Ephesians
Ipeson
1
1
Paul ekiyakia loka Kristo Yesu kanuka akot naka Edeke,
Mama ejaas lukalaunak luejaas Epeso, ka luiyuunito lukotoma Kristo Yesu:
2
Kojai asianut mama ijaas ka ainapakin nuepote kama ejai Edeke Papawok ka Ejakait Yesu Kristo.
3
Kituritete Edeke, Papa da loka Ejakaitiwok Yesu Kristo, lokisirereŋit oni karereŋ kere naka emoyo kotoma Kristo, toma aiboisio nuka akuj. 4
Kwape abu koseunia oni kotomakeŋ eriŋa kepesikina akwap, tetere kirauni oni lukalaunak, luemamei aitoronet da, kakonyeneke kotoma amin. 5
Abu kineru sek oni araut idwe mamakeŋ kanuka Yesu Kristo, kwape itojokitor akoteke, 6
tetere itopoloorio aibuses naka akesianut, nakikwamak oni kotoma Lominat. 7
Kotomakeŋ ŋes kidumunia alakunio kanuka akeokot, isioniei aibucanaretawok, kwape ejaar abar naka akesianut, 8
nakidilakini mamawok kotoma acoa kere ka acoit, 9
nakitejenikinia oni aiyeiyea naka akoteke. Abu kolo kitojok kwaŋin alosikinit kotomakeŋ, 10
kanuka aijokokinio nakokar naedolioto, aisimorikikin iboro kere toma Kristo, luejaas toma akuj, ka luejaas toma akwapin da.
11
Kotomakeŋ kiseunitai sek araut ikerumak kwape ejaar alosikinit naka ŋol loiswamai kere kwape inerunia akoteke, 12tetere kitopoloori aibusesuke lukigeikini amunokin Kristo. 13
Kotomakeŋ yes da luiirarito akirot naka abeit, Akiro Nukajokak nuka aitajariokus, luiyuunito kotomakeŋ, abu Emoyo Lokalaunan lokisumunitoi kipucak yes da aipucet. 14
Erai Emoyo ŋol aitogogoŋet naka airumetewok, kiton nealakunere lueraas luka Edeke, kitopolooroi akeibuses.
15
Kanuka ŋun eoŋ da, naapupunitor nuka akusiiyuun kotoma Ejakait Yesu, ka akusimin da mama ejaas lukalaunak kere, 16
mam enyeini aimal kanukus, eitununei yes kailipika, 17
ebe Edeke loka Ejakaitiwok Yesu Kristo, Papa loka aibuses, koinak yes emoyo loka acoa ka apukokinia ajenun ŋes, 18
kinwakenenai akonyen nuka itauonokus, tetere ijenunete amun kwape ejaar naka anyariteke, abar da kwape ejaar naka aibuses naka airumeteke kotoma kalukalaunak, 19
apolou da kwape ejaar naedeparit naka akepedor mamawok lukiyuunit, kwape ejaar aswam naka ailerit naka akegogoŋ, 20
nakiswamak Kristo nakitajarunia ŋes kokatwak, kisiboik da kakekan nakoteten kotoma aiboisio nuka akuj, 21
kuju noi adepar ayait kere, ka apolou, ka apedor, ka ejakaene, ka ekiror da kere loelimitoi, mere bon kokar kalu konye kaluepote da; 22
ido kitononokik iboro kere kwap kakejeneke, koinak da ŋes araun akou ayait iboro kere kama ka ekanisa, 23
loerai akekuan, aitekoro naka ŋol loitekori kere toma kere.
2
1
Ido kitajaru yes da, lukolo itwakito kanuka akusiibucanareta ka adiakanareta da, 2
nukolo kilosenenete kotoma, kwape ejaar epone loka akwapin kanu, kwape ejaar ekapolon loka apolou naka apak, emoyo loiswamakini kwana odwe luiulaka. 3
Kipou isio da kere kekonenenete nen kolo kotoma aiŋobel naka awatekosi, keswamaenenete nuekoto akuan ka aomisio, kirai koinono idwe luka anyunyura kwape kaluce da kere. 4Konye Edeke loebarit aitim, kanuka akemin naepol nakiminaar oni, 5
nakitwakitor kanuka aibucanaretawok, abu kituluo oni ikajarak nepepe ka Kristo, (itajarunitai kanuka asianut,) 6
kitonyou oni nepepe kaŋes, kisiboik oni nepepe kaŋes aiboisio nuka akuj kotoma Kristo Yesu, 7
tetere kokar luepote itodikini abar naedeparit naka akesianut kotoma ajokis naejai mamawok kotoma Kristo Yesu. 8
Naarai asianut ŋes kitajari yes kanuka aiyuun; kwabo mam kebuni kamakus, ŋes ainakinet naka Edeke, 9
mam kebuni kanuka aswamisio, kinyek ituŋanan kere aolobobotor. 10
Naarai kirai oni akeswamisio, nuesubunitai kotoma Kristo Yesu aswam aswamisio nuejok nukegeunia Edeke aitemonokin tetere kilosenenei kotomakec.
11
Kanuka ŋun kiitunito ebe iraas kolo Imo kotoma akuan, luenyarito ŋul luenyarakina bonik luekepitai, lumam ekepitai, ŋes atemar ebe, akepio naka akuan nakiswamaete akanin,— 12
kiitunito ebe kapak kaŋin amamei yes Kristo, igelara kajena naka Isirael, imo luamameete aitutuketa nuka aisumunet, amamei yes amun, amamei da yes Edeke kotoma akwapin. 13
Konye kwana kotoma Kristo Yesu yes lukolo kilwaka, kisukunyunitai die kotoma aokot nuka Kristo. 14
Naarai erai ŋesi ainapakiniwok, lokiituluorit oni kere ediopet, kotiyaik arwatat nakokidiŋ nakitiakit oni, 15
kitamamau asurup kotoma akuanake, ikisila luka aicorakineta kotoma apucuneta, tetere esubuni kotomakeŋ luarei araut etuŋanan ediopet lokitetet, kiswama ainapakin, 16
tetere itupuci da luarei kere mama ejai Edeke kotoma akuan adiopet kanuka emusalaba, nakearia ŋes elopet asurup. 17
Kosodi kobu kolimonok Akiro Nukajokak nuka ainapakin yes lukilwaka, ainapakin da lueapiete; 18
naarai kanukeŋ oni kere iarei kikunyakini Papa kotoma Omoyo ediopet. 19
Aso do mam bobo iraas Imo ka luiboiororos, konye iraas lukajen naka lukalaunak, ka lukokal da loka Edeke, 20
naarai aponi kodukokin apetetait naka ikiyakia ka inabin, kerai Kristo Yesu elopet amor nakapolon naka agor, 21
kotoma ŋol imorianakino aduketa kere, epoloor araun eyekalu lokalaunan kotoma Ejakait; 22
kotoma ŋol yes da kidukio nepepe araut aibois naiboio Edeke kotoma Omoyo.
3
1
Kanuka ŋun eoŋ Paul, eenat loka Kristo Yesu kanukus kImo,— 2
arai ipotu kiirasi nuka aijokokinio naka asianut naka. Edeke nakainakinio kanukus, 3
kwape ketejenikinere kapukokinio aiyeiyea kwape abu kewadikaa sek kanuesupaaka. 4
Naisiomiata nu ipedorete ajenun akamisianut nakotoma aiyeiyea naka Kristo, 5namam apotu odwe luka ituŋa kojenut katurio ace, kwape apukorere kwana mama ejaas ikekiyakia lukalaunak ka inabin da kotoma Omoyo; 6
ŋes atemar ebe eraas Imo ikerumak nepepe kasio, atutubeta nuka akuan adiopet, ka ikamorak da luka aisumunet kotoma Kristo Yesu kanuka Akiro Nukajokak.
7
Abu eoŋ karau ekejaanakinan loka ŋun, kwape ejaar ainakinet naka asianut naka Edeke nakainakinitai eoŋ, kwape ejaar aswam naka akepedor. 8
Kainakinitai eoŋ asianut na, loarai loadit noi adepar lukalaunak kere alimonokin Imo Akiro Nukajokak nuka abar namam imarun naka Kristo, 9
ka aitacaikin da ituŋa kere tetere eanyunete aijokokinio kwape ejaar nakaiyeiyea nakibwaitai ameun apeŋo kotoma Edeke lokesubi iboro kere; 10
tetere ejenunete ikayaitok ka lukapolou lukotoma aiboisio nuka akuj, acoa naka Edeke nakiponesio luipu, kotoma okanisa; 11
kwape ejaar alosikinit naka ikar kere nakelosikinit kotoma Kristo Yesu Ejakaitiwok. 12
Kotomakeŋ kija katitiŋ, kikunyakini da kamun, kanuka aiyuun ŋes. 13
Kanuka ŋun kelipit yes sirikitapalikinos kanuka aiticanioka kanukus, naerai aibusesukus.
14Kanuka ŋun akukonokin Papa kakuŋinika, 15kama emaikinere eipapaene kere loka akuj ka loka akwap da, 16
ebe koinak yes kwape ejaar abar naka akeibuses, aitogogoŋio kapedor kotoma Omoyoke toma otuŋanane lokotoma, 17
kiboienenei Kristo kotoma otauonokus kanuka aiyuun; tetere yes, icasete aliasiokus, iketakina da apetetaitikus, kotoma amin, 18
kogogoŋoros ajenun nepepe kalukalaunak kere kwape ejaar alalau, ka aojau, ka amukurur, ka aidules, 19
ka ajenun da amin naka Kristo naedeparit ajenunio, tetere itekoro kiton aitekoro kere naka Edeke.
20
Aso mama ejai ŋol loepedori aswam noi noi adepar kere nukilipi arai nukiwomit, kwape ejaar akepedor naiswamai kotomawok, 21kojai aibuses kotoma okanisa, kotoma Kristo Yesu da, kiton aturio kere ikar ka ikar. Amen.
4
1
Aso eoŋ eenat kotoma Ejakait, keŋaiŋait yes alosenen kwape ibusakinitor anyaraunio nakinyaraunere, 2
kaitasono kere ka aiyapepera da, katitiŋikin, koŋirionokinos kotoma amin, 3
kodunyakinito aricit eipeone loka Emoyo kotoma olomorut loka ainapakin. 4
Ejai akuan adiopet, ka Emoyo ediopet, kwape kolo kinyaraunere kotoma amun adiopet naka anyarauniokus. 5
Ejakait ediopet, aiyuun adiopet, aibatis adiopet. 6
Edeke ediopet, ŋes Papa loka kere, loeyait kere, loitorit toma kere, loejai da toma kere. 7
Konye aponi koinakinai ŋinidiopet kaoni asianut kwape ejaar aitemis naka ainakinet naka Kristo. 8
Ŋes ebalar ebe,
“Naadokaria kuju abu kijoreo ikijoreoro,
Koinak da ituŋa ainakineta.”
9
Akirot ŋin ebe, “Abu kodoka”, ŋes atemar ai dimarai ebe abu kijesar da ariino nukokwap noi nuka akwap? 10Ŋol loabu kijesar ŋes ŋopeŋol loabu kodoka kuju noi adepar akuj kere, tetere itekori iboro kere. 11
Ŋol da abu koinak ice araun ikiyakia, ka ice inabin, ka ice ikalimonokinak Akiro Nukajokak, ka ice ikecokok, ka ice da ikesisianakinak, 12
aitodolikinio lukalaunak kanuka aswam naka aijaanakin, kosodi akuan naka Kristo adukio; 13
kiton nepekidolio oni kere oipeone loka aiyuun, ka ajenun da Okoku loka Edeke, kiton nekidolio okiliokone loibecokino, kiton aitemis naka apolou naka aitekoro naka Kristo; 14
tetere mam kirai bobo imukerun luiriaŋiriaŋas, lukiyaŋanari ŋolikwam loka aisisianakin kotoma aimod naka ituŋa, kotute lokibotei luitapaarete. 15
Konye karicata abeit kotoma amin, kapolooros da adolore tomakeŋ kakiro kere, loerai akou, ŋes Kristo. 16
Tomakeŋ akuan kere kerucokin ka ainicakinio ejok kanuka aisigalikin naka ŋinikilenyasit, kwape ejaar aswam kotoma aitemis naka ŋinitutubet, kiyatanakini akuan apoloor kanuka aiduk kotoma aminanar.
17
Aso enera na etejenun da kotoma Ejakait, ebe, sirilosenenete bobo kwape elosenenoto Imo, kotoma aamameak nuka aomisiokec; 18
itumutonitai akececoa, egelara kotoma aijar naka Edeke kanuka aolit naejai tomakec, kanuka aninik naka itauonokec. 19
Erum kes esumerededek, aluŋakinos kes ikulepek toma abenyanut aswam nukasilianut kere kotoma airaŋaanut, 20Konye mam yes isisiato Kristo kwaŋin, 21arai ipotu kiirasi ŋes, ka aisisianakinio da kotomakeŋ, kwape ejaar abeit toma Yesu. 22
Kotoma akiro nuka iponesiokus lusodit, kolacasi etuŋanane lokolo, loebosi kanuka aiŋobel naka aiŋal, 23
ido kiteteunos kotoma omoyo loka aomisiokus, 24
konapata da etuŋanane lokitetet, lokesubio toma aput naka Edeke, toma adolit ka alaunit da naka abeit.
25
Kanuka ŋun kolacasi asabanut kinerenenasi abeit, ŋinituŋanan kikeidunyet, naarai kirai atutubeta ŋinidiopet kayenice. 26
Konyunyurasi, kwabo sirikidiakasi; kinyek akoloŋ alomar koriŋa inyunyurasi, 27kwabo sirikiinakis Satana apak. 28
Kinyek ekokolan akoko bobo, konye gwai kokokak aswam ejok kakaninike, tetere edumuni lueinakini yeniyarorotoi. 29
Sirikelomu adiokirot kere naebosit kaitukekus, dimarai naejok naeduki kwape ipudar, kosodi ainakin asianut ŋul luepupunete. 30
Ido sirikitakadikis Emoyo Lokalaunan loka Edeke, lokolo kipucakini yes aipucet kiton apaaran naka alakuniokus. 31
Kolemaros kamakus adwaris kere, ka anyunyura, ka adedeŋ, ka ecelet, ka ainyanakin, nepepe ka ameŋeranut kere, 32
koraas luisiaka bonik ka bonik, luitimonoros, ido kisionionoros, kwape kisionio Edeke da yes kotoma Kristo.
5
1
Aso koputorito Edeke kwape idwe luminan. 2
Kolosenenete da kotoma amin, kwape Kristo da kiminar yes koinakin elopet kanuwok, ainakinet ka asubanit da naeuru maa mama ejai Edeke.
3
Konye adoteu ka asilianut kere ka airaŋaanut sirielimitoi cut kotomakus, kwape ibusakinitor lukalaunak. 4
Kinyeis nukileic, ka eyala nukabaŋaanut, karaida aboliar akiro, numam ibusakinito; konye gwai aimalaenen. 5
Naarai ijenete yesi kabeit ebe emamei yenedote, karaida yenesiliana, karaida yeniranaana, ŋes yenemai aputosia, yenejaas kairumet toma ajakanut naka Kristo ka Edeke. 6
Kinyek ituŋanan aiŋalaŋal yes kakiro nuemameete, naarai kanuka ŋun ŋes ebunokinia anyunyura naka Edeke odwe luiulaka. 7Aso sirikimorianakinos kakes, 8
naarai iraas kolo amuton, konye kwana iraut aica kotoma Ejakait; kolosenenete do kwape idwe luka aica. 9Naarai araito nuka aica ejaas ajokis kere ka adolit ka abeit da. 10
Kitemete nuitojokit Ejakait. 11
Kwabo siridicasi kaswamisio numam eraete, nuka amuton, konye kitoronata kes. 12
Naarai erai nakileic alimit ŋun nuiswamaete kesi kaiyeiyea; 13
konye nuitoronit aica kere, etakanunete, naarai ŋinikirot kere naetakanunitai, ŋes aica. 14
Ŋes ebalar ebe,
“Kokweny, ijo yenijotoi, kojaru kokatwak, Kicaikini Kristo.”
15
Aso kocoito noi kwape ilosenenoto, mere kwape luemamei acoa, dimarai kwape luejai acoa, 16
koyuununete apak, naarai eroko apaarasia nu. 17
Kanuka ŋun siriraas ibaŋiok, konye kojenut nuekot Ejakait kwape ejaatar. 18
Kwabo sirimeranakinos ajon, naarai eyaunete iceleta; konye kilelebununos Emoyo, 19
kinerenenas kotoma osabulin, ka ikososinei, ka nupwakan nuka emoyo, koyeenenete, kituruonokinete Ejakait lueruos kotauonokus, 20
kimalaenenete Edeke Papa apaarasia kere, kanuka kere, kokiror loka Ejakaitiwok Yesu Kristo.
21
Kononokianakinos bonik kotoma ayoŋit Kristo. 22
Yes aŋor, kononokikis ikiliokokus kwape inonokikiniata Ejakait, 23
naarai ekiliokit ŋes akou naka aberu, kwape Kristo da eraar akou naka ekanisa, ŋes Eketajaran loka akuan. 24Konye kwape enonokikinitor ekanisa Kristo, kwape kwaŋin aŋor da kononokikis ikiliokokec kaŋinikirot. 25
Yes ikiliok, kominasi aŋorokus, kwape Kristo da keminar ekanisa koinakin kanukeŋ, 26
tetere italauni ŋes, kedau aitesegaar kailotar kakipi toma akirot, 27
tetere ijaikini ŋes elopet ekanisa lokaibuses, komamei akemer, karaida asukokinet, karaida ibore kere yenikoni nen, konye korai lokalaunan, loemamei aitoronet, 28Kwape kwaŋin da ibusakinit ikiliok aminenena aŋorokec kwape awatekec kikulepek. Loemina akeberu eminakina bon. 29Naarai emamei etuŋanan loelait akekuan elopet, konye itani ka aricit, kwape Kristo da iswamakinitor ekanisa, 30
naarai kirai atutubeta nuka akuanake. 31
“Kanuka ŋun ŋes inyeinia etuŋanan papake ka totoke da, kirotakinos kakeberu, kes da iarei eraunos adiopekuan.” 32
Epol aiyeiyea ŋin, konye enera nuka Kristo ka ekanisa. 33Konye ŋolituŋanan kayesi kominenena akeberu, kwape eminar bon, koyoŋitenenei aberu da okilenike.
|