FILIPAIBLƐISIAFILIPAIBLƐISIA 11Nya Pɔɔl, kɛɛ Timoti, Yesu Kristi yengeblaa a mue, nya mia ngi kɔlɛi ji nyɛima Kristimablei nasia gama ti Filipai, tia Yesu Kristi-ni ti wilingɔ hu vulii kɛɛ tokulɔisia tia nasia ta gbɔ ti ma. 2Mu Kɛkɛ Ngewɔ tia mu Lemɔi Yesu Kristi ti wu gɔ a ngauwanda kɛɛ ndiilɛli. 3Nga siɛgbualɔ nya Yewɔɛi ma wu va watii gbi wu hinda a hitɛ nya wɛ; 4tawao watii gbi ngi yaa Ngewɔ vɛlima wu kpɛlɛɛ va nga ngi vɛli a kohunɛ waa lɔ, 5pelei nasia va wu gbɔnga la nya ma Ngowili Yekpei vayava hu i hiye folei na vulii ma wu lani a Yesu Kristi i to folei ji ma. 6Faale nya langɔe la kɛ Ngewɔ na i ngenge yekpei ji lɔtoni wu hu, a lolɔ piema i kpɔyɔ Folei na ma Yesu Kristi a yama. 7Wu hinda lɔ Tuuŋ nya lii hu! Faale pɔɔnangɔ nya va giliva hii kɔlooni wu ma; ajifa wu gbɛɛnga nya ma mua ngengei na wiema Ngewɔ i fenga nya wɛ gba pieva kiahuna na ngi kpindiwɛlɛ bu kɛɛ watii na nya hugbɛmbongɔ yɛla kɛva kɛ tɔnya lɔ a Ngowili Yekpei kɛɛ pieva nungaa ti la la kiti gbi aa yɛ ti ma. 8Ngewɔ lɔ nya jeli le kɛ tɔnyɛi mia nga nde wu ma ji nga nde ngɛɛ nya longɔe a wu kpɛlɛɛ kia lɔɔ Yesu Kristi vulii ngi longɔ a wue. 9Nyaa Ngewɔ vɛlima aako i pie ndoma lii na i wu goohu wu nyɔunyɔ va i ya a gbaya Tuuŋ kɔɔ wu gu a tɔnyɛi gɔla, tawao wu yɛ a kiti lewe pɔɔnangɔ, 10aako hindei na kpekpengɔ tewengɔ hinda yekpei kpɛlɛɛ ma wu gu a mbumbula pieva. Na wiengaa wu sɛwɛsɛwɛngɔ a yɛla tawao tɔwanyani ɛɛ yɛ wu ma Folei na ma Kristi a yama. 11Na gbi wa pie a yɛ a hinda yekpe waa lɔ tawao Yesu Kristi yakpe lɔ a pie wu ji wie, aako nungaa ti Ngewɔ wɔlɔ, ti ngi lato. 12Nya mbaa Kristimableisia, nya longɔ wu kɔɔ kɛ hindei nasia ti nya wienga ti pienga numu gboto lɔ lekee lama a Ngowili Yekpei. 13Famia sojei nasia gbi ta Rom Maha Wai wɛlei mahugbe kɛɛ pekei nasia gbi ti mbei ti kɔɔlɔ kɛ jifa Kristi yengemɔ a nge famia ti nya wuni kpindiwɛlei bu. 14Tawao nya wuava kpindiwɛlei bu i pienga Kristimableisia gbotoma ti lii valanga panda Ndemɔi ma na hii ti lii lɔ lekee gbaama Ngowili Yekpei leva a ngaulewe. 15Tɔnya le kɛ ti lɛɛnga ta Ngowili Yekpei lelɔ kɔlooni Kristi ma tolo gbuava kɛɛ jifa ti longɔ a njianjia, kɛɛ pekeisia ta pie vulii a ndii yekpe lɔ ti longɔ kpekpeya i gbua hu. 16Kɛlɛmayei jisia ta pielɔ hii jifa ti longɔ a nge ajifa ti kɔɔlɔ kɛ Ngewɔ kɛnga a nya yenge ndeva leiŋ kɛ tɔnya lɔ a Ngowili Yekpei. 17Pekei nasia ti lolongɔ tɛɛ Ngowili Yekpei le kɔlooni Kristi ma a ndii yekpe, ta ndelɔ aako ti kpekpeya jɔɔ hu tia yekpe va; ti lii lɔ ma tɛɛ ta hinda gboto huwulɔ nya yeya kia lɛ ngi mbei kpindiwɛlei ji bu. 18Njia gbi ii na ma ti longɔ ti pie a nge! Na kpewengɔ nya ma ta mia a Ngowili Yekpei lelei a pele gbi lekee, i yɛ lema sabu yekpe ma ɔɔ ndɛhu. Tawao nga goohunɛɛlɔ Tuuŋ, 19ajifa ngi kɔɔlɔ kɛ Ngewɔ na wa fɛli nya va kɛɛ kpɔmɛi na a gbua Yesu Kristi Yafei gama ta pielɔ mahubleisia ti gbe nya ma. 20Na kpewengɔ waa nya ma tawao nya lii i ma ta mia a ji kunafɔ ngaa gbaha a nya yengei wiela, tawao waati gbi, kakayee ngamɛi ji, ngi ndiilo waa majɔɔ aako nya layie hu kɛɛ nya wiehindei ngi pie nungaa ti Kristi mbɛlɛhei gɔɔ, ngi haa bɛɛ ɔɔ ngi vulu. 21Gbamaile gbɔɔ ndɛvui yeesabui le? Nya nya wɛ, ndɛvui yeesabui lɔ a yengela Kristi wɛ. Nya haala ta, a walɔ a nafa wa nya gama. 22Kɛɛ ngi lɛmbingaa nga gulɔ a ngenge yekpe mato wiela, faale ngii kɔɔ ina nga nya haalɛi lɔ wumbu ɔɔ nya lɛmbilɛi. 23I wienga bi tɔaa bɛ tia nya laalama a leenga ngejahu we kɛɛ kɔwɔhu. Nya longɔ waa le ngi gbua ndɛvui ji hu ngi yɛ Kristi gama, tawao ji nyandengɔ polouŋ nya va. 24Kɛɛ aako ngi gbɔ wu ma, baagɔma lɔ nya yɛla ma ndɛvu hu i lewe nya haalɛi ma. 25Nya langɔe a ji, faale ngi kɔɔlɔ kɛ ngi yɛmaa lɛ na gbɔva wu gbi ma, aako wu lalei a Kristi kɛɛ wu goohunɛɛ mato. 26Nga ji wielɔ kɔɔ ngi wangaa gbɔma wu gama wu sabu matongɔ jɔɔ mata gbuava a nge tuvei va wu piema wua Yesu Kristi-ni wu wilingɔ hu. 27Kiahuna hinda yakpei na baagɔma i ma tamia a ji wa luva kia Ngowili Yekpei kɔlooni Kristi ma i ndeni yɛ wu pie, kɔɔ ngi gungaa a wala wu gama ɔɔ ngii guni, nga mɛnilɔ kɛ wuaa looni kpaŋ, wu lii i hani yakpe ma tawao wa lapi a ngooyila kɛɛ wu liima hindei yakpe lalei na va a gbua Ngowili Yekpei hu, 28tawao waa luwa nasia ma ti lolongɔ a wu yengei. Wu lii i loo watii gbi; ji lɔ a kɛ a tie kɛ ta gbahalɔ tawao kɛ wua wa temaya majɔɔlɔ, jifa Ngewɔ lɔ a teemayɛi ve wu wɛ. 29Gbamaile wua wu sabu yekpe waa majɔɔnga gbama yɛva a Kristi yengeblaa, wu lava lekee ii le a ngie, kɛɛ jifa gbɔma kpaalɛ a la wu ma ngi va. 30Wa gulɔ na a gbɛɛla nya ma yeendapii ji hu. Ndapi yakpei na wu yɛ tɔ wɔɔ nga kɔ ta mia, kia wu tɔma la, ngi kɔma kiahuna bɛɛ.FILIPAIBLƐISIA 21Ina wu luvayii Kristi hu i wu gɔnga a ndii kpakpau, ina ngi lomɛi a wu nɛpɔlɔ, ina wua Ngewɔ Yafei-ni wuaa mbaaya hu, tawao hindawanda kɛɛ manuma lɔ wu hu wu nyɔunyɔ va, 2Nyaa na wu manɛnɛma hɔɔ, kɔɔ wu pie nya goohu i nɛɛ waa a ji wu giliyii a yɛ yakpe, wu longɔ a wu nyɔunyɔ mahɔɔngɔ, wu lii i yɛ yakpe kɛɛ wu liima hindei. 3Waa hinda gbi wie wua yekpe lekee nafava, ɔɔ aako nungaa ti nde tɛɛ numu waawaangaa lɔ a wue, kɛɛ a wua yekpe mayei wu nyɔunyɔ gama, kpema gbi wa nungaa wekɛisia fesa wua yekpe ma. 4Wu mbaangɛisia ti nda hindei i gbewe wu ma vulii, wu wumayei lekee ii le. 5Mahoungɔ wu wiehindei tia Yesu Kristi wiehindei ti yɛ yakpe: 6Tia Ngewɔ ti gbatɛyii i yakpe wɔɔ gba, kɛɛ ii gilini la lapiva kɔɔ taa Ngewɔ ti maa i hɔɔ a kpaya. 7Kia aa na wie, i gbuailɔ toma wai na a ngi wumaye, i wote a nduwɔ. I wieilɔ kia lɔɔ nuuvu, i gbua nga ngi yɛngɔ a nuuvu. 8I ta yekpe mayeilɔ, i lo goloma Ngewɔ wɛ i luma i haa, hee na i pieni krɔsii ma. 9Na vamia Ngewɔ i ngi loni tomɛi na tewengɔ tomɛi kpɛlɛɛ ma ngelegoohu, i mbiyɛ ve ngi wɛ tewengɔ mbiyɛ weka gbi ma. 10Faale, baagɔma veva Yesu biyɛi wɛ, Hani kpɛlɛɛ ti ngelegoohu kɛɛ dunya kɛɛ ndɔu ta mawɛɛlɔ ngi gɔɔbu, 11tawao ti gbi ta ndelɔ leiŋ tɛɛ Yesu Kristi lɔ ti Lemɔi le ngɔlɔyɛi veva mu Kɛkɛ Ngewɔ wɛ. 12Faale naa nya liimablɛisia, kia lɔɔ wu yɛ woolo nya layie ma tuuŋ watii na ngi yɛ wu lia, fesangɔ waa a yɛla wu golo mbɛ tewengɔ na ma ji ngɛɛ yɛ wu lia. A wua yekpe ve Ngewɔ wɛ nduwahu kɛɛ magbɛli wu yɛ lɔɔ a lapi haaŋ wu mbawoyei majɔɔ, 13ajifa Ngewɔ lɔ tuuŋ yengema wu lia, aako i pie mani i wu lɔ tawao wu kpaya majɔɔ ngi nda liima hindei wieva. 14Wu yɛngaa hinda gbi wiema, waa gbonyɛ wu nyɔunyɔ ma tawao waa wu nyɔunyɔ laabla, 15aako numu gbi aa wu yia nyamu le tawao wu joowi jumbui ma, wu yɛ sɛwɛ kia Ngewɔ leengaa yekpengaa, wu heini dunya hu kavablaa kɛɛ jumbublaa ti ndavengɔ. Mahoungɔ wu voo ti lia kia tumbekeisia ta ngelei ma voo la, 16a ji wa Ndɛvu ve yiɛi le ti ma. Wu ji wiengaa, nga sabu jɔlɔ mata gbuava a wue Folei na ma Kristi a wa, ajifa na wu pienga a kɛlɔ kɛ ngenge gbayangɔi kpɛlɛɛ ngi pieni ii yɛni a kɛɛwɛ-mɔɔnɛ. 17Tɛnga ti nya waamaa nya ŋamɛi i wu kia saahanii na wa fe Ngewɔ wɛ, tamia a wu lalei a Kristi. Na wiengaa hii, kɛ nya goohu nɛngɔe tawao kɛ mua wueni kpɛlɛɛ lɔ mu gbɔnga nya goohunɛɛi ma. 18Hii lɔɔ mahoungɔ wua bɛɛ wu goohunɛɛ, mua wueni mu gbɔ wu goohunɛɛi ma. 19Ndemɔi i lumangaa, taa nya lii hu Timoti loova wu gama hugutungɔ, kɔɔ ngi wu gama va gɔɔ nya lii i lɛli. 20Ta yakpe lɔ wu hinda i mua ta lii hu tawao ngi gbewengɔe vulii wu va. 21Yeepekeisia gbi ti gbewengɔ ti wuma hindei lekee lɔ va, tii gbeweni Yesu Kristi liima hindei wieva. 22Tawao wua vulii wu ngi gbekpeyii gɔɔlɔ, kia mua ta mu Ngowili Yekpei yeengengei wienga la kia hindolo tia ngi kɛkɛ. 23Faale ngi nya hindei gɛlɛyii gɔngaa lekee, ta lɔ nya lii ngi ma ngi loova wu gama. 24Tawao nya lii lɔ looni Ndemɔi ma kɛ a pielɔ vulii ngi gu a wala wu gama hugutungɔ. 25Ngi tɔnga kɛ a nyandelɔ ngi mu ndee Ipafɔditɔsi lo wu gama na mua ta mu ngenge gboto wienga, mu ndapi gboto gɔnga Kristi va tawao wu vamia i wanga, gbɔva nya ma. 26Wu gbi wu lɔ-mani lɔ waa ngi ma, tawao ngi lii gbuangɔe ngi goohu jifa wu yɛ mɛniilɔ kɛ i heegbɛilɔ. 27I heegbɛilɔ vulii a tɔnya, i loni te i haa. Kɛɛ Ngewɔ i manuilɔ ngi ma, tawao ta yaangɔ ii le, i manuni nya bɛɛ lɔ ma, i ndiinyani gboto veela nya ma. 28Faale nya longɔ waa le ngi ngi lo wu gama aako wu goohu i nɛɛ gbɔma ji wa ngi lɔ, nya bɛɛ nya liinyani i gɛlɛ. 29Kɔnɛle a loko hei ngi bu a kohunɛ waa ajifa wu ndee mia a ngie, wua tieni wu longɔ a Ndemɔi. A baagɔma ve nungei nasia kpɛlɛɛ wɛ ta na wie i pienga, 30ajifa i ngi lɛɛvui gbuɛilɔ ndɔgbɔ a lo te i haa Kristi yengei va, kɔɔ i kpɔmɛi na wie nya ma wua vulii wuii yɛ gu a piela.FILIPAIBLƐISIA 31Nya mbaa Kristimableisia, pɛiŋ ngi yaa kɔlɛi ji gɛlɛ, nya longɔ ngi nde ngɛɛ wu goohunɛɛ jifa wua Ndemɔi-ni wu wilingɔ hu. Ɛɛ yɛ a mɔnɛ gbi nya va lajiava hindei nasia hu ngi nyɛinga ngovama, tawao ngi lajiangaa ti hu, kpundɛi na i wu mahu, mahu a yeilɔ. 2A wu mahugbe a nasia ta hinda nyamuisia wie, ngilangɛi nasia, nungei nasia ti nɔɔngɔ hu tɛɛ kɛ ta numu luwui lewe ma. 3Mua mia mu heingɔ bili yeekpekpei ya, yeenungei nasia ii le, ajifa mua ma Ngewɔ vɛli ngi Yafei gbɔmi hu lɔ, tawao gbɔma mu goohu nɛngɔ jifa mua Yesu Kristi-ni mu wilingɔ hu. Muii lani a hindei nasia nungaa ta pie ti luwui lewe gomɛisia hu. 4Nga gulɔ vulii a hɛlɛla a hinda bondɛi nasia. Ina numu gbi langɔe la kɛ a gulɔ a hɛlɛla a ngi luwui lewela ma, sabu gboto lɔ nya wɛ tewengɔ ti ma pieva hii. 5Ajifa ti nya leni hoki yila kɛ ti nya heinga bili ya, Isrɛlmɔ mia a nge ndavengɔ, ngi gbuani Bɛnjami bembei hu lɔ, Juumɔ a nya kɛkɛ kɛɛ nya nje. Juubleisia ti Jawei houla va, Farisiimɔ lɔ wɔɔ a nge, 6tawao na kpewengɔ waa yɛla nya ma, tamia a juwuya hitɛ la Kristimableisia wooma. Ina Sawei houla a gulɔ i numu yɛ a pɔɔnamɔ, kɛ nyamu yakpe bɛɛ ngii kani. 7Kɛɛ hindei kpɛlɛɛ wɔɔ ngi mbumbuni a nafa hinda, ngii yaa mbumbuni a gbɛogbɛ na va Kristi i pienga nya wɛ. 8Hindei nasia lekee ii le, ngi hani kpɛlɛɛ wumbunga a gbɛ-o-gbɛ yee na va ngi jɔngɔi lewengɔ polouŋ ti ma, tamia a nya Lemɔi Yesu Kristi gɔlɛi. Ngi va lɔ ngi hani gbi wilinga; ngi ti kpɛlɛɛ wumbunga a manɔhɔ gbama lɔ, aako ngi yɛ a Kristi woo, 9mua ta mu wili hu pandawanda. Pɔɔnamɔ yaa gbɔma a nge Ngewɔ yama hindei nasia va ngi pienga, pɔɔnamɔi na nyɔkɔ numu a wote la ji a Sawei hou. Ngewɔ i nya yɛnga na a pɔɔnamɔ jifa nya langɔ a Kristi; pɔɔni na a gbua Ngewɔ gama jifa nya langɔ a Kristi. 10Na lekee kpewengɔ nya ma tamia a ji mua Kristi ma wili hu, kɛɛ kpayei na yayenge i ngi hiyengɔi hu hee hu, kpaalɛi nasia ti lani ngi ma, nyɔkɔ i la nya ma, ngi hee na nyɔkɔ wie i pieni, 11nya lii ma ngɛɛ Ngewɔ a nya bɛɛ wumbulɔ hee hu i nya vulu. 12Ngii ndema ngaa yɛma ngi wilanga a na kpɛlɛɛ wiela Ngewɔ longɔ ngi pie ɔɔ kɛ ngi yɛnga a numui na mahoungɔ ngi yɛla. Nya lapima tuuŋ mawaa na va Yesu Kristi i welanga a nya yɛla a ngi woo fa. 13Tɔnya le, nya mbaa Kristimableisia, ngii lani la vulii kɛ ngi gunga yeemawaa ma; na hu gbi hinda yakpei na nga pie ta lɔ a ji nga gbewe gbua lɔ na kpɛlɛɛ hu i lewenga, ngi lapi a nya sɔbɛ gbi fova na ma i nya gulɔ. 14Faale, nyaa wiimɛ ma tuuŋ nga li yakpe piimɛi gɛlɛmɛi aako ngi gu mawaa ma, tamia a kunafɔ lɛɛvui Ngewɔ i nya lolinga ma Yesu Kristi sabui hu. 15Mua kpɛlɛɛ mu layii a Kristi huhitingɔ, mahoungɔ ndii yakpe ji i yɛ mu goohu. Kɛɛ ina ndii weka mia i wu lɛɛngaa goohu, Ngewɔ a pielɔ wu hugɔɔ gbalauŋ. 16I yee gbi yɛna, a mu yɛ a jia tuuŋ a sawa yakpei na mu jianga la wɔɔ i to kiahuna ma. 17Nya mbaa Kristimableisia, a yɛ tuuŋ a nya wokɔɔ. A woolo nasia ma ti jiama a pele wɔnɛi nasia mu kɛnga a wue. 18Ngi ji lenga wɔɔ wu ma kaka, tawao nyaa laajiama hu nga wɔɔ; numu gboto lɔ na ti luvayii i Kristi haalɛi krɔsii ma yɛnga a gbama hinda. 19Ti gɛlɛmɛi a jahama lɔ, gbamaile ti luwui liima hindeisia lɔ ti yewɔɛi le. Ta matɛi gbua a na lɔ mahoungɔ ti wufe fa, tawao ta gili lekee a dunyei ji hu hanisia lɔ. 20Na hu gbi, mua mu yɛmii a ngelegoohu lɔ tawao mua mu Bawomɔi, mu Lemɔi Yesu Kristi mawuloma, i gbua ngelegoohu i wa. 21Mu gbuha huhaangɔi jisia ta haa, Kristi i wangaa a yeekpuhɛi jisia maluvelɔ i pie ti wie kia ngi nda wai i na ngɔlɔya hu, a kpayei na yayenge a pie i gu a hani kpɛlɛɛ wuaala ngi mahayɛi bu.FILIPAIBLƐISIA 41Faale na, nya mbaa Kristimableisia, ngi loni a wue kpa tawao wu mani i nya lɔnga kpa! Wa pie kpa nya goohu i nɛɛ tawao nga mata gbua kpa kpele gbi a wue! Nya liima ndeengɛisia, hii mia mahoungɔ wu loo kpaŋ, waa wote wu luvayii hu kia wua Ndemɔi-ni wu wilingɔ hu. 2Yuodia wua Sintiki, nyaa wu manɛnɛma, a lapi wu woo i yɛ yila kia ndeenyahalengei nasia tia Ndemɔi-ni ti wilingɔ hu. 3Kɛɛ bia, nya mbaa ngengemɔ lɔnyangɔi, nya longɔ bi gbɔ nyahangɛi jisia ma; jifa mua tieni mu ngenge gbayangɔ wienga Ngowili Yekpei vayava hu, mua Klɛmɛnt-ni kɛɛ nya mbaa ngengeblaa wekɛisia gbi, ti biyɛi nyɛingɔ Ngewɔ Gɔlɛi na hu fuublɛisia ti lɛisia ti hu. 4A goohu nɛɛ waa kpele gbi ji wua Ndemɔi-ni wu wilingɔ hu. Gbɛɛ ngi nde gbɔma: a goohunɛɛ. 5A bɛwɛbɛwɛya gɛ a numu kpɛlɛɛ. Ndemɔi lɔ wama hugutungɔ. 6Hinda gbi aa wu liihɛlɛ, kɛɛ wu yee yɛni gbi Ngewɔ vɛlima, a ngi vɛli kpele gbi a na wu gbewengɔ fa tawao wu siɛgboto gbua ngi ma watii gbi wa yɛ ngi vɛlima. 7Faale ndiilɛli na Ngewɔ a fe, na numu gbi ɛɛ gu a ngi yɛyii gɔla a wu liisia mahugbelɔ kɛɛ wu nɛmahuisia jifa wua Yesu Kristi-ni wu wilingɔ hu. 8Nya mbaa Kristimableisia, kɛlɛma yɛpɛi lɔ ngi ndema kɔlɛi ji hu a ya a gili a hindei nasia lekee ti gbekpengɔ tawao nungaa ta tato: tia mia a hindei nasia ti lɔnyangɔ, baagɔma i ti ma, ti wɔnangɔ, ti sɛwɛsɛwɛngɔ, hindei nasia numu gbi a lo la tawao ti malɔwɔi nyandengɔ. 9Hindei nasia wu majɔɔni a nge, a ngayenge kia ngi yɛ nde la kɛɛ kia ngi yɛ pie; tawao Ngewɔ na a ndiilɛli ve mu wɛ a yɛlɔ wu wooma. 10Nya goohu nɛngɔ wa Ndemɔi hu, kɛ kia na hu i lɛmbinga ka, nya ma lii i yamanga wu goohu. Ngii ndema ngaa yɛma nya hinda i gbeilɔ a gbewela wu ma sabu lɔ wuii majɔɔni kɛva kɛ wu gbewengɔe nya va. 11Tawao ngii ji lema jifa ngi gilinga la kɛ wu nya gbuanga ndɔgbɔ, jifa nya liilɛlingɔe a na gbi a yɛ nya yeya. 12Ngi kɔɔlɔ gbɔɔ hinda-gbɔundaa le a yɛ numu ma kɛɛ ji nɛnɛɛ a yɛ numu ma. Yeemakɛi ji gungɔe nya hu aako hinda gbi ngi yɛ na, watii gbi nya liilɛlingɔe, nya goovengɔ i yɛla ɔɔ ndɔlɛ i yɛ nya ma, hani i yɛ nya yeya mɔnungɔ nya ma ɔɔ i yɛ kulo hii. 13Kristi lɔ a kpaya ve nya wɛ guva hinda gbi bu. 14Kɛɛ hinda yekpe waa mia wu pieni ji wu gbɔni nya ma nya hinda-gbɔugbɔi hu. 15Wua vulii wu Kristimableisia wu Filipai wu kɔɔlɔ vulii pandawanda kɛ watii na ngi gbuani Masidonia lɔlei hu, Ngowili Yekpei legbele ninɛi wu ma, wua yakpe mia Kristimablaa a wue wu gbɔni nya ma; wua lekee mia nya hinda-gbɔugbɔi i lani mua wueni ma kɛɛ yeenafei. 16Ji ngi yɛ Tɛsalonika la wai hu, ngi gbeweni kpɔma va tewengɔ heima yila ma, wu njooyoilɔ nya wɛ. 17Tii yɛma nya longɔ lekee ngi yɛ a hani majɔɔ a wue gbama; nya longɔ wu yɛ a kpekpeyei mato wie, i yɛ a wu yeena mahu wu pienga. 18Kɔlɛi ji a selilɔ kɛ hani kpɛlɛɛ wu fenga nya wɛ, ngi majɔɛilɔ tawao i guilɔ, i mɔnu! Kia na Ipafɔditɔsi i wanga a wu hindawanda hani kpɛlɛɛ, na hii nya gbewengɔ fa ngi yeemaleema jɔnga. Yeehani jisia ti wiengɔe kia saahanii gunɛnɛ numu a fe Ngewɔ wɛ, saai na bonda a nɛɛ ngi wɛ tawao a ndahou. 19Tawao Yesu Kristi sabui hu, na gbi wa gbewe fa, nya Yewɔɛi a kpualɔ ngi gbatɛ wai hu i fe wu wɛ. 20Ngɔlɔyɛi i yɛ mu Kɛkɛ Ngewɔ wɛ kunafɔ kɛɛ kunafɔ! Amiina. 21Ngewɔ nungei nasia Yesu Kristi woo a tie, nya fama gboto yoyoma ti wɛ. Kristimablei nasia ti mbei nya gama, tɛ ta va wu ma. 22Ngewɔ nungei nasia kpɛlɛɛ ti mbei tiaa fama gboto yooyoma wu wɛ, kakayee nasia ti Rom Mahɛi yeepɛlɛbu. 23Nyaa Ngewɔ vɛlima kɔɔ mu Lemɔi Yesu Kristi yauwandei i yɛ wu kpɛlɛɛ ma. |