KƆLƆSIBLƐISIAKƆLƆSIBLƐISIA 11Nya Pɔɔl, nya i nɛni Ngewɔ wɛ nya yɛva a tomɔ Yesu Kristi va, nya mia ngi kɔlɛi ji nyɛima mua mu ndewei Timoti, 2Ngewɔ nungei nasia gama ti heini Kɔlɔsi laa wai hu, ti yɛngɔ a mu mbaa Kristimablei nasia ti langɔ a Kristi, jifa ti wilingɔ hu tia Kristi-ni. Mu Kɛkɛ Ngewɔ i ngauwanda gɛ a wue i wu gɔ a ndiilɛli. 3Ma siɛgbualɔ mu Lemɔi Yesu Kristi ngi Kɛkɛ ma watii gbi ma yɛ Ngewɔ vɛlima wu va, 4ajifa mu mɛninga kia wu langɔ a Yesu Kristi kɛɛ kia wu longɔ a Ngewɔ nungeisia. 5Watii na Ngowili yeetɔnyangɔi, na Ngowili Yekpei le, i foni wu ma haala, yeewatii mia wu hani yekpei na hinda humɛnini wu lii i ma majɔɔva. Faale wu lalei a Kristi kɛɛ wu loyii a Ngewɔmableisia ti gbuani na hu lɔ wu kulɔgbema; tawao yeehanii na lamagbatɛngɔe pandaa ngelegoohu. 6Ngowili Yekpei lɔ tuuŋ piema kpekpeya a wa nungaa gama tawao taa lekee vayama dunyei hu gbi, kia lɔɔ i vayanga wu maahu i hiye folei na ma wu Ngewɔ yauwandei hinda humɛni, tawao wu ngi yɛyii yeetɔnyɛi gɔɔni vulii. 7Ɛpafras lɔ i ji hinda hugɛni a wue, mu liima yengemɔi na mua tieni mu yengema Kristi wɛ, a mu wooma gbewe gbua. 8I ndomɛi na hinda hugɛnga a mue Ngewɔ Yafei i punga wu lii hu. 9Sabui ji va lɔ mu Ngewɔ vɛlima tuuŋ wu va i hiye watii na ma mu wu hinda humɛnini. Mua Ngewɔ manɛnɛma aako i ngi liima hindei gɔla yeenɛmahulewe waa ve wu wɛ, kɛɛ nɛmahulewei kɛɛ hinda hugɔɔlei na gbi Ngewɔ Yafei a fe. 10Na wiengaa wa gulɔ a luvala kia Ndemɔi longɔ la, watii gbi wa ngi liima hindei wie. Wu luvayii hu, wa kpekpe laasi gbi wielɔ, tawao wu Yewɔ gɔlɛi maa a tolɔ tuuŋ. 11Nyaa Ngewɔ vɛlima aako i pie ngi gbaya gabandengɔ wai i pie wu lii i lo wu gu hindei gbi bu. Tawao a siɛgbua a kohunɛ mu Kɛkɛ ma, na i pienga wu gunga a yɛla hanii na ma Ngewɔ i ndamagbatɛnga ngi nungeisia va ngi mahayɛi na hu foofo lekee i na. 13I mu gbuanga jumbui lemayɛi yeekpindii hu, i wanga a mue ngi liima Hindoloi mahayɛi hu, 14na i mu wumawonga a ji i pienga Ngewɔ i mu jumbuisia lufenga. 15Ngewɔ na numu ɛɛ gu a tɔla, ngi gbuayei mia a Kristi na nungaa ti yɛ gu a tɔla. Ta lɔ Kplaloi le, ngi lewengɔ hani gbi ma Ngewɔ i kpatɛni. 16Gbamaile Ngewɔ i hanii gbi gbatɛni a ngi loko lɔ, nasia ti ngelegoohu kɛɛ nasia ti dunyei hu, nasia numu a gu a tɔla kɛɛ nasia numu ɛɛ gu a tɔla, kɛɛ ngafangeisia ti lunyɛi kɛɛ ndebleisia tia yeemahangeisia kɛɛ mahubleisia. Ngewɔ i ngelegoohu kɛɛ dunyei gbi gbatɛni a ngi loko lɔ tawao i kpatɛni ngi va lɔ. 17Kristi i yɛ na lɔ pɛiŋ Ngewɔ i yaa hani gbi gbatɛ, tawao ngi gbayei lɔ i houni hanii kpɛlɛɛ ma ti yɛmɛisia. 18Kristi lɔ sɔsii yeengui le na yɛni a ngi gbuhɛi; ta lɔ ndɛvui a gbua ngi gama. Ta lɔ Kplaloi a ngie Ngewɔ i ngi wuni hee hu aako ta yakpe i yɛ a hindei gbi yeekulɔmɔ. 19Gbamaile Ngewɔ vulii lɔ i hugbatɛni yɛ ngi Yewɔyɛi yeehuvɛi yɛyii gbi i yɛ ngi Hindoloi hu. 20Faale Ngewɔ Hindoloi sabui hu, ta ngi Ngewɔ i hugbatɛilɔ pieva hanii gbi ngelegoohu kɛɛ dunya ti yama ngi ma. Ngewɔ i wailɔ a ndiilɛli hee va ngi Hindoloi i pieni krɔsii ma, i hanii gbi ti dunyei hu kɛɛ ngelegoohu yama ta yekpe ma. 21Watii yila wɔɔ, wu maguhangɔ yɛla a Ngewɔ tawao ngi juwungaa yɛla a wue hinda nyamui nasia va wu yɛ pie ɔɔ wu yɛ gili la. 22Kɛɛ kiahuna na, jifa ngi Hindoloi i haani kia nuuvu na, Ngewɔ i wu yamanga na tayekpe ma, aako i pie wu loo ngi gulɔ jumbu wulo bɛɛ ii wu ma. 23Kɛɛ mahoungɔ wu yɛ a la tuuŋ a Ngowili Yekpei, wu lo kpaŋ kia pɛlei hitɛ gɔtii i na, wuɛɛ luma gbɛogbɛ aa wu loko gbenda na ma wu lii i loni ma sɔɔva ji wu Ngowili Yekpei mɛnini. Ngowili Yekpei ji lɔ nya nya Pɔɔl ngi woteni a yeengengemɔ Ngowili Yekpei ji numu laasi gboto ti hugɛnga a numu gbi dunyei hu. 24Kiahuna nya goohu nɛngɔe kpalɛisia va ti lama nya ma wu va, ajifa kpaalɛi nasia ta la nya gbuhɛi ma tia lɔ ta pie ngi kpaalɛi nasia yeemɔɔnii yakpua i lani Kristi ma Kristimableisia gbi va ngi gbuhɛi a tie. 25Tawao Ngewɔ i nya yɛnga a Kristimableisia ti yengemɔ, i yeengengei ji venga nya wɛ pieva wu gbekpeya va. Yeengengei i yɛni a ngi Wowili lelaa lɔ gbalauŋ nungaa ma, 26ta lɔ ndɔwuma hindei le i ndɔwunga wɔɔ gba nuuvui kpɛlɛɛ ma kɛɛ i magɛnga na a ngi nungeisia. 27Na i Ngewɔ nɛmahu pieva ta mia a ngi lɔwuma hindei hugɛla a ngi nungeisia, ndɔwuma-hinda gabandengɔ wai na i ngi yeya nuuvui yeelasii kpɛlɛɛ va. Tawao yeendɔwuma-hindei lɔ a ji kɛ Kristi lɔ heini wu liisia hu, tawao na a kɛlɔ kɛ wa Ngewɔ wɔlɔyei wu ndɛi majɔɔlɔ. 28Famia ma Kristi hinda hugɛ a numu gbi. Nɛmahulewei na gbi lekee i mu wɛ, ma ngayengelɔ ti laahiva kɛɛ ti gaava aako mu pie yeengila gbi i lo Ngewɔ gulɔ kia nuuvu laavengɔ, tia Kristi ti wilingɔ hu. 29Aako ji i wie, nga mɔnɛlɔ, nga lapi a Kristi gbayawai na gbi i yengema nya hu.KƆLƆSIBLƐISIA 21Gbɛɛ ngi mɔnɛ wai na hugɛ a wue ngi pienga wu va kɛɛ Laodisia lawai hubleisia va kɛɛ nungaa wekei nasia gbi tii yaa nya lɔni taa nya gɔɔ. 2Nyaa ji wiema kɔɔ ti liisia ti yɛ kpaukpau tawao ti lalagblanga ndoma hu aako ti hinda hugɔɔla gbatɛ lavengɔi majɔɔ. Ji wiengaa, ta gulɔ a Ngewɔ hinda hulɔwungɔi gɔla, na i yɛni a Kristi vulii. 3Ta lɔ Ngewɔ nɛmahulewei kɛɛ ngi hinda-hugɔlei lɔwungɔ ngi hu. 4Faale, gbɛɛ ngi ji le wu ma aako numu gbi aa wu wɛlɛ a ndɛɛ yɛpɛngaa, yeenjɛpɛisia ti gbua bɛɛ kaka a njɛpɛ yekpengaa. 5Ajifa kia bɛɛ nya gbuhɛi ii wu lia, na hu gbi nyalii lɔ wu gama, tawao nya goohu nɛngɔe ji ngi tɔma wu wilingɔ hu tawao wuɛɛ wotewote wu lalei hu a Kristi. 6Kia na wu kɔɔnga tao wu lumanga kɛ Yesu Kristi lɔ wu Lemɔi le, wua tieni wu wilingɔ hu i yɛla. 7Wa gulɔ a ji wiela a ji wa pie Kristi i hei wu liisia hu kia wu langɔ a ngie, tawao wu wu lɛɛvuisia loo ngi ma, wu lalei a ngie maa a yɛ a to, kia ti wu gaani la pieva. Tawao siɛgboto gbuala Ngewɔ ma aa baa wu la. 8A wu mahugbe hɔɔ, kɔɔ numu gbi aa wu yama gbɔma nduwɔya hu a nuuvu nɛmahulewei na ta nungaa yaka la gbama, na a gbua kaai nasia hu ndebleisia ta ndo a ti leengeisia kɛɛ dunyei yeengafangeisia, kɛɛ ii gbuani Kristi gama. 9Na gbi i Ngewɔ hu taa Kristi hu, watii bɛɛ i yɛ nuuvuya hu, 10tawao Ngewɔ i ndɛvui yeekpekpei vulii venga wu wɛ ji wua Yesu-ni wu wilingɔ hu, tawao Yesu leweni ngafangaa ti mahangeisia ma kɛɛ ti mahublɛisia. 11Ji wua Kristi-ni wu wilini hu, wu woteilɔ a biliblaa, bili na ii le nuuvungaa ta hei, bilii na le Kristi a hei, na i yɛni a mu gbualalɔ jumbu gbayei yeya. 12Ajifa watii na ti wu wuani, ti wu gbɔwuilɔ kia ti Kristi gbɔwuni la, tawao watii ti yɛ wu wuama i wieilɔ bɛɛ wu lalei a Ngewɔ gbaya wai na i Kristi wuni la hee hu i wua bɛɛ wumbunga hee hu. 13Watii yila ma wɔɔ wu wielɔ kia haablaa Ngewɔ yaama wu jumbuisia wooma ajifa Juublaa yaa a wue tawao jifa Mojisi Jawei ii wu yeya. Kɛɛ Ngewɔ i wu wunga na hee hu kia i Kristi wuni hee hu. Ngewɔ i manuilɔ mu ma mu jumbui kpɛlɛɛ va; 14i kɔlɛi na hunyaniilɔ mu wienyamuisia ti nyɛingɔ hu, kɛɛ Sawei nasia kpɛngɔ ma, i gbe gbua feu yeekɔlɛi hinda hu i kpakpa krɔsii ma. 15Ji Kristi i yɛ krɔsii ma, i ta yekpe gbuɛilɔ ngafangeisia ti mahangeisia kɛɛ ti mahublɛisia ti gbayei bu, i pie numui gbi ti ti lɔ ta to ngi ma kia kɔ-houngaa temaya vahɛi na hu ti yɛ tooni ngi ma. 16Faale, numu gbi aa sawangaa la wu yeya kɔlooni na wa mɛ ɔɔ wa kpɔli, ɔɔ Kayema voleisia va ɔɔ Ngalu Ninɛi yeekomɛisia ɔɔ Ndɛvu Volei ndɛisia. 17Hindei jisia nyɔkɔ kpɛlɛɛ ti yɛni a kulɔma hindeisia yeenɛnɛi lɔ; yeetɔnyɛi a Kristi lɔ. 18Waa luma numu gbi aa pie wu baa a wu mawaa jifa a nde yɛ i leweni nungaa wekeisia ma jifa malikangaa ti gɛnga wɔɔ a ngie, a nɔɔ nungaa tia yekpe mayeiva a ndɛɛ kɛɛ hɛɛva malikeisia ma. Yeenumui ji bonda ngi giliyii a pielɔ ngi yaama i lɛ gbama, 19tawao i gbenga a hɛlɛla a Kristi, na Kristimableisia gbi ti wui a ngie, ngi gbuhɛi a tie. Kpuhɛi na gbi i Kristi va a mɛhɛɛ jɔlɔ i gbɔvɔ, ndatɛisia ti yeehaniisia gbi hou kpaŋ ti yɛmɛisia, tawao yeekpuhɛi na a loolalɔ kia Ngewɔ longɔ i loola. 20Wua Kristi-ni wu haanga tawao wu gbuanga ngafangei nasia bu kpaya i ti wɛ dunyei hu. Gbɛe hɔɔ wu luvama bi tɔngaa bɛɛ dunyei ji woo lɔ a wue? Gbɛe wa sawei nasia nyɔkɔ hou ta nde tɛɛ, 21“Baa ji hou a loko, ɔɔ Baa na gɔɔ, ɔɔ Baa jaa a yeepekei?” 22Ji kpɛlɛɛ i yɛpɛma hanii nasia lɔ va ta nyani ji lekee numu a yenge a tie; nuuvunga lekee lɔ ti yeesawei nasia gbatɛni kɛɛ yeekaaisia. 23A tɔnya nungaa ta gililɔ tɛɛ sawei nasia bonda ti lablɛisia ti nɛmahu lewengɔe a ji ta nɔɔ nungaa ma hɛɛva malikeisia ma, ta tia yekpe mayei a ndɛɛ, ta ti gbuhɛisia goma a hanii nasia ti gbekpengɔ ndɛvui va; kɛɛ sawei jisia tɛɛ gbɔ numui na ma ngi longɔ i ta yekpe huhou hindei nasia wieva ta ngi gbuhɛi liilɛli.KƆLƆSIBLƐISIA 31Kia Ngewɔ i Kristi wunga hee hu i pienga wu ndɛvu nina majɔɔnga, faale a gbewe hanii nasia va ti Ngewɔ yeya wu va ngelegoohu mia Kristi i heini na ngi maha-heimɛi Ngewɔ yejei hu. 2A gbewe tuuŋ hanii nasia va ti mahui, waa gbewe hanii nasia va ti mbei dunyei hu. 3Ajifa piengɔe bɛɛ wu haanga, kɛɛ wu lɛɛvui yeekpekpei lɔwungɔe Ngewɔ gama, Kristi sabui hu. 4Wu lɛɛvui yeekpekpei i Kristi yeya lɔ, tawao watii na a gbua nga, yeewatii na lɔ wua bɛɛ wa gbua nga wua tieni wu gbɔ ngi wɔlɔyɛi ma. 5Mahoungɔ hɔɔ wu dunyama mani nyamui nasia waa ta wu yayenge kia nyɔkɔ: puegbuala, manɔhɔ hindei, nyaha mani, hinda nyamu wie mani kɛɛ hani-mani (ajifa hani-mani i yɛni a nɔmɔli vɛlilei yeelasii yila lɔ.) 6Hindei jisia nyɔkɔ va, Ngewɔ a kpaalɛ maluwangɔ lalɔ nasia ma tɛɛ golo ngi wɛ. 7Watii yila wɔɔ, mani nyamui jisia ti yɛlɔ wua bɛɛ vulii hu, wa pie ji wu yɛ yeemanii nasia yeya. 8Kɛɛ kiahuna na mahoungɔ wu gbe a hinda nyamui jisia kpɛlɛɛ wiela: ndiilewei, ndiimavulɛi, kɛɛ kili nyamuisia. Njia nyamu nungaa wekeisia va ɔɔ manyimi yɛpɛ aa gbua wu laa kunafɔ. 9Waa ndɛɛ guala wu nyɔunyɔ wɛ, ajifa wu gbuanga na wu yɛyii wovei hu kɛɛ hinda nyamui nasia kungɔ yɛla wu hu pieva, 10wu yɛyii nina wumbunga. Numu ninɛi ji wu yɛnga la, wu Gbatɛmɔi Ngewɔ waa lɔ piema a gbua lekee a ngie aako wu ngi hinda hugɔɔ pandawanda. 11Faale, nduahugɛ gbi ii yaa nasia Juublaa yaa tie ti luahu tia Juublaa, biliblɛisia tia pɔnɔblɛisia, ndɔlɔ weka hublɛisia, makɛvɛliblɛisia, nduwɔngɛisia kɛɛ nasia nduwɔ yaa tie, kɛɛ Kristi lɔ baama hanii le tawao numui kpɛlɛɛ hu. 12Ngewɔ nungeisia lɔ a wue; i loilɔ a wue i wu yɛ a ngi woo. Faale na, a yɛ a nungaa mamaanu lɔ, wa hinda wanda wie, wa wua yekpe mayei, wu liigɔlɛngɔ, tawao wu liilongɔ i yɛla. 13Wu wiehindei i gu wu nyɔunyɔ hu, wa manu wu nyɔunyɔ ma watii na numu yila a nyamu ga a pekei. Mahoungɔe wu manu wu nyɔunyɔ ma kia lɔɔ mu Lemɔi i manunga la wu ma. 14Tewengɔ hindei jisia kpɛlɛɛ wiela ma, a lo a wu nyɔunyɔ ajifa na lɔ a pie wu wili hu, wu lii i yɛ yakpe kia mahoungɔ i wiela. 15Ndiilɛli na Kristi a fe i na pele gɛva lɔ a wue hinda gbi hu wa pie; ajifa Ngewɔ i wu lɛnga ma hinda yila wu yɛva a kpuha yila aako wu yeendiilɛli ji yaati gɔɔ. Mahoungɔ wu siɛgbua Ngewɔ ma. 16Mahoungɔe Kristi Wowili gabandengɔ wai i yɛ tuuŋ wu liisia hu. A yɛ a wu nyɔunyɔ gaa, wu yɛ a pele wɔnɛi gɛ a wu nyɔunyɔ a nɛmahulewei. A Saam wuleisia yaa, kɛɛ nguleisia kɔlooni Kristi ma kɛɛ ngulei nasia Ngewɔ Yafei a kɛ; a yɛ a wule Ngewɔ ma, wa siɛgboto gbua ngi ma a wu lii gbi. 17Na gbi wa pie ɔɔ wa nde, mahoungɔ wu pie ɔɔ wu nde mu Lemɔi Yesu biyɛi hu kia wa siɛgbua la mu Kɛkɛ Ngewɔ ma ngi biyɛi hu. 18Hiniblɛisia, a wuaa wu hiningɛisia bu, ajifa na mia mahoungɔ wu pie kia Kristimablaa a wue. 19Nyahableisia, a lo a wu nyahangeisia, tawao waa gbandi a tie. 20Ndeengɛisia, kia Kristimablaa a wue, kpa le wu ma golova wu leblɛisia wɛ kpele gbi, ajifa na mia a nɛɛ Ngewɔ wɛ. 21Ndooblɛisia, waa wu leengeisia ti gbalɛma hinda wie; na wiengaa ti lii a nyanilɔ. 22Nduwɔngɛisia, a golo wu luwɔkɛisia wɛ hinda gbi hu, watii na lekee ii le ta yɛ wu yabɛɛma waa yɛ goloma jifa wu longɔ ti wu lato; kɛɛ a golo a ndiigole bagɔɔmɛi na va i wu wɛ mu Lemɔi va. 23Hinda gbi i yaa wu yeya pieva, a pie a wu lii gbi bi tɔa bɛɛ wu yengema mu Lemɔi lɔ wɛ, kɛɛ nuuvu va ii le. 24I ye wu nɛmahu kɛ na mu Lemɔi i ndamagbatɛnga ngi nungeisia va a wu gɔlɔ hu a mawaa. Ajifa Kristi vulii lɔ Ndemɔi le wu yengema ngi wɛ. 25Tawao Ngewɔ a hinda nyamu wiemɔ gbi pawalɔ hinda nyamui nasia va a pie, ajifa numui gbi ti gbɛmboyii i yakpe, Ngewɔ ɛɛ topooma wie.KƆLƆSIBLƐISIA 41Nduwɔkɛisia, a pɔɔna-hinda wie a wu luwɔngɛisia, waa ti gava. I yɛ wu nɛmahu kɛ numu lɔ ngelegoohu ngi woo a wua bɛɛ. 2A nɔɔ Ngewɔ vɛlila ma, tawao wu ya aa lema, wa siɛgbua ngi ma. 3A yɛ a Ngewɔ vɛli muabɛɛ va kɔɔ Ngewɔ i pele ve mu wɛ ngi Wowili na leva ndɔwungɔ wɔɔ kɔlooni Kristi ma. Gbamaile na vamia ngi kpindiwɛlei bu kiahuna. 4Faale, a Ngewɔ vɛli kɔɔ ngi gu ngi ngi Wowili ji yeembui gɛ gbalauŋ kia mahoungɔ ngi pie la. 5A nɛmahulewe wie wu wiehindei hu nasia gama tii lani a Kristi, watii gbi aa lewe wu ma kɛva a tie kɛ wua wu langɔe a Kristi. 6Mahoungɔe wu layie manɛngɔ i yɛla kpele gbi nungaa woohu nahi yeemani i yɛ a ti lɔ, tawao mahoungɔe wu kpɛmboi na gɔɔ mbɛgɔma nguava numu gbi gama. 7Mu liima ndewei Taikikɔsi, na ngengemɔ a ngie numu a gu i liilo ngi ma tawao mu mbaa ngengemɔɔ a ngie mu Lemɔi yengei hu, a vɛi kpɛlɛɛ gɛlɔ a wue kɔloongɔ nya ma. 8Na vamia ngi ngi looma wu gama kɔɔ i pie wu goohu i nɛɛ gbɔma a ji a mu kpɛlɛɛ gama va gɛ a wue. 9Tia Onɛsimɔsi mia ti wama, mu liima ndewei na mu liilongɔ ngi ma, tawao wua tieni mia Kristimableisia a wue miando. Ta hindei gbi hugɛlɔ a wue i wiema mbei. 10Aristakɔs na mua ta mu kpindiwɛlei bu yɛ a va kaka wu ma, hii Maaki bɛɛ i na, Banabasi ndewei (Wu wilanga a fɛimawoo majɔɔla, loko heiva Maaki bu pandawanda ji a foo wu ma.) 11Jɔsua na ta toli gbɔma a Jɔstɔs, ta bɛɛ yɛ a va kaka wu ma. Jisia sawei jisia lekee lɔ Juublaa a tie ti langɔ a Kristi mua tieni mu yengema Ngewɔ Mahayɛi va, tawao ti kpɔma waa wienga nya ma. 12Ipafras yɛ a va kaka wu ma; wua vulii wu yilayee mia a ngie kɛɛ Yesu Kristi yengemɔ. Taa kpele gbi Ngewɔ vɛlima a ngi lii gbi wu va yɛ Ngewɔ i pie wu lo kpaŋ kia Kristimablaa huhitingɔngaa a wue, wu golo pandawanda Ngewɔ liima hindei bu. 13Nya vulii nga gulɔ a selila kɛ i ngenge gbayangɔ waa wienga gbɔva wu ma kɛɛ nungei nasia ti Laodisia kɛɛ Haiarapolis laa waisia hu. 14Mu liima Halemɔi Luki taa Diimas bɛɛ tɛɛ ta va kaka wu ma. 15Mua fama yoyoma Kristimablei nasia gama ti Laodisia, kɛɛ nyapoi Niifa taa Kristimablei nasia ta gomɛ ngi wɛleibu. 16Wu kpɔyɔngaa a kɔlɛi ji gaala wu tɔ i gaa Kristimablei nasia gama ti Laodisia. Hii mahoungɔ wu kɔlɛi na gaa mu ndeengɛi nasia ti Laodisia ti njoyoma wu gama. 17A nde Akipɔs ma i Ndemɔi yengei na wie ti feni ngi wɛ. 18Nya vulii nya lokoi mia ngi famɛi jisia nyɛima la ngi njoyoma wu wɛ. Waa lema kɛ nyaa kpindiwɛlei bu. Ngewɔ i ngauwanda gɛ a wue. |