Igalatian11 Paul ekiyakia-mere kama kituŋa, karaida kanuka ituŋanan, dimarai kanuka Yesu Kristo ka Edeke Papa lokitajaruni ŋes kokatwak— 2ka iinacan kere luejaas nepepe keoŋ. Mama ejaas ikanisan luka Galatia: 3 Asianut kojai mama ijaas ka ainapakin nuepote kama ejai Edeke Papawok, ka Ejakait Yesu Kristo, 4 loabu koinakin kanuka adiakanaretawok, tetere kiyuuni oni kama kikar kalu lueroko kwape ejaar akot naka Edekewok ka Papa; 5kojai aibuses mama ejai ikar ka ikar, Amen. 6Aumok eoŋ ebe isunyito yesi kwaŋin aibwot kama kaŋol lokinyaraunit yes kotoma asianut naka Kristo, mama ejaas Akiro Nukajokak ace— 7 numam eraas ace, konye ejaas icetuŋa luiticanete yes, luekotosi aibelokin Akiro Nukajokak nuka Kristo. 8 Konye arai sio da arai emalaika loebuni kotoma akuj, kilimonok yes Akiro Nukajokak nuegelara ka ŋun nukipou kalimonokisi yes, korau loikenitoi. 9Kwape kipou kalimokiniata sek, kwana da alimokini bobo, arai kilimonokini yes ituŋanan Akiro Nukajokak nuegelara kaŋun nuipotu kocamut, korau yenikenitoi. 10 Naarai ejodouni kereka eoŋ ituŋa, arai bo Edeke? Arai bo amoot kereka eoŋ aisiyalamikin ituŋa? Arai ariŋa esiyalamikinit ituŋa timam karau ebulesit loka Kristo. 11Naarai iinacan, akoto yes ajenun ebe Akiro Nukajokak nuabu eoŋ kalimonok, mam keraas kopone loka ituŋanan, 12Naarai mam abu kadum kes kama kituŋanan, kwabo mam kesisianakinitai, dimarai kotoma apukokinio naka Yesu Kristo. 13 Naarai ipotu kiirasi kwape kekonitor sek kodini loka Iyudayan, kwape kareitor noi noi ekanisa loka Edeke, kamuna da ŋes. 14 Ido abu keyatakin kodini loka lyudayan adepar luatumunete nepepe keoŋ luka atekereka, kekokotikinite noi jokan iponesio luka lukapapaaka. 15 Konye Edeke loabu katiaku eoŋ ameun kakoik naka totoka, kanyaraun da kanuka akesianut, 16 nakisiyalamikinitor apukokin eoŋ Okokuke, tetere alimonokini ŋes mama ejaas Imo; atipet mam enerunit kakuan ka aokot, 17karaida adokar Yerusalem mama ejaas ŋul lukageikinito eoŋ araun ikiyakia, konye abu kalot Arabia, kasodi konyet aboŋor Damasiko. 18 Kosodi akaulo naka ikar iuni abu kadoka Yerusalem, aipejokin Kepa, abu kasal kaŋes apaarasia atomon kanukany. 19 Konye mam abu kaany ice kokiyakia, dimarai Yakob onac loka Ejakait, 20(Nukewadikak yes, koany, kakonyen nuka Edeke mam eŋalai!) 21 Kasodi alosit atutubena nuka Suria ka Kilikia, 22Ido komam ejenuna akakonyen kokanisan luko Yudaya lukejaas toma Kristo, 23konye apotu kiirasi bon ebe, “ŋol lokireit oni sek, elimonokini kwana aiyuun ŋin nalem emunaarit,” 24Kitopoloosi da Edeke kanukaŋ.21 Kosodi akaulo naka ikar itomon kaluoŋon abu kadoka bobo Yerusalem, nepepe ka Baranaba, kayaŋaasi da Tito nenipe kasio. 2 Konye abu kadoka kanuka apukokinio; ido abu kapesik kes Akiro Nukajokak nualimonokinit Imo, konye kaiyeiyea kakonyen nuka ŋul kaluecamunitai, kenyek asubit bala akeri, arai bo abu kaker atitai. 3 Konye Tito da lokijaa keoŋ, karaida erai Eyonanit, mam kitiŋaikinitai akepio. 4 Konye kanuka iinacan lukeŋalak lukitolomunitai kaiyeiyea, lualomunito airot aosikiniowok nakijaar kotoma Kristo Yesu, tetere kitubulesenete oni, 5 mam kipou kacamut anonokikin kes nepecep da, tetere kisalakini yes abeit naka Akiro Nukajokak. 6 Konye kama kaŋul kaluecamunitai araut lukapolok, (kwape ejaatar kesi, mam eoŋ apodo; mam Edeke etiaki kotuŋa), mam ŋul luecamunitai apotu keyatakis eoŋ adiokirot, 7 konye kepuwai nakeanyuniata ebe aponi ketitiŋi Akiro Nukajokak alimonokin lumam ekepitai, kwape Petero da luekepitai, 8(naarai ŋol loiswamakinit Petero ekiyakiane mama ejaas luekepitai, ŋes keswamakinit eoŋ da mama ejaas Imo,) 9 nakejenuniata da asianut nakainakinitai eoŋ, apotu Yakob, ka Kepa, ka Yokana, luecamunitai araut ipirin, kainakis eoŋ ka Baranaba akan nakoteten naka eidicane, tetere kilosi isio mama ejaas Imo, konye kes mama ejaas luekepitai. 10 Konye kokotosi sio aiitunite, lukican, akirot ŋin da nakadunyakinit aswam. 11Konye nakebunio Kepa Antiokia, abu kerebok ŋes atereikina, naarai kitelekarito ŋes akiro. 12 Naarai eriŋa ituŋa ice epona kama ka Yakob, abu komor ainyam nepepe ka Imo; konye nakedolunioto kesi, abu kikunya kogitar bon, ekuriana luekepitai. 13Kijoseikis da lyudayan ice kere nepepe kaŋes, kiton Baranaba da ayaŋaario kesoswaikec. 14Konye naabu kaanyunia ebe mam kes etenete kabeit naka Akiro Nukajokak, abu kalimok Kepa kakonyenekec kere ebe, “Arai jo loirai Eyudayat, itupi iponesio luka Imo, kwabo mam itupi luka Iyudayan, ikwaikini ai itiŋaikini Imo atupar iponesio luka Iyudayan?” 15Isio lukirai Iyudayan kauruunet kwabo mere Imo lukadiakanarak, 16 konye kijeni ebe mam ituŋanan itojokio araun yenedolit kanuka aswamisio nuka ikisila, dimarai kanuka aiyuun Kristo Yesu, isio da kipou keyuut Kristo Yesu, tetere kitojokio araut luedolito kanuka aiyuun Kristo, kwabo mere kanuka aswamisio nuka ikisila; naarai kanuka aswamisio nuka ikisila emamei yenejai akuan yenitojokio araun yenedolit. 17Konye arai nakimootor aitojokio araun lukidolit kotoma Kristo, kitakanuni kirai ikadiakanarak, erai kereka Kristo ekejaanakinan loka adiakar? Madi akuj! 18Naarai arai aduki bobo ŋun nuabu kamudia, etogogoŋi ebe arai ekebucaran. 19 Naarai kanuka ikisila abu eoŋ katwana mama ejaas ikisila, tetere ajari mama ejai Edeke. 20 Aponi kebubukin nepepe ka Kristo; konye ajari, kwabo mere bobo eoŋ, konye ejari Kristo kotomakaŋ; aijar da naajaria kwana toma akuan, ajari toma aiyuun Okoku loka Edeke lokamina eoŋ, lokijaikin bon da kanukaŋ. 21Mam etapalauni asianut naka Edeke; naarai arai ejai adolit kanuka ikisila, aso atwana Kristo atitai.31Okwe yes Igalatian luemamei acoa! Iŋai bo kilemelem yes, luaponi Yesu Kristo kolimonokinai kaitebeikin kakonyenekus? 2Akoto aisisia akirot na bon kamakus; Idumut kereka Emoyo kanuka aswamisio nuka ikisila, arai bo kanuka aiirar kaiyuun? 3Iraas kereka luemamei acoa kwaŋin? Naigeuniata ka Emoyo, iŋetakinete kereka kwana kakuan? 4Iriebas nuetia nen atitai?—arai bo erai atitai. 5Ŋol lokiinakini yes Emoyo, loiswamai da nukapedor kotomakus, iswamai kereka kanuka aswamisio nuka ikisila, arai bo kanuka aiirar naka aiyuun? 6 Kwape kiyuunitor Aburaam Edeke, ido kimarakinai ŋes araun adolit. 7 Aso kojenutu ebe ŋul luka aiyuun, kes eraas odwe luka Aburaam. 8 Kwabo naki wadikatai naeanyunia sek ebe itojoki Edeke Imo araun luedolito kanuka aiyuun, abu kolo kolimonok Aburaam Akiro Nukajokak ebe, “Isirereŋio atekerin kere kotomakon.” 9 Aso ŋul luka aiyuun isirereŋitoi nepepe ka Aburaam lokerai ekeyuunan. 10 Naarai kere lueraas luka aswamisio nuka ikisila ikenitoi; naarai iwadikatai ebe, “Kikenoi ŋin kere yenimam ericenenei akiro kere nuiwadikatai oitabo loka ikisila, aiswamaenen kes.” 11 Aso idelelei ebe emamei ituŋanan yenitojokio kakonyen nuka Edeke kotoma okisila; naarai ebe, “Ejari ikadoliton kanuka aiyuun.” 12 Konye ikisila mam eraas kanuka aiyuun, konye ebe, “Yeniswamai kes ejari kanukec.” 13 Abu Kristo kolaku oni kama kekenit loka ikisila, nakeraunia ekenit kanuwok, naarai iwadikatai ebe, “Kikenoi ŋin kere yenikajakinitai okitoi.” 14Tetere edoikini Imo arereŋ naka Aburaam toma Yesu Kristo, tetere kidumuni aisumunet naka Emoyo kanuka aiyuun. 15Iinacan, enera kopone loka etuŋanan; emamei yenitapalauni aitutuket naka ituŋanan naitogogoŋitere, karaida aiyat akiro. 16 Aponi kolimokinai Aburaam aisumuneta, ka aurike da. Mam inera ebe, Auriarikon, bala keraas luipu, dimarai bala kerai ediopet, “Aurikon”, ŋes Kristo. 17 Konye naenera nata ebe, mam ikisila itapalaunito aitutuket naitogogoŋit Edeke sek ikaru akwat aoŋon ka akaisauni eriŋa ikisila ejauna, ŋes mam itamamauniata da aisumunet. 18 Naarai arai kerai airumet kanuka ikisila, mam bobo erai kanuka aisumunet; konye abu Edeke koinak Aburaam airumet kanuka aisumunet. 19 Aso inyo bo ikisila? Aponi kiyatakinai kanuka aibucanareta, kiton naebunio aur nakisumunitere; kicorakinitai kanuka imalaikan kakan naka ekadiekan, 20Konye ekadiekan mam erai kanuka ediopet, kwabo erai Edeke ediopet. 21 Aso esurokinete kereka ikisila aisumuneta nuka Edeke? Madi akuj! Naarai arai keinakinitai ikisila luepedorete ainakin aijar, abeit tikerai adolit kanuka ikisila. 22 Konye agoloki naiwadikatai iboro kere toma adiakar, tetere einakinio luiyuunito aisumunet kanuka aiyuun Yesu Kristo. 23 Aso eriŋa aiyuun kebuno kiyaito ikisila kigolokinitoi kiton naepukorere aiyuun, 24ŋes eraatar ikisila ekeŋarenikinoniwok mama ejai Kristo, tetere kitojokio araun luedolito kanuka aiyuun. 25 Konye kwana adolu aiyuun mam bobo kiyait ekeŋarenikinon. 26 Naarai iraas kere odwe luka Edeke kanuka aiyuun kotoma Kristo Yesu. 27 Naarai yes kere lukibatisatai kotoma Kristo, inapata Kristo. 28 Emamei Eyudayat karaida Eyonanit, emamei ebulesit karaida loijakakai, emamei lokiliokit karaida naberu, naarai iraas yesi kere idiopet kotoma Kristo Yesu. 29 Ido arai iraas luka Kristo, aso iraas aur naka Aburaam, ikerumak da kwape ejaar aisumunet.41Konye abala ebe ekeruman naeriŋar erai ikoku, emamei atiaketait ka ebulesit, karaida kerai ejakait loka kere; 2konye eyaito ŋes ikedarak ka ikeŋadak aitodol apak naetetemit papake. 3 Oni da kwape kwaŋin, nakirokor kirai idwe, karaas ibulesin luka kanugeet nuka akwapin. 4 Konye naadolio apak naabeit, abu Edeke kijuk Okokuke, lokewuruuni aberu, lokewuruunio koyaito ikisila, 5 tetere elakuni ŋul lukeyaito ikisila, tetere oni kitaraunio odwe, 6 Ido naarai iraas odwe, abu Edeke kijuk Emoyo loka Okokuke otauonowok, loiworoi ebe, “Abba, Papa!” 7 Kanuka ŋun mam bobo irai ebulesit dimarai okoku, ido arai irai okoku, aso irai ekeruman kanuka Edeke. 8Konye apak ya namam ijeniata Edeke, ipotu koraas ibulesin luka ŋul lumam eraas idekesio kauruunet; 9konye kwana ijenut Edeke, konye aitelekarit ajenu Edeke yes, ikonakinete ai iboŋorete bobo mama ejaas nugeet nuekalanyaka ka nukibakor nuikotosi yesi kitubulesenoto bobo? 10 Iricito apaarasia, ka ilapio, ka apakio ka ikar da! 11 Acoikinit akaitaaritoi kamakus kinyek araun natitai. 12 Iinacan, keŋaiŋair yes, koraut kwape kaeoŋ, naarai arau eoŋ da kwape kayesi. Mam ipotu kikonakis erono kakirot kere; 13 konye ijenete ebe abu kalimonok yes Akiro Nukajokak irwan nasodit kanuka akalanyanut naka akuan; 14 ido karaida akakuan kerai acodunet kamakus, mam ipotu komwaŋata, karaida aiŋer eoŋ, konye ipotu kisukunyikis eoŋ kwape emalaika loka Edeke, kwape Kristo Yesu. 15Aso ani bo akusiisirereŋikino? Naarai etogogoŋit nukus ebe, arai kepedor tikigorununut akusikonyen, koinakis eoŋ. 16 Arau kereka lokasurup kamakus kanuka alimonokin yes nukabeit? 17 Kikokotikinitos yes konye mere kotoma ajokis, dimarai kikotos agolor yes kiŋa, tetere yes ikokotikinete kes. 18Konye ejok aikokotikinio duc kanuka akirot naejok, kwabo mere apak nakijaar eoŋ kayes bon. 19 Ikadwe, luariebar bobo bala nakedounon, aitodol naesubunere Kristo kotomakus, 20konye tikemuit ajaut kayes kwana, aijulakin ekaporoto, naarai abuonokin kanukus. 21 Kolimokinai, yes luikotos koyaito ikisila, mam kereka ipupete ikisila? 22 Naarai iwadikatai ebe ajaas Aburaam odweke iarei, ediopet loka abulesit, ediopet da loka naijakakai. 23 Konye ŋol loka abulesit keurio kwape ejaar akuan, konye loka naijakakai kanuka aisumunet. 24 Akiro ŋun eraas aput: naarai eraas aŋor ŋun aitutuketa aarei. Ebuni adiopet komoru Sinai, naeuriei kanuka ebulesene, ŋin ŋes Kagar. 25Kwabo Kagar na ŋes erai emoru Sinai kotoma Arabia; erianas ka Yerusalem loka tinenikwana; naarai erai ŋesi abulesit nenipe kikedwe da. 26 Konye Yerusalem lokokuju ŋes naijakakai, ŋes ŋin totowok. 27 Naarai iwadikatai ebe, “Kolakar ijo arakan namam iwuriei, Kodelo, kiworo ijo namam irieba aidoun, Naarai ipu idwe luka naejalakinitai aitelekarit luka ŋin naejai ekiliokit.” 28Konye iinacan, kirai oni idwe luka aisumunet, kwape ka Isaak. 29 Konye kwape kolo abu ŋol loawurio kwape ejaar akuan koreitor lokeurio kwape ejaar Emoyo, kwape kwaŋin kwana da. 30 Konye ebala ai naiwadikatai? Ebe, “Kireŋea abulesit ka okokuke, naarai mam okoku loka abulesit irumete kikoku loka naijakakai.” 31 Aso iinacan mam kirai idwe luka abulesit, dimarai luka naijakakai.51 Kotoma aosikin ŋin abu Kristo koosik oni; kanuka ŋun kicata, kwabo sirikilomasi bobo ajookot naka ebulesene. 2 Koany, eoŋ Paul kalimokini yes ebe arai kiikepi, mam Kristo kitudumikini yes ajokis. 3Konye etogogoŋi bobo ebe ŋinituŋanan yenekepitai itepesenitai aitodol ikisila kere. 4Kitiakar kama ejai Kristo, yes luikotosi aitojokio kanuka ikisila; ibiroros ainyein asianut. 5Naarai oni kotoma Omoyo kidarete amun naka adolit kanuka aiyuun. 6 Naarai kotoma Kristo Yesu mam akepio epedori ibore, karaida amamus akepio, dimarai aiyuun naiswamai kanuka amin. 7Ikerete lem ejok, iŋai bo kitikokinit yes arimar abeit? 8 Aijodijod ŋin mam kebuni kama kaŋol lokinyarit yes. 9 Aitubuunet naedit itubuuni aluŋuret kere. 10 Ejai eoŋ amun mamakus kotoma Ejakait ebe mam ijaunete kaomisio ace, konye ŋin kere yenikisiyaloŋoŋoi yes, ebeikini aketubokinio. 11 Eoŋ da, iinacan, arai eriŋa alimonokini akepio, kanukinyo eriŋar kareitere? Kwaŋin alemar ekomio loka emusalaba. 12 Arai kepedor ŋul lukiticanete yes tikegitaros! 13 Naarai iinacan, aponi konyaraun aosikinio; konye aosikiniokus kinyek araun naisigalikini akuan, konye kijaanakinos kanuka amin. 14 Naarai itodolikinio ikisila kere kotoma akirot adiopet, ŋes nata ebe, “Komina iidunyetekon kwape iminar bon.” 15Konye arai ikonyokonyas, inyamas, kocoito kinyeis amudianar bonik. 16Konye abala nata ebe, Kolosenenete kotoma Omoyo, kwabo siritodolete nuimiela akuan. 17 Naarai imiela akuan asurokin Emoyo, Emoyo da asurokin akuan; naarai eutasi bonik; kanuka ŋun mam ipedorete aswam nuikotosi. 18 Konye arai kiŋarenikinit Emoyo, mam kiyaito ikisila. 19 Aso ideleleete aswamisio nuka akuan, kes nupenu: adoteu, asilianut, abenyanut, 20aima aputosia, ecudet, asurup, epeget, ekokote, anyunyura, aŋolopa, atiakara, irioŋeta, 21 alilit, emeret, eraŋa, ka nuikote nen da. Kotoma kaŋun kekwenya yes kwape abu kekwenyaritor ebe, luiswamaete nuikote nen mam irumete ajakanut naka Edeke. 22 Konye araito nuka Emoyo kes nupenu: amin, aiyalama, ainapakin, atitiŋikin, asianut, ajokis, aiyuun, 23 aiyapepera, aitikokina; emamei ekisil loisimiki nuikote nen. 24 Ŋul da lueraas luka Kristo Yesu apotu kibubukis akuan nepepe ka aiŋobeleke ka eimielike da. 25 Arai kijari kotoma Omoyo, kalosenenete da kotoma Omoyo. 26 Sirikiiturokin atai, sirikiitunyunyuranakin, sirikiijau da kalilit bonik ka bonik.61 Iinacan, arai kedumun ituŋanan ibucarit, yes luiraas luka Emoyo kiteteut yenikoni nen komoyo lokaiyapepera. Koŋica bon, kinyek Ijo da acodunio. 2Kodakenenete nuelaŋirikinito ice, kwaŋin itodolete ikisila luka Kristo. 3Naarai arai ewomit idiotuŋanan ebe erai ibore, kwabo mam erai ibore, iŋala bon. 4 Konye kitem ŋinidiopet akeswam, kosodi konyet ejai naeoloboboo kanukeŋ, kwabo mere kanuka yenice. 5 Naarai edaki ŋinidiopet abwokonike. 6 Konye komorata yenisisianakinio akirot nepepe ka yenisisianakini kajokisio kere. 7Sirikiŋalas; mam Edeke isekelio, naarai lueyei ituŋanan, ŋupeŋul esaki da. 8 Naarai yeneyeikini akuanake, esaki aibos; konye yeneyeikini Emoyo, esaki aijar naka ikar kere. 9 Kenyeis aitapalikina aswam nuejok, naarai kedol apakike kisaki, arai mam kiilor. 10 Aso naeriŋar oni apak ejai, keswamanakisi ituŋa kere ajokis, ido aitelekarit ŋul lukokal loka aiyuun. 11Koanyutu kewadikak yes inyukuta luepolok luetia nen kakanika. 12 Ŋul luekotosi atakan ejok toma akuan, ŋupeŋul kitiŋaikinete yes akepio, konye kinyeis areio kanuka emusalaba loka Kristo. 13Naarai luekepitai mam ikulepek ericete ikisila, konye ekotosi yes akepio tetere eoloboboete kotoma awatekus. 14 Konye eoŋ madi akuj eoŋ aolobob, dimarai kotoma emusalaba loka Ejakaitiwok Yesu Kristo, lokotomakeŋ kibubukinio akwap kamakaŋ, eoŋ da kama kakwap. 15 Naarai akepio mam erai ibore, karaida amamus akepio, dimarai yenisubat yenikitetet. 16 Ido ŋul kere luelosenenete koikor kalo, kojai ainapakin ka aitim mamakec, ido mama ejai Isirael loka Edeke. 17 Ameari kwana kinyek idiotuŋanan aitican eoŋ; naarai adakit eoŋ imacarin luka Yesu kotoma akuanaka. 18Iinacan, kojai asianut naka Ejakaitiwok Yesu Kristo kimoyonokus. Amen. |