HINDEI MAGƐNI A JƆN

HINDEI MAGƐNI A JƆN 1

1Bukui ji i yɛni a Yesu Kristi ngi hinda gɛngɔi yeevaa gɛngɔ lɔ. Ngewɔ i yeehindei ji magɛilɔ a ngie aako i hugɛ a ngi yengeblaa gbɔɔ yɛ wama wiema hugutungɔ. Kristi i ngi Malikei yoyoilɔ ngi yengemɔi Jɔn gama yeehinde jisia hugɛva a ngie, 2tawao Jɔn i na kpɛlɛɛ lɔ hugɛnga mbei i hulɔni. Ngi vaa gɛngɔi lɔ kɔloongɔ ngowili ma na i gbuani Ngewɔ gama kɛɛ tɔnyɛi ma na Yesu Kristi i magɛni. 3Luba lɔ numui ma a kulɔma yiɛi jisia gaa kɛɛ nasia ma ta woolo ma tawao ta na wie nyɛingɔ hu; gbamaile yeendahou watii lukpengɔi gblanga. 4Nya, Jɔn, nya mia ngi kɔlɛi ji nyɛima sɔsii wɔfleisia gama ti Esia Lɔleihu: Ngauwanda kɛɛ ndiilɛli ti yɛ wu ma a gbua Ngewɔ gama, na i na haa, wɔɔ gbaa i na, tawao ngi walɛi hu, kɛɛ a gbua Ngafa Wɔfleisia gama ti looni ngi mahayɛi gulɔ, 5kɛɛ Yesu Kristi, ngi jeli wuaamɔ lɔnyangɔi na haala Hindolo le i hiyeni haablaa lia tawao maha a ngie mahangeisia kpɛlɛɛ maahu ti dunyei hu. I ndoma gɛnga a mue, tawao a hee na i pieni i mu wuailɔ fo a ŋamɛi na i puni mu va mu jumbuisia va. 6Kɛ i mu yɛnga a mahawu yila saagbua yengei wieva ngi Yewɔɛi kɛɛ ngi Kɛkɛ wɛ. Ngɔlɔya kɛɛ kpayei ti yɛ Yesu Kristi ma kunafɔ va! Amiina. 7A kpe lɛ, ta gbe wama nja gbilisia hu! Numui kpɛlɛɛ ta ngi lɔlɔ, kpɛlingɔ nasia bɛɛ ma ti ngi bɔni a sɔlii. Nungaa gbi ti dunyei hu ta wɔɔlɔ ngi va. Tɔnyɛi mia a ji! Amiina. 8Ndemɔi Ngewɔ wa yɛ, “Nya lɔ i lɔtoi nya ma tawao nyaa a gɛlɛ nya ma, nya ngi na haa, wɔɔ gbaa ngi na, tawao nya walɛi gbɔma hu.” 9Nya Jɔn, wu ndewei mia a nge, tawao ji mua Yesu mu wilingɔ hu, nya gbɛngɔe wu ma mɔnɛi hu a la wu ma kɛɛ ngi mahayɛi bɛɛ hu kɛɛ hinda gbɔugbɔu hu. Ti nya loilɔ tii yila hu na laa a Patmɔs Ngewɔ layie va ngi ndeni kpɛlingɔ tɔnyɛi le la ma na Yesu magɛni. 10Ndemɔi voloi ma lɔ Ngewɔ Yafei i yeini nya ma, kɛ ngi ngo lakpawa mɛninga a nya woma wee, kpuangɔ a bulu vɛwoi. 11Kɛ i ndea yɛ, “Na nyɛi bi hulɔma, bi yee kɔlɛi yoyo sɔsii wɔflei jisia gama: mia Ɛfisɔs, Simana, Paagamɔm, Taitira, Saadisi, Filadɛfia, kɛɛ Laodisia.” 12Kɛ ngi wotea tɔva yemia yɛpɛma nya gama. Humia ngi kanigbɔlu lambo vɛ wɔfla lɔni ti looni. 13Numu yɛlɔ ti lia ngi gbuangɔ a nuu hindoloi, bombani guhɛi ngi ma fongɔ ngi gɔwɔlaa kɛɛ kanigbɔlu gulei beebeengɔ ngi liima. 14Ngi wundiei golengɔ yɛla fo kia fande gowei na, kolengɔ fo kia hakɔi na, tawao ngi yaamɛisia bɛɛ ta voo dauŋ kia ngɔmbui voi na. 15Ngi gɔwɔisia mayɛlɔ a voo kia blasi gɔlu mayiangɔi na ta guaa kuliya ti kpua, tawao ngi woi gbuangɔ yɛla a njaveisia ti jundu woi. 16Tumbeka wɔfla ti yɛlɔ houni ngi yejama lokoi ya, kɛ kɔbowa laama houngɔ felei i gbuanga juaŋ ngi laa. 17Ji ngi ngi lɔni, ngi gulɛilɔ ngi gɔwɔbu ngi wie kia nuu haangɔ. Kɛ i ngi yejama lokoi wumbunga i nda nya ma, yɛ “Baa luwa! I lɔtoi nyalɔ ma, tawao ga a kpua nyalɔ ma. 18Nya mia ndɛvu nya yeya ngi haani wɔɔ, kɛɛ kpe lɛ, ngi vulunga kunafɔ ta ngi nda kunafɔ. Kpaya lɔ nya yeya hee maahu kɛɛ ndɔu. 19Faale jiahui nasia nyɛi ba hu lɔ, yee jisia ti wiema kiahuna kɛɛ nasia ta wie ji woma. 20Kanakoi yeembui lɔ a ji kɔlooni tumbeka wɔfleisia ma bi tɔni nya yejama lokoi ya kɛɛ kanigbɔlu lambo vɛ wɔfleisia; tumbeka wɔfleisia ti looni malika wɔfleisia lɔ va ti sɔsii wɔfleisia maahu, tawao lambo vɛ wɔfleisia ti sɔsii gomɛ wɔfleisia lɔ va.

HINDEI MAGƐNI A JƆN 2

1“Malikei gama Ɛfisɔs sɔsii maahu, kɔlɛi nyɛi bɛ: “Ngowili lɔ i gbuama numui gama tumbeka wɔfleisia ti ngi yejama lokoi ya, na a ŋia lambo vɛ wɔfleisia lia. 2Ngi jiahuisia kpɛlɛɛ gɔɔlɔ wu kama; i gbɛli mɔnɛ hulewengɔi ma a la wu ma kɛɛ wu gulɛi hinda gbɔugbɔu bu. Ngi kɔɔlɔ kɛ wuɛɛ loko hei pienyamubleisia bu, tawao wu nasia hugɔnga ta tia yekpe loli a tobla, kɛɛ i gbuanga ke wu yaama kɛ ndɛɛ gulablaa gbama mia a tie, tii yɛni a tobla. 3Ndiihoublaa mia a wue tawao kpalɛ hulewengɔ gbotoa langɔe wu ma nya biyɛi woma, na hu gbi, wuii gbeni a tola nya woma nava. 4Kɛɛ ji mia wu hinda gbalɛngɔ la nya ma: Wuii loni a nge kiahuna kia haalei yɛ na. 5I yɛ wu nɛmahu kɛ wu yakanga huguhangɔ! A wounve wu jumbuisia ma wa ya hindei nasia wie haalɛi hu wu yɛ pie. Wuii wounveilɔ wu jumbuisia ma, nga waa wu maahu ngi wu lambo vɛi gbua ngi loomɛi. 6Kɛɛ gbɔɔ wu hinda nɛngɔ la mbɛ yɛni a jilɔ: Wu lolongɔe a tuve nasia ti Nikolati woomableisia hu, kia nya bɛɛ nya lolongɔ a tie fa. 7“Numui na ngoli i ngi ma njia mɛniva, i woolo gbɔɔ Ngewɔ Yafei ndema sɔsiisia ma! “Nasia ta temaya mɛ nga kpaya wuaalɔ ti hu mɛliva ndɛvu wuliya i looni Ngewɔ gatei hu.” 8“Malikei gama Simana sɔsii maahu, kɔlɛi nyɛi bɛ: “Ngowili lɔ i gbuama numui gama yeetɔtoomɛi a ngie kɛɛ yeekɛlɛmɛi, na wɔɔ i haani kɛ i yamaa i vulu. 9Ngi ndii nyani gɔɔlɔ wu houngɔ kɛɛ hani vɛli na hugbi wu gbatɛngɔi! Ngi njɛpɛ-a-ngie niwi nasia gɔɔlɔ lema kɔloongɔ wu ma a nasia ta tia yekpe loli a Juublaa, kɛɛ tii yɛni la kulobɛɛ, ti yɛni a seitana mablɛisia lɔ! 10Gbɛogbɛ aa yɛ wu gama a huluwa i wama lama wu ma. A woolo! Seitana lɔ wama wu lɛnga gɔlɛma a pie i la a sabu ti wu lɛnga wili kpindi wɛlei bu; ndiinyani gboto a yɛlɔ wu ma haaŋ jii puu va. A lii loo nya ma, ti yɛ bɛɛ wu waama, nga maha bɔlɔ velɔ wu wɛ na yɛni a ndɛvu yekpe. 11“Numui na ngoli i ngi ma njia mɛniva, i woolo gbɔɔ Ngewɔ Yafei ndema sɔsiisia ma!” “Nasia ta temaya mɛ, hee yeepomayee ɛɛ gu kulo bɛɛ ti ma.” 12“Malikei gama Paagamɔm sɔsii maahu, kɔlɛi nyɛi bɛ: “Ngowili lɔ i gbuama numui gama bowa mɛɛ houngɔ laama felei ngi yeya. 13Ngi hugɔɔlɔ kɛ mia wu heini na, nalɔ Seitana i heima gbatea na. Wu lɔnyangɔe a nge, tawao wuii gbeni a la la a nge ji ti Antipas waani na yɛ seli yia yekpe le kɔloongɔ nya ma mia seitana i hei na. 14Kɛɛ hinda lɛnga lɔ na na piengɔ wu hinda ii nɛɛni bɛ: Nungaa lɛnga lɔ bi ma ti tongɔ Balam gaaisia woma, na i Balak gaani a Isrɛlbleisia wuhu nyanila jumbu wuliva nda mɛhɛɛ wooma ta kpua a saa nɔmɔliisia ma, kɛɛ gbɔma a pue nyamu gbualei. 15Hii lɔɔ bɛɛ nungaa gbɔma ti na wu lia ti toongɔ Nikolatibleisia ti gaa woma. 16Faale a wounve wu jumbuisia ma! Wuii wounveilɔ, nga waa wu maahu hugutungɔ ndapi wɛlɛva yeenungɛi nasia ma a bowei na a gbua a nya laa we. 17“Numui na ngoli i ngi ma njia mɛniva, i woolo gbɔɔ Ngewɔ Yafei ndema sɔsiisia ma! “Nasia ta temaya mɛ, nga luba mɛhɛɛ kulo wɛndɛlɔ ma ngi fe ti wɛ. Nga gbɔma kɔtii gowei ngila ngila velɔ ti gbi wɛ nda nina nyɛingɔ ma, na numu weka gbi ɛɛ kɔɔ kɛlee numui na a ngi lokoi yahɛi i mbumbu. 18“Malikei gama Tayatira sɔsiibleisia maahu, kɔlɛi nyɛi bɛ: “Ngowili lɔ i gbuama Ngewɔ Hindoloi gama, ngi yaamɛi a voo dauŋ kia ngɔmbui na, ngi gɔwɔisia ti maa a voo kia blasi gɔli na mayiangɔ fo. 19Ngi jiahuisia gbi gɔɔlɔ wu kama. Ngi domɛi yɛyii gɔɔlɔ wu hu, wu lanayei, wu yengeisia, kɛɛ wu gula hinda gbɔugbɔu bu. Ngi kɔɔlɔ kɛ wu wiehindeisia ti fesani poloŋ ti lewe haalei huma. 20Kɛɛ ji mia wu hinda nya lii houngɔ fa: Wu loko heingɔi nyapoi na bu Jɛsɛbɛ, na i tayekpe lolima a Ngewɔ lutui. Taa nya yengebleisia gaama a pie ta yaka ta lewe a pue nyamu gbualei tao ta mɛhɛɛ mɛ kpuangɔ a saa fengɔ nɔmɔliisia wɛ. 21Ngi ngi gɔnga a lɔwɔ wounve va ngi jumbuisia ma, kɛɛ ii yaa kuluni ji ma. 22Faale nya piema i la heegbɛ yalema mia tia nasia ti yɛ pue gbua a ngie ta gbalɛ na hulewengɔ. Ngi ji wiemaa hugutungɔ kɛlee ti wounve yeenyamu hulewengɔi jisia ma. 23Nga nasia bɛɛ waalɔ ti toongɔ ngi woma, kɛ nawooma lɔ sɔsiisia kpɛlɛɛ ta lii hei ma kɛ nya mia ngi nuuvuisia ti nɛmahu giliyeisia gɔɔngɔ kɛɛ ti hamiisia. Nga numui gbi pawalɔ kia ba yengela. 24“Kɛɛ wua kpɛlɛɛ wu Tayatira wu toongɔ ii le yeekaa nyamui ji woma, tawao wuii yaa gaani a na ta toli a ‘Seitana hinda mbulɔwungɔi,’ ngɛɛ yɛma nga kaha weka wulɔ wu wumba. 25Kɛɛ a hou kpauŋ na ma wu yeya i too lɔwɔi ma nga wa. 26Nasia ta temaya mɛ, ti lo na wiema nɛngɔ bɛ i to fa too voloi ma, nga kpaya yakpei na velɔ ti wɛ nya kɛkɛ feni bɛ: Nga kpaya wuaalɔ ti yeya yɛva ndɔleisia maahu, ta mahaya yenge wie ti maahu a kɔlu vomɛi ti huwongolo va ti gbukpulu kia pɔlɔvɛi a gbukpuula. Nga gbɔma ti gɔlɔ a ngenda lumbekei. 29“Numui na ngoli ngi ma njia mɛniva, i woolo gbɔɔ Ngewɔ Yafei ndema sɔsiisia ma!”

HINDEI MAGƐNI A JƆN 3

1“Malikei gama Saadisi sɔsii maahu kɔlɛi nyɛi bɛ: “Ngowili lɔ i gbuama numui gama ngafa wɔfleisia ti ngi lokohu kɛɛ tumbeka wɔfleisia. Ngi jiahuisia gbi gɔɔlɔ wu kama; wu malɔwɔi gungɔi hugbi tɛɛ wua fuluyahu, meimaa bɛɛ wu haangɔe! 2Faale a gbɛli wu wuu wu hiye wu towa loo na bu i longa wu yeya, waa loma kɛ huhaanga i gbɔyɔi gbɛlɛɛŋ. Gbamaile ngi kɔɔnga kɛ jiahusia wu kama ma ii hou kulo bɛɛ nya Yewɔɛi yama. 3Faale, a gili a gbɔɔ ti wu gaani la tawao wu laila; a yaa ti wie wu wounve wu jumbuisia ma. Wuii wuilɔ wua hiye, nga gbualɔnga wu maahu kia humamɔ, tawao wuɛɛ watii gɔɔ nga wa wu mahu. 4Kɛɛ wu lɛnga lɔ mia Saadisi wu mavei nyamungɔ ii le dunyama hindeisia hu. Wua lɔ nga jɛsia a wue, fɛmgbɛ gulei yilingɔ wu ma, gbamaile bɛngɔ a yɛla wu ma i wie hii. 5Nasia ta temaya mɛ ti mayilingɔ a yɛla a fɛmgbei kia jisia ti na, tawao ngɛɛ ti biyeisia lufe fulubleisia ti gɔlɛi hu. Nya Kɛkɛ yaama mia kɛɛ ngi malikeisia nga loona leiŋ ngi nde ngɛ nya womia a tie. 6“Numui na ngoli ngi ma njia mɛniva, i woolo gbɔɔ Ngewɔ Yafei ndema sɔsiisia ma!” 7“Malikei gama Filadɛfia sɔsii maahu kɔlɛi nyɛi bɛ: Ngowili lɔ gbuama kayemamɔi kɛɛ tɔnyamɔi gama, na Devidi jii houni ngi yeya, a na laawo numu ɛɛ kpɔu, i na gbɔwu numu ɛɛ ndawo. 8Ngi wu wiehindeisia gɔɔlɔ. Ngi dui laawonga gba wu gulɔ, na numu gbi ɛɛ gu aa kpɔwu. Ngi kɔɔlɔ kɛ kpaya wulo lɔ lɛ wu hu, tawao wu tonga nya layie woma wuii mawali nya ma. 9A woolo lɛ! Seitana mablei nasia ti tia yekpe lolima a Juublaa, kɛɛ tii yɛnila kulo bɛɛ, nga pielɔ ti wa ti maawɛlɛ wu gɔɔbu ti kpɛlɛɛ ti kuluma kɛ nya longɔi a wue. 10Kia wu tonga nya layie woma a gula hinda gbɔugbɔu bu, nya bɛɛ nga wu mabawolɔ kpemɛi na jangata wama gulama dunyableisia kpɛlɛɛ ma ti hugɔva mia dunyei hu. 11Nyaa wama hugutungɔ. A hou kpauŋ na ma wu majɔɔnga, aako numu gbi aa sabu jɔɔ temaya mawaa ngombo va wu yeya. 12Numui na a temaya mɛ nga ngi yɛlɔ a ndɔkɔ nya Yewɔɛi yepɛlɛbu, tawao ɛɛ gulɛi na kunafɔ. Nga nya Yewɔɛi ngi biyɛi nyɛilɔ ngi ma kɛɛ nya Yewɔɛi ngi lawai yeembiyei, na yɛni a Jelusalɛm yeetaa ninɛihu a hiye ngelegoohu nya Yewɔɛi a jei. Tawao nya biyɛi yeeninɛi bɛɛ nga nyɛilɔ ngi ma. 13“Numui na ngoli ngi ma njia mɛniva, i woolo gbɔɔ Ngewɔ Yafei ndema sɔsiisia ma!” 14Malikei gama Laodisia sɔsii maahu kɔlɛi nyɛi bɛ: “Ngowili lɔ i gbuama Amiina gama, na liilomamɔ a ngie kɛɛ tɔnya jeli wuaamɔ, na hani kpɛlɛɛ Ngewɔ kpatɛni yeemahɛi a ngie. 15Ngi wu wiehindeisia gɔɔlɔ. Wu luvayiisia hu a nge, ngi kɔɔlɔ kɛ wuii yaa gbuani nya woohu tawao wuɛɛ gahu gbua nya ma. Mahoungɔ wu yɛ yeekakayila ma ɔɔ pekei ma! 16Kɛɛ jifa wu lii yablangɔ wu lanayei hu a nge, nga gbelelɔ wu ma ngi bali a wue a nya laa we! 17Wua ndema wɛ, ‘Nya gbatɛngɔe nya lɛngɔ gulɔma, hani gbi lɔ nya yeya yeehami nya houngɔ.’ Kɛɛ wuii kɔɔ kia wu ŋaibongɔ tawao wu mamaungɔ la! Wu nyaningɔe, wu magbukangɔ, tawao wu wumungɔ. 18Faale nyaa wu lahii ma kanigbɔlu yeyava nya ma, kanigbɔlu yeesɛsɛɛ, aako wu gbatɛ. A fɛmgbei bɛɛ yeya wu gili wua yekpe ma a kulɛi wu wu magbuke yeengufei yambu lɔwu. A gaama gbalɛ hale yeya siava wu yaamɛisia ma, aako wu gu a kulɔ lɔ la. 19Nasia nya longɔ a tie tia lɔ nga ti makɛ nga yama nga tɔɔya yei ti ma. Faale, a pie kaaka wu wounve wu jumbuisia ma. 20A woolo lɛ! Nyaa looni pɛlei laama nga ndalewe, numu i nya wo mɛningaa i ndawo nya gulɔ, nga wuaalɔ ngi hei mu ngi mɛhɛɛ mɛ, mu nya bɛɛ nde mɛ. 21Nasia ta temaya mɛ nga kpaya velɔ ti wɛ heiva nya gbla nya maha heimi, kia lɔɔ ngi temaya jɔnga la ngi heini nya kɛkɛ gbla ngi maha heimi. 22“Numui na ngoli ngi ma njia mɛniva i woolo gbɔɔ Ngewɔ Yafei ndema sɔsiisia ma!”

NDEI MAGƐNI A JƆN 4

1Ji wooma ngi henga weka wielɔ, ngi dui lɔ kulangɔ ma gba ngelegoohu. Kɛ ngoi yeehaalayei wɛi na haa ngi mɛnini kpuangɔ a bulu vɛ wo ndenga nya ma yɛ, “Lɛ mbeindo ngi hugɛ a bie gbɔɔ wama wiema ji wooma.” 2Ngaama kɛ Ngewɔ Yafei nya huvenga, kɛ ngi hinda lɔnga ngelegoohu numui heni yeemaha heimei. 3Ngi yambu yɛlɔ a voo kia lee jasipa gɔtii nɔmingɔi na kɛɛ kanɛlia gɔtii gbɔugbɔi na, tawao yee maha heimei galangɔ yɛla a niginangei a voo dauŋ kia ɛmiladi gɔtii na. 4Mia maha-heima wai yɛ na maha gblanga gbakoleisia ti jika gungɔ a nuu gbɔyɔngɔ mahu naani ti na galangɔ yɛla ti na gomɛngɔ fio ti mayilingɔ a fɛmgbei, kanigbɔlu bɔleisia ti ti wumba. 5Gbuama a maha heimi yaka we maimai yɛlɔ a tewehu, ngelei a baahugbua a yia. Yee maha heimei gulɔ, hɛmuvo loongɔnga wɔfla ti yɛlɔ na, nasia ngafa wɔfleisia a tie ta Ngewɔ magbee gbua. 6Mia gbɔma maha heimi gulɔ yaka, hani yɛlɔ na kia njeiyɛi na, dokengɔ kana kia mɛmɛɛ goohu na. Ndɛvu vuhani naani mia ti yɛ yeemaha heimi galangɔ a yee tɔɔhuisia we, ti yaamɛisia ti jiangɔ gbi ti luwuma a ti gulɔ we kɛɛ ti woma we. 7Yee haala vuhani gbuangɔ yɛla a sugbui; yee feleyei gbuangɔ a nika hini; yeesawayei gbuangɔ a nuuvui; kɛɛ na yeenaaniyei gbuangɔ a kowɛi gowoma. 8Yeendɛvu vuhani naani nasia yeeyilayee gbi kpaki weita mia yɛ ngi ma tawao ti yaamɛisia ti jiangɔ yɛla kpɛlɛɛ ti luwuma a ti gulɔ kɛɛ ti woma we. A folo kɛɛ kpindi, ti yɛlɔ a gule yaa ta hugbawa tɛ: “Kayemamɔ, kayemamɔ, kayemamɔ mia a Ndemɔi Ngewɔ waa, na i na wɔɔ gbaa, i na kiahuna, kɛɛ ngi walɛi hu.” 9Yeendɛvu vuhani naani jisia ti ye gbi yɛ gɔlɔya kɛɛ mbɛlɛya kɛɛ siɛgbua wuleisia yaani numui gama i heini maha heimi, na i na kunafɔ ta ngi da kunafɔ, 10kpakolo nuu gbɔyɔngɔ mahu-naanisia ta gulalɔ ngi gɔɔbu maha heimi ta ngi vɛli, na i na kunafɔ ta ngi da kunafɔ. Ta maha bɔleisia gbualɔ wumba ti kula maha heimi gɔɔbu, ta wule tɛ, 11“Mu Lemɔi kɛɛ mu Yewɔɛi, bɛngɔ bi ma nungaa ti gɔlɔya kɛɛ tato lɛ bi ma bi gbayei va. Ajifa bia lɔ bi hani gbi gbatɛni, tawao a bi nyɛkɛ le bi ti gbatɛni bi ndɛvu wuaa ti hu!”

HINDEI MAGƐNI A JƆN 5

1Ngi kɔlɔ gotongɔi lɔilɔ numui yɛ heini maha heimi ngi yejama lokoi ya hunyɛingɔ a kulɔ we kɛɛ poma we, yeendamei heingɔ ma na wɔfla. 2Kɛ ngi malika wa yila lɔnga a hee la yɛ, “A bɛ yelɔ ma kɔlɔ gotongɔi ji laawo va?” 3Kɛɛ numu ma ii jɔni aijɛnɛ ɔɔ ngelebu ɔɔ ndɔu bɛɛ aa gu i kɔlɔ gotongɔi na laawo i hugbe. 4Ngi wɔɛilɔ ngagbalɛngɔ wa ajifa numu gbii yɛ na bɛngɔ ngi ma a gu i kɔlɔ gotongɔi na vulo i hugbe. 5Kɛ kpakoleisia yeeyilayee ndenga nya ma yɛ, “Gbe a wɔɔla. Kpe lɛ! Sugbu Wai, na maha a ngie i gbuani Juda bondei hu, tɔwɔmamɔ wai ngi maada wɔɔ a mahɛi Devidi, i temaya mɛa. Faale tamia a gu i kɔlɔ gotongɔi ji yeendama gbɔwuma wɔflei laawo.” 6Kɛ ngi Mbalaloi lɔnga i looni maha-heimɛi yee ndiahu, fuuhani naanisia tia kpakoleisia ti ngi galangɔ, piengɔ bɛ ti ngi waalɔ, ndowoi ngi ma wɔfla kɛɛ gaama wɔfla, nasia ti looni ngafa wɔfleisia va Ngewɔ i ti yoyoni dunyei hu. 7Kɛ Mbalaloi ya i kɔlɔ gotongɔi wumbu numui yejama lokoi ya i heini maha heimi. 8Kia lee i na wieni, kɛ fuuhani naanisia tia kpakolo nu gbɔyɔngɔ mahu naanisia ti mawɛlɛnga Mbalaloi gɔɔbu, yeengila gbi lee kɔningɛi houni ngi yeya kɛɛ kanigbɔu boleisia ndavengɔ a siimijii, na looni hɛɛsia va Ngewɔ mableisia ta pie. 9Kɛ ti gule nina yaanga, tɛ: “Bia lɔ bɛngɔ bi ma kɔlɔ gotongɔi wumbuva bi yee ndamɛisia laawo. Jifa ti bi waalɔ tawao a bi ŋamɛi lɔ bi ngumawo wiala Ngewɔ gama nungeisia va ta gbua kɛnyɛ yie gbi hu, layie gbi hu, ndɔlei gbi hu, kɛɛ kɛnyɛi gbi hu. 10Bi ti yɛnga a mahawu saagbuablaa a tie mu Yewɔɛi magbee gbuava, tawao ta yɛlɔ mahayahu dunyei maahu.” 11Gbɔma kɛ ngi kpeei wuaanga tiiŋ, kɛ ngi malikeisia lɔnga ti vahangɔ hulewengɔ gbo! Ti yɛ looni maha heimi lɔ taa fuuhani naanisia, kɛɛ kpakoleisia ti na galangɔ, 12Kɛ ti woo gbuanga ma a gule jɔɛlɛ wa tɛ: “Bɛngɔ kpa Mbalaloi ma ti paani, kpaya jɔva, kɛɛ kpatɛi, kɛɛ nɛmahulewe, kɛɛ kahu gbua, kɛɛ mbɛlɛhei, kɛɛ gɔlɔya, kɛɛ tato!” 13Kɛ gbɔma ngi mɛiga kpatɛ hani gbi lee ti ngelegoohu kɛɛ ngelebu, nasia ti ndɔu kɛɛ nasia ti gboyei hu, kpatɛ hanisia gbi lee ti dunyei hu, ti woo gbuama a gule tɛ: “Bia bi gama bi heini maha-heimɛi kɛɛ bia bɛɛ gama Mbalaloi a bie, tato kɛɛ mbɛlɛhei, gɔlɔya taa kpaya ti yɛ bi ma kunafɔ taa ngi da kunafɔ!” 14Kɛ fuuhani naanisia ti ndahounga tɛ, “Amiina!” Kɛ kpakoleisia ti mawɛlɛnga ti Ngewɔ vɛli.

HINDEI MAGƐNI A JƆN 6

1Kɛ ngi Mbalaloi lɔnga i kɔlɔ wɔfleisia yeehaalayei laama nyani i ndawo, kɛ ngi fuuhani naanisia yeengila wo mɛninga, ngi woi kia lee ngelei a baahugbuaa, a nde yɛ, “Wa!” 2Kia ngi na gbeni tiiŋ kɛ ngi soi yeekowei lɔnga looni, ndikpei houni yeesiamɔi yeya; maha bɔlei wuaangɔ lekee ngi yeya kɛ i gbuanga pu i li kia kugba a yɛ lima kɔ gɔma. 3Kia Mbalaloi i kɔlɛi yeefelei laama nyanini i ndawo, kɛ ngi mɛninga fuuhani yeefeleyei i nde yɛ, “Wa!” 4Kɛ soi yeepekei kpɔlungɔ jeele i gbuanga. Ngewɔ i kpaya wuailɔ yeesiamɔi hu pieva ndiilɛli i baa dunyeihu, aako nuuvungaa ti ya ti nyɔunyɔu waa; ti kɔ-bowei yeendakpa wa wuailɔ ngi yeya. 5Mbalaloi i kɔlɛi yeesawayei laama nyanilɔ i ndawo; kɛ ngi na gbenga, humia ngi soi yeetɛli lɔni, yeesiamɔi hani huma-hakeisia ti houni ngi yeya. 6Kɛ ngoo i gulanga nya wolihu kpuangɔ a numu woi a gbua a mia yaka we fuuhani naanisia ti yɛ na, a nde yɛ, “Mbangaa kɔpu yila lɔ na folo yila yenge va, kɛɛ kete ngɛlɛ kɔpu sawa folo yila yengei va. Kɛɛ ɔlivi wuloi taa ndɔi baa hunyani.” 7Kia Mbalaloi i kɔlɛi yeenaani laama nyanini i ndawo, ngi fuuhani yeenaaniyei wo mɛnilɔ i nde yɛ, “Wa!” 8Ngi na gbeilɔ kɛ ngi soi lɔnga maa ya puulu, numui heini maahu ngi laa a Hee, yeepekei heini poma ngi laa a ndɔu. Ti kpaya majɔɛilɔ yɛva dunyei yeekaka yila maahu kaka naani goohu, kɔɔ ti yeenungeisia waa a kɔ wɛlɛla ti ma, kɛɛ ndɔlei, kɛɛ heegbei yeelasii gbi, kɛɛ na a fula huangɛisia wilila ti ma. 9Kia Mbalaloi i kɔlɔ gotongɔi yeelɔɔluyei laama nyanini i ndawo, kɛ ngi nasia wɔɔ ti ti waani ti yɛ Ngewɔ yie le tawao ta nde tɔnya ma, ti yafeisia lɔnga ti heini saagbuamɛi gɔɔbu. 10Kɛ ti ndea yele lakpawa hu tɛ, “Aa Ndemɔ wai, kayemamɔi kɛɛ tɔnyamɔi a bialɔ! Hu yeelɛmbima pɛiŋ baa yaa dunyableisia gbɛmbo bi jangata yei ti ma mu waa va?” 11Kɛ ti ti gbi gɔnga bombani gowei hu a ngila ngila; kɛ malikei i ndenga ti ma yɛ ti lɛɛvu lɛ kulo haaŋ i lohu ti ti mbaa ngengebleisia kɛɛ ndewengeisia ti wama ti waama ti jikei i gu i ndave a tia bɛɛ ti nde wɔɔ. 12Kia Mbalaloi i kɔlɔ gotongɔi yeeweitayei laama nyanini i ndawo, ndɔlei i gbɛlilɔ jiwijiwi, foloi i lɛlikpi i gbindi kia kɔndi gula lɛilɛi yeekpɔtui na, kɛ ngalui bɛɛ i gbɔlunga jeele kia ŋamɛi na. 13Tumbekeisia ti gbɛkpɛilɔ ngeleima ta gula dunyei hu kia lekee ngului na na ngi wuɛisia tii yaa hitini ta gbɛkpɛla ji viivii vɛfɛi a gula. 14Kɛ ngelei i blanga fa i gotoma i wie kia kɔlɔ gotongɔi na, tawao ngiyei gbi lekee kɛɛ tiisia gbi lekee ti guleilɔ ti yɛmɛisia. 15Kɛ dunyama mahangeisia, tomableisia, kɔ-gugbeisia, kpatɛbleisia, kpayableisia, kɛɛ na nungaa wekangaa kpɛlɛɛ i gbɛlɛ nduwɔ ma kɛɛ numu ma nduwɔ yaa ngie, ti ya ti lɔwu puisia hu kɛɛ fawa waawaisia bu ti heini ngiyeisia maahu. 16Tɛ ngiyeisia ma taa fawa waawaisia, “kɔnɛ a gula mu mahu wu mu lɔwu numui na yaamɛisia ma i heini maha heimi kɛɛ Mbalaloi bɛɛ ngi liilewe hulewengɔi ma! 17Gbamaile, folo wai i hitea ma ti liilewei gɛ va, tawao yelɔ a gu i loonga?”

HINDEI MAGƐNI A JƆN 7

1Ji lewengɔ woma, ngi malikangaa naani lɔilɔ ti looni dunyei yeesɔku naanisia hu ta dunyei yeefɛfɛ naanisia huhou aako fɛfɛ gbi aa wa a dunyei hu we, gboyei maahu we kɛɛ nguluisia. 2Kɛ ngi malika weka lɔnga a gbua a foloi hiye welei hu we, Ngewɔ lokoi yeekpɔ wu hakei houni ngi yeya. I gbandɛilɔ malika naanisia la Ngewɔ kpaya veni ti wɛ dunyei nyani va kɛɛ gboyei. 3Yɛ ti ma, “Waa dunyei kɛɛ gboyei kɛɛ nguluisia ti nyani lɛ kɛ lee ma Ngewɔ lokoi yeekpɔi wu pɛiŋ ngi yengebleisia ti lawaa.” 4Na wooma ngi mɛnilɔ kɛ nasia Ngewɔ lokoi yeekpɔi wuni ti ma ti jika guilɔ a: numu tauji hɔndɔ yia kalɛ nuu fele gbɔyɔngɔ mahu naani, ti kpɛlɛɛ ta gbua Isrɛel gɛnyɛi hu. 5Gbuama Juda gɛnyɛi hu, numu taujii mahu puu mahu fele mia wuni ti ma. Gbuama Lubɛn gɛnyɛi hu, numu tauji mahu puu mahu fele. Gbuama Gad gɛnyɛi hu, numu tauji mahu puu mahu fele. 6Gbuama Asa gɛnyɛi hu, numu tauji mahu puu mahu fele. Gbuama Naftali gɛnyɛi hu, numu tauji mahu puu mahu fele. Gbuama Manasɛ gɛnyɛi, numu tauji mahu puu mahu fele. 7Gbuama Simiɔn gɛnyɛi hu, numu tauji mahu puu mahu fele. Gbuama Livai gɛnyɛi hu, numu tauji mahu puu mahu fele. 8Gbuama Jɛbulɔn gɛnyɛi hu, numu tauji mahu puu mahu fele. Gbuama Josɛfi gɛnyɛi hu, numu tauji mahu puu mahu fele, kɛɛ gbuama Bɛnjami gɛnyɛi hu, numu tauji mahu puu mahu fele. 9Ji lewengɔe woma, ngi fahawa lɔilɔ nya gulɔ ndalewengɔ ma gbo -- numu gbii yɛ gu aa yeenungeisia gbawala. Ti gbuɛilɔ kɛnyɛi gbi hu dunyei hu kɛ ti loonga maha heimi gɔɔbu kɛɛ Mbalaloi. Ti mayilingɔ yɛla a bombani gowei, tawao tɔkpɔ yaseisia ti yɛlɔ houni ti gbi yeya. 10Kɛ ti gulanga a yele lakpawa tɛ: Mbawoya a gbua mu Yewɔɛi gama lɔ, na heini maha-heimɛi, kɛɛ Mbalaloi! 11Malikeisia kpɛlɛɛ ti yɛ looilɔ ti maha heimi galangɔ tia kpakoleisia kɛɛ fuuhani naanisia. Kɛ ti mawɛlɛnga ti ti wombisia gbakpa maha-heimɛi gulɔ ti Ngewɔ vɛli, 12tɛ, “Amiina! Tato, gɔlɔya, nɛmahulewe, sɛnɛwo, mbɛlɛhei, kpaya, kɛɛ juujuu i yɛ mu Yewɔɛi ma kunafɔ ta ngi da kunafɔ! Amiina!” 13Kɛ kpakoloi yeengila nya mɔlinga yɛ, “Yemia a nungei jisia bombani gowei ji ti ma, tawao ti yeegbuaa?” 14Kɛ ngi potenga ngɛ, “Maada, ngii kɔ kɛ lee bia.” Kɛ i ndea nya ma yɛ, “Jisia mia nungaa a tie ti masuba gbundɛwai huvonga. Ti ti bombanisia lɔ wuanga fo ti kolenga Mbalaloi ŋamɛi hu. 15Na vamia ti looni Ngewɔ maha heimi gulɔ ngi magbee gbuava ngi wɛleibu a folo kɛɛ kpindi. Tawao numui na heini Maha heimi a ti mahugbelɔ. 16Kunafɔ tɛɛ yaa gbɔma lɔɔlɛ tawao ti bolohu ɛɛ yaa be. Folo ɛɛ yaa ti mɔ ɔɔ yee duinduin gbandi; 17gbamaile Mbalaloi na i heini maha heima yeendiahu a yɛlɔ a ti mahugbemɔi, a hou ti ma a li a tie nja loke sɛɛsɛɛ gama. Tawao Ngewɔ a ngaya yialɔ fo ti yaama.”

HINDEI MAGƐNI A JƆN 8

1Kia lekee Mbalaloi i kɔlɔ gotongɔi yeewɔflei huvuloni, kɛ hu yalooŋ ngelegoohu hawa hugutu va. 2Ngi tɔilɔ malika wɔfleisia ta yɛ looni Ngewɔ gulɔ, ti ti gɔ a bulu wɔfla. 3Malika weka liilɔ i loo miando saa a gbua na, a kanigbɔlu-vei houni ngi yeya. Numu wailɔ i ngi gɔ a hani gunɛnɛ gbotoa, kɔɔ i gahupu a hɛi nasia Ngewɔ mablaa kpɛlɛɛ ta pie kanigbɔlu jaa gbuama gbatɛngɔi mia Ngewɔ gulɔ. 4Yee hani gunɛnɛ mɔngɔi yeendulii hukpɔngɔ a Ngewɔmablaa ti hɛɛsia i lɛilɔ a gbua malikei na yeya i looni Ngewɔ gulɔ. 5Kɛ malikei i hani gunɛnɛ vei wumbunga, i ndave kpauŋ a ngɔmbui na yɛ saa gbuamɛi i pili vaa dunyei hu. Ngelei baahu gbuɛilɔ kɛ i yianga, maimai a tewehu, kɛ dunyei gbɛlinga jiwijiwi. 6Kɛ malika wɔfleisia ti ti magbatea wa va bulii wɔfleisia vɛma. 7Kia haala malikei i ngi nda bulii vɛni, kɛ hakɔi taa ngɔmbui, gahupungɔ a ŋamɛi ti jundua dunyei hu. Dunyei yeekaka sawa yeengila i mɔilɔ ŋao i gbɛlɛ nguluisia ma kɛɛ tuhani gbi lee ma ti yɛ yeekakei na ma. 8Kɛ Malikei yeefeleyei i bulii vɛnga. Hani gbuɛilɔ kia ngiye lakpawa ngɔmbui looni ma i gula gboyei hu. Kɛ gboyei yeekaka sawa yeengila i wotea a ŋamɛi; 9fuuhanisia kaka sawa yeengila ti haailɔ gboyei hu, kɛ njaya lɛndɛisia kaka sawa yeengila ti nyaninyaninga. 10Nawooma malikei yeesawayei i bulii vɛilɔ. Tumbekei yeendakpa waa a voo kia hɛmu voi na i gbuɛilɔ ngeleima i gula njɛi yeekaka saweisia hu kɛɛ nja loke sɛwɛsɛwɛisia. 11(Yee tumbekei na biyɛi mia a “Ŋɔnaŋɔnɛi”) Njei yeekaka saweisia yeengila i ŋɔnailɔ tawao numu gboto ti kpɔlini ti haailɔ ngi ŋɔnayii va. 12Kɛ malikei yeenaaniyei i bulii vɛnga. Hani i gbanjilɔ foloi yeekaka sawa yeekaka yila hu, ngawui yeekaka sawa kaka yilama, tumbekei yeekaka sawa kaka yila ma, kɛ ti gbi ti gaka yila kaka sawei maa i gbindinga. Foloi ii yaa guni a gbua folo gɔlɛma sawa yee yakpe bɛɛ va, tawao ngawui kɛɛ tumbekeisia tii yaa voni kpindi gɔlɛma sawa yeekaka yakpe bɛɛ va. 13Nawooma ngi nya wui wumbuilɔ ngi tɛ kɛ ngi kowɛi lɔnga tɛngɔ poloŋ ngeleima a gowo a li a hee la yɛ, “I nyamui kpa! I nyamui kpa! A nyamu hulewengɔ kpa nasia kpɛlɛɛ va ti dunyei hu ji malika saweisia ti longa poma ti wama bulii vɛma!”

HINDEI MAGƐNI A JƆN 9

1Kɛ malikei yeelɔɔluyei i bulii vɛnga. Kɛ ngi tumbekei lɔnga i yɛ gbuani ngeleima i gulani ngeebu; ti ndɔu-lama jii wumbuilɔ ti da ngi yeya. 2I yee ndowa hubɔngɔ wai lawoilɔ, ndulu-lɛilɛi wa a hiye na, piengɔ kia ndulii na a yɛ gbuama ngɔmbu pu lakpawa hu; foloi tia ngelei magbindi lɔ nilinili a ndulii na yɛ gbua ndowa hubɔngɔ wai hu. 3Kondeisia ti gbuailɔ yee ndulu lɛilɛi wai hu ti yei ti vaya dunyei hu, kɛ kpaya i wuaa ti hu kia nguangɔ la kekemɛisia hu. 4Ti ndeilɔ ti ma tɛ taa kpitiisia waa, ɔɔ nguluisia, ɔɔ tuhani weka gbi lekee; ta nasia lekee lɔ gbalɛ Ngewɔ maiki yeekpɔi ii wuni ti lawaasia. 5Kpaya ii veni kondeisia wɛ yee nuuvui jisia waa va, kɛ lekee ti tɔɔya va ngawu lɔɔlu va. Kpalɛi na a gbua ti tɔɔyɛi hu kpuangɔ a yɛla a kpaalɛi na numui a majɔɔ ji kekemɛi a ngi bɔ. 6Yee foloi nasia ma nuuvuisia ta hee mamani wielɔ, kɛɛ tɛɛ gu a haala; ta lolɔ ti haa kɛɛ hee a wilalɔ ti ma. 7Ti yɛyii ma, kondeisia ti gbuangɔ yɛla a soisia ti ti mayilinga li va koe hu; ti wuisia mayilingɔ yɛla a haningaa kpuangɔ a kanigbɔlu bɔleisia, tawao ti yambui gbuangɔ yɛla nuuvu. 8Ti wundie gbuangɔ yɛla a nyaha wundie, ti laa yɔungɔli kia sugbui laa yɔungɔli na. 9Ti liimɛisia mayilingɔ yɛla a hani kpuangɔ a kɔlu-lomeisia, tawao ti gbakisia yee hugondowoi gbuangɔ yɛla a soisia ti vahangɔ ti yilingɔ kongoloisia ma ti gindɛnga liva koe hu. 10Ngolisia lɔ ti ma nyi wuava la kia kekemɛi na, tawao a ti wolimisia lɔ kpaya na nuuvuisia gbalɛva ngawu lɔɔlu va. 11Maha lɔ ti yeya malika a ngie i looni ti maahu. Ngi biyei mia a Abadɔn Hibu yie hu, kɛ Apoliɔn Gliki yie hu (na yeembui a “Hunyaniwiemɔ”). 12Masube yeehaalayei i lewenga; ji woma masuba fele longɔe woma ti gulama. 13Kɛ malikei yeeweitayei i bulii vɛnga. Ngi ngoo mɛnilɔ a gbua a sɔkui nasia hu wee mia kanigbɔlu jaa gbuamɛi gbatɛngɔ na Ngewɔ gulɔ. 14Yeengoi yɛ malika weitei ma i looni bulii houni ngi yeya, “Gbe malika naanisia ma ti ngilihu mia Yufletisi yeenjawai la!” 15Faale ti gbeilɔ malika naanisia ma, ti magbatɛngɔ yɛla hawei na va, yeefoloi na ma, yee ngawui na hu, i yee foi na goohu nuuvuisia kpɛlɛɛ ti gaka sawa yeekaka yila waava. 16Ti kɔ-bleisia ti yɛ heini soisia maahu ti jika gɛilɔ a nge; ti yɛ miliɔŋ hɔndɔ fele. 17Tawao hengei hu ngi tɔilɔ ti heini soisia maahu kɔlu lomɛisia ti ti ma kpɔlungɔ jeele kia ngɔmbui na, tawao baajingɔ kia lekee sɔifɛi na. Yeesoisia ti wuteisia gbuangɔ yɛla a sugbuisia ti wutei, tawao ngɔmbui, ndulii kɛɛ sɔifɛi yɛlɔ a vaiŋ a gbua ti laa. 18A fitina sawangaa mia Ngewɔ i dunyei yeekaka yila kaka sawa goohu gbɔyɔuila: i la ngɔmbui ma kɛɛ ndulii kɛɛ sɔifɛi na yɛ gbua a soisia laa we. 19Soisia ti gbayei a gbua ti laa lɔ kɛɛ ti wolimɛi we. Ti wolisia ti gbuangɔ a kalingɛisia, nguisia ti heiheingɔ ti ya, ta buwumbu ta nungeisia nyila. 20Nuuvui yeemɔnui nasia kpɛlɛɛ ti loni fitini ji ii gulani ti ma taa haa ti gangɛilɔ wounveva hinda nyamui nasia ma ti yɛ a pie. Tii lumani ta gbe ngafangeisia ti vɛlila ma kɛɛ nɔmɔlisia kpatɛngɔ a kanigbɔlu, kɛɛ kanigole, kɛɛ blasi, kɛɛ kɔtii, kɛɛ a ngului na ɛɛ kulɔ lɔ, ɛɛ njia humɛni tawao ɛɛ gu a jia. 21Tii lumani kulo bɛɛ wounveva ti gbe a nungaa waala, njosololi hindeisia ma, puegbualei ma kɛɛ huma wielei.

HINDEI MAGƐNI A JƆN 10

1Kɛ ngi malika weka waa lɔnga i gbuama ngelegoohu a yei, njagbili ngi magbindingɔ, ninginangɛi gakaangɔ a ngi wui, tawao ngi yambui a voo kia foloi na kɛɛ ngi gɔwɔisia ti gbuangɔ a ndɔkɔisia ngɔmbui houga ma. 2Kɔlɔ gotongɔ wulo yɛlɔ ngi yeya hulawongɔ. I ngi yejama gɔwɔi wumbuilɔ i hitɛ gboyei hu, i ngi gɔwɔma gɔwɔi bɛɛ wumbu i too ndɔlɔ bengɔi ma, 3kɛ i gbaowonga ngeleya yeengoi kpuangɔ a njalɛisia ti gbaowoi na. Kia i gbawoni kɛ ngele wɔfleisia ti ndahounga kpɛlɛɛ a lenga. 4Ti ndahoungɔ lekee, kɛ ngi nya magbatɛnga na nyɛiva ti wama ndema. Kɛɛ ngoo ndeilɔ a gbua ngelegoohu yɛ, “Na lɔwu ngele wɔfleisia ti ndema, tawao baa pu kulobɛɛ kɔlɔ ma!” 5Kɛ ngi malikei na lɔnga i looni gboyei kɛɛ ndɔlɔ bengɔi ma i ngi yejama lokoi wumbu i too ngelegoohu, 6kɛ i gbolonga kpo Ngewɔ biyɛi hu, na i na kunafɔ ta ngi da kunafɔ, na ngelegoohu gbatei i kpɛli hani gbi lekee ma i hu, i dunyei gbatɛ i kpɛli hani gbi lekee ma i hu, kɛɛ gboyei i kpɛli hani gbi lekee ma i hu. Kɛ yeemalikei ndenga yɛ, “Lɔwɔ mawulo la gbii yaa ma! 7Kɛɛ tawao foloi nasia ma malikei yeewɔflei a ngi bulii vɛ, Ngewɔ hindei yeehulɔwungɔi na wɔɔ i hugɛni a ngi yengeblaa kɛɛ ngi lutuisia nda a houlɔ.” 8Nawooma ngooi ngi yɛ mɛnini i yɛpɛi nya gama a gbua ngelegoohu i gbɔma ndeilɔ yɛ, “Li bi kɔlɛi na wumbu laani ndawongɔ malikei na yeya looni gboyei kɛɛ ndɔlɔ bengɔi ma.” 9Kɛ ngi ya yeemalikei na gama ngi ngi mɔli nya gɔva a kɔlɔ gotongɔ wuloi. Kɛ i ndea nya ma yɛ, “Mbumbu bi mɛ; a bi goohu gbinilɔ, kɛɛ a nɛɛlɔ bi laahu i wie kia kɔmii na.” 10Kɛ ngi kɔlɔ gotongɔ wuloi wumbua ngi yeya ngi mɛ, tawao i nɛɛlɔ kia kɔmii na nya laahu. Kɛɛ kia ngi kpɔlini, nya goohu gbinilɔ ŋae. 11Kɛ ti ndea nya ma tɛ, “Yama huɛɛŋ gbɔma bi kulɔma yia le kɔloongɔ nunga gbotoa ma, ndɔlɔ gbotoa ma, kɛnyɛblaa gbotoa ma kɛɛ mahangeisia.”

HINDEI MAGƐNI A JƆN 11

1Kɛ ti haka huma wului venga nya wɛ, kpuangɔ a tikpɔi, tɛ nya ma, “Hiye bi li bi Ngewɔ wɛlei huma kɛɛ yeesaagbuamɛi, tawao bi nasia bɛɛ gbawa ta hɛɛ na. 2Kɛɛ baa yeekata yitisia yahuma ajifa na mia na vengɔ kafilisia wɛ ti yɛma looni kayema laawai maahu ngawu nuu fele gbɔyɔngɔ mahu fele va. 3Nga nya lutu felengaa loolɔ ngɔwoma gulɛi ti ma, tawao ta kulɔma yia lelɔ folo tauji yila njii hɔndɔ fele njii nuu sawa gbɔyɔngɔ.” 4Yeetutu felei jisia mia ɔlivi wului feleisia a tie kɛɛ lambo vɛ feleisia ti looni Ndemɔi gulɔ na ngi womia a dunyei. 5Numu gbi a lapi kɔɔ i tɔɔya la ti ma, ngɔmbui a gbualɔ ti laa i ti juwuisia nyani; tawao a ji hu we mia numu gbi a lapi ti gbalɛ va ngi da hee a ngi male. 6Kpaya vengɔe gbɔma ti wɛ ngelei gbɔwu va ma aako nja gbi aa wua watii na goohu ta yɛ kulɔma yia le ma. Kpaya lɔ ti yeya njeisia woteva a ŋamɛi kɛɛ fitini yeelasii gboto yeiva pɛpɛɛ dunyei hu kia a nɛɛla ti wɛ. 7Ji ta kpɔyɔ a Ngewɔ yie le la, huɛi na a gbua ndɔu yeendowa susuihu a ndapi wɛlɛlɔ ti ma, i ti gbua i ti waa. 8Ti womɛisia ta lolɔ laani tiitiwai ma taawai goohu, mia ta na loli sale hu a Sɔdɔm ɔɔ Ijipt, mia nungeisia ti ti Lemɔi gbakpai na. 9Njii sawa kɛɛ yeekutu va, nungɛisia, kɛɛ kɛnyɛisia, kɛɛ layiesia, kɛɛ ndɔleisia ta yeepomɛisia lɔlɔ, tawao ta gangalɔ a yeepoomɛisia gbɔwula. 10Koohunɛ a dunyableisia houlɔ jisia feleisia ti haalɛi maahu. Ta komɛ gulalɔ ta ti nyɔunyɔ jamba a hakeisia, gbamaile kulɔma yialeblaa felei nasia ti yɛ tɔɔya gboto lɔ lani nungeisia ma ti dunyei hu. 11Kɛɛ njii sawa lewengɔ woma kɛɛ yeekutu, Ngewɔ i ndɛvu vɛfɛi wuailɔ ti hu ti hiye ti loo; nasia kpɛlɛɛ ti ti lɔni nduwɛi yeehulewengɔ wa ti houilɔ. 12Kɛ tutu feleisia ti ngoo lakpawa mɛninga a gbua ngelegoohu yɛ ti ma, “A lɛ mbeindo!” Ti juwuisia ti loilɔ ti gbema lugbui i ti magboli kɛ ti lɛnga ngelegoohu. 13Ngaama dunyei gbɛlilɔ jiwijiwi kɛ taawai yeekaka yila wolonga gbo kaka puu goohu, numu tauji wɔfla ti haa ndɔlei va i gbɛlini. Nduwa hulewengɔ wa i nungeisia houilɔ ti lɛɛvui gbuani hu, tawao ti ngɔlɔya waa veilɔ Ngewɔ wɛ na ngelegoohu. 14Masube yeefelei i lewenga; kɛɛ kpelɛ na! Yeesawei lɔ pelei hu wama hugutungɔ. 15Nawooma malikei yeewɔflei i ngi bulii vɛilɔ kɛ sɔlɛ gboto wa i wungahu ngelegoohu, ta nde tɛ, “Kpaya vengɔi na mu Lemɔi wɛ kɛɛ ngi Maha Hengɔi yɛva dunyei maahu, tawao a yɛlɔ maahu kunafɔ taa ngi nda kunafɔ.” 16Kɛ kpakolo nuu gbɔyɔngɔ mahu naanisia ti heini ti heimisia Ngewɔ gulɔ ti vombonga ndɔmɛi ta Ngewɔ vɛli, 17tɛ: “Ndemɔi Wai, mu siɛgbua bi ma, bia bi na haa kɛɛ bi na wɔɔ gbaa, bi gbaya wai wumbuva ba ngayenge! 18Nungɛi nasia tii lani a bie ti liilewengɔi; gbamaile watii hitinga ma bi liilewei gɛva a tie, kɛɛ haableisia ti gbɛmbova. Watii hitinga ma bi yengebleisia pawa va, bi lutuisia, kɛɛ bi nungeisia kpɛlɛɛ, nasia gbi ta luwa bi ma, i nuwaa hu ɔɔ nuwulo. Watii hitinga ma nasia nyani va ta dunyei nyani!” 19Ngewɔ wɛlei na ngelegoohu i lawoilɔ, kɛ ngi hinda yangilingɔ gaŋaa lɔnga i heini yeepɛleibu. Maimai teweilɔ hu, ngelei i baahugbua a yia, dunyei a gbɛli jiwijiwi, kɛ hakɔi wunga hulewengɔ gboŋ.

HINDEI MAGƐNI A JƆN 12

1Nawooma kɛ kanako wa i gɛnga ngeleima. Nyahɛi yɛlɔ na, foloi yilingɔ ngi ma a kulei, ngi gɔwɔisia ti looni ngawui maahu maha bɔlei ngi wumba tumbeka puu mahu fele wɛpɛngɔ ma. 2Ngi lole gbeli magutungɔ yɛla, tawao ndole goohu gbalei kɛɛ yeendimɔnɛi ngi houngɔ yɛla a yele gula. 3Kanako weka gbɔma gɛilɔ ngeleima. Ndamba gali wai yɛlɔ na nguisia ti wɔfla ngi ma maha bɔleisia ti wɛpɛɛngɔ maahu kɛɛ ngi wumba lowoisia ti puu. 4I ngi wolii wumbuilɔ a ngi botima we i tumbekeisia kaka sawa kpɛlɛɛ kɛ i yeekaka yila ngombonga la ngeleima i pili vaa dunyei hu. Kɛ i gbekpanga nyapoi gula na ndo lemɛi yɛ ngi ma, aako ndoi lengɔ lekee kɛ i mɛnga ngi yeya. 5Nyapoi i hindolo leilɔ, na a yɛ mahayahu kɔɔli likpɔi houni ngi yeya i looni ndɔleisia kpɛlɛɛ maahu. Kɛɛ Ngewɔ i pielɔ yeendoi i gbua pu i lɛ yakpe ngi gama mia ngi maha heimi. 6Kɛ nyapoi i wilanga a lewela a piimɛ i li ndɔgbɔ lambɛi ma, mia hinda yɛ na Ngewɔ i na gbatɛnga ngi va yɛva na ta ngi mahugbe folo tauji yila, njii hɔndɔ fele, njii nuu sawa gbɔyɔngɔ va. 7Nawooma koe laleweilɔ ngelegoohu. Maikɛl taa ngi Malikeisia ti ndapi wɛlɛlɔ ndamba ngali wai ma, kɛ ta bɛɛ taa ngi da malikeisia ti hiyenga ti gɔ a tie; 8kɛɛ koe i ndamba ngali wai gbuɛilɔ ti baa gbɛlɛɛŋ a heimi na i yɛ ti yeya ngelegoohu. 9Ti ndamba gali wai gbuɛilɔ ti pili pɔ mbui -- kali wova wai ta toli a Ngafei ɔɔ Seitana, na i dunyei kpɛlɛɛ wɛlɛnga. Ti pililɔ vaa dunyei hu, taa ngi malikeisia kpɛlɛɛ. 10Kɛ ngi ngoo lakpawa mɛninga a nde ngelegoohu yɛ, “Kiahuna mia Ngewɔ mbawoyei i hitia ma! Kiahuna mia Ngewɔ i ngi gbayei gɛma a mahayɛi hu we! Kiahuna mia ngi Maha Heingɔ i ngi mahayɛi gɛma! Gbamaile Seitana na a nyamu loo mu ndewengeisia ma, a nyamu loo ti ma a folo kɛɛ kpindi Ngewɔ gulɔ, ti kpuanga ti pilinga mbui. 11Mu ndewengeisia ti temaya mɛnga ngi maahu a Mbalaloi Ŋamɛi ngi lɔɔmɛi hu we kɛɛ a tɔnyɛi woma we ti guni ti kpuani ngitiya; tawao ti lumailɔ ti ti lɛɛvuisia la ti haa. 12Faale a goohunɛɛ wua kpɛlɛɛ wu ngelegoohu tawao heima i na wu yeya! Kɛɛ a nyamui kpa dunyableisia va kɛɛ gboyei! Gbamaile Seitana i yeinga mia wu maahu, tawao ndiilewei ngi lavengɔe kpauŋ, ajifa i kɔɔlɔ kɛ ngi watii hugutungɔi i longa.” 13Ji ndamba gali wai i liiheima kɛ ti ngi wilinga pɔ dunyei hu, i teweilɔ hu a piimɛ i too nyapoi woma na yɛ ndo lenga a hindoloi. 14Nyapoi i kowɛi yeekpaki waawaa felengaa majɔɛilɔ ti vɔwa ngi ma ta gu ti pie i ngowo i li ngi yɛmɛi ndɔgbɔ lambɛi ma, miando a yɛ na ta ngi mahugbe foo sawa kɛɛ yeekutu va, ngi mabawongɔ seitana labai yeya. 15Seitana i gbeilɔ palii waa ma a ngi laahu we i ndajia nyapoi woma aako fumbui i li a nyapoi i lo hu. 16Kɛɛ ndɔlei i kpɔma yelɔ nyapoi ma a lawola njei kpɛlɛɛ i fɔfuɛɛŋ na gbuani ndamba gali laa. 17Kɛ ndamba gali wai liilewenga gboŋ nyapoi ma, i gindɛ i li koe wɛlɛva ngi goohu leengeisia kpɛlɛɛ ma ti longa, nasia kpɛlɛɛ ta Ngewɔ jaweisia hou tawao liiloma ti yeya tɔnyɛi ma Yesu i magɛni. 18Kɛ i ya i loo gboya ŋanyakpaama.

HINDEI MAGƐNI A JƆN 13

1Kɛ ngi fula hua yila lɔnga a gbua gboyei hu, Ndowoisia ti ngi ma puu kɛɛ ngi wui i wɔfla, a bɔlei pɛlɛngɔ yeendowoi yeengila gbi lee maahu, bagbuama biyeisia nyɛingɔ yeenguisia yeengila gbi lee ma. 2Ngi huɛi lɔilɔ kpuangɔ a kɔli, ngi gɔwɔisia ti wiengɔ kia fula huɛi yeendakpa waa na ta toli a biaa, kɛɛ ngi laa gamɛi kia njalɛi laa gamɛi na. Ndamba gali wai i ngi gbayei taa ngi mahayɛi kɛɛ temayei kpɛlɛɛ veilɔ yeehuɛi ji wɛ. 3Yeehuɛi ji ngi wui yeengila maahu wiengɔ yɛla bɛ ti na ŋɔnangɔ lɔ na bawonga. Ji i dunyableisia kpɛlɛɛ gɔwɔ gbɛlilɔ kɛ ti hiyenga ti to fula huɛi woma. 4Nunga kpɛlɛɛ ti liilɔ ti gula Ndamba gali wai gɔɔbu ta ngi vɛli jifa i ngi gbayei wumbuni i feni huɛi wɛ. Ti gulailɔ fula huɛi bɛɛ gɔɔbu ta ngi vɛli tɛ, “Yelɔ kpaya ngi wɛ kia fula huɛi na? Yemia pɛiŋ a gu i ndapi loo ngi gulɔ?” 5Nawooma fula huɛi i kpaya jɔɛilɔ njia nyamunga leva hulewengɔ gboŋ tawao ti lumɛilɔ i kpaya yayenge ngawu nuu-fele gbɔyɔngɔ mahu fele va. 6I lagbuailɔ i Ngewɔ yɛli, i ngi heimi yɛli i kpɛli nasia kpɛlɛɛ ma ti ngelegoohu. 7I kpaya majɔɛilɔ koe wɛlɛva Ngewɔ mableisa ma i ti gbua. Tawao i mahaya jɔɛilɔ ndɔleisia gbi maahu, kɛnyɛbleisia maahu, nungeisia maahu, layiesia mahu, kɛɛ kɛnyɛi gbi lekee. 8Dunyableisia kpɛlɛɛ ti ngeebu ta ngi vɛlilɔ, nasia kpɛlɛɛ ti biyɛi nyɛingɔ ii le ndɛvu gɔlɛi hu i Mbalaloi yeya na wɔɔ ti paani a dunyei ngi gbatɛ gbeli. 9“Faale, numu na ngoli ngi ma njia mɛniva, i woolo! 10Numu gbi lee kungɔ ti bii hou, na-o-na i wie ta bi houlɔ; numui kungɔ bi haa bowei ya, na-o-na i wie ba haangalɔ. Ji yeembui mia a gula hinda gbɔugbɔu bu taa lanaya yekpe ma Ngewɔ mableisia hu.” 11Nawooma ngi fula huɛi yeefeleyei lɔilɔ a gbua ndɔu. Ngi wumba lowoi yɛ fele kia mbala lɔgbɛi wumba lowoisia na, tawao ngi yia woi gbuangɔ yɛla a ndamba gali wai. 12I haala huɛi gbayei houilɔ i yengela ngi yaama. I gbɔndailɔ dunyableisia kpɛlɛɛ ma ti dunyei hu yɛ ti haala huɛi vɛli, na ngele nyamui wai yɛ bawonga ngi ma. 13Fula huɛi yeefeleyei ji i kabande hinda wawangaa wielɔ, i pie ngɔmbui i gbua ngelegoohu i gbuja dunyei hu numui gbi yaama. 14A kabande hinde nasia kpaya wuaani ngi hu i guni i yɛ ti wie a haala huɛi jɔngɔi, poma lɔ i dunyablaa kpɛlɛɛ wɛlɛni. I ndeilɔ nungeisia kpɛlɛɛ ma dunyei hu yɛ ti haala huɛi ngi gbuaye gbatɛ, na wɔɔ ti ŋɔnani a bowei kɛɛ ii haani, ta ya bagɔɔma vembɛ. 15Fula huɛi yeefeleyei i kpaya jɔɛilɔ i ndɛvu vɛfɛi wuaa haala huɛi ngi gbuayei gbatɛngɔi hu, na i guni i yɛpɛ i nasia kpɛlɛɛ waa ti gangani a ngi vɛlila. 16I gbɔndailɔ nungaa kpɛlɛɛ ma, bi yɛni a nu walɔ ɔɔ nu wulo, kpatɛmɔ mia a bie ɔɔ nyanimɔ, bi yɛni a nduwɔ lɔ ɔɔ bii yɛni la, aako ti kpɔ wu ti yejama lokoisia ya kɛɛ ti lawaasia. 17Kpaya gbii yɛ nuu wɛ feegɔva ɔɔ feemanjiava ina kpɔi ji ii wuni ngi lawaa, na looni yeehuɛi ji ngi biyei va lɔ taa jikei na looni ngi va. 18Nɛmahulewe kɔdi gbuala lɔ nyandengɔ ji yeembui gɔlɔva. Numui gbi lee hinda hugɔɔmɔ le a gulɔ a jikei na yeembui gɔɔla i huɛi na ma, ajifa yeejikei looni numu la lɔ va. Yeejikei mia a weita weita weita.

HINDEI MAGƐNI A JƆN 14

1Nawooma ngi nya wui wumbuilɔ kɛ ngi Mbalaloi lɔnga looni Jayɔn Yiyei maahu; ngi gblanga nuu tauji hɔndɔ yila, kalɛ nuu fele gbɔyɔngɔ mahu naani mia ti yɛ na, ngi da biyei kɛɛ ngi kɛkɛ biyei nyɛingɔ ti lawaisia. 2Kɛ ngi ngoo mɛninga a gbua ngelegoohu yeengoi gbuangɔ a njaveisia ti jundu woi kɛɛ piengɔ gbɔma bɛ ngelei mia yiama hulewengɔ. Yeengoi na gulani nya wolihu kpuangɔ yɛla a kɔninge lewewoi na gahani lewebleisia ta ndewe. 3Kɛ ti gule nina gbuanga ti ngaa maha heimi gulɔ kɛɛ ndɛvu vuhani naanisia ti gulɔ taa kpakoleisia. Numu weka gbii guni a gulei na gɔɔla aa ngaa kɛlee nuu tauji hɔndɔ yilei, kalɛ nuu fele gbɔyɔngɔ mahu naanisia ti wumawongɔ yɛla dunyei hu. 4Jisia mia nungaa a tie tii ti manɔhɔni a gbitila nyaha gbi ma, gbamaile sɛsɛya gungɔ yɛla ti hu. Jisia mia ta to Mbalaloi woma mia gbi lee a li na. Jisia mia ti wumawongɔ yɛla nuuvuisia lia tawao haalayeisia a tie ti vengɔ Ngewɔ wɛ kɛɛ Mbalaloi. 5Tii yaa wɔɔ gbaa ti houni ndɛɛ gulala hu; mbɛ yakpe bɛɛ ii ti ma. 6Kɛ ngi malika weka lɔnga a gowo tɛngɔ polouŋ ngeleima Ngowili Yekpei yeekunafɔyei ngi laa ndeva nasia gbi ma ti dunyei hu, ndɔlei gbi hu, kɛnyɛi gbi hu, layie gbi hu kɛɛ nungeisia gbi gama. 7I hee lailɔ yɛ, “A luwa Ngewɔ ma wu ngɔlɔya ve ngi wɛ, gbamaile watii hitea ma nuuvui kpɛlɛɛ gbɛmbova. A ngi vɛli na i ngelegoohu gbatɛni kɛɛ dunyei, i gboyei bɛɛ gbatɛ i kpɛli ndɔu ya lokengɔsia ma!” 8Kɛ malikei yeefeleyei i tonga yeehaalayei woma a li a hee la yɛ, “Taawai wolonga gbo, Babilɔn lawai wolonga! I pielɔ nuuvuisia kpɛlɛɛ ti hubɔnɔ lɔi yeekpayangɔ gboli i feni ti wɛ, na i ti looni pue nyamu gbuala ma a ngie.” 9Kɛ malikei yeesawei gbuaa i to yeefeleisia ma ta bɛɛ a li a hee la yɛ, “Nu-o-nu a hɛɛ fula huɛi ma ɔɔ ngi gbuayei gbatɛngɔi, ɔɔ a luma ti kalɛ bla ngi lawaa ɔɔ ngi lokoi ya, 10yeenumui na a Ngewɔ jangatɛi yeendɔɔ gbayangɔi gbolilɔ ndavengɔ kpauŋ a bolei na looni Ngewɔ liilewengɔi va. Tawao tɔɔya a lalɔ ngi ma ngɔmbu hu ngahupungɔ a sɔifɛi mia kayema malikeisia gulɔ kɛɛ Mbalaloi. 11Yeengɔmbui na tɔɔya a la hu ti ma yeendulii a lo lɛmaa kunafɔ va. A folo kɛɛ kpindi laha gbi ɛɛ yɛ nasia wɛ ta hɛɛ fula huɛi ma taa ngi gbuayei gbatɛngɔi, ɔɔ nu-o-nu wɛ a luma ti ngi biyei yeekpɔi wu ngi lawaa.” 12Ji yeembui mia a hinda gbɔugbɔu lɔ mahoungɔ i gu Ngewɔ mableisia hu, ti Ngewɔ jawei hou tawao ti wɔna a Yesu. 13Kɛ ngi ngoo mɛninga a gbua ngelegoohu yɛ, “Nyɛi bɛ: Koohunɛɛ lɔ nasia ma ta haa Ndemɔi magbewe gbuala woma!” Kɛ Ngewɔ Yafei i potenga yɛ, “Ji gama lɔnyangɔi, gbɛva kohunɛ wa vuii le. Ta lɛɛvulɔ ti yenge kpaukpausia ma, ajifa ngengei ti pieni ta yeepawei malelɔ.” 14Nawooma ngi nya wui wumbuilɔ, kɛ ngi nja gbili lɔnga kolengɔ fo, hani heini maahu kia nuuvu, kanigbɔlu maha bɔlei ngi wumba kɛɛ mbowa houngɔ wa ngi yeya. 15Kɛ malika wekei gbuanga hɛɛ wɛleibu kɛ i yele lakpawa gulanga numui na ma yɛ heini nja gbili maahu yɛ, “Mbowɛi wumbu bi tɔɔto a tewe wiela, ajifa watii hitea ma; dunyei benga yewe tewe va!” 16Kɛ numui na heini nja gbili maahu i valanga i mbowɛi lewe fiaŋ dunyei hu, kɛ dunyei yeetewelei i gbɔyɔnga ma. 17Kɛ ngi malika wekei lɔnga a gbua hɛɛ wɛleibu mia ngelegoohu, ta bɛɛ mbowɛi houni ngi yeya. 18Kɛ malika wekei, na kpaya ngi yeya ngɔmbui maahu, i gbuanga a saa gbuamɛi yaka we. Kɛ i yele lakpawa gulanga malikei na ma mbowɛi yɛ houni ngi yeya yɛ, “Mbowɛi hou yeya bi glepiisia ngɔli dunyei yeekpalɛi hu ajifa yeenguɛisia ti gbɔlungɔi!” 19Kɛ malikei i valanga i mbowɛi lewe fiaŋ dunyei hu, i glepiisia gbuakpua ngului ya, kɛ i ti wilinga ndowei hu mia glepii a vɔnya na, na looni nimisa lɔ va Ngewɔ a da nyamublaa ma. 20Ti glepiisia ti vɔnyɛilɔ ndɔ vɔnya lowei hu mia na gbuangɔ yɛla pɔ tɛi ma, kɛ ŋamɛi yeepali wa, kungɔ a mɛli hɔndɔ fele tawao ngi hubɔyii bɛɛ kungɔ a fiti lɔɔlu, i gbuanga yeendowei hu a yei fombui laani ndia.

HINDEI MAGƐNI A JƆN 15

1Kɛ ngi kanako weka wa longa kɛngɔ ngeleima. Malika wɔflangaa ti yɛlɔ na, nasia fitini yeekɛlɛmayei wɔfleisia ti ti yeya, tawao a tia lɔ Ngewɔ i ngi liilewengɔi yee jangata wai yeemɔnui yoyoma a tie. 2Kɛ ngi hani lɔnga kpuangɔ a mɛmɛɛ yei na ngahupungɔ a ngɔmbui. Ngi nasia bɛɛ lɔilɔ ti yɛ temaya mɛnga fula huɛi maahu kɛɛ ngi gbuaye gbatɛngɔi, kpɛlɛngɔ jikei na ma i looni ngi biyei va. Ti yɛ looni mɛmɛɛ yei gblanga lɔ kɔningɛisia ti houi ti yeya na Ngewɔ i feni ti wɛ. 3Ti Mojisi wulei yailɔ, Ngewɔ yengemɔi, kɛɛ Mbalaloi bɛɛ da wulei, tɛɛ, “Ndemɔi Ngewɔ Waa, Bi yengeisia ti wɔlɔni kpa tawao ti gabandei kpa! Mahawai ndɔleisia kpɛlɛɛ maahu, bi weleisia ti wɔnani kpa tawao ti lɔnyangɔ kpa! 4Ndemɔi, yelɔ na ɛɛ luwa bi ma? Yemia a ganga a bi wɔlɔyɛi magɛla? Bia yakpe lɔ kayemamɔ a bie. Ndɔleisia kpɛlɛɛ ta walɔ ti mawɛlɛ ti bi vɛli, ajifa bi yengeisia ti wɔnayii langɔe numui kpɛlɛɛ yaama.” 5Nawooma, ngi Ngewɔ wɛlei yeekayema jeli wuamɛi lɔilɔ na i lawo ngelegoohu. 6Malika wɔflei nasia fitina wɔflei yɛ ti yeya ti gbuailɔ a hɛɛ wɛleibu we; ti mayilingɔ yɛla a fɛmgbɛ lɔ kolengɔ fo, kani gbɔlu gulei yilingɔ ti liimɛi kalangɔ a tie. 7Kɛ fuuhani naanisia yeengila i kanigbɔlu boleisia ti wɔfla venga malika wɔfleisia wɛ ndavengɔ kpauŋ a Ngewɔ liilewei, Ngewɔ na i na kunafɔ taa ngi da kunafɔ. 8Hɛɛ wɛleibu gbindilɔ a ndulii na i gbuani Ngewɔ nɔlɛi hu kɛɛ ngi gbayei hu, tawao numu gbi ii yaa guni wuava hɛɛ wɛleibu kɛlee fitina wɔflei nasia malika wɔfleisia ti jeini ti leweni.

HINDEI MAGƐNI A JƆN 16

1Kɛ ngi ngoo lakpawa mɛninga a gbua a hɛɛ wɛleibu we yɛ malika wɔfleisia ma, “A li yakpe wu bola wɔflei nasia wumbu Ngewɔ liilewei fendangɔ wu huwo mia dunyei hu!” 2Kɛ malikei yeehaalayei i ngi bolei yapɛɛnga dunyei hu. Kpalɛma nyamu yagbalɛngɔisia ti gbuɛilɔ nasia ma fula huɛi maiki wungɔ yɛla ti ma tia nasia ti yɛ ngi gbuaye gbatɛngɔi vɛli. 3Kɛ malikei yeefeleyei bɛɛ i ngi bolɛi yapɛɛnga gboyei hu. Kɛ yeenjei i wotenga i wie kia ŋamɛi na a yɛ poomɛi hu, i fuuhanisia gbi ti waa ti boyei hu. 4Kɛ malikei yeesawayei i ngi bolɛi yapɛɛnga njei yeisia hu kɛɛ nja lokeisia hu ta gbua ndɔu, kɛ ti wotea a ŋamɛi. 5Kɛ ngi nja maahu malikei woo mɛninga a nde yɛ, “Bi wɔnangɔi kpɛmboisia hu bi ti wuaanga, O Kayemamɔi, bia bi na kiahuna kɛɛ bi na wɔɔ gba! 6Gbamaile pienyamubleisia ti ŋama wunga bi nungeisia ma tia bi lutuisia tao famia bi wotea bi ti gɔnga a yeeŋamɛi kpoliva kia mahoungɔ la ti va.” 7Kɛ ngi ngoo mɛninga a gbua a saa gbuamɛi yaka we yɛ, “Ndemɔi Ngewɔ Wa! Bi gbɛmboisia ti lɔnyangɔ kpa tawao ti wɔnani kpa!” 8Kɛ malikei yeenaaniyei ngi bolei yapɛlɛnga foloi maahu, kɛ foloi kpaya majɔnga a nungeisia mɔ a ngi maloindoi gbandii. 9Yeemaloindoi na i nungaa mɔilɔ hulewengɔ gboŋ kɛ tia Ngewɔ biyei gbafama na fitini jisia yeekpayei ngi yeya, tawao tii lumani wounve va ti hinda nyamuisia ma taa ngɔlɔya ve Ngewɔ wɛ. 10Kɛ malikei yeelɔɔluyei i ngi bolei yapɛlɛnga mia fula huɛi maha heimi yɛ na, kɛ ngi mahawui hugbindinga nilinili; nungeisia ti yɛlɔ a ti nɛisia yamɛ a yeekpalɛi, 11ta lagbua a Ngewɔ na ngelegoohu ta ngi yɛli kpalɛisia taa kpalɛmɛisia va ti gbuani ti ma. Kɛɛ tii lumani ta wounve ti hinda nyamuisia ma. 12Kɛ malikei yeeweitayei bɛɛ i ngi bolei yapɛlɛnga Yufletisi yawai hu. Yeenjei i bɛlilɔ yewe pelei i la kohu mahangeisia va ta gbua a foloi ngi hiye welei hu we. 13Nawooma ngi ngafa nyamu sawangaa lɔilɔ ti gbuangɔ a jiibɛisia, ta gbua ndamba gali wai lahu, a fula huɛi lahu we kɛɛ ndɛɛguala lutui. 14Tia lɔ jiina yafangaa a tie ta kabande hindeisia wie. Yeengafa sawei jisia mia kɛyia ta li mahangeisia kpɛlɛɛ gama ti dunyei maahu ti ti yandɔɔ koe va too voo wai ma kɛyila Ngewɔ wa gama. 15“A woolo! Nyaa wama kia humamɔ! Koohunɛɛ lɔ numui ma ngi yaama bengɔ yewe tawao a ngi magulɛisia hou pandawanda, aako aa gbua a ngi mahaka gbamɛi kɛ i wufenga faha lia!” 16Nawooma ngafangeisia ti mahangeisia yandɔilɔ a lenga mia ta toli Hibu yiɛi hu a Amagɛdɔn. 17Kɛ malikei yeewɔflei i ngi bolei yapɛlɛnga fofoi hu. Ngo lakpawa i gbuɛilɔ hɛɛ wɛleibu a maha heimi we, kɛ i ndea yɛ, “I gbɔyɔnga ma!” 18Kɛ maimai tewia hu, ngelei i baahugbua kɛ i yianga, kɛ dunyei gbɛlinga jiwijiwi. Yee dunya gbii yaa wɔɔ gbaa gbɛlini i hiye nuuvu gbatɛngɔi hu ma! 19Taa lakpawai Babilɔn i blailɔ kaka sawa, kɛ taawaisia gbi ti ndɔleisia hu ti wolonga. Ngewɔ i gililɔ a ndɔlɔwai Babilɔn i ndɔɔ ve ngi wɛ a ndiilewe hulewengɔ wa ngi bolei hu i kpoli. 20Tiisia kpɛlɛɛ ti gbɔyɔilɔ, ngiye jɛmbɛisia gbi ti lohu yeeŋ. 21Hakɔ gɔtii jɛmbɛisia, yeengila gbi ngi miniyii a lo te i gu a pauŋ hɔndɔ yila, ti gbuɛilɔ ngeleima ta gula nungaa ma. Kɛ nungeisia lɔ lagbuama a Ngewɔ ta ngi yɛli jifa i fitina yeini ti ma a hakɔi, gbɛva yeefitini ji nyɔkɔ ta nyamungɔ yɛla huwungɔ kpu.

HINDEI MAGƐNI A JƆN 17

1Nawooma, malika wɔflei nasia ti bola wɔfleisia woteni, yeengila wailɔ nya gama kɛ i ndea nya ma yɛ, “Wa mbei ngi hugɛ a bie kia puegbua nyaha wai, na heini njawaisia gblanga, yee wama nimisa hulɔma la. 2Dunyama mahangeisia ti pue nyamu gbuanga a ngie, tawao i ndɔ veilɔ dunyamableisia wɛ kpoli va i ti hou ti puegbua a ngie.” 3Kɛ Ngafei nya huvenga malikei i nya wumbu kɛ i ya a nge ŋanya lɔlei hu. Nalɔ ngi nyahɛi maleni na i heini fula huɛi maahu kpɔgbɔungɔ mbiyɛ nyamuisia nyɛingɔ ngi luwuima; ngu wɔfla mia ti yɛ yeehuɛi ma kɛɛ ngi lowoisia ti puu. 4Yee nyahɛi kula manyinyingɔi taa yee kpɔgbɔu mia ti yɛ ngi ma, kanigbɔluisia ti wɛpɛngɔ maahu, kpɛlingɔ kɔtu baagbangɔisia ma kɛɛ kɔtu goweisia. Ngi lokoi ya, kanigbɔu bolei yɛlɔ na ndavengɔ kpauŋ a hani mayolangɔisia kɛɛ manɔhɔ wuegbua hanisia. 5Ngi lawaa nda nyɛingɔi yɛlɔ na yeembui hulɔwungɔ: “Babilɔn Lawai, puegbua nyahangɛisia kpɛlɛɛ ti nje kɛɛ nasia nguhu nyaniblaa a tie dunyei hu.” 6Kɛ ngi yee nyapoi lɔnga Ngewɔ mableisia ti ŋamɛi ngi houngɔ tɛngɔ ngi yaama, kpɛlingɔ nasia bɛɛ ti ŋamɛi ma ti yɛ ti waani wɔɔ jifa Yesu hindei lewengɔ yɛla ti lii woma. Ji ngi yaama wɛlɛni ngi ma, nya wuhu wuilɔ kpu. 7Kɛ malikei nya mɔlinga yɛ, “Gbe ji a bi wuhu wu? Gbɛɛ ngi hinda lɔwungɔi yeembui gɛ a bie kɔloongɔ nyapoi ji ma kɛɛ huɛi na ma a hei maahu, na ngu wɔfla ngi ma kɛɛ ndowo puu. 8Fula huɛi na bi tɔni yɛlɔ wɔɔ fuuyahu, kɛɛ ii yaa ndɛvuhu kulo bɛɛ; i longa kulo te i gbua ndɔu kɛ i ya jangata i la ngi ma. Dunyamablei nasia ti lɛisia ii wuni wɔɔ ndɛɛvu gɔlɛi hu a dunyei ngi gbatɛ gbelei a yɛ ti ma a kualama lɔ ji ta yaama wɛlɛ fula huɛi ma. Ngi vulungɔ yɛla wɔɔ; kiahuna ii yaa fuuyahu, na hu gbi ngi walɛi lɔ hu gbɔma. 9“Nɛmahulewe kɔndi gbuala kɛɛ hinda hugɔɔla lɔ nyandengɔ ji yeembui gɔɔva. Ngu wɔfleisia ti ngiye wɔfleisia lɔ va nyahɛi heini maahu. Gbɔma ti looni maha wɔfleisia lɔ va. 10Ti lɔɔlu ti gulanga, yila lɔ mahayɛi hu, kɛɛ yeepekei ii yaa wani lɛ; kɛɛ tawao ngi wangɔi hu, ngi mahayɛi hugutungɔ a yɛla. 11Kɛ fula huɛi na wɔɔ yɛna, kɛɛ ii yaa na kiahuna, tamia mahɛi yeewayakpei a ngie kpɛlingɔ maha wɔfleisia ma ta yakpe a li jangata hu. 12“Ndowo puisia bi tɔni yɛni a maha puisia lɔ tii yaa tɔtoi lɛ a ti yengei, kɛɛ ti wama kpaya jɔma yɛva a mahangaa ti yenge hawa yila va tia fula huɛi-ni. 13Ti puii na ti lii lamɛi yakpe tawao ti gbayei kɛɛ ti mahayɛi ta felɔ fula huɛi wɛ. 14Ta kɔ wɛlɛlɔ Mbalaloi ma, kɛɛ Mbalaloi, ngi gbɛlingɔ nasia ma ti lolingɔ, ti huwɔyɔngɔ tawao ngi womablaa lɔnyangɔisia a tie, taa ti gbualɔ, ajifa ta lɔ ndemɔisia ti Lemɔi a ngie kɛɛ mahangeisia ti Mahɛi.” 15Kɛ malikei gbɔma ndea nya ma yɛ, “Njei nasia bi yɛ ngalɔni puegbua nyahɛi yɛ heini maahu ti yɛni a ndɔleisia lɔ, kɛɛ nungeisia, kɛɛ kɛnyɛbleisia, kɛɛ layiesia. 16Ndowo puisia bi tɔni, kpɛlɛngɔ fula huɛi ma, ta lololɔ a puegbua nyahɛi. Ngi yeya hanisia gbi ta kpualɔ ngi yeya ti ngi lo a ngi yeya haka gbami; ta ngi luwuima mɛlɔ ti ngi mɔ ngɔmbui hui. 17Gbamaile Ngewɔ i ngi liima hinda wiela wuilɔ ti liihu, a piela ti hei woma yila ti ti maha gbayei wumbu kɛ ti fenga fula huɛi wɛ, i lo haaŋ ngayenge ma i lo hu Ngewɔ layieisia laa i hou. 18“Nyahɛi na bi ngi lɔni yɛni a tawaa lɔ i looni mahangeisia kpɛlɛɛ maahu ti dunyei hu.”

HINDEI MAGƐNI A JƆN 18

1Ji kpɛlɛɛ lewengɔ wooma ngi malika weka lɔilɔ gbuama ngelegoohu a yei. Kpaya wa yelɔ ngi yeya tawao ngi nɔlɛi dunyei houngɔ ngafongɔ fa. 2Kɛ i ndenga ngoo lakpawa hu yɛ, “I wolonga gbo, ndɔlɔ wai Babilɔn wolonga! I wotea a tombo ngafangeisia tia jiina nyamuisia va, a tombo njoola ŋɔningɛisia kpɛlɛɛ va. 3I pienga nuuvuisia kpɛlɛɛ ti ndɔi yeehubɔnɔyei gbolinga a ngi wuegbuala hu we. Dunyama mahangeisia ti puegbuanga a ngie, tawao yee feegɔbleisia ti gbatɛnga ngi wuegbua mani yeehulewengɔi hu.” 4Kɛ ngi ngoo weka mɛninga a gbua ngelegoohu yɛ, “Nya nungeisia, a gule wu gbua ngi hu! Waa loma kɛ wu ngi jumbuisia wulia; waa loma ngi nimisesia taa yei wua bɛɛ ma! 5Gbamaile ngi jumbuisia ti yandɔnga yeegungei fonga fa ngelegoohu, tawao ngi wiehinda nyamuisia ti hitɛnga Ngewɔ wɛ. 6A nda ngi ma kia lɔɔ i ndaila nungaa wekeisia ma; wu ngi pawa heiheingɔ ma kpoto ngi wiehindeisia va. A ndɔ gbayangɔ ve ngi wɛ bola yakpei na goohu i huwaa na kpayangɔ i feni wu wɛ. 7A mɔnɛ ta tɔɔya hulewengɔ yei ngi ma hitingɔ sɔ ngɔlɔyɛi kɛɛ nɛnɛɛ va i tɛni tayekpe ma. Gbamaile ta lewema a ndawɔɔ yɛpɛ le ngi liihu yɛ: ‘Nyaa heingɔi a nyaha mahɛi! Poonyaha yaa nge, tao ndiinyani ɛɛ nya hou kunafɔ!’ 8Yonga lewela valɔ fitinangaa ti wama yeima ngi ma a heegbɛ, ndiinyani, kɛɛ ndɔlɛi, Tawao a mɔlɔ ngɔmbui ya, gbamaile Ndemɔi Ngewɔ ngi gbɛmbomɔi, wɔlɔngɔi.” 9Dunyama mahangeisia ti puegbuani a ngie tawao ti ngi nafa humɛni, ta wɔɔlɔ ta gbala ji taalakpawai a mɔ ndulii a gbuahu. 10Ta loolɔ kuhama polouŋ nduwɛi ti houngɔ mɔnɛi va a yɛ hu, ta wɔlɔ ta nde tɛ, “Aa kpa! Aa kpa, taalakpawai Babilɔn, ndɛmɛwai vuii gbelɛ hawa yakpe googu ngi nde gbɔyɔa ma!” 11Dunyama veegɔblaa kɛɛ yeemajiablaa ta wɔɔlɔ ndiinyani i ti hou ngi gbuhɛi va, ajifa numu gbi ɛɛ jɔɔ ti veeisia yeya va ti ma; 12numu ɛɛ yaa jɔɔ ti ganigbɔli yeya va, kɛɛ kanigolei, kɛɛ kɔtu baagbangɔisia, kɛɛ kula nyande lasi gbi lekee, kia linii na, siki kɛɛ wulii; i gbɛli ngulu lasi gbi yeemagunɛngɔ ma, hakei nasia ta kpatɛ a heleyɔngɔi, kɛɛ hani baagbangɔisia kpatɛngɔ a blasi, kɔlii, kɛɛ mabui; 13taa hani gunɛnɛngaa kia sinamɔn na, spaisi na, flakinsɛnsi kɛɛ siminjii, gbɛsɛi, kpɛlingɔ ndoe ma kɛɛ ngulɔi, mba vukangɔi ma tia nyui, nikangɛisia ma tia kɔhousia. 14Feegɔblaa ta ndelɔ ngi ma tɛ, “Hani yekpeisia kpɛlɛɛ bi hamingɔ yɛla fa malewenga kpe bi yeya, tawao bi gbatei i gbɛli nɛnɛɛ ma bi yɛ hu gbii ya bi longa kunafɔ bɛɛ yaa ti majɔɔ!” 15Feegɔblei nasia ti gbatɛni a veela ngi hu ta loolɔ kuhama polouŋ nduwa ti huvengɔ mɔnɛi va a yei ngi ma. Ngaya a yeilɔ ti ma ta lewe a gbala, 16tao ta nde tɛ, “Aa kpa! Ndɛmɛ vuii gbelɛ Babilɔn! A ngi mayili wɔɔ a fɛmgbɛ lɔ, hunyɛingɔ ngahunpungɔ a kpɔlu, i kani gbɔluisia gula ngi ma kɛɛ kɔti baagbangɔisia kɛɛ ngeya nyandeisia! 17Kɛɛ hawa yakpe goohu gbe, i baanga a ngi gbatɛ wai kpɛlɛɛ!” Ndɛndɛ mahubleisia kpɛlɛɛ tia njaya heibleisia, kpɛlingɔ ndɛndɛ wulibleisia ma kɛɛ nasia gbi ma ti nafɛi wuaangɔ njaya yengei hu ta loolɔ polouŋ kuhama, 18kɛ tia wɔɔma ji ta tɔ taawai a mɔ ndulii a gbua koohu a lɛ, tɛ, “Milɔ dunyei hu kpɛlɛɛ taa weka wa a hiye i wie kia tawai ji nyɔkɔ yɛ na?” 19Ta flofloi jɛsialɔ ti wumbeisia, ta wɔɔ tao ta gbala tɛɛ, “Aa kpa! I nyamui kpa taawai Babilɔn va mia nasia gbi ndɛndɛngaa ti ti yeya na wɔɔ njaya ti gbatei na ngi hu! Kɛɛ hawa yakpe goohu gbelɛ i baanga a kpɛlɛɛ!” 20A koohunɛɛ jɔlɛ wie, wua wu ngelegoohu, Babilɔn wololei va! A goohunɛɛ Ngewɔ nungeisia, tobleisia, kɛɛ tutuisia! Gbamaile Ngewɔ lɔ i ngi gbɛmbonga hindeisia va i ndani wu ma! 21Kɛ malika wa yila i kɔti lakpawa wumbua piengɔ kia nyɔ vuka gɔtii na, i pili vaa gboyei hu kɛ i ndea yɛ, “Himia Ngewɔ a Babilɔn lawai wumbula i pili a tawao numu ɛɛ yaa kunafɔ yaama wɛlɛma gbɔma. 22Kɔninga lewebleisia ti wule woi kɛɛ guleyaableisia, koko vɛwoi taa bulii vɛwoi kulo hii va tɛɛ yaa mɛni bi hu. Kunafɔ kaa yenge wiemɔ yeelasii gbi lekee ɛɛ yaa gbua ngi hu, tawao nyɔ vukawo kalɛ yila bɛɛ tɛɛ yaa mɛni ngii hu! 23Tɛɛ yaa lambo vofo lɔ bi hu, tawao kɔli nyahɛi taa ngi hini ti jɔlewoi tɛɛ yaa mɛni kulo bɛɛ va bi hu. Feegɔbleisia ti gbuani ngi hu ti yɛni wɔɔ a nuwawangaa lɔ ti dunya, tawao ngi likɔtɛi lɔ wieni i guni i nungeisia gbi wɛlɛni ti dunyei hu.” 24Nimisa lailɔ Babilɔn ma ajifa Ngewɔ lutuisia kɛɛ ngi nungeisia ti ŋamɛi i lɛilɔ ngi wumba, kpɛlingɔ nasia kpɛlɛɛ ti ŋamɛi ma i ti waani dunyei hu.

HINDEI MAGƐNI A JƆN 19

1Nawooma ngi sɔlɛ lakpawa mɛnilɔ kia faha gomɛ wa ngelegoohu, ta yele gula, tɛ, “Mbawoyei, ngɔlɔyɛi kɛɛ kpayei lɔ mu Yewɔɛi yeya! 2Ngi gbɛmboisia ti lɔnyangɔe tawao ti wɔnangɔe! I puegbua nyaha wai lɛɛnga dunyei wuhu nyani va a ngi wuegbualei. Ngewɔ i ngi yengebleisia ti ŋamɛi hunyɔnga ngi ma i puni.” 3Gbɔma kɛ ti yele gulanga tɛ, “Tato i yɛ Ngewɔ ma! Ndulii na bia bi gbuama taawai hu i mɔma bi lo lɛma kunafɔ bi hu aa lewe.” 4Kɛ kpakolo nuu gbɔyɔngɔ mahu naanisia kɛɛ fuuhani naanisia ti mawɛlɛnga ti wombi gbakpa ti Ngewɔ vɛli, tɛ, “Amiina! Tato i yɛ Ngewɔ ma!” 5Nawooma kɛ ngoo gbuanga a maha heimi we yɛ, “A mu Ngewɔ lato, wua ngi yengebleisia kpɛlɛɛ kɛɛ ngi nungeisia a wue wa luwa ngi ma, bi wɔlɔ ɔɔ bi gulo!” 6Nawooma ngi sɔlɛ wo mɛnilɔ kpuangɔ a faha gomɛ lakpawa, kpuangɔ gbɔma a njaveisia ti junduwoi kɛɛ ngele yiawoi na. Ngi mɛnilɔ ta nde tɛ, “A mu Ngewɔ lato! Gbamaile Ndemɔi mu Yewɔ wai mia Maha le! 7A mu kahu gbua wie, mu goohu i nɛɛ; a mu ngi wɔlɔyɛi lato! Gbamaile Mbalaloi nyaha gɔli gomɛi yeewatii hitea ma, tawao ngi nyahɛi i tayekpe magbatɛnga. 8Ti ngi gɔnga a kula huyɔfungɔi ngiliva.” (Yeekula huyɔfungɔi mia a pɔɔna yengeisia lɔ Ngewɔ nungeisia ta pie.) 9Kɛ malikei ndea nya ma yɛ, “Ji nyɛi: koohunɛɛ lɔ nasia ma ti ti lolini Mbalaloi nyaha gɔli gomɛi hu!” Kɛ malikei poma nikpɔnga yɛ, “Ngewɔ layie yeetɔnyangɔi mia a jisia.” 10Kɛ ngi gulanga ngi gɔɔbu kɔɔ ngi ngi vɛli, kɛ i ndea nya ma yɛ, “Baa na wie! Nya mbaa ngengemɔ mia a bie, wua bi ndewengeisia, nasia kpɛlɛɛ ti toma tɔnyɛi woma Yesu magɛni. Ngewɔ lɔ mahoungɔ bi ngi vɛli!” Gbamaile tɔnyɛi na Yesu i magɛni, tamia a kpɔma yɛ nungaa ma Ngewɔ layie leva. 11Kɛ ngi tɔnga ngelegoohu i lawo, soi yeekolei looni na nya gulɔ. Numui i yɛ heini maahu ngi biyɛi mia a Liiloma taa tɔnya jeliwuamɔ; a kpɛmbo wuaa a pɔnalɔ i ndapi lalewe a pɔɔna. 12Ngi yaamɛisia ti wiengɔ yɛla kia ngɔmbu voi na, tawao maha bɔleisia ti vahangɔ yɛla ti wɛpɛɛni ngi wumba. Nda yɛlɔ ngi ma nuu weka gbi ii kɔ kɛlee tayakpe. 13Bombani na yɛ ngi ma kpɔyɔngɔ yɛla gbɛlɛɛŋ a ŋamɛi tawao ngi biyɛi mia ti yɛ toli a “Ngewɔ Yiɛi.” 14Kɔgɔbleisia ti ngelegoohu ti mayilingɔ a fɛmgbɛ gula huyɔfungɔi ti hitɛilɔ ngi woma ti heini soi yeekoleisia maahu. 15Kɔbowa houngɔ i gbuɛilɔ ngi laa na a ndɔleisia ti gbuala. A mahaya mɛlɔ ti maahu kɔlu vomɛi houni ngi yeya, tawao a ti vɔnyalɔ kia glepii na ndɔɔ vɔnya vei hu, na ndiilewe wa le Ngewɔ gama. 16Ngi bombani ma taa ngi gbalei, nda yɛlɔ na nyɛingɔ, “Mahangeisia ti Mahɛi kɛɛ Ndemɔisia ti Lemɔi.” 17Kɛ ngi malikei lɔnga looni foloi ya. Kɛ i yele lakpawa gulanga ŋɔningɛisia kpɛlɛɛ ma ti gowoma polouŋ ngele ya, “A wa wu lɛma Ngewɔ mɛhɛɛ yeekomɛ jɛmɛtɛngɔe va; 18aako wu mahangeisia ti luwui mɛ, kɛɛ kɔ-gugbɛisia, kɛɛ nuuvuisia kpɛlɛɛ ti luwui, bi yɛ a nduwɔ lɔ ɔɔ bii yɛni a nduwɔ, bi ya a nuwa lɔ ɔɔ bii yɛni a nuwa!” 19Kɛ ngi fula huɛi lɔnga taa dunyama mahangeisia kɛɛ ti sojeisia ti lɛngɔma kɔ wɛlɛva numui ma i heini soi maahu taa ngi nda mableisia. 20Kɛ ti fula huɛi hounga ti ndɛɛ lutui gbɛli ngi ma na yɛ kabande hindeisia wie ngi yaama. (A yee kabande hindeisia mia i nungeisia wɛlɛni poma, nasia fula huɛi yeefeleyei ngi maiki blangɔ yɛla ti ma tawao ta ngi gbuayei gbatɛngɔi vɛli) Ti ti venjɔ wumbuilɔ ndɛvui ti hu kɛ ti ti wilinga ngɔmbu wopei hu na a mɔ a sɔifɛi. 21Yee mɔnuisia kpɛlɛɛ ti loni ti haani bowei yalɔ i gbuani numui laa yɛ heini soi maahu, kɛ ŋɔningɛisia ti ti womɛisia mɛnga i gu nyɔɔ a tie.

HINDEI MAGƐNI A JƆN 20

1Kɛ ngi malikei lɔnga a gbua ngelegoohu, i houni ndɔu lama jii ma kɛɛ jɔwɔ lakpawa. 2Kɛ i ndamba gali wai hounga, kali wova wai ta toli a ngafa nyamui ɔɔ seitana, i ngi wu jɔwɔi ya foo tauji yila va. 3I pililɔ ndɔu, i kpɔu, ti ndama gbongbo nɛvɛ ngi ma kɔɔ aa yaa ndɔleisia ti wɛlɛ gbɔma kulo bɛɛ, haaŋ i lo hu foo tauji yilei i gbɔyɔ. Nawooma ta ngi vulolɔ watii wulo va. 4Kɛ ngi maha heimeisia lɔnga kɛɛ nasia ti heini na kiti lava. Gbɔma ngi nasia bɛɛ ti yafeisia lɔilɔ ti ti hɛlɛni wɔɔ tɔnyɛi va ti yɛ nde kpɛlingɔ Ngewɔ layie ma na Yesu magɛni. Yeenungɛi jisia ti gangɛilɔ fula huɛi vɛli va taa ngi gbuaye gbatɛngɔi, tawao tii lumani ngi maiki a bla ti lawaasia ɔɔ ti lokoi ma. Ti yamɛilɔ ndɛvu hu ti gbɔ ti mahaya mɛ taa Kristi-ni foo tauji yila va. 5(Haablaa yeemɔnuisia ti loni tii yaa vuluni kɛlee foo tauji yilei gbɔyɔngɔi wooma.) Ji yɛni a haala watii lɔ Ngewɔ a nungaa wumbu hee hu. 6Koohunɛɛ kɛɛ luba waa a yɛlɔ nasia ma ta yɛ a haalablaa ta hiye hee hu. Hee yeefelei ɛɛ yaa gu ti ma; ta wote lɔ a saagbuablaa Ngewɔ va kɛɛ Kristi, tawao ta gbɔlɔ taa Kristi-ni ti mahaya mɛ foo tauji yila va. 7Foo tauji yilei na lewengɔ wooma, ta Seitana vulolɔ jɔwɔi ya, 8tawao a lilɔ ndɔleisia wɛlɛma ti vayangɔnga dunyei yeesɔku naanisia hu ti Gɔg taa Magɔg, aako i ti lɛma koe gulava; ti vahayii wiengɔi kia ŋanyɛi na i gboyei gblanga. 9Ta vayalɔ dunyei hu ti kakpa Ngewɔ mableisia ti mbafa wɛlɛngɔisia ma kɛɛ taawai ma Ngewɔ longɔ la gboŋ. Kɛɛ ngɔmbui a gbualɔ ngelegoohu i ti gbi gboli. 10Kɛ ti Seitana hounga, na ti wɛlɛni, ti pili ngɔmbu wopei hu kɛɛ sɔifɛi mia fula huɛi maahu taa ndɛɛ guala lutui; tawao a folo kɛɛ kpindi tɔɔya a lalɔ na ti ma kunafɔ ta ngi nda kunafɔ 11Kɛ ngi maha-heima lakpawa lɔnga hugolengɔ fo numui heini na. Ngi gbuangɔnga lekee, ngelegoohu taa dunyei ti gbɔyɔilɔ tawao heima bɛɛ ii yaa jɔɛina ti va. 12Kɛ ngi haableisia lɔnga, yeesɛmbɛisia kɛɛ yeekulowuisia ti looni maha heimi gulɔ. Kɛ ti bukuisia hulawonga, ti yamaa ti pekei lawo, na yɛni a fuubleisia ti bukui. Ti haableisia gbɛmboilɔ ti wiehindeisia va kia nyɛingɔ yɛla bukuisia hu. 13Kɛ gboyei i balinga a haableisia ti ngi hu. Hee taa ndɔu bɛɛ ti balilɔ a haableisia ti ti hu. Ngewɔ i ti gbi gbɛmboilɔ ti wiehindeisia va wɔɔ ti yɛ pie. 14Kɛ ti hee taa ndɔu wumbunga kpa ti ti wili pɔ ngɔmbu wopei hu. (Ngɔmbu wopawai ji yɛni a hee yeefelei lɔ.) 15Numui na gbi lekee ngi biyei nyɛingɔ ii yɛla fuublaa ti bukui hu ti pililɔ ngɔmbu wopei na hu.

HINDEI MAGƐNI A JƆN 21

1Kɛ ngi aijɛnɛ ninɛi lɔnga taa dunya ninɛi, gbamaile haala aijɛnɛ taa haala lunyɛi ti yɛ gbɔyɔnga, tawao gboyei ii yaa yɛ na. 2Kɛ ngi kayema lawai lɔnga, Jelusalɛm yeetaa ninɛi hu, i yeima a gbua Ngewɔ gama, ngi magbatɛngɔ kia koli nyahɛi a ngi mayili a yɛ lima ngi hini welei hu. 3Kɛ ngi ngoo lakpawa mɛninga i gbuama a maha-heimɛi yaka we, yɛ: “Ngewɔ i heima gbatɛnga na nuuvunga lia! A yɛlɔ ti lia, tawao ta yɛlɔ a ngi nungeisia. Ngewɔ vuii a yɛlɔ ti woma, tawao a yɛlɔ a ti Yewɔi. 4A ngaya yialɔ fo ti yaama, haa ɛɛ yɛ na gbɔma, ɔɔ ndiinyani, ɔɔ gɔlɔwo, ɔɔ kpalɛ, ajifa hindei yeengoveisia ti gbɔyɔngɔ a yɛla ma.” 5Kɛ numui na heini maha-heimɛi i ndenga yɛ, “Nyaa na hindeisia kpɛlɛɛ ti yamama ninaya hu!” I ndeilɔ gbɔma nya ma yɛ, “Ji nyɛi, gbamaile layie jisia ti lɔnyangɔi tawao liilomaya lɔ ti hu.” 6Kɛ i ndea nya ma yɛ, “I gbɔyɔnga ma! Nya mia i lɔtoni nya ma tawao kɛlɛngɔ tɛlɛ nyalɔ ma, yeetɔtoomɔi kɛɛ yeekɛlɛmamɔi. Numu gbi lekee ngi bolohu bengɔ, nga ngi ngɔlɔ a nja kpoliva gbama a gbua ndɛvu yalokengɔihu a gbua ndɔu. 7Nu-o-nu a temaya mɛ a nafaya jɔlɔ a nge: Nga yɛlɔ a ngi Yewɔɛi, ta i yɛ a nya lo. 8Kɛɛ nasia ti lii ii gbani, nasia lanaya ii ti hu, pienyamublaa, nuwaableisia, puegbuableisia, njosololibleisia, nɔmɔli vɛlibleisia kɛɛ ndɛɛ guableisia kpɛlɛɛ ti yɛmɛi mia a popɛi na hu a mɔ a ngɔmbui kɛɛ sɔifɛi, na yɛni a hee yeepomayei lɔ.” 9Kɛ malikeisia ti yilayee bola wɔflei yɛ houni ngi yeya fendangɔ a kɛlɛma fitina wɔfleisia i wanga nya gama, yɛ nya ma, “Wa ngi kɔli nyahɛi gɛ a bie, na Mbalaloi nyahɛi a ngie.” 10Kɛ Ngewɔ Yafei nya huvenga i nya wumbu i li a nge ngiye wa maahu. I Jelusalɛm gɛilɔ a nge, kayema lawai, i yeima a gbua Ngewɔ gama ngelegoohu, 11maa a voo dauŋ a ngi wɔlɔyɛi. Yeetaawai yɛlɔ a voo kia kɔtu baagbangɔ wa, kia jasipa gɔtii na, hu yagbalauŋ kia mɛmɛɛ na. 12Yee gɔlɔ loongɔi wunga guhangɔ yɛla, malika puu mahu fele ti looni yeendama puu mahu feleisia. Yeenɛtɛ laama gbi lekee kɛnyɛwu puu mahu feleisia ti gbuani Isrɛl ti biyei nyɛingɔi na. 13Nɛtɛ laama sawa mia yɛ kaka yila gbi ma: sawa a foloi hiye welei hu we, sawa a kpundɔhu yaka we, sawa a mahui yaka we, kɛɛ sawa a foloi gula welei hu we. 14Taawai yeegɔlɔi ti tooni pɛlɛ hitɛ gɔtii puu mahu feleisia lɔ maahu, mia toblaa puu mahu feleisia Mbalaloi woo a tie ti biyeisia ti nyɛingɔ na. 15Malikei na yɛpɛni nya gama tikpɔi kpatɛngɔ a kanigbɔlui hakei humavala yɛlɔ houni ngi yeya kɔɔ i taawai humala, yeenɛtɛ lamɛisia, kɛɛ yeegɔlɔi. 16Yeetaawai ngi laama wɔlɔyii taa ngi guhayii mahɔngɔ yɛla jɔ. Malikei i tawai humɛilɔ a haka huma likpɔi: Ngi guhayii i guni a maili tauji yila kalɛ hɔndɔ lɔɔlu lɔ, tawao yeengawɔlɔyii taa ngi yalɛyii kɛɛ ngii yaguhayii yɛ yakpe. 17Malikei i yeegɔlɔi bɛɛ humɛilɔ, kia nuuvu haka humayii kɛila, yeengalɛyii guni a hou hɔndɔ fele kalɛ puu mahu weita lɔ. 18Ti yeebundei looni a jasipa gɔtii lɔ tawao yeetaawai ti too a kanigbɔu na ya sɛwɛ, i yaa sɛwɛ kia mɛmɛɛ na. 19Kɔti nasia taawai yeegɔlɔi hitɛngɔ yɛla maahu magbatɛngɔ yɛla pandaa a kɔti baagbangɔi yeelasii gbi lɔ. Haala gɔtii hitɛngɔi laa a jasipa, yeefelei a safaya, yeesawei ageti, yeenaani a ɛmiladi, 20yeelɔɔlu a sadɔnski, yeeweite a kanɛlia, yeewɔflei a klisolaiti, yeewayakpei a bɛril, yee taalui a topasi, yee pui a klisoflesi; yeepuu mahu yile laa a jasinti, yee puu mahu felei a amɛtisti. 21Nɛtɛ laama puu mahu feleisia ti tooni a kɔtu gowe baagbangɔ puu mahu fele lɔ, yeenɛtɛ laama yila gbi na gbatɛngɔ a kɔtu gowe yila. Yeetei yeetiitii wai ti kpatɛni a kani gbɔu yeesɛsɛ lɔ, nga a voo kia mɛmɛɛ na hu yaagbalauŋ. 22Ngii Ngewɔ vɛli wɛlɛ lɔni yeetei goohu, ajifa ngi vɛli wɛlei a Ndemɔi Ngewɔ walɔ taa Mbalaloi. 23Folo gbuala yeemani ɛɛ yaa yeetei hou ɔɔ ngawu voofo, ajifa Ngewɔ wɔlɔyɛi yeemavoi a yɛlɔ na, yeelamboi a Mbalaloi lɔ. 24Yeetei ngi mavoi lɔ dunyableisia ta jia ma tawao nalɔ dunyama mahangeisia ta wuaa na a ti gbateisia. 25Yeenɛtɛ lamɛisia tɛɛ yaa gbɔwu, gbamaile kpindi ɛɛ yaa wɛlɛna. 26Ngɔlɔyɛi na tɛngɔ ndɔleisia ma kpɛlingɔ kpatɛima ti piengɔ ta mabelɛlɔ yeetei goohu. 27Kɛɛ gbɛ-o-gbɛ lekee njoola hani le ɛɛ yaa wuaa na, ɔɔ numu gbi lekee a lewe a ngufebaa hindangaa wie kɛɛ ndɛɛ guala. Nasia lekee ti biyeisia nyɛingɔ fuublaa ti gɔlɛi hu i Mbalaloi yeya tia mia ta wuaa yeetaawai goohu.

HINDEI MAGƐNI A JƆN 22

1Kɛ malikei i ndɛvu yɛi gama gɛnga a nge, nga a vo kia mɛmɛɛ na, a gbua a Ngewɔ maha-heimɛi we taa Mbalaloi, 2a yei a tiitii wai lia we taawai goohu. A yeenjei yakahu venjɔ we, ndɛvu ve wuli yɛlɔ na, a ngua wie heima puu mahu fele foi goohu, kɛɛ heima yakpe ma ngawu gbi lee goohu; tawao ngi laweisia ti yɛni a hale lɔ ndɔleisia va. 3Sondu gulama hinda gbi ɛɛ yaa wie yeetei na goohu; gbamaile Ngewɔ taa Mbalaloi ti maha heimi a yɛ nalɔ, tawao ngi yengebleisia ta ngi vɛli nalɔ. 4Taa Ngewɔ-ni ti yaama a heilɔ lengahu ta ngi lɔ a ti lɔ, tawao ngi biyei a wulɔ ti lawaasia. 5Kpindi ɛɛ yaa wɛlɛ na gbɔma, lambo taa foloi yeemagbee bɛɛ ɛɛ yaa ti hou, ajifa Ndemɔi Ngewɔ lɔ a yɛ a fofoi ti va, kɛ ti mahaya mɛa kunafɔ taa ngi da kunafɔ. 6Kɛ malikei ndea nya ma yɛ, “Njɛpɛ woi jisia ti lɔnyangɔi tawao liiloma vuii lɔ ti hu. Kɛ Ndemɔi Ngewɔ, na a ngi Yafei yei ngi lutuisia ma, i ngi malikei loonga liva i hugɛ a ngi yengebleisia na wama huɛɛŋ wiema hugutungɔ.” 7Yesu yɛ, “A woolo lɛ, nyaa wama sange! Koohunɛɛ lɔ nasia ma ta kulɔma yie jisia wu ti liisia hu bukui ji goohu!” 8Nya, Jɔn, ngi hindei jisia mɛnilɔ kɛɛ ngi kpɛlɛɛ hulɔilɔ, tawao kpɔyɔngɔi woma a ti hulɔla kɛɛ ti mɛnila, ngi gulɛilɔ malikei gɔɔbu na i ti magɛni a nge aako ngi ngi vɛli. 9Kɛɛ i ndeilɔ nya ma yɛ, “Sawo baa na wie! Nya mbaa ngengemɔ mia a bie wua bi ndewengei nasia tutungaa a tie kɛɛ nasia kpɛlɛɛ ta ngolo Ngewɔ layie wɛ bukui ji hu. Ngewɔ lɔ mahoungɔ bi ngi vɛli!” 10Kɛ i ya gulɔma yɛ, “Baa kulɔma yie jisia malɔwu kulo bɛɛ ti kɔlɛi ji goohu, gbamaile watii lukpengɔe gbla fɔɔ ti gbi ta wie. 11Nu-o-nu i yɛni a pienyamumɔ, li tuuŋ gulɔma a pienyamu wiela, nu-o-nu njoolamɔ a bie, li tuuŋ gulɔma a njoola hinda wiela; nu-o-nu pɔɔnamɔ a bie, li tuuŋ gulɔma a pɔɔna hinda wiela; nu-o-nu kayemamɔ a bie, li gulɔma tuuŋ a kpekpeya hinda wiela.” 12Yesu yɛ, “A woolo, nya walei hugutungɔi! Nyaa wama a mawaa hanisia numu gbi pawa va a ngi yengeyii. 13I lɔtoi nyamalɔ tawao a gɛlɛ nyamalɔ, haalamɔi kɛɛ yeekɛlɛmamɔi, yeetɔɔtomɔi kɛɛ yeengakpuamɔi.” 14Koohunɛɛ lɔ nasia ma ta ti bombanisia wua i gole fo aako ti kpaya majɔɔ ngu wuɛi mɛva ndɛvu ve wulii ya, kɛ i pienga ti gu ti wuaa a nɛtɛi lamɛisia we taalakpawai goohu. 15Kɛɛ a tɛi woma we pɔ, ngilangɛisia lɔ na kɛɛ kuɛtɛblesia kɛɛ puegbuableisia kɛɛ nu waableisia kɛɛ nɔmɔli vɛlibleisia, kpɛlingɔ numui gbi lee ma ngi longɔ a ndɛɛ taa kava gula la. 16“Nya Yesu, nya mia ngi nya malikei looni hindeisia jisia leva wu ma sɔsiisiahu. Nya mia Devidi hapii a nge kɛɛ ngi nɛkui, ngenda lumbekei yee gbalaungɔi a nyaa.” 17Ngewɔ Yafei taa kɔli nyahɛi tɛ ngi ma, “Wa!” Tawao nu-o-nu a ji mɛni koungɔ ta bɛɛ i nde yɛ, “Wa!” Nu-o-nu bi bolohu bengɔ, wa; ndɛvu yɛi hou gbama fuluva numu gbi lekee bi longɔ la. 18Nya, Jɔn, gbɛɛ ngi ndahii kpɔtu la numui gbi yeya a kulɔma yiɛi jisia mɛni ti bukui ji goohu; nu-o-nu ba bi nda lama, Ngewɔ a ngi nimise matolɔ a fitini nasia nduanwongɔ bukui ji goohu. 19Tawao nu-o-nu a gbɛogbɛ gbua kulɔma yiɛi jisia ma ti bukui ji goohu, Ngewɔ a ngi nda gbekpeyeisia gbualɔ ma ti ndɛvu wuli ya i kpɛli mɛmii bɛɛ ma i ngi yeya kayema lawai hu, nduawongɔ bukui ji goohu. 20Numui na ngi layia a ngooi jisia kpɛlɛɛ yɛ, “A tɔnya va vuii, nyaa wama sange!” Amiina. Wa, Ndemɔi Yesu! 21Ndemɔi Yesu yauwandei i yɛ wu kpɛlɛɛ ma. Amiina.

AMAZING GRACE BIBLE INSTITUTE