Iburanian

1

1Abu kolo Edeke kinera kalukapapaawok koponesio luipu luegelegela kotoma onabin; 2 konye kapaarasia kanu nukawasia ener kaoni kotoma Okoku, loabu kodakak araun ekeruman loka kere, kanukeŋ da abu kosub akwapisinei. 3 Erai ŋesi ailore naka aibuses naka Edeke, erai da einono loka ejauteneke, edakit iboro kere kakirot naka akepedor. Nakedaunia aitesegaar adiakanareta, kiboikin akan nakoteten naka Loejai kuju kakuj, kotoma akuj, 4 korau loedeparit noi imalaikan kajokis, kwape erumitor ekiror loedeparit noi lokec kajokis. 5 Naarai iŋai bo komalaikan abu Edeke kobala ebe, “Irai ijo Okokuka, lolo kauri jo”? Bobo da ebe, “Araun eoŋ Papake, ŋes da eraun okokuka”? 6 Bobo da, naayaunia ekiyai toma akwapin ebala ebe, “Komaata ŋes imalaikan kere luka Edeke.” 7 Inera nuka imalaikan ebe, “Loesubi ikemalaikan araut imoyon, Ka ikejaanakinakake da aŋajepa nuka akim.” 8 Konye nuka Okoku ebe, “Wu Edeke, ejaenena ekoniicoloŋ ikar ka ikar, Ebela da lokadolit, ŋes ebela loka ajakanutuke. 9Ido komina adolit, kolaite da epali, Tape Edeke, Ekonideke, kinyonyoikini jo akinyet naka ailel Adepar lukaupakon.” 10 Bobo da ebe, “Ijo, wu Ejakait, ameun kageunet, Ibu kopet apetetait naka akwap, Akuj da erai aswam naka akonikanin; 11Edaunos ŋun, konye jo ibusenenei; Emojoŋgete da kere kwape anapito; 12Ido inunuki kes kwape eimukoret, Ilocokinio da kwape anapito. Konye ijo ŋopeŋol, Ikonikar da mam enaŋete.” 13 Konye iŋai bo komalaikan abu ŋesi kobala ebe, “Kiboikin akanika nakoteten, Aitodol naebwaikinia lukasurupokon Araut iicoloŋ yenika akejekon”? 14 Mere kereka kes kere imoyon luijaanakinete, luiyakiaritai aijaanakin, kanuka ŋul luepote airum aitajario?

2

1Kanuka ŋun ibusakinit oni aiyatakin noi aibwaikin itauon ŋun nukipupu, kenyeis aikaleleorio kamakec. 2 Naarai arai icasit akirot nakineras imalaikan, tape eropio kadolit ŋiniibucaret ka ŋiniiulanut, 3 kikwaikini ai kikui oni arai kijali aitajario naetia nen? Abu Ejakait kogeu alimokin ŋin, kosodete lukiirarete ŋes apotu kitogogoŋoto mamawok. 4 Edeke da abu kitejen nepepe kakes kotoma aanyuneta ka nukaumokin, ka nukapedor nuka iponesio luegelegela, kotoma akorakineta da nuka Emoyo Lokalaunan, kwape ejaar akoteke elopet. 5Naarai mam einakinit Edeke akwapin nueponito nukinera, anonokikin imalaikan. 6 Konye ejai aibois naitejenunitor ediopet, kinera ebe, “Inyo bo etuŋanan, tape jo iitunit ŋes? Arai bo okoku loka etuŋanan, tape jo ianyanari ŋes? 7Ibu kosub ŋes nepetai airianakin ka imalaikan adaun apak naedit, Itanapit ŋes aboko naka aibuses ka ayoŋio, Isurumit ŋes aswamisio nuka akonikanin. 8 Itononokikinit iboro kere aibwaikin kwap kakejeneke.” 9 Konye kiseseni Yesu loaponi kosubai nepetai airianakin ka imalaikan adaun apak naedit, kanuka aiticanio naka atwanare, aponi kitanapai aboko naka aibuses ka ayoŋio, tetere kanuka asianut naka Edeke, iiri atwanare kanuka ŋinituŋanan. 10 Naarai ebusakinit ŋol, loejaas iboro kere kanukeŋ, ido loepote iboro kere kamakeŋ, naeyaunia odwe luipu toma aibuses, aitodolikin ekapeleunan loka aitajariokec kanuka aisiriebio. 11 Naarai loitalauni ka luetalaunitai eraas kere luka ediopet. Kanuka ŋun ŋes mam irumiata ŋes ileic anyarit kes iinacan, 12 kinera ebe, “Alimokini ikainacan ekonikiror, Keturenenei jo, kokidiŋ katukot.” 13 Bobo da ebe, “Amunoneno eoŋ ŋes.” Ido bobo ebe, “Koany, eoŋ ka idwe lukainak Edeke.” 14 Aso naarai imorikikinete idwe aokot ka awat, abu ŋesi da elopet komor kakes ejautenekec, tetere kanuka atwanareke emudiari ŋol loejai apedor naka atwanare, ŋes Satan. 15Tetere elacakini da ŋul kere lukejaas toma obulesene apaarasia kere nuka aijarakec, kanuka akurian atwanare. 16 Naarai abeit mam iŋarakinit imalaikan, dimarai iŋarakinit aur naka Aburaam. 17 Ŋes iburaa ŋes aitupusio ikeinacan kotoma kere, tetere eraun esasedoti lopeti lokaitim lomunot kotoma akiro nuejaas neejai Edeke, kanuka ailuc adiakanareta nuka ituŋa. 18 Aso naarai abu ŋesi da elopet korieba ecodunio, ŋes epedoria aiŋarakin ŋul luecodunio.

3

1 Aso, iinacan lukalaunak, luimorete anyaraunio nakokuju, koomoomata Yesu, Ekiyakia ido Esasedoti lopeti lokilimonori oni. 2 Kerai ŋesi lomunot mama ejai ŋol loaseuni ŋes, kwape Musa da keraar lomunot kotogoke kere. 3Naarai ibusakinit Yesu ainakinio aibuses naepol adepar Musa, kwape edumunia loeduki etogo ayoŋio adepar etogo. 4Naarai ejai ŋolitogo ekadukonike, konye loaduki kere ŋes Edeke. 5 Musa da kerai lomunot kotogoke kere kwape ebulesit, kanuka aitejenun nuepote ainerio, 6 konye Kristo kerai lomunot kotogoke kwape okoku. Kirai oni etogoke, arai kikamuni kagogoŋ ati tiŋ ka aolobobot naka amun kiton awasia. 7 Aso kwape ebalar Emoyo Lokalaunan ebe, “Lolo, arai kiirasi ekeporoto. 8 Sirikitininikata ikusitauon, kwape toma aitunyunyurikinio, Kwape kapaaran naka acodunio toma amodiŋ. 9Nakakoduniata eoŋ lukapapaakus, ketemo, Koanyutu da akaswamisio ikar akaisaoŋon. 10Ŋes abu kanyunyurikinia atur ŋin, Kabala ebe, ‘Epaarete apaarasia kere kotauonokec; Komam ejenete ikarotin,’ 11 Kwape keyapoikinia kakanyunyura ebe, ‘Mam cut elomunete aibworareteka.’ ” 12Kocoito, iinacan, kinyek ajaun kotoma idio kayesi etau loerono lomam iyuunit, lokitonyouni kama ejai Edeke lokajaran. 13 Konye kicorenenas ŋinipaaran, naeriŋar enyaritai “naka lolo”, kinyek aiŋal naka adiakar aitininik idio kayesi. 14 Naarai kirau ikamorak luka Kristo, arai kikamuni kagogoŋ ageunet naka amunowok kiton awasia. 15 Kwape eriŋar inerai ebe, “Lolo, arai kiirasi ekeporoto, Sirikitininikata ikusitauon, kwape toma aitunyunyurikinio.” 16 Naarai lukaŋai bo kiirarete, kitunyunyurikisi? Mere kereka ŋul kere luanyounete koMisiri kanuka Musa? 17 Ido lukaŋai bo luabu konyunyurik ikar akaisaoŋon? Mere kereka ŋul luapotu kodiakas, lukibirokinos akecetesin amodiŋ? 18 Ido lukaŋai bo luabu kiyapoik ebe mam cut elomarete aibworareteke, nabarai ŋul lueulakinete? 19Ido kianyu ebe mam apotu kopedosi alomar kanuka amamus aiyuun.

4

1 Aso, naeriŋar aisumunet naka alomar aibworareteke esalit, kakuriakaros, kinyek idio kayesi atakanun mam edolokinit. 2Naarai oni da kilimonokinitai Akiro Nukajokak kwape kakesi; konye akirot nakiirarete mam abu koinu kes ajokis, naarai mam aponi kimorikikinai kotoma aiyuun nepepe kaŋul luapotu kiirasi. 3 Naarai oni lukidau aiyuun, kilomari toma aibworaret ŋin, kwape abalar ebe, “Kwape keyapoikinia kakanyunyura ebe, ‘Mam cut elomunete aibworareteka,’ ” karaida apotu aswamisioke kodaunos ameun kageunet naka akwapin. 4 Naarai ejai neinerar nuka apaaran nakikanyetekaarei ebe, “Abu Edeke kibwora kapaaran nakikanyetekaarei, kotoma aswamisioke kere.” 5 Bobo da kotoma kana ebe, “Mam cut elomunete aibworareteka.” 6Aso naarai esalit ice alomar tomake, ka ŋul da luageunete alimonokinio akiro nukajokak mam elomarete kanuka aiulanut, 7 bobo etiaki ŋesi apaaran ace, ebala kama ka Daudi ketubor apak naetia nen, ebe, “Lolo,” kwape abalar sek ebe, “Lolo arai kiirasi ekeporoto, Sirikitininikata ikusitauon.” 8 Naarai arai kisiyenunit Yosua kes, timam kinera nuka apaaran ace akaulo kapaarasia kaŋun, 9Aso esalit aibworaret naka asabato mama ejaas ituŋa luka Edeke; 10 naarai yenelomari aibworareteke, eyenu do ŋesi da kotoma aswamisioke, kwape abu Edeke da kiyenunia kotoma nukeŋ, 11Aso kadunyakis alomar aibworaret ŋin, kinyek Idiotuŋanan aibirokin opone ŋol loka aiulanut. 12 Naarai erai akirot naka Edeke nakajaran, nakapedor da, ekwana adepar ŋolikileŋ loekwana kowaitin kere, ipelori da kiton aitiak aijar ka emoyo, ailenyeta ka asum, emisiikin da aomisio ka nuelosikinit etau. 13Kwabo emamei isubat yenimam etakani kakonyeneke, konye imujalalas iboro kere, ido ideleleete kakonyen nuka ŋol loejaas akirowok. 14 Aso naarai kija ka esasedoti lopeti lokapolon, lokelomari toma akuj, Yesu Okoku loka Edeke, keketakis noi alimoriwok. 15 Naarai emamei oni esasedoti lopeti lomam epedori arieba nepepe kaoni akalanyanutuwok, konye lokecodunio kakiro kere ariaka kaoni, komam adiakar. 16 Aso kekunyakis katitiŋ mama ejai eicoloŋ loka asianut, tetere kitimio, kadumutu da asianut nakinarakini oni kapakio nuka eipud.

5

1Naarai ŋolisasedoti lopeti loketiakunio kotuŋa ibwaikinio kanuka ituŋa kakiro nuka Edeke, tetere ijaikini ainakineta ka asuban da kanuka adiakanar. 2 Epedori aiyamiyamar lueolito ka luepaarito, naarai ŋes da elopet igogoleori akalanyanut. 3 Kanuka ŋun ŋes da iburao ainakin asuban kanuka adiakarike, kwape kanuka ŋun nuka ituŋa. 4 Kwabo emamei etuŋanan kere eyaŋaikin bon apolou ŋin, dimarai ŋol loenyarit Edeke, kwape ka Aaron. 5 Kwape kwaŋin Kristo da mam abu kitopoloor bon aluor esasedoti lopeti, dimarai ŋol loabu kolimok ŋes ebe, “Irai ijo Okokuka, lolo kauru jo.” 6 Kwape inerar kamace da ebe, “Irai ijo esasedoti kiton ikar kere, Kwape ejaar epone loka Melukisadek.” 7 Kapaarasia nuka akuanake, abu Yesu kiŋaiŋa kilip da, kaiworo naepol ka akiyo da, mama ejai ŋol loepedori aitajar ŋes katwanare, kopupunoi da kanuka ayoniteke Edeke. 8 Karaida kerai Okoku abu kisisia arimanut kanuka ŋun kanuesiriebete; 9 kosodi nakedaunia aitodolikinio, korau loeinakini ŋul kere luerimarete ŋes aitajario naka ikar kere, 10loamaikini Edeke esasedoti lopeti kwape ejaar epone loka Melukisadek. 11Kija kakiro nuipu einer kamakeŋ, ido nuetioko aitejenun, naarai ikimiŋakaros yesi. 12 Naarai kapak kana tikibusakinit araut ikesisianakinak, kwabo ipudasi bobo yenikisisianakini yes nusodit nuegeunete nuka akiro nuka Edeke. Ido iluoros luipudasi akile kwabo mere inyamat luenyakao. 13 Naarai yenemasi akile mam ejeni akirot naka adolit, naarai erai ikoku. 14 Konye inyamat luenyakao eraas luka lukapolok, ŋul luiruutooritai acoakec kanuka aitwasam, tetere etiakete nuejok ka nueroko da.

6

1 Kanuka ŋun kenyeis einer akiro nusodit nuka Kristo, keyatakinos apoloor; kenyeis bobo aipet apetetait naka aitoronikin kanuka aswamisio nuetwakito, ka aiyuun Edeke, 2aisisianakin naka aibatis, ka aidokokinio akanin, ka ajarun naka lukatwak, ka atubokinio da naka ikar kere, 3Kiswamai da kwaŋin arai ekoto Edeke. 4 Naarai ŋul luadaut kolo ainwakakinio, kiirata da ainakinet nakakuj, luaraunos ikamorak Emoyo Lokalaunan, 5 kiirata da ajokis naka akirot naka Edeke, ka apedor da naka ikar luepote, 6mam epedorete aiteteun bobo aitoronikin arai kibiroros ainyein ŋun, naarai ebubukis bobo Okoku loka Edeke kanukec, esurumata da ileic kaitebeikin. 7 Naarai akwap naamat akiru naetepanakini irwan ipu, kosodi kobwaŋ akui nuibusakinito ŋul luekorionokinio, edumuni arereŋ naebuni kama ejai Edeke. 8 Konye arai kitolom ikukwa ka isukukur, eneritoi, ido eapie aikenio; esaŋeke aicweio. 9Konye luminan, karaida kinera ŋun kwaŋin, kitogogoŋ kamakus akiro nuejok adepar, ido nueraas nuka aitajario. 10 Naarai Edeke mam erai lomam edolit aimurwokin aswamukus, ka amin naipotu kitodiasi mama ejai ekirorike naijaanakiniata lukalaunak, ido kwana iroko ijaanakinete. 11 Konye kiŋata noi ŋinituŋanan kayesi aitodiar adunyanut ŋipeŋin kanuka aitodolikin cut amun ŋin kiton osaŋe, 12kinyeis araut luijalijalasi, konye luipusete ŋul luirumete aisumuneta kanuka aiyuun ka atitiŋikin da. 13 Naarai naesumunio Edeke Aburaam, naarai amamei loapol aitelekarit ŋes loelimit iyapoi, abu kiyapo kolimite elopet, 14 kobala ebe, “Abeit kotoma arereŋ kesirereŋenenei jo, ka aiyat keyatanakinenei jo.” 15Kwape kwaŋin kanuka atitiŋikin abu kodum aisumunet ŋin. 16 Naarai iyapoete ituŋa kolimito loepol aitelekarit kes, ido kotoma opegetakec kere, edauni aiyapoet aitogogoŋ, 17Aso naakotor Edeke aitodikin cut noi ikerumak luka aisumunet kwape mam ijulakinor akekot, abu kodiek kaiyaposit, 18 tetere kanuka akiro aarei numam ijulakinos, numam epedori Edeke aiŋal, kidumuni aitalakario naegogoŋ, oni lukirurukit aikamun amun naibwaikinitai kakonyenewok. 19 Kija kaŋin kwape edobo loka aijar, loicasit loegogoŋ, amun naelomari mama ejai naejai toma aigalisit, 20 neabu Yesu koloma kwape ekeŋarenon kanuwok, abu koraun esasedoti lopeti ikar kere kwape ejaar epone loka Melukisadek

7

1 Naarai Melukisadek ŋol, ekabaka loko Salem, esasedoti loka Edeke Loejai kuju kakuj, loeriamunos ka Aburaam naaboŋunio kajar ikabakan, abu kilipak ŋes arereŋ; 2loabu Aburaam kokorak idiopet kotomon koboroke kere. Nasodit, arai ijulakini ekekiror, erai ŋesi ekabaka loka adolit, bobo da ekabaka loka Salem, ŋes atemar ebe ekabaka loka ainapakin. 3 Emamei ŋes papa, karaida toto, karaida lukapapaake, emamei ageunet naka apaarasiake, karaida esaŋe loka aijarake, konye itupusitoi ka Okoku loka Edeke, esalakinit erai esasedoti apaarasia kere. 4Aso ca koomito etuŋanan ŋol, kwape keraar loepol! Abu Aburaam papaawok koinak ŋes idiopet kotomon kaluŋatuna. 5 Ŋul da lukodwe luka Lebi lueinakinio esasedotene ejaas kaicorakinet ayaŋanar idiopet kotomon kotuŋa kwape ejaatar ikisila, kes iinacanakec, karaida ŋul da kelomunete kotoma akuan naka Aburaam. 6Konye ŋol lomam imaritai lukapapaake kamakec, abu kodum idiopet kotomon kama ka Aburaam, kilipak arereŋ loejaas kaisumuneta. 7Konye emamei epeget nepepec da, ebe, ŋipakini lokapolon lodidi arereŋ. 8Kane da edumunete ituŋa luetwakete idiopet kotomon, konye kalaije, ŋol loiteienunio ebe ejari, 9Epedorio einer ebe Lebi da, loedumuni idiopet kotomon, abu koinak idiopet kotomon kotoma Aburaam, 10naarai koriŋa ejai toma akuan naka papaake naeriamunotor Melukisadek kaŋes. 11Aso arai kejai aitodolikinio kanuka esasedotene loka Ilebin, (naarai apotu ituŋa kodumut ikisila kanuka ŋol,) kanukinyo ipudare bobo esasedoti ece anyoun kwape ejaar epone loka Melukisadek, komam imarakinio kwape ejaar epone loka Aaron? 12Naarai naelocokinere esasedotene, ibusakinit ikisila da ailoeokinio. 13Naarai ŋol loalimitere akiro ŋun kerai loka ateker ace, nemam ebunitor etuŋanan kere lokijaanakini kotem. 14 Naarai idelelei ebe elomunit Ejakaitiwok kotoma Yuda, ateker namam apeŋo Musa elimitor akiro nuka esasedotene. 15Bobo da iyatasi ŋun aideleleun noi, arai enyounit esasedoti ece kwape ejaar aput naka Melukisadek, 16loaraun esasedoti, mere kwape ejaatar ikisila luka aicorakinet naka akuan, dimarai kwape ejaar apedor naka aijar namam edaun. 17 Naarai itejenunitai ebe, “Irai ijo esasedoti kiton ikar kere, Kwape ejaar epone loka Melukisadek.” 18Naarai kepuai epaluni aicorakinet nageet kanuka akalanyanut ka amamus ajokisike, 19 (naarai emamei ibore yenitodolete ikisila;) kepuai da aponi kitolomikin amun naitelekarit ajokis, nakikunyaria mama ejai Edeke. 20Ido mam abu kojau komamei aiyaposit. 21 Naarai koraut kesi isasedotin komamei aiyaposit, konye je kitaraunai kaiyaposit kanuka ŋol lokelimokini ŋes ebe, “Abu Ejakait kiyapo, komam iitokini ebe, ‘Irai ijo esasedoti kiton ikar kere.’ ” 22 Abu Yesu da korau kwaŋin ekabwoaran loka aitutuket naitelekarit ajokis. 23Kes da aponi kitaraununai isasedotin luipu, naarai etikokinit kes atwanare ajaenena osasedotene; 24konye ŋol, esasedoteneke mam ikopanar, naarai ejaenena ikar kere. 25 Kanuka ŋun ŋes epedoria aitajar cut luepote mama ejai Edeke kotomakeŋ, naarai ebusi ŋesi apaarasia kere apuronokin kes. 26 Naarai ibusakinit oni ajaut kesasedoti lopeti loikoni nen, lokalaunan, loemamei aronis, karaida elos, loetiakunitai kama ejaas ikadiakanarak, loitopolooritai da adepar akuj. 27 Mam ŋes iburao ŋinipaaran, kwape isasedotin kwi lupeti, ainanakin asuban, naegei kanuka adiakanaretake, kosodi konyet kokau kanuka ŋun nuka ituŋa; naarai abu ŋesi kiswama, kwaŋin irwan atipet bon naejaikinor elopet. 28 Naarai eseunete ikisila ituŋa luekalanyaka, araun isasedotin lupeti; konye do akirot naka aiyaposit naetupakini ikisila, abu koseu Okoku loitodolikinitoi kiton ikar kere.

8

1 Akirot alopet nakibala ŋes nata ebe: kija kesasedoti lopeti loikoni nen, lokiboikin akan nakoteten naka eicoloŋ naka Lokapolou toma akuj, 2ekejaanakinan toma aiboisio nukalaunak, ka ewema lokabeit, lokibubukini Ejakait kwabo mere etuŋanan, 3Naarai ŋolisasedoti lopeti edakakinio tetere einakini ainakineta ka asuban; kanuka ŋun ibusakinit esasedoti ŋol da lopeti ajaut kibore yeneinakini. 4Aso arai kejai akwap, timam keraun esasedoti nepetai da, naarai ejaas isasedotin lueinakinete ainakineta kwape ejaatar ikisila. 5 Ijaanakinete ŋul aput ka etoribe loka aiboisio nukalaunak nukotoma akuj; kwape kicorakinia Edeke Musa napeapie aiswamaun ewema ebe, “Kocoite ebe iswamauni iboro kere kwape ejaar aput nakiitodikinio jo koroŋat.” 6 Konye kwana abu Kristo kodum aijaanakin naitelekarit noi, naarai erai ekadiekan loka aitutuket naitelekarit noi ajokis, naisilakinitai kotoma aisumuneta nuitelekarito noi ajokis. 7Naarai arai kerai aitutuket nasodit naemamei aitoronet timam kemoi aibois kanuka nakiareit. 8 Naarai itoroni kes naebalar ebe: “Ebala Ejakait ebe, epote apaarasia, Nuetodolikinio aitutuket nakitetet kekek loka Isirael, Ka ekek loka Yuda. 9 Ebala Ejakait ebe, Mere kwape ejaar aitutuket nakolo etutuki ka lukapapaakec Kapaaran naketiŋia kakan aitonyoun kakwap nako Misiri; Naarai mam ŋul kesalito toma aitutuketeka, Eoŋ da abu kajal kes. 10Ebala Ejakait ebe, Na ŋes aitutuket naetutuki kekek loka Isirael, Akaulo kapaarasia kaŋun; Epikakini ikakisila aomisiokec, Ewadikakini da otauonokec; Eoŋ da araun Ekecedeke, Kes da eraunos ikatuŋa. 11Kwabo mam bobo isisianakinos ŋinituŋanan ikeidunyet, Ka ŋinituŋanan da onaceke, kobalas ebe, ‘Kojen Ejakait,’ Naarai kajenunete rwaru kere, Ameun ka yenididi aitodol yenikapolon kakesi. 12Naarai etimi kes numam adolitekec, Ido mam bobo eituni akecediakar.” 13 Nainerar ebe Aitutuket nakitetet, itomojoŋi nasodit. Konye ŋin naamojoŋiar, naekokosanit da eapie ailicar.

9

1Aso aitutuket nasodit da kejaas kaicorakineta nuka aima Edeke ka aibois nakalaunan naka akwap. 2 Naarai itemokinitoi ewema losodit, lokejai epir loka atalai, ka emesa, ka imugatin luka aitodikin, nen ŋes kenyaritai Aibois nakalaunan. 3 Kau naka aigalisit nakiareit kejai ewema lokenyaritai Aibois nakalaunan noi, 4 lokejai etem loka lukisupurununo lokesabu, ka asaduku naka aitutuket nakiladaaritai kesabu iwaitin kere, nekejai atido nakesabu nakejai emanu, ka ebela loka Aaron loeburukunyit, ka amor da nuka aitutuket; 5 kujuke da Ikerubin luka aibuses, iteriborito eicoloŋ-lokaitim. Emamei apak kwana einer akiro nuka iboro kaŋul idiopet idiopet. 6 Aso kedaut iboro ŋul aitemonokinio kwaŋin, elomanarete isasedotin tiritir owema losodit, itodolikinete akiro nuka aijaanakin; 7 konye owema ŋol lokiareit elomanari esasedoti lopeti bon, irwan atipet ŋolikaru, mere komameete aokot nueinakini kanuke, ido kanuka aibucareta nuka aolit naka ituŋa. 8 Isideleleuni Emoyo Lokalaunan ebe mam ber erot etakanuna alomar aiboisio nukalaunak, naeriŋar ewema losodit ebwoi. 9 Ŋin ŋes aput naka apak nakwana, naejaas ainakineta ka asuban nueinakinio numam epedorete aitodol aomisio nuka yenemai; 10 naarai eraas ikisila luka akuan bon, lunyaman ka lumatan, ka luka ailoŋ naka iponesio luegelegela, lukicorakinio aitodol apak naka aiteteunio. 11 Konye kedau Kristo abunore, loerai esasedoti lopeti loka akiro nuejok nuejaunete, kotoma owema loepol aitelekarit loitodolikinio jokan, lomam kiswamao kakanin, ŋes atemar ebe, mere loka akwap kana, 12kwabo mere kanuka aokot nuka akinei ka itak lurosok, konye kanuka akeokot elopet, abu koloma irwan atipet bon Aibois Nakalaunan, nakedaunia adumun alakun naka ikar kere. 13 Naarai arai aokot nuka akinei ka imoŋin, ka ekurwon loka ataok, lukebwatanakinio luemunaara, italaunete kiton aitesegaar akuan, 14 itelekarito cama aokot nuka Kristo, lokeinakin bon mama ejai Edeke kotoma Omoyo loka ikar kere, araun asubanit naemamei akemer, itesegarete aomisiokus kaswamisio nukatwak tetere ijaanakinete Edeke lokajaran. 15 Kanuka ŋun erai ekadiekan loka aitutuket nakitetet, tetere edumunete ŋul lukenyaraunitai aisumunet naka airumet naka ikar kere, naarai abu atwanare kojau naelakuni kes kotoma apaanareta nukotoma aitutuket nasodit. 16Naarai neejai aitutuket naka airum, ibusakinit kojai atwanare naka yenikitutuki ŋin. 17Naarai icasit aitutuket naka airum nakejaunia atwanare, naarai emamei ŋes agogoŋ arai eroko ejari yenikitutuki. 18Kanuka ŋun kiton aitutuket nasodit da mam itaŋitai komameete aokot. 19 Naarai nakedaunia Musa alimokin ituŋa kere ninikicorakinet kwape ejaatar ikisila, abu kolem aokot nuka itak lurosok ka nuka akinei nepepe kakipi ka eusi loereŋ, ka esop da, kobwatanak eitabo ka ituŋa kere, 20 kobala ebe, “Nu kes aokot nuka aitutuket nukiicorakini yes Edeke,” 21 kobwatanak aokot kopone kaŋol ewema, ka iboro kere da luka aijaanakin. 22 Abeit kotoma ikisila aapiei iboro kere aitesegario kaokot, ido arai emamei abukor aokot emamei aisionio. 23 Aso ibusakinit aputosia nuka iboro lukokuju aitesegario kaŋun, konye iboro lukokuju ikulepek ibusakinit aitesegario kasuban nuitelekarito ŋun kajokis. 24 Naarai mam Kristo alomarit aibois nakalaunan nakiswamao kakanin, nakeputosi kaŋin kanakabeit, konye toma akuj alopet, atakanu kwana kakonyen nuka Edeke kanuwok. 25Kwabo mere ainanakin bon irwan ipu, kwape elomanaria esasedoti lopeti Aibois Nakalaunan ŋolikaru kaokot numam eraas nuke; 26 naarai tiibusakinit ŋes arieb irwan ipu ameun kaisub akwapin. Konye kwana, atakanu irwan atipet bon kawasia naka ikar alemar adiakanareta kanuka ainakin bon araut asubanit. 27 Ido kwape itemokinitere ituŋa atwanare irwan atipet, kosodi akaulo kaŋin atubokinio, 28 kwape kwaŋin Kristo da, nakeinakinere irwan atipet aibwok adiakanareta nuka ikepuak, etakanuni irwan nakiareit komamei adiakar mama kaŋul luidareto ŋes kanuka aitajario,

10

1 Naarai ejai ikisila etoribe loka ajokisio nuepote, kwabo mere aput obe naka akiro kaŋun, mam epedorete cut aitodolikin ŋul luikunyakinete, kanuka asuban ŋupeŋun nueinanakinete tiritir, ŋolikaru ŋolikaru. 2Arai mere kwaŋin, mam ti do kinyeis ainanakin? Naarai luemaete naedauniata aitesegario cut irwan atipet, timam bobo kilepilep adiakar. 3 Konye kotoma asuban ŋun ejai aisiitunio adiakanareta ŋolikaru, ŋolikaru. 4Naarai mam epedorete aokot nuka imoŋin ka akinei alemar adiakanareta. 5 Naarai naalomunia Kristo toma akwapin abala ebe, “Mam ibu kokoto asubanit ka ainakinet, Konye ibu kitemok akuan kanukaŋ; 6Mam isiyalamikinit ainakineta nuicweio, karaida ainakineta nuka adiakar. 7Kasodi kener ebe, ‘Koany, abu eoŋ,’ (Iwadikatai nukaŋ oitabo lonunuko) ‘Aswam nuikoto ijo, wu Edeke.’ ” 8Naarai naenerar kokuju ebe, “Asuban ka ainakineta ka ainakineta nuicweio, ka nuka adiakar, mam ibu kokoto, karaida aisiyalamikin,” (ŋun kes nueinanakinio kwape ejaatar ikisila), 9kosodi konyet einer ebe, “Koany, abu eoŋ aswam nuikoto ijo.” Elemari nasodit tetere iticasi nakiareit. 10 Kotoma akot kaŋin aponi oni kitalaun kanuka ainakinet naka akuan naka Yesu Kristo irwan atipet bon. 11 Ŋolisasedoti da ebwoi ŋinipaaran kotoma aijaanakinike, icebokinit ainanakin asuban ŋupeŋun, numam cut epedorete alemar adiakanareta. 12 Konye nakedaunia Kristo ainakin asubanit adiopet kanuka adiakanareta naedauni ikar kere, kosodi kiboikin akan nakoteten naka Edeke, 13ameuni kanen idareunit aitodol naibwaikinere lukasurupoke araun iicoloŋ yenika akejeke, 14Naarai kotoma ainakinet adiopet abu kitodolik luitalaunio kiton ikar kere. 15Emoyo Lokalaunan da itejenari nuwok, naarai naadaunia einer ebe, 16 “Ebala Ejakait ebe, Na ŋes aitutuket naetutuki kakes, Akaulo kapaarasia kaŋun, Epikakini ikakisila otauonokec, Ewadikakini da aomisiokec.” 17 Kosodi konyet ebala ebe, “Mam bobo eituni adiakanaretakec ka epalikec.” 18Konye napejaar alemario ŋun, mam bobo einakinio asubanit kanuka adiakar. 19 Aso iinacan, naarai kija katitiŋ alomar toma aibois nakalaunan kanuka aokot nuka Yesu, 20 kotoma orot lokitetet ka loejari da, lokicilakini oni kotoma aigalisit, ŋes atemar ebe, akekuan, 21 ido kwape kijaar kesasedoti lokapolon loeyait etogo loka Edeke, 22 kekunyakis ketau lokabeit, ka aiyuun naedoliorit cut, kobwatai itauonowok da ainyein aomisio nueroko, kiloŋai da awatewok kakipi nuelaete. 23 Keketakis alimor amunowok komam kiriaŋiriaŋa, naarai lokisumunit erai lomunot. 24 Kaomoomas aisinyikokin bonik ka bonik amin ka aswam nuejokuka, 25 kenyeis apalun atukonokin nepepe, kwape iswamaata ice, konye kecoras; ido keyatanakinito ŋun kwape ianyuniata apaaran ŋin eyapuunit adolun. 26 Naarai arai kilosikinit adiakanar nakiidaunia ainakinio ajenun abeit, mam esalit bobo asubanit kanuka adiakanareta, 27 dimarai aidarit kakurian atubokinio, ka adedeŋ naka akim naebunit aicwe lukasurup. 28 Yenemwaŋi ikisila luka Musa etwani komam itimio, kanuka ikajenak iarei arai iuni. 29 Iwomito biai, nanyoin aiticanet naitelekarit noi naibusakinit ituŋanan yenipudapudai Okoku loka Edeke, komunaa da aokot nuka aitutuket, nuapotu kitalaut ŋes, komor da Emoyo loka asianut? 30 Naarai kijeni ŋol loabu kiner ebe, “Enyaŋit ŋes lokaŋ, eoŋ ataci.” Bobo da ebe, “Irabakini Ejakait iketuŋa.” 31 Erai akirot naesogim aibirokin akanin nuka Edeke lokajaran. 32 Konye kiitutu apaarasia nukolo, naidauniata ainwakakinio, nuititiŋikinioto aut naepol naka aisiriebio, 33 acepakio araun lusesena kanuka amoromor ka areio, acepakio da naimorianakinotor kaluiswamakinio ŋun. 34 Naarai ipotu kitimoto ienan, ido ipotu kotitiŋikis kalakara aŋatario naka ikusiboro, kojenete ebe ejaas yes iboro luejok adepar ido lueperonorete. 35 Aso sirikicakasi atitinikus, naejai eropit loepol. 36 Naarai ipudasi atitiŋikin, tetere iswamaete nuekoto Edeke, kosodete kijaut naisumunitai. 37 “Naarai eriŋa esalit apak naedit noi, Kosodi loebuni ebuni komam itumor; 38 Konye ekadolitonika ejari kanuka aiyuun, Ido arai eboŋori kau, Mam ekatau elelakinit ŋes.” 39Konye mam oni kirai lukibonori kau toma amudiario, konye kirai luka aiyuun kanuka aitajar aijar,

11

1 Aiyuun ŋes apetetait naka akiro nuemunoi, aitogogoŋet naka akiro numam eanyuna. 2Naarai kotomakeŋ ŋes etejenunere imakio. 3 Kanuka aiyuun kijen ebe kesubio akwapin kere kakirot naka Edeke, tetere mam iswamao nueanyuna kotoma kaŋun kanuetakanete. 4 Kanuka aiyuun abu Abel koinak Edeke asubanit naitelekarit naka Kain kajokis, kanuka ŋin ŋes kitejenikinere araut loedolit, kitejen Edeke kanuka acamun ainakinetake, ido kanuka aiyuunike, karaida abu kotwana, konye eriŋa inera. 5 Kanuka aiyuun aponi koyaŋaarai Enok tetere mam eanyuni atwanare, ido mam abu kotakan, naarai abu Edeke koyaŋa ŋes. Naarai eriŋa eyanaara etejenikinitai ebe abu kitelel Edeke. 6 Konye neemamea aiyuun mam epedor aitelel ŋes. Naarai yenikunyakini Edeke ibusakinit aiyuun ebe ejai ŋesi, ido ebe eropi ŋul luemoete ŋes. 7 Kanuka aiyuun abu Noa loekwenyarit Edeke kanuka akiro nukeroko etakanuna, koyoŋ ejok, kitemok ataker aitaiaria lukokaleke; kanuka gin kotubok akwapin aitelekario, koraun ekerunan loka adolit naejai toma aiyuun. 8 Kanuka aiyuun abu Aburaam korimak nakenyaraunere alomar toma aibois naelosio ainakin araun airumet; abu koloma komam ejeni neelosi. 9 Kanuka aiyuun abu kiboioror kakwap naka aisumunet, bala akwap namere nakeŋ, iboienenei koweman nepepe ka Isaak ka Yakob ikerumak lukaupake luka aisumunet ŋipeŋin. 10Naarai abu kidareunite ere loejaas apeteta, loapwakun Edeke loaduki da. 11 Kanuka aiyuun abu Sara alopet kodum apedor apotuun karaida kedepara ikaruke, naarai abu koomite ŋol loesumuni araut lomunot. 12 Kanuka ŋun anyoun kotuŋanan ediopet, ido loasubit bala etwanit, aponi kowuriai lueputosi bala aacer nuka akuj kaipues, ido kwape asiŋe naejai ariri naka aŋolol namam imarun. 13 Apotu ŋul kere kotwakikis toma aiyuun, koroko einakina nuesumunitai, konye apotu koanyutu kimalaete da kama elwana, kolimosi ebe keraas imo ka ikalotok kakwap. 14Naarai luinerasi nuikote nen isideleleunito ebe emoete akwap naebeit kes. 15Ido arai kiitunito akwap ŋin naalomuniata, tiejaas kapak aboŋor. 16 Konye kwana iŋobeleete akwap naitelekarit ajokis, ŋes nakotoma akuj. Ŋes mam irumiata Edeke ileic anyarao Edekekec, naarai abu kitemok kes ere. 17 Kanuka aiyuun, abu Aburaam koinak Isaak, naetemere, ido loabu kodum aisumuneta kalakara etemokino ainakin okokuke loteluna, 18 loaponi kinerai ebe, “Kotoma Isaak ŋes enyaraere akoniwur.” 19 Koomite ebe epedori Edeke aitajarun, kiton kokatwak da; neadumunia kotoma aput. 20 Kanuka aiyuun abu Isaak kilipak Yakob ka Esau arereŋ kotoma akiro nuepote. 21 Kanuka aiyuun keapu Yakob atwanare, abu kilipak odwe luka Yosep kere iarei arereŋ, koma, kokukumi kakou naka ebelake. 22 Kanuka aiyuun keapu Yosep atwanare abu kiner nuka anyoun naka idwe luka Isirael, kicorak da nuka akojoke. 23 Kanuka aiyuun nakeuriere Musa, apotu ikauriakake kimunonata ŋes ilapio iuni, naarai aanyunito ebe itemelel ikoku; komam ekuriaka aicorakinet naka ekabaka. 24 Kanuka aiyuun nakepoloor Musa, kogir anyarao okoku loka apese naka Parao, 25koseu aikonakinio erono nepepe kituŋa luka Edeke itia aitalakara kotoma aronis naka apak naedit. 26 Koomite amorosit naka Kristo araut abar naepol itia iboro luka akais nuipu luko Misiri, naarai abu kosesen aropio. 27 Kanuka aiyuun abu konyou ko Misiri, komam ekuriana adedeŋ naka ekabaka; naarai abu konirik bala eanyuni lomam etakani. 28 Kanuka aiyuun abu koricite Aleleŋ ka aibwat aokot kinyek Ekamudiaran ikiyaik atiror kes. 29 Kanuka aiyuun apotu kitoroto Aŋolol Nakareŋan bala akwap naeonit; konye naketamakiniata Imisirian aitor nen, kolumosi. 30 Kanuka aiyuun kotiyaros arwatatin nuka Yeriko, nakedaunere airimor apaarasia akanykaarei. 31 Kanuka aiyuun mam Rakab naadote emudiara nepepe ka lumam erimasi, naarai abu kisukunyik ikarotak kainapakin. 32 Kener anyoika bobo? Naarai mam apak kelosikino arai kalimok nuka Gideon, ka Barak, ka Samuson, ka Yeputa, ka Daudi, ka Samuel ka inabin da,— 33 lukipikorete ajakanuto kanuka aiyuun, kiswamata adolit, kodumut aisumuneta, kitubutaasi aituke nuka iŋatunyo, 34 kitojonata apedor naka akim, kokuata akwanis naka ekileŋ, kisipedoroi nakekalanyakatar, koraut lukagogoŋ kotoma ojie, kitekerata ajoresio nuka lukacekwapin. 35 Apotu aŋor kodumut lukatwakakec kotoma aitajarunio, konye ice aponi kisiriebai kaibworit, komam ecamunete ayuunio, tetere edumunete aitajarunio naejok adepar. 36 Aponi ice kitemoi kaisekelio ka aleio, eebo, kiton aeneta ka aidaris da. 37 Aponi kibiribiroi kamor, kotuboi kimusumenon, kitemoi, aponi koarai kekileŋ; apotu kirimirimoto enapito imukulen luka imerekekin ka luka akinei; apotu kilwaritos, ereitai, kikonakinitai erono,— 38ituŋa lumam ebusakinit akwap, apotu kilokidaete kamodiŋo, ka oroŋan, ka abuai ka apanya da nuka akwap. 39Ituŋa ŋul kere da nakedaunere aitejenun kanuka aiyuunikec, mam edumuna aisumunet, 40naarai abu Edeke kojenikinite ibore yenejok aitelekarit kanuwok, tetere ŋul mam itodolikinio komam oni.

12

1 Aso naarai kilukunit oni kere elisina loepol loetia nen, loka ikajenak, kalacasi ŋinibore kere yenelaŋir; adiakar da naepatanikinit aigogo leonor oni, kaboloboloto katitiŋ epeget loibwaikinitai kakonyenewok, 2 kasesenete Yesu, ekagean ka eketodolon loka aiyuuniwok, loabu kotitiŋik emusalaba, komen ileic, kanuka aiyalama naebwaikinitai kakonyeneke, iboie kakan nakoteten naka eicoloŋ loka Edeke. 3 Koomoomata do noi ŋol loketitiŋikini asurup naetia nen naka ikadiakanarak kanukeŋ, kinyeis aipas, kiiloros kotauonokus. 4Mam ber ijiito kiton abukor aokot, iwutas kadiakar. 5 Bobo kimurwok aicor, nainera kayes kwape odwe ebe, “Okokuka, sirimwaŋenenei alecor naka Ejakait, Kwabo sirikiilor nakiriemeriemaa ŋesi. 6 Naarai elecori Ejakait yenemina, Elei da ŋinikoku yenecamunit ŋesi.” 7Kanuka alecorio ititiŋikinete. Kiswamakini yes Edeke kwape odwe; naarai ikoku inyoin yenimam papake elecori? 8 Aso arai mam kilecorio, naimorikikinit kere, kwaŋin iraas lukiwurikinitai okal! kwabo mere odwe. 9 Bobo da ajaas oni lukapapawok luka akuan lukiileconorete, oni da kayoŋito kes. Mam itelekarit noi oni anonokikin Papa loka imoyon, kajara da? 10Naarai apotu kesi koleconorete oni apaarasia nuikidioko, kwape kekototor, konye ŋol kilecori kanuka ajokis tetere kimori alauniteke. 11 Alecorio kere naka apak kana mam esubit bala nakaiyalama, dimarai nakican; konye kokau erai araito nuinapakina nuka adolit, kama kaŋul kaluituutooritai kaŋin. 12 Kanuka ŋun koriosi yesi akusikanin nuekalanyaka, kitogogoŋoto da akusikuŋin nuilejekekas, 13 kiswamakis akusikejen irotin luitenara, kinyek yeneŋwalit aitapaario, konye gwai kitaŋaleunoi. 14 Kotupata ainapakin nepepe kituŋa kere, ka alaunite da, neemamea ŋin emamei yeneanyuni Ejakait. 15 Koanyanasi ebe emamei yeneolikinit asianut naka Edeke; kinyek “Aliasit naka adwaris” alibun ka aitican yes, kosodete luipu amunaar; 16 kinyek idiotuŋanan araun yenidote arai yenimam eyoŋit Edeke kwape Esau, loabu kogwela apolouke naka ekiyai kanuka adutunet adiopet naka inyamat. 17 Naarai ijenete ebe akaulo kaŋun, naakotor airum arereŋ, aponi kogiroi, naarai mam abu kodum apak naka aitoronikin, karaida abu komoote noi kakiyo. 18 Naarai mam idolokinito emoru loepedorio atirorio, loenoki da akim, karaida neejai amuton naejesi cucucuc, ka idouon luitolimakito, ka ekwam, 19 ka aruo naka arupepe, ka eporoto loka akiro, luapupete apotu kiŋaiŋaata sirikelimokin kes bobo acekirot. 20 Naarai mam apotu kopedosi atitiŋikin akirot naecorakinio ebe, “Arai ketiro itiaŋ emoru ŋol ibiribirio kamor.” 21 Ido kerai naetakani nasogim kwaŋin, abu Musa da kobala ebe, “Akurianari noi, amaran da.” 22 Konye idolokinito Emoru Sion ka ere loka Edeke lokajaran, Yerusalem lokotoma akuj, kaneejaas ajoresio nuka imalaikan lumam imarunos, 23 ka atukot naka ikiyaik luiwadikatai toma akuj, ka neejai Ekatubon loerai Edeke loka kere, ka neejaas imoyon luka ikadolitok luitodolikinitoi, 24 ka neejai Yesu, ekadiekan loka aitutuket nakitetet, ka neejaas aokot nubwatan nuinerasi nuejok aitelekarit kwa nuka Abel. 25 Kocoito ebe mam iŋerete ŋol loinera. Naarai arai mam apotu kokuata nakeŋerioto ŋol loekwenyari kes ejai akwapin, kitelekari noi oni amamus aiku, arai kiŋeri ŋol loikwenyari ejai toma akuj. 26 Abu eporotoke kitamaran akwap kapak kaya, konye isumuni kwana ebe, “Irwan atipet bobo ejaŋakini, mere akwap bon, konye akuj da.” 27Konye akirot ŋin ebe, “Irwan atipet bobo,” itejenuni alemario naka ŋul luitamaranio, kwape luesubitai, tetere esalete lumam itamaranio. 28Kanuka ŋun naarai kidumuni ajakanut namam itamaranio, kajaas kasianut, nakijaanakinia Edeke aijaanakin naitojokit ŋesi, nepepe kayoŋit ka acoit; 29 naarai erai Edekewok akim naenyamiari.

13

1 Kojaenena amin iinacan. 2 Sirikiimurwokis aisukuny ipejok, naarai kanuka ŋin apotu ice kisukunyikis imalaikan komam ejenete. 3 Kiitunito ienan, bala kienitai nepepe kakes; ka luiswamakinitai erono, naarai ijaas yesi da toma akuan. 4 Kitubusikis ituŋa kere adukokin, ejam da korai lomam emunaara; naarai etubokini Edeke ludotea ka lueelosi. 5 Kidaras kinyeis amin apesan, kodaut luijaatar; naarai abu ŋesi elopet kobala ebe, “Mam ketukurwori jo cut, karaida aijal.” 6 Ŋes kinerar katitiŋ ebe, “Ejakait ŋes erai ekeŋarakinanika, Mam akurianari, Inyo bo epedori ituŋanan aiswamakin eoŋ?” 7 Kiitunito ikeŋarenikinokokus, lukilimonokinete akirot naka Edeke; koŋicete noi esaŋe loka ejautenekec, korokosi aiyuunikec. 8 Erai Yesu Kristo ŋopeŋol bian ka lolo, ido kiton ikar kere. 9 Sirikiyananario kaisisianakin nakiponesio luipu naegelara; naarai ejok aitogogoŋ etau kasianut, kwabo mere kanuka inyamat, lumam apotu kiŋarakis ŋul lualosioto. 10 Ejai oni etem loemamei luijaanakinete ewema apedor ainyam iboroke. 11 Naarai itiaŋ lueyaŋaari esasedoti lopeti aokotokec toma aibois nakalaunan kanuka adiakar, icweio awatekec kokiŋ kiidukurun. 12 Kanuka ŋun Yesu da, abu korieba kokiŋ kerute, tetere italauni ituŋa kaokotoke elopet. 13 Aso kalomasi oni da mamakeŋ kiŋa kiidukurun, kebwokitos amorositike. 14 Naarai emamei oni ere loeperonori kane, konye kimoot je loekot ajaun. 15 Aso kainanakis Edeke asubanit naka aiturit tiritir kotomakeŋ, ŋes araito nuka aituke nuelimorete ekekiror. 16 Konye sirikimurwokis aswam ejok, ka aimor luijaatar, naarai itojokit Edeke asuban nuikote nen. 17 Korimarito ikeŋarenikinokokus, kononokikinito da; naarai ekwenyete ŋul kanuka aijarakus, kwape luinyakunete akirot; tetere iswamaete ŋun kaiyalama kwabo mere keidiny; naarai timam ŋin kiiŋarak yes. 18 Kilipanakinai sio, naarai kitogogoŋit ebe kija kaomisio nuejok, kikoto ajaut kiponesio luejok kotoma akiro kere. 19Ido aitelekarit noi keŋaiŋait yes aikonenen nen, tetere kenyakunio katipet mamakus. 20 Konye Edeke lokainapakin, loetoboŋuni Ejakaitiwok Yesu Kristo kokatwak, ekecokon lokapolon loka amerekekin, kanuka aokot nuka aitutuket naka ikar kere, 21kitodolik yes kotoma kaŋinikirot naejok, tetere iswamaete nuekot ŋesi, kiswamai ŋesi da kotomakus naitojokitai kakonyeneke, kanuka Yesu Kristo; kojai aibuses mamakeŋ ikar ka ikar. Amen. 22 Konye iinacan, keŋaiŋait yes, koŋirikis akirot naicori, naarai kewadikakinit yes kanuesupaaka. 23Kojenutu ebe alacakin onacewok Timoteo. Arai kebu ŋol katipet, kaanyuni yes nepepe kaŋes. 24Kiyogaete ikeŋarenikinokokus kere, ka lukalaunak da kere. Kiyogaete yes luko Italia. 25Asianut kojai kayes kere, Amen.

AMAZING GRACE BIBLE INSTITUTE