Ekalimonokinan11Akiro nuka Ekalimonokinan, okoku loka Daudi, ekabaka kotoma Yerusalem. 2 Inera Ekalimonokinan ebe, Aamameak nuka aamameak; aamameak nuka aamameak, kere eraas aamameak. 3 Anyoin ameda naedumuni etuŋanan kaitaaritoike kere naetaaritor kokwap kakoloŋ? 4 Elosi atur, ebuni da atur ace; Konye iboienenei akwap ikar kere. 5 Elomuni akoloŋ, elomari da akoloŋ, Iwonyari alosit aiboisike neelomunia. 6 Elosi ekwam ari naka eŋalakimak, Kosodi aibelokin agolitomei; Ibelonokini ducuduc kalositoke, Eboŋori bobo toma airimorike. 7 Eleleete icorin kere toma aŋolol, Konye mam aŋolol ilelebun; Aibois naelosenenete icorin, Nepenen da elosenenete bobo. 8 Ileleba iboro kere aipas; Mam epedori etuŋanan alimun: Mam akoŋu imonikin asesen, Akit da mam eupi akiirar. 9 Nukejaas apeŋo kes nuejaunos rwaru; Nukiswamao apeŋo kes nuiswamao rwaru; Emamei ibore yenikitetet kokwap kakoloŋ. 10Ejai tope ibore yenebalas ituŋa ebe, “Koany, itet yen”? Kejau kolo ŋo kokaru lukigeikinete oni. 11Emamei aiitunet naka ikar lukolo ŋo: Mam ejaun da aiitunet naka ikar luekotosi aponare, Kotoma kaŋul kaluetupanakinete. 12Eoŋ Ekalimonokinan abu karai ekabaka loka Isirael kotoma Yerusalem. 13 Abu kebwaik ekatau amoot ka aŋicun kacoa kere nuiswamas kokwap kakuj; ŋes aitaaritoi naepol naabu Edeke kijaik odwe luka ituŋa aitaaritor. 14Abu kaany aswamisio kere nuiswamas kokwap kakoloŋ; ido koany, kere eraas aamameak ka ainyam ekwam. 15 Yenimagul mam epedori aitetenio: Yenemamei da mam epedorio aimar. 16 Abu keneru kotauka, katema atiar, “Koany, adum acoa naepol adepar kere lukageikinete eoŋ ko Yerusalem: eebo, adumu ekatau acoa naepol noi ka aijen.” 17 Abu kebwaik ekatau aijen acoa, aijen da ikerep, ka abaŋaanut: abu kajenu ebe eraas ŋun da ainyam ekwam. 18 Naarai toma acoa naepol ŋes ejai akadakin naepol: Ŋol da loiyatakini aijen iyatakini ican.21 Abu katema kotauka atiar, “Aso cani, etemi kalakara; aso kiyalamikin.” Ido koany, ŋin da kerai aamamean. 2 Abu katema nuka akiena atiar, “Ikerep”: ka nuka alakara da atiar, “Ajokis anyoin?” 3 Abu kamoote kotauka kwape etalakaria akakuan kebino, koriŋa ekatau keteteni eoŋ kacoa, ka epone da loekamunia abaŋaanut, kasodi ajenun nuibusakinito odwe luka ituŋa aswam kokwap kakuj apaarasia kere nuka aijarakec. 4 Abu keswama aswamisio nuepolok; abu kaduk itogoi; keraa da imanikoria luka emusabibu; 5abu keswama amanat ka ironyia, ido keraa ikito roma lukiponesio kere luka araito. 6Abu keswama ataparin nuka akipi, aicocoenenaa amagoro nakipepes ikito: 7 abu kagwel ibulesin ka abulesin, kaurikis da ibulesin kotogoka; ido kajaas kabar naepol naka isipanin luka aituk ka luka imerekekin, aitelekarit ŋul kere lukageikinete ko Yerusalem: 8 ido abu katukok epuesa ka esabu ka abar naka ŋinikwap naka ikabakan ka naka lukibukui; kadum ikayook ka akayook, ka abusian nuipu noi nuisiyalamikinete odwe luka ituŋa. 9 Aso karaun loapol, kadepa noi ŋul kere lukageikinete ko Yerusalem: kojaun akacoa keoŋ. 10 Nuemielas akakonye kere mam abu kemik kes: mam abu ketikok ekatau aiyalama kere, naarai abu ekatau kiyalama kanuka akaitaaritoi kere; ŋin ŋes kerai akakorakinet kotoma aitaaritoika kere. 11Kasodi asesen aswamisio kere nueswamaete akakanin, ka aitaaritoi naetaaritor eoŋ aswam: ido koany, kere araas aamameak ka ainyam ekwam, amamei da ameda kokwap kakoloŋ. 12 Kasodi aibelokin aomoom nuka acoa, ka ikerep ka abaŋaanut: naarai ikwaikini ai etuŋanan loetupakini ekabaka? Dimarai ŋun nueswamatai sek. 13Kasodi aanyun ebe acoa itelekarit abaŋaanut kajokis, kwape itelekaritor aica amuton. 14 Ejaas lokacoa akonye roma akouke, konye elosenenei ebaŋ kotoma amuton: kwabo amisiikini ebe edolokini adiopekirot kes kere. 15Kasodi atemar kotauka ebe, “Kwape edoikinio ebaŋ, ŋes kadoikinio eoŋ da; aso ca ajokis anyoin ajaut kacoa naepol?” Kasodi atemar kotauka ebe, “Ŋun da aamameak.” 16Naarai emamei aiitunet naka lokacoa apaarasia kere, kwape ka ebaŋ da; naarai kapaarasia nuepote koiŋaren kodaunitos sek aimurwokinio. Etwani cama lokacoa kwape ebanl 17Kwaŋin abukala aijar; naarai aswam naiswama kokwap kakoloŋ ketakadikinit: naarai kere eraas aamameak ka ainyam ekwam. 18 Abu kala aitaaritoika kere naetaaritor kokwap kakoloŋ; naarai kebusakinit ainyeinia etuŋanan lokatupakini. 19 Iŋai ma ejeni arai eraun lokacoa arai ebaŋ? Konye irumi ŋesi aitaaritoika kere naetaaritor, naeswamat kacoa kokwap kakoloŋ. Ŋun da aamameak. 20Kanuka ŋun kebelok aisiiurunun etauka kanuka aitaaritoi kere naetaaritor kokwap kakoloŋ. 21Naarai ejaun etuŋanan loetaaritoi kacoa ka aijen ka apirianut da; konye inyekinia etuŋanan lomam etaaritoi araut akekorakinet. Ŋun da eraas aamameak ka aronis naepol. 22 Naarai anyoika nuedumuni etuŋanan kaitaaritoike kere, naetaaritor kokwap kakoloŋ? 23 Naarai akepaarasia kere eraas ican, aitaaritoike da ŋes akadakin: eebo, kuare da mam eketau iyeŋuni. Ŋun da aamameak. 24 Emamei ibore yenitelekarit ajokis korunanan alemar ainyam ka aimat, ka alelakinit aitaaritoike. Abu kaany ŋun da, ebe epote kakan naka Edeke. 25Naarai iŋai bo epedori ainyam, iŋai da epedori aiyalama adepar eoŋ? 26 Naarai einakini Edeke etuŋanan loisiyalamikinit ŋes acoa, ka aijen, ka aiyalama da: konye einakini ekadiakanaran aitaaritoi, atukonokin ka aidiat, tetere einakini ŋol loisiyalamikinit Edeke. Ŋun da eraas aamameak ka ainyam ekwam.31 Ejai ŋinibore ekaruke, ŋinikirot da naejai kwap kakuj ejai apakike. 2 Apak naka aurio, apak da naka atwanare; Apak naka aira, apak da naka airut ŋul lukiraio; 3 Apak naka aiar, apak da naka aitaŋaleun; Apak naka aiket, apak da naka aiduk: 4 Apak naka aimony akiyo, apak da naka akiena; Apak naka aibworo, apak da naka ekosio; 5Apak naka acakanar amor, apak da naka atukonokin amor; Apak naka aitun, apak da naka ainyein aitun; 6Apak naka amoot, apak da naka aitoolior; Apak naka aidar, apak da naka acakar; 7 Apak naka aicil, apak da naka aidony; Apak naka aililiŋ, apak da naka einer; 8 Apak naka aminanar, apak da naka alaikin; Apak naka aitiji, apak da naka ainapakin. 9 Anyoin ameda naedumuni etuŋanan loiswamai kaŋun kere nuetaaritor? 10 Abu kaany aitaaritoi kere naabu Edeke kijaik odwe luka ituŋa aitaaritor. 11 Abu ŋesi kosub ŋinibore aibecokino kapakike: ido kibwaik akwapisinei otauonokec, konye kopone lomam epedoriata ituŋa aiŋic aswam naeswamai Edeke anyoun kageunet aitodol awasia. 12Ajeni ebe emamei ibore yenitelekarit ajokis kama ejaas ituŋa, alemar ailel ka aswam ajokis apaarasia kere nueiariata. 13 Ido ŋolituŋanan ainyam ka aimat ka adumun ajokis kaitaaritoike kere, ŋes ainakinet naka Edeke. 14 Ajeni eoŋ ebe ŋinibore kere yeniswamai Edeke ejaenena ikar kere: emamei ibore kere yenepedori aiyatakinio, karaida ainonoorio: ido eswama Edeke ŋun, tetere eyoŋete ituŋa ŋes. 15 Nuejaas kwana kejaas apeŋo; ŋun da nuekotosi ajakut apotu kojaas sek: emoot Edeke bobo nukolo ketuboros. 16 Bobo da kaany kokwap kakoloŋ, aibois naka etube kojau aronis nen; aibois da naka adolit, kojau aronis nen. 17 Abu katema kotauka ebe, Etubokini Edeke ikadolitok ka ikaronok; naarai itemokinit apak naka ŋinikirot ka ŋiniswam. 18Abu katema kotauka ebe, Akiro nuka odwe luka ituŋa igimori Edeke kes tetere eanyunete ebe esubito bala Itiaŋ. 19 Naarai nuedoikinete odwe luka ituŋa edoikinete otiaŋ da; edoikini kes adiopekirot: kwape etwania ediopet etwani ece kwaŋin; eebo, kere ejaas keiyeŋane ediopet; mam ituŋanan itelekarit itiaŋ; naarai kere eraas aamameak. 20 Elosete kere aibois adiopet; elomunete kere kapua, eboŋorete bobo kere apua. 21Iŋai bo ejeni emoyo loka ituŋanan arai elosi kuju, emoyo da loka itiaŋ arai elosi kwap toma alup? 22 Ŋes kaanyunia ebe emamei ibore yenitelekarit ajokis kilema ituŋanan alelakinit aswamuke; naarai ŋin ŋes akekorakinet: naarai iŋai epedori ainyakun ŋes aanyun nuetupanakinete ŋes?41Kasodi bobo kaany aimwaŋ kere naiswama kokwap kakoloŋ: ido koany, akiyo nuka ŋul kalukemwanitai, kwabo emameete luitalakarete kes; kojai da apedor neejaas luemwanito kes, konye komameete luitalakarete kes. 2 Ŋes keturio lukatwak luadaut atwakare aitelekarit luejarete lueroko ejarete. 3 Eebo, kaomoom aitelekarit kere ŋin yeneroko ejauna, yenimam ber eanyunit aswamisio nukaronok nuiswamas kokwap kakoloŋ. 4Kasodi aanyun aitaaritoi kere ka ŋiniswam kere nakapirianut, kanuka ŋun ŋes ikokotikinio etuŋanan ekeidunyet. Ŋun da eraas aamameak ka ainyam ekwam. 5 Ilokonyikini ebaŋ akekanin, kosodi ainyam akekuan elopet. 6Amukunet adiopet naka akan kaiyamakina itelekarit amukuneta aarei kaitaaritoi ka ainyam ekwam. 7Kasodi bobo kaany aamameak kokwap kakoloŋ. 8 Kojai obonipe, komamei lokiareit; eebo, emamei ŋes ikoku karaida onace; konye aitaaritoike kere mam enaŋi, akekonye da mam imonikinos abar, Aso ebala ebe, “Etaarikini iŋai, emiki da ekatau ajokis kanuka ŋai?” Ŋun da aamameak, eebo, aitaaritoi naepol. 9Itelekarito iarei ediopet; naarai ejaas keropit loejok kanuka aitaaritoikec. 10Naarai arai kibiroros, itonyouni ediopet aupake; konye itukwi ŋin yenejai bon naibiroror, yenemamei aupake loitonyouni. 11Bobo da, arai eperete iarei nepepe, ibusubusakinete: konye obonipe epedori biai aibusubusakin? 12Arai da itelekari etuŋanan obonipe, ipikorete ŋes iarei; auno da naicipitai kauni mam eŋeda atipet. 13Ekatumunan lokican lokacoa itelekarit ekabaka loemoionit kobaŋaana, lomam ecamuni bobo alimokinio. 14Naarai toma aenis ŋes kelomunia araun ekabaka; eebo, keurio kerai lokican kajakanutuke. 15Abu kaany lukajarak kere luilatos kokwap kakoloŋ, kojaas nepepe kekatumunan, lokiareit, loabwoi kaiboisike. 16Emamei neesanakinete ituŋa kere, ŋul kere luirumit ŋesi: konye ŋul luetupanakinete mam isiyalamikinete ŋes. Abeit ŋun da eraas aamameak ka ainyam ekwam.51 Kocoite akonikeje nailomanaria togo loka Edeke: naarai ejok aikunyakin akiirar itia ainanakin asuban nuka ibaŋiok: naarai mam ejenete ebe iswamaete aronis. 2 Sirikilebileb kaitukukon, karaida ekonitau aisunyit einer akirot kere kakonyen nuka Edeke; naarai ejai Edeke toma akuj, ijo da toma akwap; aso kikidiokoto akonikiro. 3Naarai ebuni airujasit kaipues naka aswamisio; eporoto loka ebaŋ da ebuni kaipues naka akiro. 4 Naiyapoo ijo aiyaposit mama ejai Edeke sirikitilor aitodol; naarai mam isiyalamikini ibaŋiok: kitodolonokini ŋun nuiyapoi. 5 Ejok timam kiyapo itia aiyapo kosodi akurwokin aitodolikin. 6 Sirikijalak aitukukon aidupor akonikuan; sirikiner kakonyen nuka emalaika ebe kerai aibucaret: kanukinyo tienyunyurikinia Edeke ekoniporoto, amudiar da aswamisio nuka akaninikon? 7 Naarai toma aipues naka airujasia ka aamameak ejaas da akiro nuipu: konye jo koyoŋenenei Edeke. 8 Karaida ianyuni lukican emwaŋitai, ido etube ka abeit da edemario kagogoŋ kotoma obuku, sirikiwumok akirotnin: naarai loitelekarit apolou eseseni lokapolou, ejaas da lukapolou aitelekarit kes. 9Bobo da amio naka akwap erai naka kere: ekabaka da ijaanakinio komanikor. 10Ŋol Ioikila epuesa mam imonikin epuesa; ŋol da loikila luipu mam imonikini eiyas: ŋun da eraas aamameak. 11Arai kiyatakinos iboro, ŋul da luenyamete kes iyatakinos: ameda anyoin edumuni elopet dimarai asesen kes kakekonyen? 12Ejijim ajo nuka lokeswaman, arai enyami luikidioko arai luipu; konye aimonut naka ekabaran mam isiikini ŋes ajo. 13 Ejai aronis naepol naabu kaany kokwap kakoloŋ ŋes nata, abar nainadakinit elopet eyaŋauni aronis: 14etwaniari abar ŋin kanuka arereŋ naerono; arai da keuri ikoku, komamei ibore kakanike. 15 Kwape kelomunia kakoik naka totoke, eboŋori emujalal kwape kelomunia, kwabo mam eyaŋaari ibore kanuka aitaaritoike yenepedori ayaŋaar kakanike. 16 Na da ŋes aronis naepol, kwape kelomunia elosi cut kwape kwaŋin: edumuni ameda anyoin etaaritor kanuka ekwam? 17 Enyamenenei kamuton apaarasiake kere, ido eburuni noi, edekanakin enyunyuranakini da. 18Koany, nuabu kaany ebe ejok ibusak da kes nu, etuŋanan ainyam ka aimat, ka aisiyalamikin aitaaritoike kere, naetaaritor kokwap kakoloŋ, apaarasia kere nuka aijarake nakijaikin Edeke: naarai ŋin ŋes akekorakinet. 19Ido ŋinituŋanan kere yenijaikinit Edeke abar ka iboro, ido ijaikinit apedor ainyam ka alemunun da akekorakinet, ka aisiyalamikin aitaaritoike; ŋin ŋes ainakinet naka Edeke. 20 Naarai mam iituni noi apaarasia nuka aijarake; naarai eboŋokini Edeke toma alakara naka etauke61Ejai aronis naabu kaanyu kokwap kakoloŋ, ido naelanirikinit ituŋa: 2 Etuŋanan loijaikinit Edeke abar, ka iboro, ka aibuses, tetere mam etwa niari kere nuimiela eketau, konye komam Edeke einakinit apedor ainyam kes, konye emoit enyami; ŋun eraas aamameak, ido ŋes adek naerono. 3 Arai keuri etuŋanan idwe akwatat, kobut da ikar luipu, kipuakaros apaarasia nuka ikekaru, konye komam eketau imonikin ajokis, ido komam enukio; abala eoŋ ebe, Ikoku yenikijecuna da itelekarit ŋes. 4Naarai ebuni ŋin kaamameak, elosi da kamuton, erapario da ekekiror kamuton; 5Bobo da mam eanyunit akoloŋ, kwabo mam ejeni; ibworari ŋin adepar ŋol. 6Eebo, karaida kebut ŋesi ikar elukumit irwan aarei, komam isiyalamikinit ajokis: mam kereka eboŋokinete kere aibois adiopet? 7 Aitaaritoi kere naka etuŋanan erai kanuka aitukuke, konye mam aiŋobeleke imonikin. 8Naarai itelekari biai lokacoa ebaŋ? Inyo bo da ejai lokican loejeni alosit kakonyen nuka lukajarak? 9Asesen kakonye ŋes itelekarit airimirim naka aiŋobel: ŋun da eraas aamameak ka ainyam ekwam. 10 Ŋin yenikeiau, emaikinitai ekekiror sek, ejenio ebe erai etuŋanan: kwabo mam epedori aitepeg ŋol loitelekarit ŋes kagogoŋ. 11Naarai ejaas akiro nuipu nuiyatakinete aamameak, iŋarakinete etuŋanan biai? 12 Naarai iŋai ejeni luibusakinito etuŋanan kaijarake, apaarasia kere nukaijarake naatai nuebusio kwape etoribe? Naarai iŋai epedori alimokin etuŋanan nuejaunos atupanakin ŋes kokwap kakoloŋ?71 Ekiror loejok itelekarit akinyet naka akais nuipu; Apaaran da nakatwanare itelekarit apaaran nakaurio. 2 Ejok alosit togo loka aibworo Itia alosit togo loka epucit: Naarai nen ŋes esaŋe loka ituŋa kere; Ibwaikini lokajaran ŋun otauke. 3 Aiturur itelekarit akiena: Naarai akadakinit naka akonye ŋes ejokuunia etau. 4Etau loka lukacoa ejai togo loka aibworo: Konye etau loka ibaŋiok ejai togo loka ikososio. 5Ejok akiirar aitoronio naka lokacoa Itia akiirar ekosio loka ibaŋiok. 6Kwape edeedeatar ikukwa kokwap kamot, Ikoni nen akiena naka ibaŋiok: Ŋun da aamameak. 7 Abeit amwaŋit itaraun lokacoa ebaŋ; Ainakinet da emunauni aijen. 8 Esaŋe loka akirot itelekarit ageuneteke kajokis: Loejai emoyo Ioinirikinit itelekarit loejai emoyo loeomiara. 9 Sirikisunyak anyunyurikin komoyokon: Naarai iboie anyunyura katorob naka ibaŋiok. 10Sirikiner ebe, “Akirot anyoin itelekaritotor apaarasia nukolosek nuka kwana?” Naarai mam iŋisi ŋun kacoa. 11Ejok acoa nepepe kairumet: Eebo, ejok aitelekarit neejaas ŋul lueanyunete akoloŋ. 12Naarai igalikinit acoa kwape igalikinitor epuesa da: Konye ajokis naka aijen ŋes na ebe idari acoa aijar naka ŋul kaluejaas kaŋes. 13 Koomoom aswam naka Edeke: Naarai iŋai epedori aiteten ŋun nuasubunit ŋesi imagululos? 14Kolakara kapaaran naka aikemer, koomoom da kapaaran naka ican: asubunit Edeke adiopet kwape kanace, tetere mam etuŋanan enicuni nuetupanakinete ŋes. 15 Abu kaany nu kere kapaarasia nuka aijaraka naatai: ejai etuŋanan lokadoliton loeoliori kadoliteke, ejai da etuŋanan lokaronon loiyatakini aibut toma aronisike. 16 Sirikilitokin kadolitekon: karaida alitokin kacoa: kanukinyo tikimudiaror bon? 17 Sirikilitokin karonis, karaida araut ebaŋ: kanukinyo tikitwania eriŋa edoluno apakikon? 18Ejok koric ŋun; eebo kakwa da mam ijalakini kakanikon: naarai loeyoŋit Edeke ebeluni kakes kere. 19Erai acoa agogoŋ neejai lokacoa aitelekarit ikayaitok itomon luejaas toma ore. 20 Abeit emamei etuŋanan ekadoliton kakwap loiswamai nuejok, komam ediakari. 21Sirikibwaik etau akiro kere nuinerai; kinye akiirar ebulesitikon kikeni: 22naarai irwan ipu ejeni ekonitau da ebe ikeni ijo da luce kwape kwaŋin. 23Ŋun kere abu ketem kacoa; kener atiar, “Araun lokacoan; konye kalwanik. 24 Nuejaas da, elwaka, ido idulok noi; iŋai bo epedori aŋicun? 25Abu kebelokin, ketininik ekatau ajenun, ka aŋicun, ka amoot acoa ka apolou naka akiro, ajenun da ebe aronis ŋes abaŋasnut, ka abaŋaanut da kes ikerep. 26Abu kadum da akirot naitelekarit atwanare kadwaris, ŋes aberu naerai etauke iica ka iboyan, akekanin da bala irikoi: ekui ŋolloisiyalamikinit Edeke kamakeŋ; konye ikamuni ŋesi ekadiakanaran. 27Koany, ebala Ekalimonokinan ebe, Abu kadum na, kwape etiiriania akirot kakirot adumunia apolou: 28naerina emoot ekatau, konye mam adumunit: abu kadum ediopetuŋanan kotoma olukumit; konye mam abu kadum aberu kotoma kaŋul kere. 29 Koany, abu kadum na bon ebe, kosub Edeke ituŋa itenara; konye apotu kesi komoata lupwakununa luipu.”81Iŋai loesubit bala lokacoa? Ido iŋai ejeni aitejenun akiro? Acoa naka etuŋanan itacauni akekonyen, Itegelikini da agogoŋ naka akekonyen. 2 Kainakinit akirot ebe, Koricenenei aicorakinet naka ekabaka, ido kiswama ŋun kwaŋin kanuka aiyaposit naka Edeke. 3Sirisunyanari anyoun kaneejai; siridonit akirot naerono: naarai iswamai ŋesi nuekoto kere. 4 Naarai akirot naka ekabaka ejai apedor: iŋai da epedori atemar ŋes atiar, “Iswamai inyo?” 5Ŋin yenericenenei aicorakinet mam ejenuni akirot naerono; emisiikini etau loka etuŋanan lokacoa apak ka etube: 6 Naarai ŋinikirot ejai apakike ka etube; naarai elanirikinito noi etuŋanan icano 7 Naarai mam ejeni nuejaunos; naarai iŋai bo epedori alimokin ŋes kwape eiaunotor? 8 Emamei etuŋanan loejai apedor komoyo aitikokin emoyo; kwabo emamei ŋes apedor kapaaran naka atwanare; emamei atwario kojie, aronis da mam eyuuni ŋol loanaiki. 9 Ŋun kere abu kaany, abu kebwaik ekatau toma ŋiniswam naiswamao kokwap kakoloŋ; naeyaitor etuŋanan ediopet loce aiswamakin ŋes aronis. 10Kasodi bobo kaany lukaronok enukio, kolomanarete kolomununete da aibois nakalaunan, aponi kituroi kotoma ore kama kiswamaata akiro ŋun: ŋun da eraas aamameak. 11 Naarai etube Ioetubokinio aswamisioit naerono mam itodolikinio katipet, ŋes etininikiata odwe luka ituŋa itauonokec aiswamaenen aronis. 12 Karaida iswamaenenei ekadiakanaran aronis aatenak akwatat, kosodi kobut noi, konye ajeni abeit ejaunos ejok ŋul lueyoŋito Edeke, lueyoŋito kakonyeneke. 13Konye mam lokaronon ejaun ejok, kwabo mam ebusi apaarasia nuipu nuesubito bala etoribe; naarai mam eyoŋit kakonyen nuka Edeke. 14 Ejaas aamameak nuiswamas kakwap; ejaas ikadolitok luedoikinete kwape ejaar aswam naka ikaronok; bobo da, ejaas ikaronok luedoikinete kwape ejaar aswam naka ikadolitok: kabala ebe, ŋun da eraas aamameak. 15 Kasodi aiturit ikososio, naarai emamei etuŋanan ibore yenitelekarit ajokis kokwap kakoloŋ, dimarai ainyam, ka aimat, ka alakanar: naarai ŋun ejaunos kaŋes kotoma aitaaritoike apaarasia kere nuka aijarake, nuabu Edeke kijaik ŋes kokwap kakoloŋ. 16Naebwaikinia ekatau aijen acoa, aanyun da aswamisio nuiswamao kakwap: (naarai ejai lomam iiri ajo kakonyeke paaran ka kuare da:) 17 kasodi kaany aswam kere naka Edeke, mam epedori etuŋanan aŋicun aswam naiswamao kokwap kakoloŋ: naarai etuŋanan arai itaaritoi biai amoot, konye mam enicuni; eebo, karaida eomit lokacoa ajenun, konye mam epedori aŋicun.91 Naarai abu kebwaik ŋun kere toma otauka, airot ŋun kere; kwape ejaatar ikadolitok, ka lukacoa, ka aswamisiokec toma akan naka Edeke; arai amin arai alaio, mam etuŋanan ejeni; ejaas kere kakonyenekec. 2 Eriakas akiro kere nuedoikinete kere: ejai adiopekirot neejaas ikadolitok ka ikaronok; neejaas luejok ka lueroko, ka luelaete ka lumam elaete da; neejai ŋol Ioeinakini asubanit, ka lomam einakini asubanit; kwape ejaar loejok, ikoni nen ekadiakanaran da; ka ŋol loiyapoi, bala loeyoŋit aiyaposit. 3Erai ŋin aronis naejai toma nuiswamao kere kokwap kakoloŋ, ebe, edoikini adiopekirot kere: eebo, bobo da, ileleba aronis toma otauon luka odwe luka ituŋa, ikerep da ejaas otauonokec eriŋa ejarete, ido kokau kaŋun elosete okatwak. 4Naarai ejai amun ŋol loimorikikina kalukajarak kere: naarai ejok ekiŋok loejari itia eŋatuny loetwanit. 5 Naarai ejenete lukajarak ebe etwakete: konye mam ikatwak ejenete ibore, mam bobo edumunete eropit; naarai imurwokinio aiitunetekec. 6Aolio kwana aminakec ka elaitikec ka ekokotekec da; mam bobo ejaas kakorakinet apaarasia kere kakiro kere nueswamao kokwap kakoloŋ. 7 Ape do, konyamenenei ikoninyamat kaiyalama, komasenenei ebinokon ketau loelakara; naarai adau Edeke acamun aswamisiokon. 8Kokwaŋuut inapenekon apaarasia kere; siriemamuunun akinyet kakoukon. 9 Kiboienenei kaiyalama kaberu naimina apaarasia kere nuka aijarakon naatai, nakiinakinit ŋesi jo kokwap kakoloŋ, apaarasiakon kere nuutai: naarai ŋin ŋes akorakinetekon kaijar, kakoniitaaritoi naitaaritor kokwap kakoloŋ. 10Ŋin kere yenedumuni akonikan aswam, kiswamaenenei kakonigogon; naarai emamei aswam, karaida ainerun, karaida aijen, karaida acoa, kokatwak, kama ilosi. 11 Abu kabon, kaany kokwap kakoloŋ ebe, abolobol mam erai naka luetiroko, karaida ejie loka ikagogoŋok, karaida inyamat luka lukacoa, karaida abar naka ituŋa lukaijen, karaida asianut naka ituŋa luepiriaka; konye edoikini kes kere apak ka arereŋ. 12 Naarai mam etuŋanan ejeni akepak; kwape lukecor luikamunio koboi loerono, kwape da akweny nuipokete karuja, kwape kwaŋin da ipokiata ituŋa kapak nakaronis, naenesaria kes atipet. 13Ido abu kaany acoa kokwap kakoloŋ naikoni ne, esubit bala epol kamakaŋ: 14 Kojai ere loedit, ikidioko da ituŋa luajaas toma; kobu ekabaka lokapolon aitiji, kirigau, koduk itutio luepolok: 15kojai do etuŋanan lokican lokacoa ore ŋol, abu ŋol koyu ere kanuka acoake; konye komamei yeneitunit etuŋanan ŋol lokican. 16 Kasodi kabala ebe, Ejok acoa itia agogoŋ: konye emenitai acoa naka etuŋanan lokican, komam akiroke epupunio. 17 Akiro nuinerasi lukacoa kaiyamakina epupunio aitelekarit ecelet loka ŋol kaloeyait ibaŋiok. 18 Ejok acoa itia lujiis: konye ekadiakanaran ediopet emudiari nuejok nuipu.101Icuc luetwakito itobosete tulutul akinyet naka ekenyalan aures naejok: Kwape kwaŋin elaŋir abaŋaanut naedit aitelekarit acoa ka aibuses. 2 Etau loka etuŋanan lokacoa ejai kakanike nakoteten; Konye etau loka ebaŋ ejai kakanike nakokediany. 3 Eebo, arai elosi ebaŋ korot, kodaun aijeneke, Elimokini ŋinituŋanan ebe erai ebaŋ. 4 Arai kinyoikini jo emoyo loka ekayaiton asurokin, sirinyoununei kaiboisikon; Naarai anonokikin isiyamikini aronisio nuepolok. 5Ejai aronis naabu kaany kokwap kakoloŋ, kosubit bala adiakar naebuni kama ejai ekayaiton. 6Isiboikinio abaŋaanut aiboisio nuepolok, iboiete da ikabarak aiboisio nukokwap. 7 Abu kaany ibulesin ibwanenito ibalasin, ka ikapolok elosete kakeje bala ibulesin kakwap. 8 Loeboki aipany ibirokini neni ŋol da loebeli abwas, ekonyi emun ŋes. 9Ŋol loeuki amor ilunyulunyete ŋes; Ŋol da loibesi akito edumuni akaŋas. 10Arai keŋinior asuat, komam ituŋanan ipeni, Aso ibusakinit aiyatakin agogoŋ: Konye iŋarakini acoa aiteten. 11 Arai ekonyi emun koriŋa elemelema, Emamei ajokis ekalemeleman. 12Esiaka akiro nuka aituk naka lokacoa; Konye ilikori aituk naka ebaŋ elopet. 13Ageunet naka akiro nuka aitukuke ŋes abaŋaanut: Esaŋe da loka akiroke kes ikerep lukameneranut. 14 Iyatanakini ebaŋ akiro, Konye mam ituŋanan ejeni nuejaunos; Iŋai bo epedori alimokin nuejaunos atupanakin ŋes? 15Aitaaritoi naka ibaŋiok egogori ŋolidiopet kakesi, Naarai mam ejeni neitori elosi ore. 16 Itukwi, ijo akwap, naeraar ekabakakon ikoku, Enyamete da ikapolokokon tupuruc! 17 llakara, ijo akwap, naeraar ekabakakon okoku loka lukapolok, Enyamete da ikapolokokon kapak naedolit, Adumunia agogoŋ, kwabo mere ameranakin! 18Edoi eswi kanuka aijalijalanut; Ido eisi etogo kanuka apalisonut naka akanin. 19Ipounio inyamat kanuka akiena, Ebino da italakari aijar; Apesan da eboŋokinete ŋinikirot. 20 Sirikenenenei ekabaka, karaida toma aomisiokon; Sirikenenenei ekabaran kagolakon naiperenenei: Naarai eyaŋaari ikweny yenika apak eporotokon, Ŋin da yenejaas abebenoka itatami akirot.111 Kocakanakini ikoninyamat akipi: Naarai ianyuni kes ketuboros apaarasia nuipu. 2 Koinak akorakinet mama ejaas ikanykaarei, eebo, kiton ikanykauni; Naarai mam ijeni aronis anyoin ejaun toma akwap. 3Arai kibwala idouon akiru, Kotepete toma akwap: Arai kibiror ekitoi da ari naka eŋalakimak, arai agolitomei, Aibois ŋipeŋin naebirokin, nepenen eperio. 4Loeseseni ikwamin mam eyei; Loeseseni idouon da mam edwenyi. 5 Kwape mam ijenia erot loka ekwam kwape ejaar, karaida akojo kwape epolooto kotoma aliliget naka akapotion; kwape kwaŋin mam ijenia aswam naka Edeke loiswamai kere. 6Koyeenenei ikonikinyom tupuruc, eboŋ da sirikitikok akonikan; naarai mam ijeni kakesi luikemerete, arai lu arai ŋul, elemuni eriakakinos kere araun luejok. 7Abeit ejok aica, ido erai naka aiyalama akonye asesen akoloŋ. 8Eebo, kebut ituŋanan ikar luipu, kisiyalamikina kakes kere; konye kiitunite kereka apaarasia nuka amuton, naarai eraunos nuipu. Kere nuepote eraas aamameak. 9 Kisiyalamikinite akonitumun, ijo esapat; kitalakaanar ekonitau kapaarasia nuka akonitumun, kolosenenei korotin luipuda ekonitau, kasesen da naks akonikonye: konye kojen ebe kitubokini rwaru Edeke kanuka ŋun kere. 10 Aso kolema aiturur kere kotaukon, kolema da aronis kakuanakon: naarai atumun ka akurunan eraas aamameak.121Kiitunite da Ekonikasuban kapaarasia nuka atumunikon, eroko kepona apaarasia nukaronok, eroko da ikar ikunyuna nainerar atiar, “Mam esiyalamikinit kes”: 2Eroko itudeneoro akoloŋ, ka aica, ka elap ka aacer, karaida kebono idouon kedau akiru aitep: 3 kapaaran naemaranuniata ikedarak etogo, irapanakinos ikagogon ok, inyeinete akeriak da naarai ikidioko kes, naitumutonorere ikereonokinok kadirisan. 4 Naegolokinere ikekia korot; naiyapaaror eporoto loka airiare, naenyounio ice kanuka aruo naka akweny, naisiyapaarere apesur kere nukekosiok: 5 Eebo, ekuriakaros ŋin yenetopolooritai, ka luitukurianete korot; ituroi ekuŋur, elaŋirior ebeerei da, edaun da emulalu: naarai elosi ituŋanan oreke loka ikar kere, koriariatos ikebworok korotin: 6eroko kelacara auno naka epuesa, arai atido naka esabu abwaŋ, arai amot abwaŋ katan, eroko kebila akokoro da katapar; 7 koboŋorete apua toma alup kwape kejaatar, kobonori da emoyo mama ejai Edeke lokekorakini. 8Inera Ekalimonokinan ebe, Aamameak nuka aamameak, kere eraas aamameak. 9Bobo da, naarai kerai Ekalimonokinan lokacoa, kiyatak aisisianakin ituŋa aijen; eebo, koomoomoenenei, komo, kisuduny da awaragasia nuipu. 10Abu Ekalimonokinan komo adumun akiro nuitoiokitai, ka ŋun da nukiwadikatai kaitenara, kes akiro nukabeit. 11Esubito akiro nuka lukacoa bala iketetin, ido akiro nuka ikapolok luka atukosia bala aseito nuibubutoi kojokan noi, nueinakinio kama ejai ekecokon ediopet. 12Bobo da, okokuka, kocam aicorio: emamei esaŋe aiswamaenen iitabon luipu; aisisia da nuipu itapasi akuan. 13Na ŋes esaŋe loka akirot; eirar kere: koyoŋitenenei Edeke, koricenenei akeicorakineta; naarai ŋun kes nuibusakinito ituŋanan. 14 Naarai eyauni Edeke ŋiniswam toma atubokinio, nepepe ka ŋinikirot nakibwaitai, arai naejok arai naerono. |