2 Petero11Simon Petero ebulesit ekiyakia da loka Yesu Kristo, Mama ejaas ŋul luadumutu aiyuun naketiai loepol naeriakas kanakosi kotoma adolit naka Edekewok, Eketajaran da Yesu Kristo: 2 Kiyatanakin asianut ka ainapakin mamakus toma ajenun Edeke ka Ejakaitiwok Yesu Kristo. 3 Naarai abu apedor naka eidekeoneke koinak oni akiro kere nuka aijar ka nuka ayoŋit Edeke, kanuka ajenun ŋol lokinyarauni oni kanuka aibusesuke ka ajokisike elopet; 4nukiinakinia oni aisumunetake nuepolok nuketiai loepol; tetere kotoma kaŋun iraunete ikamorak luka einono loka Edeke, nuipotu kokuiata anyoun kotoma amudiario naejai toma akwapin kanuka aiŋobel. 5 Konye kanuka ŋupe kaŋun da kodunyakis noi aiyatakin ajokis kotoma aiyuunikus, kotoma ajokisikus da ajenun, 6kotoma ajenun du aitikokina, kotoma aitikokina da atitiŋikin, kotoma atitiŋikin da ayoŋit Edeke, 7 kotoma ayoŋit Edeke da amin iinacan, kotoma amin iinacan da amin, 8Naarai arai kijaunos kaŋun kidilas, kituluorete yes lumam iloŋwaka, ka lueraete araito kotoma ajenun cut Ejakaitiwok Yesu Kristo. 9 Naarai yenemameete ŋun, erai imuduki yeneturiaitoi, kimurwokinite aitesegario adiakanaretake nukolo, 10Aso iinacan, kiyatanakis noi adunyakin aitogogoŋ anyarauniokus ka aseunio da, naarai arai iswamaete ŋun, mam iguikinos nepetai da; 11 naarai kwaŋin kiinakinio kabarara alomaret nakotoma ajakanut namam edaun naka Ejakaitiwok ido Eketajaran Yesu Kristo. 12 Kanuka ŋun ŋes ecebokinitor apaarasia kere aisiitun yes ŋun, karaida ijenete kicata da kotoma abeit naijaatar. 13 Konye aomit eoŋ ebe edolit, aroko ajai toma oidukuru lo aisinyikokin yes kaisiitun, 14 naarai ajeni ebe eapie apak naka alacar eidukuruka kwape ketejenunia Ejakaitiwok Yesu Kristo. 15Adunyakini da aisipedor yes ŋinipak aiitun ŋun kadau atwanare. 16Naarai mam kipou katupenenete awaragasia nuepwakunitai kacoa, nakitejenunia yes apedor ka abunore naka Ejakaitiwok Yesu Kristo, konye kipou kaanyutu akepolou kakonyenekosi. 17 Naarai naainakinere aiturio ka aibuses nuapotu kama ejai Edeke Papa, kobu da eporoto mamakeŋ kotoma aibuses nakapolou naimwekimweki ebe, “Lo ŋes Okokuka lominat, loalelakinit noi;” 18kipou keirasi eporoto ŋol loabuni kotoma akuj, nakijaar kaŋes moru lokalaunan, 19Ido kija kakirot naka inabin naitogogoŋitoi aitelekarit, Ido iswamaete ejok aibwaikin ŋin etau, kwape atala naecaikini aibois nakamuton, aitodol naiwalaria akwap, elomuni da etop kotoma otauonokus. 20Kojenutu na nasodit ebe, emamei akirot naiwadikato inabin naepedori ituŋanan aijul kanuke bon, 21 naarai emamei akirot nakedwaritai kakote naka ituŋanan, konye enerenenasi ituŋa nukepote kama ejai Edeke kodoikinite Emoyo Lokalaunan.21 Konye apotu kojaut inabin lukeŋalak kotoma otuŋa, kwape ejauniata ikesisianakinak lukeŋalak kotomakus, luitolomunete kaiyeiyea apaar naemudiari, ido koŋerito Lokapolon loagweli kes, iriunete bonik amudiar nakatipet. 2 Etuparete da luipu abenyanutukec, ido emoromoroo kanukec erot loka abeit. 3 Kotoma airaŋaanut da itudumunos ameda naepol kamakus kakiro nuepwakunete; atubokiniokec ageun apeŋo mam itiloro, amudiariokec da mam iluranari. 4 Naarai arai mam abu Edeke kitim imalaikan naadiakariata, konye kocakak kes ataro, kibwaik da apanya nukamuton, aidaria atubokinio, 5 mam da abu kitim akwapin nukolo sek, konye kidar Noa ekalimonokinan loka adolit nepepe kituŋa ice ikanykaarei, naayaunia akalele akwapin nuka lumam eyoŋito Edeke; 6 naabu kituluoria ireria luka Sodom ka Gomora ekurwon, kotubok akiro kibiro, kibwaik naanyunet mama ejaas ŋul luepote amamus ayoŋit Edeke; 7 koyuu da Lot ekadoliton loeyaloŋoŋoi noi kanuka iponesio luka abenyanut naka ikaronok, 8 (naarai ekadoliton ŋol loeboie kotomakec, naaanyunia ka aiirar da, aponi kiticanai ekemoyo loedolit, ŋinipaaran kanuka aswamisiokec nukepali), 9 ejeni Ejakait ayuun lueyoŋito Edeke kotoma acodunio, ka aidar lumam edolito kiticanete kiton apaaran naka atubokinio; 10 konye aitelekarit ŋul luelosenenete atuparit akuan kotoma aiŋobel nakasilianut, komenito ayaio. Iilokina, iswamaete nuekotos, mam emaranete emoromoroete lukaibuses, 11 kwabo imalaikan, karaida kepolok aitelekarit kagogoŋ ka apedor, mam eyaunete akiro nuka amorosit mama ejai Ejakait kamakec. 12 Konye kes, kwape isuban luemamei acoa, lueuritai bala itiaŋ lutai aikamunio ka amudiario da, emoromoroete kotoma akiro numam ejenete, emudiario cut kotoma amudiarikec, 13 ikonakinio kes erono ŋes eropit loka aronis. Eomito nukaiyalama abolia paaran. Eraas akemerin ka amasikineta, eboliaete kopucinokec luka aminanar, emorete kayes. 14Ejaas kakonye nuileleba adoteu, mam inyeinete adiakar. Ijodijodoete imoyon lumam icasito. Ejaas itauon luituutoro airaŋaanut. Idwe luikenen! 15 Inyeinete erot loetenit, kosodete apaar atupar erot loka Balaam, okoku loka Beor, loamina eropit loka amamus adolit, 16 konye aponi kitoronai kanuka epalike; abu asigiria namam inera kiner koporoto loka etuŋanan, kitikok ikerep luka enabi. 17 Eraas kesi ikico luemameete akipi, ka ilisinai luekutari ekwam; idaritere kes amuton nairiono cucucuc. 18 Naarai inerasi nukailabilab nuepolok nutai, ijodijodoete kaiŋobel naka akuan kotoma abenyanut, ŋul luakuito apak naedit kama kaŋul kaluelosenenete kotoma apaar. 19 Isumunete kes aosikinio, kwabo eraas kesi ikulepek ibulesin luka amudiar; naarai ŋin yenipikori ituŋanan, eraun ŋesi ibulesit yenika ŋin. 20 Naarai nakedauniata aiku anyoun kotoma asilianut naka akwapin, toma ajenun cut Ejakait, ido Eketajaran Yesu Kristo, arai inyalinyalunos bobo kaŋin, kipikoroi, eraunos nukawasiakec nukaronok adepar nusodit. 21 Naarai tiejok kamakec arai kemam kejenunito erot loka adolit, itia aboŋor kau ainyein aicorakinet nakalaunan naaponi koinakinai kes kedaut ajenun. 22 Adoiki kes kwape ejaar awaragan nakabeit ebe, Eboŋori ekiŋok alekanake, ka apege da nailoŋoŋ eboŋori eipwok orit.31 Luminan, lo ŋes ebalua lokiareit lokewadikakini yes; kotoma kes kere kesinyikokini noi akusiwomisio nuiliogototas aisiitun; 2 tetere iitununete akiro nueneritos inabin lukalaunak, aicorakinet da naka Ejakait ido Eketajaran kama kikiyakiakus. 3 Kojenutu na nasodit ebe epote ikesekelok kapaarasia nukawasia isekelete, etuparete aiŋobelekec bonik, 4 inerasi ebe, “Ejai bo ai aisumunet naka abunoreke? Naarai ageun netikolo ajotoorotor lukapapaawok, esalito iboro kwape ajaatar kageunet naka asubio.” 5 Naarai epeleikinito aimurwokin na ebe kejai akuj ameun apeŋo, ka akwap naalomuni kotoma akipi, ido kokidiŋ akipi, kanuka akirot naka Edeke, 6 ŋes ainakini akwap nakolosek amudiario kakalele naka akipi. 7Konye iŋadakinitai akuj ka akwap nukatinenikwana akim, kanuka akirot kaŋin, idaritere kiton apaaran naka atubokinio ka amudiario naka ituŋa lumam eyoŋito Edeke. 8 Konye luminan, sirikimurwok akirot na adiopet, ebe, esubit adiopepaaran kama ka Ejakait, bala ikar elukumit, ka ikar elukumit da bala adiopepaaran. 9 Mam iyapia Ejakait aisumuneteke, kwape eomitotor ice aiyapia, konye etitiŋikinit mamakus, komam ekoto idio kayesi aolior, konye kodoloto kere aitoronikin. 10 Konye ebuni apaaran naka Ejakait kwape ekokolan, kosodi edaun akuj kagat naepol, ecalaros nugeet kamwanis kanaidopit, kosodi icweio da akwap ka aswamisio nuejaas tomake. 11Aso naarai ecalaros iboro ŋul kere kwaŋin, ibusakinit yes ajaun biai kotoma oponesio lukalaunak ka ayoŋit Edeke, 12 komunos, kimielas da noi abunore naka apaaran naka Edeke, naecalarere akuj naitonokunio, ka nugeet da ecalaros kamwanis kanaidopit. 13 Konye kwape ejaar aisumunetake, kimuno akuj nakitetet ka akwap da nakitetet, neiboio adolit. 14 Aso luminan, naarai imunosi ŋun, kodunyakis adumakinio toma ainapakin, komamei elos karaida aitoronet, kakonyeneke. 15 Koomito atitiŋikin naka Ejakaitiwok araut aitajario. Abu onacewok lominat Paul kiwadikak yes kwaŋin kwape ejaar acoa naainakinitai ŋes, 16ido inera ŋun kotoma obaluanake kere. Ejaas kotomakec acekiro nuetioko ajenun, nuemojirete lumam esisiato ka lumam icasito, kwape iswamakiniata nuiwadikatai ace, kiton amudiariokec. 17 Aso luminan, yes luidaut sek ajenun ŋin, kidaras kinyeis aibiror anyoun kotoma aicasitekus, kosodete ayaŋaario kapaar naka lukaronok. 18 Konye kopolokis toma asianut, ka ajenun da Ejakaitiwok ido Eketajaran Yesu Kristo. Koinakinai ŋol aibuses lolo kiton apaaran naka ikar kere. Amen. |