2 Isesalonikan11 Paul, ka Siluano, ka Timoteo, Mama ejai ekanisa loka Isesalonikan lokotoma Edeke Papawok ka Ejakait Yesu Kristo: 2 Asianut kojai mama ijaas ka ainapakin nuepote kama ejai Edeke Papa ka Ejakait Yesu Kristo. 3 Iinacan, kiburao sio aimalaenen Edeke apaarasia kere kanukus, kwape kibusakinitor, naarai iyata noi akusiiyuun, idila da akusiminanar ŋinituŋanan kayesi kere mama kayenice. 4 Kiton sio da kiwolobobot kanukus kotoma okanisan luka Edeke kanuka atitiŋikinikus, ka aiyuun kotoma areokus kere, ka aiticanio naiŋirikinito. 5 Ŋes aanyunet cut naka etube loedolit loka Edeke, kosodete kitubusikin yes ajakanut naka Edeke, nakiticanere yes kanuke. 6 Naarai edolit kakonyen nuka Edeke atacakin aiticanio lukiticanete yes, 7 yes da luiticanio kisiyeŋunio nepepe kasio, kotoma apukorio naka Ejakait Yesu naebunio kotoma akuj nepepe ka imalaikan luka akepedor, kotoma akim naesarani, 8 inyaŋi kama kaŋul lumam ejenete Edeke, ka ŋul da lumam erimarito Akiro Nukajokak nuka Ejakaitiwok Yesu. 9 Egelitikec ŋes amudiario naka ikar kere, enyounete kakonyen nuka Ejakait, ka aibuses naka agogoŋuke da, 10 naebunio ŋesi kapaaran kaŋin, tetere itopoloorio kotoma kalukalaunakake, ka aumokinio da kotoma kaluiyuunito kere, naarai iyuunitos yesi akosiitejenun. 11 Tape da kilipanakini yes apaarasia kere, tetere kitubusik yes Ewokodeke kanyariteke, kitodolik da kapedor ŋiniwomisioit kere nakajokis, ka aswam da naka aiyuun, 12 tetere itopoloorio ekiror loka Ejakaitiwok Yesu kotomakus, yes da kotomakeŋ, kwape ejaar asianut naka Edekewok ka Ejakait Yesu Kristo.21 Konye iinacan, kiŋaiŋait yes, kakiro nuka abunore naka Ejakaitiwok Yesu Kristo, ka atukonokiniwok nepepe kaŋes, 2kinyeis aisunyit airiaŋiriaŋa kotoma aomisiokus, karaida aiyaloŋoŋ, karaida komoyo, karaida kakirot, karaida kobalua loebuni kamakosi, ebe adolu apaaran naka Ejakait. 3 Kinyek idiotuŋanan aitapaar yes kopone kere; naarai mam apaaran ŋin ebuni, dimarai isiauni atiakatiakaun ajaun, epukorio da etuŋanan ŋol lokepali, okoku loka amudiar, 4 loirebirebi, ido loitopoloor bon aitelekarit ibore kere yenenyaritai edeke, arai yenemaio; kosodi iboikin oyekalu loka Edeke, kitodiara ebe ŋes Edeke. 5Mam kereka iitunito ebe nakijaar kayes abu kalimok yes ŋun? 6Ido ijenete yenitikokinit kwana, tetere epukorio ŋes kapakike. 7 Naarai ageu aiyeiyea naka epali aswam; konye loitikokinit kwana iswamai aitodol naelemarere ŋol awai. 8 Kosodi konyet epukorio lokepali, eari Ejakait Yesu ŋes keiyeŋane loka aitukuke, ka amudiar da kotoma atakanun naka abunoreke. 9 Abunore naka ŋol lokepali naiswamai Satan ejaun kapedor kere, kaanyuneta ka nukaumokin da nukeŋalak, 10 ka aitapaar kere namam adolit mama ejaas ŋul lueoliorito, naarai mam apotu kocamut amin abeit, kosodete aitajario. 11 Kanuka ŋun ijukakini kes Edeke aswam naka apaar, tetere iyunete nuka aiŋal, 12tetere etubokinio kere lumam iyuunito abeit, konye luisiyalamikinito amamus adolit. 13 Konye kiburao sio aimalaenen Edeke apaarasia kere kanukus, iinacan luemina Ejakait, naarai abu Edeke koseik yes ameun kageunet aitajario, kanuka aitalaunio naka Emoyo, ka aiyuun da abeit. 14 Abu konyarak yes ŋin kanuka Akosikiro Nukajokak, kanuka adumun aibuses naka Ejakaitiwok Yesu Kristo. 15Aso do iinacan, kobwaata kicasito, kikamut iponesio lukisisianakinitai, arai kotoma akirot, arai kotoma obaluakosi. 16 Konye Ejakaitiwok Yesu Kristo elopet, ka Edeke Papawok, lokimina oni, loabu koinak da aitalakar naka ikar kere, ka amun naejok kotoma asianut, 17kitalaka ikusitauon, kiticat da kotoma kaŋiniswam ka ŋinikirot da naejok.31 Nuesalito, iinacan, kilipanakinai sio, tetere ekeri akirot naka Ejakait, koinakinai aibuses, kwape kotomakus, 2isio da kayuunos kama ka ituŋa luemamei acoa, ikaronok; naarai ejaas ice lumam iyuunito. 3 Konye erai Ejakait lomunot; lokiticasi yes, kidari da kama ka lokaronon. 4 Konye kija kamun kotoma Ejakait kakirokus, ebe iswamaete, ido ipote aswam nukicorakini. 5Konye kiteten Ejakait ikusitauon toma amin naka Edeke, ka atitiŋikin da naka Kristo. 6 Konye iinacan, kicorakini yes kokiror loka Ejakait Yesu Kristo, kinacata onac kere loitotolikino komam elosenenei kwape ejaar epone loipotu kodumut kamakosi. 7 Naarai ijenete yesi kwape ibusakinitor yes aputorit sio; naarai mam sio kitotolikino kamakus, 8 mam kipou kanyama inyamat luka idiotuŋanan atitai, konye kaitaaritoi ka ailolony, kipou keswamata akuare ka apaaran da, tetere mam kilaŋirikini idiotuŋanan kayesi. 9 Mere naarai emamei sio apolou, konye kiinakin yes aanyunet tetere kiputorete sio. 10 Naarai nakijaar nepepe kayes, kipou kecorakis yes nata ebe: Arai mam ituŋanan ekoto aswam, kinyek ainyam da. 11 Naarai kipupi ebe ejaas ice luelosete itotolikino kotomakus, mam iswamaete konye iramaitos nuka luce. 12 Kicorakini kotoma Ejakait Yesu Kristo, kikwenyari da luikote nen ebe, kiswamata kaiyapaara, konyamata ikecenyamat kikulepek. 13 Konye yes, iinacan, sirikitapalikinos aswam nuejok. 14 Konye arai etuŋanan kere mam erimari akirotokosi kotoma obalua kalo, koŋicutu ŋol, kinyeis aimorikikin kaŋes, tetere irumete ileic. 15 Sirikimarata ŋes kwape lokasurup, konye kikwenyanarete kwape onac. 16 Ejakait da elopet loka ainapakin, koinak yes ainapakin apaarasia kere toma akiro kere. Kojai Ejakait kayes kere. 17 Eoŋ Paul ewadikai ayogan na kakakan elopet. Ŋes aanyunet kotoma ŋolibalua; ewadikai kwaŋin. 18Asianut naka Ejakaitiwok Yesu Kristo kojai kayes kere. |