1 KƆLINTIBLƐISIA


1 KƆLINTIBLƐISIA 1

1Nya Pɔɔl, Ngewɔ i loko longa nya ma yɛva a tomɔi Yesu Kristi va, nya lɔ ngi kɔlɛi ji nyɛima, kɛɛ mu mbaa Kristimɔi Sɔstɛnisi, 2Ngewɔblei nasia gama ti Kɔlinti, nasia gbi Ngewɔ i loko longa ti ma yɛva a ngi woo, tia Yesu Kristi-ni ti wilingɔ hu, kɛɛ nungei nasia kpɛlɛɛ hinda gbi lekee ta hɛɛ mu Lemɔi Yesu Kristi ma, mua tieni mu Lemɔi. 3Nyaa mu Kɛkɛ Ngewɔ vɛlima kɛɛ mu Lemɔi Yesu Kristi aako i ti Ngauwandei kɛɛ ndiilɛli ve wu wɛ. 4Nga siɛgbualɔ Ngewɔ ma kpema gbi ngauwandei va i fɛnga wu wɛ Yesu Kristi sabui hu. 5Jifa wua Kristi-ni wu wilingɔ hu, Ngewɔ i pienga wu magbatɛnga pelei gbi hu kpɛngɔ ngowili hugɛlɛi ma pandawanda kɛɛ ndelei nungaa ma pandawanda. 6Kristi hindei nasia ti hugɛnga a wue, wu langa la a wu lii gbi 7famia wuii yaa baani a kpekpeya yakpe bɛɛ majɔɔla, kia wu Ngewɔ mawuloma Ndemɔi Yesu Kristi magɛva. 8A gbɔma pielɔ wu loo kpauŋ i to kɛlɛmɛi, aako sabu gbi aa yɛ na wu lɛɛva Kpɛmbo Volei na ma mu Lemɔi Yesu Kristi a wa. 9Mahoungɔ mu la la kɛ hinda gbi Ngewɔ i ndengaa yɛ a pielɔ, a pielɔ huɛɛŋ, Ngewɔ na i loko loni wu ma aako wua ngi Hindoloi, mu Lemɔi Yesu Kristi wu wili hu. 10Kpayei na va mu Lemɔi Yesu Kristi i feni mbɛ, nyaa ndema wu kpɛlɛɛ ma, nya mbaa Kristimableisia, wu woo i yɛ yila na gbi hu wa nde aako wu luahu aa gɔlɛ kulo bɛɛ. Wu woo i yɛ vulii yakpe, wu giliyii kɛɛ wu lii-hu-hindei i yɛ yakpe. 11Gbamaile Kloi bondɛisia lɛɛngaa ti ndenga nya ma leiŋ nya mbaa Kristimableisia, tɛɛ wu luahu i gɔlɛkɔlɛnga. 12Na nya lii i ma ndeva tamia a ji numu gbi wu lia ngi layie i gba pekeisia ti ndeisia ma. Nungaa lɛɛngaa ta ndelɔ tɛɛ, “Mu toma Pɔɔl lɔ ma;” pekeisia tɛɛ, “Mu toma Apɔlɔs lɔ ma”; yeepekeisia tɛɛ, “Mu toma Pita lɔ ma;” yeenasia tɛɛ, “Mu toma Kristi lɔ ma.” 13Yesu gɔlɛkɔlɛngɔe? Pɔɔl lɔ haani Krɔsii ma wu va? Ti wu wuani a Ngewɔ yei Pɔɔl biyei hu lɔ? 14Ngi siɛgbua Ngewɔ ma jifa ngii numu weka gbi wuani a Ngewɔ yei kɛlee Klipɔsi kɛɛ Gayɔs. 15Numu gbi ii wu lia hɔɔ aa gu a ndela yɛ ti ngi wuailɔ a Ngewɔ yei nya biyei hu. 16(Ngi Stɛfanɔs taa ngi wɛlɛbubleisia bɛɛ wuailɔ kɛɛ na wooma ngii lani la kɛ ngi numu weka gbi wuailɔ.) 17Kristi ii nya looni nungaa wuava. I nya looni Ngowili Yekpei lɔ leva, tawao ngii ndema a nuuvu nɛmahulewe yɛpɛ, aako Kristi haalei krɔsii ma aa yɛ a gbama hinda. 18Gbamaile Kristi haalei krɔsii ma yeengowili i yɛni a baaba hinda lɔ nasia wɛ tii mbawoya weleima; kɛɛ mua mu bawoma, i yɛni a Ngewɔ gbayei lɔ mu wɛ. 19Ngewɔ Gɔlɛi yɛ, “Nga nɛmahuleweblɛisia ti nɛmahulewei yɛlɔ a gbama fuŋ, ngi kaableisia ti hinda hugɔɔlei wote a baaba hinda.” 20Faale naa, njɛpɛ gbi ii nɛmahuleweblɛisia la kɛɛ kaableisia kɛɛ nasia ti bɛɛngɔ a dunyama laablɛi wiela. Ngewɔ i kɛnga kɛ dunyablaa ti nɛmahulewei i yɛni a baabaa hinda lɔ! 21Ngewɔ nɛmahulewe wai i pieilɔ nungaa tɛɛ gu taa ngi gɔɔ a ti nda nɛmahulewe. Kɛɛ nɛɛilɔ Ngewɔ wɛ nasia bawova ta la a “Baaba” wowili ji ma nde. 22Juuisia ti longɔ kabande hindanga ti wie kɛva kɛ mu wowili i gbuanga vulii Ngewɔ gama lɔ. Nasia Juu yaa tie tia nɛmahulewe gɔlila lɔ kpewengɔ ti ma. 23Kɛɛ mua, Kristi na ti kpakpani krɔsii ma tamia ma ngi hinda hugɛ, yeengowili a gbalɛ Juuisia ma, tawao nasia Juu yaa tie a babaa; 24kɛɛ nasia wɛ Ngewɔ i ti lolinga, ti yɛ a Juungaa ɔɔ nasia Juu yaa tie, Ngowili Yekpei ji kɔloongɔ Kristi lɔ ma, na Ngewɔ gbayei a ngie kɛɛ ngi nɛmahulewei. 25Gbamaile Ngewɔ wiehindei na kpuangɔ a baaba hinda, nɛmahulewe i hu i lewe nuuvu nɛmahulewe gbi ma tawao na kpuangɔ a faakaalewe i gbayani nuuvu gbaya gbi ma. 26Nya ndeengɛisia, a gili lɛɛ a yɛyii wɔɔ wu yɛ hu pɛiŋ Ngewɔ i wu loli. Kia nungaa ti yɛyiisia ti na dunyei hu, wuii yɛ gbotoni wu nɛmahulewengɔ, wuii yɛ gbotoni kpaya i wu wɛ, wuii yɛ gbotoni wu gbuani maha wɛlɛ laa. 27Nungɛi nasia dunyableisia ti ti wumbungɔ a baabaa, tia vulii lɔ Ngewɔ i ti wumbuni, nɛmahuleweblɛisia yawufeva, tawao i nasia lɔ wumbuni ta ti loli a faakaalewe kpayableisia yawufeva. 28I nungei nasia lɔ wumbuni dunyablaa ti lɛɛngɔ ti hu tawao gbɛogbɛ yaa a tie, nungei nasia yawufeva dunyablaa ti baa gɔngɔ ti ma. 29Ji a kɛlɔ kɛ numu gbi ɛɛ lawo Ngewɔ yaama. 30Kɛɛ Ngewɔ i wanga a wue wua Yesu Kristi-ni wu wilinga hu, tawao i Kristi yɛnga a mu nɛmahulewe. Ngi sabui hu lɔ Ngewɔ i mu yɛnga a pɔnablaa i mua tieni luahu gbatɛnga, mu yɛnga a ngi nda nungeisia, i mu gbuanga jumbui luwɔyɛi hu. 31Faale naa, kia Ngewɔ Gɔlɛi i ndeni la yɛ, “Numu gbi lekee ngi longɔ i lawo, i lawo a na Ndemɔi i pienga.”


1 KƆLINTIBLƐISIA 2

1 KƆLINTIBLƐISIA 2 1Ji ngi wani wu gama, nya mbaa Kristimableisia, Ngewɔ lɔnya lɔwungɔi hugɛva, ngii ngowili waawaa leni ngaa kɛ kɛ nya gaangɔ waa le. 2Ajifa watii na ngi yɛ wu gama ngi nya lii huyiliilɔ lemava hinda gbi ma lekee kɛlee Yesu Kristi, kɛɛ ngi haalei krɔsii ma. 3Faale ji ngi wani wu gama nya hawangɔ yɛla, tawao nya maa a gbɛli a nduwɛi, 4tawao kaai na ngi kɛni kɛɛ ngowili na ngi ndeni, ngii pieni a nuuvu nɛmahulewe yeembɛili-yɛpɛ, ngi pieni a pelei na lɔ a Ngewɔ Yafei gbayei gɛ leiŋ. 5Wu lalei a Ngewɔ ii gbuani hɔɔ nuuvu nɛmahulewe hu, i gbuani Ngewɔ gbayei hu lɔ. 6Na hu gbi, mu nɛmahulewe wowili lema nasia lɔ ma ti hu gbangɔ Ngewɔ hu. Kɛɛ dunyei nda yeenɛmahulewe ii le ɔɔ ngafangei nasia ti kpayei yayengema dunyei ji maahu kiahuna ti nɛmahulewe, kpayablɛi nasia ti wama gbɔyɔma. 7Nɛmahulewe wowili ma nde i yɛni a Ngewɔ nɛmahulewe lɔwungɔi lɔ, ndɔwungɔ nuuvungaa ma, kɛɛ na Ngewɔ i hugbatɛnga wɔɔ kɛva a mue pɛiŋ Ngewɔ i yaa dunyei gbatɛ aako mu yɛyii i gu i wie kia ngi wɔlɔyi i na. 8Ngafangei nasia mahangaa a tie dunyei hu yeengila bɛɛ ii yeenɛmahulewei ji gɔɔni. Ina ti kɔɛilɔ, Ndemɔi na ngɔlɔya ngi wɛ, tii yɛ ngi gbakpa krɔsii ma. 9Na hu gbi, kia Ngewɔ Gɔlɛi i ndeni la yɛ, “Na numu gbi ii yaa wɔɔ gba tɔni tawao ii yaa mɛnini, na numu gbi ii gilini wɔɔ gba kɛ a gulɔ i wie, ta vulii lɔ Ngewɔ i hugbatɛnga nasia va ti longɔ a ngie.” 10Kɛɛ mua lɔ Ngewɔ i ngi hinda lɔwungɔi gɛnga a mue ngi Yafei sabui hu. Jifa ngi Yafei a hindei gbi hugbɛkpɛlɔ, Ngewɔ liihu hinda lɔɔwungɔisia vulii bɛɛ. 11Numu nda yafei na lekee i ngi hu tamia i ngi hinda gbi hugɔngɔ; hii lɔɔ Ngewɔ Yafei yakpe i Ngewɔ hinda gbi hugɔngɔ. 12Kiahuna muii yaa dunyei ji yeengafei majɔɔni; kia na aa wie, mu ngafei na lɔ majɔɔnga Ngewɔ i njoyoni, aako mu na kpɛlɛɛ gɔɔ Ngewɔ i fenga mu wɛ gbaama. 13Faale naa, njɛpɛi na ma nde, nuuvu nɛmahulewe ii le aa mu gaa la, kɛlee na Ngewɔ Yafei a mu gaa la, ji ma yɛ tɔnyɛi nasia hugɛma Ngewɔ Yafei a kɛ a mue nasia gama Ngewɔ Yafei i ti hu. 14Numu gbi lekee Ngewɔ Yafei ii ngi hu, ɛɛ hani yekpei nasia majɔɔ Ngewɔ yafei a fe gbaama. Numu bondɛi na ii ti gbekpeyii gɔɔ vulii, ti yɛni lekee a baaba lɔ ngi wɛ, ajifa numui na lekee Ngewɔ Yafei i ngi hu ta lɔ a ti gbekpeyii gɔɔ. 15Na hu gbi, numui na lekee Ngewɔ Yafei i ngi hu a gulɔ a hani gbi gbekpeyii hugɔɔlaa, kɛɛ numu gbi ɛɛ gu a kiti lewela ngi ma. 16Kia Ngewɔ Gɔlɛi i ndeni la yɛ, “Ye lɔ i Ndemɔi nɛmahu va gɔngɔ? Ye lɔ a gu a ngi laahila?” Na hu gbi, kia Kristi a gili, hii ma gili.


1 KƆLINTIBLƐISIA 3

1Nya mbaa Kristimableisia, a tɔnya ngii guni a wu gaala kia nga nungei nasia gaa Kristi Yafei i ti hu; kpɔndangɔ yɛla nya ma wu gaava kia nungei nasia ti na dunyei woo a tie, kia ndolangaa wu lalei hu a Kristi. 2Kpɔndangɔ yɛla nya ma nyiniyɛi veva wu wɛ, ngii mɛhɛɛ kpaukpau veni ajifa wu magbatɛngɔ ii yɛla fa, tawao kiahuna bɛɛ wu magbatɛngɔ ii le fa. 3Ajifa wuaa lɔɔ luvama kia dunyei ji hublɛisia ti piema. Ji wu tolo gbuama wu nyɔunyɔ ma, wa yianjia, na ɛɛ kɛ kɛ dunyei ji woo lɔ a wue, wa luva kia nungaa gbamɛisia? 4Ji wu yilayee a nde yɛ, “Ngi toma Pɔɔl lɔ ma,” pekei yɛ, “Ngi toma Apɔlɔs lɔ ma” wuii luvama kia dunyablaa gbaama? 5Ye lɔ a Apɔlɔs? Ye lɔ a hɔɔ a Pɔɔl? Ngewɔ yengeblaa lekee lɔ a mue, mu pienga wu langa a Ngewɔ. Mu yilayee gbi a ngengei na lɔ wie Ndemɔi i fenga ngi wɛ pieva. 6Nyaa ngi tuhani-galei hini, Apɔlɔs i njɛi wu ma, kɛɛ Ngewɔ lɔ i pieni tuhani na i gbekpe. 7Numui na a tuhani-galei hii kɛɛ numui na a njɛi wu ma bagɔma waa ii ti yengei ma. Ngewɔ nda yengei lɔ bagɔma i ma ajifa ta lɔ a pie yeetuhani i gbekpe. 8Nduahugɛ gbi ii tuhani hiimɔi luahu taa numui na a njɛi wu ma; Ngewɔ a numu gbi pawalɔ ngi nda yengei va i pienga. 9Gbamaile mbangaa lɔ a mue mu ngenge yila wiema Ngewɔ wɛ, tawao Ngewɔ gbalei lɔ a wue. Ngewɔ wɛlei lɔ gbɔma a wue. 10Ji ngi yengeni a kpekpeye na Ngewɔ i feni nya wɛ, ngi pɛlɛ-lomɔ yeekpekpe yenge lɔ wieni ngi pɛlei hitɛ, tawao numu weka lɔ yeepɛlei loma. Kɛɛ numu gbi a ngi mahugbelɔ kia a yee pɛlei loo. 11Ajifa Ngewɔ wilanga a Yesu Kristi yɛla a pɛlɛ-hitɛngɔ yakpei, tawao pɛlɛ weka ɛɛ yaa hitɛ. 12Nungaa lɛɛngaa ta yengelɔ a kani-gbɔlu ɔɔ kani-gole ɔɔ kani baagbangɔ wekangaa pɛlɛ hitɛngɔi ji lova; pekeisia ta yengelɔ a ngulii ɔɔ kpitii ɔɔ kɛi. 13Tawao nungaa ta numui gbi ngi nda yengei yekpeyii lɔlɔ watii na Kristi Volei a ti magɛ. Gbamaile Foloi na ma ngɔmbui lɔ a numu gbi ngi nda yengei maagɛ; yeengɔmbui a ngengei gbi maagɛlɔ i ngi yɛyii gɛ leeŋ. 14Pɛlɛ-hitɛngɔi na ti toni i ngɔmbui huvoongaa, pɛlɛ-lomɔi a pawa majɔɔlɔ. 15Kɛɛ ngɔmbui i numu gbi ngi nda yengei mɔngaa, a baalɔ a pawɛi kɛɛ na hugbi a bawolɔ, bi tɔaa bɛɛ i gbua ngɔmbui hu lɔ. 16Wu kɔɔlɔ vulii kɛ Ngewɔ wɛlei lɔ a wue tawao kɛ Ngewɔ Yafei lɔ heini wu hu! 17Faale numu gbi i Ngewɔ wɛlei nyaningaa, Ngewɔ a ngi nyanilɔ. Ajifa Ngewɔ wɛlei magayemangɔ, tawao wua vulii lɔ ngi wɛlei a wue. 18Numu gbi aa ta yekpe gbowa. Numu gbi wu lia i gilingaa yɛ dunyama nɛmahulewei lɔ ngi wɛ, mahoungɔ i yɛ a kpowamɔ aako ngi nɛmahu i lewe vulii. 19Gbamaile na dunyablaa ta mbumbu tɛɛ nɛmahulewe le, kpowa hinda le Ngewɔ yaama. Kia Ngewɔ Gɔlɛi ndeni la yɛ “Ngewɔ a nɛmahuleweblɛisia ti nɛmahulewei yɛlɔ a mani i ti hou la.” 20Tawao Ngewɔ Gɔlɛi yeehinda weka yɛ, “Ndemɔi kɔɔlɔ kɛ nɛmahuleweblɛisia ti giliisia tii yekpeni.” 21Maa ii houni hɔɔ numu gbi i lawo a na nuuvunga ta gu ti pie. A tɔnya vulii wu woo lɔ a hani gbi: 22Nya Pɔɔl kɛɛ Apɔlɔs kɛɛ Pita kɛɛ dunyei ji kɛɛ ndɛvui kɛɛ hee kɛɛ ngaama hindeisia kɛɛ kulɔma hindeisia ji kpɛlɛɛ wu woo mia, 23tawao Kristi woo lɔ a wue, Ngewɔ woo a Kristi.


1 KƆLINTIBLƐISIA 4

1Mahoungɔ numu gbi i mu wumbu a Kristi yengeblaa, Ngewɔ i ngi lɔnya lɔwungɔisia loko wuaanga mu yeya. 2Hinda yakpei na mahoungɔ ngengemɔ bondɛi na i pie tamia a lɔnyala a ngi lemɔi. 3Kiahuna, nya gbewe gbi ii na ina wu kiti leweilɔ nya ma ɔɔ ina numu weka gbi i teweilɔ; ngɛɛ kiti lewe nya yekpe vulii ma. 4Nya yekpe vulii ngii hinda nyamu gɔɔ ngi pienga, kɛɛ na ii kɛni kɛ ngii yaa hinda nyamu gɔɔ ngi pienga. Ndemɔi lɔ a kiti lewe nya ma. 5Faale waa kiti lewe numu gbi ma yeewatii na gulɔ. Mahoungɔ kɛlɛma kiti lewelɛi i Ndemɔi walei mawulo; a ndɔwuma hindeisia gbualɔ fofo ya; i nungaa ti lii huveisia magɛ. Yeewatii na mia Ngewɔ a numu gbi lato a tatoi na mbɛngɔ ngi ma. 6Nya mbaa Kristimableisia, ngi mua Apɔlɔs wotenga a tɔmaseli aako wu gaa mu ma, waa windɛ na maahu nyɛingɔ tawao waa mata gbua a numu yila, waa lɛɛ yeepekei hu. 7Ye lɔ i wu gbatɛni i wu lewe nungaa wekeisia ma? Na gbi i wu yeya Ngewɔ ii le aa fe wu wɛ? Wa yee gu wu yonga lewe bi tɔaa bɛɛ na i wu yeya Ngewɔ ii le aa fe gbaama? 8Wu gilingɔ la wu hani gbi majɔnga wu gbewengɔ fa ɔɔ; wu gilingɔ la wu gbatɛnga? Wu gilingɔ la wu yɛnga a maha waawangaa mua muii ma. A nyandelɔ ina maha waawangaa vulii lɔ a wue aako mua wueni mu yeemahayɛi mɛ. 9Gbamaile i wienga nya gama bi tɔaa bɛɛ Ngewɔ i mua mu toblɛisia lukpenga tomɛi yeekɛlɛmayei kia nungei nasia ti na Kotii i ti lɛɛnga ti waava faha hu aako malikeisia kɛɛ nuuvungaa ti ti haamɛi lɔ. 10Kristi va kpowablaa lɔ a mue; kɛɛ wua wu gilingɔ la wu nɛmahulewengɔ ji wua Kristi-ni wu wilingɔ hu! Mua mu hawangɔ kɛɛ wua wu gilingɔ la wu gbayangɔe; nungaa ti lɛɛngɔe mu hu kɛɛ ta bagɔɔlɔ wu ma! 11I to watii ji vulii ma ndɔlɛ lɔ mu ma, tawao mu bolohu bengɔ; kula hawɛisia mia ma ngili; ta mu lewelɔ; ma lewetewelɔ nga heima ii mu yeya; 12ma mua yekpe gahu gbɔyɔlɔ a ngengei. Ti mu jondungaa, mu ti luba; ti juwuya hitɛngaa mu wooma, mu gu mbu; 13ti mu yɛlinga, mu pote a njɛpɛ nɛnɛɛngaa. Muii gbekpeni mua lewe kɛi na ma i kaawɔɛi ma; dunyama yeekpɔkpɔɛi a mua lɔ i to watii ji vulii ma. 14Ngii kɔlɛi ji nyɛima wu gama aako wu wufe kɛɛ aako ngi wu gaa kia nya liima leenga. 15Gbamaile kia bɛɛ kaamɔ tauji puu lɔ wu yeya Kristi hindei hu, Kɛkɛi i yakpe wu yeya. Gbamaile ngi yɛnga a wu kɛkɛ ajifa ji ngi wani a Ngowili Yekpei wu gama wu woteilɔ a Yesu Kristi woo. 16Faale, ngi wu manɛnɛ, a nya wokɔɔ. 17Sabui ji vamia ngi Timoti looma wu gama nya liima loo wɔnangɔi Kristi hu. A nya jiayii gbi hugɛlɔ ndɛvu ninɛi ji hu mua Yesu Kristi-ni mu wilingɔ hu, na nga Kristimableisia kpɛlɛɛ gaa la hu gbi. 18Wu lɛɛnga wua mata gbuama jifa wu langa la kɛ ngii wama vama wu ma. 19Na hu gbi, Ndemɔi i lumangaa nga walɔ wu gama hugutungɔ, tawao na hu mia nya yekpe nga kpayei na lɔ i mamaniblɛi jisia wɛ, tawao njɛpɛ gbamɛi na ta nde ta ii le. 20Ajifa numu i wuaanga Ngewɔ mahayɛi bu, numu a kɔɔ ngi wiehindei ma lɔ na ii le a nde. 21Ji nga wa bi gama a fomɛi, ɔɔ ndoma yekpeihu kɛɛ hinda manɛɛnɛ, yee gbɔɔ bi longɔla?


1 KƆLINTIBLƐISIA 5

1Kiahuna tiaa vulii ndema tɛɛ puegbua hindeisia lɔ wiema wu lia, maluwangɔ wa na hii nasia vulii bɛɛ tii Ngewɔ gɔɔ tɛɛ pie. Ti hugɛnga a nge kɛ numui tia ngi kɛkɛ nyahɛi lɔ lama. 2Kɛ wa yee na gu wu mata wie? Kia waa mata wie, mahoungɔ wu lii i nyani, tawao numui na a na nyɔkɔ wie, mahoungɔ wu ngi gbɛ wu wooma. 3Tawao kia bɛɛ nya gbuhɛi maguhangɔ a wue, nyaa gilima a wue; tawao ji piengɔe bi tɔaa bɛɛ nya gbuhɛi lɔ miando wu lia tawao mu Lemɔi Yesu gbayei hu ngi wilanga a numui na lɛɛla i hinda maluwangɔi ji wienga. Ji wa gomɛ hinda yila piengɔ bi tɔaa bɛɛ nyaa wu lia, mu Lemɔi Yesu gbayei hu, 5wa yeenumui ji loko wuaalɔ Seitana yeya ngi gbuhɛi waava aako ngi yafei i bawo Kpɛmbo Volei na ma mu Lemɔi Yesu a wa. 6Ii wɔnani wu va wu mamani wie! Wu njɛpɛwoi ji gɔɔlɔ: “Yisti wulo hii a pielɔ bledii gbi i ve i yɛ buufa.” 7Mahoungɔ wu jumbu yisti wovei gbi wua wu ma aako wu yɛ vulii sɛwɛsɛwɛ. Na wiengaa kɛ wu wienga kia lɛwɛ lɔgbɔngɔ nina na yisti gbi ii hu, kia ngi kɔɔngɔ la vulii kɛ hii vulii wu na. Ajifa mu Lewema Gomɛi hugbatɛngɔe, kia na ti Kristi, mu Lewema Gomɛi yeembalɛi gbuanga a saa. 8Faale a mu mu Lewema Gomɛi ga, kɛɛ muɛɛ ka a bledii na yisti wovei, jumbui kɛɛ pienyamui, i hu; ma ka a bledii na lɔ yisti gbi ii hu, sɛwɛsɛwɛi kɛɛ tɔnyɛi yeebledii. 9Kɔlɛi na hu ngi nyɛini wu gama ngi ndeilɔ wu ma ngɛɛ waa gbɛɛ ngawufemablɛisia ma. 10Ngii yɛpɛma nasia va tii Ngewɔ gɔɔ ta puegbua hindei wie, ɔɔ ta maninyamu wie nungaa ti yeya-hanisia ma, ɔɔ ta humɛi wie, ɔɔ ta hɛɛ nɔmɔliisia ma. Wua tieni waa gbɔ hinda gbi ma, kɛɛ ngii ndema ngɛ wu gbua dunyei hu feu. 11Na nya lii i ma ji ngi kɔlɛi nyɛini tamia ngɛɛ waa gbɛɛ numui na ma a ta yekpe loli a wu mbaa Kristimɔ kɛɛ a puegbua hindei wie, ɔɔ a mani nyamu wie nungaa ti yeya-hanisia ma, ɔɔ a hɛɛ nɔmɔliisia ma, ɔɔ a njafɛi wie, ɔɔ ndɔhoumɔɔ a ngie, ɔɔ a humɛi wie. Waa hei wua yeenumu bondɛi na waa mɛhɛɛ mɛ. 12Nya yenge ii le kiti leweva nasia ma Kristimablaa yaa a tie, Ngewɔ lɔ a kiti lewe ti ma. Kɛɛ mahoungɔ wu kiti lewe wu mbaa Kristimableisia ma kia Ngewɔ Gɔlɛi i ndeni la yɛ, “A numu nyamui gbɛ i gbua wu lia.”


1 KƆLINTIBLƐISIA 6

1Wu yilayee ngi mbaa Kristimamɔi i hinda nyamu wiengaa a ngie, gbɛe a li a yeenjiɛi nasia gama tii Ngewɔ gɔɔ ti Kotii hu kia aa pie Ngewɔbleisia ti nde? 2Wuii kɔɔ kɛ Ngewɔbleisia lɔ ti wama dunyei gbɛmboma? Kɛ ina wua lɔ wu wama dunyei gbɛmboma, wuɛɛ gu a njia mumuisia lela? 3Wuii kɔɔ kɛ mua lɔ mu wama malikeisia gbɛmboma? Mahoungɔ le mu bɛɛ a kiahuna yiɛisia lela? 4Njia bondɛi nasia ti gulangaa, wa li a tie nungei nasia lɔ gama toma ii ti yeya Ngewɔmableisia lia? 5Wuɛɛ wufe? I gbɔu bɛɛ nɛmahulewemɔ yila a yɛlɔ wu lia a gu a njia lela Kristimableisia luahu. 6Kia waa ji wie, Kristimamɔi lɔ lima a ngi mbaa Kristimamɔi nasia gama tii Ngewɔ gɔɔ, ta yeenjiɛi le. 7Ji vulii Kotii yiangaa ta gula wu luahu a kɛlɔ kɛ wu gbuanga Kristi welei ma. Ɛɛ fesa wu va ti hinda nyamu wie a wue i lo wu ma? Ɛɛ fesa wu va ti wu gapu i lo wu ma? 8Kia waa na wie, wua vulii wa nyamui lɔ wie a wu nyɔunyɔ tawao wa wu nyɔunyɔ gapu wu mbaa Kristimableisia vulii bɛɛ. 9Wu kɔɔlɔ vulii pandawanda kɛ nasia ta nyamu wie tɛɛ Ngewɔ mahayɛi majɔɔ. Waa wua yekpe gbowa; nungei nasia ta ngawufema hindei wie ɔɔ ta hɛɛ nɔmɔliisia ma ɔɔ ta pueigbua ɔɔ ta ti mbaa hingeisia jɔɔ, 10ta humɛi wie, ɔɔ ta mani nyamu wie nungaa ti yeya-hanisia ma, ɔɔ ndɔhoubleisia a tie, ɔɔ njafablaa, ɔɔ humablaa, jisia kpɛlɛɛ yeengila bɛɛ ɛɛ Ngewɔ mahayɛi majɔɔ. 11Hii wɔɔ wu lɛɛnga wu yɛ na. Kɛɛ Kristi i jumbui wuanga wu ma wu yɛnga sɛwɛ, wu yɛnga a Ngewɔ woo; tawao wu yɛnga a pɔnablaa Ngewɔ gama, Ndemɔi Yesu Kristi kɛɛ Ngewɔ Yafei biyei hu. 12Nungaa ta ndelɔ tɛɛ, “Sawei ɛɛ mu maabali hinda gbi wieva.” Tɔnya le, kɛɛ hindei gbi ii le aa nyande. Nga gulɔ a ndela ngɛɛ Sawei lumangɔe nya wɛ hinda gbi wieva, kɛɛ ngɛɛ luma hinda gbi i nya yɛ a ngi luwɔ. 13Numu wekei a ndelɔ yɛ, “Mɛhɛɛ i numu goi va lɔ, numu goi i mɛhɛɛ lɔ va.” Tɔnya le, kɛɛ folo yila Ngewɔ a ti veenjɔɔ kpɛlɛɛ nyanilɔ. Numu gbuhɛi ii na ngayengeva puegbua hinda va, i na yengeva Ndemɔi lɔ wɛ; tawao Ndemɔi lɔ mahɛi le numu gbuhɛi maahu. 14Ngewɔ i Ndemɔi vuliilɔ i ngi wumbu hee hu, tawao ngi gbayei a mua bɛɛ vululɔ ndɛvu ninɛi va. 15Wu kɔɔlɔ kɛ wu gbuhɛisia ti yɛni a Kristi gbuhɛi yeembekengaa lɔ. Mahoungɔe ngi Kristi gbuhɛi yeembeke yila wumbu ngi pote a puegbua nyahɛi gbuhɛi yeembeke? Na ɛɛ gu a wiela kulo bɛɛ! 16A tɔnya wu kɔɔlɔ kɛ numui na a ngi luwui wili puegbua nyahɛi ndɛi hu i pienga tia ta ti yɛnga a kpuha yila. Ngewɔ Gɔlɛi i ndeilɔ leiŋ yɛ, “Hindoi taa ngi nyahɛi ti veenjɔɔ ta yɛ a numu yila lɔ.” 17Kɛɛ numui na a ta yekpe wili Ndemɔi hu tia ta ta yɛlɔ a yakpe. 18A gbele puegbua hinda ma. Jumbu hinda weka gbi numu a pie ɛɛ hinda wie a ngi gbuhɛi kɛɛ numui na a puegbua hindei wie i jumbu wulinga ngi gbuhɛi vulii ma. 19Wuii kɔɔ kɛ wu gbuhɛi i yɛni a Ngewɔ Yafei wɛlei lɔ, na i wu hu tawao Ngewɔ i feni wu wɛ? Wu woo yaa wua yekpe, Ngewɔ lɔ ngi woo a wue; 20i wu yeyani a hani lɔ. Faale a wu gbuhɛisia yayenge Ngewɔ wɔlɔva.


1 KƆLINTIBLƐISIA 7

1Nyaa na yɛpɛma kɔlooni hindei nasia ma wu kɔlɔ nyɛini nya gama fa. A nyandelɔ hindo va ina ii nyaha jɔni gbi. 2Kɛɛ jifa puegbua la gbotongɔ hu waa, mahoungɔe hindo gbi i ngi wuma nyahɛi jɔɔ, tawao nyaha gbi i ngi wuma hinii jɔɔ. 3Mahoungɔ hindoi i ngi mayengei wie ngi nyahɛi gama, nyahɛi i ngi mayengei wie ngi hinii gama, ti veenjɔɔ kpɛlɛɛ ti lapi ti ti nyɔunyɔ liima hindei wie. 4Nyahɛi ii le ngi woo aa yɛ a ngi gbuhɛi, ngi hinii lɔ ngi woo a ngie; hii lɔɔ hindoi bɛɛ ii le ngi woo aa yɛ a ngi gbuhɛi, ngi nyahɛi lɔ ngi woo a ngie. 5Waa ganga a wu nyɔunyɔ lava kɛlee wu pu ngooyila hu lɔwɔ wulo va aako wu Ngewɔ vɛli; kɛɛ i gbɔyɔngaa lekee wu yama lama. Wu ji wiengaa Seitana ɛɛ gu aa pie waa puegbua jumbu wie ajifa wue gbaha a wu huhoula. 6Sawa ii le ngaa yɛ fema wu wɛ ji wieva; ngi wu laahimaa lekee ngɛɛ wu pie. 7A tɔnya vulii ngaa lolɔ wu yilayee gbi i wie kia ngi na, kɛɛ Ngewɔ i numui gbi gɔni a kpaya ngilangila lɔ, numui ji ndɛi a ji, yeena ndɛi a na. 8Nyaa na ndema hindo-gbawui ma kɛɛ nyaha gbawui, kɛɛ ponyahɛi ngɛɛ a fesalɔ wu va wu lo kpawuyei hu kia ngi na. 9Kɛɛ ina wuɛɛ gu a wua yekpe huhoula kɛ hindoi i nyaha gɔli, nyahɛi i hini jɔɔ. Ji fesangɔ i lewe ji sɔɔ-manii a wu gbalɛ. 10Sawa lɔ nya yeya nyahableisia tia hinibleisia va, nya ii le ngaa nda, Ndemɔi le. Nyahɛi aa gbele ngi hinii ma, 11kɛɛ i gbelenga ngi ma, i lo kpawuyei hu, ina na ii le, i yama ti taa ngi hinii luahu gbatɛ tawao hinii aa gbele ngi nyahɛi ma. 12Nyaa ndema yeemɔniisia ma, nya vulii, Ndemɔi ii le, Kristimamɔi yeehindoi i longaa a nyaha na Kristimamɔ ii le, tawao yeenyahɛi i lumangaa taa ta ti heilaa ma, maa ii houni hiindoi na i gbele ngi ma. 13Tawao Kristimamɔi yeenyahɛi i longaa a hindo na Kristimamɔ ii le, tawao yeehindoi i lumangaa taa ta ti heilaa ma, maa ii houni nyahɛi na i gbele ngi ma. 14Ajifa hindoi na Kristimamɔ ii le a yɛlɔ a Ngewɔ woo jifa taa ngi nyahɛi na Kristimamɔ a ngie ti wilingɔ hu, tawao nyahɛi na Kristimamɔ ii le a yɛlɔ a Ngewɔ woo jifa taa ngi hinii na Kristimamɔ a ngie ti wilingɔ hu. Ina ji ii yɛ hii, ti leengeisia taa yɛ a ndeengɛi nasia lɔ tii Ngewɔ gɔɔ; kɛɛ kia i hii, ti yɛngɔe a Ngewɔ woo. 15Na hu gbi, numui na Kristimamɔ ii le i longaa i gbele ngi mbaa na ma Kristimamɔ le, i wie hii. Yeehinda bondɛi na hu, numui na Kristimamɔi a ngie yeehinii ɔɔ nyahɛi, nyaha-jɔɔ jawei ɛɛ gula ngi ma lumava sɔɛi na vayala ma. Ngewɔ i wu lolingalɔ heiva ndiilɛli hu. 16Kristimamɔi yeenyahɛi, bɛɛ gu baa kɔɔ kɛ ba bi hinii bawolɔ? Ɔɔ Kristimamɔi yeehinii, bɛɛ gu baa kɔɔ kɛ ba bi hinii bawolɔ? 17Wu yilayee gbi i luva a pelei na Ndemɔi i kɛnga a ngie kɛɛ yɛyii na wɔɔ i yɛ hu Ngewɔ i ngi lolini. Ji lɔ sawa le nga nungaa gaa la sɔsii kpɛlɛɛ hu. 18Numui na ngi heingɔ biliya i Ngewɔ loli gulungaa, aa lapi bili yeekpoi gbuava ta yekpe ma; numui na ngi heingɔ ii le bili ya i Ngewɔ lolii gulungaa, aa pie ti ngi hei bili ya. 19Gbamaile numu heingɔ i yɛla bili ya-o, ngi heingɔ ii le nga-o, gbɛogbɛ yaa na; na hindei yeembawa le tamia a Ngewɔ jaweisia houle. 20Numu gbi i yɛ ngi yɛyii na hu i yɛ hu wɔɔ pɛiŋ i yaa Ngewɔ loli gulu. 21Nduwɔ lɔ yɛla a bie ji Ngewɔ i bi lolini? Na aa gbewe bi ma, kɛɛ ina pele i yaa bi wɛ gbuava nduwɔyɛihu, bi yeepelei hou. 22Gbamaile nduwɔi na Ndemɔi a ngi loli ii yɛni a nduwɔ Ndemɔi gulɔ; hii lɔɔ na, numu na nduwɔ ii yɛni a ngie piɛŋ na Kristi a ngi loli i yɛni a ngi luwɔ lɔ. 23Ngewɔ i wu yeyani a hani lɔ, waa yɛ a nuuvungaa ti luwɔ. 24Nya mbaa Kristimableisia, numu gbi i vɛfɛ Ngewɔ ma kpaŋ tawao i lo ngi yɛyii hu kia lee i yɛ na wɔɔ Ngewɔ i ngi lolini. 25Nyaa na yɛpɛma kɔlooni kɔlɛi na ma wu nyɛini nya gama ndalongɔ nasia ma nyaha ɔɔ hini ii ti yeya. Sawa ii nya yeya a gbua Ndemɔi gama kɛɛ nyaa nya nda nɛmahui gɛma jifa Ndemɔi i manunga nya ma, wa gulɔ a lala a nge. 26Kpundɛi nasia va ti na kiahuna, nya langɔ la fesangɔe numu gbi i lo kia i na. 27Ina nyaha lɔ bi yeya, kɛ baa lapi gbeleva ngi ma. Ina nyaha ii bi yeya; kɛ baa nyaha gɔli. 28Kɛɛ bi nyaha jɔnga, jumbu hinda yaa na baa pie; tawao kpawu nyahɛi i hini jɔngaa, jumbu hinda yaa na aa pie. Kɛɛ ngaa lolɔ vulii fawɔli nasia ta nyahablaa kɛɛ hiniblaa male folo gbi aa wu male. 29Nya mbaa Kristimableisia, na nya lii i ma ta lɔ a ji: lɔwɔi ii yaa gbotoni i longa, faale, i hiye watii ji ma mahoungɔ nyahableisia ti luva bi tɔaa bɛɛ nyaha ii ti yeya; 30nasia ta wɔɔ, ti pie bi tɔaa bɛɛ ti mamanungɔ ii le; nasia ta yɛlɛ, ti pie bi tɔaa bɛɛ ti goohu nɛngɔ ii le; nasia ta hani yeya, ti pie bi tɔaa bɛɛ ti woo yaa hani na ti ngeyani; 31nasia ta dunyama gbateisia yayenge, ti pie bi tɔaa bɛɛ tii gbeweni fa. Ajifa kia dunyei yɛyii i na kiahuna, i gbɔyɔmaa hugutungɔ. 32Nya longɔ ndiihɛlɛ gbi aa yɛ wu ma. Kpawu hindoi gbewengɔ Ndemɔi yengei lɔ va, ajifa a na gbi lɔ wie a gu ma Ndemɔi liilɛliva. 33Kɛɛ nyahamɔi a gbewe dunyama hindei nasia lɔ va ta wie folo gbi, ajifa ngi longɔ i ngi nyahɛi liilɛli; 34faale ngi lii yablangɔe. Kpawu nyahɛi ɔɔ mbɛlɛhu nyahɛi ta, Ndemɔi yengei lekee lɔ kpewengɔ a yɛla ngi ma ajifa ngi longɔ i ngi gbuhɛi kpɛlɛɛ ve Ndemɔi yengei wɛ; kɛɛ hinimɔi a gbewe dunyama hindei nasia lɔ va ta wie folo gbi ajifa ngi longɔ i ngi hinii liilɛli. 35Ngi ji lemaa ajifa nya longɔ ngi gbɔ wu ma. Ngii lapima wu huyiliva a sawangaa. Kia ngaa na wie, nya longɔ wu na wie pɔɔnangɔ, a wu lii gbi Ndemɔi gama. 36Hindoi taa nyahɛi ti Lahei wumbungaa heiva kɛɛ ti ndea tɛɛ taa sɔɔ wie, na wooma hindoi i kɔɔ kɛ taa hinda nyamu wiema a nyahɛi tawao i tɔ kɛ ta vulii ɛɛ yaa gu a ta yekpe huhoula faale mahoungɔ ti sɔɛi wie, kɛ ti pie, kia ngi longɔ la. Jumbu gbi ii ji hu. 37Kɛɛ ina hindoi na, tii kpɔndani gbi ngi ma, i ngi lii huyilinga yɛ ɛɛ nyaha majɔɔ tawao i gu vulii a ta yekpe huhoula, i ngi nɛmahu gbatɛ gbɔɔ i piema, kɛ a nyandelɔ aa nyahɛi na jɔɔ. 38Faale hindoi na a nyahɛi jɔɔ, i kpekpe lɔ wieni; kɛɛ hindoi na ɛɛ nyaha gbi jɔɔ i kpekpe lɔ wieni tewengɔ nyaha-jɔmɔi ma. 39Hinimɔi gbɛɛngɔ ngi hini ma ina lekee ngi hini lɔ ndɛvu hu. Kɛɛ ngi hinii i haangaa, kɛ ngi hu i yɔkɔnga hini weka gbi jɔva ngi longɔ la, ina lekee ta bɛɛ Kristimamɔ lɔ a ngie. 40Na hu gbi, i longaa ponyahayɛi hu ngi goohu a nɛɛlɔ i lewe na ma. Nya nɛmahuvɛi lɔ a ji tawao nya langɔe la kɛ nya bɛɛ Ngewɔ Yafei lɔ a nya hitɛ pele ma.


1 KƆLINTIBLƐISIA 8

1Nyaa na yɛpɛma kɔlooni kɔlɛi na ma wu nyɛini nya gama ndalongɔ mɛhɛɛ na ma ta kpua a saa nɔmɔliisia ma. Mu kɔɔlɔ kɛ mu gbi mu hinda hugɔɔlɔ, kia ta nde la. Na hu gbi, yeehinda hugɔɔlei ji a pielɔ numu yaama i lɛ; kɛɛ ndomɛi a pielɔ mu Kristimableisia mu wooyilɛi i gbaya. 2Numui na a gili yɛ i hinda hugɔɔlɔ, ii na gɔɔ vulii mahoungɔ i kɔɔ. 3Kɛɛ numui na ngi longɔ a Ngewɔ, Ngewɔ i ngi gɔɔlɔ. 4Faale naa, gbɛɛ ngi mɔli gbɛmbo kɔlooni mɛhɛɛ na ma ta kpua a saa nɔmɔliisia ma, mu kɔɔlɔ kɛ nɔmɔlii i yɛni a hani wokɔɔngɔ lɔ, tawao yeehani ii na gbi; mu kɔɔlɔ kɛ Ngewɔ weka gbi ii na kɛlee Ngewɔ waa yakpe. 5Ina bɛɛ, kia nungaa lɛɛngaa ta nde la, Ngewɔ wekangaa lɔ na, ti yɛ ngelegoohu ɔɔ dunyei hu, tawao kia bɛɛ yee ngewɔɛisia kɛɛ yeendeblɛisia ti gbotongɔe, 6na hu gbi Ngewɔ i yakpe mu Kristimableisia wɛ, mu Kɛkɛ, na i hani gbi gbatɛni, na mu ngi va; tawao Ndemɔi i yakpe tamia a Yesu Kristi, na ngi va Ngewɔ i hani gbi gbatɛni a ngi loko, tawao mu vulungɔ ngi sabui hu lɔ. 7Kɛɛ numui gbi ii le aa tɔnyɛi ji gɔɔ. Nɔmɔliisia ti hinda i Kristimableisia lɛɛngaa gɔnga wa wɔɔ, ti yeemɛhɛɛ bondɛi na mɛnga na, ti langɔ yɛla la lɛ lɔɔ kɛ nɔmɔlii ngi mɛhɛɛ mia; ti nɛmahu huhaangɔ tawao ta gili la kɛ yeemɛhɛɛ i ti nɔhɔnga Ngewɔ yaama. 8Na hu gbi mɛhɛɛ ɛɛ mua Ngewɔ-ni mu luahui lɛ gulɔma; muii mɛhɛɛ mɛni bɛɛ, na ɛɛ gbɛogbɛ wie a mu luahui mua Ngewɔ-ni, tawao mu mɛhɛɛ mɛ bɛɛ, ɛɛ mu nafa a pele gbi. 9A wu mahugbe, ajifa Ngewɔ lumangɔ wu mɛ mɛhɛɛ gbi mɛva kpaungɔ a saa nɔmɔliisia gama aa pie nasia ti nɛmahu huhaangɔ ti wili jumbu hu yee mɛhɛɛ mɛva. 10Numui na ngi layii a Kristi huhaangɔ aa yɛ loi i wu lɔ wua wu gilingɔ la wu hinda hugɔɔlɔ, wa mɛhɛɛ na mɛ kpuangɔ a saa nɔmɔli wɛlei bu, wu ji wiengaa ji numu na ngi nɛmahu haanga a yɛna ɛɛ ngi liilo mɛhɛɛ na mɛva ti kpuanga a saa nɔmɔlingaa ma? 11Faale na, wu mbaa Kristimɔ huhaangɔi ji Kristi i haani ngi va a jukulɔ bi hinda hugɔɔlei wooma. 12Ji wiengaa kɛ wuaa jumbui wulima Kristi ma a ji wa jumbu wuli wu mbaa Kristimableisia ma, tawao wa ti nɛmahu huhaangɔi nyani. 13Faale naa, mɛhɛɛ i piengaa nya mbaa Kristimamɔi i jumbu wie, kunafɔ ngɛɛ yaa mɛhɛɛ na mɛ ta kpua a saa nɔmɔlingaa ma, aako ngaa pie nya mbaa Kristimamɔi i jumbu wie.


1 KƆLINTIBLƐISIA 9

1Nya gbuangɔ nduwɔyɛi bu, nya tomɔ lɔ a nge tawao ngi Yesu mu Lemɔi lɔnga. Wu kpɛlɛɛ nya yengei Ndemɔi wɛ yeehuvɛi lɔ a wie. 2Kia bɛɛ nungaa wekangaa tii lani la kɛ tomɔ lɔ a nge, wua wu langɔe la vulii! Ji wu yɛnga a Kristimableisia Ndemɔi hu, wua vulii lɔ tɔmaseli a wue kɛ tomɔi lɔ a nge. 3Nungaa ti yaa nya magbuama, hii nga nya yekpe magao. 4Pɔɔnangɔ ii le kɔɔ mu mɛhɛɛ majɔɔ kɛɛ hani kpɔliva mu yengei va? 5Pɔɔnangɔe nya bɛɛ ngi ya li a nyahɛi na Kristimamɔ a ngie jiɛisiamii kia toblaa wekeisia kɛɛ Ndemɔi ndeengɛisia kɛɛ Pita-ni ta pie? 6Mua Banabasi felekpe ii le mahoungɔ mu yenge navoo ma nguava mu mahindeisia hu? 7Sojei yeegbɔɔ a ta yekpe ngi mapawɛi waa kɔɔ i yɛ ngi yengei hu? Kpalamɔi yegbɔɔ a tuhani hii ɛɛ yeenguɛi mɛ? Mbala lomɔi yeegbɔɔ ɛɛ ngi baalangɛisia ti nɔnɔi gboli? 8Ngii tɔmaseli jisia gbuama nɛmahu ajifa Sawei i yeenjɛpɛ yakpei ji lɔ leni. 9Nyɛingɔe Mojisi Jawei hu tɛɛ, “Nikɛi i yaa bi bei yangama, baa ngi lɛi yili.” Ngewɔ ii gbeweni nikɛi na vulii va? 10Mua ii le ngi lii aa yɛ mu ma ji i na leni? Mɔlima ii ma, nyɛingɔ mua lɔ va ajifa mba-wumɔi a pulɔ, ngangamɔi i nganga, ta gili kɛ ta mbei majɔɔlɔ. 11Mu ngafa yekpei hinga wu liisia hu ji mu yɛ a ngowili yekpei le. Maa ii houni mu dunyama hanisia yeekpekpeyei majɔɔ a wue? 12Ina pɔɔnangɔe numu wekeisia va ti lii i yɛ wu ma kpekpeyei jisia majɔɔva a wue mu nda wɔnɛi ii leweni ti ndɛi ma? Na hu gbi mu yaa toni i pɔɔnɛi ji wooma. Kia ngaa na wie, ngi gunga hinda gbɔugbɔi gbi bu aako mu pie Ngowili Yekpei kɔlooni Kristi ma i vaya hu. 13Wu kɔɔlɔ vulii pandawanda kɛ nungei nasia ta yenge Ngewɔ Wɛlei bu ta ti mɛhɛɛ jɔɔ a Ngewɔ Wɛlei lɔ tawao nasia ta yeesaaisia gbua saagbuamɛi, ta saahaniisia ti ndɛi majɔɔlɔ. 14Hii lɔɔ Ndemɔi i sawa langa kɛ nasia ta Ngowili Yekpei le ta ti jɔɔ hanisia majɔɔ Ngowili Yekpei hu lɔ. 15Kɛɛ ngii yaa toni nya lɔnyɛi ji wooma tawao ngii kɔlɛi ji nyɛima yeekpekpeyei jisia majɔɔva nya yekpe va. Ajifa mahoungɔ ngi haa kia numu aa nya baa a hani na nga lawoo la. 16Sabu gbii na ngi lawo jifa lekee nga Ngowili Yekpei le; ajifa kpa lɔ nya ma ndeva. Gbamaile kpundɛ maluwangɔ waa a gulalɔ nya ma ina ngii Ngowili Yekpei leni! 17Ina ngi yeengengei ji wiema a nya wuma we lɔ, nya lii aa yɛlɔ nya pawala ma; kɛɛ ngi piemaa jifa kpɔndangɔ nya ma, ajifa Ngewɔ i yeengengei ji loko wuaanga nya yeya. 18Gbɔɔ nya pawɛi le? Tamia a ji ngi sabu majɔɔnga Ngowili Yekpei leva ngɛɛ hani gbi mɔli fa tawao ngɛɛ gbewe kpekpeyei nasia va mahoungɔ ngi majɔɔ Ngowili Yekpei leva. 19Nduwɔ yaa nge, numu gbi luwɔ yaa a nge; kɛɛ ngi nya yekpe yɛnga a numui gbi ti luwɔ aako ngi yɛ a nungaa mato majɔɔ ti yɛ a Kristimableisia. 20Ngi yaa Ngowili Yekpei lema Juuisia ma nga pielɔ bi tɔaa bɛɛ Juumɔi mia a nge aako ngi gu ti ma; tawao kia bɛɛ nya vulii ngii Mojisi Jawei bu, nga pielɔ bi tɔaa bɛɛ ngi mbu lɔ ji nga yɛ Ngowili Yekpei lema nasia ma ti mbu, aako ngi gu ti ma. 21Hii lɔɔ nga pie ji nga yɛ yengema nasia Juu yaa tie ti lia, nga pielɔ bi tɔaa bɛɛ Juumɔ yaa nge, ngii toni Juuisia ti Jawei wooma, aako ngi gu nasia ma Juumɔ yaa tie. Ji ii kɛni kɛ ngɛɛ Ngewɔ Jawei hou; ngi Kristi jawei bu lɔ vulii a tɔnya. 22Ji nga yɛ nasia lia ti layii a Kristi ii gbayani, nga hawalɔ kia ti yilayee gbi i na, aako ngi gu ti ma. Faale nga wotelɔ a hani gbi numu gbi gama, aako ngi ti lɛɛnga bawo a pele gbi lekee nga gu la. 23Nga ji gbi wielɔ Ngowili Yekpei vayava hu gbi, aako ngi yeelubɛi kulo majɔɔ. 24Wu kɔɔlɔ kɛ piimɛblaa gboto lɔ ta wiimɛ mawali ma kɛɛ numu yakpe lɔ a gu yeemawaai ma. Mahoungɔ wu wiimɛi aako wu gu yeemawai ma. 25Numu gbi lekee ngi longɔ i wili kaahu-looli nasia hu ta pie mawali ma, a makɛ kpaukpau waa lɔ wie aako i lewe ngi mbaangɛisia gbi ma. I lewengaa numui gbi ma, ta maha-bɔlɔ wɛlɛlɔ ngi wumba na ɛɛ lɛmbi panda. Kɛɛ mua ma pielɔ aako mu maha-bɔlɔ majɔɔ na ɛɛ nyani kunafɔ. 26Famia nga piimɛi wie yakpe pɔɔnangɔ ngi fo kalɛi ma; famia nya wiengɔ kia bɔɔtani wilimɔi na ngi bɔɔtani ɛɛ gbula numu ma. 27Nga nya magbatɛlɔ pandawanda pɛiŋ aako ngi ngowili yekpei leengaa nungaa wekeisia gama, taa nya vulii gbɛ na yeesawei nyaniva.


1 KƆLINTIBLƐISIA 10

1Nya longɔ i hitɛ wu wɛ, nya mbaa Kristimableisia, gbɔɔ i mu maadani nasia wieni ti toni wɔɔ Mojisi ma. Njagbili na yɛ ti gulɔ i yɛlɔ a ti mahugbe tawao ti gboyei na leweilɔ ta toli a Rɛd Sii hinda ii ti wieni. 2Ti ti gbi wuailɔ njagbilii hu kɛɛ yeegboyei, ti wote a Mojisi woomablɛisia. 3Ti kpɛlɛɛ ti mɛhɛɛ yakpei na mɛilɔ Ngewɔ i yɛ njei, 4tawao ti gbi ti nja yakpei na gboli Ngewɔ i yɛ fe. Njɛi na ti kpɔleni i gbuani Ngewɔ gɔtii hu lɔ, tia yeekɔtii-ni ti lini, tawao yeekɔtii i yɛni a Kristi vulii lɔ. 5Na hu gbi, ti gbotoma ti hinda ii yɛ nɛni Ngewɔ wɛ, faale ti haailɔ, ti womɛisia ti vayafaya ndɔgbɔ lambɛi ma gbi. 6Kiahuna, ji kpɛlɛɛ i yɛni a ndahii lɔ mu va maa lo a hani nyamungaa kia ti pieni, 7tawao maa hɛɛ nɔmɔlingaa ma kia ti lɛɛngaa ti pieni. Kia Ngewɔ Gɔlɛi i ndeni la yɛ, “Nungeisia ti heiilɔ komɛ-mɛhɛɛ mɛma, kɛ yeekomɛi i wotenga a ndɔhou kɛɛ puegbua gomɛ waa.” 8Maa ii houni kulo bɛɛ mu gbiti puegbua hinda ma kia ti lɛɛngaa ti pieni folo yakpei goohu ti tauji numu gbɔyɔngɔ maahu sawa ti gula ti haa. 9Maa ii houni kulo bɛɛ mu Kristi layie gbuahu kia ti lɛɛngaa ti pieni, kaalingɛisia ti ti waa. 10Maa ii houni mu gbonyɛ kia ti lɛɛngaa ti pieni numu Waa Malikei i ti waa. 11Hindei jisia ti ti wieilɔ aako ti yɛ a tɔmaseli nungaa wekeisia va, tawao ti ti nyɛilɔ Ngewɔ Gɔlɛi hu aako ti yɛ a ndahii mu va, ajifa mu watii ji magutungɔ waa le a dunyei gbɔyɔ-gbelei. 12Numui na i gilima yɛ ngi layii a Ngewɔ gbayangɔe, i ngi mahugbe aa gula. 13Kɔlɛya gbi lekee a wa wu gama, nyɔkɔ mia lɔɔ a wa nungaa gama. Kɛɛ Ngewɔ Lahei hu ɛɛ nyani tawao kɔɔlɛya aa wa wu maahu tewengɔ wu gahui ma. Watii na kɔɔlɛyɛi a wa wu gama, a wu gɔlɔ a kpayei na a pie wu gu mbu, i wu gbua-wele ve. 14Faale na, nya mbaa Kristimableisia waa lukpe nɔmɔli vɛlila gbla. 15Nyaa yɛpɛma wu gama kia nɛmahuleweblaa wua yekpe a kiti lewe na ma nga nde. 16Bolei na ma yenge la Ndemɔi Gbɔkɔ Mɛhɛɛ mɛmɛi, ma siɛgbua Ngewɔ ma fa; ji ma ngulu-wua lɔi gboli hu, Kristi ŋamɛi tɛngaa mia ma kpɔle. Tawao bledii na ma ngaingai: mu mɛngaa, kɛ mua Kristi luwui mɛma. 17Ajifa bledii gbuhɛi i yakpe, tawao kia bɛɛ mu gbotongɔ, mu kpɛlɛɛ kpuha yila lɔ a mue jifa ma bledii gbuha yakpei lɔ mɛ. 18A gili lɛɛ a Isrelbleisia; nasia ta hani nasia lɛɛngaa mɛ kpuangɔ a saa, tia Ngewɔ-ni ti wilinga hu, saai na va ta kpua ngi ma saagbuamɛi. 19Wu lii lɔ ma wue ngi ndeilɔ ngɛɛ hani gbi lɔ nɔmɔlii hu kɛɛ mɛhɛɛ na ta kpua a saa ngi ma? 20Sawo! Na ngi ndema ta lɔ a ji kɛ hani na nasia tii Ngewɔ gɔɔ ta kpua a saa nɔmɔliisia ti jaa-gbuamɛi ti kpuama ngafa nyamungaa lɔ ma, Ngewɔ ii le; tawao ngii loni wu yɛ a ngafa nyamungaa ti mbangaa. 21Wuɛɛ gu wu ngulu-wua lɔi gboli Ndemɔi bolei hu wu gbɔma kpɔle ngafa nyamungaa ti bolei hu; wuɛɛ gu wu hei Ndemɔi Gbɔkɔ Mɛhɛɛ gɔɔbu wu gbɔma hei ngafa nyamungaa ti nda gɔɔbu. 22Ɔɔ mu longɔe mu pie Ndemɔi i tolo gbua? Mu gilingɔe la kɛ mu gbayani ngi ma? 23Nunga ta ndelɔ tɛɛ, “Sawei ɛɛ mu maabali hinda gbi wieva.” Tɔnya le, kɛɛ hindei gbi ii le aa nyande. Sawei lumangɔe mu wɛ hinda gbi wieva, kɛɛ hindei gbi ii le a yɛ gbɔma Kristimableisia ma. 24Numu gbi aa ta yekpe lekee ngi gbekpeyei gɔli, mahoungɔ i ngi mbaangɛisia bɛɛ ti gbekpeyei gɔli. 25Sawei lumangɔe wu wɛ ndahɛi gbi mɛva ta majia ndaahɛ majiamɛi, kiti gbi aa yɛ wu nɛmahu. 26Ajifa kia Ngewɔ Gɔlɛi i ndeni la yɛ, “Ndemɔi lɔ ngi woo a dunyei kɛɛ hani gbi i hu.” 27Numui na ii Ngewɔ gɔɔ i wu lolingaa mɛhɛɛ ma tawao wu luma wu li na, a na mɛ a hei wu gɔɔbu. Kiti gbi aa yɛ wu nɛmahu kɔlooni ma. 28Kɛɛ numu i ndengaa wu ma yɛ, “Ti mɛhɛɛ ji gbuanga a saa nɔmɔliisia ma,” kɛ waa yeemɛhɛɛ na mɛ numui na va kɛɛ ngi nɛmahu va i hugɛni a wue 29wu nda nɛmahu ii le, kɛ numu wekei na nɛmahu va. Numu yila a mɔlilɔ yɛ, “Kɛ gbɛe numui na ngi layii a Kristi huhaangɔ a pie ngɛɛ na wie ngi kɔɔngɔ pɔɔnangɔe? 30Ngi siɛgbuangaa Ngewɔ ma nya mɛhɛɛ va, gbɛe numu gbi a nya magbua mɛhɛɛ na va nga siɛgbua Ngewɔ ma?” 31Wu mɛhɛɛ mɛ ɔɔ wu ndɔ gboli ɔɔ wu gbɛogbɛ wie, a pie aako numui gbi ti Ngewɔ wɔlɔ. 32A luva a pelei na ɛɛ pie Juungaa, ɔɔ nasia Juu yaa tie, ɔɔ Kristimableisia taa jumbu hinda wie. 33A pie kia lɔɔ nga pie; nga lapilɔ numui gbi liilɛliva hinda gbi hu nga pie, ngɛɛ gili a nya nda gbekpeyei, nga gili a numui gbi ti ndɛi lɔ, aako ti mbawo majɔɔ.


1 KƆLINTIBLƐISIA 11

1A nya wokɔɔ hɔɔ, kia lɔɔ nga Kristi wokɔɔ la. 2Nyaa wu latoma jifa kpelema gbi wuɛɛ lema nya luvayii ma tawao wa to kaai nasia wooma ngi tewenga wu gama. 3Kɛɛ nya longɔ wu hugɔɔ kɛ Kristi mia i hindo gbi mahu, hinii mia ngi nyahɛi mahu, tawao Ngewɔ mia i Kristi mahu. 4Faale hindoi na a yɛ Ngewɔ vɛlima ɔɔ a yɛ Ngewɔ wowili lema Ngewɔ vɛli vahɛi ma ngi wui mawɛɛngɔ, i Kristi yawufenga. 5Kɛɛ nyaha gbi lekee a yɛ Ngewɔ vɛlima ɔɔ a yɛ Ngewɔ wowili lema Ngewɔ vɛli vahɛi ma ngi wui mawɛɛngɔ ii le, i ngi hinii yawufenga, ajifa nduahugɛ gbi ii ngi ma tia nyahɛi na ngi wui wolengɔ. 6Nyahɛi ii ngi wui mawɛɛlɔ, mahoungɔ hɔɔ i ngi wui wole. Tawao jifa ngufema hinda le nyaha va i ngi wui wole ɔɔ i ngi wui maahu lewetewe, mahoungɔ i ngi wui mawɛɛ. 7Sabu gbi ii na hindoi i ngi wui mawɛɛ ajifa hindoi gbatɛngɔ a Ngewɔ gbuayei lɔ tawao numu a Ngewɔ wɔlɔ yɛi lɔlɔ ngi hu. Kɛɛ nyahɛi a hindoi wɔlɔyɛi lɔlɔ ngi hu 8ajifa hindoi ii gbuani nyahɛi hu nyahɛi lɔ i gbuani hindoi hu. 9Tawao tii hiindoi gbatɛni nyahɛi va, nyahɛi lɔ ti ngi gbatɛni hindoi va. 10Kɛɛ malikeisia tia ti va, mahoungɔ nyaha i ngi wui mawɛɛ kɛva kɛ i ngi hinii gbayei bu lɔ. 11Na hu gbi kia mua Kristi-ni mu wilingɔ hu, nyahɛi a gbewelɔ hindoi va kia lɔɔ hindoi a gbewe nyahɛi va. 12Ajifa kia Ngewɔ i haala nyahɛi gbuani hindoi hu lɔ i kpatɛni, hii lɔɔ nyahɛi lɔ na a hindoi le; tawao Ngewɔ lɔ a hani gbi gbatɛ. 13Wua yekpe a kiti lewe ina nyandengɔe nyaha i Ngewɔ vɛli faha lia hani gbi ii ngi wui ma. 14Kia hindeisia ti na, wuɛ gaa kɛ ngugbitii i yɛni a ngufema hinda lɔ hindo va. 15Kɛɛ i yɛni a nyande hani lɔ nyaha ta ngi va. Ngewɔ i njombo guhaguhɛi venga ngi wɛ ngi mawɛɛva. 16Numu gbi longaa i ji hou a mawali, na lekee nga nde tamia a ji kɛ, mua kɛɛ Ngewɔ sɔsii wekeisia tɛɛ na nyɔkɔ wie Ngewɔ vɛlima. 17Na hu gbi, njɛpɛi jisia ngi wama ndema wu ma, ngii wu latoma ajifa Ngewɔ vɛli gomɛi nasia wa pie tii wu yɛma a Kristimablaa yekpe, ti wu nyamumaa lekee. 18Haala hindei, ti hugɛnga a nge kɛ ji wa gomɛ, wu luahu gɔlɛkɔlɛngɔe wa lapi luahu; tawao nya langɔe la kɛnga tɔnya le a ji. 19I laailɔ ke kɛ nduahugɔɔleisia ta yɛlɔ wu lia aako wu nasia gɔɔ gbalauŋ ti lalei lɔnyangɔ. 20Ji wa gomɛ hinda yila mɛhɛɛ mɛva, mɛhɛɛ ba mia wa mɛ, Ndemɔi Gbɔkɔ Mɛhɛɛ ii le. 21Ajifa ji wa yɛ mɛhɛɛ mɛma, numu gbi a tɔtoo pɛiŋ a mɛla ngi mbaangɛisia ti yaa foo, famia ndɔlei a yɛ ti lɛɛngaa ma lɔ, ndɔi i yeenasia houngɔ. 22Pɛlɛngaa tii wu yeya waa mɛhɛɛ mɛ na, wa ndɔ gboli? Wu longɔe wu lɛɛ Ngewɔ sɔsii hu, wu nungei nasia yawufe hinda gbɔungɔ ti laa? Gbɔɔ wu lii i nya ma ndeva wu ma kɔloongɔ ji ma? Mahoungɔe ngi wu lato? Sawo, ngɛɛ pie gbi! 23Gbamaile kaai na ngi teweni wu gama, ngi majɔɔni a Ndemɔi lɔ, tamia a kpindi na ti yɛ mu Lemɔi Yesu vema, i Bledii gbuha yila wumbuilɔ, 24i siɛgbua Ngewɔ ma, i ngaingai yɛ, “Nya gbuahɛi lɔ, na i na wu va. A Bledii ji mɛ nya hinda hitɛva wu wɛ.” 25Hii lɔɔ kpɔkɔ mɛhɛɛ mɛngɔi wooma i ndɔ bolei wumbuni yɛ, “Ngewɔ hinda yangilingɔ ninɛi lɔ nya ŋamɛi hu. Watii gbi lekee wu ndɔi ji gbolingaa, a kpɔle nya hinda hitɛva wu wɛ.” 26Ji i kɛilɔ kɛ watii gbi lekee wu bledii ji mɛngaa, wu ndɔi ji gboli bolei ji hu, wuaa Ndemɔi haalei hitɛma nungaa wɛ haaŋ i lohu i wa. 27Ji i kɛilɔ kɛ numu i Ndemɔi bledii mɛngaa, i ndɔi gboli ngi bolei hu, a pelei na a baa gbua Ndemɔi ma, kɛ i jumbu wulinga Ndemɔi gbuhɛi ma kɛɛ ngi ŋamɛi. 28Faale na, mahoungɔ numu gbi i ta yekpe lii hugbee pɛiŋ i yaa yeebledii mɛ, tawao i yeendɔi gboli yeebolei hu. 29Ajifa ii kɔɛilɔ pɛiŋ kɛ bledii na kɛɛ ndɔi ti Ndemɔi gbuhɛi na va lɔ i feni a saahanii mu va, i yeebledii mɛngaa, i yeendɔi gboli, Ngewɔ a kpalɛ lalɔ ngi ma. 30Na vamia wu gbotoma wu heegbɛngɔ, tawao wu lɛɛnga wu haanga. 31Kɛɛ Ngewɔ ɛɛ kpalɛ la mu ma ina mu mu liisia hugbeilɔ pɛiŋ mu yaa Ndemɔi Gbɔkɔ Mɛhɛɛ mɛ. 32Kɛɛ Ndemɔi a mu lɛɛlɔ i kpalɛ la mu ma aako aa mu gbɛmbo mua nasia tii Ngewɔ gɔɔ. 33Faale na, nya mbaa Kristimableisia, wu gomɛngaa Ndemɔi Gbɔkɔ Mɛhɛɛ mɛva, a wu nyɔunyɔ mawulo. 34Tawao ndɔlei i yaa numu gbi ma, mahoungɔ i mɛhɛɛ mɛ pɛiŋ ngi yeekuwuhu aako Ngewɔ gbɛmbui aa la wu ma ji wa gomɛ hinda yila. Njɛpɛ wekei nasia pungɔ wu gɔlɛi hu, nga ti lelɔ ji nga wa.


1 KƆLINTIBLƐISIA 12

1Nyaa na yɛpɛma kɔloongɔ na ma wu kɔlɔ nyɛini fa, tamia a hani nasia Ngewɔ Yafei a fe gbama. Nya longɔ wu tɔnyɛi gɔɔ kɔlooni ti ma, nya mbaa Kristimableisia. 2Wu kɔɔlɔ kɛ watii na wuii yɛ lɛ Ngewɔ gɔɔ, ti wu yakɛilɔ hɛɛva nɔmɔli haangɔngaa ma. 3Nya longɔ wu kɔɔ kɛ numu gbi ii na Ngewɔ Yafei a pele gɛ a ngie aa gu a ndela yɛ, “Yesu jondungɔe!” Tawao numu gbi ɛɛ gu a ndela yɛ “Yesu lɔ Ndemɔi le” kɛlee Ngewɔ Yafei i pele gɛ a ngie. 4Hani nasia Ngewɔ Yafei a fe gbama yeelasii gbotongɔe, kɛɛ Ngafa yakpei mia a ti ve. 5Tawao pele gboto lɔ na yengeva kɛɛ numui gbi ta yenge Ndemɔ yakpei lɔ wɛ. 6Mu guyii a yengela mahɔngɔ ii le kɛɛ Ngewɔ yakpei lɔ a kaahui ve numu gbi wɛ nga yenge va. 7Ngewɔ Yafei yeetɔmaseli lɔ numu kpɛlɛɛ hu, Kristimableisia gbi ti gbekpeyei va. 8Ngewɔ Yafei a numu yila gɔlɔ a nɛmahulewe yɛpɛva, yee-Ngafa yakpei i numu wekei gɔ a nɛmahulewe na hinda-hugɔɔla va. 9Ngafa yakpei ji a pielɔ numu yila i kpaya majɔɔ lava a Ngewɔ, i yeepekei gɔ a kpaya heegbɛblaa bawova. 10Ngafei a numu yila gɔlɔ a kpaya kabandeisia wieva; i yeepekei gɔ a kpaya Ngewɔ wowili leva; i gbɔma yeepekei gɔ a kpaya ngafangaa luahu gɔva. A numu yila gɔlɔ a kpaya kɛnyɛyia weka gboto leva, i pekei gɔ a kpaya kɛnyɛyiɛisia fasaiva. 11Kɛɛ Ngewɔ Yafa yakpei mia a ji kpɛlɛɛ ve; kia a nɛɛ la ngi wɛ, a numu gbi gɔlɔ a hani i gba ngi mbaangɛisia ti ndɛisia ma. 12Kristi gbuangɔ a numu gbuha yila lɔ, mbeke gboto i ngi ma; nasia tii kɛni kɛ, numu gbuha gboto mia a ngie, numu gbuha yakpe mia a ngie, kia bɛɛ ngi gbatɛngɔ a mbeke gboto. 13Hii lɔɔ mu gbi, mu yɛ a Juungaa ɔɔ nasia Juu yaa tie, nduwɔngaa ɔɔ nasia nduwɔ yaa tie, Ngafa yakpei na i mu wuanga a Ngewɔ yei mu yenga a kpuha yila, tawao Ngafa yakpei ji i wunga mu liisia hu. 14Gbamaile numu gbuhɛi ii gbatɛni a mbeke yakpe, taa ngi ma kpoto. 15Ina kɔwɔi i ndeilɔ yɛ, “Jifa toko yaa a nge, ngii kpuhɛi ma,” na ɛɛ pie aa gbua mbeke ma. 16Tawao ina numu wolii i ndeilɔ yɛ, “Jifa ngaama yaa a nge, ngii numu gbuhɛi ma,” na ɛɛ pie aa gbua kpuhɛi ma. 17Ina numu gbuhɛi gbi i yɛni lekee a ngaama yila lɔ, aa yee njia mɛni? Tawao kiaa i yɛni a ngoli yakpe lɔ, aa yee gu a hani gu mɛnila? 18Kɛɛ tɔnyɛi a ji lɔ kɛ Ngewɔ i numu gbuhɛi yeehani gbi wuilɔ mia ngi longɔ i pu na. 19Numu gbuhɛi a yee yɛ na ina kpɛlɛɛ gbatɛngɔ a mbeke yakpe lɔ? 20Tɔnyɛi a ji lɔ kɛ yeembeke gbotongɔe kɛɛ numu gbuhɛi i yakpe. 21Faale na, ngaamɛi ɛɛ gu aa nde tokoi ma yɛ, “Ngii gbeweni bi va!” Tawao ngui bɛɛ ɛɛ gu aa nde kɔwɔi ma yɛ, “Ngii gbeweni bi va.” 22I gbua na ma, mahoungɔ mu mbekei nasia majɔɔ bi tɔaa bɛɛ tii gbayani; 23tawao yeembekei nasia mu baa gɔɔ ti ma, tia mia ma ti mahugbe, yeembekei yeenasia tii nyandeni ma wufe a yɛpɛlaa kɔloongɔ, 24tawao mu mbeke yeenyandemɛisia maa i houni mu ti mahuwɛɛ. Ngewɔ vulii lɔ i numu gbuhɛi yangɔyɔnga i kpatɛnga a pelei na hii bagɔma veva mbeke nasia wɛ tii gbeweni fa. 25Faale na, numu mbekei luahu gɔlɛngɔ ii le, kɛɛ yeembekei-hanisia gbi ti gbewengɔe ti nyɔunyɔ va kia ti piengɔ a tia yekpe. 26Numu mbekei yeehinda yila i gbalɛngaa, tia mbekei hani wekeisia kpɛlɛɛ mia ta gbalɛ; yeehani yila i tato majɔɔngaa, yeehani-hani wekeisia lɔ ta ngi goohunɛɛi wie. 27Wu kpɛlɛɛ Kristi gbuhɛi lɔ a wue, tawao ngi gbuhɛi yeembekei lɔ a wu yilayee gbi. 28Kristimableisia lia Ngewɔ i numui gbi longa tomɛi na ngi bɛngɔ na. I haala lomɛi veni ngi loblɛisia lɔ wɛ, i yeefelei ve ngi lutuisia we, i yeesawei ve kaamɔisia wɛ; na wooma nasia ta kabande hindeisia wie, kɛɛ a nasia ta heegbɛisia bawo ɔɔ ta gbɔ nungaa wekeisia ma ɔɔ tokulɔbleisia ma ɔɔ ta kɛnyɛyia wekangaa gboto le. 29Numui kpɛlɛɛ ii le taa yɛ a toblɛisia, ɔɔ Ngewɔ lutungaa ɔɔ kaamɔngaa. Numui gbi ii le kpaya aa yɛ ngi wɛ kabande hindangaa wieva 30ɔɔ heegbɛisia bawova ɔɔ yɛpɛva kɛnyɛyia wekangaa hu ɔɔ yeekɛnyɛyiɛisia fasaiva. 31A gbewe hani yeebawai nasia va Ngewɔ Yafei a fe gbama. Tawao nga pele gɛlɔ a wue kpekpengɔ waa i lewe kpɛlɛɛ ma.


1 KƆLINTIBLƐISIA 13

1Kia bɛɛ nga gulɔ a yɛpɛla nuuvungaa ti layiesia hu kɛɛ malikeisia ti ndɛi, kɛɛ ina ndoma ii nya lii hu, nya layie a yɛ a sɔlewoo gbama lɔ ɔɔ bamande jɔlɛwoo. 2Kia bɛɛ kpaya lɔ mbɛ ngowili yɛpɛisia hugɛva; kia bɛɛ ngi hindei gbi hugɔɔlɔ, ngi ndɔwuma hindei kpɛlɛɛ hugɔngɔ; kia bɛɛ nya layii a Ngewɔ a pielɔ ngi gu a ngiye waawangaa gulela, kɛɛ ina ndoma ii nya lii hu, gbɛogbɛ yaa a nge. 3Kia bɛɛ nga nya yeya-hani kpɛlɛɛ velɔ nungaa wɛ gbama tawao kia bɛɛ nga nya gbuhɛi velɔ ngɛɛ ti mɔ, kɛɛ ndoma i yɛlɔ nya lii hu, ngɛɛ nafa gbi jɔɔ hu. 4Ndoma a gulɔ kpalɛ bu huguhangɔ tawao ngi hindawandangɔ ɛɛ tolo gbua, ɛɛ lawo, ii mamanini; 5ndoma ii makɛvɛlini, ɛɛ ta yekpe ngi gbekpeyei lekee gɔli, ngi lii ɛɛ lewe fulo, ndoma ɛɛ nyamu lamagbatɛ ngi lii hu; 6ndoma goohu ɛɛ nɛɛ nyamu maahu kɛɛ a goohunɛɛlɔ tɔnyɛi maahu. 7Ndoma ɛɛ gbaha; a pielɔ muɛɛ gbe a lala a Ngewɔ, muɛɛ gbe a liilolaa, muɛɛ gbe a mu lii houla. 8Ndoma ɛɛ gɛlɛ. Kulɔma yia yɛpeisa tɛɛ lɛmbi; kɛnyɛyia wekeisia lelaa hu a lewelɔ; ngafa yekpe hinda hugɔɔlei a gbɔyɔlɔ. 9Ajifa kpayei na Ngewɔ Yafei i feni mu wɛ hinda hugɔva kɛɛ kulɔma yia leva ngakpuangɔ ii le; 10kɛɛ kpemei na yeengakpuangɔi a wa, yeena ngakpuangɔ ii le a lolɔ hu. 11Watii na ngi yɛ ndopoyɛi hu, ngi yɛ yɛpɛlɔ kia ndopo, ndopo lii i nya goohu, nga gili kia ndopo; kɛɛ kiahuna na ngi lakpangaa, ngi ndopo hindei kpɛlɛɛ gulanga. 12Na mu tɔma kiahuna kpuangɔ a numu magbindingɔ lɔ mɛmɛɛ hugbindingɔ hu; kɛɛ Kristi wangɔi hu, ma ngi lɔlɔ gbalauŋ. Na ngi kɔɔngɔ kiahuna, kɛlɛngɔe; kɛɛ a watii na, nda a velɔ, ndavengɔ kia Ngewɔ i nya gɔngɔ la. 13Kia hindeisia ti na kiahuna, hinda sawei jisia lɔ na: lala a Ngewɔ kɛɛ liiloma kɛɛ ndoma; kɛɛ na tewengɔ ti kpɛlɛɛ ma tamia a ndoma.


1 KƆLINTIBLƐISIA 14

1Ndoma lɔ hɔɔ mahoungɔ wu lapi wu majɔɔ. A wu lii wu hani yekpei nasia hinda hu Ngewɔ Yafei a fe gbama, aako wu Ngewɔ wowili vulii le. 2Numui na a yɛpɛ kɛnyɛyia wekangaa hu, ɛɛ yɛpɛ nungaa wekeisia gama, a yɛpɛ Ngewɔ lɔ gama, ajifa numu gbi ɛɛ ngi layie mɛni. I tɔnya lɔwungɔi lɔ hugɛma Ngewɔ Yafei hu. 3Kɛɛ numui na a Ngewɔ wowili hugɛ a yɛpɛ nungaa lɔ gama a gbɔ ti ma, a ti lii gba, a ti nɛpɔ. 4Numui na a yɛpɛ kɛnyɛyia wekangaa hu a gbɔ ta yekpe lekee lɔ ma, kɛɛ numui na a Ngewɔ wowili le a gbɔ Kristimableisia kpɛlɛɛ lɔ ma. 5Nya longɔe wu kpɛlɛɛ wu yɛpɛ kɛnyɛyia wekeisia hu kɛɛ na vulii nya longɔ la tamia a ji wa kpaya majɔɔ Ngewɔ wowili hugɛva. Ajifa numui na a Ngewɔ wowili hugɛ, bagɔma lɔ ngi ma i lewe numui na ma a yɛpɛ kɛnyɛyia wekangaa hu kɛlee numu i yɛ ngaama a gu i ngi layieisia fasai aako Kristimableisia gbi ti kpɔma majɔɔ. 6Faale, nya mbaa Kristimableisia, ngi wangaa wu gama, kpekpeyei yeegbɔɔ nga pie a wue ina ngi yɛpɛilɔ kɛnyɛyia wekangaa hu? Ngɛɛ kpekpeya wulo bɛɛ wie, kɛlee ngi wa wu gama a hinda lɔwungɔ Ngewɔ i hugɛnga a nge ɔɔ nya hinda hugɔngɔ ɔɔ Ngewɔ wowili ɔɔ kaa. 7A gili lɛɛ a ngaihani nasia ndɛvu ii ti hu, kia nyɔkɔ koolei na ɔɔ mbakɛi numu a yee ngulei na gɔɔ ti ngaama kɛlee ti ngai vulii, hu yaa loke? 8Tawao ina bulu vɛmɔi ii kɔ-bulii vɛni hu yaa loke, ye lɔ a ngi magbatɛ kɔ va? 9Hii gbɔma, numu a yee hindei na gɔɔ bi yɛpɛma kɔlooni ma ina bi wowili na bi ndenga kɛnyɛyia weka hu lɔ numu ɛɛ gu i humɛi gbalauŋ? Fɛfɛi lɔ a li a bi layieisia! 10Kɛnyɛyia ngilangilɛi gbotongɔe dunyei hu, na hu gbi yeengila bɛɛ ii na nungaa tɛɛ humɛni. 11Kɛɛ ina ngii kɛnyɛyiɛi na gɔɔ ti ndema, numui na i ndema a yɛ a kɛnyɛmɔ lɔ nya gama, nya bɛɛ kɛnyɛmɔ a nge ngi gama. 12Jifa wu haamingɔ waa hani nasia va Ngewɔ Yafei a fe gbama, a lapi vulii wu yenge waa a yeenasia ta gbɔ Kristimableisia ma. 13Numui na a yɛpɛ kɛnyɛyia wekeisia hu, mahoungɔ i Ngewɔ vɛli i kpaya jɔɔ ngi layieisia fasaiva. 14Ajifa ngi Ngewɔ vɛlingaa kɛnyɛyia weka hu kɛ nya yafei lɔ Ngewɔ vɛlima vulii kɛɛ nya nɛmahui nda gbi ii ma. 15Gbɔɔ hɔɔ mahoungɔ ngi pie? Nga Ngewɔ vɛlilɔ a nya yafei, kɛɛ nga ngi vɛlilɔ gbɔma a nya nɛmahui bɛɛ; nga wulelɔ a nya yafei kɛɛ nga wulelɔ gbɔma a nya nɛɛmahui bɛɛ. 16Bi siɛgbuangaa Ngewɔ ma a bi yafei lekee, numu gbamɛi na wua tieni wu gomɛnga a yee nde yɛ Amiina bi jiɛgbua Yewɔ vɛlilei ma? Pele gbii na kɔɔva gbɔɔ bi ndema. 17Kia bɛɛ bi jiɛgbua Yewɔ vɛlilei nyandengɔ waa le, ɛɛ gbɔ numu wekei na ma kulo bɛɛ. 18Ngi siɛgbua Ngewɔ ma ajifa nga yɛpɛ pɛɛpɛ kɛnyɛyia weka hu i lewe wu gbi ma. 19Kɛɛ mu gomɛngaa Sɔsiihu, nga yɛ loni ngi njɛpɛ lɔɔlu le na nungaa ta gu a humɛnila aako ngi nungaa wekangaa gaa la kia ngaa njɛpɛ tauji puu le kɛnyɛyia wekangaa hu. 20Nya mbaa Kristimableisia, waa gili kia ndopo mumungaa ta pie. A yɛ a ndopo mumungaa jumbu wielei hu kɛɛ a yɛ a kpakolongaa kilii nasia hu wa pie. 21Nyɛingɔe Ngewɔ Gɔlɛi hu tɛɛ Ndemɔi ndeilɔ yɛ, “Nga lalɔ kɛnyɛblaa wekangaa hu ta kɛnyɛyia wekangaa le, ngi yɛpɛ nya nungeisia gama, kɛɛ na hu gbi nya nungeisia tɛɛ wolo nya ma,” 22Faale na, kpayei na a pie numu i gu a kɛnyɛyia wekangaa lela i yɛni a seli lɔ nasia va tii Ngewɔ gɔɔ, Kristimableisia va ii le, tawao kpayei na a pie numu i gu a ngowili yekpei lela i yɛni a seli lɔ Kristimableisia va, nasia tii Ngewɔ gɔɔ ti va ii le. 23Faale na Kristimableisia ti gomɛngaa hinda yila numui gbi ti tɔtoo a yɛpɛla kɛnyɛyia wekangaa hu, tawao ina numu wekangaa ɔɔ nasia tii Ngewɔ gɔɔ ti wuaailɔ na, tɛɛ nde taa yɛma wu kpɛlɛɛ wu gbowangɔe? 24Kɛɛ numui gbi ti yaa Ngewɔ wowili lema watii numui na ii lani a Ngewɔ i wuaa na, na a mɛni a pielɔ i la la kɛ jumbumɔ lɔ a ngie. Na kpɛlɛɛ a mɛni a pielɔ ngi lii i ngi gbɛmbo. 25Kili malɔwungɔi nasia ti ngi liihu ta gbualɔ foofo ya, tawao a mawɛɛlɔ i Ngewɔ vɛli, a gaye yɛ, “A tɔnya, Ngewɔ lɔ mbei wu lia!” 26Ji mia nya lii i ma, nya mbaa Kristimableisia. Wu gomɛngaa Ngewɔ vɛliva, ngulei a yɛ numu yila lɔ yeya kpuava, kaai i pekei yeya, hinda gɛngɔi yila i yeepekei yeya, ngowili lelei kɛnyɛyia wekeisia hu i yeena ma, fasailei i yeepekei ma. Mahoungɔ kpɛlɛɛ i yɛ a kpɔma Kristimableisia gbi va. 27Ina numu i yɛpɛmaa kɛnyɛyia wekangaa hu, numu fele ɔɔ sawa lɔ ta yɛpɛ a ngilangila, aa lewe na ma, tawao numu weka a yɛlɔ na a na fasai ta nde. 28Kɛɛ ina numu gbi ii na aa gu a na fasaila ta nde kɛ mahoungɔ numui na a yɛpɛ kɛnyɛyia wekangaa hu i londo, i yɛpɛ ta yekpe gama kɛɛ Ngewɔ. 29Mahoungɔ tutungaa fele ɔɔ sawa ti yɛpɛ, kɛ yeepekeisia ti kiti lewe na ma ta nde. 30Kɛɛ Ngewɔ i ngowili yeingaa numu yila ma komɛi na hu, mahoungɔ numui na i yɛpɛma, i gbe a yɛpɛla. 31Wu kpɛlɛɛ wa Ngewɔ wowili hugɛlɔ a ngilangila aako numui gbi ti gaa tawao ti kpɔma majɔɔ. 32Ngewɔ wowili lela yeekpayɛi a yɛ Ngewɔ lutuisia ti gbayei bu lɔ, 33ajifa Ngewɔ ii loni a ji mu woo a vaya hu Sɔsiihu kɛ ji ma yɛ ndiilɛli hu. Kia a wie la Ngewɔbleisia kpɛlɛɛ lia hinda gbi, 34mahoungɔ nyahangɛisia ti maa i yɛ louŋ Ngewɔ vɛli gomɛisia hu. Maa i houni ti yɛpɛ, kia Juuisia ti jawei ndeni la, maa ii houni ti yɛ komɛ maahu. 35Hinda i yɛngaa na ti longɔ ti kɔɔ, ti ti hinii mɔli pɛleibu. Ngufema hinda le nyaha va kɔ i yɛpɛ Ngewɔ vɛli gomɛ hu. 36Kɛ Ngewɔ wowili i gbuani wua lɔ gama? Ɔɔ wua lekee lɔ i fonga wu ma? 37Numu gbi i gilingaa yɛ Ngewɔ lutu lɔ a ngie ɔɔ Ngewɔ Yafei i kpaya venga ngi wɛ, mahoungɔ i kɔɔ kɛ ji ngi nyɛima wu gama i yɛni a Ndemɔi jawei lɔ. 38Kɛɛ ii woloilɔ ji ma ngi nyɛima, waa wolo ngi ma. 39Faale na, nya mbaa Kristimableisia, a wu lii wu Ngewɔ wowili lela hu kɛɛ waa nungaa maabali ji ta yɛ yɛpɛma kɛnyɛyia wekangaa hu. 40Mahoungɔe hindei gbi i wie panda tawao ndangɔ pele ma.


1 KƆLINTIBLƐISIA 15

1Kiahuna na, nya mbaa Kristimableisia, nya longɔ ngi Ngowili Yekpei hitɛ wu wɛ, na ngi ndeni wu ma, na wu majɔɔni, tawao wu langɔ la kpauŋ. 2Tia mia a Ngowili Yekpei na ngi ndeni wu ma ngɛɛ a wu yafeisia bawolɔ ina wu houilɔ mba kpaŋ, kɛlee wu lalei a Kristi i yɛ a baaba hinda. 3Na ngi majɔɔni ngi teweilɔ wu gama, tawao ta lɔ bagɔma i ma i lewe hindei gbi ma, a ji: kɛ Kristi i haailɔ mu jumbuisia va, kia nyɛingɔ la Ngewɔ Gɔlɛi hu; 4kɛ ti ngi gbɔwuilɔ tawao kɛ Ngewɔ i ngi vuluilɔ i ngi wumbu hee hu lɔwɔi yeesawei ma, kia nyɛingɔ la Ngewɔ Gɔlɛi hu; 5kɛ i gɛilɔ a Pita, na wooma i gɛ a toblaa puu maahu feleisia kpɛlɛɛ. 6Na wooma i gɛilɔ a ngi woomablɛisia ti lewengɔ hɔndɔ lɔɔlu ma a leenga, tawao ti gbotoma tiaa heini lɛ, kia bɛɛ ti lɛɛngaa ti haanga. 7Na wooma i gɛilɔ a Jemisi, i yama i gɛ a toblɛisia kpɛlɛɛ. 8Kɛlɛmɛi gbɔma, i gɛilɔ a nya bɛɛ, kia bɛɛ nya gbuangɔ a numui na ti ngi leni watii na maa ii houni ti ngi le. 9Gbamaile bagɔma i toblaa kpɛlɛɛ ma i lewe nya ma, nya maa ii houni bɛɛ nya loliva a tomɔ ajifa ngi juwuya hitɛilɔ Ngewɔbleisia wooma. 10Kɛɛ Ngewɔ yauwandei va ngi yɛnga hii kia ngi na, tawao ngauwandei na i pieni a nge ii pilini. Ngi yengenga kpaukpaungɔ i lewe toblaa wekeisia kpɛlɛɛ ma kia bɛɛ ii yeni a nya vulii nya wiehinda kɛlee Ngewɔ yauwandei na yengema nya hu. 11Faale na, i yɛ a nya ngi Ngowili Yekpei le wu ma ɔɔ tia, Ngowili yakpei mia mu gbi ma nde tawao tamia wu langɔ la. 12Kiahuna, ina mu wowili i yɛni a ji lɔ kɛ Ngewɔ i Kristi vuluilɔ i ngi wumbu hee hu, wu lɛɛngaa wa yee gu wu nde wuɛɛ haablɛisia tɛɛ vulu taa hiye hee hu? 13Ina haablaa tɛɛ hiye hee hu, kɛ Ngewɔ ii Kristi wumbuni hee hu, 14tawao ina Ngewɔ ii Kristi wumbuni hee hu, kɛ mu wowili lelei i yɛni a baaba gbama lɔ tawao kɛ wu lala la i yɛni a gbama hinda lɔ. 15Tewengɔ na ma, kɛ mua ndɛɛ gulama Ngewɔ ma, ajifa mu ndeilɔ muɛɛ i Kristi vuluilɔ i ngi wumbu hee hu; kɛɛ ina tɔnya le kɛ haablɛisia tɛɛ vulu taa hiye hee hu, kɛ ii Kristi wumbuni hee hu. 16Gbamaile ina haablɛisia tɛɛ hiye hee hu, kɛ Ngewɔ ii Kristi bɛɛ wumbuni. 17Tawao ina Ngewɔ ii Kristi wumbuni hee hu, kɛ wu lalei a Kristi i yɛni a baaba gbama lɔ tawao kɛ wuaa lekee jumbui luwɔyɛi hu. 18A gɛlɔ gbɔma kɛ nasia ti lani a Kristi kɛɛ ti haanga, ti jukulunga. 19Ina ndiiloi na mu piengɔ Kristi ma kpekpengɔ ndɛvui ji va lekee lɔ, peka gbi ii poma, kɛ mu mamanungɔe i lewe numu weka gbi ma dunya. 20Kɛɛ tɔnyɛi a ji lɔ kɛ Ngewɔ i Kristi vuluilɔ i ngi wumbu hee hu kɛva kɛ nasia ta haa Ngewɔ a tia bɛɛ wumbulɔ hee hu. 21Ajifa kia lɔɔ numu yila i pieni hee i wani numui gbi va, hii lɔɔ numu yila lɔ a pie haablaa ti hiye hee hu. 22Gbamaile kia lɔɔ numui kpɛlɛɛ ta haa jifa ti wilingɔ Adam hu, hii lɔɔ ti kpɛlɛɛ ta vulu ti hiye hee hu jifa ti wilingɔ Kristi hu. 23Kɛɛ numu a hiye hee hu a ngi nda hiye-gbelei lɔ, Kristi yese pɛiŋ, na wooma kpemɛi a wa, nasia ngi woo a tie ta hiyelɔ. 24Na wooma, dunyei gɛlɛ-gbelei a hitilɔ; Kristi a ngafa nyamuisia yeemahangeisia nyanilɔ kɛɛ yeemahublɛisia kɛɛ yeekpayablɛisia, i mahayɛi loko wuaa ngi Kɛkɛ Ngewɔ yeya. 25Gbamaile mahoungɔ Kristi i lo mahayɛi ma haaŋ Ngewɔ i wɛlɛ juwuisia kpɛlɛɛ maahu, i ti wuaa ngi bu. 26Ngewɔ juwui yeekɛlɛmayei a wɛlɛ maahu talɔ a hee. 27Ajifa Ngewɔ Gɔlɛi yɛ, “Ngewɔ i hani kpɛlɛɛ wuaailɔ ngi gɔwɔ bu.” I laailɔ ke kɛ kia i ndeni yɛ “Hani Kpɛlɛɛ,” na ii gbɛlɛni Ngewɔ ma, na i hani kpɛlɛɛ wuaani Kristi bu. 28Kɛɛ watii na Ngewɔ a hani kpɛlɛɛ wuaa Kristi mahayɛi bu, yeewatii mia ta vulii, Ngewɔ Hindoloi a ngie, a ta yekpe wuaa Ngewɔ bu, na i hani kpɛlɛɛ wuaani ngi bu; kɛ hani kpɛlɛɛ i wuaanga Ngewɔ mahayɛi bu. 29Ɔɔ gbɛe vamia ta nungei nasia wua a Ngewɔ yei a haablɛisia ti jɔngɔ? Gbɔɔ ti lii i ma pieva? Ina tɔnya le, kia nungaa lɛɛngaa ta nde la, kɛ Ngewɔ ɛɛ haablɛisia wumbu hee hu, gbɛe ti nungei nasia wuama haablɛisia va? 30Kɛɛ mua ta gbɛe vamia kpundɛ i hɛlɛni mu maahu kpele gbi? 31Nya mbaa Kristimableisia, hee lɔ hɛlɛni nya maahu folo gbi! Matɛi na nga kpua a wue jifa mua mu Lemɔi Yesu Kristi-ni mu wilingɔ hu, famia nga ji le. 32Ina nyɔkɔ mua “fulahuangaa” mia mu lapinga mbei Ɛfisɔs lɛi hu kia nuuvu gbama i na, kɛ gbɛ nafa lɔ ngi sɔɔnga? Kɛɛ ina Ngewɔ ɛɛ haablɛisia wumbu hee hu, kɛ kia nungaa ta nde la, “A mu mɛhɛɛ mɛ, mu ndɔ gboli, ajifa mu haamaa sina.” 33Waa wua yekpe hubaa. Kia nungaa ta nde la, “Hukpɔva a jumbu wieblaa a wu wiehindeisia hunyanilɔ.” 34Wu nɛmahu yekpei i yama wu ma wu gbua jumbu weleisia ma. Gbɛɛ ngi nde wu wufe kɛ wu lɛɛnga wuii Ngewɔ gɔɔ. 35Tɛnga numu yila a mɔlilɔ yɛ, “Haablɛisia ta yee gu ti hiye hee hu? Nduwui yeegbɛ nyɔkɔ lɔ a yɛ ti ma?” 36Bi kpowamɔi! Bi tuhani galei hiingaa ndɔmei, ɛɛ vale kɛlee i haa pɛiŋ. 37Tawao na ba hii i yɛni a tuhani galɛ gbasangɔ yakpe lɔ, tɛnga ketei ɔɔ tuhani gaalɛ weka, a yɛ gba tuhani yeefalei na ma i wama lakpama. 38Ngewɔ lɔ a tuhani galei na gɔ a nduwui na a nɛɛ ngi wɛ feva; a tuhani gaalɛ gbi gɔlɔ a nduwui na mbɛngɔ ma. 39Tawao nduwu laasi yakpei ii le aa yɛ ndɛvu-hani kpɛlɛɛ ma. Nduwu laasi yila mia i nuuvuisia ma, fuuhanisia ti ndɛi i gba, ŋɔningɛisia ti ndɛi i gba, nyɛngɛisia ti ndɛi i gba. 40Tawao ngelema hakeisia lɔ na kɛɛ dunyama hakeisia; ngelema hakeisia ti nyandei i gba dunyama hakeisia ti nyandei ma. 41Foloi nda nyandei i gba, ngalui nda nyandei i gba, tumbekeisia ti ndei i gba; tawao tumbekeisia vulii bɛɛ ti nyandei i gba ti nyɔunyɔ ti ndɛi ma. 42Hii a yɛ na ji haablɛisia ta hiye hee hu. Ti nduwui gbɔwungaa, a yɛ a nduwu lɔ a haa; i hiyengaa hee hu, a yɛ a nduwu lɔ ɛɛ haa. 43Nduwui nyamungɔ a yɛla watii na ta kpɔwu tawao kpaya gbi ɛɛ yɛ hu; kɛɛ watii na a hiye, nyandengɔ a yɛla, tawao kpayangɔ. 44Watii na ta nduwui gbɔwu nuuvu luwu a yɛla; watii na a hiye, ngafa luwui a yɛla. Nuuvu luwui lɔ na, faale ngafa luwui a yɛlɔ na huɛɛŋ. 45Ajifa Ngewɔ Gɔlɛi yɛ, “Ngewɔ i haala hindoi Adam gbatɛni ngi vulungɔ;” kɛɛ Adam yeekɛlɛmayei, i yɛni a Kristi lɔ. 46Ngafa luwui yese ii le aa loo kulɔ, kɛ nuuvu luwui, ngafa luwui i poma. 47Adam yeehaalayei, ngi gbatɛngɔ a pɔlɛi, i gbuani pɔlɛi hu lɔ; Adam yeefelei i gbuani ngelegoohu lɔ. 48Nasia dunyei woo a tie, ti gbuangɔ a numui na lɔ ngi gbatɛngɔ a pɔlɛi; nasia ngelegoohublaa a tie ti gbuangɔ a numui na lɔ i hiyeni ngelegoohu. 49Kia lɔɔ numui na ti kpatɛni a pɔlɛi ngi gbuayei a mue, hii ma gbua a Hindoi na i gbuani ngelegoohu. 50Nya mbaa Kristimableisia, na nya lii i ma ta lɔ a ji: na kpatɛngɔ a nduwui kɛɛ ŋamɛi ɛɛ gu aa wuaa Ngewɔ mahayɛi hu, tawao na kpatɛngɔ a haa-luwui ɛɛ gu aa yɛ na hu a yɛna kunafɔ. 51A wolo tɔnya lɔwungɔi ji ma: mu kpɛlɛɛ muɛ haa, kɛɛ watii na kɛlɛma bulii a vɛ, mu gbi ma maluvelɔ fulo 52kia numu a yaama yali gbamaile bulii i vɛngaa, haablɛisia ta hiyelɔ hee hu, tɛɛ yaa haa gbɔma, tawao mu kpɛlɛɛ mu maa a luvelɔ. 53Gbamaile na a lula, maa a luvelɔ huɛɛŋ a na ɛɛ lula; na a haa, maa a luvelɔ huɛɛŋ a na ɛɛ haa. 54Faale ji wiengaa, na a haa i maluve a na ɛɛ haa, kɛ Ngewɔ layie na i ngi Gɔlɛi hu i longa ma ji i ndeni yɛ, “Temayɛi i hee gbolinga!” 55“Hee, bi lemayɛi lɔ mi? Hee, bi gbayei na ba numu gbalɛ la taa mindo?” 56Hee a ngi gbayei majɔɔ a jumbui lɔ a numu gbalɛ la, tawao jumbui a ngi gbayei majɔɔ a Sawei lɔ. 57Kɛɛ a mu siɛgbua Ngewɔ ma na i temayɛi venga mu wɛ hee maahu mu Lemɔi Yesu Kristi sabui hu! 58Faale na, nya mbaa Kristimableisia, a lo kpaŋ waa jɛɛjia. Kpele gbi a wu wugbakpa ngengei na hu wu piema Ndemɔi wɛ, ajifa wu kɔɔlɔ kɛ hinda gbi wu pieni Ndemɔi yengei hu bagɔma lɔ ma.


1 KƆLINTIBLƐISIA 16

1Kɔlɛi na va wu nyɛini ndalongɔ navoei na ma ma fe gbɔva Ngewɔmablei nasia ma ti Judia lɔlei hu. Mahoungɔ wu na wie ngi ndeni Kristimablei nasia ma ti Galesia lɔlei hu ngɛɛ ti pie. 2Sɔnde gbi ma, numu gbi i navoo la gba kia ngi jɔhani a yɛ na, wu ndamagbatɛ aako navoo wɔyɔla aa yɛ wu ma ji nga wa. 3Ngi wangaa, nga wu magona gɔlɔngaa velɔ nasia wɛ wa la a tie, ngi ti lo Jelusalɛm a wu vehani. 4I nyandengaa nya va livaa, kɛ mua tieni ma lilɔ. 5Nga walɔ wu gama ji nga Masidonia lɔlei blandia ajifa kpa lɔ nya ma leweva a Masidonia goohu wee. 6Tɛnga vuli nga lɛmbilɔ saha wu gɔɔma, tɛngaa nga haamɛi kpɛlɛɛ gbɔyɔlɔ wu gɔɔma, na wooma wa gbɔlɔ nya ma ngi li gulɔma a nya jiei, mia gbi lekee nga li na ji nga gbua wu gɔɔma. 7Ngii loni ngi wu lɔ na kɛ ngi lewenga wu ma fulo; nya lii lɔ ma lɛmbiva wu gama, Ndemɔi i lumangaa. 8Ngi yɛmaa mbei Ɛfisɔs lɛi hu haaŋ Pɛntikɔsti volei i hiti. 9Ngi watii yekpe waa majɔɔnga mbei baama yenge wieva kia bɛɛ numu gboto ti na ti lapima a nge. 10Timoti i fonga wu ma, a loko hei ngi bu vulii pandawanda ajifa Ndemɔi yengei na lɔɔ ngi piema tamia i piema. 11Numu gbi aa lɛɛ ngi hu tawao wu gbɔ ngi ma i li gulɔma a ngi jiei ndiilɛli hu aako i yama nya gama; ajifa nyaa ngi gulɔ gbema tia mu mbaa Kristimableisia. 12Mu ndee Apɔlɔs ta, ngi nɔɔnga ngi ma kaka ngɛɛ i foo wu ma taa mu mbaa Kristimablaa wekeisia, kɛɛ ii yaa nɛni ngi wɛ wava wu gama a watii ji. Na hu gbi, kpemɛi ngi hu i gbɛmbongaa, a walɔ. 13Waa lema wua yekpe ma, a hou kpaŋ wu lii na ma falangɔ Kristi ma, a wu lii hou waa hawa wie. 14A wu yengei kpɛlɛɛ wie a ndoma. 15Wu Stɛfanɔs hinda hugɔɔlɔ tia ngi wɛlɛbuleisia; tia yese pɛiŋ ti woteni a Kristimablaa Akaya lɔlei hu gbi tawao ti tia yekpe venga Ngewɔmableisia ti yengei wɛ. 16Nyaa wu manɛnɛma, nya mbaa Kristimableisia, wu wuaa numu bondɛi jisia ti lokulɔyɛi bu kɛɛ numu weka gbi tia tieni ti yengema ta fɔndɔ jeende. 17Nya goohu nɛngɔe Stɛfanɔs walei va tia Fɔɔtunatɔs kɛɛ Akeikɔs; ti wu wooma gbewe gbuanga 18tawao ti nya lii nɛpɔnga waa kia lɔɔ ti wu lii nɛpɔni. Mahoungɔ wu wolo panda nama yee nungei jisia ta nde. 19Kristimablei nasia ti heiheini Esia lɔlei hu gbi ta va wu ma. Akuila taa Plisila kɛɛ Kristimablei nasia ta gomɛ ti wɛlei bu tiaa Kristimamɔ-vama gbɔtu yoyoma wu wɛ. 20Mu mbaa Kristimableisia kpɛlɛɛ ti mbei ta va wu ma kaka. A va wu nyɔunyɔ ma a ndoma lii. 21Nya Pɔɔl, nya vulii lɔ ngi famɛi jisia nyɛima a nya lokoi. 22Numu gbi lekee ii loni a Ndemɔi, sondu lɔ ngi ma! Mu Lemɔi, wa! 23Mu Lemɔi Yesu ngi yauwandei i yɛ wu kpɛlɛɛ ma. 24Nya lomɛi i yɛ wu kpɛlɛɛ gama Yesu Kristi woo a wue. Amiina.



AMAZING GRACE BIBLE INSTITUTE