TAITƆSTAITƆS 11Nya Pɔɔl, Ngewɔ yengemɔ a nge kɛɛ tomɔ Yesu Kristi va, nya mia ngi kɔlɛi ji nyɛinga. Ngewɔ mia i loko loni nya ma i nya yoyo ngi nungei nasia gama i ti wɔyɔni kɔɔ ngi gbɔ ti ma ti la vulii a ngie, ngi tɔnyɛi na gɛ a tie mu Yewɔ-hindei i mu gaani la, 2na i pienga mu langa la kɛ ma kunafɔ lɛɛvui majɔɔlɔ. Ngewɔ ɛɛ ndɛɛ guala, tawao tamia i Lahei wumbuni pɛiŋ wɔɔ dunyei i yaa lɔɔto yɛ a yeendɛvui ji velɔ mu wɛ, 3tawao ji yeewatii vulii i hitini sɔ, i yeendɛvui magɛilɔ ngi wowili hu. I yeengowili ji loko wuaailɔ nya yeya tawao nyaa ndema leiŋ kia mu Bawomɔi Ngewɔ i ndeni yɛ ngi pie la. 4Ngi kɔlɛi ji nyɛinga Taitɔs lɔ gaama na i wotenga a nya hindoloi vulii jifa mua ta mu langɔ a Ngewɔ. Mu Kɛkɛ Ngewɔ taa mu Bawomɔi Yesu Kristi ti ngauwanda ve bi wɛ kɛɛ ndiilɛli. 5Ngi bi loilɔ wooma Kliti tii hu kɔɔ bi hindei nasia hugbatɛ kungɔ ti wie kɛɛ mu loko ii foni ma, kɛɛ kɔɔ bi Kristimableisia ti gbakoleisia hei taa gbi hu. Baa lema fɛimɛi nasia ma ngi pieni bi ma, 6maa ii houni nyamu gbi i yɛ kpakolo hu; nyaha yakpe mia a yɛ ngi yeya, tawao mahoungɔ ngi leengeisia ti yɛ a Kristimablaa, ti langangɔ aa yɛla kɛɛ ji tɛɛ numu gbi laayia mɛni. 7Jifa Kristimablaa ti lokulɔ gbi i looni Ngewɔ yengei lɔ gulɔ, maa ii houni nyamu yakpe bɛɛ i yɛ ngi hu. Maa ii houni i yɛ a mamanimɔ ɔɔ ndiimavulamɔ, ɔɔ ndɔhoumɔ, ɔɔ ndapi-ndapimɔ, ɔɔ navoo haamimɔ. 8Mahoungɔe i yɛ a gbekpe a hotangɛisia, ngi longɔ a hinda gbi lekee kpekpengɔ. Mahoungɔe i gu ngi lii ma, ngi wɔnangɔ, a Ngewɔ liima hindei wie, tawao ngi makɛngɔ. 9Mahoungɔe i hɛlɛ kpaukpau a ngowili lɔnyangɔi na numu a gu a liivala ma tawao tia kaai na mu kɛma ti woo i yakpe. Ji lɔ a wie i gu a piela nungaa wekɛisia ti lii i wu yeekaa lɔnyangɔi ji hu, i yama i pɔɔnɛi na gɛ a nasia ta hou a mawali. 10Gbamaile numu gboto lɔ na kakayee nasia ta nde tɛ ti nasia Juublaa yaa tie hei biliya, ta ganga a kaa wɔnangɔi ta nungaa wekɛisia wɛlɛ a ti wuhuba yɛpɛisia. 11Mahoungɔe bi pie ti gbe yeenjɛpɛi nasia ma, ajifa tiaa mbonda gbuhangaa luahu nyanima a kaai nasia maa ii houni ti kɛ, tawao ti yeengufebaa hindei ji wiemaa aako lekee ti navoei majɔɔ. 12Klitimɔ vulii yɛla wɔɔ, ti Yewɔ lutuisia yeengila, i ndeni yɛ, “Ndɛɛ gulabla lɔ a Klitiblɛisia kɛɛ fuuhani wienyɔungɔngaa kɛɛ ndiiblaa hawangɔngaa.” 13Tawao na i ndeni na lɔnyangɔi na vamia mahoungɔ bi yɛ a gbandɛ ti laa aako ti lanaya yekpe majɔɔ; 14taa gbɔma hɛlɛ a Juu dɔmingaa kɛɛ nuuvungaa ti jawei nasia ta gbua nungei nasia gama ta gbele tɔnyɛi ma. 15Hani gbi sɛwɛsɛwɛngɔe nasia wɛ tia vulii ti sɛwɛsɛwɛngɔ; kɛɛ hani gbi ii sɛwɛsɛwɛni nasia wɛ ti nɔhɔngɔ Ngewɔ yaama tawao tii lani a Ngewɔ, ajifa Seitana i ti nɛmahuisia nɔhɔnga kɛɛ ti nɛmahugiliyeisia. 16Ta ndelɔ nungaa ma tɛɛ ti Ngewɔ gɔɔlɔ, kɛɛ ti wiehindeisia ta ndɛɛ lolɔ ti ma. Ti liima nyamungɔe wa, tɛɛ woolo numu gbi laayia ma, tɛɛ gu a hinda yekpe gbi wiela.TAITƆS 21Kɛɛ mahoungɔe bi yɛ a nungaa gaa a kaai na pɔɔnangɔ. 2Yɛ a hindo gbakoloisia gaa bɛɛ ti sɔbɛ hou, ti nɛmahu lewengɔ i yɛla, ti gu ti lii ma; ti layii a Ngewɔ gbekpengɔ i yɛla, kɛɛ ndoma i yɛ ti liihu, kɛɛ ti guyii hinda gbɔugbɔu bu. 3Hii lɔɔ mahoungɔ bi yɛ a nyaha gbakoloisia gaa ti yɛ a luva kia nyahangɛi nasia na Ngewɔ woo a tie. Tɛɛ yɛ a njafablaa, ɔɔ ndɔi luwɔngaa. Mahoungɔe ti yɛ a nungaa gaa a na kpekpengɔ, 4aako ti nyaha voningeisia makɛ lova a ti hiningɛisia kɛɛ ti leengeisia, 5ti gu ti lii ma, ti wiehindei i yɛ sɛwɛ, ti yɛ a ti wɛlɛbu yengeisia wie pandawanda, ti golongɔ ti hiningɛisia wɛ, aako numu gbi aa nde yɛ ngowili na a gbua Ngewɔ gama nyamungɔe. 6Hii lɔɔ mahoungɔ bi yɛ a nɔɔ kɔɔngɛisia ma ti gu ti lii ma. 7Hinda gbi hu bi luvayii i nyande pookɔɔva. Mahoungɔ bi yɛ a kɛ a nungaa kɛ bi langɔe vulii a kaai na ba ti gaa la tawao kɛ sali-hinda ii le. 8Yɛ a nɛmaulewe yɛpɛngaa le, na numu ɛɛ gu a magbuala, aako bi yɛ a mu juwuisia yawufe a ji njia nyamu gbi ɛɛ yɛ ti laa ndeva kɔlooni mu ma. 9Mahoungɔe nduwɔngeisia ti yɛ a ti luwɔkɛisia liima hindei wie hinda gbi hu. Maa ii houni taa tieni ti njɛpɛ maluve, 10ɔɔ ti hani gbi huma ti yeya. Kia taa na wie, mahoungɔe ti kɛ kɛ ti gbekpengɔe kpele gbi tawao ti lɔnyangɔ, aako ti wiehindei gbi i wa a tɔwɔ yekpe kaai na ma mu kɛma kɔloongɔ mu Bawomɔi Ngewɔ ma. 11Ajifa Ngewɔ i ngi yauwandei magɛnga nuuvui kpɛlɛɛ ti bawova. 12Ngi yauwandei na lɔ mu laahima gbeva a luvala kia nungei nasia tii Ngewɔ gɔɔ kɛɛ toola hinda nyamui nasia wooma ti dunyei hu mu maningɔ ti ma, mu yɛ na mu gungɔ mu lii ma, mu wɔnangɔ, tawao ma luva dunyei ji hu kia nungei nasia ti Ngewɔ gɔɔngɔ ta pie, 13kia mu Folo lubangɔi na mawuloma mu lii i ma, watii na mu Yewɔ wai kɛɛ mu Bawomɔi Yesu Kristi wɔlɔyɛi a wa. 14I ta yekpe veilɔ a mu jɔngɔ, kɔɔ i mu wumawo hinda nyamu wiela gbi hu, i mu yɛ a nungaa sɛwɛsɛwɛ ta yakpe ngi woo a mue tawao mu magbɛlingɔ hinda yekpe wieva. 15Yɛ a nungaa gaa a hindei jisia ba ti liinɛpɔ tawao ba ndigba a bi gbaaya lavengɔi. Baa luma taa lɛɛ bi hu.TAITƆS 31Hitɛ bi nungeisia wɛ bɛɛ ti wuaa ti mahangeisia bu kɛɛ ti mahublɛisia, tawao ti yɛ a golo ti wɛ, ti magbatɛngɔ hinda yekpe wieva a pele gbi. 2Nde ti ma taa njɛpɛ nyamu le numu gbi va, tawao taa loko wili njianjia hu, i yɛla tawao ti ndiamɔya gɛ a numui gbi, ti yagɔlɛngɔ numui gbi gama. 3Gbamaile mua vulii mu baabangɔ yɛla wɔɔ, mu vɛlingɔ, muɛɛ pɔɔna hinda wie. Mu mua yekpe wuaailɔ mu liima hindeisia yeenduwɔya hu kɛɛ nɛnɛɛ hindei yeelasii gbi. Mu yɛlɔ tuuŋ a ndiimanyamui kɛɛ toloma wie a nungaa, tawao nungaa wekɛisia ti loleilɔ a mue, mua bɛɛ mu lolo a tie. 4Kɛɛ watii na mu Bawomɔi Ngewɔ hindawandei kɛɛ ngi lomɛi i gɛni a mue, 5i mu bawoilɔ. Ii wieni bɛɛ hinda yekpengaa gbi vamia mua yekpe mu pienga, kɛɛ jifa i manuni mu ma famia i mu bawoni a ngi Yafei loko, ngi Yafei na a mu le a nina i mu gɔ a ndɛvu nina a ji a mu jumbui gbi wua mu ma. 6Ngewɔ i ngi Yafei yeilɔ mu ma ndalewengɔ ma, mu Bawomɔi Yesu Kristi sabui hu, 7aako ngauwandei na i kɛni a mue i mua Ngewɔ-ni luahu gbatɛ mu kunafɔ lɛɛvui na majɔɔ mu lii i ma majɔɔva. 8Tɔnya yia lɔ a ji. Nya longɔ bi laa liigba vulii hindei jisia ma, aako nasia ti langɔ a Ngewɔ i gbewe ti ma ti wote hinda yekpengaa wiela leenga; nasia ti gbekpengɔ tawao ta kpewe gbua numui gbi ma. 9Kɛɛ waa loko wili nguhubaa laablangaa hu, ndebla woveisia ti laa gbawalɛi, njianjiɛisia kɛɛ ndapiisia kɔlooni Sawei ma. Na kpɛlɛɛ ii gbekpeni tawao nafa gbi ii hu. 10Numui na a wa a nduahugɔlɛisia, ngi laahii heima yila ɔɔ fele, na wooma gbɛ-o-gbɛ aa yɛ wuata luahu. 11Ba kɔɔlɔ kɛ numui na ii wɔnani tawao jumbui ngi lavengɔi, ngi wiehindeisia lɔ ta ngi lɛɛ. 12Nyaa Atɛmas ɔɔ Taikikɔsi looma bi gama, yeengila gbi fongaa, lapi a bi sɛmbɛi gbi bi wa nya gama Nikopolisi, ajifa ngi hugbatɛnga kɔlɛ watii leweva na. 13Lapi a bi sɛmbɛi gbi gbɔva lɔyɛi Sinas ma taa Apɔlɔs ti ti jɛsie lɔɔto, bi tɔ ti hanii gbi majɔɔ ta gbewe fa. 14Mahoungɔe mu nungeisia ti namakɔli a kɛlaa a ti magbewe hinda yekpe wieva, aako ti gu hanii nasia ma ta haami gbua nungaa ma, taa hei lekee gbama tɛɛ kpewe gbi gbua. 15Nasia kpɛlɛɛ ti mbei nya gama tɛɛ ta va kaka wu ma. A mu vama yia le mu ndiamɔi nasia ma mua tieni mu langɔ a Ngewɔ. Ngewɔ i ngauwanda ve wu kpɛlɛɛ wɛ. |