Mariko

Mariko 1

Johana Jabatiso Oiko Yor Yesu

1 Ma e chakruok mar Wach Maber Mar Yesu Kristo Wuod Nyasaye. 2 En mana kaka ondiki e kitap Janabi Isaya niya, "Abiro oro jaotena notel nyimi mondo olosni yo." 3 "Duond ng'at moro kok e thim ni, 'Ikuru ne Ruoth yore, losneuru yo moriere tir." 4 Kamano e kaka Johana ne owuok e thim kopuonjo ji ni nyaka gilok chunygi eka obatisgi kaka ranyisi ni Nyasaye ose weyo nigi richogi. 5 Kuom mano jo piny Judea duto kod ji duto moa Jerusalem nowuok odhi ire. Ne gihulo richogi mi Johana nobatisogi e aora Jordan. 6 Johana norwakore gi lewni molos gi yie ngamia kendo notweyo kamba mar pien e nungone. Nochamo bonyo kod mor kich manie thim. 7 Wach mane Johana yalo ne chai kama: "Ng'at moro biro bang'a moloya gi duong'. Oduong' maok awinjora gonyo kata mana tond wuochene. 8 An abatisou gi pi, to en obiro tisou gi Roho Maler."

Yesu Otisi Kendo Otem

9 E kindeno Yesu nobiro koa Nazareth, e piny Galilie mi Johana nobatise e aora Jordan. 10 Ka noyudo Yesu wuok aa e pi, noneno polo kayawore kendo ka Roho Maler lor mondo opi kuome e kido mar akuru. nTo dwol maduong' noa e polo kawacho niya, "In e Wuoda mahero. Chunya mor kodi." 12 Gikanyono Roho Maler nokaso Yesu motere e thim, 13 kendo nodak e thim kuno ndalo piero ang'wen, ka Satan teme. E thim kuno Yesu nodak e kind le mag thim, to malaike ne tiyone.

Luong Mar Jopuonjre Mokwongo

14 Ka nosetwe Johana e od twech, Yesu nodhiyo Galili, koyalo Wach Maber mar Nyasaye. 15 Noyalo niya, "Saa osechopo kendo Pinyruodh Nyasaye osekayo machiegni. Lokreuru kendo yieuru Wach Maber." 16 Ka noyudo Yesu wuotho e bath Nam Galili, noneno Simon gi owadgi ma Andrea ka jobolo gokgi e nam, nikech ne gin jolupo. 17 Yesu nowachonigi ni, "Biuru mondo uluwa, mondo kar ywayo rech to aketu ubed joywa ji." 18 Ne giweyo gokegi sanosano mi giluwe. 19 Yesu nomedo chwalore nyime matin mi noneno Jakobo wuod Zebedi gi omin mare ma Johana ka jobet e yie kendo loso gokegi. 20 Maok odeko Yesu nolwongogi, kendo ne giweyo wuon-gi ma Zebedi e yie, kaachiel gi jotich mondiki mane konyogi, mi giluwoe.

Yesu Oriembo Jachien Marach

21 Ne gidhi Kapernaum, to kane Sabato ochopo, Yesu nodonjo e od lemo mi ochako puonjo. 22 Ji nowuoro puonjne, nikech nopuonjo ka ng'at man gi teko, to ok ka Jopuonj Chik. 23 To kanyono ei od lemo ne nitie ng'at moro mane nigi jachien marach. Ng'atni noywak matek kawacho ni, 24 "Idwaro ang'o irwa ka, Yesu ja Nazareth? Ibiro mondo itiekwa koso? Ang'eyo ng'ama in, in Ng'ama Ler mar Nyasaye!" 25 To Yesu nokwere gi duol matek ni, "Ling' thi! Aa kuome!" 26 Jachien marach-no noyuko ng'atno mi ogoyo koko gi dwol maliyore, bang'e oa oweye. 27 Jogo duto nowuoro ahinya, magipenjore ni, "Ma to ang'oni? Puonj manyien kendo man-gi teko! Ng'atni chiko koda ka jochiende kendo giwinje" 28 Humb Yesu nolandore piyopiyo e gwenge molworo Galili.

Yesu Ochando Ji Mathoth

29 Mapiyo piyo bang' ka gia e od lemo ne gidhi kaachiel gi Jakobo kod Johana e dalagi Simon gi Andrea. 30 To maar Petro nonindo e kitanda, ka midhusi onure. Jomane nikanyo nonyiso Yesu wachno piyopiyo. 31 Omiyo Yesu nodhi ire, momako lwete kokonye mondo oa malo. Midhusi noweyo dhakono mi otiyonigi. 32 Odhiambono, ka piny noseyuso, ji nokelo ni Yesu jotuo duto kaachiel gi joma nigi jochiende. 33 Jodalano duto nochokore e dhoot kama ne Yesu nitie, 34 to Yesu nochango ji mathoth mane nigi kit tuoche mayoreyore. Bende noriembo jochiende oa kuom ji, to ne ok oyiene jochiendego mondo owuo nikech ne ging'eyo ni En ng'a.

Yesu Olemo Kar Kende

35 Kinyne kogwen ka piny pod olil, Yesu noa malo moweyo ot kama noninde. Nowuok modhi kama ochwalore mopondo, mi nolemo kuno. 36 Simon gi joge ne jodhi manye, 37 Kendo kane giyude to ne giwachone ni, "Ji duto manyi." 38 To Yesu nodwokogi kawacho ni, "Wadhiuru kamachielo e gwenge man machiegni, mondo kuno bende ayalie." Mano emomiyo asebiro. 39 Omiyo nowuotho e Galili duto, koyalo e utegi mag lemo kendo koriembo jochiende kuom ji.

Ng'at Man-gi Dhoho

40 Jadhoho moro nobiro mogoyo chonge piny e nyim Yesu kosaye ni, "Kiyie to inyalo puodha." 41 Yesu nokecho ng'atno morieyo bade omule, kowacho ni, "Ayie, puodhri!" 42 Gikanyono dhoho norumo kuom ng'atno mochango 43 Yesu nogonyo ng'atno piyopiyo mondo odhi kochike matek ni, 44 "Ne ni ok inyiso ng'ato wachni. To dhiyo mondo ikuong inyisri e nyim jadolo kendo ichiw misengini mane Musa ochiko joma opuodhi mondo otim, eka ji ong'e ni koro iler." 45 Kar timo kamano to ng'atni nochako lando wachno e saa nogo mane oa ir Yesu. Kuom mano Yesu koro ne ok nyal donjo ayanga e dala moro amora, to nodak mana oko kuonde ma ji ongee. To kata kamano ji ne pod biro ire koa kuonde duto.

Mariko 2

Yesu Ochango Ja Athauy

1 Bang' ndalo manok Yesu nochako oduogo e dala mar Kapernaum, kendo ji nowinjo ni osebiro dala. 2 Kuom mano ji mang'eny nochokore mopong'o ot mane entie thich maonge kama odong', koda ka dhoot oko, to Yesu nopuonjogi Wach. 3 Jomoko nobiro mi gikelone ja athany ka ji ang'wen oting'e. 4 To kane jogo oyudo ka chopo ir Yesu tek nikech oganda makwar mane nikode, ne gitucho wi tat ot mochomore gi kama Yesu ne nitie tir mi giloro ja athanyno konindo e par nyaka nochopo e nyim Yesu, %a Yesu noneno yie ma jogo ne nigo, nowacho ni ja athanyno niya, "Wuoda, richoni oweni." 6 To jopuonj Chik moko ma noyudo obet ei ot kanyo nochako penjore e chunygi ni, 7 "Ng'atni wuoyo nadi? Oyanyo Nyasaye! Ere kaka onyalo nyiso jali ni richone owene to wang'eyo ni Nyasaye kende ema weyo niji richogi? 8 Sano sano Yesu nong'eyo e chunye gima jopuonj Chik neparo e chunygi, omiyo nowachonigi niya, "Ang'o momiyo uparo gik muparogo? 9 Mane mayot wacho ni ja athany kuom weche ariyogi: ni 'richoni oweni', koso ni, chung' malo ikaw pieni mondo iwuoth'? 10 To atimo ma mondo ung'e ni Wuod Dhano nigi teko e pinyni mar weyo richo" Bang' loso kamano Yesu nowacho ni ja athanyno niya, n"Winji omera, aa malo iting' pieni mondo idhi dala". 12 Ng'atno noa malo mokawo piene mi nowuotho ang'ienga ka ji duto nene. Timni nomako dho ji duto mane nikanyo mi ne gidendo Nyasaye ka giwacho ni, "Nyaka ne nywolwa pok waneno gima kama."

Luong Mar Lawi

13 Yesu nochako wuoth kendo koluwo tie Nam to oganda maduong' nobiro ire mi opuonjogi. 14 Ka noyudo owuotho e tie Nam, noneno Lawi wuod Alfayo kobet piny e od solo osuru. Yesu nowachone Lawi ni, "Luwa", mi Lawi noa malo mi oluwe. 15 Ka noyudo Yesu chiemo e od Lawi, Josol osuru kod "joricho" mang'eny ne jochiemo kode e mesa kaachiel gi jopuonjrene, nimar jogo mane luwo bang'e ne ng'eny 16 To ka jopuonj Chik ma jo Farisai nonene kochiemo gi "joricho" gi josol osuru, ne gipenjo jopuonjre Yesu niya, "Ang'o momiyo ochiemo gi josol osuru gi joricho'?" 17 Ka Yesu nowinjo wachno to nowachonigi ni, "Joma ngima ok dwar jathieth mak mana joma tuo. Ok ne abiro mondo aluong joma kare, to nobiro mondo alu-ong joricho."

Openj Yesu Wach Tweyo Chiemo

18 Nochopo kinde ma jopuonjre Johana kod jo Farisai jotweyo e chiemo. Jomoko nobiro mopenjo Yesu: "Ere kaka Jopuonjre mag Johana kod jopuojre mag jo Farisai jotweyo chiemo to jopuonjreni to chiemo achiema?" 19 To Yesu nodwokogi kapenjogi ni, "Be wend wuon kisera ditwe chiemo adier ka pod en kodgi"Chutho, ok ginyal tweyo kapod gin kode. 20 To ndalo biro ma wuon kisera nogol e kindgi, kendo ndalono ema ginitwe chiemo. 21 Ng'ato ok nyal twang'o karaka mar law manyien kuom law moti. Kotimo kamano to karaka mar law manyienno nyalo jowo law machonno mi omed yiech moloyo. 22 Bende ng'ato ok nyal olo divai manyien e piend divai machon. Kotimo kamano to divai nyalo baro piend divaino mi divaino kethre. Ooyo, divai manyien nyaka ol mana e piende divai manyien."

Ruodh Sabato

23 Chieng' Sabato moro Yesu noyudo kadho e kind puothe mag ngano mochiek, to jopuonjrene nochako jako wi ngano mondo gicham. 24 To jo Farisai nochako ng'ur ka giwacho ne Yesu ni, "Neye, ang'o momiyo jopuonjreni timo gima kwero chieng' Sabato?" 25 Yesu nodwokogi ni, "Donge useso-mo gima Daudi notimo chieng' ma en kaachiel gi joma ne nikode ne gidenyo kendo gichando? 26 E kinde mag Abiathar Jadolo Maduong', wang'eyo kaka Daudi nodonjo e od Nyasaye mi ochamo makati ma nosepuodhi moket tenge ma Chik ok oyiene ng'ato ang'ata mondo ocham , makmana jodolo. Daudi nochamo makatino mi opogone nyaka joma ne nikode mi gin bende ne gichamo." 27 Yesu nodhi nyime mowachonigi ni, "Sabato noketi nikech dhano, to dhano ne ok ochwe nikech Sabato. 28 Omiyo Wuod Dhano en Ruoth koda ka mar Sabato."

Mariko 3

1 Chieng' moro Yesu nochako odonjo e od lemo, to ne nitie ng'ato kanyo ma lwete notal. 2 Ji moko ne jokiyo Yesu kanyo ka gidwaro yo ma ginyalo don-jonego kaka jaketho. Kuom mano ne gichomo wang'gi kuome mondo gine ane ka mit dochang ng'atno chieng' Sabato. 3 Yesu nowachone ng'at ma lwete otalno niya, "Chungi ane e nyim ji duto ka." 4 Bang'e Yesu nopenjo jogo ni, "Ere gima chikwa oyie mondo otim chieng' Sabato? Timo maber koso timo marach, reso ngima koso nek)?" To jogo noling' thi. 5 Yesu nogawo jogo gi mirima kendo ka chunye lit ahinya nikech chunygi ne tek. Nowacho ni jal ma lwete otalno ni, "Rie lweti", mi ng'atno norieyo lwete kendo lwete nochango chuth. 6 Bang'eno jo Farisai nowuok oko mochako chano kaachiel gi jo Herode kaka diginege.

Oganda Maduong' Oluwo Yesu

7 Yesu kaachiel gi jopuonjrene nowuok oa kanyo mi gidhi e dho nam, to oganda maduong' moa Galili noluwo bang'e. 8 Ji mamoko mane osewinjo humbe kuom gik madongo mane otimo bende nobiro ire moa kuonde mopogore opogore kaka: Judea, Jerusalem, Idumea, kod gwenge molworo Turo gi Sidon. 9 To nikech oganda ne opoto but Yesu maok onyal yweyo, nonyiso jopuonjrene mondo oikne yie moro matin mondo okonyrego maok ji othung'e. 10 Dhano nodiyo Yesu kamano nikech nosechango ji mathoth kendo mani nomiyo joma tuo mamoko bende ne riyore nyime mondo gimul Yesu. nE saa asaya mane jochiende oneno Yesu, ne gipodho piny e nyime ka giywagore ni, "In e Wuod Nyasaye." 12 To Yesu nochikogi matek ni kik gihul gima En.

Walo Joote Apar Gariyo

13 Yesu noidho modhi malo e bath got kendo nogwelo jo mane odwaro mondo odhi kode, mi jogo nodhi kode. 14 Ne oyiero ji apar gariyo, mane oketo tenge kaka joote, mondo gibed kode eka mondo oorgi gidhi giyal Wach Maber 15 kendo gibed gi teko mar golo jochiende kuom ji. 16 Magi e joote apar gariyo mane oyier: Simon (mane omiyo nying machielo ni Petro); 17 Jakobo wuod Zebedi, kod owadgi miluongo ni Johana (owetegi Yesu neluongo ni Boanerges, tiende ni yawuot Mor Polo); 18 gi Andrea, Filipo, Batholomayo, Mathayo; gi Thoma, Jakobo wuod Alfayo, Thadayo, Simon ma ja-Zelote, 19 kod Judas ja Iskariot, jal ma nondhoge

Yesu Kod Belzebub

20 Bang'e Yesu nodonjo e ot moro to oganda maduong' nochokore kanyo kendo makata mana thuolo mar chiemo gi jopuonjrene ne ok onyal yudo. 21 To ka joodgi Yesu nowinjo wachni, ne gidhi ire mondo gigole kanyo githuon, ka giwacho niya, "Wiye obiro marach". 22 Jopuonj Chik mane obiro kanyo koa Jerusalem to nowacho kuom Yesu ni, "Opong' gi teko mar Belzebub! Ogolo jochiende gi teko mar ruodh jochiende." 23 To Yesu nolwongogi ire mowuoyo kodgi gi ngeche kowacho niya, "Ere kaka Satan digol Satan? 24 Ka pinyruoth moro opogore kendo joge gore kendgi to pinyruodhno ok nyal chung'. 25 Bende ka joot achiel opogore to odno nyaka podhi. 26 E kaka ka Satan diked gi pinyruodhe owuon, kata ka dopogre owuon to ok dochung', to mano ema dibed giko lochne. 27 Chutho onge ng'at manyalo monjo od ng'at moloye mi maye gige ka ok otweyo ng'atno mokwongo eka bang'e omaye gige. 28 Anyisou adier ni richo ma dhano osetimo gi ayany ma giseyanyogo Nyasaye nowenegi. 29 To ng'ato ang'ata mowuoyo marach kuom Roho Maler ok nowene richone, nikech oseketho ketho mochwere. 30 Nowacho kamano nikech jogi ne wuoyo kawacho ni, "En gi jachien marach."

Min Yesu Gi Owetene

31 Bang'eno min Yesu gi owetene nobiro ire. Ne gioro ng'ato mondo olu-ong nigi Yesu ka gin to gidong' gioko. 32 Oganda manobet kolworo Yesu nowachone niya, "Minu gi oweteni jo nioko ka gidwari." 33 To Yesu nopenjogi ni, "Minwa gi owetena to gin ng'a gini?" 34 Kosewacho kamano to nong'iyo joma ne obet kolwore kaeto owacho niya, "Eri, magi e minwa gi owetena! 35 Ng'ato ang'ata matimo dwaro Nyasaye e owadwa gi nyamera kod minwa."

Mariko 4

Ngech Jachuoyo

1 Kendo Yesu nochako puojo e dho nam. To oganda mane olwore ne duong' omiyo nodonjo ei yie mi obetie ka ji duto to ochung' oko e dho nam. 2 Yesu nopuonjogi gik mang'eny kokonyore gi ngeche. E puonjne nowacho niya, 3 "Winjauru! Japur moro nowuok modhi chwoyo kodhi, 4 to ka noyudo ochwoyo, kodhi moko nolwar e dir yo, mi winy nobiro mochamogi tee. 5 To kodhi moko nolwar kuonde motimo lwendni, ma lo operoree. Kodhigo notwi piyo piyo, nikech lowo ne ok tut. 6 To ka chieng' nowuok, chamgo nowang', kendo nikech ne gionge tiendegi, ne gitwo. 7 Kodhi moko nolwar e kind kudho, to ka kud-hogo nodongo, ne githung'o chamgo mi gimonogi nyak. 8 To moko nolwar e lowo maber, mi ne gitwi kendo gidongo. Ne ginyago cham, moko nyadi piero adek, moko nyadi piero auchiel, kendo moko nyadi mia achiel." 9 Bang'e Yesu nomedo wacho niya, "Ng'at man gi it mar winjo wach mondo owinji." 10 Ka odong' kende, jopuonjrene apar gariyo gi jomoko mane nibute nopenje tiend ngechego. 11 Nonyisogi ni, "Un oyienu ng'eyo tiend gik mopondo mag Pinyruodh Nyasaye. To kuom jogo man oko gimoro amora iwacho nigi gi ngeche 12 mondo, "'Ginen anena to kik ginyal ng'eyo, kendo giwinj awinja to kik ging'e tiend wach; nikech dipo ka gilokore mi owenigi richogi!'" 13 Yesu nomedo loso kodgi kowacho ni, "Ere kaka ok unyal winjo tiend ngeroni? Ka kamano to be ubiro winjo tiend ngero moro amora. 14 Japur chwoyo Wach. 15 Jomoko chalo gi kodhi mol war e dier yo, kama ichwoyoe Wach. E saa nogo ma jogi owinjoe Wach to Satan biro mi magi Wach ma giwinjono. 16 Jomoko to chai mana kaka kodhi mochwo e lowo moper-ore e wi lwanda. Gin giwinjo Wach kendo girwake gi ilo sanosano. 17 To nikech gionge tiendegi Wach ok bedi e igi aming'a. Ka chandruok kata sand obiro nigi nikech Wach Nyasaye to gipodho piyopiyo nono. 18 Moko kaka kodhi mol-war e kind kudho. 19 To achien parruok mag ngima pinyni gi wuond ma mwandu kelo kaachiel gi gombo ma gigombogo gik mathoth, kendo thung'o Wach mi obed maonge konyruok. 20 Moko to chai mana gi kodhi mochuo e lowo maber. giwinjo Wach mi girwaki. Kendo ginyak maber mana ka kodhi manyak nyadi piero adek, nyadi piero auchiel, nyaka nyadi mia achiel."

Taya Man Kama Oting'ore

21 kowacho nigi niya, "Be ng'ato kuomu nyalo moko taya kaeto oumo gi atonga kata oketo e bwo otanda? Donge ikete kama oting'ore mondo omeny ot duto? 22 Ng'euru ni onge gimoro mopan-di maok nong'ere achien, to bende onge gimoro amora mitimo ling'ling' maok nong'e ratiro. 23 Ka ng'ato nigi it mar winjo wach to mondo owinj i." 24 Yesu nodhi nyime kaluwonigi ni, "Chikuru itu maber mondo uwinj weche miwachonu, nikech rapim mupimoe ema nopimnue, kendo moloyo kanyo. 25 Nikech ng'at man-go ema nomedi; to ng'at maonge go to noma koda ka matin ma en-gono."

Ngech Kodhi Madongo

26 Nowacho bende ni, "Pinyruoth Nyasaye chai gi ng'at ma chuoyo kodhi e lowo. 27 Kata bed otieno kata odiechieng', ka ng'atno nindo kata oneno, to kodhigo twi atwiya mi dongi, ka jachuoyo ok ong'eyo kaka mano timore. 28 Lowo owuon ema golo kodhi; mokwongo tiendene wuok, eka wiye guio oko aye bang'e kodhi dongo mi chieg cham. 29 Ka cham osechiek to gikanyono wuon puodho kawo pand teyo mondo oke.

Ngech Koth Karadali

30 Nowacho kendo niya, "Yo mane ma dwaporgo Pinyruodh Polo kaka chai, kata en ngero mane manyalo nyisowa kite? 31 Ochal gi koth karadali ma en e kodhi matinie mogik mikomo e puodho. 32 To kata otin kamano to kosekome to odongo mi obed maduong' moloyo yiend puodho duto. Bedene yarore madongo mi winy mahuyo e kor polo bi pi mi ywe e tipone. 33 Yesu nomedo wuoyonigi gi ngeche machal gi mago e thuolo moro amora mane ginyalo winje. 34 Ne ok owachonigi wach moro amora maok okonyore gi ngero. To ka thuolo noyudore mi odong' gi jopuonjrene kendgi to nonyisogi tiend weche duto.

Yesu Okweyo Ahiti

35 Chieng'no godhiambo Yesu nowacho ni jopuonjrene ni, "Wadhiuru loka nam." 36 Omiyo ne giwuok giweyo oganda, mi gikawe mana kaka ne En-no, mi gichako kwang' kode ei yie. Ne nitie yiedhi mamoko bende mane kwang' kodgi e nam. 37 Eka ahiti maduong' nosieko mi apaka nochako tago yie koni gi koni mi pi ochako pong'e. 38 Sechego noyudo Yesu nindo e wi raten man kapier yie. Jopuonjre nochiewe ka kone ni, "Japuonj, donge litni ka watho?" 39 Yesu nochiew mokwero yamo. Nochiko apaka kowachone ni, "Kue! Ling' thi!" Gikanyono yamo nokue mi piny oling' thi. 40 Bang' mano Yesu nowachone jopuonjrene niya, "Ang'o momiyo uluor kamano? Pod uonge mana gi yie?" 41 Luoro nomakogi mi gipenjore kendgi niya, "Ma ang'o matimore ni? Koda ka yamo gi apaka bende winje?"

Mariko 5

Ng'at Ma Jachien Sando Ochangi

1 Ne ging'ado nam nyaka loka e gweng' miluongo ni Gerasi. 2 To Ka Yesu nowuok e yie nii to ng'at moro man gi jachien marach ma nodak e kar liete noromone. 3 Ng'atni nodak kama iikoe ji, kendo onge ng'at mane nyalo ronye mi tweye kata mana gi nyororo. 4 Nikech nosebedo ka itweyo lwetene gi tiendene to nyoroche mane itweyego nochodo achoda mi ong'iny matindo tindo chumbe mane iridogo tiendene. Koro ne onge ng'ato ma tekre ng'eny mane nyalo ronye. 5 Otieno gi odiechieng' duto ng'atni ne fwayore e kind liete kendo e gode man machiegni koywagore matek kendo kong'adore gi kite. 6 Kane oneno Yesu kabiro gi kuma bor, noringo odhi ire mogore piny e nyime. 7 Nogoyo koko gi dwol maduong' mogik ni, "lomo ang'o ira ka, Yesu Wuod Nyasaye Mamalo chutho? Kuong'ri ni Nyasaye ni ok ibi sanda!" 8 Noyudo Yesu wachone ni, "Aa kuom ng'atni, jachien marachni!" 9 Eka Yesu nopenje ni, "Nyingi ng'a?" To en nodwoke ni, "Nyinga Lejo, nikech wang'eny" 10 Eka nochako sayo Yesu mondo kik oriembgi gia e gweng'no 11 To noyudo kweth mag nguruwe moko kwayo e bath got mane ni machiegni. 12 Jochiendego nosayo Yesu kawacho ni, "Orwa ir nguruwe ka mondo wadhi wadonj e igi." 13 Yesu nomiyogi thuolo mi jochiendego nowuok modhi odonjo ei nguruwego. Kwethgo duto kar rombgi mane nyalo romo alufu ariyo, noringo matek kaluwo aridiridi mochomo nam mi giduto ne githo e pi. 14 Jokwadh nguruwego noringo oa modhi onyiso ji duto modak e taon gi gweng'no gima nosetimore, omiyo jogo duto nobiro mondo gin bende gineye gi wang'gi. 15 Kane gibiro ir Yesu, ne gineno ng'at ma yande jochiende mag Lejo san-dono kobet piny kanyo korwakore maber kendo pache nikare mi luoro nomakogi. 16 To jogo mane oneno kaka Yesu golo jachien kuom ng'atno nonyiso ji gik moko duto mane osetimore ni ng'atno kendo ni nguruwe. 17 Kuom mano jogo nosayo Yesu mondo oa e gweng'gi. 18 Ka noyudo Yesu donjo e yie, ng'at mane jachien sando mane oyudo osechangono nosaye mondo oyie odhi kode. 19 To Yesu notame kawachone ni, "Dog dala ir joodi mondo inyisgi gik madongo ma Ruoth osetimoni, kendo kaka osekechi gi kech maduong'". 20 Omiyo ng'atno noa modhi mi nochako lando e gwenge mag Dekapoli konyiso ji gik ma Yesu nosetimone. Ji duto nowuoro wechego.

Nyako Motho Kod Dhako Matuo

21 Kane Yesu oseng'ado nam gi yie mi odok loka machielo, oganda maduong' nolwore. 22 To kane pod en e tie nam, jatend od lemo moro manyinge Jairo nobiro kanyo. Kane oneno Yesu nogoyo chonge piny e nyime 23 kohombe ni, "Nyara matin tuo dwa tho, yie ibi mondo iket lweti kuome mondo ochangi odok mangima." 24 Omiyo Yesu nowuok modhi kode. Oganda maduong' ne luwo bang' Yesu kodiye koni gi koni. 25 To dhako moro ne ni ei oganda kanyo mane osebedo ka iye chwer kuom higini apar gariyo. 26 Dhakoni nosechandore miwuoro e lwet jothieth mathoth kendo nosetieko mwandu duto mane en-go to ne ok oyudo resruok. Kar chango to koreka tuone nomedore. 27 Kane owinjo humb Yesu, nobiro kang'eye ei oganda mi omulo riak nangane, 28 koparo e chunye ni, "Kata ka amulo mana lawe to abiro chango." 29 Oo mar rembe nochung' gikanyono mi nowinjo e dende ni chandruokne orumo. 30 Sanosano Yesu nong'eyo ni teko oa kuome. Nolokore mi ochomo oganda, kopenjogi ni, "En ng'a momulo lepa?" 31 To jopuonjrene nodwoke ni, "Ineno ka ji olwori oketi diere to pod ipenjo apenja ni, en ng'a momulo lepa?' 32 Yesu nomedo ng'icho ei oganda mondo one ng'at mane omule. 33 To kaka dhakono nong'eyo e chunye gima noseti-morene, nobiro mopodho e nyim Yesu kotetni gi luoro kendo nonyise adier man kuome duto. 34 Yesu nowachone ni, "Nyara yieni ema omiyo ichango. Dhi gi kuwe kendo chandruokni mondo orum chuth." 35 Ka noyudo Yesu pod wuoyo, jomoko nobiro moa e od Jairo ma jatend od lemo. Ne giwachone Jairo niya, "Nyari osetho, ang'o momiyo pod ichando Japuonj?" 36 Ka ok osedewo wach jogo, Yesu nowachone jatend lemono ni, "We luor, yie ayiea." 37 Yesu koro ne ok oyie mondo ng'at moro oluwe mak mana Petro gi Jakobo kod Johana owadgi Jakobo. 38 Kane gichopo e dala jatend od lemo, Yesu noyudo ka dala otimo koko; ka ji ywak kendo goyo nduru matek. 39 Nodonjo ei ot mopenjogi niya, "Koko gi nduru ni mana-di? Nyathi ok otho, onindo aninda." 40 To jogo nonyiere anyiera. Kane osegologi oko duto, nokawo wuon nyathi gi min-gi kaachiel gi jopuonjre mane nikode, mi odonjo kodgi nyaka iye kuma nyathi ne nitie. 41 Yesu nomako lwet nyathi manyakono mi owa-choni ni, "Talitha koum(tienae ni, "nyako matin, anyisi ni aa malo!") 42 Sano sano nyakono nochung' malo mochako wuotho e dier ot (ne en jahigini apar gariyo). Ji duto nohum nono kuom gima notimoreno. 43 To Yesu nosiemogi matek ni kik ginyis ng'ato wachni, bang'e nony-isogi ni mondo gimi nyano gimoro ocham.

Mariko 6

Janabi Maonge Luor

1 Yesu noa kanyo modhi dalagi kaachiel gi jopuonjrene. 2 To ka Sabato nochopo nochako puonjo ei od lemo. Ji mang'eny mane owinje nohum nono, ka gipenjore ni, "Ng'atni ogolo gigi kure, koso rieko manade mosemiyeni, momiyo otimo koda ka honni! 3 Donge en e japa bao ma wuod Maria kendo ma owetene gin Jakobo gi Jose kod Juda gi Simon? Nyiminene donge nikodwa ka?" Kamano ne gisin kode. 4 To Yesu nowachonigi niya, "Janabi imiyo duong' kuonde moko, makmana jogweng'gi gi wedene kod joode ema ochave." 5 Omiyo Yesu koro ne ok nyal timo honni kanyo, makmana ni noketo lwete kuom joma tuo manok mi ochang-ogi. 6 To nowuoro kaka jogo ne onge gi yie.

Yesu Ooro Ji Apar Gariyo

Bang' mano Yesu nomedo dhi nyime gi puonjo e gweng' ka gweng' 7 Kindeno noluongo ire Ji apar gariyo, mi oorogi ji ariyo ariyo, kendo omiyogi teko kuom jochiende maricho. 8 Nomiyogi chik machal kama: "Kik ukaw gimoro mar wuoth makmana ludh wuoth. Makati, kata ofuku kata pesa mikano e ofuku mar kamba kik uting'. 9 Pat pat ema urwaki, to kik uting' sati machielo miloko. 10 Ot moro amora mudonje to dagieuru nyaka udar e taon-no. 11 Kaponi udhi e dala moro to ok orwaku kata ka jadalono otamore winjo wachu, to mondo uteng' buch tiendeu kaeto ua kanyo. Mano nobednigi ranyisi ni bura oseloyogi." 12 Negi wuok magidhi yalo niji mondo olokre owe richo. 13 Bende ne gigolo jochiende mathoth kuom ji kendo ne giolo mo kuom joma tuo mathoth mi gichangogi.

Ong'ad Wi Johana Jabatiso

14 Ruoth Herode nowinjo wechegi, nikech nying Yesu koro noselandore mong'ere malach. Jomoko ne wacho kuom Yesu ni, "Johana Jabatiso osechier oa kuom joma otho, kendo mano emomiyo teko mar timo honni nie ngimane." 15 Jomamoko to ne wacho ni, "En Elija", to mamoko bende noramo ni, "En janabi machal gi jonabi machon gilala." 16 Ka ruoth Herode nowinjo wechegi, nowacho ni, "Johana mane anego osechier oa kuom joma otho!" 17 Herode ne chunye chandore nikech en owuon ema nogolo chik mondo omak Johana, kendo kuom chikneno askechege notweyo Johana moketo e jela. Notimo kamano nikech wach Herodia mane en chi owadgi ma nyinge Filipo. Herode nomayo owadgino dhako mi oloko chiege owuon. 18 To Johana nosebedo ka kwere ka wachone niya, "Chik ok oyieni mar mayo owadu chiege mondo ibedgo." 19 Kuom mano dhako ma Herodiano nomako sadha gi Johana, kendo nodwaro mondo onege. To kata kamno ne ok onyal, 20 nikech Herode ne oluoro Johana kendo ne ok odwar ni ng'ato ohinye, nikech nokawe kaka ng'ama kare kendo maler. Kinde ka kinde ka Herode nowinjo yalo Johana to dhoge ne moko; to pod nogombo mana mondo omed winjo yalone. 21 Achien thuolo nochopo mondo Herodia otim dwarone. Chieng' nywol Herode nochopo, kendo ne oloso chiemo moyiedhi ni jotend ogandane madongo gi jotend jolweny mage kod jok midewo duto moa Galili. 22 To kane budho dhi nyime, nyar Herodia nobiro momiel e nyim Herode mi miendeno nomoro ruoth gi wende. Ruoth nowachone nyakono niya, "Kwaya gimoro amora ma chunyi dwaro mondo amiyi." 23 Herode nosingore ni nyano e yor kuong'ruok ni, "Gimoro amora mikwaya anamiyi, kata obed mana nus pinyruodha." 24 Nyano nowuok odhi openjo min gima dokwa ruoth kowacho ni, "Akwa ang'o?" To min nodwoke ni, "Wi Johana Jabatiso." 25 Gikanyono nyano nodok ir ruoth koreto mi okwaye kowacho ni, "Adwaro ni mondo imiya wi Johana jabatiso sani sani e san." 26 Herode chunye nochandore ahinya ka nowinjo kwayono. To nikech noyudo osesingore e yor kuong'ruok, kendo nikech wende, ne ok odwar tuono nyano gima nosekwayo. 27 Kuom mano nooro janek piyopiyo kendo nomiyo janekno chik mondo odhi okelne wi Johana Jabatiso. Ng'atno nodhi mong'ado wi Johana e jela kama ne entie, 28 bang'e nokelo wich moseng'adi koketo e san. Ne omiyo nyako ma miende nolombo ji cha, mi nyakono nochiwe ni min mare. 29 Kane jopuonjre Johana owinjo wachni, ne gibiro mi gikawo ringre mi gipielo e bur mar yik.

Yesu Opidho Ji Alufu Abich

30 Joote noduogo onyiso Yesu gik moko duto mane gitimo kendo gipuonjo. 31 To nikech ji mathoth ne biro irgi kendo aa maok giwenigi thuolo kata mar chiemo, Yesu nowacho ni jopuonjrene niya, "Wawuoguru ka mondo wadhi kamoro mopondo ma ji ongee mondo wayue kuno. 32 Kuom mano ne ging'ado nam, gi yie, gin kendgi, mondo gidwar kar yweyo mokuwe. 33 Kata kamano ji mang'eny ma nonenogi ka giwuok nofwenyo sanosano ni en Yesu gi lange, omiyo ne giwuok e taonde mokiewo machiegni duto ka giringo e yor tielo ma gikuongo ni Yesu gi jopuonjrene loka kuma ne gidhiye. 34 Ka Yesu nolor oa ei yie, noneno oganda maduong' miwuoro, kendo nokechogi nikech ne gichal kaka rombe maonge gi jakwath. Omiyo nockako puonjogi gik mang'eny. 35 To ka saa koro ne oniang', jopuonjrene nobiro ire mowachone ni, "Saa koro osedeko ahinya to koreka wan kama bor gi mier. 36 Gony jogi mondo gidhi e gwenge kod mier molworowa mondo ging'iew gima digichan." 37 To Yesu nodwokogi kowacho ni, "Un uwegi migiuru gimoro gicham." Gin to ne gidwoke ka gipenje ni, "Ere kaka dwadhi mwang'iew makati ma nengone oromo misach ng'ato mar dweche aboro mondo wapidhgo oganda machal kama? 38 Eka Yesu nopenjogi ni, "Un gi makati adi?" Kane gisekwano kar romb makati mane gin-go ne ginyiso Yesu ni, "Abich, gi rech ariyo." 39 Eka Yesu nochiko jopuonjrene mondo ochan ji e sidienje matindo tindo, ka gibet e lum mang'ich. 40 Kuom mano ji nobedo piny e laini, ka sidienje moko oting'o ji mia achiel to moko oting'o ji piero abich. 41 Ka ji nosebet kamano, Yesu nokawo makati abichgi rech ariyogo mong'iyo malo, kogoyone Nyasaye erokamano. Nong'ingo makatigo mi omiyo jopuonjrene mondo opog ji. Rech ariyo ka bende nopogo matindo tindo niji duto. 42 Ji duto nochiemo moyieng' chuth, 43 endo bang' chiemo jopuonjre nochoko chiemo mopong'o atonge apar gariyo kuom makati gi rech mane ji ochamo odong'. 44 Kar romb chwo mane ochiemo ne gin ji alufu abich.

Yesu Owuotho E Wi Pi

45 Sanosano Yesu nochiko jopuonjrene mondo gitel nyime gi yie mondo ging'ad gidhi loka nam e dala mar Bethsaida, ka En to ne pod odong' chien ogonyo oganda bang' chiemo. 46 Bang' goyo ni oganda oriti, Yesu nodhi e bath got mondo olem. 47 To ka piny koro nochako yuso, yie koro ne nie chuny nam to Yesu to ne nikende oko e lowo motwo kuma ne odong'ie. 48 Yesu noneno kaka jopuonjrene ne chandore gi chiko yie, nikech yamo ne kedo kodgi. To kar saa apar kogwen Yesu nobiro irgi, kowuotho e wi pi. Kochopo irgi to nochalo kagima odwa kalo akala odhi, 49 to kane ginene kowuotho e wi pi kamano, ne giparo ni En jachien. Omiyo ne gibuok mi gikok matek, 50 nikech giduto ne ginene mi gidoko maluor. To Yesu noloso kodgi sanosano kowa-chonigi niya, "Chunyu kik aa En mana An! Kik uluor" 51 Eka nodonjo e yie mobet kodgi, kendo yamo noduono mochung! Jopuyonjrene nohum nono, 52 nikech tiend hond makati ne pok odon-jonigi. Pachgi ne pod odinore. 53 Ka koro ne giseng'ado loka machielo ne gichopo Genesaret, mi gigowo kanyo. 54 To saa nogono mane giwuok gilor e yie, ji nong'eyo ni Yesu osedonjo. 55 Ne giringo gidhi e mier machiegni man e alworano duto mi giting'o joma tuo konindo e pere. Jotuogi ne gikelone kamora amora mane giwinjo ni Entie. 56 Kamoro amora mane Yesu odhiye; e mier kata e taonde kata e gwenge, ji ne kelo joma tuo e chirni kendo ne gisaye mondo oyie jotuogo omul kata mana riak nangane. Ji duto mane otimo kamano nochango.

Mariko 7

Gik Maler Gi Gik Mochido.

1 Jo Farisai gi jopuonj Chik moko ma noa Jerusalem nochokore but Yesu 2 mi gineno ka jopuonjrene moko chiemo gi lwedo "mochido", tiende ni lwedo maok olwoki e yor puodhruok. 3 Jo Farisai gi jo Yahudi duto ok chiem kapok gilwoko lwetgi e yor puodhruok, kaluwore gi kit jodong-gi machon. 4 Ka gia e chiro to ok ginyal chamo gimoro kapok gilwokore. Girito timbegi moko machon mathoth: kaka lwoko okombe gi agulni, gi bakunde mag lowo gi birike. 5 Kuom mano jo Farisai gi jopuonj Chik nopenjo Yesu ni, "Ang'o momiyo jopunjreni ok lu timbe kwerewa machon, to kar timo kamano to gichiemo gi lwedo mochido"? 6 Nodwoko niya, Isaya nokoro kare kuomu, un Un joma wuondore, mana kaka ondiki ni, 'Jogi paka mana gi dhogi kende, to chunygi bor koda. 7 Gilama kayiem nono nikech gipuonjo chike ma dhano oloso mana kagima gin Chike Nyasaye.' 8 Useweyo Chike Nyasaye mi koro umako mana puonj ma kwereu machon noweyonu." 9 Nowachonigi ni, "Un-gi lony mathoth mar keto Chike Nyasaye tenge mondo urit puonju uwegi! 10 Nikech Musa nowacho ni, 'Luor wuoru gi meru; kendo ni, 'Ng'ato ang'ata mokuong'o wuon kata min nyaka negi'! 11 Un to uwacho ni ka ng'ato onyiso wuon kata min ni, 'kony moro amora ma dine amiyi koro en Koban (tiende ni, mich mowal ni Nyasaye) 12 to ng'at makamano koro ok uyiene mondo okony wuon kata min. 13 Kuom mano uketho teko Wach Nyasaye gi puonj u mane kwereu omiyou. Bende utimo gik mamoko mathoth maket gi mano. 14 Bang'eno Yesu nochako oluongo oganda ire kendo mowachonigi niya, 'Winjauru, un duto, mondo uwinj wachni. 15 Onge gimoro man oko mar dhano ma kodonjo e iye to nyalo miyo odoko "mochido". Adiera en ni gik mawuok ei dhano ema miyo odoko 'mochido'. 16 Ng'at man-gi it mar winjo wach mondo owinji." 17 Kane oseweyo oganda mi odonjo e ot, jopuonjrene nopenje tiend ngerono mane owuoyonegigo. 18 To nopenjogi ni, "Un bende kara pachu odinore? Donge uneno ni gima ni oko kodonjo ei dhano ok nyal mi odok "mochido"? 19 Nikech ok odonji e chunye, to odonjo mana e iye aye bang'e igole oko."(Ka Yesu nowacho ma, ne opuodho chiemo duto ni "ler"). 20 Nomedo wuoyo kowacho niya, "Gima wuok koa ei dhano ema miyo odoko jaketho. 21 Nikech koa ei dhano, kendo kowuok e chunye, ema richo kaka: paro maricho, chode, kuo, nek, terruok, 22 kod wuoro; kaachiel gi timbe maricho, wuond, anjawo, ketho nying, sunga kod fuwo wuokie. 23 Gik marichogi duto wuok e chuny dhano kendo ketho dhano.

Yie Mar Dhako Ma Ja Grik-Foinike

24 Yesu noa kanyo modhi e gweng' mar Turo. Nodonjo e ot moro kendo ne ok odwar mondo ng'ato ong'e ni en kanyo, kata kamano, bedone kanyo ne ok nyal tamo ji ng'eyo. 25 Dhako moro manyare matin ne nigi jachien marach ka nowinjo ni En kanyo nodhi ire sanosano mi ogoyo chonge piny e nyime. 26 Dhakoni ne en nyar jo Grik monywol Foinike e piny Siria. Nobiro ir Yesu mohombe mondo oriemb jachien oa kuom nyare. 27 Nokone ni, "We nyithindo ema okuong ocham kuon mayieng', nikech ok ber kawo kuon nyithindo mondo odir ni guogi." 28 Dhakono nodwoke kowacho ni, "Iwacho kare, Ruoth, to kata mana guogi man e bwo mesa be chamo nginjo ma nyithindo olwaro piny" 29 Eka Yesu nowachone niya, "Nikech dwokonino koro inyalo dhi. Jachien osewuok oweyo nyari." 30 Dhakono nodhi dala moyudo nyathi-neno konindo e kitanda kendo ka jachien osea

Ochang Ng'ama Ite Odino Kendo Mamomo

31 Yesu nowuok e gweng' mar Turo kaluwo Sidon, mi nolor nyaka nam Galili mondo eka ochopi e gweng' mar Dakapoli. 32 Kuno, jomoko nokelone ng'at moro mane ite odino kendo mane ok nyal wuoyo kata matin. Jogi nohombo Yesu mondo oket lwete kuom ng'atno. 33 Ka Yesu nosetero ng'atno tenge, kogole oko e kind oganda, nosoyo lith lwetene e ite. Eka nong'ulo olawo mi omulo lew ng'atno. 34 Nong'iyo malo e polo, kendo noomo chunye kowacho ni, "Efatha", tiende ni, "Yawri." 35 Kar dhogeno it ng'atno noyawore kendo lewe nogonyore mochako wuoyo maler. 36 Yesu nochiko joma nenikanyo ni kik ginyis ng'ato wachni. To kaka nomedo kwerogino e kaka gin bende ne gimedo lando wachno. 37 Ji duto mane owinjo wachno nodhier nono ka giwacho ni, "Osetimo gik moko duto maber, koda ka joma itgi odino omiyo winjo wach, kendo momni bende omiyo wuoyo."

Mariko 8

Yesu Opidho Ji Alufu Ang'wen

1 E kindego oganda maduong' machielo nochokore. To nikech ne gionge gi gima digicham, Yesu noluongo jopuonjrene ire mowachonigi niya, 2 "Akecho jogi nikech koro gisebedo koda kaa kuom ndalo adek to gionge gima ginyalo chamo. 3 Ka agonyogi gidhi thuchegi ka gidenyo kama to ginyalo podho e yo, nikech moko kuomgi oa mabor." 4 Jopuonjrene nodwoke ni, "Ere kaka ng'ato diyud makati moromo jogi e dier thim machal kama?" 5 Yesu nopenjogi ni, "Un-gi makati adi?" Ne gidwoke ni, 'Abiriyo." 6 Eka nochiko oganda mondo obed piny e lum. Bang' mano nokawo makati abiriyogo, to ka nosegoyo erokamano, nongingogi kaaye to omiyogi jopuonjrene mondo opog ji, mine gitimo kamano. 7 To ne gin gi rech moko manok bende. Rechgi bende Yesu nogwedho momiyo jopuonjrene mondo opog niji. 8 Ji nochiemo moyieng'. Bang' chiemo jopuonjre nochoko ng'injo mag chiemo mane ji ochamo oweyo moromo atonge abiriyo. 9 Kar romb joma chwo mane nikanyo ne dirom alufu ang'wen. To ka nosegonyo gi, 10 nodonjo e yie, kaachiel gi jopuonjrene, mi gidhi e gweng' mar Dalmanutha. 11 Jo Farisai nobiro mochako mino wach gi Yesu. Ne gikone mondo omigi ranyisi moa e polo, ka giteme. 12 Yesu noomo chunye aming'a kaeto owacho niya, "Tieng'ni dwaro kuoma honni gi ranyisi nang'o? Anyisou adier ni onge ranyisi moro amora mibiro migi." 13 Yesu noweyogi mi odok odonjo e yie mong'ado nam odok loka machielo.

Thop Jo Farisai Gi Mar Herode

14 Jopuonjrene wigi nowil kendo mi ok giting'o makati, makmana makati achiel kende emane gin-go e yie. 15 Yesu nosiemogi kawachonigi ni, "Neuru, ritreuru maber kuom thop jo Farisai gi mar Herode. 16 Jopuonjre nowuoyo e wachni e kindgi gi-wegi migi wacho ni, "Owuoyo kamano nikech waonge gi makati." 17 To kaka Yesu nonge'yo gima giwacho, nopenjogi ni, "Ang'o momiyo uwuoyo kuom makati ma uongego? Pod ok unyal neno kata winjo tiend wach? Mitki chunyu odinore? 18 Marang'o un-gi wengeu to ok unyal neno, kendo un-gi it to ok unyal winjo? Ok unyal kata paro gik masetimo? 19 Kane ang'ingo makati abich mondo ji alufu abich ocham, ne uchoko ng'injo mopong'o atonge adi?" Ne gidwoke ni, "Apar gariyo." 20 "To kane ang'ingo makati abiriyo ni ji alufu ang'wen, nuchoko atonge adi mag ng'injo?" Ne gidwoke ni, 'Abiriyo". 21 Eka Yesu nowachonigi ni, "Tiend wach pod otamou winjo?"

Chang Mar Muofu E Bethsaida

22 Ne gichopo Bethsaida, kendo jomoko nokelo ni Yesu muofu moro mi gihombe mondo omule. 23 Yesu nomako lwet ng'atno mi otere oko mar dalano. Ka nosen-g'ulo olawo e wang' muofuno noketo lwete kuome, eka openje, "Be ineno gimoro?" 24 Ng'atno noting'o wiye, mongi'cho kaeto owachoni Yesu ni, "Aneno ji, gichalo gi yiende mawuotho koni gi koni." 25 Yesu nochako oketo lwetene e wenge ng'atno kendo, mi wengene noyawore mi koro nonyalo neno gik moko duto maler. 26 Bang' mano Yesu nochike mondo odhi pacho maok ochako orawo e dala mar Bethsaida.

Petro Ohulo Ni Yesu E Kristo

27 Bang'e Yesu gi jopuonjrene ne jowuok modhi e gwenge mag Kaisari Filipi. To kane gin e yo gidhi, nopenjogi ni, "Uwinjo ji wacho ni An ng'a?" 28 Ne gidwoke ni, "Jomoko wacho ni in Johana Jabatiso, to jomoko wacho ni in Elija, to jomoko bende okawi ni in achiel kuom jonabi machon." 29 Yesu nomedo penjogi ni, "Un to? Uwacho ni An ng'a? Petro nodwoke ni, "In e Kristo". 30 Bang' mano Yesu nokwerogi ni kik ginyis ng'ato kuome.

Yeus Okoro Tho Mare

31 Koa kanyo Yesu nochako puonjo gi kaka Wuod Dhano nyaka ne yud sand e yore mang'eny kendo kaka ne ibiro kwede gi jodongo gi jodolo madongo kod jopuonj Chik. Nonyisogi bende ni ne nyaka bi nege to chieng' mar adek ne obiro chier. 32 Wechegi nowacho ayanga, mi Petro nokawe otere tenge mi okwere ni owe wuoyo kamano. 33 To Yesu nolokore mong'iyo jopuonjrene, bang'e to okwero Petro kowacho ni, "Ayi e nyima Satan! Pachi opong' mana gi dwaro dhano, to ok gi dwach Nyasaye" 34 Bang'e Yesu noluongo oganda ire, kaachiel gi jopuonjrene mi owachonigi ni, "Ka ng'ato dwaro luwo bang'a to nyaka okwedre kende owuon mi okaw msalape oting' eka oluwa. 35 Nikech ng'ato ang'ata madwaro reso ngimane, nowit, to ng'ato ang'ata mowito ngimane nikech An to kendo nikech Injili nores ngimane. 36 Ere ber ma ng'ato to yudo ka piny ngima obedo mare to ngimane to oiame? 37 Koso en ang'o ma ng'ato dichiw mondo owil gi ngimane? 38 Ka ng'ato wiye kuot koda kod wechena e kind tieng' kendo matimo richo to wi Wuod Dhano bende nokuod kode chieng' ma enoduogie gi duong' mar Wuoro, kaachiel gi Malaike maler."

Mariko 9

1 Bang' mano Yesu nowachonigi ni, "Awachonu adier ni jomoko manok mochung' buta ka ok nobil tho kapok gineno pinyruodh Nyasaye ka biro gi teko."

Kit Yesu Olokore

2 Bang' ndalo auchiel, Yesu nokawo Petro, gi Jakobo kod Johana motelonigi gidhi e wi got moro marabora, kama ne ginie kendgi maonge ng'ato. Kane gin kuno, kite nolokore ka gineno, 3 mi lepe nodoko marachar marieny macharo wang', nodoko rachar therrr maonge ng'ato ang'ata e piny mangima mane nyalo luoko law mi rieny maler kamano. 4 Kanyono, e nyimgi giduto, Elija gi Musa ne jothinyore, kendo ne giwuoyo gi Yesu. 5 Petro nowacho ni Yesu niya, "Japuonj, bedowa kaeni en gima ber. We mondo wager kiche adek: achiel mari, achiel mar Musa, to machielo mar Elija." 6 (Ne okiya gima dowachi nikech luoro nogoyogi nyang'eng'.) 7 Bang' mano bor polo nosieko moumogi, kendo dwol moro nowuoyo e bor polono kawacho ni, "Jali En Wuoda mahero. Winjeuru!" 8 Apoya nono kane pod ging'icho, ne ok gichako gineno ng'ato ka nikod gi makmana Yesu kende. 9 Ka noyudo gilor gia e got, Yesu nochikogi matek ni kik ginyis ng'ato ang'ata gima negi seneno nyaka chop kinde ma Wuod Dhano nosechier aa kuom joma otho. 10 Jopuonjre nokano wachni e chunygi, ka gipenjore e chunygi tiend chier aa kuom joma otho'. 11 Bang'e ne gipenje ni, "Ang'o momiyo jopuonj Chik wacho ni Elija nyaka bi mokwongo?" 12 Yesu nodwokogi ni, "Kuom adiera, Elija nyaka kwong bi mondo oios gik moko duto odok kare. Koro to ere gimomiyo ondiki ni Wuod Dhano nyaka yud sand mathoth mi ji kwede? 13 To awachonu ni Elija koro osebiro, kendo giseti-mone gik moko duto mane gigombo mana kaka ondiki kuome."

Chang Mar Wuowi Man-gi Jachien Marach

14 Kane giduogo ir jopuonjre mamoko, ne gineno oganda maduong' kolworogi kendo ka jopunj Chik mino kodgi wach, 15 To sano sano ka ji duto noneno Yesu negi yil kendo mi giringo ire mondo gimose. 16 Yesu nopenjogi ni, "Ang'o ma umi-noe wach lodgi?" 17 Ng'at achiel noting'o duonde ei oganda modwoke ni, "Japuonj, ne akeloni wuoda ma jachien marach opongo kendo oloko momo. 18 E saa ma jachiendno donjo kuome to goye piny, buoyo wuok e dhoge, kendo omuodo lake mi dende tal. Nende akwayo jopuonj reni mondo oriemb jachiendni oa kuom wuoda to ne otamogi." 19 Yesu nodwoko kawacho ni, "Yaye, tieng' maonge gi yie ni, anabed kodu nyaka karang'o? Kelnauru rawerano ka." 20 Ne gikele to ka jachiendno noneno Yesu, nomiyo rawerano opodho ka ja ndulme mi ngong'ielore e lowo aming'a ka dhoge wuok buoyo. 21 Yesu nopenjo wuon rawerano ni, "Osebedo kochal kama kinde maromo nade?" To en nodwoke ni, "Osebedo kamano nyaka oa e tinne. 22 Kendo kinde moko jachiendno osebedo ka chumbe ei mach kata e pi, mondo onege. Omiyo kinyalo timo gimoro to yie ikechwa kendo ikony-wa. 23 Yesu nowachone ni, "Kuom yie" "Gik moko duto nyalo timore ni ng'at moyie." 24 Gikanyono wuon wuowino noywag-ore kawacho ni, "An gi yie, to konya mondo alo rem mar yiena." 25 Ka Yesu noneno ka ji moko ringo biro kama gintie, nokwero jachien marachno kowacho ni, "In jachien ma ite odino kendo ma momoni, achiki ni aa kuome kendo kik ichak idonj kuome kendo." 26 Jachiendno nokok gi dwol ma liyore mi nogoye piny kogwecho matek, bang'e noa kuome. Noweyo wuowino mana kagima otho, mi ji mang'eny owacho ni, "Otho." 27 To Yesu nomako bad wuowino mokonye aa malo mochung'. 28 Ka Yesu nosedonjo e ot, jopuonjrene nopenje kar kende ni, "Ang'o momiyo wan ne ok wanyal golo jachiendno?" 29 Nodwoko ni, "Jachien machal kama inyalo golo mana kuom lamo kod tweyo chiemo." 30 Ne gia kanyo mi gikadho e dier Galili, to Yesu ne ok dwar mondo ng'ato ong'e kuma ne gintie, 31 nikech nopuonjo jopuonjrene. Nowachonigi niya, "Wuod Dhano idhi ndhogi mi keti e lwet ji. Gibiro nege, to bang' ndalo adek obiro chier." 32 To jopuonjrene ne ok owinjo tiend gimane onyisogi, to bende ne giluor mar penje mondo ging'e tiende.

En Ng'ano Maduong' Moloyo

33 Ne gichopo Kapernaum, kendo ka koro ne En e ot, nopenjogi ni, "Wach ang'o mane ugoyoe mbaka e yo?" 34 To jopuonjrene noling' ok odwoke nikech e yo ne oyudo gipingore kuom ng'ama duong' moloyo e diergi. 35 Ka koro Yesu ne obedo piny nolwon-go jopuonjrene apar gariyo ire mowachonigi ni, "Ka ng'ato dwaro ni mondo otel to nyaka odwokre chien mogik, mi obed jatij ji duto." 36 Kosewacho kamano to nokawo nyathi matin mokete ochung' e nyim ji duto. Nomako lwet nyathino, kowachone-gi kama, 37 "Ng'ato ang'ata morwako achiel kuom nyithindo matindogi e nyinga, orwaka An awuon, to bende ng'ato ang'ata moruaka ok An ema orwaka, to orwako Jal mane oora."

Ng'at Maok Ked Kodwa En Jakorwa

38 Johana nowachone ni, "Japuonj, ne waneno ng'ato ka golo jochiende e nyin-gi, to ne watame mondo owe timo kamano nikech ne ok en achiel kuomwa." 39 To Yesu nowacho ni, "Kik itame nikech onge ng'at manyalo timo hono e nyinga manyalo loko pache bang' thuolo manok mi owach gimoro marach kuoma, 40 nikech ng'ato anga'ta maok ked kodwa en jakorwa. 41 Awachonu adier ni ng'ato ang'ata mamiyou pi e okombe e nyinga, nikech un jo Kristo ok michne nolalne kata matin.

Rwako Nyawadu E Richo

42 "To bende ka nga'to omiyo joma tindo moyie kuomagi odonjo e richo, to dibed maber ka nga't motimo tim ma kamano oluti e nam kotuene pong' marang'ongo e ng'ute. 43 Ka lweti miyo idonjo e richo to ng'ade oko. Ber moloyo kidonjo e ngima ka ionge lweti moloyo kidhi gi lwetegi ariyo e Gehena 44 Kuno kudni machamo ji kod mach ok thoe. 45 To kapo en tiendi ema teri e richo to ng'ade oko. Ber moloyo kidon-jo e ngima kirang'ol kar donjo e Gehena gi tiende ariyo. 46 Kama kudni machomo ji kod mach ok thoe. 47 To ka en wang'i ema teri e richo to lodhe oko. Ber moloyo kidonjo e pinyruodh Nyasaye gi wang' achiel kar diri e Gehena, 48 kama, "kutegi ok thoe to mach bende, ok negie'" 49 Ng'ato ka ng'ato ibiro puodho gi mach. 50 Chumbi ber, to ka ndhathe orumo to ere kaka dichak imi obed gi ndhathe kendo? Beduru gi ndhath chumbi e kindu uwegi, kendo beduru gi kuwe ng'ato gi ng'ato."

Mariko 10

Ketho Keny

1 Yesu noa kanyo modhi e gweng' mar Judea man loka Jordan. Ji mathoth nochako obiro ire, kendo nop-uonjogi kaka nojatimo kinde duto. 2 Jo Farisai nobiro moteme kapenje ni, "Be Chik oyie mondo dichwo oriemb chiege?" 3 Nodwokogi ni, "Ang'o mane Musa ochikou mondo utim?" 4 Ne giwacho ni, "Musa noyie mondo dichwo ondik barup werruok ni chiege bang'e oriembe." 5 Yesu nodwokogi ni, "Chunyu matek ema omiyo Musa nondikonu Chikni. 6 To chakre chwech piny, Nyasaye nochweyogi dichwo gi dhako. 7 'Emomiyo dichwo nodar owe wuon gi min mi opadore gi chiege, 8 kendo ji ariyogo nodok ringruok achiel'. Omiyo koro ok gin ji ariyo, to gin ringruok achiel. 9 Kuom mano, kik ng'ato pogi joma Nyasaye oseriwo." 10 Kane koro gin e ot kendo, jopuonjre Yesu nopenje kuom wachni. 11 To En nodwokogi ni, "Ng'ato ang'ata mowere gi chiege mokendo dhako machielo odonjo e terruok nikech chiege moriembono. 12 To kata dhako ema owere gi chwore mokendore gi dichwo machielo to otimo richo mar terruok."

Nyithindo Matindo Kod Yesu

13 Ji ne kelo nyithindo matindo ir Yesu mondo omulgi, to jopuonjrene nokwero-gi. 14 Ka Yesu noneno gima jopuonjre timo, nokecho kodgi, mi owachonigi ni, "Weuru nyithindo matindo obi ira, kik utamgi, nikech Pinyruodh Nyasaye en mar ji machal kaka gichalni. 15 Awachonu adier ni ng'ama ok orwako Pinyruodh Nyasaye kaka nyathi matin ok nodonji ngang'. 16 Nokawo nyithindogo moting'o e bade, eka noketo lwete kuomgi, mi ogwedhogi.

Rawera Ma Jamoko

17 Ka Yesu nochako wuoth dhi, ng'at moro noringo obiro ire mogoyo chonge piny e nyime. Ng'atni noloso kode kapenje ni, "Ng'at maber, en ang'o monego atim mondo eka ayud ngima manyaka chieng' kaka girkeni mara?" 18 Yesu nodwoke kapenje ni, 'Ang'o momiyo iluonga ni japuonj maber? Onge ng'ama ber makmana Nyasaye kende. 19 Ing'eyo Chike, kaka mawacho ni, 'kik ineki, kik iterri, kik ikwal, kik ichiw neno mar miriambo, kik imechi, luor wuoru gi meru." 20 Notimo neno ni, "Japuonj, magi aser-ito nyaka ne nywola." 21 Yesu nong'iyo wuowino mohere, eka owachone ni, "Gimoro achiel ema oremi Aa ka idhi ilok mwanduni duto pesa mondo imi joma odhier, eka iniyudi mwandu mokan e polo. Kisetimo kamano to iduogi mondo iluwa." 22 Ka ng'atno nowinjo wachno, nomieno wang'e, moa kanyo ka chunye lit, nikech ne en-gi mwandu mathoth. 23 To Yesu nong'icho koni gi koni, eka owacho ni jopuonjrene niya, "Mano kaka donjo e piny ruodh Nyasaye nobed matek ni joma nigi mwandu!" 24 Jopuonjrene ne dhogi omoko kuom wechegego. To Yesu nomedo wuoyo kodgi kawacho ni, "Nyithindo, mano kaka en gima tek mondo ng'ato odonji e Pinyruodh Nyasaye! 25 Yot mondo ngamia okadhi e wang' sandan moloyo ka jamwandu odonjo e Pinyruodh Nyasaye." 26 Jopuonjrene dhogi nomedo moko, mi giwacho kendgi ni "Ere ng'ano ma nyalo kwo? 27 To Yesu nong'iyogi tir kaeto owacho ni, "Ka kuom dhano to ok nyalre, to ok kuom Nyasaye, nikech gik moko duto nyalore kuom Nyasaye." 28 Petro nowachone ni, "Wan waseyo gik moko duto mondo waluwi." 29 To Yesu nodwoke kawacho ni, "Awachonu adier ni onge ng'ama oseweyo dala, kata owete, kata nyimine, kata miyo, kata wuoro, kata nyithindo, kata puothe, nikech An kendo nikech Injili, 30 ma nobare mak oyudo nyadi mia: mier, owete, nyimine, mine, nyithindo, kod puothe, kaachiel gi sand bende, e piny masani kata e piny mabiro ngima manya-ka chieng'. 31 To ji mang'eny makoro otelo nodong' chien, to joma koro odong' chien notel."

Yesu Okoro Kendo Thone

32 Koro ne gin e yo gidhi Jerusalem, ka Yesu otelo nyimgi kendo jopuonjrene noyudo ohum nono, to joma neluwogi ne luoro omako. Yesu nochako okawo jopuonjrene otero tenge monyisogi gima nedhi timorene. 33 Nowachonigi ni, "Sani wadhi nyaka Jerusalem, kendo Wuod Dhano ibiro ndhogi michiw e lwet jodolo madongo gi jopuonj chik. Gibiro ng'adone buch tho mi gichiwe ni Joma ok jo Yahudi, 34 ma biro chare, mi ng'udh olawo kuome kendo chwade mi nyaka gi nege. To bang' ndalo adek obiro chier.

Kwayo Mar Jakobo Gi Yohana

35 Bang'e Jakobo gi Johana, mane gin yawuot Zebedi, nobiro ire mowachone ni, "Japuonj, wadwaro mondo itimnwa gimoro amora mwakwayi." 36 Yesu nopenjogi ni udwaro ni atimnu ang'o? 37 Ne gidwoke ni, "Yie mondo kiduogo e duong'ni maler to iket achiel kuomwa obed e bathi korachwich to machielo e bathi kor acham." 38 Yesu nowachonigi ni, "Ukiya gima ukwayo. Be unyalo metho e kikombe ma amethoe kata yudo batiso machal gi miti-sago?" 39 Ne gidwoke ni, "Wanyalo." Yesu nowachonigi ni, "En adier ni ubiro metho e kikombe ma amethoe mi tisu gi batiso mitisago, 40 to korka wach mar bedo e batha korachwich kata koracham to an ok ema achiw. Kuondego oiki ni jogo mane ochan nigi chon." 41 Kane jopuonjre apar mamoko owinjo mano to ne gisin gi Jakobo gi Johana. 42 To Yesu noluongogi duto kaachiel mi o wachonigi ni, "Ung'eyo ni jo mikwano kaka jotelo e kind ogendini nigi teko kuom joma gitelonegi, kendo jotend gi madongo tiyo joma nie buogi kod teko miwuoro. 43 Unto ok un kamano. Kar timo mano, to ng'at madwaro mondo obed maduong' e kindu nyaka dok jatichu. 44 kendo ng'ama dwaro notel nyaka dok misumba ji duto. 45 Nikech kata mana Wuod Dhano ne ok obiro mondo ji otine, to nobiro mondo oti ni ji kendo mondo ochiw ngimane kaka misango niji mang'eny."

Bartiman Ma Muofu Oneno

46 Bang'e ne gibiro Jericho, to ka noyudo Yesu gi jopuonjrene kaachiel gi oganda maduong' aa e dalano, muofu moro miluongo ni Bartimau, tiende ni wuod Timau nobet e bath yo kokwecho. 47 Ka nowinjo ni, en Yesu ja Nazareth nochako kok ni, "Yesu Wuod Daudi, yie ikecha!" 48 Thoth ji mane nikanyo nokwere kanyise mondo oling'. to en koreka nomedo kok matek moloyo ni, "Wuod Daudi, techa!" 49 Yesu nochung' mowacho ni, "Luongeuru obi ira ka." Omiyo ne giluongo muofuno ka giko-neni "Bed gichir! Aa malo! Oluongi." 50 Ng'atno nodiro suka mane obakorego kucha, mi ochikore ochung' gi tiende modhi ir Yesu. 51 Yesu nopenjo ng'atno ni, "Idwaro ni atimni ang'o?" To muofuno nodwoke ni, "Japuonj, adwaro ni mondo anen." 52 Eka Yesu nowachone ni, "Dhi"Yieni osechangi." Gikanyono ng'atno wang'e noyawore mochako neno, kendo moluwao bang' Yesu kowuotho eyo.

Mariko 11

Donjo E Dala Gi Loch

1 Kane koro gichomo Jerusalem, ne gichopo e miech Bethfage kod Bethania but Got Zeituni. Yesu nooro jopuonjrene ariyo 2 kowachonigi ni, "Dhiuru e dala man e nyimu cha, to ka udonjo e iye to ubiro nwang'o nyathi kanyna mapok ng'ato oidho nyaka nene kotwe kanyo. Gonyeuru mondo ukelnago ka. 3 Kapo ng'ato openjou ni, Ang'o momiyo utimo timni?' to udwoke ni, 'Ruoth dware, kendo obiro duoge bang' seche manok!' 4 Ne gidhi mi giyudo kanyna oko e yo matin kotweye e rangach. To ka noyudo gigonye, 5 jomoko mane ochung' kanyo nopenjogi ni, "utimo ang'ono, ugonyo nyathi kanynano nang'o?" 6 To ne gid-wokogi kaka Yesu nonyisogi mondo gid-wokgi mi jogo noweyogi gidhi. 7 Kane gikelo ni Yesu nyathi kanynano ne gidiro lepgi e ng'eye mi Yesu nobetie. 8 Ji mang'eny mamoko bende nopedho lepgi e yo, to jomoko nopedho oboke mag yiende mane ging'ado e puothe. 9 Jogo mane oteloni Yesu gi jopuonjrene, gi mago mane ni chien, ne goyo koko ni, "Hosanna!" "Ogwedh ng'at mabiro e nying Ruoth" 10 "Ogwedh pinyruoth mabiro mar Daudi Kwarwa." Hosanna en ma malo ahinya! 11 Yesu nodonjo Jerusalem mi odhi nyaka ei hekalu. Nowuotho e iye monono gik moko duto motimore, to nikech saa ne koro olewo, nowuok gi jopuonjrene apar gariyo mi odhi Bethania.

Yesu Oriembo Ji Ei Hekalu

12 Kinyne kane oyudo gia Bethania, kech ne kayo Yesu. 13 Kane pod en gichien, noneno yadh ng'owo moro ma pote odhukno mi odhi machiegni kode mondo oyudie olemo kuome ocham. Ka nochopo but yadhno ne ok oyudo gimoro kuome mak pote kende, nikech ne ok en kinde ma ng'owo chiekie. 14 Eka Yesu nowacho ni yadhno ni, "Ng'ato kik chak cham olemo mowuok kuomi kendo." Jopuonjrene no winje kowacho kamano 15 Kane gichopo Jerusalem, Yesu nodonjo ei Hekalu mi ochako riembo jomane ng'iewo kendo uso gik moko kanyo. Noloko mesni mag jowil pesa ataro kod kombe mag joma ne uso akuche, 16 kendo ne ok oyiene ng'ato mondo oting' misigo mar ohala moro amora kakalogo e dier agola mar Hekalu. 17 Yesu nochako puonjogi kowachonigi ni, "Donge ondiki ni: "Oda noluongi ni od lamo mar ogendini duto?"To un useloke 'kar chokruok mar jomecho'" 18 Jodolo madongo gi jopuonj Chik nowinjo wachni mochako chano yo mar nege, nimar ne giluore nikech oganda duto nowuoro puonjne. 19 Ka piny koro noyuso, ne gia dala maduong' gidhi oko e gweng.

Yiend Ng'owo Motwo

20 Kinyne gokinyi kanoyudo giwuotho ne gineno yiend ng'owo mane Yesu okuong'o cha kosetwo, chakre tiendene. 21 Petro noparo mowachoni Yesu ni, "Neye, Japuonj! Yiend ng'ow manyo ikuong'o osetwo!" 22 To Yesu nodwoko kowacho ni, "Beduru gi yie kuom Nyasaye. 23 "Awachonu adier ni ka ng'ato owacho ni godni ni, Aa ka idhi ichumbri e nam,' maok obedo gi kiawa e chunye kata matin, to oyie ni gima owachono biro timore, to gima odwarono notimre. 24 Kuom mano anyisou ni gimoro amora mukwayo kulamo, beduru gi yie ni useyude mi nobed maru adier. 25 To bende ka ichung' ilemo, to in-gi wach moro e kindi gi ng'ato, to nyaka iwene richone, eka mondo Wuonu manie polo bende oyie weyoni richoni."

Openj Teko Ma Yesu Nigo

27 Ne gichako gichopo Jerusalem kendo, to ka noyudo Yesu wuotho e agol-ni mag Hekalu, jodolo madongo gi jopuonj Chik, kaachiel gi jodongo nobiro ire. 28 Ne gipenje ni, "Teko mane mitimogo gik mitimogi, to ng'a momiyi teko mar timogi?" 29 Yesu nodwokogi ni, "Abiro penjou penjo achiel mondo udwoka mokwongo eka anyisu kuma agole teko matimogo gik matimogi. 30 Uparo ni batiso Johana noa kanye; e polo koso kuom ji? Nyisa ane uru! 31 Negitwak kuom wachni e kindgi giwegi kaeto giwacho ni, "Ka wawacho ni, 'Noa e polo', to obiro ng'eng'owa ni, 'Ka kamano to ang'o momiyo nutamoru yie kuome?' 32 To ka wawacho ni 'Noa kuom dhano' ..." (Ne giluoro oganda, nikech ji duto nokawo Johana kaka Janabi adiera.) 33 Kuom mano ne gidwoko Yesu ni, 'Wakia." Yesu nowachonigi ni, "An bende ok anyisu kuma agole teko ma atimogo gik matimogi."

Mariko 12

Ngech Jorit Puodho

1 Bang' mano Yesu nochako wuoyo kodgi gi ngeche mopogore opogore: "Ng'at moro nop-uro puoth mzabibu. Nochiele gi okuta, mi okunyo bugo molwore mibiyoe olemo mochiek, kendo ogero ohinga moting'ore gi malo kama jarito betie. Bang'e ng'atni nochiwo puotheno ni jopur moko kaeto odhi e wuoth moro mabor. 2 Kane saa keyo ochopo, ng'atno nooro jatichne moro ir jorit puodho mondo oomne olembe moko mane ochiek e puothe. 3 To jorit puodho nomake, mogoye, moriembe gi lwete nono. 4 Bang'e achien wuon puodho nooro jatichne machielo irgi, to en bende ne gindayo wiye mi gidwanye. 5 Ng'atno nonano, mochako ooro ng'at machielo, to en ne ginege. Nomedo oro joote mamoko, ma moko kuomgi ne gigoyo to moko ginego. 6 "Ne pod odong' gi ng'at achiel mane koro onyalo oro: wuode owuon mane ohero gilala. Ne oore achien mogik koparo ni, "Wuoda awuon to gibiro miyo luor." 7 "To jorit puodho nowacho e kindgi giwegi ni, 'Ma e ng'at ma mwandu duto biro dong'ne, biuru mondo wanege mondo girkeni odong'nwa. 8 Omiyo ne gi make mi gi nege eka bang'e to gi-dire oko mar puoth mzabibu. 9 "Uparo ni ka wuon puodho noduogi to notim ang'o? Obiro biro moneg jorit puodhogo mi ogol puodho oko e lwetgi mi enomi jomamoko. 10 Donge use somo Ndiko mawacho ni, "Kidi mane jogedo odagi osedoko kidi machungo ot." nRuoth osetimo ma, kendo en gima iwuoro ka waneno'" 12 Koro jodolo madongo gi jopuonj Chik nochako manyo yo mane gi nyalo makego nikech ne gi ng'eyo ni ogetogi kod ngeroni. To ne giluoro oganda, omiyo ne gi weye mi ging'wel gia kanyo.

Chulo Osuru Ni Kaisari

13 Bang'ejogo nooro jo Farisai gijo Herode ir Yesu mondo odwar wach mawuok e dhoge mondo gimakego. 14 Ne gibiro ire mi giwachone ni, "Japuonj wang'eyo ni in ng'at ma ngimane ler kendo majaadiera. Ji ok nyal ywayi maloki nikech ok iluoro wang' ng'ato, to ipuonjo mana yor Nyasaye kaluwore gi adierane. Koro nyiswa ane ka en gima ber mondo wagol osuru ni Kaisari. 15 Wagol koso kik wagol?" To kaka Yesu nong'eyo wuondruok-gi, nopenjogi ni, "Utema nang'o? Kelanauru ane dinari ka mondo anone maber." 16 Ne gikelone pesa mamingli, kaeto openjogi ni, "Goro man e ng'e pesani mar ng'a? To ndikogi to?" Ne gidwoke ni, "Gin mag Kaisari." 17 Eka Yesu nowachonigi ni, "Miuru Kaisari gige, to gig Nyasaye miuru Nyasaye". Jogo ne dhogi omoko.

Wach Kuom Kendruok Bang' Chier

18 Bang'e jo-Farisai ma ok oyie ni chier nitie nobiro ire gi penjo. 19 Ne gikone ni, "Japuonj, Musa nondikonwa ni ka ng'ato owadgi otho moweyo dhako mapod onge gi nyithindo, to ng'atno nyaka kend chi owadgi modong' chi lielno mondo ony-wolnego nyithindo. 20 Koro ne nitie owete moko abiriyo, Wuowi mokwongo nok-endo mochwe otho ka oonge nyithindo. 21 Wuowi mar ariyo nokendo chi owadgi mane owadgi oweyono, to en bende notho kapok onywolo nyathi. Notimore kamano ni wuowi mar adek bende 22 chutho, e gikone, yawuowi abiroyogo duto notho maok onywol gi chigino. Bang'e achien dhakono bende ne otho. 23 Koro nyiswae ni chieng' chier dhakoni nobed chi ng'a kuom chwo abiriyo mane okende dutogi? 24 Yesu nodwokogi ni, "Urwenyo nikech ukiya Ndiko kata teko Nyasaye? 25 Ka joma otho chier to ok ginikendi kata kendgi, to ginichal gi malaike mag polo. 26 To kuom chier mar joma otho, donge usesomo e bug Musa kama ondikie wach bungu maliel, kaka Nyasaye nowachone ni, 'An Nyasach Ibrahim, Nyasach Isaka kendo Nyasach Jakobo?'27 Ok en Nyasach joma otho, to en Nyasach joma ngima. Urwenyo mabor!"

Chik Maduong' Moloyo

28 Achiel kuom jopuonj Chik nobiro moyudo ka gimino wach. Kowinjo ka Yesu odwokogi kare, nopenje ni, "Kuom Chike duto mag Nyasaye, en mane maduong' moloyo moko duto?" 29 Yesu nodwoke kawacho ni, "Chik achiel maduong' moloyo en ma: Winjuru, yaye jo Israel, Ruoth Nyasaye ma Nyasachwa en Ruoth achiel. 30 Heruru Ruoth Nyasachu gi chunyu duto kendo gi pachu duto, kendo gi riek-ou duto, kendo gi tekou duto. 31 Chik maduong' mar ariyo en ni: 'Her wadu kaka iherori iwuon'. Onge chik maduong' moloyo magi." 32 Ng'atno nodwoke ni, "Iwacho kare, Japuonj. In kare kiwacho ni Nyasaye en achiel maonge more machielo makmana En. 33 Ka ng'ato ohero Nyasaye gi chunye duto gi winjone duto gi tekone duto, kendo kohero wadgi kaka oherore owuon to mano duong' moloyo chiwo miwang'o gi misengini mitimo duto. 34 Ka Yesu noneno ni ng'atno odwoke gi rieko, nowacho ni, "Ok in mabor gi Pinyruodh Nyasaye" Chakre kanyo onge ng'ama nohedhore penje penjo moro amora.

Kristo En Wuod Ng'a

35 Ka Yesu ne pod puonjo ei Hekalu, nopenjo ni, "Ere kaka Jopuonj Chik nyalo puonjo ni Kristo en wuod Daudi? 36 Ka Daudi owuon owuoyo e bwo teko mar Roho Maler kolero ni, "'Ruoth nowacho ni Ruodha ni, "Bedi e batha lorachwich nyaka aket wasiki duto e bwo pat tiendi"' 37 Ka Daudi owuon luonge ni 'Ruoth', ere kaka dochak obed wuode kendo?" Oganda maduong' ma newinje nopong' gi mor. 38 Yesu nomedo puonjogi kowacho ni, "Nonuru maber kuom jopuonj Chik. Gihero wuotho koni gi koni ka girwako lewni maboyo mayware piny, kendo kimosogi e chirni. 39 E sunagoke giyiero kombe moyiedhi, to kuonde molosie budho michieme gilaro kuonde mag jo dongo. 40 Gikidho ute mond liete kendo gilamo lamo moyware mond ginyisrego niji kaka gilony e lamo. Jok makamagi ibiro kum malit mokalo."

Chiwo Mar Chi Liel

41 Yesu nobedo piny kama omanyore gi kama ne ji boloe sadakagi mi nonono kaka ji ne keto pesagi e kar keno mar Hekalu. Jomwandu mang'eny ne diro pesa mojuol ojuol. 42 To chi liel moro modhier bende nobiro moketo pesa mamingli moko ariyo matindo tindo, pesa matinie mogik ma koriw eka dirom senti achiel. 43 Yesu nogwelo jopuonjerene ire mokonegi ni, "Awachonu adier ni chi liel modhierni osegolo pesa mang'eny e keno moloyo ji mamoko duto. 44 Gin gisegolo mana matin nono kuom mwandu mathoth ma gin-go, to en, kuom dhierne, ogolo mwandune duto. Ogolo gimoro amora ma nonyalo konyorego."

Mariko 13

Ranyisi Mag Ndalo Giko

1 Ka noyudo oa e Hekalu, achiel kuom jopuonjrene nokone ni, "Neye, Japuonj! Kitegi dongo manadi! Magi gedo malich manadi! 2 Yesu nodwoko ni, "Ineno ute madongo malichgi? Onge kidi kata achiel mabiro dong' ewi wadgi; gibiro redhore piny tee". 3 Ka Yesu nobedo piny e Got Zeituni, momanyore gi Hekalu, Petro gi Jakobo, gi Johana kod Andrea nopenje ling'ling' ni, 4 "Yie inyiswae ni gigi biro timore karang'o, koso en ranyisi mane manotim-re ma nonyis ni gigi duto chiegni chopo?" 5 Yesu nowachonigi ni, "Tang'uru maok uyiene ng'ato mondo owuondu. 6 Ji mang'eny nobi e nyinga ka hedhore ni, 'An e en', kendo giniwuond ji mathoth. 7 Ka uwinjo ka lwenje timore kendo ka humbe lwenje timore to kik kibaji gou. Gik makamago nyaka timre, to giko piny to pod ni nyime. 8 Ogendini noked gi ogendini wetegi, kendo pinyruoth gi pinyruoth machielo. Piny noyiengni kuonde mopogore opogore kendo kech nobedie. Magi e chakruok mar rem mar muoch ma nobedie. 9 "Nyaka uritru un uwegi, nikech nochiwu e lwet buche mag gweng' kendo norodhu gi del e ute lemo. Unuchung' kiyalou e nyim jotelo gi ruodhi nikech An, kendo nubednigi kaka joneno kuoma. 10 To Injili nyaka kuong landi e pinje duto. nE saa saya momakue moteru e bura, kik uparru motelo kuom gima ubiro wacho. Wachuru awacha gima omiu mondo uwachi e saa nogono, nikech Roho Maler ema nobed ka wuoyo kuomu, to ok un uwegi. 12 "Owete nondhogre kendgi mi gi negre, kendo koda ka wuoro notim kamano ni nyathine. Nyithindo nong'any mi jonywolgi chan yore ma dineg gigo. 13 Ji duto nochau nikech An, to ng'at mochung' motegno nyaka giko ema nokwo. 14 "To ka uneno 'gima kuero mar kethruok' kochung' kama ok onego obe-die, jasomo mondo owinj tiend wachni to kik joma odak Judea ring dhi ewi gode. 15 Ng'at manie tat ode bende kik lor piny kata donji ei ot mondo ogol gik moko oago. 16 Kata ng'at manie puodho kik dog dala mondo oom sukane. 17 Mano kaka nodok malit ni mon mayach kod mago madhodho nyithindo e ndalogo! 18 Lamuru mondo gino kik timre e ndalo koyo, 19 nikech ndalogo nobed kinde mag chandruok maok nyal pim gi moro nyaka aa chakruok, chieng' mane Nyasaye ochweyoe piny, nyaka sani; kendo onge chandruok moro mibiro pimo kode kendo. 20 Kapo ni Ruoth ne ok ong'ado ndalogo machiek, onge ng'ama dine otony; to nikech joma oyie, joge owuon ma osewalo, oseng'ado ndalogo odoko machiek. 21 "E kindeno ka ng'ato onyisou ni, 'Ne, Kristo e! Kata ni, 'Ne, En kucha!' to kik uyie kode. 22 Nikech joma wuondore ni gin Kristo kendo ni gin jonabi nothinyre mi tim ranyisi kod honni mondo giwitgo joma oyier, kapo mano ditimre. 23 Emomiyo ritreuru un uwegi; asenyisou gik moko duto motelo kapok kindego ochopo. 24 "To e ndalono, bang' masirano wuon wuon, "Wang' chieng' noimre, kendo dwe ok norieny; 25 Sulwe nolwar, koa e polo, kendo chwech mag polo noyiengni! 26 "E sechego ji none Wuod Dhano kabiro e boche polo gi teko mang'ongo kendo gi duong'.27 Kendo noor malaikege mi ochoki joge moyiero moa e tunge piny nyaka chop giko polo. 28 "To puonjreuru wachni kuom yieng ng'owo. Mapiyo ka bedene Chako loth kendo itgi chako wuok to ung'eyo ni Chwiri osechakore. kendo ite chako wuok to ung'eyo ni wan e ndalo chwiri 29 Kata kamano, ka uneno ka gigi timore to ng'euru ni ndalono chiegni, kendo mana kagima en e dhoot. 30 Awachonu adier ni tieng'ni ok norum ngang' kapok gigi duto otimore. 31 Polo gi piny nokadhi to wechena to ok nokadhi kata matin.

Odiechieng' Kod Saa Ok Ong'ere

32 "Onge ng'ama ong'eyo odiechieng'no kata sano, kata mana malaike mag polo, kata Wuowi, maka-mana Wuoro kende. 33 Ritreuru kendo nenuru, nikech ukiya saa manotimre. 34 Nobed mana machal gi ng'at mowuok dalane odhi e wuoth moro mabor, moweyo jotichne e tich mar rito gige, kosemiyo moro ka moro kuomgi gima onego otim, kendo koseketoj arito mondo orit dhoot. 35 Omiyo ritreuru nikech ok ung'eyo saa ma wuon ot nyalo biroe: kata nobi odhiambo kata chuny otieno, kata okinyi kcgwen, kata ka piny yawore. 36 Kaponi obiro apoya nono to kik oyudi kinindo. 37 Gima awachonu ema awacho niji duto ni, 'Nenuru!'"

Mariko 14

Owir Yesu Gi Mo Bethania

1 Kodong' ndalo ariyo mondo Sap Pasaka michamoe Makati maonge thowi ochopi jodolo madongo gi jopuonj chik ne manyo yo maling'ling' mane ginyalo makogo Yesu mondo ginege. 2 To ne giwinjore kendgi ni, "Kik watim kamano ka sawo pod dhi nyime, nono to ji ogomonwa." 3 Ka noyudo Yesu ni Bethania, kochiemo ewi mesa e dala ng'at moro miluongi ni Simon Ja Dhoho, dhako moro nobiro gi chupa moting'o mo madung' tik mamit ma nengone tek. Notoyo ngu't chupano mi oolo morno duto e wi Yesu. 4 Moko kuom joma ne nikanyo nyiego nomako mi gikuotho e kindgi giwegi ni, "Morni okethi kayiem kama nang'o! 5 Donge ne inyalo use pesa mang'eny moloyo misach ng'ato kuom higa achiel mi pesago pogi ni joma odhier?" Ne gik-wero mamano gi dwol ma kwiny. 6 To Yesu nodwokogi ni, "Weuru nyano mos. Uthage nang'o? Otimo gima jaber miwuoro ni An. 7 Joma odhier ubiro bedogo kinde duto, kendo unyalo konyo-gi saa asaya muhero. An to ok ubi bedo koda ndalo duto. 8 Otimo monyalo. Oseolo mo mang'we ng'arno e ringra chon mondo aikra ni ikna. 9 Awachonu adier ni kamoro amora ma noyalie Injili e kind ogendini duto mag piny, gima nyani otimo nohul, kiparego." 10 Eka Juda Ja Iskariot, mane en achiel kuom jopuonjrene apar gariyo, noa e kindgi modhi ir jodolo madongo mondo ondhog Yesu oket e lwetgi. 11 Ne gimor gi wachno, mi gisingore ni gibiro miyogo pesa. Omiyo nochako manyo kinde maber mar keto Yesu e lwetgi.

Pasaka Mar Ruoth

12 Chieng' mokwongo mar Sap Makati maonge thowi, chieng' mane ochuno jo Yahudi mondo oyang' nyarombo mar Pasaka, jopuonjre Yesu nopenje ni, "Idwani wadhi waikni kanye mondo ichamie Fasaka?" 13 Kuom mano Yesu nooro jopuonjrene ariyo kowachonigi ni, "Dhiuru ei dala maduong' mondo urom gi ng'ato moting'o dapi. Luwuru ng'atno nyaka ot modhiye. 14 Nyisuru wuon ot modonjeno ni, 'Japuonj penjo kama: ere oda mar welo mondo achamie Pasaka gi jopuonjrena?' 15 Obiro nyisou ot malach molos malo, kama osechanie kombe kendo oseiki; maber, kanyo ema uiknwa." 16 Jopuonjrego noa modhi Dala maduong' moyudo gik moko mana kaka Yesu nosewachonigi. Omiyo ne giiko Pasaka. 17 Ka piny ne koro ochido, Yesu nochopo, kaen kod jopuonjrene apar gariyo. 18 To ka noyudo koro gilworo mesa gichiemo, nowachonigi ni, "Awachonu adier ni achiel kuomu biro ndhoga, en ng'at machiemo koda." 19 Chuny jopuonjrene nodoko malit, mi achiel ka achiel gichako wacho ni, "Dobed an koso?" 20 To Yesu nodwokogi ni, "En achiel kuomu ji apar gariyo, jal ma chiemo koda e dis achiel. 21 Wuod Dhano biro dhi mana adier kaka nondiki kuome. To ng'at mandhogo Wuod Dhano none malit! Dine obedo maber moloyo ka ne ok ony-wole." 22 Ka noyudo gichiemo, Yesu nokawo makati, kendo bang' goyo erokamano, nong'inge momiyo jopuonjrene kowacho ni, "Kaweuru, ma e ringra." 23 Bang'e nokawo kikombe, mi ogoyo erokamano ni ochiwonigi eka ne gi madho kikombeno gi duto 24 "Ma en remba mar Muma, mool oko ni ji mang'eny. 25 Anyisou adier ni ok nachak amadh olemb mzabibu kendo nyaka chop odiechieng'no ma anamadhee kendo manyien e Piny Nyasaye." 26 Kane gisewero wend pak, ne gia gidhi e Got Zeituni.

Yesu Ohulo Ni Petro Biro Kwede

27 Yesu nonyiso jopuonjrene ni, "Un duto ubiro ringo uweya, nikech ondiki ni, "Abiro goyo jokwath mi rombe noke' 28 To bang' ka asechier to anatelnu adhi Galili." 29 To Petro nonyiso Yesu ni, "An ok abi weyi kata ka ji duto oringo oweyi." 30 Yesu nodwoko Petro ni, "Awachoni adier otieno makawuononi, kapok thuon gweno okok diriyo in iwuon wang' nikweda didek." 31 To Petro nosingore koramo ni, "Kata kochuno ni nyaka atho kodi, to ok abi kwedi kata matin." Jopuonjre mamoko bende nowuoyo machalre gi Petro.

Yesu Olemo Gethsemane

32 Ne gidhi kama iluongo ni Gethsemane. Yesu nowacho ni Jopuonjrene ni, "Beduru kae seche ma alamo." 33 Nokawo Petro gi Jakobo kod Johana modhigo, eka chunye nochako chandore kopong' gi paro mang'eny. 34 Nokone jopuonjrene ni, "Chunya opong' gi midhiero gi lit nyaka kar tho. Beduru ka kendo nenuru." 35 Nochwalore nyime matin aye to ogoyo chonge piny mi olamo ni kanyalore to saa mar masirano okadhe. 36 Nolemo kowacho ni, "Aba, Wuora gik moko duto nyaloreni. Gol okombeni kuoma. To kik itim dwarona, to tim mana dwaroni." 37 Bang'e nodok ir jopuonjrene mon-wang'o ka ginindo. Nowachone Petro ni, "Inindo? Neno otami kata kuom saa achiel kende? 38 Nen kendo ilam mondo kik idonji e tem. Chuny to oikore makmana ringruok ema nyap." 39 Nochako odok kendo molemo machalre. 40 To kane oduogo ir jopuon-jrene, noyudo ka gi nindo, nikech wengegi ne pek. Ne ok ging'eyo gima diginyise. 41 Ka noduogo irgi kendo mar adek, nowachonigi ni, "Pod unindo aninda kendo uyueyo? Oromo! Sa osechopo. Neyeuru kaka indhogo Wuod Dhano kendo kaka ikete e lwet joricho. 42 Auru malo! Wadhi, Jandhokna ero biro!"

Omak Yesu

43 Kane pod owuoyo, Judas, mane en achiel kuom jopuonjrene apar gariyo nothinyore gi oganda mane omanore gi gilweny kaka ligangla gi arunge. Ne oorgi kod Jodolo madongo jopuonj chik kod jodong lemo. 44 Noyudo jandhok osechano signol mane gibiro makego: "Ng'at ma anyodho e En, makeuru mondo udhi kode kurite maok onyal ringo otony." 45 Judas nochomo Yesu tir sanosano, mowachone ni, "Japuonj," aye to oyodhe. 46 Jogo nond-hiyo Yesu kamake apoya. 47 To achiel kuom joma nochung' machiegni nogolo liganglane mong'adogo it jatich Jadolo maduong' mochodo oko. 48 Yesu nowacho ni joma nobiro makego ni, "Uwuokna oko mondo umaka ka uting'o ligengni gi arunge mana ka gima an jachand piny nang'o? 49 Asebedo kodu kinde duto, ka apuonjo e Hekalu, to ne ok umaka. To koro ndiko nyaka chop kare." 50 Eka ji duto noweye moringo odhi. 51 Wuowi moro matin mane ni duk, mana suka ema nobolo kuome, noyudo luwo bang' Yesu. Kane gi liwe mi gi ndhiye, nopusore nigi. 52 moringo otony ka en duk, moweyo koda ka sukane kanyo.

Oter Yesu E Nyim Sanhedrin

53 Ne gikawo Yesu gitero ir jadolo maduong' mi jodolo madongo duto gi jodongo kaachiel gi jopuonj Chik nochokore kaachiel. 54 Petro noluwo bang'e gichien, modonjo kode nyaka e laru mar jadolo maduong'. Kanyo nobetie piny kaachiel gi jorito, kooyo mach e duol. 55 Jodolo madongo gi jobuch Sanhedrin duto ne manyo ketho mane ginyalo donjonego Yesu mondo gingadne buch tho, to ne ok giyudo ketho moro amora kuome. 56 Ji mang'eny bende ne jimbone wach ka giketo ketho mag miriambo e wiye, to wechegi nee kwedore akweda. 57 Bang'e jomoko nochung' modonjone gi miriambo kawacho ni, 58 "Ne wawinjo jali kawacho ni, Abiro muko Hekalu ma dhano ogeroni eka bang' ndalo adek to asegero machielo ma ok oloso gidhano. 59 To kata mana gin bende nendgi ne kwedore. 60 Eka jadolo maduong' nochung' malo e nyimgi mopenjo Yesu ni, "Be ibiro dwoko? Ma neno manade ma jogi don-jonigoni?" 61 To Yesu noling' aling'a ok odwoke. Jadolo maduong' nochako openje ni, "In e Kristo Wuod Nyasaye mangima koso?" 62 Yesu nodwoke ni, "Ee, An. To unune Wuod Dhano kobet e bat korachwich mar Jal Maratego kendo kolor oa e boche polo." 63 Jadolo maduong' noyiecho lepe kopenjo ni, "Pod wadwaro neno mamoko nang'o? 64 Un uwegi usewinjo koyanyo Nyasaye. Uparo nade?" Giduto ne gikwede kaka ng'at mowinjore onegi. 65 Eka jomoko nochako ng'ulo olawo kuome. Ne giumo wang'e mi gigoye ngum, ka giwacho ni, "Hui ane ng'ama ogoyi."Askeche to nong'wane ka girodhe.

Petro Okwedo Yesu

66 Ka noyudo Petro ni mwalo e laru, achiel kuom nyiri matiyo ni jadolo maduong' nobiro machiegni. 67 Ka noneno Petro ka oyo mach, nodhi machiegni kode morange matut, kaeto owachone ni, "In bende ne in gi ja Nazareth miluongo ni Yesuni." 68 To Petro nokwere kawacho ni, 'Akiya kendo kata winjo ok awinj tiend gima Iwuoyeno." Bang'e noa kanyo odhi e dhorangach. 69 Ka nyano, majatich noneno kuno, nochako owacho ni joma ochung' kanyo ni, "Ng'atni en achiel kuomgi." 70 To Petro nochako okwer kendo. Bang' kinde matin joma nochung' machiegni nowacho ni Petro ni, "Ka kuom adiera to in achiel kuomgi, nikech in ja Galili." 71 To en nochako kuong'ore mowachonigi kor amo ni, "Akiya ng'at muwuoyo kuomeni." 72 Gikanyono thuon gweno nokok kendo mar ariyo. Eka Petro noparo wach ma Yesu nosewachone ni, "Nikweda ndalo adek ka thuon gweno pok okok nyadiriyo." Wachno nodokone malit mi nochako ywak.

Mariko 15

Oter Yesu E Nyim Pilato

1 Kinyne kar kogwen, jodolo madongo gi jodongo kod jopuonj Chik, kaachiel gi jo buch Sanhedrin ne joriwo paro kuom gima nowinjore gitim. Ne gitweyo Yesu mi gi tere nyaka ne gichiwe e lwet Pilato. 2 Pilato nopenjo Yesu ni, "In e ruodh jo Yahudi?" To Yesu nodwoke ni, "Ee, en kaka iwa-chono." 3 Jodolo madongo nodonjone gi weche mathoth. 4 Omiyo Pilato nochako openje ni, "Dwokawa, donge ineno kaka gidon-joni gi ketho mang'eny." 5 To Yesu noling' aling'a kendo maok odwoke, mi Pilato nohum nono. 6 Ne en chik ni mondo ogony jatwech achiel e kinde mag Pasaka kaluwore gi kwayo mar jopiny. 7 To e ndalono ja kira-gi moro manyinge Baraba, ne nie jela, kaachiel gi jojiemo mamoko manotwe kuom wach nek kod pingo sirkal. 8 Ogandano nobiro mokwayo Pilato mondo otim nigi kaka noj atimo higa ka higa. 9 To Pilato nopenjogi ni, "Udwaro ni agonynu Ruodh jo Yahudi. 10 Nopenjogi kamano kong'eyo ni nyiego ema nomiyo jodolo madongo oketo Yesu e lwete. nTo jodolo madongo nojiwo oganda mondo oyie gi dwarogi ni Pilato ogony mana Baraba. 12 Pilato nopenjogi ni, "To koro atim ang'o gi Jal muluongo ni Ruodh jo Yahudini?" 13 Ne gikok matek ni, "Gure!" 14 Pilato nopenjogi ni, "Nang'o, en ketho mane mosetimo madimi gure?" To ne gimedo kok matek moloyo ka giwacho ni, "Gure!" 15 Nikech Pilato ne dwaro mondo omor oganda, nogonyo nigi Baraba. Yesu to nogolo chik mondo ochwade bang'e ochi-we nigi mondo gi gure.

Askeche Ocharo Yesu

16 Askeche nokawo Yesu motero e laru mar od ruoth, kama ne ji romee, mi negiluongo oganda mar askeche duto irgi. 17 Ne gibolo kuom Yesu kandhu makwar, kaeto gisidhone osimbo mar kudho e wiye. 18 Eka negichako chare ni "Ber Ruodh Jo-Yahudi. 19 Kinde ka kinde ne gigoyo wiye gi luth, kendo ka gi ng'u-lo kuome olawo, bende ne gikulore e nyime ka gigoyo chong gi piny kendo gi lame. 20 To kane gisechare ne gigolo oko nanga makwar mane girwakone mi gir-wake gi lepe owuon. Bang'e ne gitere oko mondo gigure.

Ogur Yesu E Msalaba

21 Ng'at moro maja Kurene miluongo ni Simon, mane wuon Aleksanda gi Rufus, noyudo kadho kanyo koa e gweng' moro. Ne gichune mondo oting' msalaba. 22 Koro ne gitero Yesu kama iluongo ni Golgotha (tiende ni, Hanga Wich). 23 Kanyo ne gimiye divai moru gi yath makweyo rem miluongo ni manemane mondo omadhi, to nodagi. 24 Eka ne gigure. Lepe to ne giyiecho mi gipogore ng'ato gi ng'ato, ka gigoyo ombulu mondo ging'e gima ng'ato ka ng'ato onego okaw. 25 Ne gigure saa adek okinyi. 26 Milome mane ondiki mi ogur e msalaba ma nyiso kethone. Nondike ni: "RUODH JO YAHUDI'. 27 Jokuoge ariyo moko bende ne giguro kode, achiel e bade korachwich to machielo e bade koracham. 28 Mano nochopo ndiko ma nondiki chon ni, "Nokwane e oganda joma richo." 29 Joma kadho kanyo nochare ka giyanye kendo ka gikino wigi. Ne giwachone ni, "Aha! In manyocha inyalo ketho Hekalu mi igere kendo gi ndalo adekni, 30 koro resri ane, lor piny ia ewi msalaba!" 31 Jodolo madongo gi jopuonj chik e kindgi giwegi bende nochare mana machalre. Ne giwacho ni, "Nokonyo jomoko to en koro ok onyal konyore owuon! 32 Jawar ma Ruodh Israelni loro olor ane oa e wi msalaba mondo wane, eka wayie kuome." Jok mane ogur kode bende nodhuole gi ayany

Yesu Otho

33 Kar saa auchiel, mudho noimo piny duto nyaka saa ochiko. 34 Ka saa ochiko noromo Yesu noywak gi dwol maduong' kowacho ni, "Eloi, Eloi, lama sabak-thani?", ma tiende ni, "Nyasacha, Nyasacha, iweya nang'o?" 35 Ka moko kuomgi manochungo machiegni nowinjo ma negi wacho ni, 'Winjuru, oluongo Elija." 36 Nga'to achiel noringo mopong'o siponj gi kong awayo, mondo omadhi. Kowacho ni,"Koro weyeuru mos wane ka Elija biro mondo okawe odhi kode." 37 Yesu noywak matek bang'e chunye nochot. 38 Pasia mar Hekalu notierore nyadiriyo aa malo nyaka piny. 39 To jatend askeche mane oyudo ochung' e nyime kane owinjo kaka oyuak bang'e oneno kaka otho, nowacho ni, "En adier chuth ni jali ne En Wuod Nyasaye!" 40 Ne nitie mon moko mane ng'icho gichien. Moko kuomgi ne gin Maria Magdala gi Maria min Jakobo matin, mabende min Jose, kod Salome. 41 Mon-gi ema neluwo Yesu kendo nepidhe kane En Galili. Mon mamoko mathoth ma noluwe koa kode Jerusalem bende ne nikanyo.

Oiki Yesu

42 Ne en Chieng' Ikruok (ma en odiechieng' motelo ni Sabato), omiyo ka nochopo seche mag odhiambo, 43 Josef ja Arimathaya, mane en ng'at mogen e Buch Jodongo, kendo ma en owuon norito neno Loch Nyasaye, nodhi ir Pilato gi chir mokwaye ringre Yesu. 44 Pilato nowuoro ka nowinjo ni Yesu osetho, omiyo noluong jatend askeche mopenje kapo Yesu nosetho adier. 45 To kane owinjo nowinjo kuom jatend lweny ni ne en kamano, nochiw ringre Yesu ni Josef. 46 Eka Josef nong'iewo nanga marep rep manengone tek, mi noloro ringre Yesu oboye ginanga mareprep eka okete ei bur mane okuny ei lwanda. Bang'e nong'ielo kidi mi oumogo dho liel. 47 Maria Magdala kod Maria min Jose noneno kama nopiele Yesu.

Mariko 16

Yesu Ochier

1 Bang' ka Sabato oserumo, Maria Magdala gi Maria min Jakobo kod Salome nokelo modhi mang'ue ng'ar mondo giwirgo ringre Yesu. 2 Okinyi mang'ich, odiechieng' mokwongo mar Juma ka chieng' osewuok, ne gichako wuoth mar dhi kar liel, 3 kendo ne gi penjore ng'ato gi ng'ato ni, "Ng'ano mawang' nong'ielnwa kidi oko e dho liel?" 4 To kane giting'o wang'gi, ne gineno ka kidi mang'ongono noseng'iel oko. 5 Kane gidonjo ei bur, ne gineno wuowi moro matim morwako kandhu marachar kobet e bath bur korachwich, kendo ne gibuok ahinya. 6 Wuowino nokwerogi ni, "Weuru buok. Umanyo Yesu ja Nazareth, mane ogur. Osechier! Oonge ka, neuru kamane gipiele. 7 To auru ka udhi unyis jopuonjrene, kaachiel gi Petro, ni, 'Otelo nyimu odhi Galili. Kuno ema ubiro nenee mana kaka nosenyisou motelo." 8 Mon-go nowuok moringo oa e liel kanyo ka gi tetni kendo dhogi omoko, ne ok giwacho ne ng'ato gimoro amora e yo nikech ne giluor. 9 Kane Yesu ochier kogwen, chieng' mokwongo mar juma, nofwenyore mokwongo ni Maria Magdala, mane ogolo jochiende abiriyo kuome. 10 Maria nodhi monyiso jogo mane ni kode, jogo mane ywak kendo jogo mane dengo. nKane giwinjo ni Yesu ngima, kendo ni Mariam nosenene ne ok giyie. 12 Bang'e Yesu nofwenyore niji ariyo kuomgi kinde machielo, kagiwuotho e gweng'. 13 Jogi noduogo monyiso wachni ni jomamoko; to ne ok giyie kodgi kata kamano. 14 Achien Yesu nofwenyore ni joote apar gachiel ka noyudo gi chiemo. Koseyogi nikech yie mane giongego, kendo nikech tamruok margi maok negi yie jogo mane osenene bang' kane osechier. 15 Nowachonigi ni, "Dhiuru e piny duto mondo uyal Injili ne chwech duto." 16 Ng'ato ang'ata moyie kendo obatisi nokwo, to ng'at maok oyie nong'adne bura. 17 To ranyisigi nolu joma oyie: E nyiga giniriemb jochiende; gini wuo gi dhok manyien; 18 ginimak thuonde gi lwetgi, kendo gini modhi kwiri mager, to ok ginihinyre ngang'; giniket lwetgi kuom jomatuo, to jotuo nobed mangima." 19 Bang' ka Ruoth Yesu nosewuoy-onigi nokawe motere malo e polo, mobedo e bat korachwich mar Nyasaye. 20 Eka jopuonjre nowuok odhi oko kendo oyalo kuonde duto, to Ruoth notiyo kodgi kendo nosiro wachne gi honni mane oluwore kod yalo.