Hibublɛisia

Hibublɛisia 1

1Ngewɔ yɛlɔ wɔɔ a yɛpɛ watii gboto kɛɛ a pele gboto hu wee mu maadani gama a ngi lutuisia hu wee, 2kɛɛ kiahuna na kɛlɛma voloi jisia ma, i yɛpɛnga mu gama a ngi Hindoloi hu wee. Ta lɔ Ngewɔ i hani gbi gbatɛni a ngi loko, tawao ta lɔ Ngewɔ i loko longa ngi ma hani kpɛlɛɛ yɛva a ngi woo. 3Ta lɔ numu a Ngewɔ gabandeyii lɔ ngi hu tawao i gbuailɔ a Ngewɔ a pelei gbi, ngi laayia gbayangɔ wai a pie hani gbi ti yɛ na kia ti na. Kia i pieni Ngewɔ i manu nuuvungaa ti jumbuisia ma, i heiilɔ ngelegoohu Ngewɔ yejahui, Ngewɔ na kpayei gbi i ngi wɛ. 4Ngewɔ i pieilɔ ngi Hindoloi i lewe malikeisia ma, kia lɔɔ tomɛi na Ngewɔ i yeembiyei veni ngi wɛ tewengɔ ti ndɛi ma. 5Ajifa Ngewɔ ii ndeni wɔɔ gba ngi malikei yeengila bɛɛ ma aa yɛma, “Bia lɔ nya Hindoloi a bie; folei ji lɔ ngi yɛnga a bi Kɛkɛ.” Tawao Ngewɔ ii ndeni kɔloongɔ malika gbi ma aa yɛma, “Nga yɛlɔ a ngi Kɛkɛ tawao a yɛlɔ a nya Hindoloi.” 6Kɛɛ kpelei na Ngewɔ i yɛ ngi gbla-loi yoyoma dunyei hu, i ndeilɔ yɛ, “Ngewɔ malikeisia kpɛlɛɛ ta mawɛɛlɔ ngi gɔɔbu ti ngi vɛli.” 7Kɛ Ngewɔ ndeilɔ malikeisia va yɛ, “Ngewɔ a pielɔ ngi malikeisia ti wie kia fɛfɛi i na, kɛ ngi yengebleisia kia ngɔmbuvoi i na.” 8Kɛɛ Ngewɔ ndeilɔ kɔloongɔ ngi Hindoloi ta ngi ma yɛ, “Aa Ngewɔ, bi mahayɛi a yɛlɔ na kunafɔ va! Ba yɛlɔ bi nungaa mahu tawao ba kiti lewe ti ma a pɔɔna.” 9“Bi longɔ a na lɔ pɔɔnangɔ, tawao bi lolongɔ a na ii wɔnani; na vamia Ngewɔ, bi Yewɔɛi, i loko longa bi ma i bi gɔnga a koohunɛɛ mbɛlɛhei na majɔɔva tewengɔ polouŋ na ma i feni bi mbaangɛisia wɛ.” 10I ndeilɔ gbɔma yɛ, “Bia bi Ndemɔi bi dunyei gbatɛilɔ hindei gbi lɔtomɛi, tawao bi lokoisia vulii lɔ bi ngelegoohu gbatɛni la. 11Ta lolɔ hu, tɛɛ yaa yɛ na, kɛɛ bia ba yɛlɔ na; ti gbi ta hawalɔ kia kulɛi a pie. 12Ba ti gotolɔ kia ndoma, tawao ti maa a luvelɔ kia kula wovei maa a luve a kula ninɛi. Kɛɛ bia bi maa ɛɛ luve, tawao kɛlɛma gbi ii bi lɛɛvui ma.” 13Ngewɔ ii ndeni wɔɔ gba ngi malika gbi ma aa yɛma, “Hei mbei nya yejahui, haaŋ ngi bi gɔnyɔuisia wuaa bi gɔɔbu, bi gɔwɔ lo ti ma.” 14Yeeni lɔ hɔɔ a malikeisia? Ngafangaa mia a tie ta yenge Ngewɔ wɛ, a ti lo gbɔva nungei nasia ma Ngewɔ i wama ti bawoma.

Hibublɛisia 2

1Na vamia mahoungɔ mu tɔnyɛi nasia kpɛlɛɛ hou vulii kpaŋ mu mɛninga aako mu lii aa gbua na. 2Ngowili na malikeisia ti ndeni mu maadani ma i yɛlɔ a tɔnyɛi na mahoungɔ numu gbi i la la, tawao numu gbi lekee ii tooni pooma ɔɔ ii goloni yeetɔnyɛi na bu, kpalɛi na i lailɔ ngi ma mahoungɔ i la ngi ma. 3Ma yee na gu mu bawo ina muii woloni gbi mbawo wai ji ma Ngewɔ longɔ i mu bawo la? Ndemɔi yese vulii lɔ i mbawoi ji hinda hugɛni tawao nasia ti mɛnini ngi laa ti kɛilɔ gbalauŋ a mue kɛ tɔnya le. 4Yeewatii yakpei na, Ngewɔ i yɛlɔ a ti jeli wuaangɔi wooma nikpɔ mu gama a ji i yɛ kaabande hindei yeelasii gbi wie kɛɛ kanakoisia, kɛɛ ji i yɛ ngi Yafei wuaa nungaa hu kia i nɛni ngi wɛ pieva. 5Ngewɔ ii yaa malikeisia yɛni a maha dunya ninɛi na maahu i wama, dunyei na mu yɛpɛma kɔlooni ma. 6Kɛɛ kia nyɛingɔ la Ngewɔ Gɔlɛi yeehinda yila tɛɛ: “Nuuvu ii yɛni a gbɛogbɛ, kɛɛ ba gili a ngie; nuuvu gbaama, ba ngi mahugbe? 7Bi pieilɔ waati wulo va, ngi mahu i yei i gulo malikeisia ma; bi ngɔlɔya ve ngi wɛ kɛɛ mbɛlɛhei, 8bi ngi yɛ a mahɛi hani gbi maahu.” Yeekɔlɛi i ndeilɔ yɛ Ngewɔ i nuuvu yɛlɔ a “Mahɛi hani gbi mahu;” i laailɔ ke kɛ hani gbi gbuangɔ ii le ma. Na hu gbi, muii yaa tɔma kiahuna kia hani kpɛlɛɛ taa yɛ nuuvu mahayɛi bu. 9Kɛɛ mua Yesu lɔma na Ngewɔ i pieni ngi mahu i yei i gulo malikeisia ma hinda hugutungɔ va, aako ndomɛi va Ngewɔ piengɔ a mue, i haa a numui kpɛlɛɛ jɔngɔ. Kɛɛ mua na ngi lɔma kia maha a ngie, ngɔlɔya i ngi ma kɛɛ baagɔma jifa i haa yagbalɛngɔi na wieni. 10Mbɛngɔe ma vulii kɛ Ngewɔ, na a hani gbi gbatɛ a pie ta ngi yengeisia wie, i pieni Yesu i tomɛi na majɔɔ ngi woo yɛla kɛ kpaalɛi na va i lani ngi ma, aako i pie numu gboto ti langɔ a ngie, Ngewɔ i ti gɔ ngi wɔlɔyɛi hu. Ajifa Yesu lɔ a loo kulɔ i pelei na gɛ a li a tie mia Ngewɔ a ti bawo na. 11Ta lɔ a nungeisia ti jumbuisia lufe, kɛ ta kɛɛ nasia a ti jumbuisia lufe ti yɛnga Kɛkɛ yakpei ma. Na vamia Yesu ii wufeni a ti lolila a ngi ndewengeisia. 12I ndeilɔ Ngewɔ ma yɛ, “Nga hugɛlɔ a nya ndewengeisia gbɔɔ bi pienga; nga bi latolɔ ti gomɛi hu.” 13I ndeilɔ gbɔma yɛ, “Nga liivalalɔ Ngewɔ ma.” Tawao i gbɔma ndeilɔ yɛ, “Nya gbe mbei mua ndeengɛi nasia Ngewɔ i ti venga nya wɛ.” 14Jifa ndeengɛisia, kia a ti loli la, ti yɛni a nuuvungaa lɔ nduwu i ti ma, tawao ŋamɛi ti hu, Yesu vulii i woteilɔ a nuuvu kia ti na. I ji wieilɔ aako hee na wooma i pieni, i Seitana jukulu, na hee yeekpayei ngi yeya, 15tawao kɔɔ i nungei nasia gbua ti yɛ nduwɔyahu, hee yeenduwama yeya ti lɛɛvuisia hu. 16Ajifa i laailɔ ke kɛ malikeisia ii le aa yɛ gbɔma ti ma. Kia na aa wie, Ngewɔ Gɔlɛi i ndeilɔ yɛ, “A gbɔ Ebraham bɔɔsɔɛisia lɔ ma.” 17Ji kɛilɔ kɛ mahoungɔ yɛla i wie kia ngi mbaa Kristimableisia ti na a pele gbi, aako i wote a ti Jaagbuablɛisia ti gulɔmɔ wai na ta gu a liilolaa ngi ma tawao a manu ti ma Ngewɔ yengei hu, aako Ngewɔ i maanu nungaa ti jumbuisia ma. 18Faale na a gulɔ a gbɔla nasia ma Seitana a ti gɔlɛ hinda nyamu wieva ajifa Seitana ta vulii bɛ gɔlɛilɔ, i ngi mɔnɛ.

Hibublɛisia 3

1Nya mbaa Kristimableisia, wua Ngewɔ i wua bɛɛ lolinga! A gili a Yesu, na Ngewɔ i ngi yoyoni yɛva a Saagbuablɛisia ti gulɔmɔ wai gbɔva mu ma hinda gbi hu kɔloongɔ na ma ma nde mu langɔ la. 2Ngewɔ na i ngi wumbuni yeengengei ji wieva, i guilɔ a liilola ngi ma, kia lɔɔ i liiloni Mojisi ma na va i pieni ji i gbɔni Ngewɔ nungeisia ma. 3Numui na a pɛlei lo nungaa ta mbɛlɛhei velɔ ngi wɛ i lewe pɛlei vulii ma. Hii lɔɔ mahoungɔ nungaa ti ngɔlɔya waa ve Yesu wɛ i lewe Mojisi ma. 4Tɔnya le kɛ pɛlɛ gbi numu lɔ a to, kɛɛ Ngewɔ lɔ i hani gbi gbatɛni. 5Ngewɔ i guilɔ a liilola Mojisi ma ngengei na va i pieni Ngewɔ nungeisia gbi wɛ, tawao i yɛpɛilɔ a hindei nasia Ngewɔ i wama ndema kulɔma. 6Kɛɛ Ngewɔ a liilolɔ Kristi ma ji Hindoloi na a ngie Ngewɔ nungeisia loko i ngi yeya. Mua lɔ Ngewɔ nungeisia a mue ina mu nɔɛilɔ liilola ngi ma kɛɛ lala la kɛ ma na majɔɔlɔ mu lii i ma kɛyila. 7Faale na, kia Ngewɔ Yafei ndeni Ngewɔ Gɔlɛi hu yɛ, “Wu Ngewɔ woi mɛningaa haa, 8waa ngoohugbɔnda wie kia wu maadani ti yɛ pie ji ti yɛ ganga a Ngewɔ, hii ti pieni ndɔgbɔ-lambɛi ma watii na ma ti yɛ ngi hugɔɔ. 9Namia wu maadani ti nya hugɔɔni na, kia bɛɛ ti na lɔni ngi pieni foo numu fele gbɔyɔngɔ goohu. 10Faale ngi liileweilɔ nungei nasia ma ngi nde ngɛɛ, ‘Ti gbelengɔe nya ma kpelema gbi, tawao tɛɛ luma taa nya jaweisia hou.’ 11Ngi liileweilɔ, ngi Lahei wumbu ngɛɛ: ‘Tɛɛ wuaa kunafɔ ndɔlei na hu ngaa pie ti lɛɛvu na!’ ” 12Nya mbaa Kristimableisia, a wu mahugbe numu aa yɛ wu lia ngi nyamungɔ tawao ngi gangangɔ a Ngewɔ nahi a wounve Ngewɔ vulungɔi ma. 13Mahoungɔ wu yɛ a gbɔ wu nyɔunyɔu ma folo gbi, ina lekee ti ndenga tɛɛ “Haa” mia, aako jumbu aa wu yilayee bɛɛ wɛlɛ, wu woohu aa gbɔnda. 14Ajifa mu kpɛlɛɛ mua Kristi-ni mia mu yengema ina kia wɔɔ mu lani a ngie tɔto-gbelei, mu loilɔ lama hii a ngie i to mu lɛvui gɛlɛmɛi. 15Ji lɔ Ngewɔ Gɔlɛi ndeni yɛ, “Wu Ngewɔ woi mɛningaa haa, waa ngoohugbɔnda wie kia wu maadani ti pieni ji ti gangani a Ngewɔ.” 16Nungaa yeengbɛnga lɔ ti Ngewɔ woi mɛnini, ti gangani a ngie? Tia mia a nungei nasia gbi Mojisi i gbuani a tie Ijipt lɔlei hu. 17Yeeni lɔ Ngewɔ i liileweni ti ma foo numu fele gbɔyɔngɔ va? Tia mia a nungei nasia ti jumbu hindei wieni, ti gula ti haa ndɔgbɔ lambɛi ma. 18Ji Ngewɔ i Lahei wumbuni yɛ, “Tɛɛ wua kunafɔ ndɔlei na hu ngaa pie ti lɛɛvu na” yeeni lɔ i yɛ ti ma? Nasia ti gangani a ngie. 19Mu tɔnga na kɛ tii guni a fola yeendɔlei hu, ajifa ti gangɛilɔ a lala a Ngewɔ.

Hibublɛisia 4

1Kiahuna, Ngewɔ i Lahei wumbunga mu gama yɛ ma ndɛvumɛi na majɔɔlɔ i yeenjɛpɛ leni, a mu gbi mu mu mahugbe hɔɔ aako Ngewɔ aa tɔ wu yilayee bɛɛ aa gbaha a yeendɛvumɛi na majɔɔla i Lahei wumbuni fa. 2Gbamaile mu Ngowili Yekpei mɛninga, kia lɔɔ ti mɛniila. Ti ngoowili mɛniilɔ kɛɛ ii kpekpe gbi wieni a tie, ajifa ji ti mɛnini, tii lani la. 3Mua mu langɔ la hɔɔ, ma ndɛvumɛi na majɔɔlɔ Ngewɔ i Lahei wumbuni fa. Kia lɔɔ i yɛ ndeni yɛ, “Ngi liileweilɔ, ngi Lahei wumbu ngɛɛ, ‘Kunafɔ tɛɛ wuaa ndɔlei na hu ngaa pie ti hei na ti lɛɛvu!’ ” Ngewɔ i ji leilɔ kia bɛɛ na gbi i yɛ wama piema hugbatɛngɔ yɛla i hiye dunyei gbatɛ-gbelei ma. 4Gbamaile ji lɔ ndengɔ Ngewɔ Gɔlɛi yeehinda yila kɔlooni lɔwɔi yeewɔflei ma yɛ, “Ngewɔ i lɛɛvuilɔ ngi yengei kpɛlɛɛ ma lɔwɔi yeewɔflei ma.” 5Ngewɔ i yeenjɛpɛ yakpei ji leilɔ gbɔma, “Kunafɔ tɛɛ wuaa ndɔlei na hu ngaa pie ti hei na ti lɛɛvu.” 6Nasia ti humbuni a Ngowili Yekpei mɛni tii ndɛvuma majɔɔni, ajifa tii lani la. Kɛɛ nungaa wekangaa lɔ na Ngewɔ lumanga ti wɛ ndɛɛvumɛi majɔɔva. 7Ji a kɛlɔ kɛ Ngewɔ i folo weka gɛnga ta toli a “Haa.” Foo gboto na wooma i yeenjɛpɛi wuilɔ Devidi laa Ngewɔ Gɔlɛi na hu ti welanga a ndagɛla yɛ, “Wu Ngewɔ woi mɛningaa haa, waa ngoohugbɔnda wie.” 8Ina Jɔsua i ndɛvumɛi na veilɔ nungeisia wɛ Ngewɔ i Lahei wumbuni fa, Ngewɔ ii yɛ yɛpɛ pooma kɔloongɔ folo weka ma. 9Faale na hu gbi, Ngewɔ nungeisia ta gulɔ lɛ a lɛɛvula kia Ngewɔ i lɛɛvuni lɔwɔi yeewɔflei ma. 10Ajifa numu gbi lekee i wuani taa Ngewɔ ti lɛɛvu, a lɛɛvulɔ ngi nda yengei ma kia Ngewɔ i lɛɛvuni ngi ndɛi ma. 11A mu mu sɔbɛ gbi wie hɔɔ ndɛvumɛi na majɔɔva aako mu yilayee bɛɛ aa ganga kia ti pieni jifa tii liiloni. 12Gbamaile Ngewɔ laayiɛi vulungɔe keya tawao a yengelɔ, houngɔ tewengɔ kɔbowa yaama fele gbi ma. A numu ŋɔnalɔ i foo fa mia ndɛvui taa ngafei ta gomɛ na i ti luahu gɔlɛ, mia numu gbulɔngɛi taa yeengulɔi ta hukpɔ na, i tia bɛɛ luahu gɔlɛ. A kiti lewelɔ nuuvu liima hindeisia ma kɛɛ kilii nasia ta yɛ ngi lii hu. 13Hinda gbi ii na nuuvu aa gu a ndɔwula Ngewɔ ma; hani kpɛlɛɛ i kpatɛni ti magɛngɔe, ngi yaamɛi a ti lɔ. 14Famia, a mu hou kpaŋ lanayei ji ma mu tooma pooma. Gbamaile Saagbuablɛisia ti gulɔmɔ wai lɔ mu yeya na i ya i fonga fa Ngewɔ ma, tamia a Yesu, Ngewɔ Hindoloi. 15Mu jaagbuablɛisia ti gulɔmɔ wai ii yɛni a numui na ɛɛ gu a manuma wiela hindei nasia va ma gbaha a piela Ngewɔ yaama; ajifa Seitana i yɛlɔ a ngi gɔlɛ a pelei kpɛlɛɛ kia a mu gɔɔlɛ la kɛɛ ii jumbu hinda yakpe bɛɛ wieni. 16Faale a mu li Ngewɔ maha heimɛi a ndiilo, mia ngauwanda a jɔɔ na. Na lɔ ma manuma majɔɔ na kɛɛ ngauwandei na a gbɔ mu ma a watii kinɛiŋ ma gbewe fa.

Hibublɛisia 5

1Ngewɔ a Saagbuablɛisia ti gulɔmɔ wai gbi wumbu ngi nda nungeisia lia lɔ, i loko lo ngi ma yengeva ngi wɛ a ti jɔngɔ, a saa gbua ti jumbuisia va. 2Jifa ta vulii a gbahalɔ a hinda gboto wiela mahoungɔ i pie, ɛɛ gu aa gbandi nasia ma tii hinda hugɔɔ, ta kpulanga wie. 3Tawao jifa ta vulii a gbaha a hindei nasia wiela mahoungɔ i pie, mahoungɔe i saagbua nungeisia ti jumbuisia va kɛɛ ta vulii ngi ndɛisia. 4Numu gbi ɛɛ gu aa ta yekpe yɛ a Saagbuamɔ Waa. Ngewɔ yakpe mia a loko lo numu ma yɛva a saagbuamɔ waa kia lɔɔ Ɛerɔn i yɛ na. 5Hii lɔɔ i wieni a Kristi; ta ii le aa ta yekpe wote a Saagbuablɛisia ti gulɔmɔ wai. Kia na aa wie, Ngewɔ ndeilɔ ngi ma yɛ, “Nya Hindoloi lɔ a bie; folei ji mia ngi yɛnga a bi Kɛkɛ.” 6I ndeilɔ gbɔma ngi Gɔlɛi yeehinda weka yɛ, “Ba yɛlɔ a Saagbuamɔ kunafɔ, kia lɔɔ Mɛlkijidɛki i yɛni a Saagbuamɔ.” 7Ji Yesu i yɛ ndɛvu hu dunyei ji hu, i yɛlɔ a Ngewɔ vɛli ngele ya, a wɔɔ Ngewɔ ma na a gu a piela nungaa tɛɛ ngi waa. Jifa ngi golongɔ yɛla Ngewɔ wɛ, Ngewɔ i ngi hɛɛwoi guluilɔ. 8Kɛɛ kia bɛɛ Ngewɔ Hindoloi mia wɔɔ a ngie, kpaalɛi nasia ti lani ngi ma ti ngi gaailɔ a golola Ngewɔ wɛ. 9Kia Yesu i kpɔyɔni a hindei gbi wiela Ngewɔ longɔ yɛla i pie, i woteilɔ a numui na a pie nungei nasia ta golo ngi wɛ ti mbawo majɔɔ kunafɔ va, 10tawao Ngewɔ i loko loilɔ ngi ma yɛva a Saagbuablɛisia ti gulɔmɔ wai kia lɔɔ Mɛlkijidɛki i yɛ na. 11Njɛpɛ gboto lɔ mu laa ndeva kɔlooni Yesu yɛlɛi ma a Saagbuamɔ Waa, kɛɛ kpaukpaungɔe fasaiva wu ma, ajifa wu hulɛlɛngɔ hii a hinda yeembui gɔla. 12Watii gboto lɔ wɔɔ wu yeya woteva a kaamɔngaa, na hu gbi wu gbewengɔe numu va kiahuna bee i wu gaa a Ngewɔ laayiɛi yeetɔtoomɛi. Wuaa lɛ nyini gbolima kia hɔɔ waa ya a mɛhɛɛ kpaukpau mɛ. 13Numu gbi lekee i nyini gbɔlima lɛ, ndolaa mia a ngie tawao ii yaa guni a pɔɔna hinda luahu gɔla a hinda yakangɔ. 14Kɛɛ numu lakpangɔisia tia, ta gulɔ a mɛhɛɛ kpaukpau mɛla ajifa ti longa gaama ti gunga a hinda yekpe luahu gɔla kɛɛ hinda nyamu.

Hibublɛisia 6

1A mu li gulɔma, hɔɔ, mu kaa na wie mbɛngɔ numu lakpangɔngaa ma, mu lewe kaa yeehaalayei nasia ma mu pieni kɔloongɔ Kristi ma. Maa ii houni gbɔma mu yɛpɛ kɔlongɔ kaa yeehaalayei nasia ma wu pieni kɔlooni wounvela ma tuvei nasia ma ta pie numu yafei i haa kɛɛ ngi lalei a Ngewɔ; 2kɛɛ kaa na kɔloongɔ nguɛi ma kɛɛ loko wɛlɛla Kristimableisia wumba ti lubava; kɛɛ haablɛisia ti hiyelei hee hu kɛɛ kaa na kɔlooni kitii na ma Ngewɔ a tewe kpɛmbo-volei ma tawao yeekitii a lo ma kunafɔ. 3A mu li gulɔma! Tawao ma ji lɔ wie ina Ngewɔ lumɛilɔ mu wɛ. 4Gbamaile nasia ti langɔ wɔɔ a Kristi ti gbelengaa ti lalei ma a ngie, numu a yee gu i yama a tie ti wote gbɔma? Ti yɛ wɔɔ tɔnyɛi na gɔɔlɔ a gbua Ngewɔ gaama; ngelegoohu gbekpeyɛi kulo i foeilɔ ti ma tawao tia ti mbaangɛisia ti Ngewɔ Yafei majɔɛilɔ; 5ti yɛ kɔɔlɔ ti liisia hu kɛ njɛpɛi na Ngewɔ i ndenga kpekpengɔe tawao watii na Ngewɔ i wama mahayɛi mɛma ti yeekpayei ngi walɛi ngɔɔlɔ. 6Na hu gbi ti gbengaa lalei na ma ti yɛ piengɔ a Kristi, numu ɛɛ yaa gu i yama a tie ti gbɔma wote, ajifa tiaa Ngewɔ Hindoloi gbakpama krɔsii ma a nina, ta ngi yawufe fahii hu. 7Kpekpe mia Ngewɔ a pie a ndɔmɛi na njɛi a wua pɛɛpɛ i tɔgbɔ tuhani nasia ta gbekpe na ta nungei nasia nafa ti ti hini ti va. 8Kɛɛ ina ngaali kɛɛ kpiti lekee lɔ i wɔpɔni na, nafa gbi ɛɛ gbuahu; Ngewɔ ɛɛ loto yeendɔmɛi na jonduma, tawao ngɔmbui a mɔlɔ fo. 9Kɛɛ mu yɛ bɛɛ ji lema, nya liima ndiamɔisia, mu langɔe a wue. Mu kɔɔlɔ kɛ wuaa looni pelei na ma a li mia Ngewɔ a wu bawo na. 10Ngewɔ ii gavani. Ɛɛ lema ngengei na ma wu pieni, ɔɔ ndomɛi na wu pieni a ngie kpɔmɛi na va wu pieni tawao wu piema tuuŋ wu mbaa Kristimableisia ma. 11Na nya longɔ la waa, ta mia a ji wu yilayee gbi i yɛ a madihou na wie i piema wɔɔ haaŋ wu foo kpekpei na ma wu mawuloma. 12Ngii loni wu kɛwɛ hinda wie; nya longɔ wu wie kia nasia ti na ti langɔ a Kristi, ta mawulo wie a ndiilo, tawao na i pienga ti kpekpeyei na majɔɔnga Ngewɔ i Lahei wumbuni fa. 13Watii na Ngewɔ i Lahei wumbuni Ebraham gama, i jonduilɔ na wieva i Lahei wumbuni fa. Jifa ngi malema gbi ii yɛ na, i jonduni ta yekpe ngi biyɛi lɔ ma a ngi Lahei wumbu-gbelei. 14I ndeilɔ yɛ, “Nyaa Lahei wumbuma bi gama kɛ nga bi lubalɔ, ngi pie bi ndo gboto majɔɔ kɛɛ taa-loo gboto.” 15Ebraham i liiloilɔ Ngewɔ ma i mawulo, famia i hani na majɔɔni Ngewɔ i Lahei wumbuni fa. 16Numu i yaa jonduma, a jondu mbiyɛ lɔ ma yeemamɔi lewengɔ ta vulii ma, tawao i jondungaa lekee kɛ njɛpɛi na i gbɔyɔnga. 17Ngewɔ longɔ yɛla nasia ti wama hani na majɔɔma i yɛ Lahei wumbuni fa ti kɔɔ gbalauŋ kɛ na gbi lekee Ngewɔ ndengaa yɛ a pielɔ, a pielɔ huɛɛŋ; famia i jonduni na wieva i Lahei wumbuni fa. 18Ngewɔ Lahei taa ngi jondii ti hu ɛɛ nyani tawao Ngewɔ ɛɛ gu aa ndɛɛ guala kɔloongɔ ti ma. Aako mua i mu gɔnga a ndɔwuma, mu ndiigba majɔɔ liilova ngi ma. 19Liilomɛi ji lɔ mu wɛ tawao piengɔe kia nja-ya-lɛndɛisia ti lomɛi i na mu yafeisia ti mahugbe va, na yaa kpau, numu a liilo ma. A wuaalɔ pɛlei na bu i ngelegoohu i lewe kulɛi na ma i hɛlɛni na, i foo lomu magayemangɔ wai hu, 20mia Yesu i ya wɔɔ na mu gulɔ, i wuaanga na a mu jɔngɔ. I wotenga a Saagbuablɛisia ti gulɔmɔ wai kunafɔ va, kia Mɛlkijidɛki i yɛ na.

Hibublɛisia 7

1Taa wai na ti yɛ toli a Selɛm yeemahɛi mia wɔɔ a Mɛlkijidɛki ji tawao Ngewɔ Lɛngɔ wai Jaagbuamɔ lɔ wɔɔ a ngie. Kia Ebraham i yɛ yamama a gbua kɔi na hu i maha naanisia vayani hu, Mɛlkijidɛki i liilɔ ngi gulɔ i ngi luba, 2kɛ Ebraham i hani na kpɛlɛɛ i sɔɔni kɔi hu gɔlɛnga na puu i kaka yila ve ngi wɛ. (Mɛlkijidɛki biyɛi ji yeembui yeehaalayei mia a “Pɔɔna Mahɛi;” Tawao jifa Selɛm yeemahɛi a ngie, ngi biyɛi yeembui mia gbɔma a “Ndiilɛli Mahɛi.”) 3Kɔlɔ nyɛingɔ gbi ii na aa Mɛlkijidɛki ngi kɛkɛ ɔɔ ngi nje ɔɔ ngi maadani yeengila bɛɛ hinda hugɛ; ngi leyii kɛɛ ngi haayii yeekɔlɔ nyɛingɔ ii na. Ngi wiengɔe kia Ngewɔ Hindoloi na; a lo kunafɔ Saagbuamɔyɛi hu lɔ. 4Wu ngi wɔlɔyii lɔnga na. Hani gbi mu maada lɔwɔngɔ wai Ebraham taa ngi mablɛisia ti sɔɔni kɔi hu, i kɔlɛilɔ na puu i kaka yila ve ngi wɛ. 5Tawao i Sawei lailɔ Livai leengei nasia yeya ti yɛni a saagbuablaa yɛ hani gbi Isrɛlbleisia ta sɔɔ, ti yɛ a kɔlɛ na puu, tia ti Saagbuablɛisia ti kaka ngilangila wɔyɔ ti yeya, ti gbɔugbɔu bondɛisia, kia bɛɛ Ebraham bɔɔsɔngaa a yeembondɛi nasia. 6Mɛlkijidɛki ii gbuani Livai hu, kɛɛ i Ebraham jɔɔhani gɔlɛma puu, yeekaka yila houilɔ i Ebraham luba, Ebraham na Ngewɔ lubɛi i yɛ ngi wooma. 7I laailɔ ke kɛ numui na a numu luba i leweni numui na ma ta ngi luba. 8Saagbuablei nasia tia ti gbuani Livai hu, nasia ta hani gɔlɛma pui yeekaka yilei wɔyɔ nungaa yeya, ti yɛni a nungaa lɔ ta haa huɛɛŋ; kɛɛ Mɛlkijidɛki ndɛi hu ta, i hani gɔlɛma pui yeekaka yilei houilɔ tawao ngi vulungɔe tuuŋ kia Ngewɔ Gɔlɛi ndeni la. 9Faale numu a gulɔ a ndela yɛ ji Ebraham i hani gɔlɛima pui veni, Livai (na ngi bɔɔsɔɛisia ta hani gɔlɛma puu yeekaka ngilangilɛisia wɔyɔ) ta bɛɛ i feilɔ. 10Ajifa Livai lengɔ ii yɛla lɛ, kɛɛ numu a gulɔ i nde yɛ, i yɛ ngi maada Ebraham goohu lɔ ji Mɛlkijidɛki taa Ebraham ti lɔni. 11Sawei na Ngewɔ i feni Isrɛlbleisia wɛ ngoto i yɛ heini livai bɔɔsɔɛisia lɔ gɔwɔma ti yɛni a saagbuablaa. Ina saagbuablei nasia ti gbuani livai hu ti yengeilɔ kia Ngewɔ longɔ yɛla la, saagbuamɔ laasi weka gbuala nga yeekpewe ɛɛ yɛ na, numui na i Mɛlkijidɛki jaagbuayii wooma, Eerɔn ndɛi ii le. 12Tawao Saagbuablaa woveisia ti gbuangaa na yeeninangaa ti lewe na, saweisia bɛɛ ti maa a luvelɔ huɛɛŋ. 13Ajifa mu Lemɔi na ti njɛpɛi jisia leni ngi va, i yɛni a kɛnyɛmɔ weka lɔ, tawao ngi gɛnyɛmɔ yakpe bɛɛ ii saagbua yenge wieni. 14Numui gbi ti kɔɔlɔ pandawanda kɛ ti mu Lemɔi leni Juda gɛnyɛi hulɔ; tawao Mojisi ii laalini yeekɛnyɛi ji hinda ma ji i yɛ yɛpɛma kɔloongɔ Saagbuablɛisia ma. 15Na haa ngi yɛpɛma kɔlooni ma wa gulɔ na a mbugɔɔla gbalauŋ; Saagbuamɔ laasi weka i gbuanga nga, ngi wiengɔ kia Mɛlkijidɛki i na. 16Nuuvu Jawa langɔngaa ii le taa ngi yɛ a Saagbuamɔ; ndɛvui na ɛɛ gɛlɛ, ngi gbayei hu lɔ Ngewɔ i ngi yɛni a Saagbuamɔ. 17Gbamaile Ngewɔ Gɔlɛi yɛ, “Ba yɛlɔ a Saagbuamɔ kunafɔ va kia Mɛlkijidɛki i yɛ na.” 18Faale sawa wovei i haanga na ajifa ii guni a yengela tawao kpekpeya gbi ii hu. 19Gbamaile Sawei na Ngewɔ feni Mojisi wɛ kɛva a nungaa ii guni a piela hani gbi aa gbekpe kia mahoungɔ yɛla i gbekpe. Kɛɛ kiahuna na mu lii lɔ hani na ma kpekpengɔ tewengɔ na ma mu lii i yɛ wɔɔ ma, tawao a pielɔ mu lukpe Ngewɔ gbla. 20I baa na ma, Lahei na bɛɛ lɔ na Ngewɔ i mbumbuni. Ngewɔ ii Lahei na nyikɔ wumbuni watii na nungaa wekeisia ti woteni a saagbuablaa. 21Kɛɛ ji Yesu i woteni a saagbuamɔ Ngewɔ i Lahei wumbuilɔ yɛ ngi ma, “Ndemɔi i Lahei kpaukpau wumbunga tawao ɛɛ yaa ngayama, yɛ, ‘Ba yɛlɔ a Saagbuamɔ kunafɔ va.’ ” 22Jifa Ngewɔ i Lahei kpaukpau wumbuni watii na i Yesu woteni a Saagbuamɔ, ta lɔ i Yesu yɛni gbɔma a taanimɔ kɛ hinda yangilingɔ ninɛi i gbekpeni yeengovei ma. 23Nduahugɛ weka lɔ na: saagbuablaa wekei nasia ti gbotongɔ yɛla ajifa ti yɛlɔ a haa ti loko a gbenda ti yengei ma. 24Kɛɛ Yesu vulungɔe kunafɔ va tawao ngi jaagbua yengei ɛɛ lewe numu weka gama. 25Famia kiahuna, kɛɛ kpele gbi ngi gungɔ a nungei nasia bawola ta wa Ngewɔ gama a ngi sabui hu we, ajifa ngi vulungɔe kunafɔ va ti manɛnɛ wuava Ngewɔ gama. 26Faale Yesu lɔ Saagbuablɛisia ti gulɔmɔ wai na le, a na gbi wie mu wɛ ma gbewe fa. Ngi gayemangɔ waa le; nyamu ii ngi hu tawao jumbu ii ngi ma; Ngewɔ i ngi gbuanga jumbubleisia ma i ngi lɛnga ngelegoohu. 27Ii wieni kia Saagbuabla wekeisia ti na; saa gbuala ii ngi ma folo gbi, ta yese ngi nda jumbuisia va kɛɛ na nungeisia ti ndɛisia. I saa yakpe lɔ gbuani heima yakpe kunafɔ va, ji i ta yekpe veni Ngewɔ wɛ a saahanii. 28Nungaa ti woteilɔ a saagbuablaa kia bɛɛ tii yɛ a na wie mahoungɔ yɛla ti pie, kɛɛ Lahei kpaukpau na Ngewɔ i mbumbuni Sawei na wooma i feni Mojisi wɛ ta lɔ a pie Ngewɔ Hindoloi na a gu kunafɔ a hinda gbi wiela mahoungɔ i pie.

Hibublɛisia 8

1Njɛpɛi kpɛlɛɛ mu ndema yeengui lɔ a ji: Saagbuablɛisia ti gulɔmɔ waa bondɛi na lɔ mu yeya, na i heini Ngewɔ maha-heimɛi yeengejahui mia ngelegoohu. 2Saagbuamɔ waa lɔ a ngie a yenge Ngewɔ wɛ yeehindei na saagbuamɔi a saa gbua na Ngewɔ ma, tamia kula-wɛlei yeekpekpei na le Ndemɔi Ngewɔ i toni, nuuvu ii le aa to. 3Ngewɔ lɔ a Saagbuablɛisia ti gulɔmɔ wai gbi gɛ wava a saahaniisia kɛɛ saa-lohaniisia Ngewɔ gama, faale mahoungɔ yɛla hani i yɛ mu Jaagbuamɔ Wai Yesu yeya feva Ngewɔ wɛ. 4Ina taa dunyei hu, ii yɛ yɛ a Saagbuamɔ kulo bɛɛ, ajifa Saagbuablaa lɔ na ta li a saahani nasia Ngewɔ gaama kia Juubleisia ti Jawei i kɛni. 5Saagbuamɔ yengei na ta pie i yɛni lekee a na lɔ i wiema ngelegoohu yeekpuayei ɔɔ yeenɛnɛ. Hii wɔɔ i Mojisi wieni. Ji i ngi magbatɛni kula-wɛlei na lova Ngewɔ Hinda Yangilingɔi a yɛ mbu, Ngewɔ ndeilɔ ngi ma yɛ, “Tɔ vulii bi yeekula-wɛlei gbatɛ kia na i yɛ na ngi kɛni a bie ngiyei wumba.” 6Kɛɛ kiahuna na, Ngewɔ i saagbuamɔ yengei venga Yesu wɛ tewengɔ ti ndɛi ma, kia lɔ hindei na i ngangilini taa ngi nungeisia kpekpengɔ yeengovei ma, ajifa i gbuani Lahei nasia hu lɔɔ i mbumbuni yɛ nungaa ta kpekpeyangaa majɔɔlɔ tewengɔ yeengovei ma. 7Ina hinda yangilingɔi yeehaalayei i guilɔ a ngi yengei wiela, hinda yangilingɔ yeefelei yeemani ii yɛ yɛ na. 8Kɛɛ Ngewɔ i hinda lɔilɔ kpulangɔnga yeehaalayei hu ji i ndeni yɛ, “Watii lɔ hitima, Ndemɔi yɛ, ji nga hinda nina yangilingɔi hugbatɛ a Isrɛlbleisia kɛɛ na Judableisia. 9Ɛɛ wie kia hinda yangilingɔi na ngi hugbatɛni a ti maadani folei na ma ngi houni ti lokoi ma ngi ti gbua Ijipt lɔlei hu. Tii na wieni hinda yangilingɔi yɛ ta pie, famia ngii woloni kulo bɛ ti ma, himia Ndemɔi ndeni. 10Kiahuna, ji mia hinda yangilingɔi le nga hugbatɛ a Isrɛlbleisia Watii na ma wama, himia Ndemɔi ndeni: Nga nya Jaweisia wulɔ kpaŋ ti nɛmahu, tawao nga nyɛilɔ ti liisia hu. Nga yɛlɔ a ti Yewɔi, tawao ta yɛlɔ a nya nungeisia. 11Ɛɛ yɛ a kpaa gbi numu ma. ngi mba taali gaava, ɔɔ ndeva ngi mba kɛnyɛmɔi ma, yɛ ‘Ndemɔi gɔɔ!’ Ajifa ti kpɛlɛɛ ta nya gɔɔlɔ, i hiye yeekuloi ma i too yeembawai ma. 12Nga manulɔ ti jumbuisia ma, tawao ngɛɛ yaa gbɔma gili a ti wiehinda nyamuisia.” 13Ji Ngewɔ i yɛpɛni kɔlooni hinda yangilingɔ nina ma, i pienga yeehaalayei i wovanga; tawao hani gbi lekee i wovanga, i hawa, a lolɔhu hugutungɔ.

Hibublɛisia 9

1Sawangaa ti yɛlɔ hinda yangilingɔi yeehaalayei hu kɔloongɔ Ngewɔ vɛlile ma kɛɛ gbɔma yee-Ngewɔ vɛli mi dunyei hu na nungaa ti kpatɛni. 2Ti kula-wɛlei loilɔ, yeelomui yeehaalayei i na numu gbi a wuaa na, ta toli a Lomu Magayemangɔi. Na mia lambo-lomɛi i yɛ na, kɛɛ tebii, kɛɛ bledii na ta kpua a saa Ngewɔ ma i wuni yeetebii ma. 3Bi lewengaa wɔɔ kula hɛlɛngɔi yeefelei ma, kɛ bi fonga lomui na hu ta toli a Lomu Magayemangɔ Wai. 4Namia wɔɔ saagbuamɛi na i yɛ na, kpatɛngɔ a kanigbɔlui, ta siminjii mɔ na kɛɛ Hinda Yangilingɔi Yeekaŋaa, kanigbɔlui jiangɔ ma gbi, kanigbɔlu bolei na “mana” i yɛ hu i yeekaŋaa hu kɛɛ Eerɔn likpɔi na wɔɔ i yɛ vale a ndawa gbua kɛɛ kɔtu waala felei nasia wɔɔ saweisia ti nyɛingɔ yɛla ma. 5Fuuhanisia ti yɛlɔ yeekaŋaa mahu kpakiisia ti ti ma, na a kɛ kɛ Ngewɔ hei na lɔ, ti gbakisia vombongɔ hindei na maahu Ngewɔ a manu na jumbuisia ma. Kɛɛ kiahuna ii le hindei gbi hu aa yɛ gɛma a njɛpɛ gboto. 6Hii mia hindei nasia ti hugbatɛngɔ yɛla. Saagbuablɛisia ta wuaalɔ lomui yeehaalayei hu folo gbi ti yengeisia wieva; 7kɛ Saagbuablɛisia ti gulɔmɔ wai yakpe lɔ a wuaa lomui yeekohuyei hu, tawao a ji wie heima yakpe foo ma. A wuaalɔ wɔɔ na a tohani na ti kpuanga a saa lomui yeehaalayei hu, i kpua a saa Ngewɔ ma ta vulii va kɛɛ jumbui nasia nungeisia ta pie, na tɛɛ kɔɔ kɛ jumbu mia ti piema. 8Ngewɔ Yafei lɔ nungeisia gaama gbalauŋ a hugbatɛi jisia kpɛlɛɛ hu wee kɛ Lomui Yeemagayemangɔ Wai yeepelei ii yaa lawoni lɛ ina lekee lomu yeehaalayei lɔ lɛ looni. 9Ji kpɛlɛɛ i yɛni a hindei nasia ti wiema kiahuna yeetɔmaseli lɔ. Yeembui lɔ a ji kɛ saahaniisia kɛɛ tohani nasia nungaa ta kpua a saa ta fe Ngewɔ wɛ tɛɛ gu a piela yeenungeisia ti lii aa gbe a mɔnɛla jumbui nasia va ta pie, 10ajifa saahanii nasia ta fe Ngewɔ wɛ ta sawei nasia lekee lɔ gɛ kɔlooni gbɔɔ mahoungɔ ɔɔ maa ii houni numu i mɛ ɔɔ i kpɔle kɛɛ nguɛi nasia ta ti wua la jumbuisia gbuava ti ma. Sawei jisia kpɛlɛɛ ti gbitingɔ ii le numu lii ma tawao ta yɛlɔ lekee na i to watii na ma Ngewɔ a hindei gbi hugbatɛ a nina. 11Kɛɛ Kristi i yɛnga a Saagbuablɛisia ti gulɔmɔ wai na hinda yekpei nasia ti welanga a lɛla mu ma mbei ta gbua ngi gaama. Hindei na a saa gbua na mu jumbuisia va, baagɔma lɔ na ma tawao ngi yɛyii i gbekpeni i lewe dunyayei ma; nuuvu gula-wɛlɛ gbatɛngɔ ii le, ii yɛni a hani na i mbei Ngewɔ i tia dunyei gbatɛni. 12Ji Kristi i wuaani Saagbuamɛi na i ngelegoohu, i wuaa Lomu Magayemangɔ Wai hu yakpe kunafɔ va, ii lini a njengaa kɛɛ nika-hinangaa ti ŋama gbuava a saa; i ta yekpe ngi ŋamɛi lɔ veni i pie mu wote a mahaleengaa kunafɔ va. 13Saagbuablɛisia ta njengɛisia kɛɛ nika hinangɛisia ti ŋamɛi lɔ wumbu kɛɛ nika lɔgbɛ gewengɔi yeenduvui ti falifali nungei nasia ma ti nɔhɔngɔ hɛɛva Ngewɔ Wɛlei bu tawao ji a pielɔ ti yɛ sɛwɛ i yeemanɔhɔi na gbua ti ma. 14Ina tohaningaa ti ŋama a gulɔ i nungaa yɛ sɛwɛ, kpayei na i Yesu ŋamɛi hu mu liisia yɛva sɛwɛ i leweni polouŋ na ma. Ngewɔ Yafei na i na kunafɔ va ngi sabui hu, Kristi i ta yekpe veilɔ Ngewɔ wɛ a saahani na mbɛ gbi ii ma ji i haani krɔsii ma. Hee na Kristi i pieni ji i ta yekpe gbuani a saa, a manɔhɔ mɔni na wualɔ i loni mu ma ji mu yɛ saa gbamɛi nasia gbua tɛɛ gu a gbɛogbɛ wiela, aako mu na wie Ngewɔ vulungɔi longɔ mu pie. 15Sabui na va lɔ Kristi i hinda yangilingɔ nina hugbatɛma aako nungei nasia Ngewɔ i ti lolinga yɛva a ngi woo ti lubɛi na majɔɔ kunafɔ va i yɛ Lahei wumbuni fa. Ji a gulɔ a wiela ajifa Kristi i haailɔ tawao yeehei ji lɔ a nungaa wumawo jumbui nasia hu ti pieni ji hinda yangilingɔi yeehaalayei i yɛ hu. 16Ji numu a ngi woohani gɔlɛkɔlɛyii wu kɔlɔ ma, numu ba kɛ pɛiŋ kɛ yeekɔlɛi na gbatɛmɔi i haanga, 17ajifa numu gbi ɛɛ gu aa yeekɔlɛi na yayenge ina lekee yeekpatɛmɔi lɔ heini; numu a gulɔ lekee a ngayengela, yeekpatɛmɔi haangɔi wooma. 18Na vamia kpaya gbi ii yɛ hinda yangilingɔi yeehaalayei vulii bɛɛ hu kɛlee ji nungaa ti yɛ tohanisia ti ŋamɛi gbua a saa Ngewɔ ma. 19Haala hindei Mojisi i pieni tamia a ji sawa ngilangilɛi kpɛlɛɛ Ngewɔ longɔ nungaa ti hou i hugɛni gbalauŋ a nungaa gbi kia nyɛingɔ la Sawa-gɔlɛi hu. Na wooma i nika-lɔgbɛisia kɛɛ njengɛisia ti ŋamɛi wumbuilɔ, i ngahupu a njɛi, i falifali Sawa-gɔlɛi ma kɛɛ nungaa kpɛlɛɛ ma a hisɔp wulii yeembekeisia, ngilingɔ a mbaala-yombo gbɔugbɔi. 20Kɛ i ndenga yɛ, “Ŋamɛi ji lɔ i kpaya wuaanga hinda yangilingɔi na hu Ngewɔ i ndea yɛ waa nganyani.” 21Hii lɔ Mojisi i ŋamɛi valifalini Lomu Magayemangɔ Wai bu gbi kɛɛ hani gbi i yengeni la saagbuamɛi. 22A tɔnya, kia ndengɔ la Sawa-gɔlɛi hu, ŋama wula lɔ a hani gbi yɛ sɛwɛ tawao Ngewɔ a manulɔ lekee jumbui ma ji ta tohani waa ti yeeŋamɛi gbua a saa. 23Hinde jisia ti yeenasia vuii lɔ wokɔɔma ti ngelegoohu. Faale mahoungɔ yɛla ti yɛ sɛwɛsɛwɛ kia lekee ngi ndeni la. Kɛɛ ngelegoohu haakeisia vulii mahoungɔ saa yekpe gbuava ti va. 24Ajifa Kristi ii wuaani Lomu Magayemangɔ hu nuuvu i kpatɛni, na kpuangɔ vulii a yeekpekpei. I lini ngelegoohu vulii lɔ, tawao taa naa na a mu jɔngɔ Ngewɔ gulɔ. 25Juubleisia ti Jaabuablɛisia ti gulɔmɔ wai a wuaalɔ Lomu Magayemangɔi Wai hu foo gbi a hua ŋamɛi i haaka hu. Kɛɛ Kristi ta ii wuaani na ta yekpe gbuava a saa Ngewɔ ma heima gboto va, 26ajifa aa na wie, a yɛlɔ a mɔnɛ heima gboto va i hiye lekee wɔɔ dunyei gbatɛ-gbelei ma. Kia na aa wie, kia na hindei kpɛlɛɛ ti gbɔyɔ-gbelei i lukpenga kpla, i wanga heima yakpe kunafɔ va aako i pie manuma i jɔɔ nungaa ti jumbuisia va a ji i ta yekpe veni ti ngi waa kia saahanii. 27Numu gbi a haalɔ huɛɛŋ heima yila, na wooma Ngewɔ i ngi gbɛmbo. 28Hii lɔɔ Kristi i ta yekpe gbuani a saa heima yakpe numu gboto waa ti jumbuisia gbuava ti ma. A walɔ gbɔma kɛɛ jumbu gbuava ii le hu, kɛɛ kɔɔ i nasia ti bawo ti ngi gulɔgbema.

Hibublɛisia 10

1Juubleisia ti jawei ii gbuani waa vuli a hinda yekpei nasia ti wama wama; ti yɛni lekee a yeenɛnɛ magbindingɔ lɔ. Saa nasia saweisia ti kɛni, Saagbuablɛisia lɔ kunafɔ ti gbuama foo gbi. Sawei nasia ta saasia gbuayii hugɛ, ta yee gu ti jumbui gbua nungei nasia ma ta wa Ngewɔ gaama? 2Ina nungei nasia ta hɛɛ Ngewɔ ma ti jumbuisia gbuangɔi vulii ti ma, ti lii i yɛ yaa mɔnɛ jumbui nasia va ti pienga tawao saa gbualei aa gɛlɛlɔ. 3Kia hindei yɛyii i na kiahuna, saasia lɔ ta nungaa ti jumbuisia hitɛ ti nɛmahu foo gbi. 4Ajifa nika-hinangaa ti ŋama kɛɛ njengaa ti ŋama ɛɛ gu fɔ a jumbu gbuala numu ma. 5Na vamia ji Kristi i yɛ wama dunyei hu, i ndeilɔ Ngewɔ ma yɛ, “Bii gbeweni saa gbuala va kɛɛ saahaningaa kɛɛ bi nya gbuhɛi gbatɛnga. 6Tohani nasia ta ti gbuhɛi mɔ saagbuamɛi ɛɛ bi lii lɛli ɔɔ saasia jumbuisia wuava nungaa ma. 7Kɛ ngi ndenga ngɛɛ, ‘Nya gbe bi liimɛi wieva, Oo Ngewɔ, kia lɔɔ nyɛingɔ la sawa gɔlɛi hu kɔloongɔ nya ma.’ ” 8Haalɛi hu i ndeilɔ yɛ, “Bii gbeweni tawao bi goohu ɛɛ nɛɛ saa gbuangɔngaa va ɔɔ saahaningaa ɔɔ tohani nasia ta mɔ saagbuamɛi kɛɛ saasia jumbuisia wuava nungaa ma.” I ji leilɔ kia bɛɛ ta saa jisia kpɛlɛɛ gbua a pelei na lɔ Sawei kɛni. 9Na wooma kɛ i ndenga yɛ, “Nya gbe, Oo Ngewɔ, bi liimɛi wieva.” Faale Ngewɔ lɔ ndema yɛ kpaya gbi ii yaa sawa woveisia kpɛlɛɛ hu, i Kristi jaa gbuangɔi wunga yeepomɛi. 10Ajifa Yesu Kristi i na wieni Ngewɔ longɔ i pie, saa yakpei na i kpuani kunafɔ va a ngi gbuhɛi vulii i pienga jumbui i wuanga gbɛlɛŋ mu ma. 11Juu Jaagbuamɔ gbi a ngi yengei wielɔ folo gbi tawao a saa laasi yilei gbualɔ wɔɔ heima gboto; kɛɛ yeesaa jisia tɛɛ gu kunafɔ taa jumbu gbua numu ma. 12Na hu gbi Kristi i saa yakpe lɔ gbuani jumbuisia va, tawao yeesaa na laahoungɔe kunafɔ va, na wooma i heiilɔ Ngewɔ yejahui. 13Taa na mawuloma na haaŋ Ngewɔ i ngi juwuisia wuaa ngi gɔwɔbu i gɔwɔ lo ti ma. 14Saa yakpei Kristi i ta yekpe gbuani la i jumbui gbuanga kunafɔ nasia ma Ngewɔ i ti yɛnga a ngi woo. 15Tawao Ngewɔ Yafei bɛɛ i seli wuanga mu gama. Haalɛi hu i ndeilɔ yɛ, 16“Ji lɔ hinda le mua tieni ma ngangili kulɔmɛi, hii Ndemɔi i ndenga yɛ: Nga nya jaweisia wulɔ kpaŋ ti liisia hu ngi ti nyɛi ti nɛmahuisia.” 17Kɛ i ndenga yɛ, “Ti jumbuisia kɛɛ ti hinda nyamuisia tɛɛ yaa hitɛ nya wɛ kunafɔ.” 18Faale Ngewɔ i manunga ti jumbuisia ma kɛɛ ti hinda nyamuisia, sabu gbi ɛɛ yɛ na saa gbuava jumbungaa gbuava nungaa ma. 19Faale, nya Kristimableisia, hei na Yesu i pieni i mu liigbanga wuava, Lomu Magayemangɔ Wai na hu Ngewɔ i yɛ wɔɔ na. 20Kristi i ngi gbuhɛi gbuailɔ a saa aako i pele nina la nungaa ta ndɛvu nina majɔɔ la. Ngi gbuhɛi wiengɔe kia kula kpɔtukpɔtui na i yɛ na i yɛ hɛlɛni Ngewɔ Wɛlei bu a Ngewɔ yɛmɛi maalɔɔwu. 21Saagbuamɔ waa lɔ mu yeya ngelegoohu wɛlei bu mia Ngewɔ gama. 22Faale a mu lukpe Ngewɔ gbla a mu lii gbi mu liilo ngi ma, mu wa ngi gaama a ndii nasia Kristi i nguanga fo a njaa sɛwɛsɛwɛ. 23Faale a mu lo kpaŋ, maa gbe kulo bɛɛ hani nasia ma Ngewɔ a fe mu wɛ, gbamaile ma gulɔ a liilola Ngewɔ ma jifa hinda gbi i Lahei wumbungaa pieva a pielɔ huɛɛŋ. 24A mu gbewe mu nyɔunyɔu va, mu gbɔ mu nyɔunyɔu ma ndoma gɛva kɛɛ hinda yekpe wieva. 25Maa gbe a yandɔla a lenga hinda yila, kia nungaa lɛɛngaa ti piema la. Kia maa na wie, a mu mu nyɔunyɔu lii gba i lewe yeengovei ma, jifa wuaa tɔma Ndemɔi wa-volei lukpenga kpla. 26Saa gbi ii yaa na aa jumbu gbua numu ma ina mu liilɔ lekee a jumbu wie a kɛwɛ tɔnyɛi gɛngɔi wooma a mue. 27Kia maa na wie, na lekee mahoungɔ mu pie ta lɔ a Kpɛmbo-Volo maluwangɔ wai mawulola nduwa hu, kɛɛ ngɔmbu yagbalɛngɔ wai na a nungei nasia gbi gewe ti gangangɔ a Ngewɔ. 28Numu gbi lekee a sawei nasia nyani a kɛwɛ Ngewɔ i feni a Mojisi loko, seli fele ɔɔ sawa tɛɛ ti ngi lɔilɔ i pie, Kotii mahublɛisia ta pielɔ ti ngi waa, tɛɛ manu gbi ngi ma. 29Gbɔɔ hɔɔ a numui na ii Ngewɔ Hindoloi lɔni a gbɛogbɛ? Yemia a numui na a Kristi haalɛi wumbu a baabaa-hinda, Kristi haalɛi na i pieni Ngewɔ i hinda nina yangili, i yama i yeenumui na vulii gbua jumbui yeenjiɛi hu, numui na a njia nyamu le ngauwanda Yafei ma? A gili lɛɛ a kpaalɛi ya wɔlɔyii i piema Ngewɔ a nda ngi ma! 30Ajifa mu kɔɔlɔ kɛ Ngewɔ vulii lɔ i ndeni yɛ, “Gbema nya wɛ hunyɔu va, nga kpɛi gbualɔ;” tawao mu gbɔma kɔɔlɔ ye lɔ i ndeni yɛ, “Nga nya nungeisia gbɛmbolɔ.” 31Hinda maaluwangɔ waa le wuava Ngewɔ vulungɔi gbɛmboi bu. 32A gili lɛɛ a na wɔɔ i yɛ wu wie ngovama. Watii na, ji wu lani a Ngowili Yekpei a nina, hinda yagbalɛngɔ gboto i lailɔ wu ma, kɛɛ na hu gbi wu yeendapii na gɔilɔ wuii gbahani. 33Watii lɛɛngaa nungaa ti yɛlɔ a njia nyamungaa le wu ma faha hu, ta kpaalɛ la wu ma tawao watii lɛɛngaa wu yɛlɔ a gbɛɛ nasia ma a wu nyɛkɛ nungaa ti yɛ njia nyamungaa le ti ma, ta kpaalɛ la ti ma. 34Wu yɛlɔ a gbɛɛ yeenasia ma ti yɛ kpindi-wɛlei bu kpaalɛɛngaa ta la wua tieni ma, tawao watii na ti wu yeya- hanisia kpɛlɛɛ houni wu yeya a kpaya, yeembɔnɛi na i guilɔ wu hu tawao ii wu goohunɛɛi nyanini, ajifa wu yɛ kɔɔlɔ kɛ hani lɔ lɛ wu yeya kpekpengɔ na kpɛlɛɛ ma, tawao a lo wu yeya kunafɔ. 35Faale yeehinda gbangɔi jisia taa pie waa gbaha ajifa ndiiloi a walɔ a mawaa wa. 36Mahoungɔ wu mawulo a ndiilo, aako wu Ngewɔ liima hindei wie, wu mawaa na majɔɔ i Lahei wumbuni feva wu wɛ. 37Gbamaile Ngewɔ Gɔlɛi lɔ ndema yɛ, “I longa kulo te, numui na i wama a walɔ, ɛɛ lɛmbi hu; 38Na hu gbi, nya nungaa wɔnangɔisia ta bawo lanaya wooma lɔ; kɛɛ ti yilayee gbi i yamangaa a wooma wee, ngi hinda ɛɛ nɛɛ nya wɛ.” 39Kɛɛ muii yɛni a nungei nasia ta yama a wooma wee tawao ta jukulu. Mua mu langɔe a Ngewɔ tawao mu bawongɔe.

Hibublɛisia 11

1Lanaya mia a lala la kɛ hani nasia mu lii i ti ma tiaa na, kɛɛ lala vulii kɛ hanii nasia muɛɛ ti lɔ tiaa na. 2Jifa wɔwɔmablɛisia ti lani a Ngewɔ famia ti hinda i nɛni ngi wɛ. 3Jifa mu langɔ a Ngewɔ famia mu kɔɔnga gbalauŋ kɛ Ngewɔ laayiɛi lɔ i dunya wai ji gbatɛni la, aako na ma gu a tɔla i gbuani na hu lɔ numu ɛɛ gu a tɔla. 4Ebɛl lava lɔ a Ngewɔ i saa gbuani Ngewɔ ma kpekpengɔ tewengɔ Ken ndɛi ma. Ngi lava a Ngewɔ, ngi hinda i nɛilɔ Ngewɔ wɛ i ngi wumbu a pɔɔnamɔ a ji i ngi jaa-hanisia guluni. Tawao Ebɛl lava a Ngewɔ, a yɛpɛlɔ tuuŋ mu gama kia bɛɛ ii ndɛvu hu. 5Jifa Inɔk langɔ yɛla a Ngewɔ famia ii haani. Kia aa haa, Ngewɔ i ngi wumbuilɔ i lɛ a ngie, tawao numu gbi ii guni a ngi lɔla, ajifa Ngewɔ i lɛnga a ngie. Ngewɔ Gɔlɛi yɛ pɛiŋ Ngewɔ i yaa lɛ a Inɔk ngelegoohu, i pieilɔ ngi hinda i nɛɛ Ngewɔ wɛ. 6Numu gbi lekee ii lani a Ngewɔ ɛɛ gu aa ngi liima hinda wie, ajifa numu gbi lekee ngi longɔ i hɛɛ Ngewɔ ma, mahoungɔ i la la vulii kɛ Ngewɔ lɔ na tawao a kpekpe wielɔ a nungei nasia ta wa ngi gama. 7Jifa Noa langɔ yɛla a Ngewɔ famia i woloni ndahii na ma Ngewɔ feni ngi wɛ kɔlooni kulɔma hindei nasia ma ii yɛ gu a tɔla. I goloilɔ Ngewɔ laayiɛi bu, i nja-ya-lɛndɛ yila gbatɛ, taa ngi nyahɛi kɛɛ ti leengeisia ti bawo hu. Noa wiehindei ji i kɛilɔ kɛ dunyableisia ti nyamungɔe, tawao Ngewɔ i ndeilɔ yɛ pɔɔnamɔ lɔ a Noa jifa ngi langɔ a Ngewɔ. 8Jifa Ebraham langɔ yɛla a Ngewɔ, i goloilɔ Ngewɔ laayiɛi bu ji Ngewɔ i ndeni ngi ma yɛ i gbua ngi nda lɔlei hu i li ndɔlɔ weka hu i yɛ Lahei wumbuni feva ngi wɛ. Kia bɛɛ ii yɛ mia gɔɔ i lima na, i gbuailɔ ngi nda lɔlei hu, i li. 9Jifa ngi langɔ yɛla a Ngewɔ, i heilɔ kia hota ndɔlei na hu Ngewɔ i yɛ Lahei wumbuni feva ngi wɛ. Taa ngi mablɛisia ti yɛ yii kula-wɛleisia bu lɔ, kia ngi loi Aisaki taa ngi nda loi Jekɔpi ti pieni, jifa Ngewɔ i yeelahei yakpei na wumbuilɔ tia bɛɛ gaama. 10Gbamaile Ebraham lii i yɛlɔ ma heiva tɛi na hu Ngewɔ i humanga i tonga, tɛi na a yɛ na kunafɔ ɛɛ wolo. 11Jifa Ebraham langɔ yɛla a Ngewɔ famia i guni a ndo lela kia bɛɛ ngi wovangɔ waa yɛla tawao Sera bɛɛ ngi lewengɔ ndole gbelei ma. I yɛ kɔɔlɔ kɛ Ngewɔ Lahei wumbungɔi hu ɛɛ nyani. 12Kia bɛɛ Ebraham haangɔ jɔngɔ yɛla, na hu gbi ndeengaa ti gbuailɔ ngi hu ti gbotongɔ kia tumbekeisia na ti ngelei ma, ti vahangɔ kia ŋanya gate ngilangilɛi nasia na ti ŋanyakpaa ma. 13Nungɛi jisia gbi ti loni lamaa a Ngewɔ ti haa. Tii hani nasia majɔɔni Ngewɔ i Lahei wumbuni fa, kɛɛ ti loilɔ kuhama ti tɔ ti goohunɛɛ ma, ta hugɛ a nungaa foofo hu kɛ hotangaa lɔ a tie dunyei ji hu. 14Nasia ta njɛpɛ bondɛi nasia le tiaa ndama leiŋ kɛ ti nda lɔlei mia ti kɔkɔlima. 15Tii lɛmbini gilima a ti lɔlei na ti gbuani hu; ina ti lɔlei yeemani i ti lɔilɔ, gbɛogbɛ ii yɛ aa ti huhou yamava na. 16Kɛɛ tɔnyɛi a ji lɔ kɛ ndɔlei na kpekpengɔ na mia yeemani i ti ma, ndɔɔlɔ weka gbi ii le kɛlee ngelegoohu. Faale na ii wufeni Ngewɔ wɛ ji ta ngi loli a ti Yewɔɛi, jifa i taa waa loonga ti wɛ. 17Jifa Ebraham langɔ yɛla a Ngewɔ famia i yɛ ngi hindoloi gbuama a saa, ji Ngewɔ i ngi hugɔɔni. Ebraham lɔ Ngewɔ i Lahei wumbuni ngi gama, na hu gbi ngi magbatɛngɔ yɛla ngi hindolo yakpei Aisaki gbuava a saa. 18Ngewɔ i yɛ ndeilɔ ngi ma yɛ, “Bi bɔɔsɔ vaha wai nasia ngi yeelahei wumbuni bi gaama, ba ti majɔɔ a Aisaki lɔ.” 19Ebraham i kɔɛilɔ nɛmahu kɛ Ngewɔ a gulɔ i Aisaki vulu i ngi wumbu hee hu tawao Ngewɔ i pieilɔ Aisaki i yama ngi ma bi tɔaa bɛɛ i gbuanga hee hu lɔ. 20Jifa Aisaki langɔ yɛla a Ngewɔ famia i Lahei wumbuni yɛ a ngi leengeisia luba lɔ, Jekɔpi kɛɛ Isɔ. 21Jifa Jekɔpi langɔ yɛla a Ngewɔ famia i Josɛfi leengeisia lubani a ngilangila ji ngi haalɛi i loni te. Ngi valangɔ yɛla ngi likpɔi ma i hɛɛni Ngewɔ ma. 22Jifa Josɛfi langɔ yɛla a Ngewɔ famia ji ngi haa-gbelei i loni te, i yɛpɛilɔ kɔlooni Isrɛelblɛisia ti gbualei ma Ijipt, i yama i hugɛ a nungeisia gbɔɔ mahoungɔ ti pie a ngi womɛi. 23Jifa Mojisi leblɛisia ti langɔ yɛla a Ngewɔ famia ti ngi lɔwuilɔ ngawu sawa va ngi lengɔi wooma. Ti tɔilɔ kɛ ndoi nyandengɔ waa le famia tii luwani a mahɛi jawei nyanila. 24Jifa Mojisi langɔ yɛla a Ngewɔ famia kia i lakpani, ii yɛ luma numu aa ngi loli a mahɛi nyahaloi goohu hindoloi. 25Ji wɔɔ a gbɛɛ Ngewɔ nungeisia ma kɔɔ kpaalɛ i la taa tieni ma, manɛngɔ yɛla ngi wɛ i lewe ji a goohunɛɛ jumbu ma watii hugutungɔ va. 26I tɔilɔ kɛ ji mbɛnyani a numu maale Kristi va, nafa i hu i lewe polouŋ kpatɛi kpɛlɛɛ ma i Ijipt lɔlei hu, ajifa ngi lii i yɛ mawaa na lɔ ma i wama sɔɔma kulɔma. 27Jifa Mojisi langɔ yɛla a Ngewɔ famia i gbuani Ijipt ii luwani ndiilewei na ma mahɛi i pieni; i gangailɔ a yamala, bi tɔa bɛɛ i Ngewɔ na lɔilɔ numu ɛɛ ngi lɔ. 28Jifa ngi langɔ yɛla a Ngewɔ, i Tewema Gomɛi gbɔkuilɔ tawao i nde yɛ ti yeembala ŋamɛi jia ti wɛleisia lama aako Numu-waa malikei aa Isrɛelblɛisia ti gbla-lengeisia waa. 29Jifa Isrɛelblɛisia ti langɔ yɛla a Ngewɔ famia ti guni a jiala ndɔma bengɔi ma ti gbooyɛi na lewe ta toli a Rɛd Sii; kia Ijiptblɛisia ti hitɛni ti wooma, njɛi i yeilɔ a tie ti lo hu. 30Jifa Isrɛelblɛisia ti langɔ yɛla a Ngewɔ, i pieilɔ Jɛliko yeegɔlɔi i gula ji ti yɛ jia ta kaala heima yila folo ma njii wɔfla va. 31Jifa hitɛ-nyahɛi Rehab langɔ yɛla a Ngewɔ famia Isrɛlbleisia tii ngi waani taa nasia ti gangangɔ yɛla a Ngewɔ, ajifa i loko heiilɔ pandaa Isrɛlbleisia ti nɛnɛjiagablɛisia bu. 32Ngi nungei jisia yeepekeisia gbi ti hinda hugɛ? Watii ii nya yeya ngaa gu Gidiɔn hinda hugɛva kɛɛ Berak kɛɛ Samisi kɛɛ Jɛfta kɛɛ Devidi kɛɛ Samuɛl kɛɛ Ngewɔ lutuisia. 33Jifa ti langɔ yɛla a Ngewɔ, ti gɔilɔ a kɛnyɛ wekangaa ti ti vaya. Ti pɔɔna hindei lɔ wieni tawao ti na majɔɛilɔ Ngewɔ i Lahei wumbuni fa. Ti pieilɔ njalɛisia ti londo, 34ti ngɔmbu maaluwangɔngaa lufe, ta bawo kɔbowei yeya. Kaahu gbi ii yɛ ti ma kɛɛ ti gbayailɔ; ti gbayangɔ yɛla kɔi hu tawao ti kɛnyɛblaa wekeisia ti gɔblɛisia vayɛilɔ. 35Jifa nyahangaa lɛɛnga ti langɔ yɛla a Ngewɔ, ti lenyɔuisia ti yɛ hiyelɔ hee hu ta yama ti ma. Pekei nasia tii lumani taa gbe a laala a Ngewɔ aako ti gbe ti ma, ti ngagbalɛ haa wieilɔ aako ti hiye hee hu ndɛvu yekpe majɔɔva. 36Nungaa ti yɛlɔ a ti lɛɛngaa gbafa, ta ti lewe, ta ti lɛɛngaa wu jɔɔwɔisia ya, ta li a tie kpindi-wɛlei bu. 37Ti yɛlɔ a ti hɔwɔhɔwɔ a kɔtiisia ta haa, ta ti lewendia, ta ti waa a kɔbowei. Ti yɛlɔ a lewetewe mbala-kɔlɛisia ɔɔ nje-kɔlɛisia ti ti ma a kula, ti vɛlingɔ hulewengɔ, juwuya i ti ma, ta ndoli nyamunyamungaa wie a tie. 38Ti gbekpengɔ waa yɛla na hii dunyei ji ii yɛ gbekpeni ti heiva hu. Ti yɛlɔ a lewetewenga ndɔgbɔlambɛisia ma kɛɛ ngiyeisia hu ta yii puisia hu kɛɛ ndoweisia ndɔwu. 39Nungɛi jisia gbi ti hinda i nɛɛilɔ waa Ngewɔ wɛ ajifa ti lani a ngie; na hu gbi tii hani na majɔɔni Ngewɔ i yɛ Lahei wumbuni feva ti wɛ, 40ajifa i yɛlɔ Ngewɔ nɛmahu hinda hugbatɛva mu va kpekpengɔ tewengɔ yeengovei ma. I yɛ ngi lii hu lɔ kɛ ɛɛ tia lekee wote a pɔɔnablaa mu wooma.

Hibublɛisia 12

1Mua bɛɛ, kia seli vaha wai nasia ti mu galangɔ, mahoungɔe mu loko gbua hinda gbi a mu gbaha hindei nasia ma mahoungɔ mu pie, kɛɛ jumbui na fɛɛfɛngɔ kpauŋ mu ma, mu mu lii huyili hindei wieva kia mahoungɔ mu pie ndɛvui yeena hu mu wama majɔɔma. 2A mu yɛ a gili tuuŋ a Yesu na i pienga mu langa a Ngewɔ i hiye watii na ma mu lani a ngie. I yɛ kɔɔlɔ kɛ na i wama piema dunya a pielɔ ti ngi waa krɔsii ma kɛɛ ii gbeni na va. Koohunɛɛ na Ngewɔ i yɛ wama fema ngi wɛ, ii krɔsi-ma-hee yeembɛnyanii lɔni a gbɛogbɛ, tawao taa na heini Ngewɔ maha-heimɛi yeengejahui. 3A gili lɛɛ a kpaalɛi na kpɛlɛɛ i lani ngi ma; a gili a kpaalɛi kinɛiŋ jumbublei nasia ti lolongɔ yɛla a ngie ti ndani ngi ma i guni mbu! Faale waa luma wu gahu aa gbɔyɔ wa gbe a lala a Ngewɔ. 4Ajifa magawoi ji hu wu wu magawoma la jumbui yeya, wuii yaa foni lɛ mia wa lo wu magawoma na ti wu waa. 5Wu lemanga numu liigba yɛpɛi nasia ma Ngewɔ a nde wu ma jifa ngi leengeisia a wue yɛ, “Nya loi, wolo Ndemɔi ma i bi lo pele ma, tawao bi lii aa lewe ji a lumbe bi laa. 6Jifa numu gbi lekee Ndemɔi longɔ la a ngi loolɔ pele ma, tawao a numu gbi liima belɔ ji a ngi wumbu a ngi loi.” 7A gu kpaalɛi nasia bu ta la wu ma kia kpaalɛi na na kɛkɛi a nda ndoima ji a kpulanga wie; gbamaile wu gbalei a kɛlɔ kɛ Ngewɔ lɔ wu houma kia ngi leengaa. Ndo lɔ na wɔɔ na ngi kɛkɛ ii kpaalɛ lani ngi ma? 8Ngewɔ a kpaalɛ lalɔ ngi leengeisia kpɛlɛɛ ma ti loova pele ma, faale ii kpaalɛ lailɔ wu ma, na a kɛlɔ kɛ ngi leengaa vulii yaa a wue, kɛ pue-leengaa mia a wue. 9Mu kɛkɛ nasia ti mu leni dunyei hu, ti kpaalɛ lailɔ mu ma mu makɛva tawao mu wuaailɔ ti bu. Faale mahoungɔ waa le mu gu kpaalɛi na bu mu Kɛkɛ na i ngelegoohu a pie i la mu ma aako mu ndɛvu majɔɔ a ngie! 10Mu kɛkɛ nasia ti yɛ dunyei hu ti kpaalɛ lailɔ mu ma hinda hugutungɔ va kia pɔɔnangɔ yɛla ti yaama; kɛɛ Ngewɔ a kpaalɛ la mu ma mua yekpe mu gbekpeyɛi va lɔ, aako mu gbua a ngie. 11Ngewɔ i kpaalɛ langaa mu ma, a wielɔ mu gama bɛɛ i pienga mu lii nyaniva lɔ, mu goohu nɛva ii le. Kɛɛ pooma, nasia yeekpalɛi na a pie ti makɛ ta mawaa majɔɔlɔ, ta mia a ji ta wote a pɔɔna wieblaa, ti ndiilɛlihu. 12Faale, a wu loko huhaangɔisia lɛ ngelema, wu wu wombii nasia hulata ti gbɛlima wu bu! 13A yɛ tuuŋ a jia a pele wɔnangaa kɔɔ wu gɔwɔ gbalɛngɔisia taa haa, ti bawo. 14A lapi wua numui gbi wu hei ndiilɛli hu, tawao a lapi wu luva kia numui na na ngi lɛɛvui vengɔ Ngewɔ wɛ, ajifa wuii na wieilɔ, wuɛɛ Ndemɔi lɔ. 15A wu mahugbe waa wounve Ngewɔ yauwandei ma. Numu gbi aa wie kia tuhani ŋɔnangɔ, na a lakpa i numu gboto hubɔnɔ. 16Numu gbi aa yɛ a puegbua kɛɛ numui na ii baagɔɔ hani nasia ma Ngewɔ woo le kia Isɔ i pieni, i ndewewayɛi majiɛilɔ mɛhɛɛ wulo hii va, i baa a poohani na kpɛlɛɛ i yɛ looni kulɔ. 17Wu hugɔɔlɔ kɛ na wooma ngi longɔ yɛla ngi kɛkɛ i hɛɛ ngi wɛ, hindei yangamava i pieni wɔɔ, kɛɛ ii guni a bɛla ma kia bɛɛ i yɛpɛni kaka a wɔɔ. 18Wuii wani kia Isrɛelblɛisia ti wani hani na gama wa gu a ngati gɔlaa ngiyei na ti yɛ toli a Sainai, ngɔmbu waa a vo ngumba, kpindi nilinili waa i heini ma kɛɛ ma yaa pumulu, viivii a wa na, 19bulii a vɛ na, Ngewɔ yɛpɛwoi a gbua na. Kia nungeisia ti Ngewɔ yiawoi mɛnini, ti manɛnɛ wuaailɔ tɛɛ Ngewɔ aa njɛpɛ yakpe bɛɛ le gbɔma ti ma, 20ajifa tii yɛ gu sawei na bu Ngewɔ ndani yɛ, “Ndɔgbɔ-hua bɛɛ i gbitingaa ngiyei na ma, mahoungɔ ti lo hɔwɔhɔwɔma ti paa.” 21Hindei na i yɛ wie Sainai yiyei hu i nungaa huluwailɔ hulewengɔ kɛ Mojisi i ndenga yɛ, “Ngi luwanga nya maa lɔ gbɛlima.” 22Wuii lini Sainai Yiyei gama, wu wanga Sayɔn Yiyei lɔ hu kɛɛ Ngewɔ vulungɔi laa wai, Jelusalɛm, na i ngelegoohu, taa ngi malika tauji gboto wai. 23Wu wanga komɛi na hu lɔ Ngewɔ gblalengaa goohu nɛngɔisia ti pienga, nasia ti lɛisia nyɛingɔ ngelegoohu. Wu wanga Ngewɔ gama, na nuuvu gbi ti gbɛmbomɔi a ngie, tawao wu wanga numu yekpei nasia gama lɔ Ngewɔ i ti yɛni wɔɔ a pɔɔnablaa. 24Wu wanga Yesu gama, na yɛni a sabu hinda yangilingɔ ninɛi hu i gbatɛni, tawao ngi ŋamɛi na i wuni i yɛnga a Lahei haningaa veva mu wɛ ti gbekpengɔ tewengɔ polouŋ na ma Ebɛl ŋamɛi a gu a fela. 25Faale, a tɔ vulii wu wolo pandawanda numui na ma i yɛpɛma. Nasia ti gangani a wolola numui na ma i Ngewɔ wowili leni dunyei hu tii bawoni. I laailɔ ke kɛ muɛɛ bawo ina mu wounveilɔ numui na ma i ngelegoohu a yɛpɛ. 26Ngewɔ woi i dunyei gbɛlilɔ a watii na, kɛɛ i Lahei wumbunga na yɛ, “Nga gbɔma dunyei jɛsialɔ kɛɛ ta lekee ɛɛ yɛla, taa ngelegoohu a yɛla.” 27Ji i ndeni, “Yɛ gbɔma” a dunyei jɛsialɔ, i kɛ maa a mue leiŋ kɛ a ngi gbatɛhanisia jɛsialɔ i ti gule, aako hanii nasia tɛɛ jɛɛsia ti lo. 28A mu siɛgbua Ngewɔ ma ajifa mua tieni ma yɛlɔ mahayɛi na hu ɛɛ jɛɛsia. A mu siɛgbua Ngewɔ ma mu hɛɛ ngi ma a pelei na a nɛɛ ngi wɛ, a baagɔma waa kɛ nduwahu, 29ajifa mu Yewɔɛi gbuangɔ vuli a hinda hunyani yɔmbu lɔ.

Hibublɛisia 13

1A yɛ tuuŋ a lo a wu nyɔunyɔu kia mahoungɔ Kristi lehubleisia ti pie. 2Waa lema a hotangɛisia gulula wu wɛleisia bu. Nunga lɛɛnga ti loilɔ wɔɔ ji wiema ti gbekpe a malikangaa tii kɔɔ kɛ malikangaa mia. 3Nasia ti kpindi wɛlei bu ti hinda i yɛ tuuŋ wu nɛmahu bi tɔa bɛɛ wua tieni mia wu na. A gbewe tuuŋ nasia va kpalɛ i ti ma bi tɔa bɛɛ yeekpalɛi i wua tieni lɔ ma. 4Mahoungɔ numui gbi ti baa gɔɔ nyaha-jɔɔ taa hini-jɔɔ ma, tawao maa ii houni nyahamɔ ɔɔ hinimɔ gbi taa numu weka ti la. Ngewɔ a nasia gbɛmbolɔ ta manɔhɔ kɛɛ puegbua hindeisia wie. 5Navoo-mani aa yɛ wu hu kulo bɛɛ, tawao wu lii i lɛli a na i wu yeya. Gbamaile Ngewɔ i ndenga yɛ, “Ngɛɛ gbe bi ma tawao ngɛɛ gbua bi woohu.” 6Faale, a mu nde a ndiilo muɛɛ, “Ndemɔi lɔ a gbɔ nya ma, ngɛɛ luwa. Gbɔɔ numu gbi a gu i pie a nge?” 7A gili a wu mahublɛisia wɔɔ, nasia ti Ngewɔ wowili hugɛni a wue. A gili lɛɛ a ti luvayii wɔɔ kɛɛ ti haayii, wu ti wokɔɔ a ti layii hu a Ngewɔ. 8Yesu Kristi ɛɛ wotewote, kia i yɛ na wɔɔ, hii i na kiahuna tawao hii a yɛ na kunafɔ. 9Waa luma kaa gɛwɛgɛwɛ laasii kpɛlɛɛ taa wu yaka wu gbua tɔnya welei ma; nyandengɔ waa le ji Ngewɔ a mu liisia gbaya a ngi yauwandei hu we, i lewe sawangaa houla ma kɔloongɔ mɛhɛɛngaa ma; yeesawei jisia tii yɛ gbɔni nasia ma ta ti hou. 10Saagbuablei nasia ta saa gbua Juubleisia ti hɛɛmɛi, ii wɔnani ti va saahanii na mɛva ma kpua a saa mu nda jaa gbuamɛi. 11Juu Jaagbuablɛisia ti gulɔmɔ wai a walɔ a huangaa ti ŋamɛi Lomu Magayemangɔ Wai na bu Ngewɔ a yɛ na kpuava a saa nungaa ti jumbuisia va; kɛɛ ta gbualɔ a yeehuangɛsia ti woomɛi tei hu ti mɔ. 12Na vamia Yesu bɛɛ i gbuani taa wai hu i haa aako i jumbuisia wua nungeisia ma a ta vulii ngi ŋamɛi. 13Faale, a mu li ngi gama tei wooma ngufei na i lɛni ngi ma i lɛ mua tieni ma. 14Gbamaile taa gbi ii na mu va mbei dunyei ji hu a yɛ na kunafɔ; mu taa wai na lɔ gulɔgbema i wama wama kulɔmɛi. 15Faale a mu yɛ a Ngewɔ lato kpele gbi, yeetatoi i yɛ a mu jaahani Yesu sabui hu, tawao yeetatoi ji lɔ saahanii le ndaguli nasia ta nde tɛɛ Yesu lɔ Ndemɔi le. 16Waa lema a kpekpe kɛɛ kpɔma wiela wu nyɔunyɔu ma, ajifa saa jisia lɔ a nɛɛ Ngewɔ wɛ. 17A golo wu gulɔbleisia wɛ, wu yɛ a na wie ta nde wu ma pieva. Tia mia ta wu yafeisia mahugbe ndɛvu ii ti ma, jifa i ti ma a kpa lɔ gonava Ngewɔ ma a ngengei na ti pienga. Wu golongaa ti wɛ, ta ti yengei wielɔ a kohunɛɛ; wuii goloilɔ ti wɛ, ta ti yengei wie a ndiinyani lɔ, tawao na ɛɛ wu nafa. 18A yɛ a Ngewɔ vɛli mu va tuuŋ. Mu kɔɔlɔ vulii pandawanda kɛ mu hinda nyamu wova gbi ii na aa yɛ wu lii mɔnɛma, ajifa ma hindei yeepɔnɛi lɔ wie watii gbi. 19Nyaa wu manɛnɛma vulii a kɔnɛkɔnɛ wu Ngewɔ vɛli kɔɔ i nya yama gbɔma wu gama hugutungɔ. 20Ngewɔ i pienga mu Lemɔi Yesu na mbalangɛisia ti Mahugbemɔ Wai a ngie i vulunga i hiyenga hee hu ajifa i ta yekpe gbuani a saa i haa, yeehɛi na i kalɛ wuaa kunafɔ hinda yangilingɔi hu. Ngewɔ na a ndiilɛli ve mu wɛ i hani yekpe gbi ve wu wɛ wu gbewengɔ fa aako wu ngi liima hindei wie, tawao Yesu Kristi sabui hu, i ngi liima hindei wie mu hu. Tato i yɛ Yesu Kristi ma kunafɔ kɛɛ kunafɔ va! Amiina. 22Nya mbaa Kristimableisia, nyaa wu manɛnɛma kɔɔ wu ndahii ji mɛni vulii a ndii yekpe; gbamaile kɔlɛi ji ngi nyɛinga wu gama hu ii guhani wa. 23Nya longɔ wu kɔɔ kɛ ti mu ndewei Timoti gbuanga kpindiwɛlei bu. I humbungaa a wa mbei, mua ta lɔ ma wa wu gama. 24Ma va wu lokulɔisia gbi ma kɛɛ Ngewɔbleisia kpɛlɛɛ. Mu mbaa Kristimablei nasia Italiblaa a tie tiaa vama wu ma kaka. 25Ngewɔ i ngauwanda gɛ a wu kpɛlɛɛ.

AMAZING GRACE BIBLE INSTITUTE