Ephesians

Jo-Efeso

Jo-Efeso 1

1 An Paulo jaote mar Kristo Yesu kuom dwaro mar Nyasaye, andikonu un joma ler man Efeso jogo ma luwo Yesu gi chuny achiel: 2 Ng'wono gi kuwe moa kuom Nyasaye Wuonwa kod Ruodhwa Yesu Kristo obed kodu.

Gweth Mag Chuny Man Kuom Kristo

3 Pak obed ni Nyasaye ma wuon Ruodhwa Yesu Kristo, moseguedhowa kod gueth duto mag chuny koa e polo kuom Kristo 4 Kane pok ochue piny, noyierowa kuom Kristo mondo wabed maler maonge mbala e nyime. 5 Nikech herane nowalowa chon mondo wabed yawuote kuom Yesu Kristo kaluwore gi chenrone kod dwarone 6 notimo kamano mondo ng'wonone man gi duong' mane ochiwo nono oyud pak, ma osemiyowa nono kuom Jalno mohero. 7 Kuome nikech rembe ema waseyudoe warruok kod werruok mar richo, kaluwore gi ng'wono mar Nyasaye mogundho, 8 mane oolonwa mogundho kaluwore gi riekone kod ng'eyone. 9 Ose elonwa maling'ling' mar dwarone, mana kaka nochano chon ni notimrenwa kuom Kristo, 10 ka kindeno nochopi nochano mondo oket gik moko duto manie polo gi piny e bwo loch achiel, maen Kristo. 11 Kuome bende ema noyiero wae mondo wabed jocham girkeni; kaluwore gi chenrone motimogo gik moko duto moluwore gi dwarone, 12 mondo mi wan mane wakuongo geno kuom Kristo, wadag ngima mamiyo ipako duong'ne maler. 13 To un bende nokwanu kaka Jo-Kristo kane uwinjo wach mar adier ma en Injili mar warruok. Kane useyie kuome noketonu kido mar Roho Maler mane osingi, 14 ma en singo manyiso ni wanayud girkeni nyaka chopi kinde mar warruok mar Jo-Nyasaye, kuom pak mar duong'ne.

Duoko Erokamano Kod Lamo

15 Mano emomiyo, nyaka ne awinj wach yie ma un-go kuom Ruoth Yesu kendo kuom hera ma uherogo jomaler duto, 16 pok aweyo duoko erokamano nikech un, ka aparou e lemona. 17 Asiko kakwayo mondo Nyasach Ruodhwa Yesu Kristo, Wuon duong' duto omiu Roho mamiyou rieko kendo mafweny-onu tiend gik mopondo mondo ung'eye maber. 18 Bende alamonu mondo chunyu maiye oyawre mondo ung'e tiend geno ma oseluongoue, ma gin girkeni mogundho mokano ni jomaler, 19 kod tekone maduong' mokalo apima mosemiyowa wan joma oyie. Tekoneno nyiso tich mar tekre maduong', 20 ma nonyiso kuom Kristo kane ochiere oa kuom joma otho, mi omiyo obedo e bade korachwich e polo, 21 kuma oyombo loch duto, gi teko gi telo gi nyalo kod duong' kod nyinge duto minyalo chiw, ok e ndaloni kende to kata e ndalo mabiro. 22 To Nyasaye noketo gik moko duto e bwo tiende, kendo nowale odok Wich moriwo gik moko duto ne kanisa, 23 ma en ringre, Jal ma opong'o kendo romo gik moko duto.

Jo-Efeso 2

Bedo Mangima Ei Kristo

1 To un ne utho e timbeu maok kare kod richo, 2 mane udakie ka uluwo timbe piny, kendo ruodh pinyni man-gi loch e kor polo, ma bende tekone tiyo e chuny joma ok winj wach. 3 Chutho chon waduto ne wachal kodgi, ka e ngimawa ne watimo gik ma ngima mar dhano dwaro, kendo waluwo gombo kod paro mag ringruok. Wan bende, e kitwa, mana kaka ji mamoko , ne wan e bwo mirima. 4 To kuom hera maduong' mane Nyasaye oherowago kod kechne mogundho, 5 nomiyo wabedo mangima kuom Kristo, kata obedo ni ne watho nikech kethowa, osewaru kuom ng'wono. 6 Kendo Nyasaye nochierowa gi Kristo, momiyo wabet kode e duong' mar polo ei Kristo Yesu, 7 mondo eka onyisgo tienge duto mabiro mwandu mar ng'wonone mokalo apima, ma wabiro yudo kuom kech mosekechowago kuom Kristo Yesu. 8 Nikech kuom ng'wono useyudo warruok kuom yie, to ok nikech tim maber moro amora musetimo. En mich ma Nyasaye chiwo nono, 9 ok kuom tich ng'ato maber, mondo mi ng'ato kik sungre. 10 Mano timore nikech wan chuech Nyasaye, ma nochueyo kuom Kristo Yesu mondo otim timbe mabeyo, ma Nyasaye owuon ema nosechano chon mondo watim.

Achiel E Kristo

11 Kuom mano paruru ni chon ne un Ogendini kuom nyuol kendo ne iluongou ni "joma ok oter nyangu" gi jogo malu-ongore ni "oter nyangu" (mano motim e ringruok gi lwet ji) 12 paruru bende ni kindeno ne upogoru gi Kristo, kendo ne uonge e kanyakla mar jo-Israel, bende ne un welo kuom singruok mar winjruok, ne uonge geno kata Nyasaye e pinyni. 13 To koro kuom Kristo Yesu, un ma chon ne un mabor, koro osekelu machiegni kuom remb Kristo. 14 Nikech owuon e kuwe marwa, moseriwowa mwabedo gimoro achiel, komuko oinga mar sigu mane opogowa, kendo 15 kochiwo ringre owuon, osetieko chike duto, gi wechege duto. Notimo kamano mondo ochwe dhano achiel manyien, kar ariyogo, eka okel kuwe, 16 kendo kuom ringruok achielni ema oseriwe ogendini ariyogi gi Nyasaye kuom msalaba, mi oketho sigu mane nie kind ogendinigi. 17 Nobiro moyalo kuwe ne un mane un mabor, kendo oyalo kuwe ni jogo mane ni machiegini. 18 Nikech kuome waduto koro wan-gi yo mwacho-pogo ir Wuoro, kuom Roho achiel. 19 Emomiyo koro ok un welo kata jodak, to un oganda achiel gi joma ler duto, kendo jood Nyasaye, 20 moger e mise achiel mar joote gi jonabi; ka Kristo Yesu owuon e rariw. 21 Kuome ema gedo duto oriwore kaachiel kendo dongo mibed hekalu maler man kuom Ruoth. 22 Kendo kuome ema un bende igeroue kaachiel mondo udok kar dak mar Nyasaye kuom Rohone.

Jo-Efeso 3

Paulo Jayalo Mar Ogendini

1 Mano emomiyo an Paulo asedoko misumba Kristo Yesu nikech un Ogendini. 2 Adier chutho usewinjo kaka Nyasaye nomiya tijni mar ng'owono nikech un, 3 tiende ni, chenro mopondono nolerna tiende kaka obet, mana kaka asendikonu gi weche manok. 4 Kusomo barupano to ubiro medo ng'eyo kaka winjona chai korka weche mopondo mag Kristo, 5 e kinde machon Nyasaye ne ok oelo tiend wachni ne ji, to koro oseele kuom Roho, kokonyore gi jootene maler kod jonabi. 6 Wach mopondoni en ni kaluwore gi wach md)er, Ogendini bende koro osebedo jocham girkeni kaachiel gi Israel, kagin kaachiel kaka ringruok achiel, kendo giriwore kodwa e singruokni kuom Kristo Yesu. 7 Ne abedo misumba mar wach maber ni kuom mich mar ng'wono mane Nyasaye omiya kaluwore gi tekone matiyo kuoma. 8 Kata obedo ni an e ng'ama tinie moloyo jo- Nyasaye duto to ng'wononi nomiya mondo ayal ne Ogendini mwandu maok rum mar Kristo; 9 kendo mondo anyis ji duto ong'e maler tichna kuom wach mopondoni, mosebedo kopandi kuom Nyasaye mane ochueyo gik moko duto e higini mokalo. 10 Dwaro mare ne en ni koro onyis kit rieko mar Nyasaye ni joloch gi weg teko manie polo, kokonyore gi Kanisa, 11 motimo ma kuom Kristo Yesu Ruodhwa, kaluwore gi dwarone mane osechano chakre chon ni notim. 12 En ema ka wanie iye kendo ka wayie kuome to wanyalo dhiyo e nyim Nyasaye ka wan thuolo chutho kendo ka wan gi chir. 13 Emomiyo akwayou ni kik chunyu nyosre nikech sand ma ayudo nikech un, ng'euru ni sandruokga, e duong' maru.

Lamo Ni Jo-Efeso

14 Nikech ma, ago chonga piny e nyim Wuoro, 15 nikech kuome ema dhoudi mag joma oyie duto manie polo gi piny yudoe nyingegi madier. 16 Alamo Nyasaye mondo kuom duong'ne mosiko omiu teko e ngimau maiye kuom teko mar Roho mare, 17 mondo eka Kristo osiki e chunyu kuom yie. Alamo bende ni ka usiko kuome kendo udongo e herane, 18 mondo eka ubed gi teko un kaachiel gi joma ler duto kuyango malong'o hera mar Kristo, ma lachne, gi borne, aa piny nyaka malo kod tutne okalo apima, 19 chutho mondo ung'e hera modhiero ng'eyo gi rieko duto, eka upong' gi kit Nyasaye duto. 20 Mad Jal maka wakwayo gimoro amora to chiwo mathoth moloyo kaka wakwaye kata kaka waparo, kuom tekone matiyo kuomwa, 21 oyud duong' e kanisa kendo kuom Kristo Yesu e tienge duto manyaka chieng'. Amin.

Jo-Efeso 4

Bedo E Achiel Kuom Kristo

1 Emomiyo akwayou, an ng'at motue nikech tich Ruoth, mondo udag dak mowinjore gi luong ma Nyasaye noluon-goue. 2 Kinde duto beduru joma muol chutho, modimbore, kendo ma hore mos ka ukawo ting' joweteu kuom hera. 3 Temuru duto munyalo mondo urit achiel mar Roho kusiko e kuwe mori-wowa kaachiel. 4 Nitie ringruok achiel kod Roho achiel, mana kaka ne oluongu e geno achiel kane oluongu 5 bende wan-gi Ruoth achiel, yie achiel, gi batiso achiel; 6 Nyasaye achiel kendo Wuon ji duto, En moloyo duto kendo en ema otiyo kuom duto. 7 Ng'ato ka ng'ato kuomwa Kristo osemiyo ng'wono kaluwore gi dwarone. 8 Mano emomiyo owacho ni, "Kane oidho malo to ne omako jotwech motweyo mi nomiyo ji mich." 9 To ere tiend wachni, "Nine oidho?" Donge onyiso ni nolor bende mwalo e bwo piny? 10 Omiyo Jalno mane olor bende ema noidho malo kuma bor moy-ombo polo duto, mondo eka opong' piny duto gi duong'ne. 11 En bende ema nochiwo mich ni ji koyiero jomoko mondo obedi joote, to jomoko jonabi, to moko joland Injili, to jomoko jokwath gi jopuonj. 12 mondo gitieg jo-Nyasaye duto mondo obed molony kuom tiyo tich Kristo, eka ringre Kristo ogerre, 13 nyaka chop wan duto wabed achiel e yie mawan-go kuom Wuod Nyasaye kendo wamed ng'eye chuth. Kamano otimore eka wanabed joma otegno chutho, kendo wana chop e rang'iny mogik kuom Kristo. 14 Koro ok wanachak wabed kaka nyithindo mapmyom, ma bagni koni gi koni nikech yamb puonj mayoreyore, ma dhano molal siekogo mondo giwuond-wago kendo gipudhwago oko wawe yie madiera 15 To wana siki ka wawacho adiera e hera kendo kawa dongo e yore duto kuom en ma en Jatelo, tiende ni Kristo. 16 Kuome ema ringruok duto ochomore, leche omakore gi fuon ka fuon, kendo ka fuon moro ka moro tiyo tichne kaka dwarore. Kuom mano ringruok dongo kendo gerore kuom hera.

Dak Kaka Nyithind Ler

17 Kuom mano awachonu kendo ka aramo kuom Ruoth, neuru ni ok uwuotho kaka jopiny mokiya Nyasaye wuotho ka pachgi modinore wuondogi. 18 Gin mudho odino pachgi, momiyo gipogore gi ngima mar Nyasaye nikech kia margi mawuok e chunygi matek. 19 Kaka pachgi mar pogo ber gi rach oselal, koro gichiwore ni anjawo kod timo gik moko duto mochido magisiko gi-gombo timo mang'eny 20 Un to, ne ok ung'eyo Kristo e yo machal kamano. 21 Adier, nuwinjo kuome, kendo nopuonju wachne, kaluwore gadiera man kuom Yesu. 22 Nopuonju mondo uwe kit ngimau machon kendo ulony dhano machon maketo kethruok nikech gombone maricho mag wuond 23 eka mondo chunyu maiye mar parou oloki obed manyien 24 kendo mondo uru-akru gi dhano manyien, mochue mondo ochal gi Nyasaye kuom ngima makare mar adier kendo maler. 25 Emomiyo ng'ato ka ng'ato kuomu nyaka we miriambo duto kendo wach adiera ni nyawadgi, nikech wan duto wan fuond ringruok achiel. 26 "Kaponi mirima oloyi to kik itim richo." Kik iwe chieng' podhi ka pod in-gi mirima 27 kendo kik imi jachien thuolo mar loyi. 28 Ng'ato ma yandi kwelo nyaka koro we kuo chuth to nyaka oti tich gi lwetene owuon mondo okonyrego kendo okony bende joma moko mochando. 29 Kik uyie weche maricho wuogi e dhou, to mana weche manyalo, konyo kuom gero ji kaluwore gi dwaro gi mondo wecheu okony joma winjo. 30 Bende kik umi Roho Maler mar Nyasaye chuny lit nikech en ema Nyasaye osemiyougo kaka kido ni noresu chieng' resruok. 31 Weuru chuth kecho, gi mirima, gi ich wang', gi gwandruok, gi ayany kod himruok duto. 32 Beduru mang'won kendo gi kech ni joweteu, ka ng'ato ka ng'ato weyo ni nyawadgi kethone, mana kaka un bende

Jo-Efeso 5

Nyasaye noweyonu kuom Kristo.

1 Kaka un nyithind Nyasaye mohero temuru mondo ubed machal kode, 2 kendo udag e ngima mar hera kaka Kristo ne oherowa mi ochiworenwa kaka chiwo kendo misango madung' tik mamit ni Nyasaye. 3 To e dieru kik winjre ni nitie terruok kata kit dwanyruok moro amora, kata wuoro, nikech gik ma kamago ok owinjore jomaler maluwo Nyasaye otim. 4 Bende, tim moro amora makuodo wich, kata wach mochido, kata angera mag oyuma ok owinjore kodu, makmana duoko ni Nyasaye erokamano. 5 Ng'euru malong'o ni onge ng'at maja chode, kata ma ngimane odwanyore, kata maja wuoro (Ng'at ma kamano lamo nyiseche manono) manoyud gueth mar loch Kristo gi Nyasaye. 6 Kik uyie ng'ato wuondu gi weche manono, nikech gik ma kamago ema miyo Nyasaye olo mirimbe kuom joma ok winj wachne. 7 Omiyo kik ubed e achiel gi joma kamago. 8 Nikech chon ne un jomudho to sani koro un joler kuom Ruoth. Daguru kaka nyithind ler, 9 (nikech gima olemo mar ler nyago oting'o gik mabeyo duto, gi gik makare kod gik ma adier.) 10 kendo temuru mondo unge' gima miyo Ruoth mor. 11 Kwedreuru chuth gi timbe mag mudho, maonge ohala kendo hulgiuru e lela. 12 Nikech en wichkuot kata mana mar nyiso gik majoma richo timo ling' ling'. 13 To ka gik moko duto ohul e lela to gi yangore maler 14 nikech ler ema miyo ineno gik moko duto. Mano emomiyo iwacho ni: "Chiew in manindo, chung' ia kuom joma otho, to Kristo norieny kuomi". 15 Omiyo tang'uru ahinya kaka udak, kik udagi ka joma ofuwo, to daguru ka joma riek, 16 tiuru gi thuolo ma un-go maber, nikech timbe maricho opong'o piny 17 Kuom mano weuru bedo mofuwo, to ng'euru gima Ruoth dwaro. 18 Weuru mer gi kong'o nikech mano kelo anjawo. Kar timo kamano to upong' gi Roho. 19 Wuouru ng'ato ka ng'ato kod weche mag zaburi kuwero wende kitabu kod wende chuny. Weruru kendo den-duru Ruoth e chunyu 20 ka uduoko erokamano kinde duto ni Nyasaye Wuoro kuom gik moko duto e nying Ruodhwa Yesu Kristo. 21 Beduru gi winjruok ng'ato gi ng'ato, mondo umi Kristo duong'.

Mon Kod Chwo

22 Un mon winjuru chwou mana kaka de uluoro Ruoth. 23 Nikech dichwo ewi dhako mana kaka Kristo en wi Kanisa, ma en ringre to en ema en Jawarne. 24 Mon bende onego owinj chwogi e weche duto, mana kaka Kanisa bende winjo Kristo. 25 Un chwo, heruru mondu, mana kaka Kristo bende nohero Kanisa, mochiwore nikech en 26 mondo opwodhe maler, kolu-oke gi pi kuom wach 27 kendo eka ochiw Kanisa ne en owuon ka opichni maler kendo maonge chilo moro, kata jowruok, kata mbala moro amora kuome. 28 Kamano bende, chwo onego oher mondgi mana kaka gihero dendgi giwegi. Nga't mohero chiege oherore owuon. 29 To bende onge ng'ama ochayo dende owuon. Ng'ato ka ng'ato pidho dende kendo rite maber, mana kaka Kristo bende timo ne Kanisa 30 nikech wan fuonde mag ringre. 31 "Emomiyo dichwo nowe wuon gi min, to nopadre gi chiege, kendo kargi ji ariyogo nobed ringruok achiel." 32 Wachni oting'o puonj maduong' mopondo to kata kamano awuoyo kuom Kristo gi Kanisa. 33 Kata kamano en ni ng'ato ka ng'ato kuomu nyaka her chiege mana kaka oherore owuon kendo dhako nyaka luor chwore.

Jo-Efeso 6

Nyithindo Kod Jonyuol

1 Nyithindo, winjuru jonyuolu kuom Ruoth nikech timo kamano en gima kare. 2 Chik mokuongo man gi singmok wacho ni "Mi wuoru gi minu luor 3 eka mondo ngimani odhi maber, kendo idag aming'a e piny." 4 Wuone kik umi nyithindu bedo gi mirima; to ritgiuru maber, kurieyogi kendo upuonjogi kuom Ruoth

Wasumbini Kod Ruodhi

5 Wasumbini, winjuru ruodhiu mondikou e pinyka kumiyogi duong' gi luor, kendo kutiyo gi chuny mathuolo, mana ka gima uwinjo Kristo. 6 Kik uwinj-gi mana mondo umor wang'gi seche ma girangou, to mana ka wasumb Kristo timuru dwaro Nyasaye koa e chunyu. 7 Tiuru gi chunyu duto, mana kagima utiyo ni Ruoth, to ok ni dhano, 8 nikech ung'eyo ni Ruoth biro chulo ng'ato ka ng'ato kuom gimoro amora maber ma ng'ato timo, bed ni en misumba kata ng'ama ni thuolo. 9 Un Ruodhi timneuru wasumbniu machalre. Kik ubuog-gi, nikech ung'eyo ni Ruoth motelonegi, kaachiel kodu nie polo, kendo ok odew wang' ng'ato.

Gii Lweny Mag Nyasaye

10 Mogik, beduru motegno kuom Ruoth, kendo kuom tekone maduong'. nManreuru gi gii lweny duto mag Nyasaye, mondo eka uchung' motegno kutang' ne wuond mar Jachien. 12 Nikech lweny mwakedo ok en mar ringruok gi remo, to wakedo gijotelo, kod ruodhi mag piny motimo mudhoni, kaachiel gi lang chuny maricho modak e kor polo. 13 Omiyo manreuru mogik gi gii lweny mag Nyasaye, mondo ka kinde mag richo ochopo to uyud teko mar chung' kar tiendu kendo kusetimo madwarore duto to mondo uchung'. 14 Emomiyo nyonuru piny motegno, kutweyo nungou gi kamba mar adiera, kendo kurwako tim makare ka gii lweny mag akor, 15 rwakreuru gi ikruok mar lando Injili makelo kuwe kaka wuoche e tiendu. 16 Ewi mago duto ting'uru yie maru ka okumba mugeng'ogo aserni makakni ka mach moa kuom ng'at marach. 17 Kawuru ogudu motegno mar warruok kod ligangla mar Roho ma en wach Nyasaye. 18 To lamuru kuom Roho kinde duto gi kit lamo duto, kendo ka ukwayo. Beduru gima e paro, beduru mokichore kusiko ukwayo kinde duto ni joma ler duto. 19 An bende lamnauru mondo saa moro amora ma ayawo dhoga to omiya weche mondo ayal gichir wach mopondo mar Injili, 20 momiyo an jambetre motue. Lamuru mondo awuo kuome gi chir kaka owinjore atim.

Mos Mogik

21 Tukiko, ma en owadwa mwageno kendo matiyo ni Ruoth gi adiera duto biro nyisou weche duto, kaka achal to gi gima atimo. 22 Gima omiyo aore iru en mana ni mondo onyisu chalwa, kendo mondo ojiw chunyu. 23 Mad Nyasaye Wuoro kod Ruodhwa Yesu Kristo omi jowete duto man kuom Kristo kuwe, gi hera kod yie. 24 Ng'wono obed kod jogo duto mohero Ruoth Yesu Kristo gi hera maok rum.





AMAZING GRACE BIBLE INSTITUTE