Ateso
1 Ikorinton
1
1Paul, lokenyarao araut ekiyakia loka Kristo Yesu kanuka akot naka Edeke, ka Sosetene onace. 2 Mama ejai ekanisa loka Edeke loejai Korinto, ŋul lukitalaunio kotoma Kristo Yesu, lukenyarao koraut lukalaunak, nepepe kaŋul kere luiwoneto ekiror loka Ejakaitiwok Yesu Kristo kaŋiniibois, loerai Ejakaitikec ka lowok da:
3 Kojai asianut mama ijaas, ka ainapakin nuepote kama ejai Edeke Papawok ka Ejakait Yesu Kristo.
4Emalaenenei Edeke tiritir kanukus, kanuka asianut naka Edeke nakiinakinio yes, kotoma Kristo Yesu. 5Naarai aponi kitabari yes kaŋolipone kotomakeŋ, kotoma akiro kere ka aijen da kere 6kwape kitogogoŋere aitejenunet naka Kristo kotomakus, 7 tetere mam itwakiarete amodioinakinet kere, idarete apukorio naka Ejakaitiwok Yesu Kristo; 8 loitogogoŋi yes kiton awasia, komamei aitoronio kapaaran naka Ejakaitiwok Yesu Kristo. 9 Erai Edeke lomunot, lokinyarauni yes alomun oidicane loka Okokuke, Yesu Kristo Ejakaitiwok. 10 Aso iinacan, keŋaiŋait yes, kokiror loka Ejakaitiwok Yesu Kristo, ebe kinerata kere adiopekirot, kinye atiakatiakaun ajaun kidiŋikus, konye kidicakina ketau ediopet ka ainerun da adiopet. 11Naarai, ikainacan, kalimokis eoŋ lukokale loka Kloe, ebe ejai aŋolopa kidiŋikus. 12 Aso naabala nata ebe, ebala ŋinidiopet kayesi ebe, “Arai eoŋ yenika Paul,” ice da ebe, “Konye eoŋ yenika Apolo,” ka ice da ebe, “Arai eoŋ yenika Kepa,” ka ice da ebe, “Arai eoŋ yenika Kristo.” 13Okwe, etiakatiaka kereka Kristo? Ibubukinitoi kereka Paul kanukus? Arai bo iponi kibatisai kokiror loka Paul? 14 Emalai naarai mam ebatisat idio kayesi dimarai Keresipo ka Gaio; 15kinyek idiotuŋanan atemar ebe aponi kibatisai kokirorikaŋ. 16 (Abu kebatis da lukokale loka Sitepan, Alemar ŋul mam ajeni arai abu kebatis ice kere.) 17 Naarai mam Kristo keyakit aibatis, dimarai alimonokin Akiro Nukajokak, kwabo mere kacoa naka akirot, kinyek emusalaba loka Kristo araun aamameak. 18 Naarai akirot naka emusalaba erai abaŋaanut kama ejaas lueoliorete, konye mama kija oni lukitajario erai apedor naka Edeke. 19 Naarai iwadikatai ebe,
“Amudiari acoa naka lukacoa, Etapalauni da apirianut naka luepiriaka.” 20 Ai bo ejai lokacoa? Ai bo ejai ekewadikan? Ai bo ejai eketepegan loka ikar kalu? Mam kereka Edeke abu kitababaŋ acoa naka akwap? 21 Naarai kotoma acoa naka Edeke, mam akwap abu kojen Edeke kanuka acoa, abu kisiyalamik Edeke aitajar luiyuunito kotoma abaŋaanut naka akirot naelimonokinio. 22 Naarai ekotosi Iyudayan aanyuneta, Iyonanin da emootos acoa, 23 konye sio kilimonokini Kristo loebubukinitoi, loerai aitiguikinet mama ejaas Iyudayan, abaŋaanut da mama ejaas Imo, 24 konye mama ejaas ŋul luenyaritai, Iyudayan ka Iyonanin da, erai Kristo apedor naka Edeke, ka acoa da naka Edeke. 25 Naarai abaŋaanut naka Edeke erai acoa aitelekarit naka ituŋa, akalanyanut da naka Edeke egogoŋ aitelekarit naka ituŋa. 26 Naarai, iinacan, koomito anyarauniokus, ebe mam luipu kayesi keraas lukacoa kwape ejaar aitemis naka akwap, mam ipu lukapedor, mam ipu lukapolou da luenyaraunitai, 27konye abu Edeke koseu lukabaŋaanut luka akwap tetere isurumi lukacoa ileic; bobo da abu Edeke koseu luekalanyaka luka akwap tetere isurumi lukagogoŋok ileic; 28bobo da abu Edeke koseu imukopin, ka luemwaŋitai kotoma akwap, eebo, ka iboro da luemameete, tetere itamamauni ŋul luejaas, 29 kinyek idiotuŋanan aolobobot kakonyen nuka Edeke. 30 Konye kanukeŋ ijaut yes toma Kristo Yesu, loabu Edeke kituluo awokocoa, ka adolit, ka aitalaunio, ka alakunio da; 31 kanuka ŋun kwape iwadikatere ebe, “Yeneolobobot, koolobobote kotoma Ejakait.”
2
1
Eoŋ da, iinacan, naabunio mamakus, mam abunit alimonokin yes nukaiyeiyea nuka Edeke kakiro nuejijim karaida kacoa. 2
Naarai abu kenerunite ainyein ajenun adiokirot kokidiŋikus, dimarai Yesu Kristo loebubukinitoi. 3
Eoŋ da naajaar mamakus, akalanyana, kakurian ka amaran naepol; 4akakirot ka akalimonokin da mam keraas akiro nukacoa nuijodoete, dimarai nuitodiarito Emoyo ka apedor, 5
tetere akusiiyuun mam egoŋakina acoa naka ituŋa dimarai toma apedor naka Edeke.
6
Konye ejai acoa nakinera kama kaluapolokoto konye mam erai acoa naka ikar kalu, karaida naka ikayaitok luka ikar kalu, luepote amameun, 7
konye kinera acoa naka Edeke kotoma nukaiyeiyea, acoa naibwaitai, nakicorakinit Edeke eriŋa ikar ejauna, kanuka aibusesuwok. 8
Mam ikayaitok luka ikar kalu apotu kojenut ŋin; naarai arai kejenete timam kibubukis Ejakait lokaibuses. 9
Konye kwape kiwadikatere ebe,
“Numam keanyunit akoŋu, karaida akit aibiun,
Numam kelomarito da otau loka ituŋanan
Nuetia nen nukitemokinit Edeke lueminasi ŋes.”
10
Konye kipukok Edeke oni kanuka Emoyo. Naarai irerei Emoyo kere, kiton nuidulok nuka Edeke. 11Naarai iŋai tope kotuŋa yenejeni aomisio nuka ituŋa, dimarai emoyo loka ituŋanan loejai kotomakeŋ? Kwape kwaŋin emamei yenejeni aomisio nuka Edeke dimarai Emoyo loka Edeke. 12
Konye oni, mam kidumunit emoyo loka akwap, dimarai Emoyo loebuni kama ejai Edeke, tetere kijenuni ainakineta nukiinakini Edeke oni atitai. 13
Kinera ŋun mere kakiro nuisisianakini acoa naka etuŋanane, dimarai nuisisianakini Emoyo, kitiiriani nuka emoyo kanuka emoyo.
14
Ituŋanan kauruuneteke mam ecamuni akiro nuka Emoyo loka Edeke, naarai eraas nukabaŋaanut mamakeŋ, kwabo mam epedori ajenun kes naarai emisiikinio kanuka emoyo. 15
Konye ituŋanan yenika emoyo emisiikini kere, kwabo emamei yenemisiikini ŋes. 16
“Naarai iŋai kereka ejenunit aomisio nuka Ejakait, tetere ituutoori ŋes?” Konye kijaa oni kaomisio nuka Kristo.
3
1
Eoŋ da, iinacan, mam apedorit einer kayes kwape luka emoyo, dimarai luka akuan, kwape imukerun kotoma Kristo. 2
Abu ketamata yes akile, kwabo mere inyamat; naarai mam ipedorito; eebo, kiton kwana da mam ipedorito, 3
naarai iriŋa iraas luka akuan. Naarai naejaar ekokote ka aŋolopa, mam kereka iraas ituŋa luka akuan, ilosenenete kwape ituŋa atai? 4
Naarai naebalar idiopet ebe, “Arai eoŋ yenika Paul,” ice da ebe, “Arai eoŋ yenika Apolo,” mam kereka iraas ituŋa atai?
5
Aso iŋai bo Apolo? Iŋai bo da Paul? Kes ikejaanakinak lukiyuunete yesi kamakec, ka ŋin diopet da kwape keinakinia Ejakait. 6
Abu eoŋ kera, kicoco Apolo, konye kitopolo Edeke. 7Kwaŋin ekeraan mam erai ibore, karaida ekecocoan, dimarai Edeke loitopoloi. 8Aso loirai ka loicocoi eraas ipe, ido edumuni ŋinituŋanan ekeropit kwape ajaar akeitaaritoi. 9
Naarai kirai isio ikeswamak nepepe ka Edeke; iraas yesi amana naka Edeke, aduket naka Edeke.
10
Kwape ejaar asianut naka Edeke nakainakinitai eoŋ, abu kapesik apetetait kwape ekadukon lokapolon lokacoa, konye eduki ece. Konye kocoite ŋinidiopet kwape edukio. 11
Naarai emamei yenepedori apesikin apetetait ace, dimarai ŋin naedaunitai apesikin, ŋes Yesu Kristo. 12Konye arai keduk ituŋanan toma apetetait ŋin esabu, arai epuesa, arai amor nuketiai, arai akito, arai anya, arai ariaŋ da, 13
etakanuni aswam naka ŋinituŋanan; naarai isideleleuni Apaaran, naarai epukorio kotoma akim, itemi da akim aswam naka ŋinituŋanan kwape ejaar. 14Arai esalit aswam naedukit ituŋanan toma apetetait, edumuni ŋesi eropit. 15Arai kidopoo aswam naka ituŋanan, etwaniari, kwabo itajario ŋes, konye bala kotoma akim.
16
Mam kereka ijenete ebe iraas yesi eyekalu loka Edeke, ebe da iboie Emoyo loka Edeke kotomakus? 17Arai kemuna ituŋanan eyekalu loka Edeke, emunaari Edeke ituŋanan ŋin. Naarai erai eyekalu loka Edeke lokalaunan, ŋes yesi.
18
Sirikemodakin ituŋanan. Arai ejai kotomakus ituŋanan yeneomit ilopet araut yenikacoa kokar kalu, korau ŋesi yenibaŋ, tetere eraun yenikacoa. 19
Naarai acoa naka akwap kana ŋes abaŋaanut kama ka Edeke. Naarai iwadikatai ebe,
“Ikamuni ŋesi lukacoa koboteikec.”
20
Bobo da ebe, “Ejeni Ejakait aomisio nuka lukacoa, ebe eraas aamameak.” 21Kwaŋin kinyek ituŋanan aolobobot kotoma otuŋa. Naarai eraas kere lukus, 22arai Paul, arai Apolo, arai Kepa, arai akwap, arai aijar, arai atwanare, arai nuejaas kwana, arai nuepote, kere eraas nukus, 23iraas yesi da luka Kristo, Kristo da loka Edeke.
4
1
Koomit ituŋanan sio kwanata, kwape ikejaanakinak luka Kristo, ka ikeŋadak da luka nukaiyeiyea nuka Edeke. 2
Bobo da iburao ikeŋadak atakan eraas lumunon. 3Konye kamakaŋ erai akirot naedit noi yes, arai airabet kere naka etuŋanan, atubokin eoŋ. Mam da atubokin bon. 4
Naarai mam ajeni nuewosakin bon, konye mam kemarakinio adolit kanuka ŋun, konye Ejakait ŋes katubokini. 5
Aso sirikitubo akirot eroko apak, aitodol naebunio Ejakait, loitacauni nuibwaitai nuka amuton, ido isideleleuni ainerun naka itauon. Kosodi edumuni ŋinituŋanan akeiturio kama ejai Edeke.
6
Aso iinacan, etuputoo ŋun aputokaŋ ka Apolo da kanukus, tetere kanukosi isisiaete ainyein adepar nuiwadikatai, kinye idio kayesi adakanun kanuka ediopet aitelekarit loce. 7
Naarai iŋai kitegelikinit jo kama kaluce? Inyoin kereka ejai jo yenimam kiinakinitai? Konye arai kiinakinitai, kanukinyo iwolobobotor bala mam kiinakinitai?
8
Idaut aimonikin! Idaut adumun abar! Iyaitos kamameete isio!
Eebo, arai tiiyaito, tetere kimori ayait kayes! 9
Naarai aomit ebe etodia Edeke sio ikiyakia awasia, kwape ituŋa luetubokinitai aario: naarai kiraun isio ibore yenisesena kakwap, kama ka imalaikan ka ituŋa da. 10
Kirai isio ibaŋiok kanuka Kristo, konye iraas yesi lukacoa kotoma Kristo, Kikalanyaka isio, konye igogoŋ yesi. Kitubusikinitai yes, konye sio kitisilitoi. 11
Kiton osawa lo da, kiriebi eteŋei ka akure da, kimujalal, kibuŋao, bobo da emameete sio ireria, 12
kitaaritoi aswam kakaninikosi. Nakimoromoroere, kilipanakini arereŋ; nakiticanere, kititiŋikinit; 13
nakisabanakinere, kiŋaiŋai; kitusubi bala asusuj nuka akwap, ediirit da loka iboro kere, kiton kwana.
14Mam ewadikai nu aisurumia yes ileic, konye aikwenyar yes kwape idweka luminan. 15
Karaida kejaas yes ikesisianakinak ilukumin itomon kotoma Kristo, konye emameete lukapapa luipu. Naarai eoŋ ŋes kaurit yes kotoma Kristo Yesu kanuka alimonokin Akiro Nukajokak. 16
Aso keŋaiŋait yes koputoorito eoŋ. 17
Kanuka ŋun ejuk Timoteo mamakus, loerai okokuka lominat, lomunot da kotoma Ejakait, lokisiituni yes irotinika luejaas toma Kristo, kwape esisianakinia kaŋiniibois kotoma ŋolikanisa. 18Konye edakanunos ice kayesi ebe mam abuni mamakus. 19
Konye abuni atipet mamakus, arai ekot Ejakait, abuni eoŋ ajenun mere akiro nuka ŋul kaluedakanunos dimarai apedorikec. 20
Naarai mam ajakanut naka Edeke ejai toma akirot, dimarai toma apedor. 21Ikotosi anyoika? Kabu kereka mamakus kebela, arai bo kabu kamin komoyo loiyapepera?
5
1
Isiarakina eemut ebe ejai adoteu kotomakus, adoteu da namam ejauna kotoma atekerin; ebe etuŋanan ajaut kaberu naka papake. 2Yes da idakanunos, kwabo mam kikadakinit, tetere elemario kokidiŋikus ŋol lokiswamai akirot ŋin.
3
Naarai, karaida amamei kakuan, konye ajai komoyo, adau eoŋ elopet atubokin ŋol lokiswamai akirot ŋin kwape tikajaar, 4
kotoma okiror loka Ejakait Yesu, naitukonokinotor nepepe ka ekamoyo, ka apedor da naka Ejakaitiwok Yesu, 5
kijaikis ŋol Satan tetere emudiario akuanake, tetere itajario emoyoke kotoma apaaran naka Ejakait Yesu.
6
Mam aolobobokus ejok. Mam kereka ijenete ebe aitubuunet naedit itubuuni aluŋuret kere? 7
Kitesegaaros do kaitubuunet namojoŋ, tetere iraunos aluŋuret nakitetet, kwape iraatar lumam itubuuno. Naarai aponi Kristo Aleleŋewok koinakinai araut asubanit. 8
Aso karicata epucit, mere kaitubuunet namojoŋ, karaida kaitubuunet naka ameŋeranut ka aronis, dimarai ka namam itubuuno naka aipioror naka emoyo ka abeit.
9
Abu kewadikak yes kotoma obaluaka ebe sirikimorianakinos kidotea; 10mam abala ebe kinacata cut idotea luka akwapin kanu, arai ikeraŋak, arai ikaŋatak, karaida ŋul luemaete aputosia, naarai arai kerai kwaŋin ti ibusakinit anyoun kakwapin kanu. 11
Konye kwana kewadikakini yes ebe sirikimorianakinos kaloenyaritai onac arai erai edote, arai ekeraŋan, arai loemai aputosia, arai ekamoromoron, arai ekameran, arai ekaŋatan; etuŋanan loikoni kwaŋin mam acamunit yes karaida aimor kaŋes. 12
Naarai anyoin ajokis kamakaŋ atubokin luejaas kiŋa? Mam kereka yes itubokinito luejaas toma okanisa? 13
Konye etubokini Edeke ŋul luejaas kiŋa, Kireŋeasi yesi ekaronon ŋol loejai kidiŋikus.
6
1Arai ejai edio kayesi akirot kama ka onaceke, ijecekini kereka ŋesi aosan ŋes kakonyen nuka lumam edolito, kwabo mere kakonyen nuka ikalaunak? 2
Arai bo mam ijenete ebe etubokinete ikalaunak akwapin? Aso arai itubokinete yesi akwapin, mam kereka ipedorete aitub akiro nuedisiak noi? 3Mam kereka ijenete ebe kitubokini imalaikan? Kikurwokinito biai akiro nuka aijar kana! 4Aso arai ijaas kaitub akiro nuka aijar kana, idakakinete kereka lumam eomitai kokanisa araut ikatubok? 5Enera ŋun aisurumia yes ileic. Emamei kereka kotomakus lokacoa ediopet, loepedori aitub akiro nuka iinacanake, 6konye iwosanakinos iinacan bonik, bobo da kakonyen nuka lumam iyuunito.
7
Aso kwana ejai aŋwal kotomakus, naarai iwosanakinos bonik, Kanukinyo gwai mam kikonakinere erono? Kanukinyo gwai mam kinasere iborokus. 8Konye yes ikonakinete erono, ido iŋasete, kiton iinacanakus da.
9Mam kereka ijenete ebe lumam edolito mam irumete ajakanut naka Edeke? Sirikiŋalas; karaida idotea, karaida luemaete aputosia, karaida lueeloko, karaida ikiliok luituluoros bala aŋor, karaida iketepak ikiliok, 10
karaida ikokolak, karaida ikeraŋak, karaida ikamerak, karaida ikamoromorok, karaida ikaŋatak, mam irumete ajakanut naka Edeke. 11
Ice kayesi da ipotu koraas kwaŋin; konye aponi kilotar, konye aponi kitalaun, konye aponi kitojoki araut luidolito, kokiror loka Ejakait Yesu Kristo, kotoma Emoyo da loka Edekewok.
12
“Ibus iboro kere kamakaŋ”; konye mam iboro kere isigalikinete.
“Ibus iboro kere kamakaŋ”; konye mam ketubulesene idiobore. 13
“Eraas inyamat luka akoik, akoik da naka inyamat” itapalauni Edeke kere, ŋin ka ŋul da. Mam akuan erai naka adoteu, dimarai naka Ejakait, Ejakait da loka akuan. 14
Konye abu Edeke kitajar Ejakait, kitajari oni da kapedorike. 15
Mam kereka ijenete ebe eraas awatekus atutubeta nuka Kristo? Aso kalema kereka atutubeta nuka Kristo, ketaraut atutubeta nuka naadote? Madi akuj! 16
Arai mam kereka ijenete ebe lokirotakinos kanaadote eraas adiopetekuan? Naarai ebala ebe, “Ŋul luarei eraunos adiopetekuan.” 17
Konye ŋol lokirotakinos ka Ejakait, erai emoyo ediopet kaŋes, 18Kinacata adoteu, ŋinidiakaret naiswamai ituŋanan erai nakokiŋa akuanake; konye ŋin yenedotei adiaka kotoma akuanake alopet. 19
Mam kereka ijenete ebe awatekus kes eyekalu loka Emoyo Lokalaunan loejai tomakus, lokiinakini Edeke? Mam iraas kanukus; 20
naarai kigwelitai kakais nuipu. Aso kitopolooritos Edeke kotoma awatekus.
7
1Konye nuka akiro nuipotu kiwadikakis eoŋ. Ejok kama kekiliokit kinyek atiror aberu. 2Konye kanuka adoteu, kojau ŋolikiliokit kakeberu, ŋiniberu da kokilenike. 3Kotacak ŋolikiliokit akeberu nuibusakinito ŋes, kwape kwaŋin da kotacak ŋiniberu nuibusakinito okilenike. 4Mam aberu alopet eyait akekuan, dimarai okilenike; kwape kwaŋin da mam ekiliokit elopet eyait akekuan, dimarai akeberu. 5Sirimikanaros bonik, alemar diat icamanaros adaun apak, tetere iluŋakinos ailip; kosodete konyet aimorikikin bobo, kinyek Satan acodun yes kanuka amamus ayaikina. 6Enera ŋun kacamun, kwabo mere kaicorakinet. 7
Konye emiela ituŋa kere araut kwape kaeoŋ elopet. Konye ejai ŋinidiopet ainakineteke naebuni kama ejai Edeke, idiopet kopone ece, idiopet da kopone ece.
8Konye alimokini lumam edukokina ka apuserun da, ebe ejok kamakec arai esalito kwape kaeoŋ. 9
Konye arai mam epedorete ayaikina bonik, kodukokinos. Naarai ejok adukokin itia ainok.
10
Ecorakini luedukokina, kwabo mere eoŋ, dimarai Ejakait, ebe, kinyek aberu aisac okilenike. 11Konye arai esaci, kosal mam edukokina, arai bo kopuco kokilenike. Bobo da kinyek ekiliokit aireŋear akeberu.
12Alimokini ice, eoŋ mere Ejakait, ebe, arai ejaas onace kaberu namam iyuunit, ecamuni ŋin da aiboienen kaŋes, kinyek aireŋear ŋin. 13Arai da ejaas aberu kekiliokit lomam iyuunit, ŋes da ecamuni aiboienen kaŋin, kinyek anyoun kama kokilenike. 14
Naarai italaunitai ekiliokit lomam iyuunit kanuka akeberu, aberu da namam iyuunit italaunitai kanuka okilenike. Arai mere kwaŋin tieraas ikusidwe lumam elaete, konye kwana eraas lukalaunak 15
Konye arai enyouni lomam iyuunit, konyou do ŋesi; kakiro nuikote nen mam onac arai kinac eenitai. Naarai abu Edeke konyarau oni toma ainapakin. 16
Ijo aberu, ijenuni biai, wolo bo itajari okilenikon? Ijo da ekiliokit, ijenuni biai, wolo bo itajari akoniberu?
17
Konye na bon, kolosenenei ŋinidiopet kwape kekorakinitor Ejakait, ŋinidiopet da kwape kenyaraunitor Edeke. Ecoranakini kwaŋin kotoma okanisan kere. 18Kenyaraunitai kereka etuŋanan ekepitai? Kinyek araun lomam ekepitai. Kenyaraunitai kereka etuŋanan lomam ekepitai? Kinyek akepio. 19
Naarai akepio mam erai ibore, amamus akepio da mam erai ibore, dimarai aricit aicorakineta nuka Edeke. 20Kosalak ŋolituŋanan kanyaraunio nakenyaraunere. 21Irai kereka ebulesit nakinyaraunere? Siripodo ŋun, Konye arai ipedori araun loeosikinitai, kitwasama gwai kwaŋin. 22
Naarai lokenyaraunio erai ebulesit, erai loeosikinitai loka Ejakait; kwape kwaŋin da lokenyaraunio erai loeosikinitai erai ebulesit loka Kristo. 23Aponi kogweli yes kakais nuipu; sirikiraut ibulesin luka ituŋa. 24Aso iinacan, kosal ŋinidiopet nepepe ka Edeke kwape kenyaraunere.
25
Nuka abekon emamei eoŋ aicorakinet naka Ejakait, konye kapesikis yes akiro kwape etuŋanan lomunot kanuka aitim naka Ejakait. 26Aomit eoŋ ebe kanuka ican luka tinenikwana ejok arai kesal ituŋanan kwape ejaar. 27Kirotakinitai kereka jo kaberu? Sirimoot alacakinio, Emamei kereka jo aberu? Sirimoot aberu. 28
Konye arai imanyi, mam idiakit, arai da edukokin apese, mam ŋin ediakit. Konye luikote nen eanyunete ican luka akuan, ido akoto aiyar yes ŋul. 29
Enera na, iinacan, ebe eŋoŋar apak; kanuka ŋun koraut luejaas kaŋor kwape kaluemameete, 30luemonyete da kwape kalumam emonyete, ka luiyalamasi kwape kalumam iyalamasi, luegwelete da kwape kaluemameete iboro, 31
luitwasamaete akwap koraut kwape kalumam itwasamaete, Naarai etubor epone loka akwapin kanu.
32Akoto yes koraut lumam iyaloŋoŋoete. Lomam emanyi iyaloŋoŋoi akiro nuka Ejakait, kwape epedoria aitelel Ejakait; 33
konye loamanyit iyaloŋoŋoi akiro nuka akwapin, kwape epedoria aitelel akeberu, 34ido ejai atiaket. Aberu namam edukokinitai, arai bo apese, iyaloŋoŋoi akiro nuka Ejakait, tetere eraun nakalaunan toma akuanake ka omoyoke da. Kwabo naedukokina iyaloŋoŋoi akiro nuka akwapin, kwape epedoria aitelel okilenike. 35Enera ŋun kodumut yes ajokis, mam akoto ailok yes koic, dimarai aitetemikin nuibusakinito, kijaanakinete Ejakait komamei yenitapaari aomisiokus.
36Arai eomit etuŋanan ebe mam ikonakinit ejok naisinerit, arai imiela noi, ido ibusakinit, aso kiswama ŋesi kwape ekotor, komany ŋes, mam ediaki. 37Konye loicasit kotauke, komamei ibore yenitinaikinit, loepedori ayait akoteke, itogogoŋit da kotauke aricit naisinerit, iswamai ejok. 38Kwaŋin loemanyi naisinerit, iswamai ejok; lomam emanyi da iswamai ejok aitelekarit.
39
Irotakinio aberu kokilenike apak kere naejaria ŋol. Konye arai ketwana okilenike, eosikinitai adukokin loekot, konye toma Ejakait. 40Konye aomit eoŋ ebe iyalama aitelekarit arai esali kwaŋin, Ido aomit ebe ajai kEmoyo loka Ejakait.
8
1
Nuka asuban nueinakinitai aputosia; kijeni ebe, “Ejai sio kere aijen.”
Edakunun aijen, konye do eduki amin. 2
Arai eomit ituŋanan ebe ejeni akirot, eriŋa ejenuna kwape ibusakinitor ajenun. 3
Konye arai emina ituŋanan Edeke, ejeni Edeke ŋin.
4
Aso nuka inyamat lueinakinitai aputosia, kijeni ebe, “Aput mam erai ibore kakwap,” ido ebe, “Emamei Edeke dimarai ediopet.” 5
Ido karaida ejaas luemaikinitai idekesio arai toma akuj arai toma akwap, kwape ejaatar “idekesio” luipu ka “ijaka” luipu, 6
konye kamawok ejai Edeke ediopet bon, ŋes Papa, loeponiata iboro kere kamakeŋ, oni da kirai lukeŋ, ejai da Ejakait ediopet, Yesu Kristo, lokejauniata iboro kere, oni da kirai kanukeŋ.
7
Konye ajenun ŋin mam ejai otuŋa kere. Konye ice luenaikinito aputosia kiton kwana, enyamete bala iboro lueinakinio araut asuban mama ejaas aputosia; ido naarai ekalanyaka aomisiokec, emunaaros. 8
Mam inyamat kitojokaarete oni kakonyen nuka Edeke, Arai mam kinyami, mam kitwaniari, arai kinyami da mam kiyatakinio. 9
Konye kocoito kinyek akusipedor araun aitiguikinet mama ejaas luekalanyaka. 10Naarai arai keanyu ituŋanan jo loijai kaijen, iboikin ainyam toma abila naka aput, mam kereka aomisio nuka ŋol nuekalanyaka etitiŋikinete ainyam lueinakinio aputosia? 11
Kwaŋin eoliori loekalanyana kanuka akoniijen, ŋope ŋol onace loabu Kristo kotwanik. 12Ido kwaŋin naidiakanariata kama ejaas iinacanakus, ka aimusuŋ akeceomisio nuekalanyaka, idiakanaretc kama ejai Kristo. 13
Kanuka ŋun arai itiguikinete inyamat onaceka, abeit mam anyami akiriŋ ikar kere, kenyek aitiguikin onaceka.
9
1
Mam kereka eoŋ ejakakai? Mam kereka arai ekiyakia? Mam kereka eoŋ abu kaany Yesu Ejakaitiwok? Mam kereka yes iraas akaswam toma Ejakait? 2
Naarai arai mam eoŋ arai ekiyakia kama ka ice, konye arai ekiyakia kamakus; naarai iraas yesi aipucakinet naka ekiyakianekaŋ kotoma Ejakait.
3Ŋin ŋes aboŋokineteka mama ejaas ŋul lukeŋisete. 4
Emamei kereka sio apedor ainyam ka aimat? 5
Emamei kereka sio apedor aup kaberu naerai inac, kwape kikiyakia ice, ka iinacan luka Ejakait, ka Kepa da? 6Arai bo eoŋ bon ka Baranaba emamei apedor ainyein aswam? 7Eserikalet enyoin elosi ejie kotacakin ŋes elopet? Iŋai tope irai emusabibu komam enyami araitoke? Iŋai tope icokiei esipan komam emasi akile nuka esipan?
8Okwe enera kereka ŋun kotuŋanane? Arai bo mam inerasi ikisila ŋupe ŋun? 9
Naarai iwadikatai toma okisila luka Musa ebe, “Sirikien emoŋ loipudapudai aicom akima.” Epodo kereka Edeke imoŋin? 10
Arai bo inera ŋun kanuwok? Eebo, iwadikatai kanuwok, naarai ibusakinit ekakorion akor kamun, ekecoman da aicom kamun ebe edumuni ewaike. 11
Aso arai kiraikinit yes akiro nuka emoyo, erai ca akirot naepol arai kiidweny nukakuan kamakus? 12
Arai emorete ice apedor ŋin kamakus, mam kereka sio kitelekarit?
Konye mam kitwasamata apedor ŋin, dimarai kiŋirikinit akiro kere, kenyeis aitikokin Akiro Nukajokak nuka Kristo. 13
Mam kereka ijenete ebe luiswamaete aswam naka eyekalu enyamete koboro luka eyekalu, ka ŋul da luijaanakinete kotem ejaas kewaikec kotoma oboro luka etem? 14
Kwape kwaŋin icorakinit Ejakait ebe ŋul luelimonokinete Akiro Nukajokak, ejarete kanuka Akiro Nukajokak.
15
Konye mam eoŋ etwasamat akiro ŋun karaida adiopet. Kwabo mam ewadikat ŋun tetere ejaunete kwaŋin kamakaŋ. Naarai ejok eoŋ atwanare itia idiotuŋanan aitapalaun aoloboboteka. 16
Naarai arai alimonokini Akiro Nukajokak, emamei eoŋ naaolobobotor. Naarai ketiŋaikinitai. Itukwi eoŋ arai mam eoŋ alimonokini Akiro Nukajokak! 17
Naarai arai eswamai ŋun kakoteka, ejai aropio, konye arai mere akoteka, kamunoi kotoma ajokon. 18
Aso enyoin kereka ekaropit? Ŋes lota, ebe, kalimonok Akiro Nukajokak atai, komam etwasamai akapedor kere nakijaar kotoma Akiro Nukajokak.
19
Naarai karaida kaosikinitai kotuŋa kere, etuluoro ebulesit loka kere, tetere eriuni luipu aitelekarit. 20
Abu karau bala Eyudayat kama ejaas lyudayan, tetere eriuni Iyudayan; kama kaŋul kalueyaito ikisila, abu karau loeyaito ikisila-karaida mam eoŋ elopet kayaito ikisila-tetere eriuni lueyaito ikisila. 21
Kama kaŋul kaluemameete ikisila abu karau loemameete ikisila-mere ŋes amamuut kikisila kama ejai Edeke, konye aricit ikisila luka Kristo-tetere eriuni ŋul luemameete ikisila. 22
Abu karau ekalany kama ka luekalanyaka, tetere eriuni luekalanyaka. Karau lokiponesio kere kotuŋa kere, tetere korotin kere ketajar ice. 23Eswamai ŋun kere kanuka Akiro Nukajokak, tetere kimori ka ice kotomakec.
24
Mam kereka ijenete ebe lueboloboloete, eboloboloete kere, konye ediopet edumuni ainakinet? Aso koboloboloete tetere idumunete. 25
Yenepega kabolobol eyaikina kakiro kere. Iswamaete ŋul kwaŋin tetere edumunete aboko naemunaar, konye oni namam emunaar. 26Eoŋ da mam aboloboloi atitai, mam anaŋi da bala loenaŋi apak; 27
konye eticani akakuan, ketubulesen ŋes, kenyek kadau alimonokin ice, araun eoŋ elopet loeneritoi.
10
1
Naarai iinacan, akoto yes ajenun ebe abu edou kiteriborite lukapapaakos kere, kitoroto kere aŋolol, 2aponi kibatisai da kere kama ka Musa kotoma odou kotoma aŋolol da, 3
konyamata da kere inyamat luka emoyo, 4
ido komata kere numatan nuka emoyo. Naarai apotu komata kAtiiba naka emoyo naatupit kes, Atiiba ŋin da kerai Kristo. 5
Konye mam Edeke abu kolelakinite luipu kakesi; naarai aponi komudiarai kamodiŋ.
6
Aso keraas akiro ŋun aput mamawok, tetere mam kiraŋai nueroko, kwape kiraŋaata ŋul. 7
Sirikiraut luimaete aputosia, kwape ice kakesi; kwape kiwadikatere ebe, “Kiboikinos ituŋa ainyam ka aimat, kosodete konyout abolia.” 8
Kwabo sirikidoteata, kwape ice kakesi, kibiroros da ituŋa ilukumin akaisaarei ka luuni kapaaran adiopet. 9
Kwabo sirikikodut Ejakait, kwape kekoduniata ice kakesi, komudiasi imunwo. 10
Kwabo sirikirurumakis, kwape ice kakesi, komudia kes Ekamudiaran. 11
Aso akiro ŋun apotu kodoikis ŋul aikwenyar, iwadikatai aituutooria oni, lukidoloki awasia naka ikar. 12Kanuka ŋun kocoite ŋin yeneomit ebe ebwoi, kinyek aibiror. 13Emamei acodunet nakidoikini yes, namam erai naka ituŋa kere. Konye erai Edeke lomunot, mam ejalakini yes acodunio adepar nuipedorete, konye nenipe kacodunet itemokini neekuianara, tetere ipedorete atitiŋikin.
14
Kanuka ŋun, luminanaka, kinacata aima aputosia. 15Enera kayes kwape lukacoa; kotuboto yesi nuenera eoŋ. 16
Aikopo ŋin nakarereŋ nakilipakini arereŋ, mere kereka ŋes aimor kaokot nuka Kristo? Emugati ŋol lokibili, mere kereka ŋes aimor kakuan naka Kristo? 17
Naarai erai emugati ediopet, oni da lukipu, kirai akuan adiopet, naarai kimori oni kere emugati ediopet. 18
Koanyutu kwape kiswamaa Isirael; mam kereka eraas luenyamete asuban ikamorak luka etem? 19
Aso do enera anu? Luainakinitai aputosia eraas kereka ibore? Arai bo ebe erai aput ibore? 20
Mam, konye lueinakinete ikapirin, einakinete mama ejaas ajokin, kwabo mere Edeke. Eoŋ da mam akoto yes aimor kajokin. 21
Mam ipedorete aimat aikopo naka Ejakait, ka aimat da aikopo naka ajokin. Mam ipedorete aimor komesa loka Ejakait, komesa da loka ajokin. 22
Kisurumikereka oni Ejakait ekokote? Ejai tope oni agogoŋ aitelekarit nakeŋ?
23
“Ibusak akiro kere,” konye mam kere isigalikinete. “Ibusak akiro kere,” konye mam kere edukete. 24
Sirikemo ituŋanan akejokis bon, konye naka lucekeŋ. 25
Konyam ŋinibore kere yenegwelario kagwelaret naka akiriŋ, komam iŋisete kanuka abuonokin. 26
Naarai “erai akwap naka Ejakait, ka ailelebake.” 27
Arai kiinyara yes lomam iyuunit, ikotosi da alosit, konyamata ŋinibore yenibwaikinio kakonyenekus, komam iŋisete kanuka abuonokin. 28
Konye arai kiilimok ituŋanan ebe, “Ibore ŋin ainakinitai araut asubanit,” sirikinyama, kanuka ŋin yenikiitodikini yes, kanuka abuonokin da— 29abala eoŋ ebe kanuka abuonokin, mere nakus, konye nakeŋ. Naarai kanukinyo etubokinere akaosikinio kanuka abuonokin naka ice? 30
Arai amori kaimal, kanukinyo kamoromoroere kanuka ŋin yenemalai? 31
Aso arai inyamete arai imasete, arai iswamaete adiokirot kere, kiswamata kere kanuka aibuses naka Edeke. 32
Sirikitiguikis Iyudayan, karaida Iyonanin, karaida ekanisa loka Edeke, 33
kwape etalakaritor eoŋ kere kakiro kere, komam amoot akajokis dimarai naka luipu, tetere itajario
11
1
Koputoorito eoŋ, kwape eoŋ da aputoritor Kristo.
2Keturit yes naarai kiitunito eoŋ kakiro kere, ido iricito iponesio kwape kejaikinitor yes. 3
Konye akoto yes ajenun ebe erai Kristo akou naka ŋolikiliokit, ekiliokit da erai akou naka aberu, akou da naka Kristo ŋes Edeke. 4
Ŋolikiliokit loilipi arai loedwari kimukorite akouke, itisili akouke, 5Konye ŋiniberu nailipi arai naedwari komam akekou imukoro, itisili akouke. Naarai esubit bala ebarenitoi akouke. 6Naarai arai mam imukoro aberu, koŋera do itimake, Konye arai irumete aberu ileic abarenio arai aŋerio, kimukori do. 7
Naarai mam ibusakinit ekiliokit aimukorit akouke, naarai erai aput ka aibuses naka Edeke; konye aberu ŋes aibuses naka ekiliokit. 8
Naarai ekiliokit mam elomunit kama ka aberu, dimarai aberu kama kekiliokit. 9Ido mam aponi kosubai ekiliokit kanuka aberu, dimarai aberu kanuka ekiliokit. 10
Kanuka ŋun ibusakinit aberu ajaut kaimukoret akouke kanuka imalaikan. 11Kwabo toma Ejakait emamei aberu komamei ekiliokit, karaida ekiliokit komamei aberu. 12Naarai kwape kelomunia aberu kotoma okiliokit, kwape kwaŋin da euruunio ekiliokit kama ka aberu. Epote da iboro kere kama ejai Edeke. 13Kotuboto kanukus; ibus kereka aberu ailip Edeke komam imukoro? 14Mam kereka einono elopet kisisianak yes ebe, arai ipisi ekiliokit itimake eraas nukileic kamakeŋ? 15Konye arai eojak itima luka aberu, ŋes aibuses kamakeŋ? Naarai einakinitai itimake araparia. 16Konye arai ekot ituŋanan aitepeg, emamei sio epone loikoni nen, karaida ikanisan luka Edeke.
17Konye kaicorakinet kana mam keturit yes, naarai naitukonokinotor mam erai ajokis, dimarai aronis. 18
Nasodit, naarai naitukonokinotor okanisa, eira ebe ejaas atiaketa kidiŋikus, eyuunit da ace. 19
Naarai ibusakinit irioŋeta ajaut kotomakus, tetere etakanunete lukabeit kotomakus. 20Naitukonokinotor yesi mam erai tetere inyamete inyamat luka Ejakait, 21Naarai kotoma ainyamakus, eyaŋaari ŋinidiopet ikenyamat, kogei ainyam, idiopet da eriebi eteŋei, ice da emerikin. 22
Okwe emameete kereka yes itogoi neinyamiata, ka aimat? Arai bo imenete ekanisa loka Edeke, itisilete da luemameete iboro? Enera anu kayes? Keturit gwai yes? Mam keturit yes kanuka ŋun.
23
Naarai abu kadum kama ka Ejakait, ŋun nukejaikinit yes ebe, kakuare kaya nakebilakinere ebotet, abu Ejakait Yesu kolem emugati, 24kedau aimal, kobilibil; kotema atiar, “Lo ŋes akakuan naerai kanukus. Kiswamaenenete ŋun aiitunitor eoŋ.” 25
Kwape kwaŋin da kedaut ainyam, kirum akoli, kobala ebe, “Akoli na erai aitutuket nakitetet kotoma akaokot. Kiswamaenenete ŋun naimasiananata kere, aiitunitor eoŋ.” 26
Aso irwan kere nuinyamenenata emugati ŋol, arai imasenenata akoli ŋin, ilimorete atwanare naka Ejakait, aitodol naebunio ŋesi.
27
Kwaŋin ŋin yenenyami emugati arai yenemasi akoli naka Ejakait komam ibusakinit, egwaunit akiro nuka akuan ka aokot nuka Ejakait. 28
Konye koŋica ituŋanan ilopet, kosodi konyam nuka emugati, komat da nuka akoli. 29Naarai yenenyami ka aimat komam imisiikini akuan, enyami emasi da atubokinio. 30
Kanuka ŋun ipu kayesi luekalanyaka, ka luedekasi, ice da ajotooros. 31Konye arai kimisiikina bonik, mam kitubokinio. 32
Konye nakitubokini oni Ejakait, kilecorio, kenyeis aitelekario nepepe kakwapin. 33Aso do ikainacan, naitukonokinotor ainyam, kidareununos, 34arai ejai yeneriebi eteŋei, konyam korekeŋ; kinyek atukonokinikus atubokinio. Etetemi acekiro kere naabunio.
12
1Nuka ainakineta nuka emoyo, iinacan, mam akoto yes koolik aijen.
2
Ijenete ebe nairaatar ikapirin kitapaaritai mama ejaas aputosia numam ineras, kwape kiŋarenikinitere. 3
Kanuka ŋun ketejenuni yes ebe emamei ituŋanan yeninera kOmoyo loka Edeke ebe, “Kikenoi Yesu!” kwabo mam epedori ituŋanan atemar ebe, “Yesu ŋes Ejakait,” dimarai kOmoyo Lokalaunan.
4
Aso ejaas ainakineta nuegelegela, konye Emoyo ediopet; 5
ejaas da iponesio luegelegela luka aijaanakin, konye Ejakait ediopet; 6ejaas da iponesio luegelegela luka aswam, konye Edeke ediopet, loiswamai aswamisio kere toma kere. 7
Konye einakinio ŋinituŋanan apukokinio naka Emoyo akerianaror. 8Naarai einakinio idiopet akirot naka acoa kanuka Emoyo, ice da akirot naka aijen kanuka Emoyo ŋol, 9ice da aiyuun kanuka Emoyo ŋopeŋol, ice da ainakineta nuka aitaŋaleun kanuka Emoyo ŋol ediopet, 10
ice da aswamisio nuka apedor, ice da aidwar, ice da aitiak komoyon, ice da iponesio luka aŋajepa, ice da aijul aŋajepa. 11
Konye iswamai Emoyo ediopet aswamisio ŋun kere, ŋes ŋol loekorakini ŋinituŋanan kwape ekotor.
12
Naarai kwape eraar akuan adiopet, ejaas da atutubeta nuipu, kwabo atutubeta kere nuka akuan kaŋin, karaida kipu, eraas akuan adiopet, kwape kwaŋin Kristo da. 13
Naarai aponi kibatisai oni kere kotoma emoyo ediopet araun akuan adiopet, karaida Iyudayan, karaida Iyonanin, karaida ibulesin, karaida luijakakaete-aponi oni kere kitamasi Emoyo ediopet.
14Naarai mam akuan erai atutubet adiopet dimarai nuipu. 15Arai ketema akeju ebe, “Naarai mam eoŋ arai akan, mam eoŋ arai naka akuan,” mam ŋun itamamaunete ŋes kakuan. 16Ido arai ketema akit ebe, “Naarai mam eoŋ arai akoŋu, mam eoŋ arai naka akuan,” mam ŋun itamamaunete ŋes kakuan, 17Arai kerai akuan kere akoŋu, ti kereka aiirar ejai bo ai? Arai kerai akuan kere akit, ti kereka aiŋuun ejai bo ai? 18Konye do kwana ibwaikinit Edeke atutubeta, ŋinidiopet kakesi toma akuan kwape akotor. 19Arai keraas kere atutubet adiopet, ti kereka akuan ejai bo ai? 20Konye kwana ejaas atutubeta nuipu, konye akuan adiopet. 21Mam epedori akoŋu alimokin akan ebe, “Mam eoŋ kepuda jo,” karaida akou alimokin akeje ebe, “Mam eoŋ kepuda yes.” 22Konye aitelekarit noi, atutubeta nuka akuan nueomitai araut nuekalanyaka aitelekarit, ipudai noi, 23atutubeta da nuka akuan nueomitai araut numam ibusak, ŋupeŋun kiinakinit aibuses noi, atutubetawok da nuemamei ajokis, ejai ajokis aitelekarit, 24namam atutubetawok nuejaas ajokis ipudasi. Konye abu Edeke kimorikik akuan, kaitubusikin noi atutubet naiŋoŋara, 25tetere mam ejaun atiaketait kakuan, konye kiŋaranakinos atutubeta bonik ka bonik. 26Arai keriebakin atutubet adiopet, koriebakinos nuce kere kaŋes; arai kitopoloor atutubet, kolakaros atutubeta kere kaŋes.
27
Aso iraas yesi akuan naka Kristo, ka atutubetake, ŋinituŋanan kanukeŋ. 28
Ido ebwaik Edeke ice toma oKanisa, lusodit ikiyakia, lukiareit inabin, lukiwuniet ikesisianakinak, kosodete ikeswamak nukapedor, kosodete lueinakinitai aitaŋaleun, ikeŋarakinak, ikayaitok, ka iponesio luka aŋajepa da. 29Eraas kereka kere ikiyakia? Eraas kereka kere inabin? Eraas kereka kere ikesisianakinak? Iswamaete kereka kere nukapedor? 30Ejaas kereka kere ainakineta nuka aitaŋaleun? Inerasi kereka kere aŋajepa? Ijulete kereka kere? 31
Kimielas noi ainakineta nukapolok.
Ido ketodikinete yes erot loitelekarit noi ajokis.
13
1Arai kener kaŋajepa nuka ituŋa ka nuka imalaikan, kwabo emamei eoŋ amin, arai ibore yeneruo arai aisinin nueruos tai. 2
Bobo da arai ajai kaidwar, ajenuni da nukaiyeiyea kere, ka aijen kere, arai da ajai kaiyuun kere naepedori aitwobot iroŋan, komamei eoŋ amin, mam arai ibore. 3
Bobo da arai kakorak ikaboro kere aitanyamia lukican, bobo da arai kainak akakuan aicweikinio, komamei eoŋ amin, emamei adiojokis.
4Eŋirikinit amin, esiana amin; mam amin ikokoteono, mam epogana, mam edakunun, 5
mam iswamai numam ibusakinito, mam emoot nuke bon, mam itunyunyurikinio, mam eliliei, 6
mam elelakinit numam edolito, konye elelakinit abeit. 7
Etitiŋikinit amin kere, iyuunit kere, emuno kere, ikanyi kere.
8
Mam amin enaŋi cut; konye kejai aidwar itapalaunio; kejaas aŋajepa, enaŋete; kejai aijen, itapalaunio. 9Naarai kijeni nuikidioko, kidwari da nuikidioko, 10konye naejaunia naitekoro, itapalaunio do nuikidioko ŋun. 11Naaraar ikoku, abu kenera bala ikoku, kajeni bala ikoku, kaomoomoi bala ikoku; naapolooror ketapalau nukeiditeu. 12
Naarai kwana kiseseni karoet kowariwari, konye kapak kaŋin kisesena kakonyen; kwana ajeni nuikidioko, konye kapak kaŋin ajenuni noi kwape kajenunere noi. 13
Aso kwana esalete aiyuun, ka amun, ka amin, ŋun auni; konye naepol aitelekarit kaŋun ŋes amin.
14
1
Kotupasi amin, kimielasi noi ainakineta nuka emoyo, konye aitelekarit tetere ilimonokinete, 2Naarai yeninera kaŋajepa mam ineras kituŋa dimarai ka Edeke, naarai emamei yenepupuni konye inera nukaiyeiyea kotoma Omoyo. 3Konye ŋin yenelimonokini ineras kituŋa nuedukete ka nuitalakarete, ka nuisicerededete da. 4Yeninera kaŋajep eduko bon, konye yenelimonokini eduki ekanisa. 5
Akoto yes kere einer kaŋajepa, konye aitelekarit noi tetere ilimonokinete. Naarai yenelimonokini epol adepar yeninera kaŋajepa, alemar ejai yenijuli, tetere epedorio aiduk ekanisa.
6Aso iinacan, arai kabu mama ijaas, kener kaŋajepa, ketudumikini yes ajokis anyoin, dimarai kinera kayes kotoma apukokinio, arai korot loka aijen, arai kalimonokin, arai kaisisianakin? 7Iboro luemamei aijar lueruos, bala alamaru arai adeudeu, arai tope mam eruosi kiporotoi luegelegela, ikonakinio ai etiakunio yenekusio arai yeneramio? 8Arai da itorokok eporoto loka arupepe, iŋai bo ekapakin kanuka ejie? 9Kwape kwaŋin yes da; arai ineras kaŋajep akiro numam ideleleete, ikonakini ai akirot nainerasi ejenun kama ejaas luepupete? Naarai inerasi apak atai, 10Motoko ejaas iporotoi luka iponesio luipu akwapin, konye emamei loemamei apolou, 11Aso arai mam ajeni apolou naka eporoto kaŋol, araun bala emoit kama ejai yeninera, ka yeninera da eraun imoit kamakaŋ, 12Kwape kwaŋin yes da; naarai imielasi noi araut luka ainakineta nuka emoyo, komoata araut luitekoro kotoma aiduk ekanisa.
13Kanuka ŋun yeninera kaŋajep kilip aijul. 14Naarai arai kelip kaŋajep, ilipi ekamoyo, konye emameete akaomisio araito. 15
Aso anyoika bo do? Elipi kemoyo, elipi da kaomisio; ayei kemoyo, ayei da kaomisio. 16Arai imalai kemoyo, eboŋokini biai yeniboie kaibois naka yenemamei ainakineta ebe, “Amen,” naidaunia aimal, arai mam ejeni nuinera ijo? 17Naarai elemuni imalai ijo ejok, konye mam yenice edukio. 18Emalai eoŋ Edeke, naarai enera kaŋajepa adepar yes kere; 19konye kotoma okanisa akoto einer akiro akany kaomisioka, tetere esisianakini ice, itia einer akiro alukumin atomon kaŋajep.
20
Iinacan, sirikiraut idwe kotoma aomisiokus; konye kotoma aronis koraut imukerun, konye kotoma aomisiokus koraut luipolok. 21
Iwadikatai kotoma okisila ebe, “Ebala Ejakait ebe, Abuni einer kituŋa kalu kotuŋa luka aŋajepa ace, kaituke da nuka imo, karaida kwaŋin, mam keirarete eoŋ.” 22Aso eraas aŋajepa aanyunet mere mama ejaas luiyuunito, dimarai lumam iyuunito, konye alimonokin mam erai kanuka ŋul lumam iyuunito dimarai kanuka luiyuunito. 23
Aso arai etukokina ekanisa kere, kinerasi kere kaŋajepa, arai kelomasi luemameete ainakineta, arai lumam iyuunito, mam kereka ebalasi ebe kikerepiki yes? 24
Konye arai elimonokinete kere, kolom yenimam iyuunit, arai yenemamei ainakineta, itoronete ŋes kere, etubokinete ŋes kere, 25
ilepilepio nukaiyeiyea nukotauke; kwaŋin ibirori ebuburia, emai ŋesi Edeke, elimori ebe, “Abeit ejai Edeke kayes.”
26
Aso iinacan, anyoika bo? Nakitukokinotor, ejai ŋinidiopet ekosio, arai aisisianakin, ejai apukokinio, arai aŋajep, arai aijul. Kiswamas akiro kere kanuka aiduk. 27Arai inera ituŋanan kaŋajep, kinerata iarei arai iuni, mere adepar, bobo da kabeanakin; kijul da idiopet. 28Konye arai emamei yenikejulan, kililiŋ kotoma okanisa, kinerakin ilopet ka Edeke. 29
Kinerata da inabin iarei arai iuni, komisiikis luce. 30Konye arai kepukokin yeniboie akirot, kililiŋ yenisodit. 31Naarai ipedorete yesi kere alimonokin idiopet idiopet, tetere isisiaunete kere, kitalakarai da kere; 32korima emoyo loka inabin inabin. 33Naarai mam Edeke erai Edeke loka ecelet, dimarai loka ainapakin.
Kwape ejaar kokanisan kere luka lukalaunak, 34
kililiŋete aŋor kotoma okanisan. Naarai mam ecamakinitai einer, dimarai korimasi, kwape ebalatar ikisila da. 35Arai ekotos aisisiaun akirot kere, kiŋita ikiliokokec koreriakec, Naarai mam ibus aberu einer kokanisa. 36Kebuni kereka akirot naka Edeke kamakus, arai bo kidolokinit yes bonik?
37
Arai eomit ituŋanan ebe erai enabi, arai bo yenikemoyo, koŋic ŋun nuewadikakinit yes, ebe, eraas aicorakinet naka Ejakait. 38Konye arai emamei ituŋanan aijen, kojau kwaŋin. 39Aso ikainacan, kimielas alimonokin, sirikitikokinos einer kaŋajepa; 40
konye kiswamas akiro kere kwape ibusakinitor, ido kopone kaloejok.
15
1Iinacan, ketejenik yes Akiro Nukajokak nuabu kalimonok yes, nuipotu yesi kijaut, nuicasitotor da, 2kanuka ŋun da kitajario, arai kiricata noi akirot naabu kalimonok yes-dimikito iyuunito atai.
3
Naarai abu kejaik yes nusodit nuabu eoŋ da kejau, ebe abu Kristo kotwana kanuka adiakanaretawok, kwape ejaatar nuiwadikatai, 4
ebe da aponi konukai, ebe da aponi kitajarunai kapaaran kanakiwuniet, kwape ejaatar nuiwadikatai, 5
ebe da kitakanikin Kepa, kosodi lutomon kaluarei. 6Kosodi kitakanikin irwan atipet iinacan luadeparito akwat akany, luipu kotomakec ejarete kiton kwana, konye ajotooros ice. 7
Kosodi kitakanikin Yakob, kosodi ikiyakia kere. 8
Awasia naka ituŋa kere, abu ketakanikin eoŋ da, kwape ikoku yenikijecuna. 9
Naarai arai eoŋ loadit noi kokiyakia kere, lomam kebusakinit anyarao ekiyakia, naarai abu kemanite ekanisa loka Edeke. 10
Konye kanuka asianut naka Edeke arai kwape araar kwana, akesianut da mamakaŋ mam kerai naatitai; dimarai abu keyatak noi aswam adepar kes kere, kwabo mere eoŋ, dimarai asianut naka Edeke nakijaar. 11Aso arai kerai eoŋ, arai kes, kilimonokini kwaŋin, kwaŋin da ŋes ipotu kiyuuniata.
12Konye arai elimonokinio Kristo ebe aponi kitajarunai kokatwak, inerasi biai ice kayesi ebe emamei ajarun naka ikatwak? 13Konye arai emamei ajarun naka ikatwak, mam Kristo da itajarunitai. 14Konye arai mam Kristo itajarunitai, aso erai akosilimonokin atitai, akusiiyuun da atitai. 15
Ido kitakani kirai ikajenak luka Edeke lukeŋalak, naarai kitejenunit nuka Edeke ebe abu kitajar Kristo, lomam abu kitajar arai mam ikatwak itajarunio. 16
Naarai arai mam ikatwak itajarunio, Kristo da mam itajarunitai. 17Ido arai mam Kristo itajarunitai, erai akusiiyuun atitai, isalakinito toma adiakanaretakus. 18Ido ŋul da lukejotooros kotoma Kristo aoliosi. 19Arai kimunokina Kristo kotoma aijar kana bon, kirai lukitimitoi adepar ituŋa kere.
20
Konye kwana adau Kristo aitajarunio kokatwak, ŋes araito nugeet nuka ŋul kaluejotooros. 21
Naarai kwape ajaunia atwanare kanuka etuŋanan, kwape kwaŋin ajau da ajarun naka lukatwak kanuka etuŋanan, 22Naarai kwape etwakiata kere kotoma Adam, kwape kwaŋin ejarete da kere kotoma Kristo. 23
Konye ŋinituŋanan kwape ebeikinia: Kristo ŋes araito nugeet; kosodete naebunio ŋesi ŋul lueraas luka Kristo. 24
Kosodi edoluni esaŋe, naijaikinia ŋesi Edeke Papa ajakanut; naedaunia aitapalaun airumit kere, ka apolou kere ka apedor da. 25
Naarai ibusakinit ŋes airumit aitodol naicakakinia lukasurupoke kere kwap kakejeneke. 26
Lokasurup lokawasia amudiario ŋes atwanare. 27
“Naarai itononokikini Edeke iboro kere kwap kakejeneke.” Konye naetemaria ebe itononokikinio iboro kere, idelelei ebe mam elimunitoi ŋol lokitononokikini iboro kere. 28Naitononokikinitere iboro kere, ŋes konyet itononokikinitere Okoku da elopet mama ejai ŋol lokitononokikini iboro kere, tetere eraun Edeke loka kere kotoma kere.
29Ikonakinete bo do ai luibatisauna kanuka lukatwak? Arai mam cut itajarunio ikatwak, kanukinyo kibatisaere kes kanukec? 30
Kanukinyo do kijaar sio ationis ŋolisawa? 31
Iinacan, etogogoŋit kanuka aoloboboteka kanukus nakijaar toma Kristo Yesu Ejakaitiwok, ebe, atwani ŋinipaaran 32
Arai apotu kajioto kitiaŋ kotoma Epeso, kwape etuŋanan, ajokis anyoin? Arai mam itajarunio ikatwak, aso, “Kanyama, kamata, naarai kitwaki moi.” 33Sirikiŋalas; “Aup kalueroko emunaari iponesio luejok.” 34
Kikwarut kadolit, ido siridiakanarete, Naarai ejaas ice lumam ejenete Edeke. Enera ŋun aisurumia yes ileic.
35Konye etemari ituŋanan atiar, “Ikwaikini ai itajarunio lukatwak? Ido epote kakuan anyoin?” 36
Ibaŋaana ijo, ŋin yeniyei mam ejari dimikito ketwana. 37Ŋin da yeniyei, mam iyei akuan naejauni, nabarai ikinyomit bon, motoko akimait, arai yenika epone ece. 38
Konye Edeke einakini ŋes akuan kwape akotor, einakini ŋolikinyomit akuanake bon. 39Naarai akiriŋ kere mam eputonoro; konye ejai akiriŋ naka ituŋa, ace naka itiaŋ, ace da naka ikweny, ace da naka lukecor. 40Ejaas da awat nuka akuj, ka awat nuka akwap; konye aibuses nakokuju erai ace, aibuses da nakokwap erai ace. 41Ejai aibuses naka akoloŋ, aibuses ace naka elap, ka aibuses ace da naka aacer: naarai egelegela aacerit adiopet kaacerit ace kotoma aibuses.
42Ikoni nen ajarun naka lukatwak. 43
Eyeio komamei aibuses; itajarunio kaibuses; eyeio kakalanyanut; itajarunio kapedor. 44Eyeio akuan naka akiriŋ; itajarunio akuan naka emoyo. 45
Iwadikatai kwanata ebe, “Korau etuŋanan losodit Adam ekesa loejari.” Korau Adam lokawasia emoyo loeinakini aijar, 46Konye lokemoyo mam kerai losodit, dimarai lokakiriŋ; kosodi konyet ŋol lokemoyo. 47
Abuni etuŋanan losodit kotoma alup, ŋes lokapua; etuŋanan lokiareit abuni kotoma akuj. 48Kwape ejaar etuŋanan loka apua, ikote nen luka apua; kwape ejaar da loka akui, ikote nen luka akui. 49
Kwape kiputooro etuŋanan loka apua, kiputoori da lokokuju. 50
Konye iinacan, enera nu ebe, mam epedorete akiriŋ ka aokot airum ajakanut naka Edeke; ido aibos mam irumi amamus aibos.
51
Koany, kalimokinete nakaiyeiyea ebe: Mam oni kere kijotoor, konye kilocokinio kere, 52
katipet, bala arwakakin akoŋu, keruiki arupepe nakawasia; naarai erui arupepe, itajarunio lukatwak kamamus aibos, kilocokinio oni da. 53
Naarai ibusakinit naebosi na ainap amamus aibos, ibusakinit da naetwani na ainap amamus atwanare. 54
Naebosi na naenapia amamus aibos, naetwani na da naenapia amamus atwanare, ŋes konyet itodolikinor akirot naiwadikatai ebe:
“Ejwenyario atwanare kotoma aipikor.”
55
“Wu jo atwanare, ai bo ejai akoniipikor?
Wu jo atwanare, ai bo ejai ekonitidot?”
56
Etidot loka atwanare ŋes aronis; apedor da naka aronis kes ikisila. 57Konye kimalai Edeke lokiisipikori oni kanuka Ejakaitiwok Yesu Kristo.
58
Aso do ikainacan luminan, kicata, komam iriaŋiriaŋas, kiyatanakis ŋinipaaran aswam naka Ejakait, naarai ijenete ebe mam itaaritos atai kotoma Ejakait.
16
1
Konye nuka atukonokin iboro kanuka lukalaunak; kwape ekorakinitor ikanisan luka Galatia, kiswamata yesi da kwape kwaŋin. 2
Apaaran nasodit naka asabato kiŋadak ŋinituŋanan kayesi kidiat, kwape ekerianar, kinyeinai atukonokin naabunio eoŋ, 3Konye naadolunio, luitojokete yesi kobalua, ŋul eyakiari ayaŋaar akusiinakineta Yerusalem. 4Arai ibusakinit eoŋ da alosit, kiupari kesi keoŋ.
5
Konye abuni mamakus naadaunia aitor Makedonia, naarai etori Makedonia. 6
Konye motoko asalakin mamakus, arai adaun apak naka aterot kayes, tetere kinyamakinete eoŋ nealosi kere. 7
Naarai mam akoto aanyun yes kwana etori aitor; naarai amuno asalakin kayes apak arai keesiiki Ejakait. 8
Konye asalakini Epeso kiton naka Pentekote, 9
naarai kaŋaikinitai ekek loepol kanuka aswam, ido ejaas luipu luirebirebete.
10
Arai kebu Timoteo, kocoito ebe ejai kayes komamei akurian, naarai iswamai aswam naka Ejakait, kwape kaeoŋ. 11
Kinyek ituŋanan kere aimen ŋes. Konye kinyamakisi ŋes kainapakin, tetere ebuni mamakaŋ; naarai edaret ŋes nepepe kiinacan.
12
Nuka onac Apolo, abu keŋaiŋa ŋes noi abunore mamakus nenipe kiinacan, kwabo mam erai akoteke nepepec da abunore kwana. Konye ebuni naedumunia apak.
13
Kokwenyete, kicata kotoma aiyuun, kiswamata ekiliokone, kogogoŋoto 14Kiswamata akusikiro kere kotoma amin.
15
Aso iinacan, ijenete lukokale luka Sitepan, ebe eraas lugeet luka Akaia ido ejaikinos aswam naka aijaanakin lukalaunak; keŋaiŋait yes, 16
kononokikisi yesi da ituŋa luikote nen, ka ŋinituŋanan yenikeswaman nenipe kakes ka yenitaaritoi da, 17Alakara kanuka abunore naka Sitepan ka Porutunato ka Akaiko, naarai apotu kelelebikis eoŋ nueŋoŋara kamakus; 18
naara esiyeŋut ekamoyo, ka imoyonokus da. Aso kojenete noi ituŋa luikote nen.
19
Kiyogaete ikanisan luka Asia yes. Kiyogaete da Akuila ka Pirisika noi kotoma Ejakait, ka ekanisa da loejai orekec. 20
Kiyogaete iinacan kere yes. Kiyoganakinos kainu nakalaunan.
21
Eoŋ Paul ŋes ewadikat ayogan na kakanika elopet. 22
Arai ejai yenimam emina Ejakait, korau yenikenitoi. Ebunit Ejakait! 23Asianut naka Ejakait kojai kayes. 24Kojai akamina kayes kere toma Kristo Yesu Amen.
|