1 Yokana11 Ŋin nakejai ameun kageunet, nakipou kapuput, nakianyunit kakosikonye, nakipou kasesenata, katirosi da kakosikanin, naka akirot naka aijar,— 2 kotakan da aijar, ido kipou kaanyut, kitejenuni da, kilimonokin yes aijar ŋin naka ikar kere, nakejai neejai Papa, nakitakanikinio sio,— 3nakipou kaanyut, kapuput da, kilimonokini yes da, tetere idieasi yesi da kasio. Eidicanewok da ejai nepepe ka Papa, ido nepepe ka Okokuke Yesu Kristo. 4 Kiwadikai nu tetere itodolikinio awokokiyalama. 5 Na ŋes aitejenunet nakipou kapuput kamakeŋ, nakilimonokini yes, ebe, Erai Edeke aica, ido kotomakeŋ emamei cut adiomuton. 6 Arai kinera ebe kidica kaŋes, kalosenenete da kotoma amuton, kiŋala bonik, komam kiswamai nukabeit. 7 Konye arai kilosenenei kotoma aica, kwape ejaar ŋesi toma aica, kidicenena bonik ka bonik, ido kitesegarete oni aokot nuka Yesu Okokuke kama kadiakar kere. 8Arai kinera ebe emamei oni adiakar, kimoda bonik, emamei da abeit kotomawok. 9 Arai kilimori adiakanaretawok, erai ŋesi lomunot ido loedolit, isioniei oni adiakanareta, itesegari da oni kama kamamus adolit kere. 10Arai kinera ebe mam kipou kadiakasi kituluori ŋes ekeŋalan, emamei da akekirot kotomawok.21 Ikadwe ludidik, kewadikakini yes nu kinyeis adiakar. Arai kediaka ituŋanan ejai oni Ekapuron neejai Papa, Yesu Kristo ekadoliton. 2 Erai ŋesi alucet naka adiakanaretawok, kwabo mere kanuwok bonik, konye kanuka akwapin kere da. 3Kana da ŋes kijenunia ebe kijeni ŋes, arai kiricit aicorakinetake. 4 Yeninera ebe, “Ajeni ŋes,” komam ericit aicorakinetake erai ikeŋalan, emamei da abeit kotomakeŋ. 5 Konye ŋin yenericit akekirot abeit apoloo amin naka Edeke kotomakeŋ. Kana ŋes kijenunia ebe kija tomakeŋ. 6 Ŋin yeninera ebe esalenenei tomakeŋ, iburao ŋin alosenen kwape alosenenoo ŋesi. 7 Luminan, mam kewadikakini yes aicorakinet nakitetet, dimarai aicorakinet namojoŋ naidumut ameun kageunet; aicorakinet namojoŋ ŋes akirot naipotu kopuput. 8 Kewadikakini yes bobo aicorakinet nakitetet, naerai nakabeit tomakeŋ, tomakus da, naarai edaun amuton, ecai da kwana aica nakabeit. 9 Yeninera ebe ejai toma aica, kolaite da onaceke, ejai toma amuton kiton kwana. 10 Yenemina onaceke esalit toma aica, emamei da aiguikinet kotomakeŋ. 11 Konye yenelai onaceke ejai toma amuton, elosenenei da kotoma amuton, komam ejeni neelosi, naarai etumudak amuton akekonye. 12 Kewadikakini yes, idwe ludidik, naarai esionii yes adiakanaretakus, kanuka ekekiror. 13 Kewadikakini yes, lukapapa, naarai ijenete ŋol loejai ameun kageunet. Kewadikakini yes, ikatumunak, naarai ipikos lokaronon. Kewadikakini yes, idwe, naarai ijenete Papa. 14 Kewadikakini yes, lukapapa, naarai ijenete ŋol Ioejai ameun kageunet. Kewadikakini yes, ikatumunak, naarai igogoŋ, esalit da akirot naka Edeke tomakus, ipikos da lokaronon. 15 Siriminas akwapin, karaida iboro luejaas toma akwapin. Arai emina ituŋanan akwapin, emamei amin naka Papa kotomakeŋ. 16 Naarai ibore kere yenejai toma akwapin, aiŋobel naka akuan, aiŋobel naka akonye, ka eitur da loka aijar kana, mam elomunete kaneejai Papa, dimarai elomunete kakwapin. 17 Edaunos da akwapin, ka aiŋobelekec; konye yeniswamai nuekot Edeke esalenenei kiton ikar kere. 18 Idwe, adolu esawa lokawasia, ido kwape ipotu kopupunioto ebe ebuni lokasurup loka Kristo, adolut kwana lukasurup luipu luka Kristo; ŋes kijenunia ebe adolu esawa lokawasia. 19 Apotu konyout kamawok, konye mam keraas luwok; naarai arai keraas luwok, tikesalata kaoni, konye konyout tetere itakanunio ebe mam keraas kere luwok. 20 Konye yes abu Lokalaunan kinyonyoik akinyet, ido ijenete kere. 21Mam kewadikakini yes naarai mam ijenete abeit, konye naarai ijenete ŋin, ido naarai emamei aiŋal kere naelomuni kotoma abeit. 22Iŋai bo erai ikeŋalan dimarai yeneŋeri ebe Yesu mere Kristo? Lo ŋes lokasurup loka Kristo, loeŋeri Papa ka Okoku da. 23 Ŋin kere yeneŋeri Okoku, emamei ŋin Papa. Ŋin yenelimori Okoku ejai ŋes Papa da. 24Kosal tomakus naipuput ameun kageunet. Arai kesal tomakus naipuput ameun kageunet, isalete da toma Okoku ido toma Papa, 25Na ŋes aisumunet naisumunit ŋesi oni, aijar naka ikar kere. 26Kewadikakini yes nu nuka ŋul lukitapaarete. 27 Yes da, esalit tomakus ainyonyoikinio akinyet naidumut kamakeŋ, komam ipudasi ituŋanan aisisianakin yes; konye kwape kisisianakinia yes ainyonyoikinike akinyet akiro kere, erai da nakabeit, kwabo mam erai aiŋal, ido kwape kisisianakinitor yes, kosalata tomakeŋ. 28 Kwana da, idwe ludidik, kosalata tomakeŋ, tetere naetakanunia ŋesi kajaas katitiŋ, kinyeis ileic airum oni kakonyeneke naebunio ŋesi. 29 Arai ijenete ebe edolit ŋesi, kojenut ebe ŋin kere yeniswamai nukadolit ŋes eurit,31 Koanyut amin naetia nen nakiinakinit Papa oni, tetere kinyaritai idwe luka Edeke, kirai da. Kanuka ŋun ŋes mam akwapin kijeniata oni, naarai mam apotu kojenut ŋes. 2 Luminan, kirai kwana idwe luka Edeke, mam ber etakani kwape kiraunor, konye kijeni ebe naetakanunia ŋesi kiputori oni ŋes, naarai kianyuni ŋes kwape ejaar. 3Ŋin kere yenejai amun ŋin, italauna kwape eraar ŋol lokalaunan, 4 ŋin kere yeniswamai adiakar, iswamai da epali, adiakar ŋes epali. 5 Ijenete da ebe abu ŋesi kotakan tetere elemari adiakanareta, emamei da adiakar kotomakeŋ, 6 ŋin kere yenesalit tomakeŋ mam ediakari; ŋin kere yenediakari, mam abu koany ŋes karaida ajenun 7 Idwe ludidik, kinyek ituŋanan aitapaar yes. Yeniswamai nukadolit erai yenedolit, kwape eraar ŋol loedolit. 8 Yeniswamai adiakar erai yenika Satan, naarai ediakit Satan ameun kageunet. Kanuka ŋun ŋes etakanunia Okoku loka Edeke, tetere emudiari aswamisio nuka Satan. 9 Ŋin kere yeneurio kama ejai Edeke mam iswamai adiakar, naarai esalit ekinyomitike tomakeŋ; ido mam epedori adiakar naarai keurio kama ejai Edeke. 10Kana ŋes etakanuniata idwe luka Edeke ka idwe luka Satan; ŋin kere yenimam iswamai nukadolit mam erai yenika Edeke, karaida yenimam emin onaceke. 11 Naarai na ŋes aitejenunet naipotu kopuput ameun kageunet, ebe, kaminanaros. 12 Mere kwape Kain, lokerai loka lokaronon, koar da onaceke: Ido kanukinyo kearia ŋes? Naarai keroko akeswamisio, kwabo kedolito nuka onaceke. 13 Sirikiwumokis, iinacan, arai kilaete akwapin. 14 Kijeni oni ebe kipou kanyoutu katwanare alomar aijar, naarai kimina iinacan. Yenimam emin esalit toma atwanare. 15 Ŋin kere yenelai onaceke, erai ikaaran, ijenete da ebe emamei ikaaran kere yenesalit aijar naka ikar kere tomakeŋ. 16 Kana ŋes kijenunia amin, naarai abu ŋol kopal akeijar kanuwok; oni da kiburao aipal aijarawok kanuka iinacan. 17 Arai ejai yenejaas kiboro luka akwapin, kitei da onaceke iyarorotoi, egolokini da etauke kamakeŋ, ikwaikini ai esalakini amin naka Edeke tomakeŋ? 18 Idwe ludidik, kenyeis aminanara kakirot, karaida kaŋajep, dimarai kaswam ka abeit. 19Kana ŋes kijenunia ebe kirai luka abeit, kesicerededata da iwokotauon kakonyeneke, 20kama kitoroniata kere iwokotauon; naarai epol Edeke adepar iwokotauon, ejeni da kere. 21 Luminan, arai mam itauonowok kitoronete, kija katitiŋ neejai Edeke; 22 ŋin yenikilipi da kidumuni kamakeŋ, naarai kiricit aicorakinetake, kiswamai da nuisiyalamikinete kakonyeneke. 23 Na ŋes aicorakineteke, oni aiyuun ekiror loka Okokuke Yesu Kristo, kaminanaros da kwape kiinakinitor oni aicorakinet. 24 Ŋin yenericit aicorakinetake esalit tomakeŋ, ŋes da tomakeŋ. Kana ŋes kijenunia ebe esalit tomawok, kanuka Emoyo lokiinakinit oni.41 Luminan, sirikiyuut ŋolimoyo, konye kitemoto imoyon arai eraas luka Edeke; naarai alomasi inabin luipu lukeŋalak toma akwapin. 2 Kana ŋes ijenuniata Emoyo loka Edeke; ŋolimoyo loelimori ebe abu Yesu Kristo toma akuan, erai loka Edeke. 3 Ŋolimoyo da lomam elimori Yesu, mam erai loka Edeke, ŋol erai lokasurup loka Kristo, loipuput ebe ebunit, kwana da ejai toma akwapin. 4 Idwe ludidik, iraas yesi luka Edeke, ipikosi kes, naarai epol ŋol loejai tomakus adepar ŋol loejai toma akwapin. 5 Eraas kesi luka akwapin, kanuka ŋun inerasi nuka akwapin, iirarete da akwapin kes. 6 Kirai oni luka Edeke. Yenejeni Edeke kiirari oni, yenimam erai yenika Edeke mam kiirari oni. Kana ŋes kijenunia emoyo loka abeit ka emoyo loka apaar. 7 Luminan, kaminanaros, naarai amin erai naka Edeke, ŋin da kere yenemina eurio kama ejai Edeke, ejeni da Edeke. 8Yenimam emin mam ejeni Edeke, naarai erai Edeke amin. 9 Kana ŋes etakanunia amin naka Edeke mamawok, naarai abu Edeke kijuk Okokuke loteluna toma akwapin tetere kijari kanukeŋ. 10 Kana ŋes ejaar amin, mere ebe kimina oni Edeke, konye abu ŋesi komina oni, kijuk da Okokuke araun alucet naka adiakanaretawok. 11 Luminan, arai kimina Edeke oni kwaŋin, kiburao oni da aminanara. 12 Emamei cut ituŋanan yeneanyunit Edeke apaarasia kere; arai kiminanara, esalit Edeke tomawok, akemin da apoloor kotomawok. 13 Kana ŋes kijenunia ebe kisalit tomakeŋ, ka ŋes da tomawok, naarai abu koinak oni nuka Emoyoke. 14 Kianyunit, kitejenuni da ebe abu Papa kijuk Okokuke araun Eketajaran loka akwapin. 15 Arai elimori ituŋanan ebe Yesu ŋes Okoku loka Edeke, esali Edeke tomakeŋ, ŋes da toma Edeke, 16Kijeni, kipou keyuut da, amin naejai Edeke mamawok. Edeke ŋes amin; ŋin da yenesalit toma amin, esalit toma Edeke, Edeke da esalit tomakeŋ. 17 Kana ŋes apolooror amin nepepe kaoni, tetere kija katitiŋ kapaaran naka aitub akiro; naarai kwape eraar ŋesi, kirai oni da kwaŋin toma akwapin nu. 18Emamei akurian kotoma amin, naarai amin naapoloor ireŋeari akurian. Naarai ejai akurian aiticanio, yenekuriana da mam epolooro kotoma amin. 19Kimina oni, naarai ŋes kigei amin oni. 20Arai inera ituŋanan ebe, “Amin Edeke,” kolaite da onaceke, erai ikeŋalan. Naarai yenimam emina onaceke loeanyunit, mam epedori amin Edeke lomam eanyunit. 21 Ejai da oni aicorakinet na kamakeŋ, ebe yenemina Edeke, komina da onaceke.51Ŋin kere yeniyuunit ebe Yesu ŋes Kristo, eurio kama ejai Edeke, ŋin kere da yenemin ikaurian emin ŋin yeneuriei ŋesi. 2Kana ŋes kijenunia ebe kimina idwe luka Edeke, nakiminar Edeke, kiswamai da aicorakinetake. 3Naarai na ŋes amin naka Edeke, ebe kiricit aicorakinetake. Ido mam aicorakinetake elaŋir. 4Naarai ŋin kere yeneurio kama ejai Edeke ipikori akwapin; na ŋes aipikor naipikori akwapin, aiyuuniwok. 5Iŋai bo ipikori akwapin, dimarai yeniyuunit ebe Yesu ŋes Okoku loka Edeke? 6Ŋes ŋol loabu kobu kanuka akipi ka aokot, Yesu Kristo; mere kotoma akipi bonik, konye kotoma akipi ka aokot da. 7Erai Emoyo ekajenan, naarai erai Emoyo abeit. 8Ejaas ikajenak iuni, Emoyo, ka akipi, ka aokot da; acamanara iuni kidiopet. 9Arai kicamuni aitejenunet naka ituŋa, epol aitejenunet naka Edeke adepar, naarai na ŋes aitejenunet naka Edeke naitejenunit nuka Okokuke. 10Yeniyuunit Okoku loka Edeke ejai aitejenunet tomakeŋ, Yenimam iyuunit Edeke, etuluo ŋes ekeŋalan, naarai mam abu kiyuu aitejenunet naitejenunit Edeke nuka Okokuke. 11Na ŋes aitejenunet ebe, abu Edeke koinak oni aijar naka ikar kere, ejai da aijar ŋin toma Okokuke. 12Yenejai Okoku, ejai da aijar; yenemamei Okoku loka Edeke emamei aijar. 13Kewadikak yes nu tetere ijenete ebe ejai yes aijar naka ikar kere, ŋul luiyuunito ekiror loka Okoku loka Edeke. 14Na da ŋes atitiŋ nakija kaoni kamakeŋ, ebe, arai kiilip ibore kwape ejaar akoteke, kipupuni ŋesi oni. 15Arai kijeni ebe kipupuni ŋesi oni, ŋin kere yenikilipi, kijeni ebe kidumu iboro lukilipit kamakeŋ. 16Arai keanyu ituŋanan onaceke kediakaa adiakaret namere naka atwanare, ilipi, einakini Edeke ŋes aijar kanuka ŋul lumam ediakarito kiton atwanare. Ejai adiakar naka atwanare; mam enera ebe kilipakinai ŋin. 17Amamus adolit kere ŋes adiakar, ejai da adiakar namere naka atwanare. 18Kijeni ebe ŋin kere yeneurio kama ejai Edeke mam ediakari, konye loeurio kama ejai Edeke ericit ŋes, mam lokaronon etirori ŋes. 19Kijeni ebe kirai luka Edeke, iboiete da akwapin kere kotoma lokaronon. 20Konye kijeni ebe abu Okoku loka Edeke, abu koinak oni ajenun tetere kijeni ŋol loerai abeit, kija oni toma ŋol loerai abeit, toma Okokuke Yesu Kristo. Ŋol ŋes Edeke lokabeit, aijar da naka ikar kere. 21Idwe ludidik, kidarasi bonik kama kaputosia. |