1 TIMOTI

1Nya Pɔɔl, tomɔ a nge Yesu Kristi va kia mu Bawomɔi Ngewɔ kɛɛ mu liivalamɛi Kristi i ndeni. 2Nya mia ngi kɔlɛi ji nyɛinga Timoti gama, nya hindoloi vulii a tɔnya mua ta mu langɔ a Ngewɔ. Mu Kɛkɛ Ngewɔ kɛɛ mu Lemɔi Yesu Kristi i bi gɔ a ngauwanda kɛɛ manuma kɛɛ ndiilɛli. 3Nya longɔ bi yɛ Ɛfisɔs, kia lɔɔ ngi liigbani bi ma pieva ji ngi yɛ pelei hu nga li Masidonia. Nungaa lɛɛngaa ti na tiaa ndɛɛ gaaisia gɛma a nungaa, tawao mahoungɔ bi nde ti ma a kpaya ti gbe. 4Nde ti ma ti loko gbua dɔmi gbualei nasia hu kɛɛ maadani ti laa gbawala guhaguhai nasia ta wa a ndabla gbamanga lekee; tɛɛ kpɔma gbi wie hugbatɛi na ma Ngewɔ pienga, na wu kɔɔngɔ jifa wu langɔ a Ngewɔ. 5Nungɛi nasia mabalila yeesabui lɔ a ndomɛi na mahoungɔ i gbua ndiigolengɔ hu, kɛɛ kiliya sɛwɛsɛwɛ, kɛɛ lanaya lɔnyangɔ hu. 6Nungaa lɛɛnga ti wounvenga jisia ma, ti gbulanga pele wɔnangɔi ma ti loko wilinga baaba lablangaa hu. 7Ti longɔ ti yɛ a Ngewɔ jawei yeekamɔnga, kɛɛ tɛɛ tia yekpe ti layieisia vulii yeembui gɔɔ ɔɔ hindei nasia ta yɛpɛ kɔlooni ma bi tɔa bɛɛ ti hugɔɔlɔ wa. 8Mu kɔɔlɔ kɛ Sawei gbekpengɔe ina nungaa ti ngayengeilɔ kia mahoungɔ ti ngayenge. 9Mahoungɔ vulii i yɛ wu nɛmahu kɛ Saweisia tii na numu yekpeisia va, kɛlee sawa nyaniblɛisia kɛɛ pienyamubleisia kɛɛ nasia tii gbeweni Ngewɔ va kɛɛ nasia jumbu wielei i ti gɔɔngɔ kɛɛ nasia tɛɛ hɛɛ Ngewɔ ma tawao tii gbeweni ti yafei bawola va kɛɛ nasia ta ti kɛkɛ-ni waa ɔɔ ti njeni kɛɛ numu waableisia, 10kɛɛ puegbuableisia, kɛɛ sɔɔ-nyamu wieblɛisia kɛɛ nasia ta nuuvuisia hou a kpaya kɛɛ ndɛɛ guaalablɛisia kɛɛ nasia ta ndɛɛ jelisia wuaa kɛɛ nasia ta hinda weka gbi wie tia kaa yekpei ti blangɔ nga. 11Yeekaai na i Ngowili Yekpei na hu lɔ toko wuaangɔ nya yeya nga nde, Ngowili Yekpei na i gbuani Ngewɔ wɔlɔngɔ lubangɔi gama. 12Nyaa siɛgbuama mu Lemɔi Yesu Kristi ma, na i kaahu venga mbɛ nya yengei va. Ngi siɛgbua ngi ma giliva la kɛ nya mahoungɔ yengeva ngi wɛ kɛɛ jifa i loko loni nya ma fa, 13kia bɛɛ ngovama wɔɔ ngi yɛlɔ a ngi yia-nyamu le, nga hitɛ ngi wooma a juwuya kɛɛ mbɛlɛnyani. Kɛɛ Ngewɔ i manuilɔ nya ma, ajifa ngii yɛ lani lɛ a ngie tawao jifa ngii yɛ kɔɔ gbɛmia ngi piema. 14Mu Lemɔi i ngi yauwandei yeilɔ nya ma kpotongɔ waa, tawao i lanayei ve mbɛ kɛɛ ndomɛi na mu woo le ji mua Yesu Kristi-ni mu wilingɔ hu. 15Tɔnya yia lɔ a ji, kungɔ a kulula kɛɛ lava la kɛ Yesu Kristi i wani dunyei hu jumbubleisia bawova lɔ. Ngi nyamuni jumbubleisia kpɛlɛɛ ma, 16kɛɛ Ngewɔ i manuilɔ nya ma aako Kristi i ngi liihouyii gɛ nya hinda hu, nya hii nya lewengɔ jumbubleisia gbi ma, aako i tɔmaseli gɛ a nasia kpɛlɛɛ ti wama lama a ngie ti kunafɔ lɛɛvui majɔɔ. 17Mbɛlɛhei kɛɛ ngɔɔlɔya i yɛ kunafɔ Mahɛi ma, na ɛɛ haa tawao numu ɛɛ ngi lɔ, Ngewɔ Yakpei, kunafɔ kɛɛ kunafɔ! Amiina. 18Nya loi Timoti, nyaa fɛimawoi ji loko wuama bi yeya, na ngoo i yakpe tia Ngewɔ lutuisia ti layie ti ndeni wɔɔ kɔlooni bi ma. Yee njɛpɛwoi nasia yayenge kia ndapi hakangaa aako bi ndapi gɔ pandawanda, 19bi langɔ tuuŋ a Ngewɔ tawao kiliya sɛwɛsɛwɛ bi hu. Nungaa lɛɛnga tii yaa wooloni ti giliyei ma, ti ti layii a Ngewɔ hunyaninga. 20Haiminiɔs kɛɛ Alɛksanda tia yeenungɛi jisia lia tawao ngi kpalɛ langa ti ma a ji ngi ti wuanga Seitana gbayei bu; ji a pielɔ ti gbe a Ngewɔ bɛɛnyanila.

1 TIMOTI 2

1Haala hinda, nyaa wu manɛnɛma kɛ wu yaa kponyɛ wiema Ngewɔ gama wa hɛɛ, wa ngi mɔli hinda gbi va ɔɔ wa siɛgbua Ngewɔ ma, a kpɛlɛɛ wie numui gbi va dunyei hu; 2mahangeisia va kɛɛ nasia gbi ti mu maahu, aako mu yɛ heini ndiilɛli hu fawɔli gbi ii mu ma, mu bagɔnga Ngewɔ ma, tawao ma tuvei nasia wie a nɛɛ ngi wɛ. 3Ji mia nyandengɔ tawao a nɛɛ mu Bawomɔi Ngewɔ wɛ, 4na ngi longɔ numui gbi ti bawo ti ngi lɔnyɛi gɔɔ. 5Gbamaile Ngewɔ yakpe, tawao numu yila lɔ na, na a pie Ngewɔ taa nuuvungaa ti hu i kpɔ, yeenumui mia a Yesu Kristi, 6na i ta yekpe veni nuuvungaa wumawova. Namia seli le a watii na mbɛngɔ ma kɛ Ngewɔ longɔ numui gbi ti bawo, 7tawao na vamia Ngewɔ i nya loni yɛ va a tomɔ kɛɛ Kaamɔ nasia va Juublaa yaa tie, aako ngi ngowili na le leiŋ kɔlooni lanayei ma a Ngewɔ kɛɛ tɔnyɛi. Tɔnyɛi mia ngi ndema; ndɛɛ yaa na ngaa yɛ kualama 8Watii gbi wu gomɛngaa Ngewɔ vɛliva, nya longɔ hingeisia ti yɛ a hɛɛ, hingei nasia ti tia yekpe vengɔ Ngewɔ wɛ, ta loko lɛ ngeleya ji ta yɛ hɛɛma, tɛɛ liilewe tawao tɛɛ ndabla wie. 9Nya longɔ gbɔma nyahangɛisia ti mayili yekpe wie tawao ti nɛmahulewe wie kɔlooni ti magulɛisia ma, tawao ti ya a tia yekpe mayili a pelei na a bɛ ma; taa ti wundie gbatɛ a voo dauŋ, taa kaningaa yili kpatɛngɔ a kanigbɔlu ɔɔ kɔtu jɛŋɛɛjɛŋɛɛngaa ɔɔ maayili baagbangɔngaa, 10kɛɛ ti tia yekpe mayili a hinda yekpengaa wiela, kia mahoungɔ nyahangɛi nasia va ta nde tɛɛ tiaa Ngewɔ vɛlima. 11Mahoungɔ nyahangɛisia ti gaa ndondohu tawao ti tia yekpe mayei. 12Ngii lumani nyaha gbi wɛ hinga gaava ɔɔ yɛva ti maahu, mahoungɔ ti maa i yɛ louŋ. 13Gbamaile Ngewɔ i Adam yese gbatɛni i yaa Iiv gbatɛ. 14Tawao Adam ii le Seitana aa ngi wɛlɛ; nyahɛi mia Seitana i ngi wɛlɛni i Ngewɔ jawei nyani. 15Kɛɛ ndoo lelei a pielɔ nyahɛi i mbawo majɔɔ, ina i nɔɛilɔ lala ma a Ngewɔ kɛɛ ndoma wiela kɛɛ kayema hinda wiela kɛɛ ta yekpe mayeila.

1 TIMOTI 3

1Tɔnya yia lɔ a ji: Numu i longaa i yɛ a Kristimableisia ti gulɔlomui, ngenge yekpe mia i longa la. 2Kristimableisia ti gulɔmɔ ngi nyamuma gbi ɛɛ yɛ na, nyaha yakpe mia a yɛ ngi yeya, ngi nɛmahu yakpangɔ kpele gbi, ngi gungɔ ngi lii ma, a hinda hugbatɛ pandaa, a hotangɛisia gulu ngi yepɛlɛbu; tawao ngi bɛingɔ a yɛla a nungaa gaala; 3maa ii houni i yɛ a ndɔhoumɔ ɔɔ ndapi gulamɔ; mahoungɔ ngi yagɔlɛngɔ i yɛ la tawao ii loni a njinjia; maa ii houni i lo kaka a navoei, 4mahoungɔ i gu a ngi nyahɛi kɛɛ ngi leengeisia hinda hugbatɛlaa pandaa, tawao i pie ngi leengeisia ti golo ngi wɛ ti baa gɔɔ ngi ma. 5Gbamaile numu ii bɛilɔ a ngi nyahɛi tia ngi leengeisia ti hinda hugbatɛla, a yee gu i Ngewɔblɛisia mahugbe? 6Maa i houni i yɛ a numu nina sɔsii hu aako aa mamani Ngewɔ aa ngi gula, kia wɔɔ i Seitana gulani la. 7A yɛ a numu lɔ nungei nasia Kristimabla yaa a tie ti baa gɔɔngɔ ngi ma, aako ngawufe aa ngi male, kɛ i wilinga Seitana mani hu. 8Mahoungɔ kpɔmablaa Kristimableisia lia ti luvayii nyandengɔ i yɛla tawao ti lɔnyangɔ; tɛɛ ndɔ gbɔle hulewengɔ tawao tii haami navoo va; 9mahoungɔ lanaya lɔnyangɔi na Ngewɔ i kɛnga ti hɛlɛ la nɛmahugili yekpehu. 10Mahoungɔ bi ti hugɔɔ pɛiŋ, ti gungaa na a Ngewɔ yengei wiela, bi pie ti yenge. 11Mahoungɔ ti nyahangɛisia bɛɛ ti luvayii nyandengɔ i yɛla tawao taa loko wili njɛpɛ-a-ngie hu; ti nɛmahui yakpangɔ a yɛla kpele gbi, ti wɔnangɔ hinda gbi hu. 12Mahoungɔ kpɔmamɔ gbi Kristimableisia lia ngi nyahɛi i yɛ yakpe, tawao i gu a ngi leengeisia kɛɛ ngi lehubleisia ti hinda hugbatɛla pandawanda. 13Kpɔmablei nasia ta ti yengei wie pandaa, baagɔma a yɛlɔ ti ma tawao ta gulɔ a yɛpɛla a ndiilo kɔlooni ti lalei ma a Yesu Kristi. 14Nya lii lɔ ma wava mu lɔ hugutungɔ, kia ngi kɔlɛi ji nyɛima bi gama, 15kɛɛ ngi gbɛndɛnga hu, kɔlɛi ji a pielɔ bi kɔɔ kia mahoungɔ mua Ngewɔ lehubleisia a mue ma luva, ndei na kɛngɔ a Ngewɔ vulungɔe sɔsii, ndɔkɔi na i looni tɔnyɛi bu. 16Numu gbi ɛɛ hou a mawali kia ndɔwuma hindei kɔlooni mu Yewɔi ma malɔwungɔ la. I gbuailɔ nga nuuvuya hu, Ngewɔ Yafei kɛilɔ kɛ ngi wɔnangɔi tawao malikeisia ti ngi lɔilɔ. Ti ngi yɛpɛi leilɔ kɛnyɛihu gbi, ti lailɔ a ngie dunyeihu gbi, tawao Ngewɔ i lɛilɔ a ngie ngelegoohu

1 TIMOTI 4

1Ngewɔ Yafei lɔ ndema leiŋ yɛ nungaa lɛɛngaa ta gbelɔ a lala a Ngewɔ kɛlɛma voleisia ma; ta gololɔ ndɛɛ gula yafeisia wɛ, ti ngafa nyamuisia ti gaaisia wumbu. 2Nasia ti yeekaa bondɛi nasia vayama hu tia mia a ndɛɛ gulablɛi nasia ta nungaa wɛlɛ, ti nɛmahugiliyeisia hu haangɔ, bi tɔaa bɛ ti mɔngalɔ a kɔlu gbɔlii. 3Numu bondɛi nasia mia ta nungaa gaa tɛɛ hinda nyamu le nyaha ɔɔ hini jɔva kɛɛ mɛhɛɛ lɛɛngaa mɛva. Kɛɛ Ngewɔ i mɛhɛɛi nasia gbatɛni mɛva lɔ, ji nasia ti langɔ a ngie tawao ti tɔnyɛi gɔnga ta siɛgbua pɛiŋ ngi ma hɛɛ hu. 4Hani gbi Ngewɔ i kpatɛnga kpekpengɔe; maa ii houni numu i gbele hani gbi ma tawao mahoungɔe bi siɛgbua Ngewɔ ma hɛɛ hu hani gbi va ba majɔɔ, 5ajifa Ngewɔ layie kɛɛ hɛɛ na ba pie tia mia ta pie Ngewɔ i yeemɛhɛi luba. 6Bi ndahii jisia vengaa mu mbaa Kristimableisia wɛ, ba yɛlɔ a Yesu Kristi yengemɔ yekpe, kia ba bi yafei makɛ a kaai nasia mu langɔ la kɛɛ tɔnyɛi nasia bi toma poma. 7Kɛɛ bia yekpe maguha a nasia tii Ngewɔ gɔɔ ti dɔma gbamɛi nasia tii nyandeni hugɛva. Ya a bia yekpe makɛ aako bi luvayii i nɛɛ Ngewɔ wɛ. 8Gaahu loliisia ta numu nafalɔ kulo, kɛɛ numu yafei yayengelɛi nafa lɔ hu a pelei gbi, ajifa ndɛvui a jɔlɔ hu kiahuna va kɛɛ kulɔmɛi kɛyila. 9Tɔnya yia lɔ a ji mahoungɔ kuluva a loko veenjɔɔ kɛɛ lava la. 10Ma lapilɔ mu yenge kpayangɔ ajifa mu lii valanga Ngewɔ vulungɔi ma, na a numui kpɛlɛɛ bawo kakayee nasia ti langɔ a ngie. 11Ndahii jisia ve ti wɛ kɛɛ kaai jisia. 12Baa luma numu gbi aa lɛɛ bi hu jifa ndopo a bie, kɛɛ yɛ a tɔmaseli Kristimableisia ta pookɔɔ, bi yɛpɛyii hu kɛɛ bi luvayii kɛɛ bi loyii a Ngewɔ kɛɛ nuuvungaa, kɛɛ bi layii a Ngewɔ kɛɛ bi sɛɛsɛɛyii Ngewɔ yaama. 13Haaŋ i lohu ngi wa, bi magbewei gbi la bi wote Ngewɔ Gɔlɛi gaala leenga faha hu, kɛɛ Ngewɔ yiɛi lela kɛɛ nungaa gaala. 14Baa Ngewɔ Yafei na gbua kɛwɛ i bi hu, na Ngewɔ i feni bi wɛ gbama ji ngi lutuisia ti yɛpɛni bi gama, kɛɛ kpakoleisia ti ti lokoisia wɛlɛni bi ma. 15Yɛ a hindei jisia wie, tawao bi bi lii kpɛlɛɛ wu na, aako numu gbi lee ti tɔ kɛ bia lɛma gulɔma. 16Bia yekpe yabɛɛ kɛɛ bi gaaisia.

1 TIMOTI 5

1Baa gbandɛ numui na la ngi wovangɔ bi ma, kɛɛ yɛpɛ ngi gama pandaa bi tɔa bɛɛ bi kɛkɛ mia a ngie. Hindo voningeisia hou kia bi ndeehingaa na, 2bi nyaha gbakoloisia hou kia bi njeni, bi nyaha voningeisia hou kia bi ndeenyahaleengaa, tawao bi sɛɛsɛɛngɔ i yɛla Ngewɔ yaama. 3Baagɔma ve ponyahangɛisia wɛ kakayee nasia tia lekee ti heini numu ii na aa gbɔ ti ma. 4Kɛɛ ndeengaa ti yaa ponyaha yeya ɔɔ taaleengaa, mahoungɔ ti namakɔli pɛiŋ a ti Yewɔi-vɛli yengei wiela ti bondɛisia gama aako ti ti leblɛisia kɛɛ ti maadani kɛɛ ti mamani ti gbekpeyɛi hunyɔɔ, ajifa na mia a nɛɛ Ngewɔ wɛ. 5Ponyahɛi na ta yakpe i heini numu gbi ii na aa ngi mahugbe, i lii valanga Ngewɔ ma, a ngi vɛli a folo kɛɛ kpindi kpɔma va. 6Kɛɛ ponyahɛi na a lewe lekee nɛnɛɛ wooma, i welanga a haala, kia bɛɛ ngi vulungɔ. 7Ndahii jisia ve ti wɛ kɔɔ numu gbi aa nyamu lɔ ti hu. 8Kɛɛ numui na ɛɛ ngi bondɛisia makɛ kakayee ngi lenyɔuisia, i mawalinga ngi lalei ma a Ngewɔ tawao kɛ i nyamuni nasia ma tii lani gbi a Ngewɔ. 9Baa ponyahangɛisia ti jikei mato a ponyaha gbi kɛlee ngi voo i lewe foo numu sawa gbɔyɔngɔ ma. I baa na ma, i hini yakpe lɔ wɔɔ jɔnga, 10tawao tɔwɔ yekpe i yɛ ngi ma hinda yekpengaa wieva, a yɛ a nyahɛi na lɔ i ngi leengeisia makɛni pandaa, a hotangaa lama gbatɛ ngi yeepɛlɛbu, a ngenge mayeingɔngaa wie ngi mbaa Kristimableisia va, a gbɔ nungei nasia ma kpundɛ a gula ti ma, i ta yekpe vengɔ kpekpeya wiela laasi gbi wɛ. 11Kɛɛ baa ponyahɛi yeefoningeisia ti lɛisia wu ponyahangɛisia ti la-gɔlɛi hu; gbamaile hini-mani i ti lɔnga ta wounvelɔ Kristi ma, 12kɛ ti Lahei yeehaalayei na nyaninga ti mbumbuni wɔɔ ngi gama. 13Ta gbɔma ti watii nyaanilɔ ta lewetewe nga, ta gbua pɛlei yeeji bu ta wuaa na bu; kɛɛ na nyamungɔ tewengɔ na ma ta mia a ji ta wote a njɛpɛ-a-ngieblaa tawao ta loko wili mbaa ti hindeisia hu, ta yɛpɛ a hindangaa maa ii houni ti yɛpɛ la. 14A fisalɔ nya wɛ ponyahɛi yeefoningeisia ti hini jɔɔ, ti ndeengaa le, ti ti wɛlɛbu hindeisia hugbatɛ, kɔɔ mu juwuisia taa sabu gbi jɔɔ mu nyamu leva. 15Ajifa ponyahangɛisia lɛɛngaa ti welanga bɛɛ a wounvela ti hitɛnga Seitana wooma. 16Kɛɛ Kristimableisia yeeponyahangaa ti yaa nyaha gbi ngi lei hu, mahoungɔ i ti mahindei wumbu, aa yeekahɛi na lukpe sɔsiblɛisia wumba, kɔɔ ponyahangɛi nasia tia lekee ti heini ti mahindei i yɛ ti ma. 17Kpakoloi nasia ta tokulɔ yengei wie pandaa, mahoungɔ yeengila gbi i numu fele pawa jɔɔ, kakayee nasia ta yenge kpayangɔ Ngewɔ yiɛi leva kɛɛ nungaa gaava. 18Ajifa Ngewɔ Gɔlɛi yɛ, “Baa nika-hinɛi layili ji ba pie a yɛ mbei yangama”; yɛ gbɔma, “Mahoungɔ ngengemɔi i ngi pawɛi majɔɔ.” 19Baa wolo mayiagɛ gbi ma ta kpakolo mayia gɛ la, kɛlee seli fele ɔɔ sawa ta seli pɛiŋ kɛ i yeehindei na wieilɔ. 20Nasia gbi ta jumbu hindeisia wie, jɔlɛ ti ma a kpaya kɔɔ yeemɔniisia ti luwa. 21Nyaa vulii ndema bi ma Ngewɔ gulɔ kɛɛ Yesu Kristi kɛɛ Ngewɔ malikeisia ngɛɛ bi hindei jisia wie ngi ndema bi ma, baa hinda gbi wie gba bi liimamɔ wɛ, ɔɔ ba pie gba numui na wɛ bi liimamɔ ii le. 22Bi maa aa gbɛli loko lava numu gbi ma ngi veva Ngewɔ yengei wɛ. Baa gbɛɛ nungaa wekɛisia ma ti jumbu hindeisia hu; loo sɛwɛsɛwɛya hu Ngewɔ yaama. 23Baa yaa nja lekee gbɔle; yɛ a ndɔ wulo gbɔle aako mɛhɛɛ i yɛ a vuka bi goohu jifa ba heegbɛ pɛɛpɛ. 24Nungaa lɛɛnga ti jumbuisia ti lailɔ kɛ, tawao ta maleilɔ ti gulɔ kpɛmbo voloi ma; kɛɛ nungaa wekɛisia ti jumbuisia numu ɛɛ humbu a tɔ kɛlee hu a lɛmbi kulo. 25Hii lɔɔ numu wiehinda yekpeisia ti laani ke tawao yeenasia vulii numu ɛɛ tɔ gbalauŋ tɛɛ gu a lɔwula.

1 TIMOTI 6

1Nasia nduwɔngaa a tie, mahoungɔe ti mbɛɛhei gbi ve ti luwɔkɛisia wɛ aako numu gbi aa njia nyamu le Ngewɔ biyɛi ma kɛɛ kaai mu nungaa gaama la. 2Nduwɔngei nasia Kristimablaa a ti luwɔkɛisia taa lɛɛ ti hu, ajifa ti ndeengɛisia lɔ a tie. Kia taa na wie, mahoungɔ ti yenge ti wɛ kpekpengɔ, ajifa nasia ti yengei a ti nafa ti yɛni a Kristimableisia lɔ ti longɔ a tie. Hindei jisia lɔ ba nungaa gaa la, tawao ba hugɛ a tie. 3Numu gbi lekee a nungaa gaa a kaa weka i gba polouŋ mu Lemɔi Yesu Kristi lɔnya yiɛisia ma kɛɛ mu Yewɔhindei yeekaai na ma nungaa gaa la, 4mamanimɔ waa mia a yeenumui na tawao ii gbɛogbɛ gɔɔ. Mani nyamu lɔ ngi ma kɔɔ taa nungaa ti yɛ a ndabla wie, ta yianjia kɔloongɔ njɛpɛwo ngilangila ma, tawao ji a walɔ a tolei kɛɛ mawali houleisia kɛɛ ngɛlisia kɛɛ kili nyamuisia a nungaa, 5kɛɛ ndableisia ndiima nyamublɛisia ta kpua nasia tɔnyɛi ii yaa ti hu. Ti gilingɔe la kɛ Ngewɔ yengei i yɛni a pele lɔ numu gbatɛva. 6A tɔnya, Ngewɔ hindei a pielɔ numu i gbatɛ waa ina na a sɔɔ a ngi liilɛlilɔ. 7Gbɔɔ mu wani la dunyei ji hu? Muii wani a gbɛogbɛ! Gbɔɔ ma gu a kpuala dunyei hu mu li la? Muɛɛ li a gbɛogbɛ! 8Faale, mu yɛngaa a gu mɛhɛɛ ma mɛva kɛɛ kula ngiliva, mahoungɔ na i mu liilɛli. 9Kɛɛ nasia ti longɔ ti gbatɛ, kɔlɛya a ti maleilɔ, ti wili mani hu, mani i ti lɔ kpowa hinda gboto wieva na a nungaa gbaalɛ tawao a tia vulii nyani i ti juku. 10Gbamaile ndomɛi na nungaa ta pie a navoei, hinda nyamui yeelasii gbi a gbua hu lɔ. Nungaa lɛɛngaa ti maninga navoo jɔɔ-manii ma ti gbenga ti lalei ma a Ngewɔ ti pienga ndiigbalɛ gboto i ti lii malenga. 11Kɛɛ bia, Ngewɔmɔ a bie, luwa hindei jisia kpɛlɛɛ ma. Lapi bi yɛ a pɔɔnamɔ, kɛɛ Ngewɔ gɔmɔ, kɛɛ lamɔ a Ngewɔ, ndoma i bi lii hu, ba gu hinda gbɔugbɔu bu, bi yagɔlɛngɔ. 12Piengɔe bɛɛ nasia ti langɔ a Ngewɔ ti piimɛ-mawali lɔ hounga; faale yeepiimɛi ji wie vulii a bi sɔbɛi gbi aako bi kunafɔ lɛɛvui majɔɔ bia yekpe va; jifa yeendɛvui ji lɔ Ngewɔ i bi lolini ma ji bi ndeni a bi lii gbi seli gboto yaama bɛɛ bi langa a ngie. 13Nyaa ndema bi ma a kpaya Ngewɔ yaama na a ndɛvui ve hani gbi wɛ kɛɛ Yesu Kristi na i laaligbani ngi lala ma a Ngewɔ Pɔntiɔsi Paileti gɔɔbu, 14ngɛɛ bi golo hindei kpɛlɛɛ bu ngi vɛlinga la bi ma, bi lo jiama a tie, baa kpulanga, i to folei nama mu Lemɔi Yesu Kristi a gbua nga. 15Ngi walɛi a bɛ kinɛiŋ lɔwɔi na lɔ ma Ngewɔ i ndani, Maha lubangɔ yakpei, mahangeisia ti Mahɛi, ndebleisia ti Lemɔi, 16ta yakpe mia ɛɛ haa kunafɔ; i heini fofoi na hu lɔ numu gbi ɛɛ gu a lukpela kpla. Numu gbi ii yaa wɔɔ gba ngi lɔni; numu gbi ɛɛ gu a ngi lɔla kunafɔ. Mbɛlɛhei i yɛ ngi ma kɛɛ kunafɔ gbayei! Amiina. 17Nde nasia ma ti dunyama hanisia yeekpatɛi hu taa mamani tawao taa liilo potepote hani na ma ta toli a kpatɛ, ti liilo Ngewɔ ma, na a hani gbi ve mu wɛ kpotongɔ waa mu goohu nɛva. 18Nde ti ma ti hinda yekpe wie, hinda yekpe wiela i yɛ a ti gbatɛ, taa mamani wie tawao ti magbatɛngɔ i yɛla nungaa wekɛisia gɔva ti yeyahanisia hu. 19Ti ji wiengaa kɛ tiaa kpatɛ lama gbatɛma tia yekpe va, na a yɛ a toma kpaukpau ti va kulɔma; tawao ta gulɔ ndɛvui na ma ndɛvui yeetɔnyangɔi le. 20Timoti, hindei kpɛlɛɛ ngi toko wuanga bi yeya, mahugbe pandawanda. Baa loko wili Ngewɔ-gɔɔ-vɛli yɛpɛ gbi hu kɛɛ baabaa mawali houlei na nungaa ta gbula ngi lɛi ma ta toli a “Hinda hugɔɔlei.” 21Nungaa lɛɛngaa tɛɛ yeehinda hugɔɔlɛi na lɔ ti wɛ, tawao i pienga ti baanga a pelei na ta jia la lava a Ngewɔ. Ngewɔ yauwandei i yɛ wu gbi ma.

AMAZING GRACE BIBLE INSTITUTE