Psalms

Zaburi

Zaburi 1

1 Ogwedh ng’at maok lu pach joma richo kata chung’ e yor joricho kata bedo e kom joma jaro ji. 2 Tochik Jehova ema more, kendo osiko oparo kuom chikene odiechieng’ gotieno. 3 Ochalo gi yien mopidhi e bath aora, manyago olembe e kinde molemo chieke kendo ma pote ok ner. Gimoro amora motimo dhi maber. 4 Joma timbegi richo to ok chal kamano kata matin! Gin gichalo gi mihudhi ma yamo tero. 5 Kuom mano joma timbegi richo ok nolo bura, adier, joricho ok nobedi e kanyakla mar joma kare, 6 nikech Jehova rango yor joma kare maber, to yor joma richo to biro kethore.

Zaburi 2

1 Ang’o momiyo ogendini chano timo marach kendo ji chano timo gik manono? 2 Ruodhi mag piny onyono piny matek kendo joloch pimo wach kaachiel mondo giked gi Jehova kendo gi ked gi ng’ate mowir. 3 “Giwacho ni, wachoduru nyorochegi; kendo wawit ratekegi kucha." 4 To jal mobetekom lo ch e polo to nyierogi anyiera, Ruoth goyonegi siboi. 5 Eka okwerogi kokecho kendo obwogogi kopong’ gi mirima mager, kowacho ni, 6 "Aseketo ruoth ma adwaro e Zayun, goda maler." 7 Abiro hulo chenro maok lokre mag Jehova: Nowachona ni, "In wuoda; kawuono asedoko wuoru. 8 Omiyo kwaya gima idwaro mondo aket ogendini duto obed girkeni mari, mondo piny ngima obed mwanduni. 9 Iniritgi gi ludh nyinyo; initogi matindo tindo ka agulu." 10 Kuom mano, un ruodhi, beduru mariek; tang’uru un joloch mag piny. 11 Tiuru ne Jehova gi luoro kendo moruru e nyime gi luoro. 12 Bolreuru e nyim Wuowi, nono to dipo kokecho kodu mi dong’ad ndalou, motieku, nimar iye nyalo wang’ kodu kadiemo wang’. Ji duto mogeno kuome gin joma ogwedhi.

Zaburi 3

Zaburi mar Daudi. Kane Oringo Oa Ir Wuode Abisalom

1 YAYE JEHOVA, mano kaka wasika thoth! Mano kaka joma lawa ng’eny asasa! 2 Ji mang’eny wuoyo kuoma, ka giwacho ni, "Nyasaye ok bi rese." Sela 3 To In e okumba mogeng’a, YAYE JEHOVA; In e duong’na, kendo iseting’o wiya malo. 4 Aywak matek ne Jehova, kendo odwoka gie gode maler. Sela 5 Ariera piny mondo anindi; kendo achiew achako achiew, nikech Jehova orita. 6 Ok abi luoro ji gana gi gana mochokorena molwora mondo otimna marach. 7 Aa malo, YAYE JEHOVA! Resa, Yaye Nyasacha! Thal lemb wasika duto; Muk leke joma timbegi richo 8 Wa rruok aa kuom Jehova. Mad gwethni obed kuom jogi. Sela

Zaburi 4

Is Ne Jatend Wer. Miwero Gi Gig Wer Man-gi Tondegi. Zaburi mar Daudi.

1 Ka alwongi to yie idwoka, Yaye Nyasacha makare. Konya e lit momako chunya; yie ikecha kendo iwinj lamona. 2 Yaye ji, ubiro chayo duong’na kukuodo wiya nyaka karang’o? Ubiro hero gik manono kendo ubiro luwo nyiseche manono nyaka karang’o? 3 Ng’euru ni Jehova oseketo joma oluore tenge ne en owuon; omiyo Jehova biro dwoka ka aluonge. 4 Ka iu owang’ to kik utim richo; seche ma uyueyo mos e otendiniu, to paruru matut kuom wachno, kuketo chunyu mos. 5 Chiwuru misengini mow injore kendo genuru kuom Jehova. 6 Ji mang’eny penjo ni, "En ng’a manyalo timonwa gimoro maber?" Mad ler moa e lela wang’i rieny kuomwa, YAYE JEHOVA. 7 Isepong’o chunya gi mor maduong’ moloyo mor ma gin-go kinde ma gin-gi cham kod divai mang’eny. 8 Abiro riera piny mi anind gi kuwe, nikech in kendi, YAYE JEHOVA ema imiyo adak gi kuwe.

Zaburi 5

Ne Jatend Wende Miwero Gi Asili. Zaburi Mar Daudi

1 Chik iti iwinj wechena, Yaye Jehova, para kuom pek manie chunya. 2 Winj ywakna mar dwaro kony, Yaye Ruodha kendo Nyasacha, nikech in ema alami 3 Yie iwinj duonda gokinyi, Yaye Jehova; aketo kwayoga e nyimi gokinyi kendo arito dwoko ka an gi geno. 4 Ok in Nyasaye mamor gi timbe maricho. Joma richo ok nyal dak kodi kanyachiel. 5 Josunga ok nyal chung’ e nyimi; imon gi ji duto matimo gik maricho. 6 Itieko joma wacho miriambo; Jehova ok mor gi joma rich chwero remo omako kod jomiriambo. 7 Anto, nikech kechni maduong’, abiro donjo e odi; abiro kulora gi luor ka achomo hekalu mari maler. 8 Telna, Yaye Jehova, kuom adiera mari, nikech wasika-riena yori tir e nyima. 9 Kata wach achiel mowuok e dho jogi ok nyal gen; chunygi opong’ gi kethruok. Dwondgi chalo gi liel mapok oum; gipiago lewgi ne wacho miriambo. 10 Kwan-gi kaka joketho, Yaye Nyasaye! Ket obadho ma giketo ne ji ogajgi gin giwegi. Riembgi nikech richogi mathoth, nimar giseng’aanyoni. 11 We ji duto moketi kar pondo margi obed mamor; we gisik ka giwer gimor. Umgi gi rit mari, mondo joma ohero nyingi omor kodi. 12 Nikech igwedho joma kare adier, Yaye Jehova; igeng’ogi gi hapi mana ka okumba.

Zaburi 6

Ne Jatend Wer Miwero Gi Gig Wer Man-gi Tondegi. Kaluwore Gi Sheminith. Zaburi Mar Daudi

1 Kik ikwe ra, Yaye Jehova, ka iyi owang’ kata kum kik ikuma ka mirima omaki. 2 Kecha, Yaye Jehova, nikech aol; changa, Yaye Jehova, nikech chokena rama malit. 3 Chunya winjo malit. Nyaka karang’o, Yaye Jehova, nyaka karang’o? 4 Wichri, Yaye Jehova, mondo iresa; wara nikech herani maok rem. 5 Onge ng’ama nyalo pari ka osetho. En ng’a madi paki gie i liel? 6 Chur ma achurgo ojonya otieno duto, abudo otandana gi ywak kendo pi wang’a olwoko piendena. 7 Wengena ool nikech lit ma an-go; ok ginen maber nikech wasika duto. 8 Ayiuru buta, un duto mutimo richo, nikech Jehova osewinjo ywakna. 9 Jehova osewinjo ywak mar kwayo kech; Jehova orwako lamo mara. 10 Wasika duto wigi biro kuot kendo biro hum nono; gibiro dok chien apoya nono gi wichkuot.

Zaburi 7

Shiggaion Mar Daudi, Mane Owero Ne Jehova Kuom Kush ja-Benjamin.

1 Yaye Jehova Nyasacha, in e kar pondona; Resa kendo igola e lwet joma lawa duto, 2 nono to gibiro kidha kaka sibuor kidho gik moko. Kendo gibiro yiecha matindo tindo maonge ng’ama diresa e lwetgi. 3 Yaye Jehova Nyasacha, kaponi asetimo ma adier kendo lwetena osetimo gima rach- 4 Kaponi asetimo marach ne ng’ama onge koda gi wach kata kapo ni asemayo jasika ka onge gima omiyo- 5 to yiene jasika olawa mi ojuka; wegi ginyon ngimana piny e lo mi gimi anind ei lo piny. Sela 6 Aa malo, Yaye Jehova, ka iyi owang’ aa malo irad gi gero mar wasika. Chiew, Nyasacha; chiew inyis adiera makora. 7 We chokruoge mag ogendini olwori koni gi koni. Ng’ad negi bura gie kom loch mari man malo; 8 Jehova mondo ong’ad bura ne ogendini. Yala, Yaye Jehova, kaluwore gi ngimana makare, kaluwore gi ngimana moriere tir, Yaye Jal man malo mogik. 9 Yaye Nyasaye makare, manono pach ji gi chunje ji, tiek timbe mamono mag joma richo mondo imi joma kare odag gi kuwe. 10 Okumbana en Nyasaye Man Malo Mogik, ma waro joma chunygi oriere tir. 11 Nyasaye en jang’ad bura makare; en Nyasaye ma toyo mirimbe pile ka pile. 12 Ka ok oloko pache to obiro piago liganglane; obiro dolo okumbane mi otwe tondege. 13 Oseiko gige mag lweny mager; oiko asernige makakni ka mach. 14 Ng’ama iye okuot gi gik maricho kendo mayach gi chandruok nyuolo yamo nono. 15 Ng’ama loso bur kendo kunye maber podho e bure mokunyono. 16 Chandruok mokelo gaje en owuon; maundu mare duogo ne wiye owuon. 17 Abiro goyo erokamano ne Jehova nikech en ng’ama kare kendo abiro wero wend pak ne nying Jehova man malo mogik.

Zaburi 8

Ne Jatend Wer Kaluwore Gi Gittith. Zaburi Mar Daudi

1 Yaye Jehova Nyasachwa mano kaka nyingi nigi duong’ e piny duto! Iseguro duong’ni moyombo polo. 2 Dho rawere matindo gi nyithindo mayom pod paki nikech wasiki mondo imi jasigu kod jachul kuor ling’ kik wuo. 3 Kaparo polo magi ma gin tich lweti, kaparo dwe gi sulwe miseketo keregi, 4 to awuoro ni dhano adhana to en ang’o momiyo isiko ipare, Wuod dhano to en ang’o momiyo iketo pachi kuome? 5 Ne ichwe ye gi duong’ machiegni rom gi duong’ Mar chwech mag polo kendo isesidhone duong’ gi luor. 6 Isekete jatelo ewi tich lweti duto; iseketo gik moko duto e bwo tiende: 7 Jamni gi kweth duto kod le mager mag bungu, 8 Winy duto mahuyo e kor yamo, kod rech manie nam, le duto mamol kaluwo yore manie nembe. 9 Yaye Jehova, Ruodhwa, mano kaka nyingi nigi duong’ e piny duto!

Zaburi 9

Ne jatend wer. E dwol mar"Tho mar wuowi, "Zaburi mar Daudi.

1 Abiro paki gi chunya duto, Yaye Jehova; abiro nyiso timbegi madongo duto. 2 Abiro bedo mamor kendo abiro il kodi; abiro pako nyingi gi wer, Yaye Jal Mamalo Mogik. 3 Wasika ogomo dok; gichwanyore kendo gilal e nyimi. 4 Nikech isechung’na matek ka ichwaka isebetekom duong’ mari, kiyalo bura kare. 5 Isekwero ogendini kendo isetieko joma richo; iserucho nyinggi oko nyaka chieng’ kendo nyaka chieng’. 6 Kethruok mosiko osejuko jasigu, isemuko miechgi madongo; mi kodaka kitgi oselal e pach ji. 7 Jehova olocho nyaka chieng’, oseguro kom loch mare mar ng’ado bura. 8 Obiro rito ogendini gi adiera 9 Jehova en kar pondo ne joma idiyo, en e kar pondo e kinde mag chandruok. 10 Joma ong’eyo nyingi biro geno kuomi, nikech in, Yaye Jehova, ne pok ijwang’o joma manyi. 11 Wer wende pak ne Jehova, mobet e kom lochne e Zayun; hulne ogendini gik mosetimo. 12 Nikech ng’at machulo kuor kuom remo mochwer siko kaparo; ok owe mak odewo ywak joma hinyore. 13 Neye kaka wasika sanda, Yaye Jehova! Kecha kendo ting’a igola e dhorangeye mag tho, 14 mondo anyis pakni e dhorangeye mag nyi Jerusalem kendo abed mamor kuno nikech warruokni. 15 Ogendini oselutore e buche ma gikunyo; tiendegi ogajore e tondegi ma gichokogo ji. 16 Jehova ong’ere nikech adierane; joma timbegi richo omoko e gik ma giloso gi lwetgi. Higgain. Sela 17 Joma timbegi richo dok e bur matut, nyaka ogendini duto ma wigi wil gi Nyasaye. 18 To jochan wi ji ok sik kowilgo kendo geno mar joma hinyore ok rum. 19 Aa malo, Yaye Jehova, kik iyie mondo dhano olochi; ne ni ogendini ong’ad negi bura e nyimi. 20 Gogi gi luoro, Yaye Jehova; mi ogendini ong’e ni gin mana dhano. Sela.

Zaburi 10

1 Ang’o momiyo ichung’ gichien, Yaye Jehova? Ang’o momiyo ipondo ne ji kinde mag chandruok? 2 Ng’at ma timbene richo pedho joma onge nyalo kendo omakogi e otego mage mosechiko. 3 Dwache maricho mopando e chunye omiyo osungore; jowuoche ema ogwedho to Jehova to ochayo. 4 Sunga omake maok onyal manye; onge thuolo kata matin moweyone Nyasaye e pache 5 Yorene dhi maber kinde duto, okawore omiyo chikeni ni mabor moyombe; ojaro wasike duto. 6 Owacho ne en owuon ni, "Onge gima nyalo yienga; abiro dak gi kuwe kinde duto ka onge gima thaga." 7 Dhoge opong’ gi miriambo kod weche mabw ogo ji; chandruokgi gi chenro maricho nie bwo lewe. 8 Okiyo ji e bath yore mag gweng’, onego ji apoya koa kuonde moponde, osiko ong’icho mondo wang’e omaki joma onge ketho mondo ohiny. 9 Okiyo ji kokichore ka sibuor mopondo; okichore mar mako joma ok nyal mondo ohinygi, omako joma ok nyal kendo oywayogi oko gi tonde mar meko. 10 Joma hapgi rach momako otieko kendo podho chuth, gipodho e bwo tekone. 11 Owachone en owuon ni, "Nyasaye wiye osewil; opando wang’e kendo onge gima oneno." 12 Aa malo Yaye Jehova! Ting’ badi malo, Yaye Nyasaye. Kik wiyi wil gi joma ok nyal. 13 Ang’o momiyo ng’ama timbe g e richo jaro Nyasaye? Ang’o momiyo owacho e chunye ni, "Ok obi keta piny mopenja gima asetimo?" 14 To in, Yaye Nyasaye, ineno chand ruok gi kuyo, ikaw ogi kaka mari kendo iting’ogi e lweti. Ng’at maok nya; chiwore ne in; In e jakony mar joma onge wuonegi. 15 Tur bad ng’ama rach ma timbene richo; luonge mondo onyis ji gik maricho mosetimo ling’ling’ ma ji ok nyal fwenyo mi ng’e. 16 Jehova en Ruoth nyaka chieng’ ma nyaka chieng’; ogendini biro lal nono e pinye. 17 Yaye Ruoth Nyasaye, in iwinjo kwayo mar joma chandore; ijiwogi, kendo ichiko iti ne ywakgi, 18 Ichwako joma onge gi wuonegi kod joma isando, mondo eka dhano, ma ochwe gi lo, kik dhi nyime gi bwogo ji.

Zaburi 11

Ne Jatend Wer. Zaburi Mar Daudi

1 Jehova ema ageno kuome. Koro ere kaka duwachna ni: "Hu kaka winyo nyaka wi got mari. 2 Nikech joma timbegi richo osechako ywayo atungegi; gisechano asernigi e tonde mag atung’ mondo gichielgo joma oriere gie chunygi; e mudho. 3 Ka mise mar ngima osekethi, to en ang’o ma ng’at makare ditim?" 4 Jehova nie Hekalu mare maler; Jehova nie kom duong’ mare manie polo. Orango timbe yawuot ji; wengene nonogi matut. 5 Jehova nono joma kare, to joma timbegi richo kod joma ohero maundu to chunye ochayo. 6 Obiro chwero makaa maliel mager kod salfa kuom joma timbegi richo; yamo maliet ha matwoyo gik moko, biro kudhogi. 7 Nikech Jehova en Ng’ama Kare, kendo ohero adiera; joma timbegi oriere biro neno wang’e.

Zaburi 12

Ne Jatend Wer. Kaluwore Gi Sheminith. Zaburi Mar Daudi.

1 Kony ji Yaye Jehova, nikech joma oluoro Nyasaye koro onge; joma jo adiera oserumo pep e dier ji. 2 Ng’ato ka ng’ato riambo ne nyawadgi; dhogi mohero charo ji wuoyo gi wuond. 3 Mad Jehova ng’ad oko dhok duto macharo ji kod lep duto masungore; 4 ma wacho ni, "Wabiro locho gi lewwa; lew-wa e rapurwa ma wapurogo koso en ng’a ma disindwa timo kamano?" 5 "Nikech dich modigo joma ok nyal kod chur ma joma ochando churgo, koro abiro aa malo, "Jehova owacho. "Abiro ritogi e lwet joma sandogi." 6 Weche Jehova liw, giliw ka fedha moleny e lo mowang’ maliet ha, mopwodhi ndalo abiriyo 7 Yaye Jehova, yie iritwa maber kik gimoro ohinywa kendo reswa e lwet joma kamago nyaka chieng’. 8 Joma timbegi richo wuotho koni gi koni ka ng’anjo e kinde ma ipako rach e dier ji.

Zaburi 13

Ne Jatend Wer, Zaburi Mar Daudi

1 Nyaka karang’o, Yaye Jehova? Wiyi biro wil koda nyaka chieng’ koso? Ibiro pandona wang’i nyaka karang’o? 2 Abiro dhi nyime ka ai gi pek manie pacha kod kuyo manie chunya odiechieng’ kodiechieng’ nyaka karang’o? 3 Para kendo idwoka, Yaye Jehova Nyasacha. Chiw ler ne wengena, nono to dipo ka nindo otera mi atho; 4 nikech mano nyalo miyo jasika wach ni, "Aseloye, "kendo wasika biro bedo mamor ka apodho. 5 Anto ageno kuom herani mosiko; chunya oil kuom warruok mari. 6 Abiro wer ne Jehova, nikech osebedo ka otimona maber.

Zaburi 14

Ne Jatend Wer. Zaburi Mar Daudi

1 Ng’ama ofuwo wacho e chunye ni, "Nyasaye onge." Gin joma okethore. Timbegi richo mokalo tong’, onge kata ng’ato achiel matimo maber. 2 Jehova ng’iyo piny mwalo gie polo, ong’iyo yawuot ji mondo oneye ka be nitie kata ng’at achiel kuomgi ma nigi winjo, ng’ato kata achiel ma manyo Nyasaye. 3 Giduto giseleng’ore giweyo, giduto kaachiel gisebedo joma okethore; onge kata achiel. 4 Be joma timo gik maricho biro puonjore adier- joma ngamo joga kaka ji chamo makati kendo maok lam Jehova? 5 N egie kaka luoro dwa negog i, nikech Nyasaye nitie e chokruok mar joma kare. 6 Un joma timo gik maricho, uketho chenro joma odhier, to Jehova e kar bwok margi. 7 Yaye, mad warruok mar Israel wuog Sayun! Kinde ma Jehova duogo ne joge mwandugi, onego Jakobo obed moil kendo Israel obed mamor!

Zaburi 15

Zaburi Mar Daudi

1 Jehova, EN NG’A manyalo siko kari maler milamie? En ng’a manyalo dak e godi maler? 2 En ng’at ma wuodhe obidhore kendo matimo gima kare, ng’at ma wacho adiera gie chunye 3 kendo maok tim ne wadgi gimoro amora marach kendo ok dir weche makuodo wi dhano wadgi, 4 Ng’at machayo ng’ama timbene richo mokalo tong’, to miyo joma oluoro Jehova duong’, Ng’at ma rito singruok motimo kata bed ni timo kamano hinye, 5 Ng’at ma holo ji pesane maok odwaro ni oduokne gi gimoro e wiye kendo maok yie kaw asoya kuom joma onge ketho. Ng’at ma timo gigi eki ok gimoro nyal yiengo.

Zaburi 16

Miktam Mar Daudi

1 RITA MABER, Yaye Nyasaye nikech in e kar pondona. 2 Ne awacho ne Jehova ni, "In e Ruodha; onge gima ber machielo ma an go makmana in." 3 To jomaler manie piny, to gin kaka joma nigi duong’ ma ahero gi chunya duto. 4 Joma lawo nyiseche mamoko kuyo margi biro medore. Misengini magi mag remo ok abi olo oko kendo kata nyinggi ok abi hulo gi dhoga. 5 Jehova, isemiya pok mako ra kod okombena; iserita maber gi giga duto. 6 Kiepe mag tong’ maga moro okwako kuonde mabeyo beyo; adier, girkeni maga moro wang’ adier. 7 Abiro pako Jehova ma ng’adona rieko; kata gotieno chunya puonja. 8 Asiko aketo Jehova e nyima ndalo duto. Nikech entie e lweta korachwich, onge gima nyalo buoga. 9 Emomiyo chunya mor kendo lewa yot; ringra bende biro yweyo gi kuwe, 10 nikech ok ibi jwang’a ei liel, kendo ok ibi yie mondo Ng’ati Maler otow. 11 Isenyisa yor ngima; ibiro pong’a gi ilo e nyimi, kendo gi mor mosiko e badi korachwich.

Zaburi 17

Lamo Mar Daudi

1 Yaye Jehova, yie iwinj kwayo n a makare; chik iti ne ywakna, chik iti ne lemona- lamona ok aa e dhok mawuondo ji. 2 Mad chwak michwakago oa kuomi; mad wengeni ne gima kare. 3 Kata obedo ni inono chunya kendo itema gotieno, kata ka itema to ok ibi yudo gimoro kuoma; aseng’ado pacha mogik ni dhoga ok bi timo richo. 4 To kuom gik ma joma moko timo, kaluwore gi wach mowuok e dhogi, an awuon asepogora gi yore jomaundu. 5 Okengega osesiko e yoreni; tiendena pok okier. 6 Aluongi, Yaye Nyasaye, nikech ibiro dwoka; chikna iti kendo winj lamona. 7 Nyisie teko mar herani maduong’, in ma ireso ji gi lweti ma korachwich, joma pondo ne wasikgi kuomi. 8 Rita adimba kaka tong wang’i, panda e bwo tipo mar bwombi, 9 mondo atony e lwet joma richo ma lawa, mondo atony e lwet wasika ma dhano molwora. 10 Gidino chunjegi matek ta, kendo dhogi wuoyo gi wich teko. 11 Giselawa kuonde duto, mi koro gilwora, ka wengegi ochiek, mondo gidira piny. 12 Gichalo sibuor ma nigi kech mar mako le, mana ka sibuor maduong’ mopondo kokichore. 13 Aa malo, Yaye Jehova, chomgi tir, mi igogi piny; resa e lwet joma richo gi liganglani. 14 Yaye Jehova, resa e lwet joma kamago gi lweti, resa e lwet jopinyni ma pokgi nie pinyni. Itieko kech ma joma ihero nigo; yawuotgi nigi chiemo mang’eny kendo gikano mwandu ne nyithindgi. 15 To an, anane wang’i ka ngimana nikare; ka anachiew, abiro romo ka anane kiti kaka ichal.

Zaburi 18

Ne Jatend Wer. Zaburi Mar Daudi Jatich Jehova. Ne Owero Ne Jehova Weche Mag Wendni Kinde Mane Jehova Orese E Lwet Wasike Duto Kendo E Lwet Saulo. Nowacho Niya:

1 Aheri, Yaye Jehova, in e tekra. 2 Jehova en lwandana, en kar pondo mara kendo en jawarna; Nyasacha en lwandana ma apondo kuome. En okumbana, en tung’ mar warruokna, kendo en ohingana. 3 Aluongo Jehova, en mowinjore gi pak, kendo oresa e lwet wasika. 4 Tonde mag tho ne orida matek; kendo ohula mang’ongo mar tho nouma. 5 Tonde mag liel ne orida kendo odhoga matek; gogni mag tho ne ochoma tir. 6 E chandruok ne aluongo Jehova; ne aywak ne Nyasaye mondo okonya. Ne owinjo duonda gie Hekalu mare; ywakna nochopo e nyime, modonjo e ite. 7 Piny notetni kendo oyiengni; kendo mise mag gode noyukni; ne gikirni nikech ne okecho. 8 Iro nodum koa e otuchi mag ume; mach mang’ang’ni nodhuolore kawuok e dhoge, kendo makaa maliel mager nobebni kaa kuome. 9 Notiaro kor polo molor piny; rumbi molil ti ne nie bwo pat tiende. 10 Noidho kerubi eka ofuyo; ne ofuyo matek komoko e bwomb yamo. 11 Noloko mudho raum mare, moume koni gi koni- boche molil ti mag koth manie kor polo. 12 Boche nowuok e ler marieny mane aa kuome, kaachiel gi pe madongo dongo kod mil polo ma piatore. 13 Jehova nomor gie polo; dwond Jal Mamalo Mogik nowinjore. 14 Nochielo asernige mi okeyo wasike mel, nojukogi gi mil polo madongo ma piatore. 15 Holni manie bwo nembe noelore kendo mise mag piny nowe nono kane ikwerogi, Yaye JEHOVA, kane teko mar muya mowuok e otuchi mag umi ogoyogi. 16 Nochopo ira piny koa malo mi okawa; ne ogola oko e kude mag pi matut. 17 Ne oresa e lwet wasika ma roteke, kuom joma ok dwara,mane ohinga gi teko. 18 Ne gimonja e kinde mane an gi masira to JEHOVA nobedo siro mara. 19 Ne okela moketa kama lach; ne oresa nikech chunye ne mor koda. 20 JEHOVA osetimona maber ka oluwore gi timna makare; osechiwona ka oluwore gi ler mar lwetena. 21 Nikech aserito yore JEHOVA; pok atimo marach kuom loko ra weyo Nyasacha. 22 Chikene duto nie nyima; pok alokora aweyo buchene. 23 Asebedo ka aonge ketho e nyime kendo aseritora mondo kik atim richo. 24 JEHOVA osechiwona kaluwore gi timna makare, osechiwona kaluwore gi ler mar lwetena e nyime. 25 Ne joma jo adiera, inyisori kaka jaadiera, kendo ne joma long’o, inyisori kaka ng’ama long’o, 26 ne joma ler, inyisori kaka ng’ama ler, to ne joma yoregi obam, inyisori kaka ng’ama rach. 27 Ireso joma muol to joma wengegi tek idwoko piny. 28 In ema imiyo tacha siko ka liel, Yaye JEHOVA; Nyasacha loko mudho mouma doko ler. 29 Ka ikonya to anyalo monjo mony mar jokedo; ka an gi Nyasacha to anyalo lwenyo ohinga. 30 Nyasaye to yore long’o chuth; wach JEHOVA onge rem moro amora. En okumba ne ji duto ma pondo kuome. 31 Nikech en Nyasaye mane minyalo pimo gi JEHOVA? Koso en ng’a ma en Lwanda, ka ok Nyasachwa? 32 Nyasaye mane osira gi teko kendo oloso yora obedo mokuwe. 33 Nomiyo tiendena ochalo gi tiende mwanda kendo nochunga gi kuwe ewi gode kuonde moting’ore. 34 Otiego lwetena ne lweny; momiyo bedena nyalo dolo atung nyinyo. 35 Isemiya okumba mar warruokni, kendo lweti korachwich osesira; kony mari osemiyo abedo gi duong’. 36 Ne imiya lach ne okangega ma agoyo kendo tiendena ok okier. 37 Ne alawo wasika mi ajukogi; kendo ne ok aloko ra aweyogo nyaka ne atiekogi pep. 38 Ne agoyogi piny maok ne ginyal chung’ aa malo; ne gipodho e bwo tiendena. 39 Nikech ne isira gi teko mar kedo lweny; ne imiyo joma goya onimo e bwoya. 40 Ne imiyo wasika oloko dieng’egi ne an, kendo joma ne ochaya ne atieko. 41 Ne giywak mondo okonygi to onge ng’ama ne nyalo konyogi; ne giywak ne Jehova to ne ok odwokogi. 42 Ne agoyogi adunya kaburu ma yamo tero, ne achodhogi oko ka chuodho mag yore mag dala. 43 Ne iresa e ywaruok gi ji. Ne iketa jatend ogendini; joma ne ok ang’eyo chon notiyona. 44 Sanosano mane giwinjoe humba, ne giwinja; jo pinje maoko nobiro motwere kuoma. 45 Jo pinje maoko chunygi noa kendo ne gibiro ka gitetni ka gia kuonde pondo mag-gi. 46 JEHOVA ngima! Lwandana mondo og wedhi. Kendo Nyasaye mar Warruokna mondo oting’ malo! 47 Nyasaye mane ochulo kuor kara kendo oloyo- ogendini e bwoya; 48 mane oresa e lwet wasika; ne iresa e lwet joma rori. 49 Nikech mano, abiro dendi e dier ogendini YAYE JEHOVA, kendo abiro wero wende pak ne nyingi. 50 Loch maduong’ omiyo ruoth mare, kendo onyiso hera mosiko ne ng’at mowir, ne Daudi kod kothe nyaka chieng’.

Zaburi 19

Ne Jatend Wer. Zaburi Mar Daudi

1 Polo hulo duong’ mar Nyasaye; kor polo nyiso tich mar lwete. 2 Odiechieng’ kodiechieng’ gikeyo wach; otieno kotieno ginyiso rieko 3 Gionge dhok kata weche kata dwondgi ok winji. 4 Kata kamano dwondgi dhi kuonde duto e piny, wechegi osechopo nyaka e giko piny. Osechungo hema e kor polo ne wang’ chieng’, 5 machalo gi wuon kisera mothinyore oko kawuok e kiwanja kendo mana ka jang’wech mongirore moil moikore ni chako ng’wech. 6 Owuok gie tung’ polo konchiel, kendo olworore nyaka koma chielo; onge gima opondo ne liet mare. 7 Chik Jehova long’o chuth, oduogo chuny; buche mag Jehova inyalo geno, gimiyo joma riekogi tin bedo mariek. 8 Chike mag Jehova nikare, gichiwo mor ne chuny. Chike mag Jehova rieny, gichiwo ler ne wang’. 9 Luoro Jehova liw osiko nyaka chieng’. Buche mag Jehova gin adier kendo gin kare kargi gi duto. 10 Gibeyo moloyo dhahabu, moloyo dhahabu malerie moloyo; gimit moloyo mor kich moa e pedni. 11 Gin ema ritogi kelo pok maduong’. 12 En ng’a manyalo ng’eyo kethoge mopondo? Wena kethoga mopondo. 13 Bende geng’ jatichni kuom richo mag wich teko; mad kik gibed gi loch kuoma. Eka anabed maonge ketho, anabed ka aonge gi ketho chik moro maduong’. 14 Mad weche mawuok e dhoga, kod paro manie chunya, obed malong’o e nyimi, Yaye Jehova, Lwandana kendo Jawarna.

Zaburi 20

Ne jatend Wer. Zaburi Mar Daudi

1 Mad Nyasaye duoki ka inie chandruok; mad nying Nyasach Jakobo riti. 2 Mad oorni kony moa kare maler kendo omiyi kony moa Sayun. 3 Mad opar misengni magi duto kendo oyie gi chiwo magi miwang’o pep. 4 Mad omiyi gima chunyi go mbo kendo omi chenro magi duto dhi maber. 5 Wabiro kok gimor ka ilocho kendo wabiro ting’o bendechwa malo e nying Nyasachwa. Mad Jehova chiw gik moko duto mikwaye. 6 Koro ang’eyo ni Jehova reso ng’ate mowir; odwoke gie polo mare maler gi teko ma waro ji mar lwete korachwich. 7 Jomoko ogeno kuom gechegi to jomoko kuom faresegi, to wanto wageno kuom nying Jehova Nysachwa. 8 Gibiro lwar e chonggi mi gipodhi, to wan wabiro aa malo mi wachung’ motegno. 9 Yaye Jehova, res ruoth! Dwokwa ka waluongi!

Zaburi 21

Ne Jatend Wer. Zaburi Mar Daudi

1 Yaye Jehova, ruoth oil nikech teko mimiye. Mano kaka en gi mor maduong’ nikech isemiyo olocho! 2 Isemiye gima chunye gombo kendo pok idagi timone kwayo moa e dhoge. Sela 3 Ne irwake gi gweth momew kendo nisidho osimbo mar dhahabu maliw e wiye. 4 Ne okwayi ngima kendo ne imiyegone imede ndalo nyaka chieng’ manyaka chieng’. 5 Kuom loch mane ichiwo, duong’ mare duong’; isemiye huma gi luor. 6 Adier, isemiye gweth mochwere kendo isemiyo obedo mamor gi mor moa e nyimi. 7 Nikech ruoth ogeno kuom Jehova; kuom hera maok rum mar Jal Mamalo Mogik, ok obi yiengni. 8 Lweteni biro mako wasiki duto; lweti ma korachwich biro ndhiyo joma kedo kodi. 9 E sama ibiro thinyorie nii to ibiro miyo gichal gi kendo ma mach lielie mager. Jehova biro mwonyogi ngili kuom mirimbe mager, kendo mach mare biro tiekogi. 10 Ibiro tieko kothgi mi rum e piny, kendo nyithindgi biro rumo edier ji. 11 Kata obedo ni gichano timoni marach kendo giloso chenro maricho, to ok ginyal loyo; 12 nikech ibiro miyo gilok dierng’egi ka ibiro dimbogi gi atung’ moywa. 13 Yud duong’, Yaye Jehova, kuom tekoni maduong’! Wabiro wer kendo pako nyalo mari.

Zaburi 22

Ne jatend Wer. E Dwol Mar"Akuru Mar Okinyi" Zaburi Mar Daudi

1 Nyasacha, Nyasacha, iweya nang’o? Ang’o momiyo in mabor koda maok inyal resa? In mabor ma ok inyal winjo weche mag churna? 2 Yaye Nyasacha, aywagora odiechieng’ duto to ok idwoka, aywagora gotieno bende maok aling’. 3 To eka ibetekom duong’ kaka Ng’ama Ler; in e pak mar jo-Israel. 4 Kuomi ema wuonewa noketoe genogi; ne gigeni kendo ne iresogi. 5 Ne giywakni kendo ne iwarogi; ne gigeno kuomi mi ne ok gineno wichkuot. 6 An to an mana kudni maok dhano, ng’ama ji duto jaro kendo ma ji ochayo. 7 Ji duto monena jara; gidiro ayany ka gikino wigi. 8 "Ogeno kuom Jehova; koro mondo Jehova okonye ane. Koro mondo orese ane, nikech chunye mor kode." 9 To eka in ema ne igola e ich; ne ichweya mondo agen kuomi kata kane pod adhodho thund mama. 10 Ne oriwa kodi chakre chieng’ mane onyuolae; isebedo Nyasacha aa kinde mane an ei mama. 11 Kik ibed mabor koda, nikech chandruok ni koda machiegni kendo onge ng’ama nyalo konya. 12 Ruodhi mang’eny olwora; ruodhi maroteke moa Bashan olwora koni gi koni. 13 Sibuoche maruto makidho le ma gisemako ong’amo dhogi malach kadwaro ngama. 14 Ipuka oko kaka pi, kendo chokega duto osewil. Chunya olokore odok; oseleny morumo e iya. 15 Tekona osetwo ka balatago, kendo lewa omoko e danda; isepiela e lop tho. 16 Guogi oselwora; oganda mar joma richo oseketa diere, gisetucho lwetena gi tiendena. 17 A n yalo kwano chokena duto; ji ranga aming’a kendo jara. 18 Gipogore lepa e kindgi giwegi kendo gigoyo ombulu ne nangana. 19 To in, Yaye Jehova, kik ibed mabor koda; Yaye, tekra, bi piyo mondo ikonya. 20 Res ngimana kuom ligangla, res ngimana e teko guogi. 21 Resa e dho sibuoche; resa e tunge ruedhi mager. 22 Abiro hulo nyingi ne owetena; abiro paki e nyim chokruok. 23 Un muluoro Jehova, pakeuru! Un nyikwa Jakobo duto, miyeuru duong’. Luoreuru, un koth jo-Israel duto! 24 Nikech pok ochayo kata ojaro sandruok mar joma winjo malit; pok opandone wang’e to osewinjo ywakne mar dwaro kony. 25 Kuomi ema thorro mara mar pak e chokruok maduong’ aye; abiro chopo singruok maga e nyim joma oluori. 26 Joma odhier biro chiemo mi yieng’; joma manyo Jehova biro pake- mad chunjeu bed mangima nyaka chieng’! 27 Tunge piny duto biro paro miduog ir Jehova, kendo dhout ogendini duto biro kulore e nyime, 28 Nikech loch en mar Jehova kendo en ema olocho ewi ogendini. 29 Jomwandu duto manie piny biro chiemo kendo lemo; ji duto madhi piny e lowo biro kulore e nyime- jogo maok nyal siko kangima. 30 Pon mabiro ibiro nyis kuom Ruoth. 31 Gibiro hulo timne makare ne ji mapok onyuol- nikech osetime.

Zaburi 23

Zaburi Mar Daudi

1 Jehova e jakwadha, ok anachand gimoro. 2 Omiyo anindo e lum mang’ich, otelona e geng pige mokuwe, 3 oduogo chunya. Otaya e yore mag tim makare mondo nyinge oyud duong’. 4 Kata bed ni awuotho e holo mar tipo mar tho, to ok analuor gimoro marach, nimar in koda; ludhi gi mikwachi- gin ema gihoya. 5 Iiko mesa e nyima ka wasika neno. Iwiro wiya gi mo; okombena opong’ moo oko. 6 Adier, ber gi hera biro siko ka luwo bang’a ndalo duto mag ngimana, kendo abiro dak e od Jehova nyaka chieng’.

Zaburi 24

Mar Daudi. Zaburi

1 Piny en mar Jehova, kaachiel gi gik moko duto manie iye, piny kod ji duto modakie; 2 nikech ne omiye obetie ewi nembe kendo nogure ewi pige. 3 En ng’a manyalo idho god Jehova? En ng’a manyalo chung’ kare maler? 4 Ng’at man gi lwedo maler gi chuny maler, maok ting’ chunye ne nyasaye ma dhano oloso kata kuong’re gi miriambo. 5 Obiro yudo gweth kuom Jehova kod ber moa kuom Nyasaye ma Jawarne. 6 Kamano e kaka tieng’ mar joma dware chalo, ma manyo wang’i, Yaye Nyasach Jakobo. 7 Ting’uru wiyeu malo, Yaye un dhorangeye; ting’reuru malo, Yaye dhoudi machon, mondo Ruodh duong’ odonji. 8 Ruodh Duong’ni to en ng’a? Jehova Maratego kendo manyalo, Jehova maloyo lweny. 9 Ting’uru wiyeu malo, Yaye un dhora ngeye; ting’giuru malo, un dhoudi machon, mondo Ruodh duong’ odonji. 10 Ruodh duong’ni en ng’a? Jehova Manyalo Gik Moko Duto- En e Ruodh Duong’.

Zaburi 25

Mar Daudi

1 Ating’o chunya malo ne in, Yaye Jehova; 2 In ema ageno kuomi, Yaye Nyasacha. Kik iwe ane wichkuot, kata iyie wasika loya. 3 Onge ng’ama genone nikuomi manyalo neno wichkuot, to joma timo timbe ma achach kayiem ema biro neno wichkuot. 4 Nyisa yoreni, Yaye Jehova, puonja rodegi; 5 taya e adierani, kendo puonja, nikech in Nyasaye ma Jawarna, kendo genona nikuomi odiechieng’ duto. 6 Par, Yaye Jehova, kechni maduong’ gi herani, nikech gisebedo ka gintie nyaka aa chon. 7 Kik ipar richo mane atimo kapod atin kod yorega mag ng’anyo; para kaluwore gi herani, nikech iber, Yaye Jehova. 8 Jehova ber kendo yorege oriere tir; mano emomiyo opuonjo joricho e yorege. 9 Otayo joma muol e gima nikare kendo opuonjogi yore. 10 Yore duto mag Jehova opong’ gi hera kod adiera ne joma rito dwaro duto mag singruokne. 11 Nikech nyingi, Yaye Jehova, wena kethona kata obedo ni oduong’ ahinya. 12 Koro en ng’a moluoro Jehova? Obiro puonje luwo yo moyierne. 13 Obiro dak e nyima momew, kendo nyikwaye nokaw piny kaka girkeni margi. 14 Jehova en osiep joma oluore; omiyo singruok mare ng’ere negi. 15 Wengena osiko kuom Jehova, nikech en kende ema obiro golo tiendena mamoko e obadho. 16 Lokri ira kendo bedna mang’won, nikech adong’ kenda kendo awinjo marach. 17 Chandruok manie chunya osemedore; resa kuom rem ma an go. 18 Rang pek manie chunya kod rem ma an go, kendo gol richona duto. 19 Neye kaka wasika osemedore kendo kaka gichaya gi gero! 20 Rit ngimana kendo iresa; kik iwe ane wichkuot, nikech in ema apondo kuomi. 21 Mad bidhruok gi ngima moriere rita nikech genona nikuomi. 22 War Israel, Yaye Nyasaye kuom chandruok mage duto!

Zaburi 26

Mar Daudi

1 Ng’adna bura kare, Yaye Jehova, nikech e ngimana duto asedak ka aonge ketho; asedak ka ageno kuom Jehova maok adigni. 2 Nona, Yaye Jehova, tema, non chunya gi pacha; 3 nikech herani osiko kanie nyima seche duto, kendo asiko awuotho e adierani. 4 Ok abed piny gi joma wuondore bende ok ariwra gi joma ketore. 5 Achayo chokruok mar joma timo gik maricho kendo atamora mar bet piny gi joricho. 6 Aluoko lwetena kaka ng’ama onge ketho, eka amulo tijegi e hekalu mari, Yaye Jehova, 7 ka alando pakni gi duol maduong’, kendo anyiso timbeni duto miwuoro. 8 Ahero ot kama idakie, Yaye Jehova, kama duong’ni nitie. 9 Kik ikaw chunya kaachiel gi joricho, kik ikaw ngimana kod joma rich chwero remo omako, 10 joma lwetegi oting’o chenro maricho ma lwetegi makorachwich asoya opong’o. 11 To an adak e ngima maonge ketho; yie iwara kendo ikecha. 12 Tiendena onyono kama opie; e chokruok mang’ongo abiro pako Jehova.

Zaburi 27

Mar Daudi

1 Jehova e lerna kendo en e warruokna; en ng’a ma daluor? Jehova e kama ngimana oponde. En ng’a ma dibuoga? 2 Ka joma richo lawa mondo gingam ringra, ka wasika kod joma kedo koda monja, to gibiro kier mi gipodhi. 3 Kata ka jolweny ogoyona ageng’a, to chunya ok bi luor; kata ka lweny otu - gorena, to pod abiro mana bedo gi chir. 4 Gimoro achiel ema akwayo Jehova, ma e gima adwaro moloyo; ni mondo adag e od Jehova ndalo duto mag ngimana, mondo achom wang’a kuom ber mar Jehova kendo amanye e hekalu mare. 5 Nikech chieng’ ma chandruok omaka obiro kana maber e kar dakne; obiro panda e kar pondo mar hembe maler kendo obiro keta piny malo ewi lwanda. 6 Eka wiya biro bedo matin ka ayombo wasigu duto molwora; abiro timo misango mar pak ka akok gimor e hembe maler. Abiro wer kendo abiro loso wende mamit ne Jehova. 7 Winj duonda ka aluongo, Yaye Jehova; kecha kendo idwoka. 8 Chunya wuoyo kuomi kawacho ni, "Many wang’e!" Wang’i, Yaye Jehova, ema abiro manyo. 9 Kik ipandna wang’i, kik iriemb jatichni ka mirima omaki, in ema isebedo jakonyna. Kik idaga kata ijwang’a, Yaye Nyasaye Jawarna. 10 Kata obedo ni wuonwa gi minwa ojwang’a to Jehova biro rwaka. 11 Puonja yori, Yaye Jehova; telna eyo moriere tir nikech joma sanda. 12 Kik ijwang’a ne dwach wasika, nikech joneno mag miriambo oramona matek, ka giyueyona hinyruok. 13 To pod aramo e wachni: pod abiro neno ber Jehova e piny joma ngima. 14 Rit Jehova; bed motegno kendo jiw chunyi kendo rit Jehova.

Zaburi 28

Mar Daudi

1 In ema aluongi, Yaye Jehova Lwandana; kik idinna iti. Nikech ka isiko iling’ aling’a, to abiro chalo gi joma osedhi e bur. 2 Winj ywakna mondo ikecha e sama aluongi modo ikonya, e sama ating’o bedena malo kochomo kari Maler Mogik. 3 Kik iywaya oko gi joma richo, gi joma timo gik maricho, ma wuoyo gi kuwe gi jowetegi to opando sigu e chunygi. 4 Chulgi kuom timbegi maricho kendo kuom tijegi maricho; chulgi kuom gik ma lwetegi osetimo kendo dwok kuomgi gik mowinjore gi timbegi. 5 Nikech ok gidew tije mag Jehova kod gik ma lwetene osetimo, obiro mukogi mi ogogi piny kendo ok nochak ogergi mi gichung’ kendo. 6 Jehova mondo opaki nikech osewinjo ywakna ma akwayogo kony. 7 Jehova e tekra kendo en e okumbana; chunya ogeno kuome kendo ayudo kony kuome. Chunya gwecho gi mor kendo abiro goyone erokamano gi wer. 8 Jehova e tekre joge, en ohinga mar resruok ne ng’ate mowir. 9 Res jogi kendo gwedh girkeni mari; bed jakwadhgi kendo ting’gi malo nyaka chieng’.

Zaburi 29

Zaburi Mar Daudi

1 Chiwneuru Jehova, Yaye un joroteke, chiwneuru Jehova duong’ gi teko. 2 Chiwneuru Jehova duong’ mowinjore gi nyinge; lamuru Jehova e dier lerne mang’ang’ni. 3 Dwond Jehova nie wi pige; Nyasaye mar duong’ mor kaka mor polo, Jehova mor ewi pige madongo. 4 Dwond Jehova nigi teko, dwond Jehova nigi duong’. 5 Dwond Jehova muko bepe mag sida, Jehova chodo bepe mag sida mag Lebanon matindo tindo. 6 Omiyo Lebanon chikore ka nyaroya, Got Hemon leng’ore ka rwadh bungu mapod tin. 7 Dwond Jehova chweto, ochweto gi ler mager mar mil polo 8 Dwond Jehova yiengo piny motimo ongoro; Jehova yiengo ongoro mar Kadesh. 9 Dwond Jehova dolo bepe mag dubu kendo pielo bungu piny mi dong’ nono kendo ei hekalu mare ji duto kok ni, " Duong’!" 10 Jehova obetekom loch mare ewi ataro; Jehova obetekom loch kaka Ruoth nyaka chieng’. 11 Jehova miyo joge teko; Jehova gwedho joge gi kuwe.

Zaburi 30

Zaburi. Wer Mar Gwedho Hekalu Mar Daudi.

1 Abiro dhiali, Yaye Jehova, nikech ne igola oko e bur matut kendo ne ok iyiene wasika mondo obed mamor kuoma. 2 Yaye Jehova Nyasacha, ne aluongi mondo ikonya kendo ne ichanga. 3 Yaye Jehova, ne igola oko e liel, ne iresa ka noyudo aridora piny e bur matut. 4 Werneuru Jehova, un joge maler; pakuru nyinge maler. 5 Nikech mirimbe bedo mana kuom kinde matin kende, to ng’wonone to siko nyaka chieng’. 6 Kane agalo ni adhi maber, ne awacho ni, "Onge gima biro bwoga." 7 Yaye Jehova, kane itimona ng’wono, ne imiyo goda ochung’ motegno; to kane ipando wang’i, to piny nochama. 8 In emane aluongi, Yaye Jehova; Jehova emane aywakne mondo okecha. 9 "Ohala mane ma thona biro kelo, dhi mara e liel biro konyi gang’o? Lo bende nyalo paki adier? Be dohul adierani adier? 10 Winja, Yaye Jehova, kendo kecha; Yaye Jehova bed konyruok mara." 11 Ne iloko nduru mane agoyo olokore miel; ne igolo lawa mar kuyo mi irwakona mor, 12 mondo chunya owerni kendo kik oling’. Yaye Jehova Nyasacha, abiro goyoni erokamano nyaka chieng’.

Zaburi 31

Ne Jatend Wer. Zaburi Mar Daudi

1 Kuomi, Yaye Jehova, ema aponde, kik iwe mondo ane wichkuot; resa kuom tim makare mari. 2 Lok iti ira, bi piyo mondo ikonya; bed lwandana ma aponde, ohinga motegno manyalo resa. 3 Kaka in lwandana kendo ohingana, telna kendo itaya nikech nyingi. 4 Gola oko e obadho mochikna nikech in e kar pondona. 5 Achiwo chunya e lweti; resa, Yaye Jehova, Nyasaye mar adiera. 6 Asin gi joma otwere gi nyiseche manono ma dhano oloso; ageno kuom Jehova. 7 Abiro bedo mamor kendo moil kuom herani, nikech ne ineno chandruokna, kendo ne ing’eyo lit mar chunya. 8 Ok iseketa e lwet jasigu to iseguro tiendena kama lach. 9 Kecha, Yaye Jehova, nikech chunya winjo marach; wengena kuyo kendo chunya gi ringra bende nigi lit. 10 Ngimana rem chamo kendo higni maga opong’ gi chur; tekona rumo nikech pek ma an go kendo chokena doko mayomyom. 11 Nikech wasigu olwora mang’eny, jobuta koro ochaya gi chunygi; alich koda ka ne osiepena kendo joma onena e wang’ yo ringa. 12 Wigi owil koda mana kagima ne asetho chon koro achalo mana gi agulu motore. 13 Nikech awinjo ayany mang’eny ma ji yanyago, nitie bwok e alworana koni gi koni; gikuodho kaka digitimna marach kendo gichano mar kawo ngimana. 14 To ageno kuomi, Yaye Jehova; awacho ni, "In e Nyasacha." 15 Ndalona nie lweti; resa e lwet wasika kendo kuom joma lawa. 16 Mad wang’i rieny kuom jatichni; resa gi herani maok rem. 17 Kik iwe wiya kuodi, Yaye Jehova, nikech aywagorani; to we joma timbegi richo one wichkuot kendo ginindi ka giling’ thi ei liel. 18 Mi dhogi mariambo mondo oling’; nikech sungagi kod chuny marach ma gin go omiyo giwuoyo gi wichteko kuom joma kare. 19 Mano kaka berni duong’, ber mikano ne joma oluori, mimiyo joma opondo kuomi ka ji duto neno. 20 Ipandogi ne chenro maricho mag ji ka in iwuon ibedo butgi kaka kar pondo margi; iritogi maber e kar dak mari kuom lep mahangogi. 21 Pak odog ne Jehova, nikech ne onyisa herane maduong’ kane an e dala ma wasigu ogoyona ageng’a. 22 Kane achiedhnade omaka to ne awacho ni, "Opoga kodi!" Kata kamano ne iwinja ka ayuakni mondo ikecha kane aluongi mondo ikonya. 23 Heruru Jehova un joge maler duto! Jehova rito ngima joma jo adiera, to josunga to ochulo moromo chuth. 24 Beduru motegno kendo jiwuru chunyu, un duto mugeno kuom Jehova.

Zaburi 32

Mar Daudi Maskil

1 Ogwedh ng’at ma kethone owene, ma richone oum. 2 Ogwedh ng’at ma richone Jehova ok kwan ni mage kendo ma wuondruok onge chunye. 3 Kane aling’ to chokena ne ochiyore kane achur odiechieng’ duto ma ok ayue. 4 Nikech odiechieng’ gotieno lweti ne pek kuoma; tekrena ne oduono mana kaka timorega e liet mar ndalo oro. Sela 5 Eka ne anyisi richona kendo ne ok apando ketho chik maga. Ne awacho ni, "Abiro hulo ketho chik maga ne Jehova"- kendo ne iweyona ketho mane richona okelo. Sela 6 Kuom mano, owinjore ji duto moluoro Nyasaye olami kapod inyalo yudi; adier, ka pige madongo otugore, to ok gibi chopo ire, 7 In e kar pondona; ibiro rita e chandruok kendo ibiro lwora gi wende mag loch. Sela 8 Abiro tiegi kendo puonji e yo mon- ego ilu; abiro ng’adoni rieko kendo abiro rangi maber. 9 Kik ichal gi farese kata gi nyumbu, maonge gi rieko manyaka chiki mana ka otwe dhoge kendo iywayo gi kamba, nono to ok gibi buti. 10 Lit mochomo joma timbegi richo ng’eny, to hera maok rem mar Jehova olworo ng’at mogeno kuome. 11 Beduru moil kuom Jehova, kendo beduru mamor, un joma kare; weruru, un duto ma urieru tir gie chunyu!

Zaburi 33

1 Weruru gimor ne Jehova, un joma kare; en gima owinjore mondo joma oriere tir opake. 2 Pakuru Jehova gi nyatiti; losneuru wer mamit e gir wer man gi tonde apar. 3 Werneuru wer manyien; nditneuru wer kugoyone gig wer mong’ith kendo gouru koko nikech umor. 4 Nikech wach Jehova nikare kendo en adier; en jaadiera e gik moko duto motimo. 5 Jehova ohero tim makare kod ratiro; piny duto opong’ gi herane ma ok rem. 6 Polo ne olosi gi wach Jehova, chwech mang’ang’ni mathoth mokalo akwana manie igi much dhoge ema noloso. 7 Ochoko pige mag nembe madongo e tawo; oketo kut e dere. 8 Piny duto mondo oluor Jehova; ji duto manie e piny mondo okulrene 9 Nikech ne owuoyo mipiny obetie, nogolo chik mi ochung’ mongirore. 10 Jehova miyo chenro mag pinje bedo nono; othiro thorro ma ogendini nigo. 11 To chenro mag Jehova to siko kochung’ nyaka chieng’; ochopo thorro duto manie chunye e tienge duto. 12 Ogwedh piny ma Nyasache en Jehova, oganda mane oyiero kaka girkeni mare. 13 Jehova ng’iyo piny gie polo kendo oneno dhano duto; 14 ong’iyo ji duto modak e piny gie kar dakne e polo- 15 en magero chunje ji duto, kendo manono gik moko duto ma gitimo. 16 Onge ker minyalo reso nikech en gi jolweny mang’eny; bende onge jakedo manyalo tony nikech tekone ng’eny. 17 Geno yudo resruok kuom faras en gima nono kata obedo ni en giteko mang’eny to ok onyal reso ng’ato. 18 To wenge Jehova nikuom joma oluore, kuom joma geno margi ni kuom herane maok rem, 19 mondo oresgi e tho kendo oritgi gibed mangima e kech. 20 Warito Jehova gi geno; en e konyruokwa kendo okumbawa. 21 Chunywa mor kuome, nikech wageno kuom nyinge maler. 22 Mad herani maok rem bed kuomwa, Yaye Jehova, mana kaka waketo genowa kuomi.

Zaburi 34

Mar Daudi. Kane Owuondore Ni En Janeko E Nyim Abimelek, Mane Oriembe Mi Oa Odhi

1 Abiro dhialo Jehova kinde duto; pakne biro siko e dhoga. 2 Chunya biro sungore kuom Jehova, joma winjo marach mondo owinji kendo obed mamor. 3 Miuru Nyasaye duong’ kaachiel koda; wating’uru nyinge malo kaachiel. 4 Ne amanyo Jehova, kendo nodwoka; ne oresa e luoro maga duto. 5 Joma oketo genogi kuome rieny; onge sa moro amora ma lela wengegi nyiso ni wigi okuot. 6 Ng’at ma jadhierni noluong o, kendo Jehova nowinje; ne orese mogole e chandruok mage duto. 7 Malaika mar Jehova oumo alwora mar joma oluore kendo oresogi. 8 Bil mi ine ni Jehova ber; ng’at mapondo kuome ogwedhi. 9 Luor Jehova, un joge maler, nikech joma oluore ok chand gimoro amora. 10 Sibuoche nyalo ol kendo kech nyalo kayogi, to joma manyo Jehova ok ochando gima ber moro amora. 11 Biuru nyithinda winjauru. Abiro puonjou luoro Jehova. 12 Ng’ato ang’ata kuomu mohero ngima kendo magombo neno ndalo mang’eny mabeyo, 13 mondo ogeng’ lewe kik tim gima rach kendo otam dhoge kik wach miriambo. 14 Lokri iwe richo kendo itim maber; many kuwe kendo ilawe matek. 15 Wenge Jehova ni kuom joma kare kendo itene winjo ywakgi; 16 wang’ Jehova ger gi joma timo gima rach, kendo omiyo wich wil kodgi e piny. 17 Joma kare ywagore kendo Nyasaye winjogi; oresogi e chandruokgi duto. 18 Jehova ni machiegni gi joma chunygi otur kendo owaro joma chunygi muol. 19 Ng’at makare nyalo bedo gi chandruok mang’eny, to Jehova rese kuom - gi duto; 20 orito chokene duto, ma kata achiel kuomgi ok notur. 21 Timbe maricho biro nego ng’ama timbene richo, to joma kedo gi joma kare bura biro loyo. 22 Jehova reso jotichne; onge ng’ato kata achiel mopondo kuome ma bura biro loyo.

Zaburi 35

Mar Daudi

1 Kedi, Yaye Jehova, gi joma kedo koda; gori gi joma goya. 2 Kaw kuot gi okumba; aa malo mondo ibi ikonya. 3 Mil tong’ gi chuma madhoge bith mar kedo ibuoggo joma lawa. Wach ne chunya ni, "An e warruokni." 4 Mad joma dwaro kawo ngimana ne wichkuot gi achaya. Mad joma chanona hinyruok, chunygi aa mi gigom gidogi. 5 Mad gichal gi mihudhwe ma yamo tero, ka malaika mar Jehova riembogi mabor; 6 mad yore ma giluwo lil ti kendo bed makier-kier ka malaika mar Jehova lawogi. 7 Nikech gichikona gogo margi kayiem kendo gikunyona bur kayiem; 8 mad kethruok jukgi apoya ka gikiamad gogo ma gisechiko gajgi; mad gilwar ei bur ma kargi lal nono. 9 Eka chunya noil kuom Jehova kendo nomor kuom warruokne. 10 An duto, ringra gi chunya, anahul ni, "En ng’a machalo kodi, Yaye Jehova." Ireso jodhier e lwet joma nigi teko moloyogi, Adier, ikonyo jodhier gi jochan kuom joma mayogi. 11 Joneno ma wengegi tek sudo nyime; gipenja kuom gik ma akiya gimoro amora kuomgi. 12 Gichula rach kar ber, kendo giweyo chunya kochwanyore. 13 To eka ginto kane gituo gihewore to ne arwako law ywak kendo ne abolora atweyo chiemo. Ka lamona noduogona maok oduoki, 14 ne awuotho koni gi koni ka chunya lit mana kagima aywago osiepna kata owadwa. 15 To kane achwanyora, ne gichokore kaachiel gi mor; jomonjo nochokorena sama akiya ne gisiko ka giketho nyinga. 16 Kaka ne ok giluoro Nyasaye, ne gijara ka gichano timona marach, ne gikayona lekegi. 17 Yaye Ruoth, ibiro siko kineno gigi nyaka karang’o? Res ngimana kuom kethruok duto mag-gi. Akwayi ni ires ngimana ma nengone tek e lwet sibuochegi. 18 Abiro goyoni erokamano e chokruok maduong’; abiro paki e dier oganda maduong’mochokore kaachiel. 19 Kik iyiene jogo osungre ni gisenyala, joma obedo wasika maonge gima omiyo; kik iyie joma ochaya maonge gimoro sigre gi wengegi mar timona marach. 20 Ok giwuo gi kuwe, to gichano neno mag miriambo kuom joma odak mos e piny. 21 Giyawona dhogi maduong’ kendo giwacho ni, "Haa! Haa! Wasenene gi wengewa wawegi." 22 Yaye Jehova, iseneno gini; kik iling’. Kik ibed koda mabor, Yaye Jehova. 23 Aa malo, kendo chungi mondo ikonya! Kedna, Yaye Nyasacha kendo Ruodha. 24 Yala kichwaka kuom timni makare, Yaye Jehova Nyasacha; kik iyienegi gisungre ni gisenyala. 25 Kik iwe giwach e chunygi ni, "Ero, otimorene mana kaka ne wadwaro." Kata giwach ni, "koro wasemuonye ngili." 26 Mad ji duto mamor nikech chandruokna one wichkuot kendo pachgi olal; mad joma kaworena orwaknegi wichkuot gi achaya. 27 Mad joma mor kuom chwak michwakago okog gi ilo kod mor; mad gisik ka giwacho kinde duto ni, "Jehova mondo oting’ malo en ma omor gi dhi maber mar jatichne." 28 Lewa biro loso kuom timni makare kendo kuom pakni duto odiechieng’ duto.

Zaburi 36

Ne Jatend Wer. Daudi Jatich Jehova

1 Ote moro nie chunya kuom richo ma ng’ama timbene richo timo: Ok oluoro Nyasaye; wang’e tek. 2 Nikech chunye wuonde kendo owuondore kende, chunye wuonde asasa maok onyal neno kata chayo richone. 3 Weche mawuok e dhoge richo kendo gin wuond; oseweyo bedo mariek kod timo maber. 4 Kata e otandane ochano timo gima rach; oketore mar luwo yor richo kendo ok otamre gima rach. 5 Herani chopo e polo, Yaye Nyasaye; adierani chopo nyaka ewi lwasi 6 Timni makare chalo gi gode madongo, ratiro mari chalo gi kut mang’ongo. Yaye Jehova, in ema irito ngima dhano gi le 7 Mano kaka herani maok rem nengone duong’! Joma idewo kaachiel gi ji ajia yudo kar pondo margi e bwo tipo mar buombeni. 8 Gichamo chiemo modhur e udi ka gimor; imiyogi math moa e aochi mar mor. 9 Nimar in ema in gi soko mar ngima; e lerni ema wanenoe ler. 10 Med hero joma ong’eyi, med nyiso timni makare ne joma oriere tir gie chunygi. 11 Mad tiend joma sungore kik nyona, kata lwet joma timbegi richo gola kama antie. 12 Neye kaka joma timo gik maricho oriere piny kopodho osebogi piny maok ginyal aa malo!

Zaburi 37

Mar Daudi

1 Kik chunyi chandre nikech joma richo kata chunyi gomb joma timo gik mariccho; 2 nikech gibiro ner mapiyo mana kaka lum; gibiro tho mi gilal nono mapiyo mana kaka yiende mang’ich. 3 Gen kuom Jehova kendo tim maber. Eka inidag e piny kendo inichiem gi mor e lek maber. 4 Bed mamor asasa kuom Jehova eka obiro miyi gik moko duto ma chunyi gombo. 5 Ket yori ne Jehova; gene eka obiro timo kama. 6 Obiro miyo timni makare rieny ka ler mar okinyi, ratiro makori bende biro chalo gi wang’ chieng’ ma rieny odiechieng’ tir. 7 Bed mos e nyim Jehova, kendo rite kihori mos; kik chunyi chandre ka ji dhi maber, ka gichopo chenrogi maricho. 8 Geng’ mirima kendo lokri iwe ich wang’ kik chunyi chandre- okelo mana rach. 9 Nikech joma richo ibiro ng’ad kargi oko, to joma ogeno kuom Jehova piny biro bedo margi. 10 Kinde matin nono to joma timbegi richo ok bi betie; kata ibi imanygi to ok ibi yudogi. 11 To joma muol piny biro bedo margi kendo gibiro winjo maber ka gin gi kuwe maduong’. 12 Joma timbegi richo chano timo marach ni joma kare kendo gikayo negi lekegi; 13 to Ruoth nyiero joma timbegi richo, nimar ong’eyo ni odiechieng’-gi biro. 14 Joma timbegi richo wuodho liganglagi kendo gidolo atungegi mondo gichiel jodhier gi jochan piny, mondo gineg joma yoregi oriere tir. 15 To ligengnigi biro chwoyo adundogi giwegi, kendo atungegi biro tur. 16 Gima tin ma ng’at makare nigo ber moloyo mwandu mathoth mag joma timbegi richo; 17 nikech teko mar joma timbegi richo ibiro kethi, to Jehova ting’o ng’at makare malo. 18 Ndalo mag joma onge ketho ong’ere ne Jehova, kendo gir keni margi biro siko nyaka chieng’. 19 E kinde mag masira mopore ok gibi ne r, kendo gibiro bedo gi chiemo mathoth ndalo kech. 20 To joma timbegi richo biro lal nono: Wasik Jehova biro chalo gi ber mar thiepee manie pap, gibiro lal nono gibiro lal nono kaka iro. 21 Joma timbegi richo holo ji gik moko to ok chul, to joma kare to chiwo gi ng’wono; 22 joma Jehova og wedho piny biro bedo margi, to joma okuong’o ibiro ng’ad kargi oko. 23 Ka Jehova mor gi yor ng’ato, to omiyo okangege bedo mojing’; 24 Kata ka ochwanyore to ok obi podho nikech Jehova ting’e malo gi lwete. 25 Nyaka aa e tin-na mi koro adoko ng’ama duong’ pok aneno ka joma kare ojwang’ kata ka nyithindgi kwayo ji kuon. 26 Kinde duto ging’won kendo giholo ji gigegi nono; nyithindgi ibiro gwedhi. 27 Lokri iwe rach mondo itim maber; eka inidag e piny nyaka chieng’. 28 Nikech Jehova ohero joma jo ratiro, kendo ok obi jwang’o joge ma jo adiera. Ibiro ritgi maber nyaka chieng’, to koth joma timbegi richo ibiro ng’ad kargi oko; 29 joma kaare piny biro bedo margi kendo gibiro dak e iye nyaka chieng’. 30 Dho ng’at makare hulo rieko kendo lewe wacho gima ratiro. 31 Chik mar Nyasaye nie chunye; omiyo tiendene ok kier. 32 Joma timbegi richo nindo piny karito joma kare ka gidwa tieko ngimagi; 33 to Jehova ok bi weyogi e lwetgi kata yie bura logi sama iyalogi. 34 Rit Jehova kendo lu yore. Obiro ting’i malo mi omi piny bed mari; ka joma richo ong’ad kargi oko to ibiro neno gi wang’i. 35 Aseneno ng’ama timbene richo kendo ma kwiny kadhi maber mana ka yien mang’ich moti e lo mowinjore kode. 36 To ne okalo kamano piyo piyo nono kendo ne ok ochak onene, kata ne omanye to ne ok nyal yude. 37 Par kit ngima joma onge ketho, som chal joma ngimagi oriere, ng’ama ohero kuwe nigi geno mar dak aming’a. 38 To joricho duto ibiro tieki, joma timbegi richo ibiro ng’ad ndalog i mabiro. 39 Warruok mar joma kare aa kuom Jehova; en e kar pondo margi e ndalo mar chandruok. 40 Jehova konyogi kendo resogi oresogi e lwet joma timbegi richo kendo owarogi, nikech gipondo kuome.

Zaburi 38

Zaburi Mar Daudi. Kwayo

1 Yaye Jehova, kik ikwe ra ka iyi owang’ kata ikuma ka mirima mager omaki. 2 Nikech aserni magi osechwoy a, kendo lweti oselwar kuoma. 3 Mirimbi mager osemiyo ringra obedo maonge ngima maber; chokena ok winj maber nikech richona. 4 Ketho ma asekethogo obara ndas mana ka misigo mapek mohinga ting’o. 5 Adhondena otimo tutu kendo dung’ marach nikech fupa mar timo richo. 6 Adolora kendo adwokora piny chuth odiechieng’ duto, awuotho koni gi koni, ka akuyo. 7 Onding’a rama gi rem machicho; ringra onge gi ngima maber. 8 Denda ool kendo tekra orumo chuth; achur nikech chunya lit. 9 Gik ma chunya gombo duto ong’ereni maber, Yaye Jehova; chur ma achurgo ok opondoni. 10 Chunya gwecho, tekra orumo; wengena otimo mudho. 11 Osiepena gi anyuolana badhorena nikech adhondena; jobuta otang’ koda. 12 Joma dwa kawo ngimana ochiko otegogi, joma dwa hinya chano kaka ginyalo tieka chuth. Gichano miriambo odiechieng’ duto. 13 Achalo ng’ama ite odino, maok nyal winjo wach, mana ka momo ma ok nyal yawo dhoge; 14 Aselokora koro achalo ng’at ma ok winj wach, ma dhoge ok nyal dwoko wach. 15 To in ema ariti, Yaye Jehova, kendo ang’eyo ni ibiro dwoko, Yaye Ruoth Nyasacha. 16 Nimar ne awacho ni, "Kik iyienegi gisungre ni gisenyala kata gikawrena ka tienda okier." 17 Nimar achiegni podho, kendo rem ma an-go osiko koda. 18 Ahulo kethona; richona chando chunya 19 Wasika moramona ng’eny ndi; joma ochaya maonge gima omiyo thoth mokalo akwana. 20 Joma chulo rach kuom ber ma asetimonegi ketho nyinga ka an to alawo gima ber. 21 Yaye Jehova, kik ijwang’a; kik ibed mabor koda, Yaye Nyasacha. 22 Bi piyo mondo ikonya, Yaye Ruoth Jawarna.

Zaburi 39

Ne Jatend Wer. Ne Jeduthun. Zaburi Mar Daudi

1 NE AWACHO ni, "Abiro ritora e yorena, kendo abiro rito lewa kik otim richo; abiro tweyo dhoga gi waya seche duto ma joma timbegi richo ni buta." 2 To e seche mane ok awuo kendo aling’ mos, kane ok awach gimoro amora maber, pek manie chunya nomedore. 3 Chunya nodoko maliet e iya kendo kane amedo paro, mach noliel; eka ne ating’o dhoga mi awuoyo: 4 "Yaye Jehova, nyisa giko mar ngimana kod kar romb ndalona; mi ang’e kaka ngimana rumo piyo. 5 Iseketo ndalona obedo machiek ka bad dhano; kar romb higni maga ok gimoro e nyimi, ngima dhano ka dhano en mana muya nono. 6 Dhano odich ka wuotho koni gi koni to en mana tipo nono, orikni gi tijene mapile kayiem; ochoko mwandu mathoth ka ok ong’eyo ng’ama obiro weyonegi. 7 "To koro, Yaye Ruoth, en ang’o ma amanyo? Genona ni kuomi. 8 Resa kuom ketho maga duto; kik imi abedi ng’ama joma ofuwo jaro. 9 Ne aling’ thi, kendo ne ok anyal yawo dhoga, nikech in ema isetimo ma. 10 Gol chwatni kuoma; goch ma lweti goyago ohinga. 11 Ikwero kendo ikumo ji nikech richogi; itieko mwandugi mana ka thuth- dhano ka dhano en mana muya nono. 12 "Winj lamona, Yaye Jehova, chik iti ne lamona ma adwarogo kony; kik idin iti ne ywakna, nikech adak kodi mana ka jadak, an mana wendo kaka kwerena duto ne gin. 13 We ng’iya, mondo achak abed moil kendo kapok adar aweyo pinyni mi alal e wang’ ji.

Zaburi 40

Ne Jatend Wer. Mar Daudi. Zaburi

1 Ne arito Jehova ka ahora mos; ne olokore ira mi owinjo ywakna. 2 Ne oywaya oko e bur motimo otodo, ne ogola e chuodho gi thidhya. Ne oguro tiendena e lwanda kendo nomiya kama otegno mondo achungie. 3 Ne oketo wer manyien e dhoga, wer mipakogo Nyasachwa. Ji mang’eny biro neno mi bed maluor kendo gibiro keto genogi kuom Jehova. 4 Ng’at moketo Jehova geno mare en ng’at mog wedhi, ng’at maok many kony kuom josunga, kata kuom joma lokore mondo olam nyiseche mag miriambo 5 Ranyisi misetimo thoth, Yaye Jehova Nyasacha. 6 Misengni gi chiwo ne ok ihero to ita ema iseyawo; misengni miwang’o pep kod chiwo migo l ogo richo ne ok idwaro. 7 Eka ne awacho ni, "Era e, asebiroondiki kuoma e Ndiko modol. 8 A gombo timo dwarono, Yaye Nyasacha; chikni ni ei chunya." 9 Alando tim makare e chokru o k maduong’, ok aumo dhoga, mana kaka ing’eyo, Yaye JEHOVA. 10 Ok apando timni makare e chunya; awuoyo kuom adierani gi warruokni. Ok apando herani gi adierani ne chokruok maduong’. 11 Kik itamri kecha, Yaye Jehova; mad herani gi adierani osik ka rita. 12 Nikech chandruok mokalo akwana olwora; richoga osejuka kendo ok anyal neno. Ging’eny moloyo yie wiya, kendo chunya onyosore gie iya. 13 Bed mamor, Yaye Jehova, mondo iwara. Bi piyo, Yaye Jehova, mondo ikonya. 14 Mad ji duto madwaro kawo ngimana wigi okuodi kendo pachgi olal; mad ji duto ma chunygi gombona tho oriemb odogi ka wigi okuot. 15 Mad joma nyiera ni, "Haa! Haa!" ng’eng’ ka gineno wichkuot. 16 To mad ji duto ma manyi bed moil kendo mamor kuomi; mad joma ohero warruok mari sik kawacho ni, "Jehova mondo oting’ malo!" 17 Anto adhier kendo achando, mad Ruoth para e. In e jakonyna kendo jawarna; Yaye Nyasacha, kik ideki.

Zaburi 41

Ne Jatend Wer. Zaburi Mar Daudi

1 Ng’ama paro joma ok nyal en jahawi; Jehova rese ka chandruok omake. 2 Jehova biro rite kendo biro miyo obed mangima; obiro gwedhe e piny kendo ok obi jwang’e e lwet wasike. 3 Jehova biro rite e otandane mar tuo kendo obiro miyo oa malo e kitandane ka ohewore. 4 Ne awacho ni, "Yaye Jehova, kecha; changa, nikech asekethoni." 5 Wasika wuoyo kuoma ka chunygi rach koda, ka giwacho ni, "Obiro tho karang’o mondo nyinge olal chuth?" 6 Saa asaya ma ng’ato obiro nena, to owuondore ni owuoyo kuoma maber, to ei chunye to ofwambo weche mondo okethgo nyinga eka oa odhi kendo okeyo wechego ne ji. 7 Wasika duto kuotho kaachiel kaka digihinya, chunygi paro gik maricho mogik mondo ohinya, ka giwacho ni, 8 "Tuo marach osekete piny; ok obi aa malo kendo koa kama oninde." 9 Koda ka osiepna mangita gi del, mane ageno kuome, en mane apogone kuona bende osethirona. 10 To in, Yaye Jehova, yie ikecha; chunga malo, mondo achulgi. 11 Ang’eyo ni chunyi mor koda, nimar jasika ok loya. 12 Iting’a malo nikech timna makare kendo ichunga e nyimi nyaka chieng’. 13 Opak Jehova, Nyasach Israel, nyaka chieng’ kendo nyaka chieng’. Amin kendo Amin.

Zaburi 42

Ne Jatend Wer. Maskil Mar Yawuot Kora.

1 Mana kaka mwanda gamo yueyo kamanyo kuonde ma pi nitie, e kaka chunya gami, Yaye Nyasaye. 2 Chunya riyo oloyo mar dwaro Nyasaye. Riyo mar dwaro Nyasaye mangima. Sa mane ma anyalo wuok adhi arom gi Nyasaye? 3 Aseywak mi pi wang’a ochalo chiemba odiechieng’ gotieno, ka ji to wachona odiechieng’ duto ni, "Ere Nyasachi?" 4 Aparo gigi duto sama chunya gombi: kaka ne ajadhiga gi oganda maduong’ ka atelone ji moruowo kadhi e od Nyasaye. Ka akok gimor kendo agoyo erokamano E dier oganda maduong’ matimo nyasi gi mor. 5 Ang’o momiyo inyosori, Yaye chunya? Ang’o momiyo ibuok gie iya? Ket geno mari kuom Nyasaye, Nikech pod abiro pake, kaka Jaw a rna kendo Nyasacha. 6 Chunya onyosore gie iya; Omiyo abiro pari gie piny mar Jordan, gie kuonde moting’ore mar Harmon, gie wi got Mizar. 7 Kut luongore gi kut ei aburu ru mamor; apaka magi duto gi ahiti mager oseywera motera. 8 Nyasaye chiko herane godiechieng’ to gotieno to wende nie iya; lamo ma alamogo Nyasach ngimana. 9 Awacho ne Nyasaye ma lwandana ni, "Ang’o momiyowiyi osewil koda Ang’o momiyo asiko gi kuyo Ka jasigu sanda?" 10 Chokena tho omako kendo rama malit seche ma joma kedo koda yanya kochaya, ka giwachona odiechieng’ duto ni, "Ere Nyasachi?" 11 Ang’o momiyo inyosori, Yaye chunya? Ang’o momiyo ibuok gie iya? Ket genoni kuom Nyasaye, nikech pod abiro pake, ni Jawarna kendo Nyasacha.

Zaburi 43

1 Ng’adna bura kare, Yaye Nyasaye, kendo chwaka e piny mokia Nyasaye; resa e lwet joma wuondore kod joma timbegi richo. 2 In Nyasaye ma apondo kuome. Koro to ijwang’a nang’o? Ang’o momiyo nyaka asik ka akuyo, ka jasigu sanda? 3 Or ler mari kod adierani, ornagi mondo gitaya; yie mondo gikela nyaka godi maler, nyaka kama idakie. 4 Eka anadhi kama ler mar Nyasaye, nyaka ir Nyasaye, ma en ilo mara kendo mor mara. Abiro paki gi nyatiti, Yaye Nyasaye kendo Nyasacha. 5 Ang’o momiyo inyosori, Yaye chunya? Ang’o momiyo ibuok gie iya? Ket geno mari kuom Nyasaye, nikech pod abiro pake ni Jawarna kendo Nyasacha.

Zaburi 44

Ne Jatend Wer. Mar Yawuot Kora. Maskil

1 Yaye Nyasaye, wasewinjo gi itwa; kendo wuonewa osenyisowa gik mane itimo e ndalogi, ndalo machon gilala. 2 Ne iriembo ogendini gi lweti iwuon kendo ne iguro kwe r ewa kargi; ne itieko ogendini mi imiyo kwerewa okar. 3 Ne ok giloyo piny gi liganglagi kendo kata bedegi bende ne ok okelo negi loch; to lweti makorachwich, badi iwuon, kod ler mar wang’i ema nomiyo gilocho nimar ne iherogi. 4 In e Ruodha kendo Nyasacha, magolo chik mondo Jakobo olochi. 5 Wasiro wasikwa nikech in, wanyono joma kedo kodwa kuom nyingi. 6 Atung’ mara ok ageno kuome, liganglana be ok mi alochi; 7 to in ema imiyowa loch ewi wasikwa, imiyo joma kedo ko dwa neno wichkuot. 8 Sungawa ni kuom Nyasaye odiechieng’ duto kendo wabiro pako nyingi nyaka chieng’. Sela 9 To koro isedagiwa kendo isedwokowa piny; tinde ok idhi e kedo gi jolwenjwa. 10 Ne imiyo wang’wel e nyim wasigu kendo joma kedo kodwa oseyakowa. 11 Ne ijwang’owa mondo ongamwa ka rombe kendo isekeyowa e dier pinje. 12 Ne iuso jogi nono li, maonge ohala mane iyudo kuom usogi. 13 Isemiyo wadoko joma iyanyo e dier joma odak butwa, wan joma inyiero kendo ma ocha gi joma olworowa 14 Isemiyo olokwa ngero e dier ogendini, kendo ogendini kino wigi konenowa. 15 Wichkuot mara osiko neno e wang’a odiechieng’ duto, kendo lela wang’a wichkuot oumo. 16 Seche ma joma ochaya kendo yanya dirona weche, nikech jasigu oramo ni nyaka ochul kuor. 17 Magi duto notimorena, kata obedo ni wiwa ne pok owil kodi, kata riambo ne singruok mari. 18 Chunywa ne pok oa moweyi; kendo tiendewa ne pok okier moweyo yori. 19 To podne igoyowa agoya mimiyo o n d i eg bungu olaw owa kendo ne iumowa gi mudho mandiwa. 20 Ka dipo ni wiwa nosewil gi Nyasachwa kata ni ne waseyaro lwetwa ne nyasaye moro mawendo, 21 donge Nyasaye dine ofwenyo wachn o, nikech ong’eyo gik maling’ling’ manie chuny? 22 To eka tho ochomowa tir odiechieng’ duto nikech in; kendo ikwanowa kaka rombo midwa yang’o. 23 Chiew, Yaye Ruoth! Inindo nang’o? Yaw wang’i inen! Kik ikwedwa nyaka chieng’ 24 Ipando wang’i nang’o koso wiyi owil gi pekwa kod dich modiwago nang’o? 25 Osedwokwa piny nyaka e buru, dendwa omoko piny e lo. 26 Aa malo mondo ikonywa; reswa nikech herani maok rem.

Zaburi 45

Ne Jatend Wer. Gidwol Mar "Ondanyo." Mar Yawuot Kora Maskil. Wend Arus

1 CHUNYA thoro bedo mamor gi thorro ma jaber gido sama aolo Zabur maga ne Ruoth; lewa chalo kalamb jandiko mong’ith. 2 In ema iber mogik e dier chwo kendo dhogi owir gi ng’wono, nikech Nyasaye osegwedhi nyaka chieng’ 3 Twe liganglani e bathi, Yaye ng’at maratego; rwakri gi ler kod duong’. 4 E duong’ni nyisri aya n ga kaka jaloyo mochung’ ne adiera gi muolo kod tim makare; we lweti makorachwich onyis timbeni miwuoro. 5 Atungegi mabitho mondo ochwo chunje mag wasik ruoth; ogendini mondo opodh piny e bwoyi. 6 Yaye Nyasaye, kom duong’ni biro siko nyaka chieng’; manyaka chieng’ osimbo mar adiera ema biro bedo osimbo mar pinyruodhi. 7 Ihero tim makare kendo ok idwar timbe maricho; emomiyo Nyasaye, ma Nyasachi, oseketi malo moyo mbo joweteni kuom wiri gi mo mar mor. 8 Lepi maboyo duto dung’ tik manemane gi poda kod dalasini; moa e ute ruodhi molichi gi lak liech. Wende mindito gi gig wer miyi mor. 9 Nyi ruodhi nie kanyakla mag mondi moluor; mikach ruoth nie bathi ko rachich korwa kore gi dhahabu mogol Ofir. 10 Winji nyar wegi, bed mos, kendo chik iti: Gol pachi kuom jou kaachiel gi jood wuoru monywoli. 11 Berni otoyo ruoth; miye duong’, nikech en ruodhi. 12 Nyar Turo biro biro gi mich, joma nigi mwandu biro dwaro kony kuomi. 13 Duong’ olworo ruoth madhako koni gi koni e kar dakne; law abola mare oton- oton gi dhahabu. 14 Omake itere ne ruoth gi law mochue gi usi; nyiri masilili man kode luwo bang’e kendo ikelonigi. 15 Irwakogi e ot gi ilo kod mor maduong’; gidonjo e dala ruoth. 16 Yawuoti biro kawo kar wuonegi; ibiro ketogi ruodhi e piny duto koni gi koni. 17 Abiro miyo ji pari e tienge duto nyaka chieng’; kuom mano ogendini biro paki nyaka chieng’ ma nyaka chieng’.

Zaburi 46

Ne Jatend Wer. Mar Yawuot Kora. Kaluwore Gi dwond ‘alamoth’. Wer

1 Nyasaye e kar opondowa kod tekowa, en konyruok man kodwa seche tee. 2 Emomiyo ok wabi luor, kata bed ni piny okethore kendo gode mukore e chuny nam, 3 Kata bed ni pige manie nam wuo kendo golo buoyo kendo gode yiengni kendo dhuolore. Sela 4 Nitie aora moro mapigege kelo mor e dala Nyasaye, e dala maler kama En Man Malo Mogik odakie. 5 Nyasaye odak e iye omiyo ok obi podho; Nyasaye biro konye ka piny oyawore. 6 Ogendini nigi chandruok, kendo pinje ruodhi podho; oting’o duonde mi piny leny nono. 7 Jehova Manyalo Gik Moko Duto ni kodwa; Nyasach Jakobo e ohingawa. 8 Biuru uneye tije Jehova, bi uneye kethruok mosekelo e piny. 9 Omiyo lwenje rumo e tung’ piny koni gi koni; oturo atung’ kendo ochodo tong’ matindo-tindo, bende owang’o kuodi gi mach. 10 "Bed mos, kendo ng’e ni an Nyasaye; ogendini biro miya duong’; piny duto biro miya duong’." 11 Jehova Manyalo Gik Moko Duto ni kodwa; Nyasach Jakobo e ohingawa.

Zaburi 47

Ne Jatend Wer. Mar Yawuot Kora. Zaburi

1 Pamuru lweteu, un ogendini duto gouru koko ne Nyasaye gi ywagruok manyiso ni umor 2 Mano kaka Jehova Man Malo Mogik lich en Ruoth Maduong’ man gi loch e piny duto! 3 Ne oloyonwa ogendini mi gibet e bwowa, ji nopodho piny e tiendewa. 4 Ne oyieronwa girkeni marwa, gik mabeyo mogik ne Jakobo mane ohero. Sela 5 Nyasaye oseidho malo ka ji kokne gi mor. Jehova oseting’ malo ka dwond turumbete ywak. 6 Weruru wende pak ne Nyasaye, weruru wende pak; weruru wende pak ne Ruodhwa, weruru wende pak. 7 Nikech Nyasaye en Ruodh piny duto, werneuru zaburi mar pak. 8 Nyasaye nigi loch ewi ogendini; Nyasaye obet piny e kom lochne maler. 9 Jotend ogendini ochokore kaachiel kaka jo Nyasach Ibrahim, nikech ruodhi mag piny gin mag Nyasaye;

Zaburi 48

Ne Jatend Wer. Mar Yawuot Kora. Zaburi

1 Jehova duong’ adier, kendo owinjore chuth gi pak, e dala maduong’ mar Nyasachwa, ma en gode maler. 2 Oting’ore malo kendo ober neno omiyo piny duto bedo mamor. Got Sayun chalo gi kama oting’ore malo mar Zafon, ma en dala maduong’ mar Ruoth Maduong’. 3 Nyasaye nitiere e dalane mochiel motegno kendo osenyisore ni en e ohingane. 4 Ka ruodhi noriwo tekregi kanyakla, kane giwuokne oko kaachiel, 5 ne gineno mi gibuok; kendo ne giringo gia ka luoro omakogi 6 Dendgi nochako tetni kanyo kendo ne gibedo gi rem machalo gi muoch ma kayo dhako. 7 Ne iturogi matindo tindo ka mende mag Tarsis ma yamb ugwe ong’injo. 8 Mana kaka wasewinjo e kaka waseneno gi wengewa e dala maduong’ mar Jehova Manyalo Duto, e dala mar Nyasachwa: Nyasaye oselose kama dak berie nyaka chieng’. 9 Ei hekalu mari, Yaye Nyasaye, ema wabetie ka waparo kuom herani ma ok rem. 10 Mana kaka nyingi, Yaye Nyasaye, e kaka pakni bende chopo nyaka tung’ piny; lweti makorachwich opong’ gi tim makare. 11 Got Sayun oil, kendo mier mag Juda nigi mor nikech iyalo ji maber. 12 Wuothi ei Sayun, luorri e iye koni gi koni, kwan osuche duto, 13 par maber kuom ohinga mage, ng’i ute ruodhi mage aming’a, mondo ibi inyis tienge mabiro kuomgi. 14 Nikech Nyasaye en Nyasachwa nyaka chieng’ ma nyaka chieng’ obiro bedo jatichwa nyaka chop giko ndalowa e piny.

Zaburi 49

Ne Jatend Wer. Mar Yawuot Kora. Zaburi

1 Winjuru wachni, un ji duto: chikuru itu, un duto mudak e pinyni, 2 un ji ajia kod joma idew, jomwandu gi jodhier machalre: 3 Dhoga biro wacho weche mag rieko, weche moa e chunya biro miyo ji winjo tiend weche. 4 Abiro chiko ita ne ngero moro; abiro nyiso tiend midhiero mara ka andito nyatitina: 5 En ng’a monego aluor ka ndalo mag richo obiro, ka jo miriambo ma timbegi richo olwora- 6 Joma ogeno mwandugi kendo masungore kuom mwandugi mathoth? 7 Onge ng’ama nyalo waro ngima nyawadgi kata manyalo chulo Nyasaye nengo moromo ware. 8 Nikech yor waro dhano tek sidang’, ma onge nengo madichul marom- 9 ma dimi odag nyaka chieng’ kendo kik odhi e liel. 10 Nikech ong’ere ne ji duto ni joma riek tho, mana kaka joma ofuwo gi joma oming’ bende tho mi giwe mwandugi ne joma moko. 11 Lietegi ema biro siko kaka utegi nyaka chieng’ kendo ema gibiro dakie higni gi higni maok rum, kata obedo ni ne gimako lope mathoth koni gi koni. 12 To ong’ere ni dhano ok siki e piny, kata obed gi mwandu mathoth machal nade, to otho mana kaka le bende tho. 13 Mano e gima biro timore ne joma ogenore kendgi giwegi, kendo ne joma luwogi, moluwo wechegi. 14 Gichomo liete mokunynegi ka rombe kendo tho biro lokogi chiembe. Joma ngimagi oriere tir biro loyogi ka piny oru, to dendgi biro top e liel, ka gin mabor gi utegi madongo machalo ute ruodhi. 15 Anto Nyasaye biro reso chunya mi ogola e liel adier, obiro kawa mi odhi koda ire. 16 Kik chunyi thagre ka ng’ato mwandune medore, kata ka duong’ mar ode medore; 17 nikech onge gima obiro kawo odhigo ka otho, duong’ ma en go ok bi dhi kode e liel, 18 kata obedo ni ne okawore kaka ng’ama og wedhi kane pod ongima- nikech ji nyaka paki ka mwanduni medore- 19 to obiro dhi mi oriwre gi tieng’ machon mar kwerene, maok nyal neno ler mar wang’ chieng’ kendo. 20 Ng’at man- gi mwandu mathoth to onge winjo, chalo gi le matho.

Zaburi 50

Zaburi Mar Asaf.

1 Jal Manyalo Duto, Nyasaye ma en Jehova, wuoyo kendo luongo ji duto modak e piny mondo ochokrene kaachiel, chakre koma chieng’ wuokie nyaka kuma opodhoe. 2 Nyasaye rieny gie Sayun, dala ma berne long’o chuth. 3 Nyasachwa owuok biro kendo ok obi ling’ mach nie nyime mawang’o gik moko pep, kendo ahiti mager olwore. 4 Oluongo joma odak e polo malo kaachiel kod joma odak e piny, mondo oyal joge: 5 "Choknauru joga maler, mane otimo koda singruok e yor misango." 6 Kendo polo hulo timne makare, nikech Nyasaye owuon e jang’ad bura. Sela 7 "Winjuru, Yaye joga, mondo awuo kodu, Yaye jo Israel, chiknauru itu mondo atim neno ma akwedougo: An Nyasaye ma Nyasachu. 8 Ok akweru nikech wach misengni mutimona, kata nikech chiwo miwang’o, mosiko ka nitie e nyima. 9 Ok agomb ruath moro amora moa e kundeu kata diek moa e abilniu, 10 nikech le moro amora manie bungu en mara, kaachiel gi jamni makwayo e wi thuche gana achiel. 11 Ang’eyo nying winyo ka winyo manie wi gode, kendo gik mochwe duto manie pewe gin maga. 12 Ka da bed ni kech kaya to ok dak anyisu, nikech piny en mara, kaachiel gi gik moko duto manie iye. 13 Uparo ni achamo ring ruedhi kata amadho remb diek? 14 Chiwuru misango mar goyo erokamano ne Nyasaye, chopuru singruok mau ne Jal Man Malo Mogik. 15 kendo luongauru sama un e chandruok; to abiro golou e chandruogno, kendo ubiro miya duong’. 16 Joma timbegi richo to Nyasaye wacho negi ni: "Ng’a momiyou thuolo mar olo chikena kata mondo ukaw singruok maga kaka mau? 17 Ere kaka dutim kamano to uchayo puonjna kendo udiro wechena katoku! 18 Ka uneno jakuo to uriworu kode kendo uchodo mana kaka joma moko timo. 19 Utiyo gi dhou kuom timo richo kendo lewu oikore ne wuond. 20 Usiko uwuoyo marach kuom joweteu kendo ukuodho koda ka oweteu mahie ma uago e ich achiel. 21 Gigi duto usetimo ka an to aling’; useparo ni an bende achalo kodu. To koro akwerou kendo anyisou e wang’u ni useketho kuom timo gigo duto. 22 Paruru matut kuom wachni, un joma wigi wil gi Nyasaye, nono to abiro kidhou matindo tindo, ma onge nga’ma diresu: 23 Ng’at ma timona misango mar erokamano miya duong’ kendo obedo moikore mondo anyise kaka warruok mar Nyasaye chalo."

Zaburi 51

Ne Jatend Wer. Zaburi Mar Daudi. Kane Janabi Nathan Obiro Ire Bang’ ka Daudi Noseterore Gi Bathsheba.

1 Kecha, Yaye Nyasaye, kaluwore gi herani maok rem; ruch kethona duto oko kuom ng’wononi maduong’. 2 Lwok rochruokna duto oko kendo puodha kuom richona. 3 Nikech ang’eyo ketho maga kendo richona osiko ka neno e wang’a 4 In iwuon ema asekethoni kendo asetimo gima rach e nyim wang’i, mano omiyo in kare ka iwuoyo kuoma kendo iwacho adiera kiyala. 5 En adier chuth nine onyuola e richo asebedo ka an jaricho chakre chieng’ mane mama omake ichna. 6 Adier, idwaro ni dhano obed ja adiera gie chunye iye emomiyo ipuonja rieko gie chunya maiye mogik. 7 Rudha maler gi sabun eka abiro bedo maler; lwoka mondo abed rachar moloyo pe. 8 We awinjie ilo kod mor; mi choke misetoyo ochak obedie mamor. 9 Pand wang’i ne richoga kendo ruch rochruokna duto oko. 10 Chwe chuny maler e iya, Yaye Nyasaye, kendo los chuny motegno mosiko koluori iket e iya. 11 Kik iriemba buti kata igol Roho Maler mari kuoma. 12 Duogna mor ma warruokni kelo kendo mi abed gi chuny mohero timo dwaroni, mondo chuny makamano orita. 13 Kisetimo kamano eka abiro puonjo joketho yoreni kendo joricho biro lokore duogo iri. 14 Resa e ketho mar chwero remo, Yaye Nyasaye, tim kamano, Yaye Nyasaye ma wara, eka lewa biro wer kuom timni makare. 15 Yaye Ruoth yaw pien dhoga, eka dhoga biro hulo pakni. 16 Ok imor gi misango mitimoni, nikech da achiwonigo; chiwo miwang’o pep ok miyi mor. 17 Misango mar Nyasaye en chuny motur, adundo motur kendo mamuol, ok itamri, Yaye Nyasaye. 18 Mi Sayun odhi maber kuom herani; chak iger ohinga mag Jerusalem kendo. 19 Eka misengni makare biro betie kendo, mana chiwo miwang’o duto mondo omiyi mor, eka ibiro chiw ruedhi e kendoni mar misango.

Zaburi 52

Ne Jatend Wer. Maskil Mar Daudi. Ka Doeg Ja Edom noyudo Osedhi Ir Saulo Kendo Onyise Ni, "Daudi Osedhi E Od Ahimelek."

1 ANG’O MOMIYO isungori kuom tim marach, Yaye ng’at maratego? Ang’o momiyo isungori odiechieng’ duto, in ma in gir wichkuot e nyim Nyasaye? 2 Lewi chano kelo kethruok; ochalo gi wembe mabith, in michano yor wuondo ji ni. 3 Ihero rach moloyo ber, miriambo mitni moloyo wacho adiera. Sela 4 Ihero weche duto machwanyo ji, Yaye in lep mohero wuondni! 5 To Nyasaye biro tieli piny motieki chuth nyaka chieng’; obiro yudhi mi oyiechi oko e hembi; obiro pudhi mi ogoli e piny joma ngima. Sela 6 Joma kare biro neno mano mi gibed maluor; gibiro nyiere ka giwacho ni, 7 "Koro neye uru ng’atno, mane ok okawo Nyasaye obedo kar pondo mare to nogeno mana kuom mwandune mathoth kendo notieko joma moko mondo eka omed bedo gi teko!" 8 An to achalo yiend mzabibu madongo kodhukno maber e od Nyasaye; ageno kuom hera maok rem mar Nyasaye nyaka chieng’ kendo nyaka chieng’. 9 Abiro paki nyaka chieng’ kuom gima isetimo; nyingi ema abiro ketoe geno mara, nikech nyingi ber. Abiro paki e nyim jogi maler.

Zaburi 53

Ne Jatend Wer. Koluwore Gi Dwond ‘Mahaloth’ Maskil Mar Daudi

1 Ng’at mofuwo wacho e chunye ni, "Nyasaye ongee." Gin joma okethore, kendo yoregi obam; onge kata ng’ato achiel matimo maber. 2 Nyasaye ng’iyo piny gie polo; orango yawuot ji mondo oneye ka be nitie moro kuomgi ma wachi donjone, ka be nitie moro kuomgi mamanyo Nyasaye. 3 Giduto gisebaro giweyo yo; giduto gisekethore; onge kata ng’ato achiel matimo maber, onge kata achiel. 4 Joma timo gik maricho donge dipuonjree- jogo ma ngamo joga kaka ji chamo kuon kendo maok luong Nyasaye mondo okonygi? 5 To ero, koro kihondko maduong’ omakogi, kihondko omakogi kama onge gima onego giluor. Nyasaye osekeyo choke joma nomonji; isemiyogi wichkuot, nikech Nyasaye nodagigi. 6 Yaye, mad warruok mar Israel obi koa Sayun! Ka Nyasaye duogo ne joge mwandugi, to joka Jakobo mondo obed moil kendo Israel obed mamor!

Zaburi 54

Ne Jatend Wer. Wer Miwero Gi Thumbe Man Gi Waya. Maskil Mar Daudi. Kane Jo Zifiti Odhi Ir Saulo Kendo Onyise Ni, "Daudi Mimanyo Opondo E Gweng’wa."

1 Resa gi nyingi, Yaye Nyasaye; ng’adna bura kare gi tekoni. 2 Winj lamona, Yaye Nyasaye; chik iti ne weche mawuok e dhoga. 3 Mwache monja; acheje dwa kawo ngimana- joma ok dew Nyasaye. 4 Adier, Nyasaye e jakonyna; Ruoth owuon ema rita. 5 Mad chandruok lwor joma ketho nyinga mi ketgi diere; tiekgi, nikech in jaadiera. 6 Abiro timoni misango gi chiwo ma achiwo kuom herona; abiro pako nyingi, Yaye Jehova, nikech nyingi ber. 7 Nikech oseresa kuom gik mathaga duto, mi omiyo wengena ong’iyo wasi - ka tir bang’ loyogi.

Zaburi 55

Ne Jatend Wer. Wer Gi Thumbe Man Gi Waya. Maskil Mar Daudi.

1 Winj lamona, Yaye Nyasaye, kik itamri winjo ywakna; 2 Winja kendo iduoka. Pacha chanda kendo chunya onge gi kuwe 3 Ka awinjo duond wasika, kendo ka joma timbegi richo okwarona wengegi nikech gimiyo abedo gi thagruok kendo giyanya ka gin gi mirima. 4 Chunya winjo malit e iya kendo luoro mar tho osemaka. 5 Aluor kendo denda tetni; kibaji ogoya matek. 6 Ne awacho ni, "yaye mad ne bed ni an gi buombe akuru! dine afuyo aa ka mi ayudo yweyo- 7 Dine aringo adhi mabor mi adhi adak e piny ongoro; 8 dine areto adhi nyaka kara mar pondo, kuma ni mabor gi apaka kod ahiti." 9 Lal pach joma timbegi richo, Yaye Ruoth, mi lewgi moki e dandgi, nikech aneno ka maundu gi dhaw opong’o dala maduong’. 10 Odiechieng’ gotieno gilwenyo kor ohinga mare; himruok gi ayany ni e iye. 11 Teko mar kethruok chopo tijgi ei dala maduong’, mecho gi wound osiko e yorege. 12 Ka dine ok obedo malichna ka dine ng’at ma ok dwara ema ogarna, to dine apondone. 13 To en mana in, dichwo kaka an in jawuodhakendo osiepna mangita gi del, 14 mane wan-go gi lalruok matut chon kane wawuotho e dier oganda maduong’ e od Nyasaye. 15 Mad tho neg wasika apoya, mad liel mwonygi ngili kapod gingima, nikech richo olokogi kar dakne. 16 Anto aluongo Nyasaye, kendo Jehova resa. 17 Odhiambo gi okinyi kod odiechieng’ ayuagora ka chunya lit, kendo owinjo duonda. 18 Owara kapok gimoro ohinya kuom lweny ma ji goyago, kata obedo ni ji mang’eny kweda. 19 Nyasaye mobetekom loch nyaka chieng’, biro winjogi kendo biro goyogi- Sela jogo motamore loko yoregi kendo maok mi Nyasaye luor. 20 Jawuodha monjo osiepene; oseweyo rito singruokne mane otimo kodgi. 21 Weche mowacho to yom ka mo mabuo, to lweny to nie chunye; wechege yomo del moloyo mor wirruok, to kara gin mana ligangla mosewuodh oko. 22 Ket pek manie chunyi ne Jehova to obiro riti; ok obi weyo ng’at makare podhi. 23 To in, Yaye Nyasaye, ibiro dwoko joma timbegi richo piny nyaka ei bur mar top; joma rich chwero remo omako gi joma wuondo ji ok bi bet mangima kata moromo nus ndalogi. An to ageno kuomi.

Zaburi 56

Ne Jatend Wer. E Dwol Mar"Akuru Mopiyo E Onera Man Mabor." Mar Daudi. Miktam. Kane Jo Filistia Osemake Gath.

1 Kecha, Yaye Nyasaye, nikech ji lawa dwa mwonya; odiechieng’ duto gidiya ti maok ayue. 2 Joketh nyinga lawa odiechieng’ duto; ji mang’eny monja ka sunga omakogi. 3 Ka luoro omaka to abiro geno kuomi. 4 Kuom Nyasaye ma apako wachne, kuom Nyasaye ema agenoe omiyo ok abi bedo maluor. Dhano adhana to nyalo timona ang’o? 5 Odiechieng’ duto gimino koda wach; kinde duto gichano kaka digihinya. 6 Gikuotho kendo gijimbo wach, ginono okang’ ka okang’ ma agoyo ka gidwa kawo ngimana. 7 Kik iyie gitony kata matin, dwok ogendini piny, Yaye Nyasaye, gi mirimbi; 8 Ndik piny ywak ma aywakgo kwan pi wang’a machwer e ndikoni modoldonge iketogi e rekod mari? 9 Eka wasika biro gomo dok ka aluongo kony moa kuomi. Mano ema abiro ng’eyogo ni Nyasaye en jakora. 10 Kuom Nyasaye ma apako wachne, kuom Jehova ma apako wachne- 11 kuom Nyasaye ema agenoe; omiyo ok abi bedo maluor. Dhano adhana to nyalo timona ang’o. 12 Asetimo kodi muma, Yaye Nyasaye; abiro chiwoni chiwo maga mag erokamano 13 Nikech iseresa e tho kendo isegeng’o tienda mi ok ochwanyore, mondo mi awuothi e nyim Nyasaye ma en e ler mar ngima.

Zaburi 57

Ne jatend Wer. E dwond"kik iketh Gik Moko." Mar Daudi Miktam. Kane oringone Saulo mi opondo e rogo.

1 Kecha, Yaye Nyasaye, yie ikecha nikech kuomi ema chunya yudoe kar pondo. Abiro pondo e bwo tipo mar bwombeni nyaka chop apaka mager rum. 2 Aywagora ne Nyasaye Man Malo Mogik, Nyasaye machopona chenroge ema ayuakne. 3 Ooro wach gie polo kendo oresa, kokwero joma lawa gi tekregi duto; sela Nyasaye oro herane gi adiera mare. 4 An e dier sibuoche; anindo e dier le mager mangemo- joma lekegi chalo tonge gi aserni, ma lewgi chalo ligangla mabitho. 5 Nyingi mondo oting’ malo moyombo polo, Yaye Nyasaye; mad duong’ mari pong’ piny duto. 6 Ne giyaro jogo mondo omak tiendena- kane chuny lit odola. Ne gikunyo bugo e yora- to kata kamano gin giwegi ema giselutore e iye. Sela 7 Chunya otegno, Yaye Nyasaye, chunya otegno; abiro wer kendo abiro loso wer mamit. 8 Chiew, in chunya! Chiew u ru un orutu gi nyatiti Abiro chiewo osirawende 9 Abiro paki e dier ogendni, Yaye Ruoth. Abiro weri e dier ji. 10 Nikech herani duong’ kendo chopo nyaka polo; adiera mari ochop nyaka ewi lwasi. 11 Nyingi mondo oting’ malo moyombo polo, Yaye Nyasaye; mad duong’ mari pong’ piny duto.

Zaburi 58

Ne Jatend Wer. E Dwol Mar"Kik iketh Gik Moko." Mar Daudi. Miktan

1 Un jotelo, be uwuoyo gi adiera? Be ung’ado bura moriere tir e dier ji? 2 Ooyo, uchano mayo ji ratiro magi e chunyu, kendo lweteu chano tulu e piny. 3 Joma timbegi richo chako lal aa nyuolgi; gin jendeke kendo gin jomriambo aa nyuolggi 4 Kwiri margi chalo gi kwich thuol, chalo gi kwich thuond rachier ma tege oyienyo, 5 ma kata jabochne wuone to ok winji, kata bed ni jabochneno olony machal nadi. 6 Muk lekegi ei dhogi, Yaye Nyasaye, yiech kwiri mag sibuoche oko, Yaye Jehova! 7 Mi gilal nono ka pi mamol dhi; ka giywayo atungegi to mi asernigi obed madik. 8 Mana kaka ndach kamnie ma leny nono, kendo mana kaka nyath i monyuol kosetho, mad kik gine wang’ chieng’. 9 Kapok agulni magi ochako winjo liet mach, bed ni en mach mabebni kata maliel mos, to joma timbegi richo ibiro ywe oko. 10 Joma kare biro bedo mamor kichulo negi kuor, ka giniluok tiendegi e remb joma timbegi richo. 11 Eka ji nowach ni, "Kara en adier ni joma kare pod yudo pok; kara nitie Nyasaye mang’ado bura ne piny."

Zaburi 59

Ne Jatend Wer. E Dwol Mar"Kik Iketh Gik Moko." Mar Daudi. Miktam. Kane Saulo Ooro Ji Mondo Ocher Od Daudi Mondo Onege

1 Resa e lwet wasika, Yaye Nyasaye; Rit ngimana kuom joma ogar koda 2 Gola e lwet joma timo gik maricho kendo resa kuom joma rich chwero remo omako. 3 Neye kaka gibutona ka girita e yo! Joma kwiny chano kaka digihinya, to an onge gima rach kata richo masetimo, Yaye Jehova. 4 Onge gima asetimo marach, to kata kamano gin to giikore monja. Aa malo ikonya; ne chandruokna. 5 Yaye Jehova Nyasaye Manyalo Duto, Nyasach Israel, aa malo ikum ogendini duto; kik ikech andhoke ma timbegi richo. Sela 6 Giduogo ka piny chiegni imore, ka ging’ur ka guogi kendo giwuotho koni gi koni e dala ka ging’anjo. 7 Neye gik ma ging’udho koa e dhogi, ging’udho ligengni gi dhogi, kendo giwacho ni, "En ng’a manyalo winjowa?" 8 To in nyiergi, Yaye Jehova, go siboyi ne ogandanigo duto. 9 Yaye tekrena, in ema ang’iyi, in e kar pondona, Yaye Nyasaye, 10 Yaye Nyasacha ma jahera. Nyasaye biro telona kendo obiro miyo asungra ne joma ketho nyinga. 11 To kik uneggi, Yaye Ruoth ma okumbana nikech joga dipoka wigi owil. Mi giba abaya koni gi koni gi tekoni, kendo mi gidog piny. 12 Nikech richo ma gitimo gi dhogi, nikech weche mawuok e dhogi, wegi mondo sungagi ogajgi. Nikech gikuong’o ji kendo gi wuondo ji, 13 tiekgi gi mirimbi mager tiekgi mi kargi lal nono eka biro ng’ere e tung’ piny koni gi koni ni Nyasaye nigi loch kuom joka Jakobo. Sela 14 Giduogo ka piny chiegni imore ka ging’ur ka guogi, kendo giwuotho koni gi koni e dala ka ging’anjo. 15 Gibayo koni gi koni ka gidwaro chiemo kendo ka ok giyieng’ to ging’ur. 16 Anto abiro wero tekreni abiro wero herani gokinyi; nikech in e ohingana, in e kar pondona e kinde mag tha gruok. 17 Yaye Tekrena, abiro weroni wend pak; in e ohingana, Yaye Nyasaye, Nyasacha majahera.

Zaburi 60

Ne Jatend Wer. E Dwol Mar"Ondanyo Mar Singruok" Miktam Mar Daudi. Mar Puonj. Kane Okedo Gi Aram Naharaim Kod Aram Zoba, Kendo Kane Joab Oduogo Mi Onego Jo Edom Alufu Apar Gariyo E Holo Mar Chumbi.

1 Yaye Nyasaye, isedagiwa mi imuomori kuomwa; isebedo ka ikecho kodwa, to koro loswa! 2 Iseyiengo piny mi ibare diere ariyo, Los kuondege mosebarore, nikech oyiengni. 3 Isenyiso jogi kinde mag chandruok; isemiywa kong’o mamiyo wakwang’. 4 To isechungo bandech loch ne joma oluori mondo oumgi ka oywanegi atung’. Sela 5 Re swa kendo ikonywa gi lweti makor achich mondo joma ihero ogol e chandruo. 6 Nyasaye osewuoyo gi e kare maler: "Abiro pogo ji shekem kendo abiro pimo ne ji Holo mar Sukoth. 7 Gilead en mara, kendo Manase bende mara; Efraim en oguta mar lweny, to Juda to en osimbona mar loch. 8 Moab en besen mara mar luok to Edom ema ang’we okanda; kendo e piny Filistia ema akoke ka aselocho." 9 En ng’a mabiro kela e dala maduong’ mochiel? Ng’a mabiro telona katera Edom? 10 Donge en ema isedagiwa, Yaye Nyasaye, kendo tinde ok idhi gi jolwenjwa e lweny? 11 Miwa kony mondo walo wasikwa, nikech kony mar dhano onge tich. 12 Ka wan-gi Nyasaye to wabiro yudo loch, kendo obiro nyono wasikwa piny.

Zaburi 61

Ne Jatend Wer. Gi Gig Wer Man-gi Tondegi. Mar Daudi

1 Winj ywakna, Yaye Nyasaye; chik iti ne lamona. 2 Aluongi gie tung’ piny, aluongi ka chunya ool; telna nyaka lwanda mohinga gi bor. 3 Nikech in ema isebedo kar pondona, isebedona ohinga motegno maponde ne jasigu. 4 Agombo dak e hembi nyaka chieng’ mondo apondie e raum mar bwombeni. Sela 5 Nikech isewinjo singruokna kodi, Yaye Nyasaye; isemiya gweth mikano ne joma oluoro nyingi. 6 Med ndalo mar ngima ruoth, mede higni e tienge mang’eny. 7 Mi obed e kom loch e nyim Nyasaye nyaka chieng’; ket herani kod adierani mondo orite. 8 Eka anasik ka apako nyingi gi wer kendo abiro chopo singruokna kodi odiechieng’ kodiechieng’.

Zaburi 62

Ne Jatend Wer. Mar Jeduthun. Zaburi Mar Daudi

1 CHUNYA yudo yweyo kuom Nyasaye kende; warruokna aa kuome. 2 En kende ema en lwandana kendo warruokna; en e ohingana, onge gima biro buoga. 3 Ubiro siko kugoyo ng’atni nang’o? Ang’o momiyo unywakone ugoye piny- Ng’at machalo chiel momukore mayiengnini? 4 Giramo ni nyaka to gigole kama entie e duong’ne; miriambo ema morogi. Dhogi gigwedhogo ji, to gie i chunygi to gikuong’o ji. Sela 5 Yud yueyo, Yaye chunya, kuom Nyasaye kende; genona aa kuome. 6 En kende ema en lwandana kendo warruokna; en e ohingana; onge gima biro buoga. 7 Warruok mara gi luor ma ayudo aa kuom Nyasaye; en e lwandana manyalo duto, en e kar pondona. 8 Un ji, genuru kuome kinde duto; olneuru oko gik manie chunyu, nikech Nyasaye e kar pondo marwa. Sela 9 Joma nipiny gin mana muya nono; joma ni malo gin mana miriambo; ka opimgi e ratil, to gin nono; gin duto gin mana muya nono. 10 Kik igen kuom gik moma ji kata isungri kuom gik mokwal; kata bed ni mwandugi medore to kik iket chunyi kuomgi. 11 Nitie gimoro achiel ma Nyasaye osewacho, chutho nitie gik moko ariyo ma asewinjo gi ita: ni in, Yaye Nyasaye, in ratego, kendo ni in, Yaye Ruoth, ihero ji. 12 Kuom adier, ibiro chiwo pok ne ng’ato ka ng’ato kaluwore gi gima osetimo.

Zaburi 63

Zaburi Mar Daudi. Kane En E Thim Mar Juda.

1 YAYE NYASAYE, in e Nyasacha, adwari gi tekra duto; chunya riyo mar neni oloyo denda duto gombi, e piny motwo kendo maliet, 2 Aseneni ei kari maler kendo aseng’eyo tekoni gi duong’ni. 3 Nikech herani ber moloyo ngima, dhoga biro miyi duong’. 4 Abiro paki kapod angima, kendo abiro ting’o bedena malo e nyingi. 5 Chunya biro romo mana ka ng’ama oromo gi chiemo mabeyo mogik; abiro yawo dhoga ka apaki gi wer. 6 Ka an e kitandana to apari; pacha osiko pari seche duto mag otieno. 7 Nikech in e konyruokna, awer ka an e bwo tipo mar bwombeni. 8 Chunya omoko kuomi; lweti makorachwich orita. 9 Joma dwa kawo ngimana ibiro tieki; gibiro dhi piny nyaka ei bur kama tut. 10 Ibiro chiwgi ne ligangla kendo gibiro doko chiemb ondiegi mag bungu. 11 To ruoth to biro bedo moil kuom Nyasaye; ji duto ma singore e nying Nyasaye biro pake, to dho jomiriambo ibiro um mi ling’.

Zaburi 64

Ne Jatend Wer. Zaburi Mar Daudi

1 WINJA, Yaye Nyasaye sama ating’o duonda ka anyisi chandruokna; rit ngimana kuom jasigu ma bwoga. 2 Panda ne chenro maricho mag joma richo, panda ne koko ma oganda ma timo marach goyo. 3 Gipiago lewgi ka ligangla kendo gilingo wechegi ka asere motimo sum. 4 Gidiro asere kama giponde mondo gichwogo ng’ama onge ketho; gibaye gi asere apoya ka gionge luoro. 5 Gijiwore ng’ato gi ng’ato kuom chenrogi maricho, giloso wach kaka digipand obadhogi ka giwacho ni, "En ng’a mabiro nenogi?" 6 Gichano timo ne ji marach ka giwacho ni, "Waseloso chenro malong’o chuth!" Kuom adier, pach dhano gi chunye opando riekni maricho miwuoro. 7 To Nyasaye biro bayogi gi aserni; apoya nono, ibiro puodgi piny. 8 Obiro loko lewgi mi gogi gin giwegi mi otiekgi chuth; ji duto monenogi biro kino wigi gi wuoro. 9 Ji duto biro bedo maluor, gibiro hulo tije Nyasaye kendo gibiro paro mos kuom gima osetimo. 10 Joma kare mondo obed moil kuom Jehova kendo mondo gipond kuome; ji duto moriere tir gie chunygi mondo opake!

Zaburi 65

Ne Jatend Wer. Zaburi Mar Daudi. Wer

1 PAK ORITI e Sayun, Yaye Nyasaye Wabiro choponi singruokwa duto. 2 Yaye in miwinjo lamo, in ema ji duto biro biro iri. 3 Kane richowa obarowa ndas ne iweyonwa kethowa. 4 Joma iyiero gin joma ogwedhi, jogo ma ikelo machiegni mondo odag e agolni magi! Gik mabeyo mowuok e odi oromowa chuth, mana gigo moa e hekalu mari maler. 5 Idwokowa gi timbe madongo makare, Yaye Nyasaye ma Jawarwa, Yaye geno mar piny koni gi koni kendo mar nembe man maboyo mogik, 6 in mane iloso gode gi tekoni iwuon kane imanori gi teko, 7 in mane imiyo nembe oling’ oweyo wuo, wuo mar apaka margi, kod koko mag ogendini. 8 Joma odak kuonde maboyo oluoro timbeni miwuoro, kuma okinyi yaworee kendo odhiambo rumoe imiyo ji wernie gimor. 9 Irito piny kendo iolone pi, imiyo obedo momew moromo chuth. Aoche Nyasaye opong’ gi pi mamiyo ji bedo gi cham, nimar kamano e kaka ne ichano chon. 10 Imiyo parage bedo mang’ich kendo igwedhe gi cham. 11 Igwedho higa gi cham mogundho, kendo gechegi mwandu opong’o thich. 12 Pewe motimo lum mag piny ongoro ng’ich oromo; kendo gode opong’ gi mor. 13 Lek duto jamni kwae ka giwinjo maber kendo holni cham mochiek odhure; gikok gimor kendo giwer.

Zaburi 66

Ne Jatend Wer. Zaburi

1 Go koko gi mor ne Nyasaye, in piny duto! 2 Wer kipako duong’ mar nyinge; mi pakne obed gi duong’! 3 Wachne Nyasaye ni, "Mano kaka timbe mitimo dongo! Tekoni duong’ manade momiyo wasiki duto leny nono koneni. 4 Piny duto kuloreni; giweroni wende pak; giwero wende pak ka gipako nyingi." Sela 5 Biuru uneye gik ma Nyasaye osetimo; bi uneye kaka gik motimo ne dhano dongo! 6 Ne oloko nam lo motwo, mi ne gikalo pige ka giwuotho gi tiendegi- biuru mondo wabed moil kuome. 7 Olocho nyaka chieng’ gi teko ne, wengene ema rito ogendini- omiyo kik jong’ang’o hedhre mar kedo kode. Sela 8 Pakuru Nyasachwa, Yaye ogendini, neuru ni pak mipakego ji duto owinjo; 9 oserito ngimawa kendo osegeng’o tiendewa ni kik kier. 10 Nikech in, Yaye Nyasaye, ne itemowa; ne ipuodhowa ka dhahabu. 11 Ne iterowa e jela kendo ne iketo misigo mapek e dier ng’ewa. 12 Ne imiyo ji onyono wiyewa; kendo ne wakadho mach gi pi, kata kamano ne ikelowa nyaka kama omew. 13 Abiro biro e hekalu mari gi chiwo miwang’o kendo abiro chopo kuong’ruok masetimo kodi- 14 Kuong’ruok mane asingoni e chunya kendo awacho gi dhoga. Kane an e thagruok. 15 Abiro timoni misango gi jamni machwe kendo abiro miyi chiwo mar imbe; bende abiro chiwoni ruedhi gi diek. Sela 16 Biuru uchik itu, un duto muluoro Nyasaye; we anyisue gik mosetimona. 17 Ne aywakne gi dhoga; pakne ne nie lewa. 18 Ka dine bed ni amor gi richo manie chunya, to Ruoth dine ok ochikona ite, 19 to kuom adier, Nyasaye osechikona ite kendo osewinjo duonda ka alame. 20 Pak obed ne Nyasaye, maok osedagi lamona kata golo herane kuoma.

Zaburi 67

Ne Jatend Wer. Gi Gig Wer Man-gi Tondegi. Zaburi. Wer

1 Mad Nyasaye timnwa ng’wono kendo owinjwa; mad omi wang’e rienynwa maber, Sela 2 mondo yoregi ong’ere e piny, kendo ogendini duto oyud warruokne. 3 Mad ji paki, Yaye Nyasaye; mad ji duto opaki. 4 Mad ogendini obed mamor kendo ower gi ilo, nikech irito ji gi ratiro kendo itayo ogendini mag piny. Sela 5 Mad ji paki, Yaye Nyasaye; mad ji duto opaki. 6 Eka piny biro chiego cham kaka owinjore kendo Nyasaye, ma Nyasachwa, biro gwedhowa. 7 Nyasaye biro gwedhowa, kendo piny duto koni gi koni biro luore.

Zaburi 68

Ne Jatend Wer. Mar Daudi Zaburi. Wer.

1 Mad Nyasaye aa malo, mad wasike ke; mad joma kedo kode ring konene. 2 Mad iriembgi gi dhi mabor, mana kaka yamo riembo iro tero mabor; mad joma timbegi richo lal nono e nyim Nyasaye mana kaka odok leny kowinjo mach. 3 To jomakare to mad bed mamor kendo moil e nyim Nyasaye; mad gibed mamor kendo gibed mamor chuth. 4 Weruru ne Nyasaye, weruru wende pak ne nyinge, miyeuru duong’, En moriembo gechene e boche polonyinge en Jehova- beduru moil e nyime. 5 Nyasaye modak kare kama ler. En wuoro ne joma onge gi wuonegi kendo en jachwak mond liete. 6 Nyasaye keto joma odong’ kendgi hach e udi kendo otelone joma otue kower; to joma ohero ng’anyo to dak e piny ma chieng’ otwoyo kururu. 7 Kane iwuok idhi kitelo ne jogi, Yaye Nyasaye, kane iwuotho e piny mokethore maonge tich, Sela 8 piny noyiengni kendo polo noolo koth e piny, e nyim Nyasaye, Jal man Sinai, e nyim Nyasaye ma Nyasach Israel. 9 Ne ichiwo koth mogundho, Yaye Nyasaye; ne iduogo chuny girkeni mari mane ojony. 10 Jogi nokawo pinyno modakie kendo nichiwo ne joma odhier gik ma gilando, kigolo kuom mwanduni mogundho, Yaye Nyasaye. 11 Ruoth nolando wach kendo oganda mane okawo wachno mi oke ye ne duong’ mokalo: 12 "Ruodhi gi jolweny dar gi ng’wech; ji pogo gik moyaki e kambi. 13 Kata mana sama inindo but mach kama liet, to buombe mag akuchega oum gi dhahabu, kendo yierege oum gi fedha maleny." 14 Kane Jal Manyalo Duto okeyo ruodhi manie piny, to ne ochal mana gi pee molwar koa e kama oting’ore gi malo mar Zalmon. 15 Gode mag Bashan gin gode madongo miwuoro; go d ego mag Bashan ojuothore adier. 16 Ang’o momiyo ung’icho gi nyiego, Yaye gode mojuothore, ang’o momiyo nyiego omakou gi got kama Nyasaye oyiero mondo ogurie lochne, kama Jehova owuon biro dakie nyaka chieng’? 17 Geche mag lweny mag Nyasaye gin tara gi tara; ging’eny mokalo akwana; Ruoth osebiro koa Sinai mondo odonji kare maler. 18 Kane iidho idhi malo to ne itelone joma imako motue; kendo ne ikawo mich mane ji omiyi, koda ka mich mane jong’anyo omiyi- mondo in Jehova Nyasaye, idag kanyo. 19 Pak odog ne Ruoth, ma en Nyasaye ma Jawarwa, Nyasaye mating’onwa pekwa ndalo duto. Sela 20 Nyasachwa en Nyasaye mawaro ji; tony e tho aa kuom Jehova ma Wuon Loch. 21 Kuom adier, Nyasaye biro toyo wiye wasike, obiro mayo joma dhi nyime gi timo richo osimbo motimo yier ma girwako. 22 Ruoth wacho ni, "Abiro gologi oko Bashan; abiro gologi oko kama tut mar nam, 23 mondo unyum tiendeu e remb joma kedo kodu, seche ma guogiu olodho lewgi ka gichamo makorgi." 24 Wuodhi koro nenore maler, Yaye Nyasaye, wuodh Nyasacha kendo Ruodha nenore maler kodonjo kare maler. 25 Joma wer gi dhogi otelo eka joma wer kagoyo thumbe luwogi, nyiri magoyo oyieke be nikodgi machiegni. 26 Pakuru Nyasaye e dier chokruok maduong’; pakuru Jehova e dier chokruok mar jo Isarael. 27 Dhoot matin mar joka Benjamin otelonegi, oganda maduong’ mar ruoddhi moa e dhood Juda be ni kodgi eka nitie bende ruodhi moa e dhout Zebulun gi Naftali. 28 Chok tekoni kaachiel, Yaye Nyasaye; nyiswa tekoni, Yaye Nyasaye; kaka isebedo kitimo nyaka aa chon. 29 Nikech hekalu mari man Jerusalem ruodhi biro keloni mich. 30 Kwer ondiek manie dier togo, kwer kweth mag ruedhi manie dier nyiroye mag ogendini. Mi okel miti mang’eny mag dhahabu ka wiye okuot. Ke ogendini mohero lweny. 31 Joote biro biro koa Misiri; Kus bende biro bolore ne Nyasaye. 32 Weruru ne Nyasaye, Yaye pinjeruodhi mag piny, weruru wende pak ne Ruoth, Sela 33 Werneuru Jal mariembo gechege e kor polo malo manyaka nene, Jal ma mor gi duol maduong’. 34 Landuru teko mar Nyasaye ma nigi duong’ kuom Israel kendo ma nigi teko e kor polo. 35 Ilich miwuoro ka in kari maler, Yaye Nyasaye, Nyasach Israel chiwo teko gi nyalo ne joge. Pak mondo obed ne Nyasaye!

Zaburi 69

Ne Jatend Wer. E dwol Mar"Ondanyo." Mar Daudi.

1 Resa, Yaye Nyasaye, nikech pi oseima nyaka e ng’uta. 2 Asechako nimo e chuodho matut, kama onge lowo motegno ma ng’ato nyalo chung’ie. Asechopo e chuny pi kama tut, kendo apaka olwora oketa diere. 3 Koro aseywak mondo okonya mi aol; dwonda rewni. Wengena oore, ka amanyo Nyasacha. 4 Joma ochaya maonge gima omiyo ng’eny moloyo yie wiya; joma olokore wasika kayiem thoth adier, jogogo madwaro mondo otieka. Ichuna mondo adwok gima ne ok akwalo. 5 Ing’eyo fupa, Yaye Nyasaye; kethona ok opondoni. 6 Mad joma ogeno kuomi kik ne wichkuot nikech an, Yaye Ruoth, Jehova Manyalo Gik Moko Duto; mad joma manyi kik ne wichkuot nikech an, Yaye Nyasach Israel. 7 Nimar ji ya n ya to aling’ aling’a nikech in, kendo wichkuot obako lela wang’a. 8 Achalo wendo ne owetena an kaka jamwa ne yawuot minwa; 9 nikech hera matut ma aherogo odi tieka, kendo ayenje mag joma yanyi lwar kuoma. 10 Ka aywak kendo atweyo chiemo to pod nyaka ayud ayany; 11 ka arwako law ywak, to ji oloka ngero. 12 Joma obet e rangach jara, kendo alokora wer ma jokong’o wero. 13 To alami, Yaye Jehova, e sama iikori mar konya; kuom herani maduong’, Yaye Nyasaye, dwoka gi resruok mari mar adier. 14 Gola oko e chuodho, kik iyie anim; resa e lwet joma ochaya, gola e chuny pi kama tut. 15 Kik iwe ohula ywera mi tera kata kut mwonya duto kata bur matut um dhoge ka an e iye. 16 Dwoka, Yaye Jehova, dwoka, nikech he rani ber; lokri ira kuom kechni maduong’. 17 Kik ipand wang’i ne jatichni; dwoka piyo, nikech anie chandruok. 18 Bi machiegni mondo ikonya, resa nikech joma kedo koda. 19 Ing’eyo kaka ijara, kaka ikuodo wiya kendo kaka aneno wichkuot; wasika duto ochoma tir. 20 Ajara osechodo chunya kendo oweya ka aonge teko; ne agombo yudo kech, to ne ok ayudo, kendo ne amanyo joma hoya, to ne ok ayudo kata achiel. 21 Ne giketo kedhno e chiemba kendo ne gimiya kong andwayo mondo otiekna riyo. 22 Mad mesa mochan e nyimgi lokre obadho; kendo mad olokrenegi gir chulo kuor kod otegu. 23 Mad wengegi lokre mudho mondo kik ginen kendo oguchgi odolre nyaka chieng’. 24 Ol mirimbi kuomgi; we mirimbi mager omakgi. 25 Mad miechgi olokre gundni; kendo kik iyiene ng’ato ang’ata dag e hembgi 26 Nimar gisando joma ihinyo kendo giwuoyo kuom lit mag joma ihinyo. 27 Ket ketho e wigi kuom ketho ka ketho ma gitimo; kendo kik iyie giyud warruok mari. 28 Mad ruch kargi oko e bug joma ngima kendo kik kwan-gi kaachiel gi joma kare. 29 An-gi rem kendo awinjo marach e chuyna; mad warruokni rita, Yaye Nyasaye. 30 Abiro pako nying Nyasaye gi wer kendo abiro miyo nyinge duong’ gi erokamano. 31 Mano biro miyo Jehova mor moloyo ruadh pur, moloyo ruath mabuoch man-gi tungene kod ombong’-ge 32 Joma odhier biro neno mi gibed mamor, un ma udwaro Nyasaye mad chunyu bed mangima! 33 Jehova winjo joma ochando kendo ok olok ng’eye ne joge motue. 34 Piny gi polo mondo opake, kaachiel kod nembe kod gik moko duto mawuothoe igi, 35 nikech Nyasaye biro reso Sayun kendo obiro gero taonde mag Juda kendo. Eka ji nodag kanyo kendo gini kawe kaka margi; 36 enobed girkeni mar koth jotichne, kendo joma ohero nyinge nodag kanyo.

Zaburi 70

Ne Jatend Wer. Mar Daudi. Kwayo

1 Ret piyo mondo iresa, Yaye Nyasaye; bi piyo mondo ikonya, Yaye Jehova. 2 Mad joma dwaro ngimana yud wichkuot kendo pachgi lal; mad ji duto ma gombona hinyruok gom dog kuma giaye ka giyudo achaya. 3 Mad joma wachona ni, "Haa! Haa!" dog kuma giaye ka wichkuot omakogi. 4 To mad ji duto ma manyi il kendo bed mamor kuomi; mad joma ohero wa rruok mari wach kinde duto ni, "Nyasaye mondo oyud duong’!" 5 Anto adhier kendo achando; bi ira piyo, Yaye Nyasaye. In e konyruokna kendo jaresna; kik ideki, Yaye Jehova.

Zaburi 71

1 E iyi ema aponde, Yaye Jehova; kik iwe ane wichkuot. 2 Ko n ya kendo gola e chandruok, nikech timni makare; chikna iti mondo iwara. 3 Bedna lwanda mar pondo, ma anyalo ringo adhiye seche duto; gol chik mondo iwara, nimar in e lwandana kendo ohingana. 4 Resa e lwet joma timbegi richo, Yaye Nyasacha, yudha kuom richo gi joma kwiny momaka matek. 5 Nimar in ema isebedo genona, Yaye Ruoth Nyasaye, in ema isebedo kimiya chir nyaka ae tinna. 6 Asebedo ka ayiengora kuomi nyaka ne nyuola; in ema ne igola ei minwa. Abiro siko ka apaki nyaka chieng’. 7 Alokora gima buogo ji mang’eny to kata kamano in e kar pondo mara motegno. 8 Dhoga opong’ gi pakni, kendo asiko ahulo duong’ni maler odiechieng’ duto. 9 Kik ijog koda ka koro ati; kikijwang’a ka tekra orumo. 10 Nimar wasika wuoyo marach kuoma; jogo marita mondo onega loso wach kaachiel. 11 Giwacho ni, "Nyasaye osewe ye, " omiyo laweuru umake, nimar onge ng’ama biro konye." 12 Kik ibed mabor koda, Yaye Nyasaye; bi piyo mondo ikonya, Yaye Nyasacha. 13 Mad joma donjona lal nono ka wigi okuot; mad joma dwa hinya olwor gi achaya kod wichkuot koni gi koni. 14 An-to abiro siko ka an gi geno; abiro paki kendo abiro medo paki. 15 Dhoga biro hulo timni makare, kod warruokni odiechieng’ duto, kata obedo ni ging’eny mohinga ng’eyo. 16 Abiro biro mondo anyis ji timbeni madongo, Yaye Ruoth Nyasaye Manyalo Gik Moko Duto; abiro nyiso ji timni makare, timni makare in kendi. 17 Isepuonja nyaka aa e nyathi, Yaye Nyasaye, kendo nyaka kawuono pod ahulo timbegi miwuoro. 18 Kata ka ochopo kinde ma ati kendo wiya oti lwar, to kik iwe ya, Yaye Nyasaye. 19 Timni makare ochopo nyaka ei kor polo, Yaye Nyasaye, in misetimo gik madongo. En ng’a ma dipim kodi, Yaye Nyasaye? 20 Kata obedo ni isemiyo aneno chandruok mathoth kendo malit, to pod ibiro miyo abed mangima kendo. 21 Ibiro miyo duong’ ma an-go medore kendo ibiro chako ihoya kendo. 22 Abiro paki gi nyatiti nikech adiera mari, Yaye Nyasaye; abiro weroni wend pak gi orutu, Yaye Jaler mar Israel. 23 Dhoga biro kok gi mor ka aweroni wend pak- An ng’at misewaro. 24 Lewa biro nyiso ji kuom timbegi makare odiechieng’ duto, nimar joma ne dwaro hinya oseneno wichkuot kendo oseng’eng’.

Zaburi 72

Mar Solomon

1 Sidh ne ruoth adiera mari, Yaye Nyasaye, sidh ne wuod loch timni makare. 2 Obiro ng’ado ne jou bura makare. Obiro kelo adiera ne jou masandore. 3 Gode biro kelo mwandu ne ji, kendo thuche biro kelo olemb tim makare. 4 Obiro chwako joma odhier manie dier ji kendo obiro reso nyithind joma ochando, to jadi ji to obiro tieko pe p. 5 Obiro siko ka wang’ chieng’, obiro siko ka dwe e tienge duto. 6 Obiro chalo gi koth machue e lum mong’adi maber kendo gi kodh ajiki mamiyo piny ng’ich. 7 E ndalone joma kare biro dhi maber, kendo kuwe biro bedo mogundho nyaka chop dwe lal nono. 8 Obiro bedo gi loch chakre nam nyaka nam kendo kochakore Aora maduong’ nyaka kuma piny ogikie. 9 Ogendini modak e piny ongoro biro kulorene kendo wasike biro nang’o lowo gi dhogi. 10 Ruodhi mag Tarshish kod mag dho nembe man mab oyo biro miye gik moko kendo ruodhi mag Sheba gi mag Seba biro kelone mich. 11 Ruodhi duto biro kulorene kendo ogendini duto biro tiyone. 12 Nimar obiro konyo joma ochando maywagore, jogo modhier ma onge gi jakony. 13 Obiro kecho joma ok nyal gi joma ochando kendo obiro reso ngima joma ochando. 14 Obiro gologi e dich modigigo kendo e timbe mahundu, nimar okwano rembgi ka gima nengone tek. 15 Mad odag aming’a! Mad kelne dhahabu moa Sheba. Mad ji duto sik ka lamone kendo ka gwedhe odiechieng’ duto. 16 Mad cham bed mang’eny kuonde duto e piny, kendo gikwak koda ka kuonde moting’ore gi malo mag thuche. Mad olembene ol mathoth ka Lebanon, kendo mad onyagi ka lum manie pap. 17 Mad nyinge sik nyaka chieng’ kendo mad odhi nyime ka wang’ chieng’. Ogendini duto ibiro gwedhi gi nyinge, kendo gibiro luonge ni ng’ama ogwedhi. 18 Jehova Nyasaye, ma Nyasach Israel, mondo opaki. En kende ema otimo gik miwuoro. 19 Nyinge man-gi duong’ mondo opaki nyaka chieng’ kendo mad piny duto pong’ gi duong’ne. Amin kendo Amin. 20 Ma e giko mag lamo mag Daudi Wuod Jesse.

Zaburi 73

Zaburi Mar Asaf

1 Nyasaye timo maber adier ne jo Israel, otimo maber ne jogo maler gie i chunygi. 2 An to tiendena nodwa kier. Ne achiegni aa kama ne anyono. 3 Nimar ne agombo timbe joma ochayo ji kane aneno kaka joma timbegi richo dhi maber. 4 Gionge pek moro amora kendo dendgi ber kendo otegno. 5 Chandruok ma mako ji gin ok yudgi kendo ok githagre kaka ji mamoko thagore. 6 Emomiyo sunga chalonegi thiwni mar ng’ut, kendo girwako maundu ka law. 7 Wengegi onyiedhore gi bor kendo miriambo maricho mopong’o pachgi onge gikogi. 8 Ji jaro ji kendo giwuoyo ka gihimo ji nikech gichayo ji, gisiko gibuogo ji ni ji biro wuoro. 9 Giwacho weche polo gi dhogi to lewgi to gimakogo mwandu mag piny. 10 Emomiyo jog egi doknegi kendo pa kogi kendo ok giyud rach moro amora kuomgi. 11 Giwacho ni, "Ere kaka Nyasaye nyalo ng’eyo? Nyasaye Mamalo Mogik to ong’eyo ang’o?" 12 Kama e kaka joma timbegi richo chalo: ok gidew gimoro amora kendo mwandugi osiko medore ameda. 13 Kare asetemo ritora mondo chunya osik kaler kayiem, kendo asetemo geng’o lwetena ni kik omul richo kayiem. 14 Nimar asiko achandora seche te, kendo ayudo kum okinyi kokinyi. 15 Ka dine bed ni awacho ni, "Abiro wacho kama, "to dine andhogo nyithindi. 16 To kane atemo winjo tiend gigi duto, to ne opek mohinga; 17 nyaka ne adonjo kama ler mar Nyasaye; eka nawinjo kaka gikog i nobedi. 18 Chutho iket ogi kama pothpoth, kendo ibologi piny mi githo. 19 Mano kaka itiekogi apoya nono, mi masiche malich lal kodgi nono! 20 Gilal nono ka lek ma ng’ato oleko gokinyi, omiyo sama ichiew, Yaye Ruoth, to ok ibi dewogi mana ka kido maonge. 21 Kane iya owang’, kendo chunya winjo lit, 22 to pacha nolal kendo ne ab e d o mofuwo, ne achalo le maonge rieko e nyimi. 23 Kata kamano an kodi ndalo duto, kendo imaka gi bada korachwich. 24 Itaya gi rieko ming’adona kendo bang’e ibiro tera kar duong’. 25 En ng’a ma an-go e polo mak mana in? Piny bende onge gi gimoro amora madwaro moloyi. 26 R i n gra gi chunya nyalo doko manyap, to Nyasaye ema miyo chunya teko, kendo en e girkeni mara nyaka chieng’. 27 Joma ni mabor kodi biro lal nono kendo ibiro tieko ji duto maok jo adiera ne in. 28 An to berna ka an but Nyasaye. Aseketo Ruoth Nyasaye kar pondona, kendo abiro lando gima moko duto mitimo.

Zaburi 74

Maskil mar Asaf

1 Ang’o momiyo isedagiwa nyaka chieng’, Yaye Nyasaye? Ang’o momiyo mirimbi dhuolore ka iro ko c h o m o rombe mag lek mari iwuon? 2 Par jogi mane ing’iewo chon gi lala, oganda ma gin girkeni mari, kendo mane iwaro- Got Sayun, kama in iwuon idakie. 3 Chak goyo okangegi ichom kuonde mosebedo ko kethore nyaka nenegi, lokri ichom kethruok maduong’ ma jasigu osekelo e kari maler. 4 Wasiki noruto kamane ijaromega kodwa; kendo ne gichungo bendechegi mochung’ kar timbegi maricho. 5 Ne gitimore marach mana ka ji mang’awo leyegi malo ka gidwaro tong’o yiende madongo dongo modongo modhigore. 6 Ne gituro chumbe modol odol gi tindogi kod nyundogi. 7 Ne giwang’o kari maler molokore buru, kendo ne gidwanyo kama nyingi dakie. 8 Ne giwacho e chunygi ni, "Wabiro tiekogi chuth!" Ne giwang’o kuonde duto e piny mane ilame Nyasaye. 9 Tinde ok miwa honni kaka ranyisi, kendo onge jonabi modong’ kata achiel, to onge kata ng’ato achiel kuomwa mong’eyo, ni mano biro bedo kamano nyaka karang’o. 10 N yaka karang’o ma jasigu biro jarie, Yaye Nyasaye? Ibiro yiene jasigu mondo oyany nyingi nyaka chieng’ koso? 11 Ang’o momiyo itamo lweti tiyo tichne, mana lweti mako rachwich? Gole oko kama isoye ei lepi mondo itiekgi! 12 To in e Ruodha nyaka chakre chon, Yaye Nyasaye, kendo isebedo kikelo resruok e piny. 13 In emane ipogo nam diere ariyo gi tekoni, kendo ne itoyo wiye ondiek marach ei pi. 14 In emane itoyo wiye Leviathan, mi ichiwe kaka chiemo ne le modak e thim. 15 In emane iyawo sokni gi aoche, kendo ne imiyo aoche madongo ma ok duon otwo 16 Odiechieng’ en mari, kendo otieno bende mari, bende ne iguro wang’ chieng’ gi dwe keregi. 17 In emane iketo tong’ duto mag piny kende ne iguro chwiri gi opon. 18 Parie kaka jasigu osejari, Yaye Jehova. Parie kaka joma onge rieko osechayo nyingi. 19 Kik iyie ichiw ngima mar akuchi ne le mager mag bungu; kik wiyi wil gi ngima jogi mathagore nyaka chieng’. 20 Par singruok mari nikech timbe maundu opong’o kuonde luto motimo mudho e piny. 21 Kik iyie mondo joma idiyo ringa ka wigi okuot, to mad joma odhier gi joma ochando opak nyingi. 22 Aa malo mondo isir tichni, Yaye Nyasaye; parie kaka joma ofuwo jari odiechieng’ duto. 23 Kik wiyi wil gi sibuoch wasiki, chom tir sigich wasiki mosiko medore ameda.

Zaburi 75

Ne Jatend Wer. E Duol Mar"Kik Iketh Gik moko". Zaburi mar Asaf. Wer

1 Wagoyoni erokamano, Yaye Nyasaye, wagoyoni erokamano nimar Nyingi ni machiegni, kendo ji lando timbeni miwuoro. 2 Iwacho ni, "An ema ayiero ndalo mowinjore, kendo an ema ang’ado bura kare. 3 Ka piny kaachiel gi ji duto modakie yiengni, to an ema amako sirnige motegno. Sela 4 Joma ochecho akwero ni, "Weuru sungoru; to joma timbegi richo to okwero ni, "Weuru ting’o tungeu malo." 5 Weuru bwogo polo gi tungeu, kendo kikuwuo ka ududo ng’uteu.’" 6 Nimar duong’ ok nyal medore ne ng’ato koa wuok chieng’ kata podho chieng’ kata e thim. 7 To Nyasaye ma jang’ad bura ema dwoko ng’ato piny, kendo ting’o ng’at machielo malo. 8 E lwet Jehova nitiere okombe moro mopong’ gi divai mochiek moriw gi gik makech-kech ka oole oko, to joma timbegi richo duto manie piny madhe duto pep nyaka ng’iende. 9 An to abiro siko ka alando wachni nyaka chieng’ kendo abiro wero wende pak ne Nyasach Jakobo. 10 Abiro ng’ado oko tunge joma timbegi richo duto, to tunge joma kare to ibiro ting’ malo.

Zaburi 76

Ne Jatend Wer. Gi Gig Wer Man-gi Tondegi. Mar Daudi Zaburi Mar Asaf. Wer

1 Nyasaye en rahuma e piny Juda, kendo nyinge duong’ e piny Israel. 2 Hembe nitie Salem kar dakni ni Sayun. 3 Kanyo ema nature aserni makakni, kaachiel gi okumbni gi ligengni, ma gin gig lweny 4 Duong’ mari ler okwako kendo iyombo gode momew gi kit le mayoreyore. 5 Yawuowi madongo mojing’ osema gik mane giyako koro ginindo nindogi mogik; kendo onge jokedogo kata achiel, manyalo ting’o kata mana bade. 6 Nikech kwer misekwerogigo, Yaye Nyasach Jakobo omiyo faras gi gari moywayo ochung’ kar tiendegi. 7 In kendi ema onego oluori. Koso en ng’a manyalo chung’ e nyimi ka mirima omaki? 8 Ne ing’ado bura gie polo, mi piny ne luoro omako moling’ thi- 9 Kane ia malo mondo ing’ad bura, Yaye Nyasaye, mondo ikony ji duto ma winjo marach e piny. Sela 10 Kuom adier, mirima ma in-go gi ji, keloni pak, kendo miyo joma otony ne mirimbi ritore. 11 Singri ne Jehova Nyasachi, kendo ne ni ichopogi; bende ne ni pinje duto man machiegni kelo mich ne Jal monego ji luor. 12 Ochodo chuny jotelo, kendo ruodhi duto mag piny oluore.

Zaburi 77

Ne jatend wer. Mar Jeduthun. Mar asaf. Zaburi.

1 Ne aywakne Nyasaye mondo okonya, kendo ne aywakne Nyasaye mondo owinja. 2 Kane an e chandruok, ne amanyo Ruoth; otieno duto ne arieyo bedena malo maok aol, kendo chunya nodagi hoch. 3 Ne apari mine ahum, Yaye Nyasaye, ne aol kendo chunya nonyosore. 4 Ne imako wengena mi ok oimore, kendo ne an gi pek maok anyal wuoyo. 5 Ne aparo kuom ndalo machon, higni machon gi lala; 6 ne aparo wendega mag otieno. Ne aloso gi pacha awuon, kendo chunya nopenjo kama: 7 "Be Ruoth nyalo dagi ng’ato chuth? Be en adier ni ok obi ochak ong’uon kendo? 8 Be herane maok rem dirum chuth adier? Singruokne be nyalo bare mak ochopo nyaka chieng’? 9 Mitki Nyasaye wiye osewil gi kecho ji?" Sela 10 Eka naparo ni, "Ma e kama abiro kwayoe kony: higni ma lwet Jal Mamalo Mogik mako rachwich osetieko." 11 Abiro siko kaparo timbe Jehova; ee, abiro paro kuom honni magi machon gilala. 12 Abiro paro mos kuom tijegi duto, kendo abiro paro matut kuom timbegi madongo duto. 13 Yoreni ler, Yaye Nyasaye. En nyasaye mane maduong’ kaka Nyasachwa? 14 In e Nyasaye matimo honni, kendo inyiso tekoni e dier ji mopogore opogore. 15 Ne iwaro jogi gi badi maratego, jogi ma nyikwa Jakobo gi Josef. Sela 16 Pige noneni, Yaye Nyasaye, pige noneni mi luoro omakogi, kendo kude matut notetni. 17 Boche polo ne oolo pi piny, kendo polo nomor e kor polo, ka asernigi mil koni gi koni. 18 Mor polo mari nowinji ei yamo mager, mil polo mari nomenyo piny duto, kendo piny notetni kendo oyiengni. 19 Yori nong’ado dier nam, yo miluwo nokadho e dier pige maringo matek, kata obedo ni kuonde mane tiendeni onyono ne ok nyal ne gi wang’. 20 Ne itelo ne jogi ka jakwath ka gin e lwet Musa gi Harun.

Zaburi 78

Maskil mar Asaf

1 Chiknauru itu, Yaye un joga, winjuru weche mawuok e dhoga. 2 Abiro yawo dhoga ka agoyo ngeche, ee, abiro wacho weche mopondo mawuoyo kuom gik mane otimore chon gilala- 3 Gik ma wasewinjo kendo ma wang’eyo, mane wuonewa onyisowa. 4 Ok wabi pandogi ne nyithindgi; to wabiro hulogi ne tieng’ mabiro timbe mipako mag Jehova gi tekone kod gik miwuoro mosetimo. 5 Ne ogolo chike ne joka Jakobo kendo noguro chik e piny Israel, chike mane omiyo kwe r ewa mondo opuonj nyithindgi, 6 mondo tieng’ mabiro ong’egi, koda ka nyithindo mapok onyuol, kendo gin bende ginyis nyithindgi. 7 Eka mondo mi giket genogi kuom Nyasaye kendo kik wigi wil gi gik mosetimo to ni mondo girit chikene. 8 Bende mondo kik ne gichal gi kweregi- mane gin tieng’ ma tokgi tek kendo ma jong’anyo, ma chunjegi ne ok ochiwore ne Nyasaye kendo ne ok luwe gi adiera. 9 Jo Efraim nogomo odok chieng’ kedo, kata obedo ni negimanore gi atunge. 10 Ne ok girito singruok mar Nyasaye kendo ne gidagi dak ka giluwo chik Nyasaye. 11 Wigi nowil gi gik mane osetimo, ranyisi mane osenyisogi. 12 Ne otimo honni ka wuonegi neno e gweng’ mar Zoan, e piny Misiri. 13 Ne omiyo nam opogore diere ariy o mi nomiyo gikadho kendo nomiyo pi ochung’ moling’ thi ka ohinga. 14 Ne otayogi kod bor polo godiechieng’ kendo giler moa e mach otieno duto. 15 Ne otucho lwanda e thim kendo nomiyogi pi mogundho ka nembe; 16 bende nomiyo aoche obu b n i kawuok e lwanda kama obarore mi pi nomol piny mana ka aora. 17 To eka pod ne gidhi mana nyime ka gitimo richo e nyime ka ging’anyo e thim ne Jal Mamalo Mogik. 18 Ne gitemo Nyasaye ka ging’eyo, kuom kete mondo omigi chiemo mane gigombo. 19 Ne giwuoyo marach kuom Nyasaye ka giwacho ni, "Nyasaye be nyalo chano mesa e nyimwa e thim ka? 20 Kane ogoyo lwanda to pi nothinyore oko kendo aoche nochako mol mogundho. To chiemo be domiwa adier? Ring’o be onyalo kelo mi opog ne joge adier?" 21 Kane Jehova owinjo gi ite, iye nowang’ ahinya, mi mach mare notuk kuom joka Jakobo, kendo mirimbe mager nobiro kuom jo Israel, 22 nimar ne ok giyie kuom Nyasaye kata geno kuom resruok mare. 23 To eka pod nogolo chik ne kor polo malo kendo noyawo dhoudi mag polo; 24 ne oolo mana piny ka koth mondo ji ocham, adier, nomiyogi chamb polo. 25 Ji nochamo makati mar malaike, kendo nooro negi kit chiemo duto mane ginyalo chamo. 26 Ne ogonyo yamb ugwe moa e polo, kendo nogolo yamb milambo gi tekone. 27 Nolwaro ring’o piny kuomgi ka buru, adier, winy mahuyo nolwar kuomgi ka kwoyo manie dho nam. 28 Nomiyo winjego olwar piny nyaka ei kambi mi ne gilworo hembegi duto koni gi koni. 29 Ne gichiemo mi chiemo otamogi tieko, nimar nomiyogi gima ne chunygi gombo. 30 To kane pok gitieko chiembgi mar gombono, chutho, ka chiemo ne pod opong’o dhogi, 31 mirima mager mar Nyasaye nogore kuomgi, mi nomiyo jogegi maroteke otho, kendo nopielo yawuot Israel mapod tindo piny. 32 To kata obedo ni magi duto nosetimore, pod ne gidhi mana nyime gitimo richo; pod ne ok giyie kuome, kata obedo ni ne osetimo ranyisi mathoth e diergi. 33 Omiyo nomiyo ngimagi orumo ka onge ber kendo higni mag-gi nopong’ gi masiche ma bwogo ji. 34 E kinde moro amora mane Nyasaye okumogie, to ne gimanye kendo ne gilokore mi gichak gidware gi siso. 35 Ne giparo ni Nyasaye ema ne en lwanda margi, kendo ni Nyasaye Mamalo Mogik ema ne en Jawargi. 36 To kata kamano ne gichare achara gi dhogi, ka giwuonde gi lewgi. 37 nimar chunygi ne ok omoko kuome, kendo ne ok gilu singruokne kuom adier. 38 To en, kaka en ng’ama kecho ji, noweyo negi kethogi, kendo ne ok otiekogi. Kinde ka kinde nogeng’o mirimbe kendo ne ok otoyo mirimbe duto kuomgi. 39 Noparo kaka ne gin mana dhano adhana machalo yamo makalo kendo ok chak duogi. 40 Mano kaka ne ging’anyone e thim di mang’eny kendo ne gimiye chuny lit e piny motwo! 41 Ne gitemo Nyasaye anuoya anuoya, kendo ne gisindo Jal Maler mar Israel. 42 Ne ok giparo tekone- ne ok giparo odiechieng’ mane owarogi e lwet jasigu, 43 odiechieng’ mane onyiso e lela honni mage e piny Misri kane otimo ranyisige e gweng’ mar Zoan. 44 Noloko aochegi remo mi koro ne ok ginyal modho pi moa e aochegi. 45 Ne ooro pumbi mag lwang’ni mane omwonyogi, gi ogwende mane oketho pinygi. 46 Ne ochiwo chambgi ne ongogo, chambgi mosechiek ne bonyo. 47 Ne oketho olembegi mag mzabibu gi pe, kod yiendegi mag ng’owu gi yamo mang’ich. 48 Ne ochiwo jambgi ne pe, kendo nomiyo dhogegi polo ogoyo. 49 Ne oolo kuomgi mirimbe maliet, kokecho kendo iye owang’ kendo ogeroganda malaike ma jonek. 50 Ne olosone mirimbe yo maluwo, kendo ne ok okechogi e tho to ne ojwang’ogi mondo tho otiekgi. 51 Ne onego kach jo Misri duto, mana olemo mokuongo chiek mag dhano e hembe mag Ham. 52 To joge to nogolo oko mana ka kweth, kendo notelo negi ka rombe koyoro kodgi thim. 53 Ne otayogi maber omiyo ne gionge gi luoro, to wasikgi to ne nam omwonyo. 54 Kamano e kaka ne okelogi nyaka e tong’ mar pinje maler, nyaka ne gitundo e piny motimo thuche, ma lwete makorachwich nosekawo. 55 Ne oriembo ogendini e nyimgi kendo nomiyogi lopgi kaka girkeni margi, mi nomiyo dhout Israel odak e miechgi giwegi. 56 To kata kamano ne gitemo Nyasaye, kendo ne ging’anyone En Mamalo Mogik; ka gidagi rito chikene. 57 Mana kaka wuonegi ne ok giwinje kendo ne ok gin jo adiera kendo ne gichalo atung’ mobam ma ok nyal gen. 58 Ne giwang’o iye gi kuondegi moting’ore malo, kendo ne gichiewo nyieke gi nyisechegi mane giloso. 59 Kane Nyasaye owinjogi, iye nowang’ ahinya, kendo nodagi jo Israel chuth. 60 Ne ojwang’o hemb romo mane ni Shilo, mane en hema mane oguro owuon e dier ji. 61 Nooro Sandug Muma e twech, mi duong’ne maler nodhi e lwet wasigu. 62 Nochiwo joge ne ligangla, kendo nokecho ahinya gi girkeni mare. 63 Mach notieko yawuotgi matindo, kendo nyigi ne ok ower negi wende arus; 64 jodologi ne onegi, kendo mondegi ne ywak otamo. 65 Eka Ruoth nochiew ka gima oa e nindo, mana kaka ng’ato chiewo, bang’ madho divai mang’eny. 66 Ne oriembo wasike gi goch, kendo nomiyo giyudo wichkuot mosiko. 67 Ne odagi hembe mag Josef, bende ne ok oyiero dhood joka Efraim, 68 to dhood joka Juda emane oyiero, ee, noyiero mana Got Sayun, mane ohero. 69 Ne ogero kare maler, ka go d e maboyo, kendo mana ka piny mane oguro nyaka chieng’. 70 Ne oyiero Daudi jatichne, kendo nogole e abich rombe; 71 nogole e tij rito rombe moke l e mondo okwa joge ma Jakobo mondo okwa Israel girkeni mare. 72 Kuom mano Daudi nokwayogi gi chuny makare kendo notelo negi, gi lwedo mong’ith.

Zaburi 79

Zaburi Mar Asaf

1 Yaye Nyasaye, Ogendini osemonjo girkeni mari; gisedwanyo Hekalu mari maler, kendo giseketho Jerusalem modong’ pidhe-pidhe. 2 Gisechiwo ringre jogi motho mondo obed chiemb winy manie kor polo, ring jogi maler gisechiwo ne ondiegi mag piny. 3 Giseolo remo e alwora mar Jerusam ka pi, kendo koro onge ng’ama nyalo iko joma otho. 4 Waselo kore gima kuodo wich ne jobutwa, joma ijaro kendo inyiero gi joma olworowa. 5 Nyaka karang’o, Yaye Jehova? Ibiro kecho nyaka chieng’ koso? Nyaka karang’o ma nyiego mari biro lielie ka mach? 6 Ol mirimbi kuom pinje ruodhi, maok luong nyingi; 7 nimar gisengamo Jakobo mi giketho gweng’e. 8 Kik ikwanwa kaka joketho, nikech richo mag wuonewa; mad kechni bi romnwa piyo, nimar osedwokwa piny marach. 9 Konywa, Yaye Nyasaye ma Jawarwa, nikech duong’ mar nyingi; reswa kendo wenwa richowa, mondo nyingi oyud duong’. 10 Ang’o momiyo ogendini onego owach ni, "Nyasachgino to ere?" Mi ogendini ong’e, ka waneno gi wang’wa, ni ichulo kuor nikech remb jog i mosechwer. 11 Mad chur ma joma otwe churgo chopi e nyimi; rit ngima joma oseng’adnegi buch tho gi teko mar badi. 12 Chul kuor ne jobutwa nyadibiriyo ki goyo bembegi. Kuom ayany ma gisediro kuomi, Yaye Jehova. 13 Eka jogi, ma gin rombegi mikwayo, biro paki nyaka chieng’, kendo wabiro nyiso pakni, koa e tieng’ moro nyaka tieng’ machielo.

Zaburi 80

Ne Jatend Wer. E dwol mar"Ondanyo Mar Singruok." Mar Asaf. Zaburi

1 Chiknwa iti, Yaye Jakwadh jo Israel, in mitelo ne Josef ka kweth mar dhok; in mibetekom loch e kind kerubi, koro rieny ane 2 e nyim Efraim, gi Benjamin gi Manase. Nyis tekri kendo bi mondo ireswa. 3 Dwogwa iri, Yaye Nyasaye; mi wang’i orienynwa, eka mondo wayud warruok 4 Yaye Jehova Nyasaye Manyalo Gik Moko Duto, mirimbi biro siko koyienyo gi lamo mar jogi nyaka karang’o? 5 Isemiyo gichamo pi wang’ ka kuon kendo isemiyo gimodho pi wang’ agwetni modhuro. 6 Isemiyo wadoko rachwany ne jobutwa, kendo wasikwa jarowa. 7 Dwogwa iri, Yaye Nyasaye Manyalo Gik Moko Duto; mi wang’i orienynwa, eka mondo wayud warruok. 8 Ne igolo mzabibu moro e piny Misri, kendo ne iriembo ogendini mi ipidhe kargi. 9 Ne ilosone lowo maber, kendo nochwoyo tiendene piny mi opong’o piny. 10 Tipone noimo gode duto, mana ka yiende sida ma odonge ma bedene olak. 11 Noyaro bedene madongo nyaka e nam kendo noloth mochweyo nyaka e aora. 12 Koro ang’o momiyo isemuko ohinga mag e, momiyo ji duto makadho pone ka olemo. 13 Mbithe moa e bungu kethe, kendo le mag bungu chame. 14 Duog irwa, Yaye Nyasaye Manyalo Gik Moko Duto! Ng’i piny gie polo mondo ine! Ng’i mzabibu maber, 15 yien ma lweti makorachwich ema nopidho gi tiende ma en wuodi misepidho in iwuon. 16 Mzabibu mari osetong’ mi owang’ gi mach, jogi lal nono nikech isekwerogi. 17 Mad lweti bed kuom Jal mobet e bathi korachwich, ma en Wuod Dhano misechungo ne in iwuon. 18 Eka ok wanachak walokre waweyi; dwogwa iri eka wanaluong nyingi. 19 Duogwa iri, Yaye Jehova Nyasaye Manyalo Gik Moko Duto mi wang’ orienynwa, eka mondo wayud warruok.

Zaburi 81

Ne Jatend Wer. Kaluwore Gi Gittith. Mar Asaf

1 Weruru matek gi mor ne Nyasaye ma miyowa teko, gouru koko matek ne Nyasach Jakobo! 2 Chakuru wer, yiekuru oyie ke; gweluru nyatiti gi asili mamit. 3 Gouru tung im ka Dwe Manyien ochakore, ma en ka dwe osetegno, e odiechieng’ mar Nyasiwa mogen. 4 Ma en gima ochuno jo Israel; chik ma Nyasach Jakobo nogolo. 5 Ne ogure kaka chik ne Josef, kane owuok gi mirima koa Misri, kuma ne wawinje dhok mane wakia. 6 Owacho ni, "Ne agolo misigo mapek e gokgi, mi lwetgi nogony e ting’o atonge. 7 Ne iluongo ka in e chandruok mi akonyi, ne aduoki gie ii boche polo, kendo ne atemi e tie pige mag Meriba. Sela 8 Winjuru wach, Yaye joga, to abiro siemou, abiro siemou ka uikoru mar winja, Yaye Israel. 9 Kik ubed gi nyasaye ma wendo e dieru, kendo kik ukulru ne nyasaye ma ukia. 10 An Jehova Nyasachu, mane ogolou Misri. Ng’amuru dhou malach mondo apong’e. 11 "To joga nodagi winjo duonda kendo Israel nodagi timo kaka achikogi. 12 Omiyo ne aweyogi nikech chunygi ne tek, kendo negiluwo yoregi giwegi. 13 "Ka dine joga yie winja, ka dine Israel yie lu yorena, 14 mano kaka dine atieko wasikgi piyo piyo kendo dine agoyo joma kedo kodgi gi lweta! 15 Joma ochayo Jehova dine okulorene gi luoro, kendo kum margi dosiko nyaka chieng’. 16 To un dine apidhou gi ngano maber mogik, kendo dine aromou gi mor kich ma athodho e lwanda.

Zaburi 82

Zaburi mar Asaf

1 Nyasaye osekawo kare e dier chokruok maduong’, koro ong’ado bura e kind"nyiseche." 2 “Nyaka karang’o ma ubiro dhi nyime ka udewo wang’ joma ok timbegi nikare kendo kudewo wang’ joma timbegi richo? Sela 3 Siruru joma ok nyal kod mago manyithi kiye, rituru ratiro mago ma jodhier kod joma idiyo. 4 Resuru joma ok nyal kod joma ochando; golgiuru e lwet joma timbegi richo. 5 "To gisesiko ka gimemore kendo onge gima ging’eyo. Giwuotho koni gi koni e mudho; kendo gimiyo mise duto mag piny yiengni. 6 "Asenyisou ni, ‘un nyiseche, "kendo ni un duto un yawuot Jal Mamalo Mogik.’ 7 To ubiro tho ka ji ajia; adier ubiro podho mana kaka jatelo moro amora maok otang’. 8 Aa malo, Yaye Nyasaye, ng’adne piny bura, nimar ogendini duto gin girkeni magi.

Zaburi 83

Wer. Zaburi Mar Asaf

1 Kik iling’, Yaye Nyasaye; kik iywe, Yaye Nyasaye, bende kik ibed mos. 2 Neye kaka wasiki piem kodi gi koko maduong’. Neye kaka joma kedo kodi ng’anyoni. 3 Gichano timo ne jogi marach ling’ling’; giloso chenro maricho ne joma chunyi ohero. 4 Giwacho ni, "Biuru watiekgi mi girum pep kaka oganda, mondo nying mar Israel kik chak par kendo." 5 Giloso chenro ka giriwo pachgi bedo achiel, gilosoni riwruok mondo gibed kodi. 6 Gin hembe jo Edom gi jo Ishmael, jo Moab gi jo Hagri, 7 Jo Gebal, jo Amon kod jo Amalek, jo Filistia kaachiel gi joma odak Turo. 8 Koda ka jo Asuria be oseriwore kodgi mondo oriw lwetgi ne nyikwa Lut. Sela 9 Timnegi kaka ne itimo ne Midian, mana kaka nitimo ne Sisera gi Jabin e Aora Kishon, 10 mane jotho Endor modoko manyiwa e lo. 11 Mi jogi momew ochal gi Oreb kod Zeab mi ruodhigi duto chal gi Zeba kod Zalmuna, 12 mane jowacho ni, "Wakawuru pewe mag kwath mag Nyasaye mondo obed marwa." 13 Mi gichal gi buya mayot-yot, Yaye Nyasacha, mi gichal gi mihudhwe ma yamo tero. 14 Mana kaka mach wang’o bungu maduong’ kata kaka mach wang’o wi got, 15 e kaka in bende ilawgi gi ahiti maduong’ kendo ibu oggi gi yambi makudho matek. 16 Pong’ wengegi gi wichkuot mondo ji omany nyingi, Yaye Jehova. 17 Mad wigi kuodi nyaka chieng’ kendo gisik ka luoro omakogi; mad gilal nono ka gin gi wichkuot. 18 Mi ging’e ni in, ma nyingi Jehovani in kendi e Jal Man Malo Mogik kendo ni iloyo piny duto.

Zaburi 84

Ne jatend wer. Kaluwore gi gitith. Mar Yawuot Kora. Zaburi

1 Mano kaka kar dakni ber miwuoro, Yaye Jehova Manyalo Gik Moko Duto! 2 Chunya gombo kendo nyawni ka agombo laro mag Jehova; adundona gi denda duto wer gimor ne Nyasaye mangima. 3 Nyaka winj abang’ chieth oseloso kar dakne, kendo opija bende osegero ode, kama onyalo nyuole nyithindebut kendoni mar misango, Yaye Jehova Manyalo Gik Moko Duto, ma Ruodha kendo Nyasacha. 4 Ogwedh joma odak e odi; mosiko ka paki. Sela 5 Ogwedh joma tekregi ni kuomi jogo moketo chunygi e luwo yori maler. 6 Ka gikadho e Holo mar Beka to gimiyo obedo kama opong’ gi sokni; kendo kodh opon bende pong’e gi yewni. 7 Tekregi osiko medore ameda, nyaka chop moro ka moro kuomgi chop Sayun e nyim Nyasaye. 8 Yie iwinj lemona, Yaye Jehova Nyasaye Manyalo Gik Moko Duto; chikna iti, Yaye Nyasach Jakobo. 9 Chom wang’i ine kuodwa, Yaye Nyasaye; rang ng’ati miwiro gi ng’- wono. 10 Bet e laru magi kuom odiechieng’ achiel ber moloyo bet kama chielo kuom higni alufu achiel; daher bedo jarit dhoot e od Nyasacha, moloyo dak e hembe joma timbegi richo. 11 Nimar Jehova Nyasaye en chieng’ kendo en okumba; Jehova chiwo ng’uono gi luor; ok otuon joma wuodhgi oriere tir gimoro amora maber. 12 Yaye Jehova Manyalo Gik Moko Duto, ng’ama ogeno kuomi oguedhi.

Zaburi 85

Ne Jatend wer. Mar Yawuot Kora. Zaburi

1 Ne itimo maber ne piny, Yaye Jehova; ne iduogone Jakobo mwandune. 2 Ne iweyone jogi kethogi kendo ne iumo richogi duto. Sela 3 Mirimbi duto ne iketo tenge, kendo ne ilokori iweyo mirimbi mager. 4 Duogwa iri kendo, Yaye Nyasaye Jawarwa, kendo gol kecho mikechogo kodwa iter mabor. 5 Ibiro kecho ko dwa nyaka chieng’ koso? Koso ibiro choro mirimbi e tienge duto? 6 Ang’o mamoni duogowa iri kendo, mondo eka jogi obed mamor kuomi? 7 Nyiswa herani maok rem, Yaye Jehova, kendo mi wayud resruok mari. 8 Abiro chiko ita ne gima Nyasaye ma Jehova biro wacho; osingo kuwe ne joge maler, to nyaka gine ni ok gidok e timbe mofuwo. 9 Adier, resruokne ni machiegni gi joma oluore, kendo duong’ne biro bet e pinywa. 10 Hera gi adiera biro riwore kanyakla, kendo tim makare gi kuwe biro nyodhore. 11 Adiera biro aa piny kochomo malo, kendo tim makare biro ng’iyo piny gie polo. 12 Jehova biro miyowa gima ber adier kendo pinywa biro chiego chambe. 13 Tim makare biro telo nyime kendo biro loso yo ne okangege.

Zaburi 86

Lamo Daudi

1 Winj lamona, Yaye Jehova, kendo duoka, nimar adhier kendo achando. 2 Rit ngimana, nikech achiworani. In e Nyasacha, omiyo res ngima jatichni mogeno kuomi. 3 Kecha, Yaye Ruoth, nimar aywakni odiechieng’ duto. 4 Mi jatichni obed mamor nimar in ema arangi gi geno. 5 Nikech in iber kendo iweyone ji richogi, Yaye Jehova, ichiwo hera mogundho ne ji duto ma luongi mondo ikonygi. 6 Winj lamona, Yaye Jehova; chik iti ne ywakna ma akwayigo kech. 7 Chieng’ ma chandruok omaka to abiro luongi mondo ikonya, nimar ibiro duoka. 8 Onge nyasaye moro amora e dier nyiseche machalo kodi, Yaye Ruoth. onge timbe minyalo pimo gi magi. 9 Ogendini duto misechueyo biro biro mi podhi e nyimi kalami, Yaye Ruoth, adier, gibiro miyo nyingi duong’. 10 Nimar iduong’ kendo itimo timbe miwuoro; in e Nyasaye kende. 11 Puonja yoreni, Yaye Jehova, mondo eka awuothi e adierani; miya chuny maonge hubagabaga, mondo eka aluor nyingi. 12 Abiro paki gi chunya duto, Yaye Ruoth Nyasacha, abiro miyo nyingi duong’ nyaka chieng’. 13 Nimar hera ma iherago duong’, kendo isegola ei chuny bur matut. 14 Josunga ma wengegi tek monja, Yaye Nyasaye; kidieny mar joma ok kech ng’ato dwa tieko ngimana- joma ok dew kata in. 15 Into in Nyasaye ma kecho kendo ng’won, Yaye Jehova, iyi ok wang’ piyo, ipong’ gi hera kendo in ja adiera. 16 Duog ira mondo ikecha; med jatichni tekoni kendo res jatichni mogeni. 17 Miyae ranyisi mar berni, mondo wasika one mi wigi okuodi, nimar in ema isebedo ka ikonya kendo ihoya, Yaye Jehova.

Zaburi 87

Mar Yawuot Kora. Zaburi. Wer

1 Oseguro mise mare ewi got maler; 2 Jehova ohero rangeye mag Sayun moloyo kuonde dak duto mag Jakobo. 3 Ji wacho gik madongo kuomi, Yaye dala maduong’ mar Nyasaye: Sela 4 "Abiro kwano Rahab gi Bablon e kanyakla mar joma ong’eya- koda ka Filistia bende, kod Turo, kaachiel gi Kush - kendo abiro wacho ni, ‘Jali nonyuol ei Sayun.’" 5 Adier, nowachi kuom Sayun ni, "Jali gi jalcha bende nonyuol kuome, kendo Jal Mamalo Mogik owuon biro chunge." 6 Jehova biro ndiko e kitabu mindikoe nying ogendini kama: "Jali nonyuol ei Sayun." Sela 7 Sama gihugo wer to giniwer ni, "Sokoga duto nie iyi."

Zaburi 88

Wer. Zaburi Mar Yawuot Korah. Ne Jatend Wer. Kaluwore Gi Mahalath leonoth. Maskil mar Heman ja Ezrahi

1 Yaye Jehova Nyasaye ma resa, ayuagora e nyimi odiechieng’ gotieno. 2 Mad lamona chop e nyimi; yie ilok iti ne kwayona. 3 Nimar chandruok opong’o chunya kendo ngimana sudo machiegni gi liel. 4 Ikwana kaachiel gi joma ridore piny ei bur matut; achalo ng’ama onge teko. 5 Ojwang’a kaachiel gi joma otho, mana kaka joma onegi monindo e bur, ma koro ok ipar kuomgi kendo, joma ong’ad kargi oko e ritni. 6 Iseketa ei bur matut mogik, e iye piny mogik, kama olil ti. 7 Mirimbi mager ogore kuoma mapek; isebara ndas gi apaka magi duto. 8 Isemiyo osiepena mane nimachiegni koda mogik oringa, kendo isemiyo koro achalonegi koko. Odinna maok anyal tony; 9 wengena ok nen maber nikech kuyo ma an-go. Aluongi odiechieng’ kodiechieng’, Yaye Jehova; achiko n i lwetena. 10 Be itimo honni magi ne joma otho? Joma otho be nyalo chier kendo mi paki? Sela 11 Herani be inyiso joma nie i liel; adier, koso adierani be yudore e Abadon? 12 Timbeni miwuoro be ong’ere kama otimo mudhono, kata timbeni makare e piny ma ilalieno? 13 Anto aywakni mondo ikonya, Yaye Jehova; lamona chopo e nyimi gokinyi. 14 Yaye Jehova, idaga nang’o momiyo ipandona wang’i? 15 Aseneno chandruok chakre tinna mi adwatho; asewinjo malit ndi nikech thagruok misekelona, kendo chunya oseol. 16 Mirimbi mager oseywaya; thagruok mimiya osetieka. 17 Gilwora ka ataro odiechieng’ duto; gisedinona chuth koni gi koni. 18 Isemaya osiepena gi joherana; mudho mandiwa ema koro odong’ machiegni koda kaka osiepna.

Zaburi 89

Maskil Mar Ethan Ja Ezrahi

1 Abiro wer nyaka chieng’ kuom hera maduong’ mar Jehova; abiro nyiso ji gi dhoga mi ging’e kuom adierani e tienge duto. 2 Abiro nyiso ratiro ni herani ogurore motegno nyaka chieng’; kendo ni ne iguro adierani e polo owuon. 3 Ne iwacho ni, "Asetimo muma gi ng’ata ma ayiero, asesingora ne Daudi jatichna, ni, 4 ‘Anachung’ kothi nyaka chieng’ kendo anagur lochni motegno e tienge duto.’" Sela 5 Polo pako timbeni miwuoro kod adierani, Yaye Jehova, e dier chokruok mar joma ler. 6 Koso en ng’a e kor polo minyalo pimo gi Jehova? En ng’a e dier chuech mag polo machalo gi Jehova? 7 E buch joma ler Nyasaye oluor gi luor maduong’; olich moloyo chuech duto molwore. 8 Yaye Jehova Nyasaye Manyalo Gik Moko Duto en ng’a machalo kodi? In ratego kendo adierani olwori, Yaye Jehova. 9 In-gi teko e wi nam magingore; ka apakage dhuolore malo, to ikueyogi. 10 Ne ing’inyo Rahab mana ka kitundu, kendo ne ikeyo wasiki gi badi maratego. 11 Polo gin magi, kendo piny bende en mari. In ema ne imiyo piny obetie kaachiel gi gik moko duto manie iye. 12 Ne ichueyo nyandwat gi milambo; Tabor gi Hermon pako nyingi gi wer gi mor. 13 In-gi bat maratego, lweti bende otegno, kendo lweti makorachwich nigi duong’. 14 Tim makare gi adiera e mise mag lochni; hera gi ber otelo e nyimi. 15 Oguedh joma osepuonjore goyoni sigio mar mor, jogo ma wuotho buti e lerni, Yaye Jehova. 16 Giil odiechieng’ duto nikech nyingi; gidhialo timni makare. 17 Nimar in e duong’gi gi tekog i, kendo isedhialo tungwa kuom ng’uononi. 18 Adier, kuodwa en mar Jehova, ruodhwa en mar Jal Maler mar Israel 19 Kinde moko ne iwuoyo e yor fweny, mine iwacho ne jogi ma jo adiera ni, ‘Asesidho teko kuom jalweny, asemiyo wuowi moro matin duong’ e dier ji. 20 Aseyudo Daudi jatichna; asewire gi mora maler. 21 Lweta biro sire, adier, bada biro miye teko. 22 Onge ng’ama timbene richo moro amora mane ochune mondo ogolne osuru; onge ng’ama timbene richo moro amora ma nosande. 23 Abiro tieko chuth joma kedo kode koneno gi wang’e, kendo abiro goyo wasike duto piny. 24 Herana mar adier nobed kode, kendo tungene nomi duong’ nikech nyinga. 25 Abiro keyo lwete mi kwak nam, kendo lwete makorachwich biro kwako aore. 26 Obiro luonga ni, ‘In Wuonwa kendo in Nyasacha, lwandana ma Jawarna.’ 27 Bende abiro ketone nyathina makayo, ma en Jal moting’ malo moloyo ruodhi duto mag piny. 28 Abiro siko ka ahere nyaka chieng’, kendo winjruok ma atimo kode ok norem mak ochopo ngang’. 29 Abiro guro kothe nyaka chieng’, kendo lochne nosiki mana kaka polo siko. 30 "Kata ka yawuote nowe chikna maok giluwo yorena, 31 ka ok girito buchena kendo ka chikena otamogi luwo, 32 to anakum richogi gi luth, kendo anago kethogi gi chwat. 33 Kata kamano ok anagol herana kuome, bende ok anatimne gima opogore gi adierana. 34 Ok anawe mak achopo winjruokna kode kata loko gima asewacho gi dhoga. 35 Asesingo ra dichiel kendo mogik kuom ler mara, kendo ok abi riambo ne Daudi, 36 ni kothe nodhi nyime nyaka chieng’ kendo lochne nosiki e nyima ka wang’ chieng’; 37 nogure mi osiki nyaka chieng’ kaka dwe, ma en ranyisi madier e kor polo." Sela 38 To in isekwedo, kendo isechayo, iyi osewang’ matek gi ng’ati mowir. 39 Iselokori iweyo muma mane itimo gi jatichni, kendo isechido osimbone ei buru. 40 Isegoyo ohingage duto piny kendo isemuko kuondege mochiel motegno mi olokore gunda. 41 Ji duto makalo bute oseyake; osedoko ng’ama jobute nyiero. 42 Iseting’o lwedo makorachwich mar wasike malo; isemiyo wasike duto oil. 43 Bende isemiyo dho liganglane obedo madik kendo ok isekonye e kedo. 44 Isemiyo duong’ne orumo kendo isewito lochne piny. 45 Iseng’ado ndalo mag tinne odoko machiek; isemiyo oneno wichkuot maduong’. 46 Nyaka karang’o, Yaye Jehova? Ibiro pando wang’i nyaka chieng’ koso? Mirimbi biro liel ka mach nyaka karang’o? 47 Parie kaka ngimana rumo piyo. Neye kaka ne ichueyo dhano duto kayiem! 48 En ng’a manyalo bedo mangima nyakachieng’ mak oneno tho? Koso en ng’a manyalo resore owuon e teko mar liel? Sela 49 Yaye Jehova, tinde ere hera n i maduong’ machon, hera mane isingori kuom adierani, ni initim ne Daudi? 50 Ruoth, parie kaka ji osechayo jatichni, parie kaka ating’o e chunya ayenje mag ogendini duto, 51 ayenje ma wasiki osejerogo, Yaye Jehova, ayenje ma gisejarogo okang’ kokang’ mar jatichni mowir. 52 Opak Jehova nyaka chieng’! Amin kendo Amin.

Zaburi 90

Lamo Mar Musa Ng’at Nyasaye

1 Yaye Jehova, isebedo kar dak marwa nyaka nene e tienge duto. 2 Kane pok gode obetie kata kane pok ichueyo piny gi ji modak e iye, to isebedo ka in Nyasaye nyaka nene kendo manyaka chieng’. 3 Idwoko dhano e lo, kiwacho ni, "Doguru e lo un koth dhano." 4 Nimar higni alufu achiel e nyimi chalo gi odiechieng’ manyoro mosekalo, kata gi saa mar otieno. 5 Iywoyo dhano ilalgo nono ka nindo mar tho terogi; gichalo gi lum mang’ich mar okinyi- 6 ma kata obedo ni loth ka ng’ich gokinyi to godhiambo to ner kendo two. 7 Mirimbi tiekowa kendo kecho mikechogo kodwa bwogowa. 8 Iseketo richowa e nyimi, ee, richowa mwatimo ling’ling’ ineno seche tee. 9 Ndalowa kadho piyo nikech mirimbi; hikwa rumo piyo gi chir. 10 Ndalowa en piero abiriyo kata piero aboro, ka ringrewa otegno; to kata kamano ndalogo duto opong’ gi chandruok kod kuyo, nimar gikalo piyo, kendo gilal nono. 11 En ng’a mong’eyo teko mar mirimbi? Nimar gero mari nigi teko machalo gi teko ma luori kelo. 12 Omiyo puonjwa kwano ndalow a kare, mondo wabed gi chuny mariek. 13 Ibiro siko kikecho nyaka karang’o, Yaye Jehova? Lokri, kech jatichni. 14 Romwa gokinyi gi herani maok rem, mondo wawer gi ilo kendo wabed mamor ndalowa duto. 15 Mi wabed mamor aming’a mana kaka isemiyo waneno malit, marom gi higni ma wasenene chandruok. 16 Mad tijeni nere gi jotichni, mad duong’ni nyisre ne nyithindi. 17 Mad ng’wono mar Ruoth Nyasachwa obed kodwa; yie igurnwa tich mar lwetwa- ee gurnwa tich mar lwetwa.

Zaburi 91

1 Ng’at modak ei kar pondo mar Jal Man Malo Mogik biro yudo yueyo e bwo tipo mar Nyasaye Manyalo Gik Moko Duto. 2 Ng’at ma kamano nyalo wacho kuom Jehova ni, "En e kar pondona kendo en e ohingana, en e Nyasacha ma ageno kuome." 3 Jehova biro resi adier kuom gik mochikigo mondo ohinyi kendo kuom tuoche maricho maneko. 4 Obiro umi gi buombene, kendo ibiro yudo konyruok e bwo buombene; adierane biro bedoni ka okumba kendo ka siro. 5 Ok iniluor masira mar otieno, kata asere machielore godiechieng’, 6 kata tuoche maricho maneko mang’anjo e mudho, kata tho matieko ngima ji e dier odiechieng’ tir. 7 Ji alufu achiel nyalo podho e bathi, ee, ji alufu apar nyalo riere e badi ko rachwich to in onge moro ma nochop buti. 8 Ining’igi ang’iya gi wengeni kendo inine kikumo joma timbegi richo. 9 Ka iketo Jal Man malo Mogik kar dakni, adier, kiketo Jehova ma en kar pondowa obedo kar konyruok mari, 10 to onge gimoro amora marach ma notimreni, onge masira ma nosud machiegni gi odi. 11 Nimar enochik malaikege konyisogi wachni mondo giriti e yoreni duto; 12 giniting’i malo e lwetgi, mondo kik ichwany tiendi e kidi. 13 Ininyon sibuor gi thuond fu; adier i n i n yon sibuor maratego gi thuol maduong’ man-gi kwiri marach. 14 Jehova wacho ni, "Abiro rese nikech ohera; abiro rite nikech ohulo nyinga. 15 E n o l u o n ga, kendo anaduoke; a n abed kode e chandruok, adier, anakonye kendo anamiye duong’. 16 Anami odag aming’a kendo ananyise warruokna."

Zaburi 92

Zaburi. Wer. Mar Chieng’ Sabato

1 Pako Jehova en gima ber kendo wero wende mapako nyingi bende ber, Yaye Jal Man Malo Mogik, 2 hulo herani gokinyi kod adierani gotieno, 3 kindito wer gi nyatiti matin ma tondege aboro ka wer ridore gi nyatiti maduong’ ber adier. 4 Nimar timbeni miya mor, Yaye Jehova; awer gi mor nikech tije ma lweteni otimo. 5 Mano kaka tijeni dongo, Yaye Jehova, mano kaka pachi tut miwuoro! 6 Ng’ama oming’ ok nyal ng’eyo, joma ofuwo ok winj tiend wachno, 7 ni kata obedo ni joma timbegi richo nyalo loth kaka lum kendo joma timo richo nyalo dhi maber, to ibiro tiekgi chuth nyaka chieng’. 8 To in, Yaye Jehova, ibiro siko kimiyi duong’ nyaka chieng’. 9 Nikech ka kuom adier, Yaye Jehova, ka kuom adier to wasiki duto biro lal nono; joma timo richo duto ibiro ke mel. 10 Isemiyo tungena odoko ma roboche ka tunge ruadh bungu; oseol kuoma modhi maliw. 11 Aseneno gi wengena ka iloyo wasika kendo asewinjo gi itena ka joma oramona ma timbegi richo itieko. 12 Joma kare biro loth maber ka yiend othith, gibiro dongo ka yiend sida mar Lebanon; 13 nikech opidhgi e od Jehova, gibiro loth e agolni mag Nyasachwa. 14 Kata hikgi oniang’ to pod gininyag mana olemo, kendo ginisik ka ginyien kendo ging’ich, 15 ka gilando ni, "Jehova oriere tir; en e lwandana, kendo onge richo moro amora kuome.

Zaburi 93

1 Jehova olocho kendo orwakore gi duong’, Jehova orwakore gi duong’ kendo omanore gi teko. Piny ochung’ mongirore; onge ng’ama nyalo yienge. 2 Lochni nogur chon gi lala; ionge chakruokni kata gikoni. 3 Nembe ting’ore malo, Yaye Jehova, nembe dhuolore malo ka giwuo; nembe ting’ore ka apaka gore matek. 4 Jehova nigi teko maduong’ moloyo mor mar pige maroteke, en gi teko maduong’ moloyo apaka ma tekregi ng’eny, adier Jehova man malo nigi teko maduong’. 5 Bucheni ochung’ mongirore; kendo ler opong’o odi nyaka chieng’, Yaye Jehova.

Zaburi 94

1 Yaye Jehova Nyasaye ma jachul kuor, Yaye Nyasaye ma jachul kuor, nyis lerni. 2 Aa malo, Yaye Jang’ad bura mar piny; chul josunga gima owinjore kodgi. 3 Yaye Jehova, nyaka karang’o ma joma timbegi richo, nyaka karang’o ma joma timbegi richo biro goyo siboi? 4 Gidiro weche mag wichteko; joma timbegi richo duto opong’ gi sunga. 5 Gikidho jogi, Yaye Jehova; gidiyo girkeni mari. 6 Ginego chi liel gi jadak; gideyo ng’ama onge gi wuon. 7 Giwacho ni, "Jehova ok ne; Nyasach Jakobo ok dew gik mwatimo." 8 To winjuru, un joma oming’ e dier ji; un joma ofuwogi, ubiro bedo mariek karang’o? 9 Donge ng’ama nochomo it winjo wach? Donge ng’at ma noloso wang’ neno? 10 Donge ng’at ma rieyo ogendini kumo ji? Be ng’at ma puonjo dhano dibed maonge rieko? 11 Jehova ong’eyo gik ma dhano paro; ong’eyo ni gin nono. 12 Oguedh ng’at mikumo, Yaye Jehova, ma en ng’ama ipuonjo koa e chikeni; 13 imiyo ng’ama kamano resruok e ndalo chandruok, nyaka chop kuny bur ne joma richo. 14 Nimar Jehova ok bi dagi joge; ok obi jwang’o girkeni mare. 15 Yor adiera biro yudore kendo ne joma kare, kendo joma oriere gie chunygi biro luwe. 16 En ng’a mabiro radona gi joma timb egi richo? Ng’ano mabiro chwaka kakedo gi joma timo richo? 17 Ka dine Jehova ok omiya kony, to dikoro asedhi dak e piny ma ji oling’e thi. 18 Kane awacho ni, "Tienda kier"to herani nojola, Yaye Jehova. 19 Ka achiedh nade nopong’o chunya, to hochni noduogo mor e ngimana. 20 Sirkal marach be inyalo riworigo adier, loch mamiyo ji chandore malit nikech chikene maricho? 21 Ginywako ne joma kare kendo ging’adone joma onge ketho buch tho. 22 To Jehova osebedo ohingana, kendo Nyasacha en lwanda ma aponde. 23 Obiro chulogi nikech richogi kendo obiro tiekogi nikech timbegi maricho; Jehova Nyasachwa biro tiekogi.

Zaburi 95

1 Biuru wawer gimor ne Jehova; wagouru koko matek ne lwanda mar warruokwa. 2 Wabiuru e nyime gi erokamano kendo wami nyinge duong’ ka wawer kendo wakok gi mor. 3 Nimar Jehova e Nyasaye maduong’, en e Ruoth maduong’ moloyo nyiseche duto. 4 Oting’o kuonde matut duto mag piny e lwete, kendo wi gode maroboche bende mage. 5 Nam mare, nimar en ema nolose, kendo lwetene ema noloso lo motuo. 6 Biuru wakulrene ka walame, biuru wago chongwa e nyim Jehova ma Jachwechwa; 7 nimar en e Nyasachwa kendo wan e joge mokwayo, wan e jambe morito. Kawuono ka uwinjo dwonde, 8 to kik chunyu dok matek kaka ne utimo Meriba, kata kaka ne utimo chieng’ cha Massa manie thim, 9 kama wuoneu notemoae kendo oyaloe, kata obedo ni ne giseneno gima ne atimo. 10 Kuom higni piero ang’wen iya nowang’ gi tieng’no; kendo nawacho ni, "Gin joma chunygi ohero ruenyo, kendo pok ging’eyo yorena." 11 Emomiyo mirima nomaka kodgi mine akuong’ora ka aramo ni, "Ok ginidonji e yueyona ngang’."

Zaburi 96

1 Weruru wer manyien ne Jehova; piny duto mondo ower ne Jehova. 2 Weruru ne Jehova, pakuru nyinge; nyisuru ji kuom warruokne odiechieng’ kodiechieng’. 3 Huluru duong’ne e dier ogendini, landuru tijene miwuoro ne ji duto. 4 Nimar Jehova duong’ kendo owinjore gi pak; onego oluore moloyo nyiseche duto. 5 Nikech nysiseche duto mag ogendini gin mana gik ma dhano oloso to Jehova ema nochueyo polo gi piny. 6 Luor gi duong’ oume; nyalo gi long’o nie ode maler. 7 Un dhoudi mag ogendni, miuru Jehova, miuru Jehova duong’ gi teko. 8 Miuru Jehova duong’ mowinjore gi nyinge; kelneuru mich kendo biuru e laru mage. 9 Lamuru Jehova kaka Ng’ama Ler man-gi duong’ mang’ongo; beduru maluor ahinya e nyime, un piny duto. 10 Wachuru e dier ogendini ni, "Jehova olocho." Piny ochung’ mongirore, ok nyal yienge; obiro ng’ado ne ji bura maonge dewo wang’. 11 Polo mondo obed moil, piny mondo obed mamor; nam mondo owuo kaachiel gi gik moko duto manie iye; 12 pewe mondo okog gi mor, kod gik moko duto manie igi. Eka yiende duto manie bungu nower gi mor; 13 giniwer e nyim Jehova, nimar obiro, obiro mondo ong’ad ne piny bura. Obiro ng’ado ne piny bura e yo makare, ee, obiro yalo ji gi adierane.

Zaburi 97

1 Jehova olocho piny mondo obed mamor; dho nembe man mabor mondo obed moil. 2 Boche polo gi mudho mandiwa oume; tim makare gi adiera e mise mar lochne. 3 Mach liel e nyime kendo wang’o wasike e alworane duto. 4 Mil polo mare menyo piny; piny neno kendo yiengni. 5 Gode leny nono ka odok e nyim Jehova, gileny nono e nyim Ruoth piny duto. 6 Polo hulo timne makare, kendo ji duto neno duong’ne. 7 Ji duto ma lamo gik mokedi wigi okuot; jogo gin joma sungore kuom nyiseche mopa- nyiseche duto mondo olame! 8 Sayun nowinjo wachno mi obedo moil, miech Juda bende nobedo mamor nikech bucheni, Yaye Jehova. 9 Nimar in e Jal Man Malo Mogik moloyo piny duto, Yaye Jehova; iduong’ kendo iyombo nyiseche mamoko duto mabor. 10 Joma ohero Nyasaye mondo osin gi gik maricho nimar orito ngima joge ma joadiera kendo oresogi e lwet joma richo. 11 Joma kare imenyonegi ler; joma oriere gie chunygi imiyo mor. 12 Moruru kuom Jehova un joma kare, kendo pakuru nyinge maler.

Zaburi 98

Zaburi

1 Weruru ne Jehova wer manyien, nimar osetimo gik miwuoro; lwet e korachwich gi bade maler osekelone warruok. 2 Jehova osemiyo warruokne ong’ere kendo osefwe n yone ogendiini timne makare. 3 Oseparo herane kod adierane ne dhood Israel; kuonde duto ma piny ogikie oseneno warruok mar jawarwa. 4 Gouru koko gi mor, un piny duto, bukreuru gi wer mamor kuwer gi duol mamit; 5 weruru mamit ne Jehova kugoyo nyatiti; werneuru mamit kugoyo nyatiti gi dwond wer molungi, 6 werneuru gi turumbete kod tung im maywak matek- koguru gi mor e nyim Jehova ma Ruoth. 7 Nam mondo owuo, kaachiel gi gik moko duto manie iye, kod piny duto, gi ji duto modak e iye. 8 Aoche mondo opam lwetgi, gode mondo ower kaachiel ka gimor; 9 onego giwer e nyim Jehova, nimar obiro mondo ong’ad bura ne piny. Obiro ng’ado bura ne piny e yo makare kendo obiro yalo ji maonge dew o wang’.

Zaburi 99

Mar Daudi. Zaburi

1 Jehova olocho, ogendini mondo okirni; obetekom lochne e kind kerubi, piny mondo oyiengni. 2 Jehova duong’ miwuoro e Sayun; oting’e malo moyombo ogendini duto. 3 Owinjore gipak nyingi maduong’ kendo miwuoro- nyinge ler. 4 Ruoth nyalo, ohero bura makarei sechungo adiera; isetimo ne joka Jakobo gima adier kendo makare. 5 Dhialuru Jehova Nyasachwa kendo lameuru e tie kome mobetie nikech oler. 6 Musa gi Harun ne gin jodolo mage e dier jodolo mamoko, Samuel ne en achiel kuom joma ne luongo nyinge; ne giluongo Jehova kendo noduokogi. 7 Ne owuoyo kodgi e siro mar bor polo; ne girito chikene gi buche mane omiyogi. 8 Yaye Jehova Nyasachwa, ne iduokogi; ne in Nyasaye ma weyo richo ne jo Israel, kata obedo ni ne ikumo timbegi mobam. 9 Dhialuru Jehova Nyasachwa kendo lamuru e gode maler, nimar Jehova Nyasachwa ler.

Zaburi 100

Zaburi Mar Goyo Erokamano

1 Gouru koko gi mor ne Jehova, un piny duto. 2 Lamuru Jehova ka umor; biuru e nyime kuwero wende mamor. 3 Ng’euru ni Jehova en Nyasaye. En ema nochueyowa, kendo wan mage; wan jog e, kendo wan rombeg e mokuayo. 4 Donjuru e rangeyene kugoyo erokamano kod laru mage kupake. Goneuru erokamano kendo pakuru nyinge. 5 Nimar Jehova ber kendo herane osiko nyaka chieng’; adierane ochwere e tienge duto.

Zaburi 101

1 Abiro wer nikech herani gi berni; in ema abiro weroni wend pak, Yaye Jehova. 2 Abiro neno ni aritora mondo ngimana obed malong’o chuth- ibiro biro ira karang’o? Abiro dak e oda gi chuny malong’o chuth. 3 Ok abi yie neno gimoro amora mochido gi wengena. 4 Achayo timbe joma chunygi richo; gik maricho ok adwar winjo kata gi ita. 5 Ng’ato ang’ata makuodho nyawadgi ling’ling’ abiro kwero mi ling’; ng’ato ang’ata ma wang’e tek kendo ma sungore gie chunye, ok anyal betgo aming’a. 6 Joma beyo ema abiro keto wengena kuomgi; gin ema abiro yie dak kodgi; ng’at ma wuodhe oriere tir ema biro tiyona. 7 Ok abi yiene ng’ama ohero miriambo mondo odag e oda; ng’at moro amora mawacho miriambo ok nochung’ e nyima. 8 Okinyi kokinyi abiro tieko joma timbegi richo modak e piny. Abiro nego ng’ato ang’ata matimo richo ka agologi e dala mar Jehova.

Zaburi 102

Lamo Mar Ng’at Mawinjo Marach. Sama Chunye Ool Kendo Oketo Pekne E Nyim Jehova.

1 Winj lamona, Yaye Jehova; yie irwak lamona ma akwayigo kony. 2 Kik ipandna wang’i sama chunya lit. Chikna iti; ka aluongi to duoka mapiyo. 3 Nimar ndalona rumo piyo ka iro; chokena rewni ka kit kendo maliet. 4 Chunya orewore kendo oner ka lum; wiya wil kodaka gi chamo chiemba. 5 Chur ma achurgo matek omiyo adhero alokora choke lilo. 6 Achalo gi tula mar bungu, achalo gi tula modak e gunda. 7 Asiko aneno anena, achalo gi winyo man kende ewi osuri. 8 Odiechieng’ duto wasika kinya ka gijara; joma dhawna konyore gi nyinga kaka gir kuong’ruok. 9 Nimar achamo buch kendo kaka chiemba kendo ariwo mathna gi pi wang’a 10 nikech mirimbi maduong’, nimar isekawa mi iwita gichien. 11 Ndalona chalo gi tipo modhiambo; aner adwa two ka lum. 12 Into ibetekomlochni nyaka chieng’, Yaye Jehova; humbi osiko e tienge duto. 13 Ibiro aa malo mi ikech Sayun, nimar saa osechopo monego ong’wonnee; saa mochanne osechopo. 14 Nimar kitege beyo gilala ne jotichni, kata mana buru madum kuome miyo ji keche. 15 Ogendini biro luoro nying Jehova, ruodhi duto mag piny biro luoro duong’ni. 16 Nimar Jehova biro gero Sayun kendo kendo obiro thinyore e lela e duong’ne. 17 Obiro dwoko lamo mar ng’ama ok nyal kendo ok obi chayo lamogi. 18 Wachni mondo ondik piny ne tieng’ mabiro, mondo joma pok onyuol opak Jehova: 19 "Jehova nong’iyo piny gie kar dakne maler man malo, nong’iyo piny gie polo, 20 mondo owinj ywak joma otwe kendo ogony joma ong’adnegi buch tho." 21 Kuom mano nying Jehova ibiro hul e Sayun, ibiro pake e Jerusalem 22 ka joma odak e pinje ruodhi ochokore mondo olam Jehova. 23 Ka noyudo ngimana dhi maber to nomiyo tekona odok chien kendo nong’ado ngimana odoko machiek. 24 Omiyo ne awacho ni;"Kik ikaw ngimana, Yaye Nyasacha, kapod an e chuny ngima; to into isiko ingima nyaka tienge duto. 25 Ne iketo mise mag piny kar chakruok, kendo polo bende gin tij lweti. 26 Gin gibiro lal nono to into isiko nyaka chieng’; gibiro ti ka nanga. Ibiro lokogi kaka iloko law kendo ibiro witgi. 27 Into isiko ichalri, kendo hiki ok rum. 28 Nyithind jotichni biro dak buti machiegni; nyikwagi nodhi maber e nyimi.’

Zaburi 103

Mar Daudi

1 Pak Jehova, Yaye chunya; dhanda maiye duto mondo opak nyinge maler. 2 Pak Jehova, Yaye chunya, kendo kik wiyi wil gi konyruok mochiwo- 3 en ema oweyoni richoni duto kendo ochango tuocheni duto, 4 oreso ngimani kogolo e bur matut kendo osidhi gi hera kod kech, 5 oromo chunyi gi gik mabeyo momiyo tinni osiko nyien ka mar ongo. 6 Jehova timo gik makare kendo otimo maber ne joma isando duto. 7 Nonyiso Musa yorene, noyango ne jo Israel timbene. 8 Jehova kecho ji kendo ong’uon, iye ok wang’ piyo kendo opong’ gi ng’uono. 9 Ok osik komanyo ketho kuom ji, bende ok okan mirimbe nyaka chieng’; 10 ok otimnwa mowinjore gi richowa bende ok ochulwa kaluwore gi kethowa. 11 Nimar mana kaka polo ni malo moyombo piny e kaka herane duong’ ne joma oluore; 12 mana kaka wuok chieng’ bor gi podho chieng’, e kaka osep ogow a mabor gi kethowa. 13 Mana kaka wuoro kecho nyithinde e kaka Jehova kecho joma oluore; 14 nimar ong’eyo kaka ochue w a, ong’eyo e pache ni wan mana buch lo. 15 Dhano to ndalone chalo gi lum, oloth piyo ka mafua mopidhi; 16 to ka yamo okudhe matin nono to kare orumo kendo ok chak pare. 17 Hera ma Jehova oherogo joma oluore to osiko nyaka chieng’ manyaka chieng’ kendo osiko otimo maber ne nyithind nyithindgi- 18 ma gin joma orito singruokne kendo jogo maparo mondo orit chikene. 19 Jehova osechungo lochne e polo kendo lochne orito ji duto. 20 Pakuru Jehova, un malaikege, un joge maroteke matimo kaka odwaro kendo matimo kaka owacho. 21 Pakuru Jehova, un oganda ne maduong’ manie polo, un jotichne matimo dwarone. 22 Pakuru Jehova, un gik moko duto mochueyo, manie bwo lochne kuonde duto. Pak Jehova, Yaye chunya.

Zaburi 104

1 Pak Jehova, Yaye chunya. Yaye Jehova Nyasacha, mano kaka iduong’, irwakori gi luor kod duong’. 2 Oumore gi ler mana kaka nanga; oyaro polo mana kaka hema 3 kendo ogero ode moluore aluora e wi pi. Oidho boche polo kaka gache mar lweny kendo yamo e ndike moriembo. 4 Ooro yamo kaka jootene, kendo mach maliel mager e jotichne. 5 Iseguro piny e mise mage; maok onyal yiengni kata matin 6 Ne iume gi kut mana kaka nanga mi pige obiwore moyombo gode. 7 To kane ikwero pigego to ne gileny nono, kane giwinji kimor to ne giwalore gia; 8 ne gimol ewi gode, ka giridore gidhi e holni, kuonde mane ochan negi. 9 Ne iketonegi tong’ maok ginyal kadho; mondo kik gichak giim piny kendo. 10 Jehova miyo sokni olo pi e bugni ka gimol e kind gode. 11 Gichiwo pi ne le mag bungu duto; kanyna mag bungu tieko riyo ma gingo. 12 Winy mahuyo e kor polo ogero utegi e bath pigego, kendo giwer e wi yiende. 13 Omiyo koth chue e wi gode koa e dalane manie polo; piny nyago olembe moromo nikech tijene. 14 Omiyo lum loth ne jamni, kod cham ma dhano doyo mamiyo chiemo bet e piny; 15 kaachiel gi divai mamoro chuny dhano, gi mo mamiyo lenda wang’e leny kod makati molerogo chunye. 16 Yiende Jehova yudo pi moromogi, yiendego gin sida mag Lebanon mane opidho. 17 Winy gero utegi e bedegi, winj nyamnaha nigi ode ewi yiende mag obudo. 18 Diek mag bungu odake go d e mab oyo, to lwendni morokore gin kuonde buok mag apwoche. 19 Dwe pogo kinde mag chwiri gi kinde mag opon kendo wang’ chieng’ ong’eyo saa monego opodhie. 20 Ikelo mudho mi piny lolkre otieno, kendo le mag bungu duto lak oko. 21 Sibuoche ruto ka gimanyo chiemo; gimanyo chiembgi kuom Jehova. 22 To ka chieng’ wuok to gidok e bungu; gidok kendo ginindo e gondegi. 23 Eka dhano wuok oko chako tijene, kendo nyagore gi tich nyaka odhiambo. 24 Mano kaka gik michueyo ng’eny, Yaye Jehova! Ne ichueyogi duto gi rieko miwuoro; piny opong’ gi gik michueyo. 25 Isechueyo nam maduong’ kendo malach’ mopong’ gi le mamol mathoth mokalo akwana- gik mangima madongo gi matindo. 26 Kuno ema mende kwang’ie koni gi koni, kendo ondieg nam mane ichueyo miluongo ni Leviathan tuge. 27 In ema gigo duto ng’iyi mondo imigi chiembgi e kinde mowinjore. 28 Ka imiyogi chiemo, to gichamo; ka iyawonegi lweti, to giyieng’ gi gik mabeyo; 29 ka ipando wang’i, to githagore; ka igolo muchi kuomgi, to githo kendo gidok e lowo. 30 Ka ioro Roho mari, to gibedo mangima; kendo imiyo piny bedo gi ngima manyien. 31 Mad duong’ mar Jehova sik nyaka chieng’; mad Jehova bed mamor gi gik mane ochueyo- 32 En ma kong’iyo piny to piny yiengni, kendo komulo gode to gode dhuolo iro. 33 Abiro wer ne Jehova e ngimana duto, adier, abiro wero wende pak ne Nyasacha e kinde duto mapod angima. 34 Mad gik ma aparo e chunya omiye mor, seche duto ma amor kuom Jehova. 35 Joricho to owinjore orum e piny; joma timbegi richo ok onego obedie piny kata achiel. Pak Jehova, Yaye chunya. Haleluya!

Zaburi 105

1 Gouru erokamano ne Jehova, lameuru kuluongo nyinge; miuru ogendini ong’e gik mosetimo. 2 Werneuru, werneuru wende pak; nyisuru kuom tijene duto miwuoro. 3 Nyinge maler nigi duong’; chunje joma manyo Jehova mondo obed moil. 4 Ranguru Jehova kod tekre; manyuru wang’e kinde duto. 5 Paruru gik miwuoro mosetimo, honni mage kod buche moseng’ado, 6 Yaye koth Ibrahim jatichne, Yaye yawuot Jakobo joge moyiero. 7 En e Jehova Nyasachwa; buchene nie piny duto. 8 Oparo winjruokne motimo gi joge nyaka chieng’, kod wach mane ochiko e tienge tara, 9 winjruok mane otimo gi Ibrahim, gi Muma mane okuong’orego gi Isaka. 10 Ne ogure ne Jakobo kaka gima ok kethre, ee, ne Israel kaka winjru ok mosiko, kowacho ni, 11 "Anamiyi piny Kanan kaka girkeni ma kori." 12 Kane pod gin ji matin nono, ee, kane pod ginok ruok kendo ne pod gin welo e iye, 13 ne gibayo e piny ka piny, e pinyruoth ka pinyruoth. 14 To ne ok oyie mondo ng’ato ochandgi; nikech gin, nokwero ruodhi, kowacho ni, 15 "Kik umul joga ma awiro; kik utim gimoro amora marach ne jonabi maga. 16 Ne okelo kech e piny kendo noketho yore duto mane giyudogo chiemo; 17 kendo nooro ng’ato otelone g i, ng’atno ne en Joseph mane oloki kaka misumba. 18 Ne giridho tiendene gi arungu mochuoye chuma, kendo ne giridho ng’ute gi chumbe, 19 nyaka nochopo kinde ma gik mane okoro notimoree, nyaka wach Jehova nochopo kare. 20 Ruodh Misri nooro wach mi nogonye, jatend ji nogonye thuolo. 21 Nokete ruodh ode, ma norito gik moko duto mane en-go, 22 mondo en ema ne otieg jotende kaka ohero kendo opuonj jodonge rieko. 23 Bang’e Israel duto nobiro Misri; Jakobo nodoko jadak e piny Ham. 24 Jehova nomiyo joge onya ahinya; nomiyo gibedo mathoth ma wasikgi ne ok nyal nyalogi, 25 wasikgi ma noloko chunygi mondo ocha joge, kendo mondo oram mar timone jotichne marach. 26 Nooro Musa jatichne, gi Harun, jal mane oseyiero. 27 Ne gitimo ranyisi mag honni e diergi, ee, ne gitimo timbene miwuoro e piny Ham. 28 Nooro mudho mi nomiyo piny olil ti- nimar donge ne giseng’anyo ne wechene? 29 Noloko pigegi remo, mi nomiyo rechgi otho. 30 Ogwende nosieko mopong’o pinygi, kendo ne gidonjo nyaka ei ute nindo mag ruodhigi. 31 Nowuoyo, mi pumbi mag lwang’ni nosieko, kendo kikun nopong’o pinygi. 32 Nomiyo kodhgi olokore pe kendo mil polo nokwako pinygi; 33 nogoyo yiendegi mag mzabibu gi ng’owu piny kendo nolwero yiende mane nie pinygi. 34 Nowuoyo, mi bonyo nosieko, det bonyo mokalo akwana; 35 ne gichamo gimoro amora mane loth e pinygi koda ka chambgi mane gipidho e puothegi. 36 Bang’e nonego nyithindo makayo duto mane nie pinygi, kodhi mokuongo duto mane gihango nyuolo. 37 Nogolo Israel, kogangore gi fedha kod dhahabu, kendo onge ng’ama nodong’ chien kuom dhout Israel duto. 38 Misri ne mor kane giwuok nikech mbi mar jo Israel nosegore kuomgi. 39 Noumogi gi boche polo kaka raum, kendo mach nochiwonegi ler gotieno. 40 Kane gikwaye, to nokelonegi awendo kendo noyieng’ogi gi makati mar polo. 41 Noyawo lwanda, mi pi nowuok gi teko; kendo pigno nomol ka aora mamol e piny motwo. 42 Nimar noparo singruokne maler mane omiyo Ibrahim jatichne. 43 Nogolo joge gi ilo, adier, nomiyo joge moyier owuok ka kok gi mor; 44 nomiyogi pinje mag ogendini, kendo gik ma jomoko nono nochandore ka loso nodoko girkeni magi- 45 mondo gilu yorene kendo girit chikene. Haleluya!

Zaburi 106

1 Haleluya! Gouru erokamano ne Jehova, nimar ober; herane osiko nyaka chieng’. 2 En ng’a manyalo hulo gik madongo ma Jehova osetimo kata manyalo nyiso pakne duto? 3 Ogwedh joma osiko koluwo adiera, joma osiko katimo gima kare. 4 An bende parae, Yaye Jehova, parae ka itimo ng’wono ne jogi, bi ikonya ka iresogi, 5 mondo an bende awinjie maber gi mwandu mimiyo jogi miyiero, mondo ayudie mor mar ogandani kendo amiyi duong’ kaachiel gi girkeni mari. 6 Wasetimo richo mana kaka kwerewa bende notimo; wasetimo marach kendo wasetimo gik mamono. 7 Kane kwe r ewa ni Misri, ne ok giparo matut kuom honni magi; bende ne wigi owil gi kechni mathoth, ne ging’anyoni e dho nam, ma en Nam Makwar. 8 Kata kamano noresogi nikech nyinge, mondo omi tekone maduong’ ong’ere. 9 Nokwero Nam Makwar, mi Nam Makwar notwo; kendo nomiyo gikalo kama tut mana kagima ne giwuotho kama otwo. 10 Noresogi e lwet joma ne kedo kodgi, adier, nowarogi e lwet wasigu. 11 Pi noimo wasikgi; ma kata achiel kuomgi ne ok otony. 12 Eka ne giyie gi singruok mag e kendo ne gipake gi wer. 13 To maok odeko wigi nowil gi gik mane osetimo kendo ne ok girite mondo ong’adnegi rieko. 14 Wuoro mokalo tong’ nomakogi e thim, kendo ne gitemo Nyasaye e piny motwo. 15 Omiyo ne omiyogi gima ne gidwaro, to kata kamano nooronegi tuo machiyo del. 16 Nyiego nomakogi gi Musa e kambi, kendo gi Harun, jatich mowal ne Jehova. 17 Piny ne oyawore mi nomuonyo Dothan; piny noiko oganda joka Abiram. 18 Mach nomuoch kuom joma ne luwogi mach maliel mager nowang’o joma timbegi richogo motiekogi pep. 19 Ne giloso nyaroya Horeb, mi ne gilamo kido molos gi chuma. 20 Ne giwilo Duong’ margi gi kido mar ruath machamo lum. 21 Wigi nowil gi Nyasaye mane oresogi, Nyasaye mane osetimo gik madongo e piny Misri, 22 Nyasaye mane osetimo honni e piny Ham kod timbe miwuoro e dho Nam Makwar. 23 Emomiyo nowacho ni nobiro tiekogi- ka dine Musa, ng’ate moyiero, we chung’ ka ywagore e nyime mondo ogeng’ mirimbe kik otiekgi. 24 Bang’e ne gichayo pinye ma jabber; nikech ne ok giyie singruokne ni en adier. 25 Ne ging’ur ei hembegi kendo ne ok gitimo gik ma Jehova nochikogi. 26 Emomiyo ne osingo renegi kosiemogi gi lwete ni ne obiro miyo gipodhi e thim, 27 nonyisogi ni ne obiro miyo nyikwagi podhi e kind ogendini, kendo ni ne obiro keyogi e pinje duto. 28 Ne giriwore kaachiel e lamo Baal mar jo Peor, kendo ne gichamo chiemo michiwo ne nyiseche motho; 29 omiyo ne giwang’o i Jehova gi timb egi marichogo, mi tuo marach manego ji mang’eny dichiel nogore kuomgi. 30 Kata kamano Finehas nochung’ kargi kendo noywagore ne Nyasaye, mi tuo marachno ne ok otiekogi. 31 Nyasaye nokwane kaka ng’ama kare nikech timneno, kendo ibiro kwane kamano nyaka tienge mabiro. 32 Ne giwang’o i Jehova, e dho sokni mag Meriba, mi timgino nokelone Musa chandruok; 33 nimar ne giketho chunye mi weche maricho nowuok e dhoge. 34 Ne ok gitieko ogendini chuth kaka Jehova nosechikogi, 35 to ne giriwore kodgi kendo ne giluwo timbegi. 36 Ne gilamo kido mag nyisechegi, ma bang’e nolokorenegi obadho. 37 Ne gichiwo yawuotgi gi nyigi kaka misango, kendo ne gichiwogi ne jochiende. 38 Ne gichuero remo maonge ketho, remb yawuotgi gi nyigi, mane gichiwo kaka misango ne kido mag nyiseche mag Kanan, mi piny nogak nikech rembgi. 39 Ne gidoko mogak nikech gik mane gitimo; ne gibedo joma odwanyore nikech timbegigo. 40 Emomiyo Jehova nokecho gi joge kendo chunye noa kuom girkeni mare. 41 Nochiwogi e lwet ogendini, mi ne gibet e bwo loch joma ne mon kodgi. 42 Wasikgi nothirogi kendo ne giketogi e bwo tekogi. 43 Ne oresogi dimang’eny to kata kamano joge noketo chunygi ne ng’anyo mi richogi nochiwogi mi girumo. 44 Kata kamano nokechogi e chandruokgi kane owinjo ywakgi; 45 nikech noparo mumbe mane otimo kodgi kendo noloko chunye nikech herane maduong’. 46 Nochuno ji duto mane oketogi wasumbni mondo okechgi. 47 Re swa, Yaye Jehova Nyasachwa, kendo chokwa igolwa e dier ogendni, mondo wago erokamano ne nyingi maler kendo wabed mamor ka wapaki. 48 Pakuru Jehova, ma Nyasach Israel, nyaka chieng’ kendo nyaka chieng’. Ji duto mondo owach ni, "Amin!" Haleluya.

Zaburi 107

1 Gouru erokamano ne Jehova, nimar ober; herane osiko nyaka chieng’. 2 Joma owar mag Jehova mondo owach kama- joma ne owaro e lwet jasigu, 3 mane ochoko kogolo e pinje, kochakore wuok chieng’ gi podho chieng’, nyaka nyandwat gi milambo. 4 Joge moko nobayo ab aya e thim motwo nikech ne gionge yo mar chopo e dala mane ginyalo dakie gi kuwe. 5 Ne gidenyo kendo riyo noloyogi, mi chunygi noa. 6 Eka ne giywak ne Jehova mondo okonygi e chandruokgino mi nogologi e pekgino. 7 Ne otelonegi e yo moriere tir, nyaka ne gichopo e dala, mane ginyalo dakie. 8 Onego gigo ne Jehova erokamano kuom herane maok rem kendo kuom timbene miwuoro, motimo ne ji, 9 nimar otieko riyo mar joma riyo oloyo kendo omiyo joma odenyo yieng’ gi gik mabeyo. 10 Moko kuomgi nobet e mudho, kendo e tipo mar tho, ne gin joma thagore motue gi nyoroche mag chuma, 11 nimar ne ging’anyo giweyo weche Nyasaye kendo ne gichayo rieko mar Jal Man Malo Mogik. 12 Omiyo noketogi gi tich matek mohewogi mi ne gigore piny kendo onge ng’ama ne nyalo konyogi. 13 Eka ne giywak ne Jehova mondo okonygi e chandruokgino, mi noresogi e pekgino. 14 Nogologi e mudho kendo e tipo mar tho kendo noturo nyoroche mane otuegigo. 15 Onego gigo ne Jehova erokamano kuom herane maok rem, kendo kuom timbene miwuoro motimo ne ji, 16 nimar omuko rangeye mag mula, kendo ong’ado lodi mag nyinyo. 17 Moko kuomgi nobedo joma ofuwo nikech yoregi mobam kendo ne gineno thagruok nikech timbegi mamono. 18 Dhogi ne rach maok ginyal chamo chiemo moro amora, kendo ne gichiegni tho. 19 Eka ne giywak ne Jehova mondo okonygi e chandruokgino mi noresogi e pekgino. 20 Ne ooro wachne mi nochangogi kendo noresogi e lak tho. 21 Onego gigo ne Jehova erokamano kuom herane maok rem kendo kuom timbene miwuoro motimo ne ji. 22 Onego gichiwne misango mar goyo erokamano kendo ginyis kuom gik mosetimo ka giwer gi mor. 23 Moko kuomgi nodhi kwang’ e nam gi mende; ne gin jo ohala ma yoro nembe madongo-dongo. 24 Ne gineno tije Jehova, ne gineno tijene malich miwuoro manie kude. 25 Nimar ne owuoyo, mi notugo ahiti mang’ongo ma nomiyo apaka ogingore. 26 Apaka nodirogi malo e kor yamo, kendo nonyumogi kuonde matut mogik; mi chir mane gin-go noleny nono kane ginie masira ma kamano. 27 Ne gipuore kendo gitagore ka joma omer; kendo pachgi nolalnegi. 28 Eka ne giywak ne Jehova mondo okonygi e chandruokgino mi noresogi e pekgino; 29 ne okueyo ahiti mobet mos; kendo apaka noling’ thi. 30 Ne gidoko mamor ka nam nokuwe, kendo notelonegi nyaka ne gitundo e dho wath maber, kama ne gidwaro tunde. 31 Onego gigo ne Jehova erokamano kuom herane maok rem kendo kuom timbene miwuoro motimo ne ji. 32 Onego giting’ nyinge malo e chokruok mar joge kendo gidende e buch jodongo. 33 Ne omiyo aoche olokore kuonde motwo, sokni mamol nolokore ongoro, 34 kendo lowo manyak maber nodoko lowo motimo chumbi, maonge tich nikech timbe mamono mag joma nodak kuondego. 35 To bende nomiyo piny ongo r o odoko yewni mag pi, kendo lowo motwo nolokore sokni mamol; 36 nokelo joma odenyo mondo odag kuondego, kendo ne gigero dala kama ne ginyalo dakie. 37 Ne gipuro puothe kendo ne gipidho puothe mzabibu mane ochiego cham maber; 38 ne ogwedhogi, kendo ne gidoko ji mang’eny ahinya, bende ne ok oyie mondo jambgi odog piny. 39 Bang’e achien kwan-gi nodok matin kendo ne odwokgi piny nikech sand gi masiche kod kuyo; 40 Jal ma olo mirimbe kuom ruodhi nomiyo gibayo koni gi koni e thim tangalare. 41 To jochan to noreso e thagruokgi kendo nomiyo utegi onya ka dhok. 42 Ka gima kamano otiore, to jomakare doko mamor; joma timbegi richo duto to dhogi moko. 43 Ng’ama riek mondo omak wechegi maber, kendo opar matut kuom hera maduong’ mar Jehova.

Zaburi 108

Wer. Zaburi mar Daudi

1 Chunya ochung’ mongirore, Yaye Nyasaye; abiro paki ka awerni mamit gi chunya duto. 2 Chiewuru, un nyatiti gi thum lwedo! An bende abiro romone ru piny gi wer. 3 Abiro paki e dier ogendini, Yaye Jehova, abiro werni e dier jopiny. 4 Nimar herani duong’ kendo bor moyombo polo; kendo adierani ochopo nyaka e kor polo. 5 Yud duong’, Yaye Nyasaye, yud duong’ moyombo polo, kendo mi duong’ni okwak piny duto. 6 Reswa kendo konywa gi lweti makorachwich, mondo joma ihero oyud konyruok. 7 Nyasaye osewuoyo gie kar dakne maler, osewuoyo kowacho ni, "Abiro pogo Shekem ne joga, ka alocho, kendo abiro pimonegi Holo mar Sukoth. 8 Giliad en mara, Manase bende mara, Efraim en oguta mar lweny, to Juda en oguta mar loch. 9 Moab en besenda mar luok, to Edom en kama amoe wuochena; Filistia to agoe siboi bang’ loyo lweny. 10 En ng’a mabiro tera e dala mochiel motegno? En ng’a mabiro telona nyaka Edom? 11 Donge en in, Yaye Nyasaye, donge isedagiwa kendo tinde ok idhi gi jolwenjwa mondo okednwa? 12 Yie imiwa kony mar kedo gi wasikwa, nimar kony mar dhano ok nyal gimoro. 13 Wabiro loyo lweny ka Nyasaye nikodwa, kendo obiro nyononwa wasikwa piny.

Zaburi 109

Ne Jatend Wer. Zaburi Mar Daudi.

1 Yaye Nyasaye ma apako, kik iling’, 2 nimar joma timbegi richo gi jo miriambo osemonja gi dhogi; gisewuoyo kuomwa marach gi lewgi mopiagi ne miriambo. 3 Gilwora koni gi koni gi weche mag achaya; gibuka maonge gima omiyo. 4 An aherogi to gin to gimon koda. Gitimona kamano kata obedo ni an to alemonegi. 5 Gichula rach kar ber, kod achaya kar osiep. 6 Giwacho ni, "Ket ng’at marach mondo oked kode; we jadonj ne ji mondo ochung’ kode e bura. 7 Kiyale to mi mondo oyude gi ketho, kendo kata lemo molamo onego onyis kethone. 8 Mad ng’ad ndalone dok manok; kendo mad ng’at machielo kaw tende. 9 Mad nyithinde dong’ kiye kendo chiege dong’ chi liel. 10 Mad nyithinde lokre jokwecho mabayo abaya; mad riembgi gia koda ka e miechgi mosekethore. 11 Mad jagope moro mak gige duto ma en-go kendo mad jomawelo oyak mwandu duto moseloso. 12 Onego ng’ato kik timne ng’wono kata kecho nyithinde modong’ kiye. 13 Kothe duto mondo kargi olal nono, kendo nying-gi oruchi kik bedi e tieng’ mabiro. 14 Mad Jehova sik kaparo richo mane wuonegi otimo; kendo mad richo min kik ruchi. 15 Richogi mondo osiki e nyim Jehova, eka mondo ong’ad kargi oko chuth e piny. 16 Nimar kane ongima to ne ok odewo timo ng’wono, kar timo kamano to nosando jodhier, kaachiel gi joma ochando gi joma chunygi lit; nosandogi malit nyaka ne githo. 17 Nohero kuong’o ji- to koro mad kuong’neno dogne; ne ok ohero gwedho ji- omiyo koro mad gweth bed mabor kode. 18 Ne orwako kuong’ ka nangane; mad kuong’no koro donji e dende ka pi, mad gibud chokene ka mo. 19 Mad ochal nanga moumogo dende duto, kata kamba motweyego nyaka chieng’. 20 Mano ema mondo obed chudo, ma Jehova chulo joma donjona; mano e kaka onego otim ne joma wuoyo marach kuoma." 21 To in, Yaye Ruoth Nyasaye, timna maber nikech nyingi; konya nikech ber mar herani. 22 Nimar adhier kendo achando, kendo chunya winjo marach e iya. 23 Ndalona rumo mos mos ka tipo mar odhiambo kendo yamo uka ka det bonyo. 24 Chongena onyosore nikech onge gima acham, kendo adhero aloko ra choke lilo. 25 Alokora gima ijaro ne joma donjona; ka ginena to gitwenyona umgi ka gigoyona siboi. 26 Konya, Yaye Jehova Nyasacha, resa kaluwore gi herani. 27 Mi mondo ging’e ni achal kama nikech lweti, mi ging’e ni lweti ema osetime, Yaye Jehova. 28 Gin ginyalo kuong’a to ang’eyo ni in ibiro gwedha; ka gimonja to ibiro kuodo wigi, to jatichni to biro bedo mamor. 29 Wichkuot maduong’ biro mako joma donjona kendo gibiro rwako wichkuot ka kandho. 30 Abiro dhialo Jehova malich gi dhoga; abiro pake e dier oganda maduong’. 31 Nimar ochung’ e bat korachwich mar ng’at mochando, mondo ores ngimane kuom joma ng’adone buch tho.

Zaburi 110

Zaburi Mar Daudi

1 Jehova nowacho ne Ruodha kama: "Bed e bada korachwich nyaka chop aket wasiki obed situl miyieye tiendeni." 2 Jehova biro yaro lochni chakre Sayun; ibiro bedo gi loch e dier wasiki. 3 Jo kedo magi biro bedo gi chuny moikore; gibiro riedo gokinyi kogwen gi duong’ mamalo, kendo tekri nomedre odiechieng’ kodiechieng’ mana ka tho momoko e lum gokinyi. 4 Jehova osesingore kendo ok obi loko pache: osesingore ni, "In jadolo nyaka chieng’, e kit dolo mar Melkizedek." 5 Jehova nie badi makorachwich obiro ng’inyo ruodhi chieng’ ma mirimbe otuk. 6 Obiro ng’ado bura ne ogendini, mi opiel joma otho achana-achana kong’inyo jotelo duto mag piny. 7 Obiro modho e aora matin manie bath yo, emomiyo noyud teko mi oting’ wiye.

Zaburi 111

1 Haleluya! Abiro miyo Jehova duong’ gi chunya duto, abiro miye duong’ e buch joma kare, kendo e dier chokruok. 2 Tije Jehova dongo adier; joma mor kodgi osiko ka paro kuomgi. 3 Timbene nigi duong’ kod luor, kendo timne makare osiko nyaka chieng’. 4 Omiyo waparo kuom honni mage; nikech Jehova ng’won kendo okecho ji. 5 Ochiwo chiemo ne joma oluore, kendo oparo singruok mare nyaka chieng’. 6 Osenyiso joge tekre kuom gik motimo komiyogi lope mag ogendini moko. 7 Tije motimo gi lwetene nikare kendo beyo kendo buchene duto inyalo geno. 8 Gingirore kendo ok gilokre nyaka chieng’ manyaka chieng’, nikech osetimgi gi adiera kendo moriere. 9 Ne ochiwo warruok ne joge, kendo ne oguro singruokne mosiko; nyinge ler kendo lich miwuoro. 10 Luoro Jehova e chakruok mar rieko; ji duto moluwo buchene nigi winjo maber. En kende ema owinjore yudo pak manyaka chieng’.

Zaburi 112

1 Haleluya! Ogwedh ng’ama oluoro Jehova, Ogwedh ng’ama chikene miyo mor. 2 Nyithinde nobed joma roteke e piny; ee, koth joma ngimagi oriere ibiro gwedhi. 3 Pith gi mwandu yudore e ode, kendo timne makare osiko nyaka chieng’. 4 Ng’ama ngimane oriere ler rienyne kata gotieno- ng’at ma ng’uon, ma kecho ji kendo makare. 5 Ng’ama ng’uon ma holo ji gige gi chuny maler biro neno ber- ng’at ma tiyo tijene gi adiera. 6 Adier, onge gima nyalo yiengeng’at makare ibiro par nyaka chieng’. 7 Ok oluoro weche makelo kuyo nikech chunye otegno kendo ogeno kuom Jehova. 8 Chunye ok chandre kendo oonge gi luoro moro amora; ong’eyo ni obiro neno ka olo wasike ka ento olocho. 9 Opogo gige ne joma odhier, berne osiko nyaka chieng’; duong’ne gi luor ma ji oluorego biro siko nyaka chieng’. 10 Ng’ama timbene richo biro nene mi iye wang’, obiro muodo lekene kendo obiro chiyore morum; gik ma ng’ama timbene richo gombo ni otimrene ok bi timorene ngang’.

Zaburi 113

1 Haleluya! Pakuru Jehova, Yaye un jotichne, pakuru nying Jehova. 2 Nying Jehova mondo opaki, sani kendo nyaka chieng’. 3 Nying Jehova onego opaki, chakre kuma chieng’ wuokie nyaka kuma opodhoe. 4 Jehova nigi duong’ moyombo ogendini duto, kendo duong’ne maler oyombo polo. 5 En ng’a machalo gi Jehova Nyasachwa, Jal mobetekom loch kuma bor, 6 kendo ma kulore piny mondo orang polo gi piny? 7 Oting’o joma odhier malo kogolo piny e lowo; adier, ogolo joma ochando e pidh buru, 8 kendo oketogi gibet kaachiel gi ruodhi, mi kwan-gi kaachiel gi jotend jogi. 9 Omiyo dhako ma migumba bedo gi ode mi obed miyo mamor man-gi nyithinde. Haleluya!

Zaburi 114

1 Kane jo Israel owuok Misri, ee, kane Joka Jakobo owuok e kind joma wacho dhok mayore, 2 Juda nodoko kama ler mar Nyasaye, kendo Israel nobedo mwandune owuon. 3 Nam nonenogi mi oa gi ng’wech, kendo Jordan ne odar oweyonegi piny, 4 gode noleng’ore ka imbe, to thuche to nochikore ka nyirombe. 5 Ang’o momiyo ne ia gi ng’wech, Yaye nam? Yaye Jordan, ne idar iweyonegi piny nang’o? 6 to un gode to ne uleng’oru ka imbe nang’o? Koso thuche to nochikore ka nyirombe nikech ang’o? 7 Yaye piny, yiengni ka Ruoth ni machiegni kodi, yiengni e nyim Nyasach Jakobo, 8 Nyasaye mane omiyo lwanda olokore pi mogudore, kendo mane omiyo lwanda matek olokore sokni mag pi.

Zaburi 115

1 Ok wan, ok wan, Yaye Jehova- to In ema nyingi oyud duong’, nikech herani kod adierani. 2 Ang’o momiyo ogendini penjo ni, "Nyasachgino ere?" 3 Nyasachwa nie polo; otimo gimoro amora mohero. 4 To kido mag nyisechegi to gin fedha gi dhahabu, ma lwet dhano ema oloso. 5 Gin-gi dhogi to kata kamano ok ginyal wuoyo, gin-gi wenge to ok ginyal neno; 6 gin-gi itegi to ok ginyal winjo wach, kendo gin-gi umgi to ok ginyal ng’wecho; 7 gin-gi lwetegi to ok ginyal mulo, kendo gin-gi tiende to ok ginyal wuotho bende ok ginyal kata temo loso gi duondgi. 8 Joma losogi biro chalo kodgi, kendo joma ogenogi bende biro chalo kodgi. 9 Yaye dhood jo Israel, genuru kuom Jehova- En e konyruokgi kendo okumbagi. 10 Yaye dhood joka Harun, genuru kuom Jehova- En e konyruokgi kendo okumbagi. 11 Un joma oluore, genuru kuom Jehova- En e konyruokgi kendo okumbagi. 12 Jehova parowa kendo obiro gwedh owa; obiro gwedho dhood Isreal, obiro gwedho dhood joka Harun, 13 obiro gwedho joma oluoro Jehovaji ajia kod joma igeno. 14 Mad Jehova mi imedri, in kaachiel gi nyithindi. 15 Mad iyud gweth moa kuom Jehova, jachwech polo gi piny. 16 Polo malo mogik en mar Jehova, to piny to osechiwo ne dhano. 17 Joma osetho ok ema pak Jehova, joma oseiki moling’ thi e bur ok pake; 18 en wan ema wadendo Jehova sani kendo nyaka chieng’. Haleluya!

Zaburi 116

1 Ahero Jehova nikech nowinjo duon - da; nowinjo ywakna kane adwaro kech. 2 Nikech ne ochikona ite, abiro luonge kinde duto ma angima. 3 Tonde mag tho norida, lit mar liel nochopona, kendo chandruok gi chuny lit noloya. 4 Eka naluongo nying Jehova, ne aywakne ni, "Resa, Yaye Jehova!" 5 Jehova ng’won kendo timo maber; Nyasachwa opong’ gi kech. 6 Jehova rito joma chunygi obolore; kane an-gi chando maduong’ to ne oresa. 7 Bed abeda mos, Yaye chunya, nimar Jehova osebedo ka timoni maber ndalo duto. 8 Nimar in ema isegolo chunya e tho, Yaye Jehova, wengena bende isereso e ywak, kendo tiendena isegeng’o mondo kik okier, 9 isetimo kamano mondo awuothi e nyim Jehova, e piny joma ngima. 10 Ne ayie; emomiyo ne awacho ni, "Sand oromo chunya." 11 Kendo kane achiedhnade omaka, to ne awacho ni, "Dhano duto riambo." 12 Ere kaka dachul Jehova kuom berne duto mosetimona? 13 Abiro ting’o okumba mar warruok malo kendo abiro luongo nying Ruoth. 14 Abiro chopo singruokga ma asetimo ne Jehova e nyim ji duto. 15 Tho mar joge maler en gimaber miwuoro e nyim Jehova. 16 Yaye Jehova, an jatichni adier; an jatichni, ma wuod jatichni manyako; isegonya mi igola e nyorochega. 17 Abiro timoni misango mar erokamano kendo abiro luongo nying Jehova. 18 Abiro chopo singruokga ma asetimo ne Jehova e nyim ji duto, 19 abiro chopogi e lache mag od Jehova abiro timogi e iyi, Yaye Jerusalem. Haleluya!

Zaburi 117

1 Pakuru Jehova, un ogendini duto; dendeuru, un ji duto manie piny. 2 Nimar hera moherow ago duong’, kendo adierane osiko nyaka chieng’. Haleluya.

Zaburi 118

1 Gouru erokamano ne Jehova, nimar ober; kendo herane osiko nyaka chieng’. 2 Jo Israel mondo owach ni, "Herane osiko nyaka chieng’." 3 Jo dhood Harun mondo owach ni, "Herane osiko nyaka chieng’." 4 Joma oluoro Jehova mondo owach ni, "Herane osiko nyaka chieng’." 5 Ne aywak ne Jehova kane chunya lit, kendo ne oduoka mine ogonya thuolo. 6 Jehova nikoda, omiyo ok analuor. En ang’o ma dhano ditimna? 7 Jehova nikoda; en e Jakonyna. Abiro neno gi wang’a ka olo wasika. 8 Ber pondo kuom Jehova moloyo geno kuom dhano. 9 Ber pondo kuom Jehova moloyo geno kuom ruodhi. 10 Ogendini duto nolw o ra koni gi koni, to ne atiekogi e nying Jehova. 11 Ne gilw o ra koni gi koni, to ne atiekogi e nying Jehova 12 Ne ginur kuoma ka kich, to ne githo ka kudho maliel; ne atiekogi e nying Jehova. 13 Ne gidhira gichien kendo ne achiegni podho, to Jehova nokonya. 14 Jehova e tekra kendo en e wenda; osedoko warruok mara. 15 Koko mag mor gi mag loch winjore ei hembe mag joma kare kama: "Lwet Jehova mako rachwich osetimo gik madongo! 16 Lwet Jehova makorachwich oting’ malo; lwet Jehova makorachwich osetimo gik madongo!" 17 Ok abi tho, abiro bedo mangima; abiro bedo mangima modo ahul gik ma Jehova osetimo. 18 Jehova osegoya modwa nega, to kata kamano pok oweyo tho onega. 19 Yawna rangeye mag tim makare; mondo adonji kendo ago erokamano ne Jehova. 20 Mano e dhoranga Jehova ma joma kare nyalo donjogo. 21 Abiro goyoni erokamano, nikech ne iduoka; mi idoko warruokna. 22 Kidi mane jogedo odagi koro odoko kidi moriwo kor ot; 23 Ruoth ema osetimo mano kendo en gima lichnwa miwuoro. 24 Ma en odiechieng’ ma Jehova oseloso; wamoruru kendo wail e iye. 25 Yaye Jehova, reswa Yaye Jehova, mi walochi. 26 Ogwedh ng’at mabiro gi nying Jehova. Wagwedhi gie od Jehova. 27 Jehova en ber, kendo osemiyo lerne mondo orieny kuomwa. Riwreuru gi oganda moruowo ka timo nyasi, kuting’o bede yien wuothuru kodgi nyaka uchopi e tunge mag kendo mar misango. 28 In Nyasacha, omiyo abiro goyoni erokamano; in Nyasacha omiyo abiro miyi duong’. 29 Gouru erokamano ne Jehova, nimar ober; herane osiko nyaka chieng’.

Zaburi 119

Alef

1 Ogwedh joma yoregi ler, ma wuotho koluwore gi chik Jehova. 2 Ogwedh joma orito chikene kendo ma manye gi chunygi duto. 3 Gin joma ok tim gimoro amora marach, to gisiko ka giwuotho e yorene. 4 Iseguro chikeni mochuno ni nyaka lu kaka gin. 5 Yaye, mad ne bed ni yorena ogurore e luwo chikeni! 6 Dine ok aneno wichkuot nikech aketo chunya e chikeni duto. 7 Kaka amedo puonjora chikeni makare e kaka abiro dhi nyime gi paki gi chuny moriere. 8 Abiro rito chikeni; omiyo kik ijwang’a chuth.

Beth

9 Ere kaka ng’ama pod tin nyalo rito ngimane mondo osik kaler? Onyalo rito mana kodak moluwore gi wachni. 10 Amanyi gi chunya duto; omiyo kik iwe abar awe chikeni. 11 Asekano wachni ei chunya mondo kik akethi e nyimi. 12 Yaye Jehova, mad iyud pak; yie ipuonja chikeni. 13 Aolo gi dhoga chike duto mowuok e dhogi. 14 Luwo chikeni mora mana kaka ng’ato bedo mamor kuom mwandu duto. 15 Abiro paro matut kuom chikeni kendo abiro tego wengena e yoreni. 16 Amor ahinya gi chikeni; ok abi jwang’o wachni.

Gimel

17 Tim maber ne jatichni, eka abiro bedo mangima kendo abiro rito chikeni. 18 Yaw wengena mondo eka ane gik mabeyo miwuoro manie chikeni. 19 An mana wendo e piny omiyo kik ipandna chikeni. 20 Chunya opong’ kod siso mar chikeni kinde duto. 21 Ikwero joma ochayo joma okuong’ kendo joma osebaro oweyo chikeni. 22 Gol kuoma ajara gi achaya nimar arito chikeni. 23 Kata obedo ni jotelo chokorena kendo giyanya, to jatichni pod biro mana paro matut kuom chikeni. 24 Chikeni e morna; gin e jong’ad rieko maga.

Daleth

25 Osepiela ei lowo piny; omiyo rit ngimama kaluwore gi wachni. 26 Kane ahulo yorena to ne idwoka; puonja chikeni. 27 Mi awinj tiend gik ma chikeg i puonjo; eka abiro paro matut kuom timbegi miwuoro. 28 Kuyo onyoso chunya, omiyo meda teko kaluwore gi wachni. 29 Geng’a kik adonji e yore mag miria mbo, kendo ng’wonna ka ipuonja chikni. 30 Aseyiero yor adiera; kendo aseketo chunya e chikeni. 31 Amako chikeni matek, Yaye Jehova, omiyo kik iwe ane wichkuot. 32 Yor chikeni ema aringe, nimar isegonyo chunya.

He

33 Puonja mondo alu yoreni, Yaye Jehova, eka abiro ritogi nyaka giko. 34 Miya rieko mondo eka arit chikeni kendo atim kaka owacho gi chunya duto. 35 Taya e yo mar chikeni, nimar kanyo ema ayudoe mor. 36 Ket chunya mondo oher chikeni, to ok dwaro maga mag wuoro. 37 Gol wang’a oko kuom gik manono; rit ngimana kaluwore gi wachni. 38 Chop singruok mari ne jatichni, mondo ji oluori. 39 Golna achaya ma aluoro, nimar chikeni beyo. 40 Mano kaka ahero yoreni! Rit ngimana e timni makare.

Waw

41 Mad herani maok rem bina, Yaye Jehova, mad warruokni bina kaluwore gi singruokni. 42 Eka abiro dwokora gi ng’at ma timona anyali, nimar ageno kuom wachni. 43 Kik igol wach mar adiera e dhoga chuth, nimar aseketo genona e chikeni. 44 Abiro rito chikeni ndalo duto, manyaka chieng’. 45 Abiro wuotho ka an thuolo, nimar chikeni ema asebedo ka amanyo. 46 Abiro wuoyo kuom chikeni e nyim ruodhi kendo wiya ok bi kuot, 47 nimar amor gi chikeni nikech aherogi. 48 Ating’o bedena malo ne chikeni ma ahero kendo asiko aparo matut kuom yoreni.

Zayin

49 Par wachni mane iwacho ne jatichni, nimar isemiya geno. 50 Gima hoya e chandruokna en ma: ni singruokni rito ngimana. 51 Joma ochayo ji jara maok obadhogi to kata kamano ok alokra awe chikeni. 52 Asiko aparo chikeni mosebedo ka nitie nyaka nene, Yaye Jehova, kendo ayudo hoch kuomgi. 53 Mirima mager omaka nikech joma timbegi richo, mosejwang’o chikeni. 54 Chikeni e thorro mar wenda, kamoro amora ma abwore. 55 Aparo nyingi gotieno, Yaye Jehova, kendo abiro rito chikni. 56 Ma osebedo timna, nimar asebedo ka arito yoreni.

Heth

57 In e pokna, Yaye Jehova; asesingora ni abiro rito chikeni. 58 Asemanyo wang’i gi chunya duto; ng’won-na kaluwore gi singruok mari. 59 Asenono yorena kendo asechiko okangega mondo olu yoreni. 60 Abiro reto kendo ok abi deko mar rito chikeni. 61 Kata obedo ni joma timbegi richo orida gi tonde, to wiya ok bi wil gi chikeni. 62 Achiewo dier otieno mondo agoni erokamano kuom chikegi makare. 63 An osiep ji duto moluori, jogo duto moluwo yoreni. 64 Piny opong’ gi herani, Yaye Jehova; yie ipuonja chikeni.

Teth

65 Tim maber ne jatichni kaluwore gi wachni, Yaye Jehova. 66 Puonja ng’eyo gi paro maber, nimar ayie kuom chikeni. 67 Kane pok ayudo masira to ne abayo yo, to sani koro atimo gima wachni owacho. 68 Iber, kendo gima itimo ber; omiyo puonja chikeni. 69 Kata obedo ni joma ochayo ji osemiena gi miriambo, to pod arito yoreni gi chunya duto. 70 Chunygi tek kendo ok dew gimoro amora; to an to chikni miya mor. 71 Ne en gima ber mondo ayud chandruok mondo eka apuonjra chikeni. 72 Chik moa e dhogi berna moloyo ng’injo gana gi gana mag fedha gi dhahabu.

Yodh

73 Lweteni ema nolosa kendo ochueya; miya ng’eyo mondo apuonjra chikeni. 74 Mad joma oluori bed mamor ka ginena, nimar aseketo genona e wachni. 75 Ang’eyo, Yaye Jehova, ni chikeni nikare, kendo ang’eyo ni chwat misechwadago nikare. 76 Mad ihoya gi herani maok rem, kaluwore gi singruok mane imiyo jatichni. 77 Orna kechni mondo abed mangima, nimar chikni e morna. 78 Mad joma ochayo ji ne wichkuot kuom kwinya maonge gima omiyo, an to abiro paro matut kuom yoreni. 79 Mad joma oluori dog joko ra, kaachiel gi joma ong’eyo bucheni. 80 Mad chunya bed maonge ketho, kuom rito chikeni, mondo kik ane wichkuot.

Kaf

81 Riyo mar dwaro warruokni oloyo chunya, kata kamano aseketo genona e wachni. 82 Wengena ool kamanyo singruokni; apuonjora ni, "Ibiro hoya karang’o?" 83 Kata obedo ni achalo pien ting’o divai molier e iro, to wiya pok owil gi chikeni. 84 Jatichni biro rito nyaka karang’o? Ibiro kumo joma sanda karang’o? 85 Joma ochayo ji osekunyona buche mondo apodhie, gitimo gima chikni okwedo. 86 Chikeni duto inyalo geno; omiyo yie ikonya, nikech ji sanda maonge gima omiyo. 87 Ne gichiegni yweya oko e piny, to kata kamano pok aweyo chikeni. 88 Rit ngimana kaluwore gi herani, mondo alu chike mowuok e dhogi.

Lamedh

89 Wachni ochwere, Yaye Jehova; ochung’ mogurore e polo. 90 Adiera mari ochwere e tienge duto; mana kaka ne iguro piny mi piny osiko. 91 Chikeni osiko nyaka kawuono, nimar gik moko duto tiyoni. 92 Ka dine bed ni chikeni ok ema miya mor, to dikoro aselal nono nikech masichega. 93 Wiya ok bi wil gi bucheni, nimar gin ema iseritogo ngimana. 94 Resa nimar an mari; nikech asiko amanyo chikeni ndalo duto. 95 Joma timbegi richo obutona mondo gitieka, to abiro bet mos ka aparo kuom chikeni. 96 Ang’eyo ni koda ka gik malong’o chuth nigi gikogi, to chikeni onge gikogi.

Mem

97 Yaye, mano kaka ahero chikni! Aparo kuome odiechieng’ duto. 98 Chikeni miyo abedo mariek moloyo wasika, nimar gisiko gin koda seche duto. 99 An gi winjo moloyo jopuonjna duto, nimar arito chikeni. 100 Wach donjona moloyo jodongo machon nimar arito chikeni. 101 Asetamo tiendena ni kik wuothi e yore maricho, mondo eka atim gima wachni ochiko. 102 Pok abaro aweyo chikeni, nimar in iwuon ema isepuonja. 103 Mano kaka wechegi mit ka abilogi, gimit e dhoga moloyo mor kich! 104 Chikeni miyo abedo gi winjo; e momiyo achayo yo moro amora marach.

Nun

105 Wachni e taya mar tienda kendo en ler mamenyona yo. 106 Asekuong’ora mi aketo sei ni abiro siko kaluwo chikeni makare. 107 Asechandora moloyo; omiyo rit ngimana, Yaye Jehova, kaluwore gi wachni. 108 Rwak pak ma achiwoni gi dhoga ka ahero, Yaye Nyasaye, kendo puonja chikeni. 109 Kata obedo ni ating’o ngimana e lweta kinde duto, to wiya ok bi wil gi chikeni. 110 Joma timbegi richo osechikona obadho; to kata kamano pok abaro aweyo bucheni. 111 Chikeni e girkeni mara manyaka chieng’; gin e mor mar chunya. 112 Aketo chunya kuom rito chikeni maok aweyo nyaka giko.

Samek

113 Achayo joma pachgi ariyo, to ahero chikni. 114 In e ohingana kendo okumbana; omiyo aseketo genona e wachni. 115 Ayiuru buta, un joma timo richogi, mondo arit chike mag Nyasacha! 116 Maka motegno kaluwore gi singruokni, eka anabed mangima; kik iwe geno ma an-go lalna. 117 Sira eka ananwang’ konyruok; abiro siko ka ahero chikeni. 118 Idagi ji duto mabaro weyo chikeni, nimar wuondruok ma giwuondorego en kayiem. 119 Joma timbegi richo duto modak e piny ipuko oko ka yugi; emomiyo ahero chikeni. 120 Denda tetni nikech oluori, kihondhko omaka nikech chikeni.

Ayin

121 Asetimo gima kare kendo madier, omiyo kik iweya e lwet joma sanda. 122 Ne ni jatichni dhi maber, kendo kik iyie joma ochayo ji osanda. 123 Wengena ool karango resruok mikelo, kendo kamanyo gima kare mane isingona. 124 Timne jatichni kaluwore gi herani, kendo puonja chikeni. 125 An jatichni, omiyo yie imiya nyalo mar ng’eyo gik mopondo eka awinj tiend chikeni. 126 Saa oromo mondo koro itim gimoro, Yaye Jehova, nikech iketho chikni. 127 Nikech ahero chikeni moloyo dhah abu, kendo moloyo dhahabu maler mogik, 128 kendo nikech akawo bucheni duto ni nikare, omiyo achayo yo moro amora marach.

Pe

129 Chikeni lich miwuoro; emomiyo aritogi. 130 Wachni koler tiende to kelo ler, omiyo joma ok riek bedo gi winjo. 131 Ayawo dhoga kendo agamo yueyo, ka agombo chikeni. 132 Lokri iranga mondo ikecha, kaka ijatimo ndalo duto ne joma ohero nyingi. 133 Ta okangega mondo gilure gi wachni; kik iwe richo moro amora loya. 134 Gola e dicho ma ji diyogo jowetegi, mondo eka arit bucheni. 135 Ng’i jatichni gi wang’ maber kendo puonja chikeni. 136 Pi wang’ bubni kawuok e wengena, nimar chikni ok ji orito.

Tsadhe

137 In ng’at makare, Yaye Jehova, kendo chikeni nikare. 138 Chike mise ndiko piny nikare, inyalo genogi chuth. 139 Hera ma aherogo wachni tieka, nimar wasika ok dew wachni. 140 Singruok magi osetem maber chuth, omiyo jatichni oherogi. 141 Kata obedo ni an chien kendo ji ochaya, to wiya ok nyal wil gi bucheni. 142 Timni makare osiko kendo chikni en adier, 143 Chandruok kod malit osebirona, kata kamano chikeni e morna. 144 Chikeni nikare nyaka chieng’, omiyo miya ng’eyo mondo eka abed mangima.

Kof

145 Yie iduoka, Yaye Jehova, nikech aywakni gi chunya duto kendo abiro timo kaka chikni dwaro. 146 Aywakni, yie ikonya, eka abiro rito chikeni. 147 Achiewo kogwen ka piny pok oya- wore kendo aywagora mondo ayud kony; aseketo genona e wachni. 148 Wengena neno otieno duto, mondo omi apar matut kuom sing ruok magi. 149 Winj duonda kaluwore gi herani; rit ngimana, Yaye Jehova, kaluwore gi chikeni. 150 Joma chanona gik maricho ni koda machiegni, kata kamano gin mabor gi chikni. 151 In to in machiegni, Yaye Jehova, kendo chikeni duto gin adier. 152 Ne apuonjora kuom chikeni chon gilala, ni ne igurogi mondo gisik nyaka chieng’.

Resh

153 Ne chandruokna mondo ikonya, nimar pok wiya owil gi chikni. 154 Dog jakora mondo iresa, rit ngimana kaluwore gi singruokni. 155 Warruok ni mabor gi joma timbegi richo, nimar ok giket chunygi kuom dwaro chikeni. 156 Ng’wononi duong’, Yaye Jehova; rit ngimana kaluwore gi chikeni. 157 Wasigu masanda thoth adier, to kata kamano pok abaro aweyo chikeni. 158 Arango joma onge yie ka chunya ochido kodgi, nimar ok girit chikni. 159 Neye kaka ahero bucheni; omiyo rit ngimana, Yaye Jehova, kaluwore gi herani. 160 Wechegi duto gin adier; kendo chikegi makare duto ochwere.

Sin gi Shin

161 Jotelo sanda maonge gima omiyo, to kata kamano chunya oluoro wachni. 162 Singruokni mora, mana ka ng’ama oyudo mwandu maduong’ ma wasigu oringo oweyo. 163 Asin kendo ajok gi miriambo, to ahero chikni. 164 Apaki ndalo abiriyo e odiechieng’ achiel kuom chikegi makare. 165 Joma ohero chikeni nigi kuwe maduong’ kendo onge gima nyalo miyo gichwanyre. 166 Arito warruokni, Yaye Jehova, kendo aluwo chikeni. 167 Atimo gima chikeni dwaro, nimar aherogi gi hera maduong’. 168 Arito bucheni gi chikeni, nimar yorega duto ong’ereni maber.

Taw

169 Mad ywakna chopi e nyimi, Yaye Jehova; mi abed gi winjo kaluwore gi wachni. 170 Mad kwayona chopi e nyimi, resa kaluwore gi singruokni. 171 Mad dhoga pong’ gi pak, nimar isepuonja chikeni. 172 Mad lewa wer kuom wachni, nimar chikegi duto nikare. 173 Mad lweti ikre mar konya, nimar aseyiero bucheni. 174 Asedwaro resruok mari matek, Yaye Jehova; kendo chikni e morna. 175 We amed bedo mangima mondo apaki, kendo mad chikeni okonya. 176 Aseruenyo ka rombo molal, omiyo yie imany jatichni, nimar wiya pok owil gi chikeni.

Zaburi 120

Wend Yong’o

1 Ka an e chandruok to aluongo Jehova, kendo oduoka, 2 Resa, Yaya Jehova, kuom dho joma riambo kendo kuom lew joma wuondore. 3 Be ing’eyo gima Nyasaye biro timo - ni, be ing’eyo gik mochomi adier, Yaye lep mawuondore? 4 Obiro kumi gi aserni mabitho mag jakedo, ee, obiro wang’i gi maka maliel mager, mowang’ gi yiend adugo. 5 Malit ochoma adier nikech adak Mesek, hapa rach nikech adak e dier hembe mag Kedar! 6 Asedak aming’a ahinya, e dier joma ok dwar kuwe. 7 An an ng’at kuwe; to ka awuoyo, to giikore ne lweny.

Zaburi 121

Wend Yong’o

1 Ating’o wengena ka arango godeere kuma konyruokna biro aye? 2 Konyruokna aa kuom Jehova, Jachuech polo gi piny. 3 Ok obi weyo tiendi kier- Jal ma riti ok bi nur; 4 adier, Jal marito Israel ok nur kendo ok nindi. 5 Jehova riti- Jehova e tipo moumi manie badi korachwich; 6 omiyo chieng’ ok nochomi godiechieng’ kendo dwe ok notimi gimoro gotieno. 7 Jehova biro riti mondo gimoro amora kik ohinyi- 8 Jehova biro riti kidonjo kendo kiwuok, obiro timo kamano sani kendo nyaka chieng’.

Zaburi 122

Wend Yong’o. Mar Daudi

1 Ne amor gi joma nowachona ni, "Wadhiuru e od Jehova." 2 Tiendewa ochung’ e dhorangeyeni, Yaye Jerusalem. 3 Jerusalem oger ka dala ma ji odakie machiegni- machiegni. 4 Kanyo e kama ogendini idho dhiye, ogendini mag Jehova dhi kuno mondo opak nying Jehova ka giluwo chike mane omi Israel. 5 Kanyo ema kombe loch mag ng’ado bura nitie kombe loch mag jood Daudi. 6 Lamuru mondo Jerusalem obed gi kuwe. Lamuru ni: "Mad joma oheri bed gi kuwe. 7 Mad kuwe yudre ei alworani, adier kuwe mondo obedi ei ohinga mochieli." 8 Nikech owetena gi osiepena modak e iyi, awacho ni, "Jerusalem mondo obed gi kuwe." 9 Nikech wach od Jehova Nyasachwa, adwaro ni idhi maber.

Zaburi 123

Wend Yong’o

1 In ema arangi, in ma kom lochni nie polo ema arangi. 2 Mana kaka wenge wasumbni rango lwet ruodhgi, kendo kaka wenge jatich manyako mar ot rango lwet min-odgi, e kaka we n g ewa rango Jehova Nyasachwa nyaka chop okechwa. 3 Yie ikechwa Yaye Jehova, yie ikechwa, nikech osechawa gikinda. 4 Josunga osejarowa moromo kendo acheje osechayowa moromo.

Zaburi 124

Wend Yong’o. Mar Daudi

1 Ka dine bed ni Jehova ok jakorwa- jo Israel mondo owach kamano- 2 ka dine bed ni Jehova ok jakorwa kane ji omonjowa, 3 e kinde mane mirima mabebni ka mach omakogi kodwa, to dine gimwonyowa ngili; 4 ataro dine odinonwa, ee, kodh yamo dine oywerowa, 5 kendo pi maringo matek dine odhi kodwa. 6 To pak odog ne Jehova maok oseyie mondo lekegi okidhwa. 7 Wasetony mana ka winyo mowuok e wino mar jachik winy; wino osechodi, to wan wasetony. 8 Ko n y ruokwa nie nying Jehova Jachuech polo gi piny.

Zaburi 125

Wend Yong’o

1 Joma ogeno kuom Jehova chalo gi Got Sayun, maok nyal yiengi to osiko nyaka chieng’. 2 Mana kaka gode olworo Jerusalem, e kaka Jehova olworo joge chakre sani kendo nyaka chieng’. 3 Ludh loch mar joma timbegi richo ok bi siko korito piny mopog ne joma kare, nimar ka mano otimore to joma kare nyalo tiyo gi lwetgi kuom timo marach. 4 Tim maber, Yaye Jehova, tim maber ne joma beyo, tim maber ne joma ngimagi oriere gie chunygi. 5 To joma lokore luwo yore mobam Jehova biro kumo kaachiel gi joma timo timbe maricho. Israel mondo obed gi kuwe!

Zaburi 126

Wend Yong’o

1 Kane Jehova oduogo joma otue Sayun, to ne ochalonwa mana lek. 2 Ne wathung’ gi nyiero kendo dhowa nopong’ gi wende mor. Eka nowachore e dier ogendini ni, "Jehova osetimonegi gik madongo." 3 Adier, Jehova osetimonwa gik madongo, omiyo wamor mokalo. 4 Duognwa gigewa, Yaye Jehova, mondo wachal gi aoche man Negev. 5 Joma komo kodhi ka pi wengegi chuer biro keyo ka wero wende mor. 6 Ng’at madhi oko ka ywak, koting’o kodhi mikomo, biro duogo ka wero wende mor, koting’o cham mosechiek.

Zaburi 127

Wend Yong’o. Mar Solomon

1 Ka Jehova ok ema ger ot, to joma gere nyagore gi tich matek kayiem. Ka Jehova ok ema orito dala, to jorito ochung’ karito kayiem. 2 In be imondo chiew chon kendo ineno nyaka saa molewo, kinyagori gi tich matek mondo iyud chiemo minyalo chamo; nimar Nyasaye miyo joge mohero nindo mokuwe. 3 Yaw u owi gin gweth moa kuom Jehova, adier, nyithindo gin mich moa kuome. 4 Yawuowi ma ng’ato onyuolo kapod otin, chalo gi asere manie lwet jakedo. 5 Ng’at ma ofukune opong’ kodgi en ng’ama ogwedhi. Ok ginine wichkuot ka gikedo gi wasikgi e dhorangach.

Zaburi 128

Wend Yong’o

1 Ji duto moluoro Jehova, kendo mawuotho e yorene gin joma ogwedhi. 2 Ibiro chamo olemb luchi; iniyud gweth kendo inidhi maber. 3 Chiegi nochal gi yiend mzabibu manyak maber e odi; yawuoti nochal gi chuny mzabibu maloth sama giluoro mesa ka gichiemo. 4 Kamano e kaka ng’ama oluoro Jehova ogwedhi. 5 Jehova mondo ogwedhi gie Sayun, ndalo duto mag ngimani; mad ineye gi wang’i ka Jerusalem dhi maber, 6 kendo mad idag aming’a nyaka ine nyithind nyithindi Israel mondo obed gi kuwe!

Zaburi 129

Wend Yong’o

1 Jogi osesanda malit nyaka aa e tinna- Israel mondo owach ni: 2 gisesanda malit nyaka aa e tinna, to kata kamano pok gibedo gi loch kuoma. 3 Jopur osepuro dieng’eya kendo gisegore para maroboche, 4 to kata kamano Jehova en ng’ama kare; osechoda oko mi adong’ thuolo e tonde joma richo. 5 Ji duto mochayo Sayun lo mi dog chien gi wichkuot. 6 Mad gichal gi lum moti ewi tado ma ner kata kapok odongo maber. 7 Ok onyal nyago gimoro mapong’o lwet jakeyo, kata ma jachoko nyalo ting’o e bade. 8 Mad joma kalo bute kik wachnegi ni, "Jehova mondo ogwedhi, kata ni, wagwedhi e nying Jehova."

Zaburi 130

Wend Yong’o

1 Aywakni ka an e chuny bur matut, Yaye Jehova, 2 Yaye Jehova, yie iwinj dwonda. Chik iti ne ywakna ma aywaknigo mondo ikecha. 3 Yaye Ruoth Nyasaye, ka dine bed ni isiko iparo richo, ma ji timo, Yaye Ruoth Nyasaye to en ng’a ma dichung’ e nyimi ka ok bura oloyo? 4 To kata kamano kuomi nitiere weyo richo; emomiyo ji oluori. 5 Arito Jehova, chunya rite kendo aketo genona kuom wachne. 6 Chunya rito Ruoth Nyasaye, moloyo kaka jorito rito ru piny. 7 Yaye jo- Israel, keturu genou kuom Jehova, nimar Jehova ema nigi hera maok rem kendo en ema owaro ji chuth. 8 En owuon ema obiro waro jo Israel kuom richogi duto.

Zaburi 131

Wend Yong’o. Mar Daudi

1 Ng’ayi onge e chunya, Yaye Jehova, wang’a bende ok tek; chunya ok chandre gi gik madongo, kata gi weche matek modhiera ng’eyo. 2 To abet mos kendo chunya okuwe; mana ka nyathi mapod dhoth moling’ mos e bad min, ee, kaka nyathi ma kamano ling’ mos, e kaka chunya bende oling’ mos e iya. 3 Yaye jo Israel, keturu genou kuom Jehova chakre sani kendo nyaka chieng’.

Zaburi 132

Wend Yong’o

1 Parie Daudi, Yaye Jehova, parie Daudi gi chandruok duto moseneno. 2 Ne okuong’ore kane osingore ne Jehova, kendo ne okuong’ore ne Jal Maratego mar Jakobo kama: 3 "Ok anadonji e oda, kata dhi e kitandana- 4 Ok anayie nindo tera, kata ayula wang’ lo wengena, 5 kapok aloso ne Jehova kare, kapok ayudo ne Jal Maratego mar Jakobo kar dak." 6 Ne wawinjo wachno Efratha, ee, ne wayude e puothe mag Jaar: 7 "Wadhiuru kare modake; wadhiuru mondo walame e nyim komduong’ne- 8 aa malo, Yaye Jehova, aa malo ibi kari mar yweyo, in kaachiel gi Sandug Muma ma en kido mar tekoni. 9 Mad jodolo magi rwakre gi tim makare, kendo mad jogi maler wer gi mor." 10 Nikech Daudi jatichni, kik idag i ng’ati miseyiero. 11 Jehova nokuong’ore kendo osingore ne Daudi, kendo ne en kuong’ruok maok enoloki ngang’; nokuong’orene ni, "Abiro keto achiel kuom kothi e lochni- 12 ka yawuoti orito singruokna kod chike ma apuonjogi, eka yawuotgi nobedi e lochni nyaka chieng’ kendo nyaka chieng’." 13 Nimar Jehova oseyiero Sayun, osehere kaka kar dakne, osewacho ni, 14 "Ma e kar yweyona nyaka chieng’ ma nyaka chieng’, kae ema abiro betie kom lochna, nimar asehere- 15 abiro gwedhe gi gik moko mogundho, kendo joge modhier abiro romo gi chiemo. 16 Abiro rwako jodolo mage gi warruok kendo joma ler modak e iye biro siko ka wero wende mor. 17 "Ka eni ema abiro miyo tung moro donge ne Daudi kendo abiro chungo taya ne ng’ata mowir. 18 Abiro bako wasike gi wichkuot, to en osimbo manie wiye biro medo rieny.

Zaburi 133

Wend Yong’o. Mar Daudi

1 Mano kaka en gima ber kendo malong’o, ka jowete odak kanyakla gi kuwe! 2 Dak ma kamano chalo gi mo manengone tek mool e wich kendo mamol piny nyaka e tik, ma mol piny koluwo tik Harun ka mol piny mosmos nyaka e ng’ut kandhoge. 3 Ochalo bende gi thoo momoko e Got Hermon maridore e wi Got Sayun. Nimar kanyo ema Jehova chiwe gwethne, ma en ngima manyaka chieng’.

Zaburi 134

Wend Yong’o

1 Pakuru Jehova, un jotichne duto, matiyo gotieno e od Jehova. 2 Ting’uru bedeu malo e kare maler kendo upak Jehova. 3 Mad Jehova ma jachwech polo gi piny, ogwedhu gie Sayun.

Zaburi 135

1 Haleluya! Pakuru nying Jehova; pakeuru, un jotich Jehova, 2 Un mutiyo e od Jehova, e laru mag od Nyasachwa. 3 Pakuru Jehova, nimar Jehova ber; pakuru nyinge gi wende pak nimar timo kamano en gima ber. 4 Nimar Jehova oseyiero Jakobo, mondo obed gire owuon; oseyiero Israel, mondo obed mwandune mogeno. 5 Ang’eyo ni Nyasaye duong’, ang’eyo adier ni Ruodhwa duong’ moloyo nyiseche duto. 6 Jehova timo gimoro amora mohero, e polo kendo e piny ei nembe kendo e kudegi. 7 Omiyo boche wuok koa e tung’ piny koni gi koni, kendo ooro milpolo ka koth chue bende okelo yamo kogolo e utege mokanogie. 8 Ne ogoyo nyithindo makayo mag Misri, nyithindo makayo mag dhano kod le. 9 Ne ooro ranyisi gi honni mage e dieru, Yaye Misri, noorogi kuom Farao kaachiel gi jotichne duto. 10 Ne ogoyo pinje mang’eny piny, kendo ne onego ruodhi ma roteke- 11 kaka Sihon ruodh jo Amor, gi Og ruodh Basan kod ruodhi duto mag Kanan- 12 kendo nomiyogi piny jogo kaka girkeni, kaka girkeni ne joge ma gin jo Israel. 13 Yaye Jehova, nyingi osiko nyaka chieng’, Yaye Jehova, humbi ochwere e tienge duto. 14 Nimar Jehova biro chwako joge, kendo obiro kecho jotichne. 15 Nyiseche mopa mag ogendini gin fedha gi dhahabu, molos gi lwet dhano. 16 Gin-gi dhok, to ok ginyal wuoyo, kendo gin-gi wenge to ok ginyal neno. 17 Bende gin-gi it, to ok ginyal winjo wach, kendo kata mana muya onge e dhogi. 18 Joma losogi nobed machal kodgi, kendo ji duto mogenogi be biro chalo kodgi. 19 Yaye dhood jo Israel, pakuru Jehova; Yaye dhood joka Harun, pakuru Jehova; 20 Yaye dhood joka Lawi, pakuru Jehova; pakuru Jehova, un ji duto moluore. 21 Jehova mondo opaki gie Sayun, Jal modak Jerusalem mondo opaki. Haleluya!

Zaburi 136

1 Gouru erokamano ne Jehova, nimar ober. Herane osiko nyaka chieng’. 2 Gouru erokamano ne Nyasach nyiseche: Herane osiko nyaka chieng’. 3 Gouru erokamano ne Ruodh ruodhi: Herane osiko nyaka chieng’. 4 ne En kendo ma timo honni madongo, Herane osiko nyaka chieng’. 5 Jal mane oloso polo gi riekone, Herane osiko nyaka chieng’. 6 Jal mane oyaro piny ewi pige, Herane osiko nyaka chieng’. 7 Jal mane oloso rameny madongodongo- Herane osiko nyaka chieng’. 8 nochweyo wang’ chieng’ mondo orit odiechieng’, Herane osiko nyaka chieng’. 9 kod dwe gi sulwe mondo orit otieno; Herane osiko nyaka chieng’. 10 ne En mane onego nyithindo makayo mag Misri, Herane osiko nyaka chieng’. 11 kendo mane ogolo jo Israel oko kuomgi, Herane osiko nyaka chieng’. 12 nogologi gi lwedo motegno kod bat morie; Herane osiko nyaka chieng’. 13 ne En mane obaro Nam Makwar diere ariyo; Herane osiko nyaka chieng’. 14 mi nogolo jo Israel koluwo diere tir, Herane osiko nyaka chieng’. 15 to Farao gi jolwenje to nomiyo Nam Makwar oywero; Herane osiko nyaka chieng’. 16 ne En mane otelone joge e thim, Herane osiko nyaka chieng’. 17 ne En mane ogoyo ruodhi madongo piny, Herane osiko nyaka chieng’. 18 kendo mane onego ruodhi ma roteke Herane osiko nyaka chieng’. 19 Kaka Sihon ruodh jo Amor- Herane osiko nyaka chieng’. 20 gi Og ruodh Basan- Herane osiko nyaka chieng’. 21 mi nochiwo pinygi kaka girkeni, Herane osiko nyaka chieng’. 22 Kaka girkeni ne Israel jatichne; Herane osiko nyaka chieng’. 23 ne En mane oparowa ka piny ochamowa, Herane osiko nyaka chieng’. 24 kendo mane o gonyowa e lwet wasikwa, Herane osiko nyaka chieng’. 25 machiwo chiemo ne chwech duto, Herane osiko nyaka chieng’. 26 Gouru erokamano ne Nyasach polo, Herane osiko nyaka chieng’.

Zaburi 137

1 E bath aoche mag Babulon ne wabet piny kendo ne waywak kane waparo Sayun. 2 Ne wang’awo thumbewa ewi yiend onera mane nikanyo, 3 nimar joma ne omakowa nokwayowa wende kane wan kanyo, josandwa nochunowa ni wawernegi wende mor; ne giwachonwa ni, "Wernwae uru achiel kuom wende Sayun!" 4 Ere kaka di wawer wende Jehova kapod wan e piny mawendo? 5 Ka dipo ni wiya owil kodi, Yaye Jerusalem, to mad lweta makorachwich wiye wil gi tichne. 6 Mad lewa moki e danda ka dipo ni ok apari, ka dipo ni ok aketo chunya kuomi, Yaye Jerusalem morna maduong’ mogik. 7 Parie gima ne jo Edom otimo, Yaye Jehova, parie gimane gitimo chieng’ mane Jerusalem opodho. Ne gikok matek ni, "Muke u ru ogoye piny. Mukeuru ogore piny gi mise mare duto!" 8 Yaye nyar Babulon, in mochanni kethruok, ng’ama nochuli kuom gima isetimonwa en jahawi- 9 ng’at ma nomak nyithindi mayom mi chudgi piny e lwendni en jahawi.

Zaburi 138

Mar Daudi

1 Abiro paki gi chunya duto, Yaye Jehova; abiro paki gi wer e nyim nyiseche. 2 Abiro kulora piny ka achomo Hekalu mari maler kendo abiro pako nyingi nikech herani kod adierani, nimar iseting’o nyingi kod Wachni malo moyombo gik moko duto. 3 Kane aluongo to ne iduoka, kendo ne imiyo abedo gi chir kod chuny motegno. 4 Mad ruodhi duto mag piny paki, Yaye Jehova, e sama giwinjo weche mowuok e dhogi. 5 Mad giwer kuom yore mag Jehova, nimar duong’ mar Jehova ng’ongo. 6 Jehova rango joma obolore kata obedo ni en malo to josunga to ong’eyo kata kapod gin gichien. 7 Kata obedo ni awuotho e dier chandruok, to irito ngimana; irieyo lweti kuom mirimb joma kedo koda, kendo iresa gi lweti makorachwich. 8 Jehova biro chopona chenroge; Yaye Jehova, herani osiko nyaka chieng’- kik ijwang’ tije ma iloso gi lweteni.

Zaburi 139

Ne Jatend Wer. Mar Daudi. Zaburi

1 Yaye Jehova, isenona kendo ing’eya. 2 Ing’eya sama abet piny nyaka sama aa malo; adier, ing’eyo parona gi kuma bor. 3 Bende ing’eyo yorega ma aluwo kod kuonde ma ayweyoe; yorena duto oyangoreni maber. 4 Kata kapok wach moro owuok e dhoga to ing’eye malong’o, Yaye Jehova. 5 Ilwora koni gi koni mi iketa diere; adier, iseuma duto gi lweti. 6 Ng’ech ma kamano lichna miwuoro, kendo otutna moyombo pacha. 7 Dadhi kure eka apond ne Roho mari? Koso kanye ma daring adhiye mondo apondni? 8 Ka aidho e polo, to in kuno; ka aloso otandana e bur matut, to in kuno. 9 Ka aidho yamb kogwen mondo otera e tok nam komachielo, 10 to kata kuno bende lweti biro telona e, kendo lweti mako rachwich biro maka motegno. 11 Ka awacho ni, "Mudho biro ima adier kendo ler biro lokorena otieno, " 12 to in mudho ok timni mudho kendo otieno rienyni ka odiechieng’, nimar mudho chaloni ler. 13 In ema ne ichweyo dhanda maiye, adier, ne ing’ina maber gie i mama. 14 Apaki nikech ne ichweya mong’ith kendo malich miwuoro; tijeno misetimo lich, kendo ang’eyo mano maber. 15 Fuonde mag ringra ne ok opondoni, chieng’ mane ilosa kama opondo. Chieng’ mane iriwo fuondega kaachiel e chuny piny, 16 wengeni ne oneno ringra kane pok olosore maber. Ndalo mane ochanna duto ne ondiki chon gilala e bugi kane pok kata achiel kuomgi obetie. 17 Mano kaka pachi tutna, Yaye Nyasaye! Mano kaka ging’eny mokalo akwana kargi duto! 18 Ka da bed ni anyalo kwanogi, to da giloyo kuoyo gi ng’eny. Sama achiew to ayudo ni pod an mana kodi. 19 Yaye Jehova, mad iyie ineg joma timbegi richo! Ayiuru buta, un joma rich chwero remb ji omakogi! 20 Giwuoyo kuomi gi paro marach; adier, wasiki tiyo gi nyingi e yo marach. 21 Donge amon gi joma mon kodi, Yaye Jehova, koso donge ok awinjra gi joma chung’ mondo oked kodi? 22 Achayogi kendo aonge kodgi gi tich adier akwanogi kaka wasika. 23 Nona, Yaye Jehova, mondo ing’e chunya; tema, mondo ing’e pacha. 24 Tim kamano mondo ine ane ka nitie gimoro marach kuoma, mondo itera e yor ngima manyaka chieng’.

Zaburi 140

Ne Jatend Wer. Zaburi Mar Daudi

1 Resa, Yaye Jehova, kuom joma richo, konya e lwet jomahundu, 2 joma chano chenro maricho e chunygi kendo gitugo lweny pilepile. 3 Gipiago lewgi mabith ka lew thuol kendo kwiri mar thuond fu nie lewgi. Sela 4 Rita, Yaye Jehova, rita e lwet joma timbegi richo; konya e lwet jomahundu machano gajo tiendena. 5 Josunga chikona obadho; giseyarona gogo mondo amokie kendo gisechikona otego e yorega ma aluwo. Sela 6 Yaye Jehova, Sela awachoni ni, "In Nyasacha." omiyo yie iwinja, Yaye Jehova, winj ywak ma aywaknigo mondo ikecha. 7 Yaye Ruoth Nyasaye, ma jakonyna motegno, in migeng’ona wiya sama lweny ger- 8 Kik iyie mondo joma timbegi richo oyud gik ma chunygi go mbo, Yaye Jehova; kik iyie mondo chenrogi otimre. Sela 9 Mi mondo chandruok ma joma olwora buogago, odog e wiyegi. 10 Mi mondo makaa maliel mager oolre kuomgi, ee, ne ni odirgi e mach, kata e thidhya ma nimo ji, maok ginyal wuokie kendo. 11 Mi mondo joma ketho nying jowetegi kik dhi maber e piny, ee, ne ni masira olawo jomahundu mi ojukogi. 12 Ang’eyo ni Jehova miyo jodhier yudo adieragi, kendo oneno ni ong’ad bura kare ne joma ochando. 13 Joma kare biro pako nyingi adier kendo joma ngimagi oriere tir biro dak ka ngima e nyimi.

Zaburi 141

Zaburi Mar Daudi

1 Aluongi, Yaye Jehova, yie ibi ira piyo. Yie iwinj dwonda ka aluongi. 2 Mad lamona osiki e nyimi mana ka ubani miwang’o, kendo bedena osik koriere kochomo malo mana ka misango mitimoni godhiambo. 3 Yaye Nyasaye, ket jarit e dhoga; ketna jarit mondo okonya umo dhoga. 4 Kik iyie gimoro amora marach ywa chunya, ma dimi an be atim timbe maricho kaachiel gi joma timbegi richo; rita mondo kik acham chiembgi mabeyonegi. 5 Onego ng’at makare ema ogoya, nikech mano chalo tim ng’wono motimona; onego en ema okwera, nikech mano chalo mo mool e wiya; ok anyal dagi mondo ng’ama kare otimna kamano. To kata kamano obiro kwedo timbe joma richo e lemona; 6 chieng’ ma nowit ruodhigi piny koa e wi got mabor, eka joma timbegi richo nong’e ni kare wechega ne gin adier. 7 Giniwach ni, "Mana kaka ng’ato puro kendo toyo lo, e kaka chokewa osekere e dho bur liel." 8 Anto at ego wang’a kuomi, Yaye Jehova; In e kar pondona, omiyo kik iwe atho. 9 Rita kuom obadho ma gisechikona, ee, rita kuom otego ma joma timbegi richo ochikona. 10 Mad joma timbegi richogo moki e gokegi giwegi ka anto akadho maber mak gimoro otima.

Zaburi 142

Maskil Mar Daudi Kane En Ei Bur. Lamo

1 Aywak matek ne Jehova; ating’o duonda ne Jehova mondo okecha. 2 Ahulone gik mathaga duto; anyise chandruokna duto ka abet e nyime. 3 Sama chunya chandore e iya, to in ema ing’eyo yor konyruokna. 4 Rang batha korachwich mondo ineonge ng’ama dewa. Aonge ng’ama rito ngimana. 5 Aywakni, Yaye Jehova; akoni ni, "In e kar pondona, kendo in e pokna e piny joma ngima." 6 Yie iwinj ywakna, nimar an-gi chandruok maduong’; resa e lwet joma lawa nimar gitek moloya mabor. 7 Gonya e twech ma antie, mondo apak nyingi. Eka joma kare biro chokore buta nikech ber misetimona.

Zaburi 143

Zaburi Mar Daudi

1 Winj lamona, Yaye Jehova, chik iti ne ywakna mar kech; bi mondo ikonya nikech in jaadiera kendo itimo maber. 2 Kik imi jatichni yud kum nimar onge kata ng’ato achiel ma timo maber e nyimi. 3 Jasigu lawa matek, oserodha piny nyaka e lo; ochuna ni nyaka adag kama otimo mudho mana ka joma notho chon gilala. 4 Omiyo chunya chandore e iya, ee, chunya obuok. 5 Aparo higni machon mosekalo; a keto pacha mos kuom tijeni duto kendo ageno gik ma lweti osetimo. 6 Ayaroni lwetena; chunya gombi mana kaka lowo motwo gombo koth. Sela 7 Dwoka piyo, Yaye Jehova, nimar chunya ool. Kik ipandna wang’i nono to dipoka achalo gi joma ridore e bur matut. 8 Mi mondo okinyi oromna gi herani maok rem, nimar aketo genona kuomi. Nyisa yo monego alu nimar aketo chunya duto kuomi. 9 Resa e lwet wasika, Yaye Jehova, nimar in e jaritna. 10 Puonja timo dwaroni, nimar in e Nyasacha; mi mondo Roho mari maber, otelna e yo mopie. 11 Yaye Jehova, kony ngimana nikech nyingi iwuon; gola oko e chandruok nikech timni maber. 12 Mi wasika oling’ thi, nikech herani maok rem; tiek joma kedo koda duto nimar an jatichni.

Zaburi 144

Mar Daudi

1 Pakne Jehova ma en lwandana, pakeuru en motiego lwetena ne lweny, kendo en momiyo lith lwetena bedo mong’ith e kedo. 2 En Nyasacha ma jahera kendo en ohingana, bende en kar pondona kendo en jakonyna. En okumbana ma ageng’orago, kendo en ema oloyona joma nie bwoya. 3 Dhano to en ang’o, Yaye Jehova, momiyo iketo chunyi kuome, koso wuod dhano to en ang’o, momiyo isiko ipare? 4 Dhano chalo gi muya nono kendo ndalone chalo gi tipo makadho piyo. 5 Wuogi e polo, Yaye Jehova, wuogi mondo ilor piny; lor piny imul gode, mondo gidhuol iro. 6 Or mil polo, mondo ike wasigu; dir aserni magi, mondo itiekgi. 7 Rie lweti koa e polo nyaka piny, mondo ikonya, kendo igola, e pige ma tekregi ng’eny, kendo e lwet jo pinje mamoko, 8 ma dhogi opong’ gi miriambo kendo ma lwetgi mako rachwich opong’ gi wuondruok. 9 Abiro weroni wer manyien, Yaye Nyasaye; abiro weroni wer mamit ka agoyoni thum man-gi tonde apar, 10 abiro werne Jal mamiyo ruodhi locho, kendo ma konyo Daudi jatichne e dho ligangla mager. 11 Konya kendo gola e lwet jo pinje mamoko ma dhogi opong’ gi miriambo kendo ma lwetgi makorachwich opong’ gi wuondruok. 12 Eka yawuotwa biro chalo gi yiende mayudo pi maber, kendo nyiwa biro chalo gi sirni modol maber mondo olich dala ruoth. 13 Dechewa biro pong’ gi kit mwandu duto. Rombewa biro medore gana gi gana, ee, gibiro bedo gana mathoth e lek magwa, 14 kendo ruedhi magwa biro ywayo misike mapek. Jokuoge ok nodonj e kundewa, bende ok noterwa e twech kendo ‘yore yore’ ok nogo e gweng’wa. 15 Ogwedh joma gigi gin adier kuomgi; kendo ogwedh jogo ma Nyasachgi en Jehova.

Zaburi 145

Zaburi Mar Pak. Mar Daudi

1 Abiro ting’o nyingi malo, Yaye Nyasacha ma Ruoth; abiro pako nyingi nyaka chieng’ kendo nyaka chieng’. 2 Abiro paki pile ka pile kendo abiro ting’o nyingi malo nyaka chieng’ ma nyaka chieng’. 3 Jehova duong’ miwuoro kendo owinjore gi pak, onge ng’ama nyalo yango duong’ne. 4 Tieng’ achiel biro pako tijeni ne tieng’ machielo; ee, gibiro nyiso ji kuom tijeni madongo. 5 Gibiro wuoyo kuom duong’ni mang’ongo kendo marieny, to an abiro paro mos kuom tijeni miwuoro. 6 Gibiro nyiso kuom tekoni mitimogo gik malich miwuoro, to an abiro hulo kuom tijeni madongo. 7 Gibiro loso nyasi mar berni mogundho kendo gibiro wer gi mor kuom timbeni makare. 8 Jehova ng’won kendo kecho ji, iye ok wang’ piyo kendo en gi hera mang’eny. 9 Jehova timo maber ne ji duto; okecho ji duto mosechweyo. 10 Ji duto ma isechweyo biro paki, Yaye Jehova; jogi maler duto biro dhiali. 11 Gibiro nyiso ji kuom duong’ mar pinyruodhi kendo gibiro wuoyo kuom nyaloni, 12 mondo ji duto ong’e gik madongo mitimo kod duong’ mang’ongo mar pinyruodhi. 13 Pinyruodhi en pinyruoth mochwere, kendo lochni osiko nyaka tienge duto. Jehova chopo singruok mage duto kendo ohero ji duto mosechweyo. 14 Jehova chungo ji duto mopodho kendo omiyo joma piny otaro aa malo. 15 In ema wenge ji duto ng’iyi, kendo imiyogi chiembgi e kinde mowinjore. 16 Ka iyawo lweti to gik mangima duto yudo konyruokgi duto. 17 Jehova nikare e yorege duto kendo ohero ji duto mosechweyo. 18 Jehova ni machiegni gi ji duto maluongo nyinge, to mana joma luongo nyinge e adiera. 19 Ochopo dwaro mag joma oluore; adier, owinjo ywakgi kendo oresogi. 20 Jehova rito maber ji duto mohere, to ji duto ma timbegi richo obiro tieko. 21 Dhoga biro wacho pak ne Jehova. Gik mangima duto mondo opak nyinge maler nyaka chieng’ kendo nyaka chieng’.

Zaburi 146

1 Haleluya! Pak Jehova, Yaye chunya. 2 Abiro pako Jehova e ngimana duto; abiro wero wende pak ne Nyasacha kinde duto ma angima. 3 Kik iket genoni kuom ruodhi mag piny, kata kuom dhano matho maok nyal waro ng’ato, 4 nikech ka chunygi ochot to gidok e lowo; kendo chieng’ onogono chenrogi ogik gikanyono. 5 Ogwedh ng’at ma konyruokne en Nyasach Jakobo, ng’at ma genone nikuom Jehova Nyasache, 6 ma jachwech polo gi piny, gi nam kod gik moko duto manie igi- Jehova mosiko ka en ja adiera nyaka chieng’. 7 Ochwako ng’at misando kendo ochiwo chiemo ne joma odenyo. Jehova gonyo joma otue mi gibed thuolo, 8 kendo omiyo muofni neno. Jehova miyo joma piny otaro aa malo, kendo ohero joma kare. 9 Jehova rito jadak kendo okonyo nyathi kich gi chi liel, to yore mag ng’ama timbene richo to orocho. 10 Jehova olocho nyaka chieng’ Yaye Sayun, Nyasachi olocho nyaka tienge duto mabiro. Haleluya!

Zaburi 147

1 Haleluya! Mano kaka en gima ber wero wende pak ne Nyasachwa, mano kaka en gima long’o kendo mowinjore mondo ji opake! 2 Jehova gero Jerusalem kendo; ochoko jo Israel mane otue. 3 Ochango joma chunygi tuo kendo othiedho adhondegi. 4 Osekwano kendo ong’eyo kar romb sulwe duto kendo oluongo moro ka moro kuomgi gi nyinge. 5 Ruodhwa duong’ kendo en gi teko kendo nyalo; ng’eyone onge gikone. 6 Jehova ting’o joma obolore malo to joma timbegi richo to ochwado piny e lowo. 7 Weruru ne Jehova kugoyone erokamano, weruru wer mamit ne Nyasachwa kugoyo nyatiti. 8 Oumo kor polo gi boche polo, kendo oromo piny gi koth bende omiyo lum twi ewi thuche. 9 Ochiwo chiemo ne dhok kendo ne agege ka giywakne. 10 Morne ok nikuom teko farase kata kuom ogwand dhano; 11 to Jehova mor gi joma oluore; joma oketo genogi kuom herane ma ok rem. 12 Dhial Jehova, Yaye Jerusalem; pak Nyasachi, Yaye Sayun, 13 nimar omedo sirni manie dho rangeyeni teko, kendo ogwedho jogi modak e iyi. 14 Omiyo kuwe bedo e tong’ pinyu kendo oromou gi ngano mabeyo e mogik. 15 Ooro chike e piny, kendo wachne ringo matek ka diemo wang’. 16 Oyaro pe ka yie rombo kendo okeyo ong’weng’o ka buru. 17 Odiro pe mage e piny ka kit ombo. En ng’a manyalo ngino sama odiro pe kamano? 18 Ooro wachne kendo pego leny nono; ee, otugo yembene mi pego lokre pi mamol. 19 Osenyiso Jakobo wachne, ee, osenyiso Israel chikene gi buchene. 20 Onge oganda moro machielo mosetimone kamano kendo gin ok ging’eyo chikene. Haleluya!

Zaburi 148

1 Haleluya! Pakuru Jehova gie polo, ee, pakeuru malo kuma bor. 2 Pakeuru, un malaikege duto, pakeuru, un ogandane mag lweny duto manie polo. 3 Wang’ chieng’ gi dwe bende mondo opake, kaachiel gi sulwe duto marieny. 4 Un polo man malo mogik, pakeuru, kaachiel gi un, pige manie bwo polo. 5 Onego gipak nying Jehova kargi duto nimar nogolo chik mine gibetie. 6 Ne ogurogi kuondegi nyaka chieng’ kendo nyaka chieng’ kaluwore gi chikne mochwere. 7 Pakuru Jehova gie piny, un chwech marodonge manie nam kod kude matut duto mag ataro, 8 kaachiel gi mil polo gi pe gi theluji gi boche, kod yembe maringo matek mawinjo wachne; 9 kod un gode gi thuche gi yiende manyago olembe gi yiende mag sida duto; 10 kod le mager gi jamni duto gi le matindo gi winy mahuyo, 11 kod ruodhi mag piny gi ogendini duto; kod un jotelo gi joloch duto mag piny, 12 kod un yawuowi matindo gi nyiri matindo, gi jodongo kod nyithindo. 13 Onego gipak nying Jehova gin duto, nimar nyinge kende ema nigi duong’; kendo duong’ne maler oyombo piny gi polo. 14 O sechungo tung ne joge- tung mosekelo pak ne joge maler duto, joge ma jo Israel, ma gin joma nimachiegni gi chunye. Haleluya!

Zaburi 149

1 Haleluya! Werneuru Jehova wer manyien, kendo dendeuru e chokruok mar joma ler. 2 Jo Israel mondo obed mamor gi jachwechgi; ee, jo Sayun mondo obed mamor gi Ruodhgi. 3 Onego gi pak nyinge gi miel kendo gi werne mamit ka gigoyo oyieke gi nyatiti. 4 Nimar chuny Jehova mor gi joge kendo osidho joma obolore gi warruok. 5 Jomaler mondo oil ka miye duong’ kendo giwer gimor ka gibet e otandagi. 6 Onego pak mar Nyasaye obed e dhogi kendo giting’ ligangla ma dhoge ariyo e lwetgi, 7 mondo gichulgo kuor ne ogendini, 8 kendo gitue ruodhigi gi nyoroche, kod jotendgi gi opingo mag chuma, 9 ka gichopo kum mane ondik kuomgi chon. Ma e duong’ mar joge maler duto. Haleluya!

Zaburi 150

1 Haleluya! Pakuru Nyasaye e kare maler; pakeuru ei polo mare mar nyalo. 2 Pakeuru nikech tijene mosetimo kuom tekone maduong’; kendo nikech duong’ne moyombo duto. 3 Pakeuru kugoyo turumbete, kendo kugoyo nyatiti gi asili, 4 pakeuru kugoyo oyieke kendo umiel, ee, pakeuru gi gita kod oporo, 5 pakeuru kudiemo ongeng’o gi nyawadgi, ee, pakeuru ka ongeng’o gore. 6 Gimoro amora ma yweyo mondo opak Jehova. Haleluya.





AMAZING GRACE BIBLE INSTITUTE