2 TƐSALONIKABLƐISIA2 TƐSALONIKABLƐISIA 11Nya Pɔɔl, nya mia ngi kɔlɛi ji yoyoma, mua Sailas kɛɛ Timoti. Wua wu Kristimablei nasia gama wu heini Tɛsalonika, mu Kɛkɛ Ngewɔ woo a wue tia mu Lemɔi Yesu Kristi. 2Mu Kɛkɛ Ngewɔ kɛɛ mu Lemɔi Yesu Kristi ti ngauwanda gɛ a wue, ti wu gɔ a ndiilɛli. 3Mu mbaa Kristimableisia, mahoungɔ mu siɛgbua Ngewɔ ma watii gbi wu kpɛlɛɛ va ajifa wu layii a Ngewɔ lɔ gbayama waa, tawao ndomɛi na i wu yilayee gbi hu wu mbaa wekɛisia va taa wɔlɔma. 4Na vamia mua vulii ma matagbualɔ a wue Ngewɔ sɔsiisia hu kɛɛ guyii va hinda gbɔugbɔu bu wu layii a Kristi kia bɛɛ nungaa ti hitɛnga wu wooma a juwuya, ta kpalɛngaa la wu ma. 5Ji kpɛlɛɛ a kɛlɔ leiŋ kɛ Ngewɔ a kiti lewe a pɔɔna lɔ, faale a pielɔ wu yɛ ngi mahayɛi na bu na kpalɛ i lama wu ma fa. 6Na pɔɔnangɔ ta lɔ Ngewɔ a pie: a kpalɛ lalɔ nungei nasia bɛɛ ma ti kpalɛ lama wu ma, 7tawao wua kpalɛ i lama wu ma kiahuna Ngewɔ a wu nɛpɔlɔ kɛɛ mua bɛɛ. A ji wielɔ watii na Ndemɔi Yesu a hiye ngelegoohu i gbua nga taa ngi malikei nasia kpaya waa i ti wɛ hinda waawaa wieva, 8kɛɛ ngɔmbuvo waa, hinda nyamui hunyɔva nasia ma tii Ngewɔ gɔɔ kɛɛ nasia tɛɛ luma taa na wie Ngowili Yekpei kɔlooni mu Lemɔi Yesu ma i ndeni. 9Ngewɔ a kpalɛ lalɔ ti ma, i ti nyani kunafɔ va, tɛɛ foo mia Ndemɔi i na tawao tɛɛ ngi wɔɔlɔya gabandengɔ wai hulɔ, 10ji a wa folei na ma ngɔɔlɔya kɛɛ mbɛlɛya majɔɔva a ngi nungei nasia gbi ti langɔ a ngie. Wua bɛɛ wa yɛlɔ ti lia ajifa wu langa a ngowili na mu ndeni wu ma. 11Na vamia mu Ngewɔ vɛlima wu va watii gbi. Ma mu Yewɔɛi manɛnɛlɔ aako i pie wu maa i hou tuvei na wieva i wu lolinga fa. Ngewɔ gbayei i pie wu gu a kpekpei na kpɛlɛɛ wiela mani i wu ma pieva, i wu yengei yakpua wa pie ajifa wu langɔ a Kristi. 12Ji lɔ a wie mu Lemɔi Yesu biyɛi i ngɔɔlɔya majɔɔ a wue, wua bɛɛ wu majɔɔ a ngie, tawao ji a wielɔ mu Yewɔɛi kɛɛ Ndemɔi Yesu Kristi ti yauwandei yeesabui hu.2 TƐSALONIKABLƐISIA 21Kɔɔlooni mu Lemɔi Yesu Kristi yamalei ma mbei kɛɛ mu lɛla ma hinda yila aako mua tieni mu hei, nyaa wu manɛnɛma vulii, nya mbaa Kristimableisia, 2waa luma nasia ti ndema tɛɛ Ndemɔi wa-gbelei i hitinga taa wu nɛmahu baa. Tɛngaa kulɔmayia lemɔ mia i ji leni ɔɔ vaagɛmɔ, ɔɔ tɛnga ti gililɔla kɛ mua mia mu ji wuni kɔlɔ ma. 3Waa luma numu gbi aa wu yaka kulo bɛɛ. Gbamaile Ndemɔi wa-Volei ɛɛ hiti kɛlee watii na numu gboto waa ta ganga a Ngewɔ, tawao Sawa Nyanimɔi a gbuanga, na Ngewɔ i wama ngi nyanima i ngi wili jahama. 4Hanii kpɛlɛɛ kɛɛ ngafei gbi nungaa ta hɛɛ ma, yeenumui ji ɛɛ ti wumbu a gbɛogbɛ tawao a ta yekpe lɛlɔ ti gbi maahu. A wuaalɔ vulii bɛɛ Ngewɔ wɛlɛ bu i hei a nde a ndawɔlɔ nungaa ma yɛ ta lɔ Ngewɔ a ngie. 5Ii loni wu nɛmahu? Ngi ji gbi leilɔ wu ma ji ngi yɛ wu lia. 6Na hu gbi wu kɔɔlɔ gbɔɔ i Sawa Nyanimɔi gbangɔhu kiahuna. Ngi gbangɔi hu aako i gbuanga watii yekpe ma. 7Kɛɛ kiahuna kpaya Lɔwungɔ Nyamulɔ yengema dunyei hu, i wama wiema ɛɛ wie kɛlee numui na ngi gbekpangɔ kulɔ i gbua na. 8Watii na ma lɔ sawa nyanimɔi a gbuanga, tawao Ndemɔi Yesu a ngi waalɔ a ngi laavɛfɛi, i ngi nyani a ngi vooyii na numu yaama ɛɛ loo ma watii na a wa. 9Sawa nyanimɔi a wa a seitana gbayei lɔ i ndɛɛ gabande hindei yeelasii kpɛlɛɛ wie kɛɛ ndɛɛ naali hugɛlei taa kanakoisia, 10i nungeisia wɛlɛ a nyamu, nungei nasia ti wama jukuluma huɛɛŋ. Ta jukululɔ ajifa ti gangɛilɔ a lola a tɔnyɛi na a ti bawo. 11Sabui ji va Ngewɔ i ngafa nyamui yoyoma kɔɔ i ti huwu kɛɛ i pie ti ya a la a ndɛɛ yɛpɛisia. 12Yeehuvɛi a yɛ a ji lɔ kɛ nungei nasia gbi tii ya lani a tɔnyɛi kɔlooni Yesu ma tawao ti longɔ a jumbu hindei wiela, Ngewɔ a ti lɛɛlɔ. 13Mahoungɔe mu yɛ a siɛgbua Ngewɔ ma kpele gbi wu va, mu mbaa Kristimableisia, wua mu Lemɔi longɔ a wue. Gbamaile yeetɔtoomɛi wɔɔ Ngewɔ i loko loilɔ wu ma yɛva a haalablaa mbawoyei majɔɔva, i pie ngi Yafei i wu yɛ a ngi woo, ajifa wu langɔ a tɔnyɛi. 14Ngewɔ i wu loliilɔ yɛva a ngi woo a Ngowili Yekpei na mu ndeni wu ma; i wu loliilɔ aako wu mu Lemɔi Yesu Kristi wɔlɔyɛi wu ndɛi majɔɔ. 15Faale na, mu mbaa Kristimableisia, a lo kpaŋ, wu hɛlɛ a tɔnyɛi nasia mu wu gaani la laahu kɛɛ kɔlɛi yeehaalayei na hu mu nyɛini wu gama. 16Mu Lemɔi Yesu Kristi vulii, kɛɛ mu Kɛkɛ Ngewɔ, na i loni a mue tawao ngi yauwandei sabui hu i mu gɔni a ndiiloi na ɛɛ gɛlɛ kɛɛ hani yekpe mawulova a ndiilo, 17i ndiilo laavengɔ ve wu wɛ, i wu liisia gbaya hinda yekpe gbi hu wa pie kɛɛ wa nde.2 TƐSALONIKABLƐISIA 31Mu mbaa Kristimableisia, gbɛɛ na ngi njɛpɛi ji yeengui yeekɛlɛmayei le kɔnɛɛ, a Ngewɔ vɛli mu va aako Ngowili ji kɔlooni Ndemɔi ma i yɛ a vaya hu fulofulo tawao nasia ta majɔɔ ti baa gɔɔ ma, kia i wieni wu lia. 2A gbɔma Ngewɔ vɛli aako i mu gbua nyamublɛisia kɛɛ pienyamubleisia yeya; ajifa numui kpɛlɛɛ ii le taa la a Ngowili Yekpei. 3Kɛɛ Ndemɔi i yɛni a liivalamamɔ lɔ tawao a wu liisia gbalɔ, i pie Seitana ɛɛ gu aa hinda nyamu gbi wie a wue. 4Ndemɔi i pienga mu liilonga wu ma, tawao mu langɔe la kɛ wuaa na wiema ma nde wu ma tao wuɛ gbe a piela. 5Ndemɔi i pie wu liisia ti wote Ngewɔ lomɛi gama kɛɛ ndiiloi na Kristi pieni. 6Mu mbaa Kristimableisia, mua ndema wu ma a mu Lemɔi Yesu Kristi biyei hu muɛɛ waa gbɛɛ nasia ma tɛɛ luma taa yenge tawao tɛɛ hindei nasia wie ma nde muɛ ti pie. 7Wua vulii wu kɔɔlɔ pandawanda kɛ wa na lɔ wie mu pieni. Muii yɛ hawani ji mu yɛ wu lia. 8Numu gbi ii nda mɛhɛɛ veni mu wɛ na muii sɔngɔ gbuani ngi ma. Kia maa nda mɛhɛɛ hou, mu yɛlɔ a yenge hulewengɔ; mu yɛlɔ a yenge a folo kɛɛ kpindi aako numu gbi aa bɔnɔ mu va. 9Kpaya yɛlɔ mu hu kɔɔ mu wu mɔli gbɔva mu ma kɛɛ mu yɛlɔ a yenge mu magbewe gbua va aako mu tɔmaseli gɛ a wue pookɔɔva. 10Ji mu yɛ wu lia mu yɛlɔ a nde wu ma muɛɛ, numui na ɛɛ yenge waa mɛhɛɛ gbi ve ngi wɛ. 11Mua ji lema ajifa muaa mɛnima kɛ nungaa lɛɛngaa lɔ wu lia tɛɛ luma taa yenge tawao tɛɛ gbɛogbɛ wie kɛlee loko wilila nungaa wekɛisia ti yengei hu. 12Mua ndema yeenungɛi jisia ma a mu Lemɔi Yesu Kristi biyei hu tawao mua ti laahima muɛɛ ti ti jiayii jɔgbɛ tawao ti yenge aako ti navoo jɔɔ hanii nasia yeyava ta gbewe fa. 13Kɛɛ wua, mu mbaa Kristimableisia, wu gahu aa gbɔyɔ a hinda yekpe wiela. 14Tɛngaa numu lɔ mia ɛɛ woolo Ngowili ji ma mu njoyoma kɔlɛi ji hu. Yeenumui i yɛngaa na, a lii hei ngi ma wu gbua ngi woohu, aako i wufe. 15Kɛɛ waa jia a ngie kia wu juwu na: kia na aa wie, a ngi laahii kia wu ndee. 16Ndemɔi vulii, na mu liilɛli a gbua ngi gama, i ndiilɛli ve wu wɛ kpele gbi kɛɛ a pelei gbi. Ndemɔi i yɛ wu gbi wooma. 17Nya lokoi vulii lɔ ngi ji nyɛima la: Nya Pɔɔl, nga va kaka wu ma. Himia nga nya laa wu kɔlɛi gbi ma. Himia nga kɔlɛi nyɛi. 18Mu Lemɔi Yesu Kristi i wu kpɛlɛɛ gɔ a ngauwanda. |