Jo-Rumi

Jo-Rumi 1

1 An Paulo, misumba Yesu Kristo, mane oluongi mondo obed jaote, kendo mane owal ne Wach Maber mar Nyasaye, 2 Wach Maber mane osingo chon e Ndiko Maler kotiyo gi Jonabi mage e mawuoyo 3 kuom Wuode, mane en nyakwar Daudi kuom ringruok, 4 kendo mane onyis ratiro gi teko ni en Wuod Nyasaye kuom chuny mar ler, nikech chier mare koa kuom joma otho: Yesu Kristo Ruodhwa. 5 Kuome kendo e nyinge ema waseyudoe ng'wono gi teko mar bedo joote, mondo wami Ogendini duto obed gi winjo wach mar yie. 6 To un bende un e kanyakla achiel gi jogo moseluongi mondo ubed jo Yesu Kristo. 7 Ne ji duto man Rumi, ma Nyasaye ohero kendo oluongo mondo obed jomaler, ng'wono gi kuwe moa kuom Nyasaye Wuonwa kod Ruoth Yesu Kristo mondo obed kodu:

Paulo Ogombo Limo Rumi

8 Mokuongo, aduoko erokamano ne Nyasacha, kuom Yesu Kristo nikech un duto, nimar yie maru ihulo e pinje duto. 9 Nyasaye ma atiyone gi chunya duto, ka alando Injili mar Wuode, en janeno mara kaka asiko aparou kinde duto 10 e lamo maga kendo alamo ni kaber to koro yo oyawrena mondo abi iru, ka Nyasaye oyie. 11 Agombo nenou ahinya mondo apognue mich moko mag chuny mondo ategugo. 12 tiende ni, mondo un kod an wajiwre ng'ato gi ng'ato e yie marwa, ka ajiwou to un bende ujiwa. 13 Ok adwar ni ukiya, jowetena, ni asechano kuom ndalo mang'eny mondo abi iru (to osetama timo kamano nyaka koroni), mondo un bende aka cham e dieru mana kaka aseyudo e dier ogendni mamoko. 14 An jagop jo Grik gi joma ok jo-Grik, kendo mar joma riek kod joma ofuwo. 15 Mano emomiyo aketo chunya ni nyaka un bende ayalnu Wach Maber, un ma un Rumi. 16 Aonge wichkuot gi Wach Maber, nikech en teko mar Nyasaye ma waro ng'ato ang'ata moyie, mokuongo ni jo-Yahudi, eka bang'e ne Ogendni bende. 17 Nikech kuom Wach Maber nogo ema Nyasaye ketoe dhano kare kuom yie kende ma ok omedie gimoro machielo, mana kaka ondiki ni, "Ng'at makare nobed mangima kuom yie."

Mirimb Nyasaye Kuom Dhano

18 Mirimb Nyasaye koro fwenyore koa e polo kuom ji duto motamore lame, kendo matimo richo ka gigeng'o adiera gi timbe-gi maricho. 19 Nikech gima dhano nyalo ng'eyo kuom Nyasaye oyangore negi maler, nikech Nyasaye oseele negi. 20 Nikech nyaka chakruok piny, gii Nyasaye maok nenre kaka tekone mochwere kod kite, osenenore malong'o ka gifwenyore e gik mosechweyo, mondo omi dhano kik riasre kuom weche machalo kamagi. 21 Kata obedo ni ne ging'eyo Nyasaye, to ne ok gimiye duong' kaka Nyasaye, kendo ne ok giduokone erokamano, to pachgi nobedo manono kendo chunygi mofuyo nodinore. 22 Kata obedo ni ne giwacho ni giriek, to ne gibedo joma ofuwo, 23 kendo ne giloko duong' mar Nyasaye maok tho e kido machalo gi dhano matho, gi winy, gi le ma tiende gi ang'wen, gi le mamol. 24 Mano emomiyo Nyasaye noweyogi mondo gidhi adhiya nyime gi kit chode duto ma chunygi ne gombo timo, ka giketho dendgi e kindgi ng'ato gi ng'ato. 25 Ne giloko adiera mar Nyasaye odoko miriambo kendo ne gil-amo kendo gitiyone gik mochwe kar tiyo ne Jachwech, mipako nyaka chieng' Amin. 26 Kuom mano, Nyasaye noweyogi ne owruok gi kit gombo maricho duto make-lo kethruok. Koda ka mondgi bende no weyo riwore gi chwogi e yo mowinjore to negichako riwore gi mon wetegi. 27 Chwo bende noluwo mana yo machalre; kar riwruok gi mon e yo mowinjore to dendgi noowore gigombo chwo wetegi. Chwo notimo timbe dwanyruok gi chwo wetegi, ka gionge wichkuot, kendo timgi-no nomiyo giyudo kum e dendgi giwegi mowinjore gi kethogino. 28 To bende, kaka ne giparoni ng'eyo Nyasaye ok lich, Nyasaye noweyogi mondo gidhi adhiya nyime ka pachgi obam, mondo gitim, gik ma ok onego otim. 29 Gipong' gi kit timbe mamono duto gi richo gi wuoro kod timbe mobam. Bende gipong' gi ich lit, gi nek, dhawo, wuond, kod himruok. Gin jokuoth, 30 joketh nying ji, joma ochayo Nyasaye, jokwinyojorna wigi tek, lendo josunga giloso yore manyien mag timo richo; kendo ok giwinj jonywolgi; 31 gionge paro gionge yie, gionge chuny, kendo gionge kech. 32 Kata obedo ni ging'eyo chik makare mar Nyasaye ni joma timo gik makamago onego otho, to gidhiyo adhiya nyime gi timogi, kendo bende gipwoyo joma timogi

Jo-Rumi 2

Nyasaye Ng'ado Bura Makare

1 Omiyo in bende ok initony, in ming'a-do Dura ne ng'at machielo, nikech gima ing'adonego ng'at machielo burano ema bura loyigo iwuon, nikech in ming'a-do bura bende itimo gik machalre gi gima otimo. 2 To koro wang'eyo ni buch Nyasaye ne joma timo gik makamago olu-wore gi adiera. 3 Omiyo in dhano adhana ing'ado bura ne joma timo gik ma kamago, iparo ni N)asaye biro ng'ado ne jogo bura to in, ma bende itimo gigo, to initony? 4 Koso ichayo mwandu mar ng'-wonone kod hooruokne gi kindane? Donge ing'eyo ni Nyasaye ng'wononi mondo oweni thuolo mar lokruok? 5 To kuom tamruok mari kod chunyi midagi loko, ikuno mirima mager, ne in iwuon ne odiechieng mirimb Nyasaye, ma buche makare noelie. 6 Chieng'no Nyasaye "nochul ng'ato ka ng'ato kaluwore gi tim-bene." 7 Ne joma osetimo kinda kuom timo maber, ka gidwaro duong' kod luor, kod gik maok tho, enomi ngima mochwere. 8 To joma dwaro margi kendgi, kendo maok lu adiera, to luwo mana timbe maok kare, norom gi mirima mager kod gero. 9 Masira gi chandruok malit nobedi ne ji duto matimo richo, mokuongo ne jo-Yahudi eka bang'e ne Ogendini bende; 10 to duong' gi luor kod kuwe nobed ni ji duto matimo maber, mokuongo ni jo-Yahudi, kendo ni Ogendini bende. nNikech Nyasaye ok dew wang' ji. 12 Ji duto matimo richo, ka gionge gi Chik, nolal bende ka gionge chik, to ji duto matimo richo ka gin e bwo Chik nong'adne bura gi Chik nogo. 13 Nimar ok joma winjo Chik gi itgi ema nikare e nyim Nyasaye, to mana jogo, matimo gima Chik owacho, ema ibiro keto kare. 14 (Chutho ka Ogendini maonge gi Chik, timo gik ma Chik dwaro, kata obedo ni gikia Chik, to gidoko chik negin giwegi kata obedo ni gionge gi chik kamano. 15 nikech ginyiso ni gima Chik dwaro ondiki e chunygi, kendo kata chunygi giwegi bende bedo joneno ni mano en adier, kendo pachgi seche moko ng'adonegi bura kaka joketho, to seche moko pwoyogi.) 16 Mano notimre e odiechieng' ma Nyasaye nong'ad bura ne maling' ling' mag dhano kuom Kristo Yesu kaka Injili ma ayalo wacho.

Jo-Yahudi Kod Chik

17 Koro in ka in iluongori ni ja Yahudi; ka iyiengori kuom Chik, kendo ipakori kuom winjruok ma in-go kod Nyasaye; 18 ka ing'eyo dwarone, kendo inyalo pogo gima ber moloyo nikech isepounjori chik, 19 Ka ing'eyo chuth ni in jatelo ne muofni, kendo ni in ler ne joma nie mudho; 20 bende ni in jatecho mar joma ofuwo, kendo ni in japuonj mar nyithindo mayom nikech Chik ma in go oting'o ng'eyo kod adiera 21 koro, in mipuonjo joma moko, donge ipuonjrie in iwuon? In miyalo ni kuo rach, mit ki into ikwelo? 22 In miwa-cho ni ji kik terre, mit into iterori? In ma ichayo nyiseche manono, mit ki iyako ute milemoe? 23 In ma isungori nikech Chik ma in-go, dipo ikelo achaya ne Nyasaye kuom ketho Chik? 24 Mana kaka ondiki ni, "Nying Nyasaye iyanyo e dier Ogendini nikech un." 25 Tero nyangu nigi ohala mana ka imako Chik, to ka iketho Chik to ichalo ng'at mane ok oter nyangu. 26 Omiyo ka joma ok oter nyangu timo gik ma Chik dwaro to donge inyalo bi kwan-gi kaka joma oter nyangu? 27 Koro ng'at ma ok oter nyangu e yor ringruok, to oluwo chik, biro ng'adoni bura, in ma in-gi Ndiko mar Chik kendo oteri nyangu to in jaketh chik. 28 Nikech ng'ato ok en ja-Yahudi mana kuom nenruokne maoko kata nikech otere nyangu e ringre maoko. 29 Ooyo, ng'ato en ja-Yahudi ka en kamano gi e chunye kendo tero nyangu mar adier en mar chuny, kuom Roho to ok mar chike mondiki. Ng'at ma kamano ok yud pak kuom ji, to oyudo pak kuom Nyasaye.

Jo-Rumi 3

Adiera Mar Nyasaye

1 Kare ere oh and bedo ja-Yahudi kata ber tero nyangu? 2 Nitie ber mang'eny! Mokuongo, gin emane omigi wechegi mag Nyasaye. 3 To kapo ni moko kuomgi neonge gi yie to? Bende bedogi maonge yie nyalo ketho adiera mar Nyasaye? 4 Mano ok nyalre kata matin! Nyasaye nyaka sik jaadiera, to dhano ka dhano ja-miriambo. Mana kaka ondiki ni, "Mondo ibedi kare ka iwuoyo kendo ilochi kiyalo bura." 5 To ka timbe wa maricho konyo kuom guro tim makare mar Nyasaye, to dwawach ang'o? Dwawach ni Nyasaye timo marach kokumowa gi mir-imbe mager? (Awuoyo kaka dhano.) 6 Ok kamano ngang'! Nikech ka en kamano to Nyasaye ding'ad bura ne piny nade? 7 Ng'ato nyalo penjo ni, "Ka miriambona nyalo miyo adiera mar Nyasaye medore, kendo duong'ne bende medo nyisore to marang'o pod ing'adona bura kaka jaricho?" 8 Kare ang'o mono wacho (kaka osebed kiyanyowa ni wawacho, kendo kaka jomoko osiko ni wawacho) ni "Watimuru atima richo mondo eka ber obedie?" Joma kamago owinjore kumgi!

Onge Ng'ama Jaadiera

9 Koro dwawach nang'o mogik? Bende waber adier? Ok kamano ngang'! Waseng'ado bura ni jo- Yahudi gi Ogendini joricho machalre. 10 Mana kaka ondiki ni, "Onge ng'ama kare, bende onge kata achiel; 11 Onge ng'ama wach donjone, onge ng'ama dwaro Nyasaye. 12 Ji duto oseruenyo, giduto gisedoko joma nono; onge ng'ama timo maber, onge kata achiel." 13 "Dwondgi chalo liete moya-wore; lewgi olony e wacho miriambo. "Sum mar timonel fu nie pien dhogi." 14 "Dhogi opong' gi kuong' kod weche makech." 15 "Tiendegi leng'ore ka dhi chuero remo; 16 kethruok kod masira nie yore ma giluwo, 17 kendo yor kuwe ok ging'eyo." 18 "Luoro Nyasaye onge e wang'gi." 19 To koro wang'eyo ni gimoro amora ma Chik wacho, owacho ne joma nie bwo chik, mondo dhok duto oling' thi, kendo buch Nyasaye olo piny duto. 20 Kuom mano, onge ng'ama noket kare e nyime kuom timo gik ma Chik owacho, to kuom Chik ema dhano ng'eyoe kethone.

Bedo Makare E Yor Yie

21 To koro yor ngima makare mar Nyasaye, maok otenore kuom chik, oseelore, mana kaka Ndiko mag Musa gi Jonabi nyiso. 22 Ngima makareni mar Nyasaye, yudore e yor yie kuom Yesu Kristo ne ji duto moyie. Onge pogruok; 23 nimar ji duto oseketho kendo girem kuom duong' mar Nyasaye, 24 to iketogi kare nono kuom ng'wonone, nikech warruok ma nobiro kuom Kristo Yesu, 25 Nyasaye nochiwe kaka misango magolo richo, nikech yie kuom rembe. Ne otimo ma mondo onyis timne makare, nikech e kinde motelo, Nyasaye noweyo mak okumo richo mane ji osetimo nikech kechne. 26 Notimo kamano mondo onyis ratiro e ndalogi ni en owuon en kare, kendo ni oketo kare joma nigi yie kuom Yesu. 27 To kare koro ng'aruok nikune? Ong'ad kare oko chuth. ogole gi yo mane? E yor timo gima chik dwaro? Ooyo, gi yor yie. 28 Nikech gima wang'eyo en ni ng'ato iketo kare kuom yie to ok kuom timo gik ma Chik dwaro. 29 Koso dibed ni Nyasaye en Nyasach jo-Yahudi kendgi? Donge en Nyasach Ogendini bende? Ee, en mar Ogendini bende, 30 nikech Nyasaye en achiel kende kendo obiro keto kare joma oter nyangu kuom yie, mana kaka otimo ne joma ok oter nyangu bende e yor yie achielno. 31 Koro Chik bedo maonge tich nikech wach yie mwaloseni koso? Ok kamano ngang'! Kata kamano warito Chik.

Jo-Rumi 4

Ibrahim Obedo Jaadiera Kuom Yie

1 To koro dwawach ang'o kuom Ibrahim ma kwarwa kuom ringruok; en to nowinjo tiend wachni nade? 2 Nikech kaponi Ibrahim noket kare kuom tijene to dine obedo gi gima onyalo pakorego, to ok e nyim Nyasaye. 3 Ndiko to wacho nang'o? Ibrahim noyie kuom Nyasaye, kendo mano nomiyo okwane ng'ama kare." 4 To ong'ere malong'o ni chudo mimiyo ng'ato bang' tich ok miye kaka mich; to imiye kaka gir luche mosetiyone. 5 To kuom ng'at maok ti gimoro to oketo mana genone kuom Jal maketo jomaricho kare, yie ma kamano ikwano kaka tim makare. 6 Daudi bende wuoyo kuom wachni koloso kuom hawi ma ng'ama Nyasaye kwano kaka ng'ama kare maok ti gimoro nigo 7 "Gin johawi jogo ma richogi owenegi, kendo ma richogi oum. 8 En jahawi jamo ma Ruoth ok nokwanne richoge." 9 To hawi miwuoyeni dobed mana mar joma oter nyangu kende, koso en mar joma ok oter nyangu bende? Wawacho ni yie mar Ibrahim nokwanne kaka tim makare" 10 Ere kaka nokwan nego? Ne en kosetere nyangu koso ka podi? Ok ne en bang'e, to ne en kapok otere nyangu. 11 Ne oyudo kido mar nyangu achien kaka ranyisi mar bedo ng'ama kare, ma noseyudo motelo kuom yie kapok otere nyangu. Kuom mano en kwar ji duto moyie to ok oter nyangu, mondo joma kamago be oketgi kare. 12 To bende en kwar joma oter nyangu, maok oter mana nyangu kende, to maluwo kit yie ma kwarwa Ibrahim ne nigo kane pok otere nyangu. 13 Nikech singruok mane omi Ibrahim ni piny nobed mare, ne ok obirone kata ne kothe kuom chik, to nobiro kuom tim makare mar yie. 14 Kapo ni joma oluwo Chik ema bedo jocham gikeni to yie obedo kayiem nono, kendo singruok onge tiende, 15 nikech Chik kelo mirima. To kama Chik onge, ketho chik bende onge. 16 Kuom mano, singruok biro kuom yie eka obedo kuom ng'wono, kendo nyikwa Ibrahim duto oyud singruokno, to ok ne joma rito chik kende to nyaka joma nigi yie machal gi mar Ibrahim. En e wuonwa waduto. 17 Mana kaka ondiki ni, "Aseketi wuon ogendini mang'eny." En wuonwa e nyim wang' Nyasaye mane oyie kuome, Nyasaye machiwo ngima ni joma otho kendo maluongo gik maonge mana kagima gintie. 18 Kata obedo ni gima dine mi Ibrahim bed gi geno ne onge, ne pod oyie ayiea ni nobiro bedo "wuon ogendini mang'eny," mana kaka nosewachne ni, "kamano e kaka kothi nobed". 19 Ne ok odok chien e yie, kata obedo ni ringre owuon ne chai gima otho (nikech hike ne romo kar mia achiel), kendo kata ni Sara ne migumba ma kinde minyuoloe nyithindo osekalo. 20 Kiawa moro amora ne ok omiyo okier oweyo singruok Nyasaye, to nomedo bedo motegno e yie mare komiyo Nyasaye duong', 21 kendo noyie chutho ni Nyasaye ne nigi nyalo mar timo gima nosesingore ni notim. 22 Emomiyo yiene "ne okwan-ne kaka tim makare." 23 To weche mawacho ni, "ne okwan nego, "ne ondiki ok ni en kende, 24 to ne wan bende, ma Nyasaye biro ketonwa tim makare, wan mwayie kuom Jal mane ochiero Yesu Ruodhwa oa kuom joma otho. 25 En mane ochiwe mondo otho nikech richowa kendo nochiere mondo oketwa kare.

Jo-Rumi 5

Kuwe Kod Mor

1 Emomiyo, kaka koro oseketwa kare kuom yie, wan gi kuwe gi Nyasaye kuom Ruodhwa Yesu Kristo, 2 ma kuome waseyude kuom yie yor chopo e ng'wono makoro wachungoe. Bende wail kuom geno mar duong' mar Nyasaye. 3 To ok mano kende, to wail bende kuom chandruok mwayudo, nikech wang'eyo ni chandruok kelo kinda, 4 to kinda kelo kido maber to kido maber kelo geno. 5 To geno ok kuod wiwa, nikech Nyasaye oseolo her-ane ei chunywa kuom Roho Maler, ma osemiyowa. 6 Nikech, e kinde mowinjore, kane pod ok wanyal, to Kristo nothone wan joma richo. 7 Ok en gima yot mondo ng'ato otho ni ng'at makare; dipo nono ng'ato ditho ni ng'at maber. 8 To Nyasaye nyiso herane moherowago kama: Kane pod wan joricho to Kristo nothonwa. 9 Kaka koro oseketwa kare kuom rembe, donge ibiro reswa chuth kendo moloyo e mirimb Nyasaye nikech En! 10 Nikech kane pod wan wasik Nyasaye to ne oke-towa osiepene kuom tho mar Wuode koro kaka osetimwa osiepene donge ibiro reswa moloyo nikech ngimane! 11 To ok mano kende, wail bende kuom Nyasaye, nikech Ruodhwa Yesu Kristo, ma kuome oseketwa wabedo osiepe Nyasaye.

Tho Kuom Adam, Ngima Kuom Kristo

12 Emomiyo mana kaka richo nodonjo e piny nikech ng'at achiel, kendo richono nokelo tho; e kaka tho nobiro kuom ji duto, nikech ji duto noketho, 13 chutho richo ne nie piny kane pok Chik obetie. To richo ok kwan kaka richo ka Chik onge. 14 Kata kamano tho nolocho chakre ndalo Adam nyaka ndalo Musa, kendo noloyo nyaka joma ne ok oketho kaka Adam, mane en kido mar Jal mane onego obi. 15 To mich michiwo nono opogore gi bayo yo. Nikech ka ji mang'eny notho nikech bayo yo mar ng'at achiel, to nobedo maber manade ka ng'wono mar Nyasaye kod mich manobiro kuom ng'wono mar ng'at achielno, ma en Yesu Kristo, nochiw mogundho ni ji mang'eny. 16 To bende mich Nyasaye opogore gi gima richo mar ng'at achiel nokelo. Nikech bura noluwo richo achiel mokelo kum, to mich ma nobiro bang' bayo yo kinde mang'eny nomiyo oketowa kare. 17 Nikech ka bayo yo mar ng'at achiel nomiyo tho olocho kuom ng'at achiel nogo, koro joma yudo ng'wono mogundho kod mich mar ngima makare donge biro bedo gi loch mar ngima maduong' moloyo kuom ng'at achielno, ma en Yesu Kristo. 18 Emomiyo mana kaka bayo yo mar ng'ato achiel nokelo kum ne ji duto, e kaka tim makare mar ng'at achielno miyo ji duto bedo makare kendo yudo ngima. 19 Nikech kaka tamruok winjo wach mar ng'at achiel nomiyo ji mang'eny odoko joricho, e kaka winjo wach mar ng'at achielno biro miyo iketo ji mang'eny kare. 20 To Chik nomedi mondo bayo yo omedre. To kama richo nomedoree, ng'wono nomedoree moloyo, 21 mondo kaka richo nobedo gi loch mokelo tho, e kaka ng'wono bende obedie gi loch kuom tim makare, makelo ngima mochwere kuom Yesu Kristo Ruodhwa.

Jo-Rumi 6

Tho Ne Richo, Bedo Mang'ima Ei Kristo

1 En ang'o ma koro wanyalo wacho? Dwadhi nyime ka watimo richo mondo eka ng'wono omedre? 2 Gima kamano kik timre! Ne watho e richo; ere kaka wanyalo dhi nyime kwadak e iye? 3 Koso donge ung'eyo ni wan duto mane obatiswa kuom Kristo Yesu, nobatiswa e thone? 4 Omiyo noikwa kode e tho kuom batiso, mondo kaka Kristo nochier oa kuom joma otho kuom duong' mar Wuoro, e kaka wan bende onego wadagi e ngima manyien. 5 Koseriwwa kode kamano e thone, to ochuno ni ibiro riwwa kode bende e chierne. 6 Nimar wang'eyo ni dhandwa machon nogur kode mondo ringruok mar richo okethi, kendo kik koro wabed wasumbni mag richo. 7 nikech ng'ato ang'ata mosetho osegony kuom richo. 8 Koro ka wasetho gi Kristo, wan gi yie ni wabiro bedo mangima kode bende. 9 Nimar wang'eyo ni kaka Kristo nochier oa kuom joma otho, ok onyal tho lendo, nikech tho koro onge gi loch kuome. 10 Tho ma nothogo notho ne richo dichiel kendo mogik; to ngima ma ongimago, ongima ne Nyasaye. 11 E kaka un bende nyaka ukwanru ni utho ne richo, to ungi-ma ne Nyasaye ei Kristo Yesu. 12 Emomiyo koro kik uyie mondo richo obed gi loch e ringreu matho ka uchopo gombone maricho. 13 Kik uchiw fuonde ringreu ni richo kaka gik mikethogo, to chiwreuru ne Nyasaye kaka joma osegol e tho moter e ngima; kendo chiwneuru fuonde ringreu kaka gik mitimogo timbe makare. 14 Nimar richo koro ok nobed gi loch kuomu, nikech koro ok un e bwo chik, to un e bwo ng'wono.

Wasumbini Ne Tim Makare

15 To ang'o kendo? Dwatim atima richo nikech ok wan e bwo chik, to wan e bwo ng'wono? Gima kamano kik timre! 16 Donge ung'eyo ni ka uchiworu ne ng'ato mondo uwinje kaka wasumbini to un wasumbini mag jal muwinjono, bed ni un wasumbini mag richo, makelo tho, kata mag winjo wach, makelo ngima makare. 17 To erokamano ne Nyasaye nikech kata obedo ni yande ne un wasumbini mag richo, to ne umako kit puonj mane omiu gi chunyu duto. 18 Osegonyu e richo mi koro udoko wasumbini ne tim makare. 19 Awacho ma e winjo mar dhano nilech uyomyom kaka dhano. Mana kaka yande chon ne uchiwo fuonde ringreu madoko wasumb timbe mochido, kendo ne richo mosiko medore ameda, e kaka koro owinjore uchiw fuonde ringreu obed wasumbini mag timbe makare makelo ngima maler. 20 Kane un wasumbini mag richo, ne un thuolo korka tim makare. 21 En ohala mane mane uyudo e kindeno kuom gik makoro miyou wichkuotgi? Giko mar gigo en tho! 22 To ka koro osegonyu kuom richo mi ubedo wasumbini mag Nyasaye, ohala muyudo kelo ngima maler ma gikone en ngima mochwere. 23 Nikech misach richo en tho, to mich ma Nyasaye chiwo en ngima mochwere kuom Kristo Yesu Ruodhwa.

Jo-Rumi 7

Puonj Kuom Kend

1 Koso ukia, owetena, (nikech awuoyo gi joma ong'eyo chik), ni chik otweyo ng'ato mana ka pod ng'atno ngima? 2 Kuom ranyisi, dhako mokendi Chik otweyo gi chwore mana ka chwore pod ngima; to ka chwore otho, to ogonye e chik moriwe gi chwore. 3 Kamano bende, ibiro luong dhakono ni ochot ka odak gi dichwo machielo ka chwore pod ngima. To ka chwore otho, to ogonye kuom chi-kno kendo ka dichwo machielo okende to ok kwane kaka ochot. 4 Kamano owetena, un bende, usetho korka chik kuom ringre Kristo, mondo koro ubed jo ng'at machielo, ma en Jal mosechier oa kuom joma otho, mondo eka wanyag olemo ne Nyasaye. 5 Nimar kane pod ringruok chikowa, chik ne chiewo gombowa maricho, kendo ne gitiyoe dendwa, omiyo ne wanyago olemo makelo tho. 6 To sani nikech wasetho ne gima notweyowa chon, mondo wabed wasumbini, ok manie bwo chik machon mondiki, to manie ngima manyien.

Nyagrouk Gi Richo

7 Kare koro dwawach ang'o? Chik en richo koso? Ok kamano ngang'! Adiera dine ok ang'eyo gima richo en kane onge chik. Nimar bende dine ok ang'eyo gima chik en kane ok owacho ni, "Kik igombi gir wadu." 8 To richo nokawo thuolo manie i chik mopidho kit gombo mayoreyore kuoma nimar ka chik onge to richo otho. 9 Mokuongo kane chik onge, to ne angima angima, to ka Chik nobiro, to richo nochier, kuoma mi atho. 10 Nanwang'o ni chik onogono, mane onego okel ngima, nolokore mokelo tho. 11 Nimar richo nokawo thuolo manie i chik, mowuonda, kendo okonyore gi chik nogo mondo onega. 12 Omiyo Chik en gima ler, kendo buche Nyasaye bende ler, kendo ni kare, kendo ber. 13 To dibed ni gima ber ema nolokrena tho? Ok kamano kata matin! To mondo richo ong'ere kaka richo, nokonyore gi gima ber mokelo tho kuoma, mondo eka onyisre kaka gima rach mokalo kare. 14 Wang'eyo ni Chik en gir chuny; to an ng'at ringruok, kendo richo oseng'iewa moloka misumbane. 15 Gik ma atimo odhiera ng'eyo. Nimar ok atim gik ma adwaro, to atimo mana gik ma achayo. 16 Koro ka atimo gik maok adwar, to mano nyiso ni Chik ber. 17 Chutho, an ok ema atim gino, to richo manie iya ema time. 18 Ang'eyo ni onge gimoro kata achiel maber manie iya, tiende ni, kita mar richo. Nimar an-gi gombo mar timo gimaber to ok anyal time. 19 Nimar ok atim gima ber ma adwaro mondo atim to asiko atimo mana gima rach, 20 Koro ka atimo gima ok adwar timo, to koro an ok ema atime, to richo modak e iya ema time. 21 Omiyo uyudo chikni ka tiyo: ni ka adwaro timo gima ber, to apo ka rach bende osieko ni koda 22 Nimar gie chunya maiye amor gi chik Nyasaye; 23 to aneno chik machielo e fuonde mag ringra makedo gi chik manie pacha, mamiyo abedo misumba Chik mar richo manie fuondega. 24 Mano kaka an ng'ama chandore! En ng'a mabiro resa kuom ringruokni mar tho? 25 Erokamano ne Nyasaye kuom Yesu Kristo Ruodhwa! Kuom mano, an awuon gie i pacha an misumba mar chik Nyasaye, to kuom kita mar richo ringra, an misumba mar chik mar richo.

Jo-Rumi 8

Ngima Kuom Roho

1 Emomiyo koro onge bura kuom joma ni ei Kristo Yesu, 2 nikech kuom Kristo Yesu Chik mar Roho mar ngima osegonya kuom Chik mar richo kod tho. 3 Nimar gima Chik ne ok nyal timo, nikech ringruok nomiye nyawo, Nyasaye notimo kuom oro Wuode owuon, e kit dhano ma jaricho mondo obed misango magolo richo. Osetimo kamano kuom ng'ado ne richo bura e ringruok, 4 mondo eka dwaro makare mar Chik ochopi kare chuth kuomwa, wan ma wadak kaka Roho dwaro to ok kaka ringruok dwaro. 5 Joma odak kaka ringruok dwaro oketo pachgi kuom gik ma ringruok dwaro to joma odak kaka Roho dwaro, oketo pachgi kuom Roho. 6 Paro mar jaricho en tho, to paro ma Roho chiko kelo ngima kod kuwe 7 Kuom mano, paro moket kuom ringruok mon-gi Nyasaye. Ok oyie bet e bwo loch mar chik Nyasaye, kendo ok onyal timo kamano. 8 Joma kido mar richo chiko ok nyal moro Nyasaye. 9 To kata kamano, un ok chiku gi kido mar richo, to Roho ema chikou, ka en adier ni Roho mar Nyasaye odak e iu. Kendo ka ng'ato onge gi Roho mar Kristo ok en ng'at Kristo. 10 To ka Kristo nie iu, to kata obedo ni ringruok otho nikech richo, to chuny ngima nikech tim makare. 11 Ka Roho mar Jal mane ochiero Yesu oa kuom joma otho odak e iu, to En onogo mane ochiero Kristo oa kuom joma otho obiro chiwo ngima ni ringreu matho, bende kuom Roho modak e iu. 12 Emomiyo wan jogo wi, owetena, ok ne kido mar richo to ni, mondo wadag kaka odwaro, 13 Nimar ka idak kaka kido mar richo dwaro to ibiro tho; to ka kuom Roho, inego timbe maricho mag ringruok, to ibiro bedo mangima. 14 nikech ji michiko gi Roho mar Nyasaye gin nyithind Nyasaye. 15 Nimar ne ok uyudo chuny mamiyo udoko misumba mag luoro kendo, to ne uyudo chuny maketou nyithind ot. To Kuome waywak ni "Abba! Wuora!" 16 To Roho owuon timo neno kaachiel gi chunywa ni wan nyithind Nyasaye. 17 To ka wan nyithind ot, to mano nyiso ni wan jocham gikeni. Wan jocham gikeni mar Nyasaye kendo wan jocham gikeni kaachiel kod Kristo, ka dipo en adier ni wariwore kode e malit mage mondo eka wan bende obi omiwa duong' lode.

Duong' Mabiro Achien

18 To aneno ni malit mwaneno ndalogi tin maok dipim gi duong' mabiro fwenyore kuomwa. 19 Chwech duto rito gi geno chieng' ma nyithind Nyasaye nofwenyre. 20 Nimar chwech nodonjo e kethruok, ok nikech dwarone, to kuom dwaro mar Ng'at mane okete kamano, ka en gi geno 21 ni, chwech bende ibiro gony e twech mar kethruok ma entie, mi kete e thuolo man gi duong' mar nyithind Nyasaye. —Wang'eyo ni chwech Nyasaye duto osebedo ka chur nyaka sani gi rem machal gi muoch matecho. 23 To ok mano kende, to kata wan wawegi ma wan gi olemo mokuongo mag Roho, wachur gie iwa ka pod warito gi siso maduong' mondo olok-wa yawuot od Nyasaye, chieng' ma ringruok nowar. 24 Nimar geno machal kama emane oreswae. To geno mineno ok en geno ngang'. Koso en ng'a manyalo geno gima osebedogo? 25 To ka wageno gima pod waongego to warito gino gi kinda. 26 Kamano bende e kaka Roho konyowa e nyawowa. Wakia gima owinjore wakwa sama walamo to Roho owuon ema kwayonwa gi chur matut mokalo awacha. 27 To En monono chunjewa, ong'eyo gima pach Roho en, nikech Roho kwayo ne joma ler kaluwore gi dwaro Nyasaye.

Joloch Maloyo Joloch

28 Bende wang'eyo ni e gik moko duto tiyo maber ne jogo mohere, jogo moselu-ongi kaluwore gi dwarone. 29 Nimar joma ne Nyasaye ong'eyo chon ema bende ne owalo mondo okaw kit Wuode, eka mondo odok nyathi makayo e kind jowetene mang'eny. 30 To joma nowalogo bende ema noluongo; kendo joma noluon-go noketo kare to joma noketo kare nomiyo duong' bende. 31 Kare en ang'o ma dwawach kuom wachni? Ka Nyasaye ni korwa, en ng'a ma diked kodwa mi lowa? 32 Ka Wuode owuon ema ne ok okecho, to nochiwonwago wan duto, koro en ang'o ma dimone miyowa gik moko duto, kaachiel kode kuom ng'wonone? 33 En ng'a ma di ng'ad bura moro amora ne joma Nyasaye oseyiero? Nyasaye owuon ema keto ji kare. 34 En ng'a ma di ng'ad-nwa bura marach? Kristo Yesu emane otho, to bende ne ochiere odoko mangima mi koro obet e bat korachwich mar Nyasaye, kendo okwayonwa. 35 En ng'a manyalo pogowa gi hera mar Kristo? Dobed masira, koso chandruok, koso sand, koso kech, koso duk, koso gima rach, koso ligangla? 36 Mana kaka ondiki ni, "Nikech in, tho ochomowa odiechieng' duto" ikwanowa kaka rombe midwa yang'o. 37 Ooyo, e gigi duto wan joloch ewi joloch nikech En ma noherowa. 38 Nimar an gi ratiro chuth ni tho kata ngima, kata malaike, kata jochiende, kata masani, kata gik mabiro, kata weg teko, 39 kata bor, kata tut, kata gima ochwe moro amora, ok nyal pogowa gi hera mar Nyasaye mane ei Kristo Yesu Ruodhwa.

Jo-Rumi 9

Yier Nyasaye Makende

1 Awacho adiera kuom Kristo kendo ok ariambi. chunya bende siro wach ma awachoni en adier kuom Roho Maler. 2 An gi kuyo maduong' kod lit ma ok rum e chunya. 3 Nimar daher mondo an awuon ema okuong'a kendo ong'ad kara oko kuom Kristo, nikech wach owetena awuon, kendo ogandana korka ringruok, 4 ma gin jo Israel. Gin ema noketgi yawuot Nyasaye; gin ema nomigi duong' mar Nyasaye ma gin jood Nyasaye, mane omiyo duong', gi muma, gi chik, gi lemo, kod singruok. 5 Gin bende ema kwerewa madongo noa kuomgi, kendo kata mana Kristo, kuom anyuolane kaka dhano, bende oa kuomgi; En ma en Nyasaye kuom duto, kendo mipako nyaka chieng'! Amin. 6 Mano ok onyiso ni wach Nyasaye orem mak ochopo chenrone. Nimar jo-Israel duto ok gin jo-Israel madier. 7 To bende, nyikwa Ibrahim duto ok gin kothe madier. To en mana kaka Nyasaye nony-iso Ibrahim ni, "kuom Isaka ema kothi ma hie nowuogie." 8 Ma nyiso ni nyithind ringruok ok ema nyithind Nyasaye, to mana nyithind singruok ema ikwano kaka koth Ibrahim. 9 Nimar kama e kaka singruok nowacho, "Ka kinde moketi ochopo to anaduogi kendo Sara noyud wuowi." 10 To ok mano kende; nyithind Rebeka bende ne nigi wuoro achiel machlre ma wuonwa Isaka. 11 To kapok nonyuolgi, kendo kapok ne gitimo gimoro maber kata marach, (mondo eka chenro Nyasaye mar yiero ochung' 12 ok kuom tim, to kuom jal ma luongo ji ne onyise ni, "Wuowi maduong' noti ne wuowi matin." 13 Mana kaka ondiki ni, "Jakobo nahero to Esau nachayo." 14 Koro dwawach ang'o? Ni Nyasaye ok ni kare koso? Ok nyal bet kamano! 15 Nimar owacho ne Musa ni, "Anakech ng'ama adwaro kecho, kendo anang'uon ne ng'ama adwaro ng'uonone." 16 Omiyo ok otenore kuom dwaro kata tich mar ng'ato, to en kuom kech mar Nyasaye. 17 Nimar Ndiko wacho ni Farao ni, "Aseting'i malo mana ne wachni, ni mondo anyis tekona kuomi kendo mondo nyinga olandi e piny duto. 18 kuom mano, wayudo ni ka Nyasaye dwaro kecho ng'a- to to okeche kendo ka odwaro miyo chuny ng'ato doko matek to otimo kamano. 19 To nga'to kuomu nyalo nyisa ni, "Ka kamano to Nyasaye pod kwanowa kaka joketho nang'o? Koso en ng'a ma ditam dwarone timore? 20 To in, in ng'a yaye dhano, ma didwokri gi Nyasaye? Gima ochwe be diwachne ng'at mochweye ni, "Ang'o momiyo ne ichweya machal kama?" 21 Donge jachue agulu nigi ratiro mar tiyo gi lop chuecho kaka ohero; kochueyo kode agulni moko ne tich mogen, to moko ne tich aticha mapile? 22 To ere rachne ka Nyasaye noyiere mar nyiso mirimbe, kendo mar nyiso ji tekone to osetimo kinda, kohore mos aming'a mak otoyo mirimbe kuom joma owinjore okum, ma gin joma noik netho? 23 Donge dibed ni notimo kamano mondo omi mwandu mar duong'ne ong'e gi jogo modwaro kecho mane osechano chon ne duong'. 24 ma oriwo wan bende, wan moseluongowa, ok kuom jo-Yahudi kende, to kuom Ogendini bende? 25 Mana kaka owacho e Hosea ni, "Joma ne ok joga, abiro luongo ni jahere-na kendo jal mane ok oher abiro luongo ni 'moher'" 26 "kendo ni, "Biro bedo ni kany-ono mane owachnegie, 'Ok un joga, ema noluong gie ni yawuot Nyasaye mangima. 27 Isaya bende noywagore kuom wach Israel kawacho ni, "Kata bed ni nyithind Israel ng'eny ka kwoyo mag nam, to mana joma odong' kuomgi kende ema nokuo. 28 Nimar Ruoth biro ng'ado bura ne piny ngima piyopiyo dichiel kendo mogik." 29 En mana kaka Isaya nowacho motelo ni "Ka dine Ruoth Manyalo Gik Moko Duto ok oweyonwa kodhi to dine wachalo gi jo-Sodom, adier, dikoro wan kaka jo-Gomora."

Tamruok Yie Mar Israel

30 Koro dwawach ang'o? Ni Ogendini ma ok Jo-Israel mane ok otemo matek mondo oyud ngima ema koro oseyudo ngima makare nogo miyudo kuom yie; 31 to Israel mane otemo matek mondo oyud ngima makare motenore kuom Chik to pok oyude. 32 Kamano nang'o? Nikech ne gidware ok kuom yie, to kuom yo machielo, ka giparo ni iyude kuom tich. Negichwanyore e kidi mar chwanyruok. 33 Mana kaka ondiki ni, "Ne, ayieyo kidi e Sayun mamiyo ji chwanyore, gi lwanda mamiyo gigore piny, to ng'at mogeno kuome wiye ok nokuod ng'ang.

Jo-Rumi 10

1 Jowetena, gombo mar chunya gi gima alamoe Nyasaye nejo Israel en ni mondo giyud warruok. 2 Nimar anyalo timo nendgi ni giketo chunygi ne Nyasaye, to kata kamano chunygi ok giketo kuom ng'eyo. 3 Nikech ne gikia ngima makare ma aa kuom Nyasaye, gisetemo keto margi giwegi, ka gidagi rwako yor Nyasaye moketogo ji kare. 4 Kristo e giko mar Chik kendo en ema okelo ngima makare ne ji duto moyie. 5 Musa lero kuom ngima makare maa kuom Chik kama: "Ng'at matimo gigi nobed mangima kuomgi." 6 To ngima makare maa kuom yie to wacho ni, "Kik iwach e chun-yi ni, En ng'a mabiro idho ei polo" (tiende ni, mondo olor Kristo piny), 7 "kata ni 'En ng'a mabiro lor ei bur? (tiende ni, mondo ogol Kristo oko oa kuom joma otho). 8 To owacho nang'o? Wach ni machiegni kodi, en e dhogi kendo e chunyi, (mano e wach yie mwalando; 9 Ni ka ihulo gi dhogi ni "Yesu en Ruoth" kendo iyie ei chunyi ni Nyasaye nochiere oa kuom joma otho, to nowari. 10 Nimar chunyi ema iyiego mi keti kare kendo dhogi ema ihulogo mi wari. 11 Mana kaka Ndiko wacho ni, "Ng'ato ang'ata mogeno kuome ok nokuod wiye ngang'. 12 Nimar onge pogruok e kind jo-Yahudi gi Ogendini; Ruoth en Ruoth machalre ne ji duto, kendo en gi mwandu mogundho mopogo ni ji duto maluongo nyinge, 13 nimar, "Ng'ato ang'ata maluongo nying Ruoth nowar." 14 To ere kaka digiluong Ng'at ma pok giyie kuome? Koso digiyie nadi kuom Ng'at mapok giwinjo kuome? To giniwinj kuome nadi kaonge ng'ama oyalonegi? 15 To ere kaka digiyal wach kuome ka ok oorgi? Mana kaka ondiki ni, "Mano kaka tiende joma kelo Wach Maber long'o!" 16 To jo Israel duto ok oserwako Wach Maberni. Nimar Isaya nowacho ni, "Ruoth, en ng'a moseyie wach mwalan-do?" 17 Kuom mano yie aa kuom wach miwinjo kendo wach miwinjono en wach Kristo. 18 To apenjo kama: Donge gisewinjo wach? Chutho, gisewinjo, nikech, "Dwondgi osedhi e piny duto, kendo wechegi osetundo e tung' piny." 19 Apenjo kendo kama; Be Israel nowinjo tiend wach? Mokuongo, Musa wacho ni "Anami nyiego maku gi joma ok owinjore kwan ka oganda; anami mirima maku gi oganda maonge rieko." 20 Isaya to loso gi chir ni, "Ne oyuda gi joma ne ok dwara. Ne afwenyorane joma ne ok penja." 21 To kuom Israel to owacho ni, "Odiechieng' duto narieyo bedena ni joma ok winj wach kendo ma wigi tek. "

Jo-Rumi 11

Jo-Israel Mane Otony

1 Koro apenjo ni, Ne Nyasaye okwedo jogo koso? Ooyo, ok kamano ngang! An awuon an ja Israel ma nyakwar Ibrahim, kendo ma ja dhood Benjamin. 2 Nyasaye ne ok okwedo joge mane ong'eyo chakre chon. Donge ung'eyo gima Ndiko wacho kuom Elija, kaka noyuagore ni Nyasaye nikech wach jo-Israel: 3 "Ruoth, gisenego jonabi magi kendo gisemuko kendegi mag misango mi an kenda ema adong', to an bende gichano mar nega"? 4 To Nyasaye nodwoke nang'o? "Asekano ne an awuon ji alufu abiriyo mapok ogoyo chonggi piny ne Baal." 5 Kuom mano, kata sani bende pod nitie jomodong', moyier kuom ng'wono. 6 To ka en kuom ng'wono, to mano nyiso ni koro ok yude kuom tich, nono to ng'wono koro ok dibed ng'wono. 7 To nadi? Gima Israel ne manyo gi tekrene duto ne ok onwang'o to joma oyier ema noyude. Jomamoko duto chunygi nodoko matek, 8 mana kaka ondiki ni, "Nyasaye nomiyogi chuny mar nindo matut gi wenge mondo kik ginen kod it mondo kik giwinj wach nyaka sani." 9 Daudi bende wacho ni : "Mad mesagi olokre negi rachwany gi ragaji, mad obednegi kidi mar chwanyruok kendo gima ichulogo kuor kuom timbegi maricho. 10 Mad wengegi dinre mondo kik ginen, kendo dieng'egi osik kodolore nyaka chieng'."

Bede Yien Maok Ochwogi

11 Apenjo kendo ni: Dibed ni ne gipod-ho mokalo akonya koso? Ok kamano ngang'! To nikech ketho mag-gi, warruok koro osebiro ne Ogendini mondo omi Israel obed gi nyiego. 12 To ka kethogi kelo mwandu ne piny kamano kendo ka rem margi kelo mwandu ne Ogendini, to mano kaka warruok margi nobed mwandu maduong' moloyo manadi? 13 To loro awuoyo kodu un Ogendini. Kaka an Jaote ne Ogendini, amiyo tichna duong', 14 ka an gi genoni di ami ogandana awuon nyiego maki mi awar moko kuomgi. 15 Nimar ka dagi mane Nyasaye odagigigo ema omiyo koro osiep obetie kind Nyasaye gi piny duto, donge rwakgi to nokel mana chier aa kuom joma otho? 16 Ka bath mogo modwal ochiw kaka olemo mokuongo ler, to mano nyiso ni mogo modwal duto ler; kendo ka tiend yath ler, to bede yath bende ler. 17 To ka bede yath moko nolwer oko, mondo un, ma un kaka yadh bungu, ochomu kargi, eka omi un bende ucham mwandu kaachiel kodgi koa e kor yadh Zeituni maduong', 18 to kik usungru ne bede yathgo. Paraneuru wachni ni: "Un ok ema uchungo tiend yath, tiend yath ema ochungou. 19 Inyalo wacho ni, "To donge nolwer bede yath moko oko mondo ochoma kargi?" 20 Mano en adier. To ng'eni nolwergi oko nikech ne gidagi yie, to un be uchung', mana kuom yie. Omiyo weuru pakoru, to ubed moluor. 21 Nimar ka Nyasaye ne ok okecho bede madier, to kata un ok obi weyou bende. 22 Kuom mano neye ng'wono kod gero mar Nyasaye: oger gi joma ne opodho, to onyiso ng'wonone ne un, to mana ka usiko e ng'wonone; nono to un bende ibiro ng'adou oko. 23 To gin bende, ka ok gisiko e tamruok yie, to ibiro chomogi kendo, nimar Nyasaye nigi teko mar chomogi kendo. 24 To bende kata kane ong'adu kuom yiend Zeituni moti e bungu, ochomu e kor yadh Zeituni mopidhi, ma en gima ok timre pile e yo mayot to donge en gima yot moloyo mondo gin bede yath hie odog ochomgi e kor yadh Zeituni ma margi giwegi.

Jo Israel Duto Ibiro War

25 Owetena ok adwar ni ukia tiend wach mopondoni, adwaro ni uwinj tiend wach mopondoni mondo kik ukawru ni uriek moloyo kaka uchal: Jo Israel moko konchiel osemi chunygi odoko matek nyaka chop kar kwan mowinjore mar Ogendini odonji. 26 Kamano Israel duto ibiro war, mana kaka ondiki ni, "Jawar nobi koa Sayun; enoriemb richo kuom Jakobo." 27 "Kendo ma e singruokna kodgi, ka anagol richogi." 28 Korka Injili gin wasik Nyasaye, nikech un, to korka yiero to ohergi nikech kweregi 29 nimar mich Nyasaye kod luongne ok lokre. 30 Mana kaka un makinde moko ne ok ulu-oro Nyasaye to koro osekechu nikech tamruok yie margi, 31 e kaka gin bende sani ging'anyo, mondo kuom kech mosekechugo, gin bende koro okechgi. 32 Nimar Nyasaye osemiyo ji duto obedo joma otamore winje mondo eka okech ji duto.

Wend Pak

33 Yaye mano kaka mwandu gi rieko gi ng'eyo mar Nyasaye tut miwuoro! Mano kaka buchene oyombo parowa, kendo yorene fwenyo tek! 34 "E en ng'a mosen-g'eyo pach Ruoth? Kata en ng'a mosebedonejang'adne rieko? 35 "En ng'a mosemiyo Nyasaye gimoro ma dobandh Nyasaye mondo ochule? 36 Nimar gik moko duto oa kuome, kendo gintie nikech en, kendo gin mage duto. Duong' obed mare nyaka chieng'! Amina.

Jo-Rumi 12

Misango Mangima

1 Emomiyo, jowetena, ajiwou kuom w ng'wono mar Nyasaye, mondo uchiw ringreu kaka misango mangima maler kendo ma Nyasaye morgo, nikech mano e yor lemo makare 2 Kik koro ulu kit ngima pinyni, to lokreuru ka parou doko manyien pile, eka unubed gi nyalo mar pimo kendo ng'eyo dwach Nyasaye — dwache maber, mowinjore kendo malong'o chuth. 3 Nimar kuom ng'wono mosemiya, awacho ni ng'ato ka ng'ato kuomu ni: Kik ipar ni iduong' moloyo kaka ichal to ket pachi kare eka ing'ad buchi kaluwore gi kar rom yie ma Nyasaye osepogoni. 4 Nikech mana kaka ng'ato ka ng'ato kuomwa nigi ringruok achiel man-gi fuonde mang'eny, to kendo fuondegi duto ok tim tich machalre, 5 e kaka ei Kristo, waloso ringruok achiel, kata obedo ni wang'eny, kendo ng'ato ka ng'ato kuomwa nie achiel gi jowetene mamoko duto. 6 Wan gi mich mopogore opogore kaluwore gi ng'wono momiwa. Ka mich ng'ato en koro wach to mondo oti kode kaluwore gi yie mare. 7 Ka en tiy-one ji to mondo oti, ka en puonj to mondo opuonji. 8 Ka en jipo, to mondo ojipi; ka en chiwo ne joma ochando, to mondo ochiw gi ng'wono; ka en telo, to mondo orit ji gi kinda; ka en kecho ji, to mondo otime komor.

Hera

9 Hera nyaka bed madier. Sinuru gi timbe maricho; padreuru kuom gik mabeyo. 10 Genreuru ng'ato gi ng'ato gi hera mar owete. Ng'ato ka ng'ato mondo odhial nyawadgi moloyo kaka odhialore. nKik uyie samuoyo nyosu, to neuru ni chunyu osiko kotegno, kutiyo ne Ruoth. 12 Beduru mamor kuom geno, kutimo sinani e sand muyudo, kendo ulamo ma ok uywe. 13 Poguru giu gi jo Nyasaye mochando. Beduru joma rwako welo. 14 Gwedhuru joma sandou; gwedhgiuru agwedha, kik ukuong'gi. 15 Moruru gi joma mor, kendo ywaguru gi joma ywak. 16 Daguru gi winjruok e kindu. Kik usun-gru, to beduru gi chuny mohero riwore gi joma nie ngima mapiny. Kik ng'ato ketre ni oriek moloyo ji mamoko. 17 Kik uchul ng'ato ang'ata rach kar rach. Neuru ni utimo gima ji duto oyiego ni ber. 18 Ka nyalore, to temuru mondo udag gi kwe gi ji duto. 19 Osiepena, kik uchul kuor, to weuru thuolo ne mirimb N)asaye, nimar ondiki ni, "Chulo kuor en mara; abiro chulo, "Ruoth owacho. 20 Ooyo, kar timo kamano "Ka jasiki odenyo, to miye chiemo; ka riyo oloye, to miye gimoro omodhi, kuom timo ma, ibiro olo makaa maliel e wiye." 21 Kik uyie richo lou, to louru richo gi ber.

Jo-Rumi 13

Winjo Jorit Loch

1 Ng'ato ka ng'ato nyaka winj joma nigi teko marito loch, nimar onge loch mantie, makmana mano ma Nyasaye ema oketo. Loch mantie duto Nyasaye ema oleto. 2 Kuom mano, ng'ama otamore winjo jorit loch to otamore winjo gima Nyasaye ema oketo, kendo joma timo kamano biro yudo kum kuomgi giwegi. 3 Nimar joloch ok ked gi joma timo maber makmana gi joma timo marach. Donge idwaro ni kik iluor joma orito loch? Kara tim gima kare to obiro pwoyi 4 Nimar en jatich N)asaye moketo mondo okonyi. To ka itimo marach to bed abeda maluor nikech ok oting' ligangla kayiem! En jatich Nyasaye machulo kuor gi mirima kokumo ng'ama timo marach. 5 Kuom mano, owinjore mondo ng'ato ka ng'ato owinj jorit loch, ok mana nikech inyalo yudo kum kende, to bende nikech chunyi ok ne ni mano ber. 6 Mano bende emomiyo uchulo osuru, nikech jorit loch gin jotich Nyasaye, kendo gichiwore ne tijno seche duto. 7 Miuru ji duto gik makorgi monego umigi, joma onego uchul osuru; chuluru osuru; joma juogo chuluru pesa juok; joma onego uluor miuru, luor, kendo joma onego umi duong' miuru duong'.

Herruru, Giko Chiegni

8 Kik ubed gi gop ng'ato, makmana gowi mar hera, nimar ng'ama ohero wadgi osechopo Chik.9 Chike mawacho ni, "kik iterri, kik ineki, kik ikwal, kik igombi, kaachiel gi chike mamoko duto, oriw e chik achielni, ""Her wadu kaka iherori iwuon." 10 Hera ok tim marach ne wadgi Kuom mano, hera e chopo chik. 11 To timuru kamano ka uwinjo tiend gik matimore ndalogi. Saa osechopo mondo uchiew ua e nindo maru, nikech warruok marwa koro okayo machiegni moloyo chieng' mane wayie mokuongo. 12 Otieno chiegni rumo ru piny chiegni. Omiyo waweuru timbe mag mudho, to wamanreuru gi gige lweny mag ler. 13 Wadaguru e ngima mobidhore kaka joma ni e ler mar odiechieng', ka waweyo kit richo duto kaka, tugo e thum, mer, chode, anjawo, dhaw kod nyiego. 14 Kar timo kamano to rwakreuru gi Ruoth Yesu Kristo, kendo kik uchan e pachu kaka unyalo timo gik ma ringruok gombo.

Jo-Rumi 14

Joma Yom Yom Gi Joma Otegno

1 Rwakuru ng'ama yie mare yom yom maok umino kode wach kuom weche matindo ma paro opogoree. 2 Ng'ato nyalo bedo gi yie mar chamo chiemo moro amora, to ng'at machielo ma yiene yom yom chamo mana alot kende. 3 Kik ng'at machamo gik moko duto buon ng'at maok cham, kendo ng'at maok cham gik moko duto bende kik ng'ad bura ne ng'at machamo, nikech Nyasaye oserwake. 4 In to in ng'a ma inyalo ng'ado bura ne jatich ng'at machielo? Kochung' kata kopodho to obadho mana ruodhe owuon. To obiro mi ochung' nimar Ruoth nigi nyalo mar miyo ochung'. 5 Ng'at achiel neno ni odiechieng' moro ler mohingo machielo; ng'at machielo to okaw odiechienge duto ni romre. Ng'ato ka ng'ato mondo obed gi ratiro e pache owuon. 6 Ng'at mokawo odiechieng' moro ni duong' moloyo machielo timo kamano mondo omi Ruoth duong'. Ng'at machamo ring'o bende chiemo kamiyo Ruoth duong', nikech ogoyo erokamano ne Nyasaye. Kamano bende, ng'at maok chiem be ok chiem kuom duong' mar Ruoth, kendo ogoyo erokamano ne Nyasaye. 7 Nimar onge ng'ato kuomwa ma ngimane en mare owuon, kendo onge ng'ato kuomwa matho ne en owuon. 8 Ka wangima to wangima ni Ruoth; kendo ka watho to bende watho ne Ruoth. 9 Ma emomiyo Kristo notho mochako odoko mangima kendo mondo obed Ruodh joma ngima gi joma otho duto kaachiel. 10 Koro ang'o momiyo in ing'ado bura ni nyawadu? Koso in ijaro nyawadu nang'o? Nimar wan duto wabiro chung' e nyim kom bura mar Nyasaye. 11 Nikech ondiki ni, "Kaka angima, Ruoth owacho, chonge duto nogona piny kendo lep duto nowuo kuom Nyasaye." 12 Omiyo ng'ato ka ng'ato kuomwa nodwok wach kuome owuon ne Nyasaye. 13 Kuom mano, waweuru ng'ado ne jowetewa bura. Kar timo kamano to temuru matek mondo kik ng'ato kuomu oket rachwany kata rageng' e yor nyawadgi. 14 Kaka ng'ama nie i Ruoth Yesu, ang'eyo malong'o ni onge chiemo maok ler kende owuon. To ka ng'ato okawo gimoro ni ok ler, to gino dok one maok ler ne en owuon. 15 Kapo ni gima ichamo miyo nyawadu hinyore, to mano nyiso ni iseweyo wuotho e hera. Kik iyie gima ichamo keth ng'at mane Kristo oth-one. 16 Omiyo kik iyie mondo gima ikawo ni ber, ji wuoe kaka gima rach. 17 Nimar pinyruodh Nyasaye ok en chiemo gi metho, to en ngima makare gi kuwe k>d mor ei Roho Maler, 18 nikech ng'ama tiyo ne Kristo e yo machal kama ema long'o ne Nyasaye, kendo ng'at ma kamano ema ji oyiego. 19 Kuom mano, watemuru matek mondo watim kuwe kod gik mwanyalo gerorego ng'ato gi ng'ato. 20 Kik iketh tich Nyasaye nikech wach chiemo. Chiemo duto ler, ok ber mondo ng'ato ocham gimoro amora mamiyo ng'at machielo podho. 21 Ok ber mondo icham ring'o kata imadh divai, kata itim gimoro amora machielo manyalo miyo nyawadu podhi. 22 Omiyo gimoro amora ma iyie e chunyi ni ber kuom wechegi keti obedni maling'ling' e kindi gi Nyasaye. En jahawi, jalno ma chunye ok ng'adne bura kuom gima oparo ni ber. 23 To ng'at machiemo ka nigi kiawa e chunye bura oloyo kapo ochiemo nikech ok ochiem kuom yie; to gik moko duto motim ka ok oa kuom yie en richo.

Jo-Rumi 15

1 Wan joma otegno onego wating' nyawo mar joma yomyom maok watimo mana gik mamorowa wan wawegi. 2 Ng'ato ka ng'ato kuomwa nyaka tim gik mamoro nyawadgi, ka en gi thorro maber mar gere. 3 Nimar kata Kristo bende ne ok otimo gik mamore en owuon, to mana kaka ondiki: "Ayany duto mag joma yanyi nolwar kuoma." 4 Nimar weche duto ma nondiki e ndalo machon, nondiki mondo opuonjwa, mondo kwachung' motegno kendo ka wajiwore gi Ndiko, to wanyalo bedo gi geno. 5 Mad Nyasaye mamiyo ji kinda kendo majiwo ji, omi ubed gi chuny achiel e kindu uwegi, kendo kuluwo Kristo Yesu, 6 mondo ka un gi chuny achiel kendo uwacho gi chuny achiel kamano to umi Nyasaye ma wuon Ruodhwa Yesu Kristo duong'. 7 Kuom mano, rwakuru joweteu mana kaka Kristo bende norwakou mondo eka Nyasaye oyud pak. 8 Nimar anyisou ni Kristo osedoko jatich Jo-Yahudi mondo ochop adiera mar Nyasaye, ma en mondo omi singruok mane omi kwerewa otimre, 9 kendo Ogendini omi Nyasaye duong' kuom kechne, mana kaka ondiki ni, "Emomiyo anapaki e kind Ogendini, kendo anawer wende mapako nyingi." 10 Owacho kendo ni "Moruru un Ogendini, kaachiel gi joge, " 11 Kendo ni; "Pakuru Ruoth un Ogendini duto, ee ji duto mondo owerne wende pak," 12 Isaya bende wacho ni: "Tiend yath maka Jesse nowuogi mondo otel ni Ogendini duto, en ema Ogendini nogen kuome." 13 Mad Nyasach geno opong'u gi mor kod kuwe mogundho ka ugeno kuome, mondo eka upong' gi geno motiak kuom teko mar Roho Maler.

Paulo Jatich E Kind Ogendini

14 Jowetena, ang'eyo chuth ni un joma chuth opong' gi ber gi ng'eyo kendo ng'ato ka ng'ato kuomu nyalo puonjo nyawadgi. 15 Kata kamano asendikonu kuom weche moko ka an gi chir mana mondo aparnugi, kendo kuom ng'wono ma Nyasaye omiya, 16 mar bedo Jatich Kristo Yesu e kind Ogendini, ka atiyo tich dolo mar lando Injili Maber mar Nyasaye mondo eka ogendini obed misango maler ma Nyasaye oyiego kendo ma Roho Maler opwodho. 17 Emomiyo ei Kristo Yesu anyalo sungora kuom tichna matiyo ni Nyasaye. 18 To ok anyal hedhora mar wacho gimoro amora, makmana gigo ma Kristo osetimo kotiyo koda kuom loko Ogendini mondo oluor Nyasaye, kuom wechena gi timbena, 19 kotiyo gi teko mar honni gi ranyisi kuom teko mar Roho Maler. Kamano aselworora e piny Jerusalem nyaka Iliriko, kalando Injili mar Kristo adimba. 20 Aseketo chunya mondo ayal Injili kuonde ma ji pok ong'eyje Kristo, mondo kik agedi e wi mise ma ng'at machielo ema nochako.2 !To mana kaka ondiki ni: "Jok mane pok onyis wach kuome none kendo jogo mapok owinjo kuome nowinj tiend wach." 22 Ma emomiyo asetemo dimang'eny mar biro iru to osetama.

Paulo Ochano Limo Rumi

23 To kaka koro onge kuonde modong' ma anyalo tiye e gwengegi, kendo nikech asebedo ka agombo nenou kuom higni mang'eny, 24 achano mar timo kamano kadhi Spania. Ageno mar limou ka abiro kadho gweng'u kanyo, mondo bang' bedo kodu moromo to ukonya e wuodhano. 25 Sani to pod an e wuodha adhi Jerusalem mondo adhi akony jo maler man kuno. 26 Nimar jo Makedonia gi jo Akaya osechi-wo kony gimor ne jomaler modhier man Jerusalem. 27 Ne gimor mar timo ma, to bende gisetimo mana gima owinjore gitim. Nimar owinjore mondo Ogendini, moseyudo lonyruok mar chuny mar jo-Yahudi opog negie mwandu mag pinyni. 28 Omiyo ka asechopo wuodhani, kendo ka aseneno ni giyudo olemoni to abiro dhi Spania, kendo ka akadho e wuodhano to naraw alimu. 29 Ang'eyo ni ka abiro iru to anabi ka apong' gi gweth mar Kristo. 30 Owetena, ajiwou kuom Ruodhwa Yesu Kristo, kendo kuom hera mar Roho, mondo uriwru koda e nyagruokna, kula-mona Nyasaye. 31 Lamnauru mondo Nyasaye oresa e lwet joma odagi yie man Judea, kendo mondo jo maler man Jerusalem orwak tich ma atimo e diergi, 32 mondo ka Nyasaye oyie to abi iru ka amor kendo mondo ka an kodu to uduog chunya, to an bende aduog chunyu. 33 Nyasach kuwe mondo obed kodu uduto. Amin!

Jo-Rumi 16

Mos Mag Ji Giwegi

1 Apwoyonu nyaminwa Fibi, ma en jatich e kanisa man Kenkrea. 2 Akwayou mondo urwake kuom Ruoth, kaka jomaler onego otim, kendo mondo umiye gimoro amora ma dodwar kuomu, nimar osebedo kokonyo ji mang'eny, nyaka an bende. 3 Mosnauru Priska gi Akula, ma jotich koda kaachiel e Kristo Yesu. 4 Ne giketo ngimagi e chandruok nikech an. Ok an kenda, to kanise duto mag Ogendini, bende pako timgino. 5 Kanisa machokore e odgi bende mosnau-ru. Mosnauru Epaineto, osiepna mageno, ma en ema nokuongo bedo ja- Kristo e piny Asia. 6 Mosnauru Maria, mosebedo katiyonwa matek ahinya e dieru. 7 Androniko kod Junias, ma wedena, kendo mane ni koda e jela, bende mosnauru. Ji ariyogi ochung' moyangore e kind Joote, kendo ne gikwongona yie kuom Kristo. 8 Mosnauru Ampliato ma jaherana kuom Ruoth. 9 Urbano, ma en jatich Kristo wadwa, kod Stakis ma osiepna mageno bende mosnauru. 10 Mosnauru Apele, ng'at mosetem moyud ni ja Kristo maradier. Jood Aristobulo bende mosnauru. nMosnauru watna ma Herodian, kod jood Narkiso, mohero Ruoth. 12 Mosnauru Turfena gi Turfosa, ma gin joma tiyo matek ne Ruoth; kod Per si, joherana mosetiyo matek ahinya ne Ruoth, bende mosnauru. 13 Mosnauru Rufus, ng'at ma Ruoth oyiero kod min-gi mosebedona kaka minwa an bende. 14 Mosnauru bende Asunkrito, Flegon, Herme, Patroba, Herma, kod Jowete duto man kodgi. 15 Filologo gi Julia gi Nerea kod nyamin mare; gi Olumpa kod jomaler duto man kodgi, be mosnauru. 16 Mosreuru, uduto ng'ato gi ng'ato, gi yogruok maler. Kanise duto mag Kristo omosou. 17 Ajiwou, owetena, mondo ung'i maber joma kelo pogruok, kendo keto chwanyruok e yoreu maok oluwore gi puonj museyudo. Wereuru kodgi. 18 Nimar joma kamago ok ti ne Kristo Ruodhwa, to gitiyo mana ne igi giwegi. Giwuoyo gi weche mayom ka giolo ji mondo giwuond chunje joma pachgi thany thany. 19 Ji duto osewinjo kaka uwinjo wach kendo mano omiyo chunya opong' gi mor kuomu, to adwaro mondo ubed mariek korka timo gima ber, kendo ubed maonge wach korka timo gima rach. -°Piyopiyo nono Nyasach kuwe biro toyo Satan e bwo tiendu. Mad ng'wono mar Ruodhwa Yesu Kristo obed kodu. 21 Timotheo, mwatiyogo kaachiel okowonu mos; Lukio gi Jason kod Sosipatro ma wedena bende jomosou. 22 An Tertio, ma jandiko mar baruwani, bende amosou kuom Ruoth. 23 Gayo, moserwaka e ode, kaachiel gi kanisa duto, omosou. Erasto, jakeno maduong' mar dalani, kod o wadwa Kwarto bende kowonu mos. 24 Mad ng'wono mar Ruodhwa Yesu Kristo obed kodu uduto. Amin. 25 Mad ne en manyalo miyo uchung motegno kaluwore gi Injili mara kod lando Yesu Kristo kendo kaluwore gi fweny mar gik mosepandi kuom higini mang'eny mosekalo, 26 to koro oseelgi kendo osemi ji ong'eyogi kaluwore gi Ndiko mag Jonabi, mana kaka Nyasaye mochwere nochiko, mondo Ogendini duto oyie kuome kendo owinj e. 27 Duong' obed ne Nyasaye achiel kende mariek nyaka chieng' kuom Yesu Kristo! Amin.