Jude
Juda1 An Juda ma jatich Yesu Kristo, kendo ma owadgi Jakobo, Ne joma oseluongi, ma Nyasaye Wuoro ohero, kendo ma Yesu Kristo orito. 2 Mad kech gi kuwe kod hera mogundho obed kodu. Richo Gi Kum Mar Joma Kia Nyasaye 3 Osiepena mageno, kata obedo ni ne aikora ahinya mondo andiknu kuom wach warruok ma wan duto wan-go, naneno ni ber koro andiknu mondo ajiwu uked matek kuom wach yie mane ochiwne jomaler dichiel kendo mogik mondo oriti. 4 Nikech jomoko mane osendik kuomgi chon ni bura oloyo osedonjo e dieru ling'ling'. Gin joma kia Nyasaye, ma loko ng'wono mar Nyasachwa doko negi thuolo mar timo richo, kendo madagi Yesu Kristo, ma en kende e Ruodhwa mamalo chutho. 5 Kata obedo ni useng'eyo wechegi duto to pod nyaka aparnu ni Ruoth nore-so joge mogologi Misiri, to bang'e achien nokumo joma ne ok oyie. 6 Kata mana malaike mane ok obedo kuondegi mag loch mane omigi, mago mane owuok oweyo keregi mane oketgie, gin bende osekanogi e mudho mandiwa, kotwegi gi nyoroche maok chodi nyaka chieng,' ka girito kum e odiechieng' maduong'. 7 Kamano bende Sodom gi Gomora, kaachiel gi mier moluorogi nej ochiwore ne chode gi anjawo. Gin gibedo kaka ranyisi mar joma ikumo kiwang'o e mach manyaka chieng'. 8 Kamano bende e kaka jolekogi bende duwo ringregi giwegi kendo kwedo loch kendo wuoyo marach kuom chwech man giduong' e polo. 9 To kata mana Mikael malaika maduong' kane gilaro gi Jachien ringre Musa, ne ok ohedhore wuoyo kuome marach ka hangone wach, to nowacho mana ni, "Ruoth mondo okw-eri!" 10 Jogi to wuoyo marach gi ayany kuom gimoro amora kata mana gik ma gikia tiendgi, kendo gik ma giketore ni ging'eyo, ka le maonge rieko, magi e gik matiekogi. 11 Ginine malit! Giseluwo tim Kain, kendo gisemwomore e ketho mar Balaam nikech gidwaro mich, omiyo osetiekgi kaachiel gi Kora nikech giseng'anyo kaka Kora nong'anyo. 12 Jogi gin mbelni e nyasi mau mag hera, ma gichiemo kodu ka wengegi tek, gin jokwath mapidhore kendgi! Gichalo rumbi ma yamo tero to ok kel koth kendo gichalo olemo mopidhi kinde opon bende gichalo gi yien maok nyag olemo e ndalo molemo rumoe kendo mopudh gi tiendegi, gionge tich nyandiriyo. 13 Gin apaka mager mar nam, madhuolo buoch fupgi kendo gichalo sulwe mabayo mosekan negi kum mar mudho mandiwa mosiko. 14 Enoka, mane odak e tieng' mar abiriyo bang' Adam, nokoro wach kuom jogi ni, "Neuru Ruoth biro gi joge maler tara gi gana kuom tara gi gana 15 mondo oyal ji duto kendo mondo okum joma richo duto kuom timbegi maricho ma gisetimo e yo maok mi Nyasaye duong' kendo kuom weche maricho duto ma joricho mochayo Nyasaye oseyanyego. 16 Jogi gin jong'ur kendo gin jomany ketho kuom ji; giluwo dwachgi giwegi maricho, bende giwuoyo gi sunga mathoth kuomgi giwegi. Kendo giwuondo ji gi weche mamit mondo giyud gik magidwaro. Rit Ne Luong 17 To un osiepena mageno, paruru gik mane joote mag Ruodhwa Yesu Kristo okoro chon. 18 Ne giwachonu ni, "E ndalo giko jo jar ji nobedie ma nolu gombogi giwegi maricho." 19 Magi e joma kelo pogruok e kindu, kendo gombogi mag ringruok ema chikogi, gionge Roho. 20 To un, osiepena mageno, gerreuru e yie maru maler, kendo lemuru ka un ei Roho Maler. 21 Sikuru e hera Nyasaye ka urito kech mar Ruodhwa Yesu Kristo mondo okelu e ngima mochwere. 22 Kechuru joma riwogi kiawa, 23 yud-huru jomoko kuomgi ugol e mach mondo ures ngimagi,to moko kuomgi to kechuru kutang' kendo kuluor, ka usin koda ka gi lepgi ma ringregi motop osemieno. Pak 24 Ne En manyalo ritou mondo kik upodhi e richo, kendo manyalo kelou e nyim duong'ne ka uonge ketho kendo ka un gimor maduong' 25 mad duong' makende, gi loch gi teko, kod nyalo odogne Nyasaye Jawarwa kuom Yesu Kristo Ruodhwa, e tienge duto, sani kendo nyaka chieng! Amin.
|