Matayo11 Eitabo loka aturio nuka Yesu Kristo, okoku loka Daudi, okoku loka Aburaam. 2 Aburaam kouri Isaak, Isaak kouri Yakob, Yakob kouri Yuda ka ikeinacan; 3 Yuda kouri Peres ka Sera kama ka Tamar; Peres kouri Kesuron; Kesuron kouri Ram; 4Ram kouri Aminadab; Aminadab kouri Nason; Nason kouri Salumon; 5 Salumon kouri Boas kama ka Rakab; Boas kouri Obed kama ka Rusi; Obed da kouri Yese; 6 Yese kouri Daudi ekabaka. Daudi kouri Solomon kama kaŋin nakerai aberu naka Uria; 7 Solomon kouri Rekoboam; Rekoboam kouri Abiya; Abiya kouri Asa; 8Asa kouri Yekosapat; Yekosapat kouri Yoram; Yoram kouri Usia; 9Usia kouri Yotam; Yotam kouri Akas; Akas kouri Kesekia; 10Kesekia kouri Manase; Manase kouri Amon; Amon kouri Yosia; 11 Yosia kouri Yekonia ka ikeinacan, apak naka aijoreorio Babulon. 12 Kokau kaijoreorio Babulon abu Yekonia kouri Sealutiel; Sealutiel kouri Serubabel; 13Serubabel kouri Abiud; Abiud kouri Eliakim; Eliakim kouri Asor; 14Asor kouri Sadok; Sadok kouri Akim; Akim kouri Eliud; 15Eliud kouri Eleasar; Eleasar kouri Matan; Matan kouri Yakob; 16 Yakob kouri Yosep ekile loka Mariam, naauriei Yesu loenyaritai Kristo. 17Kwaŋin aturio kere ameun ka Aburaam kiton Daudi emwaasi aturio atomon ka nuoŋon, ameun ka Daudi da kiton aijoreorio Babulon aturio atomon ka nuoŋon, ameun da kaijoreorio Babulon kiton Kristo aturio atomon ka nuoŋon. 18 Aurio naka Yesu Kristo ekoni ne. Kedau Yosep aisiner Mariam totoke, koriŋa ejenakina, kotakan ŋesi ejai akoik naka Emoyo Lokalaunan. 19Konye ekileke Yosep kineru ainyein ŋes kaiyeiyea naarai korai ekiliokit loedolit, komam ekoto aisurum ŋes ileic. 20 Konye nakeomoomaa ŋun, koany, kitakanikin ŋes emalaika loka Ejakait kotoma airujasit, ebala ebe, “Yosep, okoku loka Daudi, sirikiyoŋ aimany Mariam; naarai akepotuun erai naka Emoyo Lokalaunan. 21 Idouni ŋesi ikoku yenisapat, imaikini ekekiror Yesu, naarai ŋes itajari iketuŋa kadiakanaretakec.” 22 Iswamatai nu kere, tetere edoli akirot naenerit Ejakait kama ka enabi ebe: 23 “Koany, epotuuni abekot, idouni ikoku yenisapat, Emaikinete ekekiror Imanuel” (apolouke ebe, Edeke ejai kaoni). 24Nakenyounio Yosep kajoo, kiswama kwape kicorakinia emalaika loka Ejakait, komany akeberu; 25 mam abu kojen ŋes aitodol naauria ikoku yenisapat; komaik ekekiror Yesu.21 Nakeurii Yesu koBetelekem loka Yudaya kapaarasia nuka Kerode ekabaka, koany, kodolut lukacoa lukepote kokide Yerusalem, 2 kobalas ebe, “Ai bo ejai ŋol lokeurio Ekabaka loka Iyudayan? Naarai kipou kaanyutu aaceritike kokide, ido kiponit isio aima ŋes.” 3Nakepupunio Kerode ekabaka ŋun, kiyaloŋoŋ, ka luko Yerusalem da kere nepepe kaŋes. 4Kotukonok isasedotin lupeti ka ikewadikak luka ituŋa kere, kiŋitana kes netieurikinitai Kristo. 5 Kolimokis ŋes ebe, “Toma Betelekem loka Yudaya, naarai iwadikat enabi kwaŋin ebe, 6 ‘Ka jo da Betelekem, akwap naka Yuda, Mam irai loidite kokapolok luka Yuda; Naarai kotomakon elomuni ekayaiton, Loicokiei ikatuŋa Isirael.’ ” 7Kosodi konyarau Kerode lukacoa kaiyeiyea, kinyikok aiŋitiŋit kes apak nakitaanyikinor aacerit. 8Kijuka kes Betelekem, kotema atiar, “Koloto, komoata ikoku kainyikokin; kidaut aanyun ŋes, kitejenut eoŋ akiro, tetere eoŋ da alosi aima ŋes.” 9Nakedauniata apupun akiro nuka ekabaka, koloto; ido koany, kiŋarenik kes aacerit ya nakeanyunete kokide, aitodol neabwoia kaibois kanaajai ikoku, 10Nakeanyuniata aacerit kiyalamikinos aiyalama naepol noi. 11 Kolomasi togo, koanyut ikoku ka Mariam totoke; kibiroros komaata ŋes; kosodete kopukosi ikeceboro lukakais, kijaikis ŋes ainakineta, esabu ka lukisupurununo ka luesaete. 12Kosodi kikwenya kes Edeke kairujasit ebe sirikeboŋosi mama ejai Kerode, koboŋosi obukec kecerot. 13 Nakedauniata kesi aekar, kitakanikin emalaika loka Ejakait Yosep kotoma airujasit, kobala ebe, “Konyou, koyaŋa ikoku ka totoke, kokeria Misiri, kiboie kaŋina aitodol nekalimokinia: naarai ekot Kerode amoun ikoku amudiar.” 14Konyou ŋesi, koyaŋa ikoku ka totoke kuare, koloto Misiri; 15 kiboi kaŋina aitodol neatwania Kerode; tetere edoli akirot nakinerit Ejakait kama ka enabi ebe, “Abu kanyarau okokuka koMisiri.” 16Kosodi nakeanyunia Kerode ebe amodata lukacoa, konyunyurikin noi, kiyakia ituŋa aiar idwe kere lusap lukejaas Betelekem, koidunyetake da kere, lukeraas luka ikar iarei ka lumam edolito ŋul, kwape ejaar apak kaya nakinyikokinia aiŋitun kama ejaas lukacoa. 17 Kosodi kitodolikin akirot nakinerit enabi Yeremia ebe, 18 “Aponi kiirarai eporoto koRama, Aibworo ka akuudian naepol, Ibworo Rakel ikedwe, Komam ecamunit aitalakario, naarai emameete.” 19Konye ketwana Kerode, koany, kitakanikin emalaika loka Ejakait Yosep kairujasit koMisiri, 20 kobala ebe, “Konyou koyaŋa ikoku ka totoke, kolot akwap naka Isirael: naarai atwakata luemootos aijar naka ikoku.” 21Konyou ŋesi, koyaŋa ikoku ka totoke, kodol akwap naka Isirael. 22Konye nakepupunio ebe erum Arekelao Yudaya aibois naka Kerode papake, kokurianar alosit ŋina; kosodi kikwenya Edeke ŋes kairujasit, kolot akwap nako Galilaya. 23 Kolot kiboikin ore loenyaritai Nasaret: tetere itodolikinio akirot naenerito inabin ebe, “Enyarao Enasarayot.”31 Kapaarasia kaŋun kobu Yokana Ekebatisan, elimonokini kamodiŋ naka Yudaya, 2 ebala ebe, “Kitoronikinos; naarai aapu ajakanut naka akuj.” 3 Naarai ŋol ŋes lokinerai kama ka Isaia enabi ebe, “Eporoto loka loiworoi kamodiŋ ebe, Kitemonokisi erot loka Ejakait, Kitetenata ikesokono.” 4 Konapenenei Yokana ŋol egoe loka ajul nuka ekaala, ka amunyo kaŋabetekeŋ; ikenyamat da keraas emaase ka esik loka ais. 5Kosodete kolomasi mama ejai lukoYerusalem ka luko Yudaya kere, ka lukakwapin kere nuidunyas Yorodan; 6kibatisa ŋesi kes kocor Yorodan, kolimonorete akecediakanareta. 7 Konye nakeanyunia ŋesi epote Iparisayon ka Isadukayon luipu aibatisao, kolimok kes ebe, “Yes aur naka imusagan, iŋai bo kiikwenyari yes akerit anyunyura naebunit? 8Aso koraata araito nuibusakinito aitoronikin: 9 kwabo siriwomito kotauonokus ebe, ‘Ejai oni Aburaam papaawok’: naarai kalimokini yes ebe epedori Edeke aitonyoikin Aburaam idwe kotoma amoru kanu. 10 Nati kwape kwana da ibwaikinitai aep atoromin nuka ikito: aso ŋolikitoi lomam erai araito nuejok ejepario, ka acakakin akim. 11 “Abeit eoŋ ebatisai kakip kanuka aitoronikin: konye loebuni atupakin eoŋ ketelekarit eoŋ agogoŋ, mam kebusakinit akodit akemuk; kibatisai ŋol yes kEmoyo Lokalaunan, ka akim. 12 Ejai ekeritei akanike, epiari cut ekepejal; etukonokini akimake odula, konye icwei agugu kakim namam itudeŋio.” 13 Kosodi konyou Yesu koGalilaya, kobu Yorodan mama ajai Yokana aibatisao. 14Konye kokoto Yokana aitikokin, ebala ebe, “Epuda jo aibatis eoŋ, ijo da ibuni mamakaŋ?” 15Konye Koboŋok Yesu, kolimok ŋes ebe, “Kocam do kwana; naarai kwaŋin ibusakinitor oni aitodol adolit kere.” Kosodi kocam. 16Nakedaunia Yesu aibatisao, atipet kodoku kakipi: ido koany, kopukokin akuj, koany Emoyo loka Edeke ijesun kwape ajele, ebuni mamakeŋ; 17 ido koany, kobu eporoto kokuju ebe, “Lo ŋes Okokuka lominat, loalelia eoŋ noi.”41 Kosodi Emoyo kitodoka Yesu amodiŋ tetere Satan ecoduni ŋes. 2 Koluŋ apaarasia akaisaoŋon apaaran ka akuare, kosodi konyet korieb eteŋei. 3 Kobu ekacodan, kotema ŋes atiar, “Arai tope irai ijo Okoku loka Edeke, kicorak amor nu koraunos atap.” 4 Konye Koboŋok ebe, “Iwadikatai ebe, Mam ituŋanan ejari kanuka atap bon, nabarai kanuka ŋinikirot naelomuni kaituk naka Edeke.” 5 Kosodi Satan ayaŋaar ŋes ore lokalaunan; kisibwo koswi loka eyekalu, 6 kolimok ebe, “Arai tope irai ijo Okoku loka Edeke, kosomari kwap: naarai iwadikatai ebe, Einakini ikemalaikan aidar jo, Kidakete jo kakaninikec, Kinyek amoru aiguikin akonikeju.” 7 Kotema Yesu atiar, “Iwadikatai bobo ebe, Sirikodununei Ejakait Ekonideke.” 8Koyaŋa bobo Satan ŋes oroŋat loicelelei noi, kitodianak ajakanuto kere nuka akwap, ka aibusesukec; 9kotema ŋes atiar, “Kainakini ŋun kere, arai kibiror aima eoŋ.” 10 Kosodi kotema Yesu atiar, “Irwa, Satan; naarai iwadikatai ebe, Komaenenei Ejakait Ekonideke, Kijaanakinenei ŋes bon.” 11 Kosodi kinye Satan ŋes; ido koany, kopotu imalaikan kijaanakis ŋes. 12 Nakepupunio ŋes ebe ekamar Yokana, kolot Galilaya; 13 konyou koNasaret, kobu kiboikin Kaparanaum, loidunyas aŋolol, koikorun luka Sebulun ka Naputali, 14 tetere itodolikinio akirot naenerit Isaia enabi ebe, 15“Akwap naka Sebulun, ka akwap naka Naputali, Abear aŋolol, kokekwa Yorodan, Galilaya naka Imo. 16Ituŋa lueboiete kamuton, Aanyut aica naepol, ŋul da lueboiete kakwap ka etoribe loka atwanare, Eliyaiki aica.” 17 Agear kapak kaŋin kogeu Yesu alimonokin, ebala ebe, “Kitoronikinos; naarai aapu ajakanut naka akuj.” 18 Nakitoritor ariri kaŋolol naka Galilaya, koany iinacan iarei, Simon loenyaritai Petero, ka Anderea onaceke, ecakakinete eboi aŋolol; naarai keraas ikalokak. 19 Kotema kes atiar, “Kotupunai, eoŋ da ketaraun yes ikalokak ituŋa.” 20 Atipet kinyeis iboyanakec, kotupasi ŋes. 21Kikunyak kiŋaren koany iinacan ice iarei, Yakob okoku loka Sebedayo, ka Yokana onaceke, lukejaas ataker nepepe ka Sebedayo papakec, erucete iboyanakec; konyarau kes. 22Atipet kinyeis ataker ka papakec, kotupasi ŋes. 23 Kimanimani Yesu Galilaya kere, kisisianakini kotoma atukosiakec, kolimonokini da akiro nukajokak nuka ajakanut, kitaŋaleununei ŋinidek, ka akalanyanut kere kotoma otuŋa. 24 Kikaikin ekeemut Suria kere: koinunai ituŋa kere lukedekas, lukikamunito iponesio luegelegela luka adekesia, ka ariebo, lukajokina, ka lukipumu, ka lukasenyak da; kitaŋaleu kes. 25 Kotupasi ŋes ikodeta luipu lukepote koGalilaya ka Dekapoli, ka Yerusalem, ka Yudaya, ka okekwa Yorodan da.51 Kosodi nakeanyunia ikodeta, kodoka oroŋat: kiboikin, kopotu ikekesisiak mamakeŋ. 2Kooŋ akeituk, kisisianak kes, kobala ebe: 3 “Isirereŋitoi lukican komoyo; naarai ajakanut naka akuj erai nakec. 4 “Isirereŋitoi luitururuete: naarai italakario. 5 “Isirereŋitoi luitasonos: naarai irumete akwapin. 6 “Isirereŋitoi lueriebi eteŋei ka luejakit akur kanuka adolit: naarai isimonikinio. 7 “Isirereŋitoi luketimok: naarai itimio. 8 “Isirereŋitoi luesegara itauon: naarai eanyunete Edeke. 9 “Isirereŋitoi ikesinapikinak: naarai enyarao idwe luka Edeke. 10 “Isirereŋitoi luimanitai kanuka adolit: naarai ajakanut naka akuj erai nakec. 11 “Isirereŋitoi yes nakimuaritotor, nakimanitotor, ka einer nukaronok nuipu nuka aiŋal asurokin yes, kanukaŋ. 12 Kiyalamikinos, kolakaros noi: naarai epol ekusiropit kotoma akuj: naarai kimana kolo kwaŋin inabin lukigeikinete yes. 13 “Iraas yesi abalaŋ naka akwap; konye arai kepianiar abalaŋ, itemokinio kinyo? Mam bobo ejai ajokis, dimarai ebukorio kiŋa kicakacakata ituŋa. 14 “Iraas yesi aica naka akwap. Mam epedori ere aibwaio arai ejai kuju moru. 15 Ido mam ituŋa inokokinete atala, ka abuburikin ebukit, dimarai ikajakinete ocoget, ecaikini kere luejaas togo. 16 Kwaŋin kocau akusiica kakonyen nuka ituŋa, tetere eanyunete akusiswamisio nuejokuka, kitopoloosi Papakus loejai toma akuj. 17 “Siriwomito ebe abunit amudiar ikisila karaida inabin: mam abunit amudiar, dimarai aitodolikin. 18 Naarai abeit katemari yes atiar, Aitodol naedaunotor akuj ka akwap, mam cut edaun inyukuta idiopet, karaida aitakinet adiopet naka ikisila, aitodol neitodolikinere kere. 19 Aso ituŋanan kere yenepaluni aicorakinet adiopet kotoma kaŋun kanueraas nudidik, ka aisisianakin ituŋa kwaŋin, enyarao yenididi cut kotoma ajakanut naka akuj: konye ŋin kere yeniswamai ka aisisianakin kes, enyarao ŋin ikapolon kotoma ajakanut naka akuj. 20Naarai katemari yes atiar, arai mam akusidolit itelekarit adolit naka ikewadikak ka Iparisayon, mam cut ilomunete toma ajakanut naka akuj. 21 “Ipotu kiirasi kelimokinitai ituŋa lukolo sek ebe, Siriari; ido ituŋanan yeneari ibusakinit atubokinio. 22 Konye eoŋ katemari yes atiar, Ŋinituŋanan yenenyunyurikini onaceke ibusakinit atubokinio; ka ŋin da yenemoromoroi onaceke ibusakinit airabis; ŋin da yenetemari atiar, Ibaŋaanal Ibusakinit eupa loidopit. 23 Aso arai iyauni ainakinetekon otem, kosodi kiitu kanen ebe ejaas onacekon akiro kajo, 24kinyek ainakinetekon kotem, kolot ber; kopuco konacekon, kosodi konyet aboŋun ainakin ainakinetekon. 25 Kocamanaros atipet kalokiwosat jo, apak naijaatatar kaŋes orot; kinyek je lokiwosat ayaŋaar jo mama ejai ekatubon, ekatubon da ayaŋaar jo mama ejai eserikalet, ijo da kiremokinio aidaris. 26Abeit katemari jo atiar, Mam cut inyouni kanen, aitodol neitacia ikapu yenikawasia. 27 “Ipotu kiirasi kelimokinitai ebe, Siridote. 28 Konye eoŋ katemari yes atiar, Ŋolituŋanan loeseseni aberu kaiŋobel, etielo ŋes kotauke. 29 Arai kiduporit akonikoŋu nakoteten, kogoru, kocaka: naarai ibus koolio idiopet katutubetakon, kinye akonikuan kere acakario toma oupa. 30 Arai kiduporit akonikan nakoteten, kojepa, kocaka; naarai ibus koolio idiopet katutubetakon, kinye akonikuan kere alosit toma oupa. 31 “Kelimokinitai da ebe, ŋolituŋanan loireŋeari akeberu, koinak ŋin ebalua loka aitwar: 32 konye eoŋ katemari yes atiar, ŋolituŋanan loireŋeari akeberu, dimarai kanuka adotear, esidotea ŋin: ŋol da loemanyi ya naereŋearitai, adotear. 33 “Bobo da, ipotu kiirasi kelimokinitai ituŋa lukolo sek ebe, Siriyapoi nukaiŋal, konye kitodolik Ejakait akoniiyaposio. 34 Konye eoŋ katemari yes atiar, Siriyapoi cut; karaida alimit akuj, naarai erai eicoloŋ loka Edeke; 35 karaida alimit akwap, naarai erai iicoloŋ yenika akejeke; karaida alimit Yerusalem, naarai erai ere loka Ekabaka lokapolon. 36Kwabo siriyapoi alimit akonikou, naarai mam ipedori aituluor ekonitimat ediopet araun Ioekwaŋ arai loiriono. 37 Konye nuineras koraas Eebo, eebo, arai Mam, mam: naarai nuedeparito ŋun epote kama ejai lokaronon. 38 “Ipotu kiirasi kelimokinitai ebe, Akoŋu itia akoŋu, ekelai da itia ekelai. 39 “Konye eoŋ katemari yes atiar, Sirikinyaŋa yenikaronon: konye ŋinituŋanan yenikibapi eitinyokon lokoteten, kibelok lokokediany da. 40 Ka ituŋanan yenekot awoosan jo, ayaŋaar ekasokon, kinyeinia ŋes ekooti da. 41Ŋin da yenikitiŋaikini alosit amairo adiopet, kolot ka ŋes amairon aarei. 42Yenikilipi, koinak, ka yenekot ayuunio kamakon sirikiboŋok epur. 43 “Ipotu kiirasi kelimokinitai ebe, Komina eidunyetekon, kola lokasurupikon. 44 Konye eoŋ katemari yes atiar, Kominasi lukasurupokus, kilipanakinete da lukimanito; 45 tetere iraunete idwe luka Papakus loejai toma akuj; naarai itacaikini ŋesi akekoloŋ lukaronok ka lukajokak da, isitepikini akiru luedolito ka lumam edolito da. 46Naarai arai iminasi lukiminas yes, idumunete eropit enyoin? Mam kereka iketelemak esolo iswamaete nuikote nen? 47Arai da iyogaete iinacanakus bon, iswamaete nunyoika adepar ice? Mam kereka Imo iswamaete nuikote nen? 48 Aso iraunete yesi luidolito, kwape edolitor Papakus lokotoma akuj.61 “Kocoito kinyeis aswam nukadolitekus kakonyen nuka ituŋa, tetere eanyunete kesi: naarai arai kiswamata nuikote nen, mam idumunete eropit kama ejai Papakus loejai toma akuj. 2“Aso naikoria ainakineta nukaitim, sirikituru arupepe kakonyenekon, kwape iswamaata lukesoswai kotoma atukosia, korotin da, tetere itopoloorete ituŋa. Abeit katemari yes atiar, Adaut adumun eropitikec. 3 Konye jo naikoria ainakineta nukaitim, kinyek akonikan nakokediany ajenun nuiswamai nakoteten; 4korau akoniikor nakaiyeiyea; Papakon da loeseseni kaiyeiyea kiropi jo. 5 “Nailipiata da, siriraas kwapelukesoswai; naarai eminasi ailip kobwoete katukosia ka asisiarin da nuka irotin, tetere etakanete kotuŋa. Abeit katemari yes atiar, Adaut adumun eropitikec. 6 Konye jo nailipenenaa, kolomanari toma agolakon, kidau agolokin ekonikek, kilip Papakon lokaiyeiyea, Papakon da loeseseni kaiyeiyea kiropi jo. 7 “Ido nailipiata sirinyogonyogoete akiro atai, kwape ka Imo; naarai eomitos ebe iirario kanuka akirokec nuipu. 8 Aso sirikiputokinos kaŋul: naarai ejeni Papakus nuipudasi yesi, eriŋa kilipa. 9 Aso kilipenenete yesi kwanata: Papakosi loejai toma akuj, Ekonikiror kitalaunai. 10 Akonijakanut kobu. Nuikoto kiswamai kakwapin Kwape iswamaere kotoma akuj. 11Koinakinai sio lolo ikosinyamat luka lolo. 12 Kisionioi sio akosipesenin, Kwape kisionio isio lukapeseninikosi. 13 Sirikiya sio toma acodunio, Konye koyuunai kama ejai lokaronon. [Naarai ajakanut, ka apedor, ka apolou, eraas nukon, ikar kere, Amen.] 14 Naarai arai isioniete yesi luce akeceibucanareta, Papakus da lokotoma akuj kisionie yes. 15Konye arai mam yes isioniete luce akeceibucanareta, Papakus da mam kisionie yes akusiibucanareta. 16 “Bobo da nailuŋiata, siriraas kwape lukesoswai luinyorididos ireeta; naarai emunaunete ireetakec, tetere etakanete kotuŋa ebe eluŋete. Abeit katemari yes atiar, Adaut adumun eropitikec. 17Konye jo, nailuŋia, kinyonyoenenei akinyet akoukon, kilosi da akonikonyen, 18tetere mam itakanuni kotuŋa ebe iluŋi, dimarai Papakon lokaiyeiyea: Papakon da loeseseni kaiyeiyea, kiropi jo. 19 “Siriŋadanakinete kanukus abar akwapin, neemunaariata ikajekel ka amasikin da, ido neebokiata ikokolak ka akokwaar. 20 Konye kiŋadanakinete kanukus abar akuj, nemam emunaariata ikajekel ka amasikin, ido nemam ebokiata ikokolak ka akokwaar da. 21Naarai nepejai akonibar, nepenen ejaikin ekonitau da. 22 “Atala naka akuan ŋes akoŋu: aso arai eteni akonikoŋu, akonikuan kere ecauni. 23 Konye arai erono akonikoŋu, akonikuan kere emutono. Aso arai emutono aica naejai kotomakon, epol ca ma amuton ŋin! 24 Emamei ituŋanan yenepedori aijaanakin ijaka iarei; naarai arai elai ediopet, komina loce; arai bo iketakin kediopet, emeni loce. Mam ipedorete aijaanakin Edeke ka aijaanakin abar da. 25 “Aso do katemari yes atiar, Siriyaloŋoŋoete kanuka akusiijar, Iuinyamete ka luimasete; karaida kanuka akusiwat, luinapete. Mam kereka aijar itelekarit inyamen, ka akuan da anapito? 26 Kosesenata akweny nuka apak, mam eyeete, karaida aidweny, karaida atukonokin Emono; konye itanyami kes Papakus lokotoma akuj. Mam kereka yes itelekaritos ŋun ketiai? 27Iŋai bo kayesi kiyaloŋoŋ epedori aiyatakin akeibut? 28Kanukinyo iyaloŋoŋooto kanuka anapito? Koomito aapecelun nuka ais, kwape epolooto; mam itaaritos, ido mam eojiete: 29 konye katemari yes atiar, Ka Solomon da kotoma aibusesuke kere mam esiritoi kojokan kwape adiopet kaŋun. 30Aso arai itanapi Edeke kwaŋin inya luka ais, luejaas lolo, ecakario moi oupa, mam kereka itelekari aitanap yes, okwe yes luedit aiyuun? 31Aso sirikiyaloŋoŋoto kobalas ebe, ‘Kinyami inyo?’ Arai ‘Kimasi inyo?’ Arai, ‘Kinapi inyo?’ 32 Naarai emoete Imo ŋun kere; kwabo ejeni Papakus lokotoma akuj ebe ipudas ŋun kere. 33 Konye komoata ber yesi akejakanut, ka akedolit da; ido kiyatakinio ŋun kere. 34 “Aso sirikiyaloŋoŋoto nuka moi: naarai iyaloŋoŋi moi kanukeŋ. Edaunit apaaran aronisike.71 “Siritubonokinete, yes da kinyeis atubokinio. 2 Naarai etube loitubete, ŋopeŋol kitubokinere; ka aitemis naitemioto, ŋipeŋin kitemere yes da, 3Aso kanukinyo isesenia igugut yenejai akoŋu naka onacekon, komam ipodo akitoi naejai akoŋukon kilopet? 4Arai ilimokini biai onacekon ebe, ‘Kinyek kalem igugut yenejai akoŋukon’; ido koany, ejai akitoi akoŋukon kilopet? 5Yenikesoswai ijo, kolem ber akitoi naejai akoŋukon kilopet; kosodi konyet asesen kotenan alemun igugut kakoŋu naka onacekon. 6 “Sirikiinakis iŋokwo ibore yenikalaunan, ido sirikicakakis akusilulun kakonyen nuka ipegei, kinyeis aicakacak kakejekec, ka aibelokin agwaragwar yes. 7 “Kilipa, kiinakinio; komoata, idumunete; kikuŋukuŋoto, kiŋaikinio. 8Naarai ŋin yenilipi ijaikinio; yenemoi edumuni; ka yenikuŋukuŋi da enaikinio. 9Arai iŋai kereka kayesi, kilip ikokuke emugati, einakini tope amoru? 10Arai kilip agar, einakini tope ŋes emun? 11 Aso arai yes lukaronok ijenete ainakin ikusidwe ainakineta nuejok, mam kereka itelekarit noi Papakus loejai toma akuj ainakin ŋul Iuilipete ŋes iboro luejok? 12 Aso nuikotosi ituŋa aikonakin yes, kikonakis yesi da kes kwape kwaŋin: naarai ŋun kes ikisila ka inabin da. 13 “Kolomasi aitor orute loedidiŋ; naarai elal erut, ipajajai da erot, loebei amudiario, luelomarete da kotomake eraas luipu. 14 Edidiŋ erut, eridid da erot loebei aijar, luedumunete da eraas luikidioko. 15 “Kocoito inabin lukeŋalak, lukiponikinete enapito inapen luka amerekekin, konye kotoma eraas ipeen luededeŋ. 16 Ijenunete kes kakeceraito. Edeŋete kereka ituŋa imusabibun kokito luka ikukwa, arai bo itinin kokodokodo? 17 Kwape kwaŋin ŋolikitoi loejok erai araito nuejok; konye do ekitoi loerono erai araito nueroko. 18Mam epedori ekitoi loejok aira araito nueroko, karaida ekitoi loerono aira araito nuejok. 19 Ŋolikitoi lomam erai araito nuejok ejepario, kocakakinai akim. 20 Kanuka ŋun ijenunete kes kakeceraito. 21 “Ŋinituŋanan yenikabala eoŋ ebe, ‘Ejakait, Ejakait,’ mere ŋes elomuni ajakanut naka akuj; dimarai yeniswamai nuekoto Papaka loejai toma akuj. 22 Katemarete luipu kapaaran kaŋin atiar, ‘Ejakait, Ejakait, mam kereka kipou kadwarata kokirorikon, kokirorikon da kereŋeasi ajokin, kokirorikon da keswamata aswamisio nukapedor nuipu?’ 23 Kasodi alimor mamakec ebe, ‘Mam lem kajeni yes nepecep da: konyoutu kama ajai, yes lukeswamak nukepali.’ 24 “Aso ŋin yeniirari akakiro nu kiswama kes, ituputoorio ketuŋanan lokacoa, lokeduki eketogo atiida: 25kotep akiru, kolelek akalele, kokuta ikwamin, koleata etogo ŋol; mam ibiroro: naarai kepesikinitai atiida. 26Ŋin da yeniirari akakiro nu, komam iswamai, ituputoorio ketuŋanan lobaŋ, lokeduki eketogo asiŋe: 27 kotep akiru, kolelek akalele, kokuta ikwamin, koleata etogo ŋol; kibiror; akeibiror da korau naepol.” 28 Kosodi kanen, kedau Yesu akiro ŋun, koumokis atukon jokan akeisisianakin. 29 Naarai kisisianakini kwape etuŋanan loejai apedor, kwabo mere kwape ikewadikakakec.81 Kedoku Yesu koroŋat, kotuput ikodeta luipu. 2Ido koany, kobu etuŋanan lokatapon mama ejai, koma ŋes, kobala ebe, “Ejakait, arai ikoto, ipedori aiswagar eoŋ.” 3Korio Yesu akekan, kotiro ŋes, kotema atiar, “Akoto; kiswagar.” Atipet kiswagar aketapon. 4 Kolimok Yesu ŋes ebe, “Kocoite, sirikilimok idiotuŋanan; konye kolot, kitodiar mama ejai esasedoti, koinak ainakinet nakolo kicorakini Musa, araun aitejenunet kamakec.” 5 Kosodi nakelomaria Kaparanaum, kobu ekapolokiton erioŋet mamakeŋ, kiŋaiŋa, 6kotema atiar, “Ejakait, eperi ekatelepat kotogo edeka eseny, erieba noi jokan.” 7Kotema ŋes atiar, “Abuni aitaŋaleun.” 8Koboŋok ekapolokiton kobala ebe, “Ejakait, mam eoŋ kebusakinit jo alomun kwap kekaswi; konye kolim akirot bon, eŋaleuni ekatelepat. 9Naarai eoŋ da arai etuŋanan lokayaitai, ejaas iserikalei luayait eoŋ: ido alimokini ediopet ebe, ‘Kolot,’ elosi; ece da ebe, ‘Bia,’ ebuni; ekabulesit da ebe, ‘Kiswama na,’ ido iswamai.” 10 Nakiiraria Yesu ŋun, koumok, kotema kwi luketupito atiar, “Abeit katemari yes atiar, Mam lem adumunit aiyuun naepol naetia na, karaida toma Isirael kere. 11 Katemari yes atiar, Epote rwaru luipu anyoun kokide koto da, kiboikinos kesi nepepe ka Aburaam, ka Isaak, ka Yakob, toma ajakanut naka akuj. 12 Konye idwe luka ajakanut ecakario toma amuton nakokiŋa: ejaun kaŋina aimony ka airiamanakin ikel.” 13 Kotema Yesu ekapolokiton atiar, “Kolot, kwape ejaar akoniiyuun, kojau kwape kwaŋin.” Koŋaleu etelepat kosawa kaŋol. 14 Nakelomaria Yesu togo loka Petero, koany amuranike eperi edeka ekamidi. 15Kotiro akekan, koŋaleu ekamidi; konyou kijaanak ŋes. 16Nakitiboŋ, koinunai lukajokin luipu: kireŋea ajokin kakekirot, kitaŋaleu lukadekak kere. 17 Tetere itololikinio akirot naenerit Isaia enabi ebe, “Kolema ŋesi elopet awokokalanyanut, kibwok adekesiawok.” 18 Kosodi keanyu Yesu atukon nuipu irimorito ŋes, kicorak aikwaŋar juwai. 19 Kobu ekewadikan ediopet mama ejai, kotema ŋes atiar, “Ekesisianakinan, katupenenei jo kama ilosi kere.” 20 Kotema Yesu ŋes atiar, “Ejaas ikuwei apanya, akweny da nuka apak ejaas akaisikec; konye Okoku loka etuŋanan emamei nama iperikini akekou.” 21 Kotema ece kokesisiak ŋes atiar, “Ejakait, kisiikinai ber kalot keda papaka.” 22 Konye kotema Yesu ŋes atiar, “Kotupunai; kinye lukatwak kidaata lukatwakakec.” 23 Nakedokaria ataker, kotupasi ikekesisiak. 24Ido koany, kodakun ekwam loepol kaŋolol, korapasi akailan ataker: konye kejotoi ŋesi. 25Koloto ikekesisiak mama ejai kitwekenyut, kobalas ebe, “Ejakait, kitajarai; kimudiar.” 26 Kotema kes atiar, “Kanukinyo ikuriakarotor, yes luedit aiyuun?” Kosodi konyou, kiretak ikwamin ka aŋolol; kojaun aiyamakin cut, 27Koumokis ituŋa, kobalas ebe, “Ikoni bo ai etuŋanan lo? Naarai ikwamin ka aŋolol da erimasi ŋes.” 28 Nakedolio ŋesi okekwa juwai toma akwap naka Igadarenin, kiriamunos kituŋa iarei lukajokin, lukepote katesin, lukededeŋ noi, komamei ituŋanan yenikepedori aitor korot kaŋol. 29 Ido koany, kiworoto, kobalas ebe, “Ijo Okoku loka Edeke, anyoika ijo kasio? Ibu kereka ijo aitican sio eroko apakikosi kedolo?” 30Ido kojai esipan loka ipegei luipu edakasi kama elwana. 31Kiŋaiŋaata ajokin ŋes kobalas ebe, “Arai kiireŋea sio, kijukarai kalomasi osipan je loka ipegei.” 32Kotema kes atiar, “Kolototo.” Kolomutu kolomasi toma opegei; ido koany, komotar esipan kere nejululuei kibirokinos aŋolol, kotwakikis akipi. 33Kokerata ikecokok, kolomasi ore, kolimonokis akiro kere, ka nukedoikinete kwi lukajokin. 34Ido koany, kolomut lukore kere airiamun ka Yesu: nakeanyut, kiŋaiŋaata ŋes anyoun koikorunokec.91 Kodoka Yesu ataker, kikwaŋar, kodol ore lokobukec. 2Ido koany, koinut ŋes etuŋanan lokasenyan, eperi koitada: nakeanyunia Yesu akeceiyuun, kotema lokasenyan atiar, “Okoku, kotitiŋior; esionii akonidiakanareta.” 3 Ido koany, kotemasi ice kokewadikak kotauonokec atiar, “Einyanakini lo Edeke.” 4 Konye kojen Yesu aomisio nukotauonokec, kotema atiar, “Kanukinyo iwomitotor nukaronok kotauonokus? 5Ani bo naepatana, atemar atiar, Esionii akonidiakanareta, arai bo atemar ebe, Konyou, kolot? 6Konye tetere ijenunete ebe ejai Okoku loka etuŋanan apedor kakwap aisioni adiakanareta” kosodi kotema ŋesi lokasenyan atiar, “Konyou, kibwok ekoniitada, kolot orekon.” 7Konyou ŋesi, kolot oreke. 8Konye nakeanyuniata ikodeta, kokuriakaros, kitopoloosi Edeke, lokeinakini ituŋa apedor naikoni na. 9 Nakitoritor Yesu kanen, koany etuŋanan iboie kaitelemis esolo, ekekiror Matayo; kotema ŋes atiar, “Kotupunai.” Konyou, kotupa ŋes. 10 Kosodi kanen, nakiboikin togo ainyam, koany, kopotu luketelemak esolo ka ikadiakanarak luipu kiboikinos nepepe ka Yesu ka ikekesisiak. 11Nakeanyuniata Iparisayon, kotemasi ikekesisiak atiar, “Kanukinyo emoriata Ekusikesisianakinan ka iketelemak esolo ka ikadiakanarak da?” 12Konye nakepupunio Yesu, kotema atiar, “Lukaŋaleok mam ipudasi emurwon, dimarai lukadekak. 13 Konye koloto yesi kisisiata apolou naka akiro nu ebe, ‘Akoto aitim, kwabo mere asuban.’ Naarai mam abunit anyarit ikadolitok, dimarai ikadiakanarak.” 14 Kosodete kopotu ikesisiak luka Yokana mama ejai, kobalas ebe, “Kanukinyo kilunia isio ka Iparisayon, konye ikonikesisiak mam eluŋete?” 15 Kotema Yesu kes atiar, “Epedorete kereka luenyaritai oiterane aibworo, naeiaarar ka eteran? Konye eponito apaarasia nuedemarere eteran, eluŋete do. 16 Emamei ituŋanan yenedonyokini acana naka egoe lokitetet toma ananito namojoŋ; naarai acana naibwaikinio ecili anapito, iyatakini do acilat. 17Kwabo mam ituŋa ibwaikinete ebino lokitetet toma oriagin lumojoŋ luka emukule; arai kibwaikis, enedasi iriagin, ebukor ebino, emunaaros iriagin; dimarai ibwaikinete ituŋa ebino lokitetet oriagin lukitetiak, tetere ikuniaete kere.” 18 Napelimokini ikesisiak luka Yokana ŋun, koany, kobu ekayaiton, kokukokin kotema atiar, “Adaun akokuka kwape kwana; konye bia ma kidokok ŋes akonikan, ejari do.” 19Konyou Yesu kotupa ŋes, nepepe kikekesisiak. 20Ido koany, kobu aberu kokauke, nakedeka alel naka aokot ikar itomon ka luarei, kotiro atwele naka anapitoke; 21 naarai kotema kotauke atiar, “Arai katiro anapitoke bon, aŋaleuni.” 22Kibelokin Yesu, koany ŋes, kotema atiar, “Kotitiŋior akokuka; kitaŋaleu jo akoniiyuun.” Koŋaleu aberu ameun kosawa kaŋol, 23Nakedolio Yesu ore loka ekayairon, koany luekusere alamarun, ka ekodet eborianete, 24 kotema atiar, “Kolomasi kiŋa; naarai mam etwanit ipese konye ejotoi.” Kokienatar ŋes. 25Konye kedau aitolomar ekodet, kooma toma, kitiŋ akan naka ipese, konyou ŋin. 26Kilosikinos akiro ŋun akwap ŋin kere; 27Nakitorio Yesu kanen, kotupasi imudukiok iarei, kiworoto kotemasi atiar, “Okoku loka Daudi, kitimoi sio.” 28Keloma ŋes itogo, kopotu imudukiok mama ejai; kotema kes Yesu atiar, “Iyuunitos ebe apedori eoŋ aswam na?” Kotemasi atiar, “Eebo, Ejakait.” 29 Kosodi kotiro akonyenekec kobala ebe, “Kwape ejaar akusiiyuun kiswamakin yes kwaŋin.” 30 Kokwenyutu akecekonyen. Kicoro Yesu kes noi ebe, “Kocoito, kinyek imodiotuŋanan ajenun.” 31Konye konyoutu kesi, kisiarakis ekeemut akwap ŋin kere. 32Napenyounete kwi, koany, koinunai ebaŋ loajai ajokit. 33Kireŋear ajokit kiner lobaŋ; koumokis ikodeta, kobalas ebe, “Mam lem etakanunitos nuikote nen kotoma Isirael.” 34 Konye kobalas Iparisayon ebe, “Ireŋeari ŋesi ajokin kanuka lokapolon loka ajokin.” 35 Kimaniman Yesu ireria kere, kokialon da, isisianakini katukosiakec ka alimonokin Akiro Nukajokak nuka ajakanut, ka aitaŋaleunun ŋolipone kere loka adek ka akalanyanut da. 36 Keanyu ikodeta, kitim kes, naarai kilworuna ka aisiarakina, bala amerekekin nuemamei ekecokon. 37 Kosodi kotema ikekesisiak atiar, “Ipu idwenyan, konye ikidioko ikeswamak; 38aso kilipa Ejakait loka aidweny kijuk ikeswamak toma aidwenyeke.”101 Konyarau ikekesisiak itomon ka luarei, koinak kes apedor mama ejaas imoyon lueroko, aireŋear kes, ka aitaŋaleun ŋolipone kere loka adek ka akalanyanut da. 2 Ikiroria luka ikiyakia itomon ka luarei kes luta: losodit, Simon, loenyaritai Petero, ka Anderea onaceke; Yakob okoku loka Sebedayo, ka Yokana onaceke; 3Pilip ka Batolomayo; Tomas ka Matayo eketeleman esolo; Yakob okoku loka Alipayo, ka Tadayo; 4Simon Ekananayot, ka Yuda Isikariot, lokebilakini ŋes ebotet. 5Kijuka Yesu ŋul itomon ka luarei, kicorak kes ebe, “Sirikilomasi orotin luka lukacekwapin, sirikilomasi da ediore kere loka Isamarian, 6 konye gwai koloto mama ejaas amerekekin nueoliorito nuka ekek loka Isirael. 7 Nailosioto kolimonokis ebe, ‘Aapu ajakanut naka akuj’. 8 Kitaŋaleununete lukadekak, kitajarununete lukatwak, kiswaganarete lukatapon, kireŋeanarete ajokin, Kiinakinitai atitai, yes da koinakis atitai. 9Sirikiyaŋaasi koriaginikus esabu, karaida epuesa, karaida aikomon, 10 karaida ecoe loka alosit, karaida ikootin iarei, karaida amuk, karaida ebela; naarai ibusakinit ekeswaman ikenyamat. 11Ido ŋolire arai ekialo loilomanarete, komoenenete yenibusakinit kanen, kosalenenete mamake aitodol neinyounioto. 12 Nailomariata togo, kiyogaete. 13Arai ibusakinit etogo, kodol ainapakinikus tomake; konye arai mam ibusakinit, koboŋu do ainapakinikus mamakus. 14 Arai mam kisukunyikinio karaida akiirar akirokus, nailomuniata kotogo kaŋol, arai kore kaŋol, kilakilakete adae nuka akejenekus. 15 Abeit, katemari yes atiar, Epatanikini rwaru akwap naka Sodom ka Gomora atitiŋikin kapaaran naka etube aitelekarit ere ŋol. 16 “Koany, keyakiari yes kwape amerekekin kokidiŋ opeen; aso kopiriaka bala imunwo, ido kiyapaara bala ajeleik. 17 Konye kocoito ituŋa; naarai kiyaŋaarete aurianeta, kidaete da kotoma atukosiakec. 18 Kiriarete akonyen nuka ikayaitok ka ikabakan kanukaŋ, araut ikajenak kamakec, kama kalukacekwapin da. 19 Konye nakiyaŋanariata, sirikiyaloŋoŋoto epone loineratar karaida nuinerasi; naarai kiinakinio kapak kaŋin nuinerasi; 20 naarai mere yes inerasi, dimarai Emoyo loka Papakus loinera kotomakus. 21 Onace einakini onaceke aario, papa da ikokuke, enyoikinete idwe lukauriakakec aicutar; 22 kiŋarunete yes ituŋa kere kanuka ekakiror. Konye yenetitiŋikini kiton awasia ŋes itajario. 23 Nakireiata yes kore ediopet, kokerata ore ece, naarai abeit katemari yes atiar, Mam idaunete ireria kere luka Isirael aitodol naebunio Okoku loka etuŋanan. 24 “Ekesisian mam itelekarit ekesisianakinanike, karaida ebulesit mam itelekarit ejakaitike. 25 Edaunit ekesisian aputoor ekesisianakinanike, ka ebulesit aputoor ejakaitike. Arai enyaraete elopet etogo Beelesebul, edeparete ca do amoromor luejaas okaleke. 26 “Aso sirikikuriakaros kes; naarai emamei akirot naerapitai namam epukorio, karaida naibwaitai namam ejenunio. 27Nukalimokini yes kamuton, kinerata yesi kotoma aica; nuiirarete kaiyeiyea, kolimonokis kokuju otogoi. 28 Sirikikuriakaros ŋul luearete akuan komam epedorete aiar aijar; konye gwai kokuriaka ŋol loepedori amudiar akuan ka aijar da kotoma oGeena. 29Mam kereka egwelete anyiporin aarei apesa adiopet? Emamei adio da naedoi kwap komam Papakus ejeni, 30Konye yes, imaritai itima da kere luka akwesikus. 31 Aso sirikikuriaka; iraas yesi luka etiai adepar anyiporin nuipu. 32Aso ŋinituŋanan yenikalimori eoŋ kakonyen nuka ituŋa, alimori eoŋ da ŋes kakonyen nuka Papaka loejai toma akuj; 33 konye ŋin yenikaŋeri eoŋ kakonyen nuka ituŋa, aŋeri eoŋ da ŋes kakonyen nuka Papaka loejai toma akuj. 34 “Siriwomito ebe abu kabu ayaŋaun ainapakin kakwap: mam abu kabu ayaŋaun ainapakin, dimarai ekileŋ. 35 Naarai abu kabu aitusurupikin etuŋanan ka papake, apese ka totoke, aberu naka okokuke ka tataake. 36Lukokale luka etuŋanan kes eraunos lukasurupoke. 37 Ŋin yenemina papake arai totoke adepar eoŋ, mam kebusakinit; ŋin da yenemina ikokuke yenitelepat arai yenipese adepar eoŋ, mam kebusakinit. 38 Ŋin da yenimam erioŋi ekemusalaba ka atupar eoŋ, mam kebusakinit. 39 Ŋin yenedumuni akeijar itooliori, ŋin da yenitooliori akeijar kanukaŋ edumuni. 40 “Ŋin yenikisukunyikini yes, kesukunyikini eoŋ, ŋin da yenikesukunyikini, isukunyikini ŋol lokejukuni. 41Ŋin yenisukunyikini enabi naarai erai enabi, edumuni eropit loka enabi, ŋin da yenisukunyikini ekadoliton naarai erai ekadoliton, edumuni eropit loka ekadoliton. 42 Ŋin yenitamasi idiopet ka ludidik kalu akoli naka akipi nuelilim bon, naarai erai ikesisian, abeit katemari yes atiar, mam etwaniari cut eropitike.”111 Kosodi kanen, kedau Yesu aicorakin ikekesisiak itomon ka luarei, konyou kanen kolot aisisianakin ka alimonokin da koreriakec. 2 Kosodi nakiiraria Yokana kaidaris aswamisio nuka Kristo, kijuka ikekesisiak aiŋit, 3 kobalas ebe, “Irai kereka ijo ŋol loebunit, arai bo kedarata ece?” 4Koboŋok Yesu kotema kes atiar, “Koloto, kolimokis Yokana akiro nuiirasi ka nuianyut: 5 Ekwenyunete imudukiok, elosete iŋwalasik, iswagio lukatapon, epupete ikimiŋiok, itajario lukatwak, elimonokinio da lukican akiro nukajokak. 6 Isirereŋitoi da ŋol lomam itiguikin kanukaŋ.” 7 Kosodete keboŋosi kwi, kogeu Yesu alimokin ikodeta nuka Yokana ebe, “Kilomarete alosit amodiŋ aanyun inyo? Egada lokijaŋijani ekwam? 8Konye bo kilomarete asesen inyo? Etuŋanan lokenapit anapito naanebek? Koany, ŋul luenapito anapito nuunebek ejaas toma otogoi luka ikabakan. 9 Konye kanukinyo kilomariata? Asesen enabi? Eebo, katemari yes atiar, Loitelekarit enabi. 10 Ŋol ŋes iwadikatere nu ebe, ‘Koany, ejukari ekakiyakia kakonyenekon, Loitemonokini ekonirot kakonyenekon.’ 11 Abeit katemari yes atiar, eriŋa enyouno etuŋanan kotoma lukeuriete aŋor loitelekarit Yokana Lokebatisan; konye loedit kotoma ajakanut nakotoma akuj ŋes epol aitelekarit ŋes. 12 Ameun kapaarasia nuka Yokana Lokebatisan kiton kwana ebuikinitoi ajakanut naka akuj, enatarete da ikabuorok. 13Naarai apotu inabin kere ka ikisila kodwarata kiton apak naka Yokana; 14 Arai ikotosi acamun, ŋes Eliya loedwara abunore. 15Yenejaas aki kiira. 16“Konye etupusi kinyo atur na? Eputos kidwe luiboiete kagwelanaret luenyaritos ipaupakec kobalas ebe, 17 ‘Kikut alamarun, mam yes esoma; Kibwolol, mam yes ibworo.’ 18 Naarai abu Yokana kobu komam enyami karaida aimat, kobalas ebe, ‘Ejai ajokit.’ 19 Abu Okoku loka etuŋanan kobu enyami emasi da, kobalas ebe, ‘Koany, ekeraŋat lo, ekameran da, epapero loka iketelemak esolo ka ikadiakanarak!’ Konye aswamisioke kes itojokere acoa.” 20 Kosodi kogeu aitoron ireria lukiswamaa nukaumokinike nuipu, naarai mam itoronikina. 21 Kobala ebe, “Itukwi ijo Korasin! Itukwi ijo Betesaida! Naarai arai kiswamatai koTuro ka Sidon nukaumokin nukiswamatai kamakus, ti kitoronikinos ŋo sek, ka ainap da ipukoi ka ekurwon. 22Konye katemari yes atiar, Epatanikini rwaru Turo ka Sidon atitiŋikin kapaaran naka etube aitelekarit yes. 23 Ka jo da, Kaparanaum, kitopoloorio kereka kiton akuj? Kijesario do kiton Okatwak, Naarai arai kiswamatai koSodom nukaumokin nukiswamatai kamakon, ti kesal ore ŋol kiton lolo. 24 Konye katemari yes atiar, Epatanikini akwap naka Sodom atitiŋikin kapaaran naka etube aitelekarit jo.” 25 Kapak kaya Koboŋok Yesu kobala ebe, “Kemalai jo, wu Papa, Ejakait loka akuj ka akwap, naarai ibu kimunonik akiro nu lukacoa ka lukaijen, kopukok da idwe Iudidik; 26eebo, Papa, naarai kwaŋin ibu kitojokia kakonyenekon. 27 Kainak Papaka iboro kere; ido emamei yenejeni Okoku dimarai Papa, kwabo emamei yenejeni Papa dimarai Okoku, ka ŋin da yenekot Okoku apukokin ŋes. 28 Kopotu neajai, yes kere luitaaritos ka lukilaŋirikinito, eoŋ da kesiyenuni yes. 29 Korioŋata ajookotoka, kisisiautu kamakaŋ; naarai etasiono eoŋ, eyapepera kotau, yes da idumunete aiyeŋun kotauonokus. 30 Naarai imeimeo akajookot, akabwokon da ebenen.”121 Kapak kaŋin kitor Yesu mana naka akima apaaran nakasabato; koriebi ikekesisiak eteŋei, kogeut aijejeunun aluŋuren nuka akima ka ainyam. 2 Konye keanyutu Iparisayon, kobalas ŋes ebe, “Koany, iswamaete ikonikesisiak namam ibusakinit aswam apaaran nakasabato.” 3 Kotema kes atiar, “Mam kereka isomenenete nukiswamai Daudi, nakeriebia eteŋei, ŋes ka ikepaup; 4 kwape kelomaria togo loka Edeke, konyam imugatin luka aitodikin, lumam ebusakinit ŋes ainyam karaida ipaupake, dimarai isasedotin bonik? 5 Arai bo mam kereka isomenenete kotoma okisila ebe apaaran nakasabato kemunaasi isasedotin koyekalu asabato; komam egwaunete akiro? 6Katemari yes atiar, ejai ne yenitelekarit eyekalu. 7 Konye arai kojenete apolou naka akiro kanu ebe, ‘Akoto aitim kwabo mere asuban,’ timam kititelekaasi lumam egwaunito akiro. 8Naarai Okoku loka etuŋanan ŋes erai ejakait loka asabato.” 9 Konyou kaŋina koloma toma atukosikec. 10 Ido koany, kojai etuŋanan lokeonit akan. Kiŋita ŋes kotemasi atiar, “Ibus kereka aitaŋaleun kapaaran nakasabato?” Tetere iwosaete ŋes. 11 Kotema kes atiar, “Iŋai bo kayesi, yenejai amerekek adiopet yenimam iriuni ka alemun arai kibirokin aipany kapaaran nakasabato? 12 Mam tope ituŋanan itelekarit amerekek kotiai? Aso ibus aswam nuejok kapaaran nakasabato.” 13Kosodi kotema ŋesi etuŋanan atiar, “Korio akonikan.” Korio, koŋaleu, koputokinos kanace. 14 Konye kolomasi Iparisayon kinerut asurokin ŋes, ka epone loemudiariata ŋes. 15 Komisiik Yesu ŋun, konyou kanen; kotupasi ituŋa luipu; kitaŋaleu kere. 16 Kicor kes kinyeis aitakanun ŋes. 17 Tetere itodolikin akirot naenerit kama kenabi Isaia ebe: 18 “Koany, ekakejaanakinan loseuna, Eminataka loisiyalamikinit ekatau, Ebwaikini Ekamoyo mamakeŋ, Elimokini lukacekwapin etube. 19Mam epega, karaida aiwor; Karaida ituŋanan apupun ekeporoto korotin; 20Mam ebili agada nairiecakina, Mam itudeŋi abirait naepuriei, Aitodol naijukunia etube aipikor; 21Emunokinos lukacekwapin ekekiror.” 22 Kosodete koinut emuduki ekimiŋ loejai ajokit, kitaŋaleu, kiner ekimiŋ ka akwenyun da. 23Koumokis ituŋa kere, kobalas ebe, “Mere caat lo okoku loka Daudi?” 24 Konye kiirasi Iparisayon kotemasi atiar, “Mam ŋol ireŋeari ajokin dimarai kanuka Beelesebul, ekapolon loka ajokin.” 25Kosodi kejeni Yesu akeceomisio kotema kes atiar, “Ŋinijakanut naetiakatiakaun asurokin bon emudiar, ere da arai etogo loetiakatiakaun asurokin bon mam icasi. 26Satan arai ireŋeari Satan, etiakatiakaun asurokin bon; aso ikonakini ai akejakanut icasi? 27Arai ereŋeari eoŋ ajokin kanuka Beelesebul, ido bo ikusidwe ireŋearete kanuka iŋai? Kanuka ŋun ŋes eraatar ŋul ikusikatubok. 28 Konye arai ereŋeari eoŋ ajokin kEmoyo loka Edeke, aso adolu ajakanut naka Edeke mamakus. 29 Arai bo ikwaikini epedori ai etuŋanan alomar togo loka ekagogoŋon ka aiŋat ikeboro, arai mam ber eenit ekagogoŋon ŋol? Kosodi konyet epedori aiŋat eketogo. 30 Ituŋanan yenimam ejai keoŋ ŋes yenikekoloka, ituŋanan da yenimam etukonokini keoŋ isiarakini. 31 Kanuka ŋun katemari yes atiar, Isionio niŋironis ka ŋiniinyanakin naka ituŋa, konye mam cut isionio ainyanakin Emoyo. 32 Ŋinituŋanan da yeninera akirot asurokin Okoku loka etuŋanan isionio; konye ŋin yeninera asurokin Emoyo Lokalaunan mam isionio kotoma okar kalu, karaida kaluepote. 33 “Kituluosi ekitoi loejok ka akeraito da nuejok, arai bo kituluosi ekitoi loerono ka akeraito da nueroko; naarai ejenunio ekitoi kanuka araitoke. 34 Yes aur naka imusagan! Ikote ipedorete ai einer nuejok arai iraas luiroko? Naarai inera aituk nuilapununos kotau. 35 Itolomuni ituŋanan yenejok nuejok kotoma nuiŋadat nuejok, ituŋanan da yenikaronon itolomuni nukaronok kotoma nuiŋadat nueroko. 36Katemari yes atiar, Ŋinikirot nakejal naineras ituŋa itodiarete kapaaran naka etube. 37Naarai kanuka akonikiro kimarakinio adolit, kanuka akonikiro da kitubokinio aitelekar.” 38 Kosodete koboŋokis ice kokewadikak ka Iparisayon kotemasi atiar, “Ekesisianakinan, kikoto aanyun aanyunet kamakon.” 39 Konye Koboŋok kes kotema atiar, “Atur nakaronon naadote emoi aanyunet; kwabo mam einakinio aanyunet dimarai aanyunet naka enabi Yona. 40 Naarai kwape kejaar Yona toma akoik naka etiaŋ lokos loka aŋolol adaun apaarasia auni ka akuaresia auni, kwape kwaŋin Okoku loka etuŋanan edauni apaarasia auni ka akuaresia auni kakoik naka akwap. 41 Enyounete ikiliok luka Ninebe kapaaran naka etube nepepe katur na, itetelekarete ŋes akiro; naarai apotu kesi kitoronikinos kanuka alimonokin naka Yona, ido koany, ejai ne yenitelekarit Yona. 42 Enyouni akabaka naka Eŋalakimak kapaaran naka etube nepepe katur na, itetelekari kes akiro; naarai abu ŋesi kobu kosaŋe loka akwap akiirar acoa naka Solomon, ido koany, ejai ne yenitelekarit Solomon. 43“Kenyou emoyo loerono kotuŋanan, itori aiboisio nuemameete akip emoot nekiyeŋunet, komam edumuni. 44Kosodi etemari atiar, ‘Aboŋori togoka nekabunio’; keboŋu edumuni esil, epieitai, epesitai da. 45 Kosodi elosi eupunos nepepe kimoyon ice ikanykaarei luitelekarito ŋes aronis, elomarete kesi da esalete nen; ejautene loka ituŋanan kaŋin lokawasia eraun loerono adepar losodit. Kwape kwaŋin ejaunia atur na nakaronon.” 46 Naperoko ineras kikodeta, koany, kebwoete totoke ka ikeinacan kokiŋa, kokotosi einer kaŋes. 47Kolimoki etuŋanan ŋes ebe, “Koany, totokon ka ikoniinacan ebwoete kokiŋa, ekotosi einer kajo.” 48 Koboŋok ŋol lokelimokini ŋes ebe, “Iŋai bo erai totoka, lukaŋai da eraas ikainacan?” 49Kitodik ikekesisiak kakekan, kotema atiar, “Koany, totoka ka ikainacan! 50 Naarai ŋin yeniswamai nuekoto Papaka loejai toma akuj, ŋin ŋes onaceka; ka inacika, ka totoka da.”131 Kapaaran kaŋin kolomu Yesu kotogo kiboikin ariri kaŋolol. 2 Kotukokinos ikodeta luipu mama ejai, kodoka ataker kiboikin; kobwoi ekodet kere koitolima. 3Kolimonok akiro nuipu kawaragasia, kotema atiar, “Koany, abu ekayean koloma aiye. 4Napeyei, kodooto ikinyom ice ariri kerot, kopotu akweny, konyamata. 5Kodooto ice aŋaŋam, nemam kipu alup, atipet kobwaŋutu, kanumam idulotor alup, 6konye kecau akoloŋ konomosi, kanuamameatar alias korinyosi. 7Kodooto ice okukwa, kolibut ikukwa koridakis. 8Kodooto ice alupo nuejok koraata, ice akwatat, ice akaisakanykape, ice da akaisauni. 9Yenejaas aki, kiira.” 10Kosodi kopotu ikekesisiak mama ejai, kotemasi atiar, “Kanukinyo kineratar kakes kawaragasia?” 11Koboŋok kotema kes atiar, “Kiinakinitai yes ajenun nukaiyeiyea nuka ajakanut nakotoma akuj, konye kes mam einakinitai. 12 Naarai yenejai ibore, einakinio luiyatakina luipu; konye yenemamei ibore, ŋin da yenejaas kaŋes edemario. 13 Kanuka ŋun kinera kakes kawaragasia, naarai naeseseniata mam esesenete, naeirariata da mam iirarete, karaida ajenun. 14 Ido itodolikinio akirot naka enabi Isaia kamakec naebala ebe, ‘Akiirar iirarete, konye mam ijenunete cut, ido asesen isesenete, konye mam ianyunete cut. 15Naarai esiepaikis itauon luka ituŋa kalu, Kimiŋarito akiikec, Itumudakito akecekonye, Tetere mam eanyunete kakecekonye, Ka akiirar kakeceki, Ka ajenun da kikecetauon, Kibelokinos ketaŋaleu.’ 16 Konye isirereŋitoi akusikonye, naarai esesenete, ka akusiki da, naarai iirarete. 17Abeit katemari yes atiar, Apotu kimielas inabin luipu ka ikadolitok aanyun nuisesenete yesi, mam eanyuna, ka akiirar da nuiirarete yesi, mam iirara. 18“Aso kopupokisi awaragan naka ekayean. 19Naiiraria ituŋanan akirot naka ajakanut, komam ejenuni ŋes, ebuni lokaronon kourupo nukeyeitai otauke; ŋul kes lukeyeio ariri kerot. 20Ŋul da lukeyeio aŋaŋam, ŋul kes luiirarete akirot, atipet kiyuutu kaiyalama; 21konye emameete alias kotomakec, kicata nediokasilon, kedolokis ican arai areio kanuka akirot, atipet itiguikinos. 22 Ŋul da lukeyeio okukwa, ŋul kes luiirarete akirot, konye aiyaloiŋon naka ikar kalu, ka aiŋal naka abar koridakis akirot, mam eraa. 23Ŋul da lukeyeio alup nuejok, ŋul kes luiirarete akirot ka ajenun; eraete ŋul, ice akwatat, ice akaisakanykape, ka ice da akaisauni.” 24 Koinu kes acewaragan, kobala ebe, “Ajakanut naka akuj; eputos ketuŋanan lokeyei ikinyom luejok amanake: 25konye kejotooros ituŋa, kobu lokasurupike koyeik igitun toma akima, kolot. 26Konye kebwaŋut akima, ka aisur, kotakanut igitun da. 27Kopotu ibulesin luka elopet etogo kolimokis ŋes ebe, ‘Ejakait, mam tope kiyeit ikinyom luejok amanakon? Kepote bo kai igitun?’ 28Kotema kes atiar, ‘Lokasurup ŋes kiswamai ŋun.’ Kotemasi ibulesin ŋes atiar, ‘Aso ikoto kaloto karutosi kes?’ 29Konye kotema atiar, ‘Mam; elemuni nairusioto igitun, kimoriununut kakima da.’ 30 Kinyeisi kere kopolooros kiton aidweny; ido kapak naka aidweny alimokini ikadwenyak ebe, ‘Koruto ber igitun, koenata ikes kicweata; konye akima kotukonokis odulaaka.’ ” 31 Koinu kes acewaragan, kobala ebe, “Eputos ajakanut naka akuj; bala ecokat loka ekaradali, lokelemari etuŋanan kiraik toma amanake. 32 Kedit ŋesi aitelekarit ikinyom kere, konye kepoloor, kiteleka ikui kere koraun do ekitoi, kopotu akweny nuka apak koperenenete atenieikike.” 33 Kolimok kes awaragan ace ebe, “Eputos ajakanut naka akuj bala aitubuunet nakelemari aberu kibwa kotoma aitemisio auni nuka akiria, kiton neabuunioto kere.” 34 Kolimok Yesu ikodeta ŋun kere kawaragasia; kwabo arai emamei awaragan mam kelimokini akirot. 35 Tetere itodolikin akirot nakinerit enabi ebe, “Etooŋari akaituk kawaragasia, Alimori da nukibwaitai ameun kapetetait naka akwap.” 36 Kosodi kotwar ikodeta, koloma togo. Kopotu ikekesisiak mama ejai, kotemasi atiar, “Kitejenunai sio awaragan naka igitun lukomana.” 37Koboŋok kotema kes atiar, “Lokeyei ikinyom luejok erai Okoku loka etuŋanan; 38 Amana da erai akwap, ikinyom luejok eraas idwe luka ajakanut; igitun eraas idwe luka lokaronon, 39lokasurup lokeyei kes erai Satan; aidweny erai awasia naka akwap, ikadwenyak da kes imalaikan. 40 Kwape etukonokinere igitun ka aicweikin kakim, ikonakinio nen kawasia naka akwap. 41 Ijukuni Okoku loka etuŋanan ikemalaikan, etukonokinete kotoma ajakanutuke kere nuitiguikinete kere, ka luiswamaete nukepali, 42 ecakakinete oupa loka akim; ejaun kaŋina aimony ka airiamanakin ikel. 43 Kosodete ecaunete ikadolitok kwape kakoloŋ kotoma ajakanut naka Papakec, Yenejaas aki, kiira. 44 “Eputos ajakanut naka akuj bala abar nakibwaitai kotoma amana, nakedumuni etuŋanan kimunona; kosodi kanuka akeiyalama kolot kogwela lukejaatatar kere kogwelu amana ŋin. 45“Bobo da, eputos ajakanut naka akuj; bala ekagwelanaran loemoi ilulun luejok; 46 nakedumunia elulu ediopet loka etiai loepol, kolot kogwela lukejaatatar kere, kogwelu. 47 “Bobo da, eputos ajakanut naka akuj; bala eboi lokecakakinio aŋolol, kotukonok lukecor luka iponesio kere. 48Kosodi kilelebun, kiriut ituŋa oitolima, kiboikinos, kotukonokis luejok oboro, konye lueroko kocakasi. 49 Ikoni nen awasia naka akwap. Epote imalaikan, etiakarete lukaronok kama ka lukadolitok, 50ecakakinete kes oupa loka akim; ejaun kaŋina aimony ka airiamanakin ikel.” 51Kiŋit Yesu kes ebe, “Ijenutu kereka yesi ŋun kere?” Kotemasi atiar, “Eebo.” 52Kotema kes atiar, “Kanuka ŋun ŋinikewadikan yenituutooritai kajakanut naka akuj; eputos bala etuŋanan elopet etogo loelemuni kotoma abarake iboro lukitetiak ka lumojoŋ da.” 53 Kosodi kedau Yesu awaragasia ŋun, konyou, kolot. 54 Nakedolio bukec, kisisianak kes kotoma atukosikec, koumokis kotemasi atiar, “Kedumuni bo lo kai acoa na ka nukaumokin nu? 55Mam kereka lo erai okoku loka ekekeon? Mere totoke naenyaritai Mariam? Mere ikeinacan Yakob ka Yosep ka Simon ka Yuda? 56 Emameete akeinacan kere kane kamawok? Aso kedumun bo lo kai nu kere?” 57 Kitiguikinos kanukeŋ. Konye kotema Yesu kes atiar, “Mam eswaki enabi aitopoloorio dimarai bukec kotogoke da.” 58Mam abu kiswama nukaumokin nuipu kanen, kanu amamus aiyuunikec.141 Kapaarasia kaŋun kiira ekabaka Kerode eemut loka Yesu; 2Kotema ikekejaanakinak atiar, “Erai ŋol Yokana Lokebatisan, ajaru kotoma okatwak; kanuka ŋun iswamai nukapedor ŋun kotomakeŋ.” 3 Naarai kikamunit Kerode Yokana koen, kibwaik aidaris, kanuka Kerodia aberu naka Pilip onaceke. 4 Naarai abu Yokana kolimok ŋes ebe, “Mam ibusakinit jo ajaut kaŋes.” 5 Kokoto aiar ŋes konye kokurianar ekodet, naarai aomito ebe kerai Yokana enabi. 6Konye kedol apaaran nakaurio naka Kerode, kosom apese naka Kerodia kakonyen nuka ituŋa, kisiyalamik Kerode, 7kanuka ŋun kisumunik kaiyaposit ebe einakini ŋes ibore kere yenilipi. 8Kicoro totoke ŋes, kosodi kotema atiar, “Ae kane katuba akou naka Yokana Lokebatisan.” 9Kokadak ekabaka; konye kanuka akeiyaposio ka lukemorete kaŋes kicorak ainakinio. 10 Kijuka kotubunoi akou naka Yokana kaidaris, 11koyaunai akekou katuba koinakinai apese, koyaŋa neejai totoke, 12Kopotu ikekesisiak koyaŋaasi akuan, kidaata; kosodete koloto kolimokis Yesu. 13 Kiira Yesu ŋun, konyou kanen kotoma ataker, kolot amodiŋ neejaikinor bon, Kiirasi ikodeta, kotupasi ŋes itorito kaneeoŋit anyoun koreria. 14 Kelom Yesu koany ekodet loepol; kitim kes, kitaŋaleu lukadekakakec. 15Kitiboŋ akwap, kopotu ikekesisiak mama ejai, kotemasi ŋes atiar, “Aibois na erai amodiŋ, atuboto isawan; aso, kotwar ikodeta tetere elomanarete okialon agwel inyamat.” 16Kotema Yesu atiar, “Mam ipudasi alosit; koinakis yesi kes lunyaman.” 17Kotemasi ŋes atiar, “Emamei sio idiobore kane dimarai imugatin ikany ka lukecor iarei.” 18Kotema atiar, “Koinunai.” 19Kicorak ikodeta aiboikin anya; kolem imugatin lukany, ka lukecor luarei, kosesen akuj, kisirereŋ, kobilibil imugatin, koinak ikesisiak, koinakis ikesisiak da ikodeta. 20 Konyama kere kimonikinos. Kotukonokinai atutubeta nuabilibila nuasalete iditai itomon ka luarei ileleba. 21Lukenyamete emwaasi bala ikiliok ilukumin ikany, kilema aŋor ka idwe. 22 Atipet kitiŋaik ikekesisiak adokar ataker aiŋarenikin ŋes okekwa juwai, naarokor ŋesi etwari ikodeta. 23 Kedau ŋesi aitwar ikodeta, kodoka oroŋat neejaikinor bon ailip. Kitiboŋ akwap, kojai ŋina bon. 24Konye kedaunit ataker aikwaŋar neelwana koitolima kibukete akailan; naarai kekutunit ekwam kakonyen, 25Kakwenyunet nakiwoŋonet naka akuar kobu Yesu mama ejaas, kicakacakai aŋolol. 26 Konye nakeanyuniata ikesisiak ŋes icakacakai aŋolol, kiyaloŋoŋoto, kotemasi atiar, “Erai etoil” Kiworoto kanuka akurian. 27Atipet kiner Yesu kakes kotema atiar, “Kotitiŋioros! Eoŋ lo, sirikikuriakaros.” 28Koboŋok Petero kotema ŋes atiar, “Ejakait, arai erai jo ŋol, kicorakinai kabu mama ijai kokuju akipi.” 29Kotema atiar, “Bia,” Kodoku Petero kataker, kicakacakai akipi alosit mama ejai Yesu. 30Konye nakeanyunia ekwam, kokurianar, kogeu alumor, kiworo ebe, “Ejakait, kitajarai.” 31 Atipet korio Yesu akekan kitiŋ ŋes, kotema atiar, “Ijo loedit aiyuun, kanukinyo ibuonokinor?” 32Kedokasi kesi ataker kopala ekwam. 33Komaata ŋes lukejaas toma ataker kotemasi atiar, “Abeit irai ijo Okoku loka Edeke.” 34Kedaut aikwaŋar juwai, kodoloto akwap naka Genesaret. 35Kejenut ituŋa luka aibois kaŋin, koramata luka akwap ŋin kere, koinut ŋes lukadekak kere. 36 Kiŋaiŋaata ŋes acamakin kes atironor atwele naka anapitoke bon; koŋaleutu kere luketirorete.151 Kosodete kopotu Iparisayon ka ikewadikak mama ejai Yesu aponare koYerusalem, kotemasi atiar, 2 “Kanukinyo ijalijalatar ikonikesisiak epone loka imakio? Naarai mam ilosete akecekanin naenyamiata.” 3Koboŋok kotema kes atiar, “Kanukinyo ijalijalatar yesi aicorakinet naka Edeke kanuka eponekus? 4 Naarai abu Edeke kobala ebe, ‘Koyoŋitenene papakon ka totokon,’ ido ebe, ‘Ŋin yenimoromoroi papake arai totoke, abeit etwani.’ 5Konye yes ibalasi ebe, Arai elimokini ituŋanan papake arai totoke ebe, Lutikidum kamakaŋ ainakin Edeke, mam itepesenitai ayoŋit papake arai totoke. 6Aso kanuka eponekus, itapalaut akirot naka Edeke. 7 Yes lukesoswai! Araas nuebeito nuadwarit Isaia kanukus, ebe: 8 ‘Ketopoloorito ituŋa lu kaitukekec, Konye elwaka ikecetauon kama ajai; 9Konye kamaete eoŋ atai, Isisianakinete aituutooreta nuka ituŋa bala erai aisisianakin nakabeit.’ ” 10Konyarau ekodet kotema kes atiar, “Kiirasi kojenutu da: 11 ŋin yenelomari kaituk mam emunaari ituŋanan, dimarai nuelomunete kaituk, ŋun emunaarete ituŋanan.” 12Kosodete kopotu ikekesisiak mama ejai, kotemasi ŋes atiar, “Ijeni kereka ijo ebe naeirariata Iparisayon akirot ŋin, apotu konyunyurikinos?” 13 Koboŋok kobala ebe, “Ŋinikiraa yenimam irait Papaka lokotoma akuj erutunio. 14 Kinyeis ŋul; eraas ikeŋarenok lumudukiok, Arai emuduki iŋarenikini emuduki, ibirokinos kere iarei toma aipany.” 15Kosodi Koboŋok Petero kotema atiar, “Kitejenunai awaragan ŋin.” 16Kotema atiar, “Eriŋa yes da emamei ajenun? 17Mam ijenete ebe ŋinibore kere yenelomari kaituk edoli akoik, kosodi ikiŋaario? 18 Konye nuitorunete aituk elomunete kotau, ŋun kes emunaarete ituŋanan. 19 Naarai toma otau epote aomisio nukaronok, aiar, adoteu, aelo, akokolanut, asabanakin, amoromor, 20Ŋun kes emunaarete ituŋanan; konye ainyam eriŋa ilota akanin mam emunaari ituŋanan.” 21 Konyou Yesu kanen, kolot atutubeta nuka Turo ka Sidon. 22Ido koany, kolom aberu Akanaanit koikorun kaŋul, kiworo ebe, “Kitimoi, wu Ejakait, ijo okoku loka Daudi; ikapese iticani noi ajokit.” 23Konye ŋes mam eboŋokino akirot, Kopotu ikekesisiak mama ejai kiŋaiŋaata ebe, “Kotwara ŋin; naarai iworotoi kokauwok.” 24 Konye Koboŋok kobala ebe, “Mam kejukunio dimarai mama ejaas amerekekin nukeoliorete nuka ekek loka Isirael.” 25Konye kobu ŋin, koma ŋes, kobala ebe, “Ejakait, kiŋarakinai.” 26Koboŋok ebe, “Mam ejok alemun inyamat luka idwe, acakakin iŋokwo.” 27Konye kotema atiar, “Eebo, Ejakait; konye iŋokwo da enyamete ararasia nuedoununete komesa loka ijakakec.” 28 Kosodi koboŋok Yesu kotema ŋes atiar, “Ijo ba toto, epol akoniiyuun; kojaut mamakon kwape ikotor.” Koŋaleu akepese ameun kosawa kaŋol. 29 Konyou Yesu kaŋina kitor ariri kaŋolol naka Galilaya, kodoka oroŋat, kiboikin nen. 30Kopotu ikodeta luipu mamakeŋ, koinut luecodos, ka imudukiok, ka ibaŋiok, ka iŋwalasik, ka ice da luipu, kibwaikis akejeneke; kitaŋaleu kes. 31 Koumok ekodet, nakeanyuniata ibaŋiok ineras, iŋwalasik etenete, luecodos elosete, ka imudukiok da ekwenyete; kituroto Edeke loka Isirael. 32 Kosodi konyarau Yesu ikekesisiak kotema kes atiar, “Etim ekodet, naarai adaut apaarasia auni iboiete keoŋ, kwabo emamei ibore yenenyamete; mam akoto aitwar kes koriebi eteŋei, kinyeis aiilor korot.” 33Kotemasi ikekesisiak atiar, “Kidumuni kai inyamat luipu kamodiŋ aisimonikinia ekodet loetia ne?” 34Kotema Yesu kes atiar, “Ejaas yes imugatin imwaasi ai?” Kobalas ebe, “Ikanykaarei, ka agaria nuikidioko.” 35Kicorak ekodet aiboikin kwap, 36Kolem imugatin ikanykaarei ka agaria, kimal, kobilibil koinak ikekesisiak, kosodete ikesisiak koinakis ikodeta. 37Konyamata kere, kimonikinos; kotukonokis atutubeta nuabilibila nukesalete ibukito ikanykaarei ileleba. 38Lukenyamete keraas ikiliok ilukumin iwoŋon, kilema aŋor ka idwe, 39Kotwara ikodeta, kodoka ataker kolot atutubeta nuka Magadan.161 Kopotu Iparisayon ka Isadukayon mama ejai, kokodokodata ŋes, kilipata ŋes aitodikin kes aanyunet naebuni kokuju, 2 Koboŋok kotema atiar, “Naitiboŋia, ibalas ebe, ‘Ipiororoi moi, naarai ereŋ akuj.’ 3 Tupuruc da ebe, ‘Etepi lolo, naarai ereŋ akuj, edalidali da.’ Ijenete yesi amisiikin kwape ejaar akuj, konye mam ipedorete amisiikin aanyuneta nuka apakio. 4 Atur naerono naadote emoot aanyunet, konye mam einakinio aanyunet, dimarai aanyunet naka Yona.” Kinyek kes, kolot. 5Kedoloto ikesisiak okekwa juwai, kimurwokis ayaŋaar imugatin. 6 Kotema Yesu kes atiar, “Kokwenya, kocoito aitubuunet naka Iparisayon ka Isadukayon.” 7Kiŋitanakinos bonik ebe, “Mam kiyaunit imugatin.” 8 Konye kojen Yesu, kotema atiar, “Wu yes luedit aiyuun, kanukinyo iŋitanakinotor, naarai emameete yes imugatin? 9 Eriŋa yes ejenuna? Karaida akiitun imugatin kwi ikany luka ilukumin ikany, ka iditai luemwaasi nen Iuipotu kotukonokis? 10 Arai bo imugatin ikanykaarei luka ilukumin iwoŋon, ka ibukito luemwaasi nen luipotu kotukonokis? 11Ikonakinito bo yesi ai mam imisiikinito ebe mam enera kayes nuka imugatin? Kocoito aitubuunet naka Iparisayon ka Isadukayon.” 12 Kosodete kojenut ebe mam kelimokinit kes acoit aitubuunet naka emugati, dimarai aisisianakin naka Iparisayon ka Isadukayon. 13 Kosodi kobu Yesu atutubeta nuka Kaisarea Pilipi, kiŋit ikekesisiak ebe, “Ebalas ituŋa Okoku loka etuŋanan ebe erai iŋai?” 14 Kobalas ebe, “Ebalas ice ebe Yokana Lokebatisan, ice Eliya, ice da Yeremia arai ediopet konabin.” 15Kotema kes atiar, “Ido bo yes kibalas ebe arai eoŋ iŋai?” 16 Koboŋok Simon Petero kobala ebe, “Irai ijo Kristo, Okoku loka Edeke lokajaran.” 17 Koboŋok Yesu kotema ŋes atiar, “Kisirereŋitoi jo, Simon okoku loka Yona! Naarai mam akuan ka aokot kipukokinito jo ŋun, dimarai Papaka loejai toma akuj. 18 Eoŋ da kalimokini jo ebe irai ijo Petero, adukokini ekakanisa toma atiida na, ikirigin da luka okatwak mam ipikorete. 19 Kainakini jo ilaceta luka ajakanut naka akuj, kere nuieni ijo kakwap, eenio kokuju, kere da nuilacakini ijo kakwap, elacakinio kokuju.” 20 Kosodi kicor jokan ikesisiak sirikelimokis idiotuŋanan ebe erai ŋesi Kristo. 21 Ameun kapak kaŋin kogeu Yesu aikwenyar ikekesisiak ebe ibusakinit ŋes alosit Yerusalem, aiticanio da nuipu kama ka imakio ka isasedotin lupeti ka ikewadikak, ka aario, ka ajarun kapaaran nakiwuniet. 22Koyaŋa Petero Yesu, kogeu aitoron ŋes, kobala ebe, “Madi akuj, Ejakait! Mam kiponikinete jo ŋun.” 23Konye kibelokin kotema ŋesi Petero atiar, “Koboŋo kaukaŋ, Satan! Irai ijo ekomio kamakaŋ; naarai mam iwomit nueraas nuka Edeke, dimarai nuka ituŋa.” 24 Kosodi kolimok Yesu ikekesisiak ebe, “Arai ekoto ituŋanan kere atupit eoŋ, koŋerokin ilopet korioŋ ekemusalaba, katup eoŋ. 25 Naarai ŋin yenekoto aitajar akeijar etwaniari, ka yenetwaniari akeijar kanukaŋ edumuni. 26 Naarai ajokis anyoin kedum etuŋanan akwap kere kosodi atwaniar akeijar? Arai bo elemuni ituŋanan inyo alakunia akeijar? 27 Naarai ebuni rwaru Okoku loka etuŋanan nepepe kikemalaikan kotoma aibuses naka Papake, kosodi etacakini ŋinituŋanan kwape ejaatar akeswamisio. 28 Abeit katemari yes atiar, ejaas ituŋa luebwoete kane lumam iirete cut atwanare kiton naeanyuniata Okoku loka etuŋanan ebuni toma ajakanutuke.”171 Ketuboros apaarasia akanykape abu Yesu koyaŋa Petero ka Yakob ka Yokana onaceke, kogitaros bonik, kitodoka ŋesi kes oroŋat loeoja. 2 Kituluor kakonyenekec, koiriir ekereet kwape kakoloŋ, kokwaŋuut akenapito kwape kaica. 3Ido koany, kitakanikinos Musa ka Eliya, inerasi kaŋes. 4Koboŋok Petero kotema Yesu atiar, “Ejakait, ejok oni ajaut ne; arai ikoto, eswami ne iswamin iuni, ediopet lokon, ediopet loka Musa, ka ediopet da loka Eliya.” 5 Napekinerar ŋun, koany, kiteribo kes edou loemilia; ido koany, kolom eporoto kotoma odou kobala ebe, “Lo ŋes Okokuka lominat, loalelakinit noi; kiirasi ŋes.” 6Nakiirariata ikesisiak ŋun, kibiroros ebuburia, kokuriakaros noi. 7Kobu Yesu kotiro kes, kotema atiar, “Konyoutu, sirikikuriakaros.” 8Kikeutu akecekonye, mam eanyuna ituŋanan dimarai Yesu bon. 9 Napedokunete koroŋat, kicorak Yesu kes kotema atiar, “Sirikilimokis idiotuŋanan kere nuianyut, aitodol naejarunia Okoku loka etuŋanan kotoma okatwak.” 10 Kiŋita ikekesisiak ebe, “Aso kanukinyo ineratar ikewadikak ebe, ibusakinit ber Eliya aige abunore?” 11Koboŋok ŋesi ebe, “Abeit ebunit ber Eliya, itemokini ŋesi kere: 12 konye katemari yes atiar, Adau Eliya abunore, mam apotu kojenutu ŋes, konye kiswamakis kere nuakotos, Kwape kwaŋin elosi Okoku loka etuŋanan da aiticanio kamakec.” 13 Kosodete kojenut ikesisiak ebe enera ŋesi kakes nuka Yokana Lokebatisan. 14 Nakedolokinioto ekodet, kobu etuŋanan ediopet mamakeŋ, kokukokin, kobala ebe, 15“Ejakait, kitim ikakoku, naarai edek ipumu iticanete noi; naarai irwan ipu ibironokin akim, irwan ipu da akipi. 16Abu kainu ikonikesisiak, mam epedoro aitaŋaleun ŋes.” 17 Koboŋok Yesu kotema atiar, “Wu atur namam iyuunit, naepaarit, etodoli ai aiboi kayes? Etodoli ai da atitiŋikinit yes? Koinunai kane.” 18Kiretak Yesu ŋes, kolom ajokit: koŋaleu etelepat ameun kosawa kaŋol. 19 Kosodete kopotu ikesisiak mama ejai Yesu kaiyeiyea, kotemasi atiar, “Kanukinyo mam sio kipedoria aireŋear ŋes?” 20 Kotema atiar, “Kanuka aiyuunikus naedit. Naarai abeit katemari yes atiar, arai kijaas kaiyuun naetia ecokat loka ekaradali, ilimokinete eroŋat lo ebe, ‘Konyou kane, kolot laije,’ enyouni do; kwabo emamei akirot nakikaruni yes. [21Konye mam enyouni epone lo, dimarai kanuka ailip ka ailuŋ.]” 22 Nakiboioto koGalilaya, kotema Yesu kes atiar, “Elosi Okoku loka etuŋanan ainakinio akanin nuka ituŋa, 23earete ŋes, apaaran nakiwuniet ejaruni.” Kokadakis kes noi. 24 Nakedolioto Kaparanaum, kopotu iketelemak esolo loka atutubet naka esekel mama ejai Petero, kobalas ebe, “Mam kereka ekesisianakinanikus elemi esolo loka atutubet naka esekel?” 25Kobala Petero ebe, “Elemi.” Nakelomaria togo, koliŋ Yesu aiŋit ŋes ebe, “Iwomit ijo biai, Simon? Edumunete ikabakan luka akwap esolo loka akwap arai esolo loka ekayaiton kotuŋa inyoika? Kodwekec, arai bo komo?” 26Napekiner ebe, “Komo,” kobala Yesu ebe, “Aso anu ikote nen, ijakakaete cado odwe. 27Konye kenyeis aitiguikin kes, kolot aŋolol kocakak egolu, kolem agar nasodit naikeuni; kiŋaa aitukuke, ianyuni esekel; koyaŋa ŋol, koinak kes kanukaŋ, kanukon da.”181 Kosawa kaŋol kopotu ikesisiak mama ejai Yesu, kotemasi atiar, “Aso iŋai bo erai lokapolon kotoma ajakanut naka akuj?” 2Konyarau ikoku kisibwo kokidiŋikec; 3 kotema atiar, “Abeit, katemari yes atiar, Arai mam ibelokinos koluoros bala idwe, mam ilomarete cut toma ajakanut naka akuj. 4Aso ŋinituŋanan yenitasonikin ilopet kwape kikoku kayen, ŋin ŋes erai yenikapolon kotoma ajakanut naka akuj. 5 “Ŋin da yenisukunyikini ikoku idiopet kwaka yen kokirorika, kesukunyik eoŋ; 6 konye ŋin yenitapaari idiopet ka ludidik kalu lukeyuunito eoŋ, ti ejok ŋes aenikinio akukuse omurisiŋike ka acakakin ataro nakaŋolol. 7“Itukwi akwap kanuka akiro nuitiguikinete! Naarai mam eswakete nuitiguikinete ajaut, konye itukwi ituŋanan ŋin yeneyauni akiro ŋun nuitiguikinete! 8 Arai kiidupo jo akonikan, arai akonikeju, kotubo kocaka; ejok jo alomar toma aijar iŋwalit arai icodo, itia acakakinio akim namam eduŋei, ijaas kakanin aarei arai akeje aarei. 9 Arai kiidupo jo akonikoŋu, kogoru kocaka; ejok jo alomar toma aijar idoponyony itia acakakinio oupa loka akim. 10 “Kocoito sirimwaŋito idiopet ka ludidik kalu; naarai katemari yes atiar, Toma akuj esesenenete ikecemalaikan akonyen nuka Papaka loejai toma akuj. [11 Naarai abu Okoku loka etuŋanan kobu aitajar yenikeoliorit.] 12 Iwomito biai? Arai ejaas ituŋanan amerekekin akwatat, keolio adiopet, mam kereka inyeini akaisakanykaoŋon ka nukanykaonon, kolot oukon amoote ŋin nakeoliorit? 13Arai kedumu, abeit katemari yes atiar, Iyalamikini noi kanuka ŋin itia kwa akaisakanykaoŋon ka nukanykaonon numam aoliorito, 14Kwaŋin mam Papakus loejai toma akuj ekoto idiopet kaludidik kalu aolior. 15 “Arai kediak onacekon kamakon, kolot, kikwenya kadiakareteke, ijo ka ŋes bon: arai kiira, idum onacekon. 16 Konye arai mam kiirari, kouparos do ka ediopet arai iarei, tetere itogogoŋio ŋinikirot kaituke nuka ikajenak iarei arai iuni. 17 Arai kegir akiirar ŋul, kolimok ekanisa; arai kegir akiirar ekanisa da, korau ŋesi kamakon bala emoit ka eketeleman esolo. 18 Abeit katemari yes atiar, ŋin yenieni ijo kakwap eenio kotoma akuj, ŋin da yenilacari kakwap elacario kotoma akuj. 19 Bobo da katemari yes atiar, Arai kecamanaros iarei kayesi kakirot kere nailipete, iswamakini kes Papaka lokotoma akuj. 20 Naarai neetukokinotor iarei arai iuni kokirorika, ajai eoŋ da nepenen kidiŋikec.” 21 Kosodi kobu Petero mama ejai Yesu, kotema ŋes atiar, “Ejakait, kediaka onaceka kamakaŋ, esioniei ŋes irwan imwaasi ai? Kiton irwan akanykaarei?” 22Yesu kotema ŋes atiar, “Mam kalimokinit jo irwan akanykaarei, dimarai ebe akaisakanykaarei irwan akanykaarei. 23“Kanuka ŋun ajakanut naka akuj eputosi bala ekabaka lokekoto aimar ikeboro kama kikebulesin. 24Kegeu aimar, koinunai etuŋanan ediopet Iokiburao atalantan alukumin atomon, 25Kemamikis nutacet, kicorak ejakaitike ŋes agwelario, ka akeberu, ka ikedwe, ka luajaatar kere, kotacakinere apesen. 26Kokukokin do ebulesit, kiŋaiŋa, kobala ebe, ‘Okwe Ejakait, kotitiŋikinoi, eoŋ da katacakini jo kere.’ 27Abu ejakait loka ebulesit kaŋol kitim ŋes, koosik, kisioni apesen. 28Konye koloma ebulesit ŋol, kiriama ŋesi kediopet ebulesit aupake lokiburai adenarin akwatat; kikam ŋes, komied, kobala ebe, ‘Kotacakinai akapesen.’ 29Kokukokin do ebulesit aupake kiŋaiŋa, kobala ebe, ‘Okwe, kotitiŋikinoi, eoŋ da katacakini jo kere.’ 30Konye koŋer, kolot kibwaik aidaris aitodol naetacakinia apesen. 31Kosodete nakeanyuniata ibulesin luce nukiswamas, kokadakis noi, koloto kitejenut ejakaitikec kere nukiswamas. 32Kosodi konyarau ejakaitike ŋes kotema atiar, ‘Ebulesit ijo loirono! Abu kesioni jo apesen ŋin kere nakiŋaiŋaia; 33ti mam kereka jo da ibusakinit aitim aupakon, kwape ketimio eoŋ jo?’ 34 Konyunyurikin ejakaitike, kijaik ikedarak, aitodol naetacakinia apesenike kere. 35 Ikonakini nen Papaka lokotoma akuj ŋinidiopet kayesi, arai mam isioniete yesi ŋinituŋanan onaceke kotauonokus.”191 Kosodi kanen nakedaunia Yesu akiro ŋun, konyou koGalilaya, kodol oikorun luka Yudaya okekwa Yorodan. 2Kotupasi ikodeta luipu; kitaŋaleu kes kaŋina. 3 Kopotu Iparisayon mama ejai kocodut, kotemasi atiar, “Ibus kereka etuŋanan ainyein akeberu kanuka akirot kere?” 4 Koboŋok kotema kes atiar, “Mam isomenenete ebe Lokesubi kes kageunet abu kosub kes yenikiliokit, ka yeniberu. 5 Kotema atiar, ‘Kanuka ŋun inyeini etuŋanan papake ka totoke kirotakinos kakeberu, ŋul luarei eraunos adiopetekuan’? 6 Aso mam bobo eraas iarei dimarai adiopetekuan. Aso lukimorikikini Edeke, kinyek ituŋanan aitiak.” 7 Kotemasi ŋes atiar, “Aso do kanukinyo kicorakinia Musa ainakin ebalua loka atiak, ka ainyein?” 8Kotema atiar, “Kanuka aninik naka ikusitauon abu Musa kocam yes ainyein akusiŋor, konye ameun kageunet mam arai kwaŋin. 9 Katemari yes atiar, Ŋolituŋanan loinyeini akeberu dimarai kanuka aelo, komany ace, adotiar; ŋol da loemanyi nakinyeinio adotiar.” 10Kobalasi ikesisiak ŋes ebe, “Arai ikote nen akiro nuka etuŋanan ka akeberu, emamei ajokis aimany.” 11 Konye kotema kes atiar, “Mam ituŋa kere epedorete acamun akirot ŋin, dimarai ŋul lueinakinitai. 12Naarai ejaas ibwacin lukeurio kopone kaŋol ameun kakoikes nuka nukatotokec; bobo da ejaas ibwacin lukidoŋete ituŋa; bobo da ejaas ibwacin lukibwaciikinete kanuka ajakanut naka akuj, ŋol da loepedori acamun akirot na, kocam.” 13 Kosodete koinutu idwe ludidik tetere idokokini akaninike ka ailipakin kes. Koriemeriemata ikesisiak ituŋa. 14 Konye kobala Yesu ebe, “Kocamutu idwe ludidik kopotu mama ajai, kwabo sirikisimika kes; naarai lueputos kaŋul ajakanut naka akuj erai nakec.” 15Kidokok kes akekanin, konyou kaŋina. 16 Ido koany, kobu ece mamakeŋ, kotema atiar, “Ekesisianakinan, kebusakinit aswam akirot anyoin naejok, tetere adumuni aijar naka ikar kere?” 17 Kotema ŋes atiar, “Kanukinyo kiŋisia eoŋ nuka ajokis? Ejai ediopet loerai loejok. Konye arai ikoto alomar aijar, koricite ikisila.” 18 Kotema atiar, “Alu?” Kotema Yesu atiar, “Siriari, Siridote, Sirikokoi, Sirisabanakinenei. 19 Koyoŋitenenei papakon ka totokon, Komina da ikoniidunyet kwape iminar bon.” 20Kobala etelepat ebe, “Aricit ŋul kere; inyo eriŋa kaolikinit bobo?” 21 Kotema Yesu ŋes atiar, “Arai ikoto araun loitekoro, kolot, kogwela kere luijaatar, kokoranak lukican, ijaunete kabar toma akuj; kosodi kobu kotup eoŋ.” 22 Nakiiraria etelepat ŋun kolot itururwei; naarai kejaas iboro luipu. 23Kotema Yesu ikekesisiak atiar, “Abeit katemari yes atiar, etionikini ekabaran alomar toma ajakanut naka akuj. 24Katemari bobo atiar, Epatanikinit akaala aitor apedot naka ekus itia ekabaran alomar ajakanut naka Edeke.” 25Nakiirariata ikesisiak ŋun koumokis noi, kotemasi atiar, “Aso iŋai bo do epedori aitajario?” 26 Konye kosesen Yesu kes, kotema atiar, “Mam epedorio akiro ŋun kotuŋa, konye kama ejai Edeke epedoros kere.” 27Kosodi koboŋok Petero kotema Yesu atiar, “Koany, kipou isio kenyeis kere katuputu jo. Inyoin bo do kidumuni?” 28 Kotema Yesu kes atiar, “Abeit, katemari yes atiar, kotoma akwap nakitetet naiboikinor Okoku loka etuŋanan oicoloŋ loka aibusesuke, yes da lukiitupunete eoŋ iboikinos toma oicoloŋo itomon ka luarei, itubokinete atekerin atomon ka nuarei nuka Isirael. 29 Ŋinituŋanan yenikinyeini itogoi, arai iinacan, arai ainacan, arai papa arai toto, arai idwe arai amanat, kanuka ekakiror, edumuni irwan akwatat ka airum da aijar naka ikar kere. 30 Konye luipu lueraas lusodit eraunete lukawasia, ka lukawasia da eraunete lusodit.”201 “Naarai ajakanut naka akuj eputos ketuŋanan elopet etogo, lokelomuni tupuruc aiboleikin kikeswamak aswam toma amanake naka emusabibu. 2Kedau ŋesi acamanar ka ikeswamak ainakin adenari kanuka apaaran, kijuka kes amanake naka emusabibu. 3Kolom kwaka esawa lokiwuniet, koany ice ebwoete kagwelanaret ebolwaka. 4Kotema kes atiar, ‘Koloto yesi da toma amanaka naka emusabibu, karopete yes nuedolito.’ Koloto kesi. 5Kolom bobo kwape isawan ikanykape ka ikanykaoŋon da, kikon kwape kwaŋin. 6Kolom da kwaka isawan itomon kalodiopet, kodum ice ebwoete; kobala kes ebe, ‘Kanukinyo ibwoiata kane apaaran kere kobolwaka?’ 7Kobalas ebe, ‘Naarai emamei ituŋanan yenikiboleikinit.’ Kotema atiar, ‘Koloto yesi da toma amanaka naka emusabibu.’ 8 Napekitiboŋ, kotema ejakait loka amana naka emusabibu ekapolokitonike atiar, ‘Konyarau ikeswamak, korop eropitikec, agear ka lukokau kiton lukegeete.’ 9Kepotu kwi luka isawan itomon kalodiopet, kodum ŋolituŋanan adenari. 10Kepotu lukegeete, koomitos ebe edumunete kesi iyatakina; kodumut kesi da ŋolituŋanan adenari. 11Konye kedaut adumun, kirurumakis elopet etogo, 12kobalas ebe, ‘Ŋul lukokau eswamata esawa ediopet bon, itiirian ijo kes kasio lukitapasitoi apaaran kere kikanyi adedeŋ naka akoloŋ.’ 13Konye Koboŋok ŋesi ediopet kakesi, kotema atiar, ‘Opapero, mam keswamakinit jo erono; mam kereka kiboleikinit ijo keoŋ adenari? 14Koyaŋa naerai nakon, kolot; akoto ainakin ŋol lokokau kwape kajo. 15 Mam kereka apedori aitwasam ikaboro kwape akotor? Arai bo erono akonikoŋu, naarai ajokuna eoŋ?’ 16 Kwape kwaŋin lukokau eraunos Iusodit, ka lusodit da eraunos lukokau.” 17 Napedokari Yesu alosit Yerusalem, koyaŋa ikekesisiak itomon ka luarei aiyeiyea, kotema kes korot atiar, 18 “Koany, kidokari alosit Yerusalem; einakinio Okoku loka etuŋanan akanin nuka isasedotin lupeti ka ikewadikak, etubokinete ŋes atwanare; 19ijaikinete ŋes Imo aboliar, ka aida, ka aibubukin, apaaran nakiwuniet ejaruni.” 20 Kosodi kobu toto naka odwe luka Sebedayo nepepe kodweke mama ejai Yesu, kokukokin kilip akirot, 21 Kotema atiar, “Ikoto inyo?” Kotema atiar, “Kicorak ebe kiboikinos odweka lu luarei, ediopet kakanikon nakoteten, ediopet da nakokediany, kotoma akonijakanut.” 22 Koboŋok Yesu ebe, “Mam ijenete nuilipete. Ipedorete kereka aimat akoli naamasi eoŋ?” Kotemasi atiar, “Kipedori,” 23Kotema kes atiar, “Imasete bo akolika, konye aiboikin akanika nakoteten ka nakokediany, mere nakaŋ aikor, konye erai nakec kaŋul kaluitemokinit Papaka.” 24 Kepuputu lutomon, konyunyurikis iinacan iarei. 25 Konye Yesu konyarau kes, kotema atiar, “Ijenete ebe ikayaitok luka atekerin eyaito kes kagogoŋ, ejaas lukapolokokec kapedor mamakec. 26 Konye mam ikote nen kamakus; konye ŋinituŋanan yenekoto araut yenikapolon kamakus korau ikusikejaanakinan, 27ŋin da yenekoto araut yenisodit korau ikusibulesit; 28 kwape mam ebunitor Okoku loka etuŋanan aijaanakinio dimarai aijaanakin, ka ainakin da akeijar alakunia ikepuak.” 29 Nakeponiata koYeriko, kotupa ŋes ekodet loepol. 30 Ido koany, kiboiete imudukiok iarei kariri kerot, nakiirariata kesi ebe itorit Yesu, kiworoto, kotemasi atiar, “Kitimoi, Ejakait, Okoku loka Daudi!” 31Kiretak ekodet kes tetere ililiŋete; konye kiyatakis aiworo kotemasi atiar, “Kitimoi, Ejakait, Okoku loka Daudi!” 32Kobwou Yesu, konyarau kes, kobala ebe, “Ikotos keswamakis inyo?” 33Kotemasi atiar, “Ejakait, kikoto kitwekeny akosikonye.” 34Kitim Yesu kes, kotiro akecekonye, atipet kokwenyut, kotupasi ŋes.211 Naeapiariata kesi Yerusalem, kodolot Betapage, moru loka Iseitunin, kosodi Yesu kijuka ikesisiak iarei, 2kotema kes atiar, “Koloto ore loisesenete, atipet idumunete asigiria naeenitai, ka ikekoku, kolacut, koinut eoŋ. 3 Arai kitemari idiotuŋanan akirot, iboŋokinete ŋes ebe, ‘Ejakait ipuda kes.’ Kosodi atipet kijaikini kes.” 4Kojaut ŋun tetere edoli akirot nakinerit enabi ebe, 5 “Kolimokis yesi akoku naka Sion ebe, Koany, ebunit Ekabakakon mamakon, Loitasono, ibwanenit asigiria, Ibwanenit ikoku, ikoku yenikatiaŋ nakebwokan.” 6Koloto ikesisiak, kiswamata kwape kicorakinitor Yesu kes. 7Koinut ŋes asigiria, ka ikekoku, kopetanakis ikecenapen; kibwanen ŋesi. 8 Kopetanakis ituŋa luipu lukotoma okodet ikecenapen orot, ice da kojepununut atenieik kokito, kopetanakis kes da orot. 9 Kiworoto ikodeta lukiŋarenikinito ka luketupakinito ŋes ebe, “Kosana mama ejai Okoku loka Daudi! Isirereŋitoi loebunit kokiror loka Ejakait! Kosana kuju noi kakuj!” 10Nakelomaria ŋesi Yerusalem, korieŋut lukore kere, kobalas ebe, “Iŋai bo lo?” 11 Koboŋokis ikodeta ebe, “Ŋol ŋes enabi Yesu loko Nasaret nako Galilaya.” 12 Kosodi koloma Yesu toma oyekalu loka Edeke, kireŋea kere lukegwelanarete ka lukegwelete kotoma oyekalu, kobuburiana imesan luka ikesiecanarak arupian, ka iicoloŋo luka ŋul kalukegwelanarete ajeleik, 13 kotema kes atiar, “Iwadikatai ebe, ‘Ekatogo enyaritai etogo lokilipet,’ konye yes ituluosi abua naka ikaŋatak.” 14Kopotu imudukiok ka luicodos mama ejai oyekalu, kitaŋaleu kes. 15 Konye nakeanyuniata isasedotin lupeti ka ikewadikak nukaumokin nukiswamai, ka idwe lukiworoete koyekalu ebe, “Kosana mama ejai Okoku loka Daudi!” konyunyurikinos; 16 kotemasi ŋes atiar, “Ipupi ijo nuinerasi lu?” Kotema kes Yesu atiar, “Eebo, mam isiomitos ebe, ‘Kaituke nuka idwe ludidik ka luenakete, Itodol aiturit?’ ” 17Kinye kes, koloma kiŋa ka ere kiton Betania, koper ŋina. 18Tupuruc, nakeboŋoria ore, korieb eteŋei. 19 Koany etini kariri kerot, kolot neejai, mam eanyuna ibore kokujuke dimarai akui bon. Kolimok ŋes ebe, “Mam bobo iraenenei araito ikar kere!” Atipet korinyo etini. 20Nakeanyuniata ikesisiak, koumokis, kobalas ebe, “Ekonaki bo ai etini erinyori atipet?” 21 Koboŋok Yesu kotema kes atiar, “Abeit katemari yes atiar, Arai ijaas kaiyuun komam ibuonokinos, mam iswamaete ŋin naka etini bon, konye arai ilimokinete eroŋat lo ebe, ‘Koukor kocakar aŋolol,’ iswamaun. 22Kere da nuilipete kailipikus iyuunito, idumunete.” 23 Nakedaunia alomar toma oyekalu, kopotu lusasedotin lupeti ka imakio luka ituŋa mamakeŋ napisisianakini, kobalas ebe, “Iswamai ijo nu kapolou anyoin? Iŋai da kiinakini jo apolou ŋin?” 24Koboŋok Yesu kotema kes atiar, “Eoŋ da keŋisi yes akirot adiopet; arai kiboŋokinete eoŋ, ŋes konyet kalimokiniata yes apolou nakeswamaa nu. 25Aibatisa naka Yokana kebuni kai? Kebuni kotoma akuj, arai bo kotuŋa?” Kiŋitanakinos bonik ka bonik, kobalas ebe, “Arai kiitema ebe, ‘Kebuni kotoma akuj’; kitemari ŋesi oni ebe, ‘Aso kanukinyo mam kiyuuniata ŋes?’ 26 Arai kiitema ebe, ‘Kebuni kotuŋa,’ kikuriana ekodet; naarai eomito ituŋa kere ebe kerai Yokana enabi.” 27Koboŋokis Yesu kobalas ebe, “Mam kijeni.” Kotema kes atiar, “Eoŋ da mam kalimokini yes apolou nakeswamaa nu.” 28“Konye iwomito biai? Kojaas etuŋanan idwe iarei; kolot mama ejai losodit kotema atiar, ‘Ikakoku, kolot lolo kiswama toma amana naka emusabibu.’ 29 Koboŋok ebe, ‘Alosi Ipapa,’ konye mam eloto. 30Kolot mama ejai lokiareit kinera ŋupeŋun; Koboŋok ebe, ‘Mam akoto,’ kokau abu kitoronikin, kolot. 31 Aso ali ka luarei kaŋul loabu kiswama nuakoto papake?” Kotemasi atiar, “Lokiareit.” Kotema Yesu kes atiar, “Abeit, katemari yes atiar, Kigeikinete yes iketelemak esolo ka nudotea alomar toma ajakanut naka Edeke. 32 Naarai abu Yokana kobu mamakus korot loka adolit, mam yes iyuuna, konye apotu iketelemak esolo ka nudotea kiyuutu ŋes; yes da nakianyuniata, mam ipotu kitoronikinos kokau, ka aiyuun ŋes. 33 “Kopupokis awaragan ace. Kejai kolo etuŋanan elopet etogo, kira ŋesi amana naka emusabibu, kirigak abwas, kobokik aipany nacues tomake, koduk aiteis, kititiŋ ikeswamak, kolot akwap ace. 34Keapu apak naka araito, kijuka ikebulesin mama ejaas ikeswamak, adumun akeraito. 35Konye kikamut ikeswamak ikebulesin kodaata ece, koarata ece, ka ece da kibiribiroto kamor. 36Kijuka bobo ibulesin ice luipu adepar lusodit; kikonakis ŋul da nepenen. 37Kokau kijuka okokuke mamakec, kobala ebe, ‘Eyoŋete okokuka.’ 38 Konye nakeanyuniata ikeswamak okoku, kineranakinos bonik ka bonik kobalas ebe, ‘Erai lo ekeruman; aso kaarata ŋes, kabeata oni akeirumet.’ 39Kikamut ŋes kocakas kiŋa kamana naka emusabibu koarata. 40Aso naebunio ejakait loka amana naka emusabibu ikonakini ai ikeswamak kwi?” 41Kotemasi atiar, “Emudiari erono ikaronok kwi, ititiŋi amana naka emusabibu ikeswamak ice lueinanakinete araito kedolo apak.” 42 Kotema Yesu kes atiar, “Mam isiomito nuiwadikatai ebe: ‘Amoru nakeŋerete ikadukok Ŋin ŋes keponi kitaraunai nakapolon naka agor; Abuni akirot ŋin kama ejai Ejakait, Erai nakaumokin kakonyenewok.’ 43Kanuka ŋun katemari yes atiar, Elemario ajakanut naka Edeke kamakus, einakinio ateker ace naerai akeraito.” 44 Yenibirokini kuju amoru ŋin ebilibiliun; konye ŋin yenibirokin amoru, ipicipicari ŋes cut. 45Nakiirariata isasedotin lupeti ka Iparisayon awaragasiake, kojenut ebe inerakinit kes. 46Nakemoiata aikamun ŋes, kokuriakata ikodeta, naarai aomito ebe erai ŋesi enabi.221Koboŋok Yesu bobo, kiner kakes kawaragasia ebe, 2 “Ajakanut naka akuj eputos bala ekabaka lokipoikini okokuke epucit loka eiterane. 3Kijuka ikebulesin anyaraun lukenyaritai aponare opucit; konye kogiroto kwi aponare. 4 Kijuka bobo ibulesin ice, kobala ebe, ‘Kolimokis kwi lukenyaritai ebe, Koany, etemonok ikanyamat, adau aiar ikamoŋin ka ikatak lurobok, adau aitemonokin kere; kopotu do opucit.’ 5Konye kes mam apotu kopodos, koloto, ediopet omanikorike, ece agwelanarike, 6lukesalete da kikamut ikebulesin, kiswamakis nukepali, koarata. 7 Kosodi konyunyurikin ekabaka, kijuka akejore komudia ikaarak kwi, kicwe da erekec, 8Kosodi kotema ikebulesin atiar, ‘Itemokino epucit, konye lukenyaritai mam ibusakinito. 9 Aso koloto asisiarin nuka irotin, konyarautu ŋinituŋanan kere yenidumunete kobu opucit.’ 10Konyoutu ibulesin ŋul koloto orotin, kotukonokis lukedumunete kere, lueroko ka luejok da; kilelebun etogo loka epucit ipejok. 11Konye nakelomaria ekabaka aanyun ipejok, koany kanen etuŋanan lomam enapit anapito nakepucit. 12Kotema ŋes atiar, ‘Opapero, kilomuni ne biai komamei anapito nakepucit?’ Kobuta. 13 Kosodi kotema ekabaka ikejaanakinak atiar, ‘Koenata akanin ka akeje, koyaŋaasi kocakakis amuton nakokiŋa; kaŋina ejaun aimony ka airiamanakin ikel.’ 14Naarai ipu luenyaritai, konye luseuna ikidioko.” 15 Kosodete koloto Iparisayon kinerut ailok ŋes kakiroke. 16 Kiyakikis ŋes ikesisiakakec, nepepe ka Ikerodian, kobalas ebe, “Ekesisianakinan, kijeni ebe irai ijo lokabeit, isisianakini da erot loka Edeke kotoma abeit, kwabo mam ipodo idiotuŋanan kere; naarai mam iseseni ejautene loka ituŋa. 17Aso kolimokinai iwomit biai? Ibus kereka ainakin Kaisar esolo, arai bo mam?” 18Konye Yesu kojen akeceronis, kotema atiar, “Yes lukesoswai, kanukinyo kikoduniata eoŋ? 19Kitodikinai cani apesa naka esolo.” Koinunai adenari. 20Kotema Yesu kes atiar, “Nakaŋai aput na, ka nuiwadikatai?” 21 Kotemasi atiar, “Nuka Kaisar.” Kosodi kotema kes atiar, “Aso kotacakis Kaisar nueraas nuka Kaisar, ka Edeke da nueraas nuka Edeke.” 22 Kepuputu kesi koumokis; kinyeis ŋes koloto. 23 Kapaaran kaŋin kopotu Isadukayon mamakeŋ, luebalas ebe emamei ajarun; kiŋita ŋes, 24 kobalas ebe, “Ekesisianakinan, abu Musa kobala ebe, ‘Arai ketwana etuŋanan, komameete idwe, emanyi onaceke akeberu, tetere edumakini onaceke aur.’ 25Aso, kejaas iinacan ikanykaarei kamakosi; komany losodit, kotwana, ido naarai emamei ŋes aur kinyeinia onaceke akeberu; 26kwape kwaŋin lokiareit, ka lokiwuniet, aitodol kere ikanykaarei. 27Akaulo kakere, kotwana aberu ŋin da. 28Aso, kotoma ajarun, eraun ŋin aberu naka ŋai kakwi kalukanykaarei? Naarai kere apotu kojaas kaŋes.” 29Koboŋok Yesu kotema atiar, “Ipaarete yesi, naarai mam ijenete nuiwadikatai karaida apedor naka Edeke. 30Naarai kotoma ajarun mam emanyete karaida adukokinio, konye eraas bala imalaikan kotoma akuj. 31Bobo da kakiro nuka ajarun kokatwak, mam isiomito akirot nakinerit Edeke ebe, 32 ‘Arai eoŋ Edeke loka Aburaam, Edeke loka Isaak, ka Edeke loka Yakob da’? Mam ŋes erai Edeke loka lukatwak, konye loka lukajarak.” 33Nakiirariata ikodeta, koumokis akeisisianakin. 34 Kosodete kiirasi Iparisayon ebe etubuta Isadukayon, kotukokinos. 35 Ediopet kakes, ericakisila, kiŋit ŋes aiŋiset naekoduni, 36ebe, “Ekesisianakinan, aicorakinet ani erai nakapolon kotoma okisila?” 37 Kotema ŋes atiar, “Komina Ejakait Ekonideke kekonitau kere, ka akoniijar kere, ka akonicoa da kere. 38Na ŋes aicorakinet nakapolon nasodit. 39 Ejai da nakiareit naeputotor ebe, Komina ikoniidunyet kwape iminar bon. 40 Kotoma aicorakineta nu aarei kes icatunitotor ikisila kere ka inabin da.” 41 Ketukokinos Iparisayon, kiŋit Yesu kes ebe, 42 “Anyoika nuiwomito kanuka Kristo? Erai Okoku kaŋai?” Kotemasi ŋes atiar, “Loka Daudi.” 43Kiŋit kes ebe, “Aso kikwaikini ai Daudi enyarit ŋes Ejakait, koMoyo ebe, 44 ‘Abu Ejakait kotema Ekajakait ebe, Kiboikin akanika nakoteten, Aitodol neebwaikinia lukasurupokon kwap kakejekon’? 45Aso arai enyarit Daudi ŋes Ejakait, kikonakini bo ai erai ikekoku.” 46Mam apedorit ituŋanan aboŋokin ŋes akirot, ido ameun kapaaran kaŋin amamei bobo yeniketitiŋikinit aiŋit ŋes adiokirot.231 Kosodi kotema Yesu ikodeta ka ikekesisiak atiar, 2“Iboikinos ikewadikak ka Iparisayon oicoloŋ loka Musa; 3 aso nukilimokinete kere kiswamata, koricito da, konye sirikiswamata nuiswamaete kesi; naarai inerasi kesi kwabo mam iswamaete. 4Eenete arita nuelaŋir nuetioko aibwok, kisirioŋata ituŋa; kwabo mam kes ikulepek ekotosi atiror kebokoritikec. 5 Iswamaete aswamisiokec kere tetere eanyunete ituŋa; naarai italalaarete ikuniaikec luetoronokinete oreeta; itoojaete da atokito nuka inapenekec. 6 Ekotosi aibois nakapolon kopucin, ka iicoloŋo lukapolou kotoma atukosia, 7ka ayogao kagwelanareta, konyaritos ituŋa kes ebe Rabi. 8Konye yes, sirikinyaritai Rabi, naarai ejai yes ekesisianakinan ediopet, yes da kere iraas iinacan. 9Sirikinyarata ediotuŋanan papa kakwap, naarai ejai yes Papakus ediopet, loejai toma akuj. 10Sirikinyaritai da ikeŋarenok, naarai ejai yes ekeŋarenon ediopet, ŋes Kristo. 11 Konye loerai lokapolon kotomakus eraun ekusikejaanakinan. 12 Yenitopoloor bon itidisiario, yenitidisiar bon da itopoloorio. 13“Itukwi yes, ikewadikak ka Iparisayon, lukesoswai! Naarai igolokinete ituŋa ajakanut naka akuj; naarai yes ikulepek mam ilomarete, kwabo luelomarete da mam icamakinete alomar. [14Itukwi yes, ikewadikak ka Iparisayon, lukesoswai! Naarai icamete itogoi luka apuserun, kanuka ejose da ilipete ailipasia nueojak; kanuka ŋun kitubokinio aitelekarit.] 15Itukwi yes, ikewadikak ka Iparisayon, lukesoswai! Naarai irimirimete aŋolol ka akwap, tetere ibelokinete idiopetuŋanan, kedau aibelokin ituluorete ŋes ikoku yenika Geena irwan aarei aitelekarit yes ikulepek. 16 “Itukwi yes, ikeŋarenok lumudukiok, luibalas ebe, ‘Arai kiyapo ituŋanan kolimite eyekalu, mam akiro; konye ituŋanan yeniyapoi kolimite esabu loka eyekalu, aenikin.’ 17Ibaŋiok yesi, imudukiok! Naarai ali bo epol!, esabu arai bo eyekalu loitalauni esabu? 18Ebe da, ‘Arai kiyapo ituŋanan kolimite otem, mam akiro; konye ituŋanan yeniyapoi kolimite asubanit naejai otem, aenikin.’ 19 Imudukiok yesi! Naarai ani bo epol, ainakinet, arai bo etem loitalauni ainakinet? 20Aso yeniyapoi kolimite etem, iyapoi kolimite ŋes ka ŋinibore kere yenejai tomake; 21ŋin da yeniyapoi kolimite eyekalu, iyapoi kolimite ŋes ka ŋol da loiboie kotomakeŋ; 22 ŋin da yeniyapoi kolimite akuj, iyapoi kolimite eicoloŋ loka Edeke, ka ŋol da loiboikin tomakeŋ. 23 “Itukwi yes, ikewadikak ka Iparisayon, lukesoswai! Naarai itacakinete iitomoneta luka emopim, ka aneta ka ekumin, konye inyeis akiro nuepolok nuka ikisila, kes etube ka aitim ka aiyuun; ibusakinit yes aswam ŋun, komam inyeinete kwa da. 24Yes ikeŋarenok lumudukiok, ijililiete esirut, ilikorete da akaala! 25 “Itukwi yes, ikewadikak ka Iparisayon, lukesoswai! Naarai itesegarete kiŋa kakolin, ka asanin, konye kotoma ileleba aiŋat ka airaŋanut. 26 Ijo Eparisayot lomuduk! Kilot ber toma akoli ka asanit, tetere kiŋa da elauni. 27 “Itukwi yes, ikewadikak ka Iparisayon, lukesoswai! Naarai iputosi katesina nuiworiworitai kakwanis, etakanete kokiŋa ejokuka, konye toma ileleba akojo nuka lukatwak ka amodokok da kere. 28 Yes da kwape kwaŋin itakanete kokiŋa kaneejaas ituŋa koraas luidolito, konye kotomakus ileleba aisoswanut ka epali. 29“Itukwi yes, ikewadikak ka Iparisayon, lukesoswai! Naarai idukete atesin nuka inabin ka aitubus ailiin nuka ikadolitok, 30ka einer ebe, ‘Arai kiija isio kolo kapaarasia nuka lukapapaakosi, timam kiimorikikin kakes toma abukor aokot nuka inabin.’ 31 Kanuka ŋun itejenunos bonik ebe iraas yesi ikecedwe kalukearete inabin. 32Aso kilelebata aitemis naka lukapapaakus. 33 Yes imunwo, yes ailwek naka imusagan, ikuete biai atubokinio naka Geena? 34 Kanuka ŋun koany, kejukakini yes inabin, ka lukacoa, ka ikewadikak; iarete ice kakesi, ka aibubuonokin, idaete ice kotoma atukosiakus, irukitotor da koreria kere. 35 Tetere kibeikinete yes aokot kere nuka ikadolitok nukebukokinos kakwap, ageun kaokot nuka Abel ekadoliton, kiton aokot nuka Sakaria okoku loka Barakia, lokiarakinete kidiŋ aibois nakalaunan ka etem, 36Abeit katemari yes atiar, Eponikinete akiro ŋun kere atur na. 37 “Wu okwe, Yerusalem, Yerusalem, loeari inabin, ka aibiribir kamor ŋul lukiyakunio mamakon! Irwan imwa ai abu kakotor atukonokin ikonidwe, kwape etukonokinia akokor ikemiyoi kwap abebenokake, konye mam yes ekotokino! 38 Koany kinyeinere yes ekusitogo esil. 39 Naarai katemari yes atiar, Mam kianyunete eoŋ bobo cut, aitodol naitemariata ebe, ‘Isirereŋitoi ŋol loebunit kokiror loka Ejakait.’ ”241 Kolom Yesu koyekalu, ido napelosi, kopotu ikekesisiak mama ejai, kitodikis aduketa nuka eyekalu. 2 Konye Koboŋok kes kotema atiar, “Ianyut kereka nu kere? Abeit katemari yes atiar, mam esalakini ne amoru kuju kamoru, namam etiyakinio.” 3Nakiboio koMoru loka Iseitunin, kopotu ikesisiak mama ejai kaiyeiyea, kobalas ebe, “Kolimokinai, ejaunete akiro ŋun wori, anyoin da aanyunet naka abunorekon, ka naka esaŋe loka akwapin?” 4Koboŋok Yesu kotema kes atiar, “Kocoito kinyek ituŋanan aitapaar yes. 5 Naarai epote rwaru luipu kokirorika, ebalas ebe, ‘Eoŋ arai Kristo,’ itapaarete kesi luipu. 6 Iirarete yesi nuka ijiisio ka iemuto luka ijiisio; kocoito sirikiyaloŋoŋoto; naarai ibusakinit ŋun ajaun, konye koroko awasia edoluno. 7 Naarai enyoikini ateker asurokin ateker, ajakanut da asurokin ajakanut, ejaunun ebel ka amaran naka akwap aiboisio nuegelegela; 8eraas ŋun kere ageunet naka ariebo naka aidoun. 9 “Kapak kaŋin kijaikinete yes aiticanio, kiarete; kiŋarunete yes atekerin kanuka ekakiror. 10 Kosodete iguikinete luipu, kes da ebilanakinos ibotei, ka aŋaranar. 11 Enyounete inabin luipu lukeŋalak, itapaarete luipu. 12 Ido naarai iyatakina epali, ejoniari amin naka luipu. 13 Konye ŋin yenetitiŋikini kiton awasia, ŋes itajario. 14 Elimonokinio Akiro nu Nukajokak nuka ajakanut anatar akwapin kere, araut akajenak mama ejaas atekerin kere; kosodi konyet edoluni awasia. 15 “Aso naianyuniata etal loemudiari lokinerit enabi Daniel ebwoi kotoma aibois nakalaunan (kojenu ikasoman), 16ŋes konyet ekeriata ŋul luejaas Yudaya oroŋan; 17 ituŋanan yenejai kuju togo sirikedoku ayaŋaar iboro luejaas togoke; 18ido yenejai mana da sirikeboŋu kau ayaŋaar akenapito. 19Konye itukwi kes nuepotiete, ka nuitanakete da kapaarasia kaŋun! 20 Kilipata yesi kinyek akusikerit adolun kiporo, karaida apaaran naka asabato: 21 naarai ejaunos ican luipu, lumam peŋo etakanunito ameun kageunet naka akwap kiton kwana, ido mam bobo ejaunete cut. 22Arai kedim iŋoŋaritai apaarasia ŋun, timam kitajari akuan kere; konye kanuka luseuna iŋoŋario apaarasia ŋun. 23Kapak kaŋin arai kitemari yes ituŋanan atiar, ‘Koany, ejai Kristo ne,’ arai, ‘Ejai laije’, sirikiyuut. 24 Naarai enyounete lukriston lukeŋalak, ka inabin lukeŋalak, itoduunete ŋul aanyuneta nuepolok, ka nukaumokin da; tetere itapaarete luseuna arai epedoros. 25Koany, kadau aikwenyar yes eroko nu epona. 26 Aso arai kitemarete yes atiar, ‘Koany, ejai amodiŋ’; sirikiloto. Ebe da, ‘Koany, ejai toma agola’ sirikiyuut. 27Naarai kwape imiliaunia ageun kokide kotakani kiton to; ikoni nen abunore naka Okoku loka etuŋanan. 28 Naarai neejai akuan nakatwan, etukonokinos da atarukon nen. 29 “Konye atipet, ketuboros ican luka apaarasia kakwa, itumutonorio akoloŋ, mam elap ecauni, ibirununos aacer kotoma akuj, iianiianio da nukapedor nuka akuj; 30 kosodi konyet etakanuni aanyunet naka Okoku loka etuŋanan kokuju; kosodete konyet ibworos atekerin kere nuka akwap, eanyunete Okoku loka etuŋanan ebuni kodouon luka akuj kapedor ka aibuses naepol. 31 Ijukuni ikemalaikan keporoto loepol loka arupepe, etukonokinete luseunake anyoun kokwamin iwoŋon, ameun kosaŋe ediopet loka akuj kiton loce. 32“Kisisiautu akewaragan kama ejai etini; kedaut aketenieik alibun, itolomuni akekui, ijenunete ebe eapie apak naka aidweny; 33aso yes da naianyuniata ŋun kere, kojenut ebe eapie ŋesi, kokek, 34Abeit katemari yes atiar, mam atur na edaun aitodol naedolioto akiro ŋun kere. 35 Edaunos akuj ka akwapin, konye akakiro mam edaunos cut. 36 “Konye akiro nuka apaaran kaya ka esawa da emamei yenejeni, karaida imalaikan luejaas toma akuj, karaida Okoku, dimikito Papa bon. 37 Naarai kwape kejaatar apaarasia nuka Noa, ikonakini nen abunore naka Okoku loka etuŋanan. 38 Naarai kwape kejaatar toma apaarasia nukegeikinete akalele, anyamete, amasete, amanyasi, amanyio da, kiton apaaran nakelomaria Noa toma ataker, 39 komam kejenete kiton neadolunio akalele kolelea kere, ikonakini nen abunore naka Okoku loka etuŋanan. 40 Kapak kaŋin ejaikinos ituŋa iarei omanikor; eyaŋaario ediopet, inyeinio loce. 41Ejaikinos aŋor aarei iriete; eyaŋaario adiopet, inyeinio nace. 42 Aso kokwenyete; naarai mam ijenete apaaran anyoin naebunio Ejakait ikus. 43 Konye kojenutu na ebe, arai kejeni elopet etogo apak naka akuare naebunio ekokolan, tikekweny, kwabo timam kejalaki eketogo abokio. 44 Kanuka ŋun kokapakina yesi da; naarai ebuni Okoku loka etuŋanan kosawa lomam iwomito. 45“Aso iŋai bo ebulesit lomunot loepiriana da, lokedakakini ejakaitike ayait lukokaleke akoranakin kes ikecenyamat apakio nuedolito? 46Isirereŋitoi ebulesit ŋol loedumuni ejakaitike iswamai kwaŋin naebunio. 47 Abeit katemari yes atiar, Edakakini ŋes ayait luejaatar kere. 48 Konye arai ketema ebulesit ŋol lokaronon kotauke atiar, ‘Eyapa papaka,’ 49kogeu aibuŋa ibulesin lukaupake, ainyam ka aimat nepepe kalukamerak, 50ebuni ejakait loka ebulesit kaŋol kapaaran namam ŋes eomit, ka esawa da lomam ejeni, 51 etubi ŋes katutubeta aarei, itebei ekewai nepepe ka lukesoswai; ejaun kanen aimony ka airiamanakin ikel.251 “Kapakio kaŋun ituputoorio ajakanut naka akuj kapesuru atomon nukelemunete atalaikec koloto airiamun keteran. 2Akany kakes kebanaaka, akany da kepiriaka. 3Naarai nakeyaŋaariata nukebaŋaaka atalaikec, mam apotu koyaŋaasi akinyet da; 4Konye nukepiriaka koyaŋaasi akinyet kokubeikec nepepe katalaikec. 5Nakiyapia eteran, kiluranaros kere, kojotooros. 6Konye kidiŋebai kojau ecelet ebe, ‘Koany, eteran! Kolomutu kisiriamasi.’ 7Kosodete konyout apesur ŋun kere, kitemonokis atalaikec. 8Kotemasi nukebaŋaaka nukepiriaka ebe, ‘Koinakinai sio da amodiokinyetekus, naarai aduŋeosi akositalai.’ 9Konye koboŋokis nukepiriaka ebe, ‘Diat mam ilosikin sio kayes; koloto gwai mama ejaas ikagwelanarak kogwelut.’ 10Konye napelosete agwel, kobu eteran, kolomasi nuetemokino nepepe kaŋes toma opucit; kogolokinoi ekek. 11 Kokau kopotu apesur nuce da kobalas ebe, ‘Ejakait, ejakait, koŋaarai.’ 12 Konye Koboŋok, kotema atiar, ‘Abeit katemari yes atiar, mam kajeni yes.’ 13 Aso kokwenyete, naarai mam ijenete apaaran karaida esawa. 14 “Naarai esubit bala etuŋanan loelosi apejo konyarau ikebulesin, kititiŋ kes ikeboro. 15 Koinak ediopet atalatan akany, ka ece aarei, ka ece da adiopet, ŋolituŋanan kwape kejaar apedorike; kosodi kolot akwap ace. 16Atipet kolot ŋol lokedumuni atalatan akany, kogwelana, kitobon ameda naka atalatan ace akany. 17Kwape kwaŋin lokeinakinitai aarei, kitobon ameda naka atalatan ace aarei. 18Konye lokeinakinitai atalat adiopet, kolot kobok alup, kibwa apesan nuka ejakaitike. 19Kosodi ketuboros apaarasia nuipu, kobu ejakait loka ibulesin kaŋul, kimar kakes akepesan. 20Kobu lokeinakinitai atalatan akany, koyau atalatan ace akany, kotema atiar, ‘Ejakait, ibu kititiŋ eoŋ atalatan akany; koany, etoboŋu atalatan ace akany.’ 21 Kotema ejakaitike atiar, ‘Ejok, ebulesit ijo loejok lomunot da; ibu korau lomunot kaluikidioko, kadakakini jo ayait luipu; aso kolom ma toma aiyalama naka ejakaitikon.’ 22Kobu da ŋol lokeinakinitai atalatan aarei, kotema atiar, ‘Ejakait, ibu kititiŋ eoŋ atalatan aarei; koany, etoboŋu atalatan ace aarei.’ 23 Kotema ejakaitike atiar, ‘Ejok, ebulesit ijo loejok lomunot da; ibu korau lomunot kaluikidioko, kadakakini jo ayait luipu; aso kolom ma ijo da toma aiyalama naka ejakaitikon.’ 24Kobu da ŋol lokeinakinitai atalat adiopet, kotema atiar, ‘Ejakait, abu kajen ebe irai ijo etuŋanan loeninik, idwenyi kama nemam iyeikinit, itukonokini kanemam isiarakinit; 25aso kakurianar, kalot kebwa akonitalat kalup: koany, napekon na.’ 26Konye Koboŋok ejakaitike kotema atiar, ‘Ebulesit ijo loerono loeloŋwana! Ibu kojen ebe adwenyi kama nemam ayeikinit, atukonokini da kanemam esiarakinit; 27ti ibusakinit ijo ainakin akapesan mama ejaas ikeŋadak arupian, eoŋ da kabu tikadum nuaraas nukaŋ ka amedakec da. 28Aso kodemasi ŋes atalat, koinakis ŋol loejaas atalatan atomon. 29 Naarai yenejai ibore einakinio, ido edumuni luipu noi; konye yenemamei ibore, ŋin da yenejaas kaŋes edemario. 30 Kocakakisi ebulesit ŋol lomam ajokis amuton nakokiŋa: ejaun kanen aimony ka airiamanakin ikel.’ 31 “Naebunio Okoku loka etuŋanan kotoma aibusesuke, ka imalaikan da kere nepepe kaŋes, iboikini oicoloŋoke loka aibuses; 32 etukonokinos atekerin kere akonyeneke, etiakatiakai ŋesi kes kwape etiakatiakaa ekecokon amerekekin ka akinei: 33 ibwaikini amerekekin akanike nakoteten ka akinei da akanike nakokediany. 34Kosodi etemari ekabaka lukakanike nakoteten atiar, ‘Kopotu yesi lukisirereŋit Papaka, kirumata ajakanut nakitemonokinitoi ameun kaisub akwapin; 35 naarai kariebi eteŋei, ipotu koinakis aimuj, kajakit akur, ipotu koinakis numatan; arai epejonon, ipotu kisukunyikis; 36amujalal, ipotu kitanapa; adeka, ipotu koanyanasi; ajai toma aidaris, kopotu mama ajai.’ 37 Kosodete eboŋokinete ikadolitok ebe, ‘Ejakait, kipou kaanyutu jo wori kiriebi eteŋei, kesimujata? Arai kijakit akur, ketamata? 38Kipou kaanyut jo wori irai epejonon, kesukunyikis? Arai imujalal, ketanapa? 39Kipou da kaanyutu jo wori ideka, arai toma aidaris, kapotu mama ijai?’ 40 Kanen eboŋokini ekabaka ebe, ‘Abeit katemari yes atiar, Kwape kiswamakiniata idiopet kalu iinacanaka ludidik, ipotu kiswamakis eoŋ.’ 41 Kosodi do etemari lukakanike nakokediany atiar, ‘Irwa yesi, lukilamakinitai, kolomasi akim naka ikar kere naitemokinitoi Satan ka ikemalaikan. 42Naarai kariebi eteŋei, mam ipotu koinakis aimuj; kajakit akur, mam ipotu koinakis numatan; 43arai epejonon, mam ipotu kisukunyikis; amujalal, mam ipotu kitanapa; adeka, ajai da toma aidaris, mam ipotu koanyanasi.’ 44Kosodete eboŋokinete kesi da ebe, ‘Ejakait, kipou kaanyutu jo wori iriebi eteŋei, arai kijakit akur, arai irai epejonon, arai imujalal, arai ideka, arai ijai toma aidaris, komam kijaanakinit jo?’ 45Kanen eboŋokini kes ebe, ‘Abeit katemari yes atiar, Kwape mam kiswamakiniata idiopet kaludidik kalu, mam ipotu kiswamakis eoŋ.’ 46 Elosete ŋul alomar toma aiticanio naka ikar kere, konye luedolito elosete toma aijar naka ikar kere.”261 Nakedaunia Yesu akiro ŋun kere, kotema ikekesisiak atiar, 2 “Ijenete ebe esalito apaarasia aarei, kosodi ejaun Aleleŋ, ijaikinio Okoku loka etuŋanan aibubukinio.” 3Kosodete kotukonokinos isasedotin lupeti ka imakio luka ituŋa toma alaro naka esasedoti lopeti, ekekiror Kaiapa, 4kinerut nepepe tetere ikamunete Yesu kapirianut kosodete aiar. 5Konye kobalas ebe, “Mere toma apak naka epucit, kinyek ecelet ajaun kotuŋa.” 6 Nakejaar Yesu Betania togo loka Simon lokatapon, 7 kobu aberu mamakeŋ nakejai ekube loka akinyet naketiai loepol noi, kobukok akouke, iboie enyami, 8Konye nakeanyuniata ikekesisiak, konyunyuras kobalas ebe, “Anyoin aimadiŋ na? 9Naarai tikegwelar akinyet na apesan nuipu, akoranakin lukican.” 10 Konye kojenu Yesu, kotema kes atiar, “Kanukinyo itiyaloŋoŋooto aberu na? Naarai keswamaki eoŋ aswam naejok. 11 Naarai apaarasia kere ejaas lukican nepepe kayes, konye eoŋ mam kija kayes apaarasia kere. 12Naarai kanu abukokinia akuanaka akinyet ŋin, eswama kwaŋin tetere itemokini eoŋ aidaio. 13Abeit katemari yes atiar, Neelimonokinio Akiro nu Nukajokak kotoma akwapin kere, ŋin naeswama aberu na elimorio akiitunitor ŋes.” 14 Kapak kaŋin kolot ediopet kalutomon kaarei, ekekiror Yuda Isikariot, mama ejaas isasedotin lupeti, 15 kotema kes atiar, “Kiinakinete eoŋ inyo arai kejaik ŋes mamakus?” Kotacakis ŋes atutubeta akaisauni nuka epuesa. 16 Ameun kapak kaŋin komoote apak naejok aijaikinia ŋes. 17 Kapaaran nasodit naka imugatin lumam itubuunitoi, kopotu ikesisiak mama ejai Yesu, kotemasi atiar, “Ikoto ketemokis lali konyamak lukaleleŋ?” 18 Kotema atiar, “Kolot ore mama ejai mutan, kolimokis ŋes ebe, ‘Ebala Ekesisianakinan ebe, aapu akapak; etodolikini Aleleŋ orekon nepepe kikakesisiak.’ ” 19Kiswamata ikesisiak kwape kicorakinia Yesu, kitemokis lukaleleŋ. 20 Nakimukoki akwap, kiboikin ainyam nepepe kikesisiak lutomon kaarei; 21napenyamete, kotema atiar, “Abeit katemari yes atiar, ediopet kayes kabilakini eoŋ ebotet.” 22Kitururwoto noi, kogeut aiŋitanar ŋes ediopet ediopet ebe, “Ŋes ca nat eoŋ ya, Ejakait?” 23 Koboŋok ebe, “Ŋol lokicunyi keoŋ atibo, ŋes kabilakini ebotet. 24Elosi Okoku loka etuŋanan kwape kiwadikatere kanukeŋ, konye itukwi etuŋanan ŋol loebilakini Okoku loka etuŋanan ebotet! Tiejok kama ketuŋanan kaŋol arai mam kewuruunitai.” 25Koboŋok Yuda lokebilakinit ŋes ebotet kotema atiar, “Ŋes ca nat eoŋ ya, Rabi?” Kotema atiar, “Ijo ibala.” 26 Napenyamete, kolem Yesu emugati, kisirereŋ, kobilibil, koinak ikesisiak, kobala ebe, “Kolemutu, konyamata; lo ŋes akakuan.” 27Kolem akoli da, kedau aimal, koinak kes, kobala ebe, “Komata yesi kere lo: 28 naarai nu kes akaokot nuka aitutuket, nuebukoros kanuka ikepuak alemar aronisio, 29Katemari yes atiar, Mam amasi bobo cut nuka araito na naka emusabibu kiton apaaran ya naamasia nukitetiak nepepe kayes kotoma ajakanut naka Papaka.” 30 Nakedauniata ayoore ekosio, kolomasi koloto Moru loka Iseitunin. 31 Kosodi Yesu kotema kes atiar, “Iguikinos yesi kere kakuar kana kanukaŋ; naarai iwadikatai ebe, ‘Ebuŋai rwaru ekecokon, isiarakinos amerekekin nukosipan.’ 32 Konye kadau ajarun, keŋarenikinete yes alosit Galilaya.” 33Koboŋok Petero kotema ŋes atiar, “Karaida kiguikinos kere kanukon, konye eoŋ mam keguikini cut.” 34 Kotema Yesu ŋes atiar, “Abeit katemari jo atiar, akuar na, eriŋa ekokoro keruikino, kiŋeri eoŋ irwan auni.” 35 Kotema Petero atiar, “Karaida kebusakinit atwanare kajo, mam kaŋeri jo cut.” Kinerata ikesisiak kere da kwape kwaŋin. 36 Kosodi kodolok Yesu nepepe kakes aibois naenyaritai Getesemane, kotema ikekesisiak atiar, “Kiboikinos ber ne, kekunya ŋina ailip.” 37 Koyaŋa Petero ka odwe iarei luka Sebedayo, kogeu aiturur ka aburun. 38 Kosodi kotema kes atiar, “Itururwei ekatau noi, aapiar atwanare; kosalata yesi ne, kokwenya nepepe keoŋ.” 39 Kikunyak nediokasilon, kibiror ebuburia, kilip ebe, “Wu Papaka, arai epedoros, kenac akoli na; konye mere nuakoto eoŋ, dimarai kwape ikotor ijo.” 40Kobu mama ejaas ikesisiak, kodum kes ejotoete; kotema ŋesi Petero atiar, “Aso ca mam ipedorete aikweny nepepe keoŋ esawa ediopet? 41 Kokwenya, kilipa kinyeis alomar toma acodunio; ekoto bo emoyo, konye ekalanyana akuan.” 42Koboŋo bobo nakiareit kilip ebe, “Papaka, arai mam epedori akoli na ainac komam eoŋ amasi, kiswamai do nuikoto ijo.” 43Kobu bobo kodum kes ejotoete, naarai eluranaros ajo. 44 Kinye kes bobo, kolot kilip nakiwuniet, inera bobo akiro kwapekwa. 45Kosodi kobu mama ejaas ikesisiak, kotema kes atiar, “Iroko kereka ijotoete, iyeŋito? Koany aapu esawa, einakinio Okoku loka etuŋanan akanin nuka ikadiakanarak. 46 Konyoutu, kaloto; koany, eapie lokabilaki ebotet.” 47 Napinera ŋesi kobu Yuda, ediopet kotomon kaluarei, koupas kekodet loepol lokejaas ikileŋa, ka ibelai, epote kama ejaas isasedotin lupeti ka imakio luka ituŋa, 48Koinakinite lokebilakini ŋes ebotet kes aanyunet ebe, “Loanui eoŋ ŋes ŋol; kikamutu ŋes.” 49Atipet kolot mama ejai Yesu, kotema atiar, “Yoga, Rabi!” Konu noi, 50Kotema Yesu ŋes atiar, “Opapero, kiswama nukiyaunito.” Kosodete kikunyakis koriosi akecekanin kikamut Yesu, 51Ido koany, ediopet kaŋul kalukejaas kaYesu korio akekan, kout ekekileŋ, kinom ebulesit loka losasedoti lopeti, kojepa akekit. 52 Kosodi Yesu kotema ŋes atiar, “Kinyakak ekileŋikon aiboisike; naarai kere luekapito ikileŋa, emudiari ekileŋ. 53 Arai iwomitos ebe mam apedori aiŋaiŋa Papaka, kejukak kwape kwana irioŋeta luedeparito itomon ka luarei luka imalaikan? 54Aso edolete biai nukiwadikatai ebe ibusakinit ŋun ajaun?” 55 Kosawa kaŋol kotema Yesu ikodeta atiar, “Ilomutu teni yesi kikileŋa ka ibelai aikamun eoŋ, bala ekaŋatan? Ŋinipaaran eboonokin kotoma oyekalu esisianakini, komam kikamunete eoŋ. 56 Konye ajaut nu kere tetere edolete nukiwadikato inabin.” Kosodete kojalakis ŋes ikesisiak kere, kokerata. 57 Lukikamunete Yesu koyaŋaasi mama ejai Kaiapa losasedoti lopeti, neketukonokina ikewadikak ka imakio. 58Kotupa Petero kama elwana, kiton alaro naka losasedoti lopeti, koloma toma, kiboikin nepepe ka ikedarak aanyun nuebeikinete. 59Aso komoata isasedotin lupeti ka aurianet kere ikajenak lukeŋalak aluikin Yesu tetere earete, 60mam edumuna, karaida ketakanut ikajenak luipu lukeŋalak, Konye kokau kotakanut iarei, 61 kobalas ebe, “Abala ŋol ebe, apedori aiket eyekalu loka Edeke, ka adukokin apaarasia auni.” 62Kosodi kobwo losasedoti lopeti kotema atiar, “Mam ca bo iboŋokini akirot? Anyoika ŋun nuetejenut ŋul aluikin jo?” 63 Konye kililiŋ Yesu. Kotema losasedoti lopeti ŋes atiar, “Kesiyapoi jo mama ejai Edeke lokajaran, kolimokinai cani sio arai irai ijo Kristo, Okoku loka Edeke.” 64 Kotema Yesu ŋes atiar, “Ijo ibala, Konye katemari yes atiar, Amear kwana ianyunete Okoku loka etuŋanan iboie kakan nakoteten naka Apedor, ebuni kotoma odouon luka akuj.” 65 Kosodi kocil losasedoti lopeti ikenapen, kobala ebe, “Ainyanaki, Anyoika bobo kipudar ikajenak? Koany, iirasi kwana akeinyanakin. 66 Iwomitos anu?” Koboŋokis ebe, “Ibusakinit atwanare.” 67 Kosodete kimwaanakis aimul akonyeneke, kodipidipoto ŋes; ice da kibapanasi, 68kobalas ebe, “Ijo Kristo, kodwarak iŋai! Iŋai bo kibuŋa?” 69Kiboie Petero kokiŋa kotoma alaro: kobu apese mama ejai kobala ebe, “Ijai nan ijo da nepepe kaYesu Egalilayat.” 70Konye koŋer kakonyen nuka ituŋa kere, kobala ebe, “Mam ajeni nuinera ijo.” 71Konye nakelomunia okek, koany acepese ŋes, kotema ŋesi lukejaas nen atiar, “Ajai lo da nepepe ka Yesu Enasarayot.” 72Koŋer bobo kaiyapo ebe, “Mam ajeni etuŋanan ŋol.” 73Nediokasilon kopotu lukebwoete kanen, kotemasi Petero atiar, “Abeit irai ijo lokec, naarai itejenunit ekoniiner.” 74Kosodi kogeu eilam ka aiyapo ebe, “Mam eoŋ ajeni etuŋanan ŋol.” Atipet koruik ekokor. 75 Kiitu Petero akirot nakelimokini Yesu ŋes ebe, “Eriŋa ekokor keruikino, kiŋeri eoŋ irwan auni.” Koloma kiŋa komonyi noi akiyo.271 Napekiwala akwap, kinerut isasedotin lupeti ka imakio kere luka ituŋa asurokin Yesu aiar; 2 koenata ŋes, koyaŋaasi, kijaikis Pilato lokerai ekayaiton. 3 Kosodi Yuda lokebilakini ŋes ebotet, keanyu ebe adaun atubokin aitelekar, kiitok, kinyakak isasedotin lupeti ka imakio atutubeta akaisauni nuka epuesa, 4kobala ebe, “Abu kadiak, abilakin ebotet aokot numam akirot.” Konye kotemasi kesi atiar, “Anu nat kamakosi? Nukon bo ŋun.” 5 Kocakak atutubeta kwa nuka epuesa aibois nakalaunan, konyou; kolot komiedakin. 6 Kolemasi isasedotin lupeti atutubeta nuka epuesa, kobalas ebe, “Mam ibus aibwaikin kes aiŋadis, naarai eraas etiai loka aokot.” 7Kinerut, kogweluniata emanikor loka ekajean, aidaanakin nen ikalotok. 8 Kanuka ŋun ŋes enyaritere emanikor ŋol, Emanikor loka Aokot, kiton lolo. 9 Kosodi kitodolikinoi akirot nakinerit Yeremia enabi ebe, “Apotu kolemasi atutubeta akaisauni nuka epuesa, etiai loka ŋol kalokitirianitai, lokitirianete ice kodwe luka Isirael: 10kogweliata emanikor loka ekajean kwape kicorakinia Ejakait.” 11 Kobwo Yesu kakonyen nuka ekayaiton; kiŋit ekayaiton ŋes ebe, “Irai kereka ijo ekabaka loka Iyudayan?” Kotema Yesu atiar, “Ijo ibala.” 12 Nakiwosaata ŋes isasedotin lupeti ka imakio mam eboŋokino akirot. 13Kosodi kotema Pilato ŋes atiar, “Mam kereka jo ipupi nuetia nen nuiwosaete kesi?” 14 Mam ŋes eboŋokino, karaida amodiokirot: koumok noi ekayaiton. 15 Ketapit ekayaiton kopucit aosianakin ekodet eenat ediopet lokekotonokinos, 16Kejaas keenat loajenikina kapak kaŋin, lokenyaritai Baraba. 17Naketukokinotor, kotema Pilato kes atiar, “Ikotosi kaosikis yes iŋai? Baraba arai bo Yesu loenyaritai Kristo?” 18 Naarai ajeni ŋesi ebe ainakis kanuka ekolo. 19Nakiboikinor oicoloŋ loka aitub, kiyakik akeberu ŋes, kotema atiar, “Sirikiswamak ekadoliton ŋol adiokirot; naarai keticani nuipu kairujasit kakuar kana kanukeŋ.” 20Kosodete kisidikoto isasedotin lupeti ka imakio ikodeta tetere ilipete Baraba, ka amudiar Yesu. 21Konye Koboŋok ekayaiton kotema kes atiar, “Ikotosi kaosikis yes iŋai ka luarei?” Kobalas ebe, “Baraba,” 22Kotema Pilato kes atiar, “Aso do ekonakini ai Yesu loenyaritai Kristo?” Kobalas kere ebe, “Kibubukinoi.” 23Kobala ebe, “Kanukinyo? Naanyoin aronis nakiswamai?” Konye kiyatakisi kesi aiworo noi ebe, “Kibubukinoi.” 24 Kosodi keanyu Pilato ebe mam nuepedori, konye iyata ecelet, kolem akipi, kilot akekanin kakonyen nuka ekodet, kobala ebe, “Emamei eoŋ akirot kotoma aokot nuka etuŋanan kalo loedolit: nukus bo ŋun.” 25 Koboŋokis ituŋa kere ebe, “Kobeikisi akeokot sio, ka ikosidwe da.” 26Kosodi koosik kes Baraba: konye kedau aida Yesu, koinak tetere ibubukinio. 27 Kosodete iserikalei luka ekayaiton koyaŋaasi Yesu toma opuraitorion, kotukonokin erioŋet kere mama ejai, 28Kolacasi ikenapen, kitanapa anapito nakareŋan, 29Kojeata aboko naka ikukwa, kitanapikis akouke, ka agada da kakanike nakoteten; kokukonokinos kakonyeneke, kokienatar, kobalas ebe, “Yoga, ijo Ekabaka loka Iyudayan!” 30 Kimwaanakis aimul, kodemasi agada ŋin kinomonomiata akouke. 31 Kosodete kedautu akienar ŋes, kolacasi anapito ŋin, kitanapa ikenapen, koyaŋaasi aibubukin. 32Napenyounete kore, kodumut etuŋanan Ekurenayot, ekekiror Simon: kitiŋaikis ŋol airioŋ emusalaba loka Yesu. 33Nakedolioto aibois naenyaritai Gologota, apolouke ebe, Aibois naka Abelekek naka Akou, 34 koinakis aimat ebino loinyalakinitai epiu: kedau akiir, koŋer aimat. 35 Kedautu aibubukin, kokorokorata akenapito, kailamilam eroet. 36Kiboikinos kidarata ŋes kaŋina. 37Kikajakis kuju kakouke nueosatai ŋes nuewadikatai ebe, LO ŊES YESU EKABAKA LOKA IYUDAYAN. 38 Kapak kaŋin kibubukinoi ikaŋatak iarei nepepe kaŋes, ediopet kakanike nakoteten, ka ediopet da kakanike nakokediany. 39 Lukitorito nen koinyanakinete ŋes, kimuŋumuŋete da akecekwes, 40 kobalas ebe, “Ijo lokaketan eyekalu, ka aiduk da kotoma apaarasia auni, kitajarun cani: arai irai ijo Okoku loka Edeke, kodoku komusalaba.” 41Kikote nen da isasedotin lupeti kokienatar ŋes, nepepe ka ikewadikak ka imakio, kobalas ebe, 42“Etajar ice; mam epedori aitajarun bon. Erai ŋesi Ekabaka loka Isirael; kodoku kwana komusalaba, kiyuuni do ŋes. 43 Emunokina Edeke; mere cani kitajar ŋes kwana, arai ekoto ŋes; naarai abu kinera ebe, ‘Arai eoŋ Okoku loka Edeke.’ ” 44Ikaŋatak kwi da lukibubukinitoi nepepe kaŋes, korutonokis ŋes akiro kwapekwa. 45Ameun kosawa lokikanyetekape kojau amuton akwap kere kiton osawa lokikanyetekaoŋon. 46 Bala esawa lokikanyetekaoŋon kodelo Yesu keporoto loepol, kobala ebe, “Eli, eli, lama sabakatani?” apolouke ebe, “Ekadeke, Ekadeke, kanukinyo kijalakinia eoŋ?” 47Ice kaŋul kalukebwoete kanen, kiirasi, kobalas ebe, “Enyarit ŋol Eliya.” 48 Atipet koker ediopet kakesi, kolem acago, kileleb ebino loedwar ria, kibwaik toma agada, kitamat ŋes, 49Kobalas ice ebe, “Kinyek; kaanyutu arai cani ebuni Eliya aitajar ŋes.” 50Kodelo Yesu bobo keporoto loepol, kojal ekemoyo. 51 Ido koany, kocila aigalisit naka eyekalu kaarei, ameun kokuju kiton kwap; komaran akwap; kobwaŋabwaŋas amor; 52koŋaanaros atesin; kitonyounoi awat nuipu nuka lukalaunak kalukolo kejotooros; 53 kedau Yesu ajarun kolomut katesin, kolomasi ore lokalaunan, kitakanikinos luipu. 54Nakeanyuniata ekapolokiton ka ŋul da lukejaas kaŋes idarete Yesu, amaran naka akwap, ka akiro da nukiswamas, kokuriakaros noi, kobalas ebe, “Abeit kerai teni ŋol Okoku loka Edeke.” 55 Kojaas da aŋor nuipu ŋina, nukesesenete kama elwanikina, nuketupito Yesu anyoun koGalilaya, ijaanakinete ŋes; 56 kotomakec kejai Mariam Magadalene, ka Mariam toto naka Yakob ka Yosep, ka toto naka odwe luka Sebedayo. 57 Kosodi napekitiboŋ, kobu ekabaran loka Arimataya, ekekiror Yosep, ŋes da elopet kerai ekesisian loka Yesu. 58Kolot ŋol mama ejai Pilato kilip akuan naka Yesu. Kosodi kicorak Pilato ŋes ainakinio. 59Kolem Yosep akuan, konunukik toma obaputa Ioelai, 60 kibwaik toma atesike nakitetet, nakebokit ŋesi atiida; kikokorik amoru naepol agolokinio ekek loka ates, kolot. 61Kejaas nen Mariam Magadalene ka Mariam ace, iboiete kotereikina ates. 62Apaaran naatupakini, ŋes atemar ebe, akaulo kapaaran naka Aitemonokin, kotukokinos isasedotin lupeti ka Iparisayon mama ejai Pilato, 63 kobalas ebe, “Ejakait, kiitunit isio ebe abala lem ekeŋalan ŋol naarokor ejari ebe, ‘Akaulo kapaarasia auni ajaruni.’ 64Kanuka ŋun kicorak kidarai ates kojokan aitodol apaaran nakiwuniet, kinyeis ikekesisiak alosit akokwar ŋes, kosodete alimonokin ituŋa ebe, ‘Ajaru kotoma okatwak’ itelekari do aiŋal nakokau ya nasodit.” 65Kotema Pilato kes atiar, “Ejaas yes iserikalei lukedarak; koloto, kidarata kojokan kwape ipedoriata.” 66 Koloto do kidarata ates kojokan, kipucakis amoru ka aibwaikin da iserikalei lukedarak.281 Akaulo kasabato, napecila kide kapaaran nasodit nakasabato, koloto Mariam Magadalene ka Mariam ace aanyun ates. 2Ido koany, kejai amaran naka akwap; naarai kodok emalaika loka Ejakait kokuju, kobu kikokoro amoru awai, kiboikin kujuke. 3 Kotakanu bala eimilia, ikenapen da kiliacanito kiac. 4Komaranata ikedarak kanuka akurianar ŋes, kosubata bala lukatwak, 5Koboŋok emalaika kotema aŋor atiar, “Sirikikuriakaros yesi; naarai ajeni ebe imootos Yesu lokibubukinitoi. 6 Emamei kane; naarai ajaru, kwape eneritor. Kopotu koanyut aibois naeperikinitoi. 7 Koloto yesi da atipet, kolimokis ikekesisiak ebe, ‘Ajaru kotoma okatwak’; ido koany, kiŋarenikini yes alosit Galilaya; ianyikinete ŋes ŋina; koany kadau alimokin yes.” 8Konyout atipet kates kakurian ka aiyalama naepol, kokerata alimokin ikekesisiak. 9Ido koany, kiriamakin Yesu kakes, kobala ebe, “Yoga!” Kikunyakis kitiŋata akekejen komaata ŋes. 10 Kosodi Yesu kotema kes ariar, “Sirikikuriakaros; koloto kolimokis ikainacan koloto Galilaya, ŋina kaanyikinete.” 11Napelosete, koany, kolomasi ice kokedarak ore, kolimokis isasedotin lupeti akiro nukedoikinete, 12Kotukokinos nepepe kimakio kinerut, koinakis iserikalei arupiyan nuipu, 13 kobalas ebe, “Kinerata yesi ebe, ‘Apotu ikekesisiak kopotu kuare, kokokwasi ŋes kijotoi isio.’ 14Arai kiirar akirot na kama ekayaiton, kimaimai isio ŋes, kinyeis yes aiticanio.” 15Kolemasi arupiyan kiswamata kwape kisisianakinitere; kisiarakin akirot na toma oYudayan kiton lolo. 16 Konye kolot ikesisiak itomon ka lodiopet Galilaya, oroŋat lokicorakinit kes Yesu, 17Nakeanyuniata ŋes, komaata; konye kobuonokinos ice kakesi. 18 Kobu Yesu neejaas kinera kakes, kotema atiar, “Kainakin eoŋ apedor kere kokuju kakwapin da. 19 Aso kolot kituluosi lukatekerin kere ikesisiak, kibatisaete kes kokiror loka Papa, ka loka Okoku, ka loka Emoyo Lokalaunan; 20 kisisianakinete kes aricit akiro kere nukecorakinit yes; ido koany, ajai eoŋ nenipe kayes apaarasia kere, kiton awasia naka ikar kere,” |