2 Ikorinton11 Paul ekiyakia loka Kristo Yesu kanuka akot naka Edeke, ka Timoteo onacewok, Mama ejai ekanisa loka Edeke loejai Korinto, nenipe ka lukalaunak kere luejaas Akaia kere: 2 Kojai asianut mama ijaas ka ainapakin nuepote kama ejai Edeke Papawok ka Ejakait Yesu Kristo. 3 Kituritete Edeke Papa loka Ejakaitiwok Yesu Kristo, Papa loka aitim, Edeke da loka aitalakar kere, 4lokitalakarit oni kotoma aiticanitoiwok kere, tetere oni da kipedori aitalakar ŋul luejaas toma aiticanitoi kere, kaitalakar ŋin nakitalakaria Edeke oni. 5 Naarai kwape iyatanakinor ariebo naka Kristo kamawok, kwape kwaŋin da iyatanakinor aitalakariowok kanuka Kristo. 6 Arai kiticanitoi sio, erai kanuka aitalakariokus ka aitajariokus da; ido arai kitalakario sio, erai kanuka aitalakariokus naeyauni atitiŋikin kariebo ŋin nakisiriebio sio da. 7Icasit amunokosi kanukus; naarai kijeni ebe kwape imoriata ariebokosi, imorete kwape kwaŋin aitalakariokosi da. 8 Naarai, iinacan, mam kikoto yes kinyeis ajenun aiticanitoi nakidoikinit sio ko Asia, ebe kinuaritai noi noi adepar apedorikosi, komam kiwomit aijar. 9Kwabo kipou isio kapuput atwanare kotomakosi, kenyeis amunokina bonik, dimarai Edeke loitajaruni lukatwak; 10 ŋes abu koyuu sio kotoma atwanare naetia nen, ido kiyuuni, lokimunokina ebe iyatanakini ayuun, 11Yes da kiŋarakinos ailipanakin sio, tetere imalaete luipu kanukosi, kanuka ainakinet nakiinakinitai sio kanuka ailip naka ituŋa luipu. 12 Naarai aolobobotekosi ŋes nata, ajenanut naka aomisiokosi ebe kipou kalosenenete kotoma akwapin aitelekarit mamakus, kotoma alaunit ka aipioror naka emoyo loebuni kama ejai Edeke, mere kanuka acoa naka akuan, dimarai kanuka asianut naka Edeke, 13Naarai mam kiwadikakinit yes akirot dimarai nuipedorete asoman ka ajenun, ido amuno ebe ijenunete ŋun kiton awasia, 14 kwape ipotu kojenuniata ace kamakosi, ebe kirai isio aolobobotekus, kwape irauniata yesi da nakosi, kapaaran naka Ejakaitiwok Yesu. 15Kotoma amun ŋin abu kakoto ailiŋ abunore mama ijaas, tetere idumunete asianut nakiareit; 16 aitor mamakus alosit Makedonia, ka aboŋun bobo mama ijaas anyoun ko Makedonia, ka yes da ainyamakin eoŋ alosit Yudaya. 17 Aso naakotor ŋun, apotu kereka akaomisio kijulanakinos? Arai bo abu kenerunite ŋun kopone loka akuan, tetere ikote nen kamakaŋ, “Eebo, eebo,” ka “Mam, Mam”? 18Konye kwape eraar Edeke lomunot, akosikirot mamakus mere Eebo ka Mam. 19 Naarai Kristo Yesu Okoku loka Edeke, lokipou isio kalimonokis yes, eoŋ ka Silibano ka Timoteo, mam kerai Eebo, ka Mam; dimarai tomakeŋ eraenena Eebo. 20 Naarai aisumuneta kere nuka Edeke eraas Eebo kotomakeŋ, ido kanuka ŋol ŋes kibalar ebe Amen tetere itopoloorio Edeke. 21 Aso ŋol lokiticasi sio nenipe kayes kotoma Kristo, loinyonyoikinit da oni akinyet, ŋes Edeke. 22 Ŋes kipucakini oni aipucet, ka ainakin da Emoyo toma otauonowok araun aititiŋet. 23 Konye eoŋ ewonet Edeke araut ekajenan loka aijaraka, ebe kanuka aitimit yes, mam abu kabu Korinto. 24 Mere ŋes atemar ebe kiyait aiyuunikus, dimarai kirai ikegaŋak luka alakarakus, naarai icasitos kanuka aiyuunikus.21 Konye alosikinit na ebe mam bobo abuni mamakus kotoma akadakinit. 2Naarai arai keetakadik yes, aso iŋai bo ketalakari eoŋ, dimarai ŋol loetakadikinit eoŋ? 3Abu kewadikak ŋupeŋun kenyek naabunio akadakin kanuka ŋul lutiketalakasi eoŋ, naamunokinor yes kere ebe alakaraka ŋes nakus da kere. 4 Naarai abu kewadikak yes kotoma aiticanio naepol ka aburun naka etau, ka akiyo da nuipu, mere aitakadikin yes, dimarai tetere ijenunete kwape edeparitor noi aminaka mamakus. 5 Konye arai itakadikinit ituŋanan, mam ketakadikinit eoŋ bon, dimarai yes kere nepetai, kenyek ainuar. 6Ilosikino aiticanet ŋin yenikoni nen naedumuni kama ejaas luipu; 7ŋes ibusakinitor yes gwai aitim ka aitalakar ituŋanan yenikoni nen, kinyek diat yenikoni nen ailikorio kotoma akadakinike naedeparit. 8Kanuka ŋun keŋaiŋait yes aitogogoŋ amin kamakeŋ. 9 Naarai abu kewadik kanuka ŋun, tetere ketemi yes, wolo bo irimasi kotoma akiro kere. 10 Konye arai isioniete ituŋanan akirot kere, eoŋ da esioniei ŋes. Naarai arai esionit ituŋanan akirot, esionit kanukus, kakonyen nuka Kristo, 11 kinye Satan aipikor oni; naarai mam kiswakit aijen iboteike. 12 Naadolio Teroa alimonokin Akiro Nukajokak nuka Kristo, aponi kaŋaikin ekek kotoma Ejakait; 13konye mam ekamoyo eyeŋunit naarai mam adumunit Tito onaceka. Konye abu katwar kes, kalot Makedonia. 14Konye kimalai Edeke lokisipikonori tir kotoma Kristo, ido loitodiari aures naka aijen ŋes kaŋiniibois kotomakosi. 15 Naarai kirai isio asakat naka Kristo kama ejai Edeke, kotoma kaŋul kaluitaiario, kaŋul da lueoliorito, 16 mama ejaas lukiareit, aures naka atwanare naeyauni atwanare, konye mama ejaas ŋul lusodit aures naka aijar naeyauni aijar. Iŋai kereka ilosikino ŋun? 17 Naarai mam kirai kwape luipu luegwelanarete akirot naka Edeke, konye kinera kotoma Kristo kwape luipiororoete itauon, kwape luepote kama ka Edeke, akonyen nuka Edeke.31 Kigeuni kereka aiturokina bobo? Arai bo kwape kicetuŋa kipuda tope ibaluan luka aiturit mamakus, arai kamakus? 2 Iraas yesi ebaluakosi, iwadikatai otauonokus, ejena esiomete da ituŋa kere. 3 Itakanete ebe iraas yesi ebalua loka Kristo, lokijaanakini isio, iwadikatai mere kebuino dimarai kEmoyo loka Edeke lokajaran, mere amor, dimarai otauon luka awat. 4Kimunokina Edeke kwaŋin kanuka Kristo. 5 Mam sio kilosikino aomit bonik araut ibore kanukosi; kwabo ebuni aisilosikiniokosi kama ka Edeke, 6 lokisilosikini sio araut ikejaanakinak luka aitutuket nakitetet, mere luka enyukuta, dimarai luka Emoyo; naarai eari enyukuta, konye Emoyo einakini aijar. 7 Aso arai aijaanakin naka atwanare naigirigiritai kinyukutan kamoru, abu kobu kaibuses, tetere mam idwe luka Isirael apedorete asesen akonyen nuka Musa kanuka aibuses naka akonyeneke, aibuses ŋin naitapalaunio, 8 mam kereka aijaanakin naka Emoyo itelekarit kaibuses? 9 Naarai arai kejai aijaanakin naka atubokinio kaibuses, itelekarit noi aijaanakin naka adolit ajaun kaibuses. 10 Naarai naitubusikinitai mam kitubusikinitai kakirot kana, kanuka aibuses naedepari noi noi. 11Naarai arai naitapalaunio kejai kaibuses, itelekarit noi naesalenenei ajaun kaibuses. 12Aso kija kamun naetia nen kitwasamai atitiŋ;, naepol, 13 kwabo mere kwape Musa loemukorit akekonyen, kinyeis idwe luka Isirael asesen awasia naka naitapalaunio. 14 Konye kitininikitai ikecetauon. Naarai kiton lolo naesiomenenere aitutuket namojoŋ eriŋa esalit aimukoret ŋipeŋin mam epukoritai; naarai toma Kristo itapalaunitai, 15Konye kiton lolo naesiomenenere nuka Musa epesikina aimukoret otauonokec; 16 konye naibelonokinor tuŋanan mama ejai Ejakait, elemario aimukoret. 17 Konye erai Ejakait Emoyo, ido neejai Emoyo loka Ejakait, nepenen da ejaikin aosikinio. 18Konye oni kere kiseseni aibuses naka Ejakait kwape toma aroet, kakonyen numam imukoritai, kiloconokinio aputor ŋes, anyoun kaibuses kiton aibuses, naarai epote ŋun kama ka Ejakait, loerai Emoyo.41 Kanuka ŋun, kija kaijaanakin na kwape kidumunitor aitimio, mam kitapalikina, 2 konye kiŋer nuibwaitai nuka ileic; kwabo mam kilosenenei ketute karaida aipurujaun akirot naka Edeke kaiŋal, konye kaitodiar naka abeit kitubusikina mama ejaas aomisio kere nuka ituŋa kakonyen nuka Edeke. 3 Ido arai imukoritai Akosikiro Nukajokak, imukoritai kama kalueoliorito. 4 Abu edeke loka ikar kalu kitumudak acoa naka lumam iyuunito kinyeis aanyun ailiya naka Akiro Nukajokak nuka aibuses naka Kristo, loerai aput naka Edeke. 5 Naarai mam kilimonokini bonik dimarai Kristo Yesu Ejakait, ka sio da ikusibulesin kanuka Yesu. 6 Naarai ŋes Edeke loabu kobala ebe, “Kocai aica kotoma amuton,” loecaikinit itauonowok tetere iliyai aijen naka aibuses naka Edeke kakonyen nuka Kristo. 7 Konye kija kabar kana oboro lukelupe, tetere ebuni aidiles naka apedor kama ejai Edeke, kwabo mere kamakosi. 8 Kiticanitoi koponesio kere, konye mam kiridakinio; kibuonokin, konye mam kitapalikina; 9kimanio, konye mam kijalakinitai; kicakario, konye mam kimudiario; 10 kidakenenei tir kawatekosi atwanare naka Yesu itetere etakani da aijar naka Yesu kawatekosi. 11 Naarai nakijaria kijaikinio tir atwanare kanuka Yesu, tetere etakani da aijar naka Yesu kawatekosi nuetwakete. 12Kwaŋin iswamai atwanare tomakosi, konye aijar tomakus. 13 Konye kija kemoyo ediopet loka aiyuun, kwape iwadikatere ebe, “Abu keyuu, ŋes enerar.” Isio da kiyuunit, kanuka ŋun da kinera. 14 Kijeni ebe ŋol lokitajaruni Ejakait Yesu, itajaruni sio da nepepe ka Yesu, ka aisibwo sio nenipe kayes kakonyeneke. 15 Naarai eraas kere kanukus, tetere kwape iyatanakinor asianut kanuka luipu, iyatanakini da aimal, kitopolooritete Edeke. 16 Kanuka ŋun mam kitapalikina. Karaida emunauna etuŋananekosi Iokokiŋa, konye iteteo lokotoma ŋinipaaran. 17 Naarai ican lu luebenen luka apak naedit, kiswamakinete oni alaŋir naedepari noi noi naka aibuses, 18 naarai mam kiseseni iboro lueanyuna, dimarai lumam eanyuna; naarai lueanyuna eraas luka apak naedit, kwabo lumam eanyuna eraas luka ikar kere.51 Naarai kijeni ebe arai emunauna iswamuwok yenika akwap kana yenikiboiororor, kija kaduket naebuni kama ejai Edeke, ŋes etogo lomam iswamatai kakanin, loka ikar kere kotoma akuj. 2 Naarai kane kidinya kabeit, kemielas noi aitanapio etogowok loebuni kokuju, 3kosodi nakitanapere, kenyeis atakanun kimujalal. 4 Naarai kidinya oni lukija toma oswam yen, naarai kilaŋirikinito; mam kikoto alacar, konye aitanapio, tetere ejwenyari aijar yenetwani. 5 Konye ŋol lokiswamakinit oni akirot ŋin ŋes Edeke, lokiinakinit oni Emoyo araun aititiŋet. 6 Aso kititiŋikini oni apaarasia kere, naarai kijeni ebe nakijaar toma akuan, kilwaniar kama ejai Ejakait, 7 naarai kilosi kanuka aiyuun mere kanuka aanyun. 8 Kanuka ŋun kititiŋikini, kikoto alwaniar kakuan, kajaut die ka Ejakait. 9 Aso kigipari aisiyalamikin Ejakait, arai kija die arai kilwaka da. 10 Naarai kibusakinit kere atakanun koiŋaren keicoloŋ loka aitub loka Kristo; kodum ŋinituŋanan nukiswamai akuanake, kwape eswamator, arai nuejok arai nueroko. 11 Aso naarai kijeni ayoŋit Ejakait, kijodouni ituŋa; konye kitakanunitai sio kakonyen nuka Edeke, ido amuno ebe kitakanunitai kotoma aomisiokus da. 12 Mam kiturokina bobo kamakus, dimarai ainakin yes nuiwolobobototor kanukosi, tetere ipedorete aboŋokin ŋul luewoloboboto kakiro nukokuju bon, kwabo mere nukotauon. 13Naarai arai kemamu sio acoa, erai kanuka Edeke; arai da kijau isio acoa, erai kanukus. 14Naarai kitiŋaikinit sio amin naka Kristo, naarai kitogogoŋit ebe abu ediopet kotwanik ituŋa kere; kanuka ŋun apotu kere kotwaka. 15 Ido abu ŋesi kotwanik ituŋa kere, tetere luejarete mam ejarete bobo kanukec bonik, dimarai kanuka ŋol loabu kotwana, kojaru da kanukec. 16Ŋes mam kitenunia ituŋanan kere kwape ejaar akuan amear lolo, karaida kipou kajenutu Kristo kwape ejaar akuan, konye kwana mam bobo kijeni ŋes kopone kaŋol. 17 Kanuka ŋun, arai ejai ituŋanan kotoma Kristo, arau isubat yenikitetet; atuboros nukolo; koany, araut nukitetiak. 18 Epote kere kama ejai Edeke, loabu kitupuc oni kanukeŋ kotoma Kristo, abu koinak da sio aijaanakin naka aitupuc; 19 ŋes atemar ebe kejai Edeke toma Kristo itupuci akwap kanukeŋ, komam imarakini kes aibucanaretakec, ebwaiki da tomakosi akirot naka aitupuc. 20 Ŋes kiraar ikiyakia kanuka Kristo, kosubit bala iŋaiŋai Edeke kotomakosi. Kiŋaiŋait yes, kanuka Kristo, kopucoto ka Edeke. 21 Lomam ajeni adiakar kitarau adiakar kanuwok, tetere kiraun oni adolit naka Edeke kotomakeŋ,61 Aso kiswamai nepepe kaŋes, kiŋaiŋait yes sirikicamut asianut naka Edeke atitai. 2 Naarai inera ebe, “Apak naka acamunio abu keira yes, Kapaaran naka aitajario abu keŋarak yes.” Koany, kwape kwana ŋes apak naka acamunio; koany, kwape kwana ŋes apaaran naka aitajario. 3Mam kiyaun aiguikinet kere kotoma akirot kere, kinyek akosiijaanakin aitoronio, 4 konye kotoma akiro kere kituro kwape ikejaanakinak luka Edeke; kotoma atitiŋikin naepol, kotoma ocan, kotoma oipud, kotoma aridakinio, 5 kotoma aleconorio, kotoma aenio, kotoma iceleta, kotoma aitaaritoi, kotoma aikolerit, kotoma ailuŋ, 6 kotoma alaunit, kotoma aijen, kotoma aikany, kotoma asianut, kotoma Omoyo Lokalaunan, kotoma amin namam esoswai, 7 kotoma akirot naka abeit, kotoma apedor naka Edeke, kanuka lujiis luka adolit luka akan nakoteten, ka luka akan nakokediany; 8kanuka aitopoloorio ka amwaŋio da, kanuka amoromoroo ka aitojokio da, kwape ikeŋalak konye lukabeit, 9 kwape lumam ejenunio, konye luejenunio noi; kwape luetwakete, konye koany, kijari; kwape luiticanio, konye mam kiario, 10 kwape luitururuete konye luelelete tir; kwape luicanas, konye luitabarete ikepuak; kwape luemamei ibore, konye ejaas iboro kere. 11 Wu yes Ikorinton, itooŋaaritai akosiituk mamakus; italalaaritai da ekositau. 12Mam yes iridakina tomakosi, dimarai iridakina kotauonokus. 13 Konye tetere kitacakinete kotiai lokidumuniata, enera kayes kwape ikadwe, kitalalai da itauonokus. 14 Sirikienikinos ajookot nepepe kalumam iyuunito. Naarai emorete biai adolit ka amamus adolit? Arai ejai eidicane enyoin kidiŋ kaica ka amuton? 15Anyoin da acamanara naka Kristo ka Belial? Arai bo anyoin akorakinet naka yeniyuunit ka yenimam iyuunit? 16 Anyoin aitutuket kidiŋ ka eyekalu loka Edeke ka aputosia? Naarai kirai oni eyekalu loka Edeke lokajaran; kwape abalar Edeke ebe, “Eboikini tomakec alosenenei da kokidiŋikec, Araun eoŋ da Edekekec, kes da eraunos ikatuŋa. 17 Kanuka ŋun ebala Ejakait ebe, Konyoutu kokidiŋikec, kotiakas kakes, Sirikitirosi ibore yenimam elai; Kesukunyuni eoŋ da yes. 18 Ebala Ejakait Lokapedor kere ebe, Araun eoŋ Papa kamakus, Yes da iraunos ikadwe lusap ka lupesur.”71Aso luminan, naarai kija kaisumuneta ŋun, ketesegaaros kotoma asilianut kere naka akuan ka naka emoyo da, ketodoloto alaunit kotoma ayoŋit Edeke. 2 Koinakinai apak kotauonokus; mam kikonakinit idiotuŋanan erono, karaida amunaar idiotuŋanan, mam da kirodit idiotuŋanan. 3 Mam enera akirot ŋin tetere atubokini yes, naarai abu kenerite sek ebe ijaas yes otauonokosi, kiton atwanare nepepe ka aijar da nepepe. 4Kija katitiŋ naepol mamakus; kija kaolobob naepol kanukus; ileleba eoŋ alakara. Ilapara noi aileleka kotoma aiticaniokos kere. 5 Naarai nakidolio Makedonia da mam awatekosi iyeŋuna, konye kiticani kowaitin kere-kiŋa kejai ejie, toma da akurian. 6 Konye Edeke, loitalakari luitisilitoi, abu kitalaka sio kanuka abunore naka Tito; 7kwabo mere kanuka abunoreke bon, konye kanuka aitalakario nakitalakario ŋes kamakus, kolimonok sio akiro nuka eimielikus, nuka akuudianakus, ka adunyanutukus kanukaŋ, ŋes eyatakinia alakar. 8 Naarai karaida abu kesiturur yes kanuka ebaluaka, mam eitokina, (karaida abu keitok,) naarai aany ebe abu ebalua ŋol kisiturur yes, karaida adaun apak naedit. 9Konye kwana aleli, mere naarai kitururuoto, dimarai naarai kitururuoto kiton aitoronikin; naarai ipotu kitururuoto mama ejai Edeke, kinyeis atwakiar akirot kere kamakosi. 10 Naarai aiturur mama ejai Edeke iswamai aitoronikin, kiton aitajario namam iitokin, konye aiturur naka akwap iswamai atwanare. 11Naarai koany aiturur ŋin mama ejai Edeke abu kiswamak yes adunyanut naetia nen, aiyara da, ka anyunyura, ka akurian, ka eimiel, ka akukuranut, ka ainyaŋ da. Kaŋinikirot itodiara yesi araut luilaete kotoma aswamisioit kaŋin, 12Aso karaida kewadikakinit yes, mere kanuka yenekonit erono, karaida kanuka ŋin yenikikonakinitai erono, dimarai kitoduunai adunyanutukus kanukosi mamakus kakonyen nuka Edeke. 13Kanuka ŋun kitalakaritai. Bobo da kotoma aitalakariokosi kipou kalelata noi jokan kanuka aile! naka Tito, naarai ipotu yesi kere kisiyenut ekemoyo, 14Naarai arai abu kaolobobote kamakeŋ kotoma akirot kere kanukus, mam kesurumitai ileic; konye kwape kiilimonokinitor yes akiro kere kabeit, kwape kwaŋin da aolobobotekosi kama ka Tito kerai nakabeit. 15 Ido iyatanakin aminake mamakus, naiitunio kwape irimatar kere, kwape kisukunyikiniata ŋes kakurian ka amaran. 16Aleli naarai kotoma ŋinikirot icasit amunoka kanukus.81 Konye iinacan, kikoto yes ajenun asianut naka Edeke nakeinakinio kotoma okanisan luko Makedonia. 2Naarai nakitemere kes kaiticanio naepol, abu ailelekec nailapara, ka aiyarorotoikec naepol kiyatanak kiton abarara naka aikorokec. 3Naarai etejenun ebe kwape ejaar apedorikec, ka adepar apedorikec, apotu koseut akorakin iborokec. 4 Apotu kilipata kaiŋaiŋa naepol, kanuka asianut ŋin ka eidicane loka ajiaanakin lukalaunak. 5Apotu kiswamata kwaŋin, mere kwape kimunor isio, dimarai apotu kogeut ainakin bonik mama ejai Ejakait, ido mamakosi da kanuka akote naka Edeke. 6Kanuka ŋun kipou kecorata Tito ebe kwape abu kogeunia, koŋetak da kwape kwaŋin asianut ŋin kotomakus. 7 Konye kwape itelekaritotor yesi kakiro kere, kaiyuun, ka einer, ka aijen, ka adunyanut kere, ka akusimina da mamakosi, kitelekarito da kasianut ŋin. 8Mam enera ŋun kaicorakinet, dimarai kanuka adunyanut naka ituŋa ice aitemio ebe erai akusimin nakabeit. 9 Naarai ijenete asianut naka Ejakaitiwok Yesu Kristo, karaida kerai lokabaran, konye korau lokican kanukus, tetere kitabari yes kanu ka icanike. 10Ido kakiro kaŋun ketetemik yes; ejok na kamakus luipotu kogeikis ekaru je, mere bon aswam, dimarai akot da, 11konye kwana koŋetakis kaswam, tetere kwape ipotu kokapakinotor akot, kwape kwaŋin da koŋetakis kotoma kaluijaatar yesi. 12 Naarai arai ekapakina ituŋanan aikor, ecamunitai kwape ejaatar luejaatar ŋesi, kwabo mere kwape ejaatar luemameete ŋes, 13Naarai mam enera ŋun tetere isiyeŋunio ice, ka yes da aiticanio, 14 konye aitirian, luidilasi yes kapaarasia kanu itodolete luetwakiarito kesi, kosodete luidilasi kes da itodolete luitwakiarito yesi, kwaŋin ejaun ariakanara. 15 Kwape iwadikatere ebe, “Yeniketukonokini loepol mam edeuni, yeniketukonokini loedit, mam epuda bobo.” 16Konye kimalai Edeke loibwaikinit adunyanut ŋipeŋin kanukus otau loka Tito. 17Naarai abu kocam aicorokosi, kwabo erai loedunyana noi ebuni mama ijaas kakoteke bon. 18Kijuku nenipe kaŋes onac loituritoi anatar ikanisan kere kanuka alimonokin Akiro Nukajokak, 19 ido mere ŋun bon, konye apotu ikanisan koseutu ŋes aupun kasio kakirot naka asianut kana nakijaanakini isio aitopolooria Ejakait, ka aitodiar da akapakinakosi, 20Kicoikinit kinyek idiotuŋanan aitoron sio kanuka ainakinet kana naepol nakijaanakini isio, 21 naarai kipodo nuejok mere bon kakonyen nuka Ejakait, konye kakonyen nuka ituŋa da. 22Nepepe ka ŋul da kijuku onacewok lokipou ketemoto irwan ipu kakiro nuipu araut loedunyana, konye kwana loedunyana aitelekarit kanuka amunoke naepol mamakus. 23 Nuka Tito da, erai epadicika ka ekeswaman da nepepe keoŋ kanukus; nuka iinacanawok, eraas ikiyakia luka ikanisan, aibuses naka Kristo. 24 Aso kitodikisi kes kakonyen nuka ikanisan aitodikinet naka aminakus, ka aolobobotekosi da kanukus.91 Mam epuda aiwadikakin yes nuka aijaanakin lukalaunak. 2Naarai ajeni akusikapakina naaolobobotor kanukus mama ejaas Imakedonian, ebe etemokino Akaia ameun kokaru kaje; abu akukuranutukus da kisidik luipu. 3Konye ejuku iinacan kinyek aolobobotekosi kanukus araun atitai kakirot kaŋin, tetere itemokino yesi, kwape abu kenerar; 4kosodete arai epote Imakedonian nepepe keoŋ kodumut da yes mam itemokino, kinyeis ilek airum sio, komam kinera yes da, kamuno kaŋin, 5Aso abu kaomit ebe kebusakinit aicor iinacan koliŋa aponare mamakus, kogeut kesi aitemokin arereŋ ŋin naipotu kisumunoto, tetere etemokin, mere kwape naitelemunitai kwabo nakarereŋ. 6 Konye enera nata ebe, yeneyei luikidioko, esaki da luikidioko, yeneyei da karereŋ, esaki da karereŋ. 7 Kiswama ŋinituŋanan kwape inerunitor kotauke, mere kaiturur karaida kaitiŋaikin, naarai emina Edeke yenekori kalakara. 8Konye epedori Edeke ainakin yes asianut kere naidila; tetere yes da itekoro apaarasia kere kakiro kere, idilas aswamisio kere nuejok. 9 Kwape iwadikatere ebe, “Akoro ŋesi, ainaki Iuilwaritos, Ejaenena akedolit ikar kere.” 10 Konye ŋol loeinakini ikayean ikinyom, lunyaman da ainyam, einakini ka aitupuu ikinyomokus, iyatakini da araito nuka adolitekus. 11 Kitabario yes kakiro kere kiton abar naka aikor kere, naeyauni aimal Edeke kanukosi. 12 Naarai aswam naka aijaanakin na mam bon itodoli nuetwakiarito lukalaunak, konye idila da kanuka aimalaesia nuipu mama ejai Edeke. 13Kanuka aitem naka aijaanakin na itopoloorete Edeke kanuka arimanutukus alimor Akiro Nukajokak nuka Kristo, ka abararakus naka eidicane mamakec ka ituŋa da kere; 14kes da ilipanakinete yes, imielas yes kanuka asianut naka Edeke naedeparit mamakus. 15Kimalai Edeke kanuka ainakineteke namam epedorio aitejenun!101 Eoŋ Paul keŋaiŋait yes, kanuka aiyapepera ka aiyamara naka Kristo, eoŋ loarai loitasono nakijaar kayes, konye naamamear loacerededet kamakus, 2 konye elipi ebe nakijaar kayes kenyek aeereded kamuno kaŋin naaomit atitiŋikin kama ka icetuŋa lueomito ebe kilosenenei isio kwape ejaar akuan. 3Naarai karaida kilosenenei toma akuan, mam kijio kwape ejaar akuan, 4 naarai lujiis luka ejiewok mam eraas luka akuan, dimarai luka apedor mama ejai Edeke, amudiar aiboisio nuegogoŋ, 5Kimudiari ipegeta, ka ŋiniirebokinet naikiaritai asurokinia aijen naka Edeke, kijoreori da ŋiniwomisioit arimar Kristo, 6 kitemokin da ainyaŋ amamus arimar kere, naitodolere arimanutukus. 7Kosesenete nuejaas akonyenekus, Arai itogogoŋit ituŋanan ebe erai yenika Kristo, koomoom bobo na kanuke ebe, kwape eraar ŋesi yenika Kristo, kirai isio da kwape kwaŋin. 8 Naarai arai aoloboboi adepar nuka apoloukosi, naabu Ejakait koinak aiduk yes kwabo mere amudiar, mam kesurumio ilek. 9Tetere mam asubit bala etukuriani yes kanuka ibaluanaka. 10Naarai ebalasi kesi ebe, “Elaŋir ikebaluan, egogoŋ da, konye naejaar ŋesi kasio ekalanyana akekuan, akekirot da mam epodoi.” 11 Kojenut luikote nen ebe nukinera kibaluan nakimamear, ŋupeŋun kiswamai da nakijaar. 12 Naarai mam kineikina atubokina arai aitiriana bonik ka icetuŋa luiturokina, Konye kes itemos bonik ka bonik, itirianas da bonik ka bonik, emamei kes ajenun. 13 Konye mam sio kiwoloboboi adepar aitemis, konye kwape ejaar aitemis naka aikor loekorakinit Edeke sio kwape aitemis, adolokin kiton yes da, 14Naarai mam kinyaara bonik, bala mam kidolokinit yes; naarai kigeik isio adolokin yes toma Akiro Nukajokak nuka Kristo. 15 Mam kiwoloboboi adepar aitemis kotoma aitaaritoi naka icetuŋa; konye kimuno ebe naiyatanakinor aiyuunikus, kitopoloorio sio kotomakus kwape ejaar eikorukos kiton adepar da, 16 tetere kilimonokini Akiro Nukajokak aiboisio nuelitoro kamakus, komam kiwoloboboi oikor loitemokino loka icetuŋanan. 17 Konye “Yeneolobobot, koolobobote kotoma Ejakait.” 18 Naarai yeniturokina, mere ŋin yenecamunitai, dimarai yeniturit Ejakait.111Arai koŋirikinito eoŋ kotoma abaŋaanut naedit; eebo, koŋirikinito eoŋ! 2 Naarai ekokotikinit yes kekokote loka Edeke, naarai abu kesinerik yes ekiliokit ediopet, tetere ketodiari kwape abekot naelai mama ejai Kristo. 3 Konye acoit kinyeis akusiwomisio aitapaario kama ka aipioror ka alaunit nuka Kristo, kwape ejodijodio emun Keba kotoma apirianutuke. 4 Naarai arai ebuni ituŋanan elimonokini Yesu ece lomam sio kilimonokinit, arai bo idumunete emoyo ece lomam idumunito, arai bo icamunito Akiro Nukajokak nuegelara kanuipotu kocamut, iŋirikinete ejok. 5 Naarai aomit ebe mam eoŋ eŋoŋara kadiokirot nakejaatar ikiyakia lukapolok noi. 6 Konye karaida arai eoŋ lomam ajeni einer, mere kwaŋin kotoma acoa; konye koponesio kere kitodia ŋin kakiro kere mamakus. 7 Adiakarit kereka eoŋ aitasonikin tetere yes kitopoloorio, naarai abu kalimonok yes Akiro Nukajokak nuka Edeke, komam eropit? 8 Abu kaŋat ikanisan ice adumunio aropio kamakec tetere kejaanakini yes. 9 Ido nakijaar kayes, elwaritoi da, mam abu kalaŋirik ituŋanan, naarai apotu iinacan lukepote koMakedonia kainakis lukepuda. Bon da kotoma akiro kere abu kedarakina kenyek alaŋirikin yes, ido edarakina. 10 Kwape ejaar abeit naka Kristo tomakaŋ, emamei ituŋanan yeniketubutaari kotoma aolobobot ŋin kotoma atutubeta nuka Akaia. 11Kanukinyo? Naarai mam kamina yes? Ejeni Edeke. 12Konye nueswamai, eyatakini aswam, tetere egaliori einer loka ŋul kaluekotosi einer, tetere kotoma kaŋin naeolobobototor kotakanete araut kwape kasio. 13 Naarai luikote nen eraas ikiyakia lukeŋalak, ikeswamak aimod, luituluoros bonik bala ikiyakia luka Kristo. 14Mam erai nakaumokin, naarai Satan da ituluonor bon bala emalaika loka aica. 15Aso mam erai naepol arai ikekejaanakinak da ituluoros bonik kwape ikejaanakinak luka abeit. Eraun awasiakec kwape akeceswamisio. 16 Enera bobo ebe kinyek ituŋanan aomit eoŋ araut ebaŋ; konye arai kiwomito eoŋ kwaŋin, kocamunitos eoŋ kwape ebaŋ, tetere eoŋ da aoloboboi nuikidioko. 17Naenera, mam enera kaicorakinet naka Ejakait, konye kwape toma abaŋaanut, kotoma atitiŋ na naka aolobobot. 18Naarai eolobobotos luipu kopone loka akuan, eoŋ da aoloboboi. 19Naarai iŋirikinitos luebaŋaka kaiyalama, iraas yesi lukacoal 20Naarai iŋirikinitos arai kiitubulesen yes ituŋanan, arai kiiliko yes, arai kiiŋata, arai kedakunun, arai kiibapana yes akonyen. 21Enera kanuka aitisilikin, ebe kirai isio lukalanyak. Konye arai etitiŋikini ituŋanan akirot kere, –enera kabaŋaanut, –eoŋ da atitiŋ. 22 Eraas kereka kesi Iburanian? Eoŋ da. Eraas kereka kesi Isiraelin? Eoŋ da, Eraas kereka kesi aur naka Aburaam? Eoŋ da. 23 Eraas kereka kesi ikejaanakinak luka Kristo? Enera bala loikerepikinit-eoŋ adeparit-kotoma aitaaritoi naedeparit noi, kotoma aenio naedeparit noi, kotoma aleconorio numam imarunos, irwan ipu kotoma atwanare. 24 Irwan akany aponi kaleconor koYudayan idas akais aoŋon alemar idiopet. 25 Irwan auni aponi kaleconor kasureta; irwan atipet aponi kebiribirii kamor. Irwan auni abu ataker kobwaŋa; ajai ataro akuare ka apaaran; 26 irwanipu kotoma alosit, karonis naka icorin, karonis naka ikaŋatak, karonis naka lukatekereka, karonis naka Imo, karonis kotoma oreria luepolok, karonis nakotoma amodiŋ, karonis nakotoma aŋolol, karonis naka iinacan lukeŋalak; 27 kaitaaritoi ka ailolony, irwan ipu kotoma aikoler, kotoma eteŋei ka akure, irwan ipu kotoma ailuŋ, kaaterot ka amujalal da. 28 Komam imarakinit nukokiŋa, ejai nakalanirikinit tiritir, ŋes aiyaloŋoŋ kanuka ikanisan kere. 29 Iŋai bo ekalanyana, komam eoŋ da akalanyana? Iŋai bo kitiguikinitai, komam eoŋ da anoki? 30 Arai kebusakinit aolobob, aoloboboi kanuka akiro nuka akalanyanutuka. 31 Edeke Papa loka Ejakait Yesu loituritoi ikar kere ejeni ebe mam eŋalai. 32 Ko Damasiko, abu ekayaiton loka Areta ekabaka kidar ere loka Damasiko tetere kekamuni, 33 konye kejoluluun kotoma obukit kadirisa naka arwatat, kakuu kotoma akaninike.121Kebusakinit aolobob, karaida mam eyauni ajokis; konye adolokini aitegelikineta nuka emoyo, ka apukoreta nuka Ejakait, 2Ajeni etuŋanan kotoma Kristo, atuboros kwana ikar itomon kaluoŋon, –arai kejai toma akuan, arai kejai kiŋa kakuan, mam ajeni, ejeni Edeke, kowuruporoi loikoni nen kiton akuj nakiwuniet, 3Ido ajeni etuŋanan loikoni nen-arai kotoma akuan, arai komamei akuan, mam ajeni, ejeni Edeke,– 4 ebe kowuruporoi kiton Paradais, kiira akiro numam inerunos, numam ibus etuŋanan einer. 5 Aoloboboi kanuka loikoni nen, kwabo mam aoloboboi kanukaŋ, dimarai nuka akalanyanutukaŋ. 6 Naarai arai kakoto aolobob, timam arai lobaŋ, naarai enera abeit. Konye etikokina, kinyek ituŋanan aomit kamakaŋ nuedeparito nueseseni ka nuiirari kamakaŋ. 7 Ido kenyek aiturokina kanuka apukoreta nuidilas noi, aponi kainakin ekukwai kotoma akuan, ekiyakia loka Satan, tetere kebuŋai, kenyek aiturokina adepar. 8Abu keŋaiŋa Ejakait irwan auni kanuka ibore kaŋin, tetere elemario kamakaŋ. 9Konye abu katema eoŋ atiar, “Akasianut kidaunit jo, naarai itodolitoi akapedor kotoma akalanyanut.” Aso aoloboboi kaiyalama naepol kanuka akalanyanutukaŋ, tetere karapari apedor naka Kristo. 10 Ŋes esiyalamikinitor akalanyanut, aikonakinio nukepali, ailwaritoi, areio, ka aridakinio da, kanuka Kristo; naarai naakalanyanar, nepenen agogoŋoror. 11 Abu karau ebaŋ! Yes kitiŋaikinito. Naarai yes tiibusakinit aiturit eoŋ. Naarai mam eoŋ eŋoŋara kadiokirot nakejaatar ikiyakia lukapolok noi, karaida mam arai ibore. 12 Abeit aponi kiswamai aanyuneta nuka ekiyakia kokidiŋikus, kotoma aŋirikin kere, kanuka aanyuneta, ka nukaumokin ka nukapedor. 13 Naarai inyo kereka ibore yeniŋoŋara kamakus itia ikanisan ice, dimarai mam eoŋ abu kalaŋirik yes? Kitimoi eoŋ aibucaret ŋin! 14 Koany na ŋes irwan nakiwuniet naakapakina abunore mamakus. Ido mam kalaŋirikinete, naarai mam amoot iborokus, dimarai yes; naarai mam tiibusakinit idwe aiŋadanakin kanuka ikauriakakec, dimarai ikauriak kanuka idwekec. 15 Konye akori ido kakorakinio kaiyalama naepol kanuka aijarakus. Arai kamina yes aitelekarit, eŋoŋar kereka eoŋ aminunio? 16Konye kikona nen, mam kalaŋirikinit yes, konye karai loepiriana, abu kalok yes kaimod. 17Abu kereka kadum ameda kamakus kotoma edio kaŋul lukejukakinit yes? 18 Abu kecor Tito, kejuk da onac ŋol nenipe kaŋes, Abu kereka Tito kodum ameda kamakus? Mam kereka kilosenenei kOmoyo ediopet? Mam kereka kitupit ikukut ŋupeŋul? 19Iwomitos kereka apak na kere ebe kiiyari bonik kamakus? Kakonyen nuka Edeke kinera isio toma Kristo. Konye luminan, eraas kere adukio yes. 20 Naarai acoikina ebe motoko abuni kadum yes ijaas kwape mam akotor, yes da kidumunete eoŋ ajai kwape mam ikototor; kinyeis ipegeta ajaut, ka ekokote, ka anyunyura, ka aŋolopa, ka esiomit, ka aideideonokin, ka adakunun, ka iceleta da. 21 Kinyek Ekadeke aitisil eoŋ kakonyenekus, naabunio bobo, kakuudian luipu luadiakasi sek, komam itoronikinos kanuka amamus ailakec, ka adoteu, ka abenyanut, naapotu kiswamata.131 Na ŋes irwan nakiwuniet naabunio mamakus. Itogogoŋio ŋinikirot kaituke nuka ikajenak iarei arai iuni. 2Abu kekwenya ŋul kere luadiakasi sek, ka luce kere da, ido ekwenyari kes kwana naamamear, kwape nakijaar kayes nakiareit, ebe arai abuni bobo mam etimi kes, 3naarai imootos naitogogoŋi ebe inera Kristo kotomakaŋ. Mam ŋes ekalanyana, konye lokapedor kotomakus. 4 Naarai aponi kibubukinoi kotoma akalanyanut, konye ejari kotoma apedor naka Edeke, Naarai kikalanyaka isio kotomakeŋ, konye kijari nepepe kaŋes toma apedor naka Edeke mamakus. 5 Koŋicas arai ijaas toma aiyuun; kitemos. Arai bo mam ijenete ebe ejai Yesu Kristo kotomakus? Dimarai iraas lumam icamunitai. 6Konye amuno ebe ijenunete ebe mam sio kirai lumam ecamunitai. 7Konye kilipi Edeke ebe mam iswamaete adioronis, mere tetere kitakani isio kirai lukicamunitai, dimarai tetere iswamaete yesi ajokis, karaida kirai isio kwape kalumam ecamunitai. 8 Naarai mam kipedori ibore asurokinia abeit, dimarai kanuka abeit, 9Naarai kileli nakikalanyakar, konye yes igogoŋoros. Kilipi na da ebe yes aitodolikinio. 10 Kanuka ŋun ewadikai nu naamamear, kenyek adedeniar naabunio, kwape ejaar apolou nakainakinit Ejakait adukio, kwabo mere amudiar. 11 Nukawasia, iinacan, yoga do. Kitodolikinos, kitalakanaros, koomitos adiopekirot, kinapakinos, kosodi ejaun Edeke loka amin ka ainapakin kayes. 12 Kiyoganakinos kainu nakalaunan. 13Kiyogaete yes lukalaunak kere. 14Asianut naka Ejakait Yesu Kristo, ka amin naka Edeke, ka eidicane loka Emoyo Lokalaunan, kojai kayes kere. |