Yakob11 Yakob ebulesit loka Edeke ka loka Ejakait Yesu Kristo, Mama ejaas atekerin atomon kanuarei nuesiarakinos: Yoga. 2 Iinacanaka, koomitos kere araut nukaiyalama, naidoioto toma acodunio nakiponesio luipu, 3 kojenete ebe aitemio naka aiyuunikus eyauni atitiŋikin, 4Ido kojau atitiŋikin kaswam naedoliorit, tetere iraunos luipolok, luitekoro, komam adiokirot nakiwolikinit. 5 Arai ejai kayes yenewolikinit acoa, kilip Edeke loeinakini kere kajalit, kwabo mam itoroni, ŋes da einakinio. 6 Konye kilip kotoma aiyuun, komam ebuonokin, naarai yenebuonokini eputosi bala akailan naka aŋolol, naekutanari ekwam kibukanari. 7Kinyek ituŋanan ŋin aomit ebe edumuni ibore kama ejai Ejakait; 8ituŋanan yenika itauon iarei, yenimam icasit korotinike kere. 9 Konye koolobob onace loitisilitoi kanuka aitopoloorioke, 10 koolobob lokabaran da kanuka aitisilioke, naarai eraraar kwape aturot naka inya. 11Naarai elomuni akoloŋ isirinyori amwanis inya, edoi aturotoke, eoliori da ajokis naka aputoke. Isokokoi lokabaran da kwape kwaŋin kotoma alositeke. 12 Isirereŋitoi etuŋanan loetitiŋikin acodunio, naarai kedau acamunio, edumuni aboko naka aijar naisumunikinit Ejakait lueminasi ŋes. 13Kinyek yenecodunio einer ebe, “Edeke kacoduni eoŋ” naarai mam epedori Edeke acodunio kanukaronok, ido ŋes elopet mam ecoduni ituŋanan kere. 14 Konye ŋinituŋanan ecodunio kiriite ekeimiel elopet kaijodijodio, 15Kosodi kepotuu eimiel euriei adiakar, adiakar ŋin da kepoloor idouni atwanare. 16Ikainacan luminan, siriŋalas. 17 Ŋiniinakinet naejok, ka ŋiniijaikina naedolit ebuni kokuju, ijesuni kama ejai Papa loka luecaete, emamei ailoconokin kamakeŋ, karaida etoribe loka aibelonokin. 18 Kanuka akoteke abu kouri oni kakirot naka abeit, tetere kirauni kwape araito nusodit nuka isubanake. 19 Ijenete ŋin, iinacanaka luminan. Aso korai ŋinituŋanan yenisunyit aiirar, yeniyapi einer, yeniyapi anyunyura, 20 naarai anyunyura naka etuŋanan mam iswamai adolit naka Edeke. 21 Kanuka ŋun kolacasi asilianut kere ka aronis naelitoro, kijaut kaiyapepera akirot nairaitai toma, naepedori aitajar aijarakus. 22 Konye koraas ikeswamak akirot, kwabo mere ikeirarak bon, luimodas. 23Naarai arai iirari ituŋanan akirot, komam iswamai, eputosi ŋin ituŋanan yeneanyuni akonyen nuka aurioke kotoma aroet; 24naarai eanyuni, kolot, atipet imurwokini kwape eputor. 25 Konye yenirerei ikisila luedolito, luka aosikinio, kodunyakinite kotomakec, sirikeraun ikeiraran yenimurwokini, konye ikeswaman aswam, isirereŋitoi ituŋanan ŋin kotoma kanuiswamai. 26 Arai eomit ituŋanan kere ebe erai yenikedini, komam itikokin aŋajepeke, kiŋalai etauke, edini loka ituŋanan kaŋin erai lotai. 27Edini loelai, loemamei elos kakonyen nuka Edeke Papa ŋes lota: aanyanar ikokiok ka apuserun kotoma ocanikec, ka aidar bon kakwap komamei amasikinet.21 Iinacanaka, siritiakito ituŋa naijaatar kaiyuun naka Ejakaitiwok Yesu Kristo, Ejakait loka aibuses. 2 Naarai arai elomuni etuŋanan atukosikus, loenapit egilut loka esabu, ka inapen luibusiak, elomuni da lokican enapit luenyilinyila, 3yes da isukunyikinete loenapit luibusiak, itemarete atiar, “Kiboikin ijo ne neejok,” itemarete da lokican atiar, “Kobwo ijo kalaije,” arai bo, “Kiboikin kwap kakejeka,” 4aso mam kereka itiakasi kotomakus, iraunos ikatubok luka aomisio nueroko? 5 Kiirasi, iinacanaka luminan, Mam kereka abu Edeke koseu lukican lukakwapin araut ikabarak luka aiyuun, ka ikerumak luka ajakanut naisumunikinit ŋul lueminasi ŋes? 6Konye ipotu yesi komwaŋa lokican. Mere kereka lukabarak kiridakinito yes, kiyaŋaarete airabis? 7Mere kes emoromoroete ekiror loejok lokimaikinitai yes? 8 Konye arai kitodoloto ekisil loka akabakanut, kwape ejaar naiwadikatai ebe, “Komina ekoniidunyet kwape iminari bon,” iswamaete ejok. 9 Konye arai itiakito ituŋa iswamata erono, kitoronete ikisila yes kwape ikebucarak. 10 Naarai yenerici ikisila kere, konye kibuca kediopet, egwauni akiro nuka kere. 11 Naarai ŋol loabu kiner ebe, “Siridote,” abu kiner da ebe, “Siriari.” Arai mam idotei, konye iari, iraun do ijo yenibili ikisila. 12 Kinerasi kwaŋin, kiswamata da kwaŋin, kwape luepote atubokinio akiro kokisila luka aosikinio. 13 Naarai etube mam itimi ŋin yenimam iswamai nukaitim; naarai eoloboboi aitim kotube. 14 Iinacanaka, ajokis anyoin, arai ebala ituŋanan ebe ejai kaiyuun, konye emameete ŋes aswamisio? Epedori kereka akeiyuun aitajar ŋes? 15Arai inyilinyilitoi onac arai inac, emameete da inyamat luka ŋinipaaran, 16 konye ebala idiopet kayesi kes ebe, “Koloto inapakina, kodumutu aibuse, kimonikinos,” kwabo mam iinakinete kes nuipuda akuan, ajokis anyoin? 17Kwaŋin aiyuun da, kemamuutu aswamisio, atwana. 18 Konye inera idiotuŋanan ebe, “Ejai jo aiyuun, eoŋ da kija kaswamisio.” Kitodikinai cani aiyuunikon komameete aswamisio, eoŋ da ketodikini jo akaiyuun kotoma aswamisio. 19 Iyuunit ijo ebe erai Edeke ediopet; iswamai ejok. Iyuunete ajokin da, komaranete. 20Ijo etuŋanan lotai, ikoto kereka ajenun ebe aiyuun komameete aswamisio erai arakan? 21 Mam kereka aponi kitojokai Aburaam papaawok araun loedolit kanuka aswamisio, naainakinia okokuke Isaaka kotem? 22 Iany aiyuun kwape iswamaa nepepe kaswamisioke, ido etopoloor aiyuun kanuka aswamisio; 23 Ido kitodolikinai naiwadikatai nainera ebe, “Kiyuu Aburaam Edeke, kimarakinai araut adolit”; komaikinai epapero loka Edeke. 24 Ianyut kwape itojokere ituŋanan araun yenedolit kanuka aswamisio, mere kanuka aiyuun bon. 25 Kwape kwaŋin da mam kereka aponi kitojokai Rakab naadote araun naedolit kanuka aswamisio, nakisukunyikinia ikiyakia, kitotor kes orot ece? 26 Naarai kwape etwania akuan emamei emoyo, kwape kwaŋin da etwania aiyuun emameete aswamisio.31 Ikainacan, sirikiraut ikesisianakinak luipu; kojenut ebe kidumuni oni atubokinio naitelekarit apolou. 2 Naarai kibucari oni kere kakiro nuipu; arai mam ibucari ituŋanan kakirot, ŋol ŋes etuŋanan loepol, loepedori aitikokin kiton akuanake kere. 3Konye arai kibwaiki iboro luitikokinet aituke nuka ibalasin, tetere kirimarete oni, kibelonokini awatekec kere. 4Koany atakerin da, karaida kepolok kwaŋin, eyaŋaarete ikwamin luededeŋ, ibelonokin kes akiŋol naedit noi, kama itojokit ekereŋean kere kotoma akoteke, 5Kwape kwaŋin da erai aŋajep atutubet naedit, ilabilabi nuepolok, Koany ikito luipu luetia nen enokete akim naedit! 6 Erai aŋajep akim. Erai aŋajep akwap naka amamus adolit kotoma atutubetawok, emunaari akuan kere, isinepuni akokoro naka auruunet, Geena da isinepuni ŋes. 7Naarai epedorio aitapatan ŋolipone kere loka itiaŋ, ka akweny, ka lueliatos, ka luka aŋolol da, ido adaut ituŋa aitapatan, 8 konye emamei ituŋanan kere yenepedori aitapatan aŋajep, erono, iloliana, ileleba aisorit naeari. 9 Ŋin ŋes kituritor Ejakait ka Papa; ŋin ŋes kikenio ituŋa lukesubio kaput naka Edeke. 10Elomunete aiturit ka aiken kotoma aituk ŋin adiopet. Ikainacan, mam ibus akiro ŋun ajaut kwaŋin, 11Eleleunete kereka akipi nuejok ka nuedwarak da kotoma akoŋu adiopet naka atan? 12Ikainacan, epedori kereka etini aira iseitunin, arai bo emusabibu aira itinin? Mam da epedorete akipi nuejai amunyu aluor nuejok. 13 Iŋai bo kayes ejai acoa ka ajenun? Kitodu cani aswamisioke koponesioke luejok kotoma aiyapepera naka acoa. 14 Konye arai kijaunos kekokote loedwar ka aŋolopa toma otauonokus, siriwoloboboete, siriŋalaete da asurokin abeit. 15 Mam acoa ŋin erai naebuni kokuju, konye erai naka akwap, naka auruunet, naka Satan. 16Naarai neejai ekokote ka aŋolopa, nepenen da ejai aitotolikin, ka ŋiniswamisioit kere da naerono. 17 Konye acoa naebuni kokuju nasodit erai naesegara, kosodi nakainapakin, nakaiyapepera, naenonokikinit, ileleba aitim ka araito nuejok, emamei abuonokin, emamei da esoswai. 18 Eyeitai araito nuka adolit toma ainapakin mama ejaas ŋul luiswamaete nukainapakin.41 Epote kai ijiisio, ai bo da ebunio asurup kotomakus? Mere kane, kotoma kanukisiyalamikinete yes nuejiosi kotoma atutubetakus? 2Iŋobeleete, ido mam idumunete; iarete, ido imielas, kwabo mam ipedorete adumun. Isurorete, ijiosi da, Mam idumunete naarai mam ilipete. 3Ilipete, kwabo mam kiinakinio, naarai ilipete erono, tetere imonikinos nukisiyalamikinete yes. 4 Yes aŋor nudotea, mam ijenete ebe aipaperokin kakwapin ŋes asurup ka Edeke? Aso ituŋanan kere yenekot araun ipapero yenika akwapin ituluor yenikasurup yenika Edeke. 5 Arai bo iwomitos ebe inera atai naiwadikatai? Imiela kereka emoyo loiboie kotomawok ekolo? 6 Konye iyatanakini ainakin asianut. Kanuka ŋun ebala ebe, “Itepegi Edeke luiwoŋoko, konye einakini luitasonos asianut.” 7 Aso kononokikis Edeke. Kitepegata Satan, kikeri ŋesi da yes. 8 Kikunyakis neejai Edeke, ŋes da ikunyuni mama ijaas. Yes ikadiakanarak, kilota akaninikus, kitalautu itauon, yes luejaas itauon iarei. 9Kitururuoto, kokuudianete, komonyata da. Koluor akienakus akuudian, ka aiyalama da ajuruŋuŋ. 10 Kitasonokinos kakonyen nuka Ejakait, ŋes da kitopoloori yes. 11Iinacan, sirinerenenas nueroko. Yeninera nueroko nuka onac, arai bo yenetubokini onaceke, inera nueroko kokisila, ido etubokini ikisila. Konye arai kitubok ikisila, mam irai ikeswaman yenika ikisila, dimarai ikatubon. 12 Ejai ekesilakinan ikisila ediopet ka ekatubon, ŋol loepedori aitajar ka amudiar da. Konye iŋai bo ijo yenitubokini iidunyetekon? 13 Aso ca yes luineras ebe, “Lolo arai moi kilosi ore mutan, kidauni da kaŋina ekaru ediopet, kigwelanari kimedaun da,” 14 kwabo mam ijenete nuka moi. Inyo bo akusiijar? Iraas elisina, loetakanuni apak naedit, kosodi ailicar. 15 Ti gwai ineras ebe, “Arai ekoto Ejakait, kijari kiswamai da nu ka nu.” 16Konye kwana iwoloboboto kotoma apoganutukus. Erono aolobob kere naikoni nen. 17 Aso yenejeni aswam nuejok, komam iswamai, erai adiakar kamakeŋ.51 Aso ca yes ikabarak, komonyata kibwololoto kanuka ican lukiponikinete yes. 2 Abos abarakus, anyama ikajekel akusinapito. 3 Amasiki esabukus ka epuesakus, amasikinikec da eraun ajenanut mamakus, enyami awatekus kwape kakim. Ipotu kidiata iborokus luka akais nuipu toma apaarasia nukawasia. 4 Koany, iworoi eropit loka ikeswamak luasakata imanikoriakus, loimikitos yesi; aloma aimony naka ikadwenyak aki nuka Ejakait loka ajoresio. 5 Ipotu kisiyalamikinos kakwap, kominakinito aboliasio; kitutumata ikusitauon kotoma apaaran naka aario. 6Ipotu kitetelekasi akiro ekadoliton, koarata da; mam ŋes itepega yesi. 7 Aso iinacan, kotitiŋonokinete, kiton abunore naka Ejakait. Koany, idarit ekakorion araito nuka akwap nuketiai loepol, etitiŋikinit kes kiton ainakinio akiru naka aiporo ka naka akamu da. 8 Kotitiŋonokinete yesi da, kiticata itauonokus, naarai eapie abunore naka Ejakait. 9Iinacan, siriŋuurianakinos, kinyeis atubokinio; koany, ebwoi ekatubon kokek. 10 Iinacan, koyaŋaasi inabin araut aanyunet naka aiticanio ka atitiŋikin, luapotu kinerasi kokiror loka Ejakait. 11 Koany, kinyarit luetitiŋikinete luisirereŋitoi. Ipotu kiirasi nuka atitiŋikin naka Yob, ido ipotu koanyut kwape kiswamakinia Ejakait ŋes kawasia, kwape eraar Ejakait lokasianut naepol ka aitim. 12 Konye nuitelekarito kere, ikainacan, siriyapoenenete, karaida alimit akuj, karaida akwap, karaida aiyaposit ace kere, konye akusikirot, “eebo,” korai eebo, ka “mam” da korai mam, kinyeis aibirokin atubokinio. 13 Ejai kereka yeniticanio kotomakus? Kilip. Ejai bo yenelakara? Koye nukaiturit. 14 Ejai kereka yenedeka kotomakus? Konyarau imakio luka ekanisa, kilipakis ŋes, kinyonyoikis akinyet kokiror loka Ejakait; 15 ailip da nakaiyuun itajari ikadekan, itonyouni da Ejakait ŋes; arai da kiswamat nukadiakanar, isionio ŋes. 16Aso kolimonokinos akusidiakanareta bonik ka bonik, kilipanakinos da, tetere iŋaleunete. Ailip naka ikadoliton epedori noi aswam. 17 Kerai Eliya etuŋanan lokepone kwape kalowok, kilip noi kinye akiru aitep, ido mam abu kotepak akwap adaun ikar iuni ka ilapio ikanykape. 18 Kosodi kilip bobo, koinak da akuj akim, kora akwap araitoke. 19 Ikainacan, arai kepaa idio kayesi ainyein abeit, kosodi idiopet ainyakun ŋes, 20 kitejenut ŋes ebe yeninyakuni ikadiakanaran kotoma apaar naka erotoke, itajari akeijar kotoma atwanare, erapari da adiakanareta nukepuak.61 Petero, ekiyakia loka Yesu Kristo, Mama ejaas luseuna luesiarakinos luiboiororos kotoma Ponto, ka Galatia, ka Kapadokia, ka Asia, ka Bisunia, 2 kwape kolo esiaunia Edeke Papa ajenun, kotoma aitalaunio naka Emoyo, kiton arimanut ka abwatakinio aokot nuka Yesu Kristo: Kiyatanakin asianut ka ainapakin mamakus. 3 Kituritete Edeke ka Papa loka Ejakaitiwok Yesu Kristo! Kwape ejaar akeitim naepol abu kouri oni irwan nakiareit, tetere kija kamun naejari, kanuka ajarun naka Yesu Kristo kokatwak, 4 kadumut airumet namam edaun, naemamei elos, namam erinyori naiŋadakinitai yes toma akuj;, 5 yes lukigalikinit apedor naka Edeke kanuka aiyuun kiton naidumuniata aitajario naitemokino apukorio kapak nakawasia. 6 Iyalamasi noi kotomakeŋ, karaida ibusakinit diat aitakadikinio kwana apak naedit, kanuka acodunio naka iponesio luipu, 7 tetere aitemio naka aiyuunikus naitelekarit noi etiai loka esabu loedaun karaida kitemio kakim, kotakanu ituritoi, itopoloorio, ka aitubusikinio da, kotoma apukorio naka Yesu Kristo. 8 Iminasi ŋes karaida mam ipotu koanyut ŋes; karaida mam ianyunito ŋes kwana konye iyuunito ŋes, iyalamasi noi kaiyalama namam inerio naitepolooritai. 9 Idumunete esaŋe loka aiyuunikus ŋes aitajario naka aijarakus. 10 Apotu inabin, luadwarenenete nuka asianut naekot abunore mamakus, komoenenete ka aiŋic akiro nuka aitajario kaŋin; 11 koŋicata ani bo apak, arai ali bo epone lokikwenyaria Emoyo loka Kristo lokejai tomakec, nakegeia aitejen aiticanio naka Kristo ka aibuses naetupakin ŋin. 12 Aponi kes! kopukokinai ebe mere kanukec bonik, dimarai kanukus, apotu kijaanaki! ŋun nukidaun alimokin yes kwana, kama kaŋul lukilimonokinete yes Akiro Nukajokak, kanuka Emoyo Lokalaunan loejukunio kotoma akuj, akiro ŋun imielas imalaikan aireonokin. 13 Kanuka ŋun koenata aŋabes nuka acoakus, kinyeis amer, komunosi cut asianut nakiinunio kotoma apukorio naka Yesu Kristo. 14 Kwape idwe luerimaka, sirituputoro keimiel loka apak nakaolitekus nakolo, 15konye kwape eraar lokinyarit yes lokalaunan, koraut yesi da lukalaunak koponesio kus kere, 16 naarai iwadikatai ebe, “Iraunos yesi lukalaunak, naarai arai eoŋ lokalaunan,” 17 Arai inyarito Papa ŋol loetubokini ŋinituŋanan kwape ejaatar aswamisioke, komam etiaki ituŋa, kolosenenete kakurian kapali nairaatar ikalotok. 18 Kojenete ebe mam aponi kolakun yes kiboro luedaunos, kwape epuesa arai esabu, koponesiokus lutai lukirokunete kama kalukapapaakus, 19 dimarai kaokot nuketiai Ioepol nuka Kristo, kwape nuka imerekek yenemamei aŋwal, karaida akemer. 20 Aponi kisiaunai ajenun ŋes koriŋa akwapin kesuba, konye aponi kitakanunai kawasia naka apakio kanukus. 21 Kotomakeŋ iraut luiyuunito Edeke, loetajaruni ŋes kokatwak, koinak da aibuses, kosodi aiyuunikus ka amunokus ajaut mama ejai Edeke. 22 Naarai idaut aitalaun aijarakus kotoma arimarite abeit, kiton amin iinacan namam esoswai, kodunyakis noi aminanara kotoma otauon. 23 Naarai aponi kourii yes irwan nakiareit, mere kikinyom luebosete, dimarai kalumam ebosete, kanuka akirot naka Edeke naejari naeperonori. 24 Naarai “Akuan kere esubit bala anya, Ka aibusesuke kere da kwape aturot naka anya, Erinyorete anya, aturot da eraraar. 25 Konye akirot naka Ejakait eperonori ikar kere.” Akirot ŋin da kes Akiro Nukajokak nuaponi kolimokin yes. |