ROMABLEISIA

ROMABLEISIA 1

1Nya Pɔɔl, Yesu Kristi Ngewɔ i loko loni nya ma, i nya loli yɛva a tomɔ, i nya gbua toblaa wekeisia ma Ngowili Yekpei na leva Ngewɔ i njooyoni, nya mia ngi kɔlɛi ji nyɛima. 2Ngewɔ i Lahei wumbunga wɔɔ kpɔɔ, i punga ngi lutuisia laa kia nyɛingɔ la Ngewɔ Gɔlɛi hu. 3Yeengowili Yekpei ji i ngi Hindoloi lɔ hinda hugɛma, mu Lemɔi Yesu Kristi; nuuvuyei hu, ti ngi leni Mahɛi Devidi bembei hu lɔ; 4kɔlooni ngi hiyelei ma Ngewɔ gama kɛɛ ji jumbu gbi ii yɛ ngi ma, Ngewɔ i ngi gɛilɔ a kpaya waa kɛ ngi Loi mia a ngie a ji i pieni i vulu i hiye hee hu. 5Kristi sabui hu lɔ Ngewɔ i ngauwanda veni mbɛ yɛva a tomɔ aako gbɔma ngi pie kɛnyɛ gbi lekee yeenungeisia ti la la, ti golo Kristi wɛ. 6Wua yeenungei jisia a wue, wua wu Rom, Ngewɔ i wu lolinga yɛva a Yesu Kristi woo. 7Faale nyaa kɔlɛi ji nyɛima wu kpɛlɛɛ gama wu Rom Ngewɔ longɔ a wue tawao i wu lolinga yɛva a ngi nda nungeisia: Nyaa mu Kɛkɛ Ngewɔ vɛlima kɛɛ mu Lemɔi Yesu Kristi aako ti ngauwandei kɛɛ ndiilɛli ve wu wɛ. 8Haala, ngi siɛgbua nya Yewɔɛi ma Yesu Kristi sabui hu wu kpɛlɛɛ va; ajifa dunyei gbi lɔ mɛnima kia wu langɔ a Yesu. 9Ngewɔ kɔɔlɔ kɛ na nga nde tɔnya le, Ngewɔ na ngi yengema ngi wɛ a nya lii gbi a ji nga Ngowili Yekpei hugɛ a nungaa kɔlooni ngi Hindoloi ma. Ngewɔ kɔɔlɔ kɛ wu hinda lɔ tuuŋ nya nɛmahu 10watii gbi nga yɛ hɛɛma. Nyaa Ngewɔ vɛlima ngɛɛ i pie ngi gu a fola wu ma. 11Ajifa nya longɔ waa le mua wueni mu lɔ aako wu kpekpeyei na majɔɔ Ngewɔ a fe a ngi Yafei loko aako i wu yafeisia gbaya. 12Na nya lii i ma ta lɔ a ji mua wueni ma kpɔma majɔɔ a lenga a ji ma mu nyɔunyɔ lii gba ajifa wu nya layii gɔɔlɔ a Kristi, nya bɛɛ ngi wu layii gɔngɔ a ngie. 13Nya longɔ wu ji gɔɔ, nya ndeengɛisia; watii gboto ngi hugbatɛnga fova wu ma, kɛɛ hinda wulo a pielɔ lɔɔ ngɛɛ gu. Nya longɔ ngi gu nungaa ma wua bɛɛ lia ti la a Yesu Kristi kia ngi pienga la a nasia Juublaa yaa tie. 14Ajifa mahoungɔ ngi li kɛnyɛwekɛisia gama, nasia ti kɔlɔ gɔngɔ kɛɛ nasia tii kɔlɔ gɔɔ. 15Faale na, nya longɔ waa le ngi Ngowili Yekpei hugɛ a wua bɛɛ wu Rom. 16Nya liilɛlingɔ waa le a Ngowili Yekpei; i Ngewɔ gbaye hulɔ kɔ nasia gbi ta laa a ngie i ti bawo, Juuisia yese kɛɛ nasia Juublaa yaa tie. 17Ajifa Ngowili Yepkei lɔ a hugɛ kia Ngewɔ a yee nuuvu yɛ a pɔɔnamɔ i tia ta luahu gbatɛ: yeepelei lɔ a lala a Ngewɔ i too kɛlɛmɛi. Kia Ngewɔ Gɔlɛi ndeni la yɛ, “Numui na Ngewɔ a tia ta luahu gbatɛ ngi lalei va, a ngi yɛlɔ a pɔɔnamɔ tawao a ndɛvu majɔɔlɔ.” 18Ngewɔ i kɛnga, kɛ ngi liilewengɔ waa, kia i wama njia wɛlɛma nuuvungaa ma nyamui nasia kpɛlɛɛ va ti pienga a ngie kɛɛ jumbui nasia ti ngulinga nuuvuisia ma; nasia ti hinda nyamuisia ta nungeisia maabali a tɔnyɛi gɔla kɔloongɔ Ngewɔ ma. 19Ngewɔ a kpalɛ lalɔ ti ma, ajifa na nungaa ta gu a kɔɔla kɔloongɔ Ngewɔ ma tia ti kɔɔlɔ gbalauŋ, Ngewɔ vulii lɔ i hu yɛni gbalauŋ. 20Kia wɔɔ gba Ngewɔ i dunyei gbatɛni, ngi gbayei na kɛlɛma gbi ii ma kɛɛ ngi Yewɔyɛi nungaa ta gulɔ a kɔɔla gbalauŋ. Nungaa ta gulɔ a hindei jisia gɔla kɔloongɔ Ngewɔ ma hani nasia va i ti gbatɛnga. Faale ti gbuawee gbi ii na ti wiehindeisia yeenjiɛi hu. 21Ti kɔɔlɔ kɛ Ngewɔ lɔ na kɛɛ ti ganganga a ngi yaateenga bɛlɛhei vela ngi wɛ tawao tɛɛ luma a siɛgbualaa ngi ma. Kia taa na wie, ta baaba gili lekee lɔ wie tawao ti nɛmahuisia wopongɔe, tɛɛ kili yekpengaa gbi wie. 22Ta ndelɔ tɛɛ ti nɛmahu lewengɔe kɛɛ kpowablaa lɔ a tie. 23Kia taa hɛɛ kunafɔ Yewɔɛi ma, ta hɛɛ nuuvu hani gbatɛngɔi nasia lɔ ma kpuangɔ a nuuvu ɔɔ ŋɔningaa ɔɔ fuuhanisia ɔɔ ndala-vuuhanisia. 24Jifa nuuvugaa ti gbowangɔ hii, Ngewɔ i gbenga ti ma manɔhɔ hindei nasia wieva nɛngɔ ti wɛ, tawao ta sɔɔ hinda mawufengɔngaa wie a ti nyɔunyɔ. 25Ta gangalɔ a lala a tɔnyɛi kɔloongɔ Ngewɔ ma, ta la a ndɛi; ta hɛɛlɔ Ngewɔ gbatɛhanisia ma ta golo ti wɛ kia taa hɛɛ hanii gbi gbatɛmɔi vulii ma, na mahoungɔ nungaa ti ngi lato kunafɔ va! Amiina. 26Jifa nungaa ta ji wie, Ngewɔ i gbenga ti ma sɔɔ hinda mawufengɔngaa wieva. Nyahangɛisia vulii bɛɛ tiaa sɔɔ hinda nyamui wiema a ti nyɔunyɔ kpuangɔ Ngewɔ nda welei ma. 27Hii lɔɔ hingeisia ti gbenga nyaha-hindei yeena ma Ngewɔ i pilini, ta ti nyɔunyɔ jɔɔ, hingeisia lɔ ngufema hindangaa wiema a ti nyɔunyɔu, faale Ngewɔ a kpalɛi na lalɔ ti ma mbɛngɔ ti ma nyamui na va ti pienga. 28Jifa nuuvuisia tii lumani taa Ngewɔ gɔɔ, i gbenga ti ma aako ti yɛ a kili nɔhɔngɔ lekee wie, ta hindei nasia wie maa ii houni ti pie. 29Ti liisia lavengɔe a pienyamu yeelasii gbi, ti haamingɔ nungaa wekeisia ti yeya-hanisia va, ta nyamui wie a ti nyɔunyɔ; ti liisia lavengɔe a tolo kɛɛ numu waala kɛɛ ndapi kɛɛ numu wɛlɛlaa kɛɛ kili nyamu wiela a nungaa wekeisia. Ta yɛpɛlɔ a ti nyɔunyɔ, 30ta njia nyamuisia le ti nyɔunyɔ va, ti lolongɔ a Ngewɔ, ta ti nyɔunyɔu yɛli, ti mamaningɔ, ti yongangɔ; ta luva pele ninangaa gɔlima nyamu wieva: tɛɛ golo ti leblɛisia wɛ; 31ti gbowangɔ; na ta lahei wumbu pieva tɛɛ pie, tawao tɛɛ hindawanda wie, tɛɛ manu numu ma. 32Ti kɔlɔ kɛ Ngewɔ jaa ndeilɔ yɛ numu nasia ta yee hindei nasia wie mahoungɔ ti haa. Tawao tii lema lekee a yeehindei jisia wiela, kɛɛ tia lɔɔ nungaa nɛpɔma ti wieva.

2

1Nya ndiamɔisia, wa nungaa wekeisia gbɛmbolɔ? Kɛ wu gbuawee gbi ii na kulo bɛɛ, wu yee yɛ na gbi. Gbamaile wu nungaa wekeisia lɛɛngaa kɛɛ wa hinda yakpei nasia wie ta pie, kɛ wu wua yekpe lɛɛnga. 2Mu kɔɔlɔ kɛ Ngewɔ lɔnyangɔe ji a nungei nasia lɛɛ ta hinda nyamui jisia nyɔkɔ wie. 3Kɛɛ, nya ndiamɔisia, hindei jisia vulii wa nungaa wekeisia lɛɛ faa, wua vulii wa pielɔ! Wu langɔe la vulii kɛ Ngewɔ ɛɛ njia wɛlɛ wu ma? 4Gbamaile kɛnga wu lɛɛngɔi ngi gbekpeyeisia hu, ndanɛi va a kpua a wue kɛɛ ndihou va i hu, aako kɔɔ kɛ ngi gbekpeyei lɔ a pie wu wounve wu. 5Kɛɛ wu woohu gbɔndangɔe hulewengɔ gbo, tawao wu lii ɛɛ tɔnyɛi gulu. Faale na, kpalɛi na i wama lama wu ma wuaa ngawɔlɔma Foloi na ma kɛyila Ngewɔ a yɛ wu gbɛmboma a ndiilewe tawao a pie a tɔnyeilɔ. 6Ajifa Ngewɔ a numui gbi pawalɔ kia ngi wiehindeisia ti na. 7Numui lɛɛnga ta nɔɔlɔ kpekpei wielei ma a nungaa, ta ngɔlɔya gɔli kɛɛ mbɛlɛhei kɛɛ kunafɔ lɛɛvui: Ngewɔ a jisia gɔlɔ a kunafɔ lɛɛvui. 8Kɛɛ nungaa wekeisia ti gbewengɔ lekee tia yekpe lɔ va ta gbele pɔɔna-hindei ma hindei na wieva kpulangɔ nga; Ngewɔ liilewengɔ a yɛla ti ma tawao a kpalɛ lalɔ ti ma. 9Ngewɔ a ndiimavɔni gbalɛ lalɔ nungei nasia kpɛlɛɛ ma ta jumbu hindei wie, Juuisia yese kɛɛ nasia Juublaa yaa tie. 10Kɛɛ Ngewɔ a ngɔlɔya kɛɛ mbɛlɛhei kɛɛ ndiilɛli velɔ nungei nasia gbi wɛ ta kpekpe wie, Juuisia yese kɛɛ nasia Juublaa yaa tie. 11Ajifa numui gbi ti gbɛmboyii i yakpe, Ngewɔ ɛɛ topooma wie. 12Mojisi Jawei ii nasia yeya Juublaa yaa tie; ta jumbui wielɔ ti juku ajifa sawei ii tima. Sawei lɔ Juuisia yeya; ta jumbui wielɔ Ngewɔ i ti gbɛɛmbo a yeesawei. 13Gbamaile Sawei humɛnilei ii le aa yɛ nungaa yɛma a pɔɔnamɔ i tia Ngewɔ luahu gbatɛ; 14Sawei ii nasia ti yeya Juublaa yaa tie; kɛɛ watii gbi lekee ti na wiengaa a ti nyɛkɛ Sawei i ndeni, kɛ ti kɛnga gbɔɔ mahoungɔ i wie ɔɔ aa wie, kia bɛɛ Sawei ii ti yeya. 15Ti wiehindei a kɛlɔ kɛ na Sawei i ndeni nyɛingɔe ti liisia hu. Ti lii bɛɛ a selilɔ kɛ tɔnya lɔ a ji, ajifa watii lɛɛngaa ti lii a ndelɔ ti ma ina ti nyamu wienga ɔɔ ina ti kpekpe wienga. 16Faale na, kia nga nde la Ngowili Yekpei ji hu nga nde nungaa ma, hii lɔɔ a wie Foloi na ma Ngewɔ a nuuvuisia ti gili lɔwungɔngɔisia gbɛmbo a Yesu loko. 17Ɔɔ bia? Ba bia yekpe loli a Juu; bi hɛlɛngɔe a Sawei tawao ba yonga lewelɔ kɛ Ngewɔ longɔe a wu bembei; 18bi kɔɔlɔ gbɔɔ Ngewɔ longɔ bi pie, tawao bi kaanga Sawei hu na gɔva pɔɔnangɔ: 19bi langɔe la vulii kɛ pele gɛmɔ lɔ a bie a pumublɛisia kɛɛ foofo, nasia va ti kpindi hu 20kɛɛ kaamɔi nasia va ti lii haangɔ kɛɛ kavɛliblɛisia. Bi langɔe vulii la kɛ nɛmahulewei gbi kɛɛ tɔnyɛi gbi i Sawei hu lɔ. 21Ba nungaa wekeisia gaalɔ. Gbɛe bɛɛ bia yekpe gaa? Ba Ngewɔ yiɛi lelɔ nungaa ma bɛɛ, “Baa huma wie.” Kɛɛ bia vulii ba humɛi wielɔ? 22Ba ndelɔ bɛɛ, “Baa puegbua gbi.” Kɛɛ ba puei gbualɔ? Bi lolongɔe a nɔmɔlii nasia nungaa ta hɛɛ ma. Kɛɛ ba ti huma pɛlei nasia bu ta hɛɛ na ti ma? 23Ba lawolɔ bɛɛ Ngewɔ Jawei lɔ bi yeya. Kɛɛ ba Ngewɔ yawufelɔ a ji ba sawei nyani? 24Ngewɔ Gɔlɛi i ndeilɔ yɛ, “Wua wu Juuisia mia wu pienga nasia Juublaa yaa tie ta njia nyamu le Ngewɔ ma.” 25Wu Sawei houngaa, baa a yɛlɔ bili na ma ta wu heinga; kɛɛ wuii Sawei houilɔ, aa nyandelɔ wu lo pɔnɔyɛi hu. 26Nasia Juublaa yaa tie, kia bɛɛ ti heingɔ ii le bili ya, kɛɛ ti jiangaa a na Sawei ndeni, Ngewɔ ɛɛ ti wumbu bi tɔaa bɛɛ ti heingɔ bili ya? 27Kɛɛ nasia Juublaa yaa tie, kia bɛɛ ti ti leni ti pɔnɔngɔ, ti jiangaa a na Sawei i ndeni, ti wiehindei na ɛɛ pie Ngewɔ aa wu lɛɛ, wua hii Sawei yeenyɛingɔi i wu yeya tawao wu heingɔ bili ya kɛɛ wa Sawei nyani? 28Kɛ ye lɔ Juu vulii le ngi heingɔ vulii bili ya? Numui na ii le Juu a ngie ngi luwui ma tawao ti ngi heini bili ya a kpekɛi. 29Juu yeekpekpei a numui na lɔ ngi heingɔ bili ya a ngi luwui goohu wee, ngi lii wotengɔ Ngewɔ gama; tawao Ngewɔ Yafei lɔ a pie, Sawei yeenyɛingɔi ɛɛ gu a ji wiela. Ngewɔ lɔ a yeenumui ji lato, nuuvugaa ii le.

ROMABLEISIA 3

1Kɛ Juuisia ta kpekpeya majɔɔlɔ tewengɔ nasia ti ma Juublaa yaa tie a pele gbi hɔɔ? Ɔɔ kpekpeyei yeegbɔɔ Juuisia ta maajɔɔ ji ta ti hei bili ya? 2Kpekpeya gboto lɔ hu a pele gbi! Haalei, Ngewɔ i ngi wowili loko wuaani Juuisia lɔ yeya. 3Gbɔɔ a wie ina ti lɛɛnga tii lani a Ngewɔ wowili? Wu langɔe la kɛ Ngewɔ a ngi wowili hunyanilɔ sabui ji va? 4Na ɛɛ wie kulo bɛɛ! Na Ngewɔ a nde yɛ a pielɔ, watii gbi a pielɔ huɛɛŋ kiaa bɛɛ numui gbi ta yɛlɔ a ndɛ gualablaa. Kia Ngewɔ Gɔlɛi i ndeni yɛ, “Ngewɔ, ba tɔnyɛi lɔ le kpema gbi bi yɛpɛngaa; ba temu lɔ majɔɔ ji nungaa ta bi mayia gɛ kotiihu.” 5Kɛɛ gbɔɔ a wie ina mu hinda nyamu wielei a Ngewɔ wɔna hinda wielei lɔ magɛ gbalauŋ? Gbɔɔ ma gu a ndela? Ma ndelɔ muɛɛ hinda nyamu mia Ngewɔ a pie ji a kpalɛ la mu ma? (Nyaa yɛpɛma kɔloongɔ ngi ma nuuvu layia hu.) 6Sawo, na ɛɛ wie! Ina Ngewɔ ii wɔnani, a yee gu i dunyableisia gbi gbɛmbo? 7Kɛɛ gbɔɔ a wie ina nya lɔnya-vɛlii i wailɔ a ngɔlɔya Ngewɔ ma a ji a pie ngi lɔnyala maa i gɛ gbalauŋ tewengɔ yeengovei ma? 8Gbɛe hɔɔ muɛ nde muɛɛ, “A mu nyamu wie aako mu mbɛlɛhei ve Ngewɔ wɛ?” A tɔnya nungaa lɛɛnga ti nya bɛlɛ nyaninga a ji ti yeenjɛpɛi ji vulii lelaa lɛnga nya wumba! Ngewɔ a yeenungei nasia lɛɛlɔ tawao ti lɛɛla wɔnangɔe. 9Kɛ mu Juuisia mu yɛyii fisangɔe nasia Juublaa yaa tie ti ma? Sawo! Ngi wilanga a kɛlaa kɛ Juuisia kɛɛ nasia Juublaa yaa tie ti kpɛlɛɛ ti jumbui gbayei bu lɔ. 10Kia Ngewɔ Gɔlɛi i ndeni la yɛ; “Numu yakpe bɛɛ ii na aa wɔna, 11numu ii na aa tɔnyɛi yeembui gɔɔ ɔɔ i Ngewɔ gɔkɔli. 12Numui kpɛlɛɛ ti wounvenga Ngewɔ ma, kpekpeya gbi ii ti kpɛlɛɛ hu: numu gbii na aa kpekpeya wie, numu yakpe bɛɛ. 13Ti lɛisia wiengɔe kia kamba lawongɔi; ndɛɛ nyamu-nyamu lekee lɔ a gilikili ti nɛisia ma, kɛɛ njɛpɛi nasia ta numu waa, kia kaali-nyi, ta gbua ti laagulisia ya; 14sondu nyamu-nyamuisia ti ti lavengɔ. 15Ti huvulangɔ a numu gbalɛla kɛɛ numu waala; 16ta tombo lɔ lo kɛɛ ndiinyani mia gbi ta li na. 17Tii yaa ndiilɛli welei gɔɔni; 18tawao tii yaa gaani a luwala Ngewɔ ma.” 19Mu kɔɔnga na kɛ hani gbi lekee nyɛingɔ Sawei hu i nasia lɔ hinda hugɛma ti Sawei bu aako nuuvui gbi ti gbuawee gbi aa yɛ na, i pie dunyei gbi ti lo Ngewɔ gulɔ ti gbɛmbova. 20Ajifa numu gbi ɛɛ yɛ a pɔnamɔ Ngewɔ yaama jifa lekee a Sawei hou; na Sawei a pie ta mia a ji a pie nuuvu i kɔɔ kɛ i jumbu wienga. 21Kɛɛ kiahuna Ngewɔ pelei na gɛnga a nungaa yɛ la a pɔɔnablaa i tia tieni luahu gbatɛ, tawao kpitingɔ ii le Sawei ma. Sawei kɛɛ Ngewɔ lutuisia ti seli wuaanga ji va. 22Ngewɔ a nungaa yɛlɔ a pɔɔnablaa ji ta la a Yesu Kristi. Ngewɔ a ji wielɔ a nungei nasia gbi ta la a Kristi. Pele wekangaa gbi ii na kulo bɛɛ Ngewɔ aa nungaa wote la a pɔɔnablaa aa tia tieni luahu gbatɛ. 23Nuuvu gbi ti jumbu hinda wienga tawao ti maa i guhanga a Ngewɔ na a numu bawo. 24Kɛɛ Ngewɔ yauwandei na va a fe numu wɛ a gbaama, i ti kpɛlɛɛ yɛnga a pɔɔnablaa, i taa tieni luahu gbatɛnga Yesu Kristi sabui hu, Yesu na a numu gbua nduwɔyɛi hu. 25Ngewɔ i Yesu gbuɛilɔ a saa aako ngi haala i yɛ a sabu Ngewɔ i manu ti jumbuisia ma, ji ta la a Yesu. Ngewɔ i ji wieilɔ aako i kɛ kia a nungaa yɛ la a pɔɔnablaa i tia tieni luahu gbatɛ. Pɛiŋ Yesu i ya haa, i yɛ a ngi lii lɔ hou, a wounve nuuvuisia ti jumbuisia ma. 26Kɛɛ kiahuna a watii ji, Ngewɔ ɛɛ yaa wounve jumbui ma, a kɛlɔ kɛ ta lɔ a numu wote a pɔɔnamɔ i tia ta luahu gbatɛ. Hii Ngewɔ a kɛ kɛ ngi wɔnangɔe tawao kɛ ta lɔ a numu gbi lekee yɛ a pɔnamɔ ina ngi langɔe a Yesu. 27Gbɔɔ na hɔɔ ma lawo la? Tawao yeesabui a yɛ a gbɔɔ? Jifa le ma Sawei hou? Sawo, kɛɛ jifa mu langɔ a Yesu. 28Ajifa mu ndenga na kɛ na lekee a pie Ngewɔ i numu yɛ a pɔɔnamɔ i tia ta luahu gbatɛ ta mia a lala a Yesu Kristi, hindei nasia wieva ii le Sawei ndeni. 29Kɛ Juuisia lekee lɔ ti Yewɔ a Ngewɔ? Nasia Juublaa yaa tie tia bɛɛ ti Yewɔɛi yaa a ngie? A tɔnya Juuisia kɛɛ nasia Juublaa yaa tie ti Yewɔɛi lɔ a ngie. 30Ngewɔ i yakpe, tawao a Juuisia kɛɛ nasia Juublaa yaa tie yɛlɔ a pɔɔnablaa kia ti layii i na a Yesu. 31Kɛ ma loko gbualɔ hɔɔ Sawei houla hu jifa mu langɔ a Yesu? Sawo muɛɛ loko gbua hu kulo bɛɛ; ma loko lɔ hei Sawei bu.

ROMABLEISIA 4

1Gbɔɔ hɔɔ ma nde kɔloongɔ Ebraham ma, mu gɛnyɛi kpɛlɛɛ mu maada? Gbɔɔ i ngi wieni? 2Kiaa hindei nasia i pieni famia Ngewɔ i ngi yɛni a pɔɔnamɔ i tia ta luahu gbatɛ, Ebraham aa sabu jɔlɔ lawoova. Kɛɛ sabu gbi ii ngiɛ lawoova Ngewɔ gulɔ. 3Ngewɔ Gɔlɛi yɛ, “Ebraham langɔ yɛla a Ngewɔ, tawao ngi lalei va a Ngewɔ, Ngewɔ i ngi wumbuilɔ a pɔɔnamɔ.” 4Numui na a yenge ta ngi pawalɔ ngengei na va a pie; numu ɛɛ ngi pawɛi loli a mawaa, ta ndelɔ tɛɛ i yengenga faa. 5Kɛɛ numui na ngi langɔ a Ngewɔ, ngi wiehindeisia ii le, ngi langɔ a Ngewɔ na a ndɛɛmɔi wote a temumɔi, ngi lalei a Ngewɔ mia Ngewɔ a mbumbu aako i ngi wote a pɔnamɔ, i tia ta luahu gbatɛ. 6Ji mia Devidi lii i yɛ ma ji i yɛpɛni kɔlooni Kohunɛ na ma a yɛ numui na ma Ngewɔ a ngi wumbu a pɔnamɔ, ngi wiehinda va gbi ii le, Kia Devidi ndeila yɛ: 7“Nasia ti goohu nɛngɔe Ngewɔ i manunga ti nyamuisia ma, tawao Ngewɔ i ti jumbuisia mawɛɛnga! 8Numui na goohu nɛngɔe Ngewɔ ɛɛ ngi jumbuisia gbawa!” 9Nasia ti heingɔ bili ya tia lekee lɔ ti woo a Kohunɛ ji Devidi i yɛpɛma fa? Nasia ti heingɔ ii le bili ya tia bɛɛ ti woo le. Ajifa mu na hugɛnga Ngewɔ Gɔlɛi ndeni yɛ, “Ebraham langɔ yɛla a Ngewɔ tawao ngi lava a Ngewɔ, Ngewɔ i ngi wumbuilɔ a pɔɔnamɔ.” 10Miigbee lɔ ji i wieni? I wieni pɛiŋ ti yaa Ebraham hei biliya ɔɔ ji woma yɛla? I lani pɛiŋ a Ngewɔ ti yaa ngi hei bili ya, poma ii yɛla? 11Ti ngi heini bili ya poma lɔ, tawao bili na ti ngi heini nga i yɛni a tɔmaseli lɔ kɛva kɛ jifa Ebraham langɔ a Ngewɔ, Ngewɔ i ngi wumbunga a pɔɔnamɔ pɛiŋ ti yaa ngi hei biliya. Faale nasia gbi ti langɔ a Ngewɔ tawao Ngewɔ i ti wumbunga a pɔɔnablaa kia bɛɛ ti heingɔ ii le bili ya, ti maada lɔ a Ebraham lanayeihu. 12Ta lɔ gbɔma nasia ti heingɔ bili ya ti maada a ngie, ti heiva lekee ii le bili ya, kɛɛ ajifa kia lɔɔ mu maada i yɛ luva la jifa ngi langɔ a Ngewɔ pɛiŋ ti yaa ngi hei bili ya, hii lɔɔ ti luvama. 13Ngewɔ i Lahei wumbuilɔ Ebraham gama tia ngi bɔɔsɔɛisia yɛ dunyei a yɛlɔ a ti woo. Ngewɔ ii Lahei ji wumbuni jifa Ebraham i Sawei houni, kɛɛ jifa ngi langɔ yɛla a Ngewɔ tawao Ngewɔ i ngi wumbuilɔ a pɔnamɔ. 14Gbamaile ina hani na Ngewɔ a Lahei wumbu fa a ve nasia lɔ wɛ ta Sawei hou kɛ gbama mia a lala a Ngewɔ, tao kɛ ngi Lahei gbɛogbɛ ii le. 15Sawei a pielɔ Ngewɔ i liilewe; kɛɛ mia Sawa gbi ii na, sawa nyanila ii na. 16Ngewɔ i Lahei ji wumbuilɔ hɔɔ jifa Ebraham lani a ngie aako na Ngewɔ i Lahei wumbuni fa i gɛ gbalauŋ kɛ ta lɔ i feni gbama Ebraham bɔɔsɔɛisia wɛ -- nasia lekee ii le ta Sawei hou, kɛɛ nasia bɛɛ ti langɔ a Ngewɔ kia Ebraham pieni. Jifa Ebraham vuilɔ mu maada le lanayei ji hu. 17Kia Ngewɔ Gɔlɛi i ndeni yɛ, “Ngi bi yɛnga a kɛnyɛ gboto ti kɛkɛ.” Faale Lahei ji nyandengɔe ajifa Ngewɔ i kuluilɔ ma, Ngewɔ na Ebraham lani a ngie tawao Ngewɔ na a haamɔi vulu ngi layie a pie hani na ii na wɔɔ i yɛ na. 18Ebraham i lailɔ a Ngewɔ i liilo ngi ma kia bɛɛ liiloma sabu gbi ii yaa yɛ na, tawao na lɔ i pieni i wote a “Kɛnyɛ gboto ti kɛkɛ.” Kia lɔɔ Ngewɔ Gɔlɛi ndeni yɛ, “Bi bɔɔsɔɛisia ta gbotolɔ hii.” 19Ngi voi i loni kulo i gu a hɔndɔ yila; kɛɛ ngi layii a Ngewɔ hu ii haani ji i gilini a ngi gbuhɛi na haangɔ yɛla jɔngɔ, kɛɛ ji i gilini kɛ Sera gbemangɔe. 20Ii gbeni a lala a Ngewɔ tawao ii lɛɛni Lahei na hu Ngewɔ i mbumbuni; ngi layii a Ngewɔ i ngi gɔilɔ a kpaya, kɛ i Ngewɔ latonga. 21Ngi langɔ la vulii kɛ Ngewɔ a gulɔ i na wie i Lahei wumbuni pieva. 22Na vamia Ebraham, jifa ngi langɔ a Ngewɔ, Ngewɔ i ngi wumbuni a pɔɔnamɔ. 23Njɛpɛi jisia “Ngewɔ i ngi wumbuilɔ a pɔɔnamɔ” ti nyɛingɔ ii le ta yakpe va. 24Ti nyɛingɔ mua bɛɛ lɔ va, mua Ngewɔ i mu wumbunga a pɔɔnablaa, mu langɔ a Ngewɔ na i pieni mu Lemɔi Yesu i vulu i hiye hee hu. 25Ngewɔ i Yesu veilɔ nungaa wɛ ti ngi waa jifa mu yɛ jumbu wieni, i ngi vulu i ngi wumbu hee hu aako i mu yɛ a pɔɔnablaa, mua Ngewɔ-ni mu luahu i gbatɛ.

ROMABLEISIA 5

1Kia naa Ngewɔ i mua tieni luahu gbatɛnga jifa mu langɔ a Yesu, mu lii i lɛlinga naa Ngewɔ gulɔ, mu Lemɔi Yesu Kristi sabui hu. 2Jifa mu lani a Kristi, i pieilɔ mu Ngewɔ yauwandei gbekpeyei na majɔɔ a pie gbama tawao tamia naa mu hu. Faale, mu goohunɛngɔ ajifa ma Ngewɔ wɔlɔyɛi majɔɔlɔ. 3Tawao ma goohunɛɛlɔ gbɔma kpalɛi nasia va ti lani mu ma ajifa mu kɔɔlɔ kɛ kpaalɛi a pieilɔ numu i gu hinda gbɔugbɔi bu, 4gula hinda gbɔugbɔi bu a numu hinda nɛɛlɔ Ngewɔ wɛ, tawao ji numu hinda a nɛɛ ngi wɛ a pielɔ numu i liilo ngi ma. 5Kulɔ gbe lee ji ɛɛ mu baa, ajifa Ngewɔ i ngi lomi wunga mu liihu, a Newɔ Ngafei hu we i ndamagbatɛni mu va. 6Gbamaile watii na lɛ kpaya gbi ii yɛ mu wɛ, Kristi i haailɔ gbɔva jumbubleisia ma a watii na i nɛni Ngewɔ wɛ. 7Hinda kpaukpau le numu va i haa pɔɔnamɔ va. Tɛngaa a wielɔ numu i luma i haa numu yekpe va. 8Kɛɛ Ngewɔ i ngi loyii a mue gɛnga a mue, a ji Kristi i haani mu va watii na lɛ jumbublaa a mue. 9Ngi haalei lɔ i mua Ngewɔ-ni mu luahu gbatɛnga na; bɛwɛbɛwɛngɔ waa le ngi wɛ mu bawova Ngewɔ liilewei yeya kpɛmbo-volei ma kɛyila. 10Ngewɔ juwungaa lɔ wɔɔ a mue, kɛɛ i mu wotenga a ngi ndiamɔngaa ngi Hindoloi haalei yɛ sabui va. Kia naa Ngewɔ ndiamɔngaa a mue, i laailɔ leiŋ kɛ Kristi lɛɛvui a mu bawolɔ huɛɛŋ! 11Kɛɛ kpɛlɛɛ yaa na; ma goohunɛilɔ Ngewɔ va Yesu Kristi sabui hu ajifa i mu yɛnga naa a Ngewɔ ndiamɔngaa. 12Numu yila lɔ i pieni jumbui i wani dunyei hu tawao ngi jumbui lɔ i wani a hee. Faale hee i wɛlɛilɔ numui kpɛlɛɛ maahu, ajifa nuuvui kpɛlɛɛ ti jumbui wieilɔ. 13Jumbui i yɛlɔ dunyei hu pɛiŋ Ngewɔ i yaa Sawei ve; kɛɛ mia sawa gbi ii na, Ngewɔ ɛɛ jumbuisia gbawa. 14Kɛɛ i hiye Adam watii ma i to Mojisi watii ma, hee i temaya jɔɛilɔ nuuvu kpɛlɛɛ maahu, nasia vulii bɛɛ ti jumbui ii yɛ wieni kia Adam ndɛi na, ji Adam i Ngewɔ layie gbuani hu. Numui na ngi walei i yɛ hu yeetɔmaseli lɔ wɔɔ a Adam. 15Kɛɛ ti veenjɔɔ ti gba ti nyɔunyɔ ma, tawao pelei na Ngewɔ a hindawandei wiela gbama a nungaa i gba pelei na ma Adam i jumbui wieni la. Tɔnya le kɛ numu gboto ti haailɔ numu yakpei na ngi jumbui yilei na wooma. Kɛɛ pelei na Ngewɔ a ngi yauwandei gɛla i leweni na ma tawao pelei ji lɔ a ngi hindawandei wie la gbama a numu gboto kia lɔɔ pelei na i na numu yakpei na, Yesu Kristi sabui hu, i ngauwandei gɛni la. 16Tawao Ngewɔ hindawandei yeehuvɛi i gba numu yilei na jumbui yeehuvɛi ma. Jumbu yakpei na wooma, Ngewɔ a nungaa kpɛlɛɛ gbɛmbo lɔ; kɛɛ Ngewɔ yauwandei va, nungaa ti yɛnga a pɔɔnablaa kia bɛɛ ti jumbuisia wienga kpoto. 17Tɔnya mia kɛ ajifa numu yakpei na ngi jumbui va, yeewatii na wooma, hee mahaya majɔɛilɔ nuuvu mahu. Kɛɛ na numu yilei na, Yesu Kristi i pieni, i leweni polouŋ numu yilei na jumbui yeehuvɛi ma. Nasia gbi ta Ngewɔ yauwanda gboto wai majɔɔ kɛ ji a ti yɛ gbaama a pɔɔnablaa, ti gbayangɔ a yɛla ti lɛɛvuisia hu Kristi sabui hu. 18Faale na, kia jumbu yakpei i pieni Ngewɔ i nuuvui kpɛlɛɛ lɛɛ, hii lɔɔ pɔɔna hinda yakpei na Yesu i pieni nuuvui gbi yɛ va a pɔɔnamɔ. 19Tawao kia lɔɔ numu gboto ti woteni a jumbublaa jifa numu yila Ngewɔ layie gbuani hu, hii lɔɔ numu gboto ta wote a pɔɔnablaa tia Ngewɔ-ni ti luahu i gbatɛ jifa numu yila i goloni Ngewɔ wɛ. 20Sawei i gbɔkuilɔ aako hinda nyamu wielei maa i to; kɛɛ jumbu hinda wielei maa ii toni, Ngewɔ yauwandei maa toilɔ i lewe ma polouŋ. 21Faale na, kia lɔɔ jumbui i temaya majɔɔni jifa hee i yɛ numui gbi ma, hii lɔɔ pɔɔnɛi i teemaya majɔɔni Ngewɔ yauwandei va, i li a mue kunafɔ lɛɛvui hu mu Lemɔi Yesu Kristi sabui hu.

ROMABLEISIA 6

1Gbɔɔ hɔɔ naa ma nde? Ma ndelɔ muɛɛ mu yɛ lekee a jumbui wie aako Ngewɔ yauwandei maa i to? 2Muɛɛ na wie kulo bɛɛ! Jumbui ta ngi gama, mu haanga, ma yee na gu mu yɛ lekee a jumbu wie mu lɛɛvui ji hu? 3Ajifa wu ji gɔɔlɔ pandawanda: ji ti mu wuani mua Yesu-ni mu wili hu, mu haailɔ kia i haani la. 4Ji ti mu wuani hɔɔ, mua tieni lɔ mu haani, ti mua tieni gbɔwu aako, kia lɔɔ mu Kɛkɛ gbaya gabandengɔ wai i ngi wumbuni hee hu, mua bɛɛ mu yɛ ndɛvu nina hu. 5Gbamaile ina mua tieni mu yɛlɔ yakpe hee na hu i pieni, hii lɔɔ mua tieni ma yɛ yakpe a ji Ngewɔ a mu vulu i mu wumbu hee hu kia i pieni a ngie. 6Tawao mu kɔɔlɔ kɛ mu yɛyii wovei taa Kristi-ni ti haanga krɔsii ma aako jumbu wie gbayei na wɔɔ i yɛ mu yɛyii wovei hu i nyani, aako mua yɛ gbɔma a jumbui luwɔngaa. 7Gbamaile numu i haangaa kɛ i gbuanga jumbui gbayei bu. 8Ina mua Kristi-ni mu haanga, mu langɔe la kɛ mua tieni ma vululɔ. 9Ajifa mu kɔɔlɔ kɛ Ngewɔ i Kristi vulunga i ngi wumbunga hee hu tawao kunafɔ ɛɛ yaa haa gbɔma kpaya gbi ii yaa hee wɛ ngi maahu. 10Hee na i pieni, i pieni jumbui gama lɔ kunafɔ va; tawao ndɛvui na naa i hu ndɛvu le Ngewɔ gama. 11Hii mahoungɔ wu gili a wua yekpe kɛ wu haangɔe jumbui gama, kɛɛ wu vulungɔ Ngewɔ gama wua Yesu Kristi-ni wu wilingɔ hu. 12Wu gbuhɛisia taa yaa yɛ jumbui gbayei bu, wa golo hindei nasia wɛ wu longɔ la jifa nuuvu a wue. 13Tawao waa wu gbuhɛisia yeehinda gbi wuaa jumbui gbayei bu hinda nyamu wieva la. Kia na aa wie, a wua yekpe ve Ngewɔ wɛ kia Ngewɔ i wu gbuanga hee hu i wu vulunga, wu wu gbuhɛi kpɛlɛɛ ve ngi wɛ pɔɔna hindangaa wieva la. 14Waa luma jumbui i temaya jɔɔ wu maahu; ajifa wuii Sawei bu, wu kpekpeyei na lɔ bu Ngewɔ i kɛnga a wue. 15Gbɔɔ hɔɔ ma nde? Mahoungɔe mu jumbu wie jifa muii Sawei bu kɛ lekee Ngewɔ gbekpeyei? Muɛɛ na wie kulo bɛɛ! 16Wu kɔɔlɔ pandawanda kɛ wu wua yekpe wuaangaa numu bu nduwɔya hu golova ngi wɛ, kɛ wu yɛnga a nduwɔngaa numui na bu wa golo ngi wɛ -- wuii yɛilɔ a jumbui luwɔngaa, wu hee jɔɔ hu, kɛ wa yɛlɔ a koloya luwɔngaa, Ngewɔ i wu yɛ a pɔɔnablaa i wua tieni luahu gbatɛ. 17Kɛɛ a mu siɛ gboto gbua Ngewɔ ma! Ajifa a watii yila wɔɔ jumbui luwɔngaa yɛla a wue; kɛɛ yeewatii na wu goloilɔ a wu lii gbi tɔnyɛi nasia bu wu tɔni kaai na hu wu majɔɔni. 18Ngewɔ i wu gbuailɔ jumbui gbayei bu i wu yɛ a ngi luwɔngaa aako wu pɔɔnɛi wie. 19Gbɛɛ ngi tɔmaseli gbua mu luvayii hu folo gbi, ngi njɛpɛngaa le wa gu a mbugɔɔla. A watii yila wu wua yekpe wuaailɔ sawa nyanilɛi kɛɛ wɔji hinda wielei yeenduwɔyei hu aako wu hinda nyamui yeelasii kpɛlɛɛ wie. Hii lɔɔ mahoungɔ wu wua yekpe wuaa pɔɔna hinda wielei yeenduwɔyɛi hu hindei nasia wieva Ngewɔ longɔ la. 20Watii na wu yɛ jumbui luwɔyɛi hu, kpa ii yɛ wu ma pɔɔna hinda wieva. 21Gbɔɔ wu majɔni hindei nasia wieva wu wufengɔ ma na? Hindei nasia wu pieni yeehuvɛi lɔ a hee! 22Kɛɛ kiahuna naa wu gbuanga jumbui luwɔyɛi hu, wu yɛnga a Ngewɔ luwɔngaa, wu pawɛi lɔ a ndɛvui na fengɔ vulii Ngewɔ wɛ, tawao yeengakpuami mia a kunafɔ lɛɛvui. 23Ajifa jumbui pawɛi lɔ a hee; kɛɛ na Ngewɔ a fe gbama ta mia a kunafɔ lɛɛvui a mu Lemɔi Yesu Kristi sabui hu we.

ROMABLEISIA 7

1Nya ndeengɛisia, na nya longɔ ngi nde wu ma wu yeembui gɔɔlɔ vulii ajifa wu gbi wu Sawei hinda hugɔɔlɔ. Numu a yɛlɔ lekee Sawei bu ji ndɛvu a yɛ ngi hu. 2A mu hinimɔ yila wumbu lɛɛ a tɔmasɛi; taa Sawei bu ngi hinii gama ina lekee ndɛvui lɔ yeehindoi hu; kɛɛ hindoi i haangaa, kɛ i gbuanga Sawei na bu a yɛ mbu ngi hinii gama. 3Faale ina, taa hindo weka ti heingaa ngi hinii vulungɔ, ta ngi lolilɔ a pue gbuamɔ; kɛɛ ngi hinii i haangaa, kɛ sawei i gbuanga ngi ma tawao a hindo weka jɔlɔ ɛɛ yaa yɛ a pue gbuamɔ. 4Hii wu na, nya ndeengɛisia. Piengɔe bɛɛ wua bɛɛ wu haanga, sawei ta ngi wɛ, ajifa wua Kristi gbuhɛi-ni wu yɛnga yakpe; tawao kiahuna na ngi woo lɔ a mue, ta hii Ngewɔ i ngi vuluni i ngi wumbu hee hu aako mu yɛ a ngengeblaa yekpe Ngewɔ yengei hu. 5Gbamaile watii na lɛ mu yɛ mu luwui liilɛli hindeisia lekee wie, Sawei i pielɔ jumbu wie mani i gbaya mu luwuisia hu, tawao mu yɛilɔ a ngengeblaa yekpe na a mu waa. 6Kɛɛ kiahuna na, Ngewɔ i mu gbuanga Sawei bu ajifa mu haailɔ Sawei na wɛ i mu wungɔ wɔɔ jɔwɔ ya. Faale muii yaa Ngewɔ yengei wiema a pele wovei na Sawa nyɛingɔi i kɛni, mu yengema na a Ngewɔ Yafei welei lɔ. 7Gbɔɔ naa ma nde? Ma ndelɔ muɛɛ jumbui lɔ Sawei vulii ma? Muɛɛ na le kulobɛɛ! Kɛɛ Sawei lɔ i pieni ngi kɔɔ gbɔɔ jumbu le. Ngii yɛ kɔɔ gbɔɔ mani nyamu wiela le numu weka yeya-hani ma kiaa Sawei ii ndeni aa yɛma, “Baa mani nyamu wie numu weka yeya-hani gbi ma.” 8Jumbui i pele jɔɛilɔ pieva mani nyamu yeelasii gbi wiemani i nya lɔ a ji i yengeni a Sawei. Ajifa Sawei ji ii yɛlɔ na, jumbui haangɔe. 9Nya vulii nya vulungɔ yɛla wɔɔ ji Sawei ii yɛ na; kɛɛ ji Sawei i wani, jumbui i vuliilɔ, 10kɛ ngi haanga. Tawao Sawei yeena numu lii yɛ ma wava a ndɛvu, i wani a hee lɔ nya va. 11Jumbui i pele jɔɛilɔ i nya wɛlɛ ji i yengeni a Sawei; jumbui i yengeni a Sawei lɔ i nya waani. 12Faale na Sawei kpɛlɛɛ makpɔngɔ i gbuani Ngewɔ gama lɔ tawao Sawei yeengila gbi i gbuani Ngewɔ gama lɔ, tawao pɔɔnangɔ, kpekpengɔ. 13Ji kɛilɔ hɔɔ kɛ na kpekpengɔ ta lɔ i wani a nya haala? Ii hii kulo bɛɛ! Jumbui mia i na wieni; jumbui i yengeni a na lɔ kpekpengɔ i wa a hee nya gama aako jumbui yɛyii yeetɔnyɛi i gɛ a nuuvungaa. Sawei a pielɔ jumbui nyamuyii i gɛ hulewengɔ. 14Mu kɔɔlɔ kɛ Sawei i mu yafeisia va lɔ; kɛɛ nya ngi yɛni a nuuvu lɔ nduwui i nya ma, nya majiangɔ a nduwɔ jumbui ma. 15Ngii kɔɔ vulii gbɔɔ ngi piema; ajifa ngɛɛ na wie nya longɔ a yɛla ngi pie, nga na lɔ wie nya lolongɔ la. 16Ji nga na wie ngii loni ngi pie, a kɛlɔ kɛ ngi lumanga Sawei wɔnalaa ma. 17Faale nya vulii ii le ngaa yɛ hindei jisia wiema; jumbu wielei na i heini nya lii hu, ta le. 18Ngi kɔɔlɔ kɛ kpekpeya wiela ii nya hu -- nya nuuvuyei hu. Ajifa kia bɛɛ mani i nya ma kpekpe wieva, ngɛɛ gu ngaa pie. 19Kpekpei na nya longɔ ngi pie, ngɛɛ pie; nga nyamui na lɔ wie ngii loni ngi pie. 20Ina na ngii loni ngi pie ta mia nga pie, na a kɛlɔ kɛ nya ii le ngaa yɛ hindei jisia wiema; jumbui wielei na i heini nya lii hu, ta le. 21Faale ngi kɔnga kɛ Sawei ji mia i yengema: kpemɛi nya longɔ a yɛla ngi na wie kpekpengɔ, na nyamungɔ ta lekee lɔ nga vɛmbɛla. 22Nya lii longɔe a Ngewɔ Jawei. 23Kɛɛ ngi sawa weka lɔnga, i gba yengema nya lii hu yeesawei ji a lapi a sawei yeena nya longɔ la. A nya yɛlɔ a jɔwɔyamɔ jumbui jawei na bu i yengema nya lii hu. 24Nya li nyaningɔe hulewengɔ gbo. Ye lɔ a nya bawo nduwui ji yeya i piema ngi haa? 25Ngi siɛgbua Ngewɔ ma nya bawo va mu Lemɔi Yesu Kristi sabui hu! Ji lɔ hɔɔ nya yɛyii le: a nya wuma wee nya lii a gulɔ a jialaa a Ngewɔ jawei, nya luwui ta a jia a jumbui jawei.

ROMABLEISIA 8

1Faale naa, Ngewɔ ɛɛ yaa nungei nasia lɛɛ tia Yesu Kristi-ni ti wilingɔ hu. 2Gbamaile Ngewɔ Yafei gbayei na a ndɛvui nina ve mu wɛ gbama ajifa mua Yesu Kristi-ni mu wilingɔ hu, i nya gbuanga Sawei gbayei na bu a wa a jumbui kɛɛ hee. 3Na Sawei ii guni aa pie jifa kpaya gbi ii nuuvu luwui wɛ, Ngewɔ i pieilɔ. Ngewɔ i yeejumbui na lɛɛlɔ i yɛ nuuvu luwui hu a ji i ngi nda Hindoloi yoyoni i wa a nduwu kpuangɔ a nuuvu nda luwu jumbungɔi aako i wote a saahanii nuuvuisia ti jumbui va. 4Ngewɔ i ji wieilɔ aako mu hinda wɔnangɔi nasia wie vulii sawei a nde kɔɔ mu jia a Ngewɔ yafei nda welei, maa jia a nuuvu luwui nda welei. 5Nungei nasia ta luva kia ti luwui a nde la ti ma, ta gili lekee a na lɔ ti luwui longɔ la. Nasia ta luva kia Ngewɔ Yafei a nde la ti ma, ta gili lekee a na lɔ Ngewɔ Yafei longɔ la. 6Bi yaa gilima a na lekee nduwui longɔ la, yeehuvɛi a hee lɔ; bi yaa gilima a na lekee Ngewɔ Yafei longɔ la, yeehuvɛi a ndɛvui lɔ kɛɛ ndiilɛli. 7Faale, nuuvui a wotelɔ a Ngewɔ juwu ji a gili a na lekee nduwui longɔ la, ajifa ɛɛ Ngewɔ Jawei hou, tawao, a tɔnya, ɛɛ gu a houla. 8Nasia ta golo ti luwui liima hindei wielei bu tɛɛ gu a Ngewɔ liima hinda wiela. 9Kɛɛ wua wuii luvama kia wu luwui a nde la wu ma; wuaa luvama kia Ngewɔ Yafei a nde la wu ma -- ina Ngewɔ Yafei lɔ wu hu a tɔnya. Numu gbi lekee Kristi Yafei ii ngi hu kɛ Kristi woo yaa a ngie. 10Kɛɛ ina Kristi lɔ wu hu, kia bɛɛ wu luwuisia ti wama haama jumbui hu, na hu gbi Ngewɔ Yafei a ndɛvui velɔ wu wɛ ajifa Ngewɔ i wu yɛnga a pɔnablaa, i wua tieni luahu gbatɛnga. 11Ina Ngewɔ na i Yesu vuluni i ngi wumbu hee hu ngi Yafei lɔ wu hu, kɛ ta hii i Kristi vuluni i ngi wumbu hee hu a ndɛvu velɔ haa luwui jisia wɛ ti wu ma; ngi Yafei na i wu hu a ji wielɔ. 12Faale naa, nya ndeengɛisia, kpa lɔ mu ma, kɛɛ luvava ii le kia mu luwui longɔ mu pie la. 13Ajifa wu luvangaa kia wu luwui longɔ wu pie la, wa haalɔ; kɛɛ ina Ngewɔ Yafei sabui gbɔmi hu wa wu wiehinda jumbungɔisia waalɔ, wa ndɛvu majɔɔlɔ. 14Nasia ta to Ngewɔ Yafei ma, Ngewɔ leengaa mia a tie. 15Gbamaile Ngafei na Ngewɔ i fenga wu wɛ ɛɛ wu yɛ a nduwɔ aa pie waa luwa; yee-Ngafei a wu yɛ a Ngewɔ leengaa lɔ, tawao ngi gbayei hu ma Ngewɔ lolilɔ muɛɛ, “Kɛkɛ! Nya Kɛkɛ!” 16Ngewɔ Yafei a gbɛɛlɔ mu yafeisia ma seliva kɛ Ngewɔ leengeisia lɔ a mue. 17Jifa Ngewɔ leengaa a mua, ma lubɛi nasia majɔɔlɔ i ndama gbatɛni ngi nungɛisia va, tawao mua Kristi-ni ma gbɔlɔ na ma Ngewɔ ndama gbatɛnga ngi va, gbamaile ina Kristi gbalei mua tieni mia, mua tieni ma ngi wɔlɔyɛi bɛɛ majɔɔlɔ. 18Nya langɔe la kɛ kpalɛi na i lama mu ma kiahuna numu ɛɛ huma ngɔlɔyɛi na ma Ngewɔ i wama kɛma a mue. 19Ngewɔ gbatɛ-hani kpɛlɛɛ ti yaamɛi laalangɔe hu ta Ngewɔ mawulo ngi leengeisia gɛva. 20Ajifa Ngewɔ pieilɔ ngi gbatɛ-hani kpɛlɛɛ ti wote a gbaama fuŋ, ti nyɛkɛ ii le, kɛɛ jifa i nɛɛni Ngewɔ wɛ yɛ hii a yɛ na. Na hu gbi Ngewɔ liilomɛi ji lɔ Ngewɔ wɛ, 21kɛ folo yila Ngewɔ a ngi gbatɛ-hani gbi gbualɔ hee kɛɛ ndulayɛi hu, tawao yee kpatɛ-haniisia ta gbɔ lɔ a kohunɛ wai na veva Ngewɔ leengeisia wɛ. 22Ajifa mu kɔɔlɔ kɛ haaŋ i to watii ji ma Ngewɔ gbatɛ-hani gbi tiaa wɔɔma a kpalɛ kia ndo-le-goohugbalɛi i na. 23Kɛɛ Ngewɔ gbatɛ-hanisia lekee ii le; mua Ngewɔ Yafei i mu hu a hanii yeehaalayee Ngewɔ fenga mu wɛ gbama, mua bɛɛ mua wɔɔma a goohu wee, ma Ngewɔ mawulo i mu yɛ a ngi leengeisia, i yama i mu gbuhɛi gbi gbua nduwɔya hu. 24Ajifa ji mu liiloni Ngewɔ ma tamia i pieni mu bawoni; kɛɛ mu na lɔngaa mu kulɔgbema, kɛ liiloma vulii ii le. Ajifa ye lɔ a hani na gulɔgbe i tɔma? 25Kɛɛ mu yaa hani na gulɔgbema muii tɔma, ma mawulolɔ a ndiilo. 26Hii lɔɔ Ngewɔ Yafei a wa gbɔva mu ma ajifa kpaya gbi ii mu hu. Gbamaile muii kɔɔ pelei na mahoungɔ mu Ngewɔ vɛli la; Ngewɔ Yafei vulii lɔ Ngewɔ manɛnɛma mu va, a gbala a kpalɛi na lama ngi ma na numu gbi ɛɛ gu a ndela. 27Tawao Ngewɔ na a nuuvuisia ti liisia hulɔ, i kɔɔlɔ gbɔɔ Ngewɔ Yafei i gilima la; ajifa Ngewɔ Yafei lɔ a Ngewɔ manɛnɛ ngi leengeisia va tawao a pielɔ a pelei na a nɛɛ Ngewɔ wɛ. 28Mu kɔɔlɔ kɛ hinda gbi hu Ngewɔ lɔ yengema kpekpe gɔliva nungei nasia va ti longɔ a ngie, nasia i wilanga a loko lola ti ma aako na i hugbatɛnga pieva i wie. 29Nungei nasia Ngewɔ i wilanga a loko lola ti ma pɛiŋ, ti ya ti le, i ti gbuanga ma gba kɔɔ ti wie kia ngi Hindoloi na, aako ngi Hindoloi i yɛ a kplaloo ndewehingaa gboto lia. 30Nasia Ngewɔ loko looni ti ma pɛiŋ i ya ti le, i ji wielɔ kɔɔ ti yɛ a ngi woo; tawao nasia i loko looni ti ma i ti yɛlɔ a pɔɔnablaa i taa tieni luahu gbatɛ; tawao nasia i taa tieni luahu gbatɛni, i pieilɔ ti ngi wɔlɔyɛi bɛɛ majɔɔ. 31Ji na ji kpɛlɛɛ i gonanga mu ma, gbɔɔ ma nde? Ina Ngewɔ lɔ mu wooma, ye lɔ a lapi a mue? 32Ii gbani ngi Hindoloi vulii bɛɛ mahu, i ngi gbuailɔ a saa mu kpɛlɛɛ va! I ngi Hindoloi veilɔ mu wɛ -- ɛɛ hani gbi ve mu wɛ gbama? 33Ye lɔ a njia wɛlɛ nungei nasia ma Ngewɔ i loko longa ti ma? Ngewɔ vulii i ndenga yɛ pɔɔnablaa mia a tie. 34Numu gbi a gulɔ hɔɔ i ti lɛɛ? Yesu Kristi lɔ i haani, ɔɔ mu nde muɛɛ, tamia Ngewɔ i ngi vuluni i ngi wumbu hee hu tawao taa heini Ngewɔ yejei hu. Taa Ngewɔ manɛnɛma mu va. 35Gbɔɔ naa a gu i mu gbua Kristi lomɛi ma? Kpundɛ a gulɔ a piela ɔɔ hindagbɔundaa ɔɔ ngakpɛ nyamu ɔɔ ndɔlɛ ɔɔ fɛɛli ɔɔ hinda nyamuisia ɔɔ hee? 36Kia Ngewɔ Gɔlɛi i ndeni la yɛ, “Hee lɔ hɛlɛni mu mahu folo kpɛiŋ bi va Ngewɔ tiaa mu houma kia mbalangɛi nasia ti lima a tie ti waama.” 37Sawo, hindei ji kpɛlɛɛ hu mu temaya lavengɔ majɔɔnga a numu na i loni a mue ngi sabui hu! 38Ajifa ngi kɔɔlɔ vuli pandawanda kɛ gbɛogbɛ ɛɛ mu gbua ngi lomɛi ma: hee ɔɔ ndɛvui; malikangaa ɔɔ ngelema-mahugbeblaa kɛɛ yeekpayɛisia; ngaamɛi ji ɔɔ kulɔmɛi; 39dunyei yeena i mu maahu ɔɔ dunyei yeeji i mbui -- hani gbi ii na Ngewɔ gbatɛ-hanisia lia aa gu kunafɔ a mu gbuala Ngewɔ lomɛi na ma i kɛnga mu Lemɔi Yesu Kristi sabui hu.

ROMABLEISIA 9

1Na ngi ndema tɔnya le; Kristi woo lɔ a nge famia ngɛɛ ndɛɛ gula. Nya lii, toko i Ngewɔ Yafei yeya ngayengeva, i nya liilonga kɛ ngii ndɛɛ lɔ gualama. 2Nya liinyani wɔlɔngɔ waa le, tawao kpalɛi na i nya lii hu nya bondɛi nasia va kɛlɛma gbi ii ma, nasia maa tieni mu luwu kɛɛ mu ŋama i yakpa! 3Tia ti va, ngaa lolɔ nya vulii Ngewɔ jondii i yɛ nya ma tawao mua Kristi mu luahu i gɔlɛ. 4Tia lɔ Isrɛlbleisia a tie; i ti yɛlɔ a ngi leengaa i ti gɔ ngi wɔlɔyɛi hu; i pieilɔ tia tieni ti hindangaa yangili, i Sawei ve ti wɛ; Ngewɔ vɛliyii yeetɔnyangɔi lɔ ti yeya; ti Ngewɔ laaheisia majɔɔnga; 5ti gbuanga ti maada lɔwɔngɔi nasia hu lɔ, tawao Kristi ji i woteni a nuuvu, i gbuani ti bembei hu lɔ. Mahoungɔ numui gbi ti Ngewɔ lato kunafɔ va na hani gbi ti mahɛi a ngie! Amiina. 6Ngii ndema ngaa yɛma Ngewɔ lahei i gbahanga; ajifa Isrɛlbleisia kpɛlɛɛ ii le taa yɛ a Ngewɔ numu huwɔyɔngɔisia. 7Tawao Ebraham bɔɔsɔɛisia kpɛlɛɛ ii lɛ taa yɛ a Ngewɔ leengeisia. Ngewɔ ndeilɔ Ebraham ma yɛ, “Ta Aisaki bɔɔsɔɛisia wumbulɔ a bi ndɛisia.” 8Ji i kɛilɔ kɛ ndeengɛi nasia ta ti gbua goohu ta ti le tii yɛni a Ngewɔ leengaa; ndeengɛi nasia ta ti le jifa Ngewɔ i Lahei wumbuni yɛ ta ti lelɔ, tia lɔ ti wumbungɔ a bɔɔsɔɛi yeetɔnyangɔisia Ngewɔ wɛ. 9Ajifa ji Ngewɔ i yɛ Lahei na wumbuma i ndeilɔ yɛ, “Nga walɔ gbɔma watii na ma ndangɔ tawao Sera a hindolo lelɔ.” 10Tawao ii gɛlɛni na ma. Ajifa Ribɛka hiingaa leengaa veenjɔɔ kpɛlɛɛ ti kɛkɛ i yɛ yakpe, mu maada Aisaki. 11Kɛɛ aako i gɛ kɛ hindolo yakpe wumbula i yɛni a Ngewɔ lekee ngi hugbatɛi yeehuvaa lɔ, Ngewɔ ndeilɔ ngi ma yɛ, “Ndoi yeesɛmbɛi a mɔnɛlɔ yeekuloi wɛ.” I ji leni pɛiŋ ti yaa ti le, pɛiŋ yeengila bɛɛ i yaa hinda gbi wie, yeekpekpe ɔɔ yeenyamu; faale ji Ngewɔ i ndoi yeengila wumbuni i gbuani tolii na hu lɔ i ngi lolini la, ii gbuani nuuvu wiehinda gbi hu. 13Kia Ngewɔ Gɔlɛi i ndeni la yɛ, “Ngi loilɔ a Jekɔpi, kɛɛ ngi loloilɔ a Isɔ.” 14Ma yɛ naa hɔɔ gbɛ? Ma ndelɔ muɛɛ Ngewɔ ii wɔnani? Muɛɛ na le kulo bɛɛ. 15Gbamaile i ndeilɔ Mojisi ma yɛ, “Nga manulɔ numui na ma nɛɛ nya wɛ, ngi numui na mamamau lɔ a nɛɛ nya wɛ.” 16Faale yeehindei ii gbuama na hu nuuvu longɔ la ɔɔ na a pie, i gbuama lekee Ngewɔ manumɛi hu lɔ. 17Gbamaile Ngewɔ Gɔlɛi i ndeilɔ tokulɔ mui na ma Fɛɛro yɛ, “Ngi bi yɛilɔ a maha aako ngi bi yayenge tawao kɔɔ dunyablaa gbi ti nya biyɛi gɔɔ.” 18Faale Ngewɔ a manu numui na lɔ ma a nɛɛ ngi wɛ, tawao a numu gbi woohu gbɔndalɔ a nɛɛ ngi wɛ. 19Wu yilayee a nya mɔlilɔ hɔɔ yɛ, “Ina hii ji i na, Ngewɔ a yee nyamu lo numu ma? Ye lɔ a ganga a Ngewɔ liima hindei?” 20Gbɛe ye lɔ a bie, ndiamɔ, Ngewɔ a yɛpɛ bi ma ba hunyɔɔ? Pɔlɔ-vɛi ɛɛ ngi gbatɛmɔi mɔli aa yɛma, “Gbɛe bi nya gbatɛni hii?” 21Kpaya lɔ fɛɛ-gbatɛmɔi wɛ yengeva a bowoi a fɛɛ-gbatɛla kia ngi longa la, tawao a fɛɛ fele gbatɛlɔ a bowoi gate yakpei, yeengila i na ta yenge la lekee a ngilangila ji hinda a yɛ wiema, ta yenge a yeepekei kpele gbi. 22Hii lɔɔ Ngewɔ i hindei wienga. Ngi longɔ yɛla i kɛ kɛ ngi liilewengɔ tawao ngi longɔ yɛla i pie nungaa ti ngi gbayayii gɔɔ. Faale i ngi lii houilɔ waa nasia va ngi liilewengɔ yɛla ti ma, ngi magbatɛngɔ yɛla ti nyaniva. 23Ngi longɔ yɛla gbɔma i ngi wɔlɔya wai magɛ, na i njeini mu ma, mua i manuni mu ma, nasia i ti magbatɛnga ngi wɔlɔyɛi majɔɔva. 24Ajifa mua lɔ i mu lolini, ii mu gbuani Juuisia lekee lia, i mu gbuailɔ nasia Juublaa yaa tie bɛɛ lia. 25Ji lɔ i ndei Hosia Gɔlɛi hu yɛ, “Nungei nasia tii yɛni a nya woo, nga ti lolilɔ a ‘Nya Nungeisia.’ Kɛnyɛi na ngii yɛ loni la, nga ti lolilɔ a ‘Nya Liimableisia.’ 26Tawao mia vulii Ngewɔ ndeni na ti ma yɛ, ‘Nya nungaa yaa a wue,’ na mia vulii ndɛvu-ve-Yewɔɛi a ti loli na a ngi leengeisia.” 27Tawao Aisaya i yɛpɛilɔ ngeleya kɔlooni Isrɛl ma yɛ, “Isrɛlbleisia ti gboto bɛɛ kia ŋanyɛi na na i gboyei gbla, ti klohii mia ta bawo; 28ajifa Ndemɔi a ngi gbɛmbui lewelɔ dunyabla gbi ma floflo a ndiilo.” 29Piengɔe kia Aisaya i yɛ ndeni yɛ, “Kiaa Ndemɔ wai ii yɛ pieni ndeengaa taa lo mu woomɛi, maa wielɔ kia i Sɔdɔm wieni, maa wielɔ kia Gomɔra na.” 30Gbɔɔ naa hɔɔ ma nde? Ma ji lɔ le: kɛ nasia Juublaa yaa tie tii lapima wɔɔ kɔɔ Ngewɔ i ti yɛ a pɔɔnabla, ti yɛnga a pɔɔnabla jifa ti langɔ a Ngewɔ; 31Kɛɛ Isrɛlblɛi nasia Ngewɔ i ti wumbuni, ti sawa gɔlima na a pie ti yɛ a pɔnabla, tii tɔni. 32Gbɛe tii tɔni? Ajifa na ti pieni ii gbuani ti lalei hu a Ngewɔ kɛ ti wiehindeisia. Ti lugbɛilɔ a pele-ma-gɔtii na nungaa ta lugba la. 33Kɔtii na Ngewɔ Gɔlɛi i yɛpɛni fa yɛ, “Kpe, nyaa kɔtu lama Jayɔn na nungaa ta ti lugba la, fawa gɔtii na a pie ti gula, Kɛɛ numu gbi lekee a liilo ngi ma ngi yaa ɛɛ wufe.”

ROMABLEISIA 10

1Nya ndeengɛisia, mani lɔ nya ma hulewengɔ gbo ngɛɛ Ngewɔ i Juuisia gbi bawo. Nyaa Ngewɔ vɛlima a nya lii gbi wu va. 2Nga ti jelilɔ kɛ tia Ngewɔ hindei madi houma waa, kɛɛ madihoui ii lɔtoni yeetɔnyangɔi ma. 3Jifa tii yaa pelei na gɔɔni Ngewɔ a numu yɛ la a pɔnamɔ, i tia ta luahu gbatɛ, tawao ti lapima a ti nda wele lavalɔ; faale tii toni Ngewɔ nda welei na ma na a numu yɛ la a pɔnamɔ. 4Ajifa Kristi i pienga kpaya gbi ii yaa Sawei hu, aako numu gbi lekee a la a Ngewɔ, Ngewɔ a ngi yɛlɔ a pɔnamɔ, i tia ta luahu gbatɛ. 5Ji lɔ Mojisi nyɛini kɔlooni numu taa yɛva a pɔɔnamɔ sawei houlei va yɛ, “Numu gbi lekee a na wie Sawei i ndeni, a ndɛvui majɔɔ Sawei hu lɔ.” 6Kɛɛ jimia ndengɔ Ngewɔ gɔlɛi hu kɔlooni numu taa Ngewɔ ti luahu gbatɛlɛi ma a ji numu yɛva a pɔɔnamɔ a la a Ngewɔ: “Baa nde bia yekpe ma bɛɛ, Ye lɔ a lɛ aijɛnɛ?” (yeembui lɔ a, yeeva a Kristi.) 7“Baa ji bɛɛ le baa yɛma, Ye lɔ a yei ndɔwu?” (yeembui lɔ a, Kristi wumbuva hee hu.) 8Na Ngewɔ Gɔlɛi i ndema ta lɔ: “Ngewɔ wooyili lɔ wu gbla kɛɛ wu laagulisia ya kɛɛ wu lii hu” na i ma ta lɔ a ngowili ji ma nde kɔloongɔ lala ma a Ngewɔ. 9Bi ndengaa leiŋ a bi laagulisia bɛɛ “Yesu lɔ Ndemɔi le,” bi la la bi lii hu kɛ Ngewɔ i ngi vuluilɔ i ngi wumbu hee hu, ba bawolɔ. 10Ajifa mu langɔe la mu liisia hu tawao Ngewɔ i mu yɛnga a pɔɔnablaa i mua tieni luahu gbatɛnga; mu ndeilɔ leiŋ a mu laagulisia tawao mu bawongɔe. 11Ngewɔ Gɔlɛi lɔ ndema yɛ, “Numu gbi lekee i langaa a ngie ngi yaa ɛɛ wufe.” 12Numu gbi ii gbuani ji ma ajifa nduahugɛ gbi ii Juuisia luahu tia nasia Juublaa yaa tie; Ngewɔ lɔ numui gbi ti Lemɔi le, tawao a nasia gbi lubalɔ waa ta ngi loli kpɔma va. 13Kia Ngewɔ Gɔlɛi ndeni la yɛ, “Numu gbi lekee a Ndemɔi biyɛi loli, a bawolɔ.” 14Kɛɛ ta yee ngi loli, ina tii yaa lani a ngie? Tawao ta yee la a ngie ina tii yaa ngowili mɛnini kɔlooni ngi ma? Tawao ta yee ngowili mɛni kɔɔlooni ngi ma ina tii ndeni ti ma? 15Tawao ngowili a yee le ti ma ina tii tutungaa vayani hu? Kia Ngewɔ Gɔlɛi i ndeni la yɛ, “Nasia ta wa a ngowili yekpe, ti wangaa la i gabandeni kpa!” 16Kɛɛ numui kpɛlɛɛ ii le taa loko hei Ngowili Yekpei bu. Aisaya vulii i ndeilɔ yɛ, “Ndemɔi, ye lɔ i lani a mu wowili?” 17Faale na, lanaya a gbua ngowili mɛnila hu lɔ, tawao humɛnila a gbua ngowili lɔ hu kɔlooni Kristi ma. 18Kɛɛ gbɛɛ ngi mɔli, tɔnya le kɛ tii ngowili mɛnini? A tɔnya vulii ti mɛniilɔ kia Ngewɔ Gɔlɛi i ndeni la yɛ: “Ti woisia ti liilɔ ngeebu gbi; ti layieisia ti foeilɔ dunyei gɛlɛmɛi gbi.” 19Gbɛɛ gbɔma ngi mɔli, tɔnya le kɛ Isrɛlbleisia tii kɔɔni? Mojisi vulii lɔ haalamɔ le i mɔli ji gbɛmboni yɛ, “Nga pielɔ wu lolo a nungei nasia kɛnyɛwu yaa a tie; nga pielɔ wu liilewe kɛnyɛi na ma yeenungeisia ti gbowangɔ.” 20Aisaya i ngaulewei mato wieilɔ ji i ndeni yɛ, “Nungei nasia tii yɛ a nya gɔkɔli ti nya lɔilɔ, ngi gɛilɔ a nasia tii yɛ a nya hinda humɔli.” 21Kɛɛ Isrɛlbleisia tia ti va i ndeilɔ yɛ, “Ngi nya lokoisia lamboilɔ folo kpɛiŋ nungei nasia gama tɛɛ golo tawao ti gangangɔ.”

ROMABLEISIA 11

1Gbɛɛ ngi mɔli hɔɔ: Ngewɔ a gbelelɔ ngi gbɔugbɔu nungeisia ma? Sawo, ɛɛ pie! Nya vulii Isrɛlmɔ lɔ a nge, Ebraham bɔɔsɔ, nga gbua Bɛnjami bembei hu. 2Ngewɔ ii yaa gbeleni ngi nungei nasia ma i ti wumbuni a ngi liimablaa pɛiŋ i ya a dunyei gbatɛ. Wu Ngewɔ Gɔlɛi yeemia gɔɔlɔ Ilaija i gbonyɛni a Isrɛlbleisia Ngewɔ ma yɛ, 3“Ndemɔi, ti bi lutuisia waanga, ti bi jaa-gbuamɛisia wongonga: nya yakpe lɔ ngi longa tawao tia lapima nya waava.” 4Ngewɔ i gbɔɔ leni ngi ma? I ndeilɔ yɛ, “Ngi numu Tauji wɔfla lamagbatɛnga nya yekpe va, nasia tii yaa hɛɛni ndɛɛ-Yewɔɛi Baal ma.” 5Hii lɔɔ hindei i na kiahuna: Nungaa wulohii lɔ na Ngewɔ i ti wumbunga a ngi yauwandei va. 6Ngi numu wumbulei i gbuani ngi yauwandei hu lɔ, ti wiehinda va ii le. Gbamaile ina Ngewɔ numu wumbulei i gbuama ti wiehindei hu lɔ, kɛ ngi yauwandei ɛɛ yɛ a ngauwanda yekpe. 7Faale naa Isrɛlbleisia tii na lɔni ti yɛ a kɔkɔli. Nungaa huwɔyɔngɔi nasia Ngewɔ i ti wumbuni tia mia ti tɔni; Ngewɔ i pieilɔ yeemɔniisia ti wolii hu i lutu, tii ngi loliwoi mɛnini. 8Kia Ngewɔ Gɔlɛi i ndeni la yɛ, “Ngewɔ i pienga tɛɛ gu a hinda gbi hugɔɔlaa; i to foloi ji vulii ma tɛɛ gu a hinda lɔlaa a ti yaamɛisia tawao tɛɛ njia mɛni a ti wolisia.” 9Devidi ndeilɔ yɛ, “Ngewɔ i ti gomɛisia yɛ a mani ti gɔwɔla, i pie ti gula, i kpalɛ la ti ma! 10I pie ti yaamɛisia ti liwi kɔɔ taa gu a hinda lɔla; i pie ti mɔnɛisia ti gboto kpele gbi.” 11Nyaa hɔɔ mɔlima: Ji Juuisia ti lugbani, ti gulailɔ ti juku? Na ii wieni kulo bɛɛ! Jifa ti jumbui wieni, mbawoyei i wanga nasia Juublaa yaa tie ti gama, aako Juuisia ti tolo gbua ti ma. 12Juuisia ti jumbui i wailɔ a kpekpeya waawaa gboto dunyei hu, tawao jifa tii temaya majɔɔni, i wailɔ a kpekpeya waawaa gboto nasia Juublaa yaa tie ti gama. Yeekpekpeyei ji a gboto kpa ji Juuisia nasia kpɛlɛɛ ta mbawo majɔɔ! 13Ngi yɛpɛma naa wualɔ gama Juublaa yaa wue: ina lekee nyaa tomɔyɛi hu wu gama wua Juublaa yaa wue, nga mata gbualɔ a nya yengei. 14Tɛnga nga gulɔ ngi pie nya nda gɛnyɛblɛisia ti tolo gbua, nya wiehindei na i pie Ngewɔ i ti lɛɛngaa bawo. 15Ajifa watii na Ngewɔ i gbeleni ti ma, Ngewɔ pieilɔ dunyablaa wekeisia ti yɛ a ngi ndiamɔngaa. A yee yɛ na hɔɔ ji Ngewɔ a ti gulu? A wielɔ lɔɔ kia haablaa ta yɛ vuluma ta hiye hee hu! 16Ti bledii na tii yaa a mɔni yaingaingaa ma, ti yeengaingɔmɛi yeehaalayei ve Ngewɔ wɛ, kɛ ngi woo lɔ a yeekpuhɛi bɛɛ na ta mɔɔ kpɛlɛɛ; tawao ti ngulii yeehapiisia vengaa Ngewɔ wɛ, kɛ ngi woo lɔ a yeembekeisia bɛɛ. 17Ti ɔlivi wulu hingɔi yeembekeisia lɛɛnga yaingainga ti ndɔgbɔhuyei yeembekei longa nga. Nasia Juublaa yaa tie wu wiengɔe kia ndɔgbɔhu ɔlivi wulii na, Ngewɔ pielɔ nasia Juublaa yaa tie ti kpekpei na majɔɔ fɛngɔ Juuisia wɛ. 18Faale na waa lɛɛ nasia hu ti ti yaini nga kia ngulu- bekengaa. Wa yee gu wu mamani wie? Ngulu-beke lekee mia a wue; wua ii le waa yɛ ngulu hapii gɔma hapii mia a wu gɔ. 19Kɛɛ ba ndelɔ bɛɛ, “Tɔnya le, kɛɛ ti mbekeisia yaliilɔ nga aako ti nya lomɛi majɔɔ.” 20Ji lɔnyangɔe. Ti mbekeisia yaliilɔ ajifa tii yɛ lani a Ngewɔ, bia bi loilɔ bi lomɛi jifa bi langɔ a Ngewɔ, kɛɛ baa mamani wie ti lomɛi wumbuva; kia baa lawo, luwa bi bi mahugbe. 21Ngewɔ ii manuni Juuisia ma, tia hii mbekei nasia a tie Ngewɔ kpatɛni; wu langɔ la a manulɔ wu ma? 22Mu tɔnga ji hu kia Ngewɔ hindawandangɔ kɛɛ kia ngi yagbalɛngɔ. Ngi yagbalɛngɔe a nasia ti jumbu wienga, kɛɛ ngi gbekpengɔ a wue -- ina wuii gbeni a hindei nasia wiela a gbekpe a wue fa; kɛɛ wu gbengaa a ti wiela, Ngewɔ a wua bɛɛ yalilɔ nga. 23Juuisia ti gbengaa a gangalaa a lala a Ngewɔ, Ngewɔ a ti yamalɔ ti loma wovei, ajifa a gulɔ a ti yamala na gbɔma. 24Nasia Juublaa yaa tie wu wiengɔe kia ndɔgbɔhu ɔlivi wulii yeembekei na ta ngali nga, na kpuangɔ Ngewɔ nda welei ma, ti too ɔlivi wulu hingɔe ya. Juuisia ti wiengɔe kia ɔlivi wulu hingɔi ji; tawao bɛwɛbɛwɛngɔ waa le Ngewɔ wɛ mbeke yaingaingɔi jisia yamava ti nda wuliisia ya. 25Tɔnya lɔwungɔ lɔ na, nya ndeengɛisia, na nya longɔ wu kɔɔ. A pielɔ wu gbe a gilila a wu nɛmahu leweyii. Ta lɔ a ji: Isrɛlbleisia ti woohugbɔndɛi ɛɛ lɛɛmbi kunafɔ va, a yɛlɔ lekee na i lo hu nasia Juublaa yaa tie ti kpɛlɛɛ ti mbawo majɔɔ. 26Tawao hii Isrɛlbleisia kpɛlɛɛ ta bawo. Kia Ngewɔ Gɔlɛi i ndeni la yɛ, “Mbawomɔi a gbua Jayɔn lɔ, i pienyamuisia kpɛlɛɛ gbule Jacɔpi bɔɔsɔɛisia gama, 27tawao ji lɔ nya hinda yangilingɔi le a tie, ji nga ti jumbuisia gbua ti ma.” 28Ajifa Juuisia ti gbelenga Ngowili Yekpei ma, Ngewɔ juwunga lɔ a tie wu va, wua Juublaa yaa wie. Kɛɛ jifa Ngewɔ i ti wumbunga, ngi ndiamɔisia mia a tie ti maadani va. 29Ajifa Ngewɔ ɛɛ ngi nɛmahu wote kɔlooni nasia ma a ti wumbu i ti luba. 30Wua Juublaa yaa a wie, wu gangailɔ a Ngewɔ wɔɔ; kɛɛ kiahuna na Ngewɔ i manunga wu ma ajifa Juuisia ti gangani. 31Na hu yakpe mia Ngewɔ manumɛi na wu majɔɔni, Juuisia ti falianga na a Ngewɔ, aako tia bɛɛ ti Ngewɔ manumɛi majɔɔ. 32Ngewɔ i nuuvui kpɛlɛɛ wunga jɔɔwɔ ya ajifa ta ganga a ngie; i ji wielɔ aako i manuma gɛ a ti kpɛlɛɛ. 33Ngewɔ gbatei i wɔlɔni kpa! Ngi nɛmahulewei kɛɛ ngi hindahugɔɔlei hu i bɔni kpa! Kitii nasia a nda, ye lɔ a gu i fasai? Ye lɔ a gu a ngi wiehindeisia yee piele hugɔɔla? 34Kia Ngewɔ Gɔlɛi ndeni la yɛ, “Yelɔ i Ndemɔi nɛmahu va gɔngɔ? Yelɔ a gu a ngi laahiila? 35Yelɔ wɔɔ i hani gbi venga ngi wɛ, aako yeekpɛi i yɛ ngi ma kpuava?” 36Ajifa Ngewɔ lɔ i hani gbi gbatɛni, tamia a pie hani gbi ti yɛ na tawao ngi vamia ti na. Ngɔlɔya i yɛ Ngewɔ wɛ kunafɔ va. Amiina.

ROMABLEISIA 12

1Faale naa, nya ndeengɛisia, Ngewɔ manuma wai va mu gama, nyaa wu manɛnɛma: a wua yekpe ve a saahanii vulungɔ Ngewɔ wɛ, na Kayemangɔ tawao hinda nɛingɔ le Ngewɔ wɛ. Hɛɛ yeetɔnyangɔi a ji lɔ mahoungɔ wu pie. 2Waa hindei na wokɔɔ dunyablaa ti piema, kɛɛ a pie Ngewɔ i ndii ninangaa ve wu wɛ, i wu nɛmahui yeenina ve. Na wiengaa wa gulɔ a Ngewɔ liima hindei gɔɔla na kpekpengɔ, a ngi liilɛli tawao magbuama ii ma. 3Kɛ ngauwandei va Ngewɔ pienga ngi majɔɔngɔ, ngɛɛ wu kpɛlɛɛ ma: waa wua yekpe lɛ nɛmahu aa lewe na ma mbɛngɔ ma. Kia aa yɛ hii, a wua yekpe mayei nɛmahu, numu gbi i kiti lewe ta yekpe ma kia ngi layii i na a Ngewɔ. 4Mbeke gboto lɔ mu gbuha yilei ma, tawao yeembeke gbi ngi yengei i gba pekeisia ti ndɛisia ma. 5Hii lɔɔ mu na, kia bɛɛ mu vahangɔ, kpuha yila lɔ a mue mua Kristi-ni, tawao mu wilingɔe mu nyɔunyɔ hu kia kpuha yilei yeembekeisia ti na. 6Faale mahoungɔ numu gbi i yenge a ngauwandei na Ngewɔ i fenga ngi wɛ gbama. Ina mu nda yengei a Ngewɔ wowili lelaa lɔ, mu pie kia mbɛngɔ mu layii ma a Ngewɔ. 7Ina kpɔma wiela le, mu kpɔma wie. Ina nungaa gaala le, mu ti gaa. 8Ina nungaa wekangaa ti lii nɛpɔ va le, mu pie. Numui na lekee a nungaa gɔ na hu i ngi yeya, i pie a pandawanda; numui na lekee tokulɔ a ngie, i yenge kpayangɔ; numui na lekee a manuma hindeisia wie a nungaa wekeisia, i pie a kohunɛ. 9Wu longaa a nungaa, a lo vulii a tie a wu lii gbi. A lolo a hinda nyamu, wu hɛlɛ a na kpekpengɔ. 10A lo a wu nyɔunyɔ kia njekohungaa, wu baa gɔɔ wu nyɔunyɔ ma a wu lii gbi. 11A yenge kpayangɔ, waa hawa wie. A yenge Ndemɔi wɛ a wu lii gbi. 12Wu liilomɛi i pie wu yɛ kohunɛ hu, a liilo hinda gbɔugbɔisia hu wu yɛ a Ngewɔ vɛli kpema gbi. 13A Ngewɔ mableisia gɔ ti vɛlingɔ, a ti gɔ a wu yeya-hanisia, wu wu wɛleisia lawo hotangɛisia gulɔ. 14A Ngewɔ manɛnɛ i nasia luba ta hitɛ wu wooma nyamuva a wue; a tɔnya, a ngi manɛnɛ i ti luba, baa ti jondu. 15Nasia ti goohunɛngɔ, wua tieni a goohunɛɛ, wu wɔɔ wua nasia ta yɛ wɔɔma. 16A gbewe numui gbi va mahɔngɔ. Waa mamani wie, tawao a luma ngenge na wiela ma bagɔma ii ma. Waa gili a wua yekpe kɛ wu nɛmahulewengɔe. 17Numu i hinda nyamu wiengaa a bie, baa hunyɔu ngi ma a hinda nyamu. A lapi wu na wie numui gbi ta nde tɛɛ kpekpengɔe. 18A hinda gbi wie wa gu ma, wua nungaa gbi wu yɛ ndiilɛli hu. 19Baa hinda nyamu hunyɔu numu ma a hinda nyamu kunafɔ, nya ndiamɔisia, kia waa na wie, a gbe ma Ngewɔ liilewei ta i pie. Ajifa Ngewɔ Gɔlɛi yɛ, “ ‘Nya lɔ nga hinda nyamu hunyɔu, nya lɔ nga yee kpɛi gbua,’ hii Ndemɔi ndeni.” 20Kia waa hinda nyamu hunyɔu a hinda nyamu, Ngewɔ Gɔlɛi yɛ, sao, “Ndɔlei yaa bi juwui ma, ngi gɔ a mɛhɛɛ; ngi bolohu i bengaa, ngi gɔ a njɛi i kpɔle; ajifa bi ji wiengaa kɛ bia teka gbandi waa heima ngi wumba.” 21Baa luma hinda nyamu aa wɛlɛ bi mahu, wɛlɛ hinda nyamu mahu a hinda yekpe wiela.

ROMABLEISIA 13

1Mahoungɔ wu gbi wu golo ndɔlɔ mahubleisia wɛ, ajifa mahumɔ gbi ɛɛ yɛ na ina Ngewɔ ii lumani ma, tawao mahumɔi na i na kiahuna, Ngewɔ lɔ i ngi wunga na. 2Faale numu gbi lekee a lapi a ndɔlɔ mahumɔi na i na kiahuna, i lapima a Ngewɔ hinda hugbatɛngɔi lɔ, tawao numu gbi a na wie, a pielɔ mahubleisia ti kpalɛ la ngi ma. 3Gbamaile maa ii houni nasia ta hinda yekpe wie ti luwa mahubleisia ma kɛlee nasia ta hinda nyamu wie. Wuii lonilɔ wu luwa mahumɔ ma, kɛ a hinda yekpe wie, kɛ mahumɔi vuii i wu latonga. 4Gbamaile Ngewɔ yengemɔ mia a ngie, i yengema bi nda gbekpeyei valɔ. Kɛɛ bi hinda nyamu wiengaa, luwa mahumɔi ma, ajifa nimisei na a pie i nimisei la numu ma ii ngi yeya gbama. Ngewɔ yengemɔ mia a ngie tawao ta lɔ a Ngewɔ nimisei yeekpɛi gbua nasia ma ta hinda nyamu wie. 5Sabui ji va mahoungɔ wu golo ndɔlɔ mahubleisia wɛ - Ngewɔ nimisei lekee va ii le, kɛɛ jifa gbɔma wu lii a nde wu ma yɛ mahoungɔ wu pie. 6Sabui ji va lɔ gbɔma mahoungɔ wu pawɛi gula, ajifa mahubleisia ti yengema Ngewɔ lɔ wɛ ji ta mahayengeisia wie. 7A ti gbɛi na gbua hɔɔ a yɛ wu ma; wu wu wui yeepawei gula kɛɛ wu jɔɔhani yeepawei, tawao wu bagɔma kɛɛ mbɛlɛhei ve nasia ti gbi wɛ. 8Numu gbi ngi gba aa yɛ wu ma; kpɛi na lekee mahoungɔ i yɛ wu ma ta lɔ a lola a wu nyɔunyɔ. Numu gbi lekee ngi longɔ a ngi mbaa nuuvu, i sawei hounga. 9Sawei nasia ti ndeni tɛɛ, “Baa pue gbua; baa numu waa; baa huma wie; baa mani nyamu wie bi heinyɔui yeya-hani ma,” sawei ji kpɛlɛɛ kɛɛ pekanga ti wooma ti jɔsɔngɔe sawa yakpei ji hu, “Lo a bi mbaa nuuvui kia bi longɔ a bia yekpe.” 10Numu gbi lekee ngi longɔ a ngi mbaa nuuvui ɛɛ hinda nyamu wie a ngie kunafɔ. Kɛ lola a bi mbaa nuuvui ta lɔ hɔɔ sawei gbi houla le. 11I gbua ji ma wu kɔɔlɔ kɛ, watii i hitinga kɔɔ wu wu njii hu. Gbamaile watii na Ngewɔ a mu bawo i lukpenga naa kpla i lewe watii na ma mu lani a Yesu Kristi a nina. 12Kpindi i longa te i gbɔyɔ, ngele i longa te i wo. A mu gbe a kpindihu hindeisia wiela, mu kɔhaakeisia wumbu lapiva fofoi hu. 13A mu mua yekpe mahugbe pandawanda kia nungei nasia ti heini fofoi hu; maa loko wili ndɔ gbolila hulewengɔ hu ɔɔ ndɔhou ɔɔ ngawufema hinda ɔɔ wɔji hinda ɔɔ ndapi ɔɔ tolo gbuala. 14Kɛɛ a Ndemɔi Yesu Kristi gɔ-haakeisia wumbu, wu gbe a wotela wu lii na gama a wa a jumbui, kɔɔ wu ngi liima hindeisia wie.

ROMABLEISIA 14

1A numui na gulu ngi lalei a Ngewɔ hugbɛɛngɔ tawao wua tieni waa ndabla wie kɔlooni ngi nda nɛmahui ma. 2Numu yila lalei a Ngewɔ a lumalɔ ngi wɛ hani mɛva, kɛɛ numui na ngi lalei a Ngewɔ hugbɛɛngɔ ɛɛ hua mɛ kɛ hakpɛi lekee. 3Numui na a hani gbi mɛ, aa lɛɛ numui na hu ɛɛ hani gbi mɛ tawao numui na ɛɛ hani gbi mɛ aa numui na magbua a hani gbi mɛ, ajifa Ngewɔ i ngi gulunga. 4Ye lɔ a bie ba kiti lewe numu wekei luwɔi hinda ma? Ngi nda luwɔkɛi lɔ a kiti lewe ina taa kpekpe wiema ɔɔ ɛɛ gu. Tawao a gulɔ i kpekpe wie ajifa Ndemɔi a gulɔ i pie i kpekpe wie. 5Numu yila a gililɔ yɛ baa i folo yila ma i lewe yee pekeisia ma, numu wekei a gili lɔ yɛ foloisia kpɛlɛɛ ti yakpe. Mahoungɔe numu gbi i la la vulii pɛiŋ kɛ na i gilima la pɔɔnangɔe. 6Numui na lekee a folo yila hinda wɔlɔ, i piemaa aako i Ndemɔi bɛlɛhei; numu gbi lekee i hani gbi mɛngaa, i piemaa aako i Ndemɔi bɛlɛhɛi, ajifa a siɛgbualɔ Ngewɔ ma yeemɛhɛɛ va. Numu gbi lekee i gangangaa a hani lɛɛngaa mɛlaa, i piemaa aako i Ndemɔi bɛlɛ hei, tawao a siɛgbualɔ Ngewɔ ma. 7Numu gbi ii na aa yɛ na ta yekpe lekee va, tawao numu gbi ii na aa haa ta yakpe lekee va. 8Mu vulungɔ yɛngaa la, kɛ Ndemɔi vamia mu vulungɔ, tawao mu haangaa, kɛ Ndemɔi vamia mu haani. Faale mu vulu-o, ɔɔ mu haa-o, Ndemɔi woo lɔ a mue. 9Gbamaile Kristi i haailɔ, i vulu i hiye hee hu aako i yɛ a fuublaa kɛɛ haablaa ti Lemɔi. 10Gbɛe wa wu mbaangaa gbɛmbo? Tawao gbɛe hɔɔ wa lɛɛ wu mbaangɛisia hu? Gbamaile mu kpɛlɛɛ ma loolɔ Ngewɔ gulɔ i mu gbɛɛmbo. 11Ajifa Ngewɔ Gɔlɛi ndeilɔ yɛ, “Kia lɔɔ nya vulungɔ, hii Ndemɔi i ndenga, numui gbi ta wombi gbakpalɔ nya gulɔ, tawao numu gbi a ndelɔ fofoi hu leiŋ kɛ nyalɔ Ngewɔ a nge.” 12A ngila ngila, numu gbi a ngi wiehindeisia hugɛlɔ Ngewɔ gulɔ, i sabui nasia gɛ i ti wieni fa. 13Faale naa, a mu gbe a mu nyɔunyɔ gbɛmbo la. Kia maa na wie, ji mia mahoungɔ wu wu huyili pieva: waa hinda gbi wie a pie wu mbaa Kristimamɔ i yaka ɔɔ i jumbu hinda wie. 14Ji mua Ndemɔi Yesu mu wilini hu, tamia i pienga ngi kɔɔngɔ vulii kɛ mɛhɛɛ gbi ii nɔhɔni Ngewɔ yaama a ngi wuma wee; kɛɛ ina numu langɔe la kɛ mɛhɛɛ gbi nɔhɔngɔe, kɛ ngi liima le kɛ nɔhɔngɔe ngi va Ngewɔ yaama. 15Bi bi mbaa Kristimamɔ gbalɛngaa ajifa bi nɔɔngɔ hani lɛɛngaa mɛla ma bɛɛ kpekpengɔe, kɛ bii yaa jiama a ndoma welei. Baa pie mɛhɛɛ na ba mɛ i numui na nyani Kristi haani ngi va. 16Faale, baa pie bi hinda yekpei aa yɛ a hinda nyamu nungaa wekangaa gama. 17Ajifa Ngewɔ mahayɛi ii yɛni a mɛhɛɛ mɛlaa kɛɛ ndɔ gbolila, kɛlee pɔɔnɛi kɛɛ ndiilɛli kɛɛ Kohunɛ na Ngewɔ Yafei a fe. 18Tawao numu gbi lekee i yengengaa Kristi wɛ a pelei ji, a pielɔ Ngewɔ goohu i nɛɛ, nuuvugaa ti ngi lato. 19Faale naa, a mu hindei nasia gɔkɔli ta wa a ndiilɛli, ta gbɔma gbɔ mu ma mu nyɔunyɔ gbayava. 20Mɛhɛɛ va, waa na nyani Ngewɔ i pienga. Mɛhɛɛ gbi numu a mɛlɔ kɛɛ kpulangɔ le hani gbi mɛva na a pie numu weka i jumbu hinda wie. 21Na pɔnangɔ pieva ta lɔ a gbela a huɛi mɛla, ndɔi gbolila kɛɛ hani weka gbi lekee wiela na a pie bi mbaa Kristimamɔ i jumbu hinda wie. 22Na bi langɔ la kɔlooni mɛhɛɛ mɛlɛi kɛɛ ndɔ gbolilei ma i yɛ wu luahu wua Ngewɔ. Kohunɛ a yɛlɔ numui ma ngi lii yahupungɔ i le kɔlooni na ma a luma i mɛ. 23Kɛɛ ina numu gbi hukitingɔe kɔlooni na ma a mɛ, Ngewɔ a njia wɛlɛlɔ ngi ma ji a yeemɛhɛɛ na mɛ, ajifa ii pieni lanaya hu;

ROMABLEISIA 15

1Mua mu lanayei gbayangɔ mahoungɔ mu gbɔ nasia ma tii gbayani hinda gbangɔi nasia hu ta ti male. Maa ii houni mu mua yekpe liilɛli. 2Kia maa na wie, mahoungɔ numu gbi i na wie a ngi mbaa-Kristimamɔi liilɛli kɛɛ tawao kpekpengɔ ngi va aako bi gbɔ ngi ma yɛva a Kristimamɔ gbayangɔ ngi lanayei hu. 3Ajifa na kpɛlɛɛ Kristi i pieni, ii pieni ta yekpe goohunɛɛva, kia Ngewɔ Gɔlɛi i ndeni la yɛ, “Ngɛlii na kpɛlɛɛ ti Ngewɔ yɛlini la ti yɛni a nya yɛlingaa lɔ.” 4Hani gbi nyɛingɔ Ngewɔ Gɔlɛi hu, nyɛingɔe mu gaava, aako mu liiloma majɔɔ, ajifa Ngewɔ Gɔlɛi a pielɔ mu mawulo wie, mu lii i gba. 5Ngewɔ na mawulo-lii kɛɛ ndiigbɛi a gbua ngi gama, i pie wu giliyii i yɛ yakpe a wu nyɔunyɔ a ji wa Yesu Kristi wokɔɔ, 6aako wu kpɛlɛɛ wu mu Lemɔi Yesu Kristi kɛɛ Ngewɔ wɔlɔ a ngoo yila. 7A wu nyɔunyɔ gulu hɔɔ kia Kristi i wu guluni la aako nungaa ti Ngewɔ lato. 8Gbamaile, ngi nde wu ma, kɛ Kristi i yɛlɔ a Juuisia ti yengemɔ kɛva kɛ Ngewɔ i Lahei wumbungaa, hu ɛɛ nyani, pieva kɔɔ Ngewɔ Lahei nasia i mbumbuni mu maadani gama ti wie, 9tawao gbɔma aako i pie nasia Juublaa yaa tie ti Ngewɔ wɔlɔ ngi manumɛi va. Kia Ngewɔ Gɔlɛi i ndeni yɛ, “Faale nga bi latolɔ nasia Juublaa yaa tie ti lia, tawao nga bi biyɛi latolɔ kaka ngule hu.” 10I ndeilɔ gbɔma yɛ, “A goohunɛ, nasia Juublaa yaa tie wu gbi, wua Ngewɔ nungaa!” 11Yɛ gbɔma, “A Ndemɔi lato, nasia Juublaa yaa tie; tawao nungaa gbi ti ngi lato !” 12Gbɔma, Aisaya ndeilɔ yɛ, “Jɛsi goohu lo a walɔ, Ngewɔ a ngi lɛlɔ i yɛ a nasia Juublaa yaa tie ti mahɛi tawao ta lii valalɔ ngi ma.” 13Ngewɔ na wu lii valangɔ ngi ma, i wu gɔ a kohunɛi waa kɛɛ ndiilɛli kia wu langɔ a ngie, aako Ngewɔ Yafei ngi gbayei i pie wu liivalamɛi maa i yaa a to. 14Nya mbaa Kristimableisia nya vulii ngi kɔɔlɔ kɛ wu gbekpengɔ waa le, tawao wu gaangɔ waa nahi wa gulɔ a wu nyɔunyɔ gaala. 15Ngi ndiilo ji wielɔ jifa ngi hinda lɛɛngaa hitɛnga wu wɛ kɔlɛi ji hu, ngauwandei va Ngewɔ fenga nya wɛ, 16yɛva a Yesu Kristi yengemɔ aako ngi yenge nasia Juublaa yaa tie ti wɛ. Nga saagbua yengei lɔ wie a ji nga Ngowili Yekpei na le a gbua Ngewɔ gama aako nasia Juublaa yaa tie ti wie kia saahanii na a Ngewɔ goohu nɛɛ ajifa Ngewɔ Yafei i wu yɛnga sɛwɛ. 17Faale, ajifa mua Yesu Kristi mu wilingɔ hu, nga gulɔ ngi mata gbua ajifa ngi yengema Ngewɔ wɛ. 18Nga yɛpɛlɔ naa a ndiilo, tawao a na lekee Kristi i pienga nyahu kɔɔ nasia Juublaa yaa tie ti golo Ngewɔ wɛ, a nya layie hu kɛɛ nya wiehindeisia hu wɛ, 19tɔmaselisia kɛɛ kabandeisia ti gbayei hu kɛɛ Ngewɔ Yafei gbayei. Faale naa, ji ngi yɛ jiama nga gbua Jelusalɛm nga wa Ilirikɔm lɛihu, ngi Ngowili Yekpei leilɔ vulii pandawanda hu gbi kɔlooni Kristi ma. 20Na yeemani i nya ma wɔɔ gba ta mia a ji nga Ngowili Yekpei le hindei nasia tii yaa Kristi hinda mɛnini na ngovama, aako ngaa numu weka nda yenge lɔtongɔi yakpua. 21Kia Ngewɔ Gɔlɛi i ndenila yɛ, “Nungei nasia tii ngi yɛpɛ leni ti ma ta tɔlɔ, tawao nasia tii yaa mɛnini ta yeembui gɔɔlɔ.” 22Ngengei nasia va ti yɛ nya ma, ngii yaa a guni wava wu gama. 23Kɛɛ kiahuna naa ngi nya yengei gbɔyɔnga tatei jisia hu tawao kia foo gboto va nya longɔ wɔɔ ngi wa wu gama, 24nya lii lɔ ma kɛ nga gulɔ naa a wala wu gama. Nya longɔ mua wueni mu lɔ ji nga yɛ lewema liva Sipeiŋ lɔleihu, wu gbɔ nya ma ngi li na, ji mua wueni ma kohunɛma hinda wie pɛiŋ kulo. 25Ngaamɛi ji naa nyaa lima Jelusalɛm a njoyo-hani Ngewɔ nungeisia wɛ. 26Ajifa Kristimablei nasia ti Masidonia kɛɛ Akaya lɔleihu ti hugbatɛnga a ti wuma wee hani veva gbɔva nyaniblɛi nasia ma ti Ngewɔ nungei nasia lia Jelusalɛm. 27Tia yekpe vulii lɔ ti ji hugbatɛni. Kɛɛ, a tɔnya, kpa lɔ ti ma gbɔva nyaniblaa ma; Juuisia ti nasia Juublaa yaa tie gɔilɔ hani yekpei nasia hu ti majɔɔni a Ngewɔ ti yafeisia va, faale mahoungɔ nasia Juublaa yaa tie ti langɔ a Kristi ti gbɔ Juu nasia ma ti langɔ a Kristi a ti yeya-hani nasia ta gbewe fa folo gbi. 28Ngi yeengengei ji gbɔyɔngaa, navoei na ti tɛni ma ti va ngi fe ti wɛ ndavengɔ, nga pele houlɔ liva Sipeiŋ, tawao nga folɔ wu ma yeepelei hu. 29Ngi wangaa wu gama, ngi kɔɔlɔ kɛ nga walɔ a Kristi luba lavengɔi. 30Nyaa wu manɛnɛma, nya mbaa Kristimableisia, mu Lemɔi Yesu Kristi sabui hu kɛɛ naa ndomɛi na Ngewɔ Yafei i punga mu lii hu, wu gbɛɛ nya ma mu Ngewɔ vɛli nya va. 31A Ngewɔ vɛli aako Judiablɛi nasia tii lani a Yesu Kristi taa nya gbalɛ, tawao Ngewɔ nungei nasia ti Jelusalɛm ti ngengei na gulu ngi piema ti wɛ. 32Faale ina Ngewɔ lumailɔ nga walɔ wu gama a kohunɛ waa, tawao mua wueni mu lɔla i pie nya goohu i nɛɛ tawao ngi lɛɛvu. 33Ngewɔ na ndiilɛli a gbua ngi gama, i yɛ wu kpɛlɛɛ gbla. Amiina.

ROMABLEISIA 16

1Nya longɔ ngi hugɛ a wue kɛ mu mbaa Kristi nyahaloi Fibi na ngengemɔ a ngie Sɔsiiblei nasia lia ti Sɛnkia teihu, numu yekpe waa lɔ a ngie. 2A va ngi ma Ndemɔi biyɛi hu, kia mahoungɔ Ngewɔ nungeisia ti pie, wu kpɔma gbi wie ngi ma a gbewe fa wu yeya; ajifa ta vulii ngi gbekpengɔ waa le a numu gboto kɛɛ nya vulii. 3Nga va Plisila ma taa Akuila, nya mbaa ngengeblaa Yesu Kristi yengei hu; 4ti ti lɛɛvui yɛni a saa nya va nyaa siɛ gboto gbuama ti ma nya yaangɔ ii le, maa nasia Juublaa gbi yaa tie ti langɔ a Yesu. 5Nga va gbɔma Sɔsiiblei nasia ma ta gomɛ ti wɛlei bu. Nga va nya liima ndiamɔi Ipinɛtɔs ma, na haalamɔ yɛla Esia lɔlei hu i lani a Kristi. 6Nga va Meri ma, na i yengenga kpayangɔ waa wu wɛ. 7Nga va Andrɔnikɔs ma taa Junias, nya mbaa Juu nasia maa tieni mu yɛ kpindiwɛlei bu; toblɛisia ti yɛ ti gɔɔlɔ pandawanda, tawao tia yese ti yɛla a Kristimablaa nya gulɔ. 8Nga va kaka Amplietɔs ma, nya liima ndiamɔi na ngi wilingɔ Ndemɔi hu. 9Nga va Ɔɔbanɔs ma, mu mbaa ngengemɔi Kristi yengei hu, kɛɛ Stekis, nya liima ndiamɔi. 10Nga va kaka Apɛlis ma, na ngi goloyii magɛngɔ leeŋ a Kristi wɛ. Nga va Aristɔbulɔs bondɛisia ma. 11Nga va kaka Hɛrɔdiɔn ma, nya mbaa Juu, kɛɛ Nakisɔs bondɛi nasia ti langɔ a Ndemɔi. 12Nga va kaka Trafina taa Traifosa ma, nasia ti yengema Ndemɔi wɛ, kɛɛ nya liima ndiamɔi Paasis, na i ngenge gboto wienga Ndemɔi wɛ. 13Nyaa fama gboto yoyoma Rufɔsi wɛ, Ndemɔi yenge gugbei na, kɛɛ ngi nje, na a hindei gbi wie a nge kia nga lola. 14Nga va Asinkritɔs ma kɛɛ Flɛgɔn kɛɛ Hamis kɛɛ Patrɔbas kɛɛ Hamas kɛɛ naa mu mbaa Kristimablaa wekei nasia gbi taa tieni ti hinda yila. 15Nyaa fama yoyoma Failɔogɔs gama taa Julia, kɛɛ Niliɔs taa ngi ndewenyahaloi, kɛɛ Olimpas kɛɛ Ngewɔ nungei nasia kpɛlɛɛ taa tieni ti hinda yila. 16A va wu nyɔunyɔ ma a ndoma-lii. Kristimableisia kpɛlɛɛ tia fama gboto yoyoma wu wɛ. 17Nyaa wu manɛnɛma, nya mbaa Kristimableisia wu wu mahugbe a nasia ta nungaa luahu nyani, ta nasia yaka ti langɔ a Ngewɔ, ta kaa weka gɛ i gba kaa na ma ti wu gaani la; waa lukpe ti gbla. 18Ajifa nasia ta hinda bondɛi nasia wie tii yengema mu Lemɔi Kristi wɛ, ti gbewengɔ lekee tia yekpe valɔ. Ti layia nɛnɛisia kɛɛ ndɛ latoi ta nungaa lato la a pielɔ ti nungaa wɛlɛ. 19Numui gbi ti kɔɔlɔ kia wu golongɔ tawao wu longɔ a Ngowili Yekpei tawao sabui ji va lɔ wu hinda i nya goohu nɛngɔ. Nya longɔ wu nɛmahulewe wie hindei na gɔɔva kpekpengɔ, waa nyamu wiela hugɔɔ. 20Tawao Ngewɔ na ndiilɛli a gbua ngi gama, a Seitana wɔpɔnyɛlɔ wu gɔɔbu hugutungɔ. Mu Lemɔi Yesu Kristi yauwandei i yɛ wu ma. 21Nya mbaa ngengemɔi Timoti yɛ a va wu ma kaka. Nya mbaa Juuisia Lusiɔs kɛɛ Jesin kɛɛ Sosipeta tia bɛɛ ta va wu ma. 22Nya nya Tatiɔs, ngi Pɔɔl layie jisia nyɛima nga va wu ma kaka kia wu mbaa Kristimamɔɔ i na. 23Nya hotakɛi Gayɔs, na Kristimableisia ta gomɛ ngi yeepɛlɛbu, ta vama wu ma kaka; Ilastɔs na navoo lamagbatɛmɔi a ngie tia mu mbaa Kristimɔi Kuaatɔs tɛɛ ta va wu ma kaka. [ 24Mu Lemɔi Yesu Kristi yauwandei i yɛ wu gbi ma. Amiina.] 25A mu Ngewɔ wɔlɔ! Na a pie wu lo kpaŋ wu lalei hu a ngie kia nga nde la Ngowili Yekpei na hu nga nde, Ngowili kɔloongɔ Yesu Kristi ma kɛ gbɔma na tɔnya lɔwungɔi i kɛnga, tɔnyɛi na ndɔwungɔ wɔɔ foo gboto-gboto va. 26Kiahuna na yeetɔnyɛi i gbuanga fofoya Ngewɔ lutuisia ti gɔlɔ nyɛingɔisia hu, tawao na kunafɔ Yewɔɛi i ndeni i pienga kɛnyɛi kpɛlɛɛ ti yeetɔnyɛi na gɔnga aako ti gbi ti la a Ngewɔ, ti golo ngi wɛ. 27Ngewɔ na yakpe nɛmahulewei ngi wɛ, ngɔlɔya i yɛ ngi ma kunafɔ va Yesu Kristi sabui hu! Amiina.

AMAZING GRACE BIBLE INSTITUTE