JEMISIJEMISI 11Nya Jemisi, Ngewɔ yengemɔ a nge kɛɛ Ndemɔi Yesu Kristi bɛɛ, nya mia ngi kɔlɛi ji yoyoma Ngewɔ nungei nasia kpɛlɛɛ gama ti vayafayangɔ dunyei hu gbi. Nga va wu kpɛlɛɛ ma. 2Nya mbaa Kristimableisia, a koohunɛɛ waa wie ji hinda gbɔugbɔu gɛwɛgɛwɛngaa ta wu male, 3ajifa wu kɔɔlɔ kɛ wu longaa houni wu lalei ma wu yeehinda gbɔugbɔisia huvo, kɛ wu kɛnga kɛ wa gulɔ hinda gbɔugbɔu bu. 4Tawao a pie wu hinda gbɔugbɔu huhoulɛi hu aa lewe tawao waa gbaha, aako wu yɛ a Kristimablaa lavengɔngaa, wu nyamu gbi aa yɛ na! 5Nɛmahulewe ii yɛlɔ wu yilaye wɛ, i Ngewɔ vɛli, na ngi lokohu lambongɔ hani majiava numu gbi ma, kponyɛ wooma ii le, Ngewɔ a nɛmahulewe velɔ ngi wɛ. 6Kɛɛ mahoungɔ i Ngewɔ vɛli ngi langɔ la vulii kɛ Ngewɔ a ngi hɛɛwoi mɛnilɔ, tawao sekahu gbi aa yɛ ngi lii hu, gbamaile numui na a sekahu wie ngi gbuangɔ a gboyei yeenjagatei lɔ fɛfɛi a ngi hɔwɔhɔwɔ hu. 7Yeenumui na nyɔkɔ, a wotewote ngi giliyii hu kɛɛ ngi wiehindei, aa gili la kɛ a hani gbi majɔɔlɔ a Ndemɔi. 9Mahoungɔ Kristimamɔi na ngi vɛlingɔ i goohunɛɛ ji Ngewɔ a ngi lɛ, 10tawao Kristimamɔi na ngi gbatɛngɔ i goohunɛɛ ji Ngewɔ a ngi yei. Ajifa kpatɛblaa ta haalɔ hugutungɔ kia kpitii yeepuɛi a haa. 11Gbamaile folei a gbualɔ kpandingɔ waa i kpitii mɔ kɛ yeepuɛi i logbonga i gula, kɛ ngi nyandei i jukulunga. Hii kpatɛblaa jukulu watii na ti wugbakpangɔ a yɛla ti navoo gɔlilei hu. 12Numui na goohu nɛngɔe ɛɛ gbe a lala a Ngewɔ ji hinda gbɔugbɔngaa ta ngi male, ajifa i hugɔɔmahindei nasia huvoongaa pandaa, Ngewɔ a ngi pawalɔ a kunafɔ lɛɛvui na i Lahei wumbunga feva nasia wɛ ti longɔ a ngie. 13Hinda gbɔugbɔu bondɛi nasia ti numu gɔlɛngaa jumbu hinda wieva, maa ii houni i nde yɛ, “Ngewɔ mia i nya gɔlɛma;” ajifa numu gbi ɛɛ gu aa Ngewɔ gɔlɛ hinda nyamu wieva, tawao ta vulii ɛɛ numu gbi gɔlɛ. 14Kɛɛ numu gbi ngi liima hinda nyamuisia mia ta ngi laala ti ngi wili jumbui hu. 15Kɛɛ numu i golongaa ngi liima hinda nyamui wiela wɛ, a jumbui lɔ wie tawao numu i nɔɔngaa jumbui wiela ma, ngi yafei a haalɔ kunafɔ va. 16Nya mbaa Kristimableisia, numu gbi aa wu wɛlɛ. 17Mboya hani yekpe gbi kɛɛ hani gbi lekee ma majɔɔ gbama, a gbua ngelegoohu lɔ; a gbua mu Kɛkɛ Ngewɔ gama lɔ na i ngelema voofoisia gbatɛni, ɛɛ wotewote tawao ɛɛ wounve mu ma aa mu lo kpindi hu. 18I nɛni Ngewɔ vulii lɔ wɛ pieva ngi wowili lɔnyangɔe i pie ti mu le a nina jifa ngi longɔ mu gbekpe mu lewe ngi gbatɛ-hanii kpɛlɛɛ ma. 19Ji i yɛ wu nɛmahu, nya mbaa Kristimableisia, numu gbi ngi hu i vula a wolola, kɛɛ ngi hu i lɛli a yɛpɛla kɛɛ liileweva. 20Ndiilewe ɛɛ gu a wala a pɔɔnɛi na Ngewɔ lii i ma ngi nungeisia va. 21Faale a gbe numu nɔhɔ hindei nasia kpɛlɛɛ ma piela gungɔ wu hu kɛɛ tuva nyamui gbi. A golo Ngewɔ wɛ wu njɛpɛi na gulu i hiima wu liisia hu, njɛpɛi na a gu a wu bawola. 22Waa wua yekpe wɛlɛ a ji wa wolo lekee Ngowili Yekpei ma; kia aa yɛ hii, a na wie Ngowili Yekpei a wu gaa la. 23Numu gbi lekee a wolo gbama Ngowili Yekpei ma kɛɛ ɛɛ na wie a nde, ngi wiengɔe kia numui i na a mɛmɛɛ hugbee i ngi yɛyii yeetɔnyangɔi lɔ. 24A ta yekpe gbelɔ vulii pandawanda kɛɛ ngi gbuangɔ lekee kɛ i lema ngi yɛyii ma ngaama. 25Kɛɛ numui na a sawei gaa vulii pandawanda kpekpengɔ tewengɔ sawei gbi ma, sawei na a nungaa gbua nduwɔya hu, i nɔɔ kaala ma tawao ɛɛ mɛni lekee gbama aa lema ma, kɛɛ a na wie yeesawei i ndeni, Ngewɔ a ngi nafalɔ hinda gbi hu a pie. 26Numu gbi langɔe la yɛ Kristimamɔ yekpe lɔ a ngie? Ina yeenumui na ii guni ngi nɛi ma, kɛ baabaa-hinda gbama mia a ngi Yewɔ-hindei tawao kɛ taa ta yekpe wɛlɛma. 27Ngewɔ-hindei na sɛwɛsɛwɛngɔ tawao kpekpengɔ mu Kɛkɛ Ngewɔ yaama ta lɔ a ji: poleengeisia tia ponyahangeisia mahugbela ti hinda gbɔugbɔi hu kɛɛ numu bia yekpe mahugbela aako baa yɛ a dunyei ji yeejumbu wieblɛisia yilayee.JEMISI 21Nya mbaa Kristimableisia, kia wu langɔ a mu Lemɔi Yesu Kristi, Ngɔlɔya Lemɔ wai, waa nungaa huwɔyɔ ti yɛyii va ti luwui ma. 2Gbamaile wu gomɛngaa mia kpatɛmɔ a wa na, kanigbɔli i ngi lokohu kɛɛ ndoma nyande waa i ngi ma, kɛ fɛɛlimɔi bɛɛ i wa na ndoma hawei i ngi ma, 3bi baagɔma vengaa kpatɛmɔi wɛ bi nde ngi ma bɛɛ, “Hei heiwulii yeekpekpe wai ji ma mbei,” kɛ bi ndenga fɛɛlimɔi ma bɛɛ, “Li bi lo mia,” ɔɔ “Hei mbei ndɔmɛi nya gɔɔbu,” 4kɛ wua wua yekpe luahu gɔlɛma, wa kiti lewe la nungaa ma a ndii nyamui. 5A wolo, nya mbaa Kristimableisia! Ngewɔ i nasia lɔ wumbuni ti vɛlingɔ dunyei ji hu i ti wote a kpatɛbla ti layii va a ngie tawao i ti gbɛɛ nasia ma ti ngi mahayɛi na bu i Lahei wumbuni feva nasia wɛ ti longɔ a ngie. 6Kɛɛ wuaa fɛɛliblɛisia bɛlɛ nyanima. Yeeni lɔ ti ngulu liigbama wu bolowooma, ta li a wue kootiisia gulɔ a kpaya? Kpatɛblaa le! 7Tia lɔ ta baa gbua mbiyɛ yekpei na ma ti fenga wu wɛ. 8Hindei yeepɔnangɔi mia wa pie ji wa jia a Mahɛi Ngewɔ jawei na i ngi Gɔlɛi hu i ndeni yɛ, “Lo a bi heinyɔui kia bi longɔ a bia yekpe.” 9Kɛɛ bi nungaa luahu gɔlɛngaa, bi longɔ a ti lɛɛngaa tewengɔ yeepekeisia ma, kɛ bi jumbu wulinga tawao Sawei a bi wumbu a sawa-nyanimɔ lɔ. 10Numu na a Sawei yeengila nyani, i sawei kpɛlɛɛ lɔ nyanini. 11Gbamaile numu yakpei na i ndeni yɛ, “Baa puegbua,” ta lɔ gbɔma i ndeni yɛ, “Baa numu waa.” Faale kiaa bɛɛ bii puegbuani, kɛɛ bi numu waangaa, kɛ bi sawei kpɛlɛɛ nyaninga. 12Faale a yɛ a yɛpɛ, wa hinda wie kia nungei nasia na Ngewɔ i wama ti gbɛmboma a sawei na a mu gbua nduwɔyahu. 13Ajifa Ngewɔ ɛɛ manuma wie ji a yɛ numui na gbɛmboma ii manuma wieni; kɛɛ manuma a temaya jɔlɔ kitilewela maahu. 14Nya mbaa Kristimableisia, gbɛ nafa le jii numui a nde yɛ ngi langɔe a Kristi a sɔbɛ ina ngi wiehindeisia tii kɛni kɛ ngi langɔe a Kristi? Ngi lalei na a Kristi a ngi bawolɔ? 15Ina bi ndehingɛisia lɔ na ɔɔ bi ndenyahaleengeisia kula ii ti ma tawao mɛhɛɛ yekpe ii ti yeya; 16a yee ti nafa ina bi ndeilɔ lekee ti ma bɛɛ, “Ngewɔ i wu luba! Kɔlɛ-vɛfɛ aa wu vɛ tawao a mɛhɛɛ mɛ kpoto wu goo i ve!” Ina bii hanii nasia veni ti wɛ ti haamingɔ fa ti lɛɛvui yeva na? 17Faale lanayei lekee yaa numu wɛ kɛɛ kpekpeya wiela gɛngɔ ii le ma kɛ hu haangɔi. 18Kɛɛ tɛngaa numu yila a ndelɔ yɛ, “Numu yila langɔe a Ngewɔ kɛɛ yee pekei ta a hinda yekpe lɔ wie.” Kɛ a nge kɛ bɛɛ hinda yekpe wie kɛɛ bi langɔe a Ngewɔ, nya bɛɛ nga kɛlɔ a bie kɛ kpekpei na nga pie a kɛlɔ kɛ nya langɔe a Ngewɔ. 19Bi langɔe la kɛ Ngewɔ i yakpe? Na nyandengɔe. Ngafa nyamuisia vulii bɛɛ ti langɔe a Ngewɔ tawao ti maa a gbɛli lɔ a nduwɛi. 20Bia bi kpowamɔi ji! Bi longɔe ngi kɛ a bie kɛ lala lekee a Ngewɔ ii gbekpeni hinda yekpe wiela wooma? 21Ngewɔ i yee mu maada Ebraham woteni a pɔɔnamɔ, i tia ta luahu gbatɛ? I ji wieni Ebraham wiehindeisia lɔ va, ji i ngi hindoloi Aisaki veni Ngewɔ wɛ a saai hani. 22Bii tɔma? Ebraham layii a Ngewɔ kɛɛ ngi wiehindeisia ti makpɔilɔ ti yenge; ngi wiehindeisia lɔ ti ngi lalei a Ngewɔ yakpani. 23Tawao Ngewɔ Gɔlɛi layie i longa ma ji i ndeni yɛ, “Ebraham lailɔ a Ngewɔ, tawao jifa i lani a Ngewɔ, Ngewɔ i ngi wumbuilɔ a pɔɔnamɔ.” Faale ti Ebraham loliilɔ a Ngewɔ ndiamɔ. 24Bi tɔnga na kɛ numu wiehinda yekpeisia lɔ ta pie Ngewɔ i ngi wote a pɔɔnamɔ, ngi lalei lekee ii le a Ngewɔ. 25Hii lɔɔ i wieni a hitɛ-nyahɛi Rehab. Ngewɔ i ngi woteilɔ a pɔɔnamɔ, i taa ta luahu gbatɛ hinda yekpei nasia va i pieni ji i loko heini Juubleisia ti nɛnɛjiagablɛisia bu, i gbɔ ti ma ti yama a pele weka tawao tii ti houni. 26Faale le kia lɔɔ ngafei ii yɛlɔ numu gbuhɛi hu yeekpuhɛi haangɔ a yɛla, hii lanaya bɛɛ haangɔ a yɛla ina hinda yekpe wiela ii pooma.JEMISI 31Nya mbaa Kristimableisia, wua wu longɔ wu yɛ a Ngewɔ hindei yeekaamɔngaa, waa gboto, ajifa wu kɔɔlɔ kɛ Ngewɔ a mua mu kaamɔisia gbɛmbo a ndiimabe lɔ i lewe nungaa wekeisia ma. 2Mu gbi ma kpulanga gboto wielɔ. Kɛɛ numui na ɛɛ kpulanga wie wɔɔ gba njɛpɛi nasia hu a nde, kɛ nyamu gbi ii ngi hu tawao kɛ a gulɔ a tayekpe huhoula. 3Ma kɔlii wuaalɔ soi baahu aako i golo mu wɛ, mu gu mu pie i li mia mu longɔ a na. 4Ɔɔ a gili a njaya-lɛndɛi: kia bɛɛ ngɔlɔngɔ waa tawao kɛ fɛfɛ gbayangɔ waa lɔ a gu i jia a ngie hani wulo lɔ a ngi lo pele ma, a pie i li mia gbi ngi njiamɔi longɔ i li na. 5Hii lɔɔ numu nɛi i na: kia bɛɛ kulongɔ, a lawolɔ yɛ a gulɔ a hinda waawanga wiela. A gili lɛɛ kia ngɔmbuvo wulohii a gu a ngola lakpa waa mɔla. 6Numu nɛi wiengɔe kia ngɔmbui i na. Piengɔe gbɔma kia dunyei na hinda nyamu wiela lekee i na, i heini ngi nda yɛmɛi mu luwui hu, a pie mu gbuhɛi gbi i nyamu. A ngɔmbu yatɛlɔ mu lɛɛvui hu hindei kpɛlɛɛ ma, ngɔmbui na a wa ngi gama a gbua jahama vulii. 7Nuuvu a gulɔ tawao i gunga a fuuhani wekeisia gbi makɛla, ndɔgbɔ-huangaa kɛɛ ŋɔningɛisia kɛɛ ndala-hanisia kɛɛ nyɛngɛisa. 8Kɛɛ numu gbi ii yaa wɔɔ gba guni a nɛi makɛla. Hani nyamu lɔ a ngie, numu gbi ɛɛ gu a ngi makɛla, a gu a numu waala kia kaali nyamunyamu. 9Mu nɛi lɔ ma siɛgbua la mu Lemɔi kɛɛ mu Kɛkɛ ma, ma gbɔma mu mbaa nuuvuisia jondu la, na Ngewɔ i kpatɛni gbuava a ngie. 10Nda yakpei lɔ njia yekpei a gbua hu kɛɛ njia nyamu. Nya mbaa Kristimableisia, maa ii houni ji i wie. 11Nja nɛnɛɛ kɛɛ nja ŋɔnaŋɔna tɛɛ gbua ndowa yakpei hu. 12Nya mbaa Kristimableisia, figi wulii ɛɛ gu aa wua a ɔlivi; glepii ɛɛ gu aa wua a figi, tawao nja nɛnɛɛ ɛɛ gu a gbuala njalowɛi na hu a kpolo-yɛi ve. 13Numu lɔ wu lia ngi nɛmahu lewengɔ tawao i hinda hugɔɔngɔ? Mahoungɔ i ji magɛ a tuva yekpei na a pie kɛɛ hinda yekpei nasia a pie a nɛmahulewe tawao ngi yaama ɛɛ lɛ. 14Kɛɛ ina toloi lɔ wu liisia hu kɛɛ ndiimanyamu tawao wu longɔ a kpekpeyei gbi wua yekpe lekee va, wuaa lawola tawao wa ndɛɛ gula tɔnyɛi ma. 15Nɛmahulewei na bonda ii gbuama Ngewɔ gama, dunyei ji woo mia, Ngewɔ Yafei ndɛi ii le, ngafa nyamuisia ti nde mia. 16Gbamaile mia nungaa ti yɛngaa na wu lia ti lolongɔ tawao ta tia yekpe lekee ti gbekpeyɛi gɔli, ngo-ya-vayei a yɛlɔ na kɛɛ hinda nyamui yeelasii gbi. 17Kɛɛ nungei nasia Ngewɔ a nɛmahulewei na ve ti wɛ a gbua ngi gama, nyamu ii ti hu, ta nungaa luahu gbatɛlɔ, tɛɛ jɔlɛ, ti longɔ a ndiamɔya; ta manu nungaa ma tawao hinda yekpei yeelasii gbi wiela i ti gɔɔngɔ; tɛɛ topooma wie tawao tɛɛ baaya hinda wie. 18Tawao tuhani gaalɛi na nduahugbatɛbleisia ta hii wava a ndiilɛli, a wa kpekpeya lɔ.JEMISI 41Ndapi jisia kpɛlɛɛ kɛɛ njianjiɛisia ti wu luahu ti gbuama gbɔɔ hu? Tii gbuama nɛnɛɛisia yeemanii nasia hu lɔ ti lapima wu liisia hu? 2Wu longɔe a haningaa kɛɛ wuɛɛ gu a ti majɔɔla, faale wu magbatɛngɔe numu waava. Wu haamingɔ waa le haningaa va kɛɛ wuɛɛ gu waa ti majɔɔ, famia wa yia, wa lapi. Wuɛɛ hanii nasia majɔɔ wu haamingɔ fa jifa wuɛɛ fɛli Ngewɔ ma. 3Tawao wu ti vɛli bɛɛ Ngewɔ ma wuɛɛ ti majɔɔ ajifa wa ti vɛli hinda nyamu lɔ va. Wa haningaa vɛli Ngewɔ ma nguava wu liima hinda nyamuisia hu lɔ. 4Wua wa Ngewɔ wekeisia vɛli! Wuii kɔɔ kɛ bi yɛngaa a dunyei ndiamɔ kɛ bi yɛnga a Ngewɔ juwu lɔ? Numui na lekee gbi ngi longɔ i yɛ a dunyei ndiamɔ, i ta yekpe yɛnga a Ngewɔ juwu. 5Waa gili la kɛ Ngewɔ Gɔlɛi ii tɔnya yia leni ji i ndeni yɛ, “Ngafei na Ngewɔ i puni mu hu, ngi longɔ waa le la tawao a malolo gbualɔ waa.” 6Kɛɛ ngauwandei na Ngewɔ piengɔ a mue i leweni na ma. Famia Ngewɔ Gɔlɛi i ndeni yɛ, “Ngewɔ ɛɛ luma mamaniblɛisia wɛ taa ti liimɛi wie, kɛɛ a ngauwanda velɔ nungei nasia wɛ ta tia yekpe mayei.” 7Faale na, a golo Ngewɔ wɛ. A lapi a Seitana kɛ i lewenga a piimɛ i gbua wu gama. 8A lukpe Ngewɔ gbla, ta bɛɛ a lukpelɔ wu gbla. A wu yeyɛisia wua ti yɛ sɛwɛ, wu jumbublɛi jisia! A wu liisia hu yɛ sɛwɛsɛwɛ, wu baayablɛi jisia! 9A wu mamamau, wu wɔlɔ kaka; a gbe a yɛlɛla wu tɔtoo a wɔlɔla, wu gbe a goohunɛɛla wu lii i nyani. 10A wua yekpe mayei Ndemɔi gulɔ, a wu yalɛlɔ. 11Waa njia nyamu le wu nyɔunyɔu ma, nya mbaa Kristimableisia. Numu gbi lekee a njia nyamu le kɔlooni ngi mbaa Kristimamɔ ma yɛ ngi nyamungɔe, i njia nyamu lenga Sawei ma yɛ Sawei nyamungɔe. Bi ndengaa bɛɛ Sawei nyamungɔe, kɛ bii yɛni gbɔma a Sawei houmɔ, bi yɛnga na a kiti lewemɔ lɔ Sawei ma. 12Ngewɔ yakpe lɔ Sawa lamɔ a ngie kɛɛ kiti lewemɔ. Ta yakpe lɔ a gu a numu bawola ɔɔ numu nyanila. Bi langɔ la yelɔ a bie ba nde bɛɛ bi mbaa nuuvu nyamungɔe? 13A wolo ji ma, wua wa nde wuɛɛ, “Haa ɔɔ sina ma lilɔ tei na bonda hu, mu foo yila gbɔyɔ na, mu fele gɔ na, mu navoo gboto jɔɔ.” 14Wuii kɔɔ vulii wu lɛɛvui a yee yɛ na sina! Wu wiengɔe kia ndulii na a hɛlɛ kulo kɛ i longa hu fulo. 15Na mahoungɔ wu nde ta lɔ a ji: “Ina Ndemɔi i lumangaa, ndɛvu a yɛlɔ mu hokpala ji bonda wieva ɔɔ na.” 16Kɛɛ kiahuna wu mamaingɔ, wa lawo; tawao ndawoei na bonda kpɛlɛɛ nyamungɔe. 17Faale na, numu i hindei na gɔngaa mahoungɔ i pie, ii pieilɔ, kɛ yeenumui na lɔ jumbu wiema.JEMISI 51A wolo naa ji ma, wu kpatɛbleisia! A wɔlɔ, wu yelei gula kpaalɛi nasia va ti wama lama wu ma. 2Wu gbateisia ti lulanga, gilingɛisia ti wu magulɛisia mɛnga. 3Kaayei i wu ganigbɔli nyaninga kɛɛ wu gani-golei, tawao Kpɛmbo-Volei ma yeekaayei ji a selilɔ kɛ wu gbewengɔ wɔɔ wua yekpe lekee lɔ va tawao a wu luwui mɔlɔ kia ngɔmbui na. Wu kpatɛ gboto lɛnga ma dunyei ji hu i wama gbɔyɔma. 4Wuii yaa pawa gbi veni ngengeblɛi nasia wɛ ta yenge wu gbalɛisia hu. A wolo lɛɛ ti gboonyɛwoisia ma! Nasia ta wu luhanisia lewe, ti wɔɔwoi i fonga Ngewɔ ma, Ndemɔi na kpayei gbi i ngi wɛ. 5Wu yɛngɔi hu dunyei hu, wu koohunɛɛ hu lɔ tuuŋ, wa nɛnɛɛ lekee mɛ, wu wua yekpe wulɔnga kia fuuhanii nasia ta ti wulɔ ti waava. 6Wu nungei nasia lɛɛnga tii hinda nyamu gbi wieni, wu ti waanga, tawao tii lapini a wue. 7Faale a liilo, nya mbaa Kristimableisia, haaŋ Ndemɔi i yama mbei. A tɔ lɛɛ kia kpaa lamɔi a liilo ji a yɛ tuhani yekpe mawuloma majɔɔva ngi lɔlɔmɛi. A haama-yɛi mawulolɔ a ndiilo haaŋ i wua. 8Mahoungɔe wua bɛɛ wu liilo. Wu gahu aa gbɔyɔ gbamaile Ndemɔi wa-Volei magutungɔe. 9Waa gboonyɛ a wu nyɔunyɔu, nya mbaa Kristimableisia, aako Ngewɔ aa wu gbɛmbo. Numui gbi ti Gbɛmbomɔi wala hugutungɔe. 10Nya mbaa Kristimableisia, a gili a Ngewɔ lutui nasia ti yɛ Ndemɔi wowili le nungaa ma. Ti guyii hinda gbɔugbɔu bu i yɛni a tɔmaseli lɔ mahoungɔ wu pookɔɔ. 11Ma ndelɔ muɛɛ mahoungɔe mu nasia lato ti guni hinda gbɔugbɔu bu. Wu mɛninga kia Job i liiloni, tawao wu kɔɔlɔ gbɔɔ Ngewɔ pieni ngi wɛ kɛlɛmɛi. Ajifa Ndemɔi manumangɔ tawao ngi hindawandangɔ. 12Tewengɔ ji kpɛlɛɛ ma nya mbaa Kristimableisia, wu yaa Lahei wumbuma waa jondu ngelegoohu ma ɔɔ dunyei ɔɔ hani weka gbi. Luma lekee ji bi lii a yɛ tumɛi ma, bi mawali ji bi lii a mawali ma, na lɔ a wie Ngewɔ ɛɛ bi lɛɛ. 13Numu lɔ wu lia hinda gbɔugbɔu i ngi ma? Mahoungɔ i Ngewɔ vɛli. Numu lɔ na ngi goohunɛngɔ? Mahoungɔe i siɛgbua Ngewɔ ma ngule hu. 14Numu lɔ wu lia ngi heegbɛngɔ? Mahoungɔ i Kristimableisia yeekpakoleisia loli ti Ngewɔ vɛli ngi va, ti ɔlivi wulɔi jia ngi ma a mu Lemɔi biyeihu. 15Kristimableisia yeekpakoloisia ti langɔ yɛngaa la kɛ Ngewɔ a ti hɛɛwoi mɛnilɔ, heegbɛmɔi na a bawolɔ; Ndemɔi a kahugbua velɔ ngi ma, i manu ngi ma jumbui nasia va i pienga. 16Faale na, a gaye a wu jumbuisia wu nyɔunyɔu gama, wu Ngewɔ vɛli wu nyɔunyɔu va aako Ngewɔ i wu bawo. Hɛɛ na numu yekpei a pie Ngewɔ ma a gulɔ a hinda waawaa wiela. 17Ilaija i yɛni wɔɔ a nuuvu lɔ kia mu na. I nɔɛilɔ Ngewɔ vɛlila ma yɛ nja gbi aa wua, tawao nja gbi ii wuani aa wu ndɔlei ma foo sawa kɛɛ yeekutu va. 18Na wooma i gbɔma Ngewɔ vɛlilɔ kɛ njɛi i tɔtongɔ a wuala, tuhanisia ti gbɔma gbekpe kpaalɛisia hu. 19Nya mbaa Kristimableisia, wu yilayee i gbuangaa tɔnya welei ma, numu wekei i yama a ngie tɔnya welei ma, 20a ji la nɛmahu; numu gbi lekee a jumbumɔi gbua kaka-welei ma i ngi yama tɔnya welei ma, a yeejumbumɔi na yafei mabawolɔ kunafɔ hee yeya, i pie Ngewɔ i manu jumbu gboto ma. |