2 KƆLINTIBLƐISIA

2 KƆLINTIBLƐISIA 1

1Nya nya Pɔɔl, Ngewɔ i loko loni nyama yɛva a tomɔ Yesu Kristi va, mua mu mbaa Kristimɔi Timoti mia mu kɔlɛi ji nyɛima Ngewɔblei nasia gama ti Kɔlinti kɛɛ Ngewɔblei nasia kpɛlɛɛ ti Akaya lɔlei luwuma gbi. 2Nyaa mu Kɛkɛ Ngewɔ vɛlima kɛɛ Ndemɔi Yesu Kristi ti wu gɔ a ngauwaundei kɛɛ ndiilɛli. 3A mu siɛgbua mu Lemɔi Yesu Kristi ngi kɛɛ Kɛkɛ Ngewɔ ma, manuma Kɛkɛi na a gbɔ mu ma kpelema gbi. 4Ngewɔ na a gbɔ mu ma mu hinda gbɔugbɔi kpɛlɛɛ hu aako mu gu a gbɔla nasia ma hinda gbɔugbɔu laasi gbi i ti ma; mu yeekpɔma yakpei na yayenge mu majɔɔnga a Ngewɔ. 5Kpalɛ gboto i lailɔ Kristi ma, tawao kpalɛ a lalɔ mua bɛɛ ma kia i lani la ngi ma; tawao kia Ngewɔ i gbɔni la Kristi ma, hii Kristi sabui hu Ngewɔ a gbɔ mu ma hulewengɔ gbo. 6Watii gbi lekee kpalɛ i langaa mu ma, wu gbɔmi vamia, aako wu kpɔma majɔɔ wu lanayei i gbaya; tawao mu kpɔma majɔɔnga a Ngewɔ, wa yeekpɔma yakpei na majɔɔlɔ a pie wu gu kpalɛ laasi yakpei nasia bu a ndiilo ta la mu ma. 7Faale mu layii a wue mahu ɛɛ gbua; mu kɔɔlɔ kɛ kia lɔɔ kpalɛi na i langa mu ma i langa wu ma, kpɔmɛi na ma majɔɔ wa majɔɔlɔ. 8Mu mbaa Kristimableisia, mu longɔ wu hinda gbɔugbɔi na gɔɔ i lani mu ma Esia lɔlei hu. Kahɛi nasia ti ndani mu wumba ti wɔlɔyii kɛɛ ti miniyii i pielɔ mu la la kɛ mu lɛɛvui i gbɔyɔmaa. 9Mu langɔ yɛla la vulii kɛ mu haamaa fɔ; kɛɛ na wieilɔ aako maa liivala mua yekpe ma, mu liivala Ngewɔ yakpe ma, na a haablaa vulu i ti wumbu hee hu. 10I mu gbuɛilɔ haa maluwangɔi na nyɔkɔ hu, mu langɔ la kɛ a mu bawolɔ tawao mu liivalanga ngi ma kɛ a mu bawolɔ gbɔma, 11ji wua bɛɛ wa gbɔ mu ma a Ngewɔ vɛlila mu va. Wu Ngewɔ vɛlingaa mu va na gbotongɔ, Ngewɔ a mɛnilɔ tawao a mu lubalɔ; tawao nungaa wekangaa gboto ta siɛgbualɔ Ngewɔ ma mu luba va. 12Ma mata gbualɔ ajifa mu lii yekpei lɔ selima kɛ mu jianga panda dunyei hu, wua vui wu gama, a pɔɔnɛi kɛɛ ndiigolei na Ngewɔ longɔ la. Nuuvu nɛmahulewe ii le maa jia la kɛlee Ngewɔ yauwandei yeekpayei. 13Na wa gu a kaala tawao wa mbugɔɔ, ta lekee lɔ ma nyɛi wu gama. Na hu gbi, wuɛɛ mu wiehindei kpɛlɛɛ hugɔɔ pandawanda kiahuna, kɛɛ nya lii lɔ ma kɛ wa mu wiehindei hugɔɔlɔ gbalauŋ, aako Foloi na ma mu Lemɔi Yesu a yama mbei nuuvunga gbɛmbova, wa mata gbualɔ a mue kia ma kpua a wue. 15Nya langɔ waa yɛla a ji kpɛlɛɛ famia ngi hugbatɛni haala fova wu ma aako wu kohunɛ fele majɔɔ. 16Nya longɔ yɛla ngi foo wu ma ji nga yɛ lima Masidonia lɔleihu kɛɛ ji gbɔma nga yɛ yamama aako wu gbɔ nya ma ngi yama Judia lɔleihu. 17Ji ngi yɛ hugbatɛi ji wiema ngi pieni a sɔbɛ lɔ. Ji nga nya hugbatɛisia wie, ngii ti wieni nya yekpe lɔ nafava, ngɛ luma nga mawali a leenga? 18Kia lɔɔ Ngewɔ lɔnyangɔ, mu layie na ma nde wu ma ɛɛ ya a tuma kɛɛ mawali. 19Gbamaile Ngewɔ Hindoloi Yesu Kristi na mua Silvanɔs kɛɛ Timoti mu ngi wowili leni wu ma, ii yɛ a tuma kɛɛ mawali, ta lɔ Ngewɔ lumawoi a ngie kpelema gbi; 20jifa ta lɔ Ngewɔ Lahei kpɛlɛɛ yeetumawoi a ngie. Na vamia ji ma Ngewɔ vɛli ma nde muɛɛ “Amiina” Yesu Kristi biyɛi hu Ngewɔ wɔlɔ va. 21Ngewɔ vulii lɔ a pie mua wueni mu yɛ a Kristi woo; Ngewɔ vulii lɔ i mu gbuanga ma gba ngi yengei va; 22i loko longa mu ma kɛva kɛ ngi woo lɔ a mue tawao i Ngewɔ Yafei venga mu wɛ mu liisia hu a kpɔmbɛi na kpɛlɛɛ va i ngi yeya mu va. 23Ngewɔ lɔ nya jeli le, ta lɔ i nya lii huvaa gɔngɔ! Aako ngaa wu huyili, famia ngii wani Kɔlinti. 24Ii mu lii hu ndeva wu ma a kpaya gbɔɔ mahoungɔ wu la la; mu kɔɔlɔ kɛ wu na gɔɔlɔ vulii wu langɔ la, faale mua wueni mu yengemaa aako wu goohu i nɛɛ.

2 KƆLINTIBLƐISIA 2

1Faale ngi nya lii huyiliilɔ ngɛ ngaa wa wu gama wu lii aa gbɔma nyani. 2Ajifa ina nya wala wu gama yeehuvɛi a yɛ lekee a ndiinyani lɔ, numu weka gbi ɛɛ yɛ na nya lii nɛpɔva kɛlee wua ngi wu lii nyaninga. 3Na vamia ngi kɔlɛi na nyɛini ngii yɛ loni ngi wa wu gama ngi ndiinyani majɔɔ a nungei nasia vulii mahoungɔ ngi kohunɛ majɔɔ a tie. Ajifa nya langɔe vulii la kɛ nya goohu i nɛngaa, kɛ wua bɛɛ wu gbi wu goohu i nɛnga. 4Gbamaile watii na ngi kɔlɛi na nyɛini nya lii mɔnɛngɔ yɛla hulewengɔ gbo, ngayɛi a yei nya yaama; nya lii ii yɛ ma pieva wu lii i nyani, kɛɛ aako wu kɔɔ kia nya longɔ a wu gbi. 5Numui na i wani a kpalɛi na, ii pieni a nge kɛ wua ɔɔ, i gbɔu bɛɛ, wu lɛɛngaa. Ngi ndeilɔ a kɛyii ji hu we kɔɔ ngaa ngagbalɛ hulewengɔ wie a yeenumui na i wani la. 6Kpalɛi na wu gbotoma wu ndanga ngi ma i lo hii. 7Na hu gbi mahoungɔ wu manu ngi ma, wu ngi lii gba, aako ngi lii aa nyani hulewengɔ. 8Faale nyaa wu manɛnɛma aako wu pie i kɔɔ kɛ wu longɔe a ngie. 9Ngi kɔlɛi na nyɛilɔ wu hugɔɔva aako ngi kɔɔ ina wu woloilɔ ndahii ma ngi feni wu wɛ. 10Wu manungaa numu gbi ma na va i pienga, nya bɛɛ nga manulɔ ngi ma. Ajifa ngi manungaa numu ma kɛ ngi pienga wu va lɔ, nya jeli a Kristi lɔ, 11aako Seitana aa gu aa wɛlɛ mu mahu; ajifa mu kɔɔlɔ gbɔɔ i ngi nɛmahu. 12Ji ngi foni Toasi leihu Ngowili Yekpei leva kɔloongɔ Kristi ma, ngi tɔilɔ kɛ Ndemɔi i pele lawonga nya wɛ yeengengei ji wieva na. 13Kɛɛ nya liihɛlɛngɔ waa yɛla ajifa ngii mu ndee Taitɔs maleni na. Faale ngi vɛlilɔ ti ma ngi lewe ngi li Masidonia lɔleihu. 14Kɛɛ a mu siɛgbua Ngewɔ ma! Ajifa i temayɛi venga Kristi wɛ jumbui gbayei maahu tawao mu toblɛisia mua Kristi-ni mia ma yeekɔ-vaya-gomɛi ga. Ngewɔ a yenge a mu loko lɔ kɔɔ Kristi hindei hugɔɔlei i vaya hu gbi kia hani gu nɛnɛɛ. 15Gbamaile mu wiengɔe kia hani gu nɛnɛɛ Kristi i kpuani a saa i fe Ngewɔ wɛ faya va nasia lia ti bawoma kɛɛ nasia ti jukuluma. 16Nasia va ti jukuluma, i yɛni a hani gu nyamunyamu waa lɔ a gu a numu waala; kɛɛ nasia va ti bawoma, i yɛni a hani gu nɛnɛɛ waa lɔ a wa a ndɛvui. Ye lɔ na hɔɔ a gu a ngenge bondɛi ji wiela? 17Ajifa muii wieni kia numu gboto ti na, tɛɛ gu yeengengei ji ma. Ta Ngowili Yekpei lelɔ bi tɔaa bɛɛ feehani na ta majia ta ti mɛhɛɛ jɔɔ hu. Kɛɛ mua mu wɔnangɔe mu yengei hu; ma Ngowili Yekpei le a pelei na lɔ Ngewɔ kɛni a mue kia tutungaa i ti loni kɛɛ kia Kristi yengeblaa.

2 KƆLINTIBLƐISIA 3

1Njɛpɛi na ngi nyɛinga saange ii kɛni kɛ mua lawoma gbɔma a mua yekpe. Muii gbeweni kɔlɔngaa va mu magonava wu ma tawao muii gbeweni kɔlɔngaa va wu yeya mu magonava Kristimablaa wekangaa ma kia nungaa lɛɛngaa ti na. 2Wua vulii lɔ mu magona gɔlɛi a wue, nyɛingɔ mu liisia ma numui gbi va ti kaa ti kɔɔ. 3I laailɔ ke kɛ Kristi vulii lɔ i yeekɔlɛi ji nyɛini, i njooyo a mue. Ii nyɛini a loko kɛlee, kɛ Ngewɔ vulungɔi Yafei, tawao ii nyɛini kɔtu magbatɛngɔ ma, i yɛ nuuvungaa ti liisia ma lɔ. 4Mua ji lema ajifa mu langɔwa a Ngewɔ, Kristi sabui hu. 5Gbɛogbɛ i mu hu na a pie mu yongalewe, kɛ mua ma gulɔ mu gengei nasia wie. I kpayei na mu yeya i gbuani Ngewɔ gama lɔ; 6Ngewɔ lɔ i pienga mu gunga a yɛla a ngengeblaa ngi wɛ hinda yangilingɔ nina hu, na ii yɛni a sawa nyɛingɔ kɛ Ngewɔ Yafei. Sawa nyɛingɔi a wa a hee lɔ numu yafei va kɛɛ Ngewɔ Yafei a wa a ndɛvui lɔ. 7Sawei nyɛini kɔtu magbatɛngɔi lɔ ma, tawao watii na i feni, Ngewɔ nɔlɔi i gɛilɔ foofo gbayangɔ waa hu. Mojisi yaumbui i yɛlɔ a voo a Ngewɔ nɔlɔi na i hulɔni tawao kia bɛɛ mahu i yɛla a gbua, kpayangɔ waa yɛlɔ na hii i Isrɛlbleisia ti yaama ii yɛ gu aa lo ngi yaumbui ma. Ngewɔ nɔlɔi yeefoofo wai i gɛilɔ watii na Sawei ji a wa a hee i yɛ vema Mojisi wɛ, 8kɛ Ngewɔ nɔlɔi yeefoofo wai i leweilɔ polouŋ na ma watii na Ngewɔ hinda yangilingɔ ninɛi na yeendii a Ngewɔ Yafei i wani. 9Gbamaile ina Sawei na a wa a numu yafei haala ngi wala wɔlɔngɔ yɛla hii, Ngewɔ Yafei na a pɔɔna vɛ numu wɛ ngi walei a yɛ wɔlɔni kpa! 10Ma ndelɔ hɔɔ muɛɛ ji na ngɔlɔyɛi yeembawai i wanga, ngɔlɔyɛi na wɔɔ i yɛ voo ngovama i gbɔyɔnga. 11Gbamaile ina ngɔlɔya i yɛlɔ hinda yangilingɔ wovei na hu ii lɛmbima, ngɔɔlɔya a yɛ kpa hinda yangilingɔ ninɛi na hu i yɛma na kunafɔ va! 12Jifa mu lii valamɛi ji i na, ma yɛpɛlɔ a ngaulewe waa. 13Muii wieni kia Mojisi i na, i kulei wɛlɛni wumba aako Isrɛlbleisia taa fofoi gbɔyɔmɛi lɔ ngi yaama. 14A tɔnya ti nɛmahuisia laagbɔungɔ yɛla tii yeembui gɔɔni, tawao i to foloi ji vulii ma, kulei na wɔɔ Mojisi pɛlɛni wumba, pɛlɛngɔe ti nɛmahuisia ma ji ta yɛ hinda yangilingɔ wovei yeekɔlɛisia gaama. Na lekee a kulɛi na gbule tamia a ji numu a yɛ a Kristimamɔ. 15Foloi ji bɛɛ, watii gbi ti Mojisi Jawei gaangaa, kulei lɔ lɛ wɛlɛni ti nɛmahuisia ma. 16Kɛɛ numu i wotengaa Ndemɔi gama, kulei na a gulelɔ ngi yaama. 17Kiahuna, Ndemɔi lɔ Ngafei le; tawao mia lekee gbi Ndemɔi Yafei i na, mbawo lɔ na. 18Mu kpɛlɛɛ, kula gbi ii wɛlɛni mu yaama, ma Ndemɔi nɔlɔi lɔlɔ; tawao yeenɔlɔ yakpei ji i gbuama Ndemɔi na gama, Ngewɔ Yafei a ngie, a mu maluvelɔ mu gbua a ngie, ngi nɔlɔi i ya a mato mu ma.

2 KƆLINTIBLƐISIA 4

1Ngewɔ i manunga mu ma i ngengei ji venga mu wɛ pieva, muɛɛ gbe a piela. 2Mu loko gbi ii ngufema hindangaa wiela hu ndɔwuma, muɛɛ kaasoo hinda wie, muɛɛ ndɛɛ guala Ngewɔ Wowili Yekpei lela hu. Ngewɔ lɔ mu jeli le kɛ ma Ngowili Yekpei yeetɔnyɛi lekee lɔ le fofoya tawao mu lii lɔ ma kɛ numui gbi ta kili yekpe wielɔ a mue. 3Gbamaile ina Ngowili Yekpei ji ma nde ndɔwungɔe, kɛ ndɔwungɔ lekee nasia lɔ ma ti jukuluma. 4Tii lani a mu Wowili ajifa Seitana, dunyei yeengewɔ nyamui, i pienga tɛɛ gu a yeembui gɔla. A pielɔ tɛɛ fofoi na lɔ i vooma ti ma, foofoi na a gbua Ngowili Yekpei hu kɔlooni Kristi wɔlɔyɛi ma, na Ngewɔ gbuayei a ngie. 5Muii yɛpɛma kɔloongɔ mua yekpe ma; mu Lemɔi Yesu Kristi lɔ mu yɛpɛma kɔɔlongɔ ngi ma, mu yɛngɔ a wu yengeblaa jifa mu toma Yesu lɔ ma. 6Ngewɔ na i ndeni yɛ, “Fofoi a voolɔ i gbua kpindi hu!” yee Ngewɔ yakpei ji lɔ i pieni ngi voofoi i voo mu liisia hu, pieva mu Ngewɔ nɔlɔi na gɔɔ i vooma Kristi yaumbui ma. 7Kɛɛ mua Ngewɔ Yafei yeekpatɛi ji i mu yeya, mu wiengɔe kia pɔlɔ-vɛɛngaa gbama ti na, kɛva kɛ kpayei na tewengɔ kpɛlɛɛ ma i Ngewɔ lɔ wɛ, mua ii le. 8Nungaa lɔ kpalɛ lama mu ma pɛɛpɛ, kɛɛ na ɛɛ pie mu gbe mu yengei ma; mu kitingɔe watii lɛɛnga, kɛɛ muɛɛ gbe mu yengei ma; 9nungaa ta mu yakpelɔ, kɛɛ Ngewɔ ɛɛ gbele mu ma; tawao ta mu nɛɛmulɔ waa ti mu gula watii lɛɛnga ma kɛɛ tɛɛ mu waa. 10Watii gbi lekee hee na Yesu i pieni taa hɛlɛni mu mahu tawao ji vulii mu vulungɔ lɛ a kɛlɔ kɛ Yesu bɛɛ ngi vulungɔe. 11Kia bɛɛ mu vulungɔ, hee lɔ hɛlɛni mu maahu watii gbi Yesu va, tawao ji vulii mu vulungɔ lɛ a kɛlɔ kɛ Yesu bɛɛ ngi vulungɔe. 12Ji a kɛlɔ kɛ hee lɔ hɛlɛni mu toblɛisia mahu tawao ji lɔ i pienga wu ndɛvu majɔɔnga. 13Nyɛingɔe Ngewɔ Gɔlɛi hu tɛɛ, “Ngi Ngewɔ yiɛi leilɔ nungaa ma jifa nya langɔ a Ngewɔ.” Hii mua bɛɛ mu langɔ a Ngewɔ famia ma Ngowili Yekpei le. 14Jifa mu kɔɔlɔ kɛ Ngewɔ na i Yesu vuluni i ngi wumbu hee hu, a mua bɛɛ wumbulɔ hee hu kia i pieni a Yesu, i li a mua wieni Yesu gama. 15Ji kpɛlɛɛ i mu wiema wu va lɔ; tawao kia Ngewɔ yauwandei i piema a nungaa mato lekee, nungaa ta siɛgbua hɛɛ mato wielɔ, Ngewɔ wɔlɔ va. 16Sabui ji valɔ muɛɛ gbaha. Kia bɛɛ mu luwui i nyanima kulokulo, mu lii lɔ ninama folo gbi. 17Kpalɛi jisia ta la mu ma ti mumungɔe tawao ti hugutungɔ ina mu gilingaa a na i wama; ajifa ta walɔ mu wɛ a hani lakpa waa tewengɔ kpalɛi nasia ma, hani na a yɛ mu yeya kunafɔ, tamia a kunafɔ lɛɛvui Ngewɔ gama. 18Faale mu lii ii looni dunyama hani nasia ma numu a gu a tɔla kɛlee ngelegoohu hanii nasia muɛɛ gu a tɔla. Ajifa hanii nasia ma gu a tɔla tɛɛ lɛmbi, kɛɛ nasia muɛɛ gu a tɔla, ta yɛlɔ na kunafɔ.

2 KƆLINTIBLƐISIA 5

1Mu kɔɔlɔ kɛ watii na kpoe ji mu mbu, na i yɛni a mu gbuhɛi mbei dunya a wolo, pɛlɛ gbuhɛi a yɛlɔ Ngewɔ yeya ngelegoohu mu va, heimi na ta vulii i kpatɛni tawao ɛɛ nyani kunafɔ. 2Ji nduwui ji a yɛ mu ma dunya, ma gbalalɔ a ndiinyani ajifa mu longɔ a nduwui yeepeka, yeena a gbua ngelegoohu, i wu mu ma. 3Mu longɔ mu luwu ninɛi i yɛ mu ma, na wiengaa, muɛɛ yaa baa a nduwu kunafɔ. 4Ajifa kia lɛ mu kpoe ji bu, ma gbalalɔ a ndiihɛlɛi; ii wieni bɛɛ mu longɔ mu dunya luwui ji gbua mu ma, kɛɛ mu longɔ ngelegoohuyei i wu dunyayei mahu aako haa-luwui i kunafɔ lɛɛvu majɔɔ. 5Ngewɔ vulii lɔ i mu magbatɛnga ji va, tawao i ngi Yafei veilɔ mu wɛ a tokola na kpɛlɛɛ va i ngi yeya mu va. 6Faale ndiigba lɔ mu wɛ kpele gbi. Mu kɔɔlɔ kɛ na lekee mu wɛlei na mu mbu a nduwui ji lɔ, mu maguhangɔe a Ndemɔi yeepɛla. 7Mu luvayii i gbuani mu lalei hu lɔ a Kristi, tii yɛma jifa mu ngi lɔnga. 8Ndiigba waa lɔ mu wɛ tawao ma yɛ loni vulii mu gbua mu luwui yeepɛlei ji bu mua Ndemɔi Yesu-ni mu li mu yɛ heini. 9Faale, na mu longɔ la i lewe hani gbi ma tamia a ji ma Ndemɔi liima hindei wie, mia gbi mu na, mu yɛ lɛ mu luwui ji hu mbei ɔɔ mu gbuangɔ i yɛla hu ndɛvui yeena hu Ndemɔi gama. 10Ajifa mu kpɛlɛɛ ma lolɔ huɛɛŋ Kristi gulɔ i mu gbɛmbo. Numu gbi a pawɛi na ɔɔ kpalɛi na lɔ majɔɔ mbɛngɔ ngi ma. Kristi a ji wielɔ hinda yekpei kɛɛ hinda nyamui nasia va nungaa ti pienga dunya lɛɛvui ji hu. 11Mu kɔɔlɔ gbɔɔ luwala le Ndemɔi ma, famia ma lapi kɔɔ mu nungaa wekeisia lii manɛɛ. Ngewɔ i mu gɔɔlɔ pandawanda, tawao nya lii lɔ ma kɛ wu nya gɔɔlɔ hi wu liisia hu. 12Muii mua yekpe latoma wu gama gbɔma. Sawo, na mu lapima mu pie tamia a sabu yekpe vela wu wɛ mata gbuava a mue; tawao na wiengaa wa kɔɔlɔ gbɔɔ wa nde nasia ma ta lawo a ti luwumɛi yɛyii, tɛɛ laawo a ti jiayii. 13Ina mu gbowangɔ yɛla vulii, kɛ Ngewɔ vamia; ɔɔ mu nɛmahu lewengɔi, kɛ wu vamia. 14Ajifa Kristi lomɛi na mu va ta lɔ i jiama a mue, kia na mu kɔɔnga kɛ Kristi i haailɔ numui kpɛlɛɛ va, faale numui gbi ti haanga tia bɛɛ. 15Kristi haani numui gbi lɔ va kɔɔ nasia ta to ngi ma taa gbɔma yɛ na tia yekpe lekee ti nafava, kɛɛ ti yɛ na Kristi va. Ajifa ti va lɔ i haani, Ngewɔ i ngi vulu i ngi wumbu hee hu. 16I hiye watii na ma mu lani a Kristi, muɛɛ gili a numu gbi a nuuvu giliyii. Ina bɛɛ mu giliilɔ wɔɔ a Kristi a nuuvu giliyii, muɛɛ yaa gili hii a ngie. 17Faale numu gbi taa Kristi ti wilingaa hu, a yɛ a numu nina lɔ; yeengovei i ya, yeeninɛi i wanga. 18Ngewɔ lɔ i ji kpɛlɛɛ wieni, na Kristi sabui hu, i mu yɛnga a ngi ndiamɔngaa, i genge venga mue pieva nungaa wekeisia bɛɛ ti yɛ a ngi ndiamɔngaa. 19Mu wowili a ji lɔ kɛ Ngewɔ longɔ i nuuvungaa kpɛlɛɛ yɛ a ngi ndiamɔngaa Kristi sabui hu. Ngewɔ i manuilɔ ti ma gbama ti jumbuisia va i lema yeejumbuisia ma tawao ngowili na a hugɛ kia Ngewɔ a yee nuuvungaa yɛ a ngi ndiamɔngaa, i toko wuaanga mu yeya. 20Faale na mua lɔ Kristi yaamɛi a mue ma yɛpɛ ngi va, bi tɔaa bɛɛ Ngewɔ vulii i wuama mu hu lɔ manɛnɛi ji va nuuvungaa kpɛlɛɛ yɛva a ngi ndiamɔnga. Mua wu manɛnɛma a Kristi jɔngɔ; a luma Ngewɔ i wua tieni luahu gbatɛ i wu yɛ a ngi ndiamɔnga. 21Kristi ii jumbu hinda yakpe bɛɛ wieni, kɛɛ mu va Ngewɔ pielɔ i mu jumbui wumbu. Faale, kia mua Kristi-ni mu wilinga hu, mu yɛnga a pɔɔnablaa Ngewɔ gulɔ.

2 KƆLINTIBLƐISIA 6

1Mua Ngewɔ-ni mia mu yengema faale mua wu manɛnɛma wu ngauwandei na yayenge Ngewɔ i pienga a wue, hu aa nyani gbama. 2Faale Ngewɔ ndeilɔ yɛ, “Ji watii i hitini gbɔva wu ma, ngi wu woo mɛnilɔ, Ngi gbɔilɔ wu ma ji foloi i hitini wu bawo va.” A woolo! Watii ji lɔ Ngewɔ i gbɔma wu ma! Foloi ji lɔ Ngewɔ i wu bawoma! 3Mu yengei ji mu piema, muii loni numu gbi i mu magbua, famia muɛɛ gbani yili numu gbi gulɔ. 4Kia maa na wie, ma kɛlɔ mu wiehindei kpɛlɛɛ hu kɛ Ngewɔ yengeblaa lɔ a mue ji mu liilongɔ wa fawɔliisia hu kɛɛ hinda gbɔugbɔisia kɛɛ hinda gbangɔisia. 5Ti mu lewenga ti mu wunga kpindi-wɛlei bu, kɛɛ sɔlɛisia kɛɛ ngamɔnɛisia, tawao ti njii-manii kɛɛ, ndɔlei wilinga mu ma. 6Mu wiehindei sɛwɛsɛwɛyii kɛɛ mu Wowili Yekpei gɔɔyii kɛɛ mu liiloyii hinda gbɔugbɔu hu kɛɛ mu hindawanda wieyii, kɛɛ Ngewɔ Yafei va i mu hu kɛɛ ndoma yekpei mu piengɔ a nungaa wekeisia, 7kɛɛ mu Wowili lɔnyangɔi kɛɛ Ngewɔ gbayei a kɛlɔ kɛ Ngewɔ yengebla lɔ a mue. Ma kɔi gɔ a mu jiayii yekpei lɔ, ma kɔi wɛlɛ la mu juwuisia ma, tawao ma mu magao la. 8Nungaa lɛɛnga ta mu bɛlɛ nyanilɔ, pekeisia ta mu bɛlɛ hei; nungaa lɛɛngaa ta mu yia yekpe lelɔ, pekeisia ta mu yia nyamu le. Nungaa ti mu wumbuni a ndɛɛ gualablaa lɔ, kɛɛ ma tɔnyɛi lɔ le. 9Tiaa ndema tɛɛ gbɛogbɛ yaa a mue kɛɛ numui gbi ti mu gɔɔlɔ; tɛɛ mu yɛ haama kɛɛ mu vulungɔe keya, wua vulii wuaa tɔma. Ta mu gbalɛlɔ nyamungɔ waa, kɛɛ muɛɛ haa; 10kia bɛɛ ta mu lii nyani, mu goohu nɛngɔe watii gbi; mu wiengɔe kia fɛɛlibla ti na, kɛɛ mua piema numu gboto ta gbatɛ; mu wiengɔe bi tɔaa bɛɛ gbɛogbɛ ii mu yeya, kɛɛ a tɔnya, hani gbi lɔ mu yeya. 11Nya liima ndiamɔisia wu Kɔlinti, mu yɛpɛnga wu gama muii pɛlɛni nga; mu ndii gole gɛilɔ a wue. 12Muii ndii nyamu gɛni a wue; wua mia wu ndii nyani gɛni a mue. 13Nga yɛpɛlɔ wu gama na kia nya goohu leengaa; a mu wumbu kia mu wu wumbungɔ la. A ndii gole gɛ a mue wua bɛɛ. 14Waa lapi waa gbɔ hinda gbi ma wua nasia tii Ngewɔ gɔɔ bi tɔaa bɛɛ wu mahɔngɔe wua tieni, ajifa nyɔkɔ ɛɛ wie. Pɔɔna tia jumbu ta yee gu ti yɛ a mbaangaa? Foofo taa kpindi ta yee makpɔ ti hei hinda yakpe? 15Kristi taa Seitana ta yee ngooyila wie? Kristimamɔi taa numui na ii lani a Kristi ti yɛyii i yee yɛni yila? 16Ngewɔ wɛlei taa nɔmɔliisia ta yee makpɔ hinda yila? Gbamaile mua lɔ Ngewɔ vulungɔe wɛlei a mue! Kia Ngewɔ vulii i ndeni la yɛ, “Nga heilɔ nya nungeisia lia nga lewetewe ti lia; nga yɛlɔ a Ngewɔ na ta ngi vɛli, tawao ta yɛlɔ a nya woo.” 17Famia Ndemɔi i ndenga ngi nungeisia ma yɛ, “Wa gbɛle lɔ yee nungei nasia ma, wua tieni wu luahu i gɔlɛ. Waa gbiti hani gbi ma na nɔhɔngɔ nya yaama, wu na wiengaa nga wu gululɔ. 18Nga yɛlɔ a wu Kɛkɛ, tawao wa yɛlɔ a nya hingaleengeisia kɛɛ nya nyahaleengeisia, hii ngi ndeni, nya Ndemɔ wai a nge.”

2 KƆLINTIBLƐISIA 7

1Nya liima ndiamɔisia, Ngewɔ i Lahei jisia wumbunga mu gama. Faale na, a mu mua yekpe yɛ sɛwɛ a ji ma gbele hindei nasia kpɛlɛɛ ma ta mu gbuhɛi kɛɛ mu lii nɔhɔ Ngewɔ yaama. Tawao aako mu mbɛlɛhei ve Ngewɔ wɛ, a mu mu lɛɛvui kpɛlɛɛ ve ngi wɛ. 2A ndii gole gɛ a mue wu liisiahu. Muii yaa nyamu gani a numu gbi; muii yaa numu gbi lalei a Ngewɔ hunyanini, tawao muii yaa hani gbi gbuani numu gbi yeya a kava. 3Ngii ji lema aako wu gili la kɛ wu nyamu lɔ wienga; ajifa kia ngi ndenga la ngovama, mu longɔe a wue hulewengɔ na hii gbɛogbɛ ɛɛ gu aa mua wueni luahu gɔlɛ, hee vulii bɛɛ ɔɔ hani weka gbi lekee ndɛvui ji hu. 4Nya langɔ waa le a wue tawao nga mata waa gbualɔ a wue! Kpalɛi ji kpɛlɛɛ i langa mu ma ii yaa pieni ngaa yɔkɔ; tawao nya goohu nɛngɔe watii gbi. 5Kia bɛɛ mu foni Masidonia lɔlei hu muii lɛɛvuni kulo bɛɛ. Fawɔlisia ti yɛlɔ hu gbi, nungaa lɛɛnga ta wa a njiɛisia mu mahu, mu lii hɛlɛngɔ. 6Kɛɛ Ngewɔ na a ndiinyanimɔi nɛpɔ, i mu nɛpɔilɔ a ji Taitɔs i wani. 7Ngi walei lekee ii le aa mu lii nɛɛ, kɛ ji i gonani a nɛpɔyei na wu ngi lii nɛpɔni la. I hugɛilɔ a mue yɛ wu longɔ waa le wu nya lɔ gbɔma, yɛ wu lii mɔnɛngɔe na va wu pienga a nge, tawao yɛ wu magbatɛngɔ waa le nya mayialeva; famia nya goohunɛɛi maa i toilɔ waa. 8Gbamaile ina bɛɛ kɔlɛi na ngi nyɛini wu gama i wu mamanuilɔ, kɛ nya lii ii nyanini nyɛiva. Nya lii aa nyanilɔ ji ngi tɔni kɛ yeekɔlɛi i wu mamanuilɔ kia bɛɛ watii wulo lekee vamia. 9Kɛɛ kiahuna na, nya goohu nɛngɔe, tii yɛma jifa ngi pieni wu maa i manu, kɛɛ jifa wu liinyani i pielɔ wu wu luvayiisia maluve. Wu guilɔ yeendinyanii bu a pelei na Ngewɔ longɔ la, faale muii hinda gbi hunyanini wu ma a kɔlɛi na nyɛila. 10Gbamaile ndiinyani na a nɛɛ Ngewɔ wɛ a pielɔ numu lii i wote pelei na hu a li a ngie kunafɔ lɛɛvui hu tawao ndiinyani ii na hu! Kɛɛ ndiinyani na a nɛɛ numu wɛ a wa hee lɔ ngi mahu. 11A tɔ lɛɛ kia wu nda liinyani na nɛngɔ Ngewɔ wɛ i pienga wu maluvenga: i pielɔ wu maa i gbɛli kɛva kɛ wuii nyamu gbi wieni. Wu lii i leweilɔ na va i wieni, wu luwa na ma a gbua hu. I pielɔ nya lɔ-mani i wu lɔ; i pieilɔ wu maa i gbɛli nya magaova kɛɛ kpalɛ lava numui na ma i yeenyamui na gani. Yeehindei ji hu gbi wu kɛilɔ kɛ wu nda gbi ii na ma i wieni. 12Faale kia bɛɛ ngi kɔlɛi na nyɛini, numui na va ii le i nyamui gani ɔɔ numui na ti nyamui gani a ngie. Ngi nyɛilɔ ngi hugɛ gbalauŋ a wue kɛ Ngewɔ i ndoma wai na gɔɔlɔ wu piengɔ a mue. 13Faale mu lii i nɛɛilɔ waa, kɛɛ Taitɔs nda goohunɛɛi i mu lii nɛɛilɔ tewengɔ na ma. Ajifa i hugɛilɔ a mue yɛ wu pielɔ ndiihɛlɛi kpɛlɛɛ i gbua ngi ma. 14Ngi lawoeilɔ vulii Taitɔs gama a wu hinda tawao wuii nya yawufeni. Ma tɔnya yiɛi lɔ le wu ma watii gbi tawao ndawoei na bɛɛ mu pieni Taitɔs gama lekee i yɛnga a tɔnya. 15Famia ndomɛi na i piengɔ a wue maa lɔ toma lekee, ji i gilini a kuloi wu wua yekpe guloni la kɛɛ baagɔma wai na wu feni ngi wɛ kɛɛ ji wu kpɛlɛɛ wu valangɔ yɛla golova na gbi bu i wu gaani la. 16Nya goohu nɛngɔe jifa nga gulɔ ngi la a wue pandawanda.

2 KƆLINTIBLƐISIA 8

1Mu mbaa Kristimableisia, mu longɔ wu kɔɔ gbɔɔ Ngewɔ yauwandei i pienga Kristimablei nasia lia ti Masidonia lɔlei hu gbi. 2Mu mbaa Kristimablei nasia ti Masidonia, hinda gbɔugbɔu gboto i langa ti ma kɛɛ ti goohu nɛngɔe kpele gbi. Ti nyaningɔ waa le gbɔma kɛɛ ta hani gboto waa lɔ ve. 3Nga gulɔ a ndela wu ma kɛ a ti nyɛkɛ ti na veilɔ ta gu ma, tawao tewengɔ bɛɛ na ma ta gu ma. 4Ta mu manɛnɛ tɛɛ mu pie ti gbɛɛ nasia ma ti gbɔma Ngewɔblei nasia ma ti Judia. 5Ti wiehindei ji lewengɔ yɛla na ma mu lii yɛ ma! Ti tia yekpe yese veni Ndemɔi wɛ; na wooma ti tia yekpe ve mua bɛɛ wɛ kia i nɛni Ngewɔ wɛ kɔɔ ti pie. 6Taitɔs lɔ i navoo gboto ve-yengei ji lɔtoni wu lia, faale mu ngi manɛnɛilɔ muɛɛ i madi hou i gbɔ wu ma wu yeendoma yengei ji yakpua. 7Hindei kpɛlɛɛ hu wu lewengɔe Kristimablaa wekeisia ma: wu layii hu a Kristi, Ngowili Yekpei lelei hu, tɔnyɛi gɔɔlɛi hu, wu lumayii hu kpɔma wieva kɛɛ wu loyii hu a mue. Faale nya longɔ wu lewe pekeisia ma ndoma yengei ji bɛɛ hu. 8Sawangaa ii le ngaa yɛ ndama. Kɛ ngi laalilɔ Masidoniableisia ti magbɛliyii ma kpɔma wieva aako ngi pie wu kɛ kɛ wu lomɛi tɔnya le. 9Wu hugɔɔlɔ vulii pandawanda kia mu Lemɔi Yesu Kristi yauwandei i na; i pielɔ kia bɛɛ i yɛ Ngewɔyɛi yeekpatɛi hu, i wailɔ dunyei hu i wote a nyanimɔ wu va, yeenyanii ji va wu gbatɛ Ngewɔ gɔla hu. 10Kpɔma navoo velei va, nya langɔ la mahoungɔe wu na yakpua wu tɔtoni voonu. Ii gɛlɛni felei lekee ma, wua yese wu lii nɛni feva. 11A madi hou na wu yeengengei na wie! Wu maa i gbɛli kpɔyɔva kia wu maa i gbɛlini hugbatɛva, tawao a pie a na i wu yeya kiahuna. 12Wu maa i gbɛlingaa hani veva, Ngewɔ goohu a nɛɛlɔ na va bi gbayei a gu a fela kpoto. Ngewɔ lii ii wu ma na veva ii wu yeya. 13Ngii lapima kaha minimini lava wu wumba, ngi yee powopowoisia la pekeisia wumba; 14kɛɛ kia hani i wu yeya sɛmbɛngɔ kiahuna, mahoungɔ wu gbɔ nasia ma hinda gbɔungɔ ti laa. Na wooma hinda i gbɔungaa wu laa tawao hani gbotongɔ ti yeya, ta gbɔlɔ wua bɛɛ ma, kɛ wu maa i hɔɔnga. 15Kia nyɛingɔ la Ngewɔ gɔlɛi hu, “Nasia ta mɛhɛɛ lɛma kpoto, hani gbi ɛɛ mɔnu ti yeya, tawao nasia ta tɛma kulohii ɛɛ gbɔyɔ ti yeya.” 16A mu siɛgboto gbua Ngewɔ ma jifa i pienga Taitɔs maa i gbɛlinga gbɔva wu ma kia lɔɔ mu na. 17Ajifa ii gɛlɛni na ma i lumani gbɔva wu ma ji mu ndeni ngi ma; ngi maa gbɛlingɔ yɛla pɛiŋ gbɔva wu ma tawao ngi magbɛlingɔ yɛla a ngi nyɛkɛ liva wu gama. 18Mua ta kɛɛ mu mbaa Kristimamɔi na yoyoma Kristimableisia gbi gama ti bagɔnga ngi ma Sɔsiisia gbi hu Ngowili Yekpei vayava hu. 19Ii gɛlɛni na ma Kristimableisia gbi ti ngi gɔɔngɔ pandawanda ti gbi ti loko longa ngi ma kɔɔ mua tieni mu ya a lewetewe. A gbɔlɔ mu ma ndoma navoei ji hugbatɛva ma tɛma, wava a ngɔlɔya mu Lemɔi gama, kɛɛ kɛva kɛ mu magbɛlingɔe gbɔva mu mbaa Kristimablei nasia ma hinda gbɔungɔ ti laa. 20Mua mua yekpe mahugbeema vulii aako maa pie numu gbi i gbonyɛ a mue pelei na va mu navoo gbotoi ji yayengema. 21Na mu kɔima tamia a pɔɔna wiela Ndemɔi yaama kɛɛ nuuvungaa bɛɛ. 22Faale mua gbɔma mu mbaa Kristimɔ weka yoyoma. Mu ngi hugɔnga kpoto tawao mu tɔnga kɛ watii gbi ngi magbɛlingɔe kpɔma wieva. Tawao kia na i langa waa hii a wue, ngi magbɛlingɔe tewengɔ yeengovei ma gbɔva wu ma. 23Taitɔs ta, nya mbaa mia tawao mua tamia ma yenge gbɔva wu ma; mu mbaa Kristimablei felei nasia taa tieni ti lima tia lɔ Kristimablei nasia kpɛlɛɛ ti yaamɛi a tie tawao ti yengei a walɔ a ngɔlɔya Kristi ma. 24A ndoma gɛ a tie aako Kristimableisia kpɛlɛɛ ti mɛni ti la la kɛ muii ndawoo gbama wieni a wue.

KƆLINTIBLƐISIA 9

1Maa ii houni bɛɛ ngi yɛ a kɔlɔ nyɛi wu gama kɔloongɔ kpɔmɛi ji ma wa njoyo mu mbaa Kristimablei nasia wɛ ti Judia lɔlei hu. 2Ajifa ngi kɔɔlɔ kɛ wu lumangɔe kpɔma wieva tawao ngi lawonga a wue Kristimableisia kpɛlɛɛ gama ti Masidonia ngɛɛ, “Mu mbaa Kristimablei nasia ti Akaya lɔlei hu ti magbatɛngɔe kpɔma wieva i hiye voonu ma.” Kpɔma lii na i wu goohu i ti gbi lii wɔlɔnga nyɔkɔ wieva. 3Faale nyaa na mu mbaa Kristimablei jisia looma wu gama aako ndawoei kpɛlɛɛ mu pieni a wue yeehindei ji hu aa yɛ a njɛpɛ gbama. Kɛɛ kia lɔɔ ngi ndeni la Kristimableisia ma Masidonia, wu magbatɛngɔ a yɛla a kpɔma navoo. 4Na hu gbi, ina mua Masidoniableisia mu wailɔ wu gama kɛɛ muii maleni kpɔma navoo aa yɛ wu yeya, maa a wufe kpa, wu nda wufei va lee yana, kɛ mua bɛ va, jifa mu lani a wue. 5Faale ngi tɔilɔ kɛ mahoungɔe ngi mu mbaa Kristimablei jisia manɛnɛ liva wu gama nya gulɔ aako wu kpɔma navoei na lɛma wu yɛ Lahei wumbuni feva; aako wu tɛma pɛiŋ mu yaa foo. Wa fe a wu nyɛkɛ lɔ, tɛɛ kpua wu yeya a kpaya. 6I hitɛ wu wɛ kɛ numui na a tuhani hii kulo hii, a tewe kulo hii; kɛɛ numui na a tuhani hii kpotongɔ, a tewelɔ kpotongɔ waa. 7Numu gbi i na ve hɔɔ a wu ngi lii hu feva; aa fe a ndiinyani ɔɔ bi tɔaa bɛɛ ngi magba le, gbamaile Ngewɔ longɔ a numui na lɔ a hani ve a kohunɛ. 8Ngewɔ a gulɔ a wu gɔla a na wu gbewengɔ fa yeemaalema aako na wa gbewe fa wua yekpe va a yɛlɔ wu yeya kpele gbi kɛɛ yeemɔnu gboto hinda yekpe gbi wieva la. 9Ngewɔ Gɔlɛi yɛ, “A hani velɔ kpotongɔ waa nyanibleisia ti wɛ; ngi hindawanda wielei ɛɛ gɛlɛ kunafɔ.” 10Ngewɔ lɔ a tuhani galɛi ve numu wɛ hiiva, i ngi gɔ a mɛhɛɛ mɛva. Faale Ngewɔ a tuhani galɛi na kpɛlɛɛ velɔ wu wɛ wa gu a hiila tawao a pielɔ yeetuhani i yekpe, i wua. Ji wiengaa kɛ kpɔma-hani na wa fe i gbotonga kia tuhani a wua. 11Ngewɔ a pielɔ wu gbatɛngɔ i yɛla kpele gbi kpɔma-hani waawaa veva watii gbi aako numu gboto ti siɛgbua Ngewɔ ma wu gbɔma-hani va ma li la ti wɛ. 12Gbamaile ngengei ji wu piema ɛɛ haani lekee gbua wu mbaa Kristimableisia ma kɛɛ a pielɔ numu gboto ti siɛgbua Ngewɔ ma kaka. 13Gbamaile ngengei ji wu piema a kɛlɔ ina yeelɔ a wue, tawao a pielɔ ti Ngewɔ lato, wu goloyii va Kristi Wowili Yekpei na bu wu langɔ la. Ta gbɔma Ngewɔ latolɔ wu gbekpeyei va ti gama kɛɛ mu mbaa Kristimablaa wekeisia. 14A ndomɛi ti pieni, ta Ngewɔ vɛlilɔ wu va, jifa Ngewɔ i ngauwanda wai na gɛngɔ a wue. 15A mu siɛgbua Ngewɔ ma ngi gbekpeyei na va mue gu a hugɛla.

2 KƆLINTIBLƐISIA 10

1Nya, nya Pɔɔl nya vulii lɔ naa wu manɛnɛma. Nungaa lɛɛnga lɔ ndema tɛ ngi yɛngaa wu lia nya luwangɔ a yɛla a yɛpɛla, kɛɛ nya maa i guhangaa kɛ ngi ndiiloi wienga. Nya longɔ nya mayeingɔ i yɛla tawao nya hindawandangɔ kia Kristi i yɛ na. 2Faale nyaa wu manɛnɛma, waa pie ngaa yaa wu gbalɛ ji nga foo wu ma! Ngi kɔɔlɔ kɛ nga gulɔ a ngagbalɛ hinda wiela a nungei nasia ti ndema tɛɛ nya layieisia kɛɛ nya wiehindeisia ti yɛni a dunyamamɔ gbama nda lɔ. 3Tɔnya le kɛ mua dunyei ji hu kɛɛ muii jiama a dunyama nɛmahulewe mu gɔisia vayava. 4Kɔhakei nasia ma lapi la tii yɛni a dunyei nda gbatɛngɔisia, ti yɛni a Ngewɔ gɔ-hani gbayangɔi nasia lɔ ma gɔlɔ gbayangɔngaa wongoo la. 5Mamani mawali gbi nungaa ta hou kɛɛ gbani gbi ta ngili aako nungaa taa Ngewɔ gɔɔ, yeekɔ-haakei jisia ta gulɔ a hunyanila. Nasia ti gangangɔ a Ngewɔ, ma ti giliyii houlɔ a yeekɔ-haakɛi jisia, mu yama a tie Ngewɔ gama mu ti yɛ a nungei nasia ti liima a yɛ a golola Kristi lɔ wɛ. 6Ma yeekɔ-haakɛi jisia yayengelɔ kangamɔ gbi ma a lo, ji wua yese vulii wa kpɔyɔ a golola pandawanda. 7Na i wu mɔnɛngɔ tamia a ji wu hindeisia gbema a mahu we kɛɛ wuii mbu gɔɔ. Ina numu gbi ngi gilingɔe la kɛ Kristi woo lɔ a ngie, i gili gbɔma a ta yekpe ajifa Kristi woo lɔ a nge kia lɔɔ yeenumui na i na. 8Mu Lemɔi Yesu Kristi i kpaya venga mu wɛ wu maahu kɛɛ wu nyaniva ii le; wu gbekpeva le, tawao kiaa bɛɛ nga lawolɔ a yeekpayei ngi pili kulo kaalɛ wooma, ngɛɛ wufe. 9Ngii loni wu gili la kɛ nyaa lapima wu huluwava a nya gɔlɛisia. 10Ajifa nungaa lɔ ndema tɛɛ, “Pɔɔl maguhangɔ yɛla a njɛpɛ yagbalɛngɔ lekee lɔ le mu ma ngi gɔlɛisia hu, kɛɛ i fonga mu ma baagɔma yekpe gbi ii ngi ma tawao gbɛogbɛ ii ngi layie hu.” 11Mahoungɔe nungaa bondɛi nasia ti kɔɔ kɛ na lɔɔ ma nyɛi kɔlɛi nasia hu nga nyɛi wu gama, ta lɔ nga pie ji nga wa wu gama. 12Ɛɛ hitɛ mu wɛ kulo bɛɛ ndeva muɛɛ mu mahɔngɔe mua nungei nasia ta tia yekpe lɛ ɔɔ mu huma ti ma. Ti gbowani kpa! Ta tia yekpe huma ti nyɔunyɔ lɔ ma tawao tia yekpe lɔ ta ti gɛlɛmɛi na gɛ a bɛ ti ma. 13Na hu gbi muɛɛ lawo maa pili kaalɛ wooma; ma gɛlɛ kaalɛi na goohu lɔ Ngewɔ i na venga mu wɛ yengeva na tawao wu yeekaalɛi goohu lɔ. 14Jifa wu yeekaalɛi ji goohu lɔ, muii windɛni kaalɛ wooma ji mu wani wu gama a Ngowili Yekpei ndalongɔ Kristi ma. 15Faale muɛɛ lawo a ngengei na nungaa wekangaa ti pienga kaalɛi nasia wooma Ngewɔ i feni mu wɛ. Na mu lii i ma ta lɔ a ji wu lalei a Kristi a gbaya aako mu gu a ngenge jɛmbɛ wiela wu lia tewengɔ yeengovei ma, watii gbi mu kaalɛi na goohu Ngewɔ a kɛ a mue. 16Na wiengaa ma gulɔ a Ngowili Yekpei lelaa ndɔlɔ wekangaa hu ti ma guhangɔ tawao muɛɛ lawo a ngengei na ti wilanga a piela numu weka nda gakamɛi. 17Kɛɛ kia Ngewɔ Gɔlɛi i ndeni la yɛ, “Numu gbi lekee ngi longɔ i lawo, i laawo a na Ndemɔi i pienga.” 18Ajifa ɛɛ nasia gulu ta tia yekpe lato, Ndemɔi a nasia lɔ gulu ta vulii a ti lato.

2 KƆLINTIBLƐISIA 11

1Nyaa wu manɛnɛma ngɛɛ nya luvayii i gu wu hu, ngi kpowa hinda wulo bɛɛ wie. Kɔnɛɛ bɛɛ le! 2Nyaa wu malolo gbuama kia lɔɔ Ngewɔ i piema; wu wiengɔe kia mbɛlɛhu-nyahɛi na i na, ngi Lahei wumbunga feva hindo yekpe wɛ a ngi nyaha, yeehindoi lɔ a Kristi vulii. 3Kɛɛ nya liihɛlɛngɔe ngɛɛ na wɔɔ i Iiv wieni aa wu wie. Kali gasongɔ yɛla tawao i pielɔ Iiv i jumbu hinda wie. Wua bɛɛ ta wu wuhu nyanilɔ hii, wu gbe a lola a Kristi yakpe. 4Ajifa numu gbi lekee a wa wu gama a Yesu weka hinda hugɛ i gba na ma mu ngi hinda hugɛma, wa loko heilɔ ngi bu a kohunɛ; tawao wa ngafa kɛɛ ngowili gululɔ ti gba polouŋ Ngewɔ Yafei kɛɛ Ngowili Yekpei na ma, wu majɔɔni a mue! 5Kɛɛ nungei nasia wu ti wumbungɔ a Ngewɔ lutu waawangaa tii leweni nya ma kulo bɛɛ. 6Kia bɛɛ nya laahu ii leweni a yɛpɛla, ngi Wowili Yekpei na gɔɔlɔ pandawanda nga nde wu ma tawao nya langɔ la wu ji gɔɔlɔ na ajifa mu pienga leiŋ wu gama kaka a pelei gbi. 7Ngii hani gbi gbuani wu yeya ji ngi Ngewɔ Ngowili Yekpei leni wu ma; ngi nya yekpe mayeilɔ kɔɔ baagɔma i yɛ wu ma. 8Watii na ngi yɛ yengema wu lia Kristimablaa wekangaa lɔ ti yɛ nya pawa. Nga gulɔ a ndela kɛ ngi ti humɛilɔ aako ngi gbɔ wu ma. 9Tawao watii na ngi yɛ wu gama ngi gbeweilɔ navoo va kɛɛ ngii wɛlɛni wu ma gbɔva nya ma; mu mbaa Kristimablei nasia ti gbuani Masidonia lɔlei hu ti wailɔ a hani kpɛlɛɛ nya gbewengɔ yɛla fa. Kia lɔɔ wɔɔ nga pie, hii ngi loma piema; ngɛɛ kaha gbi la wu wumba. 10Kristi a tɔnyɛi lɔ wɔɔ le watii gbi tawao yeehinda yakpei mia ngi piema ji ngi ndema ngɛɛ matɛi ji ngi kpuama a wue navoo hindei va, numu gbi ɛɛ gu aa pie ngi gbe a kpuala Akaya lɔlei hu gbi. 11Ngi ji lemaa jifa ngii loni a wue? Ngewɔ kɔɔlɔ kɛ nya lɔnyangɔe a wue. 12Na ngi piema kiahuna nga yɛlɔ a pie, tawao ngɛɛ hani gbi hou wu yeya fa, ngii loni nasia wu ti wumbungɔ a Ngewɔ lutu waawangaa ti sabu gbi jɔɔ lawova tɛɛ ti yengema a pelei na lɔ nga pie la. 13Gbamaile ndɛɛ lutungaa lɔ a numu bondɛi nasia, ta ndɛi guala kɔlooni ti yengei ma, ta tia yekpe maluve aako ti gbua a Kristi loblaa yekpeisia. 14Na ɛɛ gɔla numu gbi ma! Jifa Seitana vulii bɛɛ a ta yekpe maluvelɔ a malikei na a voo. 15Faale ɛɛ gɔla numu ma ina ngi yengebleisia ti tia yekpe maluveilɔ ti gbua a pɔɔnamɔi yengebleisia. Kɛlɛmɛi, Ngewɔ a ti hinda nyamuisia yeekpalɛi lɔ la ti ma. 16Nyaa wu manɛnɛma gbɔma: waa gili la kɛ ngi gbowangalɔ ji ngi yɛpɛma hii. Kɛɛ wu gili bɛɛ hii, mahoungɔe ngi lo kpowɛi hu wu woolo nya ma aako hinda wulo i yɛ na nya bɛɛ nga lawo la kia ti piema. 17A tɔnya ndawoei ji nyɔkɔ ii le Ndemɔi aa nya lo piema ajifa nyaa hindei wiema kia kpowamɔ vulii. 18Kɛɛ jifa numu gboto lɔ miando ta lawo wu gama tɛɛ ti gabandengɔ waa le a dunyama hanisia, gbɛɛ nya bɛɛ ngi laawo: 19wua vulii wuɛɛ wu nɛmahulewengɔ, famia wa woolo kpowablaa ma a kohunɛ! 20Ajifa a gulɔ wu hu ji nungaa ta wu wote a ti luwɔngaa ɔɔ ta wu yeyahani kpɛlɛɛ mɛ ɔɔ ta wu gava ɔɔ ta lɛɛ wu hu ɔɔ ta wu baama gbolɛ. 21Nya wufengɔe lumava ma kɛ kaahu ii yɛ mu ma kɛɛ ndiilo hinda bondɛi nasia wieva! Kɛɛ na gbi lekee ta liilo ti lawo la nyaa gbɔma yɛpɛma kia kpowamɔ nya bɛɛ nga liilolɔ ngi laawo la. 22Kia lɔɔ Hibublɛisia a tie, hii ngi na. Kia lɔɔ Isrɛlblaa a tie, hii ngi na. Kia lɔɔ Ebraham bɔɔsɔɛisia a tie, hii ngi na. 23Ina Kristi yengeblaa lɔ a tie nya layie gbuangɔe a kpowa yia kɛ Kristi yengemɔ yekpe lɔ a nge i lewe ti ma! Ngi yengenga kpayangɔ tewengɔ ti ma, ti nya wunga kpindi-wɛlei bu kpotongɔ i lewe ti ma, ti nya lewenga kaka i lewe ti ma tawao hee i hɛlɛnga nya maahu pɛɛpɛ i lewe ti ma. 24Juubleisia ti mahublɛisia ti ndewe numu gbɔyɔngɔ maahu puu maahu taalui veilɔ mbɛ heima lɔɔlu. 25Heima sawa Rom mahangeisia ta nya lewe a nguliisia; heima yila nungaa ta lapi nya waava a ji ti yɛ nya hɔwɔhɔwɔ a kɔtiisia. Njaya-lɛndɛi i lɔmbunga a nge gboyei hu heima sawa, tawao heima yila ngi luveilɔ gboyei hu kpɛiŋ, ngi yii hu kpindi yila kɛɛ folo yila. 26Jia kpoto hu ngi kanga, kpundɛngaa ti hɛlɛnga nya maahu njaveisia hu, kɛɛ humablaa yeya, kɛɛ nya mbaa Juubleisia kɛɛ nasia Juublaa yaa tie. Kpundɛngaa ti hɛlɛnga nya maahu taa waawaisia hu kɛɛ ndɔgbɔ lambɛisia ma kɛɛ gboyeisia ya kɛɛ nungei nasia ti yɛ nde tɛɛ Kristimablaa lɔ a tie kɛɛ tii yɛni la. 27Ngi yengenga kpayangɔ waa nya gahu i gbɔyɔnga; njii gboto i nyaninga nya ma; ndɔlɛ gboto i nya lɔnga tawao nya bolohu a be; watii gboto ngii yɛ gu mɛhɛɛ ma kɛɛ njiima kɛɛ kula ngiliva. 28I baa ji kpɛlɛɛ ma kɛɛ pekangaa, ndiihɛlɛ minimini lɔ nya ma Tuuŋ Kristimablei nasia gbi va ti heiheini hu gbi. 29Kristimamɔ yila i yɛngaa nyɔngɛ, nya bɛɛ nga yɛlɔ nyɔngɛ; Kristimamɔ yila i wilingaa jumbu hu, nya lii a nyanilɔ waa. 30Ina kpɔndangɔe nya ma lawova, nga laawo a hindei nasia lɔ ta nya vakaleweyii gɛ. 31Mu Lemɔi Yesu ngi Yewɔɛi kɛɛ ngi Kɛkɛ na numui gbi ta ngi lato kunafɔ i kɔɔlɔ kɛ ngii ndɛɛ gulama. 32Ji ngi yɛ Damaskɔs, gɔvinei na i yɛ yenge Mahɛi Aritas bu i sojeisia loilɔ yee tei lamɛisia gbi aako ti nya hou. 33Kɛɛ nya mbaa Kristimableisia ti nya gbuɛilɔ tei hu a gɔlɛi yeefolemɛi wee ti nya yei bɛki hu ngi lɔwu ngi yeya.

2 KƆLINTIBLƐISIA 12

1Kpɔndangɔe nya ma lawova kia bɛɛ kpekpeya gbi ɛɛ gbua hu. Kɛɛ nga yɛpɛlɔ naa kɔloongɔ ndɔwuma hindei nasia ma Ndemɔi i kɛnga a nge. 2Ngi Kristimamɔ yila gɔɔlɔ na Ngewɔ i ngi jogbani i lɛ a ngie Aijɛnɛ yeemahuyei hu kungɔ na a foo puu maahu naani. Nya yekpe vulii mia ngi nya ma, kɛɛ ngii yaa kɔɔ ina ji i wieilɔ vulii ngi foo vulii aijɛnɛ ɔɔ ina hinda mia ngi hulɔni, Ngewɔ lekee lɔ i kɔɔngɔ. 3Gbɛɛ ngi nde gbɔma, ngi kɔɔlɔ kɛ Ngewɔ i nya jogbɛilɔ i lɛ a ngie aijɛnɛ. Ngii kɔɔ gbɔma ina i wieilɔ vulii ɔɔ ina hinda mia ngi hulɔni Ngewɔ lekee lɔ i kɔɔngɔ, 4tawao i hindangaa humɛniilɔ na numu ɛɛ gu aa hugɛ, hindangaa kpaya ii numu gbi wɛ yɛpɛva la. 5Faale nga lawolɔ a yeehindei jisia kɛɛ ngɛɛ lawo a nya yekpe, kɛlee hindei nasia ta nya vakaleweyii gɛ. 6Kia bɛɛ nga lolɔ ngi lawo, ngɛ yɛ a kpowamɔ, ajifa tɔnyɛi lɔ nga nde. Kɛɛ ngɛɛ lawo aako numu aa gili a nge tewengɔ na ma i tɔnga nya hu kɛɛ i mɛninga nga nde. 7Kɛɛ aako nya yaama aa lɛ kabande hinda gbotoi nasia va ngi hulɔni, Ngewɔ i kpalɛ nyamunyamu wɛlɛnga nya luwui ma. Yee kpalɛi lɔ a Seitana lutui yengei wie a ji a nya lewe aako kunafɔ nya yaama aa lɛ hulewengɔ. 8Heima sawa ngi yɛ Ndemɔi manɛnɛ ngɛɛ i kpua nya ma. 9Kɛɛ i ndeilɔ nya ma yɛ, “Ngauwanda wai ji ngi piengɔ a bie a gulɔ bi va, ajifa watii na ba yɛ nyɔngɛnyɔngɛ, yeewatii mia nya gbayei na i bi hu a yenge i lewe kpɛlɛɛ ma.” Kiahuna nya goohu nɛngɔ waa le lawova a nya yɛla nyɔngɛnyɔngɛ aako Kristi gbayei i yei nya ma nya mahugbeva. 10Faale nya goohu nɛngɔe ji kpalɛ a la nya ma Kristi va. Nya gbewe ii fakalewe hu ɔɔ mbɛlɛnyani ɔɔ hou nyamu ɔɔ hinda gbɔugbɔu ɔɔ fitini hu. Gbamaile watii na nga baa a nya nda gahui kpɛlɛɛ, ta lɔ Kristi gahui a wuaa nya hu. 11Nya luvama kia kpowamɔ na, kɛɛ wua mia wu kpɔndanga nya ma pieva. Wua mia mahoungɔ wu nya lato. Gbamaile ngii yɛni bɛɛ a gbɛogbɛ, nasia wu ti wumbunga a Ngewɔ lutu waawangaa tii leweni nya ma a pele gbi. 12Kabande hinda waawaa gbotoi nasia ta kɛ kɛ Kristi loomɔ mia a nge, ngi ti wielɔ wu lia a ndiihou wa. 13Gbɔɔ ngi pienga sɔsiblaa wekangaa wɛ tamia ngi pieni wu wɛ, kɛlee ji lekee ngii loko heini wu wɛ navoo va nguava nya mahindeisia hu. A manu nya ma nyamui ji va ngi pieni a wue! 14Heima yeesawa lɔ na ngi nya magbatɛnga wava wu gama tawao ngɛɛ loko hei wu wɛ hani gbi va ajifa wu yeyahani ii le ngaa lo la kɛ wua vulii. Gbɛva sie ndeengaa ii le mahoungɔ ti ti leblɛisia gɔ, ndebleisia lɔ mahoungɔ ti ti leengeisia gɔ. 15Nya goohu a nɛɛlɔ nya yeyahani gbi veva kɛɛ nya gbuhɛi vulii gbɔva wu ma. Wa lolɔ a nge kulo hii jifa nya longɔ a wue hulewengɔ? 16Wa lumalɔ ma na kɛ ngii wani a navoo hinda yeekaha gbi wu maahu. Kɛɛ wu lɛɛnga wa ndelɔ wuɛɛ kaasoo mia ngi kulanga wu ma, ngi wu hounga kia mani a ndei. 17Kɛɛ nga yee na wie? Tutui nasia ngi ti loni wu gama ti hani gbi gbuɛilɔ wu yeya? 18Ji ngi Taitɔs manɛnɛni ngɛɛ i li wu gama, ngi pielɔ taa mu mbaa Kristimamɔ weka ti li, Taitɔs i hani gbi gbuɛilɔ wu yeya ta yekpe va? Mua ta ma yenge ngafa yakpei hu lɔ, mua ta ma jia mu nyɔunyɔ gɔɔwɔi hu, ma hinda gbi wie a pele yakpei. 19Tɛnga wuaa wɔɔ gba gilima kɛ mua mu magaoma wu gulɔ. Na ii le kulo bɛɛ. Ma tɔnyɛi lɔ le kia Kristi longɔ mu nde Ngewɔ gulɔ, tawao, nya liima ndiamɔisia, hindei gbi ma pie, mu piema gbɔva lɔ wu ma. 20Nya liihɛlɛngɔe tɛnga ji nga wa wu gama nga male wu gba na ma nga lo la, tawao tɛngaa, wuɛɛ lo a na nga pie. Nya liihɛlɛngɔe tɛngaa nga male wa yianjia, wa tolo gbua wu nyɔunyɔ ma, wa liilewe wu nyɔunyɔ ma, wa gbewe wu gbekpeyei lekee va, wa yɛpɛ a wu nyɔunyɔ, wa mamani hindangaa wie, wa hindeisia huwu. 21Nya liihɛlɛngɔe vulii kɛ ji gbɔma nga wa, mu Yewɔɛi a nya yawufelɔ wu yaama tawao nga wɔlɔ nungei nasia kpɛlɛɛ va ti jumbui nasia wiema lekee ti piema wɔɔ ngovama, tawao tii yaa gbeni ngawufema hindei ma kɛɛ puegbuala hindeisia.

2 KƆLINTIBLƐISIA 13

1Heima yeesawa lɔ naa ngi wama wu gama. Ngewɔ Gɔlɛi yɛ, “Numu gbi i sawei nyaningaa, numu fele ɔɔ sawa ti seli tɛɛ ti tɔilɔ i pie.” 2Wu mbaangɛi nasia ti jumbu wieni ngovama kɛɛ yeepekeisia gbi, nya longɔ ngi ti laahii; ngi ti laahilɔ ji ngi pɛi yeefelei wieni wu gama, tawao nyaa ti laahiima gbɔma kiahuna lɛ nya maguhangɔ: kɛɛ watii wekei na nga wa nga kpalɛ lalɔ ti ma, ngɛɛ manu numu gbi ma. 3Tɔmaseli kpɛlɛɛ wu longɔ la nga felɔ wu wɛ kɛva kɛ Kristi mia i yɛpɛma nya hu. Kristi vakalewengɔ ii le ji wua tieni wa gbɔ hinda ma, a ngi gbayayii gɛlɔ wu lia. 4Tɔnya le kɛ Kristi vakalewengɔ yɛla ti ngi waani Krɔsii ma, kɛɛ Ngewɔ gbayei i pienga ngi vulungɔ kiahuna. Mua bɛɛ, ji mua Kristi-ni mu wilingɔ hu, mu vakalewengɔe. Kɛɛ kpelei na ma foo wu ma Kɔlinti, mua wueni mu hu i kpɔ, ma yɛlɔ mbɛya hu mua Kristi vulungɔi-ni, kɛ mu Ngewɔ gbayei majɔɔnga hinda wieva. 5A wua yekpe wogbɛ pandawanda aako wu tɔ ina wu langɔe vulii a Kristi. A tɔnya vulii wu kɔɔlɔ kɛ Yesu Kristi lɔ wu hu, ina ji wu wua yekpe wogbɛni wu tɔilɔ kɛ wu gbahailɔ. 6Nya langɔ la wu kɔɔlɔ kɛ ti mu wogbɛnga ti tɔnga kɛ toblaa mia a mue vulii a tɔnya. 7Kɛɛ mua Ngewɔ vɛlima kɔɔ waa hinda nyamu wie; kɛva ii le kɛ mu gungɔi, kɛɛ aako wu na wie pɔɔnangɔ, kia bɛɛ piengɔe bɛ kpahabublaa mia a mue. 8Jifa hindei nasia lekee ta Ngowili Yekpei lɛ gulɔma tia lɔ ma gu a ti wiela; muɛɛ gu a gbɛogbɛ wiela Ngowili Yekpei yamava wooma. 9Gbamaile mu goohu a nɛɛlɔ mua mu vakalewengɔ a yɛla kɛɛ wua wu gbayangɔ. Famia ma Ngewɔ vɛli aako wu li gulɔma a yɛla a Kristimablaa yekpengaa. 10Na vamia ngi ji kpɛlɛɛ nyɛima wu gama kia nya maguhangɔ a wue, aako watii na nga foo wu ma, ngaa sabu jɔɔ ngagbalɛ hinda wieva a wue ji nga yɛ kpayei na yayengema Ndemɔi i fenga mbɛ wu loova, wu wolova ii le. 11Faale naa, nya mbaa Kristimableisia, a mu kpɔkɔ-o. A lapi wu yɛ a Kristimablaa yekpengaa; a nya laahiisia wumbu; wu wo i yɛ yila, wu hei ndiilɛli hu, tawao Ngewɔ na ngi longɔ a ndoma kɛɛ ndiilɛli a yɛlɔ wu lia. 12A va wu nyɔunyɔ ma a ndoma lii. Ngewɔbleisia gbi mbei tɛɛ ta va wu ma kaka. 13Mu Lemɔi Yesu Kristi yauwandei kɛɛ Ngewɔ lomɛi kɛɛ 14Kayema Yafa mbaayɛi ti yɛ wu kpɛlɛɛ ma.

AMAZING GRACE BIBLE INSTITUTE