2 Timoteo11Paul ekiyakia loka Kristo Yesu kanuka akot naka Edeke, kwape ejaar aisumunet naka aijar naejai toma Kristo Yesu. 2 Mama ejai Timoteo ikakoku yeniminat: Asianut, aitim, ka ainapakin nuepote kama ejai Edeke Papa ka Kristo Yesu Ejakaitiwok. 3 Emalai eoŋ Edeke loejaanakini ameun ka lukapapaaka kaomisio nuelaete, nakeitununio jo komam apali kotoma ailipika, akuare ka apaaran, 4Emuit aanyun jo, naeitunio akonikiyo, tetere ilelebun aiyalamakaŋ. 5 Nakesiitunere aiyuun namam esoswai naejai kotomakon, naageuni aiboi kotoma tataakon Lois, ka totokon Eunike; ido etogogoŋit ebe ejai kotomakon da. 6 Kanuka ŋun ŋes kesiitunio jo aitunyonokin ainakinet naka Edeke naejai kotomakon, kanuka aidokokinio akaninika. 7 Naarai mam Edeke abu koinak oni emoyo loka akurian, dimarai loka apedor ka loka amin, ka loka aiyapaarit da. 8 Aso kinyeis ileic airum jo kanuka aitejenun naka Ejakaitiwok, karaida kanukaŋ, eenatake, konye kiticaneneno nepepe kAkiro Nukajokak, kwape ejaar apedor naka Edeke, 9 loabu kitajar oni, konyarau da anyarit nakalaunan, mere kwape ejaatar aswamisiowok, dimarai kwape ejaar alosikiniteke elopet ka asianut, naabu koinak oni kotoma Kristo Yesu eriŋa apakio nuka ikar, 10 konye kwana etakanun asianut ŋin kanuka aitodikinio naka Eketajaraniwok Kristo Yesu, loabu kitapalau atwanare, kitacau da aijar ka amamus aibos kanuka Akiro Nukajokak, 11 nukadakakinere eoŋ araun ekalimonokinan, ka ekiyakia, ka ekesisianakinan da. 12Kanuka ŋun da ŋes ariebar kwaŋin. Konye mam kerumito ileic, naarai ajeni loabu keyuu, ido etogogoŋi ebe epedori ŋesi aidarenen nuketitiŋitai kiton apaaran ŋin. 13 Kojau kaanyunet naka akiro nuka aijar nuibu kopup kamakaŋ, kotoma aiyuun ka amin naejai toma Kristo Yesu. 14 Kidarenenei ibore yenejok yenikititiŋitai kanuka Emoyo Lokalaunan loiboie kotomawok. 15 Ijeni ijo na ebe, kere luejaas toma Asia apotu kebonokis ipuran, kotomakec ejai Pugelo, ka Keremogene, 16Kitim Ejakait eka! loka Onesiporo, naarai abu kesiyenu eoŋ irwan ipu, kwabo mam apotu ileic kiruma ŋes kanuka erikotoka. 17Konye nakejaar Rome, kinyikok amoot eoŋ, kadum da— 18 koinak Ejakait ŋes adumun aitimio kama ka Ejakait kapaaran kaŋin-ido kaijaanakin kere naabu kijaanak ko Epeso, ijeni ijo noi jokan.21Aso do jo, ikakoku, kogogoŋor kotoma asianut naejai toma Kristo Yesu, 2Nuibu kopup da kamakaŋ kotoma ikajenak luipu, kititiŋ ŋun ituŋa lumunon, ido Iuibusakinito aisisianakin ituŋa ice. 3 Kiticaneneno nepepe keoŋ kwape eserikalet lokajokan loka Kristo Yesu, 4Mam eserikalet ekacakin kotoma aitaaritoi naka aijar kana kapak naka ejie, tetere itojoki lokiwadikai ŋes araun eserikalet. 5 Arai da eboloboloi ituŋanan, mam einakinio aboko, arai mam eboloboloi kwape icorakinitere. 6 Ibusakinit ekakorion loitaaritoi ageun ayaŋaar araito. 7Koomoom nuener, naarai kiinakin Ejakait ajenun kotoma akiro kere. 8 Kiitu Yesu Kristo, loetajarunio kotoma okatwak, loka aur naka Daudi, kwape ejaatar Akakiro Nukajokak, 9 nueticanitor kiton aenio kwape loiswamai aronis. Konye akirot naka Edeke mam eenio. 10 Kanuka ŋun ŋes atitiŋikinio kere, kanuka luseuna, tetere kes da edumunete aitajario naejai toma Kristo Yesu nepepe kaibuses naka ikar kere. 11 Namunot akirot ŋin: naarai arai kipou katwaka nepepe kaŋes, kijari da nepepe kaŋes; 12 arai kititiŋikini, kirumi da nepepe kaŋes; arai kiŋeri ŋes, ŋes da kiŋeri oni; 13 arai mam kirai lumunon, esali ŋesi erai Iomunot, naarai mam epedori ŋesi aŋerokin bon. 14 Kisiitu kes ŋun, kicor kakonyen nuka Edeke, kinyeis ejie kakiro, numam iŋarakinete, nuitotolikinete luepupete. 15 Kinyikok aitoduun bon korai lokitojokit Edeke, ekeswaman lomam ipuda kirumata ileic, loitubi kotenan akirot naka abeit. 16 Kinac akiro nutai, numam eraas nuka edini, naarai itedeparos kotoma amamus ayoŋit Edeke, 17 enyami kes akecekirot kwape eŋoti. Kotoma kaŋul ejai Kumenaio ka Pileto, 18luapaasi kotoma aiyuun, kinerasi ebe adau ajarun ajaun, itotolikinete da aiyuun naka ituŋa ice. 19 Konye icasit apetetait naegogoŋ naka Edeke, ejai aipucet na ebe, “Ejeni Ejakait lueraas luke,” ido ebe, “Konyou kotoma amamus adolit, ŋin kere yenelimori ekiror loka Ejakait.” 20 Konye kotoma togo lokapolon mam ejaunos iboro luka esabu ka luka epuesa bonik, dimarai luka akito ka luka elupe, ice da luka aibuses, ice da lumam aibuses. 21 Aso arai itesegaar ituŋanan kaŋun, eraun ibore yenika aibuses, yenitalaunitai, yenibusakinit ejakait aitwasam, yenitemonokinitai ŋiniswam naejok. 22 Aso koker eimiel loka atumun, konye kotup adolit, aiyuun, amin, ka ainapakin da, nepepe kaŋul luiwoneete Ejakait kotoma otauon luelaete. 23 Konye koŋer ipegeta luka abaŋaanut, ka lumam aisisianakinio; ijeni ebe euriete ijiisio. 24 Ido mam ibusakinit ebulesit loka Ejakait ejie, dimarai araun loiyapepera mama ejaas kere, ekesisianakinan, loetitiŋikin, 25 loicori kaiyapepera luirebirebete. Motoko einakini Edeke kes aitoronikin kodoloto ajenun cut abeit, 26ido ikwaaros anyoun kotoma atacit naka Satan, kedau ŋesi aikamun kes aswam nuekoto Edeke.31 Konye kojen na ebe kapaarasia nukawasia epote apakio nuetioko. 2 Naarai eraunos ituŋa lueminas bonik, lueminas apesan, Iuituros, luepogaka, ikainyanakinak, luiulakinito ikauriakakec, lumam imalaete, luemamei alaunit, 3lumam eminanara, Iuiketara, ikasabak, lumam itikokinos, ikadedeŋak, lumam eminas ajokis, 4 ikabilak ibotei, luemositos, luedakakina, lueminas aitelelio itia amin Edeke, 5 ejaas kaput naka ayoŋit Edeke, konye koŋeritos apedorike. Kiboŋok ŋul epur. 6 Naarai kotomakec ejaas ŋul luelomanarete otogoi, kijoreoto aŋor nubaŋiok nuelaŋirikito adiakanareta, nuiriarit aiŋobel naka iponesio luipu, 7 isisiaete apaarasia kere, komam epedorete cut adolokin ajenun abeit. 8 Kwape aponiata Yane ka Yambure kobwoikiniata Musa, kwape kwaŋin ebwoikiniata kwi da abeit, ituŋa luemunaara acoa, luegiritoi kakiro nuka aiyuun. 9Konye mam iyatanakinos noi, naarai ideleleuni akecebaŋaanut kotuŋa kere, kwape kideleleunio abaŋaanut naka ŋul kaluarei. 10Konye jo ibu kotup akaisisianakin, ka ekapone, ka nualosikinit, ka aiyuun, ka aŋirikin, ka amin, ka atitiŋikin, 11 bobo da areio, ka aiticanio, akiro nukadoikinete ko Antiokia, ka Ikonio, ka Lusitura, areio naetia nen naekanyakinit; konye abu Ejakait kayu eoŋ kotoma kaŋun kere. 12 Ido da ereunio kere luekotos aijar kayoŋit Edeke kotoma Kristo Yesu. 13 Konye ituŋa lukaronok ka ikamodak iyatanakinos aroniar, iŋalaete ido kiŋalas da. 14 Konye kosal ijo toma akiro nuisisiat, ka aitogogoŋ, ijeni mama ka lukaŋai kisisiaunia, 15 ebe da ameun keiditeu ibu kojen nuiwadikatai nukalaunak, nuepedorete aitocoun jo kiton aitajario kanuka aiyuun naejai toma Kristo Yesu. 16 Ŋinikirot naiwadikatai naiyeŋakit Edeke ejai ajokis aisisianakinia, aikwenyaria, aitetenia, aituutooria da toma adolit, 17 tetere ilosikino etuŋanan loka Edeke, loisilosikinitai kotoma ŋiniswamisioit naejok.41 Kecorak jo jokan kakonyen nuka Edeke, kakonyen da nuka Kristo Yesu loebuni airabakin ikajarak ka ikatwak da, kanuka atakanunike ka akejakanut; 2 kolimonok akirot, kokapakina kapak naejok, ka apak da namam ejok, kiretak, kitoron, kicor, katitiŋikin kere ka aisisianakin. 3 Naarai ebuni apak naegirioto ituŋa aisisianakin naka aijar, ejaas kaki nuipiete, etukonokinete bonik ikesisianakinak kwape ejaar aiŋobelekec bonik, 4 eekarete kesi ainyein aiirar abeit, epaarete mama ejaas awaragasia nutai. 5 Konye jo, kitikokina kakiro kere, kotitiŋikite nueroko, kiswama aswam naka ekalimonokinan loka Akiro Nukajokak, kitodolik akoniijaanakin. 6 Naarai kwana kabukokin eoŋ asubanit; adol apak naka akalosit. 7 Aji ejie lokajokan, adau abolobol, aricit aiyuun. 8 Amear kwana keŋadakinitai aboko naka adolit, nakainakini Ejakait, ekatubon loedolit, kapaaran kaŋin, ido mere eoŋ bon, konye kere da luaminasi atakanunike. 9 Kokukunyuun abunore mamakaŋ katipet. 10 Naarai kajalaki Dema, emina ikar luka tinenikwana, alot da Sesalonika; alot Keresike Galatia, ka Tito da Dalamatia. 11 Luka bon ejai keoŋ. Kodum Marako koyau; naarai ibus ŋes kamakaŋ kanuka aijaanakin. 12 Abu kejuka Tukiko Epeso. 13 Naibunio ijo, koyaunia elou loabu kenyek kaneejai Karapo ko Teroa, iitabon da, aitelekarit lukimukulen. 14 Abu Alegesanda ekatatan aikomon keswamak nueroko nuipu; etacakini Ejakait ŋes kwape ejaatar akeswamisio, 15Kidara ijo da kamakeŋ, naarai abu kirebok noi akirowok. 16 Kaiyarika nasodit amamei yenikowaika, konye kajalakis kere. Kinyeis ŋun aimarakinio kes! 17 Konye abu Ejakait kobwo kodiekaŋ, ketogogoŋ da, tetere etodolikini akiro nualimonokini, kopupete da Imo kere, kayuunio da kotoma aituk naka eŋatuny. 18Kayuuni Ejakait eoŋ kotoma kaŋiniswam kere naerono, ketajari da kiton akejakanut nakokuju. Kojai aibuses mamakeŋ ikar ka ikar. Amen. 19 Kiyoga Pirisika ka Akuila, ka lukokal da loka Onesiporo. 20 Abu Erasito kosalak Korinto; konye abu kenyek Toropimo Mileto edeka, 21Kokukunyuun abunore eriŋa apaarasia nuka aaterot edoluno. Kiyogai Eubulo jo, Pudes da, ka Lino, ka Kulaudia, ka iinacan kere kiyogaete jo. 22Kojai Ejakait kemoyokon, Asianut kojai kayes. |