https://www.bible.com/bible/436/php.1.ate61
Ipilipin
1
1
Paul ka Timoteo, ibulesin luka Kristo Yesu, Mama ejaas lukalaunak kere lukotoma Kristo Yesu luejaas Pilipi, nepepe kikaanyanarak ka ikejaanakinak;
2
Asianut kojai mama ijaas ka ainapakin nuepote kama ejai Edeke Papawok ka Ejakait Yesu Kristo.
3
Emalaenenei Ekadeke nakeitununoo yes, 4nakelipanakinia yes kere tir, eŋaiŋaenenei kaiyalama, 5kanuka eidicanekus aisilosikin Akiro Nukajokak ameun kapaaran nasodit kiton kwana. 6
Eoŋ da etogogoŋit ebe ŋol loabu kogeu aswam naejok kotomakus, itodoli kiton apaaran naka Yesu Kristo, 7kwape eraar naedolit eoŋ aomit ŋin kanukus kere, naarai ijaas yesi otauka, naarai iraas yesi kere luidicakina keoŋ kotoma asianut, kotoma aenioka, ka aiyar kaitogogoŋ da Akiro Nukajokak. 8
Naarai erai Edeke ekajenanika, kwape kemuitor yes kere kotoma otau loka Kristo Yesu. 9Na da ŋes ailipasitika ebe, kiyatanakin akusimin ailapanar kotoma aijen ka amisiikin kere, 10
tetere icamunete nuejok, iraunos luliogot, komamei aitoronet kiton apaaran naka Kristo, 11
kilelebi araito nuka adolit nuepote kama ejai Yesu Kristo kanuka aibuses ka aitopoloorio naka Edeke.
12
Konye iinacan, akoto yes ajenun ebe nukadoikinete apotu kisilosikis Akiro Nukajokak, 13
kiton akaenio atakanun ebe ejai kotoma Kristo, kokidiŋ oserikalei kere, ka ice da kere; 14luipu da luka iinacan agogonoros kotoma Ejakait kanuka aenioka, etitiŋikinete aitelekarit einer akirot naka Edeke komam ekuriaka.
15Elimonokinete ice Kristo kanuka ekokote ka epeget, konye ice ketau kaloejok, 16Elimonokinete lu kanuka amin, kojenete kwape kebwaikinere ne kanuka aiyar naka Akiro Nukajokak, 17konye kwi elimonokinete Kristo kanuka aŋolopa, mere kotoma abeit, koomito aitican eoŋ kotoma aenioka. 18
Aso anyoika bo? Dimarai kotoma oponesio kere, arai kotoma ojose, arai kotoma abeit, elimonokinio Kristo; ido alelakinit ŋin.
19
Eebo, alelakini do. Naarai ajeni ebe kainunete eoŋ ŋun aitajario kanuka ainainakus ka ainakinio naka Emoyo loka Yesu Kristo, 20
kwape emielar noi kamuno da ebe mam kerumete ileic kakirot kere, dimarai katitiŋ kere, kwana, kwape kapaarasia kere, kitopolooroi Kristo kotoma akuanaka, arai kotoma aijar, arai bo kotoma atwanare. 21
Naarai kamakaŋ aijar ŋes Kristo, atwanare da erai ameda. 22
Konye arai aijar toma akuan ŋes araito naka aswam kamakaŋ, aso mam ajeni nuaseuni. 23
Karidakinito akiro ŋun aarei, emiela alosit ajaut ka Kristo, naarai ŋes ejok aitelekarit. 24Konye asalit toma akuan ibusakinit aitelekarit kanukus, 25Ido naarai etogogoŋit kwaŋin, ajeni ebe asali, ido asalenenei nepepe kayes kere, tetere iyatanakinos yesi kaiyalama kotoma aiyuun, 26tetere ilapar akusiwolobobot kanukaŋ kotoma Kristo Yesu, kanuka ajaun kayes bobo.
27
Konye ejautenekus korai loibusakinit Akiro Nukajokak nuka Kristo, tetere arai abuni aanyun yes, arai bo amamei, apupuni nukus ebe icasitos kotoma omoyo ediopet, iutas nepepe, ketau ediopet kanuka aiyuun naka Akiro Nukajokak, 28kwabo mam ikuriaka lukasurupokus kotoma akirot kere. Kowaikec ŋes aanyunet naka aolior, konye kowaikus ŋes aanyunet naka aitajario, naebuni kama ejai Edeke. 29Naarai kiinakinitai yes, kanuka Kristo, mere bon aiyuun ŋes, dimarai aisiriebio da kanukeŋ, 30
kojaas kauta kaŋin nakianyunete kotomakaŋ, ido naipupete kwana ejai tomakaŋ.
2
1Aso arai ejai aitalakar kotoma Kristo, arai aiyamakina naka amin, arai eidicane loka Emoyo, arai aisioni ka aitim, 2kitodolete akaiyalama, tetere iwomitos adiopekirot, ijaas kamin adiopet, luka emoyo ediopet, iwomitos nepepe. 3
Sirikiswamata akirot kere kanuka aŋolopa, karaida eitur atai, dimarai kaitasono ŋinituŋanan kitopoloorite aupake, itia ŋes ilopet. 4
Kinyek ŋinituŋanan asesen nuke bon, konye nuka luce da. 5Koomitos yesi kotomakus, kwape aomitor Kristo Yesu, 6
lokejai einono loka Edeke, komam imarakina arianakin ka Edeke araun ibore yenimariauna, 7
konye kitisilikin, koyaŋaa einono loka ebulesit, kouriai toma aput naka etuŋanan. 8
Abu kotakan ejaas kasubunet bala naka etuŋanan, kitasonikin, korima kiton atwanare, atwanare da naka emusalaba. 9
Ŋes etopolooria noi Edeke ŋes, koinak ŋes ekiror ŋol loitelekarit ikiroria kere, 10
tetere ekukonokini ŋinikuŋ ekiror loka Yesu, nuka akuj, ka nuka akwap, ka nukokwap kakwap da; 11ido kolimonori ŋiniŋajep ebe Yesu Kristo ŋes Ejakait, kitopolooritete Edeke Papa.
12
Aso, luminanaka, kwape ipotu korimanariata apaarasia kere, mere naajaar eoŋ bon, konye aitelekarit noi kwana naamamea eoŋ, kitodolenenete aitajariokus, kayoŋite ka amaran da, 13
naarai Edeke ŋes iswamai kotomakus, ainakin yes akot ka aswam da nuitojokit ŋesi. 14
Kiswamaenenete kere komamei aŋurian ka epeget, 15
tetere iraas idwe luka Edeke luemamei aitoronet, luiyapaara, luemamei akemer kokidiŋ katur kanamagul, ka naepaarit, naitakaniata bala aica kotoma akwapin, 16
itodiarete akirot naka aijar, kasodi aolobob kapaaran naka Kristo, ebe mam abu kaker atai, karaida aitaaritoi atai. 17
Konye karaida kaabukokinio asubanit ka aijaanakin naka aiyuunikus, eyalama, ido eyalama nepepe kayes kere. 18
Kiyalamas yesi da kwaŋin, kiyalamikinos da nepepe keoŋ.
19Konye amuno kotoma Ejakait Yesu aijukakin yes atipet Timoteo, kasodi atitiŋior kadau ajenun akirokus. 20
Naarai emamei eoŋ icetuŋanan yeneriakasi kaŋes, loepodo noi ejautenekus. 21
Naarai ŋul kere emootos nukec bonik, kwabo mere nuka Yesu Kristo. 22Konye ijenete akeiturio, ebe kwape ikoku kapapake abu kijaanakini Akiro Nukajokak nepepe keoŋ, 23Aso amuno aijukun ŋes atipet kadau ber aanyun nukadoikinete; 24
konye amuno kotoma Ejakait ebe eoŋ da abuni atipet.
25
Konye abu kaomit ebe kebusakinit aijukakin yes Epapurodito onaceka, loiswamai ka ejie da nepepe keoŋ, konye ŋes ekiyakiakus, ekejaanakinan da loka eipudika. 26Naarai abu kimuite yes kere, kokadakinite noi, naarai ipotu kiirasi ebe edek. 27Naarai abu kodekakin noi nepetai atwanare, Konye abu Edeke kitim ŋes, kwabo mere ŋes bon, konye eoŋ da, kinyek aiturur aiyatakin toma aitururuka. 28Ŋes akokakinia noi aijukun ŋes, tetere naianyuniata ŋes bobo, kiyalamikinos, eoŋ da iŋoŋar akaiturur. 29
Aso kisukunyikisi ŋes kotoma Ejakait, kaiyalama kere; ido kitubusikis luikote kwaka ŋol, 30naarai aapiarit nepetai atwanare kanuka aswam naka Kristo, abu koluŋak akeijar tetere itodolikini nuemameete kotoma aijaanakinikus kamakaŋ.
3
1
Nuesalito, ikainacan, kiyalamas kotoma Ejakait. Mam ketapasi eoŋ aiwadikakin yes ŋupeŋun, konye kiticasete yes.
2
Kocoito iŋokwo, kocoito ikeswamak nueroko, kocoito luegeras. 3
Naarai kirai oni luka akepio nakabeit, lukimai kOmoyo loka Edeke, lukiwolobobot kotoma Kristo Yesu, ido lumam kimunokina akuan. 4
Karaida kapedori eoŋ amunokina akuan. Arai eomit etuŋanan ece kere amunokina akuan eoŋ etelekarit: 5
aponi kakepi kapaaran nakikanyetekauni, loka ajena naka Isirael, loka ateker naka Benyamin, Eburaniat obe loka Iburanian; kakiro nuka ikisila, Eparisayot, 6
kakiro nuka adunyanut, kareite ekanisa, kakiro nuka adolit naejai toma okisila, mam abu kajai kaitoronet. 7
Konye kere nukeraas ameda kamakaŋ, abu kaomit atwaniar kanuka Kristo. 8Konye abu kaomite cut iboro kere araut atwaniar kanuka ajokis naepol noi naka ajenun Kristo Yesu Ejakaitika, Abu katwania iboro kere kanukeŋ, kaomite da araut acin, tetere adumuni Kristo, 9
kasodi adumunio kotomakeŋ, komamei adoliteka, naebuni kotoma okisila, dimarai ŋin naebuni kanuka aiyuun Kristo, adolit naebuni kama ejai Edeke kotoma aiyuun, 10
tetere ajenuni ŋes, ka apedor naka ajarunike, ka aimor kaŋes arieboke, ketuputoritere katwanareke, 11
tetere arai apedori, adolokini ajarun nakokatwak.
12
Mere ebe adau adumun karaida aitodolikinio; konye ebwapit tetere ekamuni, naarai kekamunit Kristo Yesu eoŋ. 13Iinacan, mam aomit ebe adau aikamun, konye eswamai adiopekirot, kemurwokinete nukokau, kewopei nuejaas kiŋaren, 14
ebwapit adolore neepegare, neejai ainakinet naka anyarit nakokuju naka Edeke toma Kristo Yesu. 15
Aso oni kere lukipoloor, kaomitos ŋun; ido arai iwomitos yesi nuegelara, kipukokini da Edeke yes ŋin. 16
Konye ca nukidoloki, kalosenenete kaŋun.
17
Iinacan, koputorito eoŋ nepepe, ido kosesenete ŋul luelosete kwape ejaar yes aanyunet kamakosi. 18
Naarai elosete luipu, luabu kalimonok yes irwan ipu, kwana da kalimokini kamonyi, ebe kes lukasurupo luka emusalaba loka Kristo. 19
Esaŋekec ŋes amudiar, edekekec ŋes akoik, aibusesukec da ejai toma oleic, eomitos nuka akwap. 20
Naarai obuwok ejai toma akuj, ŋina da kidareo Eketajaran, Ejakait Yesu Kristo, 21
loilocokini awatewok nuesilok, aputoor akekuan nakaibuses, kwape ejaar aswam naka akepedor aitononokikin iboro kere kwapukeŋ.
4
1
Aso iinacanaka luminan, lukemuit da, akaiyalama ka akaboko da, kobwaata kwaŋin kicasito kotoma Ejakait, luminan, 2Eŋaiŋait Euodia, eŋaiŋait da Suntuke, kojaas kaomit adiopet, kotoma Ejakait. 3
Eebo, kelipit jo da, ekiŋariŋaret ajookot lokabeit, kiŋarak aŋor ŋun, nuetaaritos nenipe keoŋ toma Akiro Nukajokak, ka Kelement da, ka ikeswamak ice da lukaupaka, luejaas ikiroriakec toma oitabo loka aijar.
4
Kiyalamas kotoma Ejakait apaarasia kere; abala bobo ebe kiyalamas. 5
Kojenun akusiiyapaara kotuŋa kere. Eapie Ejakait. 6
Siriyaloŋoŋoete akirot kere, konye kotoma akiro kere toma ailip ka aiŋaiŋa nepepe kaimal, kitejenut Edeke nuikotosi. 7
Ainapakin da naka Edeke naedeparit ajenun kere, kidarenenei itauonokus ka aomisiokus kotoma Kristo Yesu.
8
Nuesalito iinacan, nueraas nukabeit kere, nuibusakinito kere, nuedolito kere, nukalaunak kere, nutemela kere, nuisupete kere, arai ejai ajokis kere, ido arai ejai aiturit, koomoomoete ŋun. 9
Akiro da nuipotu kisisiata kamakaŋ, kodumutu da, kopuputu da, koanyutu da kamakaŋ, kiswamaenenete ŋun; ejaenena da Edeke loka ainapakin kayes.
10Konye eyalama noi kotoma Ejakait, naarai kwana atubor apak ekwarutu da akusiwomisio kanukaŋ, kwabo ipotu koomitos ŋun konye kemamei yes apak. 11
Mere ebe enera kanuka eipud; naarai abu kesisia adauna kwape ajaar kere. 12
Ajeni aitisilio, ajeni da alitoro; kaŋinikirot, ido kotoma akiro kere, ketuutooritai aiyeiyea naka aimonikin ka ariebo eteŋei da, alitoro ka aiŋonara da. 13
Apedorit kere kotoma kaŋol kaloketogogoni.
14Konye ipotu kiswamata ejok naimorikikinotor kaiticaniokaŋ. 15
Ijenete yesi da Ipilipin ebe, kotoma ageunet naka Akiro Nukajokak, naanyounio koMakedonia, amamei ekanisa loemorikikina keoŋ kotoma akirot naka aikor ka aijaun, dimarai yes bonik, 16
naarai koSesalonika da ipotu kijukakis eoŋ irwan atipet ka nakiareit kanuka eipudika. 17
Mere naarai amoot ainakinet, konye amoot araito nuiyatanakinos otiaikus. 18
Konye ajai kiboro kere, alitoro da; etekoro, kadau aijaun lukijukunete kama ka Epapurodito, aures naeuru maa, asubanit naecamunitai naitojokit Edeke. 19Ekadeke da itekori luipudasi kere kwape ejaar akebar kotoma aibuses toma Kristo Yesu. 20Kojai aibuses mama ejai Edeke Papawok ikar ka ikar. Amen.
21Kiyogaete ŋinikalaunan kere kotoma Kristo Yesu. Kiyogaete yes iinacan luejaas keoŋ. 22
Kiyogaete yes lukalaunak kere, aitelekarit ŋul lukokal loka Kaisar.
23Asianut naka Ejakait Yesu Kristo kojai kimoyonokus.
|