Yokana11 Kageunet ajai Akirot, ajai Akirot mama ejai Edeke, korai Akirot Edeke. 2 Kojai ŋol kageunet mama ejai Edeke. 3 Kesubio iboro kere kanukeŋ; kemamei ŋesi mam kesubi ibore kere yenikesubio. 4 Kojai aijar tomakeŋ; korai aijar ŋin aica naka ituŋa. 5 Ecai aica kamuton, ido mam amuton ipikorit. 6 Kobu etuŋanan, lokijukuni Edeke, ekekiror Yokana. 7 Kobu ŋol araut ekajenan, tetere itejenuni nuka aica kaŋin, tetere iyuunete kere kanukeŋ. 8 Mam ŋol kerai aica ŋin, dimarai kobu tetere itejenuni nuka aica. 9Kejai aica nakabeit naecaikini ŋinituŋanan ebunit toma akwap. 10 Kejai ŋesi toma akwap, kesubio akwap kanukeŋ, ido mam akwap abu kojenu ŋes, 11Abu kobu obukeŋ, ido ŋul lukeraas iketuŋa mam apotu kisukunyut. 12 Konye ŋul kere lukisukunyunete ŋes, koinak apedor araut idwe luka Edeke, kes ŋul luiyuunito ekekiror: 13 lumam keurio kaokot, karaida koipud loka akuan, karaida koipud loka ekiliokit, dimarai kanuka Edeke. 14 Koraun akirot akuan, kiboiororoi kamawok, (kaanyut oni da akeibuses, aibuses naka eteluna lokebuni kama ka Papa,) ileleba asianut ka abeit. 15 Etejenuni Yokana nukeŋ, eworoi ebe, “Ŋol ŋes loabu eoŋ kabala ebe, ŋol loebunit kokaukaŋ arau lokageikini; naarai ajai ŋesi sek ageikin eoŋ.” 16 Ido kotoma ailelebake kipou kere kadumutu, asianut da itia asianut. 17 Naarai ikisila etorunere neejai Musa, konye asianut ka abeit etorunere neejai Yesu Kristo. 18 Emamei ituŋanan yeneanyunit Edeke kapakio kere; Okoku loteluna, loejai atorob naka Papa, ŋol ŋes etejenuni. 19 Na ŋes aitejenunet naka Yokana, naejukakiniata lyudayan isasedotin ka Ilebin anyoun koYerusalem, aiŋit ŋes ebe, “Iŋai bo ijo?” 20 Kolimo, mam abu kogir, konye kolimo ebe, “Mam eoŋ arai Kristo.” 21 Kiŋita ŋes ebe, “Inyo bo do? Irai kereka ijo Eliya?” Kotema atiar, “Mam arai,” “Irai kereka ijo enabi je?” Koboŋok ebe, “Mam.” 22Kanuka ŋun kotemasi ŋes atiar, “Iŋai bo do ijo? Kaboŋokisi kwi lukiijukunete. Ibala bo ijo ai kanukon?” 23 Kotema atiar, “Arai eoŋ eporoto loka yeniworoi kamodiŋ ebe, ‘Kitetenata erot loka Ejakait,’ kwape kineritor enabi Isaia.” 24Ejukunitai kes kama ejaas Iparisayon. 25 Kiŋita ŋes, kotemasi atiar, “Kanukinyo ibatisaa, arai mam jo irai Kristo, arai Eliya, karaida enabi je?” 26 Koboŋok Yokana kotema atiar, “Ebatisai eoŋ kakip; konye ebwoi kokidiŋikus lomam yes ijenete, 27 ŋes ŋol loebunit kokaukaŋ, lomam kebusakinit eoŋ ailac arukan naka amukatake.” 28 Eswamao ŋun koBetaniya okekwa Yorodan, neajai Yokana ibatisai. 29 Kapaaran naatupakini koany Yesu ebunit mamake, kotema atiar, “Koany Imerekek yenika Edeke, yenelemari adiakar naka akwapin! 30 Ŋol ŋes loabu eoŋ kenerite ebe, ‘Ebunit kokaukaŋ etuŋanan lokageikini, naarai ajai ŋesi sek ageikin eoŋ.’ 31Kwabo mam abu kajeni ŋes; konye abu eoŋ kabu ebatisai kakipi tetere itodikinio ŋes Isirael.” 32 Kitejen Yokana ebe, “Aany Emoyo edokuni kokuju kwape kajele, kosal mamakeŋ. 33 Kwabo mam abu kajeni ŋes; konye kabala ŋes lokejukuni eoŋ aibatis kakipi ebe, ‘Ŋol loianyuni Emoyo edokuni mamakeŋ kosalak, ŋes ŋol loibatisai kEmoyo Lokalaunan.’ 34 Aany eoŋ, etejen da ebe erai ŋol Okoku loka Edeke.” 35Bobo da kapaaran naatupakini kobwoi Yokana nepepe kikekesisiak iarei; 36 kosesen Yesu elosi, kotema atiar, “Koany Imerekek yenika Edeke!” 37Kiirasi ikesisiak ŋul iarei inera ŋesi, kotupasi Yesu. 38Kibelokin Yesu koany etupito ŋes, kotema kes atiar, “Imoete inyo?” Kotemasi ŋes atiar, “Rabi, (apolouke Ekesisianakinan,) iboie kai?” 39Kotema kes atiar, “Kopotu ianyunete.” Koloto, koanyutu nekiboio; kosalakis mamakeŋ apaaran ŋin, naarai kerai bala esawa lokitomonet. 40 Anderea, onaceke ka Simon Petero, ŋes arai ediopet kaluarei lueirarete Yokana, kotupasi Yesu. 41 Kodum ber ŋesi Simon onaceke, kotema ŋes atiar, “Kidumu Mesia,” (apolouke ebe Kristo). 42 Koyaŋa ŋes mama ejai Yesu. Kosesen Yesu ŋes, kotema atiar, “Ijo Simon okoku loka Yokana, Kinyarao Kepa” (apolouke ebe Petero, arai Amoru). 43 Kapaaran naatupakini kokoto alosit Galilaya, kodum Pilip kotema ŋes atiar, “Kotupunai.” 44Kerai Pilip loko Betesaida, ere loka Anderea ka Petero. 45 Kodum Pilip Natanael, kotema ŋes atiar, “Kidum ŋol lokiwadikai Musa kotoma okisila, ka inabin da, Yesu loko Nasaret, okoku loka Yosep.” 46 Kotema Natanael ŋes atiar, “Epedori tope ibore yenejok alomun koNasaret?” Kotema Pilip atiar, “Bia koany.” 47 Koany Yesu Natanael ebunit mamakeŋ, kiner nuke ebe, “Koany, lokIsirael obe, loemamei aimod kotomakeŋ!” 48Kotema Natanael ŋes atiar, “Kikonakini ai kijenuni eoŋ?” Koboŋok Yesu ebe, “Eriŋa Pilip kenyarauna jo, naijaar kwap ketiŋi abu kaany jo.” 49 Koboŋok Natanael ebe, “Rabi, irai ijo Okoku loka Edeke! Irai ijo Ekabaka loka Isirael!” 50Koboŋok Yesu ebe, “Naarai kalimok jo ebe abu kaany jo kwap ketiŋi, ŋes iyuunia? Ianyuni akiro nuepolok aitelekarit nu.” 51 Kotema ŋes atiar, “Abeit, abeit, katemari yes atiar, Ianyunete akuj eŋaara, ka imalaikan luka Edeke edokarete edokunete da mama ejai Okoku loka etuŋanan.”21 Apaaran nakiwuniet kojai adukokin koKana loka Galilaya; kojai toto naka Yesu da ŋina: 2konyararai Yesu da ka ikekesisiak opucit. 3Kedaun ebino, kotema totoke Yesu atiar, “Emamei kes ebino.” 4 Kotema Yesu ŋes atiar, “Toto, anyoika eoŋ ka jo? Eroko akapak edolo.” 5Kolimok totoke ikejaanakinak ebe, “Nukilimokini kere, kiswamata.” 6 Aso kejaas nen akaalakanya akanykape nuka amor, kibwaikinitai kes nen kanuka epone loka Iyudayan loka aitesegaar, nuilosikinos akeito aarei arai auni. 7Kotema Yesu kes atiar, “Kilelebata akaalakanya akipi.” Kes da kilelebata kiton atokitoit, 8Kotema kes atiar, “Aso do kooko, koinasi ekapolon loka epucit.” Koinasi. 9Kosodi kiir ekapolon loka epucit akipi nukeluoros ebino, komam ejeni nekebunio, (konye kojenete ikejaanakinak luaokete akipi,) konyarau ekapolon loka epucit eteran, 10kotema ŋes atiar, “Ŋinituŋanan itemokini ber ebino loejijim, kosodi kedaut ituŋa aimat noi, eyaunio do loepiana; konye jo iŋadak loejijim kiton kwana,” 11 Abu Yesu kiswama aanyunet na nasodit koKana loko Galilaya, kitodia da akeibuses; kiyuutu ikekesisiak ŋes. 12 Kokau kaŋun kijesar kiton Kaparanaum, ŋes ka totoke, ka ikeinacan ka ikekesisiak da; kosala ŋina apaarasia nuikidioko. 13 Keapie Aleleŋ naka lyudayan, kodoka Yesu Yerusalem. 14 Kodum kotoma oyekalu lukegwelanarete imoŋin ka amerekekin ka ajeleik da, ka ikesiecanarak arupian iboiete. 15Kosub edaset kaunoi, kireŋea kes kere koyekalu, amerekekin ka imoŋin da; kobuko arupian nuka ikesiecanarak, kobuburiana imesanakec. 16 Kolimok ŋul lukegwelanarete ajeleik ebe, “Kolemasi ŋun; sirikituluosi etogo loka Papaka araut logwelanaret.” 17 Kiitut ikekesisiak ebe iwadikatai ebe, “Kaari ekokote loka ekonitogo.” 18 Kosodete koboŋokis Iyudayan kotemasi ŋes atiar, “Aanyunet anyoin nakitodikini ijo sio naarai iswama nu?” 19 Koboŋok Yesu ebe, “Kotiyakisi eyekalu lo, ido adukokini eoŋ apaarasia auni.” 20Kosodete kotemasi Iyudayan atiar, “Eyekalu lo lokedukokinio ikar akaisaoŋon ka lukanykape, iduki tope ijo kotoma apaarasia auni?” 21 Konye enera ŋesi nuka eyekalu loka akuanake. 22Aso nakejarunia kotoma okatwak, kiitut ikekesisiak ebe enerit ŋun; kiyuut nakiwadikatai ka akirot da nakinera Yesu. 23Nakejaar Yerusalem kapak naka epucit loka Aleleŋ, kiyuut ituŋa luipu ekekiror, nakeanyuniata aanyuneta nukiswamai, 24Konye Yesu mam abu komunokina kes, naarai kejeni ituŋa kere, 25 komam ipuda ituŋanan aitejenun ŋes nuka ituŋa; naarai kejeni ŋesi elopet nukejaas otuŋa.31 Kojai etuŋanan loka Iparisayon, ekekiror Nikodemo, ekayaiton loka Iyudayan. 2 Kobu ŋol mama ejai Yesu kuare, kotema ŋes atiar, “Rabi, kijeni ebe irai ijo Ekesisianakinan loibunit kama ejai Edeke; naarai emamei ituŋanan yenepedori aswam aanyuneta nu nuiswamai ijo, dimikito ejai Edeke kaŋes.” 3 Koboŋok Yesu kotema ŋes atiar, “Abeit, abeit, katemari jo atiar, Arai mam ituŋanan eurio nakiareit, mam epedori aanyun ajakanut naka Edeke.” 4Kobala Nikodemo ŋes ebe, “Ikwaikini ai ituŋanan eurio kemojoŋ? Epedori kereka airucakin alomar akoik naka totoke, kouriai?” 5 Koboŋok Yesu ebe, “Abeit, abeit, katemari jo atiar, Arai mam ituŋanan eurio kakipi ka Emoyo, mam epedori alomun ajakanut naka Edeke. 6 Ibore yeneuriei akuan erai akuan; ka yeneuriei Emoyo erai emoyo, 7Sirikiwumok naarai kabala jo ebe, Ibusakinit yes aurio nakiareit. 8 Ekusi ekwam mama ekot, ipupi airurumake; konye mam ipedori aijen kama kebunio, karaida mama ebei; ikoni nen ŋinituŋanan yeneuriei Emoyo.” 9Koboŋok Nikodemo kotema ŋes atiar, “Ikwaikinete ŋun ai epedoros?” 10Koboŋok Yesu kotema ŋes atiar, “Irai tope ijo ekesisianakinan loka Isirael, komam ijeni akiro ŋun? 11 Abeit, abeit, katemari jo atiar, Kinera nukijeni, kitejenuni da nukianyunit; konye do mam yes icamunito akosiitejenun. 12 Arai abu kalimok yes akiro nuka akwap komam iyuunete, ikote Iyuunete ai arai kaalimokis akiro nuka akuj? 13 Emamei yenabu kodokarite toma akuj, dimarai ŋol lokedokuni kotoma akuj, ŋes Okoku loka etuŋanan. 14 Kwape kolo kikajakinia Musa emun kamodiŋ, ibusakinit Okoku loka etuŋanan da aikajakinio kwape kwaŋin: 15tetere ŋinituŋanan yeniyuuni ŋes kojaas kaijar naka ikar kere.” 16 Naarai komina Edeke akwapin kwanata, abu koinak Okokuke loteluna, tetere ŋinituŋanan yeniyuuni ŋes kinye aolior, konye kojaas kaijar naka ikar kere. 17 Naarai mam Edeke ejukunit Okokuke akwapin tetere itelekarete akwapin akiro, dimarai tetere itajario akwapin kanukeŋ. 18 Ŋin yeniyuuni ŋes mam itelekarete akiro; yenimam iyuuni ŋes adaut akiro aitelekar, naarai mam abu kiyuu ekiror loka Okoku loteluna loka Edeke. 19 Lo da ŋes etube, ebe abu aica kobu akwapin, konye kominas ituŋa amuton aitelekarit aica, naarai aroko aswamisiokec. 20 Naarai ŋinituŋanan yeniswamai nueroko elait aica, kwabo mam ebuni neejai aica, kinyeis akeswamisio aideleleun. 21Konye yeniswamai nukabeit ebuni neejai aica, tetere etakanete akeswamisio, ebe iswamatai kotoma Edeke. 22 Kokau kaŋun kolot Yesu ka ikekesisiak akwap nako Yudaya; kiboie kaŋina nepepe kakes ibatisai. 23 Kibatisai Yokana da kAenon naeapias ka Salim, naarai kejaas akipi nuipu nen; kolosenenete ituŋa mamakeŋ kibatisai. 24 Naarai koriŋa Yokana eenikina aidaris. 25Aso kojau epeget ikekesisiak luka Yokana ka Eyudayat kanuka aitalaun. 26 Koloto mama ejai Yokana, kotemasi atiar, “Rabi, ŋol loajai nenipe kajo okekwa Yorodan, lokitejenunit, koany, ibatisai ŋol, ido elosenenete ituŋa kere mamakeŋ.” 27 Koboŋok Yokana ebe, “Mam epedori ituŋanan adumun akirot kere dimikito einakinitai abunore kotoma akuj. 28 Itejenut yesi ikulepek ebe, abu kener ebe, Mam eoŋ arai Kristo, dimarai kejukunitai aiŋarenikin ŋes. 29 Loejaas kateran ŋes eteran; konye epapero loka eteran, loebwoi iirari ŋes, elelakinit noi eporoto loka eteran; aso adol do akaiyalama ŋin. 30 Ibusakinit ŋes aiyatakin, konye eoŋ aiŋoŋar.” 31 Ŋol loebuni kokuju eyait kere; ŋol loerai loka akwap erai loka akwap, inera nuka akwap; ŋol loebuni kokuju eyait kere. 32 Itejenuni ŋun nueanyunit ka nuiirarit da, kwabo emamei yeniyuuni akeitejenun. 33Yeniyuunit akeitejenun itogogoŋit ebe Edeke ŋes abeit. 34 Naarai lokijukuni Edeke inera akiro nuka Edeke: naarai mam Edeke einakini Emoyo kaitemis. 35 Emina Papa Okoku, ititiŋit iboro kere. 36 Yeniyuuni Okoku ejaas kaijar naka ikar kere; konye yenimam erima Okoku mam eanyuni aijar, konye esalakini ŋes anyunyura naka Edeke.41 Aso nakejenunia Ejakait ebe eirasi Iparisayon ebe adum Yesu ikesisiak luipu aitelekar Yokana ka aibatis, 2 (Kwabo mam Yesu elopet kibatisai, dimarai ikekesisiak,) 3kinye Yudaya kolot bobo Galilaya. 4 Kibusakinit ŋes aitor kidiŋ Samaria. 5 Kosodi kodol ore loko Samaria, loenyaritai Sukar, loaapias kamana nakeinakini Yakob okokuke Yosep. 6Kejai nen atan naka Yakob, aso naarai kepasit Yesu kanuka alositeke, kiboikin atan. Kerai bala esawa lokikanyetekape. 7Kobu aberu naSamariat aiwok akipi. Kotema Yesu ŋes atiar, “Ae akipi kamat.” 8Naarai kelositos ikekesisiak ore agwel inyamat. 9 Kotema aberu naSamariat ŋes atiar, “Ikonakini ai ijo Eyudayat kilipi eoŋ akipi, eoŋ naarai Asamariat?” Naarai mam Iyudayan imorikikina kIsamarian. 10 Koboŋok Yesu kotema atiar, “Arai kijeni ainakinet naka Edeke, ka ŋol da lokibala ebe, Ae akipi kamat, tikilipi ŋes, tikiinak jo akipi nukajarak.” 11Kotema aberu ŋes atiar, “Ejakait, emamei jo ibore yeniwokunet, idul atan da; aso idumuni kai akipi ŋun nukajarak? 12 Ipol kereka ijo aitelekarit papaakosi Yakob, loabu koinak sio atan na, ŋes da elopet komat akipike, nepepe kikedwe, ka ikebaren da?” 13 Koboŋok Yesu kotema ŋes atiar, “Ŋin yenemasi akipi nu ejaki bobo akur, 14 konye yenemasi akipi nuainakini eoŋ, mam ejaki akur ikar kere; konye akipi nuainakini eoŋ eraunete kotomake atan naka akipi nuibulubulitos kiton aijar namam edaun.” 15Kobala aberu ŋes ebe, “Ejakait, koinakinai eoŋ akipi ŋun kenyek akur aijak, karaida abunenen ne aiwok akipi.” 16Kotema Yesu ŋes atiar, “Kolot, konyarau okilenikon, koboŋu ne,” 17Koboŋok aberu ebe, “Emamei eoŋ ekiliokit.” Kotema Yesu atiar, “Inera abeit ebe, Emamei eoŋ ekiliokit; 18naarai kijaas kikiliok ikany, ŋol da loijaatar kwana mam erai okilenikon; inera nu abeit.” 19 Kotema aberu atiar, “Ejakait, aanyun ebe irai enabi. 20 Kemaete lukapapaakosi koroŋat kalo; ibalasi yesi ebe Yerusalem ŋes aibois naibusakinit amaia.” 21 Kotema Yesu ŋes atiar, “Toto, kiyuunai, ebunit esawa lomam imaiata bobo Papa koroŋat kalo karaida Yerusalem. 22 Imaete yesi yenimam ijenete; kimai isio yenikijeni, naarai ebunit aitajario kotoma oYudayan. 23Konye ebunit esawa, ejai da kwana, loemaiata ikamaak lukabeit Papa, kotoma omoyo ka abeit, naarai emoot Papa ituŋa luikote nen aima ŋes. 24 Erai Edeke Emoyo, ŋul da luemaete ŋes, ibusakinit aima kotoma omoyo ka abeit.” 25 Kotema aberu ŋes atiar, “Ajeni ebe ebunit Mesia (ŋol Ioenyaritai Kristo); naebunio ŋesi kipukokini sio akiro kere.” 26 Kotema Yesu ŋes atiar, “Eoŋ lopelo lokinera kajo.” 27Atipet kopotu ikekesisiak, koumokis naarai kineras kaberu, konye mam loabu kolim ebe, “Ikoto inyo?” Arai ebe, “Kanukinyo ineratar kaŋes?” 28Aso kinyek aberu akemot, kolot ore, kolimok ituŋa ebe, 29“Kopotu, koanyut etuŋanan lokalimoki akiro kere nukeswamaenenei. Epedori kereka lo araut Kristo?” 30Kolomutu kesi kore koloto mamakeŋ. 31Kapak kaŋin kiŋaiŋaata ikesisiak ebe, “Rabi, konyam.” 32 Konye kotema kes atiar, “Ejaas eoŋ inyamat lumam yes ijenete.” 33Kineranakinos ikesisiak ebe, “Ejai ca nat yeneinunit ŋes inyamat?” 34 Kotema Yesu kes atiar, “Ikanyamat kes luta, aswam nuekot lokejukuni, ka aitodol da akeswam. 35 Mam kereka ibalasi yesi ebe, ‘Eroko esalito ilapio iwoŋon, kodoli aidweny’? Katemari yes atiar, Kikeutu akusikonye, koanyut amanat ebe adaut areŋeun adwenyio, 36Eropio ekadwenyan, etukonokini araito kanuka aijar namam edaun, tetere iyalamikinos ekayean ka ekadwenyan nepepe. 37 Naarai erai akirot nakabeit ebe, ‘Eyei ice, edwenyi da ice.’ 38Abu kejuka yes aidweny ŋun numam kitaaritotor; konye kitaaritos ice, ilomakis yesi aitaaritoikec.” 39Kiyuut Isamarian luipu kotoma ore kaŋol kanuka akirot naka aberu, nakitejenunit ebe, “Abu kalimok akiro kere nukeswamaenenei.” 40Aso nakeponiata Isamarian mamakeŋ, kiŋaiŋaata ŋes asalakin kakes; kosalak do nen apaarasia aarei. 41Kiyuut ice luipu kanuka akekirot. 42 Kotemasi aberu atiar, “Kiyuunit kwana, mere kanuka ekoniiner bon, naarai kiira isio ikulepek, kijenu da ebe abeit erai ŋol Eketajaran loka akwapisinei.” 43 Akaulo kapaarasia kaŋun aarei konyou kanen kolot Galilaya. 44 Naarai kitejen Yesu elopet ebe mam enabi eyoŋio kobukec. 45 Aso nakedolio Galilaya, kisukunyikis Igalilayan, naarai apotu koanyutu akiro kere nukiswamai koYerusalem kopucit, naarai kelosito ŋul da opucit. 46 Kobu bobo Kana loko Galilaya mama etuluoria akipi ebino. Kojai etuŋanan lokapolou Kaparanaum, lokejai okokuke edeka. 47 Kiira ŋol ebe ebunit Yesu Galilaya anyoun koYudaya, kolot neejai kiŋaiŋa aijesar aitaŋaleun okokuke, naarai keapikinit atwanare. 48 Kotema Yesu ŋes atiar, “Arai mam ianyunete aanyuneta ka nukaumokin, mam iyuunete cut.” 49Kobala lokapolou ebe, “Ejakait, kijesar eroko ikakoku ketwana.” 50Kotema Yesu ŋes atiar, “Kolot; ejari okokukon.” Kiyuu etuŋanan akirot nakelimokini Yesu ŋes, kolot. 51 Kosodi napijesar kiriamakinos kikebulesin, lukebalas ebe ejari okokuke. 52Kiŋit kes esawa lokegeunia aitemokin, kolimokis ŋes ebe, “Bian esawa lokikanyetekaarei alakakinia ekamidi ŋes.” 53 Kosodi kojen papake ebe ŋes esawa je lokelimokinia Yesu ebe, “Ejari okokukon.” Kiyuu ŋesi ka lukokaleke kere. 54 Ŋin ŋes aanyunet nakiareit nakiswamai Yesu nakenyounio koYudaya adolore Galilaya.51Akaulo kaŋun kojai epucit loka Iyudayan, kodoka Yesu Yerusalem. 2KoYerusalem ejai atapar ariri kerute loka amerekekin, nakenyaritai kAburanian Betesata, naejaas alomareta akany. 3Koperenenete lukadekak luipu kanen, imudukiok, ka luicodos, ka lukasenyak da, [lukidarito akulaun naka akipi, 4Naarai kejai apak nakedokununia emalaika loka Ejakait atapar, kigur akipi: aso yenikegei alomar kedaun aigur akipi koŋaleuni adeka kere nakikamunit.] 5Kojai nen etuŋanan, lokedeka ikar akaisauni ka lukanykauni. 6Nakeanyunia Yesu ŋol eperi kojen ebe kikoni nen ikar luipu, kotema ŋes atiar, “Ikoto aŋaleun?” 7Koboŋok lokadekan ebe, “Ejakait, emamei eoŋ etuŋanan lokebwaikini eoŋ atapar naitukulaunere akipi, konye naalosio, kageikini icetuŋanan adokar.” 8 Kotema Yesu ŋes atiar, “Konyou, kibwok akonikapet, kolot.” 9 Atipet koŋaleu etuŋanan ŋol, kibwok akekapet, kolot. Kerai da apaaran ŋin nakasabato. 10 Kanuka ŋun kolimokis Iyudayan etuŋanan lokitaŋaleunio ebe, “Erai lolo nakasabato, mam ibus jo aibwok akonikapet.” 11Konye Koboŋok ebe, “Ŋol loketaŋaleuni ŋes kalimokini ebe, ‘Kibwok akonikapet, kolot.’ ” 12 Kiŋita ebe, “Iŋai bo ŋol lokilimokini ebe, ‘Kibwok, kolot?’ ” 13Konye etuŋanan lokitaŋaleunio mam kejeni ebe erai iŋai, naarai koekarite Yesu, naarai ajaas ituŋa luipu aibois ŋin. 14 Kokau kaŋun kodum Yesu ŋes koyekalu, kotema ŋes atiar, “Koany, iŋaleu! Sirikidiaka bobo, kinyek akirot naerono adepar ŋin adoikin jo.” 15Kolot etuŋanan kolimok Iyudayan ebe kerai Yesu lokitaŋaleuni ŋes. 16 Kanuka ŋun kimanata Iyudayan Yesu, naarai kiswamai ŋun kapaaran nakasabato. 17 Konye Koboŋok Yesu kes ebe, “Iswamai Papaka kiton kwana, eoŋ da eswamai.” 18 Aso kanuka akirot kaŋin kiyatakis Iyudayan amoot aiar Ŋes, naarai mere bon aibil asabato, konye kanu anyaritor Edeke Papake, kitiriana da ka Edeke. 19 Aso Koboŋok Yesu kotema kes atiar, “Abeit, abeit, katemari yes atiar, Mam Okoku epedori aswam adiokirot elopet, dimarai ŋin naeanyuni ŋesi Papa iswamai; naarai nuiswamai Papa kere, ŋupeŋun iswamai Okoku da. 20 Naarai emin Papa Okoku, itodikini ŋes kere nuiswamai ŋesi elopet; itodikini da aswamisio nuitelekarito ŋun, tetere yes iwumokinete. 21Naarai kwape itajaria Papa lukatwak ka ainakin kes aijar, kwaŋin einakinia Okoku da ŋul luekot aijar. 22 Mam Papa etubokini idiotuŋanan kere akiro, konye ainak Okoku etube kere, 23 tetere ituŋa kere itopoloorete Okoku, kwape itopolooritotor Papa. Ŋin yenimam itopoloori Okoku mam itopoloori Papa da lokijukuni. 24 Abeit, abeit, katemari yes atiar, ŋin yeniirari akakirot ka aiyuun ŋol lokejukuni, ejaas kaijar naka ikar kere; kwabo mam elomari toma atubokinio, konye anyou kotoma atwanare aloma aijar. 25 “Abeit, abeit, katemari yes atiar, Ebunit esawa, ejai da kwana, loiirariata lukatwak eporoto loka Okoku loka Edeke, ŋul da luiirarete ejarete. 26 Naarai kwape ejaatar Papa aijar kotomakeŋ, kwape kwaŋin abu koinak Okoku da ajaut kaijar kotomakeŋ; 27 koinak ŋes apedor naka aitub, naarai erai Okoku loka etuŋanan, 28Sirikiwumokis akiro nu; naarai ebunit esawa, loiirariata ituŋa kere luejaas toma atesin ekeporoto, 29 elomunete; ŋul luiswamato nuejok mama ejai ajarun naka aijar; ka ŋul da luiswamato nueroko, mama ejai ajarun naka atubokinio. 30 “Mam eoŋ apedori aswam adiokirot kanukaŋ elopet; kwape eiraria, kwape kwaŋin atubio: ekatube da erai lokabeit, naarai mam amoot nuakot eoŋ dimarai nuekot ŋol lokejukuni. 31 Arai ketejenu eoŋ nukaŋ elopet, akaitejenun mam erai nakabeit; 32 ejai ece loitejenuni nukaŋ, ajeni eoŋ ebe akeitejenun naitejenunia nukaŋ erai nakabeit. 33 Ipotu yesi kijukut ituŋa mama ejai Yokana, kitejenu ŋesi abeit. 34Konye eoŋ mam adumuni aitejenunio naebuni kotuŋa; konye enera eoŋ nu tetere yes kitajario. 35 Kerai ŋol atala naenoki kocai, yes da ikotos aisiyalamikin akeica apak naedit. 36 Konye aitejenun nakijaar eoŋ erai naepol adepar naka Yokana; naarai aswamisio nukainakinit Papa aitodolikin, aswamisio akulepek nueswamai, itejenunito nukaŋ ebe, kejukunit Papa. 37 Papa da lokejukunit, etejenunit nukaŋ, Mam yes iirarito ekeporoto apaarasia kere, karaida aanyun akeput. 38Mam da akekirot esalit tomakus, naarai mam yes iyuunitos lokijukuni ŋesi. 39 Imoete kotoma nukiwadikatai, naarai iwomito ebe ijaunete kaijar naka ikar kere kotomakec; ŋun da itejenunito nukaŋ; 40kwabo iŋerete aponare mamakaŋ tetere ijaunete kaijar. 41Mam eoŋ adumuni aibuses kotuŋa. 42Konye kajeni yes, ebe emamei amin naka Edeke kotomakus. 43 Abu kabu kokiror loka Papaka, mam yes kisukunyikis eoŋ; arai kebu ece kokirorike elopet, isukunyikinete ŋol. 44 Ipedorete biai aiyuun, yes luidumanakinos aibuses bonik komam imoete aibuses naebuni kama ejai Edeke ediopet bon? 45 Siriwomito ebe kewosai yes kama ejai Papa; ejai lokiwosai, ŋes Musa, loimunosi yesi. 46 Naarai arai kiyuunito Musa, tikiyuut eoŋ da, naarai abu ŋesi kiwadika nukaŋ. 47 Konye arai mam iyuunito akeiwadikaeta, ikwaikinete ai iyuunete akakiro?”61 Akaulo kaŋun kolot Yesu okekwa juwai loka aŋolol naka Galilaya, naerai naka Tiberia. 2Kotupa ekodet loepol, naarai apotu koanyut aanyuneta nukiswamakini lukadekak. 3Kodoka Yesu oroŋat, kiboikin nen nepepe kikekesisiak. 4 Keapie Aleleŋ, epucit loka Iyudayan. 5Aso kikeu Yesu akekonye, koany ekodet loepol ebunit mama ejai, kotema ŋesi Pilip atiar, “Kigweli kai inyamat, konyamata lu?” 6Kinera ŋun aitem ŋes: naarai ajeni ŋesi elopet nuelosi aswam. 7Koboŋok Pilip ebe, “Inyamat luka adenarin akwat aarei mam ilosikinos kes, arai kenyam ŋinituŋanan idis tai.” 8Ediopet kokesisiakake, ŋes Anderea onace loka Simon Petero, kotema ŋes atiar, 9 “Ejai ne isapat, yenejaas imugatin ikany lukesairi, ka agaria aarei: konye epedorete inyo ŋul kotuŋa luetia nen?” 10Kotema Yesu atiar, “Kisiboikis ituŋa.” Kejaas anya nuipu aibois ŋin, Aso kiboikinos ikiliok, kwaka ilukumin ikany. 11Kosodi kolem Yesu imugatin; kedau aimal, kokorak lukiboiete; kikonak nen agaria, koinak kwape akototor. 12Nakimonikinotor, kolimok ikekesisiak ebe, “Kotukonokisi atutubeta nuabilibila nuesalito, sirikedepar imodiobore.” 13Kosodete kotukonokis, kilelebata ibukito itomon ka luarei atutubeta nuabilibila nuka imugatin ikany lukesairi, nukitasalete kwi lukenyamete. 14 Kosodete nakeanyuniata ituŋa aanyunet naeswamai, kobalas ebe, “Abeit lo ŋes enabi loebunit akwapin.” 15 Kosodi kejenu Yesu ebe kekotosi aponare aikamun ŋes tetere itaraunete ekabaka, kogitar kolot bobo oroŋan ŋes elopet bon. 16 Nakitiboŋia kijesaros ikekesisiak aŋolol, 17kodokas ataker, kogeut aikwaŋar alosit Kaparanaum. Komutonor akwap, komam ber Yesu ebunit mamakec. 18Kogeu aŋolol akulaun kanuka aikut naka ekwam loepol. 19Nakikwaŋarotor bala amairon auni arai aoŋon, koanyut Yesu itorit aŋolol, ikunyunit ataker; kokuriakaros. 20Konye kotema kes atiar, “Eoŋ lo: sirikikuriakaros.” 21Aso kokotosi aisukunyuun ŋes ataker; atipet kodol ataker akwap naabeete kesi. 22Apaaran naatupakini keany ekodet loabwoi kokekwa kaŋolol ebe emamei acetaker, dimarai adiopet bon, bobo da ebe mam Yesu adokarit ataker ŋin nepepe kikekesisiak, konye alosito ikekesisiak bonik. 23 (Konye kopotu atakerin ace anyoun koTiberia koapias kaibois nakenyamiata imugatin kedau Ejakait aimal.) 24Aso nakeanyunia ekodet ebe emamei Yesu kanen, karaida ikekesisiak, kodokasi kesi ikulepek atakerin, koloto Kaparanaum, emooto Yesu. 25Nakedumuniata ŋes kokekwa kaŋolol, kotemasi ŋes atiar, “Rabi, kibuni ijo ne wori?” 26Koboŋok Yesu ebe, “Abeit, abeit, katemari yes atiar, kimoete eoŋ, mere kanuianyuniata aanyuneta, konye naarai ipotu konyama imugatin kimonikinos. 27 Siritaaritos kanuka inyamat luedaunos, konye kanuka inyamat luikuniasi kiton aijar naka ikar kere, lukiinakini Okoku loka etuŋanan; naarai ŋol ŋes loepucakinit Papa.” 28Kosodete kotemasi ŋes atiar, “Kikonakini ai tetere kiswamai aswamisio nuka Edeke?” 29 Koboŋok Yesu kotema kes atiar, “Na Ŋes aswam naka Edeke, kiyuut ŋol lokijukuni ŋesi.” 30 Kosodete kotemasi ŋes atiar, “Aso ca iswamai aanyunet anyoin, tetere kianyun keyuutu jo? Iswamai aswam anyoin? 31 Apotu lukapapaakosi konyama emanu kamodiŋ; kwape iwadikatere ebe, ‘Koinak kes inyamat lukepote kotoma akuj ainyam.’ ” 32 Kotema Yesu kes atiar, “Abeit, abeit, katemari yes atiar, Mere Musa kiinakini yes inyamat ŋul lukepote kotoma akuj; konye Papaka ŋes kiinakini yes inyamat lukabeit luepote kotoma akuj. 33 Naarai inyamat luka Edeke ŋes ŋin yenijesuni kotoma akuj, ka ainakin akwapisinei aijar.” 34Kotemasi ŋes atiar, “Ejakait, koinakinai inyamat lu apaarasia kere.” 35 Kotema Yesu kes atiar, “Arai eoŋ inyamat luka aijar; ŋin yenebuni mamakaŋ mam cut eriebi eteŋei, ŋin da yenikeyuuni eoŋ mam cut ejakenenei akur. 36 Konye katema yes atiar kianyut eoŋ, komam iyuunito. 37 Kere lukainakini Papa epote mama ajai; ŋin da yenebuni mamakaŋ mam cut ereŋeari. 38 Naarai ejesuna kotoma akuj, mere aswam nuakoto eoŋ, dimarai nuekot lokejukuni. 39 Nuekot lokejukuni kes nu ebe, Kotoma kaŋul kere lukainakini siriketoolio idiopet da, konye ketajar kapaaran nakawasia. 40 Naarai nuekot Papaka kes nu ebe, Yeneanyuni Okoku ka aiyuun ŋes kojaut kaijar naka ikar kere; etajaruni eoŋ ŋes kapaaran nakawasia.” 41Kosodete kirurumakis ŋes Iyudayan, naarai abala ebe, “Arai eoŋ inyamat lukijesunos kotoma akuj.” 42 Kobalas ebe, “Mere kereka lo Yesu, okoku loka Yosep, lokijeni papake ka totoke? Ikwaikini ai ebala ebe, Ejesun eoŋ kotoma akuj?” 43Koboŋok Yesu kotema kes atiar, “Sirikirurumata bonik ka bonik. 44 Emamei ituŋanan yenepedori abunore mamakaŋ arai mam eriunit Papa lokejukuni; eoŋ da etajaruni ŋes kapaaran nakawasia. 45 Iwadikatai kotoma onabin ebe, ‘Isisianakini Edeke kes kere.’ Ŋin yeniirarit, ka aisisiaun kaneejai Papa, ebuni mamakaŋ. 46 Mere ebe eanyunit ituŋanan Papa, dimarai ŋol loabuu kama ejai Edeke; ŋol ŋes eanyunit Papa. 47 Abeit, abeit, katemari yes atiar, Yeniyuunit ejaas kaijar naka ikar kere. 48 Arai eoŋ inyamat luka aijar. 49 Apotu lukapapaakus konyamata emanu kamodiŋ, kotwaka da. 50Lu kes inyamat luijesunos kotoma akuj, tetere enyami ituŋanan kes komam etwani. 51 Arai eoŋ inyamat lukajarak lukijesunos kotoma akuj; arai kenyam ituŋanan inyamat lu, ebusi ikar kere; inyamat da luainakini eoŋ kanuka aijar naka akwapisinei ŋes akakuan.” 52 Kopegasi Iyudayan bonik ebe, “Epedori biai etuŋanan lo ainakin oni akekuan ainyam?” 53Aso kotema Yesu kes atiar, “Abeit, abeit, katemari yes atiar, Arai mam inyamete akuan naka Okoku loka etuŋanan, ka aimat da akeokot, emamei aijar kotomakus. 54Yenenyami akakuan ka aimat da akaokot ejaas kaijar naka ikar kere, eoŋ da etajaruni ŋes kapaaran nakawasia. 55Naarai akakuan kes inyamat lukabeit, akaokot da kes numatan nukabeit. 56 Yenenyami akakuan ka aimat da akaokot esalakini tomakaŋ, eoŋ da tomakeŋ, 57Kwape kejukunia Papa lokajaran eoŋ, ajari eoŋ da kanuka Papa, kwape kwaŋin yenikanyami eoŋ ejari kanukaŋ, 58Lu kes inyamat lukijesunos kotoma akuj, mere kwape kenyamiata lukapapaa kotwaka; yenenyami inyamat lu ejari ikar kere.” 59Enera ŋesi akiro ŋun kotoma atukos, naesisianakinia Kaparanaum. 60Nakiirariata ice luipu kokesisiakake kobalas ebe, “Etiono ca akirot na; iŋai bo epedori aiirar?” 61Konye kojeni Yesu kotauke ebe erurumata ikekesisiak kanuka akirot kaŋin, kotema kes atiar, “Kitiguiki ca yes akirot na? 62 Ikonakinete bo do ai arai ianyunete Okoku loka etuŋanan edokari nekolo kejai sek? 63 Emoyo ŋes einakini aijar, mam akuan epedori ibore; akiro nukalimokinit yes eraas emoyo, eraas da aijar. 64 Konye ejaas ice kotomakus lumam iyuunito.” Naarai kejeni Yesu ameun kageunet lumam iyuunito, ka ŋol da loebilakini ŋes ebotet. 65 Kobala ebe, “Kanuka ŋun katema yes ebe emamei ituŋanan yenepedori abunore mamakaŋ, dimikito einakinitai kama ka Papa.” 66Kanuka ŋun koboŋosi luipu kokesisiakake, komam bobo eupasi kaŋes. 67Aso kotema Yesu lutomon kaarei atiar, “Ikotosi kereka yesi da aboŋor?” 68 Koboŋok Simon Petero ebe, “Ejakait, kilosi mama ejai iŋai? Ijaas ijo kakiro nuka aijar naka ikar kere. 69 Kiyuunit isio, bobo da kijeni ebe irai ijo Lokalaunan loka Edeke.” 70Koboŋok Yesu kes ebe, “Mere kereka eoŋ kaseunit yes lutomon kaarei, ediopet da kayesi erai Satan?” 71Enera nuka Yuda okoku loka Isikariot, naarai ŋol loebilakini ŋes ebotet, ŋes da ediopet kotomon ka luarei.71 Akaulo kaŋun kitorite Yesu Galilaya; naarai mam kekoto aitorit Yudaya, naarai kemootos lyudayan aiar ŋes. 2 Keapie epucit loka lyudayan loka iswamin. 3 Aso kotemasi ŋes ikeinacan atiar, “Konyou kane kolot Yudaya, tetere eanyunete ikonikesisiak akoniswamisio nuiswamai. 4Naarai emamei ituŋanan yeniswamai akiro kaiyeiyea, yenekoto ŋes elopet aitebeun. Arai kiswama nu kitodiar kakwapin.” 5 Naarai ikeinacan da mam eyuunito ŋes. 6 Aso kotema Yesu kes atiar, “Eroko akapak edolo; konye itemokino akusipak apaarasia kere. 7 Mam akwapin kipedorete aila yes, konye kalaito eoŋ, naarai etejenu eoŋ ebe eroko akeceswamisio. 8Kodokasi yesi opucit, mam ber eoŋ edokari opucit ŋol, naarai eroko akapak itodolikino.” 9Nakedaunia alimokin kes ŋun kosalak Galilaya. 10Konye nakedauniata ikeinacan adokar opucit, kanen kodoka ŋesi da elopet, mere kaitebeikin konye bala kaiyeiyea. 11Aso komoata Iyudayan ŋes kopucit, kobalas ebe, “Ai bo ejai ŋol?” 12Kojau airuruma naepol kokodeta kanukeŋ; kobalas ice ebe, “Erai etuŋanan loejok.” Kobalas ice da ebe, “Mere kwaŋin, konye itapaari ekodet.” 13 Konye emamei ituŋanan yeninera kaitebeikin naarai kekuriaka Iyudayan. 14Kosodi kanen kokidiŋ kepucit kodoka Yesu, koloma oyekalu, kogeu aisisianakin. 15 Koumokis Iyudayan, kobalas ebe, “Kikonakini lo ai ecouni komam isisiat?” 16 Aso Koboŋok Yesu kotema kes atiar, “Akaisisianakin mere nakaŋ dimarai naka ŋol lokejukuni; 17arai ekoto ituŋanan aswam nuekot ŋol, ejenuni nuka aisisianakin kana, arai kebuni kama ejai Edeke, arai bo enera kanukaŋ bon. 18 Yeninera kanukeŋ bon emoot akeibuses ilopet; konye yenemoot aibuses naka ŋol kalokijukuni ŋes erai yenikabeit, ido kotomake emamei aiŋalanut. 19 Mam kereka Musa kiinakinit yes ikisila? Konye emamei idio kayesi yenericit ikisila. Kanukinyo kimoiata aiar eoŋ?” 20 Koboŋok ekodet ebe, “Ejai jo ajokit! Iŋai bo emoot aiar jo?” 21 Koboŋok Yesu kotema kes atiar, “Abu keswama aswamisioit adiopet, iwumokinito yesi kere. 22 Kanuka ŋun abu Musa koinak yes aikep (konye mam abuni kama ka Musa, konye kama ka lukapapaa); ikepete yesi etuŋanan kapaaran nakasabato. 23 Arai ekepio etuŋanan kanakasabato, tetere mam ekisil loka Musa ebila, kinyunyurikis kereka eoŋ kanu etaŋaleunio cut etuŋanan kapaaran nakasabato? 24 Sirikituboto kwape eseseniata akusikonye, konye kotuboto kotoma adolit.” 25 Aso kotemasi ice lukoYerusalem atiar, “Mere lo loemootos kesi aiar? 26Konye, koany, inera kaitebeikin, kwabo mam elimokinete adiokirot! Motoko ejenete ikayaitok abeit ebe erai lo Kristo? 27 Konye kijeni lo neebunitor; konye naebunio Kristo, emamei yenejeni neebunio.” 28Kiworo Yesu isisianakini koyekalu kobala ebe, “Ijenete eoŋ, ijenete nekabunio da; kwabo mam eoŋ abunit kanukaŋ, konye ŋol lokejukuni erai lokabeit, lomam yes ijenete. 29 Ajeni eoŋ ŋes; naarai abuni kamakeŋ, ŋes da kejukuni.” 30 Kosodete komootos aikamun ŋes; konye mam etuŋanan abu korio akekanin aikamunia, naarai ariŋa edoluno ekesawa. 31 Konye luipu lukokodet kiyuut ŋes; kobalas ebe, “Naebunio Kristo, iswamai kereka ŋesi aanyuneta nuipu aitelekarit nuiswamat lo?” 32Kiirasi Iparisayon ikodeta irurumaete ŋun kanukeŋ; kosodete isasedotin lupeti ka Iparisayon kijukasi ikejaanakinak aikamun ŋes. 33 Kosodi Yesu kobala ebe, “Eroko apak edit ajai nenipe kayes, kasodi alosit mama ejai lokejukuni. 34 Kimoete eoŋ komam kidumunete: neajai eoŋ mam yes ipedorete aponare.” 35Kosodete kineranakinos Iyudayan ebe, “Ai bo elosi lo nemam oni kipedori adumunia ŋes? Elosi kereka ŋesi mama ejaas luisiarakina oYonanin, ka aisisianakin da Iyonanin? 36Akirot anyoin na nainerit ebe, ‘Kimoete eoŋ komam kidumunete’, ido, ‘Neajai eoŋ mam ipedorete aponare’?” 37 Kosodi kapaaran nakawasia naka epucit, ŋes apaaran nakapolon, kobwo Yesu kiworo ebe, “Arai kejak ituŋanan akur, kobu mamakaŋ komat. 38 Yenikeyuuni, kwape ineratar nuiwadikatai ebe, ‘Eleleete icorin luka akipi nukajarak kotomakeŋ.’ ” 39 Enerit akirot ŋin kanuka Emoyo, loeinakinio luiyuunito ŋes: naarai ariŋa ber Emoyo einakina, naarai eriŋa Yesu itopolooro. 40 Aso nakiirariata ice kokodet akiro ŋun, kobalas ebe, “Abeit erai lo enabi je.” 41 Ice da kobalas ebe, “Erai lo Kristo.” Konye ice kobalas ebe, “Mam, ebuni tope Kristo koGalilaya? 42 Mam kereka ebalas nukiwadikatai ebe ebuni Kristo kaur naka Daudi, kotoma Betelekem, ere lokejai Daudi?” 43 Kwaŋin kojai atiakatiakaun kotuŋa kanukeŋ. 44 Kokotosi ice aikamun ŋes, konye komamei yenikibwaikini ŋes akanin. 45 Koboŋosi ikejaanakinak mama ejaas isasedotin lupeti ka Iparisayon, luketemarete kes atiar, “Kanukinyo mam kiyauniata ŋes?” 46 Koboŋokis ikejaanakinak ebe, “Mam inerit cut idiotuŋanan kwape inerar etuŋanan lo.” 47Kosodete koboŋokis Iparisayon ebe, “Aso cama kitapaa yes da? 48 Iŋai bo kotoma ikayaitok loiyuunit ŋes, arai kotoma oParisayon? 49Konye ikenitoi ekodet ŋol lomam ejeni ikisila.” 50 Kobala Nikodemo, ŋes lokelosit kolo mama ejai Yesu, lokerai ediopet kakesi ebe, 51 “Etubokinete kereka ikisilawok etuŋanan, eriŋa ber iirara ŋes ka ajenun nuiswamai?” 52 Koboŋokis kotemasi ŋes atiar, “Ibunit kereka ijo da koGalilaya? Koŋic, koany ebe mam enyouni enabi koGalilaya.” 53Koboŋo ŋolituŋanan oreke.81 Konye kolot Yesu moru loka Iseitunin. 2Koboŋo tupuruc sek oyekalu, kopotu ituŋa kere mamakeŋ; kiboikin kogeu aisisianakin kes. 3Koyaut ikewadikak ka Iparisayon aberu naekamunitai kadoteu; kibwaikis kidiŋ, 4kobalas ŋes ebe, “Ekesisianakinan, ikamunitai aberu na edotei. 5 Aso kotoma okisila abu Musa kicorak aibiribir nuikote nen kamor; aso ca ibala bo ijo ai?” 6Kinerasi kesi akiro ŋun ekodunete ŋes, tetere edumunete akirot nakiwosaet. Konye kokukum Yesu, kiwadik alup kekebokorit. 7 Nakiyatanakiniata aiŋit ŋes, kitenar kotema kes atiar, “Yenemamei adiakaret kotomakus, kogeu aibir ŋes kamoru.” 8Kokukum bobo, kiwadik alup kekebokorit. 9 Kes da, nakiirariata, kilepilepata itauonokec, kolomasi idiopet idiopet, ageun komakio kiton lukawasia; kosalak Yesu bon, ka aberu ebwoi kanen kokidiŋ, 10Kitenar Yesu, kotema ŋes atiar, “Toto, alu bo ŋul lukiwosato jo? Emamei kereka yenikitubokini jo?” 11 Kotema atiar, “Emamei, Ejakait.” Kotema Yesu atiar, “Eoŋ da mam katubokini jo: kolot; konye sirikidiaka bobo.” 12 Kinera Yesu bobo kakes, kotema atiar, “Arai eoŋ aica naka akwapin; yenikatupuni eoŋ mam cut elosi kamuton, konye ejaas kaica naka aijar.” 13 Kotemasi Iparisayon ŋes atiar, “Itejenuni ijo elopet boni mam akoniitejenun erai nakabeit.” 14 Koboŋok Yesu kotema kes atiar, “Karaida ketejenun eoŋ elopet erai akaitejenun nakabeit; naarai ajeni nekabunio, ka nealosi da; konye yes mam ijenete nekabunio, karaida nealosi. 15 Itubete yesi kwape ejaar akuan; mam eoŋ atubokini ituŋanan. 16 Karaida katubi eoŋ, erai ekatube lokabeit; naarai mam eoŋ ajai bon, konye eoŋ ka lokejukuni. 17 Bobo da kotoma okisilakus iwadikatai ebe aitejenun naka ituŋa iarei erai nakabeit. 18 Etejenuni eoŋ elopet, ketejenuni Papa da lokejukuni.” 19 Kosodi kotemasi atiar, “Ejai bo ai Papakon?” Koboŋok Yesu ebe, “Mam kijenete eoŋ karaida Papaka; arai kiijenete eoŋ, tikijenut Papaka da.” 20 Kinera akiro ŋun kotoma agola naka aiŋad, nakisisianakinia koyekalu; kwabo amamei etuŋanan loekamuni ŋes; naarai aroko ekesawa edoluno. 21 Kotema bobo atiar, “Alosi eoŋ, yes da kimoete, itwakete yesi kotoma adiakanaretakus; nealosi eoŋ mam yes ipedorete aponare.” 22 Kosodete kotemasi Iyudayan atiar, “Earakin ca, naarai ebala ebe, ‘Nealosi eoŋ mam yes ipedorete aponare’?” 23 Kotema kes atiar, “Iraas yesi lukokwap, arai eoŋ lokokuju; iraas yesi luka akwapin kanu; mam eoŋ arai loka akwapin kanu. 24Kanuka ŋun kalimokis yes ebe itwakete kotoma adiakanaretakus; naarai arai mam iyuunito ebe arai eoŋ, itwakete kotoma adiakanaretakus.” 25 Kosodete kotemasi ŋes atiar, “Irai bo ijo iŋai?” Kotema Yesu kes atiar, “Ŋopeŋol lokalimokinit yes ameun kageunet. 26 Ejaas nuipu einer ka aitub da kanukus: konye ŋol lokejukuni erai abeit; nueirari eoŋ kamake, kes enera kotoma akwapin.” 27Kwabo mam apotu kojenut ebe inerakinit kes nuka Papa. 28 Aso kotema Yesu atiar, “Naidauniata aikeun Okoku loka etuŋanan, ŋes konyet ijenuniata ebe eoŋ ŋopeŋol, ebe da mam eswamai akirot kanukaŋ bon, dimarai kwape kesisianakinia Papa, enera kwaŋin. 29 Ejai ŋol lokejukuni nenipe keoŋ; mam kenyeinit eoŋ bon; naarai eswamaenenei nuekot ŋesi apaarasia kere.” 30 Nakinerar ŋesi ŋun, kiyuut luipu. 31Aso kotema Yesu lyudayan lukiyuunito ŋes atiar, “Arai kisalakis toma akirotoka, abeit iraas ikakesisiak; 32ijenunete da abeit, abeit da kiwosikini yes.” 33 Koboŋokis ŋes ebe, “Kirai isio aur naka Aburaam, kwabo mam kiraunit ibulesin luka idiotuŋanan kere apakio kere: ikwaikini ijo ibala ai ebe, Kiwosikinio yes?” 34 Koboŋok Yesu ebe, “Abeit, abeit, katemari yes atiar, Ŋinituŋanan yenediakanari erai ibulesit yenika adiakar. 35 Mam ibulesit iboie kotogo ikar kere; konye iboie okoku ikar kere. 36 Aso arai kiiwosik Okoku, iraas lukiwosikinitai cut. 37Ajeni ebe iraas yesi aur naka Aburaam; konye kimootos aiar eoŋ, naarai emamei akakirot aibois kotomakus. 38Nuaanyunit kaneejai Papa kes nuenera eoŋ: yes da iswamaete akiro nukiirarito kaneejai papakus.” 39 Koboŋokis kotemasi ŋes atiar, “Papakosi ŋes Aburaam.” Kotema Yesu kes atiar, “Arai kiraas idwe luka Aburaam, tikiswamata aswamisio nuka Aburaam, 40Konye kwana kimootos aiar eoŋ, lokalimoki yes abeit, naeirarit kama ejai Edeke: mam Aburaam abu kiswama kwaŋin. 41 Iswamaete yesi aswamisio nuka papakus.” Kotemasi ŋes atiar, “Mam sio kiwuritai kadoteu; ejai sio Papa ediopet, ŋes Edeke.” 42 Kotema Yesu kes atiar, “Arai kerai Edeke Papakus, tikiminas eoŋ; naarai abu kalom kama ka Edeke kabu; naarai mam kabuni kanukaŋ bon, konye ŋes kejukunit. 43 Kanukinyo mam ijenuniata ŋun nuenera eoŋ? Naarai mam ipedorete aiirar akakirot. 44 Iraas yesi luka Satan papakus, ikotosi da aswam airaŋaanut naka papakus. Kerai ŋesi ekaaran ameun kageunet, mam icasit kotoma abeit, naarai emamei abeit kotomakeŋ. Nainerar nukaiŋal, inera nueraas nukeŋ elopet; naarai erai ekeŋalan, papa da loka aiŋalanut. 45 Konye naarai enera eoŋ abeit mam kiyuunito eoŋ. 46 Iŋai kayes kelepilepi nukaronok? Arai enera eoŋ abeit, kanukinyo mam yes iyuuniata? 47 Yenerai yenika Edeke iirari akiro nuka Edeke; kanuka ŋun mam yes iirarete, naarai mam iraas luka Edeke.” 48 Koboŋokis Iyudayan kotemasi ŋes atiar, “Aso ca ma mam teni sio kinerit ejok ebe irai Esamariat, ido ejai jo ajokit?” 49Koboŋok Yesu ebe, “Emamei eoŋ ajokit; konye ayoŋit eoŋ Papaka, konye yes kimwaŋito eoŋ. 50 Kwabo eoŋ mam amoot akaibuses; ejai loemoot ka aitub da. 51 Abeit, abeit, katemari yes atiar, Arai keric ituŋanan akakirot, mam egipari atwanare ikar kere.” 52 Kobalas Iyudayan ebe, “Kwana do kijeni ebe ejai jo ajokit, Kotwana Aburaam, ka inabin da; ibala ijo ebe, ‘Arai keric ituŋanan akakirot, mam iiri atwanare ikar kere.’ 53 Itelekarit tope ijo kapolou papaakosi Aburaam loketwani? Inabin da luketwakete; ituluori ijo elopet iŋai?” 54Koboŋok Yesu ebe, “Arai ketopoloor eoŋ elopet, akaibuses mam erai ibore; loketopoloorit eoŋ ŋes Papaka; ŋol loibakasi yesi ebe erai Ekusideke; 55 kwabo mam ipotu kojenut ŋes; konye eoŋ ajeni ŋes; arai kener ebe, ‘Mam ajeni ŋes,’ tikaraun ekeŋalan kwape kayesi; konye ajeni ŋes, aricit da akekirot. 56Abu papaakus Aburaam kolelakinite aanyun akapaaran; ŋes da koany, kiyalamikin.” 57Kosodete kotemasi lyudayan atiar, “Eroko jo edolo ikar akaisakany, ianyunit tope ijo Aburaam?” 58Kotema Yesu kes atiar, “Abeit, abeit, katemari yes atiar, Eroko Aburaam ejauna, ajai eoŋ.” 59 Kosodete kirarata amor tetere ibiribirete; konye Yesu koŋop, koloma koyekalu.91 Nakitoritor, koany etuŋanan emuduki ameun kaurioke. 2 Kiŋita ŋes ikekesisiak ebe, “Rabi, iŋai bo kediakarit, etuŋanan lo arai bo ikekauriak, tape eurio emudukana?” 3 Koboŋok Yesu ebe, “Mam lo ediakarit, karaida ikekauriak; konye tetere itodiaros aswamisio nuka Edeke kotomakeŋ. 4 Kibusakinit aswam aswamisio nuka ŋol lokejukuni, eroko apaaran; ebuni akuar, namam epedoria ituŋanan aswam. 5 Naajaar eoŋ akwapin, arai eoŋ aica naka akwapin.” 6 Nakedaunia einer ŋun, kimuik aimul kwap, kosubunia elupe, kinyonyo akonye nuka etuŋanan kelupe, 7Kotema ŋes atiar, “Kolot kilota katapar naka Siloam” (apolouke ebe Loiyakiaritai), Kosodi kolot, kilota, koboŋu eseseni, 8Kosodete ikeidunyeta ka lukeanyununete lem erai ekelipan kotemasi atiar, “Mere kereka lo lolem iboienenei ilipitoi?” 9Kobalas ice ebe, “Ŋes ŋol”; ka ice da ebe, “Mam, konye eputosi kaŋes.” Kobala ŋesi ebe, “Eoŋ lopelo.” 10Kotemasi ŋes atiar, “Kekwenyunete biai akonikonye?” 11Koboŋok ebe, “Etuŋanan loenyaritai Yesu kosub elupe kenyonyoik akakonye katema atiar, ‘Kolot Siloam kilota’; kasodi kalot, kelota, kakweny.” 12Kotemasi ŋes atiar, “Ai bo ejai ŋol?” Kotema atiar, “Mam eoŋ ajeni.” 13Koyaŋaasi lokerai lem emuduki mama ejaas Iparisayon. 14 Kerai apaaran nakasabato nakesubia Yesu elupe ka aitwekenyun da akekonye. 15Aso kiŋita ŋes bobo Iparisayon da epone lokekwenyunia, Kotema kes atiar, “Abu kibwaik elupe akonyeka, kelota, kwana do aseseni.” 16 Kobalas ice koParisayon ebe, “Mam etuŋanan ŋol ebunit kama ejai Edeke, naarai mam ericit nakasabato.” Konye kobalas ice ebe, “Epedori biai ekadiakanaran aswam aanyuneta nuikote nen?” Kojaun atiakatiakaun kamakec. 17 Kobalas bobo emuduki ebe, “Ido bo jo ibala biai kanukeŋ, naarai abu kitwekeny akonikonyen?” Kobala ebe, “Erai enabi.” 18Aso mam Iyudayan apotu kiyuut akekiro ebe kerai lem emuduki, kosodi akwenyun, kiton neanyarauniata ikauriak luka lokitwekenyunio, 19kiŋita kes ebe, “Erai kereka lo okokukus? Loibalasi aurio emudukana? Ikwaikini bo ai ekwenyi kwana?” 20Koboŋokis ikekauriak ebe, “Kijeni ebe lo ŋes okokukosi, ebe da aurio emudukana; 21konye epone loekwenyia kwana mam kijeni; mam kijeni da yenikitwekenyuni ŋes akonye. Kiŋita ŋes; epol ŋesi, ineri elopet kanukeŋ.” 22 Enerasi ikekauriak kwaŋin naarai akuriaka Iyudayan; naarai enerunitos Iyudayan ebe arai elimori ituŋanan ŋes araut Kristo, ireŋeario katukos. 23Kanuka ŋun ŋes eneratar ikekauriak ebe, “Epol ŋesi; kiŋita ŋes.” 24 Konyaraut nakiareit etuŋanan loamudukana, kotemasi ŋes atiar, “Kitopolo Edeke; kijeni isio ebe erai etuŋanan ŋol ekadiakanaran.” 25Koboŋok ebe, “Arai ca erai ekadiakanaran, mam eoŋ ajeni; ajeni adiopekirot ebe karai eoŋ emuduki, kwana do akwenyi.” 26Kosodete kotemasi ŋes atiar, “Kiikonakini ai? Kiitwekenyuni biai akonikonye?” 27Koboŋok kes ebe, “Kadau alimokin yesi komam iirarete. Kanukinyo bobo ikototor akiirar? Ikotosi yesi da araun ikekesisiak?” 28Komoromoroto, kobalas ebe, “Ijo irai ekekesisian; konye kirai isio ikesisiak luka Musa. 29Kijeni isio ebe abu Edeke kinera ka Musa; konye ŋol mam kijeni nekebunio.” 30Koboŋok etuŋanan kotema atiar, “Eraas nu nukaumokin, ebe mam yes ijenete nekebunio, konye abu ketwekeny akakonye. 31 Kijeni ebe mam Edeke iirari ikadiakanarak; konye arai emai ituŋanan Edeke, iswamai da nuekoto ŋesi, iirari ŋol. 32Ameun kageunet naka akwapin mam lem iiraritai ebe itwekenyunit ituŋanan akonye nuka yeneuritai emudukana. 33 Arai kemam ŋol ebunit kama ejai Edeke, ti mam kepedo aswam akirot kere.” 34 Koboŋokis kotemasi ŋes atiar, “Kiwuritai cut jo kotoma adiakar, kisisianakini kereka ijo da sio?” Kireŋeasi ŋes kiŋa. 35Kiira Yesu ebe ereŋeasi kiŋa, kodum ŋes kotema atiar, “Iyuunit kereka ijo Okoku loka etuŋanan” 36Koboŋok ŋesi kotema atiar, “Ŋes bo iŋai, Ejakait, keyuu ŋes?” 37 Kotema Yesu ŋes atiar, “Iany ŋes, ŋes ŋol loineras kajo.” 38Kotema atiar, “Ejakait, eyuunit.” Komaa ŋes. 39 Kotema Yesu atiar, “Abu kabu toma akwapin nu kanuka etube, tetere eanyunete lumam eanyunete, koraut da lueanyunete imudukiok.” 40 Nakiirariata ice koParisayon lukejaas nepepe kaŋes, kotemasi ŋes atiar, “Kirai kereka isio da imudukiok?” 41 Kotema Yesu kes atiar, “Arai kiraas imudukiok, timam ijaas kadiakar; konye kwana ibalasi ebe ‘Kikwenyi,’ aso esalit adiakarikus.”101“Abeit, abeit, katemari yes atiar, yenimam itori orute elomari anuk naka amerekekin konye kodoka kamace, erai ŋin ikokolan ka ikaŋatan da; 2konye yenitori orute ŋes erai ekecokon loka amerekekin. 3Eŋaikini ekagolon ŋes; iirarete amerekekin ekeporoto, enyarai ŋesi akemerekekin kikiroriakec, itolomari kes kiŋa, 4Kedau aitolomar nukeŋ kere, iŋarenikini kes, etupakinete amerekekin, naarai ejenete ekeporoto. 5 Mam etuparete cut eloŋwau, konye ekerete kama ejai, naarai mam ejenete eporoto loka iloŋwau.” 6 Abu Yesu kolimok kes awaragan ŋin, konye mam ejenuna akiro nualimokini kes. 7 Kolimok Yesu kes bobo ebe, “Abeit, abeit, katemari yes atiar, arai eoŋ erute loka amerekekin. 8 Kere lukageikinete keraas ikokolak ka ikaŋatak; konye mam apotu amerekekin kiirasi kes. 9 Arai eoŋ erute; arai kitoro ituŋanan mamakaŋ, itajario, elomari ka alomun, edumuni da erony. 10Mam ekokolan ebuni atai dimarai akoko, ka aiar, ka amunaar da; abu eoŋ kabu tetere ejaunete kaijar, ejaunete da kanaedeparit. 11 Arai eoŋ ekecokon lokajokan. Einakini ekecokon lokajokan akeijar kanuka amerekekin. 12 Etuŋanan loeropio, lomam erai ekecokon, amerekekin da mam eraas nuke, eanyuni epeet ebuni, inyeini amerekekin, ekeri; ikami do epeet kes, isiarakini. 13Ekeri ŋol naarai erai loeropio, mam epodo amerekekin. 14 Arai eoŋ ekecokon lokajokan; ajeni ŋun nueraas nukaŋ, nukaŋ da kajenete eoŋ, 15 kwape kajenia Papa, eoŋ da ajeni Papa; ainakini akaijar kanuka amerekekin. 16 Ido ejaas eoŋ amerekekin ace, numam eraas nuka anuk kana; kebusakinit ayaun ŋun da, iirarete ekaporoto; kosodete araun esipan ediopet, ka ekecokon ediopet. 17 Kanuka na kamina Papa, naarai ejaikini akaijar, tetere alemuni bobo. 18 Emamei ituŋanan yenikademari, konye ejaikini eoŋ elopet. Ejai eoŋ apedor naka aijaikin, ejai da apedor alemun bobo; adumunit aicorakinet na kama ejai Papaka.” 19 Kojau bobo atiakatiak koYudayan kanuka akiro kaŋun. 20 Luipu kakes kobalas ebe, “Ejai lo ajokit, ekerepiki; kanukinyo iirariata ŋes?” 21Kobalas ice ebe, “Akiro ŋun mam eraas nuka ituŋanan yenejai ajokit. Epedori kereka ajokit aitwekenyun akonye nuka imudukiok?” 22Kerai epucit loka Atiakunio koYerusalem; kapak naka aterot; 23 kitorit Yesu oyekalu alomaret naka Solomon. 24 Kosodete kolukut ŋes Iyudayan kotemasi atiar, “Itodoli ai isibuonokini ikositauon? Arai irai Kristo, kolimokinai kaitebeikin.” 25 Koboŋok Yesu ebe, “Abu kalimok yes, konye mam iyuunito. Aswamisio nueswamai eoŋ kokiror loka Papaka, kes ketejenunito. 26 Konye yes mam iyuunito, naarai mam iraas lukotoma amerekekinika. 27 Iirarete akamerekekin ekaporoto, ajeni kes, kes da katupito eoŋ; 28 ainakini kes aijar naka ikar kere, mam cut eoliorete, kwabo emamei ituŋanan yeneurupoori kes kakanika. 29Papaka lokainakini ŋun erai lokapolon aitelekarit kere, kwabo emamei ituŋanan yenepedori aurupoor kes kakan naka Papaka. 30Kirai eoŋ ka Papa ipe.” 31 Kosodete kirarata bobo Iyudayan amor aibiribirio ŋes. 32Koboŋok Yesu kes ebe, “Ketodik yes aswamisio nuipu nuejok nuepote kama ejai Papa; kanuka aswamisioit anyoin kaŋun kibiribirioto eoŋ kamor?” 33 Koboŋokis Iyudayan ebe, “Mam kibiribiri jo kanuka aswamisioit naejok, konye kanuka ainyanakin Edeke; naarai jo etuŋanan, ituluori bon Edeke.” 34 Koboŋok Yesu ebe, “Mam kereka iwadikatai kokisilakus ebe, ‘Kabala iraas yesi idekesio’? 35 Arai abu konyara kes idekesio ŋul lukebunokini akirot naka Edeke (ido mam epedorete nukiwadikatai abilio), 36 ibalasi kereka yesi lokitalauni Papa kijuk akwapin ebe, ‘Iinyanakini Edeke’; kanu abalar ebe, ‘Arai eoŋ Okoku loka Edeke’? 37Arai mam eswamai aswamisio nuka Papaka, sirikiyuut. 38Konye arai eswamai, karaida mam kiyuunito eoŋ, kiyuutu aswamisio; tetere ijenunete ipiirikinete da ebe ejai Papa tomaka, eoŋ da toma Papa.” 39 Komoata bobo aikamun ŋes; konye koku kakanikec. 40 Kolot bobo okekwa Yorodan aibois nakegeunia Yokana aibatis; kosalak ŋina. 41Kopotu luipu mamakeŋ; kobalas ebe, “Abeit mam Yokana eswamat aanyunet kere: konye nukinera Yokana kere kanuka ŋol keraas abeit.” 42 Kiyuut luipu kaŋina.111 Kodeka etuŋanan, ekekiror Lasaro loko Betaniya, lokorekec loka Mariam ka Marita kinacike. 2 Ŋes Mariam nakinyonyoanakini Ejakait akinyet, konina akekeje kitimake, ŋipeŋin nakedeka onaceke Lasaro. 3Aso kiyakiasi ainacan ŋun mama ejai Yesu ebe, “Ejakait, edeka ŋol loimina ijo.” 4 Konye nakiiraria Yesu kobala ebe, “Adeka na mam erai nakatwanare; konye kanuka aibuses naka Edeke, tetere itopoloorio Okoku loka Edeke kanuka ŋun.” 5Komina Yesu Marita ka inacike, ka Lasaro da. 6Aso nakiiraria ebe edek, kosalak nekejai apaarasia aarei, 7Kosodi kokau kaŋun kotema ikekesisiak atiar, “Kaloto bobo Yudaya.” 8 Kotemasi ŋes ikekesisiak atiar, “Rabi, koloje kwape kwana kikotos Iyudayan aibiribir kamor, ilosi teni bobo ŋipeŋina?” 9 Koboŋok Yesu ebe, “Mam kereka eraas isawan luka paaran itomon ka luarei? Arai elosi ituŋanan paaran mam iguikini, naarai eanyuni aica naka akwapin kanu. 10 Konye arai kelot kuare, iguikini, naarai emamei aica kotomakeŋ.” 11 Kinera ŋun, kosodi kotema kes atiar, “Opaperowok Lasaro ejotoi, konye alosi eoŋ ketwekeny.” 12Kotemasi ikekesisiak ebe, “Ejakait, arai ejotoi, eŋaleuni.” 13Konye kinera Yesu nuka atwanareke, koomitos kesi ebe enera akiro nuka ajo. 14Kosodi kolimok Yesu kes kaitebeikin ebe, “Atwana Lasaro. 15 Ido eyalamikin eoŋ kanukus naarai amamei eoŋ kaŋina, tetere iyuunete. Konye kaloto do mamakeŋ.” 16 Kosodi Tomas loenyaritai Didumo kobala ikepaup ikesisiak ebe, “Kaloto oni da, katwaka nepepe kaŋes.” 17Kosodi nakedolio Yesu kodum edaunit ŋesi apaarasia aoŋon kates, 18Keapias Betaniya ka Yerusalem, bala amairon aarei, 19keponitos ituŋa luipu ko Yudayan mama ejai Marita ka Mariam aipudun kes kanuka onacekec. 20Kosodi nakiiraria Marita ebe ebunit Yesu, kolot aisiriam ŋes; kosalakinite Mariam togo. 21 Kosodi kotema Marita Yesu atiar, “Ejakait, arai kijai ijo ne, timam onaceka ketwana. 22Konye kwana da ajeni ebe kere nuilipi ijo Edeke kiinakini Edeke.” 23Kotema Yesu ŋes atiar, “Ejaruni onacekon.” 24 Kotema Marita ŋes atiar, “Ajeni ebe ejaruni kotoma ajarun naka apaaran nakawasia.” 25Kotema Yesu ŋes atiar, “Arai eoŋ ajarun ka aijar da; ŋin yenikeyuuni eoŋ, karaida ketwana, ejari. 26 Ŋin da yenejari yenikeyuuni eoŋ mam etwani ikar kere. Iyuunit kereka ijo ŋun?” 27 Kotema ŋes atiar, “Eebo, Ejakait; eyuunit eoŋ ebe irai ijo Kristo, Okoku loka Edeke, loebunit akwapin.” 28Nakedaunia einer ŋun, kolot, konyarau kinacike Mariam kaiyeiyea, kobala ebe, “Ejai Ekesisianakinan ne, kinyarit jo.” 29Nakiiraria ŋesi ŋun, kodetun atipet, kolot mamakeŋ. 30 Aroko Yesu edoluno ore, konye aroko ejai aibois naesiriamia Marita. 31Kosodete Iyudayan luajaas ka Mariam togo ipudunete, nakeanyuniata edetun atipet ka alomar kiŋa, kotupasi ŋes, koomito ebe elosi ates aimony ŋina. 32 Kosodi nakedolio Mariam nekejai Yesu, koany ŋes, kibirokin akejeke, kotema atiar, “Ejakait, arai kijai ijo ne timam onaceka ketwana.” 33 Nakeanyunia Yesu ŋes emonyi, ka Iyudayan da lukeupas kaŋes emonyete, komulau eketau, kokadak, 34kotema atiar, “Ibwaikinito ai?” Kotemasi ŋes atiar, “Ejakait, bia koany.” 35 Komony Yesu, 36Kosodete kotemasi Iyudayan atiar, “Koany, kwape lem keminar ŋes!” 37Konye kobalasi ice kakesi ebe, “Ŋol lokitwekenyuni akonye nuka emuduki mam tikepedo aisimik ŋol atwanare?” 38 Kosodi Yesu, komulau bobo eketau, kodol ates; kerai abua, kerapakinitai amoru. 39 Kotema Yesu atiar, “Kolemasi amoru.” Kobala Marita inac naka lokatwan ebe, “Ejakait, eur kwana, naarai edaunit apaarasia aoŋon etwanit.” 40 Kotema Yesu ŋes atiar, “Mam kereka kalimokinit jo ebe arai iyuunit, ianyuni aibuses naka Edeke?” 41Kosodete kolemasi amoru. Kikeu Yesu akekonye akuj, kotema atiar, “Kemalai jo Papa, naarai kiira eoŋ. 42 Kajen ebe kiiranari eoŋ apaarasia kere, konye kener nu kanuka ekodet kalo loejai ne, tetere iyuunete ebe jo kijukunit eoŋ.” 43Nakedaunia einer ŋun, kiworo keporoto loepol ebe, “Lasaro, kolom.” 44Kolom lokatwan, eenitai akanin ka akeje kigoen luka aida; eenitai akekonye da keitabala. Kotema Yesu kes atiar, “Kolacasi ŋes, koosikis kolot.” 45 Kosodete kiyuutu ŋes luipu kotoma oYudayan lukeponito mama ejai Mariam, lukeanyunito nueswamat Yesu. 46Konye ice kakesi koloto mama ejaas Iparisayon, kolimokis nukiswamai Yesu. 47Kosodete isasedotin lupeti ka Iparisayon kotukokis aurianet, kobalas ebe, “Kikwaikini ai? Naarai iswamai etuŋanan ŋol aanyuneta nuipu. 48Arai kiinyei, iyuunete ŋes ituŋa kere: epote Iromayon kidemarete oni aiboisiwok ka awokoteker da.” 49Konye ediopet kakesi, ŋes Kaiapa, lokerai losasedoti lopeti kokaru kaŋol, kotema kes atiar, “Mam ijenete adiokirot kere. 50 Kwabo mam iwomito ebe ibusakinit ediopetuŋanan atwanare kanuka ituŋa, kinye ateker kere amudiar.” 51 Mam ŋes kinera akirot ŋin kanukeŋ bon; konye naarai kerai losasedoti lopeti kokaru kaŋol, abu kodwar ebe etwani Yesu kanuka ateker; 52 kwabo mere kanuka ateker kaŋin bon, konye tetere etukokini nepepe idwe luka Edeke lukisiarakinos araut ipe, 53Ameun kapaaran kaŋin kinerut nuka aiar ŋes. 54Kanuka ŋun mam bobo Yesu alosi kaitebeikin kotoma oYudayan, konye konyou kaŋina kolot aibois naeapias kamodiŋ, kiton ore loenyaritai Epuraim; kosal ŋina nenipe kikekesisiak. 55 Keapie Aleleŋ naka Iyudayan; kodokasi luipu Yerusalem anyoun kamanat aliŋakin Aleleŋ, tetere italaunos. 56Kosodete komoata Yesu, kineranakinos ebwoete koyekalu ebe, “Iwomito inyo? Mam kereka ŋes ebuni opucit lo?” 57Kicorakinito isasedotin lupeti ka Iparisayon ebe arai kejenu ituŋanan neejai, kitejenu kes, tetere ikamunete.121 Kosodi esalito apaarasia akanykape eriŋa edoluno Aleleŋ, kobu Yesu Betaniya, nekejai Lasaro, lokitajaruni Yesu kotoma okatwak. 2 Kitemokinoi epucit kanen; kijaanak Marita, konye kerai Lasaro ediopet kalukemorete kaŋes. 3 Kosodi kolem Mariam elatiri loka akinyet naelai naka etiai loepol, kinyonyoanak akeje nuka Yesu, konina akekeje kitimake; kilelebun aures naka akinyet etogo kere, 4Konye kobala Yuda Isikariot, ediopet kokesisiakake, loekoto abilakin ŋes ebotet, ebe, 5“Kanukinyo mam egwelarere akinyet na adenarin akwat auni, koinakinai lukican?” 6 Kinera nu mere kanu etimitor lukican; konye naarai kerai ekokolan, ŋes etiŋenenei eriagi koyaŋanar nukibwaanakinio toma. 7Kosodi kotema Yesu atiar, “Kinyeisi ŋes, kiŋadak kanuka apaaran naka aidaioka. 8 Naarai ejaas lukican nenipe kayes apaarasia kere, konye eoŋ mam kija kayes apaarasia kere.” 9Kosodete kejenut luipu koYudayan ebe ejai ŋina; kopotu kesi, mere kanuka Yesu bon, dimarai aanyun Lasaro da, lokitajaruni ŋesi kotoma okatwak. 10Konye kinerut isasedotin lupeti aiar Lasaro da; 11naarai kanukeŋ apotu luipu koYudayan kotiakas, kiyuut Yesu. 12 Apaaran naatupakini kiira ekodet loepol loabunit kanuka epucit ebe ebuni Yesu Yerusalem. 13 Kogweununut atenieik nuka amusogon, kolomasi aisiriam ŋes, kiworoto ebe, “Kosana! Isirereŋitoi ŋol loebunit kokiror loka Ejakait, Ekabaka loka Isirael!” 14 Adumunit Yesu ikoku yenika asigiria, kibwanen; kwape iwadikatere ebe, 15“Sirikikurianar, ijo akoku naka Sion; Koany ebunit Ekonikabaka, Ibwanenit ikoku yenika asigiria.” 16 Mam ber ikekesisiak apotu kojenut ŋun: konye kedau Yesu aitopoloorio, ŋes konyet kiitunioto ebe iwadikatai ŋun kanukeŋ, eswamakis da ŋes ŋun. 17Kitejen ekodet lokejai kaŋes nakenyaraunia Lasaro alomun kates, kitajaru da ŋes kokatwak. 18Kanuka ŋun kolot ekodet aisiriam ŋes naarai apotu kiirasi ebe eswamat aanyunet ŋin. 19 Kineranakinos Iparisayon bonik ebe, “Koanyutu mam ipedorete ibore; koany, atupasi ŋes lukakwapin kere.” 20 Kejaas Iyonanin ice kotoma kalukedokarito aima kopucit. 21 Aso koloto ŋul mama ejai Pilip, etuŋanan loko Betesaida loko Galilaya, kilipata ŋes ebe, “Ejakait, kikoto isio aanyun Yesu.” 22Kolot Pilip kolimok Anderea; kouparos Anderea ka Pilip, kolimokis Yesu. 23Koboŋok Yesu kes ebe, “Adol esawa kitopolooroi Okoku loka etuŋanan. 24 Abeit, abeit, katemari yes atiar, Arai mam ecokat loka akimait edoi kwap kotwani, esalit ikoni nepenen; konye arai ketwana, erai araito nuipu. 25 Yenemina akeijar itooliori; ka yenelait akeijar kakwapin kanu idari kiton aijar naka ikar kere. 26 Arai kejaanakini ituŋanan eoŋ, katup; neajai eoŋ ejauni ikakejaanakinan da nepenen; arai kejaanakini ituŋanan eoŋ, itopoloori Papa ŋes. 27 “Kwana ekadakinit ekatau; atemari ai? Papa, koyuunai kosawa kalo. Konye kanuka ŋun abu kadol osawa lo. 28 Papa, kitopoloo ekonikiror.” Kosodi kobu eporoto kotoma akuj ebe, “Etopolo, ido etopoloori bobo.” 29 Nakiiraria ekodet lokebwoi kanen kobalas ebe Eretu akuj; kobalas ice ebe, “Emalaika enerata kaŋes.” 30 Koboŋok Yesu kotema atiar, “Mam ebunit eporoto lo kanukaŋ, konye kanukus. 31 Atubokin kwana akwapin nu akiro: ereŋear kwana ekapolon loka akwapin kanu. 32 Eoŋ da arai keekiar kakwap, eriari ituŋa kere mamakaŋ.” 33Konye kinera nu itodikini aketwanare naetwani. 34 Koboŋok ekodet kotema ŋes atiar, “Kiirarit isio kotoma okisila ebe ebusi Kristo ikar kere: ikwaikini ai ijo inera ebe ibusakinit Okoku loka etuŋanan aikiario? Iŋai bo ŋol erai Okoku loka etuŋanan?” 35 Kotema Yesu kes atiar, “Eroko aica ejai kayes apak naedit. Koloto yesi eroko aica ejai kayes, kinye amuton adolokin yes; ŋin yenelosi kamuton mam ejeni neelosi. 36 Eroko aica ejai kayes, kiyuutu aica ŋin, tetere iraunete idwe luka aica.” Kiner Yesu ŋun, konyou kamakec koŋop. 37Karaida abu kiswama aanyuneta nuipu noi kakonyenekec mam apotu kiyuut ŋes; 38 tetere edoli akirot naka enabi Isaia nakinerit ebe, “Ejakait, iŋai eyuunit akosikirot? Iŋai da epukokinitai akan naka Ejakait?” 39 Kanuka ŋun ŋes mam kiyuuniata naarai enerit bobo Isaia ebe, 40“Etumudak akecekonye, etininik ikecetauon, Kinyeis aanyun kakecekonye, kojenut kotauonokec, Ka aibelokin, ketaŋaleu kes.” 41 Kinera Isaia akiro ŋun naarai abu koany aibusesuke, kolimo akiroke. 42 Konye kiton ikayaitok da kiyuut ŋes luipu; konye kanuka Iparisayon mam apotu kolimosi, kinyeis aireŋeario katukos: 43 naarai keminasi aibuses naka ituŋa aitelekarit aibuses naka Edeke. 44 Kiworo Yesu kobala ebe, “Ŋin yenikeyuunit eoŋ, mam keyuunit eoŋ, dimarai je lokejukuni. 45 Yenikaanyuni eoŋ, eanyuni je lokejukuni. 46 Abu eoŋ kabu araun aica toma akwapin, tetere ŋin yenikeyuunit mam esalakini amuton. 47 Arai kiira ituŋanan akakiro, komam erici, mam eoŋ atubokini ŋes; naarai mam eoŋ abunit atubokin akwapin, dimarai aitajar akwapin. 48 Yenikaŋeri eoŋ, yenimam ecamuni akakiro, ejai ekatubokinanike: akirot naenerit, ŋes etubokini kapaaran nakawasia. 49Naarai mam eoŋ enerit kanukaŋ bon; konye Papa lokejukuni kainakinit aicorakinet, nuatemari ka nuenera da. 50 Ajeni ebe akeicorakinet erai aijar naka ikar kere: aso akiro nuenera eoŋ, kwape kalimokinitor Papa, kwape kwaŋin enerar.”131 Kosodi eriŋa edolo epucit loka Aleleŋ, kejeni Yesu ebe adolu ekesawa loenyounio kakwapin kanu alosit mama ejai Papa, kemina ŋesi iketuŋa lukejaas akwapin, komina kes aitodol awasia. 2 Napenyamete lukatiboŋ, kodaunite Satan aibwaikin Yuda Isikariot, okoku loka Simon, etau lokabilakin ebotet, 3 kejeni Yesu ebe ainaki Papa akiro kere akaninike, ebe da alomu kama ejai Edeke, elosi da mama ejai Edeke, 4 konyou konyamat, kolaca ikenapen; kolem aninaet, koenik aŋabeteke. 5Kosodi kobukok akipi atuba, kogeu ailot ikekesisiak akeje, ka anina kes kaninaet nakenapit. 6 Kodolok do Simon Petero. Kotema Petero ŋes atiar, “Ejakait, ilosi ijo akakeje?” 7Koboŋok Yesu kotema ŋes atiar, “Nueswamai eoŋ mam ijeni kwana, konye ijenuni kokau.” 8 Kotema Petero atiar, “Mam jo ilosi akakeje cut kiton ikar kere.” Koboŋok Yesu ebe, “Arai mam kelosi jo, mam imorikikina keoŋ.” 9Kotema Simon Petero ŋes atiar, “Ejakait, mere akakeje bon, konye akakanin ka akakou da.” 10 Kotema Yesu ŋes atiar, “Yenedauni ailoŋ emamei eipud dimarai ailot akeje, konye elai akuan kere: ilaete yesi da, konye mere kere.” 11 Naarai ajeni ŋesi loekoto abilakin ŋes ebotet; ŋes abalar ebe, “Mam ilaete kere.” 12 Kosodi nakedaunia ailot akejekec, ka alemun ikenapen, ka aiboikin bobo, kotema kes atiar, “Ijenut kereka nukeswamak eoŋ yes? 13 Kinyarito eoŋ Ekesisianakinan ka Ejakait da; inerasi yesi kotenan, naarai arai eoŋ kwaŋin. 14 Aso arai eoŋ, Ekusijakait ka Ekusikesisianakinan da, kelot yes akeje, ibusakinit yes da ailot akeje nuka lucekus. 15 Naarai kainak yes aitodikinet, tetere iswamaete yesi da kwape keswamakinia yes. 16 Abeit, abeit, katemari yes atiar, Mam ebulesit itelekarit ejakaitike; karaida ekiyakia aitelekarit lokiyakiari. 17 Arai kijenutu ŋun, isirereŋitoi yes arai kiswamata. 18 Mam enera nukus kere: ajeni luaseunit; konye kodol naiwadikatai ebe, ‘Lokenyami ikanyamat, ŋes ketonyoik aketitibat.’ 19 Amear kwana kalimokini eriŋa edoluno, tetere naedolunioto, kiyuut ebe eoŋ ŋopeŋol. 20 Abeit, abeit, katemari yes atiar, Yenisukunyikini ŋin yeneyakiari, kesukunyik eoŋ; yenikesukunyikini eoŋ isukunyikinit je lokejukuni.” 21 Kedau Yesu einer ŋun, kokadak kotauke, kitejenu kobala ebe, “Abeit, abeit, katemari yes atiar, ediopet kayesi kabilakini ebotet.” 22Koŋoleanakinos ikesisiak, kobuonokinos iŋai bo ŋol loelimit ŋesi. 23 Kejai ediopet kokesisiakake lokegoŋakina atorob naka Yesu, lokemina Yesu. 24Aso kokwet Simon Petero ŋes, kobala ebe, “Kiŋitu cani loelimit ŋesi.” 25Aso egoŋakina ŋesi kwape kwaŋin atorob naka Yesu, kotema atiar, “Ejakait, ŋes bo iŋai?” 26Koboŋok Yesu ebe, “Loecunyakini aodunet kainak, ŋes ŋol.” Kosodi kedau aicunyakin aodunet, kolem koinak Yuda okoku loka Simon Isikariot. 27 Kokau kaodokinet, kolomak Satan ŋes, Kosodi kotema Yesu ŋes atiar, “Nuiswamai, kisunyite aswam.” 28Kwabo emamei etuŋanan kalukemorete kaŋes lokejeni akirot nakelimokinia ŋes ŋun. 29 Naarai koomitos ice ebe naarai itiŋit Yuda eriagi, abu Yesu kolimok ŋes ebe, “Kogwel lukipuda kanuka epucit,” arai ebe kijaik lukican ibore. 30Kosodi kedau ŋol aijaar aodokinet, atipet koloma: kerai da kuare. 31Kosodi nakedaunia ŋol alomar, kotema Yesu atiar, “Kwana itopolooritai Okoku loka etuŋanan; Edeke da itopolooritai kotomakeŋ. 32 Itopoloori Edeke ŋes kotomakeŋ, itopoloori da atipet. 33 Yes idwe ludidik, eroko apak naedit ajai nepepe kayes. Kimoete eoŋ; kwape abu kalimokinitor Iyudayan ebe, ‘Nealosi eoŋ, mam yes ipedorete abunore’; kwana da kalimokini yes kwape kwaŋin. 34 Kainakini yes aicorakinet nakitetet ebe, Kominanaros; kwape abu kaminar yes, kominanaros yesi da kwape kwaŋin. 35Kanuka ŋun ejenunete ituŋa kere ebe iraas yesi ikakesisiak, arai iminanaros bonik.” 36 Kotema Simon Petero ŋes atiar, “Ejakait, ilosi bo ai?” Koboŋok Yesu ebe, “Nealosi eoŋ, mam kipedori atupun kwana; konye kitupuni kokau.” 37Kotema Petero ŋes atiar, “Ejakait, kanukinyo mam eoŋ apedoria atupar jo kwana? Ainakini akaijar kanukon.” 38Koboŋok Yesu ebe, “Iinakini kereka ijo akoniijar kanukaŋ? Abeit, abeit, katemari jo atiar, Mam ekokor eruikini, aitodol nakiŋerio eoŋ irwan auni.141 “Sirikiyaloŋoŋoto ikusitauon; kiyuutu Edeke, eoŋ da kiyuunai. 2Togo loka Papaka ejaas aiboisio nuipu; arai mere kwaŋin tikalimokis kereka yes ebe alosi aitemokin yes aibois? 3 Arai kalot eoŋ aitemokin yes aibois, aboŋuni bobo kesukunyu yes mamakaŋ, tetere neajai eoŋ ijaikinos yesi da nen. 4Ijenete yesi erot loalosi eoŋ,” 5Kotema Tomas atiar, “Ejakait, mam sio kijeni neilosi ijo; kijenuni biai erot?” 6 Kotema Yesu atiar, “Arai eoŋ erot, ka abeit, ka aijar da; emamei yenebuni mama ejai Papa, dimikito itorit tomakaŋ. 7Arai kiijenete eoŋ, tikijenutu Papaka da; amear kwana ijenete ŋes, ianyut da.” 8Kotema Pilip atiar, “Ejakait, kitodikinai Papa, kidauni.” 9 Kotema Yesu atiar, “Ajai lem eoŋ kayes apak naetia nen kere, mam jo da kijeni eoŋ, Pilip? Yenikaanyunit eoŋ, eanyunit Papa; aso biai bo ibalar ijo ebe, ‘Kitodikinai Papa’? 10 Mam kereka jo iyuunit ebe ajai eoŋ toma Papa, Papa da tomakaŋ? Akiro nuabala yes mam enera kanukaŋ bon; konye Papa loiboie tomakaŋ iswamai akeswamisio. 11 Kiyuunai ebe ajai eoŋ toma Papa, Papa da tomakaŋ; arai mere kwaŋin, kiyuunai kanuka aswamisio akulepek. 12 “Abeit, abeit, katemari yes atiar, Yenikeyuuni eoŋ, iswamai ŋesi da aswamisio nueswamai eoŋ; iswamai da aswamisio nuitelekarito ŋun, naarai alosi neejai Papa. 13 Akirot kere nailipete kokirorika, eswamai ŋin, tetere itopoloorio Papa kotoma Okoku; 14 Arai kilipa akirot kere kokirorika, eswamai ŋin. 15 “Arai kiminas eoŋ, iricete akaicorakineta. 16 Eoŋ da elipi Papa, kiinakini ŋesi yes Ekayuunan ece, tetere ejaenena kayes ikar kere, 17 ŋes Emoyo lokabeit, lomam epedorete akwapin adumun; naarai mam eanyunete ŋes karaida ajenun; ijenete yesi ŋes; naarai esalit mamakus, ejaenena da tomakus. 18“Mam kenyeinete yes iraas ikokiok; abuni mama ijaas. 19 Apak edit mam kaanyunete bobo akwapin; konye yes kianyunete; naarai ajari eoŋ, yes da ijarete. 20 Kapaaran kaŋin ijenunete ebe ajai eoŋ toma Papaka, yes da tomakaŋ, eoŋ da tomakus. 21 Ŋin yenejaas kakaicorakineta, koricite da kes, ŋin ŋes kamina eoŋ: ŋin da yenikamina eoŋ, eminuni Papaka, eoŋ da aminuni ŋes ka aitakanikin mamake.” 22 Kotema Yuda (mere Isikariot) atiar, “Ejakait, ikwaikini ai ikoto aitakanikin mamakosi, kwabo mere akwapin?” 23 Koboŋok Yesu ebe, “Arai kamina ituŋanan, erici da akakirot, eminuni Papaka, sio da kiponi mamakeŋ kitarauni ŋes ekosire. 24 Ŋin yenimam kamina eoŋ, mam erici akakiro; akirot da naiirarete mam erai nakaŋ dimarai naka Papa lokejukuni. 25“Kalimokis yes akiro ŋun, naariŋar ajai kayes. 26 Konye Ekayuunan, ŋes Emoyo Lokalaunan, loijukuni Papa kokirorika, kisisianakini ŋol yes akiro kere, kisiituni da kere nukalimokinit yes. 27 Kenyeiniata ainapakin; kainak yes akainapakin; mere kwape einakiniata akwapin, kainakinia eoŋ yes. Sirikiyaloŋoŋoto ikusitauon, kinyeis da akurian. 28 Ipuput eoŋ abala ebe, Alosi eoŋ, abuni da bobo mama ijaas. Arai kiiminasi eoŋ, tikilakaros, naarai alosi mama ejai Papa; naarai Papa ŋes lokapolon adepar eoŋ. 29 Kwana da kalimok yes eriŋa edoluno, tetere naedolunio, kiyuut. 30 Mam bobo kinera kayes akiro nuipu, naarai ebunit ekapolon loka akwapin kanu. Konye emamei ŋes adiokirot kotomakaŋ; 31 konye eswamai eoŋ kwape kecorakinitor Papa, tetere ejenunete akwapin ebe amina eoŋ Papa. Konyoutu do, kaloto kane.151 “Arai eoŋ emusabibu lokabeit, Papaka da ŋes lokeswaman. 2 Ŋinitenu kotomakaŋ namam erai araito, elemari ŋesi, ka ŋinitenu da naerai araito igweri, tetere iyatakini aira araito. 3Idaut yesi araut luilaete kanuka akirot nakalimokinit. 4Kosalakis tomakaŋ, eoŋ da tomakus. Kwape mam epedoria atenu aira araito alopet bon, arai mam esalit toma omusabibu, kwape kwaŋin yes da mam ipedorete, arai mam isalito tomakaŋ. 5 Arai eoŋ emusabibu, iraas yesi atenun. Yenesalit tomakaŋ, eoŋ da tomakeŋ, erai ŋin araito nuipu, naarai neamamea eoŋ mam ipedorete ibore. 6 Ituŋanan arai mam esali tomakaŋ, ecakario kiŋa kwape katenu, erinyori; etukokinio atenuna, ecakakinio akim, kidoposi. 7 Arai isalito tomakaŋ, akakiro da esalito tomakus, kilipata nuikotosi kere, kiswamakinio. 8 Itopolooritai Papaka kotoma nu arai iraete yesi araito nuipu, iraunos da ikakesisiak, 9Kwape kaminar Papa, eoŋ da kamina yes kwape kwaŋin; kosalata toma aminaka. 10 Arai iricete akaicorakineta, isalete toma aminaka, kwape aricitor eoŋ aicorakineta nuka Papaka, asalit da toma aminake. 11 Kalimokis yes akiro ŋun tetere ejaun aiyalamaka tomakus, kitodolikinoi da aiyalamakus. 12 “Na ŋes akaicorakinet ebe Kominanaros, kwape abu kaminar yes. 13 Emamei yenejaas kamin naepol aitelekarit na, ituŋanan ainakin akeijar kanuka ipaperoke. 14 Iraas yesi ikapapero arai iswamaete nukecorakini yes. 15Mam kanyarit bobo ibulesin, naarai ebulesit mam ejeni nuiswamai ejakaitike, konye kanyara yes ikapapero, naarai ketejenu yes kere nueirarit kama ejai Papaka. 16 Mere yes kiseunete eoŋ, dimarai eoŋ kaseu yes, kadakak yes tetere ilosete koraata araito, araitokus da kosalito; tetere nuilipete Papa kere kokirorika, kiinakini. 17Kecorakini yes ŋun tetere iminanaros. 18 “Arai kilai yes akwap, kojenutu ebe abu kala eoŋ eriŋa elaa yes. 19 Arai kiraas lukakwap, tiemina akwap yenerai yenikeŋ; konye naarai mam iraas lukakwap, konye abu kaseu yes kotoma akwap, kanuka ŋun ŋes kilaia yes akwap. 20 Kiitunito akirot nakalimokinit yes ebe, Mam ebulesit itelekarit ejakaitike kapolou. Arai kareito eoŋ, kireete yes da; arai kericito akakirot, ericete nakus da. 21 Konye kiswamakinete yes ŋun kere kanuka ekakiror, naarai mam ejenete lokejukunit, 22Arai kemam abunit einer kakes, timam ejaas karonis; konye kwana mam eiyaros karonisikec. 23 Yenikaŋara eoŋ eŋara Papaka da. 24 Arai mam keswamat kamakec aswamisio numam icetuŋanan iswamat, timam ejaas karonis, konye kwana kaanyut kaŋarut eoŋ ka Papaka da. 25 Konye itodolikinio akirot naewadikatai kotoma okisilakec ebe, ‘Apotu kalaata atitai.’ 26 Konye kebu Ekayuunan, lokejukakini yes anyoun kama ejai Papa, ŋes Emoyo Lokabeit, loebuni kama ejai Papa, itejenuni ŋol nukaŋ; 27 Yes da itejenunete, naarai ijaas keoŋ ameun kageunet.161 “Abu kalimok yes akiro nu, kinyeis aitiguikinio. 2 Kireŋeanario katukosia; eebo, ebunit esawa loeomitor ŋinituŋanan yenikiari yes ebe ijaanakini Edeke. 3 Iswamaete ŋun da naarai mam ejenunito Papa, karaida eoŋ. 4 Konye abu kalimok yes ŋun tetere naedolio esawakec, kiitunete ebe abu kalimokinite yes. 5 Mam abu kalimok yes nu ameun kageunet, naarai ajai nepepe kayes. “Konye kwana alosi mama ejai je lokejukunit; emamei edio kayesi lokeŋisi ebe, ‘Ilosi bo ai?’ 6Konye naarai kalimokis yes akiro nu, elelebunos ican otauonokus. 7 Konye eoŋ kalimokini yes abeit; ejok kamakus arai kalot eoŋ, naarai arai mam alosi mam ebuni Ekayuunan mama ijaas; konye arai alosi ejukuni ŋes mamakus. 8 Kebu ŋol, ilepilepi ŋesi akwapin kanuka aronis ka adolit, ka etube da. 9 Aronis, naarai mam keyuunito eoŋ; 10 adolit, naarai alosi mama ejai Papa, mam bobo kianyunete; 11 ka etube da, naarai adaun lokapolon loka akwapin kanu atubokinio. 12 “Eroko ejaas eoŋ nuipu alimokin yes, konye mam ipedorete atitiŋikin kwana. 13 Kebu je, Emoyo loka abeit, kiŋarenikini yes kabeit kere; naarai mam inera nuke bon, konye inera kere nuepupuni, kitejenuni da yes akiro nuepote. 14Ketopoloori ŋesi eoŋ, naarai elemuni nueraas nukaŋ kitejenuni yes. 15 Nuejaatar Papa kere eraas nukaŋ; kanuka ŋun ŋes abalar ebe elemuni nueraas nukaŋ ka aitejenun yes. 16 “Apak naedit, mam kianyunete eoŋ; bobo da apak naedit, kianyunete.” 17Kineranakinos ice kokesisiakake atiar, “Anyoika bo nu nuebala ŋesi oni ebe, ‘Apak naedit, mam kianyunete eoŋ, bobo da apak naedit, kianyunete’; ido ebe, ‘Naarai alosi mama ejai Papa’?” 18Kobalas ebe, “Anyoika bo nu nuebala ebe, ‘Apak naedit’? Mam kijeni nuinera.” 19Kojeni Yesu ebe ekotosi aiŋit ŋes; kotema kes atiar, “Nupenu kereka nuiŋitanaros yesi nuabala eoŋ ebe, ‘Apak naedit, mam kianyunete eoŋ, bobo da apak naedit kianyunete’? 20Abeit, abeit, katemari yes atiar, Imonyete yesi, ka aibworo, konye iyalamikinos akwapin; itururwete yesi, konye akusiiturur eraun ailel. 21 Naeriebar aberu aidoun eanyuni ican, naarai adolu ekesawa; konye kedau auruun ikoku, mam bobo iituni ariebo ŋin, kanuka ailel! naarai aurii ituŋanan kotoma akwapin. 22 Yes da, kwape kwaŋin ianyunete ican kwana, konye eoŋ kaanyuni yes bobo, elelete ikusitauon, emamei yenikidemari akusiilel. 23 Kapaaran kaŋin mam kiŋisete eoŋ adiokirot. Abeit, abeit, katemari yes atiar, Arai kilipa Papa akirot kere kiinakini kokirorika. 24 Kiton kwana mam ipotu kilipata akirot kokirorika; kilipa, idumunete tetere itodolikin akusiilel. 25 “Enera eoŋ ŋun kayes kawaragasia; konye ebunit esawa lomam kinerar bobo kayes kawaragasia, konye kalimokinete kaitebeikin nuka Papa. 26Kapaaran kaŋin ilipete kokirorika; kwabo mam kabala ebe eoŋ kelipakini yes kama ejai Papa; 27 naarai Papa elopet kimina yes, naarai kiminasi yesi eoŋ, ido iyuunito ebe abu kabu kama ejai Papa. 28Abu kabu kama ejai Papa, kabu toma akwapin; bobo da enyeini akwapin, alosi mama ejai Papa.” 29 Kotemasi ikekesisiak atiar, “Kwana do inera kaitebeikin, kwabo mam bobo inera kawaragan. 30 Kijeni do kwana ebe ijeni akiro kere, mam bobo ipuda ituŋanan aiŋit jo; kanuka ŋun kiyuunit ebe ibu kobu kama ejai Edeke.” 31Koboŋok Yesu kes ebe, “Aso iyuunito do kwana? 32 Koany, ebunit esawa, eebo, adau adolun, naisiarakinotor ŋolituŋanan oreke, ka ajalakin eoŋ kasilikinit, Konye mam eoŋ kasilikini, naarai ejai Papa keoŋ. 33 Kalimokis yes akiro ŋun tetere ijaunete kainapakin tomakaŋ, Toma akwapin ejaas yes ican; konye kotitiŋikis, epiko eoŋ akwapin.”171 Kinera Yesu ŋun; kikeu akekonye akuj, kobala ebe, “Papa, adol esawa; kitopolo Okokukon, tetere Okokukon da kitopoloori jo. 2 Kwape ibu koinakinia apedor kama kaluejaas awat kere, tetere einakini kere lukiinakini ŋes aijar namam edaun. 3 Aijar namam edaun ŋes na ebe, kojenutu jo Edeke ediopet lokabeit, ka Yesu Kristo Iokijukuni. 4 Ketopolo eoŋ jo kakwap, naarai etodolik aswam naibu koinak eoŋ aswam. 5 Kwana da, wu Papa, kitopolooroi eoŋ kamakon kaibuses nakijaar eoŋ kajo eroko akwapin ejauna. 6 “Etodia ekonikiror mama ejaas ituŋa lukiinakinit kakwapin; araas lukon kosodi ainakin eoŋ: aricata da akonikirot. 7Kwana ejenete ebe kere lukiinak apote kamakon: 8 naarai akiro nukiinakinit eoŋ ainak kes; acamut, ajenut da abeit ebe abu kalom kamakon, eyuut ebe ijo kijukuni eoŋ. 9 Elipakini eoŋ ŋul: mam elipakini akwapin, konye ŋul lukiinak; naarai eraas lukon. 10 Ŋul da kere lueraas lukaŋ eraas lukon, lueraas lukon da lukaŋ; ketopolooritai eoŋ tomakec. 11 Mam eoŋ aroko bobo ajai toma akwapin, konye lu ejaas toma akwapin, abuni eoŋ mamakon. Papa Lokalaunan, kidar kotoma okirorikon lukiinakinit eoŋ, tetere eraunete ipe, kwape kiraar oni ipe. 12 Naariŋar ajai kakes, abu kedar kes kotoma okirorikon lokiinakinit; kegalikinite kes, kwabo emamei ediopet kakesi loeoliorit dimarai okoku loka aolior; tetere edoli nakiwadikatai. 13 Konye kwana abuni mamakon; enera akiro nu toma akwapin, tetere ejaunete kaiyalamaka naedolit kotomakec. 14 Ainak eoŋ kes akonikirot; alaata akwapin kes naarai mam eraas luka akwapin, kwape mam eoŋ araar loka akwapin. 15 Mam eoŋ elipi ebe kolema kes kakwapin, konye kidar kes kama ejai lokaronon, 16Mam kes eraas luka akwapin, kwape mam eoŋ araar loka akwapin. 17 Kitalau kes kotoma abeit; akonikirot ŋes abeit. 18 Kwape ibu kijukunia eoŋ toma akwapin, ejuka eoŋ da kes kwape kwaŋin. 19 Etalauna kanukec, tetere italaunio kes da kotoma abeit. 20 “Mam elipakini lu bon, konye ŋul da lukeyuunete kanuka akecekirot; 21 tetere eraunete kere ipe; kwape ijo Papa ijaar tomakaŋ, eoŋ da tomakon, ŋul da kojaut tomawok: tetere iyuunete akwapin ebe ijo ŋes kijukunit. 22 Eoŋ da ainak kes aibuses nakiinakinit eoŋ; tetere eraunete ipe, kwape kiraar oni ipe: 23 eoŋ tomakec, ijo da tomakaŋ, tetere edolete aitekoro naka eipeone; tetere ejenunete akwapin ebe ijo ŋes kijukunit, komina kes kwape ibu kominar eoŋ. 24 Papa, akoto kes lukiinakinit ajaut nenipe keoŋ kere neajai; koanyutu akaibuses nakiinakinit; naarai ibu komina eoŋ eriŋa epesikina apetetait naka akwapin. 25Wu Papa Ekadoliton, mam akwapin kijenete, konye kajeni jo; ejenete lu ebe ijo ŋes kijukunit. 26Etejenu eoŋ kes ekonikiror, ido etejenuni, tetere amina nakiminar eoŋ ejaun tomakec, eoŋ da tomakec.”181 Nakedaunia Yesu einer akiro ŋun, koloma nepepe kikekesisiak kodoka aguurut Kidiron, nekejai emanikor, koloma ŋesi ka ikekesisiak. 2 Kejeni Yuda da loakoto abilakin ŋes ebotet aibois ŋin; naarai kelosenenei Yesu ŋina irwan ipu nenipe kikekesisiak. 3Kosodi kedau Yuda ainakinio erioŋet loka iserikalei, ka ikejaanakinak kama kisasedotin lupeti ka Iparisayon, kolot ŋina katalai ka akalasia ka lujiis. 4 Kosodi Yesu, kojeni kere nuedoikinete, kolom kotema kes atiar, “Iŋai bo imootos?” 5Koboŋokis ebe, “Yesu loko Nasaret.” Kotema Yesu kes atiar, “Eoŋ lo.” Kebwoi Yuda da lokebilakini ŋes ebotet nenipe kakes. 6Nakelimokinia kes ebe, “Eoŋ lo,” koboŋosi kau, kibirokinos kwap. 7Kosodi kiŋit bobo ebe, “Iŋai bo imootos?” Kotemasi atiar, “Yesu loko Nasaret.” 8Koboŋok Yesu ebe, “Kadau alimokin yes ebe eoŋ lo: aso arai kimootos eoŋ, kinyeis lu koloto.” 9 Tetere edoli akirot naenerit ebe, “Lukiinakinit eoŋ mam etooliorit ediopet.” 10Kosodi Simon Petero, kejai ekileŋ, kout kinom ebulesit loka losasedoti lopeti, kotub akekit nakoteten. Kerai ekiror loka ebulesit Malako. 11 Kotema Yesu Petero atiar, “Kinyakak ekileŋikon akuraruke; mam kereka eoŋ amasi akoli nakainakinit Papa?” 12 Kosodete iserikalei ka ekapolokiton ka ikejaanakinak luka Iyudayan kikamut Yesu, koena, 13Koyaŋaasi ber mama ejai Anas; naarai kerai ekamuran loka Kaiapa lokerai esasedoti lopeti okaru ŋol. 14 Kaiapa ŋol lokeinakin Iyudayan aomisioit ebe ejok etuŋanan ediopet atwanikin ituŋa. 15 Kotupa Simon Petero Yesu, ka ekesisian ece da. Kejenikina ekesisian ŋol kama ka losasedoti lopeti, koloma ŋesi nepepe ka Yesu alaro naka losasedoti lopeti; 16konye kobwoi Petero korute kokiŋa. Kosodi kolom ekesisian ece lokejenikina kama ka losasedoti lopeti, kinerata ka akagolon, kitolom Petero. 17Kosodi kotema apese nakagolon Petero atiar, “Irai kereka ijo da ediopet kokesisiak luka etuŋanan kaŋol?” Konye ŋes kobala ebe, “Mere eoŋ.” 18Kebwoete ibulesin ka ikejaanakinak inokokinito akim naka atotol; naarai kededen aaterot; ipierete akim; kejai Petero da nenipe kakes ebwoi ipieri. 19Kiŋit losasedoti lopeti Yesu nuka ikekesisiak ka nuka akeisisianakin da. 20 Koboŋok Yesu ebe, “Enerit eoŋ kakwapin kaitebeikin; esisianakinenei apaarasia kere katukosia ka oyekalu da, neatukonokinos Iyudayan kere; kwabo mam eoŋ enerit akirot kere kaiyeiyea. 21Kanukinyo kiŋisitor eoŋ? Kiŋit lukeirarito anyoika nukalimokinit kes; koany, ejenete ŋul nuenerit eoŋ.” 22 Nakedaunia einer ŋun, abu ekejaanakinan lokebwoi aapu kaŋes kibapa Yesu, kobala ebe, “Iboŋokini kwaŋin esasedoti lopeti?” 23Koboŋok Yesu ebe, “Arai enerit nukaronok kitejen nukaronok; konye arai enerit nuejok, kanukinyo kibapia?” 24Kosodi kijuka Anas ŋes eenitai mama ejai Kaiapa losasedoti lopeti. 25Kebwoi Simon Petero ipieri akim. Kosodete kobalas ŋes ebe, “Irai kereka ijo da ediopet kokesisiakake?” Koŋer kobala ebe, “Mere eoŋ.” 26Kobala ediopet kobulesin luka losasedoti lopeti, lokerai lokajen naka je loketubi Petero akekit ebe, “Mam kereka kaanyunit jo komanikor nepepe kaŋesi” 27Kosodi koŋer bobo Petero: atipet koruik ekokor. 28 Kosodete koyaŋaasi Yesu anyoun kama ka Kaiapa kiton ore loka ekayaiton: kerai napetupuruc sek: konye mam kes elomara toma ore loka ekayaiton, kinyeis amunaar, konye kopedosi ainyam lukaleleŋ, 29Kosodi kolom Pilato kiŋa mamakec, kobala ebe, “Nunyoika iwosatere etuŋanan lo?” 30Koboŋokis kotemasi atiar, “Arai mam etuŋanan lo iswamat nueroko, timam kiyau mamakon.” 31 Kotema Pilato kes atiar, “Aso koyaŋaasi yesi, kotubokis kokisilikus.” Kotemasi Iyudayan ŋes atiar, “Emamei sio apedor aiar ituŋanan.” 32 Tetere edoli akirot naka Yesu nakinerit, itodikini atwanare naekoto atwanare. 33Kosodi koloma Pilato bobo toma ore loka ekayaiton, konyarau Yesu, kotema ŋes atiar, “Irai kereka ijo Ekabaka loka Iyudayan?” 34 Koboŋok Yesu ebe, “Inera kereka ijo nu kanukon bon, arai bo kilimokis ituŋa ice nukaŋ?” 35 Koboŋok Pilato ebe, “Arai tope eoŋ Eyudayat? Akoniteker ka isasedotin lupeti kes kijaikinete mamakaŋ, Iswamat anyoika?” 36Koboŋok Yesu ebe, “Akajakanut mere naka akwapin kanu: arai kerai akajakanut naka akwapin kanu, tikejioto ikakejaanakinak, kenyek aijaikin mama ejaas Iyudayan; konye akajakanut mere naka ne.” 37 Kotema Pilato ŋes atiar, “Irai kereka ijo ekabaka?” Koboŋok Yesu ebe, “Ijo ibala ebe arai eoŋ ekabaka. Kauritai eoŋ kanuka ŋun, kanuka ŋun da abu kabu akwapin, tetere etejenuni abeit. Yenerai yenikabeit iirari ekaporoto.” 38Kotema Pilato atiar, “Inyo bo abeit?” Kedau einer ŋun, koloma bobo mama ejaas Iyudayan, kotema kes atiar, “Mam eoŋ aanyunit adioronis kamakeŋ. 39Konye ejai yes epone, eoŋ aosikin yes ediopet apak naka Aleleŋ: aso ikotosi kereka kaosikis Ekabaka loka Iyudayan?” 40Kiworoto bobo ebe, “Mere lo, dimarai Baraba.” Kerai Baraba ŋol ekaŋatan.191Kosodi Pilato koyaŋa Yesu, koda ŋes. 2Kojeata iserikalei aboko naka ikukwa, kitanapikis akouke, kitanapata da anapito naamuge; 3 koponenenete mama ejai, kobalas ebe, “Yoga, Ekabaka loka Iyudayan!” Kibapanasi ŋes. 4Kosodi kolom bobo Pilato kiŋa, kotema kes atiar, “Koany ayaŋauni ŋes kiŋa mama ijaas, tetere ijenunete ebe mam eoŋ aanyunit adioronis kamakeŋ.” 5Kolom do Yesu, enapit aboko naka ikukwa ka anapito naamuge, Kotema Pilato kes atiar, “Koany etuŋanan!” 6Kosodete keanyutu isasedotin lupeti ka ikapolokitok, kiworoto ebe, “Kibubuk, kibubuk ba!” Kotema Pilato kes atiar, “Koyaŋaasi yesi, kibubukis, naarai mam eoŋ aanyunit adioronis kamakeŋ.” 7 Koboŋokis Iyudayan ebe, “Ejai sio ekisil, ido kanuka ekisil kaŋol ibusakinit ŋes atwanare, naarai abu kitarauna bon Okoku loka Edeke.” 8Kosodi nakiiraria Pilato akirot ŋin, kiyatak akurianar; 9koloma bobo oPuraitorion kotema Yesu atiar, “Laali bo kibunio?” Konye mam Yesu eboŋokino. 10Kanuka ŋun kotema Pilato ŋes atiar, “Mam inera keoŋ? Mam ijeni ebe ejai eoŋ apedor aosikin jo, ejai da apedor aibubukin?” 11 Koboŋok Yesu ebe, “Ti mam jo ijaas kapedor kere mamakaŋ, arai mam kidumunit abunore kokuju; kanuka ŋun ŋol lokejaikini eoŋ akaninikon ŋes erono adepar.” 12 Ageun kapak kaŋin komoote Pilato aosikin ŋes, konye kiworoto Iyudayan ebe, “Arai kiwosik lo, mam irai epapero loka Kaisar; ŋolituŋanan loedakakini bon araun ekabaka itokokoli Kaisar.” 13Nakiiraria Pilato akiro ŋun, kitolom Yesu kiŋa, kiboikin oicoloŋ loka aitub, aibois naenyaritai Amor Nuepesitai, konye kAburanian enyaritai Gabata. 14Kerai da apaaran naka Aitemokin Aleleŋ; kerai bala esawa lokikanyetekape. Kotema Pilato Iyudayan atiar, “Koany, Ekabakakus!” 15 Kanuka ŋun kiworoto ŋul ebe, “Kolema, kolema, kibubuk!” Pilato kotema kes atiar, “Ebubukini kereka Ekabakakus?” Koboŋokis isasedotin lupeti ebe, “Emamei sio ekabaka ece dimarai Kaisar.” 16 Kosodi kijaik ŋes akaninikec aibubukinio. 17Koyata Yesu, koloma, erioŋit ekemusalaba kiton aibois naenyaritai Abelekek naka Akou, kAburanian ebe Gologota. 18Kibubukis nen, ka ice iarei nenipe kaŋes, ediopet epuai ka ece da epuai, ka Yesu kidiŋikec. 19Kiwadik Pilato aitejenunet, kikajak omusalaba; ewadikatai ebe, “YESU LOKO NASARET, EKABAKA LOKA IYUDAYAN.” 20Kosioma luipu koYudayan aitejenunet ŋin, naarai keapie aibois nakibubukinitoi Yesu kore; kiwadikatai kAburanian, ka Aromayon, ka Ayonanin da. 21Kosodete isasedotin lupeti luka Iyudayan kotemasi Pilato atiar, “Sirikiwadika ebe, ‘Ekabaka loka lyudayan’, dimarai ebe, ‘Abala ŋesi ebe Eoŋ ekabaka loka Iyudayan.’ ” 22Koboŋok Pilato ebe, “Nuewadik, ewadik.” 23Nakedauniata iserikalei aibubukin Yesu, koyaŋaasi akenapito kokora katutubeta aoŋon, ŋoliserikalet nakeŋ, ka ekaso da. Konye ekasoke kemamei airiamasit, naarai kejeitai ameun kokuju kiton kwap; 24 Kotemanaros bonik atiar, “Sirikiicil, konye kelamilamakisi eroet aanyun iŋai ebeikini.” Tetere edolete nukiwadikatai ebe, “Akorokorata anapitoka, Kilamilamata kanuka ekasoka.” Kiswamata iserikalei kwaŋin. 25Konye kobwoete totoke ka inaci naka totoke, ŋes Mariam aberu naka Kelopa, ka Mariam Magadalene, eapiete kemusalaba loka Yesu. 26 Kosodi keanyu Yesu totoke, ka ekesisian lokemina ebwoi kodie, kotema totoke atiar, “Toto, koany okokukon!” 27Kosodi kotema ŋesi ekesisian atiar, “Koany totokon!” Ameun kosawa kaŋol koyaŋa ekesisian ŋin oreke. 28 Kokau kaŋun, kojeni Yesu ebe aŋetakinos kere, tetere itodolikini nakiwadikatai kobala ebe, “Kajak akur.” 29 Kejai nen amot naeleleba ebino loedwar; kibwaikis acago naileleba ebino ŋol loedwar kuju akwara, kikiasi kiton aitukuke. 30Kedau Yesu aijaikinio ebino loedwar, kobala ebe, “Aŋetakinos.” Kitulur akekou, kijaik ekemoyo. 31 Aso naarai kerai apaaran naka Aitemonokin, kinyeis awat asalakin omusalaba apaaran nakasabato (naarai kerai nakasabato ŋin apaaran nakapolon), ŋes kilipiata Iyudayan Pilato akejekec abilio, tetere elemunio. 32Kopotu do iserikalei kobilata akeje nuka losodit, ka nuka lokiareit lokibubukinitoi nenipe kaŋes; 33konye kedolokis Yesu koanyut ebe kedau nan atwanare, mam ebila akejeke, 34Konye ediopet koserikalei kicum amaranake kakwara, atipet kolomutu aokot ka akipi. 35Ŋol da lokeanyuni itejenunit, ido akeitejenunet erai nakabeit, ŋes da ejeni ebe inera abeit, tetere yes da iyuunete. 36 Naarai kedoikinete ŋun tetere edoli nakiwadikatai ebe, “Mam ebilio akekoit.” 37 Ka nakiwadikatai ace da ebala ebe, “Esesenete moolo ŋol lokicumete.” 38 Kokau kaŋun abu Yosep loka Arimataya lokerai ekesisian loka Yesu, konye kaiyeiyea kanuka akurian Iyudayan, kilip Pilato apedor alemar akuan naka Yesu: kisiik Pilato. Kosodi kolot, kolema akuanake. 39 Kolot Nikodemo da, lokelosit ber mama ejai ŋesi kuare, koyaŋa lukesaete ka icicikwa luinyalal, bala alaŋir naka ilatirin akwatat. 40Kosodete kolemut akuan naka Yesu, konunukikis ogoen luka ebaputa nepepe kalukesai, kwape ejaar epone loka Iyudayan loka aida. 41Nepenen nekibubukinitoi kejai emanikor; ido toma omanikor kejai ates nakitetet namam lem kibwaikinitai idiotuŋanan. 42Kosodi kanuka Aitemonokin naka Iyudayan, kibwaikis Yesu nen, naarai aapie ates.201 Apaaran nasodit nakasabato kodil Mariam Magadalene alosit ates, eroko emutono akwap, koany amoru ikokororitai awai kates. 2 Koker, kolot mama ejai Simon Petero ka ekesisian ŋol lokemina Yesu, kolimok kes ebe, “Kelemar Ejakait kates, mam kijeni neibwaikinitai.” 3Kosodi konyou Petero ka ekesisian ece, koloto ates, 4Kokerata kere iarei, konye kilany ekesisian ŋol Petero, koliŋ adolore ates; 5kokukum, kireik toma, koany igoen lukebaputa ejaas nen, konye mam abu koloma. 6Kosodi kodolu Simon Petero da, etupakinit ŋes, koloma toma ates; koany igoen lukebaputa ejaas nen, 7 ka eitabala, lokejai akouke, mam kejaas kigoen lukebaputa konye kenunukitoi kaiboisike bon. 8Kosodi koloma da ekesisian ece, lokeliŋi adolore ates, koany ŋesi kiyuu da; 9 naarai mam ber kes ajenunito nakiwadikatai ebe ibusakinit ŋes ajarun, 10Kosodete koboŋosi bobo ikesisiak oreriakec. 11Konye kebwoi Mariam kokiŋa eapie kates emonyi, napemonyi kokukum kireik toma ates; 12koany imalaikan iarei lukenapito luakwaŋak, iboiete, ediopet kakou, ediopet da kakejen kanekiperikinitoi akuan naka Yesu. 13Kes da kotemasi ŋes atiar, “Imonyi inyo, toto?” Kotema kes atiar, “Naarai kelemar Ekajakait, mam ajeni neibwaikinitai.” 14Kedau einer ŋun kibelokin kau koany Yesu ebwoi, komam ejeni ebe ŋes Yesu, 15Kotema Yesu ŋes atiar, “Imonyi inyo, toto? Imoi iŋai?” Konye ŋin koomite ŋes araut ekeswaman emanikor, kotema atiar, “Ejakait, arai ilemarit ijo ŋes, kolimokinai neibwaikinit, eoŋ da ayaŋaari.” 16Kotema Yesu ŋes atiar, “Mariam,” Kibelokin ŋesi kotema kAburanian atiar, “Raboni!” (Ŋes atemar ebe, “Ekesisianakinan,”) 17 Kotema Yesu ŋes atiar, “Sirikitiŋ eoŋ, naarai eriŋa edokara mama ejai Papa; konye kolot mama ejaas ikainacan kolimok kes ebe, Adokari alosit mama ejai Papaka, ŋes Papakus da, mama ejai Ekadeke, ŋes Ekusideke da.” 18Kolot Mariam Magadalene kolimok ikesisiak ebe, “Aanyu eoŋ Ejakait.” Kolimok da kes nuabu kinera kaŋes. 19 Kosodi kikamus apaaran ŋin nasodit naka asabato, kegolol ikekia kaneajaas ikesisiak kanuka akurian Iyudayan, kobu Yesu kobwo kokidiŋikec, kotema kes atiar, “Kinapakinos,” 20 Kedau einer ŋun, kitodik kes akekanin ka akemarana. Kosodete kiyalamikinos ikesisiak nakeanyuniata Ejakait. 21 Kotema Yesu kes bobo atiar, “Kinapakinos. Kwape keyakuunia Papa, eoŋ da keyakiari yes kwape kwaŋin.” 22 Kosodi kedau einer ŋun, kiyeŋak kes, kotema atiar, “Kijautu Emoyo Lokalaunan. 23 Arai isioniete adiakanareta nuka ituŋanan kere, isionio; arai da ienete adiakanareta nuka ituŋanan kere, eenio.” 24 Konye ediopet ka lutomon kaarei, ŋes Tomas lokenyaritai Didumo mam kejaas kakes nakebunio Yesu. 25 Aso kolimokis ikesisiak ice ŋes ebe, “Kianyu Ejakait.” Konye kotema atiar, “Arai mam eoŋ aanyunit apoorei nuka aseito kakaninike, ka aibwaikin da ikabokor apedon nuka aseito, ka aibwaikin akakan toma amaranake, mam eoŋ eyuuni nepetai da.” 26 Ketuboros apaarasia akanykauni kojaas bobo ikekesisiak togo, kojai Tomas da nepepe kakes. Kegolol ikekia konye kobu Yesu kobwo kokidiŋikec, kotema atiar, “Kinapakinos,” 27Kosodi kotema ŋesi Tomas atiar, “Koyau ne ekonibokorit, koany akakanin; koyau da akonikan, kibwaik toma amaranaka; kwabo sirikiraun lomam iyuunit, dimarai loiyuunit.” 28 Koboŋok Tomas ebe, “Ekajakait, Ekadeke da!” 29 Yesu kotema ŋes atiar, “Naarai kiany eoŋ ŋes konyet iyuunia? Isirereŋitoi luiyuunete komam eanyunito.” 30Kiswama Yesu aanyuneta ace nuipu kakonyen nuka ikesisiak, numam iwadikatai oitabo lo; 31 konye iwadikatai nu tetere iyuunete yesi ebe Yesu ŋes Kristo, Okoku loka Edeke, ido kanuka aiyuun ŋin kojaut kaijar kokirorikeŋ.211Akaulo kaŋun kitakanikin bobo Yesu ikesisiak kaŋolol naka Tiberia; kitakanikin kwanata: 2 kejaas nepepe Simon Petero, ka Tomas loenyaritai Didumo, ka Natanael, loko Kana loko Galilaya, ka odwe luka Sebedayo, ka ice iarei kokesisiakake. 3 Kotema Simon Petero kes atiar, “Alosi ailok.” Kotemasi atiar, “Isio da kiupari kajo.” Kolomasi, kodokasi ataker; konye kakuar kaŋin mam ikamuna ibore. 4 Napiwalari akwap kobwo Yesu koitolima; konye mam ikesisiak ajenete ebe erai ŋesi Yesu. 5 Kosodi kotema Yesu kes atiar, “Idwe, ejaas yes idinyaman?” Koboŋokis ebe, “Mam.” 6 Kotema kes atiar, “Kocakakisi eboi kowai lokoteten loka ataker, idumunete yesi.” Kosodete kocakakis, kwana do mam epedorete airiun kanuka aipues naka lukecor. 7 Kosodi ekesisian lokemina Yesu kotema Petero atiar, “Ŋes Ejakait.” Nakiiraria Simon Petero ebe ŋes Ejakait, konap akenapito (naarai kimujalal), kibirokin aŋolol, 8Konye kopotu ikesisiak ice kotoma ataker, iriitos eboi ileleba lukecor, naarai mam kelwanikina kaneeoŋit, konye bala iyadin akwatat. 9Kosodi nakedokuniata oitolima koanyut kanen akim naka atotol, ibwaikinitai yenikecor ka emugati da. 10Kotema Yesu kes atiar, “Koyaut lukecor ice luikamunito.” 11Kosodi kodoka Simon Petero ataker kiriu eboi oitolima, ileleba lukecor luepolok, akwatat ka akaisakany ka luuni: karaida kipu kwaŋin, mam eboi eŋeda, 12Kotema Yesu kes atiar, “Kopotu konyama.” Kwabo emamei ediopet kokesisiak loketitiŋikini aiŋit ŋes ebe, “Iŋai bo ijo?” Kojenut ebe kerai Ejakait. 13 Kobu Yesu, kolem emugati koinak kes, ka yenikecor da kwape kwaŋin. 14 Ŋin ŋes irwan nakiwuniet nakitakanikinor Yesu ikekesisiak kedau ajarun kokatwak. 15 Nakedauniata ainyam, kotema Yesu Simon Petero atiar, “Simon, okoku loka Yona, kimina eoŋ aitelekarit lu?” Kotema ŋes atiar, “Eebo, Ejakait, ijo ijeni ebe kamina.” Kotema ŋes atiar, “Kitadakenenei idwe luka amerekekinika.” 16 Kolimok bobo nakiareit ebe, “Simon, okoku loka Yona, kimina eoŋ?” Kotema ŋes atiar, “Eebo, Ejakait, ijo ijeni ebe kamina,” Kotema ŋes atiar, “Kipisenenei akamerekekin.” 17 Kolimok irwan nakiwuniet ebe, “Simon okoku loka Yona, kimina eoŋ?” Kokadak Petero naarai abu kolimok irwan nakiwuniet ebe, “Kimina eoŋ?” Kotema ŋes atiar, “Ejakait, ijeni akiro kere; ijeni kamina.” Kotema Yesu ŋes atiar, “Kitadakenenei akamerekekin. 18 Abeit, abeit, katemari jo atiar, Nairaar kolo ikatumunan ikapakini bon, ilosi neikoto: konye naimojoŋia iriori akonikanin, kisikapi ece, kiyaŋaari nemam ikoto.” 19 Kinera ŋun itodikini atwanare naetopolooria Edeke. Nakedaunia einer ŋun, kotema atiar, “Kotupunai.” 20 Kibelokin Petero, koany ekesisian lokemina Yesu etupit, ŋes ŋol lokegoŋakina katorob naka Yesu kapak kaya naka inyamat lukatiboŋ, loabala ebe, “Ejakait, iŋai bo kibilakini ebotet?” 21Aso keanyu Petero ŋol, kotema ŋesi Yesu atiar, “Ejakait, ido bo lo ikwaikinio ai?” 22Kotema Yesu ŋes atiar, “Arai akoto ŋol aidarit aitodol neabunio, ipodo bo ijo inyo? Kotupunai ijo eoŋ.” 23Kisiarakin akirot ŋin oinacan, ebe mam ekesisian ŋol etwani, konye mam kebala Yesu ebe mam etwani; konye ebe, “Arai akoto ŋol aidarit aitodol neabunio, ipodo bo ijo inyo?” 24 Ŋol ŋes ekesisian ŋol loitejenuni akiro ŋun, loewadikai ŋun; kijeni oni ebe akeitejenun erai nakabeit. 25 Ejaas da akiro ace nuipu nueswamat Yesu, arai kiwadikatai ŋinidiopet, aomit ti mam akwapin ilosikinos iitabon lutikiwadikai. |