1 TƐSALONIKABLƐISIA1 TƐSALONIKABLƐISIA 11Nya Pɔɔl, nya mia ngi kɔlɛi ji yoyoma. Mua Sailas kɛɛ Timoti, Wu Kristimablei nasia gama wu heini Tɛsalonika, mu Kɛkɛ Ngewɔ woo a wue tia mu Lemɔi Yesu Kristi. Ngewɔ i wu gɔ a ngauwanda kɛɛ ndiilɛli. 2Ma siɛgbualɔ Ngewɔ ma kpele gbi wu kpɛlɛɛ va, ma Ngewɔ vɛli wu gbi va watii gbi ma yɛ Ngewɔ vɛlima. 3Ajifa kpelema gbi lekee mu yaa mu Kɛkɛ Ngewɔ vɛlima, ma laalilɔ wu layii a Kristi yaayengeyii ma kɛɛ ngenge gbayangɔi na wu pieni jifa wu longɔ a ngie kɛɛ kia wu lii i looni mu Lemɔi Yesu Kristi ma kpaukpaungɔ. 4Mu ndeengɛisia, mu kɔɔlɔ kɛ Ngewɔ longɔe a wue tawao i wua wu wumbunga yɛva a ngi woo. 5Mu wailɔ wu gama a Ngowili Yekpei kɔɔlooni Yesu Kristi ma, muii wani a laahu-yɛpɛ gbama lekee, mu wailɔ a kaabande hindangaa Ngewɔ Yafei i pieni tawao mu kɛilɔ gbalauŋ kɛ mu langɔe la kɛ tɔnya vulii lɔ a yee-Ngowili Yekpei. Wu kɔɔlɔ kia mu yɛ luva la ji mu yɛ wu lia; wu nda gbekpeyɛi vamia na kpɛlɛɛ i wieni. 6Wu mu wookɔilɔ mua Ndemɔi-ni; tawao kia bɛɛ kpalɛ gboto i lani wu ma, wu lailɔ a yeengowili a Kohunɛ na Ngewɔ Yafei a fe. 7Famia wu woteilɔ a tɔmaseli Kristimablei nasia kpɛlɛɛ gama ti Masidonia kɛɛ Akaya. 8Ajifa ii gɛlɛni ngowili ma kɔlooni Ndemɔi ma wu fayani Masidonia kɛɛ Akaya, wu layii a Ngewɔ yeetɔwɔi i vayanga hu gbi. Famia njɛpɛ weka gbi ii na mahoungɔ mu nde. 9Nungei nasia kpɛlɛɛ lɔ yɛpɛma kɔɔlooni pelei na ma wu mu houni ji mu wani wu gama, kɛɛ ji wu wounveni nɔmɔliisia ma, wu wote Ngewɔ gama, yengeva tɔnya Yewɔ vulungɔi wɛ, 10kɛɛ ngi Hindoloi mawulova i hiye ngelegoohu i wa, ngi Hindoloi Yesu na i mbumbuni hee hu, kɛɛ na a pie mu bawo watii na Ngewɔ liilewe yagbalɛngɔ wai a hiti ma.1 TƐSALONIKABLƐISIA 21Mu mbaa Kristimableisia, wua vulii wu kɔɔlɔ kɛ pei na mu pieni wu gama ii yɛni a kɛwɛ jia. 2Wu kɔɔlɔ kia ti kpalɛ lani la mu ma, ta mu bɛlɛ nyani Filipai pɛiŋ mu yaa wa wu gama Tɛsalonika. Tawao kia bɛɛ nungaa ti yɛ lapi waa a mue, mu Yewɔɛi i mu gɔilɔ a ndiilo Ngowili Yekpei na leva wu ma a gbua ngi gama. 3Ji mu lapini aako wu la a Ngowili Yekpei muii ndɛɛ gualani tawao muii manɔhɔ hinda wieni tawao muii kava gulani numu gbi ma. 4Kia maa na wie, watii gbi ma na lɔ le Ngewɔ longɔ mu nde, ajifa i mu hugɔɔnga i tɔnga kɛ mu mahoungɔe Ngowili Yekpei loko wuava mu yeya. Muii lapima nuuvungaa liilɛliva, mu lapima Ngewɔ lɔ liilɛliva, na i mu liisia huvei kpɛlɛɛ gɔɔngɔ. 5Wu kɔɔlɔ vuli pandawanda kɛ muii wani wu gama a numu lɛ yɛpɛ ɔɔ njɛpɛi nasia ta mani nyamui nasia malɔwu ma pie nungaa wekɛisia ti yeya-hanisia va. Ngewɔ lɔ mu jeli le. 6Muii lapini tato majɔɔva a numu gbi, muii loni a wu lato ɔɔ nungaa wekangaa ti nda, 7kia bɛɛ mua ma gulɔ mu hani gboto gbua wu yeya ajifa toblaa lɔ a mue Kristi va. Na hu gbi mua mu ndii bɛbɛngɔ lɔ gɛni ji mu yɛ wu gama, kia koimɛi a ngi leengeisia nyini, a ti mahugbe. 8Ndoma wai na va mu piengɔ a wue, mu magbatɛngɔ yɛla pieva wua bɛɛ wu Ngowili Yekpei hinda hugɔɔ a gbua Ngewɔ gama kɛɛ hinda gbi wieva gbɔva wu ma. Mu longɔ yɛla a wue hulewengɔ. 9Taa wu nɛmahu vulii, mu mbaa Kristimableisia, kia mu yengeni kpayangɔ waa! Mu yengeilɔ a folo kɛɛ kpindi aako maa yɛ a kaha wu ma ji mu yɛ Ngowili Yekpei na lema wu ma a gbua Ngewɔ gama. 10Wua lɔ mu jelisia a wue kɛɛ Ngewɔ kɛ mu luvayii wua wu Kristimableisia gama sɛwɛsɛwɛngɔ yɛla, pɔɔnangɔ, tawao nyamu gbi ii hu. 11Wu kɔɔlɔ kɛ mu wu yilayee gbi houilɔ kia kɛkɛi a ngi nda leengeisia hou la. 12Mu wu liiloilɔ, mu wu nɛpɔ, tawao mu yɛlɔ a nɔɔ wu ma jiava a pelei na a nɛɛ Ngewɔ wɛ na i wu lolima aako wua tieni wu gbɔ ngi Mahayɛi ma kɛɛ ngi wɔlɔyɛi. 13Tawao sabu weka lɔ na ma siɛgbua Ngewɔ ma kpele gbi. Ji mu wani wu gama mu Ngewɔ wowili hugɛ a wue, wu mɛniilɔ tawao wu lailɔ la, wuii mbumbuni kia nuuvu wowili gbama, wu mbumbuilɔ a Ngewɔ wowili, tawao hii vulii i na. Ajifa Ngewɔ lɔ hinda wiema wu hu wua wu langɔ a ngie. 14Mu mbaa Kristimableisia, hindei nasia ti wu wienga tia mia ti Kristimablei nasia wieni ti heiheini Judia lɔlei hu, nasia ti na Yesu Kristi woo a tie. Wu gbɔugbɔu gɛnyɛblɛisia ti juwuya hitɛilɔ wu wooma a toloma yakpei na Juublaa ti hitɛni la ti wooma, 15Juublaa nasia ti Ndemɔi Yesu waani kɛɛ Ngewɔ lutuisia, ti hitɛni mu wooma a juwuya. Ti hinda i gbalɛni kpa Ngewɔ ma! Ti loloni kpa a numui gbi! 16Ti lapilɔ gbɔma tɛɛ ti mu maabali maa Ngowili Yekpei na le nasia ma Juublaa yaa tie kɔɔ taa bawo. Hii ti jumbui kpɛlɛɛ laavenga ti piema wɔɔ gba. Faale kɛlɛmɛi ji lɔɔ, Ngewɔ i liilewenga ti ma. 17Kɛɛ mua, mu mbaa Kristimableisia, ji mua wueni mu luahu i gɔlɛni kulo, kia bɛɛ wu hinda ii yɛ gbua mu nɛmahu, wu mani i mu lɔni kpa tawao mu lapini kpa wu lɔva gbɔma! 18Mu longɔ yɛla mu yama gbɔma wu gama. Nya, Pɔɔl vulii ngi lapilɔ tewengɔ heima yila ma yamava wu gama, kɛɛ Seitana ii lumani mu wɛ. 19Gbamaile wua vulii lɔ mu lii valamɛi a wue kɛɛ mu goohunɛi kɛɛ mu sabui lawova a temaya majɔɔla mu Lemɔi Yesu gulɔ watii na a wa gbɔma. 20Tɔnya vulii le kɛ wua mia wa pie mu matagbua, mu kohunɛ jɔɔ!1 TƐSALONIKABLƐISIA 31Kɛlɛmɛi muii guni a mawulo weka wiela. Faale mu hugbatɛilɔ muɛɛ mua lekee mu lo Atɛns, 2ji mu Timoti loni wu gama, mu ndewei na mua tieni mu yengema Ngewɔ wɛ a ji ma Ngowili Yekpei le kɔɔlooni Kristi ma. Mu ngi yoyoilɔ aako i pie wu layii a Kristi maa i to, 3aako wu yilayee bɛɛ aa yama a wooma wee juwuyei jisia va. Wua vulii wu kɔɔlɔ kɛ juwuyei jisia nyɔkɔ ti yɛni a Ngewɔ liima hindei lɛɛngaa lɔ mu va. 4Gbamaile watii na lɛ mu yɛ wu lia, mu humbuilɔ a hugɛ a wue kɛ nungaa ta juwuya hitɛlɔ wu wooma; tawao kia wu kɔɔngɔ la pandawanda, na mia lɔɔ i wieni. 5Na vamia ngi Timoti yoyoni. Ngii yaa guni a mawulo wiela aa lewe na ma, famia ngi ngi loni kɔɔ i wu layii a Kristi hugbɛkpɛ. A tɔnya nya luwangɔ yɛla ngɛ Seitana i wu gɔlɛma a pelei lɛɛnga hu we, kɛ mu mɔnɛi kpɛlɛɛ i yɛnga mu ma a kɛwɛ mɔnɛ! 6Timoti i yamanga mbei na tawao i wanga a va nɛnɛɛ kɔlooni wu layii ma a Ngewɔ kɛɛ ndomɛi na wu piengɔ a ngie. I hugɛnga a mue yɛ wa kili yekpe wielɔ a mue watii gbi, tawao yɛ wu longɔe wu mu lɔ kia lɔɔ mu longɔ mu wu lɔ. 7Famia ndiinyani kɛɛ kpalɛi na kpɛlɛɛ hu i langa mu ma, wu hinda i mu lii nɛpɔnga, mu mbaa Kristimableisia. Wu layii a Kristi mia i mu lii nɛpɔni, 8ajifa ndɛvui vulii lɔ na mu hu ji mu kɔɔnga kɛ wu lala a Ndemɔi i ya kpau. 9Ma siɛgbualɔ mu Yewɔɛi ma wu va. Kɛɛ muɛɛ gu a siɛgbuala ngi ma pandawanda ngi yaama kohunɛi va i mu hu kɔlooni wu ma. 10A folo kɛɛ kpindi mua ngi vɛlima a mu lii gbi aako i pie mua wueni mu yaama wɛlɛ ma, mu na ve wu gbewengɔ fa wu lalei va. 11Mu Kɛkɛ Ngewɔ vulii kɛɛ mu Lemɔi Yesu ti pele la mu wɛ wava wu gama. 12Ndemɔi i pie ndomɛi na wu peingɔ a wu nyɔunyɔ kɛɛ numui gbi maa i to i wɔlɔ i wie kia ndomɛi na i na mu piengɔ a wue. 13Ji wiengaa, Ndemɔi a kpaya wuaalɔ wu hu, tawao nyamu gbi ɛɛ yɛ wu hu wu magayemangɔ a yɛla mu Kɛkɛ Ngewɔ yaama ji mu Lemɔi Yesu a wa tia nasia gbi ngi woo a tie.1 TƐSALONIKABLƐISIA 41Mu mbaa Kristimableisia, gbɛɛ ngi ji le njɛpɛi ji yakpuava: mu kɛilɔ a wue wa yee luva na a nɛɛ Ngewɔ wɛ. Tawao yeetuvei mia wɔɔ wu piema. Kiahuna na mua wu manɛnɛma Ndemɔi Yesu biyɛi hu yeetuvei na mato wieva. 2Wu na gɔɔlɔ mu ndeni wu ma pieva kia Ndemɔi Yesu i puni mu laa ndeva. 3Ngewɔ longɔ wu luva a pelei na a kɛ kɛ Ngewɔ woo lɔ a wue, wu loko gbi ii puegbua hinda hu. 4Mahoungɔ wu yilayee gbi i kɔɔ kia mahoungɔ i ta yekpe houla puehinda hu mbɛlɛya hu kɛɛ pelei na a nɛɛ Ngewɔ wɛ, 5tii yɛma sɔɔ-hinda lekee i gbewe wu ma kia nungei nasia ti na tii Ngewɔ gɔɔ. 6Faale Nyahajɔɔ hindei hu, numu gbi aa ngi mba Kristimamɔ gava kulo bɛɛ. Mu ji lenga wu ma ngovama tawao mu wu laahilɔ kpɔtukpɔtu kɛ Ndemɔi a kpalɛ lalɔ nasia gbi ma ta na wie. 7Ngewɔ ii mu lolini heiva a puegbuala, i mu lolini luvava lɔ kia nungei nasia na ngi woo a tie. 8Faale na, numu gbi lekee a gbele kaai ji ma, ii gbeelema nuuvu lɔ ma kɛ Ngewɔ na a ngi Yafa Yekpei ve wu wɛ. 9Sabu gbii na kɔlɔ nyɛiva wu gama kɔɔlooni ndomɛi na ma mahoungɔ wu pie a wu mbaa Kristimableisia. Ngewɔ i wua vulii gaanga kia wa yee lo a wu nyɔunyɔ. 10Tawao a tɔnya, hii wu pienga a Kristimablei nasia gbi ti Masidonia lɔlei hu gbi. Faale, mua wu manɛnɛma, mu mbaa Kristimableisia, wu mato wie. 11A wu lii huyili waa loko wili ndabla hu ɔɔ sɔlɛ, wu woo i yɛ wu nda hindei lekee ma, tawao a yenge a gahu hanii nasia majɔɔva wa gbewe fa kia mu ndeni la wu ma. 12Ji lɔ a wie nasia tii lani a Ngewɔ ti baa gɔɔ wu ma, tawao waa hɛlɛ a numu gbi hanii nasia va wa gbewe fa. 13Mu mbaa Kristimableisia, Mu longɔ wu tɔnyɛi hugɔɔ kɔɔlooni nungei nasia ma ti haanga, aako wu lii aa nyani, kia nungei nasia ti na ti lii ii ma ngelegoohu majɔɔva. 14Mu langɔe la kɛ Yesu i haailɔ, i hiye gbɔma hee hu, faale mu langɔe la kɛ nasia ti loni lama a Kristi ti haanga, Ngewɔ a pielɔ ti vulu ti lɛ mia Yesu i na. 15Kaai na Ndemɔi i kɛni a mue tamia mu wu gaama la kiahuna: Mua mu vulungɔ a yɛla folei na ma Ndemɔi a wa, mua yese muɛɛ li ngi gama nasia gulɔ ti haanga. 16Ngewɔ malikei yeembawai a yɛpɛlɔ ngeleya, kɛɛ Ngewɔ bulii woi, tawao Ndemɔi a gbualɔ ngelegoohu i yei. Nasia ti loni lama a Kristi ti haanga, tia yese ta vulu lɔ ti hiye; 17na wooma mua mu vulungɔ a yɛla a watii na Ngewɔ a mua tieni lɛlɔma hinda yila fɛfɛi hu, Ndemɔi maliva lugbui hu. Na wiengaa, mua Ndemɔi-ni ma heilɔ kunafɔ. 18Faale na, a yɛ a wu nyɔunyɔ nɛpɔ a njɛpɛi jisia.1 TƐSALONIKABLƐISIA 51Nya mbaa Kristimableisia, sabu gbi ii na ngi kɔlɔ nyɛi wu gama kɔɔlooni lɔwɔi yeefoloi na ma Ndemɔi a yama mbei. 2Ajifa wua vulii wu kɔɔlɔ pandawanda kɛ Ndemɔi wa-Volei a walɔ kia humamɔi a wa kualama hu a kpindi. 3Ji nungaa ta tɔɔto a ndela tɛɛ, “Mu liilɛlingɔe tawao hinda nyamu gbi ii mu gama,” yeewatii na mia hunyani waa a yei ti ma fulo kia ndoo le goohugbalɛi i na, a gbundɛ nyahɛi ma ji ngi lo le watii a fo ma, tawao numu gbi ɛɛ gbua mbu. 4Kɛɛ wua, nya mbaa Kristimableisia, kia wuii yeehindei ji yeekpindi hu, maa ii houni folei na i gɔla wu ma kia humamɔi a gɔla numu ma. 5Wu kpɛlɛɛ wu yɛni a nungaa lɔ wa luva bi tɔa bɛɛ wa hinda gbi wie folei yeefofoi hu lɔ. Muɛɛ luva kia nungei nasia na ta hinda wie kpele gbi kpindi hu. 6Faale na, maa ii houni mu yɛ njii hu, kia nungaa wekɛisia ti na; mahoungɔ mu valangɔ i yɛla tawao mu gungɔ mu lii ma. 7Kpindi lɔ nungaa ta yii; kpindi lɔ ndɔi a nungaa hou. 8Kɛɛ mua ma hinda gbi wie a folei lɔ tawao mahoungɔ mu gu mu lii ma. Mahoungɔ mu la a Ngewɔ mu lo a ngie na a wielɔ bi tɔa bɛɛ mu mu mayilinga kɔi va, tawao mu lii i yɛ vulii ma kɛ Ngewɔ a mu bawolɔ: na a wielɔ bi tɔa bɛɛ wu kɔlu-bɔlɛi lɔ wɛlɛnga wumba. 9Ngewɔ ii loko looni mu ma aako mu kpalɛ majɔɔ ngi liilewei va kɛɛ aako mu mbawoyei maajɔɔ mu Lemɔi Yesu Kristi sabui hu, 10na i haani mu va kɔɔ mu yɛna mua tieni, i bɛ mu vulungɔi ma ɔɔ mu haangɔi ma watii ma a yama mbei. 11Faale, a yɛ a wu nyɔunyɔ lii nɛpɔ, wa gbɔ wu nyɔunyɔ ma, kia lɔɔ wu piema kiahuna. 12Mua wu manɛnɛma, mu mbaa Kristimableisia, muɛɛ wu yɛ a baagɔma yekpe ve nasia wɛ ti yengema wu lia, nasia Ndemɔi i ti lolinga kɔɔ ti pele gɛ a wue, tawao ta wu gaa a pelei na mahoungɔ Kristimamɔi i jia la. 13A baagɔma waa ve ti wɛ, wu lo a tie ngengei na kpɛlɛɛ va ti piema. Fawɔli gbi aa yɛ wu nyɔunyɔ luahu. 14Mua wu manɛnɛma, mu mbaa Kristimableisia, muɛɛ wu kɛwɛ-gbuablɛisia laahii, wu nduwableisia liilo, wu gbɔ nasia ma ti gbewengɔ kpɔma va, waa gbandi a numu gbi. 15Waa lo heini numu gbi aa hinda nyamu hunyɔɔ a hinda nyamu, tawao a lapi vulii watii gbi hinda yekpe wieva a wu nyɔunyɔ kɛɛ numui gbi. 16Wu goohu nɛngɔ i yɛla watii gbi, 17a Ngewɔ vɛli kpema gbi, 18gbɛogbɛ bɛ i wie a yɛ a siɛgbua Ngewɔ ma. Tuvei ji lɔ Ngewɔ longɔ wu pie wua Yesu Kristi-ni wu wilingɔ hu. 19Waa pie Ngewɔ Yafei aa gbe a ngi yengei wiela; 20Waa lɛɛ Ngowili nasia hu Ngewɔ a pu nungaa ti lii hu ndeva. 21A yɛ a gbua hindei gbi wooma, wu yɛ a na wie kpekpengɔ, 22waa loko wili hinda nyamu yeelasii gbi wiela hu. 23Ngewɔ na a ndiilɛli ve mu wɛ i pie wu gbua a ngie a pelei gbi, i pie wu lɛɛvui kɛɛ wu yafei kɛɛ wu gbuhɛi gbi i yɛ sɛwɛsɛwɛ aako watii na mu Lemɔi Yesu Kristi a wa gbɔma njia ɛɛ yɛ wu ma. 24Ngewɔ na i wu lolima yɛva a ngi nda nungeisia a na wielɔ, ajifa ngi layie ɛɛ nyani. 25Mu mbaa Kristimableisia, a yɛ a Ngewɔ vɛli mua bɛɛ va. 26A va Kristimableisia kpɛlɛɛ ma a ndoma lii. 27Nyaa ndema wu ma a kpayei na mu Lemɔi i feni nya wɛ ngɛɛ wu kɔlɛi ji gaa Kristimableisia gbi gama. 28Mu Lemɔi Yesu Kristi i ngauwanda ve wu wɛ. |