Ikolosain11 Paul ekiyakia loka Kristo Yesu kanuka akot naka Edeke, ka Timoteo onacewok. 2 Mama ejaas lukalaunak ka iinacan luiyuunito lukotoma Kristo luejaas Kolosai: Asianut ka ainapakin kojaas mama ijaas nuepote kama ejai Edeke Papawok. 3 Kimalaenenei Edeke Papa loka Ejakaitiwok Yesu Kristo apaarasia kere nakilipanakinia yes, 4 naarai kipou keirasi nuka aiyuunikus kotoma Kristo Yesu, ka aminakus mama ejaas lukalaunak kere, 5 naejai kanuka amun naiŋadakinio toma akuj kanukus. Ipotu kiirasi ŋin kolo toma akirot naka abeit naka Akiro Nukajokak, 6 nuadolokis yes; ido kwape eraiata araito, iyatanakinos da kotoma akwapin kere, kwape kwaŋin kotomakus da, ameun kapaaran naipupioto, kojenut da asianut naka Edeke kabeit, 7 kwape isisiaata kama ka Epapurasi ebulesit aupawok lominat. Erai ŋesi ekejaanakinan lomunot loka Kristo kanukosi, 8lokitejenik da sio akusimin kotoma Omoyo. 9 Kanuka ŋun sio da, ameun kapaaran nakipupunio, mam kinyeinenei ailipanakin yes kaiŋaiŋa ebe, kilelebikin ajenun nuekoto Edeke, kacoa kere, ka acoit naka emoyo, 10 kolosenenete kwape luibusakinito Ejakait aisiyalamikin ŋes kakiro kere, koraete araito kotoma kaŋiniswam kere naejok, kiyatanakinos da ajenun Edeke. 11 Kitogogoŋoi kapedor kere, kwape ejaar agogoŋ naka aibusesuke, kiton atitiŋikinit kere, ka aikany da nepepe kaiyalama, 12 kimalaenenete Papa lokitubusikinit oni aimor kairumet naka lukalaunak kotoma aica. 13 Abu ŋesi kolaku oni alemar kapolou naka amuton, kisibwot alomar ajakanut naka Okokuke lominat. 14 Kija kalakunio kotomakeŋ, ŋes aisionio naka adiakanareta. 15 Erai ŋesi aput naka Edeke lomam etakani, ekiyai loka isuban kere; 16 naarai kotomakeŋ ŋes kesubere iboro kere, luejaas toma akuj, ka luejaas toma akwap, luetakanete ka lumam etakanete, arai iicoloŋo lukajakanuto, arai ijaka, arai ikayaitok, arai lukapolou, kesubio iboro kere kotomakeŋ ido kanukeŋ. 17 Egeikinit ŋesi iboro kere, icasito da iboro kere nepepe kotomakeŋ. 18 Erai ŋesi da akou naka akuan, ŋes ekanisa; erai ŋesi ageunet, ekiyai kotoma okatwak, tetere eraun ŋesi elopet losodit kotoma kere. 19 Naarai kotomakeŋ kitojokit aitekoro naka Edeke aiboienen, 20 kotomakeŋ da aitupuc iboro kere mamakeŋ, arai luejaas akwap, arai da luejaas akuj, kisinapik kanuka aokot nuka emusalabake. 21 Ka yes da lukolo igelara, lukasurup da kaomisiokus, kaswamisio nueroko, konye kwana abu ŋesi kitupuc yes 22 kotoma akekuan naka etuŋanan, kanuka aketwanare, tetere kitodiari yes lukalaunak, luemamei akemer ka luemamei aitoronet da kakonyeneke, 23 arai bo isalenenete kotoma aiyuun, iketakina apetetaitikus, icasito komam iriaŋiriaŋas, ainyein amun naka Akiro Nukajokak nuipotu kopuput, nuaponi kolimonokin ŋinisubat kere yenejai kwap kakuj, nuabu karaunor eoŋ, Paul, ekejaanakinanikec. 24 Kwana eyalamikin arieboka kanukus, etodoli da nuikadidio nuka aiticanio naka Kristo toma akuanaka kanuka akuanake, ŋes ekanisa, 25 lokaraunor eoŋ ekekejaanakinan kwape ejaar aijokokinet naka Edeke nakainakinitai kanukus, aitodolikin akirot naka Edeke, 26 aiyeiyea nakibwaitai ameun kikar ka aturio da, konye kwana ikujokinitai mama ejaas lukalaunakake. 27 Abu Edeke kokoto kes aitejenikin Imo abar kwape ejaar naka aibuses naka aiyeiyea kaŋin, naerai Kristo kotomakus, amun naka aibuses. 28 Kilimonokini ŋes, kekwenya ŋinituŋanan, kisisianakini da ŋinituŋanan kacoa kere, tetere kitodiari ŋinituŋanan epol kotoma Kristo. 29 Kanuka ŋun ŋes etaaritor aut kwape ejaar akegogoŋ naiswamai kotomakaŋ kapedor.21Naarai akoto yes ajenun aut naetia nen naauta kanukus, kanuka ŋul da luejaas Laodikia, ka ŋul kere lumam eanyunito akakonyen toma akuan; 2 tetere italakario ikecetauon, inicakina kotoma amin, koanyut abar kere naka acoit naitogogoŋitoi, kojenut cut aiyeiyea naka Edeke, ŋes Kristo, 3 loibwaitai kotomakeŋ iboro kere luketiai loepol luka acoa ka ajenun da. 4 Enera ŋun kinyek idiotuŋanan aitapaar yes kakiro nuka aijodijod. 5 Naarai karaida amamei eoŋ kotoma akuan, konye ajai kayes kotoma omoyo, eyalama da aanyun ekusipone loeteni ka aicasit naka aiyuunikus kotoma Kristo. 6 Aso kwape ijauniata Kristo Yesu Ejakait, kolosenenete kwaŋin kotomakeŋ; 7 kicasito aliasiokus, kodukokina kotomakeŋ, ido kitogogoŋitete kotoma aiyuun, kwape kisisianakinere, kilapara kaimal. 8 Kocoito kinyek idiotuŋanan aŋatar yes kanuka aminacoa ka aiŋal naatai, kwape ejaatar iponesio luka ituŋa, kwape ejaatar nugeet nuka akwapin, kwabo mere kwape ejaar Kristo. 9 Naarai kotomakeŋ iboie aitekoro kere naka Eidekeone kakuan, 10 yes da itekoro kotomakeŋ, loerai akou naka ayait kere ka apolou da. 11 Kotomakeŋ da kikepitai yes kakepio namam iswamatai kakanin, ilacata akuan naka etuŋanan kotoma akepio naka Kristo; 12 kinukio nepepe kaŋes kaibatis, kaŋin da aponi kitajarun nepepe kaŋes, kanuka aiyuun aswam naka Edeke lokitajaruni ŋes kokatwak. 13 Yes da lukitwakito kotoma aibucanareta, ka amamus akepio naka awatekus, abu Edeke koinak yes aijar nepepe kaŋes, kedau ŋesi aisioni oni aibucanaretawok kere, 14 kedau aimwatar aitutuket naewadikatai toma okisila nakitusurupi oni; abu kolema awai, kibubuk omusalaba. 15 Kolaca ŋesi ikayaitok ka lukapolou kitodia kes katitiŋ, kipiko kes komusalaba. 16 Aso kinyek idiotuŋanan atubokin yes kakiro nuka inyamat, arai numatan, arai bo kakiro nuka epucit, karaida ailamun naka elap, karaida nuka apaaran nakasabato. 17 Eraas nu etoribe loka nuepote; konye akuan ŋes naka Kristo. 18Kinyek idio ademar ainakinetekus, yenekoto aitisilikin, ka aima imalaikan, kitogogoŋooro kaitapoeta, iturokina atai kanuka aomisioke nuka akuan, 19 kwabo mam iketakina Akou, lokotomakeŋ akuan kere isigalikinio ka ainicakinio kanuka ailenyeta ka amoori, iyatanakin keiyas loka Edeke. 20 Arai ipotu kotwaka nepepe ka Kristo ainyein nugeet nuka akwapin, kanukinyo inonokikinitotor ikisila bala iroko ijarete kotoma akwapin, 21 ebe, “Sirikitiŋ, Sirikiir, Sirikitiro”, 22 (ŋul kere eoliorete toma aitwasamao) atupar aicorakineta ka aisisianakin naka ituŋa? 23 Akiro ŋun kere ejai aput naka acoa kotoma aima naepwakunete ituŋa bonik, ka aitisilikin, ka aitican akuan; emamei ŋun ajokis nepetai da aitikokinia aiŋobel naka akuan.31 Aso arai kitajarunitai nepepe ka Kristo, komoenenete nuejaas kuju, neejai Kristo, iboie kakan nakoteten naka Edeke. 2 Koomoomoete nuejaas kuju, kwabo mere nuejaas akwap. 3 Naarai ipotu kotwaka, ibwaitai da akusiijar nepepe ka Kristo, toma Edeke. 4 Naetakanunia Kristo, ŋes aijarawok, kosodete yesi da itakanunete nepepe kaŋes kotoma aibuses. 5 Aso kitwataniasi akusitutubeta nuejaas akwap; adoteu, asilianut, ainekit, eimiel loerono, ka airaŋaanut, ŋes aima aputosia. 6 Kanuka ŋun ŋes ebunokinia anyunyura naka Edeke odwe luiulaka. 7Ipotu yesi da kolosenenete kolo kaŋun, naijariata kotomakec. 8 Konye yes da kwana kolemasi ŋun kere awai; anyunyura, adedeŋ, aronis, ainyanakin, einer nukileic kaitukekus. 9 Siriŋalaŋalas, naarai ipotu kolacasi etuŋanan lokolo nepepe kaswamisioke, 10 konapa da etuŋanan lokitetet loisiteteununio kiton ajenun kwape ejaar aput naka ŋol lokesubi ŋes. 11 Emamei kanen Eyonanit, karaida Eyudayat, akepio ka amamus akepio, imoit, Esukusit, ibulesit, karaida yenijakakai, konye Kristo ŋes kere, ejai da kotoma kere. 12 Aso konapenenete etau loka aitim, asianut, aitasono, aiyapepera, atitiŋikin, kwape luseuna luka Edeke, lukalaunak ka luminan da; 13 koŋirionokinos, kisionionoros, arai ejai ituŋanan kere aŋurian kayenice, ido kwape kisionio yes Ejakait, yes da kisioniete kwape kwaŋin. 14 Ido aitelekarit ŋun kere konapa amin, naerai elomorut loka adolior. 15 Kodiekenenei ainapakin naka Kristo kotoma otauonokus, nakinyarakinio da toma akuan adiopet, kimalaenenete da. 16 Kiboienenei akirot naka Kristo kabarara kotomakus, kacoa kere: kisisianakinete ido kikwenyanaros kisabulin, ka ikososio, ka nupwakan nuka emoyo; iyeonokinete Edeke kasianut kotoma otauonokus. 17 Ido nuiswamaenenete kere kakirot arai kaswam, kiswamaenenete kokiror loka Ejakait Yesu, kimalaenenete Edeke Papa kotomakeŋ. 18 Yes aŋor, kononokikis ikusikiliok, kwape ibusakinitor kotoma Ejakait. 19 Yes ikiliok, kominas akusiŋor, siridedeŋanakinete kes. 20 Yes idwe, korimasi ikusikauriak kotoma akiro kere, naarai ŋin itojokit Ejakait. 21 Yes lukapapa, sirikitunyunyuranakis ikusidwe, kinyeis ajuruŋuŋ. 22 Yes ibulesin, korimasi ikusijaka luka akuan kotoma akiro kere; mere kaijaanakin nakokuju kwape luitojokito ituŋa, dimarai kaipioror nakotau, koyoŋito Ejakait, 23Yeniswamaete kere, kiswamaenenete kaijar kere, bala iswamanakinete Ejakait kwabo mere ituŋa, 24Kojenete ebe kiinakini Ejakait eropit loka airumet; ijaanakinete Ejakait Kristo. 25 Naarai yeniswamai erono, etacakinio bobo kwape ejaar akeronis, ido emamei atiakit ituŋa.41 Yes ijaka, kokorakis ikusibulesin nukadolit ka aitiirian, kojenete ebe ejai yes da Ejakait toma akuj. 2 Kicebokinito kotoma ailip, kokwenyenenete kotomake kaimal. 3 Kilipanakinete sio da, ebe koŋaik Edeke sio ekek kanuka akirot, einer aiyeiyea naka Kristo, nakaenitere eoŋ kanukeŋ; 4 tetere etodiari kwape kebusakinitor einer. 5 Kolosenenete kacoa mama ejaas ŋul lukokiŋa, koyuununete apak. 6 Kinerenenasi apaarasia kere kasianut, kokonyite abalaŋ, tetere ijenete kwape ibusakinitor aboŋonokin ŋinituŋanan. 7 Kitejenikini yes Tukiko nukadoikis kere; erai ŋesi onace lominat ka ekejaanakinan lomunot, ido ebulesit aupakosi kotoma Ejakait. 8 Ejuk ŋes mamakus kanuka akirot kana, tetere ijenunete nukidoikis sio, ido kitalaka ŋesi ikusitauon, 9 nepepe ka Onesimo, onace lomunot ka lominat da, lokobukus. Kitejenikinete kesi yes akiro kere nukane. 10 Kiyogai yes Arisitariko, ekijoreoritono aupaka, ka Marako ecen loka Baranaba, (Ioaponi kicorakin yes kanukeŋ; arai ebuni mamakus, kisukunyikis ŋes), 11ka Yesu loenyaritai Yusito, Eraas lu lukotoma luekepitai, kes bonik ikeswamak lukaupaka kanuka ajakanut naka Edeke, luapotu ketalakasi eoŋ noi. 12 Kiyogai yes Epapurasi, loerai lokobukus, ebulesit loka Kristo Yesu, euta apaarasia kere kanukus kotoma ailipike, tetere ibwoenenete kopolok, kitogogoŋito da kere nuekot Edeke. 13Naarai etejenaara kanukeŋ ebe itaaritoi ŋesi noi kanukus, kanuka luko Laodikia da, kanuka luko Kierapoli da. 14 Kiyogai yes Luka emurwon lominat, ka Dema da. 15Kiyogaete iinacan luejaas Laodikia, Numpa da ka ekanisa loejai togoke. 16Ido naidauniata yesi asoman ebalua lo, kosiomata da kotoma okanisa loka Laodikia; kosiomata yesi da loebuni koLaodikia. 17 Kolimokis da Arikipo ebe, “Kocoite aijaanakin naibu kodum kotoma Ejakait, tetere itodoli.” 18 Eoŋ Paul ewadikai ayogan na kakakan elopet. Kiitununete akaenio. Asianut kojai mama ijaas. |