1 Isesalonikan11 Paul ka Siluano ka Timoteo, mama ejai ekanisa loka Isesalonikan kotoma Edeke Papa ka Ejakait Yesu Kristo: Asianut kojai mama ijaas ka ainapakin. 2 Kimalaenenei Edeke kanukus kere apaarasia kere, kilimununei yes kotoma ailipikosi, 3 komam kinyeinenei aiitunun kakonyen nuka Edeke Papawok aswamukus naka aiyuun, ka aitaaritoi naka amin, ka atitiŋikin da naka amuno naka Ejakaitiwok Yesu Kristo, 4Naarai iinacan luemina Edeke, kijeni aseuniokus; 5 naarai Akosikiro Nukajokak mam apotu kodolokis yes kotoma akirot bon, dimarai kotoma apedor, ido kotoma Omoyo Lokalaunan, ido kaitogogoŋio naepol, kwape ijeniata epone lokitodiaror tomakus kanukus. 6 Ido ipotu koputosi sio ka Ejakait, naarai ijaut akirot kotoma aiticanio naepol, kaiyalama naka Emoyo Lokalaunan; 7 kosodete araun aanyunet mama ejaas luiyuunito kere kotoma Makedonia ka Akaia da. 8 Naarai anyoun kamakus epup akirot naka Edeke, mere kotoma Makedonia ka Akaia bon, dimarai isiarakina akusiiyuun kotoma Edeke ŋiniibois kere, emamei bobo sio eipud einer akirot kere. 9 Naarai alimosi kesi ikulepek akirokosi kwape kiilomunia mamakus, ido kwape ibelokinotor mama ejai Edeke, kinyeis aputosia, tetere ijaanakinete Edeke lokajaran lokabeit, 10 ka aidareun Okokuke abunore kokuju, lokitajaruni ŋesi kokatwak, ŋes Yesu lokiyuuni oni kotoma anyunyura naebunit.21 Naarai ijenete yesi iinacan, ebe akosilomun mamakus mam kerai atai; 2 konye karaida kiiticanitai ka aiswamakinio da nukepali koPilipi, kwape ijeniata, kipou katitiŋikisi kotoma Edekewok, alimonokin yes Akiro Nukajokak nuka Edeke kauta naepol. 3Naarai alimonokinikosi mam erai naka aiŋal, karaida naka asilianut, karaida kotoma aimod, 4 konye kwape kicamakinia Edeke isio araut lukimunoi kotoma Akiro Nukajokak, kwape kwaŋin kinerar, mere aitalakar ituŋa, dimarai aitalakar Edeke loiteteni itauonokosi. 5 Naarai mam kijaa kakiro nuisupete apakio kere, kwape ijeniata, karaida nuerapete airaŋaanut, erai Edeke ekajenan; 6 mam kipou kamootos aibuses kama kituŋa, karaida kamakus, karaida kama kice, nakipedoria alaŋirikinit yes, kwape ikiyakia luka Kristo. 7Konye kipou keyapeperas kokidiŋikus, kwape akasaan naitani ikedwe alopet. 8Kwaŋin kipodori yes, ketojokata akorakin yes mere Akiro Nukajokak nuka Edeke bon, konye akosiijar da, naarai iraas iminanakosi noi. 9 Naarai, iinacan, iitunito yesi akosiitaaritoi ka ailolony; nakiswamaenena akuare ka apaaran da, kenyeis alaŋirikin ituŋanan kere kayesi, kalimonokinete yes Akiro Nukajokak nuka Edeke. 10Iraas yesi ikajenak, ka Edeke da, kwape kijaar kamakus luiyuunito kalaunit, ka adolit, komamei aitoronet; 11 kwape ijeniata yesi ebe, kwape icoria papa ikedwe, kipou kecorata ŋinidiopet kayesi, kesinyikokito, ka aitejenun da, 12 tetere ilosenenete kwape luibusakinito Edeke, lokinyarit yes alomar toma ajakanutuke ka aibuses da. 13 Kanuka ŋun da kimalaenenei Edeke tiritir, naarai naijauniata akirot naka Edeke naipupunete kamakosi, ipotu kocamut, mere kwape akirot naka ituŋa, konye kwape eraar abeit akirot naka Edeke, naiswamai da kotomakus kaluiyuunito. 14 Naarai, iinacan, ipotu koputosi ikanisan luka Edeke lukotoma Kristo Yesu, Iuejaas Yudaya; naarai apotu ikusituŋa kiticanata yes da, kwape eticaniata Iyudayan lukec; 15 luapotu koarata Ejakait Yesu ka inabin da, ido kireŋeto sio, kwabo mam kes isiyalamikinito Edeke, isuruposi kituŋa kere, 16 kirebokinito da sio alimonokin Imo tetere itajario, kosodete aitodolikin adiakanaretakec apaarasia kere. Konye ekokoikin kes cut anyunyura naka Edeke. 17 Konye iinacan, kipou isio katiakasi kayes apak naedit, kakonyen, kwabo mere kotauon, kipou kadunyakis noi noi aanyun akusikonyen kaimue naepol; 18naarai kipou kakotosi aponare mamakus, eoŋ Paul, irwan nasodit ka nakiareit da, konye kitikok Satan sio. 19 Naarai inyo bo amunokosi, arai aiyalama, arai aboko naka aolobob kakonyen nuka Ejakaitiwok Yesu kotoma abunoreke? Mere yes? 20Naarai iraas yesi akosiibuses ka aiyalama da.31 Kanuka ŋun namam bobo kipedoria atitiŋikin, kipou ketojokata ainyeinio bon ko Asene, 2 kejukas Timoteo onacekosi ido ekejaanakinan loka Edeke toma Akiro Nukajokak nuka Kristo, tetere iticasi yes ka uitalakar da kotoma aiyuunikus, 3 kinyek ituŋanan kere airiaŋiriaŋa kotoma aiticanio kana. Naarai ijenete yesi ebe kitebeitai ŋin. 4 Naarai nakijaar kayes, kipou kekwenyasi yes ebe kidumuni aiticanio; kwape kedounio da, ido kwape ijeniata. 5 Kanuka ŋun namam bobo apedoria atitiŋikin, abu kejuk kasodi ajenun aiyuunikus, kinyek ekacodan acodun yes, aitaaritoikosi da koraun natitai. 6 Konye kwana naadolunio Timoteo mamakosi ebuni kamakus, abu koinu sio akiro nukajokak nuka aiyuunikus ka aminakus, ebe da kiitununete yesi sio ejok apaarasia kere, kimuito aanyun sio, kwape sio da yes,— 7 kanuka ŋun, iinacan, kitalakaritai kanukus kotoma aridakiniokos kere ka aiticanio, kanuka aiyuunikus, 8naarai kwana kijari arai ibwoete yesi icasito kotoma Ejakait. 9Naarai aimal anyoin kipedori atacakin Edeke kanukus, kanuka aiyalama kere nakiyalamar kanukus kakonyen nuka Edekewok, 10kidunyakinit ailip akuare ka apaaran da ebe kaanyut akusikonyen, ka aitemonokin nuiŋoŋara kotoma aiyuunikus? 11 Konye Edeke elopet Papawok ka Ejakaitiwok Yesu kiteten ekosirot aponare mamakus; 12Ejakait da koinak yes aiyatanakin ka aidilakin aminanar bonik, ka ituŋa kere, kwape sio da kiminar yes, 13 tetere kiticat ikusitauon koraas Iuemamei aitoronet kotoma alaunit kakonyen nuka Edeke Papawok, naebunio Ejakaitiwok Yesu nepepe kalukalaunakake kere.41 Nuesalito, iinacan, kiŋaiŋait yes ka aicor da kotoma Ejakait Yesu, kwape kijauniata kamakosi kwape ibusakinitor yes alosenen ka aisiyalamikinit Edeke, kwape ilosenenoto, kiyatanakinos bobo kwaŋin, 2Naarai ijenete kwape ejaatar aicorakineta nukipou kainakis yes kanuka Ejakait Yesu. 3 Naarai naekoto Edeke ŋes nata, aitalauniokus: kinacata adoteu; 4 kojenu ŋinituŋanan kayesi ajaut kakeberu kotoma alaunite ka ayoŋit, 5 mere kotoma ainekit naka eimiel kwape ikapirin Iumam ejenete Edeke; 6 kinyek ediotuŋanan aibucar karaida airod onaceke kotoma akirot, naarai erai Ejakait ekenyaŋan kotoma kaŋun kere, kwape kipou kekwenyariata yes ka aitejenun da noi. 7 Naarai mam Edeke kinyarakinit oni asilianut, dimarai toma alaunit. 8 Aso yeneŋeri, mam eŋeri etuŋanan dimarai Edeke, lokiinakini yes Ekemoyo Lokalaunan. 9 Konye nuka amin iinacan mam ipudasi eoŋ aiwadikakin yes, naarai kisisianakinit Edeke yes aminanara; 10 naarai iswamanakinete akirot ŋin iinacan kere luejaas Makedonia kere, Konye, iinacan, keŋaiŋait yes kiyatanakinos adepar nen, 11 koŋaŋato aiyapaara, kiswamaenenete nukus bonik, kitaaritos da kakusikanin, kwape kipou kecorakiniata yes, 12 tetere ilosenenete koponesio luejok kama kalukokina komam ilwaritos. 13 Konye iinacan, mam kikoto yes aolit nuka ŋul kaluejotoete, tetere mam itururwete kwape ice luemamei amun. 14 Naarai arai kiyuunit ebe abu Yesu kotwana, kojaru da, kwape kwaŋin kanuka Yesu eyauni Edeke nepepe kaŋes ŋul luejotoete. 15 Naarai kilimokini yes na kakirot naka Ejakait, ebe onilukijari lukipaikinit kiton abunore naka Ejakait, mam kigeikini luejotoete. 16 Naarai edokuni Ejakait elopet abunore kotoma akuj kaiworo, keporoto loka emalaika lokapolon, ka arupepe naka Edeke. Ŋul da luketwakete kotoma Kristo, kes eliŋete ajarun; 17 kosodi konyet oni lukijari, lukipaikinit, kiwuruporio nepepe kakes toma odoun, airiamun ka Ejakait toma apak; kwaŋin kijaenena ka Ejakait apaarasia kere. 18Aso kitalakanaros bonik kakiro kaŋun.51 Konye iinacan, mam ipudasi eoŋ aiwadikakin yes nuka apakio ka ikar. 2 Naarai ijenete yesi jokan ebe ebuni apaaran naka Ejakait kwape ekokolan kuare. 3 Naineratar ebe, “Ejai ainapakin ka aiyamakina,” eŋesakin do kes amudiar kwape eŋesakinor ariebo aberu naidouni, kwa bo mam ekuete nepepec da. 4Konye iinacan, mam ijaas amuton, apaaran ŋin aturiaikin yes kwape ekokolan. 5 Naarai iraas yesi kere odwe luka aica, ka odwe luka apaaran; mam oni kirai luka akuar karaida luka amuton. 6Aso do kenyeisi ajotoor kwape ka ice, konye kakwenyenenete, kenyeis amer, 7Naarai luejotoete, ejotoete kuare, luemerasi da emerasi kuare. 8 Konye do oni kirai luka apaaran, kenyeis amer, kanapa yenikatorob yenika aiyuun ka amin, akopira da korai amun naka aitajario. 9 Naarai mam Edeke kibwaikinit oni kanuka anyunyura, dimarai adumun aitajario kanuka Ejakaitiwok Yesu Kristo, 10 loabu kotwanik oni tetere kijari nepepe kaŋes, arai kikwenyi, arai bo kijotoi. 11 Aso kitalakanaros bonik, kodukonoros ŋinituŋanan kayenice, kwape iswamaata da. 12 Konye iinacan, kiŋaiŋait yes ajenun ŋul Iuitaaritos kotomakus, lukiyaito yes kotoma Ejakait, ka lukicorete da, 13koyoŋito kes noi kamin kanuka aswamukec, Kojaas kainapakina kotomakus. 14 Konye iinacan, kiŋaiŋait yes, kicorata luitotolikino, kiticasete luipirisiaros itauon, kisigalikis luekalanyaka, kotitiŋikis ituŋa kere. 15 Koanyutu ebe emamei yenetacakini aronis kanuka aronis, konye komootos apaarasia kere aikonanakin lucekus ejok, ka ituŋa da kere. 16 Kiyalamasi apaarasia kere, 17 kilipenenete tiritir, 18 kimalaenenete kotoma ŋinikirot kere; naarai ŋin ŋes naekoto Edeke kamakus kotoma Kristo Yesu. 19 Siritudeŋete Emoyo, 20sirimenete aidwar, 21 konye kitemoto akiro kere; kikamutu cut nuejok, 22 kinacata ŋolipone kere loerono. 23 Edeke da elopet loka ainapakin kitalau yes cut, kidaritete cut imoyonokus, ka aijarakus, ka awatekus da, komamei aitoronet kiton naebunio Ejakaitiwok Yesu Kristo. 24 Lokinyarit yes erai lomunot, ido ebuni aswam. 25 Iinacan, kilipanakinai sio. 26 Kiyogaete iinacan kere kainu nakalaunan. 27Kesiyapoete kalimite Ejakait ebe kosiomakinai ebalua lo iinacan kere. 28Asianut naka Ejakaitiwok Yesu Kristo kojai kayes. |