Revelation

Fweny Mane

Fweny Mane 1

Weche Motelo

1 Fweny ma Nyasaye nomiyo Yesu Kristo mondo onyisgo jotichne gigo manyaka timre mapiyo. Kristo nomiyo fwenyni ong'ere ka nooro malaikane mondo onyis Johana jatichne, 2 manyiso gik moko duto manoneno ma en wach Nyasaye kod weche duto mane Yesu Kristo owacho. 3 Nga'tno masomo weche mokorgi kendo gin johawi jogo mawinjo wachni kendo kano weche mondiki e chunye; nikech kinde chiegni.

Mos Kod Pak

4 An Johana ni kanise abiriyo manie piny Asia, Ng'wono kod kuwe moa kuom jamo mantie, mane nitie kendo mabiro betie, kendo moa kuom Roho abiriyo manie nyim kom duong'ne, 5 kendo moa kuom Yesu Kristo, ma janeno maradier maok lokre, jal mane okwongo chier oa kuom jomotho, jaloch mar ruodhi manie piny. Ne en moherowa kendo ogonyowa kuom richowa gi rembe, 6 mi omiyo wadoko oganda ruodhi, matiyone kaka jodolo mag Nyasache kendo Wuon mare -Duong' gi loch obedne manyaka chieng'! Amin. 7 Neuru, obiro gi boche polo, kendo wenge duto nonene koda jogo mane ogure kendo Ogendini duto manie piny noywagre nikech en. Mano e kaka enobed! Amin. 8 Ruoth Nyasaye wacho niya, "An e Chakruok kendo Giko," "Jal mantie, Jal mane nitie kendo mabiro betie, Jal Manyalo Gik Moko Duto."

Ng'at Machalo Gi Wuod Dhano

9 An Johana ma owadu, kendo ma achiel kodu e sand gi Pinyruoth kod dhil e kinda marwa kuom Yesu, ne an e chula mar Fatimo nikech wach Nyasaye, kendo wuoyo katimo neno e lela kuom Yesu. 10 E odiechieng Ruoth, Roho nopong'a kendo ne awinjo duol maduong' maywak ka tung' e yo ka ng'eya. nKowacho niya: 11 "Ndik gik moko duto mineno e kitabu kendo orgi ne kanise abiriyogi: Efeso, gi Smurna, gi Pergamo, gi Thiatiro, Sarde gi Filadelfia kod Laodikia." 12 Eka nalokora mondo ane ni en ng'ano mane loso koda: Kane alokora naneno Rachungi teyini abiriyo mag dha-habu, 13 to e dier rachung teynigo ne nitie ng'ato machalo gi wuod dhano" mor-wakore gi kandhu mochopo nyakae tiende piny, Kendo kotueyo kore gi kamba mar dhahabu. 14 Wiye kod yie wiye ne rachar ka yie rombo, Kendo rachar ka pe, to wen-gene ne chalo gi mach makakni. 15 To tien-dene ne pakni ka muia mopuodhi gi mach; dwonde to ne mor ka pi mopong' mawuo. 16 E lwete korachwich noting'o sulwe abiriyo, kendo ligangla mabith ma dhoge ariyo newuok e dhoge. To lend wang'e ne rieny ka chieng' marieny mang'ang'ni. 17 Kane anene, napodho e tiende ka ng'at motho. Eka noyieyo lwete ma korachwich kuoma mowachona niya, "Kik iluor. An e Jal Mokuongo kendo Mogik. 18 An e Jal Mangima; Ne atho, to koro angi-ma nyaka chieng'! An-gi kifungu mag Tho kod mag piny joma otho. 19 Emomiyo, ndik gigo miseneno, gigo mantie kod gigo mabiro timore e kindego machien. 20 Tiend wach mopandi mar sulwe abiriyo mane ineno e lweta ma korachwich, kod rachung teyni abiriyogo mag dhahabu e mani: Sulwe abiriyogo e malaike mag kanise abiriyo, to rachung teyini abiriyo gin e kanise abiriyogo.

Fweny Mane 2

Ne Kanisa Man Efeso

1 Ne malaika morito Efeso ndikne: Magi e weche jalo moting'o sulwe abiriyo e lwete korachwich kendo mawuotho e kind rachung teyni abiriyo mag dhahabu: 2 Ang'eyo timbegi, tij i matek, kod kindani. Ang'eyo ni isetiyo matek kendo isetimo kinda. Ang'eyo ni ok iwinjri gi joma richo. Ang'eyo ni isetemo joma luongore ni joote, to ok gin joote, ma iyudo ni gin jomiriambo. 3 Isetimo kinda kendo isebedo gi horuok e tembe nikech nyinga to ok iseol. 4 To kata kamano an kod wach achiel maok kare kuomi, iseweyo herani mokuongo. 5 Omiyo par kuma iae kipodho! Lokri mondo itim gik mane itimo mokuongo. To ka ok ilokori to abiro biro mi agol rachung-tachi kare. 6 To kata kamano nitie tim maber mapuoyigo en ni isin gi timbe jo Nikolao ma an bende asin- 7 Ng'at man gi it mondo owinj gima Roho wacho ni kanise. Ng'a molocho anami ratiro mar chamo olemb yadh ngima man e paradiso mar Nyasaye.

Ne Kanisa Man Smurna

8 Ne malaika morito kanisa man Smurna ndikne: Magi e weche mag Jal Mokuongo kendo Mogik, Jal mane otho kendo ochako obet mangima. 9 Ang'eyo chandruok miyudo kod dhier mari - Chutho to in jamoko. Bende ang'eyo ayany majoma wuondore ni jo-Yahudi yanyigo to chutho mana oganda malamo Satan. 10 Kik iluor kuom sand ma ibiro yudo machiegni. Adier, anyisou ni Jachien biro tweyo jomoko kuomu e jela mondo otemugo kendo ubiro yudo sandruok kuom ndalo apar. Bed Jadiera nyaka kar tho to abiro miyi osimbo mar ngima. 11 Ng'at man-gi it mondo owinj gima Roho wacho ni kanise. Ng'a molocho to tho mar ariyo ok notime gimoro kata matin.

Ne Kanisa Man Pergamo

12 Kuom malaika morito kanisa man Pergamo ndikne: Magi e weche Jalo man-gi ligangla mabith ma dhoge ariyo: 13 Ang'eyo kama idakie, kama kom duong' mar Satan nitie to kata kamano isebedo kirito nyinga. Bende ne ok ikwedo yie miyiego kuoma, kata mana e kinde mane Antipa janenona maradier mane onegi e dalau kama Satan odakie. 14 To kata kamano an kod weche matin kuomi: In kod jomoko kanyo maluwo puonj mar Balaam mane opuonjo Balak kaka onyalo ywayo jo-Israel mondo otim richo ka gichamo chiemo motimgo misango ni nyiseche manono kendo kuom richo mar chode. 15 To bende in kod jomoko maluwo puonj mag jo-Nikolao. 16 Emomiyo lok chunyi gi pachi! Nikech ka ok ilokori to abiro biro mapiyo mondo aked kodgi gi ligangla mawuok e dhoga. 17 Ng'at man-gi it mondo owinj gima Roho wacho ni kanise. Ng'a molocho abiro miyo manna moko mopandi. Bende abiro miye kidi marachar mondikie nying' manyien maonge ng'ama ong'eyo makmana ng'at monwang'e.

Ne Kanisa Man Thiatira

18 Ne malaika morito kanisa man Thiatira ndikne: Magi e weche mag Wuod Nyasaye ma wengene chalo gi mach makakni to tien-dene chai ka muia mapakni. 19 Ang'eyo timbeni, herani kod yie mari, tij i mar konyo ji, kod kindani. Kendo imedo tiyo maber moloyo kaka nitiyo mokuongo. 20 Kata kamano, an kodi gi wach moro maok ber kuomi, iyie gi dhako miluongo ni Jezebel maluongore ni janabi madhako. Owuondo jotichna kuom puonjne mondo otim chode kendo chamo chiemo motimgo misango ni nyiseche manono. 21 Ne amiye kinde mondo olokre owe timo richo kod chode to notamore. 22 Omiyo abiro bole e kitanda mar thagruok bende abiro miyo joma terore kode biro yudo thagruok malich ka ok giyie loko chunygi mi giweyo yorene. 23 Nyithinde bende abiro nego mi kanise biro ng'eyo ni An ema ang'eyo chunje gi paro mag ji kendo ni anapog ng'ato ka ng'ato kaka tichne chalo. 24 Koro awuoyo gi joma moko modong' man Thiatira ne un maok umako puonjne kendo maok usepuonjoru puonj Satan miluongo ni maling' ling' maiye. Ok abi miyou ting' moro amora 25 makmana any-isou ni makuru gima un-go nyaka abi. 26 To jal molocho kendo otimo dwarona nyaka giko, abiro miyo teko mar locho kuom ogendini. 27 Jal molochono noti tich loch gi odunga mar nyinyo, kendo noto ogendini matindo tindo ka ng'ama toyo agulu,' mana kaka Wuora osemiya teko mar loch. 28 Abiro miye sulwe mar okinyi. 29 Ng'at man-gi it mondo owinj gima Roho wacho ni kanise.

Fweny Mane 3

Ne Kanisa Man Sarde

1 Ne malaika morito kanisa man Sarde ndikne: Magi e weche mag jalo moting'o Roho abiriyo mag Nyasaye kod sulwe abiriyo. Ang'eyo tichni; kendo kaka igenoni in gi nying ni ingima to adiera isetho. 2 Omiyo chiew! Jiw gima pod odong'no kendo chiegni tho, nimar timbeni ayudo korem e nyim Nyasaye. 3 Emomiyo par gik mane iseyudo kendo isewinjo, makgi, kendo lokri. Ka ok ichiew to abiro biro apoya ka-jakuo maok ibi ng'eyo saa ma anabiye iri. 4 Kata kamano nitie jomoko manok e Sarde maok osechido lepgi. Gin to gini wuothi koda ka girwakore gi lewni marachere nikech gin joma owinjore. 5 Ng'ama olocho bende norwakre gi lewni marachere kaka gin, bende ok naruch nyinge e kitap ngima, to abiro hulo nyinge e nyim Wuora gi malaikene. 6 Ng'at man-gi it mondo owinj gima Roho wacho ni kanise.

Ne Kanisa Man Filadelfia

7 Ne Malaika morito kanisa man Filadelfia ndikne: Magi e weche mag jamo maler kendo jaadier, moting'o kifungu mar Daudi. Gima oyawo to onge ng'ama nyalo loro; kendo gima oloro to onge ng'ama nyalo yawo. 8 Ang'eyo timbeni. Omiyo ase yawoni dhoot kendo onge ng'ama nyalo lore. Ang'eyo ni in-gi teko matin to kata kamano iserito wachna kendo ok ise kweda. 9 Abiro miyo jogo malamo Satan, maluongore ni ok gin Jo-Yahudi kata obedo ni gin to giriambo ariamba. Abiro chunogi mondo gibi kendo gipodhi e tien-du mondo ging'e ni aherou. 10 Nikech iserito chikna ka ihoyori kuom tembe, abiro riti maber e kinde mar masira mabiro yudo piny ngima mondo otem ji modak e piny. 11 Abiro piyo. Omiyo mak gino main-go matek mondo kik ng'ato mayi osimboni. 12 Jal molocho anami obed siro e Hekalu mar Nyasacha. Ok nochak owuog kanyo nyaka chieng'. Abiro ndiko kuome nying Nyasacha kod nying dala mar Nyasacha ma en Jerusalem manyien, mabiro aa e polo kuom Nyasacha kendo abiro ndiko kuome nyinga manyien. 13 Ng'at man-gi it mondo owinj gima Roho wacho ni kanise.

Ne Kanisa Man Laudikia

14 Ne Malaika morito kanisa man Laudikia ndikne: Magi e weche moa kuom jal miluongo ni Amin ma jaadiera kendo janeno ma jaratiro, jalno ma jaloch kuom chuech duto mag Nyasaye. 15 Ang'eyo timbeni, ni ok ing'ich bende ok iliet. Dine berna kibedo kiliet kata ka ing'ich! 16 To nikech koro indhemndhem: ok iliet kata ok ing'ich, achiegni ng'ogi oko. 17 Iwacho ni, 'an jamoko, kendo aseyudo mwandu mathoth bende onge gima aremo to ok ing'eyo ni in ng'at mathagore mogik; idhi-er, in ng'at monego okechi; bende in muofu kendo in duk. 18 To ang'adoni rieko mondo ibi ing'iew kuoma dhahabu mop-uodhi gi mach mondo ibed jamoko. Ng'iew lewni marachere kuoma mondo irwaki oumni dugi. Ng'iew yath kuoma mondo ithiedh go wang'i mondo inen. 19 Joma ahero ema akwero kendo akumo. Omiyo bed jadiera kendo ilok chunyi iwe timo richo. 20 Ne! achung' e dhoot kendo aduong'o, ka ng'ato ang'ata owinj o duonda mi oyawona dhoot to abiro donjo ire mi achiem kode to en bende ochiem koda. 21 Ng'ama olocho nami thuolo mar bedo koda e kom duong'na mana kaka an bende kane aselocho ne abedo gi wuora e kom duong'ne 22 Ng'at man-gi it mondo owinj gima Roho wacho ni kanise.

Fweny Mane 4

Kom Duong' Man E Polo

1 Bang'e ne ang'icho mi aneno dhoot moyaw e polo. To duol machalo gi tung' mane ase winjo mokuongo kawuoyo koda nowachoni, "Bi malo ka mondo any-isi gik mabiro timore bang'e". 2 Gi e sano ne Roho Opong'a mi aneno kom duong' e polo ka ng'ato obetie. 3 Ng'ama ne obetie komno ne kite nenore ka kite manengogi tek miluongo ni Jasper gi Sardus. Ndanya mar koth machalo Zumaridi ne oluoro kom duong'no koni gi koni. 4 Kom duong'no ne oluor gi kombe moko piero ariyo gi ang'wen ma jodongo piero ariyo gang'wen obedoe. Ne girwakore gi lewni marachere to e wigi ne girwake osimbo mar dhahabu. 5 Koa e kom duong'no, polo ne mil, kendo moor kendo riadore. E nyim kom duong'no ne nitie teyni abiriyo maliel. Magi e roho e abiriyo mag Nyasaye. 6 Bende e nyim komno ne nitie gimoro manenore ka nam ma rangine chalo gi glas to orieny ka pi. E dier komno tir kod alworane ne nitie gik moko ang'wen mangima man-gi wenge mang'eny yo ka nyimgi kod yoka dier ng'egi. 7 Gima ngima mokuongo ne chalo gi sibuor, mar ariyo ne chalo gi ruadh bwoch, mar adek ne lend wang'e chalo gi mar dhano to mar ang'wen ne chalo gi ongo mafuyo. 8 Moro ka moro kuom gik mangimago ne nigi buombe auchiel kendo ne gin gi wenge mathoth moluoro dendgi nyaka e buo buombegi. Odiechieng' gi otieno duto ne gi siko ka giwacho ni, "Maler, maler en Ruoth Nyasaye Manyalo Gik Moko Duto. En mane nitie to bende entie kawuono, to pod obiro betie." 9 E seche duto ka gik mangima-go ne chiwo pak, gi puoch kod erokamano ne Jal mane obedo e kom duong' kendo mangima nyaka chieng'; 10 Jodongo piero ariyo gang'wen-go to ne podho e nyim ng'at mobet e kom duong' ka gilamo jal mangima nyaka chieng'. Ne gibolo osimbo mag-gi e nyim kom duong' ka giwacho niya: 11 "Aa Ruodhwa kendo Nyasachwa iwinjori yudo duong' gi pak kod teko, nimar ichweyo gik moko duto, kendo kuom dwaroni ne ochwe gi kendo gibedo mangima."

Fweny Mane 5

Kitabu Kod Nyarombo

1 Eka ne aneno kitabu majal mane obet oting'o e lwete ma korachwich, kitabuno ne ondiki koni gi koni kendo ne odine gi kido abiriyo motweye. 2 Eka ne aneno malaika maratego ka penjo gi duol maduong' niya: "Ere ng'ama owinjore gonyo kidogi mondo kitabuni?" 3 To ne ok oyudi ng'ato ang'ata e polo kata e piny mane nyalo elo kitabuno, kata mane nyalo rango iye. 4 Kuom mano ne aywak malit nikech ne onge ng'ama nyalo elo kitabuno mondo onyiswa gima ondiki e iye. 5 To achiel kuom Jodongogo nowachona ni, "We ywak! Ne, Sibuor moa e dhood Juda ma Nyakwar Daudi oselocho kendo en ema, owinjore yawo kitabu modin gi kido abiriyogo." 6 Eka ne aneno Nyarombo machalo ka gima ne osenegi kochungo e dier kom duong' kolwore gi gik mangima ang'wen kod jodongo. Ne en gi tunge abiriyo gi wenge abiriyo mochung' kar Roho abiriyo mag Nyasaye moseor e piny mangima. 7 Nobiro mi okawo kitabuno e lwedo korachwich mar jamo manobedo e kom duong'. 8 E saa mane okawoe kitabuno gik mangima ang'wenka gi Jodongo Piero ariyo gang'wen-go ne opodho auma e nyim Nyarombo. Moro ka moro ne nigi thum kod tewni mag dhahabu ma ubani opong'o, magin lemo mag jo-maler. 9 Kendo ne giwero wer manyien miwero ni: "In ema iwinjori kawo kitabuni, kendo g)nyo kido molorego nikech in ema nonegi kendo rembi ne ing'iewogo ji ni Nyasaye, ji moa e dhoudi duto, kendo mawacho dhok duto gi ji duto kod pinje duto. 10 Isemiyo gibedo oganda joka ruoth kendo jodolo mondo gitine Nyasachwa, kendo ginibed joloch e piny." 11 Eka ne ang'icho, kendo nawinjo dwond malaike mang'eny makwan-gi ne romo gana gi gana, tara gi gana kuom tara gi gana. Ne gilworo kom duong' kaachiel gi gik mangimago kod Jodongo. 12 Ne giwer gi dwol maduong' kama: "Duong' odokne Nyarombo manonegi, mondo oyud loch gi mwandu, gi rieko gi luor gi duong' kod pak." 13 Eka nawinjo ka gik mangima duto manie polo kendo e piny kod e bwo piny kendo e nam, kendo gigo duto mochwe modak e igi, kawer niya: "Ne en mobet e kom duong' to gi Nyarombo, Pak gi luor, duong' kod loch obedne manyaka chieng'!" 14 Kendo gik mangima ang'wen-go nowacho niya "Amin" eka jodongogo nopodho piny mi gidende.

Fweny Mane 6

Kido

1 Eka naneno Nyarombo ka elo achiel kuom kido abiriyogo. Eka nawinjo duond achiel kuom gik mangima ang'wen-go kaluongo gi duol machalo ka mor polo, kawacho, "Bi!" 2 Ne ang'icho mi aneno e nyima faras marachar. Ng'ama oidhe ne oting'o atung', kendo ne osidhne osimbo, ne owuok gi farase ka jaloch madhi mondo olochi. 3 Kane Nyarombo ne oyawo kido mar ariyo. Ne awinjo gima ng'ima mar ariyo kaluongo ni bi! 4 Eka faras machielo ma sifwal nobiro, ng'ama noidhe ne omi teko mondo ogol kwe e piny, mondo ji ochinjre kendgi. Ng'atno ne omi ligangla maduong! 5 Kane Nyarombo oyawo kido mar adek, ne awinjo gima ngima mar adek kawacho ni, bi. Ne ang'icho to e nyima kanyo ne nitiere faras marateng'! Ng'amo oidhe ne oting'o ratil e luete 6 Ne awinjo gima chalo gi duol e dier gik mangima angwen-go kawacho ni, "Koro gorogoro mar ngano ibiro ng'iew gi nengo maromre gi chudo michulo jatich e odiechieng' achiel kendo nengo mar thowe gorogoro adek bende chai gi mar ngano, to nengo mo gi divai kik medi." 7 Ka Nyarombo noyawo kido mar ang'wen, nawinjo duond gima ngima mar ang'wen kaluongo ni, "Bi!" 8 Nang'icho to naneno faras ma rabuor e nyima! Ng'at mane oidhe niluongoni Tho, to Kar Jo motho ne luwo bang'e machiegni. Ne omigi teko kuom bath piny moromo achiel kuom angw'en mondo gineg gi ligangla kod kech gi dera kod le maricho mag bungu. 9 Kane oyawo kido mar abich, naneno e bwo kendo mar misango chunje jomoko mane osenegi nikech Wach Nyasaye, kendo nikech neno mane gisiko gihulo. 10 Eka negi ywak gi dwol maduong' niya, "Nyaka karang'o, Yaye Ruoth Maratego, Maler kendo Maradier, ma ibiro ng'ado bura ni joma odak e piny. Ka ichulo kuor kuom rembwa?" 11 To nomigi kandho marachar ng'ato ka ng'ato, kendo nowach-nigi ni mondo girit kuom kinde matin moromo, nyaka kwan mar jotich wetegi, kod jowetegi mibiro nego kaka gin, orom. 12 Ne ang'icho kane oyawo kido mar auchiel. Piny noyiengni matek. Mi chieng' nolokore marateng' ti, machal gi ogunia mirwako e kuyo molos gi yie diel, due bende nolokore makwar ka remo; 13 kendo sulwe manie polo nolwar e piny mana kaka olemo machien mag ng'owu lwar koa kuom yadhe ka yamo mager kudho mauko yath. 14 Polo nolal nono ka kalatas mibano kendo gode duto gi chulni duto nogol oa kuonde mane gintie. 15 Eka ruodhi mag piny, gi ji madongo, kod jotelo mag lweny, gi jo mwandu, kod jomaroteke, kaachiel gi ji duto ma wasumbini, gi joma ni thuolo, giduto ne gipondo e rogo kendo e bwo lwendni mag gode. 16 Negilwongo kagi-wacho ni gode gi lwendinigo ni, "Podhuru kuomwa mondo uumwa kupandowa ni wang' Jal mobet e kom duong'no, kendo ne mirimb Nyarombo! 17 Nikech chieng' maduong' mitoyo negi mirima osechopo, to en ng'ama nyalo chung' mondo osire.

Fweny Mane 7

Ji 144,000 Moyier

1 Bang'e ne aneno malaike ang'wen kochung' e tunge ang'wen mag piny, ka gimako yembe ang'wen mag piny, mondo gigeng' yamo kik kudhi e piny kata e nam kata e yath moro amora. 2 Eka naneno malaika machielo kalor koa obiro piny kowuok e yor wuok chieng', koting'o kido mar Nyasaye mangima. Noluongo gi duol maduong' malaike ang'wen mane osemi teko mondo ohiny piny kod nam. 3 Nowacho nigi, "Kik uhiny piny, kata nam, kata yiende nyaka chop waket kido e lend wang'jotich Nyasachwa." 4 Bang'e nawinjo kar kwan joma ne oketnigi kido ne gin ji 144,000 mowuok e dhout Israel duto, 5 Koa e dhood Juda nowal ji 12,000, koa e dhood Ruben ji 12,000, Koa e dhood Gad ji 12,000, 6 Koa e dhood Manase ji 12,000, Koa dhood Naftali ji 12,000, Koa dhood Manase ji 12,000, 7 Koa dhood Simeon ji 12,000, Koa dhood Lawi ji 12,000, Koa dhood Isakar ji 12,000, 8 Koa dhood Zebulunji 12,000, Koa dhood Josef ji 12,000, kendo dhood Benjamin ji 12,000.

Oganda Maduong' Morwakore Gi Kandho Marachere

9 Bang' mani ne ang'icho, mi naneno oganda mar ji mang'eny ma ok kwanre moa e pinje duto gi dhoudi kod ogendini kod dhok duto kochungo e nyim kom duong', kendo e nyim Nyarombo. Ne gir-wako kandhe marachere kendo giting'o othidhe e lwetgi. 10 Kendo negiywak gid-uol maduong' ka giwacho niya: "Warruok en mar Nyasachwa mobedo e kom duong' mar loch kendo ne Nyarombo." 11 Malaike duto nochung' kolworo lom duong' kendo kolworo jodongo kod gik mangima ang'wen. Ne gikulore piny e nyim kom duong' mi negi dendo Nyasaye. 12 Ka giwacho niya, "Amin! Pak gi duong' kod rieko gi erokamano gi luor kod teko gi nyalo obedni Nyasachwa, nyaka chieng'. Amin! 13 Eka achiel kuom jodongogo nopenja niya, "Jogi morwakore gi lewni marachere gin ng'a gini, to bende gia kanye?" 14 An to nadwoke ni, "Jaduong' in e ma ing'eyo, an akiya." Eka nowacho ni, "Jogi e joma owuok koa e sand mager; giselwoko kandhe gi matar gi remb Nyarombo. 15 Ma, "emomiyo koro gin e nyim kom duong' mar Nyasaye, ka gitiyone odiechieng' gi otieno ei Hekalune; to Jalno mobet e kom duong' noumgi korieyo hema mare kuomgi. 16 Kech ok nokagi ngang' kendo; kata riyo ok nomak gi kendo. Chieng' ok norieny kuomgi kata liet moro mager ok nowang'gi. 17 Nimar Nyarombo mobedo e kom loch mar Nyasaye nobed jakwadhgi; notelnigi koterogi e sokni mag pi ngima. To Nyasaye noywe pi wang' gi duto."

Fweny Mane 8

Alama Mar Abiriyo Gi Tap Wang'o Ubani Molos Gi Dhahabu

1 Kane oyawo kido mar abiriyo, polo noling' thi kuom kinde ma dirom nus saa. 2 Eka naneno malaike abiriyo mochun-go e nyim Nyasaye, kendo nomigi tunge abiriyo. 3 Malaika moro machielo, nobiro mochungo but kendo mar misango, lot-ing'o tap ubani mar dhahabu. Nomiye ubani mang'eny mondo ochiw, magin jomaler duto e wi kendo mar misango molos gi dhahabu manie nyim kom duong'. 4 Iro mar ubani moting'o lemo mag jomaler nodum kadhi malo e nyim Nyasaye koa e lwet malaika. 5 Bang'e malaika nokawo tap ubani, mi opong'e gi mach moa e kendo mar misango, eka nobole e piny. Bang' mano polo noriadore matek, kendo omoor komil malich, kendo piny noyiengini.

Turumbeta

6 Eka malaike abiriyo mane nigi turumbeta abiriyogo ne oikore goyo turumbeta-go. 7 Malaika mokwongo nogoyo turumbe-tane, to pe gi mach mokikore gi remo e manowuok, kendo nowitgi e piny. To bath piny moromo achiel kuom adek nowang', yien bende marom kamano nowang' gi lum mang'ich duto nowang'. 8 Malaika mar ariyo nogoyo turumbe-tane, mi gima chalo got maduong', ma liel gi mach, nowiti e nam. To bath nam moromo achiel kuom adek nolokore remo, 9 momiyo achiel kuom adek mar gik mangima manie nam notho, kendo achiel kuom adek mar yiedhi manie nam nokethi. 10 Eka malaika mar adek nogoyo turumbetane mi sulwe maduong' maliel ka toch nolwar oa e polo, nolwar kuom achiel mar adek mag aore, kendo kuom sokni duto. 11 Nying sulweno en, "Gima Kech," kamano bende achiel kuom adek mar pi nolokore makech, kendo pige makechgo nomiyo ji mang'eny notho. 12 Kendo malaika mar ang'wen nogoyo turumbetane, mi achiel kuom adek mar chieng' gi achiel kuom adek mar due, kod mar sulwe bende, notimo mudho, to achiel kuom adek mar odiechieng' gi otieno notimo mudho. 13 Bang'e nang'icho mi awinjo ongo mahuyo e kor polo kaywak matek niya, "Lit! Lit! Lit ni joma odak e piny, nikech turumbeta modong' ma malaike adek biro goyo.

Fweny Mane 9

1 Eka malaika mar abich nogoyo turumbeta, mi naneno sulwe moro mane oselwar e piny koa e polo. Sulweno ne omi kifungu mar Bur matut Maonge gikone. 2 Kane oyawo Burno, yiro nowuokie machalo gi ich mach maduong'. Yirono moa e burno noimo chieng' kod boche polo molokore marateng'. 3 Kendo bonyo nowuok e yirono mopiyo e piny, to nomigi teko machalo gi teko thomoni manie piny. 4 To nokwergi ni kik giketh lum manie piny kata gimoro mang'ich kata yien, to ginyalo mana hinyo jogo maonge gi kido mar Nyasage e lenda wengegi. 5 Ne ok omigi teko mar negogi to nomigi thuolo mar sandogi kuom dweche abich. To rem mane jogo oyudo ne chalgi mano miyudo ka thomoni okayo dhano. 6 E ndalogo ji nodwar tho, to ok giniyude; ginigomb mondo githo to tho noring-gi. 7 Bonyogo ne chalo gi farese moikore ni lweny E wigi negirwako gik machalo gi osimbo mag dhahabu, to lend wang'gi ne chalo gi lend wang' dhano. 8 Yie wigi ne chalo gi yie wi mon, kendo lekegi ne chalo gi leke sibuoche. 9 Ne girwako gilweny mag akor machalo gi akor mar nyinyo, to buombegi ne goyo koko mana ka farese mang'eny kendo ka geche miywayo kad-hiyo e lweny 10 Negin gi yiwgi makecho kaka thomoni kecho, to e yiwgigo negin gi teko mar sando kagikayogo ji kuom dueye abich. 11 Ruodh-gi motelo nigi en malaika mar Bur Matut Maonge gikone manyinge miluongego gi dho Hibrania en Abadon, to gi dho Grik en Apolion. 12 Masira mokwongo osekadho, to masiche ariyo mamoko pod biro. 13 Bang' mano malaika mar auchiel nogoyo turumbetane, mi nawinjo dwol moa e tunge mag kendo mar misango mar dhahabu manie nyim Nyasaye. 14 Eka duolno nowacho ni malaika mar auchiel man gi turumbeta niya, "Gony malaike ang'wen motue gibed thuolo gia e aora maduong' mar Yufrate." 15 To nogony malaike ang'wen-go mane oseiki ni saa-no gi odiechiengno kod dueno gi higano, mondo gineg achiel kuom adek mar ji duto. 16 Kwan mar jolweny moidho farese ne oromo tara mia ariyo. Ne awinjo kar kwan-gi. 17 To farese gi joithgi mane aneno e fwenynano ne chalo kama: joma noidhogi norwako akor mag nyinyo makwar kamach, kendo mambulu molil, kod ratong' gweno. Wi faresego ne chalo gi wi sibuoche, to mach gi yiro kod pilni mach ne wuok e dhogi. 18 Masiche adekgo mag mach, yiro kod pilni mag mach manewuok e dho faresego nonego achiel kuom adek mar kwan ji duto. 19 Teko mane faresego nigo ne nie dhogi kendo e iwgi nikech iwgi ne chalo gi thuonde, man gi wiye ma gike-chogo ka gihinyogo ji. 20 To joma odong' mane masichego ok onego, pod ne ok oloko chunygi oa kuom gik mane giloso kendo gichueyo gi lwetgi; kendo ok giweyo lamo jochiende gi nyiseche manono molos gi dhahabu gi fedha kod muia gi kidi kod bao, ma gin gik maok nen kata winj wach, kata wuotho. 21 Bende ne ok giloko chunygi ka giweyo nek, kata timbe juok kata terruok kata kuo mane gibedo ka gitimo.

Fweny Mane 10

Malaika Gi Kitabu Matin

1 Eka naneno malaika machielo maratego, kabiro kolor oa e polo. Ne orwakore gi boch polo ka ndanya oumo wiye; wang'e nechal gi chieng', kendo tiendene ne chalo gi sirni makakni ka mach. 2 Ne oting'o kitabu matin moel e lwete. Nonyono nam gitiende korachwich, to tiende ma koracham nonyonogo piny, 3 kendo nokok gi dwol maduong' machalo ka sibuor maruto. Bang' losekok kamano to duonde mor polo abiriyo nowuoyo. 4 To kane mor polo abiriyogo osewuoyo kamano, ne adwaro ndiko gima giwacho, eka nawinjo dwol moro moa e polo mawa-chona niya, "Kik indik gima polo abiriyogo osewacho to ling'go ei chunyi." 5 Eka malaika mane aneno konyono nam kod piny cha noting'o bade korachwich kochomo polo. 6 Kendo nokuong'ore gi nying' Jal mangima nyaka chieng', jal manochueyo polo gi gigo duto manie iye, gi piny gi gik moko duto manie iye, kod nam gi gik moko duto manie iye kowacho niya, "Deko moro ok nochak obedie ngang'! 7 To e ndalono, ma malaika mar abiriyono nogo turumbetane, eka wach mopondo mar Nyasaye nochopi, mana kaka nonyiso jotichne ma jonabi." 8 Bang' mano dwol mane awinjo ka wuoyo koa e polo cha ne ochako wuoyo koda kendo kowacho niya: "Dhiyo, ikaw kitabu moel manie lwet malaika monyono nam kod piny." 9 Omiyo ne adhiyo ir malaikano, kendo makwaye mondo omiya kitabu matinno. To nowachona ni, "Kawe, mondo ichame. Obiro bedo makech e iyi, to e dhogi nobed mamit ka mor kich." 10 Eka nakawo kitabu matinno manie lwet malaikano, mi achame, ne omit e dhoga ka mor kich to kane asechame nobedo makech e iya. 11 Bang'e ne owachna kendo niya, "Nyaka ichak ikor wach kuom ogendini mang'eny, gi pinje kod dhok ma ji wacho gi ruodhi."

Fweny Mane 11

Joneno Ariyo

1 Eka nomiya modi machalo gi luth mar pimo; kendo nowachna niya, "Aa malo idhiyo ipim Hekalu mar Nyasaye kod kendo mar misango, kendo ikwan joma lemo kanyono! 2 To iwe laru maoko manie nyim Hekalu kik ipime, nikech osemiye Ogendini, kendo gibiro nyone gi tiendegi kagiketho Dala Maler kuom dueye piero ang'wen gariyo. 3 To abiro miyo jonenona ariyo morwakore gi gunia teko, kendo ginihul wach Nyasaye kuom ndalo alufu achiel gi mia ariyo kod piero auchiel. 4 Magi gin e yiende ariyo mag Zeituni, kod rachung teyni ariyo mochung' e nyim kom Ruodh piny. 5 Ka ng'ato moro amora dwaro hinyogi, to mach wuok e dhogi matieko wasikgi. Mano e kaka ng'ato moro amora mad-waro hinyogi notho. 6 Jogi nigi teko mar loro polo mondo koth kik chue e ndalo ma gihuloe wach. To bende gin gi teko mar loko pi obed remo kendo kelo tuoche yembe mopogore opogore e piny e kinde mora amora magidwaro. 7 To ka gisetieko hulo wach gi, ondiek mawuok Bur Matut maonge gikone noked kodgi, mi nologi kendo negogi. 8 Ringregi noriere koriyo e yo mar dala maduong'no, ma iluongo gi ngero Sodom kod Misri, dalano e kama nogurie Ruodhgi. 9 To ji moa e ogendini duto gi dhoudi, kod dhok duto ma ji wacho gi pinje duto, norang ringregi kuom ndalo adek gi nus, kendo ok giniyie mondo oyik-gi. 10 Ji duto modak e piny nogo siboi kuom thogi, ka gimor kendo gimiyore chiwo, nikech jonabi ariyogo nosebedo kasando ji modak e piny. 11 To bang' ndalo adek gi nus much ngima mar Nyasaye nodonjo e igi, mi ne gichung' gi tiendegi, kendo luoro maduong' nomako joma ne onenogi. 12 Bang' mano negiwinjo dwol maduong' koa e polo kawachonigi niya, "Biuru malo ka!" Mi ne gidhiyo e polo malo ei bor polo moumogi, ka wasikgi nenogi. 13 Gi e saa nogo piny noyiengni matek, mi bath dalano achiel kuom apar nomuko-re mogore piny, kendo ji alufu abiriyo notho e yiengni mar pinyno to joma nodong' nobwok malich, kendo negimiyo Nyasach Polo duong'! 14 Masira mar ariyo osekadho, neuru, masirano mar adek biro biro piyo.

Turumbeta Mar Abiriyo

15 Eka malaika mar abiriyo nogoyo turumbetane, to dwonde moko nokok matek ei polo, kagiwacho niya: "Loch mar pinyni koro osedoko mar Ruodhwa kendo mar Kristo, kendo enolochi nyaka chieng'." 16 To jodongogo piero ariyo gang'wen mane obedo e kombegi mag duong' e nyim Nyasaye, nokulore piny auma kendo ne gidendo Nyasaye, 17 Ka giwacho niya: "Wagoyoni erokamano, aa Ruoth Nyasaye Manyalo Gik Moko Duto! In Mantie, kendo mane nitie, nikech isekawo teko mari maduong', mi koro ichako locho. 18 Nyiego nomako pinje mag ogendini, to koro mirimbi osechopo. Kinde osechopo mar ng'ado bura neorno tho, kendo chiwo mich ni jotichni ma jonabi, gi jogi maler kod jogo moluoro nyingi, jomatindo gi jomadongo. Kendo tieko jogo maketho piny." 19 Eka Hekalu mar Nyasaye noyaw e polo, kendo Sandug Muma nonenore ei Hekalu; to mil polo marieny mager gi riadruok, koko kod mor polo gi yiengni mar piny nobetie kod pe nochue mang'eny.

Fweny Mane 12

Dhako Kod Thuol Malich

1 Bang' mano ranyisi malich nonenore ei polo: ne en dhako morwakore gi chieng', to due onyono e tiende, kendo wiye nosidhie osimb sulwe apar gariyo. 2 Ne en-gi ich, kendo noywak ka en girem nikech muoch ne kaye kod-waro nyuol. 3 Eka ranyisi machielo bende nonenore ei polo: ne en thuol mang'ongo, makwar man-gi wiye abiriyo kod tunge apar gi osimbo ±>iriyo mosidhi e wiyege 4 Iwe noyweyo achiel kuom adek mar sulwe manie polo mi opudho kendo owito-gi e piny. Thuol malichno nochungo nyim dhakono mane chiegni nyuol, mondo ocham nyathine kosenywole. 5 Dhakono nonywolo nyathi ma wuowi, nyathi madichwo mabiro locho korito ogendni gi ludh nyinyo. To nyathineno noyudhi moter malo ir Nyasaye e kom duong'ne. 6 Dhakono noringo modhiyo e thim kuma ne Nyasaye oselosone kama nibiro ritee kuom ndalo alufu achiel gi mia ariyo kod piero auchiel. 7 Eka lweny nochakore e polo. Mikael gi malaike mage nokedo gi thuol malichno, to thuondno gi malaike mage bende nokedo kodgi. 8 To thuol ne onge teko moromo, mi nologi kendo ne oriembgi kargi e polo. 9 Eka thuol malichno nowit modire mwalo e piny, thuol mang'ongo machon miluongo ni Jachien kata Satan, mawuondo piny ngima. Nowite modire e piny, kaachiel kod malaike mage bende. 10 Eka ne awinjo duol maduong' moa e polo, kawacho niya, "Koro warruok giteko kod pinyruodh Nyasachwa, gi loch mar Kristo osechopo. Nikech Jahang jowetewa, mahangonegi e nyim Nyasachwa odiechieng' gi otieno, osewit modir e piny. 11 To ne giloye gi remb Nyarombo kendo gi Wach Nyasaye mane gihulo, bende ne ok gihero ngimagi ahinya mane nyalo miyo giluor tho. 12 Emomiyo moru-ru un polo, kod joma odak eiye! To mano kaka nobed malit ne piny gi nam, nikech Jachien oselor obiro iru! En gi mirima mager nikech ong'eyo ni odong'ne mana ndalo matin kende." 13 To kane thuol malichno oneno ni ose-wite modire e piny, ne olawo dhako mane onywolo nyathi ma wuowi cha. 14 Dhakono nomi fcuombe ariyo mag ongo maduong' mondo ohugo ochopgo kama nolosne thim, kuma ne idhi ritee kuom higni adek gi nus kama thuol ok nenyal chopoe ire. 15 Eka thuol nong'ogo pi moa e dhoge mamol ka aora mondo oyuogo dhakono gi apaka mamol. 16 To piny noyawo dhoge, momodho pi duto mane thuol ong'ogono, mi nokonyo dhakono. 17 Eka thuol mang'ongono ne okecho gi dhakono, nod-hiyo mondo oked gi nyithind dhalono modong', morito chike Nyasaye kendo osiko motegno kahulo wach Yesu. Kendo thuol nochung' e dho nam.

Fweny Mane 13

Ondiegi Magalagala Owuok E Nam

1 Eka naneno ondiek moro magalagala kawuok aa e nam. Ne en gi tunge apar kod wiye abiriyo. To nosidho osimbo apar e tungegego, kendo wich ka wich nondikie nying marach mayanyo Nyasaye. 2 Ondiek mane aneno ne chalo gi kwach, to tiendege ne chalo tiende dubu, kendo dhoge ne chalo gi dho sibuor. To thuol mang'ongono nomiyo ondiegino tekone gi kome mar duong' gi lochne duto. 3 Achiel kuom wiye ondiek magala-galano mar tho ne nenore ka gima ne nigi adhola malich to adholano malich mar tho nosechango. Jopiny mangima nohum nono, kendo negiluwo bang' ondiegino. 4 To ji nolamo thuol mang'ongono nikech nosemiyo ondiek malichno tekone owuon kendo negilamo ondiek malichno ka gipenjo niya. "En ng'ano machal gi Ondiek malich?" Ere ng'ato ma nyalo kedo kode?" 5 Ondiegi malichno nomi dhok mar wacho weche mag sungruok kod ayany, kendo ne oyiene bedo gi loch kuom dueye piero ang'wen gariyo. 6 Eka nochako wuoyo koyanyo Nyasaye kendo koketho nyinge kod kar dakne, kaachiel gi joma odakie polo. 7 Bende nomiye teko mondo oked gi jomaler mag Nyasaye kendo ologi bende nomiye loch kuom dhoudi duto, gi ogendini kod dhok duto miwacho gi pinje duto. 8 Ji duto modak e piny biro lamo ondiek malichno, jogo ma nyinggi ok ondiki e kitabu mar ngima mar Nyarombo manoyang' chakre chwech piny. 9 Ng'at man-gi it, mondo owinji! 10 Ka ng'ato onego otue to tuejno ema nodhiye. Kendo ka ng'ato onego negi gi ligangla, liganglano ema nonegego. Ma dwaro bedo jakinda modhil kod yie motegno kuom jotich Nyasaye moyiedhi.

Ondiek Malich Moa E Piny

11 Eka naneno ondiek malich machielo kawuok ei piny. Ne en gi tunge ariyo machalo gi mar nyarombo, to nowuoyo kaka thuol mang'ongo. 12 Notiyo gi teko duto mar ondiek malich mokwongo ka en e nyim ondiegino. Eka nomiyo piny gi ji duto modak eiye olamo ondiek malich mok-wongono, ma wiye ne nigi adhola malich manogo lero mar tho nosechango. 13 Notimo honni madongo ma kata mana mach nomiyo lor a e polo, kabiro e piny ka ji duto neno. 14 To nowuondo ji modakie piny, nikech honni mane omiye teko mondo otim e nyim ondiek malich mokwongo. Ne ogolo chik mondo gilosi gima ket ma imiyogo duong' ondiek malich mokuongo mane ohiny gi ligangla to ok otho. 15 Nomiye teko mondo omi gima ket mar ondiek malich mokwongo muya, mondo owuo kendo oneni jogo duto mane otamore lamo gima ketno onegi. 16 Bende nochuno ji duto, jomatindo gi jomadongo jomwandu kod jochan, wasumbini gi joma ni thoulo, mondo oket alama e rwetegi ma korachwich kata e lenda wengegi. 17 Mondo omi ng'ato ang'ata kik ng'iew kata uso gimoro amora, makmana ka en gi alamano ma en nying ondiek malichno kata kwan mar nyinge. 18 To ng'eyo tiend wachni dwaro rieko, Ng'at man gi ng'eyo matut, mondo okwan namba mar ondiek, nikech nambano en mar nying dhano. Nambano en mia auchiel gi piero auchiel gauchiel.

Fweny Mane 14

Nyarombo Gi Ji Alufu Mia Achiel Piero Ang'wen Gang'wen (144,000)

1 a Eka ne ang'icho kendo naneno J¿ Nyarombo kochung' e wi Got Sayun. To ne en kod ji alufu mia achiel gi piero ang'wen gang'wen kendo nyinge owuon gi nying Wuon mare nondik e lenda wengegi. 2 Kendo ne awinjo dwol moro moa e polo ka mor ka mor pi aora maringo matek kendo ka mor mar polo. Dwolno mane awinjo ne chalo gi jo thumbe mag nyatiti magoyo nyatiti. 3 To ne giwero wer manyien ka gichungo e nyim kom duong', kendo e nyim gik mangima ang'wen kod jodongogo. Bende ne onge ng'ato mane nyalo puonj ore wero wendni makmana ji alufu mia achiel gi piero ang'wen gang'wen (144 ,000 ) mane gin joma nores koa e piny. 4 Jogi e joma ne ok odwanyore gi mon, to ne giritore maler. Giluwo bang' Nyarombo kamoro amora modhiye. Nong'iewgi koa kuom ji kendo mobedo kaka olembe mokwongo chiek michiwo ni Nyasaye kod Nyarombo. 5 Miriambo ne ok owuok e dhogi, gionge gi ketho moro amora.

Malaike Adek

6 Eka ne aneno malaika moro ka huyo e kor polo. Ne en gi Wach Maber mochwere ma olando ni ji duto modak e piny ne pinje duto, gi dhoudi duto kod dhok duto gi ogendini duto. 7 Nokok gi dwol maduong' kowacho niya, "Luoruru Nyasaye kendo miyeuru duong', nikech saa ma ong'adoe bura osechopo! Lamuru Jal mane ochueyo polo gi piny, kod nam gi sokni mag pi." 8 Eka malaika mar ariyo nobiro kowacho niya, "Yaye! Babulon Dala Maduong' osepodho piny! Osepodho Piny! En e dhako cha mane omiyo ogendini duto omadho divai mar mer mar terruokne. 9 Bang' mano, malaika mar adek nobiro bang'gi kowacho gi duol maduong' niya, "Ka ng'ato ang'ata olamo ondiek malich kod gima ket kode, kendo ondikne alama e lenda wang'e kata e lwete, 10 ng'atno, bende, nyaka nomadh divai mar mirimb Nyasaye, moseol mopong' thich giteko moo ei kikombe mar mirimbe. Noyud sand ei mach makakni e nyim malaika maler, kendo e nyim Nyarombo. 11 To yich mach mar sandgino dhi malo nyaka chieng'. Jogo malamo ondiek malich kod gima ket kode, kata jogo mondiknegi alama mar nyinge, ok noyud yueyo odiechieng' kata otieno. 12 Ka eri ema kinda kod dhil mar jomaler, mag Nyasaye dwarore, jogo marito chike mag Nyasaye, kendo osiko koyie kuom Yesu. 13 Eka nawinjo dwol moa e polo kawacho niya, "Ndik ni, Chakre kawuononi, jogo gin johawi matho ka gin ei Ruoth!" Roho bende wacho ni, "Ee, gin johawi adier, nikech giniyue kuom tichgi matek, nimar timbegi noluwgi."

Keyo Mar Piny

14 To ne ang'icho, mi naneno e nyima bor polo marachar, to ewi bor polono ne nitie ng'ama obetie "machalo gi wuod dhano." Nosidho osimbo mar dhahabu e wiye, kendo ne oting'o pala mabith mar keyo e lwete. 15 Eka malaika machielo nowuok oa e Hekalu kaluongo gi duol maduong' jal mobedo e bor polono niya, "Kaw pandi mar keyo mondo ike, nikech saa mar keyo osechopo, nimar cham manie piny osechiek." 16 Omiyo jal mane obet e bor polo notiyo gi pande mar keyo e piny, mi nokayo piny ka cham. 17 To malaika machielo nowuok oa e Hekalu manie polo, en bende ne en gi pala mabith mar keyo. 18 Eka malaika moro machielo, mane nigi teko kuom mach, nobiro kowuok e kar kendo mar misango kendo norwongo gi dwol maduong' jamo mane nigi pala mabich mar keyo no wachone niya, "Kaw pandi mabithno mar keyo mondo ikago olemb mzabibu mag piny, nikech olembege ochiek ahinya!" 19 Omiyo malaikano notiyo gi pande mar keyo e piny, ne okayo olembe mzabibu kendo noketogi kar biyo mzabibu maduong' mar mirimb Nyasaye. 20 Olembego ne obi kinyonogi gi tielo e kar bichono e pap oko mar dala, to remo nochuer kamol kawuok kar bichono, mochopo mabor moromo kilomita mia adek koa e dala, to tut remono ne nyalo romo mita achiel gi nus.

Fweny Mane 15

Malaike Abiriyo Makelo Masiche Abiriyo

1 Eka ne aneno ei polo ranyisi machielo malich ahinya: Ne aneno Malaike, abiriyo, moting'o masiche abiriyo mogik nikech kuomgi mirimb Nyasaye ochopo kare. 2 Ne aneno gima chalo nam mar glas moru gi mach to e bathe kanyo ne aneno joma oseloyo ondiek malichno kod kido machalo kode to gi namba mar nyinge ko-chung'. Ne giting'o nyatiti mane omigi gi Nyasaye, 3 ka giwero wend Musa jatich Nyasaye gi wend Nyarombo kama: "Yaye; mano kaka tijeni dongo kendo lich aa Ruoth Nyasaye Manyalo Gik Moko Duto. Yoreni ni kare kendo gin adiera, Aa Ruodh ogendini manyaka nene. 4 En ng'a maok nyal luori aa Ruoth, maok nyal miyo nyingi duong? Nikech in kendi ema iler, ogendini duto nobi nyimi mondo olami, nimar timbeni makare osefwenyore ratiro." 5 Eka-ne ang'iyo mi aneno ka Hekalu mar Hemb Rapar oyawore e polo. 6 Malaike abiriyo moting'o masiche abiriyo nowuok e hekalu. Ne giruakore gi lewni maler mapakni kendo manyilni to ne gitweyo kamba mar dhahabu e korgi. 7 Achiel kuom gik mangima ang'wen ka ne omiyo malaike abiriyogo tewni abiriyo mag dhahabu mopong', gi mirimb Nyasaye, Nyasaye mosiko nyaka chieng'. 8 Hekalu ne iye opong' gi iro moa e duong' maler mar N)asaye kod tekone. To onge ng'ama ne nyalo donjo ei hekalu kapok masiche abiriyo mag malaike abiriyogo orumo.

Fweny Mane 16

Tewni Abiriyo Mag Mirimb Nyasaye

1 Eka ne awinjo duol maduong' kakok koa ei hekalu ka wuoyo gi malaike abiriyogo kawachonigi niya "Koro dhiuru, mondo upuk tewni abiriyo mopong' gi mirimb Nyasaye e piny." 2 Malaika mokuongo nodhi mopuko tape e piny, mi adhonde malich mang'ue marach ne omako ji duto mane nigi alama mar ondiek malich kendo mane lamo gima ket lode. 3 Malaika mar ariyo noolo tape e nembe mi pi nembegi nolokore machal remb ng'at motho, kendo gik mangima duto modak e nembego ne otho. 4 Malaika mar adek noolo tape e aore gi sokni mag pi kendo pigegi ne olokore remo. 5 Bang'e ne awinjo malaika mochung'ne pige kawacho niya: "In kare kuom kelo kumgi, Aa Ng'ama ler mantie bende mane nitie, nikech iseng'ado bura kare; 6 nimar jogi ne osechwero remb jogi maler, gi jonabi, mane onegi to koro isemiyo gimadho remo mana kaka owinjore kodgi." 7 Eka ne awinjo duol kawuok e kendo mar misango kawacho niya, "Ee Ruoth Nyasaye Manyalo Gik Moko Duto kumni nikare kendo gin adieri." 8 Malaika mar ang'wen noolo tape e wang' chieng' mi chieng' nomi teko mar wang'o ji gi mach mager. 9 Liet mager mar chieng' nowang'ogi to ne gidhi nyime mana giyanyo nying Nyasaye man giteko mar geng'o masichego, kendo ne gitamore hulo richogi mondo gimiye duong'. 10 Eka malaika mar abich noolo tape e wi kom duong' mar ondiek malichno, to piny ruodhe nolokore mudho. Ji nokayo lewgi nikech rem malit mane gin-go 11 kendo ne giyanyo Nyasach polo nikech rem mane gin-go gi adhondegi; to kata kamano ne gitamore lokore kuom richo mane gisetimo. 12 Bang'e malaika mar auchiel noolo tape e aora maduong' mar Yufret, mi pige noduono mondo yo olosre ni ruodhi mane biro koa yo wuok chieng'. 13 Eka naneno jochiende adek machalo ogwende, ne giwuok e dho Thuol maduong' kendo e dho ondiek malich kendo e dho Janabi mar miriambo. 14 Gin chunje mag jochiende matimo timbe honni kendo gidhi ir ruodhi duto mag piny ngima mondo gichokgi ni lweny ma nobedie chieng' maduong'

Mar Nyasaye Manyalo Gik Moko Duto

15 "Neuru! Abiro ka jakuo! Ng'atno en jahawi ma nonwang' kaneno kendo ma orwako lepe mondo wiye kik kuodi ka oyude duk. 16 Bang' mano chunjego nochoko ruod-higo kanyakla kama iluongo gi dho Hibrania ni Armagedon. 17 Kendo malaika mar abiriyo bende noolo tape e yamo; eka duol maduong' nowuok koa ei Hekalu e nyim kom maduong' mar loch kawacho niya, "Osetimore!" 18 Bang' mano, ne nitie mil polo makakni, koriadore kod mor polo gi yiengni malich mar piny. Piny noyiengni matek mapok oyiengni kamano nyaka aa chuech dhano. Adiera chutho ne en yiengni mar piny marachie moloyo. 19 Dala maduong' nobarore mopogore didek kendo mier madongo mag pinje ogendini nomukore mogore piny. Nyasaye noparo Babulon dala maduong', mi ne omiye kikombe mopong' gi divai mar mirimbe mager. 20 Chula ka chula nolal nono kendo gode duto bende nolal kamano. 21 Pe madongo dongo ma pek moro ka moro dirom kilo piero abich, noa e polo mogoyo ji. To ne giyango Nyasaye nikech masich peno, nimar ne en masira marach, moloyo!

Fweny Mane 17

Dhako Mobet Kuom Ondiek Malich

1 Eka achiel kuom malaike abiriyo mane nigi tewni abiriyo nobiro ira, mowachona niya; "Bi mondo anyisi kum mar jachode maduong' mobet ewi pige mang'eny. 2 En ema ruodhi mag piny noterore kode, kendo ji duto modak e piny bende osemadho divai mar terruokne mi omer." 3 Bang'e malaika nokawa kapong' gi Roho kendo otera e thim. Ekanyono naneno dhako moro koidho ondiek malich makwar, ma dende duto nochadhore gi nyinge mag ayany, kendo ne en gi wiye abiriyo kod tunge apar. 4 Dhakono nor-wakore gi lewni maralik gi makwar, kendo nolichore gi dhahabu kod kite mabeyo manengogi tek gi Mu. To noting'o e lwete kikombe mar dhahabu, mopong' gi gik modwanyore kod timbe mochido mag ter-ruokne. 5 Kendo nyingni nondik e lenda wang'e niya: "HONO, BABULON MADUONG' MIN JOCHODE DUTO, KENDO MIN GIK MODWANYORE MAG PINY." 6 Bende ne aneno dhakono komer gi remb jo-maler mag Nyasaye, remb jogo mane ohulo ni Yesu e Ruoth. Kane Anene Ne Awuoro Ahinya. 7 Eka malaika cha nopenja ni, "Ere gima omiyo iwuoro kamano? Abiro nyisi tiend wach mopondo mar dhakono kod mar ondiek malich moidho gi wiye abiriyo kod tunge apar. 8 Ondiek malich mane ineno, yande nitie, to tinde oonge kendo obiro wuok oa e Bur Matut Maonge Gikone ka odhiyo e kar tethruokne. Ji duto modak e piny, ma nyingegi ok ondiki e kitap ngima nyaka aa chakruok mar piny nowuor ka gineno ondiek malichno, nikech yande entie to tinde oonge, to nochak oduogi-kendo. 9 "Ng'eyo tiend wachni dwaro paro matut man-gi rieko. Wiye abiriyogo gin gode abiriyo ma dhakono obetie. 10 To bende gin ruodhi abiriyo. Ma abich kuomgi osepodho, to achiel pod nitie, to machielo pod ok obiro; to kapo ni obiro to nobedi kuom thuolo mabor matin. 11 Ondiek malichno ma yande nitie, to tinde oonge, en ruoth mar aboro. Bende en achiel kuom ruodhi abiriyogo, kendo odhiyo e kar kethruokne. 12 Tunge apargo mane ineno, gin ruodhi apar ma pok oyudo pinyruoth to ibiro miyogi teko mar locho kuom saa achiel kende, kaka ruodhi kaachiel gi ondiek malichno. 13 Gin duto gin gi paro achiel kendo ginichiw tekogi kod lochgi ni ondiek malichno. 14 Giniked gi Nyarombo, to Nyarombo nologi nikech en e Jaduong' mar jodongo, kendo Ruodh ruodhi, to jogo manobed kode, gin joge moluongi, jomoyier gi jogo maluwe gadiera." 15 Eka malaikano nowachona niya, "Pigego mane ineno ma dhako ma jachode obedoe, gin ji gi ogendini mang'eny k>d dhout pinje gi joma wacho dhok mopogore opogore. 16 To ondiek malichno gi tunge apargo mane ineno biro bedo mager kod dhakono ma jachode. Ginihinye kagitieke kendo weye duk; ginicham ringe, ma giniwang'e te gi mach. 17 Nimar Nyasaye oseketo e chunygi mondo gitim gima odwaro ka gimiyo ondiek lochgi mondo olochi, nyaka wach Nyasaye ochopi. 18 Dhakono mane ineno en e dala maduong' man gi loch kuom ruodhi mag piny."

Fweny Mane 18

Babulon Opodho

1 Bang' mani ne aneno malaika machielo kalor piny aa e polo. Ne en gi teko maduong', kendo lerne ne menyo piny. 2 Nokok gi dwol maduong' kowacho niya, "Yaye! Babulon dala maduong' osepodho! Osepodho! Osedoko kar dak mar jochiende, kendo odoko gunda ma chuny duto mochido odakie, kaachiel gi winy duto makelo luoro gi mago maok ler makuero. 3 Mano osetimore nikech ogendini e pinje duto osemadho divai mar neko mag terruokne, Ruodhi mag piny oseterore kode, kendo jo-ohala mag piny bende osedoko jomwandu nikech ohala ma ngimane oyombore mane odhialorego." 4 Eka nawinjo dwol moro machielo moa e polo kawacho niya: "Un joga, wuoguru ua kuome, mondo kik ubed achiel kode e richone, mondo omi kik un wang' masichene, 5 nikech richone osebi-wore mochopo e polo malo, kendo Nyasaye koro o separo timbene mamonogo. 6 Timneuru kaka oseti-mono! Medneuru nyadiriyo kuom gik ma osetimo! Losneuru mathne mane omiyo ji e kikombene nyadiriyo. 7 Miyeuru sand kod ywa-gruok mang'eny marom gi duong' kod dhialruok mar ngima moyom-bore manodakie kendo manomiyore owuon. Nosungore kowacho e chunye niya, 'Abedo kaka ruoth madhako, ok an chie liel kendo ok ane gima dimi aywag ngang'. 8 Emomiyo masichege chieng' moro achiel noloye: masichego gin tho gi ywa-gruok kod kech. Mach nowang'e kendo tieke duto, nikech Ruoth Nyasaye mang'adone bura, nigi teko maduong' moloyo!' 9 "To ruodhi mag piny mane oterore kode, kendo bedo kode e ngima moyom-bore noywage kendo sedo kod nyinge ka gineno yiro madum ka owang'. 10 Ginichung' mabor ka giluoro sandne kendo ka giywak niya, "To mano kaka lit! To mano kaka lit!" Yaye dala maduong'. Yaye Babulon; dala maduong' man-gi teko! Kethruokni osechoponi kuom saa achiel kende!" 11 "Johala mag piny noywage ka giden-go, nikech onge ng'at ma nochak ong'iew mwandugi kendo. 12 Mwandugigo gin: dhahabu gi fedha kod kite mabeyo manen-gogi tek gi lulu kod lewni mabeyo, gi lewni maralik, lewni mareprep kod lewni makwar gi yien duto madum tik mamit, gi gik moko duto molos gi lak liech, gi yien ma neng'ogi tek kod molos gi nyinyo, kod muia kendo molos gi kite mabeyo, 13 kod gik moko kaka dalasini gi gik mang'ue ng'ar; kaka ubani gi mor wir madum tik mamit kod uvumba gi divai kod mor mzabibu gi mogo mayom gi ngano kod dhok gi rombe gi farese gi geche lweny kod ringruok gi chunje ji bende. 14 "Giniwach niya, 'Olembe ma yande igombo oserumoni. Mwandugi duto kod gik mabeyo malombo wang' oselal chutho, ok nibed kodgi kendo ngang'.' 15 Jo-ohala mane ouso gigegi kendo obedo momewo nikech gigege nochung' mabor, ka giluor nikech sandruokne. Giniywagi kagidengo, 16 kendo goyo nduru ka giwacho niya: "Mano kaka lit! Mano kaka lit, Yaye dala maduong' morwakore gi lewni mabeyo kod lewni mareprep gi makwar, mapakni gi dhahabu gi kite mabeyo manengogi tek kod lulu! 17 Mano kaka mwandu mathoth kama osekethi motieki kuom saa achiel kende!' "Jotend yiedhi duto, gi jowuoth duto mawuotho gi yiedhi kod jokwang' yiedhi gi jogo duto ma loko ohala e nam, ginichung' gichien. 18 Ka gineno yiche dum kowang' gini wach niya: 'Bende ne nitie dala moro machalo gi dala maduong'ni? 19 Giniket buru e wigi kendo goyo nduru ka giywak niya: "Mano kaka lit! Mano kaka lit, Yaye dala maduong' Kama ji duto mane nigi Yiedhi e nam, nobedo joma omewo nikech mwandune. Mano kaka osekethe kendo otieke chutho mana kuom saa achiel kende. 20 Yaye polo bed maraor kuom kethne. Un jomaler mag Nyasaye gi joote kod jonabi, beduru mamor! Nyasaye oseng'adone bura kendo kume nikech timbe mane otimonu. 21 Eka malaika maratego nokawo kidi machalo gi pong' rego maduong', noting'e kendo nobologo e nam, kowacho niya: "Mana gi gero malich kama, e kaka Babulon dala maduong' nomuki kendo ok nonene ngang'. 22 Wende jogo thum nyatiti gi jower, kod jogo asili gi jogo tung', ok nowinji e iyi kendo ngang'. Kata johala moro amora ok noyud e iyi kendo ngang', bende dwond pong' marego ok now-inj kendo e iyi ngang'. 23 Ler mar taya ok norieny kendo e iyi chutho. Dwond wuon kisera gi dwond miaha bende ok nowinj eiyi kendo ngang'. Jolok ohala magi ne gin ji madongo e piny. To pinje duto nobaro mokethore nikech wuondni kod timbeni mayore mag juok. 24 Ne oyud kuome remb jonabi gi remb jomaler, kod remb ji duto mane osene-giepiny.

Fweny Mane 19

Haleluya!

1 Bang' mani, nawinjo gima chalo kJ gi koko maduong' mar oganda ei polo kawacho niya: "Haleluya! Warruok gi duong' kod teko odok ne Nyasachwa, 2 nikech buchene gin adiera kendo kare. Oseng'ado bura ni jachodeno maduong' mane oketho piny gi ter-ruokne. Adier Nyasaye osekume nikech nonego jotich Nyasaye.' 3 Eka ne gigoyo koko kendo niya: "Haleluya! Iro moa kuome kowang' nodum mochuere manyaka chieng'." 4 To jodongo piero ariyo gang'wen gi gik mangima ang'wen kande, nopodho piny auma kendo ma gi dendo Nyasaye mane obedo e kom duong' mar loch. Negiywak niya: Amin! Haleluya!" 5 Eka dwol noa e kom duong' mar loch, kawacho niya: "Pakuru Nyasachwa, un jotichne duto, un joge moluore, jomatindo kod jo madongo!" 6 Bang'e ne awinjo gima chalo gi koko oganda mang'eny machalo gi koko mar pige maringo matek, bende machalo gi polo mamor matek, kawacho niya: "Ruoth omi duong'! Haleluya! Nimar Ruoth Nyasaye Manyalo Gik Moko Duto, olocho. 7 Wabed moil kendo mamor ahinya kendo wamiyeuru duong'! Nikech kinde mar arus mar Nyarombo osechopo, to miahane oseikore. 8 Osemiye law maber mareprep, mapichni kendo maler, mondo orwaki. (Law maberno ochungo kar timbe makare mag jomaler.) 9 Eka malaikano nowachona ni, Ndik kama: Jogo gin johawi moluongi e chiemb arus mar Nyarombo!' Eka nomedo wacho niya, "Magi gin weche ma adier mag Nyasaye." 10 Eka napodho piny e tiende mondo alame. To nowachona niya, "Ngang'! Kik itim kamano! An bende an mana jatich wadu kaachiel gi joweteni mohulo gichir wach kuom Yesu. Nyasaye kende ema owinjore ilam! Wach adierano mar Yesu e ma kelo koro wach mar jonabi."

Jaith Faras Marachar

11 Eka naneno polo koyawore kendo naneno faras marachar kochungo e nyima ma jaithne iluongo ni Jaratiro, kendo Jaadiera. Ong'ado buchege e yo makare kendo okedo lwenjege gi ratiro. 12 Wengene chalo mach makakni to osimbe mang'eny ni e wiye. En gi nying' mondik kuome, maonge ng'ama ong'eyo, makmana en owuon. 13 Kendo orwakore gi kandho moling' e remo, to nyinge en Wach Nyasaye. 14 Ogend lweny mag polo neluwe, ka giidho farese marachere kendo ka girwakore gi lewni mabeyo mareprep marochere kendo maler. 15 To ligangla mabith wuok e dhoge ma ochwowogo ogendini manie pinje. Obiro locho korito-gi gi ludh nyinyo. To enonyon-gi ka jabi-cho mar divai kotoyo mirimb Nyasaye Manyalo Gik Moko Duto kuom-gi. 16 En gi nying mondik e kandhone kendo e bamne ni: RUODH RUODHI, KENDO JADUONG' MAR JODONGO. 17 To bang'e ne aneno malaika moro kochung'e wang' chieng'; nogoyo koko gi dwol maduong' ne winy duto mane huyo e kor polo niya, "Biuru, uchokru kaachiel e kar chiemo maduong' mar Nyasaye, 18 mondo ucham ringre ruodhi, gi ringre jotend lweny kod ringre joma rateke, gi ringre farese kod joithgi kaachiel gi ringre ji duto, joma ni thuolo gi wasumbini, joma tindo gi joma dongo. 19 Eka naneno ondiek malichno gi ruodhi mag piny kod cgen-dinigi mag lweny kochokore kaachiel mondo giked gi Jalno moidho faras kod ogandane mar lweny. 20 To ne omak ondiek malichno kaachiel gi janabi mar miriambo, mane o setimo timbe honni e nyinge. Honnigo ema ne osewuondogo joma ne oketinigi alama mar ondiek malichno kendo negilamo gima ket kode. Kargi gik moko ariyogi ne owitgi kagingi-ma e ataro mar mach maliel mager. 21 To jogegi mane odong' noneg gi ligangla mane owuok e dho jaidh faras, kendo winy duto nokidho ringregi.

Fweny Mane 20

Higni Alufu Achiel

1 Eka naneno malaika kalor oa e polo, koting'o e lwete kifungu mar Bur Matut Maonge gikone kod nyororo maduong'. 2 Ne omako matek Thuol maduong'no, thuol machon cha, ma en Jachien kata Satan, kendo notueye kuom higni alufu achiel. 3 Ne owite e Bur Matut Maonge gikone, kendo nolorone modi-none e iye, mondo kik ochak owuond ogendini mag pinje ngang' nyaka higni alufu achielgo rum. To bang'e nogonye mondo obed thuolo kuom kinde matin. 4 Bang' mano, ne aneno kombe mag loch, majoma ne obet e kombego nosemi teko mar ng'ado bura. Bende ne aneno chunje joma ne ong'ad wiyegi nikech wach yie margi motegno mane gihulo kuom Yesu kendo wach Nyasaye mane guando. Jogi ne ok olamo ondiek malichno kata gima ket kode kendo alama mare ne ok oket e lenda wengegi kata lwetegi. Ne gidoko mangima kendo negilocho gi Kristo kuom higni alufu achiel. 5 Ma e chier mokwongo. (To jo motho man-odong' mane ok ochier e chierni, ne ok odoko mangima nyaka higni alufu achielgo nommo.) 6 Gin johawi kendo mopuod-hi jogo mochier e chier mokwongo. Tho mar ariyo onge gi teko kuomgi, to ginibed jodolo mag Nyasaye kendo mag Kristo kendo giniloch kode kuom higini alufu achiel.

Oloo Satan

7 To bang' ka higni alufu achiel oseru-mo, Satan nogony mobed thuolo koa e bur mane otueye, 8 kendo nowuog oko kodhiyo mondo owuond ogendini duto mag tunge ang'wen mag piny, ma gin Gog gi Magog, kendo nochokgi kaachiel mondo gidhi e lweny To kar kwan-gi romre gi kuoyo manie dho nam. 9 Ne giwuotho mi gik-wako piny te, kendo ne gilworo kar jot mar jo-Nyasaye, dala maduong' ma ohero. To mach ne oa e polo mobiro e piny kendo nowang'ogi motiekogi. 10 To Jachien, mane owuondogi ne owit e ataro mar mach maliel mager, kama ondiek malichno gi janabi majawuondno nowitie. Kanyono nosandgie odiechieng' gi otieno nyaka chieng'.

Jomotho Ing'ado Nigi Bura

11 Eka naneno kom mar loch maduong' marachar kaachiel gi jal manobedo e komno. Piny gi polo noringo oa e nyime kendo ne gilal maok nonegi kendo. 12 To ne aneno jo motho, jotelo madongo gi jomatindo, ne gichungo e nyim kom maduong' mar loch, kendo kitepe noyaw. Kitabu moro noyaw, ma en kitap ngima. Jomothogo nong'ad nigi bura koluwore kod gik mane gisetimo kaka ondiki e kite-pego. 13 Nam nogolo oko jomotho manie iye, to Tho gi Piny Joma otho nogolo oko jomotho manie igi, kendo ng'ato ka ng'ato nong'adne bura koluwore kod gik mane osetimo. 14 Eka tho gi Piny Joma otho nowiti e ataro mar mach. Ataro mar machno e tho mar ariyo. 15 Ng'ato ang'ata ma nyinge ne ok onwang' kondiki e kitap ngima, nowit e ataro mar mach.

Fweny Mane 21

Jerusalem Manyien

1 Eka ne aneno polo manyien gi piny manyien. Polo mokwongo gi piny mokwongo noselal, to nam bende noselal kamano. 2 Bang'e naneno Dalano Maler, ma en Jerusalem manyien kalor piny oa e polo ir Nyasaye, ka oikore ka miaha morwakore maber ni chuore. 3 To ne awinjo dwol maduong' moa e kom duong' mar loch mawacho niya, "Koro kar dak mar Nyasaye ni kod ji kendo enodag kodgi, ginibed joge, to Nyasaye owuon enobed kodgi kendo nobed Nyasachgi. 4 Enoywe pi wengegi duto. Tho kata ywak gi nduru kod rem ok nochak obedie kendo ngang', nikech gik machon oserumo'. 5 Jal manobed e kom duong' mar loch nowacho niya, 'Neuru! Aloso gik moko duto bedo manyien! "Eka nowacho kendo niya, "Ndik mani, nikech wechegi gin migeno kendo gin adiera." 6 Bang' mano nowachona niya: "Osetimore. An e Alfa gi Omega, Chakruok gi Giko, Ng'at ma riyo oloyo anami modho pi soko mar ngima, nono ma onge nengo. 7 Ng'at molocho noyud gigi duto kaka gir keni, kendo anabed Nyasache, to en obed wuoda. 8 To jomalu-or, gi joma ok oyie kod jokoko gi jonek kod jomaterore, gi jojuogi gi jomalamo nyiseche manono kod jomiriambo duto, kargi nobed mana ataro mar mach maliel mager, ma en tho mar ariyo! 9 Eka achiel kuom malaike abiriyogo mane nigi tewni abiriyo moting'o masiche abiriyo mogik nobiro ira mowachona niya, "Bi, mondo anyisi miaha ma en chi Nyarombo." 10 To malaikano noting'a kapong' gi roho motera malo e wi got maduong' kendo mabor, mi nonyisa Jerusalem, Dala Maler, kalor piny aa e polo ir Nyasaye. 11 Ne orieny gi ler mar duong' Nyasaye, to lerne ne rieny ka kidi ma nengone tek, kaka jaspa maler ahinya. 12 Ne en gi ohinga maduong' kendo mabor man gi dhorangeye apar gariyo kendo man gi malaike apar-gariyo e dhor-angeyego. E dhorangeyego nondikie nying ogendini apar gariyo mag Israel. 13 Dhorangeye adek ne ni yo wuok chieng', to adek yo nyandwat, kendo adek yo mil-ambo gi adek mamoko yo podho chieng'. 14 To ohinga mar dalano ne nigi misingi apar gariyo, mane ondikie nying joote apar gariyo mag Nyarombo. 15 Malaikano mane owuoyo koda, ne nigi luth mar rapim molos gi dhahabu mipimogo dalano, gi dhorangeyene kod ohingane. 16 Dalano noger ma bethene ang'wen romore, borne rom gi lachne. Nopimo dala gi luth kendo noyudo ni borne gi lachne kod kaka oidho malo ne romo kilo-mita alufu ariyo gi mia ariyo maromore. 17 Ne opimo ohingane bende, mi oyudo ni pek mar kore oromo bede mia achiel gi piero ang'wen gang'wen, kipimo gi bat mar dhano, ma en rapim mane malaika otiyogo. 18 Ohingano noger gi jaspa, to dala hie ne dhahabu lilo marieny ka glas maler. 19 Misingi mar ohinga mar dala nokedi gi kite mabeyo duto ma nengogi tek. Misingi mokwongo nolos gi jaspa, to mar ariyo ne safir, eka mar adek ne kalke-do kendo mar ang'wen ne zumaridi, 20 to mar abich ne sardonikso, mar auchiel ne sardius, eka mar abiriyo ne krusolith, to mar aboro ne berul, mar ochiko ne topaz, to mar apar ne kruskopraso, kendo mar apar gachiel ne huakintho, to mar apar gariyo ne amethusto. 21 Dhorangeye apar gariyogo ne gin kite mag lulu ma nengogi tek, kendo dhorangach ka dhorangach nolos gi lulu achiel achiel moriwore. Yor dalano ne dhahabu lilo marieny maler ka glas. 22 To ne ok aneno Hekalu ie dalano, nikech Ruoth Nyasaye Manyalo Gik Moko Duto kod Nyarombo ema obedo Hekalu mare. 23 Dalano ok dwar chieng' kata due mondo orienyne, nimar dwong' Nyasaye ema miye ler, kendo Nyarombo e tache. 24 Ogendini mag pinje nowuothi e lerne, kendo ruodhi mag pinje nokel bergi e iye. 25 Dhorangeyene ok nolor odiechieng' moro amora, to otieno bende ok nobedie ngang' kuro. 26 Duong' gi mwandu mag ogendini mag pinje nokel e iye. 27 To gimoro amora ma ok ler, kata ng'ato matimo gik mamono, kata mariambo, ok nodonjie, makmana jogo ma nying-gi ondiki e kitap Nyarombo mar ngima kende.

Fweny Mane 22

Aora Mar Ngima

1 Bang'e eka malaika nonyisa aora mar pi mar ngima, marieny maler ahinya, kendo mamol kaa e kom duong' mar loch mar Nyasaye gi mar Nyarombo, 2 ne omol e dier yo maduong' mar dalano. To bath aora koni gi koni ne nitie yath mar ngima konyago olembe apar gariyo kendo ne onyago olem-begego due ka due, bende ite yadhno ema ithiedhogo ogendini mag pinje. 3 Kuong' moro amora ok nobedie kendo. Kom duong' mar loch Nyasaye gi mar Nyarombo ema nobedie ei dalano, to jotichne notine. 4 Gininene wang' gi wang' kendo nyinge nobed e lenda wengegi. 5 Otieno ok nobedie kendo ngang'. Ok ginidwar ler mar taya kata ler mar chieng', nikech Ruoth Nyasaye ema nomigi ler. To ginilochi nyaka chieng'. 6 Eka malaikano nowachona niya, "Wechegi gin weche migeno kendo ma adiera. To Ruoth ma Nyasach chunje mag jonabi, nooro malaikane mondo onyis jotichne gik mabiro timore mapiyo."

Yesu Biro

7 "Neuru abiro mapiyo! Ng'atno en jahawi momako weche mokor manie kitabuni!" 8 An, Johana ema nawinjo gigi kendo ne anenogi. To kane asewinjogi kendo neno-gi, napodho piny e tiend malaikano mane nyisagi. 9 To nowachona niya, "Kik itim kamano. An bende an jatich wadu matiyo kodi kaachiel gi joweteni ma jonabi gi jogo duto morito weche manie kitabuni. Mi Nyasaye duong'!" 10 Bang' mano nowachona niya, "Kik iling' mak ihulo weche mokor manie kitabuni, nikech kindeno ma gigo onego timre chiegni. 11 We ng'at matimo richo odhi nyime kod timo richo; kendo ng'at ma chunye ochido odhi nyime timo timbe mochido; to ng'at matimo makare bende odhi nyime gi timo makare, to ng'at maler odhi nyime gi bedo maler." 12 "Ne, abiro piyo! Ating'o michna, to abiro miyo ng'ato ka ng'ato koluwore kod gima osetimo. 13 An Alfa gi Omega, Jal Mwokongo kendo Mogik kendo An e Chakruok gi Giko. 14 "Johawi gin jogo ma lwoko kand-hogi maler, mondo omi gibed gi ratiro mar chamo olemb yath mar ngimano kendo gikadh ka gidonjo e dhorangeye mag dalano. 15 To guogi, gi jojuogi, gi jomaterore kod jonek, gi joma lamo nyiseche manono kod ji duto ma ohero miriambo kendo matimo gik maok adiera, duto nobed oko." 16 "An, Yesu aseoro malaikana mondo ohulni wechegi ilonygo kanise. An Tiend anyuola kendo Koth Daudi, to bende an Sulwe Maler mar Okinyi." 17 Roho gi miaha wacho ni, "Bi!" To ng'ato mawinjo, bende owach niya, "Bi!" Ng'ama riyo oloyo, mondo obi, kendo ng'at mohero, mondo obi oyud pi ngima mochiw nono. 18 An Johana asiemo ng'ato ka ng'ato mawinjo wechegi mokor mag kitabuni kama: Ka ng'ato moro nomed gimoro amora e wechegi, Nyasaye nomedne ng'atno masiche mondik e kitabuni. 19 To bende ka ng'ato moro nogol oko weche manie kitabuni mar koro, Nyasaye nogol oko kamaye pokne manie yath mar ngima kendo manie dala maler, mondiki e kitabuni. 20 Jal mawacho wechegi wacho kendo niya, "Ee, Abiro mapiyo." Amin! Bi, Ruoth Yesu. 21 Ng'wono mar Ruodhwa Yesu obed gi jo-Nyasaye. Amin.





AMAZING GRACE BIBLE INSTITUTE