Aswamiso11 Abu kewadik eitabo losodit, wu Teopilo, kotoma akiro kere nukegeuni Yesu aswam ka aisisianakin da, 2 kiton apaaran naayaŋarere ŋes toma akuj, naadaunitor aicorakin ikiyakia luaseunit kanuka Emoyo Lokalaunan, 3Nakedaunia aiticanio kitodikin kes ejari kanuka nuitogogoŋete nuipu, kitakananakin kes apak naka apaarasia akaisaoŋon, ka ainerenen akiro nuebeito ajakanut naka Edeke. 4 Nakiriamunotor kakes kicorak kinyeis anyoun koYerusalem, konye kidarata aisumunet naka Papa. Kobala ebe, “Ipotu kiirasi ŋun kamakaŋ; 5 naarai abu Yokana kibatis kakip, konye yes kibatisao kEmoyo Lokalaunan eriŋa etuboro apaarasia nuipu.” 6 Kosodi naketukokinotor, kiŋita ŋes ebe, “Ejakait, apak na ŋes kereka nainyakakinia Isirael ajakanut?” 7 Kotema kes atiar, “Mere nakus ajenun apakio karaida ikar luabu Papa kitemok kapedorike. 8 Konye idumunete agogoŋ kedau Emoyo Lokalaunan adoikin yes; iraunete yesi ikakajenak kotoma Yerusalem, ka Yudaya kere, ka Samaria, kiton osaŋe da loka akwap.” 9 Kedau einer ŋun, naperoko esesenete, kodakarai, kiteribo edou kakonyenekec. 10 Napesesenete noi akuj naalosio ŋesi, koany kobwaata ikiliok iarei aapu kakes enapito lukakwaŋak, 11 kobalas ebe, “Yes ikiliok luko Galilaya, kanukinyo ibwoiata kosesenete akuj? Yesu ŋol, loayaŋaar kamakus alosit toma akuj, eboŋuni kopone kaŋope kaŋol loianyuniata ŋes elosi toma akuj.” 12 Kosodete koboŋosi Yerusalem anyoun komoru loenyaritai loka Iseitunin, loeapias ka Yerusalem, alosit bala naka apaaran nakasabato. 13 Nakelomariata kodokasi agola nakokuju, nakiboienenoto; Petero ka Yokana, ka Yakob, ka Anderea, Pilip ka Tomas, Batolomayo ka Matayo, Yakob okoku loka Alipayo, ka Simon Selot, ka Yuda okoku loka Yakob. 14 Ŋul kere kinyikokinito ailip ketau ediopet, nepepe kaŋor ka Mariam toto naka Yesu, ka ikeinacan. 15Kapaarasia kaŋun kobwo Petero kokidiŋ kiinacan, (etiai loka ekodet kerai bala akwatat ka akaisaarei) kobala ebe, 16 “Iinacan, ibusakinit kodolo nakiwadikatai, nakinerit kolo Emoyo Lokalaunan kaituk naka Daudi, nuka Yuda lokiŋarenikinit ŋul lukikamunete Yesu. 17Naarai kimaritai nepepe kaoni, kodum ekewai kotoma aijaanakin kana. 18 (Naarai kogwelia etuŋanan ŋol amana keropit loka aronisike; kibiror keŋeso kocila, kolomut amoetenake kere. 19Kojenunos kotuŋa kere luiboiete koYerusalem, konyarai amana ŋin kaŋajepakec Akeledama, apolouke ebe Amana naka Aokot.) 20 Naarai iwadikatai kotoma oitabo loka Isabulin ebe, ‘Kosilior ekere, Komamuun ituŋanan yeniboie kanen.’ Bobo da ebe, ‘Kirum ece akepolou,’ 21 Aso kotoma otuŋa luaupenenas kaoni kapakio kere nukelomanaria Ejakait Yesu kolomununei da mamawok, 22 ameun kaibatis naka Yokana, kiton apaaran naayaŋarere kamawok alosit toma akuj, ibusakinit ediopet kakesi araun ekajenan loka ajarunike nepepe kaoni.” 23Koseut iarei, Yosep loenyaritai Barasaba, lokerai ekekiror Yusito, ka Matiya. 24 Kilipa, kotemasi atiar, “Ijo Ejakait loijeni itauon luka ituŋa kere, kitodikinai loiseunit ijo kotoma kalu luarei, 25kirum aibois kotoma aijaanakin kana ka aiyakianut na, naebuci Yuda kolot akeibois elopet.” 26 Kilamilamata eroet, kobeik eroet Matiya; kimarakinai nepepe kikiyakia itomon kalodiopet.21 Nakedolio apaaran naka Pentekosit, kejaas kere nepepe aibois adiopet. 2 Koŋesun airuruma kokuju bala airuruma naka ekwam loekusi ka gogoŋ, kilelebun etogo kere lokiboioto. 3 Kotakanut aŋajepa nuketiakatiaka bala nuka akim; kodoik ŋinidiopet kakesi. 4 Kilelebai kere Emoyo Lokalaunan, kogeut einer aŋajepa ace, kwape keinakinia Emoyo kes einer. 5 Kejaas Iyudayan lukiboiete koYerusalem, ituŋa luiyapaarito lukepote kaŋiniteker nakokwap kakuj. 6Kosodi nakiirarere airuruma ŋin, kotukokinos ikodeta, kitirirata, naarai abu ŋinituŋanan kiira kes inerasi aŋajepeke. 7Koumokis kere noi noi, kobalas ebe, “Koany, mam kereka lu kere luinerasi eraas Igalilayan? 8Inyo bo ainaki oni aiirar, ŋinituŋanan aŋajepewok nakiwuriere? 9Iparatian, ka Imedin, ka Iyelamin, ka luibolete koMesopotamia, ko Yudaya da, ka Kapadokia, koPonto ka Asia, 10ko Purugia, ka Pampulia, ko Misiri ka atutubeta nuka Libua aapu ka Kurene, ka ice lukepote ko Rome, Iyudayan ka ikebelokinok, 11Ikuretan, ka Iyarabun, kiira kes inerasi aŋajepawok aswamisio nuepolok nuka Edeke.” 12Koumokis kere, kobuonokinos, kotemanaros atiar, “Inyo bo apolou kanu?” 13Konye kokienatar ice kobalas ebe, “Emeras ajon nuwinyiwiny,” 14Konye kobwo Petero nepepe ka lutomon ka lodiopet, kikeseu ekeporoto kolimok kes ebe, “Yes ikiliok luko Yudaya, ka yes da kere luiboiete koYerusalem, kojenut akirot na, kopuputu akakiro. 15Mam ituŋa lu Emerasi, kwape iwomitotor yesi, naarai eraas isawan iuni luka apaaran; 16 konye erai na naenerit enabi Yoel ebe: 17‘Ebala Edeke ebe, Ejaun kapaarasia nukawasia, Abukokini awat kere Ekamoyo, Edwarete rwaru ikusidwe lusap ka lupesur, Eanyunete ikusikatumunak aitapoeta, Irujaete ikusimakio airujasia. 18Eebo apaarasia ŋun abukokini ikabulesin ka akabulesin Ekamoyo, edwarete kesi. 19Etodikini nukaumokin kokuju toma akuj, Ka aanyuneta kakwap kokwap, Aokot, ka akim, ka euria loka apuru; 20Ituluorio akoloŋ amuton, Elap da araun aokot, Eroko edoluno apaaran naka Ejakait, Nakapolon naejenikina. 21 Kosodi kanen, ŋin yeniwonei ekiror loka Ejakait itajario.’ 22 “Yes ikiliok luka Isirael, kopuputu akiro nu: Yesu loko Nasaret, ekiliokit lokitodiar Edeke mamakus kanuka aswamisio nukapedor, ka nukaumokin ka aanyuneta da nukiswamai Edeke kotomakeŋ kokidiŋikus, kwape ijeniata yesi ikulepek. 23 Yesu ŋol, lokijaikinio kanuka ainerun ka aijen naka Edeke ameun apeŋo, ipotu yesi kibubukis, koarata kakanin nuka ituŋa lukaronok. 24 Konye kitajaru ŋes Edeke, kolaca ariebo naka atwanare; naarai mam epedoro aikamunit ŋes. 25 Naarai inerit Daudi kanukeŋ ebe, ‘Abu kaanyununei Ejakait kakonyeneka, Naarai ejaenena akanika nakoteten, Kenyek airiaŋiriaŋa. 26Ŋes iyalamikinor ekatau, elakanari da akaŋajep; Bobo da iboie akakuan kotoma amun. 27 Naarai mam jo inyeini ekatau kokatwak, Karaida aijaikin Lokalaunanikon aibos. 28Kitejenik eoŋ irotin luka aijar; Kilelebikini eoŋ aiyalama kakonyenekon.’ 29 “Ikiliok iinacan, apedori atitiŋikin alimokin yes nuka papaawok Daudi ebe abu kotwana konukai, ejai da atesike mamawok kiton lolo. 30 Aso kanu keraar enabi, kojeni ebe iyapoikinit Edeke aiyaposit ebe, kotoma aurike edakakini ediopet oicoloŋoke, 31 abu ŋesi kogeik aanyun kinera da nuka ajarun naka Kristo ebe, mam aponi kinyeinai Okatwak, karaida akekuan aibos. 32Yesu ŋol abu Edeke kitajaru, kirai isio kere ikajenakake. 33 Aso kedaun aitodokaar kiton akan nakoteten naka Edeke, ka ainakinio kama ejai Papa aisumunet naka Emoyo Lokalaunan, abuku lo loianyunete loipupete da. 34 Naarai mam Daudi abu kodoka toma akuj; konye ebala ŋesi elopet ebe, ‘Abu Ejakait kotema Ekajakait ebe, Kiboikin akanika nakoteten. 35Aitodol naebwaikinia lukasurupokon kere Araut iicoloŋ yenika akejekon.’ 36 Aso kojen ekek kere loka Isirael kabeit ebe etarau Edeke ŋes Ejakait ka Kristo da, ŋes Yesu loipotu kibubukis.” 37 Nakiirariata ŋun koditasi ikecetauon, kobalas Petero ka ikiyakia ice ebe, “Kekonakis ai, iinacan?” 38 Kotema Petero atiar, “Kitoronikinos, kibatisaunos, ŋinituŋanan kayesi, kokiror loka Yesu Kristo, kanuka aisionio naka adiakanaretakus; kiinakinio ainakinet naka Emoyo Lokalaunan. 39 Naarai aisumunet erai kanukus ka ikusidwe da, ka ituŋa kere luelwaka, kere luenyarauni Ejakait Edekewok mamakeŋ.” 40 Kitejenu kes kakiro ace nuipu ka aicor da ebe, “Kitajarunos katur kana namagul.” 41 Aponi kibatisai ŋul lukecamunete akekirot, kiyatakinos ituŋa kapaaran kaŋin bala ilukumin iuni. 42 Kinyikokinito kaisisianakin naka ikiyakia, ka eidicane, ka aibil emugati, ka ailipasia da. 43Kokurianari ŋinituŋanan; kitwasamai ikiyakia aswam nukaumokin nuipu ka aanyuneta da. 44 Kojaas luiyuunito kere nepepe, kimorikikina koboro kere; 45Kogwelanasi luebeito ka iborokec ka akoranakin ituŋa kere, kwape kipudar ŋinituŋanan. 46 Kinyikokinito ŋinipaaran ketau ediopet kotoma oyekalu, ebilete emugati kore, komorete kalakara ka etau loelai, 47 ituritos Edeke kitojokito ituŋa kere. Kiyatanakini Ejakait otiaikec ŋinipaaran lukitajario.31Kosodete edokarete Petero ka Yokana alosit oyekalu esawa loka ailip, ŋes lokikanyetekaoŋon. 2 Ido adakitai etuŋanan Ioeŋwalit ameun kaurioke, lokibwaanakinio ŋinipaaran orute loka eyakalu loenyaritai Lokajokan, tetere ilipitoi nukaitim kama ejaas ituŋa luelomanarete toma oyekalu, 3Keanyu ŋol Petero ka Yokana elomarete oyekalu, kilip kes nukaitim. 4 Kosodi Petero kosesen ŋes nepepe ka Yokana, kotema atiar, “Kiteoi sio.” 5Koŋolia kes, komun adumun ibore kamakec. 6 Konye Petero kotema atiar, “Emamei eoŋ epuesa karaida esabu; konye yenikija keoŋ, kainakini ŋin, Kokiror loka Yesu Kristo loko Nasaret, kosakasak.” 7Kitiŋ akekan nakoteten, kitonyou ŋes: atipet kodomut akekeje ka ikekurunya agogoŋ. 8 Kodetu, kobwo, kogeu alosit; koloma oyekalu nepepe kakes, elosi, esomanari, iturit Edeke, 9Koanyut ituŋa kere elosi iturit Edeke. 10Kojenata ebe kerai ŋesi ŋopeŋol lokiboie ilipitoi nukaitim korute Lokajokan loka eyekalu: koumokis noi ŋin naedoikinit ŋes. 11 Naperiŋa ŋesi itiŋit Petero ka Yokana, kokerut ituŋa kere mama ejaas toma alomaret naenyaritai naka Solomon, eumokinitos noi. 12Nakeanyunia Petero, Koboŋok ituŋa ebe, “Yes ikiliok luka Isirael, kanukinyo iwumokinitotor nu, kanukinyo da kiseseniata sio, bala Iem kitolosi ŋes kakosipedor arai bo kakosiyoŋit Edeke? 13 Edeke loka Aburaam, ka loka Isaak, ka loka Yakob, Edeke loka lukapapaawok etopoloo Eketelepat Yesu; loipotu yesi kijaikis, ka aiŋer kakonyen nuka Pilato, nakekotor aosikin ŋes. 14 Konye yes ipotu koŋeroto Lokalaunan Lokadoliton, kilipa ainakinio ekaaran, 15 koarata Ekapolon loka aijar; lokitajaruni Edeke kotoma okatwak, Kirai isio ikekajenak. 16Kanuka aiyuun ekekiror ainak ekekiror etuŋanan lo agogoŋ, loianyunete loijenete da; eebo, aiyuun ŋin naejai mamakeŋ ainak lo aŋaleu naeleleba kakonyenekus kere. 17 “Kwana da iinacan, ajeni ebe iswamato ŋun kanu mam ijeniata, kwape eswamaata ikayaitokokus da. 18 Konye akiro kwa nukelimonokini Edeke ameun apeŋo kaituk nuka inabin kere ebe ibusakinit Kristoke aiticanio, etodoliki kwaŋin. 19 Aso do kitoronikinos, kibelokinos, komwatarai akusidiakanareta, tetere edolete apakio nuka aisikwarunio nuepote kama ejai Ejakait, 20Ido tetere ijukuni Kristo lokiseikinitai apeŋo, ŋes Yesu: 21loibusakinit akuj aisukunyikin aitodol apakio nuiteteunere akiro kere nukinerit Edeke kaituke nuka inabinoke lukalaunak ameun kageunet naka akwapin. 22 Naarai enerit teni Musa ebe, ‘Kitonyoikini yes Ejakait Edeke enabi kotoma oinacanakus loeputos keoŋ. Ŋol ŋes iirarete kotoma akiro kere nukilimokini yes. 23 Kosodi kanen, ŋinituŋanan yenimam iirari enabi ŋol emudiario kotuŋa.’ 24Eebo, inabin kere ameun ka Samuel ka luketupakinete ŋes, kere lukineras, kelimonokinete nuka apaarasia kanu. 25 Iraas yesi idwe luka inabin ka aitutuket ŋin nakitutuki Edeke kalukapapaakus, elimokini Aburaam ebe, ‘Isirereŋio atekerin kere nuka akwapin kotoma aurikon.’ 26 Kedau Edeke aitajarun eketelepat Yesu, kijuku ber mamakus, tetere kisirereŋi yes aibelokin ŋinidiopet kayesi kotoma nukaronokokus.”41 Napineras kituŋa, koponikis isasedotin ka ekapolokiton loka eyekalu ka Isadukayon, 2 ekadakinito noi naarai isisianakinete ituŋa, ka alimono kin ajarun naka lukatwak kotoma Yesu. 3 Kikamut kogolokis aidaris kiton tupuruc: naarai kitiboŋit akwap. 4 Konye kiyuunito luipu luapotu kiirasi akirot; etiai da loka ikiliok kodol kwaka ilukumin ikany. 5Kosodi kanen tupuruc, kotukonokinos ikayaitokokec ka imakio ka ikewadikak Yerusalem; 6ka Anas losasedoti lopeti, ka Kaiapa, ka Yokana, ka Alegesanda da, ka ŋul lukeraas luka ekek loka losasedoti lopeti. 7 Kedautu aisibwo kes kokidiŋ, kiŋita ebe, “Kanuka apedor anyoin, ka okiror enyoin, iswamaata yesi nu?” 8 Kosodi Petero, kilelebun Emoyo Lokalaunan, kotema kes atiar, “Yes ikayaitok luka ituŋa, ka imakio, 9arai kiiŋisi lolo akiro nukajokak nueswamakinio loŋwalas, epone lokitanaleunere, 10 kojenutu yesi kere, ka ituŋa kere luka Isirael ebe, Kokiror loka Yesu Kristo loko Nasaret, lokibubukinete yesi, lokitajaruni Edeke kokatwak, kanuka ŋol ebwoi etuŋanan lo kakonyenekus eŋalei, 11 ŋol ŋes amoru nakinerete yesi ikadukok, naebwaikin araut amoru nati naka agor. 12 Kwabo emamei aitajar kotoma ece kere: naarai emamei ecekiror kokwap kakuj loeinakinitai ituŋa, loibusakinitor oni aitajario.” 13Kosodi keanyutu atitiŋ naka Petero ka Yokana, komisiikis da ebe eraas ituŋa lumam isisianakinitai, luemamei aijen, koumokis; kojenut da ebe kejaas kaYesu. 14 Nakeanyuniata da lokitaŋaleunio ebwoi nepepe kakes, komamuut nueboŋokinete, 15Konye kicorakis kes alomar kaurianet, kineranakinos ebe, 16 “Kikonakini ai ituŋa lu? Naarai idelelei kotuŋa kere luiboiete koYerusalem ebe eswamai aanyunet naejenio kamakec; kwabo mam kipedori aiŋer. 17 Konye kinye akirot na aiyatakin aisiarakin otuŋa, ketukuriana kes, sirikinerata bobo kediotunanan kere kokiror kaŋol.” 18Konyaraut kes, kicorakis kinyeis einer cut karaida aisisianakin kokiror loka Yesu. 19 Konye koboŋokis Petero ka Yokana kotemasi kes atiar, “Arai edolit kakonyen nuka Edeke aiirar yes aitelekarit Edeke, kotuboto yesi: 20naarai mam kipedori ainyein einer akiro nukianyunit ka nukiirarit da.” 21Nakedauniata aitukurian bobo, koosikis, mam apedorete aitican kes kanuka ituŋa; naarai kitopolooritos ituŋa kere Edeke kanuka ŋun nukiswamao. 22Naarai keraas ikar luka etuŋanan lokiswamakinio naanyunet ŋin naka aitaŋaleun luedeparito akaisaoŋon. 23Nakeosikinere koloto neejaas ikecetuŋa, kitatamikis kes akiro kere nukelimokinete isasedotin lupeti ka imakio. 24 Nakiirariata, kikeut ikeceporotoi nepepe mama ejai Edeke, kotemasi atiar, “Wu Ejakait, lokisubi akuj, ka akwap, ka aŋolol, ka kere da luejaas tomakec: 25 ibu kiner kotoma Emoyo Lokalaunan kaituk naka papaakosi Daudi ekonitelepat ebe, ‘Kanukinyo enyunyuratatar lukacekwapin, Ka ituŋa da itetemonoroto aamameak? 26Etemonokinos ikabakan luka akwapin, Etukonokinos ikayaitok nepepe, Asurokin Ejakait, ka Lokinyonyoikitonoke akinyet.’ 27 Naarai abeit etukonokinos Kerode ka Pontio Pilato, nepepe ka Imo ka ituŋa luka Isirael ore lo asurokin ekonitelepat lokalaunan Yesu, loinyonyoikinit akinyet, 28 tetere iswamaete kere nuelosikinit akonikan, ka nuinerunit ŋol ajaun. 29 Kwana da, wu Ejakait, kosesen aitukurianakec: koinak ikonibulesin einer akirot katitiŋ kere, 30nairioria akonikan aitaŋaleun; kiswamai da aanyuneta ka nukaumokin kanuka ekiror loka ekonitelepat lokalaunan Yesu.” 31 Nakedauniata ailip, kitamaranai aibois kama ketukonokina; kilelebunos kere Emoyo Lokalaunan, kinerata akirot naka Edeke katitiŋ. 32 Kejaas ekodet kere loka luiyuunito ketau ediopet ka aijar adiopet: kwabo emamei idiopet yenikebala ebe ibore kere yenejaatar erai yenike; dimarai emorikikinito iboro kere. 33 Kitejenut ikiyakia ajarun naka Ejakait Yesu kapedor naepol, kojai asianut naepol mamakec kere. 34 Amamei yenilwaritoi kotomakec, naarai ituŋa kere lukejaas amanat arai itogoi, apotu kogwelanasi, koyaata etiai loka iboro lukegwelunete 35kibwaikis akejen nuka ikiyakia: kokorakinai ŋinituŋanan kwape kipudar. 36 Yosep da, lokenyaraete ikiyakia Baranaba, (apolouke Okoku loka aitalakaar) Elebit, lokeurikinio Kupuro, 37kejai ŋes amana kogwela, koyau apesan kibwaik akejen nuka ikiyakia.51Konye ekiliokit ediopet, ekekiror Anania, ka akeberu Sapira, abu kogwela ibore yenajaatar, 2 kiŋadak acepesan kotiai, kojeni akeberu da, koyau ace, kibwaik akejen nuka ikiyakia. 3 Konye kotema Petero atiar, “Anania, kanukinyo kisilelebia Satan etaukon aimod Emoyo Lokalaunan, ka aiŋadakin da acepesan kotiai loka amana? 4Arai kesalakinit mam egwelara, mam kereka kesalit erai nakon? Nakedaunere agwelar, mam kerai nakakonipedor? Kikonakini bo ai ibwaikin akirot ŋin otaukon? Mam imodit ituŋa konye Edeke.” 5Nakiiraria Anania akiro ŋun, kibiror kotwana. Kokuriakaros ituŋa kere noi lukiirarete ŋun. 6Konyout ikatumunak konunukoto, kodakasi kiŋa, kidaata. 7Ketuboros bala isawan iuni kolom akeberu da komam ejeni nukedoikinete. 8Kotema Petero atiar, “Kolimokinai, ipotu kereka kogwelasi amana kotiai kaŋol” Kotema atiar, “Eebo, kotiai kaŋol.” 9Kotema Petero atiar, “Kanukinyo ineruniata akodun Emoyo loka Ejakait? Koany, akejen nuka luedaete okilenikon ejaas okek, kidakarete jo da.” 10Atipet kibirokin akejeke kotwana. Kolomut ikatumunak kodumut ketwana, kodakasi kiŋa, kidaata kidunyas kokilenike. 11Kokurianar Ekanisa kere, ka ituŋa kere lukiirarete ŋun. 12 Kiswamai aanyuneta ka nukaumokin nuipu kotuŋa kakanin nuka ikiyakia. Kojaenenas kere nepepe kediopetau alomaret naka Solomon. 13Ice da mam apotu kotitiŋikis aimorikikin kakes, konye ituŋa kitopoloorito kes. 14 Kiyatanakinos lukiyuunito mama ejai Ejakait, ikepuak, ikiliok ka aŋor; 15 kodakununete lukadekak orotin, ka aiperionokin ojam ka opalisin, tetere naitorio Petero kodolokini etoribeke ice kakesi. 16Kotukonokinos da ituŋa lukoreria lukeapias ko Yerusalem, koyaununete lukadekak ka ŋul lukiticanenete ajokin nueroko; kitaŋaleunoi kes kere. 17 Konye konyou losasedoti lopeti ka lukejaas nepepe kaŋes kere, ŋes erioŋet loka Isadukayon, ileleba ekolo, 18Kikamut ikiyakia koenikis aidaris naka ituŋa kere. 19 Konye kuare koŋaa emalaika loka Ejakait ikekia luka aidaris, kitolom kes kotema atiar, 20“Koloto, kobwaata koyekalu kolimokis ituŋa akiro kere nuka Aijar kana.” 21Nakiirariata kesi, kolomasi oyekalu tupuruc sek, kisisianakis. Konye kobu losasedoti lopeti, ka ŋul lukejaas nepepe kaŋes, konyaraut aurianet, ka imakio kere luka idwe luka Isirael, kiyakiasi ituŋa aidaris tetere eyaunete kes. 22Konye nakedolioto ikejaanakinak mam eanyuna kesi kaidaris; koboŋut kolimokis kes ebe, 23“Kidum aidaris eenen ejok, ebwoete ikedarak da kokekia; konye nakiŋaaria mam edumuna idiotuŋanan kotoma.” 24Nakiiraria ekapolokiton loka eyekalu ka isasedotin lupeti akiro ŋun, kobuonokinos noi kanukec ebe, “Ikonakini bo do akirot na ai?” 25Kobu etuŋanan kolimok kes ebe, “Ituŋa ŋul lukienikinito yesi aidaris ejaas toma oyekalu, ebwoete isisianakinete ituŋa.” 26Kosodi kolot ekapolokiton nepepe ka ikejaanakinak koomata kes, konye mere kagogoŋ, naarai kekuriaka ituŋa kinyeis aibiribir kes kamor. 27Nakeyauniata, kibwaikis akonyen nuka aurianet. Kiŋit losasedoti lopeti ebe, 28 “Kipou kecorakis yes kagogoŋ ebe Sirikisisianakis kokiror kalo; ido koany, ilelebata Yerusalem kaisisianakinikus, ikotosi ayaŋaun aokot nuka etuŋanan kaŋol mamakosi.” 29 Konye koboŋokis Petero ka ikiyakia ebe, “Kibusakinit arimarit Edeke aitelekarit ituŋa. 30 Abu Edeke loka lukapapaawok kitajaru Yesu, lokiarete kaikajakin okitoi. 31 Etopoloo Edeke ŋes kakanike nakoteten korau Lokapolon ka Eketajaran, koinak Isirael aitoronokin ka aisionio adiakanareta. 32 Kirai isio ikajenak luka akiro kaŋun, nepepe ka Emoyo Lokalaunan, loainak Edeke kere luerimasi ŋes.” 33 Nakiirariata ŋun, konomos noi ikecetauon, kinerut aiar kes. 34 Konye etuŋanan ediopet, Eparisayot ekekiror Gamaliel, ekesisianakinan loka ikisila, lokeyonito ituŋa kere, kobwo kaurianet, kicorak kitolomarai ber ikiyakia kiŋa. 35Kotema kes atiar, “Yes ikiliok luka Isirael, kocoito nuiswamakinete ituŋa ŋul. 36 Naarai eroko apaarasia nu edoluno abu Teudas konyou, kituro ebe erai lokapolon; kimorikikinos ŋes kituŋa bala akwat aoŋon; konye koarai ŋes, kere da lukerimarete ŋes kisiarakinos, mam eraun ibore. 37 Akaulo kaŋol konyou Yuda Egalilayat, kapaarasia nuka aibil akwes, kiria ice kotuŋa atupar ŋes; ŋes da abu koolio; kere da lukerimarete ŋes kisiarakinos. 38 Kwana da katemari yes atiar, Kinaca ituŋa ŋul, kinyeisi kes; naarai akirot na arai aswam na, arai erai naka ituŋa, eoliori; 39 konye arai erai naka Edeke, mam ipedorete aitoolior kes; kinyeis diat atakanun bala itijiete Edeke.” 40 Kocamut akekiro; nakenyarauniata ikiyakia, kodaata, kicorakis kes kinyeis einer kokiror loka Yesu, koosikis. 41 Aso kolomut kesi kaurianet, iyalamasi naarai imaritai luibusakinit aiticanio kanuka Ekiror kaŋol. 42 Ido ŋinipaaran, koyekalu ka oreria da mam inyeina aisisianakin ka alimonokin nuka Yesu ebe ŋes Kristo.61 Kapaarasia kaŋun nakiyatakinor etiai loka ikesisiak, kojau aŋuurian naka Iyonanin aluikin Iburanian naarai aponi kopalunai apuserunukec kotoma aijaanakin naka ŋinipaaran. 2Konyaraut lutomon ka luarei ekodet ŋol loka ikesisiak, kotemasi atiar, “Mam ibusakinit sio ainyein akirot naka Edeke aijaanakin komesan. 3 Aso do, iinacan, koseutu ituŋa ikanykaarei kokidiŋikus, luijenete ebe ejokuka, luileleba Emoyo ka acoa, lukipedori adakakin oswam na. 4Konye sio kinyikokini kotoma ailip ka aijaanakin naka akirot.” 5 Kitojokai akirot na kokodet kere, koseut Sitepan etuŋanan loileleba aiyuun ka Emoyo Lokalaunan, ka Pilip, ka Porokoro, ka Nikanor, ka Timon, ka Pamena, ka Nikolao, ekebelokinon loko Antiokia. 6 Kibwaikis ŋul akonyen nuka ikiyakia, kosodete nakedauniata ailip, kidokokis kes akecekanin. 7 Konyanyaar akirot naka Edeke; kiyatakin noi etiai loka ikesisiak ko Yerusalem, korimasi luipu lukosasedotin aiyuun ŋin. 8Kilelebun Sitepan asianut ka apedor, kiswama nukaumokin nukos ka aanyuneta kotuŋa, 9Konye ice kotuŋa lukatukos naanyaritai atukos naka Luaosikinitai, ka luko Kurene, ka luko Alegesanderia, ice da lukoKilikia ka Asia, konyoutu kopegata ka Sitepan. 10 Konye mam apedorete abwoikin acoa ka Emoyo lokinerar. 11 Kosodete kicora ituŋa, lukebalas ebe, “Kipou keirasi ŋol inera akiro nukainyanakin Musa ka Edeke.” 12Kisidiko ituŋa ka imakio ka ikewadikak, koponikis ŋes, kikamut, koyaŋaasi aurianet, 13 kisibwaata ikajenak lukeŋalak luabalas ebe, “Etuŋanan lo mam inyeinit einer akiro nuka asurokin aibois na nakalaunan ka ikisila da; 14naarai kipou keirasi ŋes inera ebe ebuni Yesu ŋol Enasarayot amudiar aibois na, ka ailocokin iponesio lukiinakini Musa oni.” 15Koŋanyakis ituŋa kere lukiboiete kaurianet ŋes akonyen, koanyut ekereet eputosi bala loka emalaika.71Kotema losasedoti lopeti atiar, “Ikote kereka akiro ŋun nen?” 2 Kosodi Sitepan ebe, “Iinacan ka lukapapa da, kiirarai. Abu Edeke loka aibuses kotakanik papaawok Aburaam, nakejaar Mesopotamia, eroko iboikino Karan, 3 kotema ŋes atiar, ‘Konyou kotoma akwapukon, ka ajenakon, kolot akwap naketodikini.’ 4 Kosodi konyou kakwap naka Ikaludean, kiboikin Karan. Ketwana papake kitonyou Edeke ŋes kanen kiton akwap na naiboito yesi kwana; 5 kwabo mam keinakinit adioirumet, karaida nekicakakina akeju, konye kisumun ainakin ŋes airum, ka aurike naetupanakini, nakerokor ŋes ikoku emamei. 6 Kinera Edeke nuikote nen ebe eraun akeur apejonon kotoma akwap naka ituŋa ice, luitubulesenete kes, ikonakinete kes erono apak naka ikar akwat aoŋon. 7 Kobala Edeke ebe, ‘Atubokini eoŋ ateker ŋin naitubulesene kes; akaulo kaŋun elomunete, kamaete eoŋ kaibois kana.’ 8 Koinak ŋes aitutuket naka aikep. Kouri do Aburaam Isaak, kokep kapaaran nakikanyetekauni; Isaak kouri Yakob, Yakob da kouri lukapapaawok lutomon ka luarei. 9 “Koreata lukapapaawok Yosep, kogwelasi Misiri. Kojai Edeke nenipe kaŋes. 10 Kolem ŋes kotoma aiticanioke kere, koinak aminunio ka acoa kakonyen nuka Parao, ekabaka loko Misiri, kitarau ŋes ekayaiton loko Misiri kere, ka eketogo da kere. 11 Kosodi kojau ebeli akwap kere nako Misiri ka Kanaan da, ka aiticanio naepol, lukapapaawok da mam edumuna inyamat lukedaunito. 12 Konye nakiiraria Yakob ebe ejaas akima Misiri, kijuka lukapapaawok irwan nasodit. 13 Kiton alosit nakiareit kitejenikin Yosep ikeinacan, kojenun do ateker naka Yosep kama ka Parao. 14 Kijuka Yosep, konyarau Yakob papake, ka akejena kere, ituŋa akaisakanykaarei ka lukany. 15 Kijesar Yakob Misiri, Kotwana, ŋes ka lukapapaawok; 16 koyaŋaarai kiton Sekem, kidaikinai toma ates ya nakegwelit Aburaam kotiai loka epuesa kama ejaas odwe luka Kamor koSekem. 17 “Konye nakeapuunia apak naka aisumunet naabu Edeke koinak Aburaam, kipuaros ituŋa, kiyatakinos noi koMisiri, 18aitodol naanyounio ekabaka ece koMisiri, lomam ajeni Yosep. 19 Koŋopik ŋol atekerewok, kikonak lukapapaawok erono, kicorak acakanar ikecemukerun tetere mam ejarete. 20 Kouriai Musa kapak kaŋin, kerai ŋesi yenikejok noi kama ejai Edeke. Kosaai ilapio iuni kotogo loka papake; 21 kiton neacakarere, kiraru akoku naka Parao, kitan ŋes kwape ikekoku. 22Kituutooroi Musa kacoa kere nako Misiri, kogogoŋor kotoma akiro ka aswamisio da. 23 “Kedolo ikekaru bala akaisaoŋon, kineru kotauke alosit aanyun ikeinacan idwe luka Isirael. 24 Koany ediopet ikonakinio erono, koyu ŋol lokereitai kinyaŋak kinom Emisiriat: 25koomit ebe ejenunete iinacanake ebe ainak Edeke aitajario kakanike; konye mam apotu kojenut. 26 Kapaaran naatupakini kitakanikin kes nakecelatar, kokoto aidiek kes, kobala ebe, ‘Ikatuŋa, iraas yesi iinacan, kanukinyo ikonanakinotor erono?’ 27 Konye lokikonakini onaceke erono koremo ŋes, kobala ebe, ‘Iŋai bo kiidakakini jo araut ekayaiton ka ekatubon kamakosi? 28Ikoto kereka aiar eoŋ da, kwape bian iaria Emisiriat?’ 29 Koker Musa kakirot kaŋin, korau epejonon kakwap nako Midian, kouru kaŋina idwe iarei. 30 “Kosodi ketuboros ikar akaisaoŋon, kitakanikin emalaika loka Ejakait kotoma amodiŋ naka Emoru Sinai, kaipelonoreta nuka akim kotoma okiot. 31Nakeanyunia Musa, koumok nuaanyu; nakikunyakinia aanyun, kobu eporoto loka Ejakait ebe, 32 ‘Arai eoŋ Edeke loka lukapapaakon, Edeke loka Aburaam, ka loka Isaak, ka loka Yakob da.’ Komaran Musa, komam etitiŋikini asesen. 33 Kotema Ejakait ŋes atiar, ‘Kolaca amuk kakejenekon, naarai aibois naibwoia erai akwap nakalaunan. 34 Abeit aany aiticanio naka ikatuŋa luejaas Misiri, eira da eidinyikec, ejesun eoŋ ayuun kes. Aso kwana, kejukari jo Misiri.’ 35 “Musa ŋol lokegirete kobalas ebe, ‘Iŋai bo kiidakakini jo araut ekayaiton ka ekatubon da?’ ŋes kijukari Edeke araut ekayaiton ka ekayuunan kakan naka emalaika lokitakanikin kotoma okiot. 36 Ŋol ŋes kitolomuni kes, kedau aswam nukaumokin ka aanyuneta koMisiri ka Aŋolol Nakareŋan, kamodiŋ da apak naka ikar akaisaoŋon. 37 Ŋes Musa ŋol lokelimokini Isiraelin ebe, ‘Kitonyoikini Edeke yes enabi kotoma oinacanakus kwape kaeoŋ.’ 38 Ŋol ŋol loajai okanisa toma amodiŋ nepepe ka emalaika Iokineras kaŋes kotoma Moru Sinai, ido kalukapapaawok; ŋes lokedumuni akiro nuka aijar ainakin oni. 39 Kogiroto lukapapaawok arimar ŋes, konye koremosi, kinyakasi ikecetauon Misiri, 40 kolimokis Aaron ebe, ‘Kosubakinai sio idekesio lukiŋarenikinete; naarai mam kijeni nuadoikis Musa ŋol, lokiitolomuni kotoma akwap nako Misiri.’ 41 Kapaarasia kaŋun kosubut itaok, koinakis asuban mama ejai aput ŋin, kolelakis aswam naka akaninikec. 42 Konye kibelokin Edeke, kojalak tetere emaete ajore naka akuj; kwape kiwadikatere oitabo loka inabin ebe, ‘Ipotu kereka koinakis eoŋ itiaŋ luearitai ka asuban, Ŋo ekek loka Isirael, ikar akaisaoŋon kamodiŋ? 43Ipotu kodakasi ewema loka Molok, Ka aacerit naka edeke Repan, Aputosia nuiswamata tetere imaete: Ketwobosi yes koloto neelwana adepar Babulon.’ 44 “Kejaas lukapapaawok ewema loka aitejenunet kamodiŋ, kwape kicorakinia lokineras ka Musa, aswam koriakas kaput nakeanyuni. 45 Apotu lukapapaawok, kabeikinikec kitolomut ŋes nepepe ka Yosua, nakebeata airumet naka atekerin, nuereŋear Edeke kakonyen nuka lukapapaawok, kiton apaarasia nuka Daudi; 46 lokedumun asianut kakonyen nuka Edeke, kilip adumakin Edeke loka Yakob eyekalu. 47 Konye abu Solomon kodukok ŋes etogo. 48 Kwabo Loejai kuju kakuj mam iboie kotogoi luiswamao kakanin; kwape inerar enabi ebe, 49 ‘Akuj ŋes ekaicoloŋ, Ka akwapin da iicoloŋ yenika akakeje, Ebala Ejakait ebe, Etogo enyoin kidukokinete eoŋ? Arai aibois anyoin naebworaria? 50Mere kereka akakan iswamat ŋun kere?’ 51 “Yes lueninik imurisiŋa, lumam ekepitai itauon ka aki, irebirebete tiritir Emoyo Lokalaunan. Kwape eswamaata lukapapaakus, yes da iswamaete kwape kwaŋin. 52 Enabi ali lomam lukapapaakus areito? Apotu koarata lukedwarete akiro nuka abunore naka Ekadoliton; lokwana ibilakis yesi ebotet, koarata da, 53 yes luipotu kodumut ikisila kwape icorakinitotor imalaikan, komam iricito.” 54 Kosodi nakiirariata akiro ŋun, konomos noi itauonokec, kiriamanakis ikel asurokinia ŋes. 55 Konye Sitepan kileleba Emoyo Lokalaunan, kosesen toma akuj, koany aibuses naka Edeke, ka Yesu da ebwoi kakan nakoteten naka Edeke; 56kotema atiar, “Koany, aanyuni akuj eŋaara, ka Okoku loka etuŋanan ebwoi kakan nakoteten naka Edeke.” 57Konye koresiaros keporoto loepol, kisikakis akeceki, kosomakinos ketau ediopet. 58 Kireŋeasi kore, kibiribiroto kamor; kibwaikis ikajenak ikecenapen akeje nuka ekatumunan loanyaritai Saul. 59 Kibiribiroto Sitepan kamor, kilip ŋesi ebe, “Ejakait Yesu, kiira ekamoyo.” 60 Kokukokin kiworo keporoto loepol ebe, “Ejakait, sirikimarak kes aronis na.” Kedau einer ŋun, kojotoor.81 Kitojokit Saul da akeario. Kapaaran kaŋin kodakun aimanit naepol aluikin ekanisa lokejai Yerusalem; kisiarakinos kere akwap nako Yudaya ka Samaria, dimarai ikiyakia. 2 Apotu ituŋa lueyoŋito Edeke kidaata Sitepan, kokuudianata da ŋes noi. 3 Konye komuna Saul ekanisa, kolomanari ŋolitogo, kidilidiliununei ikiliok ka aŋor da, kibwaik aidaris. 4Kosodete ŋul lukisiarakinio koloto elimonokinete akirot. 5 Kijesar Pilip ore loko Samaria, kolimonok Kristo. 6Kopupokis ikodeta kacoit ketau ediopet nukinera Pilip, naiirariata ka aanyun da aanyuneta nukiswamai. 7 Naarai apotu ajokin nuipu nueroko kolomut kama kaŋul lukikamunito, kiworoto keporoto loepol: luipu da lukasenyak ka iŋwalasik kitaŋaleunoi. 8 Kojau aiyalama naepol ore ŋol. 9Konye kojai etuŋanan ekekiror Simon, lolem eswamaenenei nukecudet kore kaŋol, kisiwumok ituŋa luko Samaria, kobala ebe ŋes lokapolon. 10Kopupokito kesi kere kacoit, ameun ka yenididi kiton yenikapolon kobalas ebe, “Etuŋanan lo erai apedor naka Edeke naenyaritai Nakapolon.” 11Kopupokito kacoit, naarai abu kisiwumok kes apak naepol kanuka ecudeteke. 12 Konye nakiyuuniata Pilip elimonokin akiro nukajokak nuka ajakanut naka Edeke, ka ekiror da loka Yesu Kristo, kibatisai, ikiliok ka aŋor da. 13Simon da elopet abu kiyu; kedau aibatisao koupakinos ka Pilip. Koumok nakeanyunia aanyuneta ka nukapedor nukapolok nukiswamai Pilip. 14 Kosodete nakiirariata ikiyakia lukejaas Yerusalem ebe eyuu Samaria akirot naka Edeke, kiyakiasi Petero ka Yokana mama ejaas, 15lukijesaros kilipakis kes, tetere edumunete Emoyo Lokalaunan: 16naarai mam ber kedoikinit idio kakesi, konye ebatisatai ber kokiror loka Ejakait Yesu. 17 Kosodete kidokokis kes akecekanin, kodumut do Emoyo Lokalaunan, 18Konye nakeanyunia Simon ebe einakinio Emoyo Lokalaunan kanuka aidokokin akanin nuka ikiyakia, kokoto ainakin kes arupian, 19kobala ebe, “Koinakinai eoŋ da apedor na, tetere ŋinituŋanan yenedokokini akakanin kodumun Emoyo Lokalaunan.” 20Konye kotema Petero atiar, “Koolio epuesakon nepepe kajo; naarai iwomit ebe idumuni ainakinet naka Edeke kanuka arupian. 21 Emamei jo akorakinet karaida ewai kotoma akirot kana; naarai mam itenara ekonitau kakonyen nuka Edeke. 22Aso kitoronikin aronisikon na, kilip Ejakait, elemuni kisionii aomisioit na naketaukon. 23 Naarai kaanyu jo ileleba adwaris kwape kepiu, ido da kienit elomorut loka amamus adolit.” 24Koboŋok Simon ebe, “Kilipakinai yesi eoŋ kama ejai Ejakait, kenyeis akiro ŋun nuinerata adolokin eoŋ.” 25Kosodi nakedauniata aitejenun ka alimonokin akirot naka Ejakait, koboŋos! Yerusalem, elimonokinete Akiro Nukajokak oreria luipu luka Isamarian. 26Konye kinerata emalaika loka Ejakait ka Pilip, kotema atiar, “Konyou kobe ari naka eŋalakimak kiton orot loijesar anyoun ko Yerusalem alosit Gasa.” Ŋes amodiŋ. 27 Konyou kolot. Ido koany, etuŋanan loko Etiopia, ebwacit, ejakait loka Kadake akabaka naka Etiopia, loapolokinit abarake kere, kelosit ŋesi Yerusalem aima; 28eboŋuni ŋesi iboie kagalike, esiomi eitabo loka enabi Isaia. 29Kotema Emoyo Pilip atiar, “Kikunyak agali ŋin, koupakinos kaŋes.” 30Aso koker Pilip mama ejai, kiira ŋes esiomi eitabo loka enabi Isaia, kiŋit ebe, “Ijeni kereka ijo ŋun nuisiomi?” 31 Kobala ebe, “Ekonakini ai ajenuni, arai mam keŋarenikinit ituŋanan?” Kiŋaiŋa ŋesi Pilip adokar aiboikin kaŋes. 32 Ewai loka nukiwadikatai lokisiomi ŋesi ŋes lota ebe: “Koyaŋaarai aario kwape kamerekek; Ido kwape ililiŋia ikoku yenika amerekek kama kekatubon ajul, Kwape kwaŋin mam ŋes eoŋari akeituk; 33Kaitisilioke aponi kolemarai aketubokinio; Iŋai bo epedori aitejenikin aketur? Naarai alemar akeijar kakwap.” 34Kotema ebwacit Pilip atiar, “Keŋaiŋait, kinera enabi akiro ŋun kanuka ŋai? Eraas kereka akekiro, arai bo nuka ece?” 35Kooŋ Pilip akeituk, kogeu kanakiwadikatai kaŋin kolimok ŋes akiro nukajokak nuka Yesu. 36 Napelosete korot, kodoloto neajaas akip; kotema ebwacit atiar, “Koany, akipi nu; inyo ca kesimikit eoŋ aibatisao?” [37Kotema Pilip atiar, “Arai iyuunit kekonitau kere, epedoros.” Koboŋok ebe, “Eyuunit ebe Erai Yesu Kristo Okoku loka Edeke.”] 38Kicorak agali aibwo; kijesaros kesi iarei akipi, Pilip ka ebwacit, kibatisa ŋes. 39 Kedaut adokun kakipi abu Emoyo loka Ejakait kourupo Pilip; mam bobo ebwacit eanyuna, konye kiyatak akelosit iyalama. 40 Konye kotakanu Pilip kotoma Asoto, nakitoritor kolimonok akiro nukajokak koreria kere, kiton adolore Kaisarea.91 Konye Saul, kiyatakinite nukaitukurian ka nukaiar ikesisiak luka Ejakait, kolot mama ejai losasedoti lopeti, 2kilip ibaluan lulosit Damasiko lukiwadikakinitai atukosia, tetere arai kedum ituŋa luka Erot kalo, ikiliok ka aŋor da, koeni ka ayaun Yerusalem. 3 Ido napelosi eapikinit Damasiko, atipet kimiliau aica nakebuni kokuju airiamar ŋes. 4Kibirokin kwap, kiira eporoto lokelimokini ŋes ebe, “Saul, Saul, kanukinyo kimanitor eoŋ?” 5 Kobala ebe, “Ijo iŋai, Ejakait?” Kotema ŋes atiar, “Eoŋ Yesu loimanit ijo. 6Konye konyou, koloma ore, kilimokinio nuibusakinit aswam.” 7Ituŋa da lukeupas kaŋes, kobwaata ililiŋete, iirarete eporoto, komam eanyunete etuŋanan, 8Konyou Saul kokwap; komudukaka akekonyen, komam eanyuni ibore; kitiŋata akan, korikosi ŋes kiton Damasiko, 9Kodau apaarasia auni komam eseseni, komam enyami da karaida aimat. 10 Kojai ekesisian Damasiko, ekekiror Anania, Kolimok Ejakait ŋol kaitapoet ebe, “Anania,” Kobala ebe, “Eoŋ lo, Ejakait.” 11 Kotema Ejakait ŋes atiar, “Konyou, kolot orot loenyaritai Loitenara, kiŋitu kotogo loka Yuda etuŋanan loenyaritai Saul loko Taruso; naarai koany, ilipi, 12eanyunit da etuŋanan ekekiror Anania, elomari ka aidokokin ŋes akanin, tetere ekwenyuni bobo.” 13Konye Koboŋok Anania ebe, “Ejakait, abu keira akiro nuka etuŋanan kaŋol kotuŋa luipu, nukaronok nuipu nuabu kiswamak lukalaunakakon, koYerusalem; 14 kiton ne da ejai ŋes apolou naebuni kaneejaas lusasedotin lupeti ajen kere lukiwoneete ekonikiror.” 15 Konye kotema Ejakait ŋes atiar, “Kolot, naarai erai ŋol ibore yeneseunitai kamakaŋ adakar ekakiror kakonyen nuka atekerin ka ikabakan ka idwe luka Isirael; 16 naarai etodikini ŋes nuipu nuibusakinit ŋes aiticanio kanuka ekakiror.” 17Kolot do Anania koloma togo. Kidokok akanin, kotema atiar, “Onac Saul, keyaku Ejakait, ŋes Yesu lokiitakanikini jo korot lokibunio, tetere ikwenyuni bobo, kilelebi Emoyo Lokalaunan.” 18Atipet kodooto iboro kakonyeneke bala aabel, kokweny. Konyou kibatisai, 19konyam inyamat, kodum agogoŋ. Kiboioto apaarasia ace ka ikesisiak luajaas Damasiko. 20Atipet kolimonok Yesu katukosia ebe, “Ŋes Okoku loka Edeke.” 21 Koumokis lukiirarete kere, kotemasi atiar, “Mere lo etuŋanan loabu komuna ŋul lukiwoneete ekiror ŋol koYerusalem? Ne da abu kobunite kanuka akirot kaŋin ajen kes ka ayaŋaar mama ejaas isasedotin lupeti.” 22 Konye kiyatak Saul agogoŋoor, kisitirira Iyudayan lukejaas Damasiko, itogogoŋit ebe erai ŋol Kristo. 23 Kosodi ketuboros apaarasia nuipu, kinerut Iyudayan aiar ŋes, 24 konye kojenu Saul ekecebotet. Kidarata korutei paaran ka kuare da tetere earete ŋes, 25Konye koyaŋaasi ikekesisiak ŋes kuare, kitodokasi karwatat, kijoliliosi kobukit. 26 Kosodi kedol ŋesi Yerusalem, abu kotam aimorikikin kikesisiak; kokuriakaros ŋes kere, naarai mam eyuunito ebe kerai ekesisian. 27 Konye Baranaba koyaŋa ŋes, kitoloma mama ejaas ikiyakia, kitejen kes kwape keanyunia Ejakait koroto, ebe da kinera kaŋes, ido kwape kelimonokinia katitiŋ kokiror loka Yesu koDamasiko. 28Kojau kakes kolomanari kolomununei da koYerusalem, 29elimonokini katitiŋ kokiror loka Ejakait; inera ka apeg ka Iyonanin; konye komootos kesi aiar ŋes. 30 Konye nakejenuniata iinacan, koyaŋaasi ŋes Kaisarea, kijukasi alosit Taruso. 31Kwaŋin kinapakina ekanisa anatar Yudaya kere ka Galilaya ka Samaria da, kodukoi; ido kiyatanakin kolosenenei kayoŋit Ejakait, ka aitalakar naka Emoyo Lokalaunan. 32Kosodi kanen nakimanimania Petero owaitin kere, kijesar mama ejaas lukalaunak lukiboiete koLuda. 33Kanen kodum etuŋanan ekekiror Aenea, eperi koitada adaun ikar ikanykauni, naarai kesenyit. 34Kotema Petero ŋes atiar, “Aenea, kitaŋaleu jo Yesu Kristo; konyou, kopet ekoniitada.” Atipet konyou. 35Koanyutu ŋes ituŋa kere lukiboiete koLuda, ka Saron, kibelokinos mama ejai Ejakait. 36Kojai akesisian koYopa, ekekiror Tabita, apolouke ebe Dorokas arai Amiam. Eleleba aberu ŋin aswamisio nuejok ka nukaitim nuakorenenei. 37Kosodi kanen kapaarasia kaŋun kodekakin, kotwana; nakedauniata ailoŋ, kiperikis agola nakokuju. 38Kosodi kanueapiatar Luda ka Yopa, kiirarito ikesisiak ebe ejai Petero ŋina, kiyakiasi ituŋa iarei mamakeŋ, kiŋaiŋaata ebe, “Sirikiyap abunore mamakosi.” 39Konyou do Petero kouparos kakes. Nakedolio, koyaŋaasi agola nakokuju. Kobwaata apuserun kere aapu kaŋes emonyete, ka aitodikin ikootin ka inapen lukedonyenenei Dorokas apak nakejaar kakes. 40 Konye kitoloma Petero kes kere kiŋa, kokukokin, kilip; kedau, kibelokin neejai akuan, kotema atiar, “Tabita, konyou.” Kokwenyu ŋesi; nakeanyunia Petero, konyou kiboikin. 41 Koinak ŋes akekan kitonyou; kosodi konyarau lukalaunak ka apuserun, kitodia ŋes ejari. 42Kojenunai kore kere loko Yopa, kiyuutu da ituŋa luipu Ejakait. 43 Kosodi kosalak Petero Yopa apaarasia nuipu togo loka etuŋanan ekekiror Simon, ekekisikisan imukulen.101 Kojai etuŋanan koKaisarea ekekiror Korunelio, ekapolokiton loka erioŋet loenyaritai Italian, 2etuŋanan loeyoŋit Edeke, nepepe ka lukokaleke kere, lokekorenenei nukaitim nuipu otuŋa, ka ailipenen da Edeke tir. 3 Kosawa lokikanyetekaoŋon loka apaaran koany kaitapoet kaitebeikin emalaika loka Edeke ebunit neejai ŋesi, lokinera ebe, “Korunelio.” 4Kosesen noi, kokurianar, kobala ebe, “Anyoika, Ejakait?” Kotema ŋes atiar, “Adokasi ailipikon ka aikorokon araun aisitunet akonyen nuka Edeke. 5Aso kwana kiyakia ituŋa Yopa, konyarau Simon loenyaritai Petero: 6 Ipejokinit ŋesi Simon, ekekisikisan imukulen, loejai eketogo ariri kaŋolol.” 7Nakelosio emalaika loeneras kaŋes, konyarau iarei kokejaanakinakake lukotogo, ka eserikalet ediopet loeyoŋit Edeke kotoma kaŋul kalukijaanakinete ŋes tiritir; 8nakedaunia aitatamikin akiro kere, kijuka kes Yopa. 9Kapaaran naatupakini, nakelosioto, ka aapikin ere, kodoka Petero kuju oswi loketogo ailip, kosawan ikanykape luka paaran. 10Korieb noi eteŋei, kokoto ainyam: konye napitemonokinio, kogelakin ekemoyo, 11 koany akuj eŋaara, ka ibore yenejesunitai, bala aisuka naepol, ijoliliunitoi kwap kowaitin iwoŋon, 12Nakejaas iponesio kere luka itiaŋ, ka lueliatos kakwap, ka ikweny luka apak, 13Kobu eporoto ebe, “Petero, konyou; koar, konyam.” 14 Konye kotema Petero atiar, “Mam cut, Ejakait; naarai mam anyamenenei ibore yeniketal, karaida yenimam elai.” 15 Kobu eporoto irwan nakiareit ebe, “Luitalaunit Edeke, sirikinyara ijo luketal.” 16Kiswama akirot ŋin irwan auni, atipet kinyakarai ibore ii toma akuj. 17Napebuonokin Petero kotauke apolou naka aitapoet naanyunit, koany, kobwoete ituŋa lukiyakuunit Korunelio kokek, kedaut aiŋitun etogo loka Simon, 18Konyarata kiŋita arai ipejot Simon loenyaritai Petero nen. 19 Napeomoomoi Petero aitapoet, kotema Emoyo ŋes atiar, “Koany, ejaas ituŋa iuni lukimooto jo. 20Aso konyou, kijesar kwap, koupakinos kakes komam ibuonokin; naarai eoŋ ejukunit kes.” 21Kijesun Petero mama ejaas ituŋa, kobala ebe, “Eoŋ lo lokimooto; iponitos kanuka akiro anyoika?” 22Kotemasi atiar, “Korunelio, ekapolokiton, etuŋanan loedolit Ioeyoŋit Edeke, loitojokitai kotoma ateker kere naka Iyudayan, abu emalaika lokalaunan kikwenya ŋes anyaraun jo alosit togoke, tetere iirari akiro kamakon.” 23 Kisukunyik kes araut ikepejok. Kapaaran naatupakini konyou kolot kakes, koupakinos da ice koinacan luko Yopa kaŋes. 24Kapaaran naatupakini kolomasi Kaisarea. Kidaret kes Korunelio, kotukokinite lukajenake ka ikepadic da. 25Napelomari Petero, kisiriam Korunelio ŋes, kibirokin akejeke, koma ŋes. 26 Konye Petero kitonyou ŋes, kobala ebe, “Kobwo; arai eoŋ da etuŋanan.” 27Napinera, koloma kodum ituŋa luipu etukokina; 28kotema kes atiar, “Ijenete yesi ikulepek kwape eraar naketal Eyudayat aimorikikina arai aipejokin etuŋanan kere loka ateker ace; konye abu Edeke ketodik eoŋ ebe mam ebusakinit anyara idiotuŋanan yeniketal arai yenimam elai. 29Kanuka ŋun nakanyaraunere, abu komam aŋeri, Aso keŋisit anyoin akirot nakinyaritotor eoŋ.” 30Kotema Korunelio atiar, “Eraas apaarasia aoŋon atuboros, kwape esawa lo, abu karicite esawa lokikanyetekaoŋon loka ailip kotogoka; ido koany, kobwo etuŋanan kakonyeneka enapit luimiliasi, 31kabala ebe, ‘Korunelio, eirar akoniilip, akoniikor da eitun kakonyen nuka Edeke. 32Aso kiyakia ituŋa Yopa, konyarau Simon loenyaritai Petero; ipejokinit ŋesi togo loka Simon, ekekisikisan imukulen, kariri naka aŋolol.’ 33Aso abu kanyarau jo atipet, iswama ejok abunore. Aso kwana kija ne kere akonyen nuka Edeke, keirasi kere nukicorakinit Ejakait jo.” 34 Kosodi kooŋ Petero akeituk, kotema atiar, “Abeit ajenu ebe mam Edeke etiakatiakai ituŋa, 35 konye kotoma ŋiniteker yeneyoŋit, kiswama da nuedolito, ecamuni ŋesi. 36 Akirot nakijukakini idwe luka Isirael, elimonokini akiro nukajokak nuka ainapakin kotoma Yesu Kristo, (ŋes Ejakait loka kere,) 37 ijenete yesi akirot naalimoritai anatar Yudaya kere, ageun koGalilaya, akaulo ka aibatisa naalimonokini Yokana; 38 Kwape kinyonyoikinia Edeke Yesu loko Nasaret akinyet naka Emoyo Lokalaunan ka apedor; lokelosenenei iswamai nuejok, itaŋaleununei kere lukiticani Satan, naarai kejai Edeke nenipe kaŋes. 39 Kirai isio ikajenak luka akiro kere nukiswamai ŋesi kakwap naka Iyudayan, koYerusalem da; koarata ŋol kaikajakin okitoi. 40 Abu Edeke kitajaru ŋes kapaaran nakiwuniet, koinak ŋes aitodiario; 41 mere kotuŋa kere, konye mamakosi luabu Edeke koseu sek araut ikajenak, lukinyami ka aimat da nepepe kaŋes kedau ajarun kokatwak. 42 Kicorak sio kalimonokis ituŋa, ka aitejenun da ebe ŋol ŋes lekedakakini Edeke araut ekatubon loka ikajarak ka ikatwak da. 43 Ŋol ŋes itejenunitos inabin kere ebe kanuka ekekiror ŋinituŋanan yeniyuuni ŋes edumuni aisionio naka adiakanareta.” 44Naperiŋa Petero inera ŋun, kodoik Emoyo Lokalaunan kere lukiirarete akirot. 45Koumokis lukiyuunito lukekepitai lukeupunos ka Petero, naarai abukokin Imo da ainakinet naka Emoyo Lokalaunan. 46 Naarai kiirasi kes ineras kaŋajepa ka aitopoloor Edeke. Kosodi Koboŋok Petero ebe, 47“Epedori kereka ituŋanan aisimik akipi nuka aibatis ituŋa lu, luainakin Emoyo Lokalaunan kwape kaoni?” 48 Kicorak kes aibatisao kokiror loka Yesu Kristo. Kosodete kilipata ŋes asalakin apaarasia nuipupuuto.111Kosodete kiirasi ikiyakia ka iinacan luajaas Yudaya ebe eyuut Imo da akirot naka Edeke. 2 Kosodi nakedolunio Petero Yerusalem, ko pegata lukekepitai nepepe kaŋes, 3 kobalas ebe, “Ibu kolot otuŋa lumam ekepitai, komorata kakes.” 4Konye kogeu Petero aitejenun kaisudunyit, kotema atiar, 5 “Abu kajai ore loka Yopa elipi; kogelakin ekamoyo kaany aitapoet, ijesun ibore, bala aisuka naepol, ijoliliunio kokuju kowaitin iwoŋon; kadolok. 6Kerere, kaŋic, ido kaany itiaŋ luka akwap, ka itiaŋ luededeŋ, ka lueliatos, ka akweny nuka apak. 7Keira eporoto ebala ebe, ‘Petero, konyou; koar, konyam.’ 8Konye katema atiar, ‘Mam cut, Ejakait; naarai ibore yenerai yeniketal karaida yenimam elai mam elomarit cut aitukuka.’ 9Konye Koboŋok eporoto irwan nakiareit ebuni kokuju ebe, ‘Lukitalauni Edeke mam ibusakinit jo anyarit luketal.’ 10Kiswama akirot na irwan auni, kosodi kiriarai bobo kere toma akuj. 11Atipet ŋipeŋin, kobwaata ituŋa iuni koiŋaren ketogo lokija, lukiyakuunio mama ajai koKaisarea. 12Kalimok Emoyo aupar kakes komam abuonokin. Koloto iinacan lu ikanykape nepepe keoŋ, kalomasi togo loka etuŋanan kaje. 13Kitejenik epone lokeanyunia emalaika lokebwoi kotogoke ka atemar ebe, ‘Kiyakia ituŋa Yopa, konyarau Simon loenyaritai Petero; 14lokilimokini akiro nukitaiarete, ijo ka lukokalekon kere.’ 15Konye napageari einer, kodoik kes Emoyo Lokalaunan kwape kiidoikinio oni kageunet. 16 Keitu do akirot naka Ejakait, kwape kinerar ebe, ‘Abu Yokana kibatis kakip, konye yes kibatisao kEmoyo Lokalaunan.’ 17Aso arai ainaki Edeke kes ainakinet ŋin nakiinakinit oni nakiyuunia Ejakait Yesu Kristo, eoŋ bo iŋai lotiapedori airebokin Edeke?” 18 Nakiirariata akirot ŋin kililiŋata. Kitopoloosi Edeke, kobalas ebe, “Ainak Edeke kiton Imo da aitoronikin naeyauni aijar.” 19 Kosodete lukisiarakinos kanuka aimanit nakedoikini kanuka akiro nuka Sitepan, koloto kiton Poenike ka Kupuro ka Antiokia, komam elimonokinete akirot dimarai oYudayan bon, 20Konye ice kaŋul luko Kupuro ka Kurene, nakedolioto Antiokia, kinerata ka Iyonanin da elimonokinete akiro nukajokak nuka Ejakait Yesu. 21 Kojai akan naka Ejakait nenipe kakes, kiyuut ituŋa luipu kibelokinos neejai Ejakait. 22 Kodol eemut loka ituŋa kaŋul aki nuka ekanisa lokejai toma Yerusalem, kiyakiasi Baranaba Antiokia. 23 Nakedolio koany da asianut naka Edeke, kiyalamikin; kicor kes kere aikokoikin aimorikikina ka Ejakait kikecetauon kere; 24 naarai kerai etuŋanan loejok, loeleleba Emoyo Lokalaunan ka aiyuun. Kiyatakinos ituŋa luipu mama ejai Ejakait. 25 Kosodi kolot Baranaba Taruso amoot Saul. 26 Nakedumunia koyau ŋes Antiokia. Kosodi kanen kotukonokinos nenipe kekanisa adaun ekaru kere, kisisianakis ituŋa luipu; ido kotoma Antiokia Ŋes ageunere amaikin ikesisiak Ikristayon. 27 Kapaarasia kaŋun kijesaros inabin anyoun koYerusalem kiton Antiokia. 28 Kobwo ediopet kakesi ekekiror Agabo, kodwar kanuka Emoyo ebe, ebuni ebeli loepol anatar akwapin kere; kojau da kapaarasia nuka Kulaudia. 29 Kinerut ikesisiak, ŋinituŋanan kwape epedoria, aijukakin iinacan lueboiete ko Yudaya iboro luiŋarakinete; 30 Kiswamata kwaŋin, kijukakis imakio kakanin nuka Baranaba ka Saul.121 Kapak kaŋin korio Kerode ekabaka akekanin aikonakin erono ice lukokanisa. 2Koar Yakob onace loka Yokana kekileŋ; 3nakeanyunia ebe itojokito Iyudayan, kiyatak aikamun Petero da. Keraas apaarasia ŋun nuka Imugatin lumam itubuunitoi. 4 Nakedaunia aikamun, kogolok aidaris, kibwaik akanin nuka irioŋeta iwoŋon luka iserikalei iwoŋon iwoŋon, tetere idarete; kokoto aitolomun ŋes neejaas ituŋa kedaun Aleleŋ. 5 Aso kidarai Petero kaidaris; konye kinyikokis noi lukokanisa ailip Edeke kanukeŋ. 6 Kakuar kaŋin naakotor Kerode aitolomun ŋes, kojotoi Petero kokidiŋ kiserikalei iarei, eenitai kirikoi iarei, kojaas ikedarak okek idarete aidaris; 7 ido koany, kobwo emalaika loka Ejakait aapu kaŋes, kocau aica kagola; kinom Petero osiep kitwekeny, kobala ebe, “Konyou atipet.” Kodooto irikoi kakaninike. 8Kotema emalaika ŋes atiar, “Konap, kirupak da akonimuk.” Kiswama kwaŋin, Kotema ŋes atiar, “Kimukok ekonilou, kotupunai.” 9Koloma kotup ŋes; mam abu kojen ebe nueswamai emalaika eraas nukabeit, konye aomit ŋesi ebe aanyu aitapoet. 10Naketuborotor kaidaret nasodit ka nakiareit, kodoloto okek lokasua lolomaret kiŋa toma ore; koŋaari bon, kolomasi kiŋa kitoroto orot ediopet; atipet kinye ŋes emalaika. 11Kosodi nakejenunia kotema atiar, “Kwana ajeni abeit ebe ejuku Ejakait ekemalaika alemun eoŋ kakan naka Kerode ka kere nuemuno ateker naka Iyudayan.” 12 Nakedaunia aomoom ŋun, kolot togo loka Mariam, toto naka Yokana ŋol loerai ekekiror lokiareit Marako; ketukokina ituŋa luipu nen, ilipete. 13Nakikuŋukuŋio ekek loka erute, kobu apese ekekiror Roda ajaar. 14Nakejenunia eporoto loka Petero, mam eŋaara ekek kanuka aiyalama, konye koker koloma toma, kobala ebe, “Ebwoi Petero kokek.” 15 Kotemasi ŋes atiar, “Kikerepiki ca ijo.” Konye kitogogoŋ noi ebe ikote nen. Kotemasi atiar, “Erai ekemalaika.” 16Konye kiyatak Petero aikuŋukuŋ; kiton neaŋaariata, koanyutu ŋes, koumokis. 17Konye kisililiŋ kes kakekan, kitatamik kes kwape kelemunia ŋes Ejakait kotoma aidaris. Kotema atiar, “Kolimokis Yakob ka iinacan da akiro ŋun.” Kosodi konyou kolot aibois ace. 18 Nakiwalaria akwap, kobur iserikalei kanuadoikis Petero, 19Nakemoia Kerode komam edumuni, kiŋitiŋit ikedarak, kicorak aario. Kosodi kijesar anyoun koYudaya alosit Kaisarea, kosalak nen. 20 Konyunyurik Kerode ituŋa luko Turo ka Sidon, kolosikis Ŋes ketau ediopet, ido kedaut aipaperikin ka Bulasito, lokedaran agola naperot naka ekabaka, kilipa ainapakin, naarai kedumunit akwapukec inyamat kakwap naka ekabaka. 21Kapaaran naaseunitai konap Kerode ikenapen luka ekabakane, kiboikin oicoloŋ loka ekabakane, kiner akiro kamakec. 22 Kocelut ituŋa kobalas ebe, “Ŋes eporoto loka edeke, mere loka etuŋanan!” 23 Atipet kinom emalaika loka Ejakait, naarai mam kitubusikinit Edeke; konyamata ŋes ikur, kotwana. 24 Konye kiyatakin akirot naka Ejakait, konyanyaar. 25 Koboŋosi Baranaba ka Saul koYerusalem, kedaut aijaanakinikec, kouparos Yokana loenyaritai Marako kakes.131 Ko Antiokia, kokanisa lokejai kanen kojaas inabin ka ikesisianakinak, kes Baranaba, ka Simeon loenyaritai Niger, ka Lukio loko Kurene, ka Manaen Lokitanakio nepepe ka Kerode ekabaka, ka Saul da. 2 Kosodi napijaanakinete Ejakait, ka ailuŋ, kotema Emoyo Lokalaunan atiar, “Kogitakinai Baranaba ka Saul kanuka aswam naanyarakinit kes.” 3 Kosodi kedaut ailuŋ ka ailip, kidokokis kes akecekanin kotwarata. 4 Kosodi kijuka Emoyo Lokalaunan kijesaros Seleukia; kenyoutu kanen kikwaŋaros kiton Kupuro. 5 Nakedolioto Salamis, kolimonokis akirot naka Edeke katukosia nuka Iyudayan. Kojaas ka Yokana ijaanakini kes. 6Nakedauniata aitor apujan kere kiton Papo, kodumut ekacudan, enabi lokeŋalan, Eyudayat, ekekiror Bar-Yesu; 7kejaas etuŋanan ŋol nepepe ka ekayaiton, Serugio Paul, etuŋanan loka acoa. Konyara ekayaiton Baranaba ka Saul, kokoto aiirar akirot naka Edeke. 8 Konye Elumayo ekacudan (ŋes apolou naka ekekiror) kopegata kakes, kokoto aitapaar ekayaiton ainyein aiyuun. 9Konye Saul, ŋes Paul, kilelebun Emoyo Lokalaunan, koŋanyak ŋes akonye, 10 kobala ebe, “Ijo loileleba aimod ka aronis kere, ijo okoku loka Satan, lokasurup loka adolit kere, mam kereka inyeini aitapaar irotin luitenara luka Ejakait? 11 Kwana da, koany, ejai akan naka Ejakait mamakon, imudukanar ijo, komam ianyuni akoloŋ adaun apak.” Atipet kodoik ŋes elisina ka amuton, koturiaitoi ka amoot luerikete kakan. 12Kosodi kiyu ekayaiton, nakeanyunia nukiswamao, naarai koumok aisisianakin naka Ejakait. 13 Kosodete kikwaŋaros Paul ka ikepaup anyoun koPapo, kodoloto Peruga toma Pampulia. Kinye kes Yokana kanen koboŋo Yerusalem. 14Konye kes, konyout koPeruga kitoroto akwap kodoloto Antiokia ere loka Pisidia. Kolomas atukos kapaaran nakasabato, kiboikinos. 15 Kedaut asoman ikisila ka inabin, kiyakiasi ikayaitok luka atukos mamakec ebe, “Iinacan, arai ijaas kakirot nakaicor ituŋa, kolimut.” 16Kobwo Paul kokwet kakan kobala ebe, “Ikiliok luka Isirael, ka yes da luiyoŋito Edeke, kiirasi. 17 Edeke loka ituŋa kalu luka Isirael abu koseu lukapapaawok, kitopoloo ituŋa nakiboiororoto kakwap nako Misiri, kitolom kakan naerioro. 18 Apak bala naka ikar akaisaoŋon kotitiŋik kes kamodiŋ. 19 Nakedaunia amudiar atekerin akanykaarei kotoma akwap nako Kanaan, koinak kes akecekwap araut airumet, apak naka ikar bala akwat aoŋon ka akaisakany. 20 Akaulo kaŋun koinak kes ikatubok kiton Samuel enabi. 21 Kosodete kilipa ekabaka; koinak Edeke Saul okoku loka Kis, lokateker naka Benyamin, apak naka ikar akaisaoŋon. 22 Nakelemaria ŋol, kodakak Daudi araut ekabakakec; lokitejenuni ŋesi ebe, ‘Adum Daudi okoku loka Yese etuŋanan loitalakarit ekatau, loebuni aswam nuakoto eoŋ kere.’ 23 Kotoma aur naka etuŋanan kaŋol ainu Edeke Isirael Eketajaran, ŋes Yesu, kwape esumunitor. 24 Eriŋa ŋesi ebuno abu Yokana koliŋak alimonokin ituŋa kere luka Isirael aibatis naka aitoronikin. 25 Napedauni Yokana akelosit, kobala ebe, ‘Kiwomito eoŋ araut iŋai? Mam arai ŋol. Konye koany, ebunit kokaukaŋ lomam kebusakinit eoŋ alacar amuk nuka akejeke.’ 26 “Iinacan, idwe luka aur naka Aburaam, ka luiyoŋito Edeke da kotomakus, ejukun akirot naka aitajario mamawok. 27 Naarai luiboiete koYerusalem, ka ikayaitokokec, kanu mam ajenuniata ŋes, karaida akiro nuka inabin nuesiomenenoo ŋinisabato, etodolikis kanuka atubokin ŋes. 28 Karaida mam eanyunitos akirot naibusakinitor atwanare, konye kilipata Pilato koarai. 29 Nakedauniata aitodolikin kere nukiwadikatai kanukeŋ, kijesut kokitoi, kibwaikis ates. 30 Konye kitajaru ŋes Edeke kokatwak. 31 Apaarasia nuipu kitakanikin ŋul lukedokarete nepepe kaŋes anyoun koGalilaya kiton Yerusalem, lueraas kwana ikajenakake mama ejaas ituŋa. 32 Kiinunit isio yes akiro nukajokak nuka aisumunet nakeinakinio lukapapaawok, 33 ebe etodolik Edeke oni ikecedwe aisumunet ŋin, kanuka aitajarun Yesu; kwape iwadikatere kotoma osabuli lokiareit ebe, ‘Irai ijo Okokuka, Lolo kawuru jo.’ 34 Ido kanuka akirot kaŋin ebe etajaru ŋes kokatwak, kinye bobo aboŋor aibos, inera kwanata ebe, ‘Kainakini yes arereŋesio nukalaunak ka nuicasito nuka Daudi.’ 35 Kanuka ŋun inera kosabuli ece ebe, ‘Mam icamuni Ekalaunanikon aibos.’ 36 Naarai Daudi, kedau aijaanakin ainerun naka Edeke katurike, abu kojotoor, kibwaikinai nepepe ka lukapapaake, kobos; 37konye ŋol lokitajaruni Edeke mam abu kobos. 38 Aso do iinacan, kojenutu ebe, kotoma otuŋanan kaŋol elimonokinio yes aisionio naka adiakanareta; 39 ido kotomakeŋ ŋin yeniyuuni imarakinio adolit kakiro kere, numam epedorere aimarakin adolit kokisila luka Musa. 40 Aso kocoito, kinye akirot adoikin yes, nainerito inabin ebe: 41 ‘Koanyutu, yes ikamenak, koumokis, kooliosi; Naarai eswamai eoŋ aswam kapaarasiakus, Aswam namam iyuunete cut, karaida kiilimonok ituŋanan yes.’ ” 42Napelomarete, kiŋaiŋaata alimokin akiro ŋun kasabato naatupakini. 43 Nakisiarakinor atukokin naka atukos, apotu Iyudayan luipu ka ikebelokinok lueyoŋito Edeke kotupasi Paul ka Baranaba, lukinerasi kakes, kisicerededata aiyatakin kotoma asianut naka Edeke. 44Kosodi kasabato naatupakini kotukokinos ituŋa luipu, aapie ere kere, aiirar akirot naka Edeke. 45 Konye nakeanyuniata Iyudayan ikodeta, kilelebun ekolo, kitepega nuenera Paul, komoromoroto da. 46 Kinerata Paul ka Baranaba katitiŋikin ebe, “Ibusakinit akirot naka Edeke ainerio ber kamakus. Konye naarai igaguarete kamakus, itubokinos bonik araut lumam ibusakinito aijar namam edaun, koany, kibelokin do mama ejaas Imo. 47 Naarai abu Ejakait kicorak sio kwaŋin ebe, ‘Kebwaik jo araut aica naka Imo, Tetere iyauni aitajario kiton osaŋeta luka akwapin.’ ” 48 Nakiirariata Imo ŋun, kiyalamikinos, kitopoloos akirot naka Ejakait; ŋul da lukelosikinito aijar namam edaun kiyuut do. 49Kisiarakin akirot naka Ejakait akwap ŋin kere. 50Konye kicecemoto Iyudayan aŋor nueyoŋito nukapolou ka ikeŋarenikinok luka ere, kisidikoto aimanit Paul ka Baranaba, kireŋeasi koikorunokec. 51 Konye kilakilakata adai nuka akejekec, koloto Ikonium. 52Kilelebunos ikesisiak aiyalama ka Emoyo Lokalaunan.141Kosodi kanen kotoma Ikonium, kolomasi nepepe toma atukos naka Iyudayan, ido kanuka ŋun nuenerasi kiyu ekodet loapol loka Iyudayan ka Iyonanin. 2 Konye Iyudayan lumam kiyuunito kisidikoto Imo kitolomikis etau loerono asurokin iinacan. 3 Kosodete kosala nen apak naepol, inerasi katitiŋ kotoma Ejakait, lokitejenuni akirot naka akesianut, kocamak aanyuneta ka nukaumokin aiswamao kakaninikec, 4Konye kotiakas ituŋa lukore; ice owai loka lyudayan, ice da owai loka ikiyakia. 5 Kiton neatakanunia asurokin naka Imo ka Iyudayan, nepepe kikayaitokokec, aiswamakin kes erono, ka aibiribir kamor. 6 Kejenut kes ŋun, kokereasi Lusitura ka Derube, ireria luka Lukaonia, ka akwapin nuedunyatar; 7 kanen da kolimonokis akiro nukajokak. 8 Kanen koLusitura kojai etuŋanan iboie, ilejekekas akekeje, eŋwalas ameun kakoik naka totoke, lomam alosi cut. 9 Abu ŋol kiira Paul inera; kosesen Paul ŋes, koany ebe ejai aiyuun naitanaleuni, 10kolimok keporoto loepol ebe, “Kobwo kotenan kakonikeje.” Kodetun atipet, kosakasak. 11 Nakeanyuniata ikodeta nukiswamai Paul, kikeseut iporotoikec, kobalas kaŋajep naka Lukaonia ebe, “Kijesakinos oni idekesio kaput naka ituŋa.” 12Komaikis Baranaba Seu, ka Paul da Kereme, naarai kerai ŋesi lokiŋarenikinit einer. 13Koyau esasedoti loka Seu, lokejai eyekaluke kiŋaren naka ere, imoŋin ka abokoi nuka atur kiton okek, kokoto ainakin asuban nepepe kikodeta. 14Konye nakejenuniata ikiyakia Baranaba ka Paul, kocilata ikecenapen, kokerata kolomasi okodet, kiworoto ebe, 15 “Ikatuŋa, kanukinyo iswamaata nu? Kirai isio da ituŋa lukepone kwape kayesi, kiinunit yes akiro nukajokak, tetere ibelokinos ainyein akiro nu nukamameak kosesena Edeke lokajaran lokesubi akuj ka akwap ka aŋolol ka iboro da kere luejaas tomakec. 16 Katurio nuatuboros abu kojalak atekerin kere alosit kotoma orotinikec; 17 konye mam kinyein komamei aitejenunet, naarai kiswama nuejok, koinak yes akiru abunore kakuj, ka apakio nuka amio, isimonikini ikusitauon kinyamat ka aiyalama.” 18Kakiro kaŋun, kitikokis ikodeta kationis ainakin kes asuban. 19 Konye kodolut Iyudayan luapote koAntiokia ka Ikonium; kisidikoto ikodeta, kibiribiroto Paul kamor, kiriasi kiŋa naka ere, koomito ebe atwana, 20Konye napelukunito ikesisiak, konyou, koloma ore; kapaaran naatupakini kolot Derube nepepe ka Baranaba. 21 Kosodi nakedauniata alimonokin akiro nukajokak toma ore ŋol, ka adumun ikesisiak luipu, koboŋosi Lusitura ka Ikonium ka Antiokia, 22 kitogogoŋo itauon luka ikesisiak, ka aikwenyar kes kosalito toma aiyuun ŋin, ebe da kibusakinit alomar toma ajakanut naka Edeke kotoma aiticanio nuipu. 23 Nakedauniata aseikin kes imakio kotoma ŋolikanisa, kailip, ka ailuŋ, kibwaikis kes akanin nuka Ejakait lokiyuunito. 24Kitoro Pisidia, kodolot Pampulia. 25Kedaut alimonokin akirot toma Peruga, kijesaros kiton Atalia; 26 konyout kanen kikwaŋaros kiton Antiokia nekolo elipakinere kes asianut naka Edeke kanuka aswam naadaut aitodol. 27 Nakedolioto, kotukokis ekanisa, kitatamikis akiro kere nukiswamai Edeke nepepe kakes, ebe da aŋaik Imo ekek loka aiyuun, 28Kiboioto kanen apak namam edit nepepe kikesisiak.151 Konye kijesunos icetuŋa anyoun koYudaya, kisisianakis iinacan ebe, “Arai mam kikepio kwape ejaar epone loka Musa, mam ipedorete aitajario.” 2 Kosodi kedaut Paul ka Baranaba epeget kituŋa kaŋul ka aibakibak noi, kicorakis iinacan Paul ka Baranaba ka ice kakesi adokar Yerusalem mama ejaas ikiyakia ka imakio kanuka akirot kaŋin. 3Aso kotwar ekanisa kes kitoro akwapin nuko Poinike ka Samaria, itatamete aibelokin naka Imo, kisiyalamikis noi iinacan. 4 Nakedolioto Yerusalem, kisukunyik ekanisa, ka ikiyakia ka imakio, kitejenut akiro kere nukiswamai Edeke nepepe kakes. 5Konye konyout lukiyuunito ice lukorioŋet loka Iparisayon, kobalas ebe, “Ibusakinit aikep kes, ka aicorakin da airic ikisila luka Musa.” 6Kotukokinos ikiyakia ka imakio tetere eomoomoete akirot ŋin. 7 Kedaut aibakibak noi, kobwo Petero kotema kes atiar, “Iinacan, ijenete ebe kapaarasia nugeet, abu Edeke koseu kokidiŋikus, tetere iirarete Imo akirot naka Akiro Nukajokak kaitukuka, kiyuut. 8 Edeke da loejeni itauon luka ituŋa kitejenik kes, koinak Emoyo Lokalaunan kwape kiinakinia oni; 9 kwabo mam etiakit oni ka kes, konye itesegaari itauonokec kaiyuun. 10 Aso kanukinyo ikoduniata Edeke kanuka aibwaikin ajookot omurisiŋa luka ikesisiak, namam lukapapaawok karaida oni kipedorit airioŋ? 11 Konye kiyuunit ebe kitajario kanuka asianut naka Ejakait Yesu, kwape kakesi.” 12Kosodi kililiŋ atukot kere; kopupokis Baranaba ka Paul itatamete aanyuneta ka nukaumokin nukiswamai Edeke kotomakec komo. 13 Nakedauniata aililiŋ koboŋok Yakob ebe, “Iinacan, kiirarai. 14 Kitejenu oni Simeon kwape kisiaunia Edeke aanyanar Imo, alemun kotomakec ituŋa kanuka ekekiror. 15 Ecamanara nu kakiro nuka inabin, kwape iwadikatere ebe, 16 ‘Akaulo kaŋun aboŋuni, Aduki bobo ewema loka Daudi lokibiror; Aduki bobo amejeke, Eticasi ŋes. 17Tetere luesalito luka ituŋa emoete Ejakait, Ka Imo kere luenyaritai ekakiror. 18 Ebala Ejakait nu, loitejenunit akiro nu ameun apeŋo.’ 19Kanuka ŋun atubi eoŋ kwanata ebe, Mam kiticani ŋul luibelokinos mama ejai Edeke kotoma Imo, 20 konye kewadikakisi kes kinaca nuesiliaka nuka aputosia, ka adoteu, ka itiaŋ luemiedio ka aokot. 21 Naarai ameun katurio nupeŋo ajaas lualimonokinete akiro nuka Musa kaŋolire, naarai esiomio ŋinisabato kotoma atukosia.” 22Kosodete kitojoka ikiyakia ka imakio ka ekanisa kere, aseun ituŋa lukotomakec, aiyakiar Antiokia nepepe ka Paul ka Baranaba; kes luta, Yuda loenyaritai Barasaba, ka Sila, lukeraas ikeŋarenikinok koinacan: 23kiwadikata kwanata kijukasi kakaninikec ebe: “Iinacan ikiyakia ka imakio mama ejaas iinacan lueraas Imo kotoma Antiokia ka Suria ka Kilikia, ayogan. 24 Naarai kipupu ebe ituŋa ice lukepote kamakosi kiticanata yes kakirokec, isibuonokinete itauonokus, numam sio kicorakinit, 25kitojok sio, kemorikikina ketau ediopet, aseun ituŋa aiyakuun mama ijaas nepepe ka Baranaba ka Paul luminanawok, 26ituŋa luijaikinito aijarakec kanuka ekiror loka Ejakaitiwok Yesu Kristo, 27aso kijuku Yuda ka Sila, lukilimokinete akiro nupenu kaitukekec. 28 Naarai itojokit Emoyo Lokalaunan ka sio da kenyeis aisibwok yes abwokon naitelekarit akiro nu nuibusakinito: 29Kes nuta ebe, Kinaca iboro lueinakinio aputosia araut asuban, ka aokot, ka itiaŋ luemiedio, ka adoteu da. Arai kitikokinos kaŋun, iswamaete ejok, Yoga do,” 30Kosodi ketwar, kijesaros Antiokia; kotukokis ekodet kere, koinakis ebalua. 31Nakesiomiata, kiyalamikinos kanuka aitalakario kaŋin. 32 Yuda ka Sila da, lukeraas inabin, kitalakasi iinacan kakiro nuipu, kitogogoŋo kes. 33Kosalakis ŋina adaun apak, kotwara kes iinacan aboŋor kainapakin mama ejaas lukiyakuunete. [34Konye kitojok Sila asalakin nen.] 35Konye kosalakis Paul ka Baranaba Antiokia, isisianakinete ka alimonokin akirot naka Ejakait, nepepe ka icetuŋa da luipu. 36 Ketuboros apaarasia adis, kotema Paul Baranaba atiar, “Aso kaboŋosi kwana kaanyanasi iinacan kaŋolire nekiilimonokinit akirot naka Ejakait, kaanyutu kwape ejaatar.” 37 Kokoto Baranaba ayaŋaar Yokana loenyaritai Marako aupar kakes. 38 Konye mam kitojokit Paul ayaŋaar ŋol lokinyeini kes koPampulia, komam elosete kakes aswam. 39 Kosodi kojau epeget loepol kidiŋikec kiton neatiakatar, koyaŋa Baranaba Marako kikwaŋaros Kupuro, 40konye Paul koseu Sila konyou, ilipakinete iinacan tetere einakinio asianut naka Ejakait. 41Kitor Suria ka Kilikia, itogogoŋi ikanisan.161 Ido kodol Derube ka Lusitura: nekejai ekesisian ekekiror Timoteo, okoku loka aberu Ayudayat nakiyuunit; konye papake kerai Eyonanit. 2 Kitejenut iinacan lukiboiete koLusitura ka Ikonium kwape ejokiar ŋesi. 3Kokotokin Paul ŋol aupakin kaŋes; koyaŋa kokep ŋes kanuka Iyudayan lukejaas atutubeta ŋun, naarai kejenete kere ebe kerai papake Eyonanit. 4 Kosodete nakitoritotor oreria, koinakis kes aicorakineta nukicorakinete ikiyakia ka imakio luko Yerusalem tetere ericete. 5Kwaŋin kitogogoŋoi ikanisan kotoma aiyuun ŋin, kiyatanakin etiaikec ŋinipaaran. 6 Kitoroto akwap naka Pirugia ka Galatia, kisimik kes Emoyo Lokalaunan alimonokin akirot toma Asia. 7Nakedolioto atereikina Musia, kotama alosit Bitunia, konye mam Emoyo loka Yesu abu kocamak kes, 8Aso kinaca Musia kijesaros Tiroa. 9Koany Paul aitapoet kuare: bala ebwoi etuŋanan loko Makedonia iŋaiŋait kobala ebe, “Kikwaŋun Makedonia, kiŋarak sio.” 10Nakedaunia aanyun aitapoet, atipet kakotos alosit Makedonia, naarai kiwomit cut ebe kinyarit Edeke sio alimonokin kes akiro nukajokak. 11Aso kekwaŋaros anyoun koTiroa, karasasi Samoturake, kapaaran da naatupakini kadoloto Neapoli. 12Kanyoutu kanen kadoloto Pilipi, ere lokapolon loka akwap nako Makedonia, akwap nakebwotunito ice ko Romayon. Keboioto kore kaŋol apaarasia adis. 13Kosodi kapaaran nakasabato kalomutu korute kaloto ariri kecor, nekiwomit ebe kejai aibois nakilipet; keboikinos kenerata kaŋor nukidumuni kanen. 14 Aberu, ekekiror Ludia, nakegwelanari iboro lumugeik, naka ere loka Tuatira, naeyoŋit Edeke, kopup sio: nakepukorit Ejakait eketau tetere ecoit akiro nuenera Paul. 15Kosodi kedau aibatisao, ŋes ka lukokaleke, kiŋaiŋa sio, kobala ebe, “Arai ianyunito eoŋ arai naiyuunit Ejakait, kolomutu togoka kipejoto.” Kitiŋa sio. 16 Napekilosi aibois naka ailip, keriamata kapese naejai ajokit naka aidwar, nakedumanakini ikejaka ameda naepol naka aidwar. 17 Kotupu ŋin Paul ka sio iworoi ebe, “Ituŋa lu eraas ikejaanakinak luka Edeke loejai kuju kakuj, lukilimonokinete yes erot loka aitajario.” 18 Kikoni nen apaarasia nuipu. Konye koŋoiar Paul, kibelokin kotema ajokit atiar, “Kecorakini jo kokiror loka Yesu Kristo kolom kamakeŋ.” Kolom kosawa kaŋope kaŋol. 19Konye nakeanyuniata ijakake ebe atwakiasi ameda naamunos, kikamutu Paul ka Sila, kidilidilasi kiton agwelanaret akonyen nuka ikayaitok; 20 koyaŋaasi mama ejaas ikatubok kotemasi atiar, “Ituŋa lu eraas Iyudayan, amunaasi erewok, 21bobo da elimonokinete iponesio lueraas luketal kamawok Iromayon acamun karaida aswam.” 22 Konyou ekodet kere asurokin kes: kolacasi ikatubok inapenekec kagogoŋ, kicorakis kes aleio kisureta. 23Nakedauniata aile noi, kogolokis aidaris, kicorakis ekedaran aidar kes kacoit, 24Kedau adumun aicorakinet ŋin, kibwaik kes toma aidaris nakotoma, koen akejekec oloin. 25Konye kidiŋebai ilipete Paul ka Sila, eyeikinete Edeke ikososio luka aiturit, kopupete ienan da ice; 26atipet kojau amaran naepol naka akwap, komaranata apeteta nuka aidaris; atipet koŋaaros ikekia kere, kolacaros da aeneta nuka ituŋa kere, 27Kokweny ekedaran, nakeanyunia ebe eŋaara ikekia luka aidaris, kout ekekileŋ, kokoto aarakin, koomit ebe asiata ienan. 28Konye kiworo Paul keporoto loepol ebe, “Sirikimusuŋikin, naarai kija isio ne kere.” 29Konyarau atalai, komotar toma, emarani kanuka akurian, kibirokin akonyen nuka Paul ka Sila, 30 kitolom kiŋa, kotema atiar, “Ikajaka, kekonak ai tetere ketajario?” 31Kobalasi ebe, “Kiyuu Ejakait Yesu, kitajario jo ka lukokalekon kere.” 32Kolimokis ŋes ka ituŋa kere luajaas togoke akirot naka Ejakait, 33Kisukunyik kes kosawa kaŋol loka akuare, kilot ikecemacarin, atipet kibatisai ŋes ka iketuŋa kere. 34Kosodi koyau kes togoke, koinak kes inyamat, kolakara noi, ŋes ka ekekale kere, naarai iyuunit Edeke. 35Konye kiwala akwap, kiyakiasi ikatubok ikapolok luka iserikalei, kobalas ebe, “Koosikis ituŋa ŋul koloto.” 36Kitejen ekedaran Paul akiro ŋun ebe, “Eyakuut ikatubok aosikin yes: aso do kolomutu, koloto inapakina.” 37 Konye kotema Paul kes atiar, “Apotu koleata sio kakonyen nuka ituŋa kere, komam etubokina, kwabo kirai isio Iromayon, bobo da kigolokis aidaris; kwana da ekotosi cabo alacakin kaiyeiyea? Mam cut; konye kopotu kesi ikulepek kolacakis sio.” 38Kolimokis ikapolok luka iserikalei ikatubok akiro ŋun; kokuriakaros nakiirariata ebe eraas ŋul Iromayon; 39 kopotu, kiŋaiŋaata; nakedauniata aitolomun, kilipa kes anyoun kore kaŋol. 40Konyoutu do kaidaris kolomasi togo loka Ludia: ido kedaut aanyun iinacan, kitalakasi kes, koloto.171 Nakedauniata aitor Amipipoli ka Apolonia, kodoloto Sesalonika, nekejai atukos naka Iyudayan, 2Kosodi koloma Paul mama ejaas, kwape kejaar ekepone, kopeta kakes nukiwadikatai asabaton auni. 3 Kikujok kitogogoŋ da ebe ebusakinit Kristo aiticanio ka ajarun kotoma okatwak, ebe da, “Yesu ŋol lokalimonokini yes, ŋes Kristo.” 4Kiyuut ice kakesi, kimorikikinos ka Paul ka Sila; ka Iyonanin lukiyaparito luipu noi, ka aŋor da nukapolok numam ikidioko, 5Konye kilelebun Iyudayan ekolo, koyaŋas ituŋa lueroko luutai, kotukokis ekodet, kigurut ere, kosurokis etogo loka Yason, kokotos aitolomun kes otuŋa. 6 Nakekurwokis adumun kes, kiriasi Yason ka ice koinacan mama ejaas ikapolokitok ere, kiworoto ebe, “Ituŋa lu luabuburiasi akwap adolutu ne da, 7 esukunyiki Yason kes; iswamaete ŋul kere nuesurokinete ikisila luka Kaisar, kobalas ebe, ejai ekabaka ece, loenyaritai Yesu.” 8Kiyaloŋoŋoto ekodet ka ikapolokitok ere nakiirariata ŋun, 9Kosodete nakedauniata aitelemun Yason ka ikepaup aititiŋet, koosikis kes alosit. 10Atipet kijukasi iinacan Paul ka Sila Beroea kuare; nakedolioto ŋina kolomasi atukos naka lyudayan. 11 Konye kejokuka lu aitelekarit luko Sesalonika, naarai apotu kocamut akirot kitauon luekapakina, koŋicenenata nuiwadikatai ŋinipaaran ajenun arai ikote akiro ŋun nen, 12Kanuka ŋun kiyuut luipu kakesi, ka aŋor nuYonanin nusotia ka ikiliok da lumam ikidioko. 13 Konye kejenut Iyudayan luko Sesalonika ebe elimonokini Paul akirot naka Edeke koBeroea da, kopotu nen da kisidikoto kigurut ikodeta. 14 Kosodi atipet kijukasi iinacan Paul alosit adolore aŋolol, konye kosalata Sila ka Timoteo nen. 15Konye lukinyamakinete Paul koyaŋaasi kiton Asene; kosodete kicorakinai alimokin Sila ka Timoteo abunore mama ejai atipet kwape epedoriata, koloto. 16Kosodi nakejaar Paul Asene idaret kes, koriebakin eketau nakeanyunia ere ileleba aputosia. 17Kwaŋin kopetanak lyudayan ka lukeyoŋito Edeke akiro kotoma atukos, ido ŋinipaaran kagwelanaret kaŋul lukiriamununos kaŋes. 18 Ice luka ikaminak acoa luka Ipikurean ka Isitoikin kiriamunos kaŋes, Kobalas ice ebe, “Ekoto kereka ekenerat lo einer anyoika?” Kobalas ice ebe, “Etakani bala elimonokini akiro nuka idekesio lumo.” Naarai kelimonokini Yesu ka ajarun. 19Kikamut ŋes koyaŋaasi Areopago, kobalas ebe, “Kipedori kereka isio ajenun anyoin aisisianakin na nakitetet nainera ijo? 20Naarai iyaŋaut akiro numo akiikosi; aso do kikoto ajenun apolou naka akiro kanu,” 21Naarai kemameete luka Asene ka imo lukiboienenete kanen aceswam dimarai aitatam arai aiirar akiro nukitetiak. 22Kobwo Paul kokidiŋ Areopago, kobala ebe, “Yes ituŋa luka Asene, amisiiki ebe iraas luka edini kakiro kere. 23Naarai naketoritor, ka aanyun iboro luimaete, abu kadum etem lokiwadikatai akiro nu ebe, ‘LOKA EDEKE LOMAM EJENA.’ Aso kalimonokini yes ŋol loimaete komam ijenete. 24 Edeke lokesubi akwapisinei ka iboro kere luejaas toma, naarai erai ŋesi Ejakait loka akuj ka akwap, mam iboie kabilai nuedukio kakanin, 25 kwabo mam ijaanakinio kakanin nuka ituŋa, bala ipuda idiobore; naarai ŋes elopet einakini kere aijar ka eiyeŋane ka iboro da kere. 26 Kojautene ediopet kosub atekerin kere nuka ituŋa aiboi kakwapin kere, nakedaunia aibwaikin apakio ka iikorun luka aiboisiokec, 27 tetere emoete Edeke, moto erarapete ka adumun ŋes; karaida mam elwana kaneejai ŋinidiopet kaoni, 28 ‘Naarai kotomakeŋ, kijari, kilosi, kijai da’; kwape abalatar ice kokapwakunakakus ebe, ‘Naarai kirai oni aurike.’ 29 Aso naarai kirai oni aur naka Edeke, mam kibusakinit aomit ebe eput Edeke ka esabu, karaida epuesa, karaida amor, iboro luegerio kanuka apirianut ka acoa naka ituŋa. 30 Mam abu Edeke kosesenenei apakio nuka aolit, konye kwana icorakini ituŋa kere luejaas aiboisio kere aisilar: 31 naarai abu kibwaik apaaran naebunio atubokin akwapin kadolit, kotuŋanan loaseunit; ido itogogoŋit ŋun mama ejaas ituŋa kere, kanuka aitajarun ŋes kokatwak.” 32Kosodi nakiirariata nuka ajarun naka ikatwak, kokienatar ice; konye kobalas ice ebe, “Kiirari bobo jo kakiro kaŋun.” 33Kosodi konyou Paul kinye kes. 34Konye kimorikikinos icetuŋa kaŋes, kiyuut; kotomakec kojai Dionusio Eareopagot, ka aberu naenyaritai Damaris, ka icetuŋa da nepepe kaŋul.181Kokau kaŋun konyou ko Asene kodol Korinto. 2 Kodum Eyudayat ekekiror Akuila, euriat koPonto, kerai ŋesi abunore ŋipeŋin koItalia nepepe kakeberu Pirisikila, naarai abu Kulaudio kicorakinite Iyudayan kere anyoun koRome. Kodol Paul mama ejaas; 3 naarai kerai akeceswam adiopet, kosal mamakec, kiswamata nepepe, naarai keraas ikasubak iweman. 4Kopetanak akiro katukos ŋinisabato, kotam aimaumaun Iyudayan ka Iyonanin. 5 Konye nakijesunotor Sila ka Timoteo koMakedonia, kitiŋaik akirot Paul, kitejenanak lyudayan ebe Yesu ŋes Kristo. 6 Nakitepegiata ka ainyanakin Edeke, kilakilak inapeneke, kotema kes atiar, “Kojaas aokotokus akwesikus; alai eoŋ; amear kwana alosi mama ejaas Imo.” 7Konyou kanen, koloma togo loka etuŋanan ekekiror Tito Yusito, loemai Edeke, lokeapias eketogo katukos. 8 Abu Kirisipo ekayaiton loka atukos kiyuu Ejakait, nepepe ka lukokaleke kere; nakiirariata Ikorinton luipu Paul kiyuut, kibatisai. 9 Kolimok Ejakait Paul kaitapoet kuare ebe, “Sirikikurianar, konye kiner, sirikililiŋ; 10 naarai ajai eoŋ nenipe kajo, kwabo emamei ituŋanan yenikisurokini aitican; naarai ejaas eoŋ ituŋa luipu ore lo.” 11Kosalak nen apak naka ekaru ediopet ka ilapio ikanykape, isisianakini kes akirot naka Edeke. 12Konye nakeraar Galio ekayaiton loko Akaia, konyoikis Iyudayan Paul ketau ediopet, koyaata airabis. 13Kobalas ebe, “Ijodijodi ekesa lo ituŋa aima Edeke asurokin ikisila.” 14 Konye nakekotor Paul aooŋ akeituk, kotema Galio Iyudayan atiar, “Wu yes Iyudayan, arai erai akirot naka aswam aronis arai naka adiakaret naerono, tikebusakinit atitiŋikin kayes; 15 konye arai erai akirot naka aiŋiseta nuka akiro ka ikiroria ka ikisilakus, nukus bo ŋun; mam eoŋ akoto araut ekatubon kaŋun.” 16Kireŋea kes kairabis. 17 Kikamutu kere Sosetene, ekayaiton loka atukos, koleata kairabis. Konye mam Galio apodo ŋun. 18 Kokau kaŋun kosalak Paul apaarasia nuipu, kosodi kotwar iinacan, kikwaŋar alosit Suria, kouparos ka Pirisikila ka Akuila. Kobaren akekou koKenekerea, naarai kiyapot. 19Kodoloto Epeso, kinye kes kaŋina; konye koloma ŋesi elopet atukos, kopeta ka Iyudayan akiro. 20Nakilipiata ŋes asalakin apak naepol, koŋer; 21 konye kotwaras kakes kobala ebe, “Aboŋuni bobo mama ijaas arai itojokit Edeke.” Kikwaŋa anyoun ko Epeso. 22 Nakedokunia Kaisarea, kodoka kiyoga ekanisa, kijesar Antiokia. 23Kosalak nen adiopak, kosodi konyou, kitor anatar akwapin nuka Galatia, ka Pirugia, itogogoŋi ikesisiak kere. 24 Kobu Eyudayat Epeso, ekekiror Apolo, euriat loka Alegesanderia, etuŋanan loisisianakinitai; kerai lokapedor kotoma nukiwadikatai. 25 Aponi kituutooritete korot loka Ejakait; kodunyakinite komoyo, kinera kisisianakini kacoit akiro nuka Yesu, konye kojeni aibatis naka Yokana bon. 26Kogeu einer katitiŋ katukos; konye nakiirariata Pirisikila ka Akuila, koyaŋaasi ŋes, kiyatakis aitejenun kacoit erot loka Edeke. 27 Nakekotor aikwaŋar alosit Akaia, kisicerededata iinacan, kiwadikakis ikesisiak aisukunyikin ŋes, Nakedolio, kiŋarak noi ŋul lukiyuunito kanuka asianut, 28 naarai kiteleka Iyudayan kagogoŋ, kaitebeikin, itodikini kakiro nukiwadikatai ebe Yesu ŋes Kristo.191Nakejaar Apolo Korinto, kitor Paul akwap naimukurur, kodol Epeso. Kodum ikesisiak ice kaŋina. 2 Kiŋit kes atiar, “Ipotu kereka ko dumut Emoyo Lokalaunan nakiyuuniata?” Kobalas ebe, “Mam, karaida aiirarit ebe ejai Emoyo Lokalaunan.” 3Kotema atiar, “Aso kibatisatai yes aibatis anyoin?” Kotemasi atiar, “Aibatis naka Yokana.” 4 Kotema Paul atiar, “Abu Yokana kibatis kaibatis naka aitoronikin, elimonokin ituŋa aiyuun loebunit kokaukeŋ ŋes Yesu.” 5Nakiirariata ŋun, kibatisaunos kokiror loka Ejakait Yesu. 6 Kosodi nakedaunia Paul aidokokin kes akekanin, kodoik kes Emoyo Lokalaunan; kinerata kaŋajepa, ka aidwar. 7Keraas kere bala ituŋa itomon ka luarei. 8Koloma Paul atukos, kinerenena katitiŋ ilapio iuni, epesi akiro kituŋa kiyamuyam kes toma akiro nuka ajakanut naka Edeke. 9 Konye ice lueninik kogiroto aiyuun, kinerasi nueroko nuka Erot kakonyen nuka ekodet, kosodi kinyek kes, kogita ikesisiak, kopegenenas ka ituŋa ŋinipaaran kosomero loka Turano. 10Kiyatanakinos akiro ŋun apak naka ikar iarei; kiton lukiboiete kere koAsia aiirar akirot naka Ejakait, Iyudayan ka Iyonanin da. 11 Kiswama Edeke nukaumokin nuedeparito kakanin nuka Paul, 12 kiton ayaŋaar iitabalan ka inapen kakuanake mama ejaas ikadekak, konyout adekesia kamakec, kolomut da ajokin nueroko kamakec. 13 Konye koŋasikinos ice koYudayan lukerimok, ikereŋeak ajokin, alimor ekiror loka Yesu mama ejaas lukejaas ajokin nueroko, kobalas ebe, “Kecorak yes kanuka Yesu loelimonokini Paul.” 14Kosodi kojaas idwe ikanykaarei luka Sekeba esasedoti lopeti loYudayat, lukiswamaenenete ŋun. 15 Konye Koboŋok kes ajokit naerono ebe, “Ajeni Yesu, ajeni Paul da; konye yes lukaŋai?” 16Kosomakin kes etuŋanan lokejai ajokit naerono, kiteleka kes kere, kipiko, tape ekerete kotogo kaŋol imujalalas, imusuŋitai. 17 Kojenut ŋun kere Iyudayan ka Iyonanin lukiboiete ko Epeso; kirum akurian kes kere; kitopolooroi da ekiror loka Ejakait Yesu. 18Kopotu luipu da kaŋul luiyuunito, kolimosi, kilepilepata da akeceswamisio. 19Ka ituŋa luipu kaŋul lukiswamaete nukamurwonut, kotukonokis ikeceitabon, kicweata kakonyen nuka ituŋa kere; kimarata etiaikec, kodumut ebe edolit atutubeta alukumin akaisakany nuka epuesa. 20 Kwaŋin kopoloor akirot naka Ejakait, kitelekarit kagogoŋ. 21 Kedaunos akiro ŋun kolosik Paul Komoyo aitor Makedonia ka Akaia alosit Yerusalem, kobala ebe, “Kadau ajaut ŋina, kebusakinit aanyun Rome da.” 22 Kiyakia iarei kokejaanakinakake alosit Makedonia, kes Timoteo ka Erasito, kosalak ŋes elopet Asia apak. 23 Kapak kaŋin kodakun aigurun namere naedit kanuka Erot. 24 Naarai etuŋanan ekekiror Demeterio ekatatan epuesa, lokesubenenei abilai nuka epuesa nuka Aratemi, lokedumanakini ikeswamak luepiriaka ameda naepol; 25kotukonoki ŋul nepepe ka ikeswamak ice luka aswam kaŋin, kobala kes ebe, “Ikatuŋa, ijenete yesi ebe kidumuni abarawok kotoma aswam kana. 26 Bobo da ianyut, iirarete da ebe, mere koEpeso bon, konye eapie toma Asia kere, ejodijod Paul lo ituŋa luipu ka aijulakin akeceomisio, ebala ebe ŋulluiswamao kakanin mam eraas idekesio: 27mere atemar ebe aswamuwok na bon emwaŋio, konye eyekalu da loka adeke nakapolon Aratemi mam imario araut ibore, ebuni aitisilio kapolouke, ŋin naemaete luko Asia kere ka akwapisinei da.” 28Nakiirariata ŋun konyunyurikinos, kiworoto kobalas ebe, “Aratemi naka Ipeson ŋes nakapolon!” 29 Kilelebun ere ecelet; komotaros ketau ediopet alomar alaro naka aboliasio, kedaut aikamun Gaio ka Arisitariko, ituŋa luko Makedonia, lukeupas ka Paul kalositeke. 30Kokoto Paul alomar otuŋa, kisimika ikesisiak. 31Ikapolok ice da luka Asia, lukeraas ikepapero kiyakiasi mamakeŋ, kiŋaiŋaata ŋes kinyek alomar alaro naka aboliasio, 32Aso kiworoto ice ace, ka ice da ace; naarai kitolutoluno ekodet; naarai luipu kakesi mam kejenete akirot naeinakinit kes atukokin. 33Kolemut Alegesanda kotoma okodet, lokisibwoete Iyudayan kakonyen nuka ituŋa. Kokwetu Alegesanda kakanike, kokoto apurokin kakonyen nuka ituŋa. 34Konye nakejenuniata ebe erai ŋesi Eyudayat, kiworoto kere keporoto ediopet bala apak naka isawan iarei ebe, “Aratemi naka Ipeson ŋes nakapolon!” 35Nakedaunia ekewadikan loka ere aisiyamikin ekodet, kobala ebe, “Okwe ikatuŋa luko Epeso, iŋai bo ituŋanan yenimam ejeni ebe, erai ere loka Epeso ekedaran loka eyekalu loka Aratemi nakapolon, ka loka aput nakedouni kokuju? 36Aso naarai mam epedorio aiŋer akiro ŋun, ibusakinit yes aiyamakin, komam isunyito akirot, 37Naarai iyaut ituŋa lu ne lumam ekokoto iboro luka eyekalu, karaida ainyanakin adekewok. 38Aso arai ejaas Demeterio ka ikeswamak ice ipaupake akiro nuiwosaete kituŋanan, ejai airabet, ejaas da ikayaitok; kiwosakinos. 39Konye arai imootos acekirot, itemonokinio katukot naduc. 40Naarai kija toma aronis aiwosao kanuka ecelet loka lolo, loemamei akirot; ido kotoma akirot kana mam kipedori aitojok atukokin na.” 41Kedau einer ŋun kotwar atukot.201Kinapakin ailoŋiloŋa, konyarau Paul ikesisiak, kicor, kotwar kes, konyou kolot Makedonia, 2Nakedaunia aitor atutubeta ŋun, ka aitalakar kakiro nuipu, kodol Yonan. 3Kosalak nen ilapio iuni, ido nakineruniata Iyudayan asurokin ŋes edwar aikwaŋar alosit Suria, kopeleik aboŋor korot loko Makedonia. 4 Kouparos kituŋa kalu, Sopater loka Beroea, okoku loka Puro, ka Arisitariko ka Sekundo Isesalonikan; ka Gaio loka Derube, ka Timoteo; ka Tukiko ka Toropimo luko Asia. 5 Konye keliŋara ituŋa ŋul, kidareut sio koTiroa, 6kekwaŋaros isio anyoun koPilipi akaulo kapaarasia nuka imugatin lumam itubuunitoi, kadolokis kes koTiroa kalosit naka apaarasia akany; kasalakis nen apaarasia akanykaarei. 7 Kapaaran nasodit nakasabato, nakiriamunor tetere kibili emugati, kiner Paul kakes, apele alosit apaaran naatupakini; kiyatak einerike kiton kidiŋebai. 8Kojaas atalai nuipu kagola nakokuju kama kitukokina. 9Iboie etelepat ekekiror Eutuko kadirisa; kilurutu noi ajo; kiyatakinit Paul noi alimonokin, kipikosi ajo, kibiror kwap kagola nakiwuniet, kodakunai etwanit. 10 Konye kodoka Paul kokukum kamake, kotun, kobala ebe, “Sirikiyaloŋoŋoto; naarai eroko ŋesi ejari.” 11Kodoka bobo kuju, kobil emugati, konyam, kiyatak einer kakes apak naepol, kiton tupuruc, kosodi kolot. 12Koyaut etelepat ejari, kolakara alakara naepol. 13Konye sio kaliŋa alosit ataker, kekwaŋaros kiton Assos, kamunos aitodokun Paul ataker kaŋina; naarai kitemokinit ŋesi kwaŋin, komuno ŋes; aitorit neeonit, 14Nakiriamunor Assos, ketodokutu ŋes ataker, kasodete kadoloto Mitulene, 15Kekwaŋaros anyoun kaŋina kadolo apaaran nakiareit aibois naetereikina ka Kios; apaaran da naatupakini kabwoutu koSamos, ka naatupakini ŋin kadoloto Mileto. 16 Naarai abu Paul kitojokite ainac Epeso tetere mam itumor kotoma Asia; naarai kemarani arai epedori adolore Yerusalem eroko apaaran naka Pentekote edolo. 17Nakejaar Mileto kiyakik anyaraun imakio luka ekanisa koEpeso. 18 Nakedolunioto mamakeŋ, kotema kes atiar, “Ijenete yesi kwape keboienenoo kayes apak kere ageun kapaaran kanasodit naadolio Asia, 19 ejaanakinenei Ejakait kaitasono kere, ka akiyo, ka acoduneta nukadoikinete kobotei luka Iyudayan, 20mam abu kenac alimonokin yes akirot kere naeyaun ajokis, kesisianakinenei yes kaitebeikin, ido kaŋolitog, 21etejenuni lyudayan ka Iyonanin da nuka aitoronikin mama ejai Edeke ka aiyuun da Ejakaitiwok Yesu Kristo. 22 Aso kwana, koany, alosi Yerusalem, kaenitai komoyo, mam ajeni akiro nukadoikinete kaŋina, 23 dimarai ketejenuni Emoyo Lokalaunan kaŋolire ebe kedareto aeneta ka areio. 24 Konye mam apodo akaijar araun naketiai kamakaŋ, dimikito kaŋetak akaigerosit ka aijaanakin nakadumuni kama ejai Ejakait Yesu, aitejenun Akiro Nukajokak nuka asianut naka Edeke. 25Aso kwana, koany, ajeni eoŋ ebe yes kere lukerimorit alimonokin ajakanut naka Edeke mam bobo ianyunete akakonyen. 26 Kanuka ŋun ketejenuni yes lolo ebe mam akusiwokot kabeikinete eoŋ, 27naarai mam abu kenac alimonokin yes ainerun kere naka Edeke. 28 Kocoito yesi, ka esipan da kere loadakaki Emoyo Lokalaunan yes araut ikaanyanarak, tetere icokiete ekanisa loka Edeke, lokikurauni kakeokot elopet. 29 Ajeni ebe kanyou eoŋ epote ipeen luededeŋ mamakus, mam itimete esipan; 30 bobo da enyounete kotomakus ikiliok luineras nuitapaarete airiar ikesisiak atupar kes. 31 Asokokwenyete, kiitunitos ebe ikar iuni mam abu kenyek aicor ŋinituŋanan paaran ka kuar kakiyo. 32 Kwana da ketitiŋ yes Edeke, ka akirot naka akesianut naepedori aiduk yes ka ainakin da airumet nepepe kaŋul kere luitalaunitai. 33 Mam abu kemiela epuesa karaida esabu karaida inapen luka ituŋanan. 34 Ijenete yesi ebe akakanin nu apotu kiswamata nukeipudika, ka loka ŋul kalukija nepepe keoŋ. 35Kotoma akiro kere ketodik yes ebe kaitaaritoi naikoni nen ibusakinit aiŋarakin luekalanyaka, kaiitunite akiro nuka Ejakait Yesu, nukebala ebe, ‘Ainakin erai nakarereŋ adepar adumun.’ ” 36 Nakedaunia einer ŋun kokukokin kilip nepepe kakes kere. 37 Komonyata noi kere, kotunata Paul konuata. 38 Ekadakinitos noi kanuka akirot ŋin nakinera ebe mam bobo eanyunete akekonyen. Kinyamakis do kiton ataker.211Kosodi kanen nakidaunia atwarakin, kekwaŋaros kiderit kadoloto Kos, apaaran da naatupakini kadoloto Rodo, kanyout kanen kadolo Patara. 2Kadumutu ataker naekoto aikwaŋar kiton Poenike, kadokasi, kekwaŋaros. 3Nakianyunia Kupuro kipou kenyeisi ŋes kakan nakokediany, kediata kiton Suria, kadokutu koTuro; naarai nen kekotor ataker alemario iboro lueleleba. 4 Kiidau amoun ikesisiak, kasalakis nen apaarasia akanykaarei. Kolimokis kesi Paul kanuka Emoyo ebe sirikedoka Yerusalem. 5 Kosodi kedaunos apaarasiakosi kanen, kanyoutu kasodokinete; apotu ituŋa kere, nepepe kaŋorokec ka idwekec kinyamakis sio kiton kiŋa naka ere; kakukokinos oitolima kelipa kasodete katwarakinos. 6Kadokas isio ataker, koboŋosi do kesi orekec. 7Kasodete nakidaunia alositekosi anyoun koTuro, kadoloto Pitolomai; keyogata iinacan kasalata mamakec apaaran adiopet. 8 Tupuruc kanyoutu kadoloto Kaisarea; kalomasi togo loka Pilipo ekalimonokinan, lokerai ediopet kokanykaarei, kasalata mamake. 9 Kejaas ŋol apesur aoŋon abekon, nukeraas akadwarak. 10 Nakisalitor nen apaarasia nuipu, kodoku enabi ekekiror Agabo anyoun koYudaya. 11 Nakedolunio mamakosi kolem amuny naka Paul, koen elopet akekeje ka akekanin, kotema atiar, “Ebala Emoyo Lokalaunan kwanata ebe, Kwape kwaŋin eeniata Iyudayan luko Yerusalem elopet amuny na, ijaikinete da akanin nuka Imo.” 12 Nakiiraria ŋun, isio ka ituŋa luka aibois kaŋin, keŋaiŋaata ŋes sirikedoka Yerusalem. 13 Kosodi Koboŋok Paul ebe, “Anyoika iswamaete yesi, aimony ka aibil ekatau? Naarai akapakina mere aenio bon, konye atwanare da kotoma Yerusalem, kanuka ekiror loka Ejakait Yesu.” 14 Nakegirio akosiiŋaiŋa, kapalutu do kabalas ebe, “Nuekoto Ejakait kiswamai.” 15Akaulo kapaarasia kaŋun, ketemokisi ikosiboro kadokasi kiton Yerusalem. 16Kouparos ice kokesisiak luko Kaisarea kasio, koyaŋaasi sio ore loka Menason loko Kupuro, ekesisian lokolo sek, lokipejoi mamakeŋ. 17Nakidolio Yerusalem kisukunyikis iinacan sio kaiyalama. 18 Kapaaran naatupakini koloma Paul nepepe kasio mama ka Yakob; kojaas da imakio kere. 19Akaulo kayogan kes, kitatam kisudunyite akiro kere nukiswamai Edeke kama ka Imo kotoma aijaanakinike. 20 Nakiirariata, kituroto Edeke. Kotemasi ŋes atiar, “Onacekosi, iany kwape imwaatar ilukumin luka Iyudayan luiyuunito, irumit kes kere ekokote kanuka ikisila, 21 elimonokinitai kes nukon ebe isisianakini Iyudayan kere luejaas Omo ainyein Musa, ilimonokini kes ebe sirikekepata ikecedwe karaida atupit iponesio. 22Aso ikwaikinio bo do ai? Abeit epupunete ebe ibu ijo. 23 Aso kiswama nukilimokini jo, Ejaas sio ikiliok iwoŋon lueenit aiyaposit; 24 koyaŋa ituŋa lu, kitalaun nepepe kakes, kotacak kes tetere ebarenete akwesikec. Kojenut ituŋa kere ebe akiro kwa nukelimonokinitai kanukon mam ebeito, konye jo elopet iricit aitodol ikisila. 25 Konye kanuka Imo luiyuunito, kipou kewadikata ebalua katubito ebe kinaca kesi iboro lueinakinio aputosia araut asuban, ka aokot, ka itiaŋ luemiedio, ka adoteu.” 26 Kosodi Paul ayaŋaar ikiliok ŋul, kitalaun elopet nepepe kakes apaaran naatupakini, koloma oyekalu, aitejenun apak naitodolikinere apaarasia nuka aitesegaario naeinakinere asubanit kanuka ŋolidiopet kakesi. 27Keapuut apaarasia akanykaarei aŋetakin, koanyut lyudayan lukepote koAsia ŋes koyekalu, kisidikoto ekodet kere, kikamutu ŋes, 28 kocelut ebe, “Yes ikiliok luka Isirael, kiŋarakinai sio! Lo ŋes etuŋanan loisisianakini ituŋa kere kaiboisio kere asurokin atekerewok ka ikisila ka aibois na da; ido da ayau ŋesi Iyonanin toma oyekalu, amunaa aibois na nakalaunan.” 29 Naarai keanyunitos Toropimo Epesot nepepe kaŋes kore, koomitos da ebe ayau Paul ŋes toma oyekalu. 30Kosodi kibwaa ere kere, kokerut ituŋa; kikamutu Paul kibwosasi kiŋa keyekalu, atipet kogolokinoi ikekia. 31Nakemoototor epone loaret, kodolokis akiro ekapolon loka erioŋet ebe enyalinyalun Yerusalem kere. 32Atipet kolem iserikalei ka ikapolokitokokec, koker mamakec; kosodete nakeanyuniata ekapolon ka iserikalei kinyeis aibuŋa Paul. 33 Kosodi koapik ekapolon kikam ŋes, kicorak aenio kirikoi iarei, Kiŋit ebe, “Iŋai bo lo?” ido ebe, “Anyoika eswama?” 34Kocelas ice kokodet ace, ka ice da ace; namam kepedoria ajenun akiro kanuka ecelet, kicorak ayaŋaario ore loka iserikalei. 35Nakedolio adoketa kodakasi ŋes iserikalei kanuka agogoŋ naka ekodet; 36 naarai ketupit ekodet loka ituŋa luipu, ecelasi, kobalas ebe, “Kicutasi ŋes!” 37Konye napedwar kes aitolomar ŋes orekec, kiŋit Paul ekapolon ebe, “Ibus kereka eoŋ alimokin jo akirot?” Kobala ŋesi ebe, “Ijeni tope ijo Ayonanin? 38 Mere kereka ijo Emisiriat je, loitonyounit pac ituŋa ilukumin iwoŋon lukenyaritai Ikaarak, kiŋarenik amodiŋ?” 39 Koboŋok Paul ebe, “Arai eoŋ Eyudayat, loko Taruso kotoma Kilikia, lokore lomere loedit; keŋaiŋait, kisiikinai kener kituŋa kalu.” 40Kisiik ŋes, kosodi kobwo Paul kadoketa, kokwet ituŋa; kojau aililiŋ tiiti, kiner kakes kaŋajep nAburaniat, ebe:221 “Yes ikiliok iinacan ka lukapapaka, kiirarai kwana nuenera aiiyaror.” 2 Nakiirariata ebe inera kakes kaŋajep nAburaniat, kiyatakis aililiŋ tii. Kobala ebe: 3 “Arai eoŋ Eyudayat, kaurikinio Taruso, koKilikia, konye kasaunio kore kalo kakeje nuka Gamaliel, kesisianakinio kainyikokin kokisila luka lukapapaawok, abu kerumite ekokote kanuka Edeke kwape ijaatar yesi kere lolo. 4 Kareite ituŋa luka Erot kala kiton atwanare, kaenenei karemonokin aidaris ikiliok ka aŋor da, 5kwape itejenikina esasedoti lopeti ka imakio kere luka aurianet, Abu kadum ibaluan kamakec ainar iinacan, kalot Damasiko tetere ekamuni luejaas ŋina da, ka ayaun kes Yerusalem eenitai tetere iticanio. 6“Kosodi kanen napalosi, aapikin Damasiko, kidiŋ paaran, atipet kemiliaik aica naepol naabuni kokuju. 7Kebirokin kwap, keira eporoto lokabala eoŋ ebe, ‘Saul, Saul, kanukinyo kireitor eoŋ?’ 8Kaboŋok ebe, ‘Ijoŋo iŋai, Ejakait?’ Kabala ebe, ‘Arai eoŋ Yesu Enasarayot, loireit ijo.’ 9Ŋul da lukejaas keoŋ apotu koanyut aica ŋin, konye mam apotu kiiras eporoto loka ŋol kalokinera keoŋ. 10Kabala ebe, ‘Keswama anyoika, Ejakait?’ Katema Ejakait eoŋ atiar, ‘Konyou, koloma Damasiko, kanen kilimokinio kere nuitemokinitoi jo aswam.’ 11Konye namam apedoritor aanyun kanuka amwekimwek naka aica kaŋin, karikosi eoŋ ŋul lukejaas keoŋ, kaloma Damasiko. 12Kanen Anania, etuŋanan loeyoŋit Edeke kwape ejaatar ikisila, loetojokitai koYudayan kere lukiboiete kanen, 13kobu mamakaŋ, kobwo kodiekaŋ kabala ebe, ‘Onaceka Saul, kokweny.’ Ido kosawa kaŋol abu kakweny kaany ŋes. 14 Kobala ŋesi ebe, ‘Kiseu jo Edeke loka lukapapaawok tetere ijenuni nuekoto ŋesi, ka aanyun da Ekadoliton, apupun eporoto loelomuni kaitukuke; 15naarai iraun ekekajenan kotuŋa kere kakiro kaŋun nuiany ka nuiiraa da. 16 Aso kwana idaret inyo? Konyou, kibatisai, kilota akonidiakanareta, kiwonete ekekiror.’ 17 “Kosodi kanen nakadaunia aboŋun Yerusalem, elipi koyekalu, kogelakin ekamoyo, 18Abu kaany ŋes, katema eoŋ atiar, ‘Kisunyite, konyou atipet koYerusalem, naarai mam ecamunete akoniitejenun kamakaŋ.’ 19 Kabala ebe, ‘Ejakait, ejenete kesi ebe abu eoŋ kaenenenei ka aibuŋ da ŋul lukiyuunito jo kaŋinitukos kere. 20 Naabukorere da aokot nuka Sitepan ekajenanikon, ajai eoŋ da abwoi eapie, ketojokite, kedari inapen luka lukearete ŋes.’ 21 Katema eoŋ atiar, ‘Ape; naarai keyakiari jo neelwana mama ejaas Imo.’ ” 22 Apotu kopupokis ŋes kiton akirot ŋin; kosodete kodelosi kiworoto ebe, “Kicutasi oloŋai ŋol kakwap. Naarai mam ibus ŋes aijar.” 23Napecelasi, ka acakanar ikecenapen ka aiwelanar da apua kuju, 24kicorak ekapolon aitolomar ŋes ore loka iserikalei, kotema ŋes aŋicio kadaio, tetere ejenuni nuainakinit kes ecelas kwaŋin kanukeŋ. 25 Nakedauniata aien ŋes kaunoi, kobala Paul ekapolokiton lokebwoi eapie ebe, “Ibus kereka yes aida etuŋanan loerai Eromayot komam etubokinitai?” 26Nakiiraria ekapolokiton kolot kitejen ekapolon kobala ebe, “Nunyoika ikoto ijo aswam? Naarai erai etuŋanan ŋol Eromayot.” 27Kobu ekapolon kiŋit ŋes ebe, “Kolimokinai, irai teni ijo Eromayot?” Kobala ebe, “Eebo.” 28Koboŋok ekapolon ebe, “Abu eoŋ kagwel araut Eromayot karupian nuipu.” Kobala Paul ebe, “Konye eoŋ euriat.” 29Atipet kobwata lukekapakina aiŋit ŋes; kokuriana ekapolon da, naarai ajenu ebe erai Eromayot ido abu koen ŋes. 30Apaaran naatupakini, kokoto ajenun abeit nuainakinete Iyudayan aosan ŋes, kolacak, kicorak isasedotin lupeti ka aurianet kere atukokin, koyaŋau Paul da kisibwo ŋes kakonyenekec.231 Kikesite Paul akonye kaurianet, kobala ebe, “Ikiliok iinacan, abu kajar kakonyen nuka Edeke ketau kaloejok kiton lolo.” 2 Kicorak Anania losasedoti lopeti lukebwoete aapu kaŋes aibap ŋes akeituk. 3 Kosodi Paul atemar ŋes atiar, “Kibapi jo Edeke, ijo arwatat naiworiworitai kakwanis! Iboikin kereka ijo atubokin eoŋ kwape ejaatar ikisila, kwabo icorak eoŋ aibapio aitegelikin ikisila?” 4Kobalas lukebwoete aapu kaŋes ebe, “Ijo ba, imoromoroi kereka esasedoti lopeti loka Edeke?” 5 Kotema Paul atiar, “Iinacan, mam ajeni ebe erai esasedoti lopeti; naarai iwadikatai ebe, ‘Sirikiner erono mama ejai ekayaiton loka ikonituŋa.’ ” 6 Konye nakejenunia Paul ebe atutubet adiopet kerai naka Isadukayon, ka nace da naka Iparisayon, kiworo kaurianet ebe, “Ikiliok iinacan, arai eoŋ Eparisayot, okoku loka Iparisayon; katubokinitai eoŋ kanuka amun naka ajarun naka ikatwak.” 7Nakedaunia einer ŋun, kojau epeget kidiŋ Iparisayon ka Isadukayon; kotiaka atukot. 8 Naarai ebalas Isadukayon ebe emamei ajarun, karaida emalaika, karaida emoyo; konye ecamunito Iparisayon ŋun kere. 9 Kojau ecelet loepol; kobwaata ikewadikak ice owai loka Iparisayon, koutasi kobalas ebe, “Mam sio kidumuni adiokirot naerono kotuŋanan kalo. Arai bo emoyo inera kaŋes, arai bo emalaika?” 10Kiyatakin ecelet apoloor, kokurianar ekapolon ebe enyilinyiliete kesi Paul, kicorak iserikalei adokun ka alemun ŋes kagogoŋ kakaninikec, ainyakar da ore loka iserikalei. 11 Kakuare kaŋin kobwo Ejakait aapu kaŋes, kobala ebe, “Kotitiŋior, naarai kwape itejenunia nukaŋ koYerusalem, kwape kwaŋin ibusakinit ijo aitejenun ko Rome da.” 12Nakiwala akwap, kitutuko Iyudayan, koenikinos kaiyaposit ebe mam enyamete karaida aimat kiton neaariata Paul. 13Lukiyapoikinete kwaŋin emwaasi ituŋa akaisaoŋon ka adepar da. 14 Koloto kesi mama ejaas isasedotin lupeti ka imakio, kotemasi atiar, “Kienikin noi kaiyaposit ebe mam kiiri ibore kiton nekiaria Paul. 15Aso do kwana, kikwenyasi yesi ka aurianet ekapolon ayaŋaun Paul mama ijaas, bala ikotosi ajenun kotenan akekiro, Kikapakina isio da aiar ŋes eriŋa eekuna die.” 16Kiira ecen loka Paul nuka aperunikec; kolot koloma ore loka iserikalei, kolimok Paul. 17Konyarau Paul ekapolokiton ediopet kotemaatiar, “Koyaŋa etelepat lo mama ejai ekapolon; naarai ejai akirot naelimokini ŋes.” 18Kanuka ŋun koyaŋa ŋes, kitoloma neejai ekapolon, kobala ebe, “Abu Paul ŋol eenat kanyara eoŋ, kelip aitolomun etelepat lo mamakon, naarai ejai akirot naineras kajo.” 19Kitiŋ ekapolon akekan kogitaros kaŋes, kiŋit kaiyeiyea ebe, “Anyoin akirot naikoto ijo alimokin eoŋ?” 20Kobala ebe, “Enerut Iyudayan aiŋitun jo aitodokar Paul moi toma aurianet, bala ekotos aiŋitiŋit kotenan akekiro. 21Aso siri jo kicam; naarai eperunito ŋes ituŋa luedeparito akaisaoŋon kakesi, luaenikinos kaiyaposit ebe mam enyamete karaida aimat kiton neaariata ŋes; aso kwana ekapakina kesi, idaretos akoniisumunet.” 22Kosodi kotwar ekapolon etelepat, kicoro ebe, “Sirikilimok idiotuŋanan ebe kikwenyarit eoŋ.” 23Kosodi konyarau ikapolokitok iarei, kobala ebe, “Kitemokis iserikalei akwat aarei, ka ikebwanenok akaisakanykaarei, ka lukakwaras da akwat aarei, alosit kiton Kaisarea, osawa lokiwuniet loka akuar. 24Kitemokis itiaŋ lukisibwaneno Paul da, koyaŋaasi ŋes mama ejai Pelikis ekayaiton eiyara.” 25Kiwadik ebalua kepone kalota: 26 “Kulaudio Lusia mama ejai ekayaiton lokaibuses Pelikis, ayogan. 27 Ikamunito Iyudayan etuŋanan lo, aapikinito aiar ŋes, kabunok kes nepepe ka iserikalei, kayu, kajenu ebe erai Eromayot. 28 Kakoto ajenun akirot naeosatotor, ketodoka aurianetekec. 29 Kadum ebe kiwosatai kanuka aiŋiseta nuka ikisilakec, kwabo mam kiwosatai adiokirot kere naibusakinitor aaria karaida aenia. 30 Kosodi nakapukokinere ebe ejaun ebotet loebilakinete ekiliokit lo, atipet kejuku mamakon, kecoraki da lukewosatok einer akecekiro kakonyenekon.” 31Kosodete koyaŋaasi iserikalei Paul kwape kicorakinitere kinyamasi kuare kiton Antipaturi. 32Tupuruc do koboŋosi kesi ore loka iserikalei kinyeis ikebwanenok aiyatakin alosit kaŋes, 33Kedolo ŋul Kaisarea, ka ainakin ekayairon ebalua, kisibwaata da Paul kakonyeneke. 34 Ŋes da nakedaunia asoman, kiŋit ebe, “Erai ŋesi loko buku ali?” Nakejenunia ebe erai loko Kilikia, 35kotema atiar, “Keirari jo naeponiata lukiwosato.” Kicorak aidario kotogo lokapolou loka Kerode.241Kosodi ketuboros apaarasia akany, kijesar Anania esasedoti lopeti nepepe kice komakio, ka ekeneranikec, Teratulo. Kikujokis kesi ekayaiton nuesurokinitotor Paul. 2Kenyaraun ŋes, kogeu Teratulo aosan ebe: “Naarai kidumunit ainapakin naepol kanukon, wu Pelikis lokaibuses, kanuka apiirikinikon da eteteun akiro nuka ateker kana, 3 kicamunit da kaimal naepol koponesio kere kaiboisio da kere. 4Konye kenyek aitapas jo noi, keŋaiŋait jo kopupok sio kasianutukon kanuesupaaka. 5 Naarai kidum isio ekesa lo erai ekamunaaran, ekesidikon da loka ecelet koYudayan kere anatar akwapin kere, ekeŋarenon da loka erioŋet loka Inasarayon. 6 Bobo da abu kotam amunaar eyekalu, kekamut, [kakotos atubokin kwape ejaatar ikisilakosi. 7Konye kobu ekapolon Lusias kolema ŋes kagogoŋ naepol kakaninikosi,] 8 kicorak da ikewosatokoke aponare akonyenekon. Ijo elopet kaiŋitiŋitikon ipedori adumun akiro nukiwosat isio ŋes.” 9Kiwosata Iyudayan da kobalas ebe, “Ikote nepenen.” 10Kosodi kokwet ekayaiton Paul einer, Koboŋok ebe: “Naarai ajeni ebe irai ijo ekatubon loka ateker kana ikar luipu, atubo elop ketau kaloelakara, 11 naarai ipedori ajenun ebe eroko apaarasia edepara atomon kanuarei ageun naadokaria eoŋ Yerusalem aima; 12mam ituŋa lu apotu kadumut koyekalu kipega kidiotuŋanan, karaida aituwutaar atukot, karaida katukosia, karaida kore. 13Kwabo mam epedorete aitogogoŋ akiro ŋun nuiwosaete kwana. 14 Konye alimori kamakon nu ebe kwape ejaar Erot, loenyarito kesi erioŋet, kwaŋin amaia Edeke loka lukapapaakosi, eyuunit kere nuelimito ikisila, ka nuiwadikatai oitabon luka inabin, 15 amunokina Edeke, ŋol loecamunito kesi da ikulepek, ebe ejaun ajarun naka luedolito ka lumam edolito da. 16 Kanuka ŋun enyikokinit ajaut ketau lomam itoronio mama ejai Edeke ka ituŋa da apaarasia kere. 17 Akaulo naka ikar luipu abu kabu ainun atekereka nukaitim ka ainakineta da. 18 Kaŋun kadumut eoŋ koyekalu etesegaara, komamei ekodet karaida autar. Konye Iyudayan ice lukepote ko Asia— 19lutiebusakinit ajaut ne akonyenekon aosan eoŋ, arai ejai adiokirot keoŋ, 20Arai bo kolimut lupelu aibucaret naeanyunitos kamakaŋ naabwoia kaurianet, 21 dimarai akirot na adiopet bon nakeworoi kabwoi kokidiŋikec ebe, ‘Kanuka ajarun naka ikatwak katubokinio lolo kakonyenekus.’ ” 22 Konye kisiyap Pelikis kes, naarai kejeni ace nuka Erot, kobala ebe, “Naijesunor Lusias ekapolon atubi akirokus.” 23 Kosodi kicorak ekapolokiton aidar Paul konye kajalakinit, komam isimiki idio kopaperoke aijaanakin ŋes. 24Kosodi ketuboros apaarasia kodol Pelikis nepepe ka Durusila akeberu, nakerai Ayudayat, kiyakia anyaraun Paul, kiira ŋes inera nuka aiyuun naejai toma Kristo Yesu. 25Kopesik Paul ŋes akiro nuka adolit, ka nuka ayaikina, ka atubokinio naebunit, kokurianar Pelikis, Koboŋok ebe, “Kolot do kwana; kadum eoŋ apak, keworouni.” 26Komuno da ebe einakini ŋes Paul arupian, Kanuka ŋun konyaraunun eyala kaŋes. 27 Kosodi ketuboros ikar iarei, kodakakinai Porukio Pesito airum aibois naka Pelikis; kekoto Pelikis aitojokio kama ka Iyudayan, kwaŋin kinyek Paul kaidaris.251Kosodi nakedolio Pesito obuku, ketuboros apaarasia auni kodoka Yerusalem anyoun koKaisarea. 2 Kikujokis ŋes isasedotin lupeti ka ikeŋarenok luka Iyudayan nuka Paul, kiŋaiŋaata ŋes, 3 kilipata kasianutuke ayaun Paul Yerusalem, tetere eperunete ka aarakin orot, 4Konye Koboŋok Pesito ebe idario Paul koKaisarea, eapie ŋes da alosit ŋina. 5Kobala ebe, “Aso ŋulluejai apedor kayesi kauparos kaeoŋ, arai kito ejai akirot naerono kotuŋanan kaŋol, kiwosata do.” 6Nakesalitor kakes apaarasia numam edeparito akanykauni arai atomon, kijesar Kaisarea; apaaran naetupakini kiboikin oicoloŋ loka etube, kicorak Paul ayaunio. 7Nakedolunio Paul, kobwaata Iyudayan lukijesunos koYerusalem airimor ŋes, kiwosata ŋes akiro nuipu nuelaŋir, numam apedorete aitogogoŋ, 8Kobala Paul eiyar ebe, “Mam eoŋ adiakit akirot karaida kokisila luka Iyudayan, karaida oyekalu, karaida mama ejai Kaisar.” 9 Konye Pesito kekoto aitojokio kama ka Iyudayan, Koboŋok Paul ebe, “Ikoto kereka ijo alosit Yerusalem atubokinio kaŋina kakonyeneka kakiro kanu?” 10Konye kobala Paul ebe, “Abwoi eoŋ kane koiŋaren keicoloŋ loka etube loka Kaisar, nekebusakinitor atubokinio; mam adiakit akirot koYudayan, kwape ijenia ijo kotenan. 11Aso arai adiakit, arai eswamat akirot naibusakinitor atwania, mam aŋeri atwanare; konye arai emamei abeit kanukewosatotor, emamei yenepedori aijaikin eoŋ akaninikec. Eyatakinit mama ejai Kaisar.” 12Kosodi nakedaunia Pesito einer kituŋa luka aurianet Koboŋok ebe, “Iyatakinit ijo mama ejai Kaisar; ilosi do mama ejai Kaisar.” 13Ketuboros apaarasia, kodol Agiripa ekabaka, ka Berenike Kaisarea ayogan Pesito. 14 Nakesalitotor nen apaarasia nuipu, kitatamik Pesito ekabaka akiro nuka Paul ebe, “Ejai ne etuŋanan lokinyeini Pelikis eenitai; 15lokekujokinete isasedotin lupeti ka imakio luka Iyudayan akiroke nakajaar Yerusalem, kokotosi ŋes atubokinio. 16Abu kaboŋok kes ebe mam erai epone loka Iromayon aijaikin etuŋanan kere eroko yeniwosatai etereikina ka luiwosato, ka adumun apak naka aiyar kotoma kanuiwosatai. 17Aso naketukonokinotor ne, mam abu keyap, konye apaaran naatupakini keboikin oicoloŋ loka etube, kecorak etuŋanan ŋol ayaunio. 18Kosodi nakebwoiata lukiwosato ŋes mam eyauna akirot naerono kwape abu kaomitor; 19 konye ejaas aiŋiseta ace nuka edinikec, ido nuka etuŋanan ece Yesu loabu kotwana, konye loitogogoŋit Paul ebe ejari. 20Kaoliki eoŋ aiŋic aiŋiseta ŋun, abu keŋit arai ekoto alosit Yerusalem atubokinio kaŋina kakiro kaŋun. 21Konye Paul kiyatak aidario tetere etubokini Kaisar, kecorak ŋes aidario kiton neejukaria ŋes mama ejai Kaisar.” 22 Kotema Agiripa Pesito atiar, “Eoŋ da elopet abu kakoto apupun etuŋanan ŋol.” Kobala ebe, “Ipupuni ŋes moi.” 23 Kosodi kapaaran naatupakini kobu Agiripa nepepe ka Berenike kaibuses naepol, kolomasi aibois naka aipup akiro nepepe ka ikapolok luka iserikalei ka ikiliok luejenikina lukore. Kicorak Pesito Paul ayaunio. 24 Kotema Pesito atiar, “Ekabaka Agiripa, ka yes kere luijaas ne nepepe kasio, ianyut etuŋanan lo lokelipito eoŋ Iyudayan kere luko Yerusalem ka ne da, kiworoete ebe mam bobo ebusakinit ŋes aijar. 25Konye abu kaany ebe mam iswamat akirot naibusakinitor atwanare; ŋes da elopet iyatakinit mama ejai Kaisar, abu kaomite aijukar. 26Eoŋ da emamei akirot nakabeit naewadikakini ejakait. Kanuka ŋun ayau ŋes ne akonyenekus, aitelekarit akonyenekon, wu Ekabaka Agiripa, tetere kidau aiŋitiŋit kadum akirot naewadikai. 27Naarai aomit eoŋ ebe mam ejok aijukar eenat komam itodiara nuiwosatere ŋes.”261Kobala Agiripa Paul ebe, “Kinup jo einer kanukon.” Kosodi korio Paul akekan, koiyar, kobala ebe: 2“Wu Ekabaka Agiripa, kekemer naarai kaiyar lolokakonyenekon kanuka akiro kere nukewosatotor Iyudayan, 3aitelekarit naarai ijeni ijo iponesio kere ka aiŋiseta da kere nuejaas oYudayan. Kanuka ŋun kemaimait kopupok eoŋ katitiŋikinit. 4Naarai ejenete Iyudayan kere ekajautene ameun keitelepane, lokejai kageunet kotoma atekereka, ido ko Yerusalem da. 5 Apotu kajenut ameun apeŋo, arai ekotosi aitejenun, ebe abu karai Eparisayot lokorioŋet loetokit noi kotoma odinikosi. 6 Kwana da abwoi kane atubokinio kanuka amun aisumunet nakisumunit Edeke lukapapaakosi, 7 naemunosi atekerinikosi atomon ka nuarei adolokin, emaenenete Edeke kainyikokinit paaran ka kuare da. 8Kanukinyo eomitere kamakus araut akirot namam ecamuna ebe itajari Edeke ikatwak? 9 “Abeit abu eoŋ elopet kaomite ebe kebusakinit aswam nuipu airebokin ekiror loka Yesu Enasarayot. 10Abu keswama ŋun ko Yerusalem; abu kaen ice kalukalaunak aidaris, kadau ainakinio apedor kaneejaas isasedotin lupeti, ido da abu kekeik akan luaario. 11Ido irwan ipu abu keticanenenei kes katukosia kere, ketiŋaikinite ainyanakin Edeke; kareite kes kaibworit kiton oreria lukokiŋa da. 12“Kasodi alosit Damasiko kanuka aswam kaŋin, kija kapedor ka anupakinio naka isasedotin lupeti. 13Kosodi kidiŋ paaran, wu ekabaka, abu kaany aica nakebuni kokuju, nakedeparit ailiya naka akoloŋ, kacaikin eoŋ ka ŋul lukija nenipe keoŋ. 14Kebirokinos isio kere kwap, keira eporoto lokinera keoŋ kaŋajep naka Aburanian ebe, ‘Saul, Saul, kanukinyo kireitor eoŋ? Kitionikinit ijo aipet iketetin.’ 15Kabala ebe, ‘Iŋai bo ijo, Ejakait?’ Katema eoŋ Ejakait atiar, ‘Eoŋ Yesu loireit ijo. 16 Konye konyou, kobwo kakejekon; naarai ketakanikin jo kanuka nu, adakakin jo araun ekejaanakinan ka ekajenan loka akiro nuibu koanyunia eoŋ, ido kaŋun nuketakanikinor, 17 kayuuni jo kama kituŋakon ka Imo da-lukeyakiari mamakec, 18 aitwekenyun akecekonye, tetere ibelokinos ainyein amuton kesesenata aica, ainyein da apedor naka Satan kosesenata Edeke, kosodete adumun aisionio adiakanareta, ka airumet kokidiŋ; kaŋul kaluitalaunitai kanuka aiyuun naejai tomakaŋ.’ 19 “Kanuka ŋun, wu Ekabaka Agiripa, mam abu kepaliik aitapoet nakakuj, 20 konye abu kageu alimonokin luko Damasiko, kosodi koYerusalem, kotoma akwap kere da naka Iyudayan, ka Imo da, ebe kitoronikinos, kibelokinos mama ejai Edeke, iswamaete aswamisio nuibusakinito aitoronikin. 21 Kanuka ŋun ŋes kekamuniata Iyudayan kotoma oyekalu, katamakis aiar da. 22 Aso kiton lolo adum aisigalikinio naebuni kama ejai Edeke, abwoi aitejenun ludidik ka lukapolok da, kwabo mam eneri akirot dimarai ŋun nukinerasi Musa ka inabin ebe ejaunete: 23 ebe ibusakinit Kristo aiticanio, ido da korau ŋesi losodit ajarun kokatwak, elimonokini aica mama ejaas ituŋakosi ka Imo da.” 24Kosodi nakeiyaror kwaŋin, kotema Pesito keporoto loepol atiar, “Kikerepiki cama ijo, Paul, kijulaki jo aisisiakon naepol.” 25Konye kobala Paul ebe, “Mam kekerepikinit, wu Pesito lokaibuses, dimarai enera akiro nukabeit ka nukapirianut da obe. 26 Naarai ejeni ekabaka nuka akiro kaŋun, eoŋ da enera kaŋes katitiŋ; naarai etogogoŋit ebe emamei akirot kotoma kaŋun naimunonikinitai ŋes, naarai mam nu eswamas kagor. 27Ekabaka Agiripa, iyuunit tope ijo inabin? Ajeni ebe iyuunit.” 28 Kotema Agiripa Paul atiar, “Kanaesupaana ikoto aituluor eoŋ da Ekristayot!” 29Koboŋok Paul ebe, “Arai kanaesupaana, arai kanaepol elipi Edeke mere ijo bon, konye kaŋul da kere lukapupete lolo, koraut kwape keoŋ-dimarai aeneta nu.” 30Kosodi kobwo ekabaka, ka ekayaiton ka Berenike, ka ŋul lukiboiete kakes; 31napenyounete, kineranakinos ebe, “Mam etuŋanan lo iswamat akirot naibusakinitor atwanare karaida aenio.” 32 Kobala Agiripa Pesito ebe, “Arai kedim etuŋanan ŋol aiyatakinit mama ejai Kaisar ti kelacakin.”271 Kosodi nakicorakinere sio aikwaŋar kiton Italia, kijaikis Paul ka ienan ice mama ejai ekapolokiton erioŋet loka Augusito, ekekiror Yulio. 2 Kadokas ataker naka Aduramutio, nakekapakina alosit kiton oreria luka oitolima luka Asia, kekwaŋasi, kauparos ka Arisitariko Emakedoniat loko Sesalonika. 3 Apaaran naatupakini kadolo Sidon; kikonak Yulio Paul asianut, kocamak ŋes alosit mama ejaas ipaperoke tetere imukeo. 4Kanyoutu kanen kekwaŋaros kediata keririto Kupuro, naarai kemeunito ikwamin kakonyen. 5Ketoro aŋolol naka Kilikia ka Pampulia, kadolo Mura nako Lukia. 6Kanen kodum ekapolokiton ataker naka Alegesanderia idiai Italia, kadokikis ŋin, 7Kekwaŋaros motimot apaarasia nuipu, kadolo Kinido kationis, ido naarai kitikokinit ekwam, keririata Kurete katereikina Salumone, 8Ketoroto kationis aapu koitolima, kadolo aibois naenyaritai Odoketa Lukajokak naidunyas ka ere Lasea. 9 Kiilonya apaarasia, kojau aronis alosit naarai atuboros apaarasia nuka Ailuŋ, kidelu Paul, 10kobala kes ebe, “Lukipa, aanyunit eoŋ ebe ejaun amunaar ka atwaniar alosit na, mere iboro bon ka ataker, konye aijarawok da.” 11Konye abu ekapolokiton kopupok ekekwaŋan lokapolon ka elopet ataker aitelekarit ŋun nuenera Paul. 12Ido da mam ebusakinit edoket ŋol aiboio apak naka aaterot, kidelut luipu kakesi aikwaŋar anyoun kanen, tetere elemuni edolete Poenike, edoket loka Kurete, loetereikina agolitome nakokide, ka egalakimak nakokide, kasala nen kapak naka aaterot. 13Kosodi napekusi ekwam lokeŋalakimak kiyamakina, koomitos ebe adumutu nukekotos, kibwosut edobo lokitapaikinet, kikwaŋaros aapu koitolima loka Kurete. 14Ketubor apak naedit kokut ekwam lokagogoŋ, loenyaritai Eurakulon ebuni kaneonit, 15Kokutar ataker, mam epedoro atereikina ekwam, kajalakisi kikutario, 16Kanen ketoro atipet ariri naka apujan naedit naenyaritai Kulauda, kekurautu ajen itaker. 17Kekiasi ŋes, kitwasamata aisigalikineta, koenikis kwap ataker; ido naarai kokuriaka aipok koSuritis, kijoliliosi iboro, kwaŋin kokutarai. 18Naarai kiiliilit ekwam, apaaran naatupakini kogeut acakar iboro aŋolol; 19apaaran nakiwuniet da kocakanasi kakaninikec ikulepek iboro luka ataker. 20Mam atakani akoloŋ karaida aacer apaarasia nuipu, kokuta sio ekwam loededeŋ, kokau kodaun amun kere naka aitajario. 21Nakiboioto apak naapol mam enyamete, kosodi kobwo Paul kokidiŋikec, kotema atiar, “Lukipa, ti ebusakinit yes aiirar eoŋ, amamus aikwaŋar anyoun koKurete, adumun amunaar ka atwaniar na. 22Aso kwana kecori yes kolakaros; naarai emameun yenetwaniari akeijar, dimarai ataker bon. 23Naarai kakuar kana abu emalaika loka Edeke, loarai eoŋ lokeŋ, loamaenenei da, kobwo aapu keoŋ, 24 kalimok eoŋ ebe, ‘Paul, sirikikurianar; ibusakinit ijo aibwo kakonyen nuka Kaisar; ido koany, kiinak Edeke ituŋa lu kere luiupatar.’ 25Aso, lukipa, kolakaros, naarai eyuunit eoŋ Edeke, ebe ejaun kwape kalimokinitere. 26 Konye ibusakinit aipok kapujan.” 27Kosodi kedol apaaran nakitomonet kaoŋon, nakikaleleor aŋolol naka Adiria, bala kidiŋ ebai koomitos ikekwaŋak ebe aapikis neeonit. 28Kitemo, kodumut aidules akaisaarei; kiyatakis edit kitemo bobo, kodumut aidules atomon kakany. 29Kokuriakaros aipok katiban, koosikis idoboi iwoŋon lukitapaikinet kokori, kilipa akwap aiwalar. 30Nakekototor ikekwaŋak aisii kataker, apotu kijoliliosi itaker toma aŋolol, kijoseikinito bala eosikinete idoboi lukitapaikinet kokume. 31Kolimok Paul ekapolokiton ka iserikalei ebe, “Dimikito esalete ituŋa lu ataker, mam ipedorete aitajario.” 32Kosodete iserikalei aitub aunoi nuka itaker, kojalakis kodo. 33 Napiwalari, kiŋaiŋa Paul kes kere ainyam inyamat, kobala ebe, “Lolo ŋes apaaran nakitomonet kaoŋon aidaret kailuŋ, komam inyamete ibore. 34 Aso keŋaiŋait, konyamata; naarai eraun mamakus aitajario, naarai emamei karaida etimat loka akwesikus loeoliori.” 35 Kedau einer ŋun, kolem emugati, kimala Edeke kakonyenekec kere, kobil, kogeu ainyam. 36Kosodete kolakaros kere, konyama kesi da. 37Isio lukija toma ataker kimwa ituŋa kere akwat aarei ka akaisakanykaarei, ka lukanykape. 38Kedaut aimonikin, kitebebenata ataker, kocakakis akima aŋolol. 39Kiwala akwap, mam ejenuna akwap ŋin, dimarai apotu koanyutu agule naejai oitolima, kinerut aisukunyar ataker ŋina arai epedor. 40Kocakasi idoboi lukitapaikinet, kinyeis kes kaŋolol, nepepe kaijarijar aunoi nueenis aiteteneta; kikeut egoe tetere ekutari ekwam kobeasi oitolima. 41Konye kodoloto neiriamata akailan kipok ataker kokwap, kiminaikin ekume, kosalak komam ijaŋijaŋa, konye kobila akailan ekori. 42Kinerut iserikalei aiar ienan, kinye idiokakesi aiduor ka aisi; 43konye kokoto ekapolokiton aituku Paul, kitikok kinyeis aswam nuenerunitotor. Kicorak luapedorete aidu kisiaut aibironokin aŋolol kobeata neeonit, 44 lukesalete da kabaoi ka oboro ke luka ataker. Kwaŋin kokuasi ituŋa kere neeonit.281Nakidaunia aiku, kajenut ebe apujan ŋin kenyaritai Melita. 2 Kiswamakis sio ikulepek akwap asianut namam etapit, naarai apotu kinokokis akim, kisukunyikis sio, kanuka edou loketepi, ido kanuka aterot da. 3Nakeraraa Paul ekesit loka akito, kibwaik akim, kolom emusaga kanuka amwanis, kidolakin akanike. 4Nakeanyuniata ikulepek akwap emun edelideli kakanike, kotemanaros ebe, “Abeit erai etuŋanan lo ekaaran, Karaida kekuit kaŋolol, mam Etube isiikit ŋes aijar.” 5 Konye ŋes kilakilakak emun akim komam edumunit amusuŋut. 6 Kidarito, komunosi ŋes abuun arai aibiror atwanare eŋeso; konye kedaut aidar apak naepol koanyut ebe amamei adiomusuŋut kere, kibelokinos kotemasi ebe erai edeke. 7Aapu kaibois kaŋin kejaas amanat nuka ekapolon loka apujan, ekekiror Publio, kisukunyik ŋol sio ketau loka eipaperone apaarasia auni. 8Kosodi kanen kedeka papa loka Publio ekamidi ka aleporit aokot, koloma Paul mamakeŋ, kilip, kidokok ŋes akekanin, kitaŋaleu, 9Akaulo kaŋun, kopotu ice lukedekas kapujan kaŋin kitaŋaleunoi. 10Kosodete kitubusikis sio kainakineta nuipu; ido nakikwaŋaror kibwaikis iboro kere lukipuda ataker. 11Akaulo naka ilapio iuni, kediata kataker naka Alegesanderia, nakesalakinit apujan apakio nuka aterot, aanyuneteke kerai Iinacan Imwatok, 12Kadolo Surakusa, kasalakis nen apaarasia auni. 13Anyoun kanen kerimosi kadolo Regium; ketubor apaaran adiopet kokut ekwam lokeŋalakimak, kadolo Puteoli apaaran nakiareit. 14Kanen kadumut iinacan, kiŋaiŋaata sio asalakin mamakec apaarasia akanykaarei. Kwaŋin kadolo do Rome. 15Kiirasi iinacan lukaŋina nukosi, kopotu kiton Agwelanaret naka Apius ka Iswamin Iuni aisiriam sio. Nakeanyunia Paul kes, kimal Edeke, kotitiŋior. 16 Nakilomaria Rome, kocamakinai Paul aiboi bon nepepe ka eserikalet loidari ŋes. 17 Akaulo kapaarasia auni konyarau lukeraas ikapolok koYudayan; kedaut atukokin, kotema kes atiar, “Iinacan, karaida mam eswamat aronis kotuŋa karaida koponesio luka lukapapaawok, aponi kejaikin ko Yerusalem toma akanin nuka Iromayon aenio. 18Kaadaut aiŋitanar, kakotosi alacakin, naarai kemamei adiokirot kamakaŋ naaret. 19 Konye nakepegatar Iyudayan, ketiŋaikin aiyatakin mama ejai Kaisar-kwabo amamei nakiwosaet ituŋa luka atekereka. 20 Aso kanuka ŋun kanyarautu yes aponare aanyun eoŋ keiner keoŋ, naarai kanuka amun naka Isirael ŋes kaenitere korikot kalo.” 21Kotemasi kesi ŋes atiar, “Mam sio kidumunit ebalua anyoun koYerusalem kakirokon, ido emamei onace edio da loebunit ne loelimorit ka ainerit akirot naerono kanukon. 22 Konye kikoto apupun kamakon nuiwomit; naarai kanuka akiro nuka erioŋet kalo ejenikina kamakosi ebe ereitai noi kaŋinikibois.” 23Kedaut aseikin ŋes apaaran kopotu luipu noi mamakeŋ togo lokiboio. Kitetemik kes ka aitejenun ameun tupuruc kiton eboŋ nuka ajakanut naka Edeke, ikujokini akiro nuka Yesu kanuka ikisila luka Musa ka inabin da. 24Apotu ice kiyuut nuenerai, kwabo ice mam iyuuna. 25Namam kecamanarotor, koloto do, kedau Paul einer akirot adiopet na ebe: “Abu Emoyo Lokalaunan kinera kotenan kama ka enabi Isaia mama ka lukapapaakus ebe: 26 ‘Kolot mama ejaas ituŋa lu, kolimok kes ebe: Kiiranarete konye mam ijenunete, Koanyuŋunete da konye mam imisiikinete, 27Abaŋaakata itauon luka ituŋa kalu, Ijikititas akiikec, Itumudakito akecekonyen, Kinyeis aanyun kakonyenekec, Ka aiirar kakeceki, Kojenut kotauonokec, Kibelokinos ketaŋaleu kes.’ 28 Aso kojenutu ebe ejukakin aitajario na naka Edeke Omo: iirarete kesi da.” [29Kedau einer ŋun koloto Iyudayan, epeganakinos noi.] 30Kodau Paul ikar iarei kotogoke loketacanakini, kisukunyanakinenei kere lukeponenenete mamakeŋ, 31 elimonokini ajakanut naka Edeke, ido ka aisisianakin katitiŋ akiro nuka Ejakait Yesu Kristo, komam itikokinio. |