2 TIMOTI2 TIMOTI 11Nya Pɔɔl, tomɔ a nge Yesu Kristi va kia i nɛni la Ngewɔ wɛ, i nya longa ndɛvui na hinda hugɛva i Lahei wumbuni feva mu wɛ, tawao mu majɔɔnga jifa mua Yesu Kristi-ni mu wilingɔ hu. 2Nya mia ngi kɔlɛi ji nyɛinga nya liima hindoloi Timoti gama. Mu Kɛkɛ Ngewɔ kɛɛ mu Lemɔi Yesu Kristi i bi gɔ a ngauwandei, i manu bi ma, tawao i ndiilɛli ve bi wɛ. 3Nyaa siɛgbuama Ngewɔ ma na ngi yengema ngi wɛ a nɛmahugiliya yekpe, kia nya maadani ti pieni. Nyaa siɛgbuama ngi ma jifa nga gili a bie tuuŋ ji nga yɛ Ngewɔ vɛlima a folo kɛɛ kpindi. 4Ngayɛi na i yeini bi ma ji mu luahu i yɛ gɔlɛma taa nya nɛmahu, tawao bi lɔmani lɔ nya ma hulewengɔ aako nya goohu i nɛɛ waa. 5Yee sabui lɔ a ndomɛi na mahoungɔ i gbua ndiigolengɔ hu, kɛɛ kiliya sɛwɛsɛwɛ hu, kɛɛ lanaya lɔnyangɔ hu. 6Sabui ji va lɔ ngi hitɛma bi wɛ ngɛɛ bi yɛ a yenge a kpayei na Ngewɔ i bi mawaani la ji ngi nya lokoisia wɛlɛni bi ma ngi Ngewɔ vɛli bi va. 7Gbamaile Ngewɔ Yafei na i fenga mu wɛ ɛɛ pie maa luwa; kia Ngewɔ Yafei aa pie mu luwa, a mu laavelɔ a kpaya kɛɛ ndoma kɛɛ ji ma gu mu lii ma. 8Faale, baa wufe a seli wuaala mu Lemɔi va; tawao baa wufe nya hinda ma, kpindi-wɛlɛbumɔ a nge Kristi wooma. Kia baa na wie, kɛ kpalɛi bi ndɛi i la bi ma Ngowili Yekpei va, kia Ngewɔ a yeekahui ve bi wɛ fa. 9I mu bawoilɔ i mu loli yɛva a ngi nda nungaa, mu wiehinda va ii le, kɛ na i yɛ ngi liihu wɔɔ gba pieva kɛɛ ngi yauwandei va. I yeengauwandei ji veilɔ mu wɛ Yesu Kristi sabui hu pɛiŋ wɔɔ hani gbi i yaa gbatɛ, 10kɛɛ kiahuna na i magɛnga a mue a ji mu Bawomɔi Yesu Kristi i wanga. I hee gbayei gbuanga ngi yeya tawao i kunafɔ lɛɛvui magɛnga a Ngowili Yekpei hu wee. 11Ngewɔ i nya yɛnga a tomɔ kɛɛ kaamɔ Ngowili Yekpei leva leiŋ nungaa ma, 12tawao sabui ji valɔ kpalɛi jisia ti lama nya ma. Kɛɛ nguhugiti gbi ii nya ma ajifa ngi numui na gɔɔlɔ ngi lii longa ngi ma, tawao ngi kɔɔlɔ vulii kɛ hindei gbi i toko wuaanga nya yeya pieva, a lolɔ mahugbema haaŋ folo wai na i hiti ma. 13A hou kpaŋ tɔnya yiɛi nasia ma ngi wu gaani la, i yɛ a tɔmaseli ba pookɔɔ, tawao baa gbua lanayei kɛɛ ndomɛi na ma mu woo le ji mua Yesu Kristi-ni mu wilingɔ hu. 14Ngewɔ Yafei na i mu hu ngi gbayei hu, hinda yekpei nasia mahugbe toko wuaangɔ bi yeya. 15Bi kɔɔlɔ kɛ numui gbi ti Esia lɔlei ji hu ti gbuanga nya woohu, Figɛlɔs kɛɛ Hamɔginis ti gbuangɔ ii le ma. 16Ndemɔi i manu Onɛsiforɔs bondɛisia ma, ajifa i yɛlɔ a nya yanɛpɔ watii gboto va. Ii wufeni jifa ngi kpindi-wɛlɛ bu, 17tawao kia lekee i foni Rom, i a nya gɔkɔlilɔ haaŋ i nya lɔ. 18Ndemɔi i manu ngi ma Folo wai na ma! Tawao bi kɔɔlɔ pandawanda gbɔɔ kinɛiŋ i pieni nya wɛ Ɛfisɔs.2 TIMOTI 21Bia, nya loi, Ngewɔ yauwandei na mu woo le ji mua Yesu Kristi-ni mu wilingɔ hu i pie bi kaahu majɔɔ. 2Kaai nasia wumbu bi yɛ mɛni ngi yɛ kɛ leiŋ seli gboto yaama, bi ti loko wuaa ndiivalamablaa yeya, nasia tia bɛɛ ta gu a nungaa wekangaa gaala. 3Kpalɛi bi ndɛi i la bi ma, kia Yesu Kristi gugba lɔnyangɔi a bie. 4Kugba gbi a ngi yengei wielɔ aako i ngi mahumɔ wai liilɛli, faale ɛɛ loko wili numu gbamɛisia ti hindeisia hu. 5Piimɛmɔi na tia ngi mbaangɛisia ta wiimɛ mawali ma ɛɛ gu aa ngi mbaangɛisia gula aa mawaa na majɔɔ ti lapima faa kɛlee i jia a yee saweisia. 6Kpala yengemɔi na i yengema kpaayangɔ, mahoungɔ haala bei na ta tewe, ta yesei i ngi ndɛi majɔɔ. 7Gili a njɛpɛi jisia ngi ndema, ajifa Ndemɔi a pielɔ bi gu a kpɛlɛɛ yeembui gɔla. 8Yɛ a gili a Yesu Kristi na Ngewɔ i ngi wuni hee hu, na i yɛni a Devidi bɔɔsɔ, kia ma nungaa gaa la Ngowili Yekpei ji hu nga hugɛ, 9jifa nga Ngowili Yekpei le nungaa ma famia kpalɛ a la nya ma tawao jɔwɔi vulii gulangɔ nya ma kia sawa nyanimɔ. Kɛɛ jɔwɔ gulangɔ ii le Ngewɔ laayiɛi ma. 10Famia nga gu hindei gbi bu Ngewɔ nungaa wɔyɔngɔisia va kɔɔ tia bɛɛ ti mbawoi na majɔɔ Yesu Kristi a wala kpɛngɔ kunafɔ wɔlɔyɛi ma. 11Tɔnya yia lɔ a ji, tɛɛ: “Ina mua Yesu-ni mu haanga, mua tieni lɔ ma vulu gbɔma. 12Ina muii gbahai a gula hinda gbɔugbɔu bu, mua tieni ma mahayɛi mɛlɔ gbɔma. Ina mu mawalinga ngi hinda ma, ta bɛɛ a mawalilɔ mu hinda ma. 13Ina mu gbenga a lala a Ngewɔ, ta ɛɛ gbe a lala a mue gbamaile ɛɛ ta yekpe hou a mawali” 14Ji hitɛ nungeisia wɛ, bi ti laahii kpɔtukpɔtu Ngewɔ yaama taa ndabla wie, taa lapi kɔlooni njɛpɛwo gbi ma. Na ɛɛ kpekpe gbi wie tawao a nasia hinda huwulɔ ta wolo. 15Lapi a bi sɔbɛ gbi bi tato majɔɔ Ngewɔ yaama, kia ngengemɔi na i na ɛɛ wufe ngi yengei ma, numui na ngi bɛɛngɔ a nungaa gaala a Ngewɔ wowili yeetɔnyɛi. 16Gbe baabaa laablɛi nasia ma ta baa gbua Ngewɔ ma, ta pie nungaa tɛɛ la a Ngewɔ. 17Kaai na wiengɔe kia ngelei na i na a li a numu luwui mɛ, yeekpalɛmɛi ya a wɔlɔ lekee. Hingaa fele ti nungaa gaanga a hinda bondɛi jisia, tia mia a Haiminiɔs kɛɛ Failetɔs. 18Ti gbenga tɔnya welei ma tawao tiaa piema nungei nasia ti langɔ a Ngewɔ ti lii yaa a hupu, a ji ti ndema ti ma tɛɛ, mu welanga bɛɛ a wula hee hu. 19Kɛɛ pɛlei ji Ngewɔ i hitɛnga, gbɛ-o-gbɛ ɛɛ sɛɛjia; tawao njɛpɛi jisia lɔ nyɛingɔ ma tɛɛ, “Ndemɔi i nasia gɔɔlɔ ngi woo a tie”, kɛɛ gbɔma, “Numu gbi lekee a nde yɛ Ndemɔi lɔ ngi woo a ngie, mahoungɔ i wounve hinda nyamu wiela ma.” 20Mɛhɛɛ-mɛ haakei yeelasii gbi lɔ pɛlɛ waa gbi bu, tɛngaa gbatɛngɔ a kanigolei kɛɛ kanigbɔlui, pekeisia gbatɛngɔ a ngulii kɛɛ hujii; tɛɛnga lɔ na ta yenge la a ngila ngila hinda waawaisia mahu, pekeisia ti na ta yenge la kpele gbi. 21Numu gbi i gbengaa hinda nyamui jisia kpɛlɛɛ ma i ta yekpe yɛ sɛwɛ, Ngewɔ a yengelɔ a ngie hinda waawaangaa hu, ajifa i ta yekpe venga ngi bɔɔsɔi wɛ tawao a gu a ngi magbewe gbuala, ngi magbatɛngɔ ngenge yekpe gbi wieva. 22Joowi hinda nyamui nasia ma mani a numu lɔ foningeyɛi hu, bi lapi pɔɔna hinda wiela ma, kɛɛ lala a Ngewɔ, kɛɛ ndoma, kɛɛ ndiilɛli, wua nungei nasia ta wɔɔ Ngewɔ ma a ndiigole kpɔma va. 23Joowi baabaa mawali houlei nasia ma nungei nasia tii gbɛ-o-gbɛ gɔɔ ta wa la; bi kɔɔlɔ kɛ ta gɛlɛ njianjiɛi hu lɔ. 24Ndemɔi yengemɔi tia numu gbi tɛɛ yia. Mahoungɔ i yɛ a kpekpeya wie a numui gbi, Kaamɔ yekpe a ngie a ngi lii hou, 25Ɛɛ liilewe ji a yɛ nungei nasia loma pele ma ta ngi hou a mawali. Gbamaile tɛngaa Ngewɔ a sabu lalɔ ti wɛ wounveva ti jumbuisia ma ti tɔnyɛi gɔɔ. 26Tawao ti nɛmahui a walɔ na, ti bawo Seitana mani ya, na i ti hounga wɔɔ i kpɔndanga ti ma ngi liima hindei wieva.2 TIMOTI 31I yɛ bi nɛmahu, hinda gbangɔngaa ta yɛlɔ na kɛlɛma voleisia ma. 2Nunga ta lolɔ kpekpeyei gbi i lɛ tia yekpe lekee ma, ti haamingɔ a yɛla hulewengɔ hanii gbi va, ti yongangɔ, ti hinda i tia yekpe yaama houngɔ; ta yɛlɔ a ngɛli-ngɛlii wili, tɛɛ golo ti leblɛisia wɛ, tɛɛ sabu gɔɔ, ti gbewe ɛɛ yɛ Ngewɔ hinda hu; 3tɛɛ hindawanda wie, tɛɛ manu numu ma, ti yafangɔ a yɛla, ta ndapi-ndapi gula, ti vulangɔ; ta lololɔ a hinda yekpei; 4ta yɛlɔ a baayablaa, tɛɛ gili pɛiŋ taa yɛ a hinda wie, tawao ti mamaningɔ; ta lolɔ a nɛnɛɛ hindei i lewe Ngewɔ ma; 5ta hindeisia wielɔ aako nungaa ti tɔ kɛ mu Yewɔ-hindei mia ti piema, kɛɛ ti gbelengɔ a yɛla kpayei na ma i mu Yewɔ-hindei hu. Joowi nungei jisia nyɔkɔ ma. 6Ti lɛɛnga ta lilɔ nungaa ti wɛleisia bu, ti gu nyahangɛi nasia ma tɛɛ gu a tia yekpe huhoula tawao jumbu gahɛi i ti gotongɔ ta hinda nyamu laasi gbi wie mani a ti lɔ pieva; 7nyahangɛi nasia ti lapima tuuŋ tɔnyɛi gaava kɛɛ tɛɛ gu a kɔɔla fɔ. 8Kia lɔɔ Janis taa Jambris ti Mojisi houni a mawali, hii nungei jisia ta tɔnyɛi hou a mawali nungaa lɔ a tie ti nɛmahui ɛɛ yenge tawao ti lala a Ngewɔ ii lɔnyani. 9Kɛɛ tɛɛ li kuhama ajifa numui gbi ta ti gbowayii lɔlɔ, kia lɔɔ i Janis taa Jambris wieni. 10Kɛɛ bi jianga a kaai na ngi bi gaani la kɛɛ nya luvayii kɛɛ na i nya lii hu pieva ndɛvui ji hu; bi liiheinga nya layii ma a Ngewɔ, kɛɛ nya liilɛliyii hinda ma kɛɛ ndomɛi na nya hu, kɛɛ nya guyii hinda gbɔugbɔu bu, 11kɛɛ juwuyei ti yɛ hitɛ la nya wooma, kɛɛ kpalɛi nasia ti lani nya ma. Bi na kpɛlɛɛ lɔilɔ i nya wieni Antiɔk, kɛɛ Aikoniɔm, kɛɛ Listra, juwuya hindei nasia ngi guni mbu; kɛɛ Ndemɔi i nya gbuɛilɔ kpɛlɛɛ hu. 12Numu gbi lekee ngi longɔ i luva kia Ngewɔ longɔ la, tia Yesu Kristi ti wilingɔ hu, nungaa ta juwuya hitɛlɔ ngi wooma; 13tawao numu nyamuisia kɛɛ nasia ta kasoo gula nungaa ma, ti nyamuyii maa a yɛlɔ a to, ta nungaa wekɛisia wɛlɛ, tia vulii nungaa ta ti wɛlɛ. 14Kɛɛ bia, baa gbe tɔnyɛi nasia ma ngi bi gaani la tawao bi langɔ la kpaukpaungɔ. Bi kɔɔlɔ yeeni lɔ ti bi gaani, 15tawao taa bi nɛmahu kɛ i hiye bi lopongɔi hu ma, bi Ngewɔ Gɔlɛi gɔnga, na a bi gɔ a nɛmahulewei na a wa a mbawoyei, a ji numu ba la a Yesu Kristi. 16Ngewɔ Gɔlɛi kpɛlɛɛ Ngewɔ lɔ i puni nungaa lii hu ti nyɛini tawao kpekpengɔe nungaa gaava a tɔnyɛi, kɛɛ pieva nungaa ti kpulangei nasia gɔɔ ti piema, kɛɛ pieva nungaa ti gbe a hindei nasia wiela ii wɔnani, kɛɛ nungaa gaava a jiala a pelei na a nɛɛ Ngewɔ wɛ, 17aako numui na a yenge Ngewɔ wɛ mahoungɔ ngi gaangɔ i yɛla tawao ngi magbatɛngɔ hinda yekpe yeelasii gbi wieva.2 TIMOTI 41Nyaa bi laahima kpɔtukpɔtu Ngewɔ yaama kɛɛ Yesu Kristi, na i wama fuublaa gbɛmbova kɛɛ haablaa, tawao jifa taa wama yɛva a Mahɛi, 2ngɛɛ bi yɛ a Ngewɔ wowili le nungaa ma, bi nɔɔ ndela ma; nde-gbelei i nyande nungaa wɛ ɔɔ ii nyandeni, pie ti kɔɔ gbɔɔ mahoungɔ pieva, kɛɛ ti kɔɔ ji ta hinda gbulanga tawao bi ti lii nɛpɔ, ya pie a ndiihou ji ba yɛ ti gama. 3Watii a hitilɔ nungaa tɛɛ wolo kaa wɔnangɔ ma, tawao ta to ti liima hindeisia lɔ ma, ta kaamɔisia mato lɛma tuuŋ, yeekaamɔɛisia tɛɛ kaa weka gɛ kɛlee na yeenungeisia ti wolii hu i yangema mɛniva. 4Ta gbelɔ a wolola Ngewɔ wowili lɔnyangɔi ma, ti wolo dɔmi gbamɛisia ma. 5Kɛɛ mahoungɔ bi gu bi lii ma hinda gbi hu; gu hinda gbɔugbɔu bu, Ngowili Yekpei lela yengei wie, bi bi mahindei gbi wie kia mahoungɔ Ngewɔ yengemɔɔ i pie. 6Nya nya va, watii i hitinga nya gbuava a saa; watii i hitinga nya va ngi gbua dunyei ji hu. 7Ngi nya sɔbɛi gbi wienga piimɛi hu ngi piema wɔɔ, ngi wiimɛnga ngi fonga famia mahoungɔ ngi gɛlɛ na, tawao ngii gbeni a lala a Ngewɔ. 8Kiahuna na kɔi ngi fayani yeemawai na Ngewɔ a fe pɔɔnablaa wɛ taa nya mawuloma, mawali na Ndemɔi, Njialemɔ wɔnangɔi, a fe nya wɛ Folei na ma tawao ɛɛ fe nya yaangɔ wɛ, a fe nungei nasia gbi lɔ wɛ ti longɔ a ngie, ti ngi mawuloma gbuava nga. 9Lapi a bi sɛmbɛi yii gbi bi wa nya gama kaakaa. 10Diimas i longa a dunyɛi ji hu-haniisia, i vayanga nya ma i ya Tɛsalonika. Klisɛnsi i ya Galesia, tawao Taitɔs i ya Dalmesia. 11Luki yakpe lɔ mua ta mu mbei. Bi yaa wama wua Maaki wu wa ajifa a gulɔ a gbɔla nya ma nya yengei hu. 12Ngi Taikikɔsi longa Ɛfisɔs. 13Bi yaa wama bi wa a nya lomawai ngi ndoni Toasi a Kaapɔs; wa a bukuisia bɛɛ, kakayee yeenasia ti nyɛingɔ hua-kɔlɛisia ma. 14Ngaimɔi Alɛksanda i nyamu waa wieilɔ a nge; na i pienga Ngewɔ a ngi pawalɔ a yeepawei. 15Bia vulii bi mahugbe a ngie ajifa ngi lolongɔe a mu wowili hulewengɔ. 16Numu yakpe bɛɛ ii loni nya wooma haala watii na ngi yɛ nya yekpe magaoma Kotii hu; ti gbi ti vayɛilɔ nya ma. Ngewɔ aa yeekpalɛ gbua ti ma! 17Kɛɛ Ndemɔi i yɛlɔ nya wooma tuuŋ tawao i kpaya wuailɔ nya hu nahi ngi gu ngi ngowili gbi hugɛ gbalauŋ aako nasia Juublaa yaa tie ti kpɛlɛɛ ti mɛni; tawao i nya bawoilɔ tii nya lɛɛni nya waava. 18Tawao Ndemɔi a nya gbualɔ hinda nyamu gbi hu, i li a nge panda ngi Mahayɛi hu ngelegoohu. Ngɔɔlɔya i yɛ ngi ma kunafɔ kɛɛ kunafɔ ! Amiina. 19Nga va kaka Plisila taa Akuila ma kɛɛ Onɛsiforɔs mawɛlɛbublɛisia. 20Irastɔs i longa poma Kɔlinti tawao ngi Trofimɔs loni Mailetɔsi lɔ jifa ngi heegbɛngɔ yɛla. 21Lapi a bi sɛmbɛ yii gbi wava nya gama pɛiŋ kɔlɛ watii i yaa lɔto. Yubiulɔs, kɛɛ Piudɛns, kɛɛ Lainɔs kɛɛ Klɔdia ta va kaka bi ma tia Kristimablaa wekɛisia gbi. 22Ndemɔi i yɛ tuuŋ a bi mahugbe. Ngewɔ i ngauwanda gɛ a wu kpɛlɛɛ. |