2 PITA2 PITA 11Nya Saimɔn Pita, Yesu Kristi yengemɔ a nge kɛɛ tomɔ, nya mia ngi kɔlɛi ji yoyoma, wu kpɛlɛɛ gama wua wu lanaya majɔɔnga kia mua vulii mu ndɛi na jifa mu Yewɔɛi kɛɛ mu Bawomɔi Yesu Kristi wɔnangɔ; 2Ngewɔ yauwandei kɛɛ ngi liilɛli wu gama maa i yɛ a to tuuŋ jifa wu Ngewɔ gɔnga tia mu Lemɔi Yesu Kristi. 3Ngewɔ gbayei lɔ Yesu Kristi hu tawao i hani gbi venga mu wɛ mu gbewengɔ fa kɔɔ mu yɛ a jia a Ngewɔ liima welei jifa mu Kristi gɔɔlɔ vulii pandawanda, Kristi na i mu lolini aako i mu gɔ ngi nda wɔlɔyei hu kɛɛ ngi gbekpeyii. 4Ji kpɛlɛɛ yeehuvɛi lɔ a ji i hani baa gbangɔ wai nasia venga mu wɛ i Lahei wumbuni fa aako mu bawo numu yafei jukulu hinda nyamui nasia yeya nungaa ti maningɔ ma dunyei hu, tawao wu yɛyii i wie kia Ngewɔ yɛyii i na. 5Sabui ji vulii va, a lapi a wu sɛmbɛi gbi wu wu layii a Kristi mato a hinda yekpe wiela, wu wu hinda yekpe wielei mato a Ngewɔ liima hindei gɔɔla; 6wu wu Yewɔ liima hindei gɔlɛi mato a joowila wu liima hinda nyamuisia ma, wu wu joowilɛi wu liima hinda nyamuisia ma mato a gula hinda gbɔugbɔu bu, wu wu gulɛi hinda gbɔugbɔu bu mato a Ngewɔ liima hindei wiela. 7Mahoungɔ wu yɛ a ndoma gɛ a wu mbaa Kristimableisia kpɛlɛɛ, tawao mahoungɔe wu lo a numui gbi. 8Mahoungɔe makɛi jisia ti yɛ wu hu tawao ti yɛngaa a mato wu hu, ta pielɔ wu gu a mu Lemɔi Yesu Kristi gɔɔla pandawanda. 9Kɛɛ Kristimamɔi na makɛi jisia tii ngi hu ngi wiengɔe kia numui na i na pumui i ngi yaama ɛɛ hinda lɔ, tawao i lemanga kɛ Kristi i ngi jumbu wovei gbi wuanga fo ngi ma. 10Faale, nya mbaa Kristimableisia, a lapi a wu sɛmbɛi gbi wu wu lolilei kɛɛ wu wumbulei yɛ a hinda waa; wu na wiengaa wuɛɛ gbe a lala a Kristi. 11Wu lapingaa a wu sɛmbɛi gbi wu kɛ wu luvayii gbi hu kɛ Ngewɔ vulii lɔ i wu lolini i wu wumbu, Ngewɔ a lumalɔ wu wɛ liva mia mu Lemɔi kɛɛ mu Bawomɔi i mahayɛi ma na kunafɔ va. 12Faale, nga yɛlɔ a hindei jisia hitɛ wu wɛ watii gbi kia bɛɛ wu ti gɔɔngɔ tawao wu hɛlɛngɔ a tɔnyɛi na ti wu gaani la. 13Nya langɔ la mahoungɔe nya va ngi yɛ a pie waa lema hindei jisia ma a ji nga yɛ a ti hitɛ wu nɛmahu kia lɛ ndɛvui i nya hokpala. 14Ngi kɔɔlɔ kɛ nya haala hugutungɔe naa kia mu Lemɔi Yesu Kristi i ndeni la nya ma leiŋ. 15Nga nya sɛmbɛi gbi wielɔ pieva hindei jisia ti gu a hitɛla wu wɛ kpema gbi lekee nya haangɔi wooma. 16Gbamaile ndɛɛ dɔmingaa ii le mua hugbatɛ nɛmahu maa kpua wu wɛ ji mu hugɛni a wue muɛɛ mu Lemɔi Yesu Kristi a yamalɔ mbei a kpaya waa. Mua mu ngi wɔlɔyei hulɔilɔ a yaama. 17Mu yɛ nalɔ mu Kɛkɛ Ngewɔ i ngi wɔlɔyii kɛɛ ngi gabandeyii gɛni kɛɛ ji ngoi i gbuani Ngewɔ gama ngelegoohu i wani ngi gama yɛ, “Nya liima Hindoloi lɔ, ngi hinda i nya liilɛlingɔ waa!” 18Mua vulii mu ngoi ji mɛniilɔ i gbuani ngelegoohu ji mua tieni mu yɛ Ngewɔ nda yiyei na hu. 19Faale mu lailɔ na vulii waa a ngowili na kpɛlɛɛ Ngewɔ lutuisia ti ndeni. A yɛ a kpɔma lɔ wu va ji wa la a ngowili nasia Ngewɔ lutuisia ti ndeni ajifa ti wiengɔe kia lamboi na a lo voma kpindi-kpindimɛi haaŋ ngele i wo, Kristi voofoi na yeesawulɛi a ngenda lumbekei i voo wu liisia hu. 20Na hu gbi, na tewengɔ hindei gbi ma ta lɔ a ji: numu gbi ɛɛ gu aa Ngewɔ lutuisia ti laayiɛi na fasai i Ngewɔ Gɔlɛi hu a ngi wuma wee ina Ngewɔ Yafei ii gbɔni ngi ma. 21Ajifa Ngewɔ lutuisia tii ti wuma yɛpɛ lɔ leni, kɛlee Ngewɔ wowili na ngi Yafei i yɛ pu ti lii hu ndeva.2 PITA 21Kɛɛ ndɛɛ Yewɔ lutuisia ti yɛlɔ a gbɔku wɔɔ Isrɛlbleisia lia kia lɔɔ ndɛɛ kaamɔisia ti wama gbɔkuma wu lia. Ta wu gaalɔ a hindangaa bi tɔaa bɛɛ tɔnyɛi mia kɔlooni Ngewɔ ma kɛɛ tii lɔnyani kulo bɛɛ tawao ta gulɔ a piela nungaa ti la a hindei nasia tii lɔnyani kɔloongɔ Ngewɔ ma; tawao ta gbelelɔ Kaamɔɛi Yesu Kristi vulii bɛɛ ma na i ti wumawoni tawao ji a pielɔ ti jukulu fulo. 2Na hu gbi, yeemanɔhɔ luvei nasia ndɛɛ kaamɔisia ta pie Kristimabla gboto ta pookɔɔlɔ tawao ti wiehindei na a pielɔ nasia tii lani a Kristi ti njia nyamungaa le Ngowili Yekpei na ma. 3Jifa ndɛɛ kaamɔi jisia ti hanimaningɔ, ta ndɛisia lɔ guala wu wɛ kɔɔ ti gbatɛ wu hu. Ngewɔ i ti lɛɛnga wɔɔ kpɔɔ tawao i hugbatɛnga wɔɔ kpɔɔ ti waava. Ngewɔ ɛɛ yii tawao kpaalɛi na i ndeni yɛ a nda ti ma, hu ɛɛ nyani. 4Mu kɔɔlɔ kɛ Ngewɔ ii manuni malikei nasia ma ti jumbu hinda wieni; i ti wiliilɔ jahama, jɔwɔi gulangɔ ti ma ti heini kpindi hu ta Kpɛmbo Volei mawulo. 5Mu kɔɔlɔ kɛ Ngewɔ ii manuni wɔɔwɔɔmablɛi nasia bɛɛ ma tii yɛ ngi gɔɔ, i njave waa yeilɔ ti ma i ti gbi waa; nasia lekee i ti bawoni tia mia a Noa kɛɛ numu weka wɔfila, Noa na i yɛ a pɔɔna welei na gɛ Ngewɔ longɔ nungaa ti jia la. 6Mu kɔɔlɔ kɛ Ngewɔ i taa waawa fele, Sɔdɔm kɛɛ Gomɔra, lɛɛlɔ i ti mɔ kpae a ngɔmbui, i ti yɛ a tɔmaseli kɛva gbɔɔ i wama peima a nasia tii lani a ngie. 7Mu kɔɔlɔ kɛ Ngewɔ i Lɔt bawoilɔ yeengɔmbui na hu; numu yekpe lɔ wɔɔ a ngie tawao folo gbi ngi lii i yɛ nyanilɔ waa tuva nyamui nasia va nungei nasia tɛɛ sawa hou ti yɛ pie. 8Numu yekpei na i yɛ heini ti lia lɔ, tawao folo gbi ngi lii i yɛlɔ a nyani waa ti hinda nyamui nasia va i yɛ hulɔ kɛɛ na i yɛ humɛni. 9Ji kpɛlɛɛ a kɛlɔ kɛ nasia ti langɔ a Kristi, Ndemɔi bɛɛngɔe a ti bawola ti hinda gbɔugbɔisia hu; kɛɛ a numu nyamuisia liima belɔ kpindi-wɛlei bu haaŋ Kpɛmbo Volei i hiti, 10kakayee nungei nasia puegbuala gɛwɛ hindei na a numu nɔhɔ Ngewɔ yaama gungɔ ti hu, ti lɛɛngɔ Ngewɔ lemayɛi hu. Ndɛɛ kaamɔi nasia ti yaama bengɔi tawao ti yongangɔ, tii baa gɔɔ malika gbayangɔi nasia ma ti ngelegoohu; kia taa baa gɔɔ ti ma, ta ti bɛlɛ lɔ nyani. 11Malikeisia vulii bɛɛ, kia bɛɛ ti wɔlɔngɔ tawao ti gbayangɔ tewengɔ yeendɛɛ kaamɔi nasia ma, tɛɛ ti bɛlɛ nyani ji ta ti lɛɛ Ndemɔi gulɔ. 12Kɛɛ ndɛɛ kaamɔi jisia ti yɛngaa hinda gbi wiema tɛɛ gili, ti wiengɔe kia ndɔgbɔ huangɛisia ti na, ta ti le lekee ti houva ti ti waa; yeendɛɛ kaamɔɛi jisia ta baa gbualɔ hinda gbi ma tii yeembui gɔɔ. Ta ti waalɔ kia nungaa ta ndɔgbɔ huangɛisia waa la, 13tawao ti pawɛi a yɛ a kpaalɛ lɔ a la ti ma kpaalɛi na va ti ndanga nungaa ma. Ti liima hindei lɔ a hinda gbi weila foofo hu a ti luwui liilɛli; ti hinda mawufengɔe tawao mbɛlɛnyani le ji wua tieni wa loko hitɛ wu mɛhɛɛi hu, ti goohu nɛngɔ jifa ta wu wɛlɛ. 14Ti longɔ nyaha gbi ta tɔ tia tieni ti la; jumbu wie-manii ɛɛ gu a tie. Ta pielɔ nungei nasia ti layii a Kristi ii gbayani ti yaka ti wili jumbui hu. Hanimani lewengɔe ti hu tawao ti bɛɛngɔ waa le a na majɔɔla ti longɔ la. Ngewɔ i ti jondunga tawao ta jukululɔ huɛɛŋ. 15Ti gbuanga pelei yeepɔnɛi ma ti yakanga; ti na lɔ wieni tutui Belam, Biɔ hindoloi, i pieni. Belam lumɛilɔ jumbu wuliva aako i navoo majɔɔ. 16Kɛɛ ngi jakasi i ngi lahouilɔ yɛ aa kpowa hinda wie. Fuuhani na i yɛpɛilɔ kia nuuvu, i yia Belam ma ngi jumbui va. 17Ndɛɛ kaamɔi jisia ti wiengɔe kia njɛi na a bɛɛli, ɔɔ njagbili na viivii a lewe la; Ngewɔ i hinda gbatɛnga ti va kpindi yeenilinilii hu. 18Ta ndawo waawaangaa lɔ wie gbama ngeleya, ta kpowa yɛpɛngaa le, tawao kia tɛɛ sawa hou, ta lapilɔ pieva nasia ti tɔɔtonga a wounvela jumbui nasia ma ti heini ndia, ti gbɔma ti wokɔɔ ti luwui liilɛli hinda nyamuisia wiela hu kɛɛ puegbua gɛwɛ hindei. 19Yeendɛɛ kaamɔi jisia ta Lahei wumbulɔ tɛɛ ta pielɔ yeenungeisia ti gbua jumbui luwɔyɛi hu kɛɛ tia vulii nduwɔngaa lɔ a tie jumbui nasia bu ta numu yafei jukulu gbamaile hinda gbi lekee i wɛlɛni numu maahu, ngi luwɔ mia a yeenumui na. 20Mu Lemɔi kɛɛ mu Bawomɔi Yesu Kristi gɔɔla i piengaa nungaa ti bawo jumbui nasia yeya ta numu yafei jukulu, na wooma yeejumbui nasia ti gbɔma wɛlɛ ti maahu, yeenungɛi nasia ti yɛyii a yɛ nyamuni kɛlɛmɛi i lewe tɔɔtomɛi ma. 21Aa fesalɔ polouŋ ti va ina tii yɛ pelei wɔɔni na gɔɔni Ngewɔ longɔ mu jia la, i lewe ji ma ti kɔɔngɔ ti wounvenga Ngewɔ jawei nasia ma ti kɛni a wue. 22Na i ti wieni a kɛlɔ kɛ tɔnya lɔ a salei nasia ti ndeni tɛɛ, “Ngilɛi lɔ yamama gbɔma hani na gama i balini la” kɛɛ “Ndondɛi na ti nguanga fo, taa yamama gendebelema patɛi hu.”2 PITA 31Nya liima ndiamɔisia, kɔlɛi yeefeleyei lɔ naa ngi nyɛinga wu gama. Ngi lapinga yeekɔlɛi veenjɔɔ kpɛlɛɛ hu pieva wu kili sɛwɛsɛwɛngaa wie a ji ngi hindei jisia hitɛma wu nɛmahu. 2Nya longɔ kulɔmayiɛi nasia Ngewɔ lutuisia ti ndeni wɔɔ ti yɛ wu nɛmahu, kɛɛ mu Lemɔi, mu Bawomɔi Kristi jawei na ngi looblɛisia ti kɛni a wue Ngowili Yekpei hu. 3Baama hinda waa le wu va kɔɔva kɛ kɛlɛma voleisia ma, nungei nasia ti longɔ a ti liima hinda nyamuisia lekee wiela, ta wu gbafalɔ jifa wu langɔ a Kristi, 4tawao ta wu mɔlilɔ tɛɛ, “Ii Lahei wumbuni yɛ a walɔ gbɔma? Taa na mindo? Mu maadani ti haanga wɔɔ, kɛɛ hindei kpɛlɛɛ lɔ wiema kia lɔɔ wɔɔ i wiema i hiye dunyei gbatɛ-gbelei ma!” 5Ti wounveilɔ tɔnya wai ji ma kɛ Ngewɔ i njɛpɛ lɔ wɔɔ leni kɛ ngelegoohu i gbatɛnga kɛɛ dunyei. I pieilɔ dunyei i gbua njɛi bu tawao i kpatɛni a njɛi lɔ, 6tawao njavei lɔ i gbɔma yeedunya wovei na gbɔyɔila. 7Kɛɛ Ngewɔ laayia yakpei na lɔ i ngelegoohu lamagbatɛnga kɛɛ dunyei yeeji i na kiahuna aako ngɔmbui i ti nyani. Ngewɔ i ti mahugbema folei na va a nungei nasia lɛɛ ta gbele ngi ma, i ti nyani. 8Kɛɛ waa lema hinda yila ma, nya liima ndiamɔisia; folo yila kɛɛ foo tauji yila tii gba ti nyɔunyɔu ma Ndemɔi yaama, ti veenjɔɔ kpɛlɛɛ ti yakpe ngi wɛ. 9Ndemɔi hulɛlingɔ ii le hinda gbi wieva i Lahei wumbunga fa, kia nungaa lɛɛngaa ta nde la tɛɛ ngi hulɛlingɔe, kɛɛ a ngi liilɔ hou wu va, ajifa ii loni numu gbi i jukulu, ngi longɔ numui gbi ti wounve ti jumbuisia ma. 10Kɛɛ Ndemɔi wa-Volei a weilɔ kia humamɔi a guala numu ma. Yeefolei na ma, ngelegoohu a lolɔ hu a yelewoo waa, ngelema hanisia gbi ta mɔlɔ ti nyani tawao dunyei taa hani gbi ti ngi hu ta gbɔyɔlɔ. 11Jifa hani kpɛlɛɛ dunya ti wama jukulumaa hii, nungaa yeegbɛngaa lɔ mahoungɔ wu yɛla? Mahoungɔ wu wua yekpe loko wuaa Ngewɔ yeya, jumbu gbi ii wu ma, 12kia lɛ wu yeefolei na mawuloma Ngewɔ a dunyablaa gbi gbɛmbo, wu lapima a wu sɛmbɛi gbi lɔ aako yeefolei i humbu a wa, folei na ngɔmbu waa a ngelegoohu mɔ i na gbi nyani, nduenduei i ngelema hanisia gbi gbandi ti wu ti wote a njɛi. 13Kɛɛ mua mu Kristimableisia, mu hani na lɔ gulɔgbema Ngewɔ i Lahei wumbuni feva mu wɛ; tamia a ngelegoohu nina kɛɛ dunya nina, mia numui gbi ta pɔɔna hindei lekee wie na. 14Faale, nya liima ndiamɔisia, kia wu hindei jisia ti wiela mawuloma, a lapi a wu sɛmbɛi gbi wu yɛ sɛwɛsɛwɛ, jumbu gbi aa yɛ wu ma Ngewɔ yaama Folei na ma tawao wua tieni wu hei ndiilɛli hu. 15Mu Lemɔi a ngi lii houlɔ huguhangɔ tawao mahoungɔe wu kɔɔ kɛ wua mia i wu mawuloma hitɛva pelei na ma ta mbawo majɔɔ la. Mu liima ndewei Pɔɔl i kɔlɔ nyɛilɔ wu gama kɔlooni yeehinda yakpei ji ma, a nɛmahulewei na yayenge Ngewɔ i feni ngi wɛ. 16Ndemɔi walɛi ji lɔ a nde ngi gɔlɛi kpɛlɛɛ hu ji a kɔlɔ nyɛi kɔloongɔ yeenjɛpɛi ji ma. Hinda lɛɛnga Pɔɔl gɔlɛisia hu kpaukpaungɔe yeembui gɔva tawao nungei nasia tii hinda hugɔɔ kɛɛ nasia ta wotewote ta fasailɔ a ndɛɛ, kia lɔɔ ta pie a Ngewɔ Gɔlɔ wekɛisia. Ji ti piema tamia a pie ti jukulu Kpɛmbo Volei ma. 17Kɛɛ wua, nya liima ndiamɔisia, wu hindei jisia hugɔɔlɔ kpɔyɔngɔ. Faale, wu valangɔ i yɛla aako waa gbua toma yekpei na i wu looni na tɔnyɛi gɔlɛi hu, waa wili kpulangei nasia hu sawa nyanibleisia ta wili hu. 18Mahoungɔe wu luvayii i pie ngauwandei na mu Lemɔi kɛɛ mu Bawomɔi Yesu Kristi piengɔ a mue maa i yɛ a to tawao mu li gulɔma tuu a ngi gɔɔla, Ngɔlɔya i yɛ ngi wɛ kiahuna kɛɛ kunafɔ. Amiina! |