror loka EJAKAIT amudiari kes.
13Ibu koremo eoŋ noi tetere ebiror:
Konye abu EJAKAIT keŋarak.
14
EJAKAIT ŋes akagogoŋ, ekakosio da,
Ido araun ŋesi akaitajar.
15Eporoto loka ailel ka aitajario ejai toma oweman luka ikadolitok:
Iswamai akan nakoteten naka EJAKAIT nukatitiŋ.
16
Itopolooritai akan nakoteten naka EJAKAIT:
Iswamai akan nakoteten naka EJAKAIT nukatitiŋ.
17
Mam atwani konye ajari,
Kasodi alimor aswamisio nuka EJAKAIT.
18
Kaleco noi EJAKAIT eoŋ,
Konye mam abu kainak atwanare.
19
Koŋaikinai eoŋ ikirigin luka adolit:
Alomari tomakec, emalai EJAKAIT.
20
Ŋol ŋes erute loka EJAKAIT;
Elomarete ikadolitok tomake.
21Kemalaenenei jo, naarai kiboŋok eoŋ,
Ido iraun akaitajar.
22
Amoru naaŋerete ikadukok
Araun nakapolon naka agor.
23
Ŋin ŋes aswam naka EJAKAIT;
Eumokina noi kakonyenewok.
24
Na ŋes apaaran naasubi EJAKAIT;
Kileli keyalamasi da kotomake.
25
Wu EJAKAIT, kitajarai kiŋaiŋait:
Wu EJAKAIT, kiŋaiŋait, kijuk akerianut.
26
Isirereŋitoi ŋol loebuni kokiror loka EJAKAIT:
Kilipaki isio yes arereŋ kotogo loka EJAKAIT.
27
EJAKAIT ŋes Edeke, kiinak oni aica:
Koenikisi asubanit kaunoi amumwar nuka etem.
28
Irai ijo Ekadeke, kemalaenenei jo,
Irai ijo Ekadeke, ketopoloonori.
29Okwe kimalata EJAKAIT; naarai ejok ŋesi;
Naarai ejaenena akeitim ikar kere.
119
1
Isirereŋitoi ŋul luedolito cut korot,
Luelosete kokisil loka EJAKAIT.
2
Isirereniroi ŋul luericito aitejenunetake,
Luemoete ŋes kekecetau kere.
3
Eebo, mam ŋul iswamaete numam adolit,
Elosenenete korotinike.
4Ibu kicorak sio aituutooretakon,
Tetere kidunyakini airic kes.
5
Okwe karai kicasito ikarotin:
Tiaricenenei ikonikisila!
6
Ŋes do mam kerumiata ileic
Naacamunia akoniicorakineta kere.
7Kemalaenenei jo ketau loitenara,
Naesisiaunia itubesiakon luedolito.
8Aricenenei ikonikisila:
Okwe sirikiijal cut!
9
Ikonakini ai ekatumunan italauni ekerot?
Kocoite kwape ejaar akonikirot.
10
Kamo eoŋ jo kekatau kere:
Okwe, kenyek apaar kaicorakinetakon.
11
Eŋadak eoŋ akonikirot otauka,
Kenye adiakar kamakon.
12Kituritete jo, wu EJAKAIT:
Kisisianakinai eoŋ ikonikisila.
13Alimonok eoŋ kakaŋajep
Itubesia kere luka aitukukon.
14Alelakinit eoŋ erot loka aitejenunetakon,
Kwape alelakinitor abar kere.
15
Aomoomoenenei aituutooretakon,
Ido acamunit ikonirotin.
16Esiyalamikinit ikonikisila:
Mam kemurwokini akonikirot.
17Kikonak ekonibulesit nukajokak, tetere ajari;
Kasodi karic akonikirot.
18Kitikweny akakonye,
Kaany nukaumokin kokisilakon.
19
Arai eoŋ ekeboiororon kakwap:
Sirikibwa akoniicorakineta kamakaŋ.
20Emwokolikin ekatau kanuka eimiel noi
Itubesiakon apakio kere.
21Ibu kitoron luiturokina:
Kikenoi luepaarete kaicorakinetakon.
22Kolema amoromoro ka amwaŋio kamakaŋ,
Naarai aric eoŋ aitejenunetakon.
23Apotu ikapolok da kiboikinos kinerasi aluikin eoŋ:
Konye abu ekonibulesit koomoomoi ikisilakon.
24Esiyalamikinit eoŋ aitejenunetakon,
Eraas da iinerunetaka.
25
Eminaikin ekatau apua:
Kitajarunai kwape ejaar akonikirot.
26
Alimo ikarotin, ijo da ibu Koboŋok:
Kisisianakinai ikisilakon.
27Kitejenunai erot loka aituutooretakon:
Kasodi konyet aomoom aswamisiokon nukaumokin.
28Epirisiar ekatau kanuka alaŋir:
Kitogogoŋoi kwape ejaar akonikirot.
29
Kolema erot loka aiŋal kamakaŋ,
Ido koinakinai ikonikisila kasianut.
30Aseu eoŋ erot loka amunonut:
Ebwaik itubesiakon akonyeneka.
31Eminaikin eoŋ aitejenunetakon:
Wu EJAKAIT, sirikiisurum ileic.
32
Akerianari orot loka aicorakinetakon,
Naitalalaaria ekatau.
33
Wu EJAKAIT, kisisianakinai erot loka ikisilakon:
Kasodi aricit aitodol awasia.
34
Ae acoa, kasodi aidar ekonikisil:
Eebo, arici eoŋ kekatau kere.
35Kitotoroi eoŋ osokot loka aicorakinetakon;
Naarai esiyalamikinit eoŋ kes.
36
Kogoŋak ekatau aitejenunetakon,
Konye mere airaŋanut.
37
Kibelok akakonye kaite aamameak,
Kitajarai da korotinikon.
38
Kitogogoŋik ekonibulesit akonikirot,
Naerai naka ayoŋite jo.
39Kibelok akamorosit naketukuriani;
Naarai ejokuka itubesiakon.
40Koany, emiela eoŋ aituutooretakon,
Kitajarai kotoma adolitekon.
41Wu EJAKAIT, kadolokis eoŋ aitimesiakon,
Aitajarakon kwape ejaar akonikirot.
42Kwaŋin adumuni eoŋ aboŋokinet naaboŋokini yenikamoromoroi;
Naarai amuno eoŋ akonikirot.
43Sirikilema akirot naka abeit kaitukuka:
Naarai amunokin itubesiakon.
44Kasodi adunyakin airic ikonikisila,
Ikar ka ikar.
45
Kalakakin kalositeka;
Naarai amoot aituutooretakon.
46
Eneri da nuka aitejenunetakon kakonyen nuka ikabakan,
Mam kerumete ileic.
47Esiyalamikini eoŋ aicorakinetakon, Nuamina.
48Ariori akakan mama ejaas aicorakinetakon, nuamina;
Aomoomoi da nuka ikisilakon.
49Kiitu akirot kama ejai ekonibulesit,
Naarai ibu kisumun eoŋ.
50
Na ŋes alakaraka kotoma aiticanioka.,
Naarai akonikirot ketajar eoŋ.
51
Kesekeloto eoŋ noi luisosoloko:
Konye mam apaarit kokisilakon.
52Eitu itubesiakon lukolo jo, wu EJAKAIT Alakara da.
53
Kerum eoŋ anyunyura naepol,
Kanuka ikaronok luejalete ikonikisila.
54Araunos ikisilakon ikakososinei
Kotojo loka ejobiraneka.
55
Wu EJAKAIT, eitu ekonikiror kuare,
Aric ikonikisila.
56Ejai eoŋ ŋin
Naarai aricit aituutooretakon.
57
EJAKAIT ŋes akorakineteka:
Abu kalimo ebe arici akonikiro.
58Abu keŋaiŋa asianutukon kekatau kere:
Kitimoi kwape ejaar akonikirot.
59
Abu kaomoom irotinika,
Kebeleu da akakeje mama ejaas aitejenunetakon.
60Abu kesunyak, mam abu ketumor,
Airic aicorakinetakon.
61Kekodikodata aunoi nuka ikaronok;
Konye mam kemurwokinito ikonikisila.
62
Anyouni kidiŋebai aimal jo
Kanuka itubesiakon luedolito.
63Arai eoŋ epaup loka ŋul kere lukiyoŋito jo,
Ka ŋul da luericito aituutooretakon.
64
Wu EJAKAIT, ileleba akwap akoniitim:
Kisisianakinai ikonikisila.
65Ibu kikonak ekonibulesit ejok,
Wu EJAKAIT, kwape ejaar akonikirot.
66Kisisianakinai etube loejok ka aijen;
Naarai eyuu akoniicorakineta.
67
Eroko eoŋ kiticana abu kapaa;
Konye kwana aricit akonikirot.
68
Ijok ijo, ido iswamai nuejok;
Kisisianakinai ikonikisila.
69
Kenyonyoikis eoŋ luiturokina aiŋal:
Arici aituutooretakon kekatau kere.
70
Etariono ekecetau bala asiepai;
Konye eoŋ esiyalamikinit ikonikisila.
71
Ejok keticani;
Tetere esisiauni ikonikisila.
72Ekisil loka aitukukon ejok kamakaŋ,
Adepar ilukumin luka esabu ka epuesa da.
73
Akonikanin kasubete eoŋ keticata da;
Ae acoa tetere esisiauni aicorakinetakon.
74
Kaanyunete eoŋ ŋul lukiyoŋito jo kosodete aiyalamikin;
Naarai amunokin akonikirot.
75
Wu EJAKAIT, ajeni ebe edolito itubesiakon,
Ebe da kitican ijo eoŋ kotoma amunonut.
76Keŋaiŋait, ketalaka asianutukon-nakamin,
Kwape ejaar akonikirot mama ejai ekonibulesit.
77Kadolokis eoŋ akoniitimesia nukajokak, tetere ajari:
Naarai kesiyalamikinito ikonikisila.
78
Kisurumai luiturokina ileic; naarai kebirosi kasabanakin:
Konye eoŋ aomoomoi nuka aituutooretakon.
79Kibeleunos ŋul lukiyoŋito jo mama ajai,
Ejenunete da aitejenunetakon.
80
Korau ekatau loedolit kokisilakon:
Tetere mam kerumete ileic.
81
Imwokolikin ekatau kanuka aitajarakon:
Konye amunokin akonikirot.
82
Ewariwarete akakonye kanuka akonikirot,
Nape atemaria ebe, “Wori bo kitalakaaria?”
83
Naarai asub bala eriagi loka emukule kotoma apuru:
Konye mam kemurwokinito ikonikisila.
84
Imwaasi ai apaarasia nuka ekonibulesit?
Wori bo itodolio ijo etube mama ejaas ŋul lukemanito eoŋ?
85
Kabokanakis luiturokina apanya,
Lumam etupito ikonikisila.
86
Aicorakinetakon kere eraas numunon:
Kemanito kasabanakin; kiŋarakinai eoŋ.
87Nepetai kes amudiar eoŋ kakwap;
Konye mam abu kajal aituutooretakon.
88Kitajarai kwape ejaar asianutukon-nakamin;
Kwaŋin arici aitejenunet naka aitukukon.
89
Wu EJAKAIT, icasit akonikirot
Kotoma akuj ikar kere.
90Enatarit amunonutukon aturio kere:
Iticat ijo akwap, ido iboie.
91
Iboiete lolo kwape ejaatar aicorakinetakon;
Naarai iboro kere eraas ikonibulesin.
92
Kedim eoŋ aisiyalamikinit ikonikisila,
Ti do eoŋ kaolio kotoma aiticanioka.
93Mam cut kemurwokinete aituutooretakon;
Naarai kes kitajaria ijo eoŋ.
94
Arai eoŋ ekon, kitajarai;
Naarai amoot eoŋ aituutooretakon.
95Kedareut ikaronok amudiar eoŋ;
Konye eoŋ aomoomoi nuka aitejenunetakon.
96
Aany esaŋe loka adolit kere;
Konye elal noi akoniicorakinet.
97
Amina ca ma eoŋ ikonikisila!
Aomoomoi eoŋ nukec apaaran kere.
98
Ketocout eoŋ aicorakinetakon adepar lukasurupoka,
Naarai ejaenenas keoŋ tiritir.
99
Epol eoŋ aijen adepar ikakesisianakinak kere;
Naarai aomoomoenenei nuka aitejenunetakon.
100
Ajeni eoŋ nuipu adepar imakio,
Naarai aricit eoŋ aituutooretakon.
101
Etikok akakeje aibe ŋolirot kere loerono,
Tetere arici akonikirot.
102Mam apaarit kotubesiakon;
Naarai kisisianak ijo eoŋ.
103
Ewinyak ca ma akirokon kaŋajepeka!
Eebo, ewinyak adepar esik kaitukuka!
104Aituutooretakon kes adumanakini eoŋ aijen:
Kanuka ŋun alait ŋolirot loka aiŋal.
105Akonikirot ŋes atala naka akejeka,
Aica da nakosokotoka.
106
Eyapo, ido etogogoŋ ŋun ebe,
Arici itubesiakon luedolito.
107Keticani noi:
Wu EJAKAIT, kitajarai kwape ejaar akonikirot.
108
Keŋaiŋait jo, kocam ainakineta nukakote nuka aitukuka,
Wu EJAKAIT, kisisianakinai da ikonitubesia.
109
Ejai ekatau ducuduc akanika;
Konye mam kemurwokinito ikonikisila.
110Kalokata ikaronok keic;
Konye mam abu kapaa kaituutooretakon.
111
Etarau eoŋ aitejenunetakon bala airumet ikar kere;
Naarai elelakinit ekatau kes.
112Agoŋak ekatau aitodol ikonikisila,
Ikar kere, aitodol awasia.
113Alait eoŋ ŋul luka itauon iarei;
Konye amina ikonikisila.
114
Ijo ŋes akaŋopis ekabuku da:
Amunokin eoŋ akonikirot.
115
Konyout kamaka yesi luiswamaete aronis;
Tetere arici eoŋ aicorakineta nuka Ekadeke.
116
Kigaŋai, kwape ejaar akonikirot, tetere ajari;
Kenyeis ileic airum kotoma amunoka.
117
Kigaŋai, keyamakin,
Kasodi acamun ikonikisila ducuduc.
118Iner ijo ŋul kere luepaarete kokisilakon;
Naarai aiŋalakec erai aamameak.
119
Icaka ijo ikaronok kere luka akwap bala asusujo:
Kanuka ŋun amina eoŋ aitejenunetakon.
120
Emarani akakuan kanuka ayoŋit jo;
Ido ayoŋit itubesiakon.
121Etodol eoŋ etube ka abeit:
Sirikiijalak kama ejaas lukaroikinito eoŋ.
122
Kobwaa ekonibulesit, kanuka ajokis:
Kinyeis luiturokina aroikin eoŋ.
123Ewariwarete akakonye kanuka aitajarakon,
Ido kanuka akirotokon naedolit.
124Kikonak ekonibulesit kwape ejaar akoniitim,
Kisisianakinai da ikonikisila.
125Arai eoŋ ekonibulesit, ae acoa;
Tetere ajenuni aitejenunetakon.
126Adol apak EJAKAIT aswam,
Naarai etapalaut kesi ikonikisila.
127
Kanuka ŋun amiria aicorakinetakon,
Adepar esabu, eebo, adepar esabu loejok.
128Ŋes aderio aituutooretakon kere nuka akiro kere nuejok; Alait da ŋolirot loka aiŋal.
129Eumokina aitejenunetakon:
Ŋes ericia ekatau kes.
130
Naenaarotor akonikiro itaeaikinete;
Itejenikinete ijimat.
131Abu kaooŋ akaituk noi, abu keyenanakin;
Naarai emiela aicorakinetakon.
132
Kibelokin mama ajai, kitimoi,
Kwape itapitor aikonanakin ŋul lueminas ekonikiror.
133
Kiteten ekalose kakirotokon,
Kinyeis numam adolit kere ayait eoŋ.
134
Kolakunai karoikinio naka ituŋanan:
Kwaŋin ŋes aricia aituutooretakon.
135
Kitacaik ekonibulesit akonikonyen;
Kisisianakinai da ikonikisila.
136
Eleleete icorin luka akipi kakonyeka,
Naarai mam ituŋa ericito ikonikisila.
137
Wu EJAKAIT, idolit ijo,
Ikonitubesia da itenara.
138Ibu kicorak aitejenunetakon kadolit,
Ka amunonut naepol.
139Kerum eoŋ ekokote
Naarai emurwokis lukasurupoka akonikiro.
140Ililiauna akonikirot noi;
Kanuka ŋun ŋes eminaritor ekonibulesit.
141
Adite eoŋ kamenitai da:
Konye mam kemurwokinito aituutooretakon.
142
Adolitekon ŋes adolit namam enaŋi,
Ikonikisila da kes abeit.
143Kadoikis eoŋ ican ka ariebo;
Konye kesiyalamikinito aicorakinetakon.
144Edolite aitejenunetakon ikar kere;
Ae acea, tetere ajari.
145Abu kewone kekatau kere; koboŋokinoi, wu EJAKAIT:
Aricenenei ikonikisila.
146Abu kewone jo; kitajarai,
Tetere arici aitejenunetakon.
147Abu kanyou eroko etop kelomuna, kamony:
Kamunokina akonikirot.
148
Abu kakweny eroko akwenyuneta nuka akuare,
Tetere aomoomoi akonikirot.
149Kiira eporotoka kwape ejaar akonisianut-nakamin:
Wu EJAKAIT, kitajarai kwape ejaatar itubesiakon.
150Ikunyunete die luibwapito aronis;
Elwaka kesi kokisilakon.
151
Wu EJAKAIT, ijai ijo die,
Akoniicorakineta da kere eraas abeit.
152
Abu kajen apeŋo kaitejenunetakon ebe,
Iticasit kes ikar kere.
153
Koomoom aiticanitoika, ido koyu eoŋ;
Naarai mam kemurwokinito ikonikisila.
154
Kopurokinai akakirot, kolakunai:
Kitajarai kwape ejaar akonikirot.
155
Elwana aitajario kama ejaas ikaronok,
Naarai mam kes emoete ikonikiaila.
156Wu EJAKAIT, epolok noi aitimesiakon nuejok:
Kitajarai kwape ejaatar itubesiakon.
157Ipu lukemanito ka lukasurupoka da;
Konye mam eoŋ apaarit kaitejenunetakon.
158Abu kaany luemodomodoete, keturur;
Naarai mam ericito akonikirot.
159Koomoom kwape aminar eoŋ aituutooretakon:
Kitajarai, wu EJAKAIT, kwape ejaar asianutukon-nakamin.
160Etiai loka akirokon ŋes abeit;
Itubesiakon luedolito kere ejaenenas ikar kere.
161
Kemanata eoŋ ikapolok komam akiror;
Konye ebwoi ekatau koyoŋite akonikiro.
162Alelakinit eoŋ akonikirot,
Kwape ituŋanan yenedumuni iŋatan luipu.
163Alait eoŋ asacit da aiŋalanut;
Konye amina ikonikisila.
164Keturenenei jo irwan akanykaarei apaaran;
Kanuka itubesiakon luedolito.
165
Lueminas ikonikisila ejaas ainapakin naepol;
Emamei da adiokirot naisiguikini kes.
166Wu EJAKAIT, amunokin aitajarakon,
Eswama da aicorakinetakon.
167Abu ekatau koric aitejenunetakon;
Ido amina kes noi.
168
Abu karic aituutooretakon ka aitejenunetakon;
Naarai ejaas ikarotin kere akonyenekon.
169Wu EJAKAIT, kikuny aimonyoka neijai:
Ae acoa kwape ejaar akonikirot.
170Kodol aiŋaiŋaka akonyenekon:
Koyuunai kwape ejaar akonikirot.
171Kolim akaituk aiturit;
Naarai kisisianakini ijo eoŋ ikonikisila.
172Koye akaŋajep akonikirot;
Naarai edolito aicorakinetakon kere.
173
Kitemokino akonikan aiŋarakin eoŋ;
Naarai aseu aituutooretakon.
174Wu EJAKAIT, emiela aitajarakon;
Esiyalamikinit ikonikisila.
175Kojar ekatau, kosodi aiturit jo;
Keŋarakis da eoŋ itubesiakon.
176
Apaa eoŋ bala amerekek naeoliorit; komou ekonibulesit;
Naarai mam kemurwokinito aicorakinetakon.
120
1Abu kamony mama ejai EJAKAIT kocanika,
Kaboŋok eoŋ.
2Wu EJAKAIT, koyu ekatau
Kama kaituke nuiŋalaete,
Ka aŋajep da naemodomodoi.
3Inyo bo kiinakinio jo,
Ido anyoika bobo ace nukikbnaltinio jo,
Ijo aŋajep naimodomodoi?
4Imalia lueitak luka ikagogoŋok,
Ka akuk nuka erotem.
5
Wu okwe, naarai eboiororor koMesek,
Eboienenei koweman luka Kedar!
6Eboi ekatau apak naepol
Kayenelait ainapakin.
7Enapakina eoŋ:
Konye naeneria, ekotosi kesi ejie.
121
1Eteluori akakonye mama ejaas iroŋan:
Ai bo ebunio akaiŋarakinio?
2Ebuni akaiŋarakinio kama ejai EJAKAIT,
Lokesubi akuj ka akwap.
3
Mam ŋes ecamakini akonikeju aigetanar:
Ŋol lokidari jo mam iluranar.
4Koany, ŋol loidari Isirael
Mam iluranar karaida ajotoor.
5EJAKAIT ŋes ekedaranikon:
EJAKAIT ŋes etolimikon kakanikon nakoteten.
6
Mam akoloŋ kinomori jo paaran,
Karaida elap kuare.
7
Kidarenenei EJAKAIT jo karonis kere;
Idari ŋesi ekonitau.
8
Idarenenei EJAKAIT akonilosit ka akoniboŋun da,
Amear lolo aitodol ikar kere.
122
1
Abu keyalamikin nakalimokiniata ebe,
“Kaloto togo loka EJAKAIT.”
2Ebwoete akosikeje
Koruteikon, wu Yerusalem.
3
Ijo Yerusalem, idukuk
Bala ere loidunyudunyitai:
4
Loedokiata atekerin,
Kes atekerin nuka EJAKAIT,
Araut aitejenunet mama ejai Isirael,
Aimal ekiror loka EJAKAIT.
5Naarai esipokinitai nen Iicoloŋo luka aitub,
Iicoloŋo luka etogo loka Daudi.
6
Kilipakis Yerusalem ainapakin:
Ekeriakaros lukiminasi jo.
7Kojau ainapakin kotoma arwatatinikon,
Akerianut da otogoikon lukapolok.
8Kanuka ikainacan ka ikapaup,
Alimuni do ebe, “Kojaun ainapakin tomakon.”
9Kanuka etogo loka EJAKAIT Ewokodeke
Kamoikini jo ajokis.
123
1Keteluori jo kakakonye,
Wu jo loiboie kotoma akui.
2Koany, kwape eseseniata akonye nuka ibulesin akan naka
ekeceiakait,
Ido kwape eseseniata akonye nuka abulesit ajakaitike;
Kwape kwaŋin eseseniata akosikonye EJAKAIT Ekosideke,
Aitodol nakltimio ŋesi sio.
3Kitimoi sio, wu EJAKAIT, kitimoi sio:
Naarai kiup isio cut amenio.
4Aupa ikositauon
Aisekelio naka ŋul kaluiiakakaete,
Ka amenio naka luiturosi.
124
1
Kiner do Isirael ebe,
Kedim EJAKAIT ajakut owaiwok.
2Kedim EJAKAIT ajakut owaiwok,
Nakinyoikinioto ituŋa asurokin oni:
3
Ti do kes kilikorito oni kaiarete,
Naenepunia akecenyunyura asurokin oni:
4Ti do akipi kilelearito oni,
Aleles da tierapiarit iwokotauon.
5Ti do akipi nuedakununos
Erapiarito iwokotauon.
6Kituritete EJAKAIT,
Lomam abu koinak oni okelakec bala lumejauna.
7Aku ewokotau bala akweny naekui kairukutu naka ikalokak:
Elakulakun airukutu, kiku do oni.
8
Ainarakiniowok ejai okiror loka EJAKAIT,
Lokesubi akuj ka akwap.
125
1Ŋul luemunos EJAKAIT esubito bala emoru Sion,
Lomam epedorio aijanar, konye ebwoi ikar kere.
2Kwape irimoritotor iroŋan Yerusalem,
Irimorit kwaŋin EJAKAIT ikeruna,
Amear lolo aitodol ikar kere.
3Naarai ebela loka aronis mam esalakini airumet naka ikadolitok;
Tetere mam ikadolitok eriorete akecekanin mama ejaas nwnam adolit.
4Wu EJAKAIT, kikonak ejok ŋul luejok,
Ka ŋul da luitenara kotauonokec.
5
Konye ŋul luepaarete orotinikec lumagul,
Itolomari EJAKAIT kes nepepe kikeswamak numam adolit. Kinapakin Isirael.
126
1
Naebelokinio bobo EJAKAIT aŋatario naka Sion,
Kipou kasubata bala ŋul luirujaete.
2
Kilelebuni do akiena aitukewok,
Ayoore da anaiepawok:
Kotemasi do atekerin ebe,
“Eswamaki EJAKAIT kes nuepolok.”
3Kiswamak oni EJAKAIT nuepolok;
Ŋes kiyalamar.
4Wu EJAKAIT, kibelok bobo akosiŋatario,
Kwape kalelesia nuka ari naka Enalaklmak.
5
Ŋul lueyeete komonyete akiyo,
Esakete kailel.
6Karaida elosi korotoke komonyi akiyo,
Kitiŋite ikinyom luyean;
Eboŋuni kailel, eyaŋauni da iisutanake.
127
1Dimikito keduk EJAKAIT etogo,
Itaaritos atai luedukete:
Dimikito kidar EJAKAIT ere,
Ekwenyi lokedaran atai.
2
Idilokinete yesi akwenyun atai, ka aitumor aiyeŋun,
Ainyam da atap naka aitapasitoi:
Naarai einakini kwaŋin iminanake ajo.
3
Koany, idwe kes airumet naka EJAKAIT:
Aur da naka akoik ŋes ainakineteke.
4Kwape kimalia kakan naka ekagogoŋon,
Esubito kwaŋin idwe luka atumun.
5Iyalama etuŋanan loilelebit kes ocoeke:
Emameete ileic,
Naineratar kalukasurupokec orute.
128
1Isirereŋitoi ŋinituŋanan yeneyoŋit EJAKAIT,
Yenelosenenei korotinike.
2
Naarai inyami aitaaritoi naka akaninikon:
Iyalamikini ijo, ijaun ejok.
3Epusi akoniberu bala emusabibu loerai noi,
Kaiboisio nukotoma nuka togokon:
Elukunete idwekon emesakon bala aitoceta nuka iseitunin.
4Koany, isirereŋio kwaŋin
Ituŋanan yeneyoŋit EJAKAIT.
5
Kisirereŋi EJAKAIT jo koSion:
Ianyununei da ajokis naka Yerusalem
Apaarasia kere nuka aijarakon.
6
Eebo, ianyuni idwe luka idwekon.
Kinapakin Isirael.
129
1Kotema do Isirael ebe:
“Keticanata eoŋ irwan ipu ameun keiditeuka.
2Keticanata eoŋ irwan ipu ameun keiditeuka:
Konye mam kepikorito.
3Apotu ikakoriok kokorioto opuraka;
Etooiasi aloboikec.”
4Edolit EJAKAIT:
Aŋed ŋesi aunoi nuka ikaronok.
5Kisurumai kes ileic kitoboŋooroi,
Ŋul kere luelaito Sion.
6Kosubata kesi bala anya koswion luka itogoi,
Nueokete eroko kepolooro:
7Numam ilelebia ekasakan akekan,
Karaida loeeni iisutan atorobuke.
8Luitorete nen da mam etemarete ebe,
“Arereŋ naka EJAKAIT kojai kayes;
Kilipakini yes arereŋ kokiror loka EJAKAIT.”
130
1
Wu EJAKAIT, abu kamony mama ijai kataro naidul.
2EJAKAIT, kiira ekaporoto:
Kitoik akoniki
Eporoto loka aiŋaiŋaka.
3
EJAKAIT, arai imarenenei numam adolit,
Wu EJAKAIT, iŋai bo yenebwoi?
4
Konye ejai aisioni mama ijai,
Tetere kiyonio.
5
Edareunit eoŋ EJAKAIT, idareunit ekatau,
Amunokina da akekirot.
6Ipuda ekatau EJAKAIT,
Aitelekarit eipud loipudatar ikedarak atupuruc,
Eebo, aitelekarit eipud loka ikedarak atupuruc.
7
Wu Isirael, komunokin EJAKAIT;
Naarai mama ejai EJAKAIT ejai aitim,
Mamakeŋ ŋes ejai alakun naepol.
8
Elakuni da ŋesi Isirael
Kotoma numam adoliteke kere.
131
1
EJAKAIT, mam ekatau iwonoono,
Karaida akakonye aomiara;
Mam da alomanakin akiro nukapolok,
Karaida akiro nukekarunito.
2
Abeit etapala esililiŋ da ekatau;
Kwape ikoku yenejakarit kodakite totoke,
Esubit ekatau bala ikoku yenejakarit.
3Wu Isirael, komunokin EJAKAIT,
Amear lolo aitodol ikar kere.
132
1EJAKAIT, kiitu Daudi Aicanioke kere;
2Kwape eyapoikinio EJAKAIT,
Kiyapoik da Lokapedor loka Yakob ebe:
3“Abeit mam alomari owema loka ekatogo,
Karaida alosit aperitika;
4
Mam acamakini akonyeka ajo,
Karaida abukioka ailuranar;
5Aitodol naadumakinia EJAKAIT aibois,
Ewema lokalaunan loka Lokapedor loka Yakob.”
6
Koany, kipou keirasi nuke kotoma Epurata;
Kadumakisi da ŋes amana naka amonieik.
7Kilomari owemanake lukalaunak;
Kimai ŋes kokwap keicolog loka akejeke.
8
Konyou, wu EJAKAIT, koloma aiboisikon nakiyenunet;
Ijo, ka asaduku naka agogoŋukon.
9
Konapata isasedotinikon adolit;
Kikareoto lukalaunakakon kanuka aiyalama.
10Kanuka Daudi ekonibulesit,
Sirikibelok akonyen nuka lokinyonyoikitonokon akinyet.
11
Eyapoiki EJAKAIT Daudi kotoma abeit;
Mam ijulakini:
Ebe, “Kaur naka akuanakon esiboikini oicoloŋokon.
12Arai kerica ikonidwe aitutuketeka
Ka aitejenunetaka nuesisianakini kes,
Iboikinos do ikecedwe da oicoloŋokon ikar kere.”
13Naarai aseu EJAKAIT Sion;
Ekilakin aitaraun akeibois.
14Na ŋes aibois nakiyenisika ikar kere:
Nee ŋes neeboikin eoŋ; naarai ekilakin ŋes.
15Esirereŋi cut inyamatake:
Esimonikini lukicanike katap.
16
Etanapi isasedotinike aitajario:
Lukalaunakake da ikareete kanuka aiyalama.
17
Esilibuni kaŋina amumwarat naka Daudi:
Etemok atala kanuka lokinyonyoikitonoka akinyet.
18Etanapi lukasurupoke ileic:
Konye emwekimweki abokoke kamakeŋ,
133
1
Koany, ejok ca ma ido ibus
Iinacan aiboi nepepe kidicasi!
2
Esubit bala akinyet naka akais nuipu kakou,
Naelelei kiton ajulo nuka epenek,
Epenek loka Aaron;
Naelelei kiton adal naka inapeneke.
3
Bala akopyo nuka Kerumon,
Nueleleete koroŋan luka Sion:
Naarai ŋina ecorakin EJAKAIT arereŋ,
Ŋes aijar naka ikar kere,
134
1
Koany, kituroto EJAKAIT,
Yes ibulesin kere luka EJAKAIT,
Luibwoete kuare kotogo loka EJAKAIT.
2
Koriosi akusikanin mama ejai aiboisike nakalaunan,
Kituroto da yesi EJAKAIT.
3
Kisirereŋ EJAKAIT jo koSion;
Ŋes lokesubi akuj ka akwap.
135
1Kituroto yesi EJAKAIT!
Kituroto ekiror loka EJAKAIT;
Kituroto ŋes, yes ibulesin luka EJAKAIT;
2
Yes luibwoete kotogo loka EJAKAIT,
Kalaroi da nuka etogo loka Edekewok.
3Kituroto yesi EJAKAIT; naarai ejok EJAKAIT:
Koyooto aiturit ekekiror; naarai ibus.
4
Naarai aseu EJAKAIT Yakob kanukeŋ,
Isirael da araun abarake obe.
5Naarai ajeni ebe epo! EJAKAIT,
Itelekarit da EwokoJAKAIT idekesio kere.
6Nuetojokit EJAKAIT, ŋupeŋun eswama ŋesi,
Kotoma akuj, ka akwap, ka aŋololin, ka ataroi kere da.
7
Itupurionori ilisinai kosaŋeta luka akwap:
Ka eimina aupa kakiru;
Itukutuni ikwamin kaiŋadisiake.
8Loabu kodany ikiyaik luko Misiri,
Luka ituŋa ka luka itiaŋ da.
9Abu kijuk aanyuneta ka nukaumokin kidiŋikon, ijo Misiri, Mama ka Parao, ka ikebulesin kere.
10
Loabu kodany atekerin nuipu,
Koara da ikabakan lukagogoŋ:
11
Sikon ekabaka loka Imorain,
Ka Og ekabaka loka Basan,
Ka ajakanuto kere da nuka Kanaan:
12
Koinak akecekwap araun airumet,
Airumet naka Isirael iketuŋa.
13
Wu EJAKAIT, ejaenena ekonikiror ikar kere;
Wu EJAKAIT, ejaenena aiitunetekon anatar aturio kere.
14
Naarai etubokini EJAKAIT ikeruna,
Iituni da ikebulesin.
15
Aputosia nuka atekerin eraas epuesa ka esabu,
Aswam naka akanin nuka ituŋa.
16Ejaas kes aituke, konye mam ineras;
Ejaas akonye, konye mam esesenete;
17Ejaas aki, konye mam epupete;
Emamei da edioiyenane kaitukekec.
18Eputokinos lueswamaete kes kakes;
Eebo, ŋinidiopet yenemuno kes.
19Ijo ekek loka Isirael, kituroto EJAKAIT:
Ijo ekek loka Aaron, kituroto EJAKAIT:
20Ijo ekek loka Lebi, kituroto EJAKAIT:
Yes luiyoŋito EJAKAIT, kituroto EJAKAIT.
21Kituritete ETAKAIT koSion,
Loiboie ko Yerusalem.
Kituroto yesi EJAKAIT.
136
1
Kimalata ca EJAKAIT; naarai ejok ŋesi:
Naarai ejaenena akeitim ikar kere.
2
Kimalata ca Edeke loka idekesio:
Naarai ejaenena akeitim ikar kere.
3
Kimalata ca EJAKAIT loka ijaka:
Naarai ejaenena akeitim ikar kere.
4Ŋol loiswamai bon nukaumokin nukapolok:
Naarai ejaenena akeitim ikar kere.
5
Ŋol lokesubi akuj kacoake:
Naarai ejaenena akeitim ikar kere.
6
Ŋol loaterari akwap kokuju kakipi:
Naarai ejaenena akeitim ikar me.
7
Ŋol loasubi luecaete luepolokr.
Naarai ejaenena akeitim ikar kere.
8Akoloŋ ayait apaaran:
Naarai ejaenena akeitim ikar kere.
9Elap ka aacer ayait akuare:
Naarai ejaenena akeitim ikar kere.
10
Ŋol loabu kodany Misiri kotoma okiyaikike:
Naarai ejaenena akeitim ikar kere.
11
Kitolom Isirael kamakec:
Naarai ejaenena akeitim ikar kere.
12Kakan nakagogoŋ, kakan naerioro da:
Naarai ejaenena akeitim ikar kere.
13
Ŋol leabu kotiak Aŋolol Nakareŋan:
Naarai ejaenena akeitim ikar kere.
14Kosodi aitotor Isirael kidiŋike:
Naarai ejaenena akeitim ikar kere.
15Konye kocakak Parao ka ajoreke Aŋolol Nakareŋan:
Naarai ejaenena akeitim ikar kere.
16
Ŋol loeŋarenikinit ikeruna kamodiŋ:
Naarai ejaenena akeitim ikar kere.
17Ŋol loabu kodany ikabakan lukapolok:
Naarai ejaenena akeitim ikar kere.
18
Koara da ikabakan luajenas:
Naarai ejaenena akeitim ikar kere.
19
Sikon ekabaka loka Imorain:
Naarai ejaenena akeitim ikar kere.
20
Ka Og ekabaka loka Basan:
Naarai ejaenena akeitim ikar kere.
21
Koinak akwapukec araun airumet:
Naarai ejaenena akeitim ikar kere.
22Airumet naka Isirael ekebulesit:
Naarai ejaenena akeitim ikar kere.
23
Loabu kiitu oni kotoma aitisiliowok:
Naarai ejaenena akeitim ikar kere.
24Kilaku oni kama ejaas lukasurupowok:
Naarai ejaenena akeitim ikar kere.
25
Einakini ŋinikuan inyamat:
Naarai ejaenena akeitim ikar kere.
26Kimalata ca Edeke loka akuj:
Naarai ejaenena akeitim ikar kere.
137
Kipou keboikinos kwap kariri naka icorin luka Babulon, Eebo, kipou kamonyata akiyo kanen,
Nakiitunio Sion.
2Kipou kekajakisi akosideudeun
Okito lukanen.
3Naarai akotosi lukiŋatarito sio ikososio kamakosi,
Ŋul da lukimwanito sio akotosi aboliasio, kobalas ebe, “Koyeikinai sio ediopet kokososio luka Sion.”
4Kiyei isio biai ekosio loka EJAKAIT Kacekwap?
5Arai keemurwoki ijo, wu Yerusalem,
Kimurwoki da akakan nakoteten apirianutuke.
6
Kiminaikin do akaŋajep aŋiirit naka aitukuka,
Arai mam keitunit jo;
Arai mam etopoloorit Yerusalem
Adepar akaiyalama kere.
7
Wu EJAKAIT, kiitu aluikin idwe luka Edom,
Kanuka apaaran naka Yerusalem;
Luabalas ebe, “Kotiyaikisi, kotiyaikisi,
Kiton apetetaitike.”
8
Wu apese naka Babulon, kimudiario jo:
Iyalamikini ŋesi yenikiropi jo
Kwape kiswamakinia sio.
9Iyatamikini ŋesi, yenedakuni kosodi aideeakin
Ludidikikon atiiba.
138
1
Kemalai jo kekatau kere:
Ayei ammt jo kakonyen nuka idekesio.
2
Kamaenenei jo kaseseni eyekalukon lokalaunan,
Emalai da ekonikiror kanuka akonisianut-nakamin ka abeitekon:
Naarai itopoloo ijo akonikirot adepar ekonikiror kere.
3
Kapaaran nakewonetor ibu Koboŋok,
Kisinyikok eoŋ kagogoŋ kotauka.
4Wu EJAKAIT, kimalaete rwaru jo ikabakan kere luka akwap,
Naarai apuput akiro nuka aitukukon.
5Eebo, eyeete nuka irotin luka EJAKAIT;
Naarai epol aibuses naka EJAKAIT.
6
Naarai karaida kejai EJAKAIT kuju, irerei luitasonos;
Konye luiwoŋoko ejeni kama elwana.
7
Karaida ketorit kidiŋ ocan, kitajari eoŋ;
Iriori akonikan asurokin anyunyura naka lukasurupoka, Akonikan nakoteten ŋes ketajari eoŋ.
8
Itodoli EJAKAIT nukaŋ:
Wu EJAKAIT, ejaenena akoniitim ikar kere;
Sirikijal aswamisio nuka akonikanin.
139
1Wu EJAKAIT, ibu konie eoŋ, kojenu da.
2Ijeni aiboika ka anyounika da,
Ijeni akaomisoit eroko elwana.
3Iŋici ekasokot, ka aperoka da,
Ijeni da ikarotin kere.
4Naarai emamei akirot kaŋajepeka,
Konye koany, wu EJAKAIT, ijeni ŋes cut.
5Kiluk eoŋ kiŋaren kokau da,
Ido kidokok eoŋ akonikan.
6Aijen naikoni nen kekarunit;
Ikiara noi, mam apedori adolokin ŋes.
7Ai bo alosi anyoun komoyokon?
Ai bo da akereari anyoun kakonyenekon?
8Arai kadoka kuju, ijai ijo nen:
Arai kapesik akaperit toma Okatwak, koany, ijai Ijo nen da.
9Arai kaporo kabebenoka nuka tupuruc,
Kasodi aiboikin osaŋe cut loka aŋolol:
10Keŋarenikini akonikan ŋina da,
Ketiŋi akonikan nakoteten.
11Arai kener ebe, “Abeit karapiari amuton,
Aica da nakalukunit eraun akuare.”
12Mam amuton kinopikini jo,
Konye ecai akuare kwape kapaaran:
Eputos amuton ka aica kamakon.
13Naarai ibu ijo kosub ineretenyaka:
Ibu koburia eoŋ kakoik naka totoka.
14Kemalaenenei jo; naarai kasubunitai eoŋ kopone loeyoŋoŋ ka loeumokina da:
Nukaumokin akoniswamisio;
Ejeni ekatau ŋun jokan.
15Mam akasubunet ibwaa kamakon,
Nakasubere kaiyeiyea,
Nakeswamaere kapirianut katutubeta nukokwap nuka akwap.
16Apotu akonikonye koanyut eoŋ alidio,
Ewadikatai akatutubeta kere oitabokon,
Nukeswamaere ginipaaran,
Koroko ketakanuna adiokakesi.
17Wu Edeke, akoniwomisio eraas nuka akais nuipu kamakanl Epol ca ma etiaikec!
18Arai kemar kes, epol etiaikec adepar asiŋe:
Naakwenyunia, eriŋa ajai nepepe kajo.
19Wu Edeke, abeit iari ikaronok:
Aso konyoutu kaneajai yes ikaarak.
20Naarai inerasi nueroko asurokini jo,
Lukasurupokon da elimito ekonikiror atai.
21Wu EJAKAIT, mam kereka alait eoŋ kes lukilaito jo?
Mere asacit eoŋ ŋul lukinyoikinete jo?
22Alait kes kalait alopet:
Emarakinit kes araut lukasurupoka.
23Wu Edeke, koŋicai, kojen ekatau:
Kitemoi, kojen akaomisio:
24Koany arai ejai ediorot loerono tomakaŋ,
Ido kiŋarenik eoŋ korot lomam edaun.
140
1Wu EJAKAIT, koyuunai kama ejai ituŋanan yenikaronon; Kidarai kama ejai ituŋanan yenikadedeŋan:
2Luitetemonorete ameŋeranut kotauonokec;
Icebokinitos atukonokin nepepe ejie.
3
Epenata akeceŋajep bala emun;
Ejai aisorit naka emusaga kwap kaŋajepekec. Sela.
4Wu EJAKAIT, kidarai kakanin nuka ikaronok:
Kidarai da kama ejaas ituŋa lukadedeŋak:
Lualosikis aitapaar akakeje.
5
Ebwaata luituros eic lokalokitotor, ka aunoi;
Aterakis eboi ariri kerot;
Etemokis da atacin alokia eoŋ. Sela.
6
Abu katema EJAKAIT atiar,
Ijo ŋes Ekadeke:
Wu EJAKAIT, kitoik akit eporoto loka aiŋaiŋaka.
7
Wu Edeke EJAKAIT, agogoŋ naka aitajarioka,
Irapia akakou kapaaran naka ejie.
8
Wu EJAKAIT, sirikijaik yenikaronon nuipuda;
Sirikitodol ekebotet lokaronon;
Kinyeis aitopoloor bonik. Sela.
9
Konye akwes nuka ŋul kalukerimorito,
Korapia kes ameŋeranut nakanaiepakec.
10
Kotepakis kes atotol nuesaranete:
Kocakakinai kes akim;
Toma apanya nuidulok, tetere mam bobo enyounete.
11Mam iticasio kakwap yeninera nueroko:
Emejai aronis aibiror ituŋanan yenikadedeŋan.
12
Ajeni ebe itodoli EJAKAIT akiro nuka luereitai,
Ka abeit da naka luilwaritos.
13Abeit imalaete ikadolitok ekonikiror:
Iboikinos luitenara akonyenekon.
141
1EJAKAIT, kewonet jo; kiwonyuni mama ajai,
Kitoik akonikit eporotoka nakewoneo jo.
2
Kojaun ailipika bala lukisupurununo kakonyenekon;
Arionor da naka akaninika bala asubanit naka atiboŋ.
3Wu EJAKAIT, kidar akaituk;
Kidar ekek loka anaiepeka.
4
Sirikigonak ekatau obore kere yenerono;
Ailolitoi kaswamisio nuka aronis
Kituŋa Iuiswamaete numam adolit;
Sirikanyam lukajijimakakec.
5Kenomata do ikadolitok, eraun asianut;
Ketoron ŋesi eoŋ, eraun bala akinyet naebukokinio akou; Sirikener akakou ŋes:
Konye iyatanakin akailip kotoma aronisikec da.
6Acakar ikecekatubok ariri naka atiiba;
Epupunete da akakiro; naarai ejijim kesi.
7
Kwape ekorio ituŋanan kotiakatiakai alup,
Awokokojo da isiarakinos aituk naka ates.
8
Naarai kaseseni jo, wu Edeke EJAKAIT:
Kamunokini jo; sirikinyek ekatau esilikinit.
9Kidarai koic lokalokitotor,
Ka atacin da nuka ikeswamak numam adolit.
10
Kibirokinos do ikaronok oboyanakec,
Kakuj bo do eoŋ.
142
1
Amonyi kekaporoto mama ejai EJAKAIT;
Eŋaiŋai EJAKAIT kekaporoto.
2Adoriani kakonyeneke;
Etoduni ikacan.
3Naeiloror ekamoyo kotomaka,
Ibu kojen ekasokot.
Ebwaata kesi eic lokalokitotor korot loetorit.
4Kosesen akanika nakoteten, koany;
Naarai emamei ituŋanan yenikaieni:
Kakurwoki aiku; emamei ituŋanan yenepodo ekatau.
5
Wu EJAKAIT, abu kamony mama ijai;
Kabala ebe, Ijo neekeriaraka,
Airumeteka da kakwap naka ikajarak.
6
Kopupok akaimony;
Naarai ketisili noi.
Koyuunai kama ejaas lukemanito;
Naarai ketelekarito eoŋ kagogoŋ.
7
Kitolom ekatau kaidaris,
Tetere emalai ekonikiror:
Kerimorito ikadolitok;
Naarai kikonakini ijo eoŋ nuejok.
143
1Wu EJAKAIT, kiira akailip:
Kitoik akit akaiŋaiŋa:
Koboŋokinoi kamunonutukon kadolitekon da.
2
Sirikitubok ebulesitikon;
Naarai kakonyenekon emamei ikajaran yenitojokio.
3
Naarai emana lokasurup ekatau;
Enomo aijaraka alatakin kwap:
Kesiboiki aiboisio nuka amuton, kwape kaŋul kaluatwakata sek. 4
Kanuka ŋun eilor ekamoyo kotomakaŋ;
Asiliki etauka kotomakaŋ.
5
Eitu apaarasia nukolosek;
Aomoomoi aswamisiokon kere:
Enoosikin aomoom aswam naka akaninikon.
6
Ariori akakanin mama ijai:
Ejakit ekatau akur kanukon, kwape kakwap kanaeonit, Sela.
7Wu EJAKAIT, kisunyite ca bo aboŋokin eoŋ;
Eilor ekamoyo:
Sirikibwa akonikonye kamakaŋ;
Kenye aiput ŋul luelomarete Aipany.
8Kisiirarai akonisianut-nakamin tupuruc;
Naarai kamuno jo.
Kitejenunai erot loibusakinit eoŋ aitorenen:
Naarai etonyouni ekatau mama ijai.
9Wu EJAKAIT, koyuunai kaneejaas lukasurupoka:
Akeruni aiŋop mamakon.
10
Kisisianakinai aiswamaenen nuikoto ijo;
Naarai irai ijo Ekadeke;
Ejok emoyokon;
Kiŋarenikinoi toma akwap naka aitenara.
11Kitajarai, wu EJAKAIT, kanuka ekonikiror:
Kotoma adolitekon kitolom ekatau kotoma ocan.
12Ido kanuka akonisianut-nakamin komudia lukasurupoka, Kodanya kere luereito ekatau;
Naarai arai eoŋ ekonibulesit.
144
1
Kituritete EJAKAIT atiibaka,
Loisisianakini akakanin ejie,
Ikabokoro da anaŋ.
2Edeke ŋes akasianut-nakamin, ka abwasika,
Ekapir loeoja, ekayuunanika;
Ekabuku, ka ŋol loamuno eoŋ;
Loketononokikini ikatuŋa.
3
EJAKAIT, inyo bo ituŋanan, tape jo ijeni ŋes?
Arai bo okoku loka ituŋanan, tape jo iwomit nuke?
4Esubit ituŋanan bala aamameak:
Akepaarasia da bala etoribe loetubor.
5
Wu EJAKAIT, kitulur akonikuj, kijesun da:
Kotiro iroŋan, epuruunete.
6Koeaku eimilia, kisiarisiara kes;
Kijuku ikonimalia, kisiyaloŋoŋ kes.
7
Korio akonikan kokuju;
Kolakunai, koyuunai kakipi nukepuak,
Kakan naka imo:
8Luineras akeceituk aamameak,
Akecekan da nakoteten erai akan nakoteten naka aiŋalanut.
9
Wu Edeke, kayeikini jo ekosio lokitetet:
Ayei aiturit jo kadeudeu naka aputio atomon.
10Ŋes ŋol loitajari ikabakan:
Loeyuuni Daudi ekebulesit kokileŋ kaloekwana.
11Kolakunai, koyuunai da kakan naka imo,
Luineras akeceituk aamameak,
Akecekan da nakoteten erai akan nakoteten naka aiŋalanut.
12Naesubiata odwewok bala iraan luepolok koiditeukec; Adwewok da bala amoru nuka agor nuigirio kwape nukore lokapolon;
13Nailelebunotor idulaawok, kojaas inyamat toma luegelegela; Naeuriata awokomerekekin ilukumin ka ilukumin itomon koronyiawok;
14
Naibwokiata iwokomoŋin luipu;
Naemameunor acilun, arai acilar,
Komamei da elulu korotiniwok;
15
Iyalamas ituŋa luikote nen:
Eebo, iyalamas ituŋa, luerai EJAKAIT Ekecedeke.
145
1Ketopoloori jo Ekadeke, wu Ekabaka;
Eturenenei ekonikiror ikar kere.
2Keturenenei jo ŋinipaaran;
Eturenenei ekonikiror ikar kere.
3Epol EJAKAIT, loibusakinit aiturio;
Mam akepolou emounio.
4Aturi adiopet ituri aswamisiokon mama ejai aturi ace,
Elimori da akoniswamisio nukapedor.
5Nuka aibuses naepol naka apoloukon,
Ka akoniswamisio nukaumokin, kes aomoomoi.
6Itatamete ituŋa apedor naka aswamisiokon nuketasuro; Alimori eoŋ da apoloukon.
7Iŋerete aiitunet naka ajokisikon naepol,
Eyeete da nuka adolitekon.
8
Esiana EJAKAIT, ileleba aision;
Iyapi anyunyurikin, ido loka aitim naepol.
9
Ejok EJAKAIT kama kakere;
Aitimesiake nuejok ejaas mama kaswamisioke kere.
10
Kimalaete jo akoniswamisio kere, wu EJAKAIT;
Kiturete jo lukalaunakakon.
11Iŋerete nuka aibuses naka ajakanutukon,
Itatamete da akonipedor;
12Aitejenun odwe luka ituŋa aswamisioke nukapedor,
Aibuses da naka apolou naka akejakanut.
13Akonijakanut erai ajakanut namam enaŋi,
Ejaenena da ayaitekon anatar aturio kere.
14Igaŋi EJAKAIT luibiroros kere,
Itonyouni da ŋul kere luekukumito.
15Kidarito jo akonye nuka kere,
Iinakini kes ikecenyamat kedol apak.
16Ipukori akonikan,
Isimonikini da eimiel loka ŋinibore kere yenikajaran.
17Edolit EJAKAIT korotinike kere,
Esiana da kaswamisioke kere.
18
Eapie EJAKAIT kama ejaas luiwoneete ŋes kere,
Kama kaŋul kere luiwoneete ŋes kabeit.
19
Itodoli eimiel loka ŋul kalueyonito ŋes;
Epupuni da aimonyokec, itajari kes.
20
Idari EJAKAIT ŋul kere lueminasi ŋes;
Konye emudiari ikaronok kere.
21Ineri akaituk aiturit EJAKAIT;
Kitur ŋinikuan kere ekekiror lokalaunan ikar ka ikar.
146
1Kituroto yesi EJAKAIT!
Kiturite EJAKAIT, wu ekatau.
2Eturi EJAKAIT aroko abusi:
Ayei aiturit EJAKAIT aroko ajari.
3
Sirikimunokin ikapolok,
Karaida okoku loka ituŋanan, loemamei aiŋarakin.
4
Elosi eiyeŋaneke, eboŋori alupoke;
Eoliorete aomisioke apaaran ŋipeŋin.
5
Iyalama ŋin yenerai Edeke loka Yakob ekenarakinanike, Yenemuno EJAKAIT Ekedeke:
6
Lokesubi akui ka akwap,
Aŋolol, ka luejaas tomakec kere;
Loidari abeit ikar kere:
7Loitodoli etube kanuka luemwaŋitai;
Loitanyami lueriebi eteŋei inyamat.
Elacakini EJAKAIT lueenitai;
8Itwekenyuni EJAKAIT akonye nuka imudukiok;
Itonyouni EJAKAIT luekukumito;
Emina EJAKAIT luedolito;
9Idari EJAKAIT imo;
Igaŋi ikokiok ka apuserun;
Konye ebuburiari erot loka ikaronok.
10Irumi EJAKAIT ikar kere,
Edekekon, wu Sion, anatar aturio kere,
Kituroto yesi EJAKAIT!
147
1Kituroto yesi EJAKAIT!
Naarai ejok ayoore aiturit Edekewok;
Naarai ejok, ibus aiturit.
2
Eduki EJAKAIT Yerusalem;
Etukonokini luaponi kireŋeai koIsirael.
3
Itaŋaleuni ŋesi luejaas itauon luebilil,
Eeni da amusuŋunukec.
4
Imari ŋesi etiai loka aacer;
Emaanakini kes kere ikecekiroria.
5
Epol EwokoJAKAIT, egogoŋ kapedor
Aijeneke mam imarun.
6
Igaŋit EJAKAIT luitasonos,
Ecakakini ikaronok kwap.
7
Koyeikisi EJAKAIT kaimal;
Koyeikisi aiturit Edekewok kadeudeu:
8
Loerapakini akuj kidouon,
Itemokini akwap akiru,
Isibwaŋuni inya koroŋan.
9
Einakini itiaŋ ikecenyamat,
Ikuruka da ludidik luemonyete.
10
Mam isiyalamikinit agogoŋ naka ebalasit;
Kwabo mam itojokit akeje nuka ituŋanan.
11Itojokit EJAKAIT ŋul lueyoŋito ŋes,
Ŋul luemunos akeitim.
12Ijo Yerusalem, kiturite EJAKAIT,
Ijo Sion, kiturite Edekekon.
13Naarai etogogoŋ atiketa nuka iruteikon;
Esireren idwekon kotomakon.
14Eyauni ainapakin oikorunokon;
Kisimonikini jo apokoi nuka akima.
15
Ijukuni aicorakineteke toma akwap;
Etirono akekirot.
16Ekori ŋesi akako kwape kajujo nuka amerekek;
Ebwasi akopyo nuidoudouto kanuka aaterot kwape kekurwon.
17Ecakanari akekipi nuerurwakito kwape kararasia;
Iŋai bo epedor abwoikin aaterotoke?
18Ijukuni akirotoke, ecalari kes,
Itukusi ikwaminike, elelearete akip.
19
Itodikinit Yakob akekirot,
Ka Isirael da ikisilake ka itubesiake.
20
Mam iswamakinit adioceteker kwaŋin;
Mam ejenunito itubesiake,
Kituroto yesi EJAKAIT!
148
1 Kituroto yesi EJAKAIT! Kituroto yesi EJAKAIT kokuju: Kituroto ŋes kaneicelelei.
2 Kituroto ŋes, yes ikemalaikan kere: Kituroto ŋes, yes akejore kere.
3 Kituroto ŋes, ijo akoloŋ ka elap: Kituroto ŋes, yes aacer kere nuicaete.
4 Kituroto ŋes, yes akuj naka akuj, Ka yes da akipi nuejaas kuju kakuj.
5 Kituroto ŋul ekiror loka EJAKAIT: Naarai abu kicorak, kosubunai.
6 Eticat da kes ikar kere: Esilaki ekisil lomam edaun.
7 Kituroto EJAKAIT kakwap, Yes akinyana, yes da ataroi kere:
8 Akim ka akako, akiru ka ilisinai; Ekwam loeiliili, itodolete akekirot.
9 Iroŋan ka iukon kere; Ikito lueraete noi ka iresia kere:
10 Itiaŋ ka ibaren kere; Iboro lueliatos ka akweny nueporitos.
11 Ikabakan luka akwap ka ituŋa kere; Ikapolok ka ikatubok kere luka akwap:
12 Isap ka apesur; Imakio ka idwe da.
13 Kituroto ŋul ekiror loka EJAKAIT; Naarai ekekiror bon itopolooritai: Akeibuses edeparit akwap ka akuj da.
14 Ekeu ŋesi amumwarat naka iketuŋa, Aiturit naka lukalaunakake kere; Kes idwe luka Isirael, ituŋa luidunyas kaŋes. Kituroto yesi EJAKAIT.
149
1 Kituroto yesi EJAKAIT! Koyeikisi EJAKAIT ekosio lokireter, Aiturioke da katukor naka lukalaunak.
2 Kiyalamikin Isirael kanuka ŋol lokolo kesubi ŋes: Kolakaros idwe luka Sion kanuka ekabakakec.
3 Kituroto kesi ekekiror kikosiete: Koyeikis aiturit ŋes, kisiman ka adeudeu.
4 Naarai iyalamikinit EJAKAIT iketuŋa: Itubusi luitasonos kaitajar.
5 Kitopoloosi lukalaunak ŋes kaibuses: Koyeenenete kaiyalama kaperitokec.
6 Kojaun aiturit naikiara naka Edeke oporotoikec, Ka ekileŋ da loekwaka iwairin iarei akaninikec;
7 Aitodol enyaŋit katekerin, Ka aiticaneta kotuŋa;
8 Ajen ikabakanakec kirikoi, Ka ikapolokokec kaeneta nuka asua.
9 Aitodolikin kes etube loiwadikatai. Ejai lukalaunakake kere aibuses ŋin.
Kituroto yesi EJAKAIT!
150
1 Kituroto yesi EJAKAIT! Kituroto Edeke kotoma aiboisike nakalaunan: Kituroto ŋes kotoma apak naka agogoŋuke.
2 Kituroto ŋes kanuka aswamisioke nukagogoŋ: Kituroro ŋes kwape ejaar apolouke kaibuses.
3 Kituroto ŋes keporoto loka arupepe: Kituroto ŋes kisabulin ka adeudeu.
4 Kituroto ŋes kisiman ka ekosio: Kituroto ŋes kiraman luka aputio ka alamaru.
5 Kituroto ŋes kaisinin nueruosi noi: Kituroto ŋes kaisinin nueruosi bala iciirin.
6 Ŋinibore kere yenejai eiyeŋane kiturit EJAKAIT. Kituroto yesi EJAKAIT!
|