1 Petero11 1 Petero, ekiyakia loka Yesu Kristo, Mama ejaas luseuna luesiarakinos luiboiororos kotoma Ponto, ka Galatia, ka Kapadokia, ka Asia, ka Bisunia, 2 kwape kolo esiaunia Edeke Papa ajenun, kotoma aitalaunio naka Emoyo, kiton arimanut ka abwatakinio aokot nuka Yesu Kristo: Kiyatanakin asianut ka ainapakin mamakus. 3 Kituritete Edeke ka Papa loka Ejakaitiwok Yesu Kristo! Kwape ejaar akeitim naepol abu kouri oni irwan nakiareit, tetere kija kamun naejari, kanuka ajarun naka Yesu Kristo kokatwak, 4 kadumut airumet namam edaun, naemamei elos, namam erinyori naiŋadakinitai yes toma akuj;, 5 yes lukigalikinit apedor naka Edeke kanuka aiyuun kiton naidumuniata aitajario naitemokino apukorio kapak nakawasia. 6 Iyalamasi noi kotomakeŋ, karaida ibusakinit diat aitakadikinio kwana apak naedit, kanuka acodunio naka iponesio luipu, 7 tetere aitemio naka aiyuunikus naitelekarit noi etiai loka esabu loedaun karaida kitemio kakim, kotakanu ituritoi, itopoloorio, ka aitubusikinio da, kotoma apukorio naka Yesu Kristo. 8 Iminasi ŋes karaida mam ipotu koanyut ŋes; karaida mam ianyunito ŋes kwana konye iyuunito ŋes, iyalamasi noi kaiyalama namam inerio naitepolooritai. 9 Idumunete esaŋe loka aiyuunikus ŋes aitajario naka aijarakus. 10 Apotu inabin, luadwarenenete nuka asianut naekot abunore mamakus, komoenenete ka aiŋic akiro nuka aitajario kaŋin; 11 koŋicata ani bo apak, arai ali bo epone lokikwenyaria Emoyo loka Kristo lokejai tomakec, nakegeia aitejen aiticanio naka Kristo ka aibuses naetupakin ŋin. 12 Aponi kes! kopukokinai ebe mere kanukec bonik, dimarai kanukus, apotu kijaanaki! ŋun nukidaun alimokin yes kwana, kama kaŋul lukilimonokinete yes Akiro Nukajokak, kanuka Emoyo Lokalaunan loejukunio kotoma akuj, akiro ŋun imielas imalaikan aireonokin. 13 Kanuka ŋun koenata aŋabes nuka acoakus, kinyeis amer, komunosi cut asianut nakiinunio kotoma apukorio naka Yesu Kristo. 14 Kwape idwe luerimaka, sirituputoro keimiel loka apak nakaolitekus nakolo, 15konye kwape eraar lokinyarit yes lokalaunan, koraut yesi da lukalaunak koponesio kus kere, 16 naarai iwadikatai ebe, “Iraunos yesi lukalaunak, naarai arai eoŋ lokalaunan,” 17 Arai inyarito Papa ŋol loetubokini ŋinituŋanan kwape ejaatar aswamisioke, komam etiaki ituŋa, kolosenenete kakurian kapali nairaatar ikalotok. 18 Kojenete ebe mam aponi kolakun yes kiboro luedaunos, kwape epuesa arai esabu, koponesiokus lutai lukirokunete kama kalukapapaakus, 19 dimarai kaokot nuketiai Ioepol nuka Kristo, kwape nuka imerekek yenemamei aŋwal, karaida akemer. 20 Aponi kisiaunai ajenun ŋes koriŋa akwapin kesuba, konye aponi kitakanunai kawasia naka apakio kanukus. 21 Kotomakeŋ iraut luiyuunito Edeke, loetajaruni ŋes kokatwak, koinak da aibuses, kosodi aiyuunikus ka amunokus ajaut mama ejai Edeke. 22 Naarai idaut aitalaun aijarakus kotoma arimarite abeit, kiton amin iinacan namam esoswai, kodunyakis noi aminanara kotoma otauon. 23 Naarai aponi kourii yes irwan nakiareit, mere kikinyom luebosete, dimarai kalumam ebosete, kanuka akirot naka Edeke naejari naeperonori. 24 Naarai “Akuan kere esubit bala anya, Ka aibusesuke kere da kwape aturot naka anya, Erinyorete anya, aturot da eraraar. 25 Konye akirot naka Ejakait eperonori ikar kere.” Akirot ŋin da kes Akiro Nukajokak nuaponi kolimokin yes.21 Aso kolemasi awai aronis kere, ka aimod kere, ka aisoswanut, ka ekokote, ka esiomit da kere. 2 Kwape imukerun lupeurio kwape kwana kimielas akile nukemoyo nuemamei aimod, tetere kitopoloete yes adolore aitajario; 3 arai ipotu kiirata ajokis naka Ejakait. 4 Ipote mamakeg, amoru naejari, naaŋerete ituŋa, konye kama ejai Edeke erai naseuna, naketiai loepol; 5 ka yes da kwape amor nukajarak kidukio koraut etogo lokemoyo, esasedotene lokalaunan, ainanakin asuban nukemoyo, nuitojokit Edeke kanuka Yesu Kristo. 6 Naarai ejai toma nuiwadikatai ebe: “Koany, apesikini eoŋ koSion amoru nakapolon naka agor, Naseuna, naketiai loepol, Ido yeniyuuni ŋes mam irumete ileic.” 7 Aso mamakus luiyuunito erai ŋesi loketiai loepol; konye mamakec lumam iyuunito, “Amoru naaŋerete ikadukok, Araun nakapolon naka agor.” 8 Bobo da, “Amoru naitiguikinet, ka atiiba nakebiroron”; iguikinos akiro naarai mam erimarito, kwape elosikinitere kes. 9 Konye yes iraas ajena naseuna, esasedotene loka ekabakane, ateker nakalaunan, ituŋa obe luka Edeke, kosodete alimonokin nukajokak nuka ŋol lokinyarauni yes anyoun kamuton alomar toma aicake nakaumokin. 10 Mam kolo iraas ituŋake, konye kwana iraas ituŋa luka Edeke; mam kolo kitimitoi, konye kwana idumut aitimio. 11 Luminan, keŋaiŋait yes kwape ikalotok ka ikeboiororok, ainacenen aiŋobel naka akuan, naejio kaijar. 12 Kojaas kiponesio luejok kotoma Omo, tetere nakisiomiata yes bala ikeswamak nueroko, kitopoloosi Edeke kapaaran naka aanyanario kanuka aswamisiokus nuejokuka. 13 Kononokikis ŋiniicorakinet naka ituŋa kanuka Ejakait, arai erai naka ekabaka naarai ŋes itelekarit kere; 14arai naka ikayaitok, luijukuni ŋesi aitican luiswamaete nueroko, ka aiturit da ŋul luiswamaete nuejok. 15 Naarai nuekoto Edeke kes nuta, yes aswam nuejok tetere itubutarete abaŋaanut naka ituŋa lueolito. 16 Luijakakaete, kwabo mere luitwasamaete aijakak ŋin bala araparet aronis; konye bala ibulesin luka Edeke. 17 Kitopoloorito ituŋa kere. Kominas iinacan. Koyoŋito Edeke, Kitopoloorito ekabaka. 18 Yes ibulesin, kononokikis ikusijaka kayoŋite kere, mere lukajokak bonik ka luiyapeperas, konye ka lukadedeŋak da. 19Naarai na ŋes itojokitai, ituŋanan aŋirikin ican kanuka aiitun Edeke, isiriebio komameete akiro. 20 Naarai aiturio anyoin, arai kidiakasi, kibapanar ititiŋikinete? Konye arai kiswamata nuejok, kisiriebi, ititiŋikinete, itojokitai ŋun, kama ejai Edeke. 21 Naarai aponi konyarakin ŋin, naarai Kristo da aponi kisiriebai kanukus, kinyekinia yes naanyunet tetere ituparete ikukutuke. 22 Mam ŋes abu kodiaka, karaida aimod adumun kaitukuke. 23 Naamoromoroere ŋes, mam abu kinyaŋa aimor; naesiriebere, mam abu kitukurian; konye abu kijaikin mama ejai ŋol loetubokini kadolit. 24 Abu ŋesi elopet kibwok adiakanaretawok kakuanake kokitoi, tetere nakidaunia atwanare kama ejaas adiakanareta, kajarata mama ejai adolit. Imacarinike kes kitaŋaleunete yes. 25 Naarai ipotu kopaarito kwape amerekekin, konye kwana iboŋut mama ejai Ekecokon Ekaanyanaran da loka aijarakus.31 Yes aŋor da kwape kwaŋin, kononokikis ikiliokokus, tetere ice, karaida mam erimasi akirot, kiriasi iponesio luka aŋorokec komamei akirot, 2 naeanyuniata iponesiokus luesegara, ka luka ayoŋit. 3 Kinyek aisiritekus araut nakokuju, naka aicip itim, ka aidelonokin esabu, ka ainap inapen, 4konye korai etuŋanane loibwaa lokotau, anapito namam edaun naka emoyo loiyapepera ka aiyapaara, loerai loketiai loepol kakonyen nuka Edeke. 5Naarai kwape kwaŋin kolo sek kisirenenoto aŋor nukalaunak nuamunosi Edeke, kononokikinito da ikiliokokec. 6 Kwape kerimaritor Sara Aburaam, konyarite ŋes ejakait. Iraas yesi da idweke, arai iswamaete ejok, komam kitukuriani etasuro kere. 7 Yes da ikiliok kwape kwaŋin, kiboienenete kakusiŋor koomito nukec, kitopoloorito aberu kwape ibore yenitelekarit akalanyanut, naarai kes da akerumak nukaupakus nuka asianut naka aijar, kinyek akusiilip aitikokinio. 8 Nakawasia, koraas kere luicamanara, luitimonoros, luiminanara kwape iinacan, luisiaka, luitasonos da. 9 Sirinyaŋarete aronis kanuka aronis, karaida amorosit kanuka amorosit; konye gwai kilipakis arereŋ, naarai aponi konyarakin ŋin, tetere irumete asianut. 10 Naarai ebe: “Yenimiela aijar, ka aanyun da apaarasia nuejok, Kitikok aŋajepeke kama karonis, Aitukuke da kinyek einer nukaimod. 11Konyou kotoma aronis, kiswama ajokis; Komo ainapakin, kotup da. 12Naarai esesenete akonyen nuka Ejakait ikadolitok, Itoikinit da akiike apupun ailipikec. Konye egirito akonyen nuka Ejakait ŋul luiswamaete aronis.” 13Iŋai tope kiswamakini yes erono arai idunyakinito nuejok? 14 Konye karaida kisiriebio kanuka adolit kisirereŋitoi, Sirikikuriakaros aitukurianakec, kwabo sirikiyaloŋoŋoto, 15 konye kitalautu Kristo kotauonokus araut Ejakait. Kokapakina apaarasia kere aboŋokin ŋinituŋanan yenikiŋisi yes akiro nuka amun naejai tomakus, konye ca kaiyapepera ka ayoŋit. 16 Kojaas kaomisio nuejok, tetere kaŋun nukisiomere, irumete ileic ŋul luemoromoroete ikusiponesio luejok kotoma Kristo. 17 Naarai ejok aisiriebio kanuka aswam nuejok, arai ŋes naekot Edeke, itia kanuka aswam nueroko. 18 Naarai Kristo da aponi kisiriebai kanuka adiakanar irwan atipet, lokadolit kanuka lumam edolito, tetere kiyauni mama ejai Edeke, nakearere akuanake, konye koinakinai aijar kotoma omoyo, 19 loalosio da alimonokinia imoyon luejaas aidaris, 20 lumam kerimasi kolo, naedareunitor atitiŋikin naka Edeke, kapaarasia nuka Noa, naetemonokinere ataker, kama etajarere ituŋa idis, kotoma akipi, kes ituŋa ikanykauni. 21 Eputosi akiro ŋun kaibatisao, naitajari yes kwana, mere alemar elos loka akuan, dimarai einer kaomisio nuejok mama ejai Edeke, kanuka ajarun naka Yesu Kristo, 22 ejai akan nakoteten naka Edeke, kedau adokar toma akuj; imalaikan, ka lukapolou, ka lukapedor da kononokikis ŋes.41 Aso naarai Kristo aponi kisiriebai akuan, konapenenete yesi da lujiis luka aomisioit kaŋin, naarai yenisiriebio akuan enyek adiakar, 2 tetere idaunete apaarasiakus nuideuna iriŋa ijaas toma akuan, mere bobo kanuka aiŋobel naka ituŋa, konye kanuka ŋun nuekot Edeke. 3 Naarai apaarasia nuatuboros kidaunito aiswamaenen nuekotos Imo, alosenen toma abenyanut, aiŋobel, emeret, aboliasio, edeŋo, ka aima da aputosia nuketal. 4Isiwumokinito kes naarai mam ikerete nepepe kakes kotoma oponesio ŋupeŋul luutai, komoromoroete yes; 5 konye inyakunete kesi akirot mama ejai ŋol loitemonokino atubokin lukajarak ka lukatwak da. 6 Naarai ŋin ŋes elimonokinere lukatwak da Akiro Nukajokak, tetere kes da etubokinio kwape ituŋa luejaas awat, konye kojarata kotoma omoyo kwape ka Edeke. 7 Eapie awasia naka iboro kere; aso koomito kacoit, kinyeis da amer, tetere ilipenenete. 8 Aitelekarit kere kodunyakis noi aminanara, naarai erapari amin adiakanareta nukepuak. 9 Kisukunyanakinete ipejok bonik ka bonik, komamei aŋuurian. 10 Kwape kedumunia ŋinituŋanan ainakinet, kijaanakis lucekus kaŋin, kwape ikeŋadak luejok luka asianut naka Edeke naka iponesio luipu; 11 arai ejai yeninera, kwape yeninera akiro nuka Edeke; arai ejai yenijaanakini, kwape kanuka agogoŋ naekori Edeke; tetere itopolooritai Edeke kotoma kere kanuka Yesu Kristo. Aibuses ka ayait kojaas mamakeŋ ikar ka ikar. Amen. 12 Luminan, siriwumokinete aitemio naka akim nakibunokinit yes, bala kidoik yes ibore yenikaumokin. 13 Konye kiyalamasi naarai imorete aisiriebio naka Kristo, tetere naepukorere da akeibuses, iyalamas kailel naepol. 14 Arai kiimoromoroi kanuka ekiror loka Kristo, isirereŋitoi, naarai kidoik yes Emoyo loka aibuses, ka loka Edeke da. 15Konye kinyek idio kayesi aisiriebio kanuka araut ikaaran, arai bo ikokolan, arai yeniswamai nueroko, arai kanuka araut yeniramaana; 16 konye arai kisiriebio kanuka araut Ikristayot, kinyeis ileic airum, konye kitopoloor Edeke kokiror kaŋol. 17 Naarai adol apak naegeunere atubokin lukokal loka Edeke; ido arai egeuni kaoni, anyoin bo awasia naka ŋul lumam erimasi Akiro Nukajokak nuka Edeke? 18 Bobo da, ebe, “Arai etiono aitajar ikadoliton, Ai bo do etakanunia yenikepali ka ikadiakanaran?” 19 Kanuka ŋun kiswamata ejok ŋul luisiriebio kwape ejaar akot naka Edeke, kisiŋadata Ekasuban lomunot akeceijar.51 Aso eoŋ loarai ekimat aupakus ka ekajenan da loka aisiriebio naka Kristo, ekamoran da loka aibuses naekoto apukorio, ecori imakio kotomakus: 2 kicokienenete esipan loka Edeke lokotomakus, mere kanuka aitiŋaikinio, dimarai kanuka alosikinit, mere kanuka ameda nakileic, dimarai koipud, 3 mere kwape lueyaito kagogoŋ nukibeito, konye koraut aanyuneta nuka esipan. 4 Kosodi naetakanunia Ekecokon lokapolon, idumunete aboko nakaibuses namam erinyori. 5 Yes da ikatumunak kwape kwaŋin, kononokikis imakio. Konapito yesi kere aitasonikino bonik ka bonik, naarai “itepegi Edeke luiwoŋoko, konye einakini luitasonos asianut.” 6 Aso kitasonikinos kokwap kakan nailerit naka Edeke, tetere kitopoloori yes kedol apak. 7 Kowoikis ŋes aiyalononokus kere, naarai epod ŋesi yes. 8 Kinyeis amer, kokwenyenenete. Lokasurupikus Satan irimirimi kwape eŋatuny loegat, emoot yenenyamari. 9 Kitepegata ŋes, kicasito kaiyuun, kojenete ebe itodolitoi aisiriebio ŋipeŋin koinacanakus luejaas akwapin. 10 Konye Edeke lokasianut kere, lokinyarakinit yes aibusesuke naka ikar kere toma Kristo, kidaut aisiriebio apak naedit, kitetemikini yes, kiticat, ka aitogogoŋ da. 11Kojai ayait mamakeŋ ikar ka ikar. Amen. 12 Kejukakinit yes ebalua lo kakan naka Siluano, loaomit eoŋ araut onace lomunot, kewadikakinit kakiro nuikidioko, kecor ka aitejenikin noi ebe ŋin ŋes asianut obe naka Edeke, kobwaata yesi kotomakeŋ. 13 Kiyogai yes ŋin naejai Babulon, naseuna aupakus, ka Marako da okokuka. 14 Kiyoganakinos kainu nakamin. Ainapakin kojai mamakus kere luijaas toma Kristo. |