Luka11Naarai apotu luipu kotamakis aiwadik kotenan akiro ŋun nuetodolikinos kamawok, 2 kwape kiilimonokiniata kwi lukeraas ikajenak lukeanyunito ameun kageunet, ido ikejaanakinak luka akirot kaŋin, 3 ketojok eoŋ da, naarai abu kamoote abeit naka akiro ŋun kere ameun kanusodit, kesuduny da, kewadikak jo Teopilo lokaibuses, 4tetere ijenuni abeit naka akiro nukiisisianakinio. 5 Kapaarasia nuka Kerode ekabaka loka Yudaya, kejai esasedoti ekekiror Sakaria, loka abeanakin naka Abiya: kerai aberuke naka aur naka Aaron, ekekiror Elisabet. 6Keraas kesi kere luedolito kakonyen nuka Edeke, kolosenenete kaicorakineta ka ikisila da kere luka Ejakait komam aitoronio. 7Kemamei kes ikoku, naarai arakakit Elisabet, ido kemojoŋito kesi kere. 8Kosodi kanen, nakiswamaa ŋesi aswam naka esasedoti kakonyen nuka Edeke, kwape kebeikinitor, 9 kwape kejaar epone loka esasedotene, kobeik ŋes eroet alomar aibois nakalaunan naka Ejakait, aisupuruun lukisupurununo. 10Kilipi ekodet kere loka ituŋa kokiŋa kosawa loka aisupuruun. 11Kitakanikin ŋes emalaika loka Ejakait ebwoi kowai lokoteten loka etem loka aisupuruun. 12Nakeanyunia Sakaria ŋes, kiyaloŋoŋ, kokurianar. 13Konye kotema emalaika ŋes atiar, “Sakaria, sirikikurianar; naarai eirar akoniilip, kiwurikini jo akoniberu Elisabet ikoku yenisapat, imaikini ekekiror Yokana. 14Ilakar ijo, iyalamikin; ido isiyalamikinete luipu akeurunio. 15 Naarai eraun lokapolon kakonyen nuka Ejakait, kwabo mam emasi ajon karaida nuitemerete; ilelebun Emoyo Lokalaunan, ameun kakoik naka totoke, 16Ido inyakuni ŋesi luipu kodwe luka Isirael mama ejai Ejakait Ekecedeke. 17 Iŋareni kakonyeneke komoyo ka apedor naka Eliya, ainyakun itauon luka lukapapa mama ejaas idwe, ka lukepali mama ejai acoa naka ikadolitok; aitemonokin Ejakait ituŋa luesikapikinitai.” 18 Kotema Sakaria emalaika atiar, “Ajenuni biai ŋun? Naarai amojoŋit eoŋ, akaberu da atuboros ikekar.” 19 Koboŋok emalaika kotema ŋes atiar, “Eoŋ Gaburiel, loabwoi kakonyen nuka Edeke; keyakuunitai einer kajo, ka alimokin jo akiro nu nukajokak. 20 Ido koany, ililiŋi ijo komam ipedori einer, aitodol apaaran naedolioto nu, naarai mam iyuunit akakiro, nuitodolikinio kapakikec.” 21Edarito ituŋa Sakaria, koumokis kanu etumoror kaibois nakalaunan. 22Nakelomunia, mam apedori einer kakes: kojenut ebe aanyunit aitapoet kotoma aibois nakalaunan: kiyatak aitetem kakanin, kosal mam epedori einer. 23Kosodi kanen, nakitodolikinotor apaarasia nuka aijaanakinike, koboŋo oreke. 24Akaulo kapaarasia kaŋun kopotuu akeberu Elisabet; koŋop ilapio ikany, kobala ebe, 25 “Kekonak Ejakait kwanata kapaarasia nukasesenia, tape kawoori ikaleic kakonyen nuka ituŋa.” 26Kolap lokikanyetekape aponi kijukunai emalaika Gaburiel kama ejai Edeke alosit Galilaya ore Nasaret, 27 mama ejai abekot nakisinerit ekiliokit ekekiror Yosep, lokokek loka Daudi; ekiror loka abekot ŋes Mariam. 28 Koloma emalaika mama ejai, kotema atiar, “Yoga, naisirereŋitoi noi, ejai Ejakait kajo!” 29Konye kiyaloŋoŋ ŋesi noi kanuka akiroke, koomoom kotauke ebe ikoni bo ai ayogan na, 30Kotema emalaika ŋes atiar, “Sirikiyoŋ, Mariam, naarai idum asianut kama ejai Edeke. 31 Ido koany, ipotuuni, idouni ikoku yenitelepat, imaikini ekekiror Yesu. 32 Eraun ŋol lokapolon, enyarao Okoku loka je Ioejai kuju kakuj; Ejakait Edeke einakini ŋes eicoloŋ loka Daudi papaake, 33 irumi ekek loka Yakob ikar kere; akejakanut da mam enaŋi.” 34Kotema Mariam emalaika atiar, “Ikwaikinete bo ai ŋun, naarai mam ajeni ekiliokit?” 35 Koboŋok emalaika ŋes ebe, “Kidoikini jo Emoyo Lokalaunan, kirapiari agogoŋ naka Je loejai kuju kakuj; kanuka ŋun yeneuruunio enyarao yenikalaunan, Okoku loka Edeke. 36Ido koany, Elisabet kinacikon, ŋes da epotiei ikoku yenitelepat kotoma amojoŋuke; elap lo da ŋes lokikanyetekape loka ŋin nakenyaritai arakan. 37 Naarai emamei akirot naikaruni Edeke.” 38Kobala Mariam ebe, “Koany, arai eoŋ abulesit naka Ejakait; kojaut mamakaŋ kwape kakonikiro.” Kosodi konyou emalaika kamakeŋ. 39Kapaarasia kaŋun konyou Mariam, kisunya alosit akwap nakiukon, kiton ore ediopet loko Yuda; 40koloma togo loka Sakaria kiyoga Elisabet. 41 Kosodi kanen, nakiiraria Elisabet ayogan naka Mariam, kicuru ikoku kakoikike; kilelebai Elisabet Emoyo Lokalaunan; 42 kodelo jokan, kotema atiar, “Isirereŋitoi jo kotoma aŋor, isirereŋitoi da araito nuka aliligetekon. 43Kepote bo nu kai, toto naka Ekajakait abunore mamakaŋ? 44Naarai koany, napadolunio ayoganikon akiika, kicuru ikoku kakoikika kanuka aiyalama. 45 Isirereŋitoi da ŋin naiyuunit; naarai itodolikinio nualimokinitai ŋes kama ka Ejakait.” 46 Kotema Mariam atiar, “Itopoloori ekatau Ejakait. 47Elelakinit da ekamoyo Edeke Ekaketaiaran. 48 Naarai aanyu ican luka akebulesit. Naarai koany, amear lolo kanyaritos eoŋ aturio kere naitusulianyitai. 49 Naarai keswamaki Lokapedor nuepolok: Lokalaunan ekekiror. 50 Akeitim ejai kaŋul lueyoŋito ŋes, Anatar aturio kere. 51 Etodia agogoŋ kakekan, Esiarisiar ikewoŋok kaomisio nuka itauonokec. 52 Ereŋea lukapolok koicoloŋokec, Etopolo luitasonos. 53 Esimoniki luketeŋei iboro luejok, Epapel ikabarak. 54 Eitu akeitim, Eŋaraki Isirael ekebulesit. 55 Kwape kisumunio lukapapaawok, Aburaam ka aurike apaarasia kere.” 56Kosalak Mariam kaŋes bala ilapio iuni, kosodi koboŋo orekec, 57Kosodi kanen kodol apak naka Elisabet aidoun, kidou ikoku yenitelepat. 58Kiirasi ikeidunyeta ka ikepajen ebe etopoloo Ejakait akeitim mamakeŋ, kiyalamikinos nenipe kaŋes. 59 Kosodi kapaaran nakikanyetekauni kopotu aikep ikoku; kokotosi amaikin ekiror loka papake Sakaria. 60 Koboŋok totoke kotema atiar, “Mam, konye emaikinio Yokana.” 61Kotemasi ŋes atiar, “Emamei yenikajenakon yenemaikinitai ekiror ŋol.” 62Kokwetut papake ajenun ebe ekoto amaikin iŋai. 63Kilip ibore yenikiwadika, kiwadik ebe, “Ekekiror erai Yokana.” Koumokis kere. 64Atipet kopukoroi akeituk, kolacarai da akeŋalep, kiner, iturit Edeke, 65Kokuriakaros ikeceidunyeta kere, Kitisiarakinai akiro ŋun anatar akwap kere nakiukon naka Yudaya; 66kere lukiirarete koricata kotauonokec, kobalas ebe, “Aso eraun ikoku yen yenikepone enyoin?” Naarai akan naka Ejakait ajai kaŋes. 67Kilelebun papake Sakaria Emoyo Lokalaunan, kodwar kobala ebe, 68 “Kituritete Ejakait Edeke loka Isirael, Naarai aanyana iketuŋa alaku da. 69 Etonyoiki oni amumwarat naka aitajar Kokek loka Daudi eketelepat. 70Kwape enerar kolo kageunet Kaituke nuka inabinoke lukalaunak; 71 Ebe kitajari oni kama kalukasurupowok, Kakan da naka ŋul kere lukireito; 72 Itodoli aitim naesumunit lukapapaawok, Ka aiitun akeitutuket nakalaunan. 73 Aitodolikin aiyaposit naeyapoikinit Aburaam papaawok. 74 Ainakin oni ketajarunos kakan naka lukasurupowok, Kejaanakis ŋes komam kikuriaka; 75Kotoma alaunit ka adolit kakonyeneke Apaarasia kere nuka aijarawok. 76 Ŋo da ikoku, kinyarao enabi loka Je loejai kuju kakuj; Naarai iŋareni kakonyen nuka Ejakait aitemokin ikerotin. 77 Kitejen iketuŋa aitajario kotoma aisionio akecediakanareta. 78 Kanuka aitim nakotau loka Edekewok, Kipejok oni Acilakide naabuni kokuju. 79 Acaikin ŋul luiboete kotoma amuton, Kotoribe da lokatwanare, Aiteten awokokeie korot loka ainapakin.” 80 Kopoloor ikoku, kiyatanakin agogoŋor komoyo; kojai kamodiŋo aitodol apaaran nakitakanikinor Isirael.21Kosodi kanen kapaarasia kaŋun, kobu ekisil kama ka Kaisar Augusito ebe ibusakinit ituŋa luka akwapin kere aiwadikao. 2Ŋin ŋes aiwadikao nasodit nakeraar Kuirinio ekayaiton loka Suria. 3Koloto ituŋa kere aiwadikao, ŋinituŋanan bukec. 4Konyou Yosep da koGalilaya, kore Nasaret, kodoka alosit Yudaya, ore loka Daudi, loenyaritai Betelekem, naarai kerai ŋesi lokokek ka ajena naka Daudi; 5 tetere iwadikao nepepe ka Mariam, nakisinerit ŋesi, epotiei. 6Kosodi kanen, ejaas ŋina, kodoloto akepaarasia nuka aidoun. 7 Kidou yenikiyaike yenisapat; kimuko kigoen lukimukeru, kiperik atuba nakenyamenenata ibaren, naarai mam adumunito apak kotogo loka ipejok. 8Kojaas ikecokok kakwap kaŋin lukiboiete kais idarete ekecesipan kuare. 9Kotakanik kes emalaika loka Ejakait, kocau aŋosibib naka Ejakait airiamar kes: kokuriakaros noi. 10Kotema emalaika kes atiar, “Sirikikuriakaros; naarai koany, kainunit yes akiro nukajokak nuka aiyalama naepol naejauni mama ejaas ituŋa kere; 11naarai auruun lolo kanukus Eketajaran, ŋes Kristo Ejakait kotoma ore loka Daudi, 12Na ŋes aanyunet kamakus; idumunete ikoku yenimukeru imukoritai kigoen lukimukeru, eperi kotoma atuba nakenyamenenata ibaren.” 13 Atipet kojai nepepe kemalaika kaŋol ekodet loka ajore naka akuj ituritos Edeke, ebalasi ebe, 14 “Kojai aibuses mama ejai Edeke kokuju kakuj, Ka ainapakin da kakwapin mama ejaas ituŋa luitoiokit.” 15Kosodi kanen, kenyout imalaikan aboŋor toma akui, kotemanaros ikecokok ebe, “Aso kaloto kiton Betelekem, kaanyut ŋun nuiswamatai, nukitejenu Ejakait oni,” 16Koloto atipet, kodumutu Mariam ka Yosep, nepepe kimukeru eperi katuba nakenyamenenata ibaren. 17 Keanyutu, kitejenut akirot nakelimokinio kes naka ikoku kaŋin, 18Koumokis lukiirarete kere akiro nukelimokinete ikecokok. 19 Konye koricite Mariam akiro ŋun kere, koomite kotauke. 20Koboŋosi ikecokok, itopoloorito ituritos da Edeke kanuka akiro kere nukiirarete, ka nuaanyut da, kwape kelimokinitere. 21 Kedolo apaarasia akanykauni nuka aikep ŋes, komaikis ekekiror Yesu, kwape kemaikinia emalaika eriŋa epotuuno. 22 Kedol apak naka aitesegariokec kwape ejaar ekisil loka Musa, koyaŋaasi ŋes Yerusalem aitodiar mama ejai Ejakait. 23 (Kwape iwadikatere kokisil loka Ejakait ebe, “Ŋinikoku yenikiliokit yenepukori aliliget enyaritai yenikalaunan mama ejai Ejakait.”) 24 Koinakis da asuban kwape kineritere kokisila luka Ejakait, “Ajeleik aarei arai ilukei iarei ludidik.” 25 Ido koany, kejai etuŋanan Yerusalem, ekekiror Simeon, kerai etuŋanan loedolit loeyoŋit Edeke, edaret aitalakario naka Isirael, kejai ŋes Emoyo Lokalaunan. 26Kikwenyarit Emoyo Lokalaunan ŋes ebe mam etwani eroko eanyuna Kristo loka Ejakait. 27Kobu ŋol toma oyekalu iŋarenikinit Emoyo; ido nakeyauniata ikauriak ikoku Yesu tetere iswamakinete ŋes kwape ejaar epone loka ikisila, 28kodak ŋes elopet kakaninike, kimal Edeke, kotema atiar, 29 “Ejakait, kotwar kwana ekonibulesit inapakina, Kwape ejaar akonikirot; 30 Naarai aanyut akakonye akoniitajar. 31Nakitemonokinit kakonyen nuka ituŋa kere. 32 Aica naapukoo lukaŋekwapin, Araun aibuses naka ikonituŋa Isirael.” 33Koumokis papake ka totoke ŋun nukinerai kanukeŋ. 34 Kilipak Simeon kes arereŋ, kotema ŋesi Mariam totoke atiar, “Koany, ibwaikinitai ikoku yen kanuka aibiror ka anyoun da naka luipu kotoma Isirael, Ido araut aanyunet naitepegitai. 35Ijo da alopet kicumi ekileŋ ekonitau, Tetere epukoros aomisio nukotauon kaluipu.” 36Kejai da anabi, ŋes Ana, akoku naka Panuel loka ateker naka Aser; kedaunit ikar luipu, kiboikino kokilenike ikar ikanykaarei ameun kabekonutuke, 37 kerai apuserut ikar akaisakanykauni ka luoŋon, Mam kenyoununei koyekalu, konye komaenenei Edeke paaran ka kuare da kailuŋ ka ailip. 38 Kotakanu ŋin da kapak kaŋin, kimala Edeke, kolimok lukidareto alakunio naka Yerusalem nuka ikoku. 39 Kosodete nakedauniata aitodolikin kere kwape kicorakinitere kotoma okisila luka Ejakait, koboŋosi Galilaya, orekec Nasaret. 40 Kopoloor ikoku, kiyatakin agogoŋ, kileleba acoa; asianut da naka Edeke kojai kaŋes. 41 Kolosenenete ikauriakake ŋolikaru Yerusalem apak naka epucit loka Aleleŋ. 42Nakedol ŋesi ikar itomon kaarei, koloto kwape kejaar epone loka epucit; 43 nakedaut aitodolikin apaarasia, apak naka aboŋorikec, kosalak isapat Yesu Yerusalem, komam ikekauriak ejenete. 44Konye koomitos kesi ebe ejai toma okodet, koloto alosit naka apaaran adiopet; kosodete komoata ŋes opajenakec ka opaperokec da. 45Nakekurwokis adumun, koboŋosi Yerusalem emootos ŋes. 46Kosodi kanen, ketuboros apaarasia auni kodumakis ŋes oyekalu, iboie kokidiŋ kikesisianakinak, epupi, kiŋisi da aiŋiseta. 47Koumokis kere lukiirarete ŋes akeijen ka akeboŋonokin da. 48Nakeanyuniata, koumokis: kotema totoke ŋes atiar, “Ikakoku, kanukinyo kikonakinia sio kwaŋin? Koany, papakon ka eoŋ da kipou kamootos jo kaiturur.” 49 Kotema kes atiar, “Kanukinyo kimoiata eoŋ? Mam kereka yes ijenete ebe kebusakinit aiboi kotogo loka Papaka?” 50Mam kes apotu kojenut akirot ŋin nakelimokini kes. 51 Kijesar nepepe kakes, kiton Nasaret; kononokikinite kes. Koricite totoke akiro ŋun kere kotauke. 52 Kiyatanakini Yesu kotoma acoa ka apoloor, ka asianut mama ejai Edeke ka ituŋa da.31Kokaru lokitomonet kakany loka airumit naka Kaisar Tiberio, korai Pontio Pilato ekayaiton loko Yudaya, ka Kerode da ekabaka loko Galilaya, ka Pilipo onaceke ŋes ekabaka loka akwap naka Ituraya ka Turakonito, ka Lusania ŋes ekabaka loka Abilene, 2kapak nakeraatar Ana ka Kaiapa lusasedotin lupeti, kobu akirot naka Edeke mama ejai Yokana okoku loka Sakaria kamodiŋ. 3 Kolot akwap kere naidunyasi Yorodan, elimonokini aibatisa naka aitoronikin kanuka alemar adiakanareta. 4 Kwape kiwadikatere koitabo loka akiro nuka enabi Isaia ebe, “Eporoto loka yenikiworoi kamodiŋ ebe, Kitemonokis erot loka Ejakait, Kitetena ikesokono. 5Itutuo rwaru ŋinidirot, Ikeio ŋoliroŋat ka ŋoliukot; Itetenio neekudukudo, liyaiyakinio nuimugogolito; 6 Eanyunete kere luejaas awat aitajar naka Edeke.” 7 Aso kolimok ikodeta lukepote mamakeŋ aibatisao ebe, “Yes aur naka imusagan, iŋai bo kiikwenyari yes akerit anyunyura naebunit? 8 Aso koraata araito nuibusakinito aitoronikin, ido sirikigeut einer kotauonokus ebe, ‘Ejai oni Aburaam papaawok’; naarai kalimokini yes ebe, Epedori Edeke aitonyoikin Aburaam idwe kotoma amor kanu. 9 Nati kwape kwana da ibwaikinitai aep atoromin nuka ikito: aso ŋolikitoi lomam erai araito nuejok ejepario, ka acakakin akim.” 10Kiŋita ŋes ikodeta ebe, “Aso keswamara anyoika?” 11Koboŋok kes kotema atiar, “Yenejaas ikason iarei, koinak yenemamei; ka yenejaas inyamat da kikon nepenen.” 12 Kopotu luketelemak esolo da aibatisao, kiŋita ŋes ebe, “Ekesisianakinan, keswamata isio da anyoika?” 13Kotema kes atiar, “Siritelemenenete luedeparito lukicorakinitai.” 14Kiŋita ŋes iserikalei da ebe, “Ka sio da, keswamata anyoika?” Kotema kes atiar, “Siribenyaka kama ejai ituŋanan, sirisabanakinete; kisiyalamikinito da ekusiropit.” 15 Kosodete komunos ituŋa, koomoomoete ituŋa kere kotauonokec nuka Yokana, arai diat erai ŋesi Kristo; 16 Koboŋok Yokana kotema kes kere atiar, “Abeit kebatisai yes kakipi; konye ebunit loketelekarit eoŋ kagogoŋ, lomam eoŋ kebusakinit alacun amuny naka amukake: kibatisai ŋol yes kEmoyo Lokalaunan ka akim, 17Ejai ekeritei akanike, epiari cut ekepejal, etukonokini akimake odula; konye icwei agugu kakim namam itudeŋio.” 18Ido kaicoreta ace nuipu kolimonok ituŋa akiro nukajokak. 19 Konye ekabaka Kerode, kanuetoronia Yokana ŋes kanuka Kerodia aberu naka onaceke, ka nukaronok kere nukiswamat Kerode, 20kiyatak na da tomakec, kogolok ŋesi Yokana aidaris. 21 Kosodi kanen, kedaut ituŋa kere aibatisao, kibatisauna Yesu da, napilipi ŋesi, koŋaar akuj, 22 kijesun Emoyo Lokalaunan mamakeŋ kakuan bala ajele, kolom eporoto kakuj, ebe, “Irai ijo Okokuka Iominat; kalelakinit jo noi.” 23 Yesu elopet nakegeunia aisisianakin kerai loka ikar bala akaisauni, koomitete araut okoku loka Yosep, okoku loka Keli, 24Okoku loka Matat, okoku loka Lebi, okoku loka Meliki, okoku loka Yanai, okoku loka Yosep, 25okoku loka Matatia, okoku loka Amos, okoku loka Nakum, okoku loka Esili, okoku loka Nagai, 26okoku loka Maat, okoku loka Matatia, okoku loka Semein, okoku loka Yosek, okoku loka Yoda, 27 okoku loka Yoanan, okoku loka Resa, okoku loka Serubabel, okoku loka Sealutiel, okoku loka Neri, 28okoku loka Meliki, okoku loka Adi, okoku loka Kosam, okoku loka Elamadam, okoku loka Er, 29koku loka Yesu, okoku loka Elieser, okoku loka Yorim, okoku loka Matat, okoku loka Lebi, 30okoku loka Simeon, okoku loka Yuda, okoku loka Yosep, okoku loka Yonam, okoku loka Eliakim, 31 okoku loka Melea, okoku loka Mena, okoku loka Matata, okoku loka Natan, okoku loka Daudi, 32 okoku loka Yese, okoku loka Obed, okoku loka Boas, okoku loka Salumon, okoku loka Nason, 33 okoku loka Aminadab, okoku loka Arani, okoku loka Kesuron, okoku loka Peres, okoku loka Yuda, 34 okoku loka Yakob, okoku loka Isaak, okoku loka Aburaam, okoku loka Tera, okoku loka Nakor, 35okoku loka Serug, okoku loka Reu, okoku loka Peleg, okoku loka Eber, okoku loka Sela, 36 okoku loka Kainan, okoku loka Arupakasad, okoku loka Sem, okoku loka Noa, okoku loka Lamek, 37okoku loka Metusela, okoku loka Enok, okoku loka Yared, okoku loka Makalaleel, okoku loka Kainan, 38 okoku loka Enos, okoku loka Set, okoku loka Adam, okoku loka Edeke.41 Kosodi Yesu, kilelebun Emoyo Lokalaunan, koboŋo koYorodan, kiŋarenik Emoyo Lokalaunan amodiŋ, 2kodau apaarasia akaisaoŋon, ecoduni Satan ŋes. Kapaarasia kaŋun mam kenyami ibore: kedaunos, korieb eteŋei, 3Kotema Satan ŋes atiar, “Arai tope irai ijo Okoku loka Edeke kicorak amoru na koraun atap.” 4 Koboŋok Yesu ŋes ebe, “Iwadikatai ebe, Mam ituŋanan ejari kanuka atap bon.” 5Kitodoka kuju, kitodianak ajakanuto kere nuka akwapin, katipet, 6Kotema Satan atiar, “Kainakini jo apolou na kere, ka aibusesukec; naarai kainakinitai eoŋ; eoŋ da ainakini yenakoto kere. 7Aso arai kiima eoŋ, eraunete kere nukon.” 8 Koboŋok Yesu kotema ŋes atiar, “Iwadikatai ebe, Komaenenei Ejakait Ekonideke, kijaanakinenei ŋes bon.” 9Koyaŋa ŋes Yerusalem, kisibwo koswi loka eyekalu, kotema atiar, “Arai tope irai ijo Okoku loka Edeke, kosomari kwap. 10 Naarai iwadikatai ebe, Icorakini ikemalaikan kanukon, kidarata jo. 11 Ido, Kidakete jo kakaninikec, Kinyek amoru aiguikin akonikeju.” 12 Koboŋok Yesu kotema ŋes atiar, “Ebalai ebe, Sirikodununei Ejakait Ekonideke.” 13 Nakedaunia Satan ŋinicodunet, kinyek ber ŋes. 14 Koboŋ Yesu kapedor naka Emoyo, kolot Galilaya: kisiarakin ekeemutu anatar akwapin kere nuidunyatar. 15Kisisianakinenei kotoma atukosiakec, kitopolooritos ituŋa kere. 16 Kobu Nasaret, kama kitopolounere; kapaaran nakasabato koloma toma atukos, kwape kejaar ekepitene, kobwo asoman. 17 Koinakinai eitabo loka enabi Isaia. Kopuko eitabo, kodum aibois mama kiwadikatai ebe, 18 “Emoyo loka Ejakait ejai keoŋ, Naarai abu kenyonyoik akinyet alimonokin lukican akiro nukajokak; Kejuk eoŋ alimor aosikinio mama ejaas luijoreoritai, Ka imudukiok da akwenyun, Alakakin lueridakinitai. 19 Alimor da ekaru loka Ejakait loecamunitai.” 20Korapak eitabo, kinyakak ekejaanakinan, kiboikin; kosesenata ŋes noi ituŋa kere lukejaas atukos. 21Kogeu alimokin kes ebe, “Etodolikin lolo nukiwadikatai nu toma akiikus.” 22 Kitejenut kere, koumokis akiro nukasianut nukelomunete kaitukuke: kobalas ebe, “Mere lo okoku loka Yosep?” 23 Kotema kes atiar, “Abeit ipote ainerakin eoŋ awaragan na ebe, ‘Emurwon, kitaŋaleun bon: ŋun kere nukiiranari ebe kiswamat Kaparanaum, kiswama kane da kobukus.’ ” 24 Kotema atiar, “Abeit katemari yes atiar, Emamei enabi loecamunio kobukec. 25 Konye abeit katemari yes atiar, Kojaas kolo apuserun nuipu koIsirael kapaarasia nuka Eliya, apak nakegolitere akuj ikar iuni ka ilapio ikanykape, nakedoikinio ebeli loepol akwap kere; 26 mam aponi kijukarai Eliya mama ejai adiopet kakesi, dimarai Sarapeta, kakwap naka Sidon, mama ejai aberu nakerai apuserut. 27 Kojaas da lukatapon luipu koIsirael kapaarasia nuka Elisa enabi; mam yenaponi kiswagarai, dimarai Naaman Esuriat.” 28Nakiirariata kesi akiro ŋun kotoma atukos, kilelebunos kere anyunyura. 29Konyoutu, koremosi kiŋa ka ere, koyaŋaasi neetukum koukot loadukokinitai ekecere, tetere eremorete ŋes kwap cut. 30Konye ŋes kitoro kidiŋikec kolot. 31 Kikokorun kiton Kaparanaum, ore loko Galilaya. Kisisianak kes kapaaran nakasabato, 32 Koumokis noi ituŋa akeisisianakin; naarai kejai akekirot apolou, 33Kejai etuŋanan atukos lokejai emoyo loka ajokit naerono, kiworo keporoto loepol ebe, 34“Kinyeinai! Anyoika isio kajo, Yesu loko Nasaret? Ibu kereka amudiar sio? Kajeni jo kwape iraar, Lokalaunan loka Edeke.” 35Kiretak Yesu ŋes ebe, “Kobuta, kolom kamakeŋ.” Kibirok ajokit lokadekan kidiŋikec, konyou kamakeŋ, komam imadiŋit, 36Koumokis kere, kineranakinos bonik ka bonik ebe, “Akirot anyoin na? Naarai icorakini imoyon lueroko kapolou ka apedor, elomunete da.” 37Kisiarakin ekeemut anatar aiboisio kere nuidunyatar akwap ŋin. 38 Konyou katukos koloma togo loka Simon. Kedeka toto naka aberu naka Simon ekamidi loepol; kiŋaiŋaata ŋes kanukeŋ. 39Kobwo kama ejai, kiretak ekamidi; kinyek ŋin: atipet konyou kijaanak kes. 40Napibiror akoloŋ, ŋul kere lukejaas ituŋa lukedekasi adekesia nuegelegela koinut ŋes; kidokok akekanin ŋinidiopet kaŋul, kitaŋaleu kes. 41 Konyoununut ajokin da kaneejaas luipu, kiworoto ebe, “Irai ijo Okoku loka Edeke.” Kiretak kes, kisimik einer, naarai kejenete ebe ŋes Kristo. 42Kosodi kiwala akwap, konyou kolot aibois naesil; komoata ŋes ikodeta, kopotu mama ejai, kokotosi aitasal ŋes, kinyek anyoun kamakec. 43 Konye kotema kes atiar, “Kebusakinit alimonokin akiro nukajokak nuka ajakanut naka Edeke koreria ice da: naarai ŋin keyakuunere.” 44 Kolimonokinenei katukosia nuko Galilaya.51 Kosodi kanen nakeridakiniata ŋes ikodeta iirarete akirot naka Edeke, kebwoi ŋesi kariri kaŋolol naka Genesaret. 2Koany atakerin aarei nukejaas oitolima loka aŋolol; konye kedokunito ikalokak ilosete iboyanakec. 3Kodoka ataker adiopet, nakerai naka Simon, kilip ŋes aisukunyar nediokasilon anyoun koitolima, Kiboikin kisisianak ikodeta kojai ataker. 4 Nakedau einer, kotema ŋesi Simon atiar, “Koremo ataker kiton ataro, kocakakis iboyanakus aikamia lukecor.” 5 Koboŋok Simon kotema atiar, “Ejakait, kipou ketaaritos akuare kiya, komam kidumuni idiobore: konye kanuka akonikirot, acakakini bo iboyan.” 6 Kedaut aswam ŋun, kipokata iboro lukecor luipu noi: kokotosi ikeceboyan aŋed; 7kokwetut lukaupakec lukejaas ataker ace aponare aiŋarakin kes. Kopotu, kisilelebata atakerin kere aarei kiton neebuciata alumor. 8Konye keanyu Simon Petero ŋun, kibirokin kwap akuŋin nuka Yesu, kobala ebe, “Wu Ejakait, kinyeinai, naarai arai eoŋ ekadiakanaran.” 9Naarai koumok ŋesi, ka ŋul kere lukejaas kaŋes, kanuka aipues naka lukecor lukikamunete: 10 koumokis da Yakob ka Yokana, odwe luka Sebedayo, lukemoranara ka Simon. Kotema Yesu Simon atiar, “Sirikikurianar; amear natikwana iraun ekalokan ituŋa.” 11 Nakedauniata aitodokun atakerinikec oitolima, kinyeis kere, kotupasi ŋes. 12 Kosodi kanen, nakejaar ore ediopet, kojai etuŋanan loelelebikina atapon: nakeanyunia ŋesi Yesu, kibirokin kwap ebuburia, kiŋaiŋa kotema atiar, “Ejakait, arai ikoto, ipedori aiswagar eoŋ.” 13Korio Yesu akekan, kotiro ŋes, kotema atiar, “Akoto; kiswagar.” Atipet konyou atapon kamakeŋ. 14 Kicor ŋes sirikelimoki idiotuŋanan; konye ebe, “Kolot, kitodiar mama ejai esasedoti, koinak kanuka aiswagariokon kwape kolo kicorakinitor Musa, araun aitejenunet kamakec.” 15Konye kiyatakinos akekiro aisiarar: kotukonokinos ikodeta luipu akiirar, ido aitaŋaleunio adekesiakec. 16 Konye ŋes kogitar kolot amodiŋ, kilip. 17 Kosodi kanen kapaaran adiopet kaŋun, isisianakini ŋesi: ido kiboiete Iparisayon ka ikesisianakinak luka ikisila kanen, lukepote koreria kere luko Galilaya ka Yudaya ka Yerusalem: kojai agogoŋ naka Ejakait kaŋes aitaŋaleun. 18Ido koany, kibwokut ituŋa etuŋanan loesenyit koitada: kokotos aitolomar ŋes toma, ka aibwaikin akonyeneke, 19Nakekurwosi aitolomar kanuka ekodet, kodokasi kuju oswi, kijoliliut ŋes aitorunio ametegulan koitadake kokidiŋ, akonyen nuka Yesu, 20Nakeanyunia ŋesi akeceiyuun kotema atiar, “Ijo ba, esionii akonidiakanareta.” 21 Kogeut ikewadikak ka Iparisayon epeget kobalas ebe, “Tŋai bo lo loinera nukainyanakin Edeke? Iŋai bo epedori aisioni adiakanareta, dimarai Edeke bon?” 22Konye kojeni Yesu ekecepeget, koboŋok kotema kes atiar, “Kanukinyo ipegatatar kotauonokus? 23Ani bo naepatana, atemar ebe, ‘Esionii akonidiakanareta,’ arai bo atemar ebe, ‘Konyou kolot?’ 24Konye tetere ijenunete ebe ejai Okoku loka etuŋanan apedor kakwap aisioni adiakanareta,” (kolimok lokasenyan ebe,) “Katemari jo atiar, Konyou, kibwok ekoniitada, kolot orekon.” 25Atipet konyou kakonyenekec, kibwok akeperit, kolot oreke, itopoloorit Edeke. 26Koumokis kere, kitopoloorito Edeke; kilelebunos akurian, kobalas ebe, “Kiany lolo nukaumokin.” 27 Kokau kaŋun koloma, koany eketeleman esolo, ekekiror Lebi, iboie kaitelemis, kotema ŋes atiar, “Kotupunai.” 28Kinyek kere, konyoi: kotupa ŋes. 29 Kipoik Lebi ŋes epucit loepol koreke: kojau ekodet loepol loka iketelemak esolo ka ke lukemorete kakes. 30 Kirurumakis Iparisayon ka ikewadikakakec ikekesisiak kobalas ebe, “Kanukinyo inyamiata imasiata da nepepe ka iketelemak esolo ka ikadiakanarak da?” 31Koboŋok Yesu kotema kes atiar, “Lukaŋaleok mam ipudas emurwon; dimarai lukadekak. 32Mam abunit anyarit ikadolitok, dimarai ikadiakanarak tetere itoronikinos.” 33 Kotemasi ŋes atiar, “Eluŋete ikesisiak luka Yokana irwan ipu, ka ailip; ikote nen da ikesisiak luka Iparisayon; konye lukon enyamete emasete da.” 34Kotema Yesu kes atiar, “Ipedorete kereka aituluŋ luenyaritai opucit loka eiterane, naejaatar keteran? 35Konye eponito apaarasia, nuedemarere eteran, eluŋete do kapaarasia kaŋun.” 36Kolimok kes awaragan, ebe, “Emamei yeneciluni atutubet kanapito nakitetet, ka adonyokin ŋes anapito namojoŋ; arai kikonaki nen eciluni nakitetet, atutubet da naecilunio kama kanakitetet, mam ecamanaros kanamoion. 37Emamei da yenebukokini ebino loitet oriagin lukemukule lumojoŋ; arai kikonaki nen, ecili ebino loitet iriagin, ebukor ebino, imadiŋikinos iriagin da. 38Konye ebukonokinio ebino loitet oriagin lukitetiak. 39Kwabo emamei yenemasi ebino loikuniatai, yenekoto loitet; naarai ebala ebe, ‘Ejok loikuniatai.’ ”61 Kosodi kanen nakitoritor amanat apaaran nakasabato, kijejeata ikekesisiak aluŋuren nuka akima, koninata kakanin konyama. 2 Konye ice koParisayon kotemasi atiar, “Kanukinyo iswamaata yesi numam ibus kapaaran nakasabato?” 3 Koboŋok Yesu kotema kes atiar, “Mam isiomito na nakiswamai Daudi, nakeriebia eteŋei, ŋes ka ikepaup; 4 kwape kelomaria togo loka Edeke, kolem imugatin luka aitodikin, konyam, koinak da ikepaup; lumam ibus ainyam dimarai isasedotin bonik?” 5Kotema kes atiar, “Okoku loka etuŋanan ŋes ejakait loka asabato.” 6 Kosodi kanen, kanakasabato ace, koloma toma atukos kisisianak: kojai nen etuŋanan, lokewonit akekan nakoteten. 7 Kiteikinito ikewadikak ka Iparisayon, aanyun arai itaŋaleuni kapaaran nakasabato; tetere edumunete akirot nakiwosaet ŋes. 8Konye kojeni akeceomisio; kolimok etuŋanan lokejai akan nakewonit ebe, “Konyou, kobwo kokidiŋ.” Konyou ŋesi kobwo. 9Kotema Yesu kes atiar, “Keŋisit yes ebe, Ibus kereka aswam nuejok kapaaran nakasabato, arai bo aswam nueroko, aitajar aijar arai bo amudiar?” 10Kosesen kes kere, kolimok je ebe, “Korio akonikan.” Kikonak nen: koŋaleu akekan, 11Konye kilelebun kes anyunyura, kinerut bonik nuiswamakinete Yesu. 12 Kosodi kanen kapaarasia kaŋun, kolot oroŋat ailip; kilip Edeke akuare kiya. 13 Kiwala akwap, konyarau ikekesisiak; koseu itomon ka luarei kotomakec, luabu komaik ikiyakia; 14Simon, loamaikini Petero, ka Anderea onaceke, ka Yakob ka Yokana, ka Pilip ka Batolomayo, 15ka Matayo ka Tomas, ka Yakob okoku loka Alupayo, ka Simon loenyaritai Selot, 16ka Yuda okoku loka Yakob, ka Yuda Isikariot, lokebilakini ŋes ebotet. 17 Kikokorun nepepe kakes, kobwo kaibois kanaeriana, ka ekodet loepol loka ikekesisiak, ka ituŋa luipu noi lukepote koYudaya kere ka Yerusalem, ka ariri nakaŋolol nako Turo ka Sidon, lukepote akiirar ŋes, ka aitaŋaleunio akecedekesia: 18ŋul da lukiticanete imoyon lueroko aponi kitaŋaleunoi. 19Kokotos lukokodet kere atiror ŋes; naarai kolom apedor kamakeŋ kitaŋaleu kes kere. 20 Kikeu akekonye kosesen ikekesisiak, kotema atiar, “Isirereŋitoi yes lukican; naarai ajakanut naka Edeke erai nakus. 21 “Isirereŋitoi yes lukiriebi eteŋei kwana; naarai imonikinos. “Isirereŋitoi yes luimonyete kwana: naarai ikieniete. 22 “Isirereŋitoi yes, nakiŋaruniata ituŋa, kigitarete yes, kimoromoroete, ecakarete ekusikiror bala ibore yenerono, kanuka Okoku loka etuŋanan. 23 Kolelakis ka eicur apaaran ŋin: naarai koany, epol ekusiropit kotoma akui: naarai kikonakis, lukapapaakec inabin kwaŋin. 24 “Konye itukwi yes lukabarak! Naarai idaut adumun akusiitaakario. 25 “Itukwi yes, luimonikinos kwana! Naarai ebuni eteŋei airieb yes. “Itukwi yes, luikienasi kwana! Naarai ipote aibworo ka aimony. 26 “Itukwi yes, lukiturete kwana kere! Naarai kikonakis lukapapaakec inabin lukeŋalak kwaŋin. 27 “Konye katemari yes luipupete atiar, Kominasi lukasurupokus, kikonakinete nuejok ŋul lukinaras yes, 28kilipakis arereŋ ŋul lukilamete, kilipakis da ŋul lukireito yes. 29Yenikibapi eitinyo, kibelok loce da; yenikidemari ekonilou, sirikimik ekaso da. 30Koinak ŋinituŋanan kere yenikilipi; yenikidemari jo ikoniboro sirikiburau bobo. 31 Kwape ikototor ituŋa aikonakin yes, kikonakis yesi da kes kwape kwaŋin. 32“Arai iminasi ŋul lukiminasi yes, kimalao kanuka inyo? Naarai ikadiakanarak da eminasi lueminasi kes. 33Arai da iswamakinete nuejok ŋul lukiswamakinete yes nuejok, kimalao kanuka inyo? Naarai ikadiakanarak da iswamaete kwape kwaŋin. 34 Arai da iyuunete ŋul luimunos adumun kamakec, kimalao kanuka inyo? Ikadiakanarak da eyuunete ikadiakanarak tetere edumunete ŋupeŋul bobo. 35Konye kominasi lukasurupokus, kiswamakisi nuejok, koyuut, komam ijuruŋuŋito; epol rwaru ekusiropit, iraunete yesi idwe luka Je kaloejai kuju kakuj: naarai esiana ŋesi mama kalumam imalaete ka lueroko da. 36Koraas luketimok, kwape eraar Papakus loketimon. 37 “Siritubonokinete, yes da kinyeis atubokinio: sirisitelekanarete, yes da kinyeis aisitelekario; kisioniete, yes da kisionio; 38 koinakisi, yes da kiinakinio; aitemis naejok, naicikakinitai, naijaŋijaŋitai, kiton abukonor, ŋin ŋes kiinakinete ituŋa atorobusiokus. Naarai aitemis naitemioto, ŋipeŋin kitemere yes da.” 39 Kolimok kes awaragan ebe, “Epedori kereka emuduki aiŋarenikin emuduki? Mam ibirokinos kere iarei toma aipany? 40 Mam ekesisian itelekari ekesisianakinanike, konye ŋinituŋanan yenituutooritai cut erianakinos ka ekesisianakinanike. 41Aso kanukinyo isesenia igugut yenejai akoŋu naka onacekon, komam ipodo akitoi naejai akoŋukon kilopet? 42Arai ipedori biai alimokin onacekon ebe, ‘Onaceka, kinyek kalem igugut yenejai akoŋukon’, komam iseseni akitoi naejai akoŋukon kilopet? Yenikesoswai ijo, kolem ber akitoi naejai akoŋukon, kosodi konyet asesen kotenan alemun igugut kakoŋu naka onacekon. 43“Naarai emamei ekitoi loejok loerai araito nukaronok; karaida ekitoi loerono loerai araito nuejok. 44 Naarai ejenunio ŋolikitoi kanuka araitoke. Naarai kotoma okukwa mam ituŋa edeŋete itinin, karaida toma okodokodo aideŋ imusabibun. 45 Itolomuni ituŋanan yenejok nuejok kotoma kanuejok nuiŋadakinit otauke; ituŋanan da yenikaronon itolomuni nukaronok kotoma kanueroko nuiŋadakinit: naarai inera akeituk nuilapununos kotauke. 46 Kanukinyo kinyaritotor eoŋ ebe, ‘Ejakait, Ejakait,’ kwabo mam iswamaete nuabala eoŋ? 47Ŋinituŋanan kere yenebuni mamakaŋ, kiira da akakiro ka aswam kes, ketodikini yes kwape eputor: 48Eputos bala ekadukon etogo, loeboki kwap noi, epesikini apetetait atiida; naeleleunia akalel, naeretonokinotor akip nukecor togo ŋol, mam epedori aijaŋijaŋa: naarai edukitoi ejok. 49Konye yenepupuni, komam iswamai, eputos bala lokeduki eketogo alup komamei apetetait; koretonokinos akip nukecor togo ŋol, atipet kibiror; kepol da atiyakinike.”71 Nakedaunia akekiro kere kopupete ituŋa, koloma Kaparanaum. 2 Kejai ekapolokiton-erioŋet ekebulesit lokemina noi, lokedeka eapikinit airidakin, 3Nakiiraria ŋol eemut loka Yesu, kiyakia imakio luka Iyudayan ailip ŋes abunore aitaŋaleun ekebulesit. 4Nakedolioto kesi mama ejai Yesu, kiŋaiŋaata noi, kobalas ebe, “Ibus ŋesi, kiswamaki nu: 5naarai emin awokoteker, kidukok sio akositukos.” 6Kouparos Yesu kakes, Nakeapikinia etogoke, kiyakik ekapolokiton ikepapero kotema atiar, “Ejakait, sirikitaar: naarai mam eoŋ kebusakinit jo alomun kwap kekaswi. 7Ŋes mam aomitor aibusakin abunore mamakon: konye kolim akirot bon, eŋaleuni ekatelepat. 8Naarai eoŋ da arai etuŋanan lokayaitai, ejaas iserikalei luayait eoŋ: ido alimokini ediopet ebe, ‘Kolot’, elosi; ece da ebe, ‘Bia,’ ebuni; ekabulesit da ebe, ‘Kiswama na,’ ido iswamai.” 9Nakiiraria Yesu akiro ŋun, koumok kanukeŋ, kibelokin kolimok ekodet loketupit ŋes ebe, “Katemari yes atiar, Mam lem adumunit aiyuun naepol naetia na, karaida toma Isirael kere.” 10Nakeboŋoriata lueyakunitai ore, kodumut ebulesit keŋaleu. 11Kosodi kanen ketubor apak naedit kolot ore loenyaritai Nain, koupas ikekesisiak kaŋes ka ekodet loepol. 12 Nakeapiaria orute loka ere, koany, kibwokunitai lokatwan kiŋa, lokerai loteluna, totoke da kerai apuserut: kejaas ituŋa luipu lukore nenipe kaŋes. 13Nakeanyunia Ejakait ŋin kitim, kotema ŋes atiar, “Sirikimony.” 14Kikunyak kotiro ekirigi lokibwokitere, kobwout lukibwokito. Kotema atiar, “Etelepat, katemari jo atiar, Konyou.” 15 Kiboikin lokatwan kogeu einer. Koinak ŋes totoke. 16 Kokuriakaros kere; kitopoloosi Edeke, kobalas ebe, “Atakanu cama enabi lokapolon kamawok!” ebe da, “Aanyana Edeke iketuŋol” 17Kisiarakinos akiro ŋun toma Yudaya kere, ka akwap kere naidunyatar. 18 Apotu ikesisiak luka Yokana kolimokis ŋes akiro ŋun kere. 19 Kenyarau Yokana iarei kokesisiakake kiyakia mama ejai Ejakait, iŋisit ebe, “Irai kereka ijo ŋol loebunit, arai bo kedarata ece?” 20Nakedolioto ituŋa mamakeŋ, kobalas ebe, “Kijukunit Yokana Lokebatisan sio mamakon iŋisit ebe, ‘Irai kereka ijo ŋol Iocbunit, arai bo kedarata ece?’ ” 21Kosawa kaŋol kitaŋaleu luipu akecedekesia, ka ican ka imoyon lueroko; koinak imudukiok luipu aanyun. 22 Koboŋok kotema kes atiar, “Koloto, kolimokis Yokana ŋun nuianyut ka nuiirarito da; ekwenyunete imudukiok, elosete iŋwalasik, iswagio lukatapon, epupete ikimiŋiok, itajario lukatwak, elimonokinio da lukican akiro nukajokak. 23Isirereŋitoi da ŋol lomam itiguikin kanukaŋ.” 24Kosodi kedaut ikiyakia luka Yokana alosit, kogeu alimokin ikodeta nuka Yokana ebe, “Kilomarete alosit amodiŋ aanyun inyo? Egada lokijaŋijaŋ! ekwam? 25Konye bo kilomarete asesen inyo? Etuŋanan lokenapit anapito naanebek? Koany, luisiritoi kaluibusak, luenyamete da luetaitaete, ejaas toma alaroi nuka ikabakan. 26 Konye kilomarete asesen inyo? Enabi? Eebo, katemari yes atiar, loitelekarit enabi. 27 Ŋol ŋes iwadikatere nu ebe, ‘Koany, ejukari ekakiyakia kakonyenekon, Loitemonokini ekonirot kakonyenekon.’ 28 Katemari yes atiar, Kotoma lukeuriete aŋor emamei yenepol aitelekarit Yokana: konye loedit kotoma ajakanut naka Edeke ŋes epol aitelekarit ŋes.” 29 (Nakiirariata ituŋa kere, ka iketelemak esolo da, kitogogoŋoto adolit naka Edeke, naarai kibatisauna kaibatisa naka Yokana. 30 Konye koŋeroto Iparisayon ka iricakisila ainerun naka Edeke, naarai mam apotu kibatisaunos kamakeŋ.) 31“Aso do etupusi kinyo ituŋa luka atur kana, eputosi kesi kinyo? 32Eputosi kidwe luiboiete kagwelanaret, konyaras, kobalas ebe, ‘Kikut alamarun, mam yes esoma; Kibwolol, mam yes emonya.’ 33 Naarai kobu Yokana Lokebatisan komam enyami karaida aimat ebino; ibalasi yesi ebe, ‘Ejai ajokit’. 34Kobu Okoku loka etuŋanan enyami emasi da; ibalasi yesi ebe, ‘Koany, ekeraŋat lo, ekameran da, epapero loka iketelemak esolo ka ikadiakanarak!’ 35Konye ikedwe kere kes itojokere Acoa.” 36 Kosodi konyara ediopet koParisayon Yesu aimor kaŋes. Koloma togo loka Eparisayot, kiboikin ainyam. 37 Ido koany, kepupu aberu nakore kaŋol, nakerai nakadiakanaran ebe eboikin togo loka Eparisayot ainyam, koyau ekube loka akinyet; 38 kobwo kokauke koapie kakejeke, emonyi, kogeu aitodoonokin akiyo akejeke, koninana kitima luka akouke, konu akejeke, kinyonyoanak akinyet. 39Keanyu Eparisayot lokenyararit, kotema kotauke atiar, “Arai kerai etuŋanan lo enabi, tikejenu aberu ŋin erai iŋai, ido nakepone enyoin, naetironori ŋes, naarai erai nakadiakanaran.” 40Koboŋok Yesu kotema atiar, “Simon, ejai akirot naakoto alimokin jo.” Kotema atiar, “Aso, Ekesisianakinan, kiner.” 41Kotema atiar, “Kejaas etuŋanan kalukapesen iarei; kiburai ediopet adenarin akwat akany, lokiareit da akaisakany. 42Amameete kes nutacet, abu kitim kes kere iarei. Kotoma kes luarei, iŋai bo eminuni ŋes aitelekarit?” 43Koboŋok Simon ebe, “Aomit ebe je lokisionio nuipu.” Kotema ŋes atiar, “Itub kotenan.” 44 Kibelokin mama ejai aberu kotema ŋesi Simon atiar, “Iany ijo aberu na? Alom eoŋ togokon, mam jo einakina akipi nuka akejeka, konye na etodoonoki akiyo akejeka ka anina da kitimake. 45 Mam jo ibu konu eoŋ, konye ameun napenan alomunia mam na inyeina ainu noi akakeje. 46Mam jo ibu kinyonyo akinyet akouka, konye na enyonyo akinyet akejeka, 47Kanuka ŋun katemari jo atiar, Isionio akediakanareta nuipu, naarai epol akemin; konye yenisionio nuikidioko, edit akemin.” 48 Kotema ŋesi ŋin atiar, “Esionii akonidiakanareta.” 49Kosodete kogeutu lukemorete kaŋes atemanar atiar, “Iŋai ca lo, loisioniei adiakanareta?” 50 Kotema ŋesi aberu atiar, “Kitajar jo akoniiyuun; kolot inapakina.”81 Kosodi kanen ketubor apak naedit, kimaniman ireria kere lukapolok ka luedisiak, elimonokini ka alimor akiro nukajokak nuka ajakanut naka Edeke, kojaas nenipe ka lutomon kaarei, 2 ka aŋor ace nukitaŋaleunitai imoyon lueroko ka adekesia, Mariam naenyaritai Magadalene, nakelomunete ajokin akanykaarei, 3ka Yoana aberu naka Kusa ekeŋadan loka Kerode, ka Susana, ka ace nuipu nukijaanakinete kiborokec lukejaatar. 4 Naketukokinor ekodet loepol, kopotu da lukepote kaŋolire mamakeŋ, kiner kawaragan atiar, 5“Abu ekayean koloma aiye ikekinyom; napeyei, kodooto ice ariri kerot; kicakacakai, konyama ikweny luka apak. 6Kodooto ice aŋaŋam; nakegeuniata abwaŋun, kooko, kanuemameatar akip. 7Kodooto ice okukwa; kopolooto ikukwa kakes, koridakis, 8Kodooto ice alup nuejok, kopolooros, koraata araito kiton akwatat.” Nakinerar akiro ŋun, kiworo ebe, “Yenejaas aki nuka akiirar, kiira.” 9Kiŋita ŋes ikekesisiak ebe inyo bo apolou kawaragan kaŋin. 10 Kotema atiar, “Kiinakinitai yes ajenun nukaiyeiyea nuka ajakanut naka Edeke; konye ice kawaragasia; tetere eanyunete komam eanyunete, ido iirarete komam ejenunete. 11 Aso apolou naka awaragan ŋes nata: Ekinyomit ŋes akirot naka Edeke. 12 Kwi da lukariri kerot kes lukiirarete; kosodi ebuni Satan, alemar akirot kotauonokec, tetere mam iyuunete ka aitajario da. 13Kwi da lukaŋaŋam kes lukiirarete kocamut akirot kailel; konye komameete alias, iyuunete nediokasilon, kosodete kapak naka acodunio etiakaros, 14Kwi da lukedoete okukwa, kes lukiirarete, ido kelototo koridakinos aiyaloŋoŋ, ka abar, ka aiyalama naka aijar, komam ititionete adioraito. 15 Kwi da luka alup nuejok, kes luka itauon luitenara luejok lukiirarete akirot, koricito, koraata araito katitiŋikin. 16 “Emamei ituŋanan yeninokokini atala, kobuburik ibore, arai aibwaikin kwap keitada; konye ibwaikini kuju ocoget, tetere epedorete luelomunete aanyun akeija. 17 Naarai emamei akirot naibwaitai, namam ikujunio, karaida naimunonitai namam ejenunio ka aikujunio. 18 Aso kocoito kwape ipupioto; naarai yenejai ibore, einakinio ice; ka yenemamei ibore, edemunio ŋin da yeneomit ŋesi ebe ejaatar.” 19 Kopotu do totoke ka ikeinacan, mam apedorete aikunyakin ŋes kanuka ekodet. 20Kolimokinai ebe, “Ebwoete totokon ka ikoniinacan kokiŋa; ekotosi aanyun jo.” 21Konye Koboŋok kotema kes atiar, “Totoka ka ikainacan kes ŋul luiirarete akirot naka Edeke, kiswamata da.” 22 Kosodi kanen adiopet kapaarasia kaŋun, kodoka ataker, ŋes ka ikekesisiak; kotema kes atiar, “Aso kekwaŋaros aŋolol juwai”; kogeut alosit. 23Konye napikwaŋasi kojotoor ŋesi, kokut ekwam loepol kaŋolol; kogeut akipi ailelebun ataker, kojaut toma ationis. 24Koloto mama ejai kitwekenyut, kobalas ebe, “Ekapolon, ekapolon ba, kitwaka.” Kokweny ŋesi, kiretak ekwam ka agat naka akipi: kopalasi kojaun aiyamakin. 25Kotema kes atiar, “Ani bo aiyuunikus?” Kokuriakata, koumokis, kotemanaros atiar, “Aso iŋai bo lo, naarai icorakini kiton ikwamin ka akipi da, korimarete?” 26 Kodolot akwap naka Igerasenin, naetereikina Galilaya, 27Nakedokunia koitolima, kiriamunos ketuŋanan loka ore kaŋol lokejaas ajokin; apak naepol mam anapit inapen, mam abu kosal togo, konye toma atesin, 28Nakeanyunia ŋol Yesu, kilala, kibirokin kakonyeneke, kiner keporoto loepol ebe, “Anyoika eoŋ kajo, Yesu, Osoku loka Edeke loejai kuju kakuj? Keŋaiŋait, sirikiitican eoŋ.” 29Naarai abu kicorak emoyo loerono alomun kotuŋanan. (Naarai kikamununei ŋes irwan ipu; kidareneno, koenen kirikoi ka iloin; koŋedeŋedei lukeenitere; kokerianara ŋes ajokit amodiŋ.) 30Kiŋit Yesu ŋes ebe, “Ekonikiror iŋai?” Kobala ebe, “Ajore,” naarai kelomakinitos ŋes ajokin nuipu. 31Kiŋaiŋaata ŋes sirikicorak kes alomar aipany. 32Kejai nen esipan loka ipegei luipu edakasi oroŋat; kiŋaiŋaata ŋes acamakin kes alomar opegei. Kocamak kes, 33Kolomut ajokin kotuŋanan, kolomasi toma opegei: komotar esipan kaneijululuei, kibirokin aŋolol, kotwakikis akipi. 34Nakeanyuniata ikecokok nuadoikis, kokerata, kisiarakis akiro toma ore kamanat da. 35Koloto aanyun nuadoikis; kopotu mama ejai Yesu, kodumut etuŋanan lokelomunete ajokin, iboie kakejen nuka Yesu, enapit igoen, kejokiar adam; kokuriakaros. 36Ŋul da luapotu koanyut kitejenut kes kwape kitaŋaleunere ŋol lolem ajaas ajokin, 37Kosodete ituŋa kere luka akwap naka Igerasenin airiamar kilipa ŋes anyoun kamakec; naarai kikam kes akurian naepol; kodoka ataker, koboŋo. 38Konye kilip etuŋanan lokelomunete ajokin aup kaŋes; konye kotwar, kobala ebe, 39“Koboŋo orekon, kolimonok nukapolok nukiswamak jo Edeke.” Kolot, kolimonok anatar ere kere nukapolok nukiswamakini ŋes Yesu. 40 Kosodi nakeboŋunio Yesu, kisukunyik ekodet ŋes kaiyalama; naarai kidaritos ŋes kere. 41Ido koany, kobu etuŋanan ekekiror Yairo, lokerai ekayaiton loka atukos; kibirokin akejen nuka Yesu, kiŋaiŋa ŋes alomar togoke; 42 Naarai kejai ŋes apese nateluna, naka ikar itomon ka luarei, keapikinit atwanare. Konye napelosi koridakis ikodeta, 43Kosodi aberu nakedeka alele nakaokot ikar itomon ka luarei, naketacakinit imurwok lukejaatar kere, komam epedori ituŋanan aitaŋaleun, 44komanu kokauke, kotiro atwele naka anapitoke; atipet kosaŋ alele nakaokotoke. 45Kotema Yesu atiar, “Iŋai bo katiro?” Kosodete nakeŋerioto ituŋa kere, kobala Petero ebe, “Ekapolon, kilukut jo ikodeta kiridakis da!” 46Konye kotema Yesu atiar, “Katiro ma ituŋanan: naarai amisiik ebe alom apedor kamakaŋ.” 47Nakeanyunia aberu ebe mam epedori aibwaio, kobu emarani, kibirokin akonyeneke, kitejenu kakonyen nuka ituŋa kere akiro nukeinakinete ŋes atiror, ido kwape kitaŋaleunere atipet. 48 Kotema ŋes atiar, “Akokuka, kitaŋaleu jo akoniiyuun; kolot inapakina.” 49Napinera ŋun, kobu etuŋanan kore loka ekayaiton loka atukos, kobala ebe, “Adaun akoonipese; sirikitaar bobo Ekesisianakinan.” 50Konye nakiiraria Yesu ŋun koboŋok ebe, “Sirikikurianar; konye kiyuu aiyuun, itajario.” 51Nakedolio togo, mam abu kisunup ituŋanan alomar nepepe kaŋes, dimarai Petero, ka Yokana, ka Yakob, ka papa loka ikoku ka totoke. 52 Emonyete kere kibworos; konye kotema atiar, “Sirikimonya; naarai mam etwanit, konye ejotoi.” 53Kokienatar ŋes noi, naarai kejenete ebe adau ikoku atwanare. 54Konye kitiŋ akekan, kiworo ebe, “Ipese, kokweny.” 55Koboŋu ekemoyo, atipet konyou; kicorak ainakin ŋes inyamat. 56 Koumokis ikekauriak; konye kicor kes kinyeis alimokin ituŋanan nukiswamao.91 Konyarau lutomon ka luarei nepepe, koinak apedor ka apolou kama ejaas ajokin kere, ka aitaŋaleun adekesia. 2Kiyakia kes alimonokin ajakanut naka Edeke, ka aitaŋaleun da lukadekak. 3 Kotema kes atiar, “Sirikiyaŋaasi ibore kere yenikerot, karaida ebela, karaida ecoe, karaida inyamat, karaida apesan, karaida ajaut kikason iarei. 4 Kaŋolitogo loilomanarete, kosalenenete nen, aitodol nainyounioto alosit. 5 Ŋul lumam kisukunyikinete yes, nainyounioto kotoma ore kaŋol, kilakilakenenete adae nuka akejenekus araut akajenak kamakec.” 6Koloto kesi, kiriamas ireria, elimonokinete Akiro Nukajokak, ka aitaŋaleun da kaŋiniibois. 7 Kosodi kiira ekabaka Kerode nukiswamao kere; kiyaloŋoŋ noi, naarai kebalas ituŋa ice ebe, ajaru Yokana kotoma okatwak; 8ka ice da ebe, “Atakanu Eliya”; ka ice da ebe, “Ajaru ediopet kotoma onabin lukolo sek.” 9 Kobala Kerode ebe, “Abu kajepa akou naka Yokana; konye iŋai bo lo loapupi eoŋ akiro nuetia nen?” Kokoto aanyun ŋes. 10 Kosodi keboŋut ikiyakia kitejenut Yesu akiro kere nuapotu kiswamata, Koyaŋa kes, kogita kiton ore loenyaritai Betesaida. 11Konye nakejenuniata ikodeta kotupasi ŋes; kisukunyik kes kaiyalama kolimok kes nuka ajakanut naka Edeke, kitaŋaleu da lukipudas aitaŋaleunio, 12Kejotaki akoloŋ; kopotu lutomon kaarei mama ejai, kotemasi atiar, “Kotwar ekodet, tetere elosete toma oreria ka amanat da nuidunyatar, kodumutu neeperete ka inyamat da; naarai kijaa ne amodiŋ.” 13Konye kotema kes atiar, “Koinakisi yesi kes lunyaman.” Kotemasi atiar, “Emamei sio ibore yenedeparit imugatin ikany ka agaria aarei; arai mam kilosit agwelakin etuŋat lo kere inyamat.” 14Naarai emwaasi ikiliok bala ilukumin ikany. Kotema ikekesisiak atiar, “Kisiboikis kes katukon bala akaisakany ŋinitukot.” 15Kiswamata kwaŋin, kisiboikis kes kere. 16Kolem imugatin lukany, ka agaria aarei, kosesen akuj, kisirereŋ kes, kobilibil; koinak ikesisiak akoranakin ekodet. 17 Konyama, kimonikinos kere; kotukonokinai atutubeta nuabilibila nukesalete, iditai itomon ka luarei. 18 Kosodi kanen, napilipi ŋesi kogitara, kojaas ikekesisiak nenipe kaŋes: kiŋit kes ebe, “Ebalas ikodeta ebe arai eoŋ iŋai?” 19 Koboŋokis ebe, “Yokana Lokebatisan; konye ice Eliya; ice da ebe ajaru ediopet konabin lukolo sek.” 20 Kotema kes atiar, “Ido bo yes kibalas ebe arai eoŋ iŋai?” Koboŋok Petero ebe, “Ijoŋ Kristo loka Edeke.” 21Konye kicor kes, kisimik alimokin idiotuŋanan akirot ŋin. 22 Kobala ebe, “Ibusakinit Okoku loka etuŋanan aiticanio nuipu, egirete da imakio ka isasedotin lupeti ka ikewadikak, ka aiar, kapaaran da nakiwuniet ejaruni.” 23 Kolimok kes kere ebe, “Arai ekoto ituŋanan aitup eoŋ, koŋerokin ilopet, korioŋ ekemusalaba ŋinipaaran, katup eoŋ. 24 Naarai ŋin yenekoto aitajar akeijar etwaniari; konye ŋin yenetwaniari akeijar kanukaŋ, itajari ŋes, 25Naarai ajokis anyoin arai kedumu ituŋanan akwapin kere, kitoolio arai kotwania akeijar? 26 Naarai yenirumete ileic kanukaŋ, kanuka akakiro da, irumete ileic Okoku loka etuŋanan da kanukeŋ, naebunio kaibusesuke, ka naka Papa, ka naka imalaikan da lukalaunak. 27Konye abeit katemari yes atiar, Ejaas ice kaluebwoete kane lumam iirete cut atwanare aitodol neaanyuniata ajakanut naka Edeke.” 28 Kosodi kanen akaulo kakiro kaŋun bala apaarasia akanykauni, koyaŋa Petero ka Yokana ka Yakobo, kodoka oroŋat ailip. 29Napilipi, kogelakin epone loke ereeteke, kiliacanata ikenapen komwekimwekete, 30Ido koany, kineras ituŋa iarei kaŋes, lukeraas Musa ka Eliya; 31 luketakanete kaibuses, kineras akiro nuka atwanareke naelosi ŋesi aitodolikin koYerusalem. 32 Kilurunito Petero ka lukejaas kaŋes ajo; konye nakekwenyuniata koanyutu aibusesuke, ka kwi da iarei lukebwoete kaŋes, 33Kosodi kanen, napetiakas kaŋes, kotema Petero Yesu atiar, “Ekapolon, ejok oni ajaut ne; aso keswamata iswamin iuni; ediopet lokon, ediopet loka Musa, ka ediopet da loka Eliya.” Komam ejeni nukinera. 34Napinera ŋesi ŋun, kobu edou, kiteribo kes; kokuriakaros nakelomariata odou. 35 Kolom eporoto kotoma odou, kobala ebe, “Lo ŋes Okokuka, loseunaka; kiirasi ŋes.” 36Napinera eporoto ŋol, kotakan Yesu bon. Kililiŋata kesi, komam elimokinete idiotuŋanan kapaarasia kaŋun adiokirot kanuaanyut. 37 Kosodi kanen apaaran naatupakini nakedokuniata koroŋat, kiriamunos kekodet loepol. 38Ido koany, kiworo etuŋanan kotoma okodet ebe, “Ekesisianakinan, keŋaiŋait, koany ikakoku; naarai erai ikateluna; 39Ido koany, ikamununei ajokit ŋes, atipet isilalai; bobo da kisiilio, kokui ekuetete, mam inyeini dimarai kationis, idecideci ŋes, 40eŋaiŋa ikonikesisiak aireŋear ŋes, konye mam epedoro.” 41Koboŋok Yesu kotema atiar, “Wu okwe yes atur namam iyuunit, naepaarit, etodoli eoŋ ai ajaut kayes, ka atitiŋikinit da yes? Koyau ma ikonikoku ne.” 42 Napebuni kibirok ajokit kwap, kisiilio. Kiretak Yesu ajokit naerono, kitaŋaleu isapat kinyakak papake. 43Koumokis kere apolou naka Edeke. Konye napeumokinitos kere akiro kere nueswamai, kotema ŋesi ikekesisiak atiar, 44 “Kitolomasi akiro nu akiikus; naarai einakinio Okoku loka etuŋanan akanin nuka ituŋa.” 45 Konye mam kes apotu kojenut akirot ŋin, kimunonitai kamakec, kinyeis amisiikin; koyoŋata aiŋit apolou naka akirot kaŋin. 46 Kogeut epeget kotomakec ebe iŋai bo kakesi eraun lokapolon. 47Konye kejen Yesu epeget loka itauonokec, koyau ikoku yenididi, kisibwo kodieke, 48 kotema kes atiar, “Ŋin yenisukunyikini ikoku yen kokirorika kesukunyikinit eoŋ, ŋin da yenikesukunyikini eoŋ, isukunyikinit ŋol lokejukuni; naarai loerai loedit kokidiŋikus kere, ŋol ŋes erai lokapolon.” 49Koboŋok Yokana kotema atiar, “Ekapolon, kipou kaanyutu etuŋanan ireŋeari ajokin kokirorikon, kesimika ŋes, naarai mam kiupa kaoni.” 50 Konye Yesu kotema ŋes atiar, “Sirikisimika; naarai ŋol lomam erai lokasurupikus, erai lokowaikus.” 51 Kosodi kanen, keapuut apaarasiake nuka aitodokario, kitogogoŋ akonyeneke alosit Yerusalem. 52 Kijuka ikiyakia aliŋakin ŋes, koloto kolomasi ore loka Isamarian tetere itemokinete kanukeŋ; 53 konye mam kes apotu kisukunyikis, naarai atereit akekonyen aibe Yerusalem. 54 Keanyut ikekesisiak Yakob ka Yokana ŋun, kobalas ebe, “Ejakait, ikoto kecorakis akim kodoku kokuju komudia kes [kwape kolo eswamaa Eliya]?” 55Konye kibelokin, kitoron kes, [kotema atiar, “Mam ijenete epone loka emoyo loejai kayes. Naarai mam abunit Okoku loka etuŋanan amudiar aijar naka ituŋa, dimarai aitajar.”] 56Koloto ore ece. 57 Napelosete kesi korot, kotema etuŋanan atiar, “Katupenenei jo kama ilosi kere.” 58Kotema Yesu ŋes atiar, “Ejaas ikuwei apanya, akweny da nuka apak ejaas akaisikec; konye Okoku loka etuŋanan emamei nama iperikini akekou.” 59Kotema ŋesi ece atiar, “Kotupunai.” Konye kobala ebe, “Ejakait, kisiikinai ber kalot keda papaka.” 60Konye kotema ŋes atiar, “Kinye lukatwak kidaata lukarwakakec; konye jo, kolot kolimono ajakanut naka Edeke.” 61 Kobala ece da ebe, “Ejakait, katupenenei jo; konye kisiikinai ber katwar ituŋa lukokaleka.” 62Konye Yesu kotema ŋes atiar, “Emamei yenetiŋit emeleku lokimoŋin, kosesen kau, yenibusakinit ajakanut naka Edeke.”101 Kosodi kokau kaŋun koseu Ejakait ice akaisakanykaarei, kiyakia kes iarei iarei aiŋarenikin ŋes alosit ŋolire ka ŋiniibois naekoto ŋesi elopet alosit. 2 Kotema kes atiar, “Ipu idwenyan, konye ikidioko ikeswamak; aso kilipa Ejakait loka aidweny kijuk ikeswamak toma aidwenyeke. 3 Koloto yesi; koany, keyakiari yes kwape idwe luka amerekekin kokidiŋ opeen. 4 Sirikiyata eriagi, karaida ecoe, karaida amuk; sirikiyogata da ituŋanan korot. 5Ido ŋolitogo loilomanarete, kotemasi ber atiar, ‘Kojau ainapakin togo lo!’ 6Arai kejaun okoku loka ainapakin kanen, esalakini ŋes ainapakinikus; arai mam, kiboŋokini yes ainapakinikus. 7 Kosalata ber togo ŋopeŋol, inyamete komasete lukiinakinete yes, naarai edolit ekeswaman aropio; siribwosenenete otogoi ice. 8 Ido ŋolire kere loilomanarete kiisukunyikis, konyamata inyamat lukiinakinete yes; 9kitaŋaleununete lukadekak luejaas nen, kolimonokinete ebe, ‘Ekunyu ajakanut naka Edeke mamakus.’ 10 Konye ere kere loilomanarete, arai mam kisukunyikinete, kolomutu orotinike, kineras ebe. 11 Kilakilakanakini yes adae nukakejenekosi; konye kojenutu na ebe, ‘Ekunyu ajakanut naka Edeke mamakus.’ 12 Katemari yes atiar, Kapaaran kaya, epatana Sodom atitiŋikin aitelekarit ere ŋol. 13 “Itukwi ijo Korasin! Itukwi ijo Betesaida Naarai arai kiswamatai koTuro ka Sidon nukapedor ŋun nukiswamatai kamakus, tikitoronikinos ŋosek, kiboiete kopukoi ka ekurwon. 14Konye apaaran naka etube epatanikini Turo ka Sidon atitiŋikin aitelekarit yes. 15 Ka jo da Kaparanaum, kitopoloorio kereka kiton akuj? Kijesario do kiton Okatwak. 16 “Yenikiirari yes, keirari eoŋ; yenikipaluni yes, kapaluni eoŋ da; yenikapaluni eoŋ epaluni lokejukuni.” 17Kosodete koboŋut kwi akaisakanykaarei kaiyalama, kobalas ebe, “Ejakait, kononokikis sio ajokin da kokirorikon!” 18 Kotema kes atiar, “Aany Satan ibiruni kokuju kwape keimilia. 19 Koany, kainakinit yes apedor aicakacak imunwo ka ikiritona, ido kama ejai apedor kere naka lokasurup; emamei da ibore kere yenikikonakini yes erono. 20 Konye sirikiyalamikinos kanu kinonokikiniata yes ajokin; konye kiyalamikinos naarai iwadikatai ikusikiroria kotoma akuj.” 21 Kosawa kaŋol kolakar kOmoyo Lokalaunan, kotema atiar, “Kemalai jo, wu Papa, Ejakait loka akuj ka akwap, naarai ibu kimunonik akiro nu lukacoa ka lukaijen, kopukok da idwe ludidik; eebo, Papa, naarai kwaŋin ibu kitojokia kakonyenekon. 22 Kainak Papaka iboro kere; ido emamei yenejeni Okoku dimarai Papa, kwabo emamei yenejeni Papa dimarai Okoku, ka ŋin da yenekot Okoku apukokin ŋes.” 23 Kosodi kibelokin mama ejaas ikekesisiak, kiner kakes kaiyeiyea ebe, “Isirereŋitoi akonye nuesesenete nuisesenete yesi. 24 Naarai katemari yes atiar, ‘Apotu kimielas inabin luipu ka ikabakan aanyun nuisesenete yesi, mam eanyuna, ka akiirar da nuiirarete yesi, mam iirara.’ ” 25 Ido koany, kobwo ericakisil ediopet kokodokod, kobala ebe, “Ekesisianakinan, ekonakini ai tetere erumi aijar naka ikar kere?” 26Kotema ŋes atiar, “Iwadikatai bo inyo toma okisila? Isiomi biai?” 27 Koboŋok ŋes ebe, “Komina Ejakait Ekonideke kekonitau kere, ka akoniijar kere, ka akonigogoŋ kere, ka akonicoa kere; ka ekoniidunyet da kwape iminari bon.” 28 Kotema ŋes atiar, “Iboŋok kotenan; kikonaki nen, ijari.” 29Konye ŋes ekoto aitoiokikin, kiŋit Yesu ebe, “Iŋai bo ekaidunyet?” 30Koboŋok Yesu kobala ebe, “Abu etuŋanan kijesar anyoun koYerusalem alosit Yeriko, kiriamunos kikaŋatak, lukelacarete ŋes inapen, kibuŋata, koloto kinyeis eapie airidakin. 31Kosodi kanen kitor esasedoti orot ŋol; nakeanyunia ŋes, kinac kotubor, 32Elebit da kwape kwaŋin, nakedolio aibois ŋin, koany ŋes, kinac kotubor. 33 Konye Esamariat ediopet kalositeke, kedol nen nekejai; nakeanyunia, kitim ŋes, 34kikunyak koen akemusuŋun, kobukok akinyet ka ebino; kibwanenik otiaŋake koyaŋa kiton togo loka ipejok, kimuke, 35Apaaran nakiareit kolem adenarin aarei koinak elopet etogo, kobala ebe, ‘Kimuke lo; ibore kere yenitaci aitedepar, katacakini jo naaboŋunio.’ 36Iŋai kaŋul kaluuni loiwomit ijo araut ekeidunyet kaje kalokiriamunos kikaŋatak” 37Kotema atiar, “Ŋol lokitimi ŋes.” Kolimok Yesu ŋes ebe, “Kolot ijo da, kikonak nen.” 38 Kosodete napebeete, koloma ore ediopet; kisukunyik aberu ekekiror Marita togoke, 39Kejai ŋes kainacike naenyaritai Mariam, nakiboie kakejen nuka Yesu, iirari akekiro, 40Konye abu Marita kitaaritoi kanuka aijaanakin naapol; kolot mama ejai Yesu kotema ŋes atiar, “Ejakait, mam kereka ipodo ebe kenyeinia kinacika aijaanakin bon? Aso kolimok ŋes keŋarak eoŋ.” 41Konye Koboŋok Ejakait kotema atiar, “Marita, Marita, iyaloŋoŋoi ilolonyi da kanuka akiro nuipu; 42 konye ipudai luikidioko, arai bo idiopet bon; naarai aseu Mariam ewai loejok, lomam edemario ŋes.”111 Kosodi kanen, nakilipia kaibois adiopet, nakedaunia, kotema ediopet kosesisiakake atiar, “Ejakait, kisisianakinai sio ailip, kwape kisisianakinia Yokana da ikekesisiak.” 2 Kotema kes atiar, “Nailipiata, kineras ebe, Papakosi loejai toma akuj, ekonikiror kitalaunai. Akonijakanut kobu. Nuikoto kiswamai kakwap, kwape iswamaere kotoma akuj. 3Koinanakinai sio ikosinyamat luka ŋinipaaran; 4Kisionioi sio akosidiakanareta; naarai kisioniei isio lukapeseninikosi. Sirikiya sio toma acodunio, konye koyuunai sio kama ejai lokaronon.” 5Kotema kes atiar, “Iŋai kayesi yenejai ekepapero, kelot mama ejai kidiŋ kuare, kotema ŋes atiar, ‘Opaperoka, koyuunai ber kimugatin iuni; 6naarai adolu ekapapero mamaka ebuni kalosit, emamei eoŋ idiobore yenainakini ŋes ainyam’; 7 eboŋokini lokotogo ebe, ‘Sirikiitapas eoŋ; egolol ekek, kiperi eoŋ nepepe kikadwe koitada; mam apedori anyoun ainakin jo’? 8 Katemari yes atiar, Karaida mam enyouni ainakin naarai erai ekepapero, konye kanuka akeiŋaiŋait enyouni einakini ŋes luipuda kere. 9 Katemari yes atiar, Kilipa, kiinakinio; komoata, idumunete; kikuŋukuŋoto, kiŋaikinio, 10Naarai ŋin yenilipi ijaikinio, yenemoi edumuni, ka yenikuŋukuŋi da enaikinio. 11Iŋai bo kayesi erai papa, arai kilipi ikokuke emugati, einakini tope amoru? Arai bo agar, ido aibois kagar einakini tope ŋes emun? 12Arai kilip abeet, einakini tope ekiriton? 13Aso arai yes lukaronok ijenete ainakin ikusidwe ainakineta nuejok, mam kereka itelekarit noi Papakus loejai toma akuj ainakin ŋul luilipete ŋes Emoyo Lokalaunan?” 14 Kosodi kanen ireŋeari ŋesi ajokit nabaŋ, Kelom ajokit, kiner lobaŋ; koumokis ikodeta. 15 Konye kobalas ice kakesi ebe, “Ireŋeari ŋesi ajokin kanuka Beelesebul ekapolon loka ajokin.” 16 Kocodut ice, kokotosi aanyunet naebuni kotoma akuj. 17Konye kejeni ŋesi akeceomisio, kotema kes atiar, “Ŋinijakanut naetiakatiakaun asurokin bon emudiar; arai etogo ketogo ibiror. 18Aso arai etiakatiakaun Satan bon, ikonakini ai akejakanut icasi? Naarai ibalasi yesi ebe ereŋeari eoŋ ajokin kanuka Beelesebul. 19Aso arai ereŋeari eoŋ ajokin kanuka Beelesebul, ido bo ikusidwe ireŋearete kanuka iŋai? Kanuka ŋun ŋes eraatar ŋul ikusikatubok. 20 Konye arai ereŋeari eoŋ ajokin kebokorit loka Edeke, aso adolu ajakanut naka Edeke mamakus, 21Etuŋanan lokagogoŋ ekapi lujiisike idari alaroke, inapakina ikeboro: 22 Konye naebunokinia ekagogoŋon loedeparit ŋes, ipikori edemari lujiisike kere luamunokina ŋesi, ka akorokor iŋatanake. 23 Ituŋanan yenimam ejai keoŋ, ŋes yenikekoloka; ituŋanan da yenimam etukonokini keoŋ, isiarakini. 24“Kelonu emoyo loerono kotuŋanan, itori aiboisio nuemameete akip, emoot nekiyeŋunet; keoliki, ebala ebe, ‘Aboŋori togoka nekabunio.’ 25Keboŋu, edumuni epieitai, epesitai da. 26 Kosodi do elosi eupunos kimoyon ice ikanykaarei luitelekarito ŋes aronis; elomarete kesi da esalete nen; ejautene loka ituŋanan kaŋin lokawasia eraun loerono adepar losodit.” 27 Kosodi kanen, napinera akiro ŋun, kiworo adiopeberu kotoma okodet, kotema atiar, “Isirereŋitoi aliliget nakipotiere jo, ka ikisin da lukinaki.” 28 Konye Yesu kobala ebe, “Konye ca, nuitelekarito, isirereŋitoi luiirarete akirot naka Edeke, koricata da!” 29 Kosodi naketukokinotor ikodeta mamakeŋ, kogeu atemar kes atiar, “Atur na erai atur nakaronon; emoot aanyunet, kwabo mam einakinio aanyunet, dimarai aanyunet naka Yona. 30 Naarai kwape keraar Yona aanyunet kama ejaas ituŋa luko Ninebe, kwape kwaŋin eraunia Okoku loka etuŋanan kama ejai atur na. 31 Enyouni akabaka naka Eŋalakimak kapaaran naka etube nepepe kituŋa luka atur kana, itetelekari kes akiro; naarai abu ŋesi kobu kosaŋe loka akwap akiirar acoa naka Solomon, ido koany, ejai ne yenitelekarit Solomon. 32 Enyounete ikiliok luka Ninebe kapaaran naka etube nepepe katur na itetelekarete ŋes akiro; naarai apotu kesi kitoronikinos kanuka alimonokin naka Yona, ido koany, ejai ne yenitelekarit Yona. 33 Emamei yeninokokini atala kibwaik aipany arai toma obukit, dimarai ikajakini ocoget, tetere epedorete luelomunete aanyun aica. 34 Atala naka akuan ŋes akonikoŋu; arai oteni akonikoŋu, akonikuan kere ecai; konye arai erono, akonikuan da emutono. 35Aso kocoite kinye aica nakotomakon araun amuton. 36Aso arai ecai akonikuan kere, komamei adiotutubet naemutono, ileleba kere aica pas, kwape katala nakinwakakinit jo kaicake.” 37 Napinera, konyara Eparisayot ediopet oreke aimor kaŋes lukapaaran; koloma kiboikin ainyam. 38 Keanyu Eparisayot ŋol koumok, naarai mam ber kilosit eroko enyama. 39 Kotema Ejakait ŋes atiar, “Kwana yes Iparisayon itesegarete kiŋa kakolin ka asanin, konye kotomakus ileleba aiŋat ka aronis, 40Ibaŋiok yesi! Lokesubi lukokuju mere ŋes lokesubi lukotoma da? 41Konye koinakisi lukotoma araut ainakineta nukaitim; ido koany, elaete kere kamakus. 42 “Konye itukwi yes Iparisayon! Naarai iinanakinete idiopet kotomon yenika alilot ka ecaboi ka ŋinikiyot kere, inyeinete etube ka amin naka Edeke; ibusakinit yes aswam ŋun komam inyeinete kwa da. 43 Itukwi yes Iparisayon! Naarai iminasi iicoloŋo lukapolou katukosia, ka aiyogao kagwelanareta. 44Itukwi yes! Naarai iputos katesin numam etakanete, nuitorito ituŋa komam ejenete.” 45Koboŋok ediopet koricakisila kotema ŋes atiar, “Ekesisianakinan, kiner ijo kwaŋin kimoromor sio da.” 46Kotema atiar, “Itukwi yes da iricakisila! Naarai isibwokete ituŋa ibwokon lukalaŋirok, konye yes ikulepek mam itirorete ibwokon kediopet kobokorokus. 47Itukwi yes! Naarai idukete atesin nuka inabin luapotu lukapapaakus koara. 48Aso iraas ikajenak icamunito da aswamisio nuka lukapapaakus; naarai kes lukearete, yes da idukete atesinakec, 49Kanuka ŋun inera acoa naka Edeke ebe, ‘Ejukakini kes inabin ka ikiyakia, earete ice kakes, ereete,’ 50tetere itepesenio atur na aokot nuka inabi; kere, nukebukoros ameun kapetetait naka akwap, 51 ameun kaokot nuka Abel kiton aokot nuka Sakaria, lokearakinio kidiŋ ketem ka aibois nakalaunan. Eebo, katemari yes atiar, Itepesenio kotoma atur kana. 52Itukwi yes iricakisila! Naarai ilemut alacetait naka aijen; mam yes ilomarito, ido itikokinito luakotos alomar.” 53Nakelomunia kanen, kogeut ikewadikak ka Iparisayon aridakin jokan, ka aiŋitiŋit akiro nuipu, 54 kolokata ŋes tetere ipoki kakirot naelomuni kaitukuke.121 Kapaarasia kaŋun, naketukonokinotor ilukumin luka ikodeta kiton aicakacaka, kogeu alimokin ber ikekesisiak ebe, “Kocoito aitubuunet naka Iparisayon, ŋes aisoswanut. 2 Konye emamei akirot naimunonitai, namam epukorio; karaida naibwaitai, namam ejenunio, 3Aso nuinerata kamuton iirario kaica; ido nuiyeiyeata kagolai nukotoma elimonokinio kokuju otogoi. 4“Katemari yes ikapapero atiar, Sirikikuriakaros luearete akuan, kosodi mam bobo nuepedorete aswam. 5Konye kekwenyari yes loikuriaka: kokuriaka ŋol loejai apedor kedau aiar acakakin Ogeena; eebo, katemari yes ariar, Kokuriaka ŋol. 6Mam kereka egwelete anyiporin akany apesan aarei? Kwabo mam imurwokinio adiopet kakonyen nuka Edeke. 7 Konye imaritai itima da kere luka akwesikus kere, Sirikuriaka; iraas yesi luketiai adepar anyiporin nuipu. 8“Katemari yes atiar, ŋinituŋanan yenikalimori eoŋ kakonyen nuka ituŋa, elimori da Okoku loka etuŋanan ŋes kakonyen nuka imalaikan luka Edeke; 9 Konye ŋin yenikaŋeri eoŋ kakonyen nuka ituŋa, enerio ŋin da kakonyen nuka imalaikan luka Edeke. 10 Ŋinituŋanan da yeninera akirot asurokin Okoku loka etuŋanan isionio; konye yeneinyanakini Emoyo Lokalaunan mam isionio. 11 Nakiyaŋaariata yes akonyen nuka atukosia ka ikayaitok ka lukapolou, sirikiyaloŋoŋoto epone arai akiro nuiboŋokinete arai nuineras; 12naarai kisisianakini Emoyo Lokalaunan kosawa kaŋol nuibusakinit einer.” 13Kotema ediopet kokodet atiar, “Ekesisianakinan, kolimok onaceka katiakata keoŋ akosikirumet.” 14 Konye kotema ŋes atiar, “Ikatunanan, iŋai bo kadakakini eoŋ araut ekatubon arai ekakoran kamakus?” 15 Kotema kes atiar, “Kocoito, kidaras bonik kama ejai airaŋaanut kere; naarai aijar naka ituŋanan mere iboro luipu luejaatar ŋesi.” 16Kolimok kes awaragan ebe, “Kebwaŋunito noi alup nuka etuŋanan lokabaran. 17Kogeu aomoom kotauke ebe, ‘Kekonak ai, naarai emamei neengadakini ikanyamat?’ 18Kotema atiar, ‘Ekonakini ne; atiyatiyai idulaaka, ka aje da luitelekarito; eŋadakini nen akakima kere ka ikaboro.’ 19Atemari akaijar atiar, ‘Aijar, ejaas jo iboro luipu luimonot kanuka ikar luipu; aso kijamam, konyam, komat, kolakara da.’ 20 Konye kotema Edeke ŋes atiar, ‘Ibaŋaana ijo! Ekotoi akoniijar akuare na; iboro da luitemokinit, eraunete lukaŋai?’ 21 Ikoni nen yeniŋadakinit iboro luka akais kanuke elopet, komam ebari mama ejai Edeke.” 22 Kotema ikekesisiak atiar, “Kanuka ŋun katemari yes atiar, Siriyaloŋoŋoete kanuka akusiijar, luinyamete, karaida kanuka akusiwat luinapete, 23Naarai aijar itelekarit inyamat, ka akuan da itelekarit anapito. 24 Koomito ikuruka ebe mam eyeete kwabo mam idwenyete, emameete aiŋadisia karaida idulaa; konye itanyami kes Edeke, Itelekarito cama yesi noi akweny! 25Iŋai bo kayes kiyaloŋoŋ epedori aiyatakin akeibut? 26Aso do arai mam ipedorete akirot naedit noi kwaŋin, kanukinyo iyaloŋonooro kanuka ace kere? 27 Koomito aapecelun, kwape epolooto; mam itaaritos, karaida aoj; konye katemari yes atiar. Ka Solomon da kotoma aibusesuke kere mam esiritoi kojokan kwape adiopet kaŋun. 28Aso arai itanapi Edeke kwaŋin inya luka ais, Iuejaas lolo, ecakario moi oupa; itelekarit cama noi aitanap yes, okwe yes luedit aiyuun. 29Sirikimoata luinyamete karaida nuimasete, kwabo sirikibuonokinos. 30Naarai emooto atekerin kere nuka akwapin ŋun kere: konye ejeni Papakus ebe ipudasi yesi ŋun. 31Konye komoata akejakanut, kiyatakinio da ŋun. 32 “Ijo esipan loedit, sirikikurianar, naarai isiyalamikinit Papakus ainakin yes ajakanut. 33 Kogwelanasi luijaatar, kokora lukaitim; kodonyonokinos iriagin lumam emojoŋete, emono kotoma akuj lomam iŋoŋar, aibois namam eapikini ekokolan, karaida ikajekel amunaun. 34Naarai nepejai akusibar, nepenen ejaikinos ikusitauon da. 35 “Koenito akusiŋabes, konokete da akusitalai; 36 yes da ikulepek kosubito bala ituŋa luidarete ejakaitikec naeboŋunio koiterane tetere naebunio aikuŋukuŋ koŋaikis atipet. 37 Isirereŋitoi ibulesin ŋul luedumuni ejakaitikec ekwenyete naebunio; abeit, katemari yes atiar, eeni akeŋabet, isukunyikini kes onyamat, ebuni ŋesi elopet ijaanakini kes. 38Arai kebu kakwenyunet nakiareit, arai nakiwuniet, kodum ikote nen, isirereŋitoi ibulesin ŋul. 39 Konye kojenutu akirot na ebe arai kejeni elopet etogo esawa loebunio ekokolan, tikekweny, kwabo timam kejalaki eketogo abokio. 40Yes da kokapakina; naarai ebuni Okoku loka etuŋanan kosawa lomam iwomito.” 41Kotema Petero atiar, “Ejakait, kilimokinit sio bon awaragan ŋin, arai bo ituŋa kere?” 42 Kotema Ejakait atiar, “Aso iŋai bo erai ekeŋadan lomunot loepiriana, lokedakakini ejakaitike ayait lukokaleke kere akoranakin kes ikecenyamat kapakikec? 43Isirereŋitoi ebulesit ŋol, loedumuni ejakaitike iswamai kwaŋin naebunio. 44 Abeit katemari yes atiar, Edakakini ŋes ayait luejaatar kere. 45Konye arai etemari ebulesit ŋol otauke ebe, ‘Eyap ejakaitika abunore,’ kogeu aibuŋ itelepai ka apesur, ka ainyam ka aimat ka amer da; 46ebuni ejakait loka ebulesit kaŋol kapaaran namam eomit, ka esawa da lomam ejeni, etubi ŋes katutubeta aarei, itebei ekewai nepepe kalumam iyuunito. 47 Ebulesit ŋol loejeni nuekoto ejakaitike, komam ekapakin, karaida aswam nuekoto ejakaitike, edaio luipu. 48Konye ŋol lomam ejeni, kiswama da nuibusakinito adaia, edaio luikidioko. Ŋin da yeneinakinitai nuipu, emoio nuipu kamake; ŋin da yenititiŋito ituŋa nuipu, iburaete nuiyatakina. 49“Abunit acakakin akim akwap; ti akoto kinokokinitete sek! 50 Ejai aibatis naebusakinit aibatisao; ido aridakina cama eoŋ kiton neitodolikinere! 51 Aso iwomitos kereka ebe abu kabu ayaŋaun ainapakin toma akwap? Katemari yes atiar, Mam; dimarai atiakatiak: 52naarai amear kwana ejaikinos ituŋa ikany togo ediopet, etiakas iuni aluikin iarei, ka iarei da aluikin iuni; 53 etiakas, papa eluikini okokuke, ka okoku da eluikini papake, toto eluikini akokuke, ka akoku da eluikini totoke, tataa eluikini ateranike, ateran da eluikini tataake.” 54 Kotema ŋesi ikodeta da atiar, “Naianyuniata edou edakun koto, atipet ibalas ebe, ‘Etepi nat akir’; ido ejaun kwaŋin, 55Naianyuniata ekusi ekwam loka eŋalakimak, ibalas ebe, ‘Ejaun aibuse naepol’; ejaun da kwaŋin, 56Yes lukesoswai, ijenete aŋicun ejautene loka akwap ka akuj; konye kanukinyo mam ijeniata aŋicun apak na? 57“Kanukinyo mam yes ikulepek itubioto nueraas nukabeit? 58 Naarai naiupatarar ka lokiwosat alosit mama ejai ekayaiton, kinyikok ainerun kaŋes korot nuka aipuc, kinyek aidilidilar jo mama ejai ekatubon, ekatubon da kijaikini akanin nuka eketatacan, eketatacan da kieakakini aidaris. 59Katemari jo atiar, Mam cut ilomuni kanen aitodol naidaunia atacakin apesa nakawasia.”131 Kapak kaŋipe kaŋin kojaas ituŋa lukitejenunete ŋes nuka Igalilayan, lukinyalakini Pilato akeceokot kasubanakec. 2 Koboŋok kotema kes atiar, “Iwomito kereka ebe keroko Igalilayan ŋul aitelekarit Igalilayan ice kere, naarai iticanio ŋun? 3 Katemari yes atiar, Mam; konye arai mam yes itoronikinos, imudiaros kere kwape kwaŋin, 4Arai kwi itomon kakanykauni lukibirokin etogo loeoja, koSiloam, koara kes, iwomito kereka ebe ebucarito ŋul aitelekarit ituŋa kere lukiboiete koYerusalem? 5Katemari yes atiar, Mam; konye arai mam yes itoronikinos, imudiaros kere kwape kwaŋin.” 6 Kiner awaragan na ebe, “Kejai etuŋanan ka etini lokiraikinitai manake naka emusabibu; kolot amoot araitoke, mam edumuna. 7Kotema ŋesi ekeswaman loka amana naka emusabibu atiar, ‘Koany, ikar iuni lu abu amoot araito naka etini kalo, mam adumunit amodio. Kojepa; kanukinyo imadiŋikinia alup?’ 8 Koboŋok kotema atiar, ‘Ejakait, kinyek ber ekaru lo da, kebokibok kewor da. 9Arai kera do araito okaru je, ejok; konye arai mam, ijepari.’ ” 10Kapaaran nakasabato isisianakini kotoma adiopet katukosia. 11Ido koany, kojai aberu nakejai ajokit nakalany ikar itomon kakanykauni; nakekudokina, komam epedori cut aitenar, 12Nakeanyunia Yesu ŋes, konyarau, kotema ŋes atiar, “Toto, kilacar kotoma akalanyanutukon.” 13 Kidokok ŋes akekanin, atipet kitenar, kitopolo Edeke. 14 Konye konyunyura ekayaiton loka atukos naarai etaŋaleun Yesu kapaaran nakasabato, kotema ituŋa atiar, “Ejaas apaarasia akanykape nuejokiar ituŋa aiswamaa aswam; aso kopotu aitaŋaleunio kapaarasia kaŋun, kwabo mere kapaaran nakasabato.” 15 Konye Ejakait Koboŋok ebe, “Yes lukesoswai! Kapaaran nakasabato mam kereka ilacununete ŋinidiopet kayes ekemoŋ arai akesigiria kotoma auj, koyaŋa aitamat? 16 Aberu na da, naerai aur naka Aburaam, nakeeni Satan ikar lu itomon kalukanykauni, mam tope kibusakinit alacakinio kaenet kana apaaran nakasabato?” 17Nakinerar ŋun, kirumata ileic lukasurupoke kere: kiyalamikin ekodet kere kanuka akiro kere nukaibuses nukiswamai ŋesi. 18 Aso kotema atiar, “Eputos ajakanut naka Edeke kinyo? Etupusi kinyo? 19 Eputosi kecokat loka ekaradali lokelemari etuŋanan, kocakak toma omanikorike; kobwaŋ, koraun ekitoi; koperenenete akweny nuka apak atenieikike.” 20Kotema bobo atiar, “Etupusi kinyo ajakanut naka Edeke? 21Eputosi kaitubuunet nakelemari aberu kibwa kotoma aitemisio auni nuka akiria, kiton neabuunioto kere.” 22Kiyatak akelosit aitor koreria lukapolok ka ludidik, isisianakini, ebei Yerusalem, 23Kiŋit ŋes etuŋanan ediopet ebe, “Ejakait, ikidioko ca luitaiario?” Kotema kes atiar, 24 “Kokokito alomar kokek kaloedidiŋ: naarai katemari yes atiar, Ekotokinos luipu alomar kwabo mam epedorete. 25 Apak naanyounio elopet etogo agoloki da ekek, igeunete yesi aibwo kokiŋa, ka aikuŋukuŋ ekek, kobalas ebe, ‘Wu okwe Ejakait, koŋaarai;’ eboŋokini ŋesi etemari atiar, ‘Mam ajeni nekiponiata.’ 26 Kanen igeunete atemar atiar, ‘Kipou kanyama kamata da kakonyenekon, ijo da kisisianakini korotinikosi;’ 27 etemari ŋesi atiar, ‘Katemari yes atiar, Mam ajeni nekiponiata; irwa kamakaŋ, yes kere lukeswamak numam adolit.’ 28 Kanen ejaun aimony ka airiamanakin ikel, naianyuniata Aburaam, ka Isaak, ka Yakob, ka inabin kere, kotoma ajakanut naka Edeke, ka yes da ikulepek kicakario kiŋa. 29 Epote ituŋa anyoun kokide, koto, ka agolitomei ka eŋalakimak da, iboikinos kesi toma ajakanut naka Edeke. 30 Ido koany, ejaas lukawasia lueraunos lusodit, ejaas da lusodit, lueraunos lukawasia.” 31Kosawa kaŋol kopotu Iparisayon ice kotemasi ŋes atiar, “Konyou kane kolot nenice; naarai ekoto Kerode aiar jo.” 32Kotema kes atiar, “Koloto kolimokis ekuwe ŋol ebe, ‘Koany, ereŋeari ajokin, etaŋaleununei da lolo ka moi, kapaaran nakiwuniet etodolikin. 33Konye kebusakinit aibe ekarot lolo ka moi, ka apaaran naetupakini da; naarai mam ibusakinit enabi amudiario kokiŋa naka Yerusalem.’ 34 Wu okwe Yerusalem, Yerusalem, loeari inabin ka aibiribir kamor ŋul lukiyakunio mamakon! Irwan imwa ai abu kakotor atukonokin ikonidwe kwape etukonokinia akokor ikemiyoi kwap abebenokake, konye mam yes ekotokino! 35 Koany, kinyeinere ekusitogo. Katemari yes atiar, Mam kianyunete eoŋ bobo cut, aitodol naitemariata atiar, ‘Isirereŋitoi ŋol loebunit kokiror loka Ejakait!’ ”141 Kosodi kanen nakelomaria ainyam togo loka ekayaiton ediopet loka Iparisayon kapaaran nakasabato, kiteikinito, 2Kosodi koany, kiŋarenike kejai etuŋanan lokedeka eidada. 3Koboŋok Yesu iricakisila ka Iparisayon kobala ebe, “Ibus kereka aitaŋaleun kapaaran nakasabato arai bo mam?” 4Konye kes kililiŋata. Kitim, kitaŋaleu ŋes, kotwar. 5 Kotema kes atiar, “Iŋai bo kayesi, arai kibirokin akeiteŋ arai akesigiria toma aipany, yenimam iriuni ŋes atipet kapaaran nakasabato?” 6Kes da mam apotu kopedosi aboŋokin ŋun. 7 Kolimok awaragan ŋul lukenyaraunitai, naaanyunia epone lokeseata kesi iicoloŋo lukapolou, kobala kes ebe, 8 “Arai kinyararit jo ituŋanan opucit loka eiterane, sirikiboikin oicoloŋ lokapolou, kinyek loenyarit ŋesi lokitelekarit jo apolou abunore. 9Kosodi ŋol lokiinyarari jo ka ŋes alimokin jo ebe, ‘Koosik lo aibois,’ kanen kigeunete ileic airum, ibei da aibois nakokwap. 10Konye nakinyararere, kolot kiboikin aibois nakokwap, tetere naebunio je lokinyararit jo kolimok ebe, ‘Opapero ba, kikuny ne kuju’; kanen ijaunete kaibuses kakonyen nuka ŋul kere kalukiboiete kajo. 11 Naarai ŋin kere yeniturokin itisilio, ka yenitisilikin iturio.” 12Kotema da lokenyarit ŋes atiar, “Naipoio inyamat luka paaran arai luka eboŋ, sirikinyarau ikonipapero karaida ikoniinacan, karaida ikonipajen, karaida iidunyeta lukabarak, kinyeis ŋul anyarar jo bobo, jo da kitacakinio. 13 Konye naipoio epucit, konyaraununei lukican, ka iŋwalasik, ka luicodos, ka imudukiok da, 14 kwaŋin kisirereŋitoi; naarai emameete ŋul lukitacakiniata; naarai kitacakinio kotoma ajarun naka luedolito.” 15 Nakiiraria ŋun ediopet kalukemorete kaŋes, kotema atiar, “Isirereŋitoi ŋin yenenyami atap kotoma ajakanut naka Edekel.” 16 Konye kotema ŋes atiar, “Kojai etuŋanan loabu kipo epucit loepol, konyarau ituŋa luipu; 17kedol apak naka ainyam kiyakia ekebulesit alimonokin kwi luanyaritai ebe, ‘Kopotu; naarai adaun aitemonokin iboro kere.’ 18Konye kogeutu kere aiyanar kediopetau. Kobala losodit ebe, ‘Agwel emanikor, kebusakinit alosit aanyun; keŋaiŋait kiikinai.’ 19Kobala ece ebe, ‘Agwel imoŋin ajookon akany, alosi aitetemor; keŋaiŋait, kiikinai.’ 20 Kobala ece ebe, ‘Amany aberu, ŋes mam apedoria abunore.’ 21Kobu ebulesit kolimok ejakaitike akiro ŋun kere. Kosodi konyunyurikin elopet etogo, kotema ekebulesit atiar, ‘Koloma atipet kolot toma orotin ka isokono da luka ere, koyau ne lukican, ka iŋwalasik ka imudukiok, ka luicodos da.’ 22Kotema ebulesit atiar, ‘Ejakait, ŋun nukicorak eswamasi, konye ca eriŋa aibois ejai.’ ” 23Kotema ejakait ebulesit atiar, “Koloma kolot orotin lukapolok ka asisiarin da, kitiŋau ituŋa alomun, tetere ilelebun ekatogo. 24Naarai katemari yes atiar, Kotoma kwi kalukenyaritai emamei edio da loiiri ekapueit.” 25Kouparos ikodeta luipu kaŋes; kibelokin kotema kes atiar, 26 “Arai ebuni etuŋanan mamaka, komam elai papake, ka totoke, ka nakowaike, ka ikedwe, ka ikeinacan ka ainacan, eebo, kiton akeijar alopet, mam epedori araun ekakesisian. 27 Ŋin yenimam erioŋi ekemusalaba, katup eoŋ, mam epedori araun ikakesisian, 28Naarai iŋai bo kayesi, arai ekoto aiduk etogo loeoja, mam iboikini ber aimar eketiai, ebe luejaatar edaunete? 29Kinyek diat kedau aipet apetetait, komam epedori adaun, egeunete ituŋa kere lueanyunete akienar ŋes, 30kobalas ebe, ‘Abu etuŋanan ŋol kogeu aiduk, komam epedori adaun.’ 31Arai bo ekabaka enyoin, arai ekoto alosit ejie kekabaka ece, lomam ber iboikini ainerun arai epedori kilukumin itomon airiamakin kaje loebunit asurokin ŋes kilukumin akaisaarei? 32Arai keanyu ebe mam epedori, iyakiari ikiyakia ailip nukainapakin, eriŋa je elwana. 33Aso kwaŋin ŋinituŋanan kayesi, yenimam epaluni luejaatar kere mam epedori araun ikakesisian. 34 “Ejok abalaŋ; konye arai kepianiar abalaŋ, itemokinio kinyo? 35Mam ibusakini alup, karaida etut; ebukorete ituŋa kiŋa, Yenejaas aki nuka akiirar, kiira.”151 Kosodete kikunyakis iketelemak esolo ka ikadiakanarak kere akiirar ŋes. 2 Kirurumata Iparisayon ka ikewadikak ebe, “Isukunyikini etuŋanan ŋol ikadiakanarak, emorete da kakes.” 3Kolimok kes awaragan na ebe, 4 “Iŋai bo kayes yenejaas amerekekin akwatat, keolio adiopet, mam kereka inyeini akaisakanykaoŋon ka nukanykaonon kamodiŋ, kolot amoot ŋin nakeoliorit aitodol needumunia? 5Kedau adumun, erioŋakini okeperinike, kolakara. 6Naedolio togoke, enyarauni ikepapero ka ikeidunyeta, kolimok ebe, ‘Kolakaros nepepe keoŋ, naarai adum akamerekek naaoliorit.’ 7Katemari yes atiar, Kwape kwaŋin ŋes ejaunor alakara toma akuj kanuka ikadiakanaran idiopet yenitoronikin itia kanuka ituŋa akaisakanykaoŋon ka lukanykaoŋon lumam ipudasi aitoronikin. 8“Arai iŋai bo aberu, ejaas karupiyan atomon, arai koolio adiopet, mam inokokini atalake ka aipie etogo ka amoot kainyikokinit kiton needumunia? 9Kedau adumun, enyarauni akepapero ka akeidunyeta kolimok ebe, ‘Kolakaros nepepe keoŋ, naarai adum arupiya naaoliorit.’ 10 Katemari yes atiar, Kwape kwaŋin ejai alakara kakonyen nuka imalaikan luka Edeke kanuka ikadiakanaran idiopet yenitoronikin.” 11Kobala ebe, “Kojai etuŋanan lokejaas odweke iarei. 12Kotema lodidi papake atiar, ‘Papa, ae atutubet naka ikoniboro lukabeito eoŋ.’ Kokorak do kes lukejaatar. 13 Ketuboros apaarasia nuikidioko, kotukonok lodidi lukebeito ŋes kere, kolot akwap naelwana, kiweliwel ikeboro kaŋina koponesio luutai. 14Nakedaunia aitwasam kere, kodo ebeli akwap ya, kogeu ŋesi da aiyarorotoi. 15Kolot kimorikikinos kediopet kokulepek akwap, kijuka ŋol ŋes oronyike acok ipegei. 16 Koŋat aimonikin abubuk nukenyamete ipegei; kemamei da ituŋanan yeneinakini ŋes idiobore. 17Nakiitoki kotauke, kobala ebe, ‘Imwaasi ai ikejaanakinak luka papaka luenyamete inyamat kosala, eoŋ da kane atwani eteŋei. 18 Anyouni do kalot mama ejai papaka, kalimok ŋes ebe, “Papa, adiaka kama ejai akuj, kakonyenekon da; 19Mam bobo kebusakinit anyarao okokukon; kikonakinai bala ediopet kokejaanakinakakon.” ’ 20Konyou kobu mama ejai papake. Konye naperoko elwana, koany papake ŋes, kitim, koker kibirokin omurisiŋike, konu ŋes. 21Kotema okoku ŋes atiar, ‘Papa, adiaka kama ejai akuj, kakonyenekon da; mam bobo kebusakinit anyarao okokukon.’ 22Konye kobala papake ikekejaanakinak ebe, ‘Koyaŋautu atipet anapito naitelekarit aibuses, kitanapa ŋes; kitanapikis da egilut obokoritike, ka amuka da akejeke; 23koyaŋautu da itaok yenirobok koarata, kanyama kalakaros; 24 naarai okokuka lo abu kotwana, ajaru bobo; aoliorit, atakanu bobo.’ Kogeut alakar. 25“Kojai okokuke lokapolon amana; konye napebuni aapikin ere, kiira lueruos ka ekosio. 26Konyarau ediopet kotelepai kiŋit ebe, ‘Ikote bo ai ŋun?’ 27Kolimok ebe, ‘Abu onacekon, aaraki papakon itaok yenirobok, naarai abwatu ŋes eŋalei.’ 28 Konye konyunyurikin, mam abu kokoto alomar toma. Kolom papake kiŋa kiŋaiŋa. 29Konye Koboŋok ŋesi papake ebe, ‘Koany, kejaanak jo ikar lu luipu, kwabo mam adiakit adioicorakinetekon; konye mam kiinakinit eoŋ imodiokalol, kalakarotor kikapapero. 30Konye napabunio okokukon ŋol, loabu konyam ikoniboro nepepe kanudotea, iarak ŋes itaok yenirobok.’ 31 Kotema papake atiar, ‘Ikakoku, ijai ijo keoŋ apaarasia kere, kere da lukijaar eoŋ eraas lukon. 32Ibusakinit alakar ka aiyalamikin, naarai onacekon ŋol abu kotwana, ajaru bobo; aoliorit, atakanu bobo.’ ”161Kotema bobo Yesu ikekesisiak atiar, “Kojai etuŋanan ekabaran lokejai ekekeŋadan, kirupeai ŋol kamake ebe eweliwel iboroke. 2Konyarau kotema ŋes atiar, ‘Akiro nunyoika nu nueirarit kamakon? Kimar iboro luka akoniiŋad, naarai mam ipedori bobo araut ekeŋadan.’ 3Kotema ekeŋadan je kotauke atiar, ‘Kekonak ai, naarai kadema papaka aiŋad? Emamei eoŋ agogoŋ akor, kerumito da ileic ailipitoi. 4Ajeni nueswamai, tetere keereŋei kaiŋadakaŋ, kesukunyikis otogoikec.’ 5Konyarau lukapesenin luka ejakaitike ŋolidiopet, kotema losodit atiar, ‘Inyo bo kiburai ejakaitika jo?’ 6Kobala ebe, ‘Aitemisio akwatat nuka akinyet.’ Kolimok ebe, ‘Kolem akoniitutuket, kiboikin atipet, kiwadik akaisakany.’ 7Kosodi atemar ece atiar, ‘Inyo bo kiburao jo?’ Kobala ebe, ‘Aitemisio akwatat nuka akima.’ Kotema ŋes atiar, ‘Kolem akoniitutuket, kiwadik akaisakanykauni.’ 8 Kitojok ejakaitike ekeŋadan lokeŋalan kanuka aswam nukapirianut; naarai idwe luka akwapin kanu kotoma aturikec ejaas kapirianut aitelekarit idwe luka aica. 9 Katemari yes atiar, Koneronosi ipapero kotoma abar naka amamus adolit, tetere naemamuunor, kisukunyikis yes toma aiboisio nuka ikar kere. 10 “Yenimunot kakirot naedit noi, erai yenimunot kakirot naepol; ŋin da yeniŋalai kakirot naedit, erai yeniŋalai da kakirot naepol. 11Aso arai mam yes iraas lumunon kotoma abar naka aiŋal, iŋai bo kisiŋadikini yes abar nakabeit? 12Arai mam iraas lumunon kotoma kaŋul kalueraas luka ice, iŋai bo kiinakini yes lueraas lukus ikulepek? 13 Emamei ekejaanakinan loepedori aijaanakin ijaka iarei, naarai arai elai ediopet, komina loce, arai bo iketakin kediopet emeni loce. Mam ipedorete aijaanakin Edeke ka aijaanakin abar da.” 14 Kiirasi Iparisayon lueminas apesan ŋun kere, kimuasi ŋes. 15 Kotema kes atiar, “Iraas yesi luitojokas araut ikadolitok kakonyen nuka ituŋa, konye ejeni Edeke ikusitauon; naarai yenitopolooritai kotuŋa erai yeniketal kakonyen nuka Edeke. 16 “Kejaas ikisila ka inabin kiton Yokana; ameun kapak kaŋin elimonokinio akiro nukajokak nuka ajakanut naka Edeke, ebelakini da ŋinituŋanan kagogoŋ. 17 Konye epatana akuj ka akwap adaun itia aicunyakinet adiopet naka ikisila apalunio. 18 “Ŋolituŋanan loereŋeari akeberu komany ace adotear, ŋol da loemanyi nakireŋeari okilenike adotear. 19“Kojai etuŋanan lokabaran, lokenapenenei egoe lomuge ka ebaputa loejok, kolakanar ŋinipaaran koboro luetaitaete. 20Kojai da lokican ekekiror Lasaro, loeperionokino oruteke, kojaas kajimii nuipu. 21 Kimiela ŋesi aimonianakin ararasia nukedoenenete komesa loka ekabaran; koponenenete iŋokwo da aime akejimii. 22Kosodi kanen kotwana lokican, kodakasi imalaikan atorob naka Aburaam. Kotwana ekabaran da, konukai. 23Kitonyou akekonye kotoma Okatwak, kanekejaar toma aikilianar naepol, koany Aburaam kama elwana ka Lasaro da katorobuke. 24Kiworo ebe, ‘Aburaam Papa, kitimoi, kijuk Lasaro kidomak kiŋaren kebokoritike akipi ketojonia akaŋajep; naarai arieba noi kotoma akim na.’ 25Kobala Aburaam ebe, ‘Okokuka, kiitu ebe ibu ijo kodum nukajokakakon kotoma aijarakon, ka Lasaro da kwaŋin kodum nukaronok; konye kwana italakario ŋes kane, ka jo da kisiriebio. 26Mere ŋun bon, konye kidiŋikosi kayes ejai asoogot naidul, tetere ŋulluekotosi anyoun kane mam epedorete atubun mamakus, emameete da luepedorete anyoun kaŋina ailamun mamakosi.’ 27Kotema atiar, ‘Aso papa, keŋaiŋait, kijuka ŋes togo loka papaka, 28naarai ejaas eoŋ iinacan ikany, tetere ikwenyari kes, kinyeis kesi da adolun aibois na nakaikilianar.’ 29 Konye kobala Aburaam ebe, ‘Ejaas kes kaMusa ka inabin, kiirasi ŋul.’ 30Kotema atiar, ‘Mam, Aburaam Papa; konye arai kelot etuŋanan loenyouni kokatwak, itoronikinos.’ 31 Kotema ŋes atiar, ‘Arai mam iirarete Musa ka inabin, mam ecamunete karaida kejaru ituŋanan kokatwak.’ ”171Kotema ikekesisiak atiar, “Mam eswakete nuitiguikinete abunore; konye itukwi ituŋanan ŋin yeneyaŋauni ŋun! 2 Tiejok ituŋanan ŋin aenikin akukuse omurisiŋike, kocakakinai aŋolol itia aitiguikin idiopet kaludidik kalu. 3 Kocoito; arai kediak onacekon, kitoron ŋes; arai kitoronikin kisioni. 4 Arai kediak kamakon irwan akanykaarei kapaaran adiopet, koboŋu mamakon irwan akanykaarei, kobala ebe, ‘Etoronikin,’ kisioni ŋes.” 5 Kotemasi ikiyakia Ejakait atiar, “Kiyatakinai aiyuunikosi!” 6 Kotema Ejakait atiar, “Arai kijaas kaiyuun naetia ecokat loka ekaradali, tikilimokis esukamin lo ebe, ‘Koukor, kiraikin aŋolol.’ Tikiirimak yes. 7“Ido iŋai bo kayesi yenejai ekebulesit loekoriei arai loicokiei amerekekin yenelimokini ŋes atipet napeboŋunio kotoma amana ebe, ‘Kobia atipet kiboikin ainyam’. 8Arai bo elimokini ŋes ebe, ‘Kitemokinoi ikanyamat lukatiboŋ, koen aŋabet, kijaanak eoŋ, kiton neadaunia eoŋ ainyam ka aimat; kosodi konyet inyami ijo da ka aimat’? 9Imalai kereka ŋesi ebulesit naarai eswama nuecorakinitai? 10Kwape kwaŋin yes da, naidauniata aswam kere nukicorakinitai, kineras ebe, ‘Kirai isio ibulesin lumam ajokis; kiswama bon nukibusakinit aswam.’ ” 11 Kosodi kanen napelosi Yesu Yerusalem, kitor kidiŋ Samaria ka Galilaya. 12 Napelomari ore ediopet, kiriamunos kalukatapon itomon, lukebwoete kama elwana, 13kiworoto kobalas ebe, “Wu Yesu, Lokapolon, kitimoi sio.” 14 Nakeanyunia kes kotema atiar, “Koloto, kitodiaros mama ejaas isasedotin.” Ido napelosete kiswagarai. 15Kosodi ediopet kakesi nakeanyunia ebe aŋaleu, koboŋu, kitopolo Edeke keporoto loepol. 16Kibirokin ebuburia akejen nuka Yesu, kimala ŋes. Kerai da ŋol Esamariat. 17Koboŋok Yesu kiner atiar, “Mam eswagara itomon kere? Ai bo do ejaas kwi ikanykaoŋon? 18Mam ca etakanunit edio da aboŋun aitopoloor Edeke dimarai emoit lo?” 19 Kotema ŋes atiar, “Konyou, kolot; kitajar jo akoniiyuun.” 20 Nakiŋisiata Iparisayon ebe ebuni bo wori ajakanut naka Edeke, Koboŋok kes kotema atiar, “Mam ebuni ajakanut naka Edeke iteio; 21 kwabo mam ineras ebe, ‘Koany, ejai lailo!’ arai, ‘Ejai laije!’ Naarai koany, ejai ajakanut naka Edeke tomakus.” 22Kotema ikekesisiak atiar, “Epote rwaru apaarasia, nuimielatar aanyun adiopet kotoma apaarasia nuka Okoku loka etuŋanan, komam ianyunete. 23 Kilimokinete ebe, ‘Koany, ejai laije!’ ‘Koany, ejai lailo!’ Sirikiloto, kwabo sirikitupasi da. 24 Naarai kwape imiliaunia eimilia ameun kowai ediopet loka akuj, inwakit kiton owai ece loka akuj, kwape kwaŋin ejaunia Okoku loka etuŋanan kotoma apaaranike. 25 Konye ibusakinit ber ŋes aiticanio nuipu, kogir atur na. 26 Kwape kejaatar kapaarasia nuka Noa, kwape kwaŋin ejauniata kotoma apaarasia nuka Okoku loka etuŋanan. 27 Konyama, komata, komanya, ka amanyio da, kiton apaaran nakelomaria Noa toma ataker, kijesun akalele komudia kere. 28 Kwape kwaŋin kwape kejaatar kapaarasia nuka Lot; konyama, komata, kogwela, kogwelasi, kiraata, koduko da; 29 konye kapaaran nakelomunia Lot koSodom, kotep akim ka acukuman abunore kakuj, komudia kere. 30Ikote nen kapaaran naepukorere Okoku loka etuŋanan. 31 Kapaaran kaŋin, yenejai kuju togo, kojaas ikeboro toma togo, sirikijesun alemun; kwape kwaŋin yenejai mana sirikeboŋu kau. 32 Kiitut aberu naka Lot. 33 Inituŋanan yenekoto aitajar akeijar, itooliori; ka ŋin da yenitooliori akeijar itajari. 34Katemari yes atiar, kakuare kaŋin ejaunos ituŋa iarei oitada ediopet; eyaŋaario ediopet, inyeinio loce. 35 Ejaunos aŋor aarei iricete nepepe; eyaŋaario adiopet, inyeinio nace. [36Ejaunos ituŋa iarei amana; eyaŋaario ediopet, inyeinio loce]” 37 Kotemasi ŋes atiar, “Laali bo, Ejakait?” Kotema kes atiar, “Neejai akuan, etukonokinos da atarukon nen.”181 Kolimok kes awaragan, aikwenyar ebe ibusakinit kes ailipenen Edeke komam itapalikina. 2Kotema kes atiar, “Kojai kolo ekatubon ore ece, lomam eyoŋit Edeke, kwabo mam kepodo ituŋa. 3Kojai da apuserut ore ŋol; nakicebokinit abunenen mamake, kobala ebe, ‘Kigaŋai kama kalokasurupika.’ 4Koŋer ber; konye kokau kotema kotauke atiar, ‘Karaida mam ayoŋit Edeke, karaida mam apodo ituŋa, 5 konye naarai kecebokinit apuserut na, egaŋi ŋes, kenye aitapas eoŋ kanuka arim tiritir neajai.’ ” 6Kotema Ejakait atiar, “Kiirasi nuenera ekatubon lomam edolit. 7Mam kereka igaŋi Edeke luseunake, luemonyakinete paaran ka kuare, etitiŋikinit ŋesi kanukec? 8Katemari yes atiar, Igaŋi kes atipet. Konye naebunio Okoku loka etuŋanan, edumuni kereka aiyuun kakwap?” 9Kolimok da awaragan na ituŋa lukemunokina ebe eraas kesi luedolito komwaŋito luce; 10“Kodokasi ituŋa iarei oyekalu ailip, ediopet Eparisayot, loce da eketeleman esolo. 11 Kobwo Eparisayot kilip kwana kotauke ebe, ‘Wu Edeke, kemalai jo naarai mam eoŋ kiputo kicetuŋa, ikaŋatak, ikeŋalak, idotea, karaida bala lo eketeleman esolo. 12 Aluŋenenei eoŋ irwan aarei ŋinisabato, ainanakini da yenikitomonet kotoma kaluadumuni kere.’ 13 Konye kobwo eketeleman esolo kama elwana, kwabo mam ketitinikinit aikeun akekonyen akuj, konye kodipidip aketorob, kobala ebe, ‘Wu Edeke, kitimoi eoŋ ekadiakanaran!’ 14 Katemari yes atiar, Abu ŋol kodok alosit oreke imarakinitai adolit aitelekarit je; naarai ŋinituŋanan yeniturokin itisilio, konye yenitisilikin iturio.” 15 Koinunai idwe ludidik da tetere etirori kes; konye nakeanyuniata ikesisiak, kitorona kes. 16Konye Yesu konyarau kes kotema atiar, “Kocamutu idwe ludidik abunore mama ajai, kwabo sirikisimika kes; naarai lueputosi kalu ajakanut naka Edeke erai nakec. 17 Abeit katemari yes atiar, ŋin yenimam iyuuni ajakanut naka Edeke kwape kikoku yenididi, mam cut elomari toma.” 18 Kiŋit ŋes ekayaiton ediopet ebe, “Ekesisianakinan Iokajokan, keswama anyoika tetere erumi aijar naka ikar kere?” 19Kotema Yesu ŋes atiar, “Kanukinyo kinyaraa eoŋ lokajokan? Emamei yenikajokan dimarai ediopet, ŋes Edeke. 20 Ijeni aicorakineta ebe: ‘Siridote, Siriari, Sirikokoi, Sirisabanakinenei, Koyoŋitenenei papakon ka totokon.’ ” 21Kotema atiar, “Aricit ŋun kere ameun keiditeuka.” 22 Nakiiraria Yesu ŋun, kotema ŋes atiar, “Eriŋa kiwolikit adiopekirot. Kogwela luijaatar kere, kokoranak lukican, ijaunete moolo kabar kotoma akuj; kosodi kobu, kotup eoŋ.” 23Konye nakiiraria ŋun kokadak noi, naarai kebarit noi. 24Nakesesenia Yesu ŋes kotema atiar, “Etiono cama lukabarak alomar ajakanut naka Edeke! 25Epatana ekaal aitor apedot naka ekus, itia ekabaran alomar ajakanut naka Edeke.” 26Kotemasi ŋul lukiirarete atiar, “Aso iŋai bo do epedori aitajario?” 27Konye kotema atiar, “Numam epedorio kotuŋa epedorio kama ejai Edeke.” 28Kobala Petero ebe, “Koany, kipou isio kenyeis ikosiboro katuputu jo.” 29Kotema kes atiar, “Abeit katemari yes atiar, Emamei etuŋanan loenyeinit etogo arai aberu, arai iinacan, arai ikauriak, arai idwe, kanuka ajakanut naka Edeke, 30lomam edumuni ipu noi aitelekarit kapak kana, ido kokar luepote aijar naka ikar kere.” 31 Koyaŋa lutomon ka luarei, kotema kes atiar, “Koany, kidokari alosit Yerusalem, itodolikinio akiro kere nukiwadikaete kolo inabin kama ka Okoku loka etuŋanan, 32Naarai einakinio mama ejaas Imo, eboliatar, iswamakinio nukepali, imwaanakinio aimul: 33edaete ka aiar ŋes; kapaaran da nakiwuniet ejaruni.” 34 Konye mam kes apotu kojenut adis kaŋun; naarai kimunonikinitai kes akirot ŋin, kwabo mam ejenuna nukinerai. 35 Kosodi kanen, nakeapiaria Yeriko, kejai etuŋanan emuduk iboie kawai kerot ilipitoi. 36Nakiiraria ekodet itorit, kiŋit ebe, “Ikote bo ai ŋun?” 37Kolimokis ŋes ebe, “Yesu loko Nasaret itorit.” 38Kiworo ebe, “Yesu, okoku loka Daudi, kitimoi eoŋ.” 39Ŋul da lukiŋarenito kiretakis tetere ililiŋi: konye ŋes kiyatak noi aiworo ebe, “Wu jo okoku loka Daudi, kitimoi eoŋ.” 40Kobwou Yesu, kicorak ayaunio mama ejai, Napekeapiki, kiŋit ŋes ebe, 41“Ikoto keswamak jo inyo?” Kotema atiar, “Ejakait, akoto kakweny.” 42 Kotema Yesu ŋes atiar, “Kokweny: kitaŋaleu jo akoniiyuun.” 43Atipet kokweny, kotupa ŋes, itopoloorit Edeke. Nakeanyuniata ituŋa da kere, kituritos Edeke.191Koloma Yeriko kitorite kidiŋike, 2Ido koany, kojai etuŋanan ekekiror Sakayo; korai eketeleman esolo lokapolon, kerai da ekabaran, 3Kemoot ŋol aanyun Yesu kerai loka epone enyoin, mam epedoro kanuka ekodet, naarai kewuriana ŋesi. 4Koker kiŋaren, kodoka kuju osukamin, tetere eanyuni; naarai itorunit orot ŋol. 5Nakedolio Yesu aibois ŋin, kosesen okitoi, kotema atiar, “Sakayo, kodoku atipet; naarai kebusakinit lolo aiboikin togokon.” 6Kodoku atipet, kisukunyik ŋes kaiyalama. 7 Nakeanyuniata ituŋa kirurumata kere, kobalas ebe, “Aloma aiboikin ketuŋanan lokadiakanaran.” 8 Kobwo Sakayo, kotema ŋesi Ejakait atiar, “Koany, Ejakait, akorakini lukican atutubet naka ikaboro; arai da arodit ituŋanan idiobore, atacakini irwan aoŋon.” 9 Kotema Yesu ŋes atiar, “Adolu lolo aitajario togo lo, naarai erai ŋesi da okoku loka Aburaam. 10 Naarai abu Okoku loka etuŋanan amoot ka aitajar yenikeoliorit.” 11 Nakiirariata ŋun, kiyatak alimokin awaragan, naarai keapie ko Yerusalem, ido naarai komunosi ebe etakanuni ajakanut naka Edeke atipet. 12 Aso kobala ebe, “Kojai etuŋanan lokapolon, kolot akwap naelwana, tetere edumuni ajakanut, kosodi konyet aboŋun, 13Konyarau itomon kobulesinike, koinak kes ŋinituŋanan arupian atomon, kotema kes atiar, ‘Aso kogwelanasi aitodol neaboŋunio.’ 14 Konye kolaata ŋes ituŋa lukoreke, kiyakiasi ikiyakia atupar ŋes, alimokin ebe, ‘Mam kikoto ŋol ayait sio.’ 15Kosodi kanen nakeboŋunio, kodumunite akejakanut, kicorak anyaraun ibulesin ŋul luainakinit arupian, tetere ejenuni ameda naadumut kanuka agwelanar. 16Kobu losodit akonyeneke, kobala ebe, ‘Ejakait, akonirupia emedau ace atomon.’ 17 Kotema ŋes atiar, ‘Iswama ejok, ijo ebulesit loejok! Naarai irai lomunot kakirot naedit noi, koyaŋa apolou naka ireria itomon.’ 18Kobu lokiareit da, kobala ebe, ‘Ejakait, akonirupia emedau ace akany.’ 19Kotema ŋes atiar, ‘Ijo da koyaŋa ireria ikany.’ 20Kobu ece da kobala ebe, ‘Ejakait, koany akonirupia na, naeŋadakinit ogoe. 21Naarai abu kakurianar jo, naarai irai loininik: ilemuni numam ibwaikinit, idwenyi da numam iyeit.’ 22Kotema ŋes atiar, ‘Katubokini jo kakiro nuka aitukukon, ijo ibulesit loerono! Ibu kojeni ebe aninik eoŋ, alemi numam ebwaikinit, adwenyi da numam ayeit. 23Aso kanukinyo mam kiinakinia akarupian mama ejaas ikagwelanarak, tetere neabunio kadum nepepe kamedakec?’ 24Kobala lukebwoete eapias ebe, ‘Kodemut arupia, koinakis je loka arupian atomon.’ 25Kotemasi ŋes atiar, ‘Ejakait, ejaas ŋes arupian atomon.’ 26 ‘Katemari yes atiar, yenejai ibore einakinio; konye yenemamei ibore, edemunio ŋin da yenejaas kaŋes. 27Bobo da ŋul lukasurupoka, lumam akotos eoŋ ayait kes, koyaut ne, koarata kakonyeneka.’ ” 28Nakedaunia einer ŋun, kiŋarenik kes adokar Yerusalem. 29 Kosodi kanen nakeapiki Betepage ka Betaniya, komoru loenyaritai loka Iseitunin, kijuka iarei kokesisiak, 30kobala ebe, “Koloto ore loisesenete; nailomariata toma idumunete ikoku yenika asigiria eenitai, yenimam lem ibwanenit idiotuŋanan: kolacut, koinut. 31Arai kiŋisi ituŋanan ebe, ‘Kanukinyo ilacariata?’ iboŋokinete ebe, ‘Ejakait ipuda ŋes.’ ” 32Koloto lukijukario kodumut kwape kelimokinitere. 33Napelacunete ikoku yenika asigiria, kobalas ikulepek ebe, “Kanukinyo ilacariata isigiria?” 34Koboŋokis ebe, “Ejakait ipuda ŋes.” 35Koyaŋaut mama ejai Yesu, kopetanakis isigiria ikecenapen, kisibwanenoto Yesu. 36 Napelosi, kopetanakis ikecenapen orot, 37Nakeapikinia aijesaret naka Emoru loka Iseitunin, kogeu ekodet kere loka ikesisiak ailel ka aiturit Edeke keporoto loepol kanuka aswamisio kere nukapedor nuaanyut. 38 Kobalas ebe, “Isirereŋitoi Ekabaka loebunit kokiror loka Ejakait! Ainapakin kotoma akuj, ka aibuses da kokuju kakuj!” 39Ice koParisayon lukejaas toma okodet kotemasi ŋes atiar, “Ekesisianakinan, kitoron ikonikesisiak.” 40Koboŋok ebe, “Katemari yes atiar, Arai kililiŋata lu, iworoete do amor.” 41 Nakeapiki koany ere, komonyak, 42 kobala ebe, “Arai kojeni ijo kapaaran kana akiro nukiinakinete ainapakin! Konye kwana ibwaitai kakonyenekon. 43Naarai epote apaarasia nukidukokiniata lukasurupokon itutio airigaunia, kiridakinete jo airiamar iwaitin kere, 44 kibirokinete jo kwap, ka ikonidwe kotomakon, komam kinyeiniata amoru naidokokino amoru nace; naarai mam ibu kojen apak naka aanyanariokon.” 45 Koloma toma oyekalu kogeu aireŋear lukagwelanarak. 46 Kobala kes ebe, “Iwadikatai ebe, ‘Ekatogo eraun etogo lokilipet’; konye yes ituluosi abua naka ikaŋatak.” 47 Kisisianakini ŋinipaaran kotoma oyekalu, Konye komooto isasedotin lupeti ka ikewadikak ka ikapolok luka ituŋa amudiar ŋes; 48konye mam eanyuna nuepedorete aswam, naarai kokotos noi ituŋa kere akiirar ŋes.201Kosodi kanen kapaaran adiopet nakisisianakinia ituŋa koyekalu, ka alimonokin da akiro nukajokak, koponikis ŋes isasedotin lupeti ka ikewadikak nepepe kimakio. 2Kotemasi ŋes atiar, “Kolimokinai iswamai ijo nu kapolou anyoin, bobo da iŋai bo kiinakini apolou ŋin?” 3Koboŋok ebe, “Eoŋ da keŋisi yes akirot adiopet; kolimokis; 4aibatis naka Yokana kebuni kereka kotoma akuj arai bo kotuŋa?” 5Kiŋitanakinos bonik ka bonik, kobalas ebe, “Arai kiitema ebe ‘Kebuni kotoma akuj’, etemari ŋesi atiar, ‘Aso kanukinyo mam kiyuuniata ŋes?’ 6Konye arai kiitema ebe, ‘Kebuni kotuŋa’ kibiribirete oni ituŋa kamor; naarai acamunito ebe kerai Yokana enabi.” 7Koboŋokis ebe mam kejenete nekebunio. 8Kotema Yesu kes atiar, “Eoŋ da mam kalimokini yes apolou nakeswamaa nu.” 9Kogeu alimokin ituŋa awaragan na ebe, “Abu etuŋanan kira amana naka emusabibu, kititiŋ ikakoriok, kolot akwap ace kiboioror apak naeoj, 10Kapak naka aidweny kiyakia ebulesit mama ejaas ikakoriok, tetere einakinete araito nuka emusabibu; konye kibuŋata ikakoriok ŋol, kireŋeasi titai. 11Kiyakia ebulesit ece: kibuŋata ŋol da, kisuruma ileic, kireŋeasi titai. 12Kiyakia lokiwuniet da: kimusuŋata ŋol da, kocakasi kiŋa, 13Kobala ejakait loka amana naka emusabibu ebe, ‘Ekonakini ai? Ejukari okokuka lominat: elemuni eyoŋete ŋes.’ 14Konye nakeanyuniata ikakoriok, kinerut bonik ka bonik, kobalas ebe, ‘Lo ŋes lokeruman: aso kaarata ŋes, tetere eraun airum nawok.’ 15Kocakasi kiŋa kamana naka emusabibu, koarata. Aso ikonakini kes ai ejakait loka amana naka emusabibu? 16Ebuni emudiari ikakoriok ŋul, einakini ice amana naka emusabibu.” Nakiirariata ŋun, kobalas ebe, “Madi akuj!” 17Konye kosesen kes, kotema atiar, “Anyoin apolou naka akirot kana naiwadikatai ebe, ‘Amoru nakeŋerete ikadukok, ŋin ŋes keponi kitaraunai amoru nakapolon naka agor?’ 18Ŋinituŋanan yenibirokini kuju amoru ŋin ebilibiliun; konye ŋin yenibirokin amoru ipicipicari ŋes cut.” 19Apotu ikewadikak ka isasedotin lupeti komooto aikamun ŋes kosawa kaŋol, konye kokuriaka ituŋa; naarai apotu kojenut ebe inerakinit kes awaragan ŋin. 20Kiteikinitoi, kijukasi ikarotak, lukijoseete araut lukabeit, tetere ikamunete ŋes kakiroke, kosodete aijaikin ŋes mama ejai ayait ka apolou naka ekayaiton. 21Kiŋita kobalas ebe, “Ekesisianakinan, kijeni ebe inera, isisianakini da nukabeit, kwabo mam isei ituŋa, konye isisianakini erot loka Edeke kotoma abeit. 22Ibus kereka sio ainakin Kaisar esolo, arai bo mam?” 23Konye kojeni akecepirianut, kotema kes atiar, 24“Kitodikinai adenarit. Nakaŋai aput na, ka nuiwadikatai?” Koboŋokis ebe, “Nuka Kaisar.” 25Kotema kes atiar, “Aso kotacakis Kaisar nueraas nuka Kaisar, ka Edeke da nueraas nuka Edeke.” 26Ido mam apedorete aikamun ŋes kakiroke kakonyen nuka ituŋa; koumokis akeboŋokin koŋatakis. 27Kopotu ice koSadukayon mamakeŋ, luebalas ebe emamei ajarun, kiŋita ŋes ebe, 28“Ekesisianakinan, abu Musa kiwadikak sio ebe, arai ketwana onace ketuŋanan, loemanyit, komamei ikoku, ibusakinit onaceke ayaŋaar aberu, kodumak onaceke aur. 29Aso kejaas iinacan ikanykaarei: komany losodit aberu, kotwana komamei ikoku; 30ka lokiareit da, 31Koyaŋa Iokiwuniet da; ka ice da kere ikanykaarei, kotwaka komam inyeinito idwe. 32Kawasia kotwana aberu da, 33Aso kotoma ajarun eraun ŋin aberu nakaŋai? Naarai kemanyito ikanykaarei kere.” 34Kotema Yesu kes atiar, “Emanyete odwe luka akwapin kanu, emanyario da; 35konye ŋul luimaritai araut luibusakinito adolokin akwap ya ka ajarun kokatwak, mam emanyete, karaida amanyio. 36Naarai mam epedorete atwakare bobo: naarai eriakakinos ka imalaikan; kes da eraas idwe luka Edeke, kanu eraatar idwe luka ajarun. 37Konye ebe itajarunio lukatwak, abu Musa da kitodik, kotoma owai loka Ekiyot, nakelimoria Ejakait araut Edeke loka Aburaam, ka Edeke loka Isaak, ka Edeke loka Yakob da. 38Mam ŋes erai Edeke loka lukatwak, dimarai loka lukajarak; naarai ejarete kere kamakeŋ,” 39Koboŋokis ikewadikak ice, kotemasi atiar, “Ekesisianakinan, iner ejok.” 40Naarai mam bobo etitiŋikino aiŋit akirot. 41Kotema kes atiar, “Biai bo ebalatatar ituŋa ebe erai Kristo okoku loka Daudi? 42Naarai Daudi elopet inera koitabo loka Isabulin ebe, ‘Abu Ejakait kotema Ekajakait atiar, Kiboikin akanika nakoteten. 43Aitodol neebwaikinia lukasurupokon araut iicoloŋ yenika akejekon.’ 44Aso enyarit Daudi ŋes Ejakait, kikonakini bo ai erai ikekoku?” 45Kopupete ituŋa kere, elimokini ikekesisiak ebe, 46“Kocoito ikewadikak, luekotos alosit konapitos ikason Iueojak, kominasi aiyogao kagwelanareta, ka aiboikin aiboisio nukokuju katukosia, ka iicoloŋo lukapolou kopucin; 47ecamete itogoi luka apuserun, kanuka ejose da ilipete ailipasia nueojak; edumunete ŋul atubokinio naitelekarit.”211 Kikeu akekonyen, koany ikabarak icakanakinete ainakinetakec toma aiŋadis, 2Koany apuserut adiopet nakican ecakakini ikapun iarei. 3 Kotema atiar, “Abeit katemari yes atiar, acakaki apuserut ŋin nakican luipu adepar ice kere: 4Naarai acakanakis ŋul kere kotoma luebarara, konye ŋin kotoma ocanike acakaki lukejaatar kere.” 5 Nakineratar ice nuka eyekalu, kwape kitubusitere kamor nuejok ka ainakineta, kotema atiar, 6 “Ŋun nuisesenete, epote apaarasia numam esalakinia amoru adiopet kuju kanace namam etiyakinio.” 7Kiŋita ŋes ebe, “Ekesisianakinan, ejaunete bo ŋun wori? Anyoin da aanyunet naeapuuniata ŋun adolun?” 8 Kotema atiar, “Kocoito kinyein aitapaar yes; naarai epote luipu kokirorika, kobalas ebe, ‘Eoŋ ŋopeŋol!’ Ebe da, ‘Aapuu apak!’ Aso sirikitupasi ŋul. 9 Naiirariata rwaru nuka ijiisio ka iceleta, sirikikuriakaros, naarai ibusakinit ber ŋun ajaun, konye mam awasia edoluni atipet.” 10 Kosodi kotema kes atiar, “Enyoikini ateker asurokin ateker, ka ajakanut da asurokin ajakanut. 11Ejaununete amaraneta nuepolok nuka akwap, ejaunun da ebeli, ka atular kaiboisio nuegelegela; ejaunete nuketasuro ka aanyuneta nukos abunore kotoma akui. 12 Konye eriŋa ŋun edoluno, kikamunete yes, kireete, kijaikinete yes kakonyen nuka atukosia ka aidarisia, kiyaŋaario kakonyen nuka ikabakan ka ikayaitok kanuka ekakiror. 13Eraunete ŋun akajenak kamakus. 14 Aso kibwaikisi otauonokus ebe sirikiwomoomata ber nuiboŋokinete; 15 naarai kainakinete yes aituk ka acoa, numam lukasurupokus kere epedorete aitepeg karaida airebokin. 16Kijaikinete ikauriakakus, ka iinacanakus, ka lukatekerekus, ka ipaperokus, earete ice kayesi; 17 kiŋarunete yes ituŋa kere kanuka ekakiror. 18 Konye mam eoliori etimat ediopet loka akwesikus. 19 Kotoma atitiŋikinikus ikucaunete akusiijar. 20“Konye naianyuniata irimorito ajoresio Yerusalem, aso kojenut ebe aapiki amudiarioke. 21Ŋes konyet ekeriata ŋul luejaas Yudaya oroŋan, kolomutu ŋul luejaas kotomake kiŋa, sirikelomasi ŋul luejaas amanat; 22 naarai eraas nu apaarasia nuka einyaŋane, tetere edolete kere nuiwadikatai. 23 Itukwi kes nuepotiete, ka nuitanakete da kapaarasia kaŋun! Naarai ejaun ationus naepol toma akwap, ka anyunyura da asurokin ateker na. 24 Eŋianakinere akwanis naka ekileŋ, ijoreorio toma atekerin kere; icakacakaete Imo Yerusalem, aitodol naedolioto apakio nuka Imo. 25 Ejaunete moolo aanyuneta toma akoloŋ ka elap ka aacer, ido toma akwap aburun naka atekerin, nuebuonokinos kanuka agat naka aŋolol ka akailan; 26 ipirisiaros itauon luka ituŋa kanuka akurian, ido kanuka aidaret akiro nueponikinito akwap: naarai itamaranio nukapedor nuka akuj. 27 Kosodi konyet eanyunete Okoku loka etuŋanan ebuni kodou kapedor ka aibuses naepol. 28 Konye naegeuniata ŋun atakanun, kikeutu akwesikus, kosesenata kuju, naarai aapu alakuniokus.” 29 Kolimok kes awaragan ebe, “Koanyutu etini, ka icekito kere. 30Apak naegeuniata ailib, ianyunete, ijenunete da kanukus ebe aaput apaarasia nuka aidweny, 31Aso do, yes da, naianyuniata akiro ŋun ketakanut, kojenutu ebe aapu ajakanut naka Edeke. 32Abeit katemari yes atiar, Mam edaun atur na, aitodol naejaunotor akiro kere. 33 Edaunos akuj ka akwapin; konye akakiro mam edaunos cut. 34 “Konye kocoito yesi kinyek airaŋanut ka emeret ka aiyaloŋoŋ da naka aijar kana aisilaŋirir ikusitauon, konesakin apaaran ŋin kwape ipokia akuluma. 35 Naarai edolokini ituŋa kere luejaas akwapin kere. 36 Konye kokwenya apakio kere, kiŋaiŋaata tetere idumunete agogoŋ aiku kakiro ŋun kere nuedolokinete, ka aibwo da kakonyen nuka Okoku loka etuŋanan.” 37 Kisisianakinenei ŋinipaaran koyekalu, konye kolosenenei apero kuare moru loenyaritai loka Iseitunin. 38Kodilenenete ituŋa kere tupuruc sek alosit mama ejai oyekalu akiirar ŋes.221 Kosodi koapu epucit loka Imugatin lumam itubuunitoi loenyaritai Aleleŋ. 2 Komootos isasedotin lupeti ka ikewadikak epone loka aiar ŋes; naarai apotu kokuriaka ituŋa. 3 Kolomak Satan Yuda loenyaritai Isikariot, lokerai ediopet kotomon ka luarei; 4kolot kinerut ka lusasedotin lupeti, ka ikapolokitok iserikalei, epone loka aijaikin ŋes akaninikec. 5Kiyalamikinos, kitutukoto ainakin ŋes arupian. 6Kocam, komo apak naka aijaikin ŋes mamakec, komamei ekodet. 7 Kodol apaaran naka Imugatin lumam itubuunitoi, naibusiar aaria imerekekin lukaleleŋ. 8Kiyakia Yesu Petero ka Yokana kobala ebe, “Koloto kitemonokis lukaleleŋ kanuwok, tetere kinyami.” 9Kotemasi ŋes atiar, “Ikoto ketemokis lali?” 10Kotema kes atiar, “Koany, nailomariata ore, iriamunos ketuŋanan loibwokit amot naka akipi; kotupasi ŋes, kolomasi togo loelomari ŋesi, 11Ilimokinete elopet etogo ebe, ‘Ebala Ekesisianakinan ebe, Ani bo agola nakipejok, neanyamakini lukaleleŋ nepepe kikakesisiak?’ 12Kitodikini ŋesi yes agola naepol nakokuju naepesitai; kitemonokis nen.” 13 Koloto, kodumutu kwape kelimokinia; kitemonokis lukaleleŋ. 14Nakedolio apak, kiboikin ainyam nepepe kikekesisiak. 15Kotema kes atiar, “Abu kemiela noi aimor kayes lukaleleŋ lu, eriŋa eoŋ kiticana; 16 naarai katemari yes atiar, Mam anyami bobo lukaleleŋ kiton naitodolikinere kotoma ajakanut naka Edeke.” 17Kolem akoli, kedau aimal kobala ebe, “Kolemutu na, kijaanakinos: 18naarai katemari yes atiar, Amear kwana mam amasi araito nuka emusabibu kiton neebunio ajakanut naka Edeke.” 19 Kolem emugati, kedau aimal, kobilibil, koinak kes, kobala ebe, “Lo ŋes akakuan, nakeinakinio kanukus: kiswamaenenete kwaŋin akiitunitor eoŋ,” 20 Ka akoli da kwape kwaŋin kedautu ainyam, kobala ebe, “Akoli na erai aitutuket nakitetet kotoma aokotoka, nuebukoros kanukus. 21 Konye koany, akan naka ŋol kalokabilakini ebotet ejai keoŋ omesa. 22Naarai elosi Okoku loka etuŋanan kwape kelosikinitere; konye itukwi etuŋanan ŋol loebilakini ŋes ebotet!” 23Kogeutu aiŋitanar bonik ebe Iŋai bo kakesi ekoto aswam akirot ŋin. 24 Kolom epeget kotomakec ebe, Iŋai bo loeomitai araut lokapolon. 25 Kotema kes atiar, “Irumitos ikabakan lukacekwapin ikecetuŋa; ŋul da lukapedor kamakec enyaritai ikeswamak ajokis. 26 Konye yes mam ikote kwaŋin, dimarai lokapolon kamakus koraun bala erai lodidi, ka lokeŋarenikinon da bala ŋol loijaanakini. 27 Naarai iŋai bo lokapolon, ŋol loiboikini ainyam, arai bo ŋol lojaanakini? Mere tope je loiboikini ainyam? Konye ajai eoŋ kokidiŋikus bala ekejaanakinan. 28“Iraas yesi luipotu kotitiŋikis keoŋ kotoma acodunioka; 29 eoŋ da keŋadakinit yes ajakanut, kwape keŋadakinitor Papaka eoŋ, 30 tetere inyamete ka aimat komesaka kotoma ajakanutuka, ka aiboikin oicoloŋo luka ajakanut, itubokinete atekerin atomon kanuarei nuka Isirael. 31 “Simon, Simon, koany, enit Satan yes, tetere kipiesi kwape kalos, 32 Konye kelipak eoŋ jo kinyek akoniiyuun akurwor; ijo da naibelokinor, kitogogoŋ ikoniinacan.” 33Kotema ŋes atiar, “Ejakait, etemokino aupar kajo aenio, kiton atwanare da.” 34Kotema atiar, “Kalimokini jo, Petero, ebe mam lolo ekokor eruikini aitodol nakiŋerio eoŋ irwan auni ebe mam kijeni.” 35 Kiŋit kes ebe, “Nakejukaritor yes emamei eriagi, karaida ecoe, karaida amuk, ipotu kereka kipudas imodiobore?” Kobalas ebe, “Mam,” 36Kotema kes atiar, “Konye kwana, yenejai eriagi koyaŋa, ka yenikecoe da kwape kwaŋin. Yenemamei ekileŋ kogwela ekelou, kogwelunia. 37 Naarai katemari yes atiar, Ibusakinit ŋun nuewadikatai aitodolikinio mamakaŋ ebe, ‘Aponi kimarakinai nepepe ka lukepali’; naarai nukabeito eoŋ ejaas aitodolikiniokec.” 38Kobalas ebe, “Ejakait, koany, ejaas ne ikileŋa iarei.” Kobala kes ebe, “Aso do.” 39 Kolom, kolot Moru loka Iseitunin, kwape atapitor; kotupasi ikekesisiak da. 40Nakedolio aibois ŋin kotema kes atiar, “Kilipa, kinyeis alomar toma acodunio.” 41Kotiakar ŋesi elopet bala apak naetiakara amoru, kokukokin, kilip, 42 ebe, “Wu Papa, arai ikoto, kolema akoli na kamakaŋ; konye mere nuakoto eoŋ, dimarai nuikoto ijo kiswamai.” 43 Kitakanikin ŋes emalaika loabuni kokuju, kitogogoŋ ŋes. 44Kosodi kanuka aikilianar kiyatak noi ailip; kosubito ainyinyirake bala imany luka aokot nuedoenenete kwap, 45Nakenyounio kotoma ailipike, kobu mama ejaas ikesisiak kodum kes ejotoete kanuka aiturur. 46Kotema kes atiar, “Kanukinyo ijotooto? Konyoutu kilipa kinyeis alomar toma acodunio.” 47 Atipet napinera ŋesi, koany, kotakan ekodet, iŋarenikinit etuŋanan loenyaritai Yuda, ediopet kotomon ka luarei. Kikunyak mama ejai Yesu tetere enui. 48Kotema Yesu ŋes atiar, “Yuda, ibilakini kereka ijo Okoku loka etuŋanan ebotet kainu?” 49Ŋul da lukejaas die kaŋes, kojenutu nuekotosi adoikin, kobalas ebe, “Ejakait, kajepejepata ca kikileŋa?” 50Ediopet kakesi kojepe ebulesit loka losasedoti lopeti kotubo akekit nakoteten, 51Koboŋok Yesu ebe, “Kinyeis ŋun!” Kotiro akekit kitaŋaleu. 52 Kosodi kobala Yesu isasedotin lupeti ka ikapolokitok luka eyekalu ka imakio lukeponikinito ŋes ebe, “Ilomutu ca ikapito ikileŋa ka ibelai bala aikamun ekaŋatan? 53 Apaarasia kere ajaenena eoŋ nenipe kayes toma oyekalu, konye mam ipotu kikamut eoŋ. Konye lo erai ekusisawa, ka apedor naka amuton.” 54 Kosodete kikamut ŋes, koyaata togo loka losasedoti lopeti, konye kotupite Petero kama elwana. 55Kedaut ainokokin akim kidiŋ alaro, kiboikinos nepepe, kiboie Petero da kokidiŋikec, 56Kanen koany apese ŋes, iboie kaneejai akim, kojene, kobala ebe, “Ajaas nan etuŋanan lo nenipe kaŋes.” 57Konye koŋer, kobala ebe, “Ŋo ba na, mam eoŋ ajeni ŋes,” 58Nediokasilon koany ece ŋes, kobala ebe, “Ijo da irai lokec.” Konye Koboŋok Petero ebe, “Ijo ba lo, mere eoŋ,” 59Ketubor bala esawa ediopet kitogogoŋ ece ebe, “Abeit ajai lo nepepe kaŋes; naarai erai ŋesi da Egalilayat.” 60Konye kobala Petero ebe, “Ijo ba lo, mam ajeni nuinera ijo.” Atipet napinera ŋesi koruik ekokor. 61 Kibelokin Ejakait kosesen Petero. Kiitu Petero akirot ya naka Ejakait, nakelimokinit ŋes ebe, “Lolo, eriŋa ekokor eruikino, kiŋeri eoŋ irwan auni.” 62Koloma kiŋa komony noi. 63 Kosodete ituŋa lukikamunete Yesu koboliatar ŋes, kinomonomata; 64korapanakis akekonye kiŋita atiar, “Kodwaru cani! Iŋai bo kinom jo?” 65Koinyanakinete da kakiro nuipu nuka amoromor. 66 Kosodi kiwala akwap, kotukonokin atukot naka imakio luka ituŋa, ka isasedotin lupeti ka ikewadikak; koyautu toma aurianetekec, kobalas ebe, 67 “Arai irai ijo Kristo, kolimokinai.” Kobala ebe, “Karaida kaalimokis yes, mam iyuunete cut; 68Arai keeŋit yes, mam iboŋokinete. 69 Konye amear natikwana iboikin Okoku loka etuŋanan akan nakoteten naka apedor naka Edeke.” 70Kobalas kere ebe, “Aso irai kereka ijo Okoku loka Edeke?” Kobala kes ebe, “Yes ibalas ebe arai eoŋ.” 71Kobalas ebe, “Kipudar bo inyo bobo nuitejenunete? Naarai kiira oni ikulepek akiro nuka aitukuke.”231 Konyou atukot kere, koyaŋaasi Yesu mama ejai Pilato. 2Kogeutu aosan, kotemasi atiar, “Kianyu lo itapaari atekerekosi, ka aiteŋer ituŋa ainanakin Kaisar esolo, ebala ebe ŋes elopet erai Kristo ekabaka.” 3 Kiŋit Pilato ŋes ebe, “Irai kereka ijo ekabaka loka Iyudayan?” Koboŋok ebe, “Ijo ibala.” 4Kobala Pilato isasedotin lupeti ka ikodeta ebe, “Mam aanyunit akirot naerono kotuŋanan kalo.” 5Konye kiketakis kesi noi, kobalas ebe, “Isidiki ituŋa, isisianakini kotoma Yudaya kere, ameun koGalilaya kiton ne da.” 6Kiira Pilato ŋun, kiŋit arai erai etuŋanan ŋol Egalilayat. 7 Nakejenu ebe erai eyaitono loka Kerode, kijuka ŋes mama ejai Kerode, naarai kejai ŋesi da Yerusalem kapaarasia kaŋun. 8 Kosodi napekeanyu Kerode Yesu, kiyalamikin noi, naarai abu kokoto lem aanyun ŋes, naarai abu kiiranar akekiro, komuno aanyun aanyunet naiswamai. 9Kiŋiriŋit ŋes kakiro nuipu; konye ŋes mam eboŋokino amodiokirot. 10Kobwaata isasedotin lupeti ka ikewadikak, kiwosata ŋes kakiro nuipu. 11Kosodete Kerode nepepe kikeserikalei kowena Yesu, koboliatar; kitanapata anapito naibus, kinyakas mama ejai Pilato. 12Kosodi kapaaran kaŋin kominunos do Kerode ka Pilato, naarai kekolosi lem. 13Kosodi kotukonok Pilato isasedotin lupeti ka ikayaitok ka ituŋa, 14kotema kes atiar, “Kiinut etuŋanan lo kwape loitapaari ituŋa, eoŋ da eŋitana ŋes kakonyenekus, ido koany, mam abu kaany amodiodiakaret kotoma akiro ŋun kere nuiwosatotor ŋes. 15Karaida Kerode, naarai enyaku ŋes mamawok. Aso koany, emamei akirot kere naeswamat naibusakinit atwania; 16kanuka ŋun alecori ŋes kasodi aosikin.” [17Kibusakinit ŋes aosikin kes ediopet kopucit.] 18Konye kiworoto kere nepepe ebe, “Koyaŋa lo, koosik sio Baraba.” 19Kerai ŋesi etuŋanan lokeenitai kanuka aipaliikin kotoma ore, ka aiar da, 20Kosodi kiner Pilato kakes bobo, kokoto aosikin Yesu; 21konye kiworoto ebe, “Kibubuk, kibubuk baa!” 22Kolimok irwan nakiwuniet ebe, “Kanukinyo, naanyoin aronis naeswamat lo? Mam aanyunit kamakeŋ adiokirot naibusakinit atwania; kanuka ŋun alecori ŋes kasodi aosikin.” 23Konye kes kiketakis, kilipa kiporotoi luepolok ebe ibusakinit ŋes aibubukinio. Kipikosi iporotoikec. 24Kotub Pilato kwape eŋaiŋaitotor. 25Koosik etuŋanan lokeenitai kanuka aipaliikin ka aiar, lokilipete; konye koinak Yesu aiswamakinio kwape kekototor. 26 Nakeyaŋariata ŋes, kikamut Simon loka Kurene, lokebuni kamanat, kisirioŋa emusalaba, arionit atupitor Yesu, 27Kotupite ekodet loepol loka ituŋa, ka aŋor da nukedipidipeete atorobusio ibworosi ŋes. 28Konye kibelokin Yesu kobala ebe, “Yes apesur nuko Yerusalem, sirikiimonyata eoŋ, konye komonya akulepek, ka ikusidwe. 29 Naarai koany, epote apaarasia nuetemariata atiar, ‘Isirereŋitoi arakanin, ka aliligeta numam eurito, ka ikisin da lumam itanakito!’ 30 Kanen egeunete kesi alimokin iroŋan ebe, ‘Kibirunos mamakosi’; ka iukon da ebe, ‘Koraparai’. 31 Naarai arai kiswamata nu kokitoi loepalal, ikonakinete bo do ai kaloeonit?” 32Koyaŋaasi ice da iarei, ikeswamak nueroko, aario nenipe kaŋes. 33 Nakedolioto aibois naenyaritai Abelekek naka Akou, kibubukis ŋes nen, ka kwi ikeswamak nueroko, ediopet akanike nakoteten, ka ediopet da akanike nakokediany. 34 Kotema Yesu atiar, “Papa, kisioni kes; naarai mam ejenete nuiswamaete.” Kokorokorata ikenapen kailamilam eroet. 35 Kobwoete ituŋa esesenete; konye ikayaitok koinyanakinete kobalas ebe, “Etajari lem ice; kitajarun ŋes elopet, arai erai kito Kristo loka Edeke, Loseunake!” 36 Kokienatar iserikalei da, koloto koinutu ŋes ebino loedwar ria; 37kobalas ebe, “Arai irai cani Ekabaka loka lyudayan, kitajarun jo elopet!” 38Kujuke da kojai aiwadikaet ebe, “LO ŊES EKABAKA LOKA IYUAYAN.” 39Ediopet ka ikeswamak nueroko lukikajakinitai koluik ŋes kobala ebe, “Mere ijo Kristo? Kitajarun bon ka sio da!” 40Koboŋok loce kitoron ebe, “Mam jo iyoŋit Edeke, naarai ijai ijo toma atubokinio napena? 41Erai na nakabeit kamawok; naarai kitacakinio nukibusakinito kanuka aswamisiowok; konye lo mam iswamat adiokirot naerono.” 42 Kotema atiar, “Wu Yesu, kiitunoi eoŋ nailomaria toma ajakanutukon.” 43Kotema ŋes atiar, “Abeit katemari jo atiar, lolo ijaun nepepe keoŋ Paradais .” 44 Kedol bala esawa lokikanyetekape, komutonor akwap kere kiton osawa lokikanyetekaoŋon. 45 Komamu aica naka akoloŋ; kocila aigalisit naka aibois nakalaunan kaarei. 46 Kodelo Yesu keporoto loepol ebe, “Wu Papa, ebwaikini ekamoyo akaninikon.” Kedau einer ŋun, kiridak. 47Keanyu ekapolokiton nuadoikis, kitur Edeke, kobala ebe, “Abeit kerai etuŋanan lo loedolit.” 48Ikodeta da kere luatukokina aanyun ŋun, keanyutu nuadoikis, koboŋosi ore edipidipeete atorobusio. 49 Kere da lukejenete ŋes, ka aŋor nuketupito ŋes anyoun koGalilaya, kobwoete kama elwanikina, esesenete akiro ŋun. 50 Ido koany, kojai etuŋanan ekekiror Yosep, lokerai lokaurianet, etuŋanan loejok loedolit da. 51 (Mam ŋes acamunit ainerunikec ka aswamisioitikec da.) Kerai ŋesi loka Arimataya, ere ediopet loka Iyudayan, edaret ŋesi ajakanut naka Edeke. 52Kolot ŋol mama ejai Pilato, kilip akuan naka Yesu. 53Kolacu, konunukik ogoe loka ebaputa, kiperik ates nakikeitoi atiiba, namam lem kiperikinitoi idiotuŋanan. 54Kerai apaaran naka Aitemonokin, koapie asabato ageun. 55Kotupito aŋor nukepote kaŋes koGalilaya, koanyutu ates, ka epone lokiperikinere akekuan. 56 Koboŋosi kitemonokis lueuru maa ka akinyet.241 Kiyeŋutu kapaaran nakasabato, kwape kejaar aicorakinet. Konye kapaaran nasodit nakasabato, tupuruc sek, koloto ates, koyaŋaasi lueuru maa lukitemokinito. 2Kodumut amoru kikokorior kates. 3Kolomasi toma mam eanyuna akuan naka Ejakait Yesu. 4Kosodi kanen, napebuonokinos kanuka akirot kaŋin, koany, kobwaata ituŋa iarei aapu kakes enapito inapen luimilias; 5nakekuriakarotor kesi ka aitulur akonyenekec kwap, kotemasi ŋul atiar, “Kanukinyo imoototor lokajaran mama ejaas lukatwak? 6 Emamei kane, konye ajaru, Kiitutu kwape enerar kayes eroko ejai Galilaya, 7ebe ibusakinit Okoku loka etuŋanan ainakinio akanin nuka ikadiakanarak, ka aibubukinio, ka ajarun da kapaaran nakiwuniet.” 8Kiitut akiroke, 9koboŋosi kates, kolimokis lutomon kadiopet ka ice da kere, akiro ŋun kere. 10 Keraas kesi Mariam Magadalene, ka Yoana, ka Mariam toto naka Yakob, ka aŋor ace nuajaas nepepe kakes, nualimokinete ikiyakia akiro ŋun. 11Kosubito akiro ŋun kakonyenekec bala nukabaŋaanut; mam apotu kiyuut kes. 12Konye konyou Petero, koker kiton ates; kokukum kireik toma, koany igoen luka ebaputa egitara; koboŋo ore eumokinit nuajaut. 13 Ido koany, kapaaran kaŋin alosete iarei kakesi ore ediopet ekekiror Emao, lokelwanikina ko Yerusalem bala amairon akanykaarei, 14kineranakinos kesi bonik akiro ŋun kere nuadoikis. 15 Napinerasi epeganakinos, kikunyak Yesu elopet koupakinos kakes. 16Konye koraparai akecekonye kinyeis ajenun ŋes, 17Kotema kes atiar, “Akiro anyoika ŋun nuineranakinos ilosete?” Kobwaata ekadakinito. 18Kosodi ediopet kakes, ekekiror Keleopa, Koboŋok ebe, “Ijo bon ipejonikinit ko Yerusalem tape mam ijeni nuadoikis nen kapaarasia kanu?” 19 Kotema kes atiar, “Anyoika?” Kotemasi ŋes atiar, “Akiro nuka Yesu loko Nasaret, lokerai enabi lokapedor kotoma aswamisio ka akiro kakonyen nuka Edeke ka ituŋa da kere. 20Bobo da epone loejaikiniata ŋes isasedotin lupeti ka ikayaitokowok toma atubokinio naka atwanare, kibubukis. 21 Konye kipou isio kamunosi ebe ŋes loekoto alakun Isirael. Eebo, keja ŋun da, lolo ŋes apaaran nakiwuniet ameun naeswamatar akiro ŋun. 22 Bobo da, kituwumokis sio ace kaŋor nukokodetekosi, nuadilito sek ates, 23mam eanyuna akekuan; kopotu ebalas ebe etakanikina kes imalaikan luabalas ebe ejari ŋesi. 24 Ice da lukejaas nenipe kasio apotu koloto ates, koanyut kwape kwaŋin kwape eneratar aŋor kwa; konye mam apotu koanyutu ŋes.” 25Kotema kes atiar, “Wu yes luedit aijen, luiyapete da itauon aiyuun kere nukineras inabin! 26Mam kereka ebusakinit Kristo aiticanio ŋun, ka alomar da toma aibusesuke?” 27 Kosodi ageun kama ka Musa ka inabin kere kitejen kotoma kanukiwadikatai kere akiro nuabeito ŋes. 28Keapikis ere lokelosete, kosubite bala elitor kiŋaren; 29konye kitiŋaasi ŋes, kobalas ebe, “Kosalak ne kasio, naarai ekamus akwap, aapu apaaran adaun.” Koloma kosal kakes. 30 Kosodi nakiboioto kakes enyamete, kolem emugati, kisirereŋ, kobilibil koinak kes. 31Kopukoroi akecekonye kojenut ŋes; koolio kakonyenekec. 32Kotemanaros bonik atiar, “Mam tope amulaete iwokotauon naenerar kaoni korot, ka aikujonokin oni nukiwadikatai?” 33Konyout kosawa kaŋope kaŋol koboŋosi Yerusalem, kodumut lutomon ka lodiopet etukokina, kes ka lukejaas nepepe kakes, 34 ebalas ebe, “Abeit ajaru Ejakait, etakanikin ŋesi Simon,” 35Kes da kolimokis akiro kwa nukorot, ka epone lokitejenunor mamakec kotoma abilibil emugati. 36 Napinerasi akiro ŋun kobwo Yesu elopet kokidiŋikec, kotema kes atiar, “Kinapakinos.” 37 Konye korieŋutu kokuriakata noi, koomitos ebe aanyut etoil. 38Kotema kes atiar, “Kanukinyo iyaloŋoŋooto, kanukinyo da iŋitanarotor kotauonokus? 39Koanyutu akakanin ka akakeje, ebe eoŋ lopelo: kotiroroi, koanyutu; naarai emamei etoil akuan, ka akojo da, kwape ianyuniata ejaas eoŋ.” 40Kedau einer ŋun, kitodik kes akekanin ka akekeje, 41Naarokotor mam iyuuna kanuka aiyalama, koumokis da, kotema kes atiar, “Ejaas yes idisinyamat?” 42 Koinakis atutubet naka agar naipoo. 43Kolem, konyam kakonyenekec. 44 Kotema kes atiar, “Nu kes akakiro, nuabu kalimok yes, naariŋar ajai kayes, ebe ibusakinit kitodolikinos akiro kere nuiwadikatai kokisila luka Musa, ka inabin, ka isabulin, nukabeito.” 45Kosodi kikujok akececoa ajenun nukiwadikatai. 46 Kotema kes atiar, “Kwaŋin iwadikatai ebe ibusakinit Kristo aiticanio, ka ajarun da kotoma okatwak kapaaran nakiwuniet. 47Ebe da elimonokinio atekerin kere kokirorike aitoronikin ka aisionio naka adiakanareta, agear ko Yerusalem, 48iraas yesi da ikajenak luka akiro kaŋun. 49 Ido koany, kejukakini yes aisumunet naka Papaka; konye kiboikinos ore, aitodol nekitanapere yes apedor naebuni kokuju.” 50 Kosodi kiŋarenik kes kiton Betaniya, korio akekanin kisirereŋ kes. 51Kosodi kanen napisirereŋi kes, kotiakar kamakec, koyaŋaarai toma akuj. 52 Komaata ŋes, koboŋosi Yerusalem kailel naepol: 53Kojaenenas duc toma oyekalu, ituritos Edeke. |