Filemon

Filemon 1

1 An Paulo ng'at rnotuc nikech Kristo Yesu kod Timotheo owadwa, ne in osiepwa ma wageno kendo jatich wadwa Filemon, 2 kaachiel gi nyamin-wa Ana gi Arkipo jalweny wadwa, kod Kanisa malemo e odi. 3 Ng'wono kod kuwe moa kuom Nyasaye Wuonwa kod Ruoth Yesu Kristo obed kodu.

Erokamano Kod Lamo

4 Agoyo ni Nyasacha erokamano pile ka aluongo nyingi e lemona, 5 nikech awinjo kuom yie ma in-go kuom Ruoth Yesu, kendo kuom hera miherogo jomaler duto. 6 Alemoni ni mondo iland yie ma in-go motegno, mondo eka ibed gi ng'eyo matut kuom gik mabeyo duto ma wan-go ei Kristo. 7 Hera ma in-go osemiya mor maduong' kendo osejiwa, nikech in, owadwa mahero, iseduogo chunje jomaler .

Paulo Kwayo Ne Onesimo

8 Kuom mano, kata obedo ni kuom Kristo ne anyalo bedo gi chir mar chiki mondo itim gima onego itim, 9 to koro asayi mondo itim kamano nikech hera. Koro an Paulo awuon, jaduong' moti, kendo motue nikech wach Kristo Yesu, 10 akwayi kuom wach wuoda Onesimo mane odoko wuoda ka an e twech. 11 Onesimo yandi chon onge ohala kuomi to sani koro okelo konyruok maduong' ne in kaachiel kod an bende. 12 Aduoge iri kendo, kata obedo ni chunya ogene ahinya. 13 Dahero bedo kode ka mondo okonya kari ka pod otueya gi nyororo nikech Wach Maber. 14 To ne ok adwar timo kode gimoro amora ka ok in ema iyie, mondo tim ng'wono moro amora mitimo kik bed gima ochun, to obed gima itimo nikech ihero. 15 Nyalo bet ni Onesimo nowuok iri kuom kinde machwok mondo eka iyud thuolo mar kawe chuth bang'e, 16 ok kaka misumba to kaka owadu migeno ma en ng'at moloyo misumba. En ohala ne an, to ang'eyo ni en ohala moloyo ne in bende, ok mana kaka ng'ato ang'ata, to kaka owadu kuom Ruoth. 17 Omiyo ka inyalo kwana kaka ng'ama ni kodi e achiel to rwake mana kaka dirwaka. 18 Kapo ni osetimoni marach, kata ka en-gi gopi moro to kwan-gi e wiya. 19 Andikoni baruani gi lweta awuon an Paulo, ka anyisi ni abiro chuli, kata ka ok aparoni in kod gopa ma en ngimani owuon. 20 Gima agombo maduong', owadwa, en ni mondo iyie itimna ng'wono kuom Ruoth, kiduogo chunya kuom Kristo. 21 Nikech ang'eyo maber ni iwinjo wach, andikoni ka an gadiera ni ibiro timona maber moloyo kaka akwayi. 22 Kwayo machielo ma an-go en ni mondo ilosna kar nindo, nikech an-gi geno ni ibiro gonya mana kaka usebedo kulamo. 23 Epafras motue koda kaachiel nikech wach Kristo Yesu ooronu mos. 24 Mariko bende omosou kaachiel gi Aristako gi Demas kod Luka, ma gin jotich wetena. 25 Ng'wono mar Ruoth Yesu Kristo mondo obed kod chunyi.