ƐFISƆSBLƐISIA


ƐFISƆSBLƐISIA 1

1Nya Pɔɔl, nya i nɛni Ngewɔ wɛ i nya yɛni a tomɔ Yesu Kristi va, nya mia ngi kɔlɛi ji nyɛima Kristimablei nasia gama ti ɛfisɔs, nasia tɛɛ wote jifa ti wilingɔ hu tia Yesu-ni: 2Mu Kɛkɛ Ngewɔ kɛɛ Ndemɔi Yesu Kristi ti wu gɔ a ngauwanda kɛɛ ndiilɛli. 3A mu siɛgbua Ngewɔ ma jifa kia mua Kristi-ni mu wilingɔ hu, i ngelegoohu gbekpeyɛi yeelasii kpɛlɛɛ wienga a mue mu yafeisia. 4Pɛiŋ bɛɛ wɔɔ dunyei i yaa gbatɛ, Ngewɔ i loko longa wɔɔ mu ma yɛva a ngi woo, a ji mua Kristi-ni ma wili hu aako mu jiayii i yɛ sɛwɛsɛwɛ Ngewɔ yaama, tawao jumbu gbi aa yɛ mu ma. Ndomɛi va Ngewɔ pieni a mue, 5hugbatɛngɔ yɛla ngi lii hu mu woteva a ngi leengeisia Yesu Kristi sabui hu, ji lɔ nɛngɔ yɛla ngi wɛ pieva. 6Na a pielɔ tato i yɛ Ngewɔ ma ngi yauwanda wai va i pieni a mue gbaama, ngi Hindoloi sabui hu, na ngi langɔ la. 7Jifa Kristi i haani krɔsii ma, i mu wumawonga a ngi ŋamɛi tawao Ngewɔ i gbenga mu jumbuisia ma. Ngewɔ yauwandei ya wɔlɔni ma kpa; 8na ya wɔlɔngɔ wa i pieni a mue a ngi nɛmahu gbi kɛɛ ngi hinda hugɔɔlei. 9Ngewɔ i na wieilɔ i yɛ ngi lii hu, i hinda hugbatɛngɔ lɔwungɔi na hugɛ a mue i yɛ ngi lii hu pieva a Kristi loko. 10Yeehinda hugbatɛngɔi na Ngewɔ a ngakpua lɔ ji yeewatii a hiti, ta mia a ngi gbatɛ-hani kpɛlɛɛ lɛla ma hinda yila; hani gbi ti ngelegoohu kɛɛ dunyei hu, i Kristi yɛ a ngui ti mahu. 11Hindei gbi a wielɔ kia i Ngewɔ lii hu kɛɛ kia i hugbatɛni la; tawao Ngewɔ i loko loilɔ mu ma yɛva a ngi nungeisia, mua Kristi-ni mu wilingɔ hu kia i yɛ ngi lii hu pieva pɛiŋ wɔɔ i yaa hani gbi gbatɛ. 12Mua, mua yese mu liiloni Kristi ma. Kɛɛ i loko loilɔ mu ma aako mu tato ve Ngewɔ wɔlɔyei wɛ. 13Wua bɛɛ wu woteilɔ a Ngewɔbleisia ji wu ngowili yeetɔnyangɔi mɛnini, Ngowili Yekpei na i pieni Ngewɔ i wu bawoni. Wu lailɔ a Kristi tawao Ngewɔ i ngi lokowoi wuilɔ wu ma yɛva a ngi woo a ji i ngi Yafei na veni wu wɛ i Lahei wumbuni fa. 14Ji mu Ngewɔ Yafei majɔɔnga, mu langa la kɛ ma na majɔɔlɔ Ngewɔ i Lahei wumbuni feva ngi nungeisia wɛ, tawao a pielɔ mu la la kɛ Ngewɔ a nasia gbualɔ yɛlɛŋ nduwɔyahu ngi woo a tie. A mu ngi wɔlɔyei lato! 15Sabui ji va lɔ i hiye watii ma ngi mɛnini kɛ wu langɔe a mu Lemɔi Yesu Kristi, tawao wu longɔ a Ngewɔbleisia kpɛlɛɛ, 16ngi yaa lɛɛvui a siɛgbuala Ngewɔ ma wu va. Nga wu laa gɛlɔ ji nga yɛ Ngewɔ vɛlima 17tawao nga mu Lemɔi Yesu Kristi ngi Kɛkɛ wɔlɔngɔ wai manɛnɛ aako i ngi Yafei ve wu wɛ, yee-Ngafei i pie wu nɛmahu i lewe, i Ngewɔ gɛ a wue, aako wu tɔnyɛi gɔɔ kɔloongɔ ngi ma. 18Nyaa ngi vɛlima gbɔma kɔɔ wu nɛmahuisia ti lawo tɔnyɛi na gɔva gbalauŋ a gbua Ngewɔ gama aako wu hani na gɔɔ i wu lolinga kulɔgbeva, kɛɛ kabande gbekpeya gboto wai na Ngewɔ i Lahei wumbunga feva ngi nungeisia wɛ, 19kɛɛ ngi gbayei huleweni kpa i yengema mu hu, mua mu langɔ a Kristi. Yeekpekpeya yakpei ji i yengema mu hu ti yakpe tia kpaya wai na 20Ngewɔ i Kristi wuni la hee hu, i ngi hei ngi yeja gakei ma ngelegoohu. 21Ngewɔ Kristi yɛlɔ a maha, ngi lewengɔ polouŋ mahubleisia gbi ma kɛɛ nasia kpaya wuangɔ ti yeya, kɛɛ tomableisia, kɛɛ mahawaisia tawao i leweni toma-biyɛi yeekpayei ma i dunyeihu kɛɛ na poma. 22Ngewɔ i hani kpɛlɛɛ wuailɔ Kristi bu, kɛ i ngi wotɛnga a ngui hani gbi mahu sɔsii va. 23Sɔsii i yɛni a Kristi gbuhɛi lɔ, tawao sɔsii lɔ i Kristi yakpuani, Kristi na i hani kpɛlɛɛ yakpuani dunyei hu gbi.


ƐFISƆSBLƐISIA 2

1Bi wiengɔ kia haamɔ Ngewɔ yaama, ajifa wu gangani a Ngewɔ, wa jumbu hindeisia wie. 2A watii na, wu jiani a pele na lɔ hinda nyamublaa ti jiama la; wu golongɔ yɛla ngafa nyamui nasia ti hinda gbi ti maha nyamui wɛ, ngafei na i yengema kiahuna a nungei nasia ti gangangɔ a Ngewɔ. 3A tɔnya kia ti na, hii wɔɔ mu gbi mu yɛ na, ma lewe a mu nyɛkɛ gbuala, ma hinda gbi lekee wie mu gbuhɛisia liilɛliva kɛɛ mu nɛmahuisia. Kia lee nungaa gbi ti na, Ngewɔ i liileweilɔ huɛɛŋ mu ma jumbui va. 4Kɛɛ Ngewɔ manumangɔ waa le, tawao ngi longɔ waa a mue, 5faale kia bɛɛ mu haangɔ Ngewɔ yaama yɛla jifa mu gangangɔ a ngie, ji mua Kristi mu wilingɔ hu i mu vuluilɔ i mu wumbu hee hu. Ngewɔ yauwandei wooma mia wu bawonga. 6Jifa mu wilingɔ hu mua Kristi-ni, i mua tieni wumbuilɔ hee hu i pie mu yɛ ngi mahayɛi ma ngelegoohu. 7I ji wieilɔ aako watii gbi va ngi yauwanda hulewengɔ wai i gɛ, kɛɛ ndomɛi na va i pieni a mue Yesu Kristi sabui hu. 8Gbamaile Ngewɔ yauwandei wooma mia wu bawonga mu lalei va a Kristi, wua yekpe wu wiehindeisia va ii le, aako numu gbi aa lawo. 10Ngewɔ mia mu gbatɛni, tawao Kristi sabui hu, i mu gbatɛnga ngenge yekpei nasia wieva lɔ i hugbatɛni mu va a ngova pieva. 11Wua ti wu leni Juublaa yaa wue, Juublaa ta wu loli a “pɔnɔblɛisia” ta tia yekpe loli a biliblɛisia, jifa ta ti luwui lewe ma. A gili gbɔɔ wɔɔ a wue. 12A watii na wuii yɛ Kristi gɔɔ. Hotangaa lɔ wɔɔ a wue, wu gba Ngewɔ nungei nasia ma i ti wumbuni. Wuii yɛ Ngewɔ hinda yangilingɔi nasia ma toongɔ laaheisia ma i mbumbuni ngi nungeisia gama, wu yɛlɔ na dunyei hu wu liiloma gbi ii na, tawao wuii yɛ Ngewɔ gɔ. 13Kɛɛ kiahuna na, wua Yesu Kristi-ni wu wilingɔ hu, wua wɔɔ wu maguhangɔ polouŋ a Ngewɔ, i wu lalangaa gbla jifa Kristi i woteni a saahanii i haa. 14Gbamaile Kristi vulii i wanga mu wɛ a ndiilɛli a ji i Juublaa tia nasia Juublaa yaa tie yɛnga a numu yila. A ngi gbuhɛi vulii lɔ i pɛlɛ-bondɛi na woloni la, na i ti luahu gɔlɛngɔ wɔɔ, kɛ ndiimanyamu wuaangɔ ti luahu. 15A ngi haalei i Juubleisia ti jawei gbuɛilɔ kɛɛ yeesawa mumuisia aako i kɛnyɛ felei jisia wote a numu nina yakpe tia tieni ti wilingɔ hu, kɛ i ndiilɛli wuaanga ti luahu. 16Hee na Kristi pieni krɔsii ma, ta lɔ i ndiimanyamui gbɔyɔni ti luahu; yeehee na mia i kɛnyɛ felei jisia wɛlɛni hu, i ti yɛ a numu gbuha yila, i yama a tie Ngewɔ gama. 17Famia Kristi i wailɔ i Ngowili Yekpei le wu ma kɔloongɔ ndiilɛli ma numui gbi va, wua Juublaa yaa wue wu maguhangɔ yɛla a Ngewɔ, kɛɛ Juubleisia, ti magutungɔ a ngie. 18Kristi sabui hu lɔ mu kpɛlɛɛ, Juublaa kɛɛ nasia Juublaa yaa tie ma gu a wala mu Kɛkɛ Ngewɔ gama ngi Yafei gbayei hu. 19Faale naa, wua Juublaa yaa wue wuii yɛni gbɔma a hotangaa; wu mbaa taalingaa lɔ a Ngewɔ nungeisia, wua tieni kpɛlɛɛ Ngewɔ leengeisia a wue. 20Wua bɛɛ wu wiengɔe kia pɛlɛ na. Tobleisia tia tutuisia lɔ ti kpujani, tawao yeendiihu ngajei vuilɔ a Yesu Kristi! 21Ta lɔ i houni pɛlei kpɛlɛɛ ma, a pie ti lo yeepɛlei loma i wote a pɛlɛ magayemangɔ Ndemɔi gɔɔma. 22Wua bɛɛ wua Kristi-ni wu wilingɔ hu, a wu makpɔlɔ wua Ngewɔblaa wekɛisia gbi i wu wote a pɛlei na Ngewɔ Yafei a yɛ mbu.


ƐFISƆSBLƐISIA 3

1Sabui ji vamia, nya Pɔɔl, nga hɛɛ wu va, kia bɛɛ kpindiwɛlɛbumɔ a nge Yesu Kristi va, wua wu va Juublaa yaa wue. 2Pɛiŋ ngi ya li gulɔ, i laailɔ leiŋ kɛ Ngewɔ, ngi yauwandei hu, i ngengei ji venga nya wɛ kɔɔ ngi pie wu gbekpeyei va. 3Ngewɔ i ngi hugbatɛ lɔwungɔe hugɛilɔ a nge, kia ngi nyɛinga sange. 4Tawao wu na gaangaa ngi nyɛini, wa gulɔ a na gɔla ngi kɔɔngɔ kɔlooni Ngewɔ hinda lɔwungɔi na ma Kristi i ngayengema. 5Wɔɔ ta, Ngewɔ ii yeehinda lɔwungɔi ji magɛni a nuuvungaa kɛɛ kiahuna i pienga ngi Yafei i hugɛnga a kayema looblɛisia kɛɛ ngi lutuisia. 6Yeehinda lɔwungɔi a ji lɔ kɛ Ngowili Yekpei i pienga nasia Juublaa yaa tie tia Juubleisia ti gbɔnga Ngewɔ lubeisia ma; ti yɛni a Kristi gbuha yakpei lɔ, ti gbɔngɔ hani na ma Ngewɔ i Lahei wumbuni fa, Yesu Kristi sabui hu. 7Ngewɔ pienga ngi yɛnga a ngengemɔ ngowili yekpei va a ngi yauwandei hu we, na i feni mbɛ gbama, a ngi gbayei yengeihu wɛ. 8Numui na Ngewɔbleisia kpɛlɛɛ ti lewengɔ ngi ma, i leweni nya ma; na hu gbi nya lɔ Ngewɔ i ngauwandei ji veni nya wɛ liva nasia Juublaa yaa tie gama a Ngowili Yekpei kɔlooni Kristi gbatɛ wai na ma tɛɛ gu a mbugɔɔla; 9tawao gbɔma ngi fasai numui kpɛlɛɛ gama kia Ngewɔ a yee ngi hinda hugbatɛngɔ lɔwungɔi yayenge. Ngewɔ na hani gbi gbatɛni, i ngi hugbatɛ lɔwungɔi lɔwuilɔ foo gboto lewengɔ kpɛlɛɛ va wɔɔ, 10aako sɔsii sabui hu, malikei yeemahangeisia tia ngafa nyamui nasia ti na ti ngi nɛmahulewei yeelasii kpɛlɛɛ gɔɔ. 11Ngewɔ i ji wieilɔ kia lɔɔ wɔɔ dunyei lɔtomɛi i hugbatɛni pieva, tawao i pieni a mu Lemɔi Yesu Kristi loko lɔ. 12Jifa mua Kristi-ni mu wilingɔ hu tawao mu langa a ngie, ma ndiigba jɔlɔ liva Ngewɔ gɔɔbu, mu kɔɔngɔ kɛ a wololɔ mu ma. 13Faale nyaa wu manɛnɛma, waa yɔkɔ jifa kpalɛ i lama nya ma wu va; ji kpɛlɛɛ i wiemaa aako wu nafa. 14Sabui ji va lɔ kia ngi ji kpɛlɛɛ lenga nga gula lɔ mu Kɛkɛ gɔwɔbu, 15na a hani gbi gɔ ti ngelegoohu kɛɛ dunya a ndɛvui. 16Nyaa Ngewɔ manɛnɛma kɔɔ i pie ngi Yafei i kpaya gbua ngi wɔlɔya wai hu i fe wu wɛ aako wu yafeisia ti gbaya, 17tawao nyaa Ngewɔ vɛlima ngɛɛ i pie Kristi i hei wu liisia hu kia wu langɔ a ngie. Nyaa Ngewɔ vɛlima ngɛɛ wu gbɔku ndoma hu, tawao i gbaya wu liisia hu, 18aako wua Ngewɔbleisia gbi wu kpaya majɔɔ Kristi lomɛi yawɔlɔyii hugɔva gbalauŋ kɛɛ ngi guhayii kɛɛ ngi wungɛi kɛɛ ngi hubɔyii. 19Ngewɔ i pie wu Kristi lomɛi gɔɔ, kia bɛɛ numu ɛɛ gu aa kpɛlɛɛ gɔɔ, aako wu gbua vulii a Ngewɔ. 20Ngewɔ na, ngi gbayei i yengema mu hu, a gulɔ i na wie kpotongɔ kaka tewengɔ polouŋ na ma ma ngi mɔlila ɔɔ ma gilila, 21Yesu Kristi kɛɛ Ngewɔbleisia ti mbɛlɛya ve Ngewɔ wɛ watii gbi va, kunafɔ kɛɛ kunafɔ. Amiina.


ƐFISƆSBLƐISIA 4

1Faale ngi wu manɛnɛ, nya nya Pɔɔl, ngi kpindiwɛlɛ bu jifa Ndemɔi yengemɔ a nge, a luva a tuvei na i yɛ Ngewɔ nɛmahu jii wu lolini. 2A wua yekpe mayei tawao, wu makɛngɔ i yɛla kpele gbi, tawao ndiihou i yɛ wu wɛ. A ndoma gɛ wu hinda i gu wu nyɔunyɔ hu. 3A lapi a wu sɔbɛ gbi yɛva ngoyilɛi na hu Ngewɔ Yafei i hugbatɛnga, a ji wa hei ndiilɛli na hu i wu yɛnga a numu yila. 4Kpuha yakpei mia a mue tawao Ngewɔ Yafei i yakpe, kia lɔɔ liiloma yakpei na Ngewɔ i mu lolinga kulɔgbeva. 5Ndemɔi yakpe, lalei yakpe, nguɛi na i yakpe ti mu wuani la Ngewɔ biyei hu; 6Ngewɔ yakpe taa Kɛkɛi nuuvu kpɛlɛɛ va, na Ndemɔi le nungeisia kpɛlɛɛ mahu, a yenge a numui gbi tawao, i numui kpɛlɛɛ hu. 7Mu gbi a ngilangila, mu mboya hanisia majɔɔnga kia Kristi i kɔɛkɔɛini mu ma. 8Kia Ngewɔ Gɔlɛi i ndeni la yɛ, “Ji i yɛ lɛma ngeleima, i liilɔ a kɔhou gboto waa; i mboya haningaa gɔɛkɔɛilɔ nuuvungaa ma.” 9Gbɔɔ “i lɛilɔ ngelemahu” yeembui le i gbua ji ma i yeilɔ gbɔma ndɔu. 10Faale ta lɔɔ i yeini ndɔu, talɔ gbɔma i lɛni polouŋ ngelemahu, aako i yɛ hani gbi hu dunyei hu gbi. 11Ta lɔ i mboya haningaa venga nuuvungaa wɛ gbama; i kpaya veilɔ mu lɛɛnga wɛ yɛva a toblaa, i kpaya ve pekeisia wɛ yɛva a Ngewɔ lutungaa, i kpaya ve ti lɛɛngaa wɛ ta lewetewe ta Ngowili Yekpei le, yeenasia ti yɛngɔ a sɔsii mahublɛisia kɛɛ kaamɔngaa. 12I ji wieilɔ aako i Ngewɔbleisia gbi magbatɛ Kristi yengei va kɔɔ mu Kristi gbuhɛi lo. 13Faale na, mu kpɛlɛɛ ma lɛlɔ ma mu yɛ a numu yila mu layii hu a Ngewɔ kɛɛ ngi Hindoloi gɔlɛi; ma wotelɔ a numu lakpangɔngaa, mu wiengɔ kia Kristi na. 14Na wiengaa muɛɛ yaa wie kia ndopongaa, ndɛi nasia numu wɛlɛbleisia ta nungaa gaa la ti yakava, taa wu hɔwɔhɔwɔ la hu kia viivii tia njavei ta pie a ndɛndɛ mumuisia. 15Kia na aa wie, mu yɛngaa a tɔnya le, mu lo a mu nyɔunyɔ, ma lakpalɔ a pele gbi mu wie kia Kristi, na sɔsii yeengui a ngie. 16Ta lɔ i pieni ngi gbuhɛi yeemahakɛisia gbi ti looni nga pandaa, yeengila i ngi nda yɛmɛi. Yeehakɛi kpɛlɛɛ ti yengengaa pandawanda a leenga kia mahoungɔ yeengila gbi i ngi nda yengei wie la, kpuhɛi gbi a loolalɔ kia nungeisia ta lo a ti nyɔunyɔ. 17Nyaa naa wu laahima kpɔtukpɔtu a Ndemɔi gbayei ngɛɛ waa yaa luva kia nungei nasia tii Ngewɔ gɔɔ ta pie, nasia tɛɛ gili a hinda yekpe gbi kɛlee baabaa hindeisia, 18tawao nɛmahu gbi ii ti ma. Ti nda gbi ii ndɛvu ninɛi na ma Ngewɔ a fe nungaa wɛ jifa tii gbɛogbɛ gɔɔ tawao ti woohu gbɔndangɔ. 19Tɛɛ yaa wufe kulo bɛɛ; gbɛogbɛ ii gbeweni ti ma kɛlee pie nyamu hindei, ta manɔhɔ hindei yeelasii gbi wie kɛlɛma ii ma. 20Kɛɛ na ii le taa wu gaa la kɔloongɔ Kristi ma! 21Wu ngi hinda humɛninga vulii tawao kia ngi woomablaa a wue, ti wu gaailɔ a tɔnyɛi na i Yesu Kristi hu. 22A gbe wu luvayii wovei na ma i yɛ pie wa hinda nyamui nasia wie, wu luvayii wovei na i yɛ wu nyani, a ji i yɛ pie hindei nasia ta numu yaka yeemani a wu lɔ. 23Mahoungɔe vulii ndii nina kɛɛ nɛmahu nina ti yɛ wu hu, 24tawao mahoungɔe wu tuva nina wumbu na Ngewɔ kpatɛni kɔɔ i wie kia i na, pɔɔnahu kɛɛ kayemahu a tɔnyahu we. 25Faale a gbe ndɛɛ gulalei ma, numu gbi i yɛ a tɔnyɛi le ngi mbaa Kristimamɔi ma ajifa Kristi gbuha yakpei yeemahaakɛisia lɔ a mue. 26Wu lii i lewengaa, waa luma wu liilewei aa wu lo jumbu hinda wiema; tawao waa luva kpɛiŋ yeendilewei hu. 27Waa pele ve Seitana wɛ pieva wu jumbu wuli. 28Numu na wɔɔ ngi hɛlɛngɔ a humɛi, mahoungɔ i gbe humɛi ma, i tɔtoo a ngengei na wiela a navoo jɔɔ hu pɔɔna hu ngi mahindeisia va kɛɛ gbɔva fɛɛliblɛisia ma. 29Waa njia nyamu le numu ma kɛlee njɛpɛi nasia ta kpɔma wie, njɛpɛi nasia nyɔkɔ ta hinda hugbatɛ nungaa ti gbewengɔ fa aako na wa nde i kpekpe wie a nasia ta wu woi mɛni. 30Waa Ngewɔ Gayema Yafei lii nyani; ajifa Ngewɔ Yafei lɔ Ngewɔ lokowoo le i wu ma kɛva kɛ ngi woo lɔ a wue haaŋ i to mbayoya voloi ma. 31A gbe ndiimanyamui gbi ma kɛɛ ndiimavulɛi kɛɛ ndiilewei. Waa yaa lumbe, waa numu yɛli, tawao waa kili nyamu wumbu numu gbi va. 32Kia waa na kpɛlɛɛ wie, a hindawanda wie a wu nyɔunyɔ, wu nasia mamamau lɔ hinda nyamu a ti wie, wu manu wu nyɔunyɔ ma, kia Kristi i pienga Ngewɔ i maanunga wu ma.


ƐFISƆSBLƐISIA 5

1Faale naa, kia Ngewɔ liima leengeisia a wue, mahoungɔe vulii wu lapi aako wu wiehindeisia ti gbua a ngi ndei. 2Mahoungɔ ndoma i jia a wue hinda gbi hu wu lɛɛvui hu, kia lɔɔ Kristi i loni a mue, i ngi lɛɛvui ve a saahanii gu nɛnɛɛ na nɛngɔ Ngewɔ wɛ. 3Jifa Ngewɔ nungeisia a wue, puegbua hinda ɔɔ manɔhɔ hinda ɔɔ mani nyamu wiela nungaa ti yeya-hanisia ma, maa ii houni kulo bɛɛ ndaa gɛva vulii bɛɛ wu lia. 4Tawao maa ii houni wu loko wili ngufeba yɛpɛ lela hu ɔɔ baaba yɛpɛ ɔɔ ndawɔ yɛpɛ. Kia waa na wie, a ya a siɛgbua Ngewɔ ma. 5A la la kɛ numu gbi lekee a puegbua hindei wie ɔɔ manɔhɔ hinda ɔɔ a mani nyamu wie nungaa ti yeya-hanisia ma ɛɛ heima gbi jɔɔ kunafɔ mia Kristi taa Ngewɔ ta yɛ na mahayɛi ma; gbɛva hanimanimɔ wiengɔi kia numu na a vɛfɛ nɔmɔli yewɔi vɛlilei ma 6Waa luma numu gbi aa wu wɛlɛ a baabaa yɛpɛngaa; yeehindei nasia vulii va lɔ Ngewɔ a liilewe nasia ma tɛɛ golo ngi wɛ. 7Faale gbɛ-o-gbɛ aa yɛ wua numu bondɛi nasia luahu. 8Wua vulii wu yɛ wɔɔ kpindi hu lɔ, kɛɛ i hiye watii na ma wu woteni a Ndemɔi woo, wu fofoi hu lɔ. Faale mahoungɔ wu luva kia fofohublaa, 9gbamaile yeefofoi ji huvei lɔ a pie nungaa ti hinda gbi wie na kpekpengɔ, pɔɔnangɔ, tawao tɔnyangɔ. 10A lapi wu Ndemɔi liima hindei gaa wu kɔɔ. 11Waa wili baabaa hindei nasia hu kpekpeya gbi ii hu nungaa ta pie, gbɛva nasia ti kpindi hu tia mia ta yeehindei nasia wie. Kia waa na wie, a yeehindei jisia magbundɛ gula fofoya. 12Mawufengɔe hulewengɔ gbo laliva vulii hindei nasia ma ta pie ndɔwuma. 13Kɛɛ foofo i wungaa yeehindei jisia kpɛlɛɛ ma kɛ ti yɛyii yeetɔnyɛi maa i gɛnga gbalauŋ. 14Ajifa hani gbi lekee numu a gu a tɔla, foofo le. Famia ta nde tɛ: “Njiimɔi, wu, bi hiye hee hu, tawao Kristi a voolɔ i foofo wu bi ma.” 15Faale a wu luvayii mahugbe. Waa luva kia nungei nasia tii hinda hugɔɔ, kɛɛ a luva kia nɛmahuleweblaa. 16Watii gbi lekee wa gu a hinda yekpe wiela mahoungɔ wu pie, ajifa nuuvuisia ti nyamungɔe a folei ji. 17Waa yɛ a kpowablaa, a lapi kɔɔ gbɔɔ Ndemɔi longɔ la wu pie. 18Ndɔ aa wu hou, ajifa a hinda lɔ huwu lekee; kia na aa wie, Ngewɔ Yafei ta i wu laave. 19A wule wu nyɔunyɔ gama ngulei nasia ti Saam Gɔlɛi hu kɛɛ Kristimableisia ti wuleisia; a Kristimableisia ti wuleisia yaa kɛɛ Saamisia kɛɛ ngulii nasia Ngewɔ Yafei a kɛ, a wu lii gbi siɛgbuava Ndemɔi ma. 20Mu Lemɔi Yesu Kristi biyɛi hu a siɛgbua mu Kɛkɛ Ngewɔ ma kpele gbi hindei gbi va i wiema. 21A wuaa wu nyɔunyɔ bu mbɛlɛhei na gɛva i wu yeya Kristi va. 22Hiniblɛisia, a wuaa wu hiningɛisia bu, bi tɔngaa bɛɛ Ndemɔi mia wu wuama ngi bu. 23Gbamaile hinii lɔ kpaya i ngi wɛ nyahɛi maahu kia lɔɔ kpaya i Kristi wɛ sɔsiblɛisia maahu; tawao Kristi na ngi gbuhei a sɔsiblɛisia ta vulii lɔ i sɔsiblɛisia bawoni. 24Faale mahoungɔe hinimɔ gbi i golo ngi hinii wɛ kia sɔsiblɛisia ti golongɔ Kristi wɛ. 25Nyahamɔi, lo a bi nyahɛi a ndomɛi na nyɔkɔ Kristi i piengɔ a sɔsiblɛisia gbi, i ngi lɛɛvui ve ti va. 26I ji wieilɔ kɔɔ i sɔsiblɛisia wua fo a njɛi kɛɛ Ngowili Yekpei; 27aako i sɔsiblɛisia ve ta yekpe wɛ kia numui na, nyandengɔ waa tawao mbɛ gbi ii ngi ma. 28Mahoungɔe hingeisia ti lo a ti nyahangɛisia kia ti longɔ a tia yekpe ti gbuhɛisia. Hindoi na ngi longɔ a ngi nyahɛi ngi longɔe a ta yekpe. 29Numu gbii na aa lolo a ta yekpe ngi gbuhɛi. Kia aa na wie, a ngi gbuhɛi makɛlɔ a mɛhɛɛ, a mahugbe, kia lɔɔ Kristi a pie a sɔsiblɛisia, 30ajifa ngi gbuhɛi yeemaahakɛisia lɔ a mue. 31Kia Ngewɔ Gɔlɛi i ndeni la yɛ, “Sabui ji va, hindo a ngi kɛkɛ lolɔ kɛɛ ngi nje i vɛfɛ ngi nyahɛi ma, kɛ ti veengɔ ti yɛnga a numu yila.” 32Tɔnya hubɔngɔ lɔwungɔ lɔ hugɛngɔ Ngewɔ Gɔlɛi ji hu, tawao ngi kɔɔlɔ kɛ kɔlooni Kristi kɛɛ sɔsii lɔ ma. 33Kɛɛ kɔlooni wua bɛɛ lɔ ma: mahoungɔ nyahamɔ gbi i lo a ngi nyahɛi kia ngi longɔ a ta yekpe tawao mahoungɔ hinimɔ gbi i baa gɔɔ waa ngi hinii ma.


ƐFISƆSBLƐISIA 6

1Ndeengɛisia, kpa le wu ma na gbi wieva wu leblesia ta nde wu ma pieva ajifa Ndemɔi woomia a wue, tawao namia pɔɔnangɔ pieva. 2Sawei kpɛlɛɛ Ngewɔ i feni Mojisi wɛ yeehaalayei lɔ Lahei langɔ ma, i ndeilɔ yɛ, “Bagɔɔ bi kɛkɛ ma taa bi nje, 3aako hindei gbi i nɛɛ bi ma tawao bi lɛɛvui hu i guha dunyei hu.” 4Ndolebleisia, waa hinda wie a wu leengeisia a pie ti lii i lewe. Kia waa na wie, a ti makɛ a pelei na mahoungɔ Kristimamɔ i pie, wu ti gaa a na mahoungɔ ti pie. 5Nduwɔngeisia, a golo wu luwɔkɛisia wɛ, nduwahu kɛɛ magbɛlihu; tawao a pie a ndiigole bi tɔngaa bɛɛ wu piema Kristi lɔ wɛ. 6Watii na wu luwɔkɛisia ta yɛ wu gbema yeewatii lekee ii le waa yɛ ngenge yekpe wiema aako ti wu lato; kɛɛ a yɛ a na wie Ngewɔ longɔ la a wu lii gbi kia Kristi luwɔngaa. 7A wu luwɔyengei wie a kohunɛ bi tɔngaa bɛɛ wu yengema Ndemɔi lɔ wɛ, nuuvungaa gbama ii le. 8A la la kɛ Ndemɔi a numu gbi pawalɔ ngenge yekpei na va a pie, i yɛ a nduwɔ ɔɔ ii yɛni a nduwɔ. 9Nduwɔkɛisia, hii mahoungɔ wu wu luwɔngɛisia hou kpekpengɔ; wu gbe a ti huluwala. I yɛ wu nɛmahu kɛ Ngewɔ na ngelegoohu ngi woo lɔ a wua kɛɛ wu luwɔngɛisia tawao mu gbi mu gbɛmboyii i yakpe, Ngewɔ ɛɛ topooma wie. 10Gbɛɛ ngi kɔlɛi ji gɛlɛ a ndela ngɛɛ, wu gbayei i lɛ gulɔma Ndemɔi ngi gbaya wai hu. 11A wu mayili a kɔhakei nasia kpɛlɛɛ Ngewɔ a fe wu wɛ aako wu gu a lapila a kaaso nyamui nasia Seitana a nungaa wɛlɛ la. 12Gbamaile muii lapima a nuuvungaa; mu lapima a ngafa nyamui nasia lɔ ti na hinda gbi, yeemahangeisia kɛɛ yeekpaayablɛisia kɛɛ ngafangei nasia nungaa ta hɛɛ ti ma a watii ji mu hu kia kpindi. 13Faale a wu mayili a kɔhakei nasia Ngewɔ fenga wu wɛ wu mahugbeva. Aako yeefolo nyamui nasia ti gbuangaa, wuɛ yama a wooma we ji wu gɔnyamui a gbundɛ wu ma; tawao yeendapi na i gɛlɛngaa, wa gulɔ huɛɛŋ a loola kpaukpaungɔ. 14Faale a loo kpakpaungɔ wu magbatɛngɔ i yɛla, wu lia yilingɔ a tɔnyɛi, pɔɔnɛi yɛngɔ a kɔlu-lɛɛvɛ i wɛlɛni wu liimɛi, 15tawao wu gɔwɔhu gɔwɛi i yɛ a magbatɛi na wa yɛ hu Ngowili Yekpei leva kɔlooni ndiilɛli ma. 16Watii gbi lalei hou yeya kia kɔvɛlɛi na; ajifa i yɛngaa wu yeya, ndikpa gbandi-gbandi nasia Seitana a pili wu ma wa gulɔ a ti huhoula la, tɛɛ foo wu ma. 17Tawao wu mbayoyei gulu wu pɛlɛ wumba a bɔlei, kɛɛ Ngewɔ Yiɛi i yɛ a kɔbolei na Ngewɔ Yafei a fe wu wɛ. 18A ji kpɛlɛɛ wie, wa Ngewɔ vɛli Tuuŋ, wa ngi gbɔmi huvɛli. Wu yaa hinda gbi wiema a Ngewɔ vɛli a pelei na Ngewɔ Yafei a kɛ. Faale gbɛogbɛ i wie, waa gbe a Ngewɔ vɛlila waati gbi, tawao a yɛ a Ngewɔ vɛli Tuuŋ Ngewɔ nungeisia kpɛlɛɛ va. 19A Ngewɔ vɛli nya bɛɛ va aako i yɛ a ngowili wu nya laa ji nga lo ngi yɛpɛ aako ngi yɛpɛ a ngaulewe, ngi pie nungaa ti hinda lɔwungɔi na gɔɔ Ngowili Yekpei i hugɛnga. 20Ngowili Yekpei ji va, Yesu Kristi yaamei lɔ a nge kia bɛɛ ngi kpindiwɛlɛ bu kiahuna. A Ngewɔ vɛli aako ngaulewe i yɛ nya hu ngowili yekpei leva kia mahoungɔ ngi ndela. 21Mu mbaa Kristimamɔi Taikikɔsi, na mu longɔ la tawao Ndemɔi yengemɔ yekpe waa a ngie, a nya mavaa gbi gɛlɔ a wue, aako wua bɛɛ wu nya yɛyii gɔɔ. 22Na vamia ngi ngi loma wu gama aako i mu kpɛlɛɛ mu yɛyii hugɛ a wue, i yama i wu lii gba. 23Mu Kɛkɛ Ngewɔ kɛɛ mu Lemɔi Yesu Kristi ti Kristimableisia kpɛlɛɛ gɔ a ndiilɛli kɛɛ ndoma kɛɛ lanaya. 24Ngewɔ i ngauwanda ve nasia gbi wɛ ti longɔ a mu Lemɔi Yesu Kristi a kunafɔ lomɛi. Amiina.



AMAZING GRACE BIBLE INSTITUTE