1 PITA1 PITA 11Nya Pita, tomɔ a nge Yesu Kristi va, nya mia ngi kɔlɛi ji nyɛinga Ngewɔ nungaa wumbungɔi nasia gama ti gbuanga ti yee ti heiheini hotaya hu Pɔntɔsi plɔvinsi hu, kɛɛ Galesia kɛɛ Kapadosia kɛɛ Esia kɛɛ Bitinia. 2Mu Kɛkɛ Ngewɔ i wu wumbuilɔ kia hugbatɛngɔ yɛla ngi nɛmahu, Ngewɔ Yafei i pie wu wote a pɔɔnablaa aako wu golo Yesu Kristi wɛ, tawao wu yɛ sɛwɛ a ngi ŋamɛi. Ngauwanda kɛɛ ndiilɛli i yɛ wu hu ndavengɔ kpauŋ. 3A mu siɛgbua Ngewɔ ma, mu Lemɔi Yesu Kristi ngi Kɛkɛ! Jifa ngi manumangɔ waa, i ndɛvu nina veilɔ mu wɛ a ji i Yesu Kristi vuluni i ngi wumbu hee hu. Na Ngewɔ i pieni, ta lɔ i pienga mu liilomɛi na gulɔgbema i yeya mu va na ɛɛ gbɔyɔ; 4famia mu lii lɔ ma kpekpeya wai nasia majɔɔva Ngewɔ i ndamagbatɛnga feva ngi nungeisia wɛ. I ndamagbatɛnga ngelegoohu wu va tawao ɛɛ lula, ɛɛ nyani tawao ɛɛ lohu. 5Ti na wu va lɔ, wua Ngewɔ gbayei i wu mahugbema jifa wu langɔ a Kristi aako wu mbawoyei na majɔɔ Ngewɔ magbatɛngɔ na magɛva kɛlɛma volei ma. 6A goohunɛɛ ji va, kia bɛɛ kiahuna hinda hugutungɔ va hinda gbɔugbɔu laasi gbotoi nasia va ti lama wu ma. 7Kpaalɛi jisia ti lama wu ma gbuava pooma mia ina wu langɔe a Kristi a tɔnya. Nungaa ta gulɔ a kanigbɔlui vulii nyanila, kɛɛ ta gbua pooma a ngɔmbui lɔ tɔva ina kpekpengɔe; hii mahoungɔ gbuava wu lalei wooma na baagɔma i ma tewengɔ kanigbɔlui ma, aako i lɛmbi. Na wiengaa, wa tato majɔɔlɔ kɛɛ ngɔlɔya kɛɛ mbɛlɛhei Folei na ma Yesu Kristi a ta yekpe gɛ a numui gbi. 8Wu longɔe a ngie kia bɛɛ wɔɔ gba wuii yaa ngi lɔni, tawao wu langɔe a ngie, kia bɛɛ wuɛɛ gu a ngi lɔla kiahuna. Faale wa koohunɛɛ lakpa waa wielɔ na numu gbi ɛɛ gu i hungɛ, 9ajifa wu langa a ngie, na vamia wu yafeisia ti mbawoyei majɔɔnga. 10Ngewɔ lutuisia ti mbawoyei ji hinda hugbɛkpɛilɔ a, tɔmbɛyama wee, tawao i loni kulɔma lɔ ti mbawoyei na hinda hugɛ Ngewɔ a fe wu wɛ gbama. 11Ti lapilɔ kɔɔva migbe lɔ mbawoyei ji a wa tawao a yee wa. Watii ji lɔ Kristi Yafei na i ti hu i loko loni ma ji i yɛ kpaalɛi nasia hinda hugɛma i wama lama Kristi ma kɛɛ ngɔlɔyɛi na a majɔɔ na wooma. 12Ngewɔ kɛilɔ a ngi lutui jisia kɛ tii ti yengei wiema ti yekpe nafava kɛlee wua, ji ti yɛ yɛpɛ kɔlooni hindei nasia ma wu mɛninga na a nasia ti Ngowili Yekpei hugɛni a wue Ngewɔ Yafei na Ngewɔ i ngi yoyoni a gbua ngelegoohu ngi gbayei hu. Jisia ti yɛni a hindangaa lɔ malikeisia vulii bɛɛ ta yɛ loni ti mbugɔɔ. 13Faale naa, a wu lii huyili yengeva. Wu ya aa lema, wu valangɔ i yɛla, wu mbawoyei na yakpe gulɔgbe Yesu Kristi a fe wu wɛ gbama watii na a ta yekpe magɛ a numui kpɛlɛɛ. 14A golo Ngewɔ wɛ tawao waa luma mani nyamui nasia ti yɛ wu lɔ watii lɛ wɔɔ wuii yɛ Ngowili Yekpei hinda hugɔɔ kɔlooni Kristi ma. 15Kia waa na wie, a joowi hinda nyamu laasi gbi ma wu wiehindei kpɛlɛɛ hu kia lɔɔ Ngewɔ na i wu lolini ngi yengei wieva ngi lolongɔ a hinda nyamu. 16Ngewɔ ndeilɔ ngi Gɔlɛi hu yɛ, “Jumbu gbi aa yɛ wu ma ajifa jumbu gbi ii nya ma.” 17Wa Ngewɔ loli a wu Kɛkɛ, ji wa yɛ ngi vɛlima; ta lɔ a numui gbi gbɛmbo ngi wiehindeisia ma. Ɛɛ topooma wie. Faale naa, a baagɔma waa ve ngi wɛ wu lɛɛvui yeemɔni hu gbi mbei ngelebu. 18Gbamaile wu kɔɔlɔ Ngewɔ i yee wu wumawoni i wu gbua wu luvayii wovei hu, tuva huwopongɔ gbamɛi na wu maadani ti ndoni a wue. Ngewɔ ii wu wumawoni a na a nyani kia nyɔkɔ kanigole ɔɔ kanigbɔlu, 19kɛɛ i wu wumawoni a saa baagbangɔ waa lɔ i kpuani a Kristi na i wieni kia mbaalɛi na mbɛ gbi ii ma. 20Pɛiŋ wɔɔ Ngewɔ i yaa dunyei gbatɛ, i loko loilɔ Kristi ma kɛ ngi sabui hu lɔ a wu bawo; famia Kristi i wani kɛlɛma volei jisia ma kɔɔ i wu bawo. 21Ta lɔ i yɛni a sabu wu lani a Ngewɔ na i ngi vuluni, i ngi wumbu hee hu, i ngi gɔ a ngɔlɔya waa; faale wu langɔ a Ngewɔ lɔ, wu lii i looni ngi ma. 22Kia naa wu sawei nasia hounga Ngowili Yekpei kɛni tawao na i pienga Ngewɔ i manunga wu jumbui ma wu yafeisia ti yɛnga sɛwɛ, ji lɔ i pienga wu ndoma yekpe wienga a wu mbaa Kristimableisia, a lo a wu nyɔunyɔ a wu lii gbi. 23Ngewɔ layia vulungɔe na a yɛ na kunafɔ, i ndɛvu nina venga wu wɛ, wu wienga kia ndeengɛi nasia ti lemɔi ɛɛ haa kunafɔ kia mu nda leblɛisia ta haa. 24Kia Ngewɔ Gɔlɛi ndeni yɛ, “Nuuvui kpɛlɛɛ ti wiengɔe kia kpitii i na, tawao ti wɔlɔyɛi gbi wiengɔe kia ngulu-wuɛisia ti na. Kpitii a belɔ, tawao ngulu-wuɛisia ta gulalɔ ti nyani, 25kɛɛ njɛpɛi na Ndemɔi i ndenga a yɛlɔ na kunafɔ.” Njɛpɛi ji i yɛni a Ngowili Yekpei na lɔ ti ndeni wu ma gbalauŋ.1 PITA 21Faale, a gbe hinda nyamui yeelasii gbi wiela ma; waa gbɔma ndɛɛ guala, waa numu wɛlɛ, waa lolo a numu gbi, waa mbɛlɛnyani yɛpɛ le a numu. 2A wie kia ndoola nɛnɛɛngaa ti na, wa wɔɔ nyiniya senyangɔi na va numu yafei longɔ la, aako wu yɛ a kpɔle wu yafeisia ti lakpa tawao ti bawo. 3Kia Ngewɔ Gɔlɛi ndeni la yɛ, “Wua yekpe vulii wu Ndemɔi gbekpeyii lɔnga na.” 4A yɛ a lukpe Ndemɔi gbla. Ngi wiengɔe kia pɛlɛ- lo-gɔtii na pɛlɛ loblɛisia ti pilini tɛɛ ii gbekpeni kɛɛ Ngewɔ i mbumbuni a kɔtu baagbangɔ waa. 5A wa Ndemɔi gama kia kɔtii yekpengaa, wu luma Ngewɔ Yafei i Ngewɔ Wɛlei lo a wue, wu wote na a Ngewɔ jaagbuablaa Yesu Kristi biyɛi hu, wa saai nasia gbua Ngewɔ ma ngi Yafei a kɛ a wue tawao a nɛɛ ngi wɛ. 6Ajifa Ngewɔ Gɔlɛi ndeilɔ yɛ, “Ngi kɔtu baagbangɔ wumbuilɔ, tamia ngi ngi yɛma a dɛmɛ gɔtiwai mia Jayɔn; tawao numu gbi lekee a la a ngie, ngi yaa ɛɛ wufe kunafɔ.” 7Kɔtii ji baa wɔlɔngɔ waa le wu va wua wu langɔ a Kristi; kɛɛ nasia tii lani a Kristi: “Kɔtii na pɛlɛ loblɛisia ti pilini tɛɛ ii gbekpeni, i woteilɔ a bagɔma gɔtii tewengɔ kɔtii kpɛlɛɛ ma.” 8Tawao Ngewɔ Gɔlɛi yeepekei i ndeilɔ yɛ, “Kɔtii ji lɔ nungaa ta lugba la, ta gula.” Ti lugbɛilɔ jifa tii lani a Ngowili Yekpei; namia i nɛni Ngewɔ wɛ ti va. 9Kɛɛ wua lɔ kɛnyɛi na a wue Ngewɔ i wu mbumbuni, mahɛi jaagbuablɛisia a wue, wu vengɔ Ngewɔ yengei wɛ, tawao ngi nungaa lɔ a wue, i wu wumbuni ngi wiehinda gabandengɔisia hugɛva a numui gbi, Ngewɔ na i wu lolini i wu gbua jumbui yeekpindii hu, i wa a wue ngi bawoyɛi yeefoofo gabandengɔ wai hu. 10Watii lɛɛnga wɔɔ, wuii yɛni a Ngewɔ nungaa, kɛɛ kiahuna na ngi nungeisia lɔ a wue; watii lɛɛnga wɔɔ, wuii Ngewɔ manumɛi majɔɔni, kɛɛ kiahuna na wu ngi manumɛi majɔɔnga. 11Nya liima ndiamɔisia, nyaa wu manɛnɛma jifa hotangaa lɔ a wue kɛɛ nasia tii wani lɛmbima dunyei ji hu! A loko gbua hindei nasia hu wa pie wu luwui liilɛliva, hindei nasia ta kɔ wɛlɛ numu yafei ma watii gbi. 12Wu luvayii i gbekpe nasia ti lia Juublaa yaa tie, nahi ti ndɛɛ gualangaa tɛɛ hinda nyamu wieblaa lɔ a wue, ti hinda yekpei nasia lɔ wa pie, ta lumalɔ tɛɛ numu yekpengaa lɔ a wue, tawao ti Ngewɔ lato folei na ma a wa. 13A golo nuuvu lemaya gbi bu jifa mu Lemɔi woomablaa a wue; a golo Rom Maha Wai bu, na ngi lewengɔ ti gbi ma, 14kɛɛ Gɔvinɛi nasia i ti heinga kpaalɛ lava hinda nyamu wieblɛisia ma kɛɛ nasia lato va ta hinda yekpe wie. 15Gbamaile Ngewɔ longɔ wu yɛ a hinda yekpe wie tuuŋ aako wu kpɔhu wu nguhubaablei nasia laa gbɔwu ta baa wu ma. 16A luva kia nasia na tii nduwɔyahu, na hu gbi waa gili la kɛ ji wuii ndɔwuya hu kpaya vengɔi wu wɛ hinda nyamu gbi wieva, kɛɛ a luva kia Ngewɔ luweisia. 17A baagɔɔ numu gbi ma, wu lo a wu mbaa Kristimableisia, wu luwa Ngewɔ ma, wu baagɔɔ Rom Maha Wai ma. 18Mahoungɔ wua Kristimablaa a wue wu nduwɔya hu, wu golo wu luwɔkɛisia wɛ, wu baagɔma waa ve ti wɛ, nasia lekee ii le ta wu hindawanda ta gili a wue pandaa, kɛ nasia bɛɛ ti yagbalɛngɔ. 19Ngewɔ a wu lubalɔ ji va, ina wu liiloilɔ wu gu kpalɛi na bu ta nda wu ma mbaama hu, ajifa wu kɔɔlɔ kɛ hii i nɛni Ngewɔ wɛ. 20Tatoi yeegbɔɔ wu langɔ la wa majɔɔ ina wu guilɔ ndewe bu hinda nyamu va wu pienga? Kɛɛ kpaalɛ i langaa wu ma ji wa hinda yekpe bɛɛ wie, Ngewɔ a wu lubalɔ fa. 21Ji lɔ i wu lolini ma, ajifa kpaalɛ i lailɔ Kristi vulii ma wu bawova, tawao i tɔmaseli longa a wue pookɔɔva. 22Ii jumbu hinda gbi wieni tawao ndɛɛ yɛpɛ gbi ii gbuani ngi laa. 23Ji nungaa ti yɛ a ngi bɛlɛ nyani, ii hunyɔni a mbɛlɛnyani; ji ti kpaalɛ lani ngi ma, ii ti huluwani kpaalɛ lava ti ma, kɛɛ i ta yekpe loko wuaailɔ Ngewɔ yeya, na a kiti gbi lewe a pɔɔna. 24Kristi vulii i numui gbi ti jumbuisia wumbuilɔ ngi luwui hu i li la krɔsii ma, i haa na aako i mu wumawo i mu gbua jumbui luwɔyɛi hu, mu jia a pele wɔɔni na Ngewɔ longɔ la. Jifa ti kpaalɛ lani Kristi ma, mu mbawoya majɔɔnga. 25Wu wiengɔ yɛla kia mbalangɛi nasia ta lohu, kɛɛ kiahuna na Ngewɔ i yamanga a wue Kristi gama, na a wu yafeisia mahugbe kia mbala mahugbemɔi a pie a ngi baalangɛisia.1 PITA 31Hii mahoungɔ wu nyahangeisia wu golo wu hiningeisia wɛ aako ina ti lɛɛnga tii lani a Ngowili Yekpei, wu luvayii a pielɔ ti la la kiaa bɛɛ wuii yeenjɛpɛ gbi leni ti ma, 2ajifa ta bagɔɔmɛi na lɔlɔ wa fe ti wɛ kɛɛ pɔɔnɛi na wa yɛ hu. 3Waa hanihani gboto yilingili wu ma aako wu nyande, kia nyɔkɔ ngundia baagbangɔisia ɔɔ kanigbɔluisia ɔɔ kula baagbangɔisia wa wu mayili la. 4Kia waa lapi wu luwuma nyandei va, wu nyandei i yɛ a wu yɛyii yeekpekpei na ndɔwungɔ wu bu numu ɛɛ tɔ. Yeenyandei ɛɛ jambo tawao a yɛ nungei nasia lɔ ma ti lii gɔlɛngɔ tawao tɛɛ jɔlɛ. Nyandei ji nyɔkɔ lɔ Ngewɔ i baa gɔɔngɔ ma. 5Gbamaile Ngewɔ vɛli nyahangɛi nasia wɔɔ ti liiloni Ngewɔ ma, ti yɛ a tia yekpe nyande a ji lɔ ti yɛ golo ti hiningɛisia wɛ. 6Hii Sera i yɛ na; i goloilɔ Ebraham wɛ, a ngi loli a ngi Kaamɔ. Wu yɛnga na a ngi leengeisia lɔ ina wu pɔɔna hindei wieilɔ tawao wuɛɛ luwa hinda gbi ma ta wu huluwa la. 7Wua wu nyahableisia, mahoungɔ wua wu nyahangeisia wu hei wu kɔɔngɔ vuli kɛ hingaa ti gbayani nyahangaa ma. A baagɔma ve ti wɛ ajifa wua tieni lɔ wa kunafɔ lɛɛvui na majɔɔ Ngewɔ a fe gbama. A ji wie aako Ngewɔ i wu hɛisia mɛni. 8Njɛpɛi ji yakpuava gbɛɛ ngi ji le wu ma: mahoungɔ wu kpɛlɛɛ wu giliyii i yɛ yakpe, wu lii i nyani ji wu mbaangaa ta wɔɔ, wu goohunɛɛ ji ti goohu a nɛɛ; a lo a wu nyɔunyɔ kia mahoungɔ njekohungaa ti pie, wu gbewe vulii wu nyɔunyɔ va tawao waa wua yekpe huwɔlɔ. 9Waa hinda nyamu hunyɔɔ numu gbi ma a hinda nyamu, tawao waa mbɛlɛnyani hunyɔɔ a mbɛlɛnyani; kia waa na wie, a Ngewɔ vɛli i gbekpe a tie, ajifa ji nyɔkɔ wieva lɔ Ngewɔ i wu lolini aako wu poohani na majɔɔ i Lahei wumbuni feva wu wɛ. 10Kia Ngewɔ Gɔlɛi i ndeni la yɛ, “Numu gbi lekee ngi longɔ i lɛmbi dunyei hu koohunɛ hu, tawao ngi longɔ nɛnɛɛ i lɛ ngi ma, aa njia nyamu le nungaa wekangaa ma tawao i gbe a ndɛisia gualala; 11i wounve hinda nyamu wiela ma i pɔɔna hinda wie; i ndiilɛli gɔkɔli i to pooma. 12Gbamaile Ndemɔi a kpekpe wieblɛisia mahugbelɔ i woolo ti hɛɛwoi ma; kɛɛ ngi wounvengɔe nyamu wieblɛisia ma.” 13Ye lɔ a kpaalɛ la wu ma ina wuaa lapima vulii hinda yekpe wieva watii gbi? 14Kɛɛ kia bɛɛ nungaa ta kpaalɛ lalɔ wu ma jifa wa pɔɔna hindei wie, koohunɛɛ a yɛlɔ wu ma. Waa luwa numu gbi ma, tawao wu lii aa hɛlɛ. 15Kɛɛ mbɛlɛya waa i yɛ wu liisia hu Kristi va, wu baagɔɔ ngi ma jifa ta yakpe lɔ Ndemɔi a ngie. Numu gbi lekee a wu mɔli gbɔɔ wu kulɔgbema, wu magbatɛngɔ i yɛla watii gbi hugɛva a ngie. 16Kɛɛ wu yaa yeemɔli gbɛmboma waa kpɔnda numu gbi ma lava a Kristi tawao wu bagɔɔ na ma a yɛ tia bɛɛ nɛmahu. Wu wiehindei i kɛ kɛ wuii yaa hinda gbi wieni wu lii aa nde yɛ nyamungɔe aako nasia ta nde tɛɛ nungaa nyamungaa lɔ a wue kia bɛɛ wa hinda yekpe lekee wie jifa Kristi woomablɛisia a wue, ti wufe na va ta nde wu ma. 17Ajifa fesangɔ kpaalɛ i la numu ma hinda yekpe wieva, ina ji lɔ a nɛɛ Ngewɔ wɛ, i lewe na ma kpaalɛ a la numu ma hinda nyamu wieva. 18Mahoungɔe wu luma kpaalɛ i la wu ma ji wa hinda yekpe wie, ajifa Kristi vulii, ii jumbu yakpe bɛɛ wieni, i haailɔ yakpe mu jumbuisia kpɛlɛɛ va. Hee na i pieni ta lɔ i yɛni a sabu Ngewɔ i guni a manula mu jumbuisia ma, faale i pienga mu pele jɔnga livaa Ngewɔ gaama. Nuuvu yɛla a Kristi watii na ti ngi waani; watii na Ngewɔ i ngi vuluni i ngi wumbu hee hu, i yɛni a ngafa lɔ, na ɛɛ haa, 19i loni yeengafayei hu lɔ i li i Ngewɔ yiɛi le ngafangei nasia ma ti makpangɔ yɛla. 20Ngafangei jisia mia a nungei nasia tii yɛ goloni Ngewɔ wɛ ji i ti mawuloni kaka watii na Noa i yɛ ngi lɛndɛi gbatɛma. Numu sɛkɛngɔi nasia ti yɛ ndɛndɛi hu, ti kpɛlɛɛ ti yɛ wayakpa, ti bawoilɔ njavei yeya. 21Njɛi na i yɛni a tɔmaseli lɔ nguɛi na va ta wu wua la tawao i pienga Ngewɔ i wu bawonga na jumbui yeya. Yeenguɛi ji ii yɛni a manɔhɔ wuala lekee luwuma, i yɛni a Lahei na lɔ wu mbumbuni Ngewɔ gama a kiliya sɛwɛsɛwɛ hu we. Yeenguɛi ji a pielɔ wu bawo jifa Kristi i hiyeilɔ hee hu; 22na i lɛnga ngelegoohu i heinga Ngewɔ yejei hu, tawao Ngewɔ i ngi yɛnga a Maha malikeisia gbi maahu kɛɛ mahubleisia, kɛɛ nasia kpaya i ti yeya ti ngi bu.1 PITA 41Jifa ti kpaalɛ lani Kristi vulii ma mu va, mahoungɔ wua bɛɛ wu magbatɛngɔ i yɛla kpaalɛ majɔva kia ngi magbatɛngɔ yɛla kpaalɛ majɔva, gbamaile numu gbi lekee kpaalɛ a la ngi gbuhɛi ma kia i lani Kristi ma, i wounvenga jumbu wiela ma. 2Faale, i hiye watii ji ma i to wu lɛɛvui gɛlɛmɛi dunyei ji hu, mahoungɔ wu golo Ngewɔ liima hindei wiela bu, waa golo wu liima hindeisia bu. 3Wu lɛmbinga wɔɔ hindei nasia wiema nungei nasia tii Ngewɔ gɔɔ ti longɔ a piela. Wu wu lɛɛvui kpɛlɛɛ wuaani puegbua hindei hu lɔ kɛɛ hinda nyamu wie-manii kɛɛ ndɔhou pɛɛpɛi kɛɛ ndɔ gbɔle gomɛisia kɛɛ nɔmɔli vɛlila gɛwɛgɛwɛisia. 4Kiahuna na kualangɔe nasia ma tii Ngewɔ gɔɔ ji wuɛɛ yaa gbɛɛ ti ma yeehinda nyamu hulewengɔ yakpei jisia wieva, famia ta nde tɛɛ numu nyamungaa lɔ a wue. 5Kɛɛ Ngewɔ a ti gbɛmbolɔ ti wiehindeisia va, Ngewɔ na i wama fuublaa kɛɛ haablaa gbɛmboma hugutungɔ. 6Sabui na va lɔ Kristi i Ngowili Yekpei leni haablɛisia bɛɛ ma nasia Ngewɔ i ti gbɛmboni pɛiŋ ti yaa haa kia Ngewɔ a nuuvui kpɛlɛɛ gbɛɛmbo la; i Ngowili Yekpei leilɔ ti ma kɔɔ ti yafeisia ti luva kia Ngewɔ a luvala. 7Hani gbi ti gɛlɛmɛi hugutunga; faale wu lii aa wulima tawao wu nɛmahui i yɛ wu gbla aako wu gu a Ngewɔ vɛlila a yeepelei. 8Tewengɔ hindei gbi ma, a lo a wu nyɔunyɔ hulewengɔ, ajifa wu longaa a wu nyɔunyɔ, wu magbatɛngɔ a yɛla kpele gbi manuva nungaa wekɛisia ma hinda nyamui nasia va ta pie a wue. 9A loko hei wu nyɔunyɔ bu a koohunɛɛ wu wɛleisia bu tawao waa gbonyɛ. 10Ngewɔ i wu Kristimableisia gbi a ngilangila gɔnga a mboya hanisia tawao mahoungɔ numu gbi i gu a yee mboya hanii na houla pandaa Ngewɔ i fenga ngi wɛ, i ngayenge numui kpɛlɛɛ ti gbekpeyɛi va. 11Numu gbi lekee a Ngowili Yekpei le, i Ngewɔ Wowili vulii le; numu gbi lekee tia Kristimableisia ti yengema, i yenge a kaahui na Ngewɔ a fe ngi wɛ aako hinda gbi hu numui gbi ti Ngewɔ lato Yesu Kristi biyɛi hu, na ngi woo a ngɔlɔyɛi kɛɛ kpayei kunafɔ kɛɛ kunafɔ. Amiina. 12Nya liima ndiamɔisia, hinda yaagbalɛngɔi jisia ti wu wiema wu hugɔɔva, aa guala wu ma bi tɔaa bɛɛ hinda nina mia i wu wiema. 13Kia na aa wie, a goohunɛɛ ajifa kpaalɛ i lama wu ma kia i lani Kristi ma, aako wu goohu i nɛɛ ji a ngi wɔlɔyei magɛ. 14Mahoungɔ wu goohu i nɛɛ ji nungaa ta wu bɛlɛ nyani jifa Kristi woomablɛisia a wue; ji a pielɔ wu kɔɔ kɛ Ngewɔ Yafa gabandengɔ wai lɔ heini wu hu. 15Nungaa ti kpaalɛ langaa wu yilayee gbi ma, aa yɛ ajifa numu-waamɔ a ngie ɔɔ humamɔ ɔɔ hinda nyamu wiemɔ ɔɔ numui na a loko wili nungaa ti hindeisia hu. 16Na hu gbi, nungaa ti kpaalɛ langaa bi ma jifa Kristimamɔ a bie, baa yeengufe wie kɛɛ siɛgbua Ngewɔ ma jifa Kristi biyɛi i bi ma. 17Ngewɔ a tɔɔtolɔ hugungɔ a numui gbi gbɛmbola tawao ngi nda nungeisia yese lɔ a ti gbɛmbo. Ina kpɛmboi i lɔɔtoma mua lɔ ma, nasia tii lani a Ngowili Yekpei na Ngewɔ i njoyoni ta yee wie? 18Kia Ngewɔ Gɔlɛi ndeni la yɛ, “Ina kpaukpaungɔi pɔɔnableisia va ti bawo, gbɔɔ hɔɔ a jumbublɛi nasia wie tii gbeweni Ngewɔ va?” 19Faale naa, nasia kpaalɛ a la ti ma jifa hii i nɛni Ngewɔ wɛ ti va, mahoungɔ kpekpei nasia ta pie a nungaa wekɛisia i pie ti ti yafeisia loko wuaa ti Gbatɛmɔi yeya, na ngi Lahei wumbungɔi hu ɛɛ nyani.1 PITA 51Nya vulii bɛɛ Kristimableisia ti gbakolo a nge, nyaa yɛpɛma a nya lii gbi Kristimableisia ti gbakolei nasia gama ti wu lia. Ngi kpaalɛi nasia hulɔilɔ i lani Kristi ma, tawao Kristi wɔlɔyɛi na Ngewɔ i wama kɛma a numui gbi, nga nya ndɛi majɔɔlɔ. Nyaa wu manɛnɛma, 2wu yɛ a Kristimablei nasia mahugbe Ngewɔ i ti veni wu wɛ kia mbala mahugbemɔi a pie a ngi baalangɛisia tawao wu ti mahugbe a koohunɛɛ kia Ngewɔ longɔ wu pie bi tɔaa bɛɛ ti kpɔndangalɔ wu ma. Waa Kristimableisia ti mahugbe yengei ji wie aako ti wu pawa a navoo, a pie jifa mani vulii i wu ma gbɔva ti ma. 3Waa lapi mahaya mɛva nasia maahu Ngewɔ i ti loko wuaanga wu yeya ti mahugbeva, tawao wu luvayii i yɛ a tɔmaseli ta lo ti pookɔɔ. 4Tawao watii na Mbala Mahugbemɔi na tewengɔ mbala mahugbeblɛisia kpɛlɛɛ ma a gbua nga, wa ngɔlɔya maha-bɔlɔ gabandengɔi na majɔɔlɔ a lo vooma kunafɔ. 5Wua wu kɔɔngɛisia bɛɛ, mahoungɔe wu golo kpakoleisia wɛ, tawao mahoungɔe wu Kristimableisia gbi wu yɛngaa hinda yekpe wiema a wu nyɔunyɔ wu wua yekpe mayei tawao waa pie a mamani; ajifa Ngewɔ Gɔlɛi ndeilɔ yɛ, “Ngewɔ a mamaniblɛisia ti ma hindei hunyanilɔ, kɛɛ a kpekpe lɔ wie a nasia tii mamanini.” 6Faale a wua yekpe mayei Ngewɔ gulɔ, Ngewɔ na ngi gbayangɔ wu mahugbeva, aako i wu lɛ watii na ma i kɛnga. 7A wu liihɛlɛmɛisia kpɛlɛɛ lukpe ngi ma ajifa ngi gbewengɔi wu va. 8Wu magbatɛngɔ i yɛla na gbi va a wie! Wu juwui Seitana lɔ lewetewema ngi laawongɔ kia njalɛi a yɛ gbelema a numu gɔkɔli hunyivinyivi va. 9Gbɛogbɛ aa pie wu layii a Kristi maahu aa gbua, tawao waa hinda gbi wie Seitana a wu lo piema ajifa wu kɔɔlɔ kɛ kpaalɛi nasia ti lama wu ma, yeekpaalɛ yakpei lɔ lama wu mbaa Kristimablei nasia ma ti vayangɔ dunyei hu gbi. 10Kɛɛ kpaalɛi i langaa wu ma watii wulo va, Ngewɔ na ngi yauwandangɔ a wue hulewengɔ, tawao i wu lolinga kunafɔ wɔlɔyɛi wu ndɛi majɔva jifa wua Kristi-ni wu wilingɔ hu, a wu hinda hugbatɛlɔ a nina, i pie wu layii a Kristi maahu aa gbua, i wu liisia gbaya, i pie wu hapi wuaa, waa jɛɛjia wu lalei hu a Kristi. 11Ngewɔ i lo ngi mahayɛi ma kunafɔ kɛɛ kunafɔ va! Amiina. 12Sailas na ngi mbumbunga a nya ndewe jifa nya longɔ a ngie, tamia i gbɔni nya ma kɔlɔ gutui ji yoyova wu gama. Nya longɔ ngi wu lii nɛpɔ tawao nyaa seli wuaama kɛ ji kpɛlɛɛ ngi punga kɔlɛi ji hu kɔloongɔ ngauwandei na ma lɔ Ngewɔ a pie a wue jifa ngi longɔ a wue hulewengɔ. A hou kpaŋ wu lalei ma a Kristi, waa yɔkɔ. 13Wu mbaa Kristimablei nasia ti heini Babilɔn, Ngewɔ i tia bɛɛ wumbuni, tɛɛ ta va wu ma; tawao nya hindoloi Maaki bɛɛ yɛ a va wu ma. 14A va wu nyɔunyɔ ma, wu wu nyɔunyɔ gulu kɛva kɛ wu longɔe a wu nyɔunyɔ. Ngewɔ i ndiilɛli ve wu kpɛlɛɛ wɛ Kristi woo a wue. |