James11 UJakobe, inceku kaNkulunkulu leyeNkosi uJesu Kristu, kuzo izizwe ezilitshumi lambili ezisekuhlakazekeni, ngiyabingelela. [2 Kubaleni njengentokozo yonke, bazalwane bami, nxa liwela ezilingweni ezizinhlobonhlobo, [3 lisazi ukuthi ukuhlolwa kokholo lwenu kuveza ukubekezela; [4 kodwa ukubekezela kakube lomsebenzi opheleleyo, ukuze libe ngabapheleleyo liphelelisiwe, lingasileli ngalutho. [5 Njalo uba kukhona kini oswele inhlakanipho, kacele kuNkulunkulu ophanayo ngesihle kibo bonke, futhi kasoli, njalo uzayinikwa. [6 Kodwa kacele ekholweni engathandabuzi ngalutho; ngoba othandabuzayo unjengegagasi lolwandle eliqhutshwa ngumoya lizuliswe. [7 Ngoba lowomuntu kangacabangi ukuthi uzazuza ulutho eNkosini. [8 Indoda enhliziyombili kayijikamanga endleleni zayo zonke. [9 Lomzalwane ophansi kazincome ekuphakameni kwakhe; [10 lonothileyo ekuthotshisweni kwakhe; ngoba njengeluba lotshani uzadlula. [11 Ngoba ilanga liphuma lilokutshisa, libunise utshani, leluba labo liwohloke, lobuhle bokubonakala kwalo bunyamalale; ngokunjalo lesinothi sizanyamalala ezindleleni zaso. [12 Ibusisiwe indoda ebekezelela isilingo; ngoba isihloliwe izakwemukela umqhele wempilo, iNkosi eyawuthembisa kwabayithandayo. [13 Kakulamuntu olingwayo omele athi: Ngilingwa nguNkulunkulu; ngoba uNkulunkulu kalasilingo sokubi, laye uqobo kalingi muntu. [14 Kodwa ngulowo lalowo uyalingwa, lapho edonswa ehugwa ngezakhe inkanuko; [15 kuthi lapho inkanuko isikhulelwe ibelethe isono; lesono lapho sesiphelele sizala ukufa. [16 Lingakhohliswa, bazalwane bami abathandekayo. [17 Sonke isipho esihle laso sonke isipho esipheleleyo sivela phezulu, sehla sivela kuYise wezibane, okungekho kuye ukuguquka, kumbe isithunzi sokuphenduka. [18 Ngokuthanda kwakhe wasizala ngelizwi leqiniso, ukuze sibe njengezithelo zokuqala zezidalwa zakhe. [19 Ngakho, bazalwane bami abathandekayo, wonke umuntu umele aphangise ukuzwa, aphuze ukukhuluma, aphuze ukuthukuthela; [20 ngoba ukuthukuthela kwendoda kakwenzi ukulunga kukaNkulunkulu. [21 Ngakho selihlubule amanyala wonke lokwanda kakhulu kobubi, lemukele ngobumnene ilizwi eligxunyekiweyo, elilamandla okusindisa imiphefumulo yenu. [22 Kodwa banini ngabenzi belizwi, lingabi ngabezwayo kuphela, lizikhohlisa lina ngokwenu. [23 Ngoba uba umuntu engumuzwi welizwi futhi engesimenzi, yena ufanana lendoda ebuka ubuso bayo bemvelo esibukweni; [24 ngoba iyazibuka, ibisisuka, ibisihle ikhohlwa ukuthi ibinjani. [25 Kodwa lowo okhangelisisa emlayweni opheleleyo, lowo owenkululeko, abesebambelela kuwo, yena engesimuzwi okhohlwayo kodwa engumenzi womsebenzi, lo uzakuba ngobusisiweyo ekwenzeni kwakhe. [26 Uba umuntu phakathi kwenu esithi uyakholwa, uba engalufaki itomu ulimi lwakhe, kodwa akhohlise inhliziyo yakhe, ukukholwa kwalowo kuyize. [27 Ukukholwa okuhlanzekileyo lokungangcoliswanga phambi kukaNkulunkulu ngitsho uBaba yilokhu, ukuhambela izintandane labafelokazi ekuhluphekeni kwabo, lokuzilondoloza engelasici kokomhlaba. [ [21 Bazalwane bami, kungeyisikho ngokubandlulula abantu libe lokholo lweNkosi yethu uJesu Kristu, iNkosi yenkazimulo. [2 Ngoba uba kungena emhlanganweni wenu indoda elendandatho yegolide lesembatho esikhazimulayo, besekungena longumyanga olesembatho esingcolileyo, [3 beselinanzelela ogqoke isembatho esikhazimulayo beselisithi kuye: Wena hlala lapha kuhle, beselisithi kongumyanga: Wena mana lapho; loba: Hlala lapha ngaphansi kwesenabelo senyawo zami; [4 pho, kalibandlululi phakathi kwenu, njalo laba ngabahluleli abalemicabango emibi yini? [5 Zwanini, bazalwane bami abathandekayo. UNkulunkulu kabakhethanga yini abayanga balumhlaba, benothile ekholweni, njalo bezindlalifa zombuso awuthembisayo kwabamthandayo? [6 Kodwa lina libadumazile abayanga. Abanothileyo kabalicindezeli yini, njalo bona balidonsele ekwahlulelweni yini? [7 Bona kabalihlambazi yini ibizo elihle elibizwa ngalo? [8 Uba liphelelisa umlayo wobukhosi, ngokombhalo othi: Wothanda umakhelwane wakho njengalokhu uzithanda wena, lenza kuhle; [9 kodwa uba libandlulula abantu, lenza isono, lilahlwa ngumlayo njengabaweqayo. [10 Ngoba loba ngubani ogcina umlayo wonke, kodwa akhubeke kokukodwa, uba lecala kuyo yonke. [11 Ngoba owathi: Ungafebi; wathi futhi: Ungabulali; uba-ke ungafebi, kodwa ubulala, usungumeqi womlayo. [12 Khulumani ngokunjalo lenze njalo, njengabazakwahlulelwa ngomlayo wenkululeko. [13 Ngoba ukwahlulelwa okungelasihawu kungokwalowo ongenzanga isihawu; njalo isihawu sizincoma kukho ukwahlulela. [14 Kusizani, bazalwane bami, uba umuntu esithi ulokholo, kodwa engelamisebenzi? Lolokholo lungamsindisa yini? [15 Uba-ke umzalwane loba umzalwanekazi behambaze njalo beswela ukudla kwensuku ngensuku, [16 omunye wenu abesesithi kibo: Hambani ngokuthula, likhudumale lisuthe; kodwa engabaniki izinto ezidingwa ngumzimba, lokho kusizani? [17 Kunjalo lokholo, uba lungelamisebenzi, lufile ngokwalo. [18 Kodwa omunye uzakuthi: Wena ulokholo, mina-ke ngilemisebenzi: Ngitshengisa ukholo lwakho ngaphandle kwemisebenzi yakho, lami emisebenzini yami ngizakutshengisa ukholo lwami. [19 Wena uyakholwa ukuthi uNkulunkulu munye; wenza kuhle; lamadimoni ayakholwa, njalo athuthumele. [20 Kodwa uyathanda ukwazi yini, O siphukuphuku, ukuthi ukholo olungelamisebenzi lufile? [21 UAbrahama ubaba wethu kalungisiswanga yini ngemisebenzi, esenikele indodana yakhe uIsaka phezu kwelathi? [22 Uyabona ukuthi ukholo lwalusebenza kanye lemisebenzi yakhe, lokuthi ukholo lwapheleliswa ngemisebenzi, [23 kwasekugcwaliswa umbhalo othi: LoAbrahama wakholwa uNkulunkulu, kwasekubalelwa kuye ukuthi kuyikulunga, wasebizwa ngokuthi ngumngane kaNkulunkulu. [24 Ngakho-ke liyabona ukuthi umuntu uyalungisiswa ngemisebenzi, futhi kungesikuthi ngokholo kuphela. [25 Ngokunjalo-ke loRahabi isifebe kalungisiswanga ngemisebenzi yini, esezemukele izithunywa, eseziphumise ngenye indlela? [26 Ngoba njengalokhu umzimba ngaphandle komoya ufile, ngokunjalo lokholo ngaphandle kwemisebenzi lufile. [ [31 Lingabi ngabafundisi abanengi, bazalwane bami, lisazi ukuthi sizakwemukela isigwebo esikhulu. [2 Ngoba sonke siyakhubeka ezintweni ezinengi. Uba umuntu engakhubeki elizwini, lowo uyindoda epheleleyo, elamandla okukhina lomzimba wonke. [3 Khangela, sifaka amatomu emilonyeni yamabhiza ukuze asilalele, sibe sesiqondisa umzimba wonke wawo kwenye indlela. [4 Khangela, lemikhumbi, lanxa imikhulu kangaka njalo iqhutshwa yimimoya elamandla, iyaqondiswa kwenye indlela ngephinyana nje, lapho isifiso somtshayeli esifuna khona. [5 Lunjalo lolimi luyisitho esincinyane, kanti luzincoma kakhulu. Khangela, umlilo omncinyane uyatshisa izigodo ezingakanani! [6 Ulimi lalo lungumlilo, umhlaba wobubi; lunjalo ulimi lubekwe phakathi kwezitho zethu, lungcolisa umzimba wonke, luthungele indlela yempilo, njalo luthungelwa yisihogo. [7 Ngoba yonke imvelo yokubili izinyamazana lezinyoni, kokubili ezihuquzelayo lezidalwa zolwandle, iyathanjiswa njalo isithanjisiwe ngemvelo yabantu; [8 kodwa ulimi kakulamuntu ongaluthambisa; luyibubi obungenqotshwe, lugcwele ubuhlungu obubulalayo. [9 Ngalo siyabonga uNkulunkulu ngitsho uBaba, langalo siqalekisa abantu abenziwe ngokufanana loNkulunkulu; [10 emlonyeni ofananayo kuyaphuma ukubonga lenhlamba. Lezizinto kazifanelanga, bazalwane bami, zenzeke njalo. [11 Kambe umthombo emgodini ofananayo ungagobhoza yini okumnandi lokubabayo? [12 Kambe, bazalwane bami, umkhiwa ungathela imihlwathi yini, loba ivini umkhiwa? Ngokunjalo kakulamthombo oveza amanzi alitswayi lamnandi. [13 Ngubani ohlakaniphileyo loqedisisayo phakathi kwenu? Katshengise imisebenzi yakhe ekuziphatheni kuhle ngobumnene benhlakanipho. [14 Kodwa uba lilomhawu obabayo lombango enhliziyweni yenu, lingazincomi liqambele amanga iqiniso. [15 Lokhu kayisiyo inhlakanipho eyehla ivela phezulu, kodwa ingeyomhlaba, ngeyemvelo, eyamadimoni. [16 Ngoba lapho okukhona umhawu lombango, lapho kukhona isiphithiphithi lazo zonke izenzo ezimbi. [17 Kodwa inhlakanipho evela phezulu eyokuqala ihlanzekile, emva kwalokho ibe lokuthula, ibe mnene, ilalele, igcwele isihawu lezithelo ezinhle, kayilakubandlulula futhi ingelakuzenzisa. [18 Lesithelo sokulunga sihlanyelwa ekuthuleni kulabo abenza ukuthula. [ [41 Zivela ngaphi izimpi lokulwa phakathi kwenu? Kakuveli lapha yini, enkanukweni zenu ezilwayo ezithweni zenu? [2 Liyafisa, kodwa kalila; liyabulala njalo lilomhawu, kodwa lingeke lazuza; liyalwa futhi lenza impi, kodwa kalila, ngoba kaliceli; [3 liyacela njalo kalemukeli, ngoba licela kubi, ukuze likuchithele enkanukweni zenu. [4 Zifebe lezifebekazi, kalazi yini ukuthi ukuthanda umhlaba kuyibutha kuNkulunkulu? Ngakho loba ngubani othanda ukuba ngumngane womhlaba, wenziwa isitha sikaNkulunkulu. [5 Kumbe licabanga yini ukuthi umbhalo utsho ize: Umoya ohlala kithi ufisa kumona? [6 Kodwa uyanika umusa omkhulu; ngakho uthi: UNkulunkulu umelana labazigqajayo, kodwa abathobekileyo uyabapha umusa. [7 Ngakho zehliseleni kuNkulunkulu, melanani loSathane, njalo uzalibalekela. [8 Sondelani kuNkulunkulu, laye uzasondela kini; gezani izandla, zoni, njalo lihlanze izinhliziyo, banhliziyombili. [9 Danani lilile likhale; ukuhleka kwenu kakuphendulwe ukulila, lentokozo ukudana. [10 Zithobeni phambi kweNkosi, njalo izaliphakamisa. [11 Lingahlebani, bazalwane. Lowo ohleba umzalwane, amehlulele umzalwane wakhe, uhleba umlayo, ehlulela umlayo; kodwa uba esehlulela umlayo, kawusumenzi womlayo, kodwa umahluleli. [12 Munye ummisumlayo, olamandla okusindisa lokubhubhisa; wena ungubani owahlulela omunye? [13 Lalelani-ke lina elithi: Lamuhla loba kusasa sizakuya emzini othile, sihlale khona umnyaka owodwa sithengiselane sizuze; [14 elingakwaziyo okwakusasa. Ngoba iyini impilo yenu? Ngoba iyinkungu ebonakala okwesikhatshana, emva kwalokho ibisinyamalala; [15 endaweni yalokho ngabe lithi: Uba iNkosi ivuma, njalo sizaphila, sibe sesisenza lokhu kumbe lokhuyana. [16 Kodwa khathesi liyazincoma ekuzigqajeni kwenu; konke ukuzincoma okunje kubi. [17 Ngakho lowo okwaziyo ukwenza okuhle kodwa engakwenzi, kuyisono kuye. [ [51 Minani-ke lina abanothileyo, khalani lilile ngenxa yenhlupheko zenu ezilehlelayo. [2 Inotho yenu ibolile, lezembatho zenu zidliwe yinundu; [3 igolide lenu lesiliva kuthombile, lokuthomba kwakho kuzakuba yibufakazi kini, njalo kuzakudla inyama yenu njengomlilo. Lizibekela inotho ensukwini zokuphela. [4 Khangela, umvuzo wezisebenzi ezigunde amasimu enu, oncitshwe yini, uyakhala; lokukhala kwabavuni kungene endlebeni zeNkosi yamabandla. [5 Libusile ngokuzithokozisa emhlabeni, latamasa; linonise inhliziyo zenu njengesukwini lokuhlatshwa, [6 limlahlile, lambulala olungileyo; kamelananga lani. [7 Ngakho bekezelani, bazalwane, kuze kube sekufikeni kweNkosi. Khangela, umlimi uyalindela isithelo somhlabathi esiligugu, asibekezelele, size sizuze izulu elokuqala lelokucina. [8 Lani bekezelani, liqinise inhliziyo zenu, ngoba ukufika kweNkosi kuyasondela. [9 Lingasolani, bazalwane, ukuze lingalahlwa; khangela, uMahluleli umi emnyango. [10 Thathani isibonelo sokuhlupheka, bazalwane bami, lesokubekezela, abaprofethi abakhuluma ebizweni leNkosi. [11 Khangela, sithi babusisiwe ababekezelayo; lizwile ukubekezela kukaJobe, laselibona ukucina kweNkosi, ukuthi iNkosi ilesihawu esikhulu lobubele. [12 Kodwa phambi kwakho konke, bazalwane bami, lingafungi, kumbe ngezulu, loba ngomhlaba, loba yisiphi esinye isifungo; kodwa kakuthi uyebo wenu abe nguyebo, lohatshi nguhatshi; ukuze lingaweli ekulahlweni. [13 Kukhona ohluphekayo yini phakathi kwenu? Kakhuleke. Kukhona othokozayo yini? Kahlabele indumiso. [14 Kukhona ogulayo phakathi kwenu yini? Kabizele kuye abadala bebandla, babesebekhuleka phezu kwakhe, bamgcobe ngamafutha ebizweni leNkosi; [15 lomkhuleko wokholo uzamsindisa ogulayo, leNkosi izamlulamisa; uba-ke enzile izono, kuzathethelelwa kuye. [16 Vumani iziphambeko omunye komunye, likhulekelane, ukuze lisiliswe. Umkhuleko oqinileyo wolungileyo ulamandla kakhulu. [17 UElija wayengumuntu olemizwa efanana leyethu, wasekhuleka umkhuleko wokuthi lingani; njalo kalinanga emhlabeni okweminyaka emithathu lenyanga eziyisithupha; [18 wasebuya ekhuleka, lezulu lanika izulu, lomhlaba wathela isithelo sawo. [19 Bazalwane, uba omunye kini ephambuka eqinisweni, lomunye angambuyisa, [20 yazi ukuthi obuyise isoni ekuduheni kwendlela yaso uzasindisa umphefumulo ekufeni, usibekele inkithinkithi yezono. |