Tito

Tito 1

1 An Paulo ma jatich Nyasaye kendo ma jaote Yesu Kristo nikech yie mar joma Nyasaye oyiero kod ng'eyo mar adieri makelo luoro Nyasaye, 2 yie kod ng'eyo ma otenore kuom geno mar yudo ngima mochwere, ma Nyasaye maok riambi nosingo kapok ndalo obetie, 3 bende ka kinde mane ochano ochopo nomiyo wachne ofwenyore e ler kuom tij lando wach mane oket e lwete kuom chik mane Nyasaye ma Jawarwa ogolo. 4 Ne Tito wuoda maradier kuom yie moriwowa e achiel, ng'wono gi kuwe moa kuom Nyasaye Wuoro kod Kristo Yesu Jawarwa obed kodi

Tich Momi Tito

5 Gimomiyo ne aweyi Krete ne en ni mondo irie gik moko mane odong' kapok atieko, kendo mondo iyier jodong kanisa e dala ka dala, kaka ne achiki ni itim. 6 Jaduong' kanisa nyaka bed ng'at ma wach moro amora marach onge kuome, kendo ma jadhako achiel, kendo ma nyithinde oyie kendo maok nyal kwan kaka nyithindo ma achach kendo ma wigi tek. 7 Nikech Jatend Kanyakla mar jo-Kristo en jarit tich Nyasaye, nyaka obed ng'at ma wach moro amora marach onge kuome. Kik obed ng'at ma ochayo ji kata ma mirimbe liet, kata ma ohero kong'o, kata ma ohero goruok, kata ma yudo mwandu e yor miriambo. 8 To nyaka obed ng'at mohero rwako welo kendo mohero gigo mabeyo, nyaka obed ng'at ma pache ler, mohero adiera kendo moluoro Nyasaye; kendo moritore. 9 Nyaka omak motegno puonj migeno, mana kaka osepuonje e kinde motelo, mondo eka jiw joma moko gi puonj madier kendo okwer joma kwedo puonjno. 10 Nikech nitie ji mang'eny ma jong'anyo, ma gin mana jothor wach kendo jo wuond ji, to moloyo jogo moter nyangu ma gin jo-Yahudi moyie. 11 Jogi nyaka kwer mondo oling', nikech giketho mier mang'eny ka gipuonjo gik maok owinjore gipuonji; kendo gitimo kamano mana mondo giyudie ohala maok nikare. 12 Kata mana janabi moro ma margi owuon osewacho niya, jo-krete riambo kinde duto, ondiegi malich ma timbegi richo kendo gin jowuoro mabudho abudha." 13 Wach janabigini en adier. Omiyo kwergi matek mondo eka gibed gi yie maradier, 14 kendo mondo kik gichik itgi ni sigendni mag jo-Yahudi kata ni chike mag joma odagi adiera. 15 Gik moko duto ler mana ni joma ler, to kuom joma okethore maok oyie to onge gima ler. Chutho, pachgi kaachiel gi chunygi monego onyisgi kethogi osetho. 16 Giwacho ni ging'eyo Nyasaye to gikwedo Nyasaye nogo gi timbegi manono. Gin acheje ma wigi tek kendo ok ginyal timo gimoro amora maber.

Tito 2

Gik Monego Puonji Ne Kidienje Mopogore Pogore

1 Nyaka ipuonj weche mowinjore gi puonj ma adiera. 2 Puonj joma chwo madongo mondo obed joma obidhore, maok ohero oyuma, kendo moritore, bende man-gi yie madier kendo gi hera kod kinda. 3 Kamano bende puonj mon madongo mondo odag e ngima mar luor to ok joma ketho nying ji, kata joma madho kong'o orundo, to nyaka gipuonj gik mabeyo. 4 Bang'e eka ginyalo tiego mon matindo kaka onego giher chwogi gi nyithindgi; %endo eka ginyalo ritore ka gidak e ngima maler kendo ka gidich e utegi. Nyaka gibed mon mang'won kendo ka gin e bwo loch mar chwogi, mondo eka ng'ato kik yud thuolo mar chayo wach Nyasaye. 6 Kamano bende onego ijiw yawuowi bende mondo oritre. 7 Bednigi ranyisi e yore duto kitimo gik mabeyo. Kipuonjo to nyis ni in ng'ama ngimane oriere tir kendo ma ok dwar oyuma, 8 wecheni obed weche mowinjore ma ng'ato ok nyal chayo, mondo joma ok oyie kodi wigi okuodi nikech gionge gimoro amora marach ma ginyalo wacho kuomwa. 9 Puonj wasumbini mondo owinj ruodhi maggi e weche duto, kendo gitem tim-onigi mana gik malong'o maok gid-wokere kodgi, 10 kata kik gikwal gigegi, to ginyisre ni gin joma inyalo geno e weche duto mondo omi e yore duto ginimi puonj mar Nyasaye Jawarwa oywa ji. 11 Nikech ng'wono mar Nyasaye makelo warruok osefwenyore ni ji duto. 12 Ng'wonono puonjowa mondo wawach ni "Wadagi" ne timbe maricho kod gombo maricho mag piny, kendo mondo wadagi e ngima moritore, e ngima makare kendo mamiyo Nyasaye duong' e kindeni, 13 kapod warito geno mogwedhi ma en fwenyruok man gi duong' mar Nyasacha maduong' kod Jawarwa, Yesu Kristo, 14 mane ochiworenwa mondo oreswa wawe timbe maricho kendo mondo opwodh ni en owuon joma owinjore bedo joge, moikore timo gik mabeyo. 15 Koro magi e gik monego ipuonji. Jiw ji kendo ikwergi gi teko duto. Kik iwene ng'ato thuolo mondo ochayi.

Tito 3

Timo Timbe Mabeyo

1 Par niji mondo obed moboch e bwo joma nigi loch kod joma nigi teko. Nyisgi mondo giwinj chik kendo mondo gibed moikore ni timo gimoro amora maber, 2 kik giketh nying ng'ato ang'ata, gibed joma ohero kuwe, kendo ma paro mar konyo jowetegi, ka ginyiso muolo madier niji duto. 3 Nikech kata wan bende chon ne wan joma ofuwo maok winj wach kendo ne wan joma owuondi mane nie twech mar kit gombo gi mor ma yoreyore mag ringruok. Ngimawa mapile nopong' gi ichlit gi nyiego; ne gimon kodwa to wan bende wamon e kindwa. 4 To ka kech kod hera mar Nyasaye ma Jawarwa nofwenyore to nowarowa, 5 ok nikech tim moro makare mane wasetimo, to nikech kechne. Nowarowa kane olwokowa gi lwok mar nyuol manyien, kendo kane Roho Maler olokowa joma nyien, 6 Roho manoolonwa mogundho, kuom Yesu Kristo ma Jawarwa, 7 mondo ka oseketwa kare kuom ng'wonone to wabed jocham mwandune, ka wan gi geno mar yudo ngima mochwere. 8 Ma en wach madiera. Kendo adwaro ni ijiw wechegi mondo joma oseketo genogi kuom Nyasaye otang' mondo gichiwre mar timo gik mabeyo. Gigi gin gik malong'o chuth, kendo kelo konyruok niji duto. 9 To pogri gi mbekni mofuwo gi sigendni mag nonro anywola, gi mino wach kod dhawo kuom weche mag chike, nikech gik ma kamago ok kel konyruok kendo gionge tich. 10 Siem ng'at makelo pogruok dichiel, kendo tim kamano mar ariyo. Bang' sieme diriyo to pogri kode chuth. 11 Bed king'eyo gadiera ni ng'ama kamano en Jaricho ma pache okethore. En ng'ama ketho kong'eyo.

Weche Mogik

12 Kaka aseoro Artema kata Tukiko iri, to item matek mondo ibi ira piyo Nikopoli, nikech asechano mar bet kuno kinde koyo. 13 Tim duto minyalo mondo ikony Zena ma okil kod Apolo e wuodhgi, kendo ne ni giyudo gik moko duto ma girdwaro. 14 Jowa nyaka puonj re keto chunygi kuom timo gik mabeyo, mondo eka giyud gik ma gikonyorego e ngimagi mapile kendo kik gidag ngima maok kel konyruok. 15 Ji duto man koda ooroni mos. Mosnwa joma oherowa kuom yie. Ng'wono obed kodu uduto.